RAMHUAI LIAM KÂWN

Hlauhawm lampang hrim hrim hmun hrang hrang a mi lakkhawm...
Pjsstephen1997@
Posts: 43
Joined: March 8th, 2019, 9:44 pm

RAMHUAI LIAM KÂWN

Unread post by Pjsstephen1997@ » July 6th, 2019, 9:30 pm

RAMHUAI LIAM KÂWN

Pjs

Zan a rei tawh hlê maia, ka ṭhianpa rawn leng chuan eng emaw hlauh rùk a neih avangin "Min thlah rawh" tih thu chu vawi nga lai a sawi a, dawih tiru tak chung chuan thlah chu ka remti ta a. Eng nge a hlauh ber lah chu a sawi thei si lo. A ruibuai lungpuamin a chhungte a hlauh vang a nih ngei ka ring ber a.

Kan khua chu khawlian a ni lo va, În pawh a inhlat hlawm hlê a ni. Varanda leh kawtkaia bulb chhit kan la intihhmuh lo va, kawng chu zan lamah chuam a thim êm em mai ṭhin a ni.

Ani thlah tur chuan ka chhuah pui ve ta a, kan in piah deuh lawkah chuan kâwn a awm a, chu kâwn sirah chu kêa kalna kawng te tak têin a tan tlang bawk a, zawh zen zen loh a nih avangin a bel hran lem lo bawk. Chu káwn piah lawkah chuan ka ṭhianpa te in chu a awm a, kâwn kan kal pelh chiah chuan naupang pahnih ém phur hi kan tawk a, pen sawm vela hla aṭang chuan an thilsawi thawm chu a ri nep nepa, hmanhmawh hmel zet hian a rawn kal phei zela, a thim deuh hlek avangin an hmel kan hmuchiang lo.

Kei chuan azan zana naupang lehnghal êm nena han chhuah chu(h) ka lo tineuh neuha, ka ṭhianpa hmel chu ka han ena, ka phone light chuan ka han chhun a, naupang pahnih lak ata chu a mit a lasawn thei ta reng reng lo mai. A mak timitmeng leh hlauhna mit meng chu ka hlau zawk hial.

Chung hmeichhe naupang pahnih te chuan min rawn hnaih zela, zan zana engvanga em phur nge an nih zawh tuma ka án zuau lai chuan, min lo kalpel fel der tawh mai, hnunglam kan han hawi a, kawnah tak mai chuan an han ding leh rih a, an inbe melh melha, thu tlem an sawi zawh chuan kawn aṭanga kawng te tak tê ah chuan pakhat a ding lamah pakhat a vei lamah pengin an inkalsan ta daiha.

Eng tak ti ang maw..?? Kawng a thim teh reng nen light an keng si lo va, engtin nge maw kawng an hmuh theih ni?

Ka ṭhianpa hnenah chuan ve kalhnaia, khawia kal tur nge an nih tih zawh ka duh thu ka han sawi a, ani chuan a lo rem ti lo nasa mai. Ramhuai an nih ngei a ring a, a lo hlau em em mai a ni.

Zantir aṭanga a hlauh em em chhan chu a sawi ta a. "Nizana ka haw lam paw'n hetilaia tuikhur koah hian (tuikhur lam chu a kawka) naupang pakhatin lehkhabu a lo chhiar melh melha, eng nge a chhiar ka hre lo, ka van pan hnaia, tu nau nge a nih hriat ka duh avangin, mahse ka thleng dawn ṭep tih a, hmanhmawh zetin a tlan phut a, hmuh a hlauh hmel em em mai lehnghal. Chutia a tlan lai chuan a phe zawk zawk a, rang tak mai hian sawtilaia kawng te tak tê ah sawn a tlan liam daih alawm. Chuvang a nia, min thlah rawh ka tih ni. Ka hlau lutuk chu chak deuhin kan in thleng ka tlan phah ringawt alawm." A han tikhur hlep hlep maia, ka ngaihtuah hian mak ka ti hlê a, naupang mak tak an ni nge, ramhuai zawk ni ang?

Chu kâwn piaha tuikhur bulah chuan kan awm reng a, boruak a vawt deuh suk bawk nen, an in lam pan a tum lai vel chuan, káwn lam chu kan han hawi phei leh a, tlangval pakhat meichher keng hi a rawn lang hlawl mai le.

Iptepui a ak a, a ipte-ah ah chuan thisen niawm tak hi a kainuan mai a, a hmel tak chu a meichher ken chuan a hliah a, a hmuhchhian theih hauh si lo. A meichher ken chu danglam tak a ni. A alh phe hlup hlupa, a eng pawh mei alh pangai ang a ni lo. A ipte ah chu a khawih a khawiha, a chang leh a zut a, kawng lehlam pan chuan zawimuang hian a phei a, a pen dawn chiah chuan a ipte chhung aṭang hian Mihring lú hi a rawn khai chhuaka, naupang lu a ni, hmeichhe naupang a ni tih pawh a hriat theih nghe nghe. Chu naupang lu a ken chu rangtakin a ipte-ah chuan a thun a, a peng bo leh ta a.

A va rapthlak em...!!! Chuti'ang thil chu ka piana hnu lamah ka la hmu ngai lo va, râpawm tak a va han ni chiang em. Va kalhnaih chu sawi loh, tuikhur bul aṭang pawh chuan kan la awmhnai mah mah a ni. Min rawn hmu thei phei sela chuan kan lú a la ve ngei ngei ang.

Chumi zan chuan thin phu dep dep chungin ka ṭhianpa te inah chuan ka riak ta daiha, haw leh ngam chi a ni lo a ni. Ka ṭhianpa nena kan thil tawn a chhungte hnena kan sawi chuan min awihsak chu sawi loh ruibuai lutuk thil hmusual mai kan lo ni. Nia, a awm ve tho. Mahse kan hmu ngei bawk si a, a ruk taka mangan a, hlauh em em mai chi keini pahnih tan chuan.

Zing khua a lo var chuan, zana kan thil hmuh ka phone-a ka lo la lo kha ka inchhir hle a, kan sawina apianga, a video nena kan hmuh zel chuan an awih ve ngei a rinawm a ni. Chhun khaw engah chuan kâwn chu hlauh chi ziazang a ni lo. A ven em avang leh kawng zau lai tak a nih avangin naupang ho tualchaina ber a ni bawk a, tuman an hlau lo vang. Chu kâwn lai takah chuan ka ṭhianpa nen chuan ka va dinga, ramhuai thla lak rem dan tur leh zan a lo thlen leh hunah chan na tur te kan han ruata, inphennan tiin tuikhur bulah chuan puan kan zar bawk a, chanchhuah a, an thla lak chu kan tum ber a ni. Finfiah ngam lo mah ila, an awm ngei a ni tih chu mite'n hre ve se, dawt kan sawi lo a ni tih chu hriattir ngei kan tum ta a ni.

Zan boruak a rawn inherchhuah leh chuan kei leh ka ṭhianpa chuan kan inah inkawmin zan hmasaa kan thil hmuhna hmuna kalnawn leh chu kan tum ta a, an rawn lang leh a nih chuan video-a lo lak pawh kan tum a ni.

Zanlai dar 11 leh a chanve velah chuan tuikhur bula kan thilsiamah chuan kan ṭhu ran tawh a. Boruak chu a reh hle a, khuangbai leh khauchher hram ri chu thawm awmchhun an ni mai. Thli chu a rawn thaw leh vuk vuk zel a, zan hmasa lama mi kan hmuh hun awmvel a rawn thlen pawh chuan kâwn chu a la rehruih renga.
Kan han nghak deuh renrawna, an rawn lan vat ring chungin kan thin pawh a phu dep dep reng a, mahse zan darkhat velah pawh chuan engmah reng a rawn lang thei lo va, thawm riva pawh a awm ta reng reng lo mai, haw kan rawt a, zan hmasa lama kan thil hmuh pawh kha kan mitvaiah kan puhthlu ta ringawt a.

Zan dangah pawh kâwn bulah chuan kan thilhmuh kha kan hmuh leh hlauh takin ti a, ka han ngaihchan chang pawhin kan hmu leh thei tawh reng reng lo mai a, kan han ngaihtuah chianga, khami zan leh a zan hmasa lama kan thilhmuh hunte kan han chhut a, calendar nena ṭang kawpin kan han enmil a, kan thil hmuh hun lai vel kha thlamang lai a lo ni a, thlamang zan ah an rawn inlar ṭhin ni ngeia kan rin avangin thlamang hun chu kan han nghak leh chhin ta a.

September thlamang zan a rawn inherchhuah dawn chuan kawn bulah a hmaa kan tih ang bawk khan ramhuai thla laknan tiin a channa tur pawh chu kan han siam leh a. A rawn lan ngei kan rin avangin chan chhuah ngei pawh chu kan tum ta a ni.

Thlamang zanah tak mai chuan tlai lam aṭangin a boruak a dang hle a, zan dar 11 a rawn thlen chuan a thim muk reng a, kan ṭhut ngawi reng lai chuan mipui phun mur mur thawm chu a rawn awm ta a, kâwn lam chu ka han hawi phei a, boruak chu a vir vel muai maia, a thim em avang erawh chuan tutute nge awm a hmuh theih loh thung. Mi an awm tih chu a hriat hle a, an thawm aṭang pawhin mi zavel dawnlai an nih ngei a rinawm.

Mak ve deuh chu he kawnah hian thlamang zan apianga thawm awm ṭhin si hi, tuman kan lo hre ngai lo hrim hrim a nih ngei a rinawm a, a hre bik nih leh a hmutua keini kan ṭang chu kan vanduai hle a ni.

Chutia kan thlir reng lai chuan ka phone chu ka han lekchhuak dawn a, ka han phawrh chiah chuan ka han hmet eng dawn a, a nung thei ta lo, a switch a on theih ta reng reng lo mai a ni. Eng nge a chhan ni ta ang? Thlarau mak tak takte hian kan awm a ni tih an hre ngei ang le! Zam leh khur chungin kan ṭhu kun tlawk tlawk a ni ber mai.

Hun rei lote hnu ah chuan kâwn chu a eng pup pup mai a, kan han hawi phei leh chuan meichher hi an lo keng a, an keng alh puat puat mai a ni. An hmel hmuh theih a ni lo va, boruak chevel ang mai hian an fawn hlurh hlurh a, chung chauh chu kan hmuhtheih awmchhun a ni mai.

An zinga pakhat chu ring tak mai hian a au lung lunga, an kalna tur lam niawm tak chu a han kawka, an haw haw dur dur a, ruam lam chu an panthla ta hlawm a.

A tawp bera kal naupang chuan kan lam a rawn hawi a, a hmel chu kan han enchianga, hnar pawh a nei lo, mit awmang hmuh tur pawh a nei lo, kâ pawh a nei chuang lo. A plane vek a ni tawp mai.

Chu naupangte chuan "Kan pem dawn a, kan rawn lang tawh lo ang" tih pah chuan a ṭe thla ruai ruai a..



Link:
BBcode:
HTML:
Hide post links
Show post links

Mawia32
Posts: 1
Joined: October 9th, 2019, 7:25 pm

Unread post by Mawia32 » October 11th, 2019, 11:37 pm

Hmmm

Link:
BBcode:
HTML:
Hide post links
Show post links

Pjsstephen1997@
Posts: 43
Joined: March 8th, 2019, 9:44 pm

Unread post by Pjsstephen1997@ » October 13th, 2019, 7:58 pm

Mawia32 wrote:
October 11th, 2019, 11:37 pm
Hmmm
Haha

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)