CHAKÂI RAMHUAI KOHCHHUAH NAN

Hlauhawm lampang hrim hrim hmun hrang hrang a mi lakkhawm...
Pjsstephen1997@
Posts: 43
Joined: March 8th, 2019, 9:44 pm

CHAKÂI RAMHUAI KOHCHHUAH NAN

Unread post by Pjsstephen1997@ » June 25th, 2019, 8:41 pm

CHAKÂI RAMHUAI KOH CHHUAH NAN.



Pjs



"Ramhuai i hmu châk tak tak a nih chuan, ram i riah leh hunah, thlam banah chakai hruiin kaihkherh la, i ṭawn bet dawn nia, tichuan zanlaiah ramhuai chu a rawn kal anga, a rawn ei ang, chuan i zuk bih dawn a nia".

Ramhuai hmuh chu ka châk alawm, chutia awlsam taka hmuh theih a nih chuan, ka han tichhin ngata.


Tlai lamah ka vau kawrah chuan chakai chu ka khawrh a, aikam lian tawk tak ka man chu thlam banah chuan kaihkhirhin ka ṭawn bet ta ngei a, zan tir lamah chuan vauah hian chingpirinu chu a thizun hluah hluah renga, hre ṭhang ta na na chu 'thi tak tak zun' tiha a hram pawh chuan ka hlau lem lo.

A hre ngai lo tan chuan chingpirinu hram hi ṭihawm ve tak a ni.


Zan dar 9 vel a lo rik chuan thlam hnuai chu a ri leh set set ṭhin a, ka chakai phuar beh kha a tal chhuah leh chhuah loh te chu ka ensek reng bawk. Eitu an la awm hauh lo mai. Ka pu min hrilh dannah kha chuan "zanlaiah ramhuai chuan a rawn ei ang" a ti kha a nia, Ramhuai chu hmuh ngei ka tuma, a ruk tak chuan ka hlauh zawng tak a ni a, mahse thil fiah nuam tichi ka ni a, dar 12 nghahthlen ngei chu ka tum ta a.

Ani chuan , "Chakai hi, ramhuai chikhat liantak mai hian an chaw tui tak a ni a, thlam hnuaia chakai i dah chu a rawn hmu anga, a rawn ei dawn a ni. Ramhuai kohchhuahna ṭha tak a ni a, nimahsela thlam chu a sawih vak vak dawn a , hlauh loh tum viau mahla, i hlau ngei ngei ang, kan pi leh pute chuan he thil hi thil ṭha tak a ni lem lo tih an sawi ṭhin a, chakai leh ramhuai hian inzawmna eng emaw tak an nei a ni, tihzen zen chi a ni lo tih i hriat hun chuan i hlau ve mai ang." A ti a, mahse kei chuan ka hlauh ka ring lem lo, eng nge chakai kaihkhirh a, ṭawn beh chuan ramhuai a koh bik kher ang ni ka ti a, tak tak a ni em tih chu fiah ngei ka tum ta a ni.

Zan dar 12 a thleng ṭep tih ah chuan thlam bul vel chu a ri leh huau huau ṭhin a, thli na tak rawn tleh tur ang mai hian thawm chu a ri ta reng mai a ni. Thlam chu a rawn nuai mai dawn emaw tih tur khawp hian a rawn chhem leh vuk vuk ṭhin a, boruak rit tak hian min delh a ni ber mai.

Tapah chuan ka ṭhu a, ka mei chhem te chu a alh ṭha duh tawh reng reng lo maia, boruak awm lo ang mai hian a alh lep lepa, reilo te ah a thi leh mai ṭhin.


Chhan eng emaw ni tak chu a awm ngei a ni tih ka hria a, thli in thlam a rawn nek leh sawk chang phei chuan ka ṭim leh sung sung ṭhin. Ka rin loh tak maiin thlam chu a su deuh dul dul reng a, mihring ke pen thawm ang mai hian ka thlam hmalamah chuan a ri a ri a, mahse a thawm chu ring tak a ni. Khephah lianpui mai ina, an ke an pena, ri deuh dup dup nen hian ka tehkhin ber mai..


Chu thawm chuan thlam chu a kalhual vel reng a, a thim muk mai bawk si. Han dah chhuah chu sawi loh, chet pawh ka che ngam reng reng lo.


Thlanglam aṭang chuan thlam chhuat chu zawi muang hian a rawn pawng ṭelh ṭelh a, ka chakai ṭawn behna bawr velah chuan a tawpa, thlam ban chu dawmtu an awm tih hriat tak mai hian a che dawt dawt a, rei lo te chhung chu a han chawl a, thlam chhuat chu a rawn nek ri leh rawp rawp a, a chiat mai a hlauhawm hle a ni.

Lehlam ka hawi vata, hmuh ka duh em em mai ramhuai a rawn kal takah chuan ka hmu hlau leh ta si. Ka hlauh em avangin zun ka cheh hial a nih chu mawle...

Chakai chu a ri ruap ruap a, a ei ta ngei a ni tih ka hriat chuan ka thla a muang sawt a, a ei zawh chuan a kal mai ka ring a ni.

A ei zawh hnu chuan thlam chu a su dul dula, a chim mai ang tih chu ka hlau hle. A chim a nih chuan min hmu anga, eng tin nge min tihdawn chu hriatthiam a har ngawt ang le..


A ei zawh a, a thawm a reh tak vang vang hnu chuan ka hlauh a la reh thei tlat lo. Khum chu ka siama, mut ka han tum chuan vawt ka tih em avang nge ka hre lo, ka khur ta dur dur maia, mei han chawmnung leh tur pawhin ka che hleithei ta tlat lo. Hrehawm tak a ni..



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)