A Story of Clara Zorempuii(Mizo Horror story) Ziaktu - Maruata jr

Hlauhawm lampang hrim hrim hmun hrang hrang a mi lakkhawm...
Maruata jr
Posts: 82
Joined: September 12th, 2018, 10:28 am

A Story of Clara Zorempuii(Mizo Horror story) Ziaktu - Maruata jr

Unread post by Maruata jr » January 22nd, 2022, 6:47 pm

Mizo Horror Story

Clara Zorempuii Thlahrang

Ziaktu - Maruata jr



Kum 2021, April thla a ni a. Favang awllen lai nun tih takah a boruak a nuamin a theng thaw nuam em em a. Kalep Lalremruata te thian ho pawh an tum ram 'Chengkawl lui' lam panin an kal ve hnak hnak hlawm a. Hmeichhia an tel ve avang erawhin an kal chak lo hle a.


Lalremruata(Kalep-a), Lallawmzuala(Lawma), Zorempuii(Clara-i), Lalhriatpuii(Apuii) leh Malsawmtluangi(Tluangi) te an ni hlawm a. A nuam an tiin, in tih hlim pah ni fawmin Sangha man tumin an kal hlawm a. A hmun an thlen chuan an han thu chawl rih te te a. Lalremruata(Kalep tiin kan sawi tawh ang) chuan,'Vawiin kan boruak chu a nuam hle mai a, tihian han chawl hahdam ila, muang marin lui te lai hi kan theh kang dawn nia. Ni pawh a la sang that viau hi, hmanhmawhna chhan tur kan nei hleinem,' a han ti a. A hmangaih em em Clara Zorempuii(Clara tiin kan ko tawh ang) bula thut pahin a tui sik ken chu a in nghal khawlh khawlh a. Apuii chuan,'Ni e, a nuam khawp mai. Ruah tui a hul tan tawh bawk a. Ti daih ila Kalep engtik nge inneih in tum deuh a ?' Nui deuh var var chung hian a han ti a. 'Ni e, nang ni pahnih hi in zuina a rei tawh a. Inneih te pawh a hun viau tawh a ni,'Tluangi chuan a han tih chhunzawm ve nghal zat a. Nui kur kur chung hian Kalep-a chuan,'Khaia ! In ti mak emai thian te u, ti teh u. In hahdam tawh chuan tan tawh ang u,' tiin a tho nghal thurh a.


Lawma leh Kalep-a chuan lui tui te chu, tui lo luan luhna dang chat te te in, an in peih fel hnu chuan, an theh tan nghal a. Mipa pahnihin an duh tawka an han theh chuan tui chu a kang hma em em lehnghal a. Kaikuang, Nghavawk leh Nghaler te chu an lo per nawlh nawlh a. Hmeichhe ho chu, nuam tiin an rak teng tung a. Nui iarh iarh chung hian chung Sangha te chu an man nghauh nghauh a. An hlimin nuam an ti ve em em hlawm a.

Chutiang zelin Lui te deuhte chu an theh kang zung zung zel a. Chaw fak hun a nih chuan Chaw chhun/Chhun chaw ei tur chuan an inbuatsaih hlawm a. An chaw fun te phawrhin chawhmeh an pai/ken ang ang te an han phawrh hlawm a. Tui ti takin an ei hlawm a. An kham dawn hnaih ah chuan Apuii chuan duhsak takin eng emaw fun hi phawrhin,'Awi, En teh, Lalthian ka theihnghilh tep a lawm. Hei i tan tiin ka lo fun sak che a, ka thianpa Kalep-a nen kum 3 in zuina(ngaizawng) ka lawmpui zia che entir nan,' tiin a thil fun chu a han pe a. Clara-i chuan a ban ve mai a. Tui ti takin a ei ve mai bawk a.

A thil fun pek khi ka en thlakna a rem loh em avangin kei pawhin ka va hmu miah lo a. Ka hrilh thei lo tlat che u. Hahaha



Chaw an fak zawh hnu chuan, a la hma ang reng tho sia tiin reilote tal chu tiin an theh kang leh hlawm a. Tumah hi an ngai bik lo. An hlimna chuan van a tawng hial awm e a.


Khua a lo tlai hnu chuan khaw lam pan turin an inbuatsaih a, an Sangha man te leh an kaikuang man te chu in sem hlawmin khaw lam an pan ta hlawm a. Clara-i pawh in a thlen chuan a Nu leh Pa te chuan an lo lawm thiam em em a. An fanu neih chhun kha a ni ve miau a, an duatin an ngaina em em a. A mah Clara-i pawh mi nun ngil leh mi pawisawi hlau tak mi hi a ni ve a. A nu chuan,'Mami, in hlawhtling hle mai. A nuam bawk maw ? Kha inbual tui tur pawh ka siam tawh kha, va in bual tawh khai, i Sangha man chu ka han chhum hluah a nge. I pa hian a tui a ti leh dawn mange,' a lo ti nghal bawrh bawrh a.


Clara-i pawh in bual zo in a Nu chu a puih ve nghal sawk sawk a, eirawng an bawl zawh hnu chuan,'Mami, i pa va ko la, i Pa Sawma te In ah a len kha. A vak daw daw reng mai. I koh karin Chaw ei ka lo siam ang e,' Pi. Vanhliri(Clara-i nu) chuan a han ti a. Clara-i pawh a nu in a tirh angin, a pa ko turin a chhuak ve nghal mai bawk a. Kar lo ah Clara-i te pafa pawh an lo in zui lut a, Zanriah chu an ei nghal thuai a. Pi. Vanhliri sawi ang tak tak chuan, Clara-i Pa chuan a fanu Sangha leh kaikuang hawn chu tui a tiin a fanu chu a chhuang ve em em a. Chaw a han bar a, Sangha tui hang in a zui zat bawk a, a lung a awi hliah hliah a ni.

Ni e, Pu. Vela te nupa hian Clara-i lo chu fa dang reng an nei thei tlat lo mai a, mak pawh an in ti ve reng a. Mahse, khuanu remruatah ngaiin Clara-i ah hian an lungawi thiamin vui vaina an nei lo reng reng a. An fanu neih chhun chu an duatin an hmangaih em em a, M.A zir chhuak tawhin, Kum thar lamah chuan Doctor ni mai tawh tur a ni a, Aizawl a Civil Hospital-a thawk tur a ni a. A mah Clara-i ngei pawh a lawm ve em em a, Doctor hna a hmuh pawh khan a mittui a tla ve hial a, a hmangaih Kalep-a nen ngei pawh Kum thar lam a in neih tuma ruahmanna siam lawk sa kha an ni ve miau a.

An tum ang leh an ruahman lawk ang hian, an kal ang em le ? Chu zawng, hun in a la hril ang chu...





Zan riah an ei kham hnu reilote ah chuan Clara-i pum chu a Na ta thut mai le. A tirah chuan a tuar thei mai a mahse, a rei tial tial a. A na chu a zual tulh tulh a, khumah mu in a vial ngawl ngawl a.Thei leh thei lo hian, a nu chu a han ko a. A aw lah chu a tham chhal lehnghal a. A na thaw khat viau a ni ang, a Mittui hial a tla a. Pi.Hliri chu mangang tak in a Pasal Pu. Vela chu a ko nghal chuk chuk a. Damdawiin an pan pui nghal dawr dawr a. Damdawiin an thlen chuan Doctor te chuan an theih tawpin an buaipui nghal a. ICU ah nawr lut nghalin, an han en chiang a. Clara-i lah chu awmngaihna hre lo hian a vial ngawl ngawl a, a chang leh a rum leh hawk thin. Doctor te pawh an beidawng ve hial a, Damdawite chuan an han chiu a. Mahse, awmzia lah chu a nei der si lo a. A thaw a zawi telh telh a, a lungphu a muang tial tial a. Doctor te leh Nurse te pawh an buai phat phat khawp mai. Nurse nu chuan a han au vak vak a, a mit te a han keu sak a. Mahse, Clara-i chu chhan tlak a ni tawh lo. A na em a ni, Chu a natna chu tuar chhuak zo lo in, a hmangaih em em Kalep-a leh a nu leh pa chu a kal san ta. Doctor chu ICU atang chuan a chhuak a, Pu.Vela chuan,'Doctor, eng nge kan chanchin. Ka fanu chu eng nge a an, a tha em?' Beiseina sang tak nen a han zawt a.'Ka Pu, in tlai hret a ni. A rang teh thut lutuk a, kan chhan hman ngang lo a ni. A pawi ka ti hle mai.' Doctor in a han tih chuan, Pi. Hliri chu in sum zo lo in,'Ka fanu, a ni thei lo ka naute. Tinge, min kal san. I tello in engtin nge ka awm ang,' tiin a tap nghal hawm hawm a, a in sum thei thlawt lo a ni. A dem awm loh e, Nu hmangaihna hi chu a thuk ve em a tin ni. Pu. Vela erawh mipa tih takah in sum takin an chhung leh khat te chu a han bia a.

Mihring hi chu kan tum ang leh kan ruahmanna ang hian a kal vek si lo a, kan hma hun lah kan hre hek lo. Clara-i pawh a tum dan leh ruahman danah kha chuan Doctor tha tak nih a, Pasal fanau te nen khawsak kha a tum leh ruahmanna kha a ni a. Mahse, a tum loh leh beisei loh takin thihna kut vawt chuan a man ta si.

Clara-i thihna ah khan thil fel lo a awm em ni ? Thil ei sual vanga thi a ni zawk ? Nge kha a pum natna phenah ruahmanna fel tak leh rawng taka tual thahna a in phum ru zawk.

Chu zawng hun in a la hril ang chu.


Pu. Vela leh Doctor chu in kawmin, Doctor chuan,' Ka Pu, i fanu pum natna chhan awm ang i hre thei em ? X-ray te kan han tih khan, a kaw chhung lamah engmah danglamna a awm der si lo a. Mak kan ti khawp mai, khatiang natna kha kan vawikhat hmuhna leh kan vawikhat hriatna a ni,' a han ti a. 'Aaaa ! Chutianga han natna chhan tur em em pawh ka hre lo, a thiante ho nen Luiah Sangha manin an chhuak a. Sangha leh eng ilo vel an lo hawn a. Khatia zan riah kan ei kham kha reiloteah a pum a rawn na thut a. Zan riah kan kil tlang a, kan ei leh in a in ang a. Kei ni pawh engmah Na kan nei bawk si lo a. Mak hle mai,' Pu. Vela chuan a han ti a. Mak an tih thu leh a ngaihna an hriat loh thu chu an sawi zui ve nak nak a. A ruk tak chuan Pu. Vela chuan eng emaw dik lo leh a fanu thih chhanah hian tihluihna leh tual thahna a in phum ru in, tu emaw ruahmanna a nih a ring tlat a. Zawn chhuah a chhui chhuah ngei chu a tum tlat a ni. Mahse, a sawi chhuak lem hlei lova.



Kalep-a zan riah ei kham Meizial a zuk lai chuan, Information atang hian,'Hello, Chhiat tawh thu, ka han puang a nge ? Zanin tlai khan Nl. Clara Zorempuii, Civil Hospital ah a boral a. Nula leh Tlangval a thei apiang te i chhuak khawm ang u. Tunah hian khaw lam lo pan pui mek a ni a. Khawtlang mipuite kan han hriattir a ni e,' a han tih chuan Kalep-a chu a nghing lawih a, a thutna atang chuan thing thi hnawkin dan rual lohin a biangah mittui a luang zawih zawih a.'Ka hmangaih, Clara a va mak teh thut ve le. Eng nge awmzia ? Min va thawng ve. Vawiin te kha chuan hlim takin min nuih kha a ni a. Sangha i hmuh a, i hlim ziate kha. Nakum mai a in neihna thu tiam min tiam pui tur a min hrilh zan te kha, ka bengah hian a la cham reng a sin, kan ruahmanna te kha a thlawn mai maw lo ni dawn ta le! A va mak ngai ve le, ka awi thei lo. I tello chuan engtin nge ka awm ang. Ka mang ni se ka ti.' Tiin a tap rawih rawih a. A hmangaih leh a duh em em, a neih chhun chuan nat lawk pawh awm lo in thihna chuan a thawng thut ta si a. Tunge dem thei ang le ? Thihna meuh hi chuan Patling pawh a ti pachang zo thin lo chu a ni e.



Clara-i ruang chu in thlen puiin an lumen a ngai dawn a. Zan tir lam a nih vangin, Nu leh pa te chu Clara-i te In lam an pan nghal sang sang a.


An ui hlawm em em a, chutia nat lawk em em pawh nei lo a, a han thi thut mai chu mak an tiin an khawngaih hlawm em em a. Clara-i nu phei chu a mittui a hul thei mawlh lo chu a ni e.


Zan a rei tial tial a, Nu leh Pa te an haw phak phak a, Nula leh Tlangval te chu, tlaivar turin Clara-i te In chu an pan hlawm a.


Kalep-a, Lawma, Apuii leh Tluangi chu Clara-i bul hnaihah chuan an thu a. Nula leh Tlangval Inchhunga thutna chang lo te pawh pawn lamah chuan an thu fur hlawm a.

Apuii chu Clara-i lu bulah chuan thu in, a zai tui em em a. Chutia tui taka a zai lai chuan, a thiannu Clara-i chu lo meng thutin chiang tak hian Apuii chu a rawn melh ta thut mai le, Apuii hlau leh mangang chu a khur nghal zawih zawih a, Clara-i chuan Apuii nghawngah chuan a rek nghal a. Apuii na ti chu a tal vak vak a, a hlau bawk si tih theih a nei si lo, a mangang bawk si a tal vak vak a, Tluangi chuan Apuii chu a sawi vak vak a, Apuii pawh a harh hlawl a. Tluangi chuan,'Nga ti nge kha tia i tal vak vak a, vawiin i chau deuh a ni maw? I muthlu nasa hle mai,' a han tih chuan. Apuii chu a hawi chhuak nghal a, midang ho chu an lo zai tui hle a ni tih a hriat chuan a thil tawn kha a mang a ni a ni tih a hre nghal mai a. A rilru chu a lawm veng veng a. A ni pawh chu a zai chhunzawm ve leh mai bawk a. Mahse, a zai tui thei vak tawh lo a ni, a rilru ah a mang kha a awm reng a, nuam a ti chiah lo a ni. Midang erawh an zai tui em em a.



Chutia tui tak a an zai lai chuan, Clara-i te in hnuaiah eng thawm nge tih hriat loh hi a rawn ri chiam mai a. Zawhte leh Sazu in um thawm ang mai hian a ring em em a, Chutah an in Sira an Ar chu an rawn rak ta nawk nawk mai le. An zai tui lai chu an chawl nghal thup a. Hmeichhe ho chu an hawi hra hra hlawm a.Thawm lah chu a la reh mai bawk si lo, mak tak mai in thli lah chu a thaw fuk fuk mai lehnghal a. Apuii phei chu a khur ti tih nghal der a, a mang kha a la hrechiang mai si a. A bula thu Lawma banah chuan a vuan chawt a.


Inchhunga awm ho leh Pawn lama awm ho chu an reh thuap a. Hmeichhe ho phei chu an bula mipa thu ve te chu an hnaih sauh sauh a. Pu. Vela chuan,'Khaia ! Mambawih, Duh tawk teh khai, I then leh rualte i ti mangang dawn lutuk e. Hei chu i awm ve na tur a ni tawh hleinem ?' Tiin a fanu Thla chu a rilru in, a be mawlh mawlh a. Pi. Hliri rilru na leh hrehawm ti chu a a tap chhuak hawm hawm a.


Chu tah,In ti pachang tak hian, an Y.M.A President Pu. Sawma(Pu.Vela te thenawmpa) chu dingin, hlauhawm a nih loh thu leh in hnuaiah Zawhte emaw thildang mai mai a nih thu sawiin Hmeichhe ho chu a thlamuan nghal thuai a. A nihna takah chuan a ni pawh chu a hlau ve tho mai. Mahse, a in ti huai lui ve ngat a.

A thlamuan ve tak nang a, hmeichhe ho erawh chu hlauhna in a man lak lawh tawh tlat.

Kalep-a chu a in ngaihtuah muk hle a, Clara-i thihnaah hian thil dik lo a awm em ni ? Thil fel lo a awm em ni ? Tih chu a ngaihtuahna luah bertu a ni a.


Pawna awm Tlangval then khat chuan Clara-i te in hnuai fiah tur chuan an chhuk a, mahse thawm chu reh leh dukin engmah hmuh tur lah chu a awm der bawk si lo a. Mak tiin an hawi an hawi ringat mai a ni. Engmah an hmuh tak lo ah chuan an chhuak ve leh mai bawk a. Mahse, an hlau ve hle tho mai.

An ngaihtuahna chu a in ang theuh hlawm a, eng vanga tianga rawn che nge a nih, a thih danah hian thil fel lo leh lungawi lohna a nei em ni ? Clara-i thihna ah hian thil in thup a awm em ni ? Chu thu chu, chu laia awm ho rilru ah chuan a awm vek a.

Hlauh lohna chi ni mawlh hek lo le, kha tia tui taka an zai lai khan an lumen mek te in hnuaiah thawm ring leh na tak a rawn chhuak a, an Ar ho lah an rak nawk nawk bawk nen. Chutah thli a rawn la thaw fuk fuk lehnghal. Tlangval pakhatin Clara-i te Ar dahna a va en nak chuan, an Ar pahnih ngawt mai hi a lo thi chu niin. Mak ti takin a en hu hu ringawt a.


Hlauhna chuan a man vek a. Mahse, an hmelah erawh tih lan loh hram an duh a ni. Hmeichhe ho phei chu an rilru ah engmah a lut thei tawh lo. Khatia vawi leh khatah tiang thil a rawn thleng thut kha mak tiin an hlau hlawm hle a.


Tui lo zet chuan, an zai ve leh mai bawk a. Apuii zun chhuak chu a mah mai chuan chhuak ngam hek lo le. An boruak teh hrep avang chuan zung pawh chu a hrehin a huhphurh em em a, mahse a in sum thei bik si lo a. Lawma leh Tluangi chuan an zui ta nge nge a. Clara-i te Ar dahna sir a zuninah chuan a han zung a. Chutia a zung zo, Apuii thlang lam hawi chhuak chuan, chiang em em mai hian, tuna an lumen mek an thiannu ni bawk Clara-i chu a thlang lawk ah chuan a lo ding kur mai le, chutah chiang tawk hian Clara-i chuan Apuii chu a lo melh kur mai a, a lo la kawk zui lehnghal. Apuii hlau lutuk chu a hmai hupin a au thawt a. A au thawm hriain Lawma leh Tluangi chuan an va hnaih thuai a, Lawma chuan,' Eng nge ni ta ? Eng nge awmzia,'tiin a zawt nghal vat a. Apuii, chuan a thil hmuhna lam a han kawk a, Lawma leh Tluang in Apuii kawhna lam an hawi chuan, engmah hmuh tur hi a lo awm tawh si lo a. Apuii lah chu, a la hlau nasa mai si a. Lawma chu kuahin a in sut faih faih a. Lawma chuan,'Apui, hlau suh. Khi engmah a awm hleinem. I hmuh sual mai mai a nih kha,' a han ti a. Apuii chuan,' Ni lo, ka hmu sual lo. Clara-i ngei a ni. Ka hmu sual lo,' a ti leh chuan. Lawma rilru chu a meng phawk nasa kher mai,'Eng tin maw i tih ? Kan thiannu Clara-i maw i tih ? Thinrim aw leh vin deuh lek lek chung hian a han ti a. Apuii chuan,'Aw ni e, ka hmu chiang a lawm. A ni chiang lutuk tlat.'a ti ve bawk si. Lawm an sawi zawm leh a tum lai takin, Apuii te thawt thawm hriaa pawna awm Tlangval then khat te Apuii te kiangah chuan an lo kal khawm vat hlawm a. Thil awmzia an zawt nghal a. Tluangi chuan,' Engmah a ni lo e. Apuii hi nalah a tawlh palh hlauh a lawm le. Engmah a ni lo e,' tiin a lo chhang thuai a. Awi chiah si lo, hlauhna rilru pai deuh tung chung chuan an kir ve leh mai bawk a. Lawma chuan Apuii chu zawh chhunzawm duh viau mahse hun a awm tawh bawk si lo nen, in chhung lamah chuan a luh pui ta thuai a.


Apuii hmel erawh a dik thei tawh meuh lo. A hmu chiang em lah tak a. Midang han tih phawk lek duh lo in engmah sawi lo chuan Lawma si chat chung chuan a thu a. A hlauhna chu a la reh mawlh lo.


Zan a rei deuh hnu chuan, an zai tui ve leh ta viau a. Mahse, Hmeichhe ho erawh thawm an hriat avang khan an hlauhna erawh a la reh thei meuh lo a ni. Thawm han ri deuh hlek se, an hawi phawk hra hlawm a. Zun chhuak leh in thiar tur a kal te pawh mahni chauh a kal ngam tawh hek lo le. Pahnih emaw pathum zelin an in zui chhuak a. He zan zet hi zawng, khua a var har an tiin zan rei ber an ti hial awm e a. An hlauhna chu a reh chiang thei meuh lo. An bula mipa thu te chu an fawp lo chauh hi a ni ber tawh a.


Hun chu tuma pawh din leh auh din rual lohin a kal ve bek bek zel a. Zing khua a lo var chuan, Tlangval ho pawh Thlan lai turin a haw sap sap a, Nu leh Pa ho pawh, Tlaivar ho chhawk turin an lo lut ve mek bawk a.


Nula ho erawh Clara-i te in chu an phiat fai ve mek bawk a. Apuii erawh Nu leh Pa thenkhat an lo thlen hnu chuan an in lamah a haw nal nal a. A hlauhna kha a reh mawlh hek lo le. In a thlen chuan a tawngtai ta tawp a.



*******************


Clara-i an vui ni atanga a ni thum ni zan a lo nih chuan Khaw har in riak ho pawh an lenna atang chuan an lo haw nghal sup sup a. Kalep-a leh Lawma pawh mutna phahin an mu zal ve nghal a.


Zan dar 11 a lo rik chuan Kalep-a bula mu Tlangval Pakhat Huliana chu zung turin a tho chhuak a. Pawn a han chhuak a, Zunin lam pan a, a phei lai chuan thli hi a rawn thaw sung sung a. Thli lah chu a vawn vin tuk lehnghal a. Zawhte lah chu Clara-i te in hnuaiah chuan a miau a miau lehnghal a. An kawm thlang Thing kungah lah zan danga hram ngai lo Chingpiri nu chu a hram ta dut dut lenghal. A zung zo a hawi chhuak chiah tih ah hian Clara-i thla ngei mai chu a hmaah chiang tak hian a lo lang thut mai leh, a lo then khum chiam lehnghal. Chu tah, kawh va pah hian rapthlak leh ring em em hian a nui vak vak lehnghal. A hlau lutuk chu zah pawh sawi lo in bak lengin in chhungah tlan lutin khur hlawk hlawkin Kalep-a leh Lawma chu a va bawh nawk nawk a. An ni chutia bawhtu awm ta na na na chu an harh rang nasa mai. Kalep-a chuan, 'Liana, Hulian eng nge awmzia ? Khatia i awm tak chiam chiam mai,' a han ti a. Huliana lah a la hlau nasa mai, a khur hlawk hlawk a. Engmah a la sawi rih thei lo. Lawma chuan tui lak sakin a pe thuai a. Huliana chuan Lawma tui pek chu in khawlh khawlhin a thaw hawk a. A hmelah erawh a la hlau hle a ni tih hi a hriat theih a. Huliana thawm a rin deuh hlek avang khan midang ho pawh an lo harh ve vek tawh a. Huliana chun a thil tawn a han sawi chuan midang ho chu an lo meng phawk hra hlawm a. Mak an tiin an hlau hle mai a. Kalep-a chu engmah sawi lo hian pawn lamah chuan a chhuak nghal thuai a. Lawma chuan a zui ve mai bawk a. Huliana'n a thil hmuh a sawina lam chu panin a ding ngawi vang vang a. Chutah,'Clara, eng nge i duh ? Eng nge sawi tur i neih ? Lungawi lohna i nei em ni ? Ka hmaah hian lo in lan ta che,' a han ti a. Mahse, chhang tu reng a awm lo. Thawm chu a reh tlawk tlawk a. Lawma chuan,' Tirawh, thianpa i lut teh ang. Kan thiannu hian duh a nei a nih chuan a lo in lar em em ang,' a han ti a. In chhungah chuan an lut ta thuai a. Midang ho chu an lo la meng thuap hlawm a. Kalep-a chuan,' Ti tawh u, Thiante u. Muthilh i tum ang u, engmah hlauhawm a awm lo a nia,' tiin a ni pawh chu a mu ve nghal a. Huliana erawh a thil hmuh avang khan a muhil ngam meuh tawh lo a ni e. Hlauna chuan la manin a la khur thei hial a. Kalep-a bul hnaih set ah chuan a in sawn ta daih a.


Khatia thawm an neih lai khan Pu. Vela chu lo harhin Huliana sawi kha a hre pha ve a. A rilru te te chuan,' Mambawih, i thihnaah hian thil in phum a awm a ni tiraw ?Eng nge i sawi duh chu ni ang le ? Vawikhat tal hmuh ve che ka va chak si em !' A ti rilru vawng vawng a.



Zan a rei tak hnu chuan midang ho chu an hnar leh suk suk tawh a. Huliana erawh a la muhil thei lo. A thil tawn khan a thawngin hlauhna in a la man miau a. Zing lam Dar 4 vel a ni tawh awm e. Clara-i te Chokaa bung bel an dah chu khawihtu awm tih hriat tak hian a ri ruk ruk a. Kukar te chu in hawng ang mai hian a ri leh bal bal thin a. Huliana chuan a hre chiang em em mai lehnghal. Hlauhna chuan rawn man nawn lehin a khur ti tih der a. Huliana chu rang zet hian puan a in lu khuh nghal vatin. Chutah tap lam chu a la ri rak rak lehnghal. Thaw ri leh hui deuh pap pap thawm chu a la ri ta deuh deuh lehnghal a. Midang ho lah chu an mutui em em tawh a. Pen thawm hriain, Pen thawm lah chu a lam pan hian a lo phei zel lehnghal. A bulah tawp chawtin, a en ngam der si lo. A ke lam atang chuan pawt tu awm tih hriat takin a puan chu a che hrut hrut zel a. A hlau mangang au chhuak thei bawk si lo chu, a khawngaih thlak let ling hial zawk a. A theih tawpin a puan chu a pawt ve tang tang a. Thil thang rim chhe deuh hi a rawn nam chhuak lehnghal. Tawrh thiam har a ti em em a, a thaw lo thei si lo. Au chhuah vak hi a tum a, mahse a au chhuak thei si lo. A mangang em em a, a hlau bawk nen. A bula mu Kalep-a lah chu engmah hre lo hian a mutui em em lehnghal a. Kaih thawh a sawi harh turin a che thei tawh si lo. Thawm chu reh dukin thil thang rim chhe em em chu a reh nghal mai bawk a. Minute 3 vel a nghah hnu ah thawm dang a hriat tak lo ah chuan a puan in lu khuhna chu la thla in a han hawi kual a, Current lah chu a thim lehnghal a. Favang tih takah khaw dur leh chhum tih vel awm hek lo, thla lah chu a eng em em lehnghal a, Pu. Vela te tukverh darthlalang atang chuan Thla eng chuan in chhung chu a en thei a. Chutia Huliana a dak kual Ventilation a lam a hawi chhoh lai tak chuan Clara-i thla ngei mai chu Ventilation ah chuan a lo dak kur mai leh chiang takin Huliana chu a rawn la melh zui. A hmai lah chu a dang var pup mai lehnghal, chutah a rawn la then khum chiam lehnghal a. Ventilation atang chuan rawn vak chhuakin In bangah te chuan a vak kual zut zut lehnghal a. Huliana hlau lutuk chu a zun hial a cheh a, a che sawn thei bawk si lo. A hmu chiang bawk si, chutah a mutna lu chung, in chung ah chuan a lo la vak phei ta deuh deuh leghnghal. Rawn chhiat khumin a rawn la nuih vur vur lehnghal a. Huliana chu thla nei se la a thlawk bo daih tawh ngei ang le. Tih theih a nei bawk si lo, a khawngaih thlak hial zawk a. Au chhuak turin chakna a nei lo a, che sawn turin chakna a nei hek lo.

A vanneih a siamin, Room lam atang chuan thawm a lo awm a, Clara-i nu Pi. Hliri chu zung turin a lo chhuak a, Clara-i thla leh thawm pawh chu a rehnghalin a bo ta daih a. Huliana lawmna chuan van a tawng hial awm e a. Sana a en chuan zing lam dar 5 hi a lo ri tawh a, tho nghalin a puan chu telin chhuah nghal mai a tum a, Pi. Hliri zung zo nen a in tawkin,'Liana, i va zing ve. Nizan lam te i mutui maw? Pi. Hliri chuan a han ti a,"Aw mutui e, nia zing karah kan Chulah an hnah eng ilo vel lak a ngai a, ka tho hma a nih hi,' Liana chuan a ti a. Pi. Hliri chuan,'A nih chu maw le,' tiin an khawhar hnem tura an riah pui avanga lawmthu te a han sawi a. Huliana pawh a chhuak ve nghal a. Chu ina riah leh chu a ngam tawh lo a ni. A thil tawn teh hrep kha a rap awm em a tin ni. Chhuan lam siamin, a chhungte a puan tel a lak tir ta tawp a.


Hun chu a kal ve bek bek zel a. Zan khat chu Apuii te inah hian Kalep-a leh Lawma leh Tluangi te chu Inpui lamah in kawm khawm hlawmin an ti ti ve siam siam hlawm a. Chutia an ti ti bawrh bawrh lai chuan Apuii te Choka(Kitchen) ah hian tu emaw a kal zuk lai hi an hmu hlawm a. A tirah chuan Apuii nau Nunmawii emaw an ti mai a. Mahse, engmah thawm dang hriattur a awm tak si lo ah chuan an ngaih chu a tha zan lo a. Kalep-a chuan,'Choka-a pen thawm leh kal thawm kha in hre ve em ? Mahse, tinge a reh tak daih a,' a han tih chuan a thiante pawh chuan an lo tuihnih ve tliar tliar hlawm a. Lawma chuan fiah tumin Choka lam panin a phei, Parda zarna a keu chiah chu, Gas chungah an thiannu, an hnung lawk a thi, an vui tawh Clara-i chu a lo thu run mai leh. A thih zana a kawr hak chiah chiah kha lo ha in a lo then khum chiam mai a. Lawma mak ti leh hlau lutuk chu a hnung tawlh rawk rawk a. A thiante ho chuan lo sawi nawk nawkin,'Thianpa, harh teh eng nge thil awmzia. Harh teh,' Kalep-a chuan a han ti a. Mahse, a chhang thei lo. Kalep-a chuan a han sawi leh nawk nawk a. Muang chang hian,'Clara-i,' tih chauh sawiin a thil hmuhna lam a kawk a. Midang ho in an en lahin engmah hmuh tur a awm tawh si lo a. Kalep-a chuan,' Thianpa i ti tak tak em ? Clara-i i hmu maw ? I mit vai a ni lo maw ?' Tiin a zawt nghal chung chung a. Lawma chuan chhang lem lo hian a lo buk khum nghut a. Mak an tiin sawi mai tur pawh an hre hlawm lova. An ngawih kar lai chuan Tluangi chuan,' A mak hle mai, kan thiannu chunga thil thleng hi. Eng emaw lungawi lohna a nei a ni ngei ang le. Kan khaw mi thenkhat te pawhin an hmu fo mai a. Biak theih dan hi han awm se aw,' a ti vawng vawng a. Midang ho pawh an ngaihtuahna a buai nak mai. A puii erawh a hlau thawng hle a. Mahse, sawi chhuah chi lah a ni si lo. Eng tak chu ni ang maw !An thiannu Clara-i chu hlauh a hnehin an khawngaih hle zawk a. Zan a rei tak hnu chuan an haw ta dial hlawm a.

Apuii pawh a thiante an haw hnu chuan, kawngka te kalhin a room lam chu a pan nghal a. A nihna takah chuan a thla a muang lo in a hlau thawng ve em em a. Mahse, a in ti huai lui ve ngat a. Kar loh ah a muhil ve mai bawk a.



Zan lai ah tak Apuii chu chiang em em hian a harh hlawl mai a. Mutna bul tukverh lama thawm ri rak a awm avang chuan a hawi nghal vat a. Chutah, Tukverh parhda chu thli thaw miah si lo hian khawihtu awm ang mai hian a puar leh pap pap thin a. Apuii chuan a en kar a, chu tukverh chuan a mit a la in mak a ti em em a. Chutah chu Tukverh chu a mah chuan a rawn in hawng thuai a. Apuii phu nasa lutuk chu a kang dawr thei hial a. Hlau thawng tak chung chuan Tukverh khar that tumin muang changin tukverh lam chu a pan a. A bul a thleng, tukverh a, a dak chiah chu a hmaah tak Clara-i chu a lo lang thut mai le. Apuii hlau lutuk chu a hnung tawlh rawk rawk a, a tlu nghal thuai a. Clara-i chuan rawn pan zelin hnai set sawt a bih pah hian,'Nang hian min hrai hlum a ni, i thih ve a ngai,' tiin a nuih khum vak vak a. A rak chiam chiam a. Apuii hlau lutuk chu a beng hup chawih chawih a, a huaisenna zawng zawng sawm khawmin, a tho chhuak a. A room atang chuan chak zetin a tlan chhuak nghal a. A nau Nunmawii room ah kalin Nunmawii bulah chuan a mu ve ta tawp a. Puana in bi lu khuhin a khur zawih zawih a. A hmuh dan kha a chiang em lah tak ah. A thil tih man chu a la hmu ngei ang le.


Kalep-a zing tho chu zan an hman liam taa an thil tawn chu mak a ti em em a. Miten Clara-i thla an hmuh thin thu an sawi te kha lo uak sak lem lo in a awi duh lo kha a ni a. Mahse, nizanah khan chiang takin a thianpa Lawma khan a hmu si a. A rilru chu kawm malh malhin,'Clara, eng nge i duh le ? Min hrilh tum i nei em ni ? Tinge, Thlamuang takin ila chawl thei lo em ni ? Vawikhat chiah ka mit hmuh ah hian lo in lan ve teh' Tiin a rilru chuan a ngaihtuah rauh rauh a. A dam laia an hlim thin zia te, a nui hmel te kha a mitthlaah a lo in lar zut zut a. A nu in chaw ei tura a koh takah chuan chaw ei turin Choka lam chu phur lo zetin a pan ve hna hna a.






Clara-i thihna pawh chuan thla eng emaw zat a liam leh tawh a. An veng a ti ti tui ber chu Clara-i thla an hmuh thu a ni a. A chang chuan a thawm chauh an hriat thin dan te, an thenawm khaw vengte'n zana an in hnuaia thawm an hriatte, an Ar leh Vawk te a rak chiam chiam te chu an hre thin a. Mahse, a mah Clara-i thla erawh an hmu si lo. Pi. Hliri leh Pu. Vela te pawh chuan an fanu chet thin dante, a thawm an hriat thin dan te chu an hre ve vek a. Mahse, a mah tak erawh a in lar thin si lo. Pi. Hliri chu mittui tla zawih zawih hian a fanu chu a au leh lawm lawm thin a.








Kalep-a leh a thiante ho pawh an tih thin dan ang bawkin October thla, Fullmoon zan lawmin Apuii te in kawtah chuan Spicy chhumin Thingpui te an lum pah bawk a. Guiter nen chuan an zai ve lang lang a. Chutia tudang ngai lo a an in kawm bawrh bawrh lai chuan, an bul lawk a Ui chu a rawn bauh tuarh tuarh mai le. Thim lam hawiin a bauh vak vak a, a chang leh a ngur leh chhur chhur thin. Kalep-a hawi chhuak chuan an piah thim chin a, Clara-i thla ngei mai chu, a va hmu ta mai le, a hmuh chuan a meng kawk a. A mit chu a nuai sawk sawk a, a mit vai emaw a in ti hial a. Mahse, Clara-i ngei kha a ni si. A thiante lam a han hawi chuan Clara-i thla chu hmu ve awm pawhin an lang lo. An ti ti bawrh bawrh a. Clara-i a hmuhna lam a han en leh a. Chutah, Clara-i chuan a lo hui lauh lauh a. Kalep-a chuan,"Thiante u, in hmu ve em ! Saw, Clara-i'n min hui a nia. Kal turin min duh a ni ang,' tiin Clara-i thla in a huina lam a han kawh hmuh a. A thiante ho in an han en ve a. Mahse, tumahin an hmu ve si lo. Kalep-a chu a tho thut a, chak zet hian Clara-i thla a hmuhna lam pan chuan a tlan dawr dawr a. A thianpa Lawma chuan a um ve nghal zat bawk a.









In ruak tawh leh tuma luah tawh loh hmunah chuan Kalep-a chu a lut hlawl a, in chung a neih tawh loh avang chuan Thla eng chuan chu in chhung chu a ti fiah em em lehnghal. In kil lama, a hnung chhawn zawnga lo ding hmeichhe lam chu Kalep-a chuan panin ,' Clara, nangmah i ni em ? Eng nge sawi duh i nei em ni ? Min han hrilh teh ?' A han ti a.







Chu Hmeichhia chu muang changa a lu chauh in herin, chiang takin Kalepa chu a melh kur mai le. A taksa hma lam erawh bang kil lam a la hawi thung. Chutah rawn then khum chiamin, rapthlak tak hian a nuih vak vak a. Chu tah,' Kei hi, thah ka ni. Lalhriatpuii khan min that a ni. Tura hrai hlum ka ni. Kha ni, Luia kan kal ni ah khan,' tiin a bo leh ta hmak a. Kalep-a chu eng emaw hian a lu ah tlakin ni khaw hre lo chuan a tlu nghal a.









A thianpa Lawma pawh lo thlengin Kalep-a chu an buaipui nghal sawk sawk a. An han bel chiang a, a lu atang hian thisen hlir hi lo chhuakin a mar an han dek a. A mar erawh a la tha viau lawi si a, Lawma chuan a han ko tuarh tuarh a, a sawi nawk nawk a. Kalep-a pawh thei leh thei lo hian a lo meng siar siar a. Chutah chiang zet hian a rawn meng kawk a. Amah chiang taka lo melh tu a thianpa Lawma chu melhin,'Clara-i kha thah a ni. Tura hrai hlum a ni,' a han ti chu. Lawma chu a meng kawk a.'Maw ! Eng nge i sawi awmzia ? Kan thiannu chu thah a lo ni maw ? Tunge a that tu ?' Tiin a thinrim em em a.


Kalep-a chuan," Thianpa, ni e. Ka hmangaih Clara-i kha thikna vanga thah a ni. I la hria ang tiraw ? Luia kan kal ni kha,' Lawma chu a lu a lo bu nghut a. Kalep-a chuan sawi zawm lehin,' Kha mi ni a Apuii'n Clara-i ei tur a pek thil funah khan Tur a tel a ni. Apuii hian min duhin min lo hmangaih a. Mahse, keiin midang ka lo neih tawh avangin tih theih a nei tawh si lo rilruna leh thikna avangin a thiannu chu a that ta a ni,' a tih chuan Lawma chu a sa ta phat mai le,' Hrep chuan le, mai mai tenawm lutuk.' Tiin chil a chhak pharh pharh a.


Kalep-a chuan,'Thianpa, in beng dai rih rawh. A mah a in puan nan ruahmanna kan siam dawn nia,' a ti a. Lawma pawh in beng dai leh thuaiin khaw lam pan chuan an in chhawm haw nghal a. Kalep-a chu an in lamah haw puiin Tluangi leh Lawma chu chiang zeta melhin,'Naktuk zanah kan inah lo kal ang che u. Thil pawimawh sawi tur ka nei,'a han ti a. Lawma chuan hrethiam tak hian a lu a lo buk khum nghal vat a. Mahse, Tluangi erawh a bo hle thung. Lawma chu a nui suk a.'Naktuk zanah i hre mai ang. Tunah chuan haw rih phawt ang,' tiin Tluangi banah chuan a kai a. An haw ve nghal a.






ZAN HNUHNUNG




Zan dar 7 a lo rik chuan Lawma leh Tluangi chu Kalep-a te inah chuan an leng phei a, an thian thumin an thu thap hlawm a. Kalep-a chuan,'Kan inah chuan sawi chi a ni lo e. Pu. Vela te inah i phei phawt ang u,' tiin a tho tharh a. A chhuak nghal a, Midang ho pawh chuan an zui ve mai bawk a. Pu. Vela te in tual an thlen chuan kawngka chu a lo in khar a,'Ka Pa. Vel, in awm maw ? Kan lo leng dawn a sin,' Kalep-a chuan a han ti a. Pi. Hliri chuan kawngka lo hawngin,'Khai aw, Kalep-a te ni reng che u chuan. Eng thli chhia in nge lo len luh tir nawlh che u a. Lo lut tawh u khai,' a han ti a. Lawma chu nui var var chung hian,"Thli tha zawkin mawle," a ti thuai a. In chhungah chuan an lut hlawm a.




He tih lai hian Apuii erawh in ah awmin a rilru a buaiin a lo hlauthawng em em a. Kha a thil tih sual kha a hre nawn awn awn a. A in chhir leh hnu hnawh a. Kha tih hun laia a rilru nat vang leh thikna avanga a thian tha ber a han that mai kha. Tun ah hian a in chhir em em a. Mahse, a sawi chhuak ngam si lo. Zep law law a, a tuk a, a Nutei te khaw lama zin daih a tum rilru a. A thiante ho lah chu zan danga lo leng ziah thin kha zaninah erawh an hmel chu sawi loh an thawm pawh a hre lo chu a nia. A ngaih a tha mawlh lo a ni e. A nu leh Pa Aizawl lamah zan khat riakin dam lo kanin an zin daih si a. A nau Nunmawii lah a thiante In ah Birthday lawmin a kal si a. A lo haw hun tur hriat ni bawk si lo. A mah chauh a han mut chu a hreh ve em em a. Mahse, Nutling a ni ve tawh a, a in ti huai lui ve ngat a. Zan a rei tak hnu chuan Apuii pawh mu turin a Room lam a pan nghal a. Kawngka erawh a kalh lem lo. A chhan pawh Nunmawii a lo haw hunah a tho peih dawn lo a ni tih a in hriat vang a ni a. Chutiangin rukru leh suam hmang tih vel an tawng ngai lo bawk nen, a in thlah dah ve hrim hrim a.



Kalep-a te thian thum, Pu. Vela te in a leng ta pawh kha, engkim hrilhin Clara-i thih dante, thah a nih dan leh a that tu pawh an thiannu Apuii a nih thu te, thikna avanga thah a nih dan te a sawi fai ta vek a.


Pu. Vela, Pi. Hliri leh Tluangi mak ti chu sawi mai na chang pawh hre lo chuan an ngawi tawp a. Tluangi phei chu mak hi a ti zual em em a. A ngaihtuahna a vak thui hman hle reng a. Kawngka chu rawn in kik in pawn atang chuan lawi luh dil thawm a lo awm a. Tluangi chuan rang takin kawngka chu a va hawn ta thuai a. An khua Y.MA President Pu. Sawma leh An Kum puan Secretary Pi. Mahlimi te chu an lo lut hlawl mai a. Pu. Sawma chuan, Kha Kalep kan lo tlai em lo maw, kan buai ve deuh hlek a. Duh angin kan lo hma thei lo a nih hi,' a han tih chuan,' Kalep-a chuan, Tlai love, lo thu rawh u khai,' tiin a lo chhang thuai a. Kalep-a bawk chuan,' Kan veng hruaitute pahnih ka sawmna chhan chu, thu hretu a tana ka sawm an ni a. Kum puan Chairman Pu. Sangbawiha a hman tak loh avangin Kum puan Secretary Pi. Mahlimi hi ka ko rawih a ni. A lo hman hlauh a, a lawmawm hle mai,' tiin Clara-i thih dan te a thih chhan te chu a sawi chhuak leh dap dap a. Midang ho chuan ngawi karin an lo ngaithlaa. A sawi zawh chuan a ruahmanna te chu a sawi leh par par a. A sawi zawh hnu chuan Zan rei lam mi mut vek tawh hnu an chang dawn a ni.


Kalep-a hian, Apuii te chhungkaw awm dan a lo hre vek tawh a. A nu leh pa an zin thu te. Tin, a nau Nunmawii Birthday lawmnaa a kal tur thute a lo hre vek tawh a. Apuii a mah chauh a, a awm tur thu a hriat avang chuan chu zan chu hun tha a ni tih hriain ruahmanna pawh siam a ni reng a ni.



Zan a rei tak hnu chuan an ruahmanna ang chuan Apuii te in lam chu an pan ta hlawm a.



Apuii muhil pawh an Choka lama thawm ri a hriat avang chuan a harh hlawl a. Sana a en chuan Zan lai 12:30Am hi a lo ni tawh a. A nau Nunmawii a nih ringin mut hilh leh mai a han tum a. Mahse, a thawm hriat ngai bawk chu a hre leh a. Bungbel tla ri a hriat avang leh an Choka a tui herh haw na te chu a mahin a in on avangin. Apuii chu a tho nghal vat a. A nau Nunmawii room a va en chuan a nau chu a lo la haw reng reng lo a. Chutah hlauthawng tak chungin an Choka lam chu fimkhur tak leh thin phu dep dep in a pan nghal a, an In pui atang chuan Choka lam chu a bih dek dek a. Mahse, a lang chiang thei si lo a. Parda chu keu dek dekin Choka a hmu chiang thei ta. Chuta a thil hmuh avang chuan a hlau lutuk chu a hmai a hup ta tawp a. Choka ah chuan a hnung chhawn zawng hian hmeichhe sam thlah hnuang, Kawr fual var vek ha hi a lo ding run mai hi a lo ni a.



Chutah chu nu chuan Apuii chu lo panin aw thum chher chhur hian,' Nang hian eng vanga min that nge i nih ? I eng pawi nge ka sawi?' A han ti a. A kawk a, a la nui vak vak lehnghal a.


Apuii hlau leh mangang chu a mittui a tla zawih zawih a, a khur hlawk hlawk a,' Ka thian, Clara ka tihpalh a ni. Min ngaidam hram rawh. I Hmangaih em em, Kalep-a kha ka duhin ka hmangaih ve em em a. Mahse, ka lam a lo hawi tak si lo ah chuan ka rilru na in ka that ta mai che a ni. Khawngaihin min ngaidam hram rawh. Khawngaihin lo in lan tawh suh. Ka thiam loh a ni,' a ti khur hlawih hlawih a.



A sawi zo chiah tih ah an kawng ka a tang chuan. An Y.M.A President leh An Kum Puan Secretary chu an lo lut nghal a. A hnungah Pu. Vela, Lawma leh Kalep-a pawh an lo lut ve nghal a. Apuii mak ti leh a ngaihna hre lo chu a hawi lawl lawl a. Clara-i thla ni a a hriat kha a thiannu Tluangi lek chu lo niin. A in thuamna leh a a sam a tawn that hnu chuan Tluangi chuan,' Lalhriatpui, min ti zak khawp mai. Ka thian chu i ni ve si a maw ! Mahni thiante nunna hial pawh la duh mihring ilo ni ang tih ngaihna ka hre lo,' tiin a biangah chuan a beng pawp a. Apuii lah lo in ring hman hek lo a tlu nghal thuai a. Midang ho chuan lo thelh nghal vatin. Pu. Sawma chuan,' Eng pawh ni se. Thil tisual tu chu kan man tawh a. A fiahna pawh kan nei a. Police lam te pawh an lo thleng tep tawh ang.' A han ti a. Apuii chu engmah sawi ngam tawh lo in hnuai lam bihin a kun chal mai a.



Kar lo ah Police pawh lo thlengin Apuii chu an hruai phei ta nghal a.


Kalep-a te ho pawh an in lam theuh panin an mu ta diak hlawm a. kalep-a chuan mang lo neiin. A mangah chuan a hmangaih Clara-i nen chuan in hmu in,' Kalep, ka lawm e aw. Tunah chuan, thlamuang takin ka chawl thei ta. Nang pawh thlamuang takin awm la. Nupui tha deuh nei la. Lo hlim reng ang che aw. Kei pawh ka hlim lutuk a nia,' Clara-i chuan a lo ti a. Kalep-a chuan,' Clara, ka ngai lutuk che a sin. I tello chuan engtin nge ka awm theih ang le. Min hruai ve mai rawh. I bula awm ka duh a ni,' a han tih chuan," Ni lo e, ka hmangaih tunah chuan nang nen hian kan awm dun thei rih lo a lawm. Nang chu hring chan khawvel ah ila awm si a. Pialral ilo pan ve hunah chuan kan pahnih hi tuman min then hrang thei tawh lo ang. Ka kal a hun e. Hlim takin lo awm reng ang che aw," tiin a ral riai riai a. A bo ta daih a. Kalep-a chuan a au lawm lawm a. Mahse, chhang tu reng a awm tawh si lo.


Chutah Kalep-a chu, a harh hlawl mai a, 'Clara, Ka hmangaih Mangtha aw,' tiin a mittui a tla zawih zawih a.







A tawp ta.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)