ZUALTEI THLAHRANG (by : Aaron Malsawmdawngzuala)

Hlauhawm lampang hrim hrim hmun hrang hrang a mi lakkhawm...
Aaron Dustin
Posts: 104
Joined: March 14th, 2018, 10:15 am

ZUALTEI THLAHRANG (by : Aaron Malsawmdawngzuala)

Unread post by Aaron Dustin » February 21st, 2020, 11:29 pm

ZUALTEI THLA A HRANG!
Story by : Aaron Malsawmdawngzuala

Malsawmzuali, Zualtei tia an koh thin, nula fel leh hmeltha tak hi Pu Zara leh Pi Khumi te fanu neihchhun niin kum 23 mi a ni a. An chhungkua hi pathum chauh niin khawsak harsa ve tak an ni a, Pu Zara hi Biak In chowkidar a ni a, Pi Khumi hi an venga middle school pakhatah cook angin a thawk ve bawk. An pawisa hlawh tlemte hmang chuan an nung ve tawk tawk hi a ni ber a, an fanu Zualtei hian college a kal ve mek bawk. Zualtei hian a nu leh pate hi a hmangaih em em a, a theih ang tawkin a ti hlim thin a, reithei hle mahse an chhungkaw inhmangaihna thuk tak avang hian chhungkaw awhawm ve tak chu an ni. Zualtei hi nula hmeltha leh pian dik zaih mai, ft 5'4 vela sang a ni a. A sam sei dum hnap leh a vun ngo nung sar mai te, a mitmeng nalh tak leh a awmbawr a tawk chiah a lian te chuan a pian a ti lang nalh zual em em a, han en mai chuan mi rethei tak chhungkua atanga lo seilian ani tih chu awih a harsa hle ani. Kohhranah leh khawtlang ah a inhmang em em a, mi fak pawh a hlawh a, ngaizawng tu pawh an tam narawh e. Chutia nula hmeltha, fel leh pian nalh ta na na na chu bialpa pawh a nei ve a, a hming chu Robert-a a ni. Roberta erawh hi chu Officer fapa niin mi khawsa thei tak leh nei nung tak an ni a, a hmel pawh a chhe lemlo, nula hmeltha tam tak hnawl a chowkidar fanu Zualtei kher a thlang pawh hi mi mak tih leh titi ti tam tu ber a ni. Selna anka te chu sirah hnawlin Zualtei leh Robert-a te chu an hlim dun em em tho a, Roberta phei chuan nupuia neih ngei a tum nghet tlat a ni.

Mahse an buaina ber chu Robert-a nu leh pate hian Zualtei chu an iai tlat mai, vawitam tak Robert-a pawh hi an in atangin, titauvin a chhuak ta fo mai a, Zualtei pawhin hrehawm a tiin a inthlahrun phah hle thin. Mi tam tak chuan Roberta te chhungkua ina Zualtei an duhlo hi a awm ngawih ngawih an ti a, a chhan pawh an dinhmun inthlauh em vang a ni. Mahse tlangval luhlul ve tak Robert-a chuan Zualtei chu then a tumlo nasa mai si a, a nu leh pate pawh an mangang thin hle. Vawi engemaw zat chu Roberta pawh hian a chhungte bulah Zualtei a neilo a nih chuan intihhlum mai pawh a duh thu hrilhin a vau ta fo mai a, an pafa-a han insual bur bur chang te pawh a awm lo thei ta lo. Roberta pa hi pa luhlul tak mai a ni a, sawrkar hna thawkin officer a ni kan tih tawh kha, mahse pa zawhawm tak erawh a ni lemlo. Pa nelawmloh leh inla milian tak mai a ni a, a eiru thin tih pawh an venga mi te chuan an hre deuh vek ang. Diklo taka sum lalut thin a nih avang pawh a niang nge, veng mipui te eiloh rawn leh ngei rawn a ni. Robert-a nu lah chuti tho, nu chapo tak leh an thiam em em mai hi a ni a, Zualtei pawh hi vawi engemaw zat a fapa then turin a vau fo a, an inah te luhchilhin tawngkam chhe chi tinreng in a va ankhum thin a ni.

(Zualtei a thi)

Krismas a hnai a, veng mipui te pawh an phur a, nula leh tlangval inngaizawng te pawh hmuh tur an tamin thlalai te pawh an hlim tlang hle mai. Urlawk zan a ni a, Zualtei leh Robert-a te pawh lengchhuak dunin veng chei hrang hrang te an fang dun a, tudang an ngai biklo. Zan dar 11 a lo rik chuan Zualtei leh Roberta chu Roberta te in lamah pheiin an inchunga Roberta room verandah-ah chuan mei chhemin an thian dangte nen hlim takin an zai a, Krismas hla te sa in an hlim tlang dar dar hle. Zualtei te chhungkua hian kum tin hian Krismas leh Kumthar alo thlen hian Pathian hnena lawmthu sawina tawngtai an nei thin a, chumi zan pawh chuan dar 12 a rik dawn chuan Zualtei chuan an inlama va haw zuai a, a nu leh pate nena tawngtaina an va hmanzawh huna lo let leh thuai a duh thu a sawi a. Roberta te in atang hian Zualtei te in hi ahla em em lo a, mahse step-a chhuk ve deuh vang vang angai a, Robert-a chuan thlah a tum chuan Zualtei chuan, "Angai hleinem, pawn lamah pawh mipui an la tam emai, min ngaihtuah suh, ka rawn let vat ang." a tih tlat avang chuan Robert-a chuan a thlah ta lemlo a, Zualtei chu alo kir leh vat beiseiin an inbul thleng chu a thlah ta tho a. Dar 12:45 vel a ni tawh a, Zualtei chu alo la let lo. Dar 1 rik hma deuh hret chuan Zualtei nu chuan Roberta a rawn phone a, Zualtei awmna rawn zawtin, alo la haw miahloh thu a rawn sawi ta tlat mai. Roberta chuan darkar khat liam ta vel daiha a lo haw tawh thu leh lo let leh vat a tum thu te chu a hrilh a, an mangang te hlawm hle mai. A rang a rangin Robert-a leh a thiante ho chuan Zualtei te in lam chu an pan ta a, reiloteah Zualtei bo thu chu veng chhung ah a khat nghal der a. YMA hruaitute chuan a tlawmngai thei apiang an ko khawm a, a hunin zirlo leh mahse Zualtei zawn hna chu a zan azanin an bei ta a. Zinglam dar 2 rik dawn velah chuan Zualtei ruang chu an huan a theihai kung hnuaiah hmuh a ni. Chutia an veng nula fel leh tlawmngai em em, Kohhran leh khawtlang tana inpe em em mai, Zualtei a thi ta mai chu mak an ti em em a, a thih chhan lah tuman an hre silo. A ruang chu police ten post mortem turin an la nghal a, an zawh hnuah vui turin zing dar 6 rik hma hretin an in lamah an phur phei ta a ni. Police te chhut dan chuan Zualtei chu dar 12 leh minute 10 bawr vela thi angin an sawi.

Zualtei boral ta mai chu a nu leh pate chuan an hrethiamlo hle a, a ruang an chhar tih thu an hriat phei kha chuan a nu Pi Khumi hi minute engemaw zat chu biak theih lohvin a khawng char char a ni. A tuar ber te zing ami chu a bialpa, amah hmangaih em em tu leh ngaihsak em em tu Roberta a ni. Zualtei post mortem result alo chhuak chu mi zawng zawng mak tih a tling a ni, Zualtei thihna chhan chu drug overdose vang a ni an ti tlat mai. Police te chuan Zualtei hi a thih hma minute 10 vel khan ruih theih chi damdawi mum 10 vel lai mai chu a ei a, chu chu a taksa in tuar lovin a OD ta mai niin an sawi. Pi Khumi te nupa chuan mak an tih mai bakah awih har an ti hle a, chutia an fanu an chhuan em em, an thu awih em em tu leh an mahni chawmtu tura an ngaih in drugs a lo ti reng tih an hriat chuan an rilru ana zual hle a,mahse Robert-a erawh chuan a awih duh lo thung. Zualtei, nula taima leh fel, mi pawi sawi ngailo leh vengchhungte pawhina an fak rawn, nula chhuanawm tak, ruihtheihthil ti ngailo anga an hriat, OD vanga a thi ta mai chu a bialpa Roberta, amah hrechiang em em tu hian a pawm thei hlawl lo a, mi kut tuara thi a nilo tih chu Zualtei taksa ah chiang hle mahse midang an inrawlh ve hi a ring tlat a ni. Zualtei ruangah hian kutthlakna engmah hmuh a nilo a, pem leh hliam a neihloh mai bakah pawngsual pawh anih loh avang hian OD vanga thi a nih hi a rinawm em em a, a taksa chhunga damdawi an hmuh chhuah hian a ti chiang zual tiin police te chuan an sawi a ni.

(A thla a hrang!)

Zualtei thih tuk atang chuan khawhar in riak pawh an thahnem hle a, mahse zan 3 riak tling ngam erawh tumah an awmlo thung. A thih hnu atang hian Zualtei thla hi hmu tu an tam em em a, khawhar in riak te phei chuan sawi tur an ngah em em a, a bialpa ber Robert-a erawh a riah ve loh vang nge ni, a bialnu thla chu a hmu ve ngailo. A thla a hran dan hi a rapthlak hlawm hle mai a, mi hrang hrangin an hmu a, a hmu tute sawi dan hrang hrang han tarlang ta ila....

(Robert-a thianpa Jacob-a thil tawn)

Zualtei hi ka thianpa nen an inngaihzawn tirh kha chuan ka duh puilo hle mai a, a chhan chu a hmel vang nilovin, khawsak lama an inthlauh em vang a ni. Mahse ka kawm hnem telh telh a, a fel ka ti em em a, Robert-a chauh nilovin kei ngei pawh hi min ngaihsakin unaupa ang tak tak hian min en a. A thih chhan pawh hi OD vang chu lo ni pawh nise, drugs a tih thin hi ka ringlo bur a ni. Zualtei te vengah hian ka awm velo a, keichu veng dang ka ni. Urlawk zana Robert-a te inchunga kan zai khan zu ka in hnem deuh avangin ka kai em em a, vawi 2 lai ka luak nghe nghe. Zualtei haw tura a kal hnu deuh lawk khan ka harh ta deuh a, mahse ka lu anat em avang chuan chhuanlam siamin mut ka chak em a, ka haw ta a. Ka bike awmna lam ka pan lai chuan Zualtei te in chhukna stepa hmeichhe pakhat thu chu ka zu hmu a, engah vak ngailo chuan kalsan mai ka tum chu ka en chiang a, Zualtei ni tlat hian ka hria a, ka zu chhuk ta a. Ka pan hnai zel a, a kawrlum phiar var(white) atang chuan Zualtei ngei a ni tih ka hre ta a. A bul hnai ka thlen chuan thil rimchhe em em hi ka hre ta a, sazu thi rim hi ka tehkhin ber. Ka hnaih tulh tulh a, a nam tulh tulh mai hian ka hria. Min hnungchhawn zawng hian a thu a, a tap ri kerh kerh a, ka ngaih a tha zan lo. A bulah chuan ka va thu a, "Zualte, tinge i tah a, i haw dawn maw ka tia?" tiin ka zawt a. Min chhanglo chuan a thu kun reng a, ka be lui zel a, a tap char char ringawt. A kutah ka va vuan a, a vawt em em a, mahse ngaih thatlohna engmah ka nei lo, khawvawh lai a ni a, mak tihna ka nei em em lo. Ka ngaih ti thalo tu ber chu Zualtei kha khalai hmun, abul vel rimchhe em em kara alo thu peih kha amak ka ti zawk, ka lu na a ti zual hialin ka hria. Zualte chuan min rawn en a, a hmai chu a dang vek a, a mit a bui luk bawk a, mahse a hmelthat dan chu ala ngai reng. Chiang tak hian min en a, tap chungin, "Tinge tiang em em a mi hmuhsit tura ka lo pian bik le? Enge ka tihsual bik?" a ti ringawt a, ka khawngaih hle mai. Keipawhin ka hriatpui a, Robet-a pa hian Zualtei hi a duhlo bur a, a nu phei chuan an inah te va luh chilhin ava ankhum riap riap mai thin kha a nia, khang thil te kha a ngaihtuah anga, haw mai lo chuan a rilru na chu helai hmunah hian a tap ta mai niin ka ngai a. Keichuan ka kai tho a, "Zualte, lungngai suh, i unaupa ka awm alawm. Zu haw vat rawh, lo let leh vat la, Robert-a'n a ngai hman lutuk ang che." ka ti a, tichuan ngawi reng chuan an in lam pan chuan a chhuk ta a. Mak ka tih deuh pakhat chu khatia step-a a chhuk kha, ka la harh chian loh vang nge ni, mihring pangngai a anglo tlat hian ka hria a, a chhuk dan kha ka ngaihtuah a, a ke kha a pen lo tlatin ka hria, muangchangin a tleng thla nimai hian ka hria. Ka haw a, ka chatthla nghal a, ka harh leh chuan ka thu hriat hmasak ber chu Zualtei a thi tih a ni. A thih hma lawk khan ka hmu si a, kan inbe ngei kha a ni a, thi-a chhar a ni tih ka hriat phei kha chuan hlauhna hlirin ka khat a ni ber mai. Khami zana step-a lo thu kha, Zualtei tak tak nge Zualtei thla zawk ni ang? Ka kut ngeiin ka khawih a, thla chu a ni thei dawn em ni? Nge ni a, khatia a lungngai tap zo kha damdawi eiin a intihlum ni ang? Zawhna hlir hi ka rilru ah a awm a, zan tam tak chu ka mut theihloh phah hial a ni.

Zualtei thih atanga ni 4 na vel a ni a, zanah ka thianpa Mama nen kan in thlang lawka middle school, a hmun zau nuam ve tak ah chuan kalin zu kan indun a, kan titi pawh a tui tan hle a. Mama chuan, "Sehhmeh ka han lei belh lawk ange, nangmahin ilo awm ngam angem?" min ti a, keichuan huai inti takin, "Han kal rawh, i peih phawt te chuan, mahse reilo la." ka ti a, a han kal ta a, chutih lai chuan dar 9 a pel tawh. Kan zu inna lai hi school office hnunglam a ni a, kan hmazawn chu mau hmun a ni. Minute khat pawh ala ral lo ang tihah chuan ka thianpa Mama chu hlauthawng tih hriat tak hian a t(r)e ta vak vak mai a, ka phu chiang kher mai. Rang takin ka tho a, stepah chuan a rawn in chhuih thla nawk nawk a, ka lam pan chuan hlauh nei tih hriat tak hian a rawn tlan a, "Jacob, Jacob.." tiin a rawn au vak vak a, minti hlauthawng takzet a ni. Ka bul a rawn thlen chuan ka hnungah biru nghalin ka kawrah a pawt a, a khur nghal char char a. Keichuan, "Mama, enge? Enge ni?" tiin ka zawt a, Mama chuan thaw hlawp hlawp chung chuan, "Zual...Zualtei..khi..khitah, stepah khian ka hmu." a ti a, a tap titih lehnghal a. Keichuan, "Tunge chu chu? Tu Zualtei?" ka ti a, Mama chuan vin lek lek leh hlauthawng tak chung si chuan, "Zualtei, Malsawmzuali...Robert-a bialnu." a ti chiah chu mak ka ti em em a, a thi tawh si a, ka ngaih atha lo hle mai a. Step lam chu ka han hawi chho a, tumah chu ka hmulo. Mama bulah chuan, "Khii..en ta che, tumah an awmloh khi..i rui i hmusual a nih kha." ka ti a. Mahse Mama chuan, "Ka hmu sual lo, ka chhoh pah khan tap ri ka hria a, step chung ber a tang khian a rawn bawkvak thla alawm...ka ti tak tak, ka nu hmingchhalin dawt ka sawi lo." a ti a. Chutia hlawuthawng taka kan awm lai chuan hmeichhe tap ri, lungngaih hmel em em a tap ri hawm hawm chu kan hre ta. Keipawh chu ka ruih a reh vek a, Mama nen chuan invuanin kan hawi kual a, a tap ring telh telh a, kan hlau dun khawp mai. Tap ri lo chhuahna chu kan han ngaithla chiang a, kan zu inna bul, mau hmun atang chuan a ni. Ngawi rengin chu mau hmun lam chu kan en a, mau te chu a che ta luih luih mai a. Zawi muangin kan hnungtawlh a, mau hmun atang chuan hmeichhe pakhat, kawr t(r)et hnuang mai, sam thur em em leh zangkul em em mai hi a rawn chhuak a nih chu. Mama hlau lutuk chu min tlanchhiat san daih tih pawh ka hria, mahse tlanchhiat ve nachang pawh ka hrelo, ka thil hmuh ka hlau lutuk chu che miahlo hian ka en reng ringawt a. Ka lam pan chuan pitar ang mai hian a lo kal phei chhut chhut a, a hmel ka hmu chu Zualtei ngei a ni. Mahse Zualtei, pian nalh leh hmeltha tak kha a ni tawh lo, a hmel a dang vek a, a sam ngil tak leh nalh tak thin kha a pawr fur a, a mitmeng fiah kak thin te kha a var hian a var pup mai a, rapawm tak a ni. Ka zawn a rawn thlen chuan ring em em hian, "A theih loh, hetiang ringawt chuan a tawp thei lo." tiin a au ta chiam chiam mai a, ka hlau lutuk chu rang takin stepah ka tlan chho a, ka haw nghal vang vang a, hun rei tak chhung chu zan ka chhuak ngam leh tawh lo.

(Khawharin riak te zinga mi Hruaia thil tawn)

Kan veng nula chhuanawm tak Zualtei a boral tih ka hriat khan mak ka tiin ka ui em em a, a thih chhan ni a an sawi ka hriat phei kha chuan ka mak tihna a zual hle bawk. Zualtei nen hian han inkawm leh infiam bawrh bawrh chu kan nei ngailo na a, kan inhmelhriat tha ve a, veng chhung mi theuh theuh, a nel pawh kan innel ve thawkhat hle bawk. Khawlaiah han hmu ila, biak hmasak ka chang ngai lo, chuti khawpa nula fel leh zaidam Zualtei chu han inkawm em em lo mah ila ka thiannu a ni chu ka ti ve ngam. A thih tuk zan atang chuan khawharin riak turin ka in pu lut ve a, riah luh hma chuan ka'n lem deuh sak bawk nen, Zualtei nu leh pate chu ka titi pui deuh luam a, dar 10:30 velah chuan mut zai kan rel ve ta a. Ka kai angreng hle mai a, ka muhil nghal a ni deuh ber mai. Zanlai ah chuan zawhte hram ri reng mai chuan min ti harh a, a bengchheng ka ti khawp mai, minti mu thei lo chu ani ber e. Kan mutna lai hi an siiting room a ni a, a kil berah ka mu a, Pi Khumi te nupa erawh bedroomah an riak a, Zualtei room a ruak bawk a ni. Zawhte hram lah chu a bengchheng tulh tulh a, ka ning ta deuh a, "Chu zawhte mai mai chuh!" tih pah chuan ka tho a, midang riak ve ho erawh an muttui hlawm bawk aniang, an inhnar rin siak amaw tihmai tur a ni. Ka tho kang a, ka chapal ka thawlh a, kawngkhar lam ka pan lai chuan zawhte chu a ngiau vak a, tui baw hawk ri ang deuh hi ka hre bawk a. A reh ta bawk a, mut leh mai ka tum chu engvanga kha zawhte kha hram tawp daih nge a nih tih chu thuhran ni se, tui baw hawk ri ang deuh ka hriat kha enge a nih va enfiah hrim hrim chu ka duh tlat pek a, ka va chhuak ta a. Zawhte awmna lai ni a ka hriat chu ka va pan a, ka thil hmuh chu a va rapthlak tak em. Zawhte chu a lai takah a bung a, a ril te chu a inzam nuai a, thisen tam em em hi a lo baw nuai bawk a, ka rap ngei mai. Zawhte chu ka'n en chiang a, Robert-a, Zualtei bialpa, amah Zualtei pawh ina a duat em em, Tommy-a ngei a ni. Ka rap bawk si, mak ti bawk si chuan, "Ekhai awww.." ka tiin ka au thawt a. Ka lo au ring deuh aniang e, khawharin riak midangte pawh chu an lo chhuak a, zawhte ruang an hmu chu an rap ve ngang a niang, thil awmzia min zawt nghal sap sap hlawm a. Ka thil hriat te leh zawhte ruang ka hmuhdan te chu ka han hrilh a, thenkhat chuan, "Misual an awm aniang, atha dawnlo tawp mai." an ti a, thenkhat erawhin Zualtei thla chu a hrang anga, a tihlum anih an ring bawk. Dar 12 leh achanve vel a ni a, mut leh phawt chu tha in kan hria a, chubakah Pi Khumi te nupa kan ti hlauthawng lutuk ang tih ka hlau a, kan mu leh ta a.


Tuvak mah kan la muhil lo, kawngkhar chu pawn lam atanga rawn chum ang mai hian a rawn ri ta bur bur mai a. Kan thuchhuak sap sap hlawm a, kan zinga upa ber U Sanga chuan, "Hey, tunge a? Khatia rawn ben vak vak kha angai ami?" a ti vin tuar a, a reh ve mai bawk a. Pa Zara chu bedroom atang chuan a rawn chhuak a, "Enge ni a? Tunge ni?" a rawn ti a, U Sanga chuan, "Kan hre biklo, a rawn chum vak vak ringawta." a lo ti a. Pu Zara chuan kawngkhar lam chu ava pan a, a hawng a, pawn vel chu a va en kual a. U Sanga nen chuan Pa Zara chu zuiin kan va chhuak ve a, tumah hmuh tur an awm lo. Inchhungah kan lut leh a, Pa Zara chuan, "Hlau suh u, Krismas zan te ania, kan in hi a fal em bawk a, tlangval zurui thenkhat ten min rawn tihthaih vel mai mai anih dawn kha, kan inbul vel hi zu in nan an rawn hmang nasa thin alawm." a ti a, ngaihtha lemlo tak chuan kan mu leh ta a. U Sanga chu a hnar nghal bawrh bawrh a, kei erawh ka muhil thei tawh thak lo. Robert-a te zawhte second 10 vel lek chhunga khati taka a taksa bung rum khawpa lo sawisa hman tu kha mihring anih theih hi ka ring lo a, zawhte lian ve tak anih avangin mihring kutlawng chuan a pawh bun zawh hi ka ring hlawl lo. Chemin lo sat pawh nise a sat ri ka hre ngei tur a ni, mahse ka hre silo. Chutia ka inngaihtuah lai chuan kan riahna in chu chak taka tlan hual tu an awm leh ta tlat mai, mihring tlan ri chu ni mahse, khati em em a chak khan tu mihring mah hi an tlan thei lo ang. A tlan hual pah chuan hmeichhia, lungchhe em em a tap ri kan hre bawk a. In riak ho chu kan harh vek a, U Sanga pawh kan kaitho a, ngawi rengin kan ngaithla a. Tap ri lah chu a ring telh telh a, Pu Zara kaihthawh kan hreh si, tumah tawng ngam kan awmlo. Tap ri lah chuan achangin, "Tiang ringawt chuan a ni theilo, a diklo, adiklo ani." tiin a au vak vak bawk a, Zualtei aw ngei ani tih chu tuman kan hai lo. U Sanga meuh pawh a tawng chhuak ngam lo, a naupang deuh ho phei chu an tap pur hlawm a. Tlaivar thakin tumah chu muhil lovin chu tap ri chu kan ngaithla a, khaw en dawnah zawi muangin thawm chu a reh ve ta chauh a ni. A tuk zingah chuan an inpu chhuak ta deuh vek mai a, chhuanlam hrang hrang an siam a, Pu Zara leh Pi Khumi te chuan a ngaihna an hrelo hle mai. An in bula zawhte ruang pawh chu Pu Zara te nupa thawh hma in khawvar tawh hnu ah U Sanga nen kan paih a, thisen vel chu kan tifai bawk a. In riak zawng zawng deuhthaw an input chhuah vek avang chuan U Sanga nen chauh chuan kan bang ta. Chhuah ve mai chu ka duh em em a, mahse U Sanga'n, "Zankhat chiah riah a, chhuahsan vek chu amawilo, chubakah a zahthlak emai. Kan pahnih talin kan riak leh ang chu, i tlawmngai dun leh phawt ang, mipa kan nih hi, zan 3 em pawh riahloh te chu." a ti tlat a, keipawh chu Zualtei nu leh pate ka khawngaih ve tho bawk si a, hreh tak chung chuan ka riak ve leh ta a.


Zan alo thlenga, ka huphurh ngei mai. Inleng an haw rem a, dar 10 a pel vel ang tih ah chuan U Sanga nen chauh chuan kan mu ta a. Ka muhil eihlo, dar 1 vel thleng chuan thawm danglam engmah hriat tur a awm hrih lo. Mahse, Zuatei ruang an hmuhna, an huan kalkawng, an kawmthlang lawk atang chuan tawng thum ri bul bul hi ka hria a, hlauhna hlirin ka khat nghal. U Sanga ka kai tho a, U Sanga chuan a ngaithla vang vang a, "tleirawl zu in ho titi mai mai aniang..." a ti liam mai a, mahse a hmel ka en chuan a thusawi ngei pawh chu a awih bik chiahlo niin alang, a hlauh ve hmel em em a. Tawng ri chu ka ngaithla a, a thusawi chu ka hrelo nangin, mizo tawng anilo tih chu ka hria, a tawng rang em em mai lehnghal. Chuveleh an kawmthlanga an vawk chu a nguk ta chiam mai a, a ri rawk rawk a, kan phu dun chiang ngei mai. Vawk chu sawisa tu awm ang mai hian a t(r)e chiam chiam mai a, sihal u chuah chuah ri kan hre bawk. U Sanga chu a tho lawk a, choka ah pheiin chem a va la a, "Hruaia, tikhan lo awm rawh." a ti a, kawngka chu hawngin a chhuak ta daih mai a. Ka hlau lutuk chu kawngka pawh ka va kalh ngam lo, ka mu a, ka inlukhup a, ka khur nghal char char. Chuveleh light a rawn thim thut a, kawngka lah chu a inhawng huau mai a, tukverh atanga thla engin inchhung a rawn chhun bak chu eng dang a awmlo, ka che chhuak ngamlo, lo inpu chhuak ve law law ila tha tur tiin ka inchhir lutuk chu ka mittui a tla phung thei hial ani. Minute khat vel hnuah chuan pawnlamah pen thawm ka hria a, inchhung lam rawn pan tur ngei a ni. U Sanga ni se ka ti ngawih ngawih, a rawn hnai zel a, inchhungah chuan muang changin a rawn lut ta. Khawilama U Sanga....amah Zualtei ngei a ni. A zang a kul em em a, a kal pah chuan a lu a bu nghut nghut a, muang changin a hawi kual a, a sam a thur em em bawk a, inlu khupin ka muhil der ta ringawt a. Ka puan sin kar atang chuan fimkhur takin ka bih a, tukverh lam chu a en a, min hnungchhawn zawngin a ding a. Chutah a in hnit ta feih feih a, a tap leh tan dawn ta mai a. Muang changin, bu nghauh nghauh pah chuan ama room ah ngei mai chuan a lut a, ka thawlo rei lutuk chu ka thaw a chham hman tep a ni. Current a rawn eng a, U Sanga chu chempui nen a lo lut a, ka lawm lutuk chu ka va pan nghal a. A banah va vuanin, "U Sang, tah sawn, a room ah sawn a lut..." ka ti chul mai a. U Sanga chuan, "Tumaw?" a ti a. Keichuan, "Zualtei...tah sawn a lut.." ka ti a, U Sanga chu Zualtei room lam pan chuan a kal a, room kawngkhar a in hawng sa a, room chhung erawh a thim vek. U Sanga kawr hnunga pawh pah chuan ka zui ve zel a, kan thlen dawn tepah chuan na em em in kawngka chu a rawn inkhar bur mai a, ka phu nasa lutuk chu a au lo chauh a ni. U Sanga chuan, "A mai mai chuan.." tih pahin kawngka chu a tlawh hawng rawk a, light a on eng a, tumah an awmlo. Mahse mak deuh mai chu Zualtei room tukverh lo inhawng chu a ni, ahmaa a nu leh paten'a an kalh thlap kha a ni si a, ka thlanin min bual huh vek tawh. A hma zan ang bawk chuan mu miahlo chuan kan meng tlaivar leh ta thak mai a, ahma ang bawkin kan riahna in chu chak em em hian Zualtei thla chuan a tlan hual leh ta vak vak mai a, a chang leh a tap a, achang leh thinrim hmel em em hian a rum a, khawvar dawn hnaiah chuan a reh ve leh ta a. Zing khawvar hnu chuan U Sanga nen chuan kan inpu chhuak ve ta nghal a, kan riak ngam tawh ta biklo a ni. He ka thil tawn hnu atang hian tun thlengin khawhar inah ka riak leh tawh ngailo.


(Zualtei a thih hma December 21st bawr vel khan Zualtei te vengah hian mikhual rawn awm thar hi a awm a, thingtlang atanga rawn kal a ni. Zualtei hi tunge a nih a hre lemlo a, a thih pawh khan a ngaihsak lemlo. Zualtei thih hnu deuh lawk, ni reilote a ral hnu khan he mikhual pa pawh hian Zualtei thla a hmu ve tih a sawi a, a thil tawn chu hetiang hian a sawi a ni.)

He vengah hian December 21st ah kan khua atangin ka nau nen zirna avangin kan rawn pem a, Zualtei an tih hi tunge a nih a, eng ang hmel nge a put tih pawh mithar kan nih vang te pawh aniang e, amah hi ka hre ngailo hrim hrim. A thih zan pawh khan mitthi an awm tih thu kha chu ka hre ve a, mahse ka la mikhual em avangin ka kal talo a, ka nau nen inah kan awm a ni. December ni 29 a ni a, he venga kan awm tirh atanga ka kawm ve ber, Hmingmawia te inah ka leng a, kan titi a, zan dar 11 rik hma hret chuan ka haw a. Ka in luah hi a fal deuh hlek a, thlanmual kal pelh angai a. Ka kal zel a, thlanmual kal pelh pawh chu ka hlau lemlo, tlangval ka ni ve a, chubakah vawi tamtak mahni pawh a ram riak ve tawh ka nih avangin chutia thlanmual kal pelh zuai te mai mai chu hlauhna ka nei lemlo. Thlanmual ka thleng chu thlanmual thim ruih atang chuan hmeichhe aw hian zawitein, "Ka pu.." a rawn ti ri hi ka hria a. Ka ding chat a, ka enkual a, a thim em avang pawh ani mahna, tumah ka hmu lo. Ka bengchhe ri mai mai aniang tiin kal leh mai ka tum a, ahma ang bawkin, "Ka pu.." a rawn ti leh a. Tu tak chu nimaw, thlanmualah hmeichhia mahnia awm chu ti nuah nuah pahin ring deuh lenglawng hian, "Tunge?" ka ti vak a. Ka phone light ka on a, thlan pakhat bula hmeichhe lo thu chu ka hmu a, ka va kal hnai a, "Nangmah ami min ko kha?" ka va ti a. A rawn dak chhuak a, hmeichhe hmeltha tak a ni, asam asei nalhin a dum hlarh a, vun ngo lam a ni a, a mitmeng lah a pawl ra mai lehnghal a. A rawn ding chhuak a, "Aw...keimah a nih kha." a ti a. Keichuan, "Enge ni ta? Hetah enge i tih a? Thlanmualah hian enge i tih?" tiin zawhna chu ka zawt vak vak a. Chunu chuan, "Malsawmzuali ka nia, Zualte tiin min ko thin. Ka pa chu Zarzoliana a ni a, ka nu chu Lalthankhumi a ni a, kum 23 mi ka ni bawk a.." a ti a, a sawi zawh hma chuan, "Ngawi teh thiannu, tinge chu chu min hrilh kher a, eng buaina nge i neih a?" ka ti a, a ngawi vang vang a. Chutia hmeichhe hmeltha leh pian nalh takina thlanmuala min rawn ko ta chu beisei a nei a nih ringin a bulah chuan ka thu hnai a, han kuah vel pah chuan, "Tinge i ngawih daih a?" ka ti a. Chunu chuan, "I puihna ka mamawh a ni...ka pu." a ti a, eng ang kawng pawhin pui kha ka chak ngawih ngawih. Ka be leh tur ka tawng dawn chiah chu kan thutna thlan hnuai chiah a thlan, alung pawh la phunloh, a mitthi-a an phumna la reilo tih hriat taka an vurna leivung pawh a bul vela la darh nuai mai chunga a mitthi hming inziak chuan ka mit ala tlat mai a. Ka tho a, ka phone light chuan ka en a, chiang taka en pah chuan chunu bulah chuan, "Thiannu, Zualtei tiraw i hming kha?" ka ti a, "Aw." tih ringawtin min chhang. "Kum engzat nge ka ni i tih khah?" ka ti leh a, "Kum 23." a ti leh ringawt a. Hlauhna in min tuam nghalin ka thauvah min man a, kha thlana mitthi hming kha, Malsawmzuali (Zualtei) kum-23 tih lo a inziak ka hmu a, ka thlanfimin min bual nghal zawih zawih a. Hreh tak chung si chuan chu nula awmna lam chu muangchangin ka hawilet a, ka thil hmuh chuan min va rap tak em. Chu nula, ahmaa hmeltha tak leh mitmeng nalh em em mai kha, a mit a var pup a, a sam ngil nalh tak kha a thur bum mai a, pitar zang kul ang mai hian kun ngulin min rawn en a nih chu. Ka hlau lutuk chu ka thidang lo chauh, ka hmulthi a ding vek a, chu nu chu ahma a aw mawi tham nalh tak ni si kha, rapthlak em em hian ka hmazawn taka ding chunga min kawh pah chuan, "Min pui dawn em? Sawi rawh?" a rawn ti t(r)ial ruai mai chu ka au thawt a, ka theih ang bera chakin ka tlan chhe ta a.

Ka haw kawngah pawh chuan chu hmeichhe rapthlak leh hlauhawm tak chuan min zui zel a, hnunglam ka en a, a rawn kal bu nghauh nghauh mai a. A chang leh a tap a, a chang leh a au t(r)ial ruai ruai a, kan in ka thleng chu kawngkhar ka chum vak vak a, "Bawiha, lo hawng teh..hawng vat teh." tiin ka nau chu ka au chul mai a. Ka nau chuan rawn hawngin inchhungah chuan ka lut a, kawngka ka kalh nghal a. Ka nau chuan zawhna tam tak min zawt tih pawh ka hria, mahse enge a sawi pawh ka hre mumal lo, ka hlau lutuk chu ka khur char char. Ka nau chuan enge thil awmzia tih hriat a duh a ni chek ang chu, kawngka chu va hawn a tum a, mahse ka phallo nasa mai a, minute 5 vel min thutpui a, min bawihsawm hnu chuan ka harh chiang ta deuh a. Ka nau chuan, "Enge awmzia ka u? Tinge i va hlauh hmel ve?" tiin min zawt a. Thudik hrilh chu ka tum viau na a, ka nau hi pawl 10 zirlai mai chauh a la ni a, a hlau ang tih ka hlau a, "Ihh..englo ania, tlangval zurui ho ka chhang pawr a, rin aiin anlo tam sia, min rawn um alawm le." tiin dawt ka phuahchawp ta ringawt a. Ka nau pawh chu a nuih a za deuh leh ta nghal a, ka thil tawn kha chu tawng ve se a nuih bik hauh lovang. Chumi zan chuan kha nula khan min tihbuai chhunzawm lemlo mahse ka mu lo hrim hrim, zankhuain ka tlaivar a ni. A tukah chuan zan hmasa lama ka thil tawn te chu ka thianpa Hmingmawia bulah chuan ka sawi ta vek a, ani pawh chuan Zualtei chu a lo hria a, a thlalak te min hmuh a, khanu ngei kha a ni. Hmingmawia chuan Zualtei chu khawhar in riakten a thla an hmuh thu leh OD-a thi a nih thute, a nu leh pa hmingte nen, an chhungkaw chanchin te, a thihdan te leh a thla an hmuh thin dan te thleng chuan chipchiar takin min hrilh ta vek a ni. Khami ka thil tawn zan atang khan zana dawr kal takngial pawh ka ngam tha tawh lo, thil t(r)ul tawpkhawk a nih loh chuan zan ka chhuak tawh ngailo a, thil pawimawh a zana ka chhuah pawhin ka nau ka inkalpui tir ta ziah a ni. Mahse ka rilru ti nuamlo tu dang leh chu, Zualtei thlarau khan duh a nei a, puih angai takzet a ni tih hi ka ring tlat a ni.

(Zualtei thiannu Nunui thil tawn vethung)

Zualtei hi ka best friend ve ngawih ngawih a ni a, kawng engkimah kan inpui tawn thin. Ngaihzawng chungchang a ni emaw, chhungkaw buaina a ni emaw, zirna lam emaw pawh nise, engkim kan inhrilh a, thuruk engmah kan zep ngailo. A thi tih ka hriat khan ka tuar thiamlo hle a, OD an tih phei kha chuan a mak ka ti lutuk a, ka awihlo em em bawk a, mahse doctor te leh police te pawn thudik a ni an ti miau si a. Damdawi hi lo ti pawh nise, kei hian ka hre ngei tur a ni,. Ka hriatlohvin a rukin lo ti pawh nise, hriatchhuah hun chu ka nei ngei awm si a, OD khawp khawpa damdawi lo ti nasa tawh chu, ahma khan ka hre daih tawh ang. A thih hnu lawk atang khan khawhar in riak ten Zualtei chu a hrang tiin an sawi thawm ka hria a, a hnu deuhah mi hrang hrangin a thla an hmuh thin thu an sawi thawm ka hre leh bawk a. Ka thian tha ber mah nise hmeichhe dawih ve tak ka nih avangin ka hmuh ve hi ka hlau em em a, pawn pawh ka chhuak ngam ngailo. Zualtei thih atanga kar 2na vel a ni, college ka bang tlai deuh a, zan dar 6 velah in ka thleng chauh a, ka chau lutuk chu chaw pawh eilo chuan ka lo muhil a. Ka harh leh meuh chuan dar 8 alo ri tawh a, ka thawmhnaw te chu phelhin inbual turin bathroomah ka lut a. Ka room ah hian bathroom hran ka nei a, kan bathroom pangngai hi ka hmang ngai meuh lo. Ka inbual lai chuan bathroom kawngkhar chu a rawn in kik vak vak a, ka nau kum 8 mi, Joshua a nih ringin, "Enge bawiha?" ka ti a, mahse min chhanglo. A ngaite bawk chuan a rawn kik leh vak vak a, keichuan vin zetin, "Lal Joshua, a ninawm...ka pa bulah ka sawi dawnnia, ninhlei suh." ka ti a, a reh ve mai bawk a. Ka inbual zo chu bathrope ha in ka room atanga chhuakin ka pa, TV lo en mek bulah chuan, "Pa, khawnge Joshua kha?" ka ti a. Ka pa chuan min ngaihsak loh hmel deuh hian, "I nuin a inkhawmpui, anlo bang tep ang." a ti ta mai a. Mak ka ti angreng hle mai, "A va mak awm ve, ka inbual laia kawngka rawn kik vak vak tu kha tunge?" ka ti leh a, ka pa chuan nui suk hian, "A awihawmloh lutuk, i u a mu tawh a, kan pahnih hi kan ni lehmai, tumah kan lo lutlo." a ti sam leh et a. Ngaihtha vak lo chuan ka roomah chuan ka lut leh a, ka U Mama'n min fiam anih ringin ka ngaih ka ti tha lui a. Ka room darthlalang hmaah chuan thu in ka ke chu lotion ka chulh mawlh mawlh a, nichin lawka ka bathroom kawngka rawn kik thu kha tunge ni ang tiin ka ngaihtuah nauh nauh a. Chutah le, darthlalanga ka in en leh chiah chu, keimah tho chu ani, mahse che miahlovin ding chungin min lo melh reng a nih chu. Ka hlau lutuk chu ka tawlh dawrh a, ka ding chhuak nghal a. Ka ban te chu ka phar vel a, mahse darthlalanga mi zawk chuan che miahlo hian min la en reng a. Ka hlau lutuk chu ka khur nghal char char a, darthlalanga mi, keima hmel ang pu tho, ka thawmhnaw hak ang chiah ha ve, keimah tho chuan min rawn pan hnai a, a kun a, a sam in a hmel a hliah ta vek a. Ka en reng a, a rawn hawi chhuak leh chu keimah ka ni ta hauh lo mai. Ka thiannu, kar 2 liam ta a thi, Zualtei ngei kha a ni. Lungchhiat hmel em em hian min melh a, a mittui a tla a. Chutah a rawn tawngchhuak ta a, "Nunu, OD-a thi ka nilo, damdawi ka ti ngailo tih pawh i hriat kha...min ring tiraw?" a rawn ti ta mai a. Ka hlau lutuk chuan tap tuau chungin, "Zual..Zualte???" tih chiah ka sawi thei. Zualtei bawk chuan, "Nunu...nangchuan min ring tiraw? OD-a thi ka nilo, thah ka ni, min thattu pawh ka hria." a ti leh a. Ka hlau lutuk chu ka au vak a, khumah tlan lawn nghalin ka inlukhup nghal a. Ka pa ka au vak vak a, ka che ngam tawh silo. Chutah le, ka khum lam pana rawn pen ri ka hre ta a. ka rizai rawn hlimin ka ke hmawr atangin kut vawt tak mai hian min rawn zut a, ka malah a zut chho zel a, ka rak vak vak a, room kawngka a rawn inhawng ri thuai mai a, ka phu chiang kher mai.


Ka rizai chu tu emaw hian a rawn pawt hlim a, ka pa leh ka u Mama te anlo ni. Ka pa chu ka kuah nghal a, ka tap zawih zawih a. Ka pa chuan thil awmzia min zawt a, engkim ka hrilh ta vek a. Ka pa chu ka thil hriat te ka hrilh hnu chuan a ngawi vang vang a, "Thil fello chu a awm alawm. Keipawhin Zualtei kha damdawi a tih ka ring lo hrim hrim. Ka fanu angin ka en a, ka duat em em a, ka hrechiang ve thawkhat viau chuan ka hria. Mami, zanin chu i nu nen kan bulah lo mu mai rawh, chuan naktukah kan sawi zawm dawnnia." tiin ka pa chuan min hrilh a. Chumi zan chuan ka nu leh pa te inkar ah ka mu a, mumang mak tak mai hi ka nei a. Ka mumangah chuan Zualtei nen chuan kan lo inkawm a, hlim takin kan nui dun har har a. Kan hnung atang chuan Robert-a pa hi lo kalin Zualtei bulah chuan, "Zualte, kha i tui in a hal awm si a, hei hi in rawh." tih pahin tui um hi a rawn pe a, Zualtei chuan hlim takin, "Ka lawm e.." tih pah chuan a in a. A in zawh hnu chuan muang chang hian a kang del del a, a kang sang zel a, hnuailam rawn melh pah chuan, min rawn en a, "Nunu, nangchuan min ring ang tiraw? Damdawi ka ti ngailo, tiang ringawta tawp tur chuan ka phallo, Nunu..min pui hram rawh.." a ti lawm lawm a, vanah chuan a thlawk chho ta daih a. A tuk zingah chuan ka mumang chu ngaihtuah letin mak ka ti em em a, ka hlauh rual rualin ka mumanga Zualtei tap hmel leh lungchhe hmel mawlh kha ka mitthla ah a cham reng a, ka khawngaih hle bawk. Ka mumang chu ka pa ka hrilh leh a, tichuan ka pa chuan, "Umm...a nih tak chu, bawihte thil engemaw chu a awm a ni, Zualtei thih dan kha a pangngai lo tlat. Mahse lungngai suh, Zualtei thlarau chuan engemaw min hrilh a duh pawh a ni thei asin, hlau reng reng suh aw. Ka awm alawm, engthil emaw chu kan tih ve angai a ni." a ti a. Ka pa chuan a thianpa, police inspector hmelhriat a nei a, chupa chu Pu Lianmawia a ni. Kan inah leng turin a sawm a, chaw te eiin chaw ei khamah chuan kan pathum chuan ka pa te room lamah kan phei a. Ka pa chuan Pu Lianmawia bulah chuan engkim a hrilh ta vek a. Pu Lianmawia pawh chuan ngun taka ngaithla in a bu nghut nghut a. Pu Lianmawia chuan, "A nih tak chu, keipawn Zualtei thla an hmuh thin thu hi chu mi ka atangin ka lo hre ve nual tawh alawm. A tir chuan awihlo hle mah ila khawhar ina riakte khan an sawi darh nasa bawk a, engemaw inthup hi chu a awm ani ngei ang. Thianpa, hma lak dan ka lo zawng ange, lungngai lo ula, he case hi chhui that leh theih dan pawh ka lo ngaihtuah vek ang, thlamuang tak khan awm ang che u." tiin min hawsan ta a. Zualtei kha athla hmutu dangte sawi dan tlangpui chu hmel rapthlak tak leh pitar ang maia zangkul, sam thur bum leh tihbaiawm tak ang deuh hlir in an sawi thin kha a ni a, mahse ka hmaa a rawn inlar kha chuan a hmel kha a pangngai em em a, a hmelthat dan pawh ala ngai reng a, mahse a hmel kha a dangin nunna nei tawhlo a ang ka ti ber. Ka sawithiam dan ber chuan a thih ni a, a ruang ka hmuh hnuhnun bera a hmel ang chiah chiah kha a ni.

(Zualtei college kalna ah hian Zualtei hian duhsak em em tu a nei a, chu chu an Sir Tluangtea a ni. Tluangtea pawh hian Zualtei thla hi a hmu ve niin a sawi a, a thil tawn rapthlak tak mai chu ama sawi ngei ilo tarlang dawn teh ang.)

Zualtei hi ka student ngainat ber a ni a, an class teacher ka ni bawk. Lehkha a thiam theih mai bakah, a nunchang a that em avang hian ka duhsak bikin ka duat bik thei hle a, zirlai dangte pawhin an thikin an ngei rawn thin tih pawh ka hria. A boral tih ka hriat khan ka tuar na ve em em a, OD-a thi a nih thu ka hriat phei kha chuan mak ka tiin, damdawi alo ti ve reng thin chu hriatthiam har ka ti em em a, an vui ni ah pawh khan ka kal ve ngei a ni. Tlai khat ka college kal ka haw chu duh aiin ka haw tlai a, khua a thim tan vel tih ah chuan college atang chuan ka haw ve chauh a ni. Kan college hi kan in atang hian km 5 vel laia hla a ni a, ka bike in ka kal thin a ni. Chumi zan chuan ka haw lam chu kawng reh deuhhlek lai ah chuan ka bike chu a thi ta tlat mai a, han tih nun ka tum ngial pawh chuan a nung theil tlat lo. Ka nghak deuh vang vang a, ka'n rap leh chhin a, a rawn nung ve mai bawk a, tichuan ka tlan leh char char a. Kumthar vuakvet ani bawk nen khawlaiah pawh mi veivak an tamin, lehlam kawngzawng tak chuan kawngsira tlangval zurui te, drugs addict lo awm te leh inngaizawng lo tawmdun ka hmuh te chuan thla an ti muang angreng hle a. Chutia ngaihtha taka ka tlan lai chuan ka hma ah hian thil dum vek, mihring ruang am ang deuh si hian kawng a rawn cross thut mai a, ka phu nasa lutuk chu balance ka hlauh a, ka thal thuai mai a. Reiloteah tlangval 5 vel lo kalin min rawn pui a, ka nat lutuk lemloh avang chuan min pui tute chu lawmthu hrilhin ka haw veleh nghal mai a. Mak ka ti khawp mai, ka han mitthla let leh pawh khan ka hmaa rawn phe vuai kha mihring chu a ang hle tih ka hria, mahse hmel a nei nge neilo pawh ka hmu chiang hman lo, dum vekin a inthuam a, mihring theih phakbaka chakin a rawn phe vuai kha a ni a, zep lo chuan ka tiril a fan a, ka hlau ve hle ani. In ka thleng a, ka bike ka dahtha a, inchhungah lutin chaw te ka ei a, ka inbual fai a. Ka haw kawnga ka thil tawn mawlh mai khan min la ti hlauthawng a ni. Karleh lawk hi class test ka pek hun tur a nih tawh avangin question set chuan hna ka thawk nghal char char a. Mahse ka rilru ah a lut thei mawlh lo, kha ka thil tawn kha ka mitthla ah alo lang zel a, ka thil tih lai chu dahin sana ka en a, dar 10 a lo ri der tawh mai. Light ka off a, ka mu ta a. Ka mu deuh chiah tih ah chuan kan ui chu a bauh ta vak vak mai a, achang leh a u ruah ruah a. A tir chuan kumthar vuakvet te a ni a, mi ingngaizawng kal vel te a hmu anga, a bauh mai mai aniang tiin engah vak ka ngai lo. Mahse a u leh ruih ruih thin chuan ka ngaih a ti tha ta hauh lo mai, ka room tukverh ah chuan ka dakthla a, kan inkawt atanga hla vakloa hmeichhe pakhat, kawrlum phiar var ha, a samin a hmai akhuh vek chu ka zu hmu thei a, kan in lam hawi chuan a ding reng a. Ka room atang chuan ka chhuak a, inhnuai lamah chhukin kan ui tukverh lam hawia lo bauh vak vak chu ka va hmu a. Ka va kal hnai a, "Jimmy, enge ni i bauh vak vak a? A bengchheng lutuk.." tiin ka hau a, min rawn pan nghal a. Kawngka ka hawng a, kha hmeichhia, kan in lam hawia lo ding reng kha ka hmu tawh lo. Ka chhuak a, ka hawi kuala tumah an awm lo. Let leh ka tum chu kan ui Jimmy-a chuan a hma zawn chu enin a bauh leh ta vak vak mai a. Ka hawikual a, tumah an awm silo. Chutah meikhup zul zulin ka ke bulah chuan Jimmy-a chu a rawn biru ta a, ka hmazawn ka hawi phei a, ka thil hmuh chu..


A hmel chu Zualtei hmel ngei a ni, mahse a hmai a var vek a, a mitmu chu a rawn pawng chhuak deuh titih bawk a. A sam a thur vek a, akawr te chu a t(r)et deuh phung bawk. Ka lam pan chuan alo phei a, ka hlau kher mai. Ka bula hmun phiah chu la in ka tin a, hlau chung chung chuan "Hey, tunge i nih?" ka ti a, ka khur zawih zawih a. Zualtei hmel a ni tih chu ka hria, mahse Zualtei ka hriat thin kha a ni tlat lo. Ka thauvah min manin intih huai luih chu a har a ni, a ka a rawn ang a, a ha lah chu a dum vek lehnghal. Muangchang hian, "Sir Tluangte.." a rawn ti ta mai a, ka hlau lutuk chu ka hnungtawlh dawrh a, rang takin roomah ka tlan lut a, khumah lawnin ka inlukhup nghal a. Mahse kawngka kha kalh lovin ka tlansan tih ka hrechhuak thut a, mahse ka tho ngam tawh lo. Inchung step-a rawn chho ri ka hriat chuan min ti hlauthawng zual a, ka thlanfimin min bual huh vek. Alo hnai zel a, ka room lam a rawn pan tih chu ka hria. Ka tho vat a, khum hnuaiah ka biru a. Ka room kawngkhar ah hian kalhna a awmlo a, chuvanga ka sa himna ber tura ka ngaih, khum hnuaia biru ta mai chu ka ni. Ka room kawngka chu zawi muangin a rawn inhawng a, chumi rual rual chuan current a thim nghal. Ka room tukverh atanga thla engin a rawn chhun bak chu eng dang a awm lo. Room chhungah chuan a rawn lut a, kelawngin a kal a, a ke dang vek leh a ketin dum th(r)ut te chu ka hmu thei a, mi rap em em a. Ka khum lam ala rawn pan zui, khumah chuan a lawn kang a, aww..thidang thei ila ka van ti em. Chuveleh zawite hian a tap ri ta kerh kerh mai a, a lungchhiat hmel em em a. A tap ri chu a ring tulh tulh a, a hnuah phei chuan a rak in a rak ta vak vak mai a. A sam te chu a rawn tla nuai nuai a, khum hnuai atang chuan a sam rawn tla te chu ka lo hmu thei a, tlangval pui si chu ka tap pur tawh mai a ni. Chutia minute 10 vel lai a rak vak vak hnu chuan a reh a, current a rawn eng a, mahse ka la chhuak ngam mai lo. Rei ve fe ka nghah hnu chuan muang changin ka chhuak a, vanneihthlak takin alo awm tawh lo. A sam tla te pawh chu engmah hmuh tur a awm tawhlo a, mahse ka khum chu a in chinglet nasa ngei mai. Tukverhah chuan ka dak thla leh hram a, lo dak thla lui tawh lo law law ila tha tur. Zualtei chu sam kawlh vek deuhthaw, sam tlemte chauh nena kan inkawt atanga min rawn hui chu ka hmu leh ta a, ka au tuar a, ka room ah chuan ka riak ngam talo. Chhuanlam eng enge maw siamin ka nau bulah ka va mu ta ringawt a ni. Hemi zan hian ka muhil lo hrim hrim, ka meng tlaivar thak. Tin, hemi zan atang hian ka khumah khan ka mu ngam tawhlo a, khumdang ka siamtir phah nghe nghe a ni. Ka rizai te, lukham te leh bedsheet te pawh ka paih vek a, a tharin ka thlak vek. Mahse hemi zan bak hi chu Zualtei thla kha ka hmu leh tawh biklo, hlau viau mah ila, tunthleng hian Zualtei hi ka la ngai a, a thi kha ka la ui ngawih ngawih a ni.

(Zualtei thla hi heng kan tarlan ho te chauh lo pawh, midang tam tak pawhin anlo hmu nual a. Robert-a pa te, an venga tlangval zurui ho te, an bialtu pastor te leh a thian dangte pawhin anlo hmu nual a, mahse chung zawng zawng erawh chu sawi lang tawhlo mai ila.)

(Thudik hailan a ni ta.)

Zualtei thiannu Nunui pa leh a thianpa Inspector Lianmawia te chuan Zualtei thihdan chhui chiang leh turin hma an la ta a. Zualtei pa chuan FIR thehlut in case re-open dilin police department lam te pawh chuan anlo remti hlauh mai a, tichuan thu zawhfiah turin Robert-a pa chu Pu Lianmawia chuan Station lamah a hruai phei ta a ni. A tir chuan han t(r)ang na deuh mahse Robert-a pa chu a inpuang ta a, a chhan pawh Zualtei thlarauvin police te hnena inpuang tura zantin a lo vau thin vang a ni. Thudik chu hei hi a ni, Robert-a pa hian Zualtei hi a iai in, an retheih em avang chuan a hmusit em em a, a fapa tan hian a duhlo mai nilovin, a huat in a hua a ni ber mai. Mahse a fapa lahin a hmangaih tlat si a, an pafa a an insual phah ziahna, Zualtei chu tihchhiat vek a duh a ni ber mai. Robert-a'n Zualtei a neih loh chuan intihhlum mai pawh pawi a tihloh thu te, in atanga chhuah mai pawh pawi a tihloh thute leh neih ngei a tum thute a sawi a sawi takah chuan Robert-a pa thinlungah chuan Satan-a a rawn inrawlh ta. Zualtei chu tihhlum mai chu a tha ber dawn tlatin a hria a, tichuan ruahmanna tak a siam ta a ni. Urlawk zan khan Zualtei chu Robert-a te inchungah a awm a, an thian ho khan an zai kha a ni a. Robert-a pa chuan Zualtei chu an inah an chhungkuaa tawngtai turin a haw dawn tih pawh a hre lawk vek a. Chutia Zualtei lo chhuk chu Robert-a pa chuan Zualtei chu lo ko dingin, "Ngawi lawk teh Zualte, hei Robert-a nu-in thei tui ka siam ve e a ti a, han insak vek lawk teh." a ti a, Zualtei chuan lawm takin a in a, tichuan Robert-a chuan kawngka bul thleng thlahin a room ah a chhoh san leh ta a ni. Mahse Zualtei hriat miahloh chu kha theitui ah khan Robert-a pa chuan damdawi alo pawlh a, chu damdawi chu a dose a san em avangin Zualtei taksa chuan tuar lovin Zualtei chu a boral ta a ni. Robert-a pa hian an driver, Mawia chu Zualtei'n an in a thlen hmaa lo chang tur leh, Zualtei lu haia a tluk veleh a, an huan bula theihai kung hnuaiah a ruang lo dah turin a hrilh lawk vek a. Zualtei te in hi a fal deuh em avangin Mawia'n a ruang a put lai pawh chu tuman an hmulo. Robert-a pa chuan chu a damdawi pawlh chu minute 10 vel hnuah Zualtei taksa chuan tuarlovin a thihpui dawn tih pawh chu Zualtei ruang postmortem tu doctor hnen atang chuan a hre lawk vek a, chu doctor pawh chu pawisa pein Zualtei tihlum tur chuan thurual puiah alo sawm lawk vek a ni. Chumai nilovin Zualtei thih chhan chhuitu, he case buaipui tu ber Sub-Inspector Thangliana pawh chu Robert-a pa hian pawisa tamtham tak pein a lo thurualpui bawk a, Zualtei chu drug overdose anga boral ta anga sawi turin a hrilh a ni. A inpuan hnu chuan Robert-a pa chu tualthah case-in man a ni a, a driver Mawia, Doctor leh SI Thangliana te pawh chu he tualthahnaa an inrawlh ve avangin man an ni ve bawk a, SI Thangliana leh Doctor te chu an hna atanga ban tir an ni.

Zualtei thih chhan chiang taka chhuichhuah a nih hnu chuan Robert-a pa chu pawisa tamtak chawi tir niin chu pawisa chu Zualtei nu leh pate hnena pek a ni a, vengpum an thin a rim a, abik takin Zualtei bialpa Robert-a chuan a pa, amah hringtu pa ngei mai, tualthattu tenawm tak mai chu a haw ngawih ngawih a. A pa police in an hruai dawn hian Robert-a hian a pa hnenah, "Kut thlak che a, sawisak hlum hial che pawh ka duh. Mahse he ka kut hian i taksa tenawm tak hi ka khawih duhlo, ka pa tiin ka ko leh tawh ngailo che anga, i fapa ka ni tawhlo tih hi lo hre bawk ang che. Jail chhungah chuan kumkhua in va awm la, hrehawm takin i damchhungin hun i hmang tawh ang. Ka hua che...ka pa, ka hua che.." tiin a hmangaih em em thattu a pa ngei mai chu a tawpna atan tap zawih zawihin anchhia a hlawh a, Robert-a hian tun thleng hian apa hi hmuh leh pawh a duh tawh lo. Robert-a nu erawh he tualthahna ah hian inrawlhna a nei velo a, a pasalina chutia tualthah duhna rilru a nei mai chu mak a ti em em a, Zualtei chu duhlo ve viau mahse thah kher chu a rilru ah a awm ngai biklo. Zualtei thattute an man atang hian Zualtei thla hi tuman an hmu leh tawh ngailo a, mahse a thiannu Nunui sawi dan chuan Robert-a pa an man zan hian a mumangah Zualtei chuan Nunui chu lawmthu a hrilh thu a sawi a ni. Robert-a erawh khawhar takin a nun a hmang chho zel a, Zualtei chu a ngai em em a, mahse vanneihthlak takin camp ah lutin Pathian khawngaihna azarah Lal Isua a nei ve ta a, Pathian thute zirin tun thleng hian Zualtei tihloh kha chu bialnu dang a nei tawh hrih lo a ni.

(A tawp ta.)



Link:
BBcode:
HTML:
Hide post links
Show post links

Jacob lalhriatpuia
Posts: 1
Joined: June 29th, 2020, 1:12 am

Unread post by Jacob lalhriatpuia » June 29th, 2020, 1:17 am

Ava han ngaihnawm teh lul em....achang leh hlau chungin ka chhiar a achang leh mittui parawl purin..angaihnawm lutuk

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)
Post Reply
  • Similar Topics
    Replies
    Views
    Last post

Who is online

Users browsing this forum: No registered users and 2 guests