"HAW RAWH U." Ziaktu : Aaron Malsawmdawngzuala

Hlauhawm lampang hrim hrim hmun hrang hrang a mi lakkhawm...
Aaron Dustin
Posts: 214
Joined: March 14th, 2018, 10:15 am

"HAW RAWH U." Ziaktu : Aaron Malsawmdawngzuala

Unread post by Aaron Dustin » February 9th, 2020, 11:31 pm

A ni leh thla chu ka hre tawh lo, mahse 2005 emaw 2006 kum kha a ni tih chu ka hria.
Kan thian zingah hian a thawveng pawl leh engto nei lemlo ber hi ka ni ve a, picnic te, lui
kal te, chakai chhit te leh ram kal te hi nuam ka ti em em a, hlauh hi ka nei tlem ve khawp
mai. Mizo ah chuan palian ve pawl tak ka ni a, feet 5 leh inches 10 leh tlem vel chu ka ni
ve ang. Kan thian ho zingah pawh hian ka lian ber a, keima tawkah chak ka inti ve em em
a, insual te leh in tihbuai nikhua te hian a pawr ber ber leh a thinchhe ber chu ka ni ve
ang. Zu hi chu duh ve tak mai ka ni a, meizial leh kuhva lah ka heh em em bawk a, ka
hmeltha lemlo a, bialnu nei miahlovin kum 30 dawn lai chu ka hmang ve ta. Kan thianho
hi inkawmngeih tak kan ni a, mipa hlang chauh nilovin hmeichhia pathum lai an tel ve a.
Kan thianho hming hi han sawi ve ta mai mai ila, kei hi Marcus-a ka ni a, ka thiante chu
Sangtea, Hminga, Zautea, Estheri, Zodini, leh Kimkimi te an ni. Sangtea leh Estheri hi an
inngaizawng a, Zodini leh Zautea hi an inngaizawng bawk a, Kimkimi hian an college-ah
bialpa a nei a, mahse kan kawm ve ngailo. Kei leh Hminga hi luck lo ve pangngai, mahse
bialnu neih tum chuanglo, bemtu tawng ve ngailo leh vawikhat mah hmeichhe hmui
pawh la fawp ve ngailo kan ni. Awle, a thupuiah lut dawn ang aw...

Nikhat chu luia sangha man tumin kan inrawt phur a, kei phei chu phur fal tak ka ni.
Chumi ni chuan Sangtea, Zodini, Estheri leh Zautea, a plural bik ho te chu Maruti 800
ngei mai chuan an kal a, kei leh Hminga, val tolo pahnih te chu ka bike Velocity, (khatih
hunlai kha chuan a tluka bike nalh leh lar kha a awm bik kher lo ang.) chuan kan inphur
ve bawk a. Hemi ni hian zan riah tlang nghal kan tum a, kan lui kal tumna hi Sangtea min
hrilh a ni a, kan vawikhat kalna tur vek a ni. Sangtea chuan, "Ka thiante nen pawh hman
kum khan an kal a, thlam a awm nghal a, chutah chuan kan riak nghal." tiin min hrilh a,
chu thlama riah ve nghal pawh chu kan tum dan a ni. Sangtea te chu an hnungah kan zui
a, a kalkawng chu a thuiin kawng lah chu a chhe em em lehnghal. Darkar teh meuh kan
tlan hnu chuan kawng zawl tak leh zautak hi kan thleng a, meichhemna hnu vel te pawh a
lo awm a, mahse eng lui mah hmuh tur a awm lo. Sangtea chu a ding a, motor atang
chuan a rawn chhuk a, "Khai le, kan mamawh te kha phawrh chhuak ila, kan kalna tur
lam i pan ang ule." a rawn ti a. Kei chuan hrethiamlo takin, "Khawnge lui chu?" ka ti hu
a. Sangtea chuan kawngsira hnimbuk kara kawng tereuhte awm chu kawh pah chuan,
"Helai atang hian chhuk tur, abak kawng a awm lo." a la ti zui. Tichuan kan mamawh ang
ang te leh sangha manna tur hmanrua te leh buhfai te nen chuan kan ri thla ve ta rek rek
hlawm a. A kalkawng han thui zia chuh, ka zozial pawh pack khat kal pahin ka zu zo
hman lek lek tih ah chuan kan thleng ve ta a. Lui chu a zauvin a nuam em em a, a tui te
lah chu a thiang kak a, a thianghlim hmel em em bawk a. Chu lui bulah chuan thlam lian
vaklo hi a awm a, chutah chuan kan inghat a, kan insiam fel hnu ah chuan sangha man tur
chuan kan chhuak ta a. Kan rin ai takin sangha lah chu a lo tam a, kan man nual mai. Kan
lui kalna kawng a thui bawk a, sangha kan duhtawk kan hman zawh chuan khua a thim
dawn ta mai a. Tichuan kan sangha man te chu siamin eirawng te kan bawl a, chaw te kan
ei a, keilah chu chawheh tih takah ka'n lim leh nghek kha. Chaw te kan eikham a, thlam
chhungah chuan zial te zuin kan inkawm a, kan hlim dar dar hle mai. Rei fe chutia kan titi
ho hnuah chuan ka phone Nokia Eleven 100 ngei mai, whatsapp, facebook, music player
leh camera te chhawm ve lo, han hmeh en a, a screen rawn hring nghal vut mai chu ka
phawrh a, dar zat ka'n en a, dar 9:30 alo ri der mai. Mipa ho chuan, "A hun chiah e." tiin
kan funte te chu kan phawrh a, kan in a. Kan thian hmeichhia te hi ka fak ve em em na
chu, mipa ho zawng zawng hian zu kan in vek a, mahse anni chuan an in ve duh ngailo,
mahse kan zu inna ah te leh kan kalna apiangah te chuan an lo kal ve zel a, an hlim ve
thei em em tho. Tichuan kan zu te chu kan in a, kan kai fe tawh hnuah chuan dar 10 a pel
duai ta mai, mut zai kan rel ve ta a.

Thlam kawngkhar bul hnaih ah chiah hian ka mu a, midang an mut ve ngamloh vang a ni,
an dawih hi ka ti khawp a. Ka muhil lai chu eng emawni hian min ti harh zawk mai a, ka
harh chiang ngei mai. Kelawnga hnahthel ro rap ri ang deuh penthawm hi ka hre ta a.
Ramvak emaw, sa chang an awm anih ringin chuti teh ualah ka ngai lo. Mahse kan thlam
riahna lam pan chuan alo hnai zel a, pen ri chu alo hnai zel a, a ring tulh tulh lehnghal. Ka
awm chu a nuam chiah tawh biklo, enfiah hrim hrim tha in ka hria a, chubakah ka zun a
chhuak tho a, zun pah a va endik ka tum ta a. Ka tho a, thlam kawngka chu ka hawng a,
tumah ka hmulo. Ka bengchhe ri aniang tiin thlam chu chhuahsan in thlam atanga feet 30
vela hla ah chuan ka va phei a, ka va zung ta a. Ka zung zo let leh ka tum chu ka chhak
hnimbuk atang chuan patling rum tuah tuah ri hi ka hre ta a. Ka leh hawi a, hnimbuk chu
a che luih luih a, chutah le...palian em em mai, dum vek, a hmel hmuh theih miahloh
khawpa dum hi a rawn vak chhuak ta anih chu. A len dan em em chu e, kei hi palian ve
tak ft 5 leh inches 10 lai ka ni ve kha a nia, mahse kha palian lakah kha chuan naupang
kum 6 mi lek pawh ka tluk dawn em ni tih tur khawp a ni. Ka lam pan chuan a rawn phei
a, a hmel chu hmu theilo mah ila a mit a sen vek tih chu ka hmu thei a. Ka hlau ve ta hle
mai, tlanchhiat ka tum a, mahse ka che thei lo, ka ding khawng reng a. Au chhuah ka
tuma, mahse ka theilo, ka thlanfimin min bual zawih zawih a ni ber mai. Chuveleh min
rawn hnaih zel a, mitthi rim thang uih em em hi ka hre ta a, a rawn hnai zel a, a rim chu
ana telh telh lehnghal. A rawn kal hnai zel a, a lian tulh tulh lehnghal, ava han hrehawm
tak em. Rapthlak tak chuan a rawn nui phei a, khatih lai khan theih chu nise, vanram
emaw, meidil emaw, ka thlarau kalna tur ka ngaihtuah tawh lo, thih ka chak ngawih
ngawih, aww..ka nu ka van ngai tak. Ka hmaah chuan a rawn ding a, ka dak chho a,
arawn kun hniam a, patling sawm rual vel aw ang mai hian rapthlak takin ka hmaizawnah
chuan, "HAW RAWH U..HE LUI HI KA TA A NIH HI." a rawn ti ta mai a. Chuveleh
chak em em hian a tlan thut a, alo chhuahna ah bawk chuan a zuangthla leh a, keipawh ka
taksa chu a che leh thei ta. Ka thaw hawk a, ka thingthi hnawk a, a rimchhiat em avang
chuan ka luak ta nghek mai a. Ka ruih zawng zawng pawh a reh vek, ka hlau lutuk kha
awmngaihna ka hre lo. Hlauh nei ngai miahlo, thlahrang leh ramhuai tih vel awih ngailo,
fiah ngat zel tum, tu lakah mah la tlawm ngailo, kei mi huaisen ve tawk tak hi ka va
tlawm chiang em. Ka hnuk a ulh a, ri silovin chhuak em em in ka tap ta a. Ka tho vat a,
thlam lam chu ka pan ta a. Thlam ka hawng chu Zautea chu alo harh a, min rawn en a,
mak a tih hmel em em a, "Marcus, khawnge i kal a, tinge i mit te chu a sen vek lehnghal,
i tap anilo maw?" min ti a, chhan mai dan tur ka hrelo, ka tlawm a, ka inhmuhniam
ngawih ngawih. Ka thil tawn te chu hrilh ka tum viau nang a, Zautea hi adawih ve em
avangin a hlauh ka ring a, ka hrilh duh talova, "Ka va zun pahin ka va luak alawm le, ka
kai deuh mah mah a." tih pahin za lo deuh chuan ka nui suk a, thlam chu ka kalh a, ka mu
ve leh ta a. Mahse ka muhil thei mai hrih lo, ka rilru a insual nasa em em a. Engtia awm
zel tur nge, kan haw ang nge, zing khawvar kan nghak law law dawn? Mahse haw ka
rawt ringawt chuan a chhan min zawt ngei anga, ka hrilh chuan an hlauvin hmeichhe ho
phei chu an chi ai mai dawn si a, mahse ka hrilh loh chuan kha paliana khan min that vek
mai ang tih ka hlau si. Ka phone chu ka en a, zinglam dar 2 a ni tawh. Khua a var tep
tawh tho tiin ka inhnem a, ka tawngtai a, tichuan hriatloh laiin ka lo muhil ve leh mai
bawk a.

Rei pawh ka la muhil lovang tihah chuan Kimkimi au vak chuan min ti harh a, ka va hawi
phei a, a lo khur char char a. Midang pawh chu lo harhin Kimkimi chu kan buaipui a, kan
sawi vak vak a, mahse a melh ngai a melh reng a, a hlauh hmel em em a. Sangtea chuan,
"Kim, enge ni ta, engthil nge thleng?" tiin a zawt a, mahse Kimkimi chuan thlam tukverh
lam chu a kawk ringawt a, tukverh chu a lo in hawng huau a, kan mut hma khan kan khar
thlap si a. Minute 5 vel lai kan buaipui a, tui te kan in tir hnu chuan a ziaawm deuh ta a.
Sangtea bawk chuan, "Enge awmzia? Enge i hmuh a?" tiin a zawt a. Kimkimi chuan, "Ka
muhil lai kha ka harh thut a, chuan tukverh lam saw a rawn ri rek rek a, muangchang hian
tukverh chu a rawn inhawng a, kut hmul dur, lian em em hi a rawn lang a, chutah palian
tak, hmel mumal pawh neilo, min sen vek hian min rawn melh a, ka hlau lutuk chu ka au
vak vak a, a kalbo lehnghal daih a, ka hlau lutuk, ka hlau lutuk." a ti khur dar dar a.
Midang chuan mak an ti hlawm em em a, mahse keichuan hlau tho mah ila, min
barakhaih lutuk lemlo, a aia chiangin ka hmu tawh miau a. Hmeichhe ho chu hlauvin an
tap nghal pur mai a, ka hlauh ang chiahin thil a thleng ta. Haw mai an rawt nghal ta sup
sup mai a, chutih lai chuan Hminga chu a ding thut a, "Ehe..khawnge Zautea hi?" a ti a,
kan han in enkual a, kan lo ngaihtuah miahlo, kan zingah chuan Zautea a awm ve lo reng
reng. Chuveleh kan riahna thlam atanga hla vaklo ah chuan Zautea aw ngei manganga au
ri kan hre ta a, hmeichhe ho chu hlauvin an tap pur tawh mai. Ka thin in a tuar ta lo, eng
anga palian pawh lo ni se, ka taksa pawh lo thunun thei pawh nise, ramhuai emaw,
thlahrang emaw, ka thian te tan chuan ka nun pawh ka hlan ngam thu ka sawi chamchi
thin anilawm ni tiin ka huaisenna ka sawm khawm a, thlam banga chempui chu la in dan
rual lovin kawng khar ka chhuih hawng thuai a, ka tlan chhuak nghal a, midang chuan
min au nasa tih chu ka hria, mahse ka rilru ah chuan Zautea chauh a awm tawh. Ka
thiante chuan min rawn umzui em tih pawh ka hre chuanglo, Zautea au thawm rawn
chhuahna lampang pan chuan ka chempui nen chuan ka kal ta a. Ka phone torch light nen
chuan Zautea chu ka zawng ta a, chu lai hmun chu ka hriat ngai pawh anih loh avangin ka
kal risk pawp pawp a ni ber mai. Zautea chu ka zawng zel a, ka au vak vak a, mahse min
chhangtu an awmlo. Ka kal thui hman hle aniang, hnunglam ka hawi a, let leh dawn ta
ila, kan riahna thlam awmna ber ka hre tawh hauh lovang. Ka chawl det a, ka hah ve ta
deuh a niang, ka thaw hlawp hlawp a. Ka phone light chu a rawn thim ta thut a, ka han en
a, ka phone chu a thi hmak, a on theih ta hauh lo mai a. Ka awmna lai vel ah chuan
hmeichhe nui ri rapthlak em em mai chuan min rawn hual vel a, ka thinrimna zawng
zawng chu ahma ang bawkin hlauh lamah a kal leh ta. Ka thauvah min man a, ka
thlanfimin min bual leh ta, ka lo chhuak kher kher kha ka va inchhir leh hnuhnawh tak
em. Nui ri lah chu a ring telh telh a, "Tunge i nih? Enge i duh?" tiin ka au ve chiam chiam
ringawt a. Nui ri chuan min hnaih zel a, thawk leh khatah a tawp ta thut mai a. Second 10
vel a ral hnu chuan Zautea aw ngei chuan, "Marcus, min chhan rawh.." tiin mangan hmel
takin ka awmna atanga hla vaklo ah chuan min rawn au ri chu ka hre leh ta a. "Zaute, lo
mangang suh, kalo kal." tih pahin thawm lo chhuahna lam pan chuan ka tlan phei ta a.
Rei pawh ka tlan lo, ka sir hnimbuk atang chuan hmeichhe hlau leh mangang taka au ri hi
ka hria a, ka phone lah chu amah in a rawn eng leh a, rangtakin light ka on a, hnimbuk
chu ka en a. Hmeichhe au ri chu alo hnai telh telh a, ka chempui chu humin, "Lo chhuak
mawlh teh, ka sat khawp ang che." tiin ka tin ran mai a. A lo hnai telh telh a, alo chhuak
chiah chu ka va han sat teuh tehreng em. Zautea bialnu Zodini alo ni a, kan inhmu chiah
chu kan phudun chiang kher mai, kan au rual thawt a. Zodini chuan min hmuh veleh
chuan tap chungin, "Marcus.." tih pahin min kuah nghal a. Keichuan lo kuah letin,
"Zodin, hlau suh ka awm alawm." tiin ka hnem a, mahse zeplo chuan ka hlau ve reng.

Zodini nen chuan inkuah rialin thingbuk hnuaiah chuan kan thu dun a, "Engthil nge
thleng a? Khawnge midang an awm?" tiin ka zawt a, Zodini chuan, "Khatia i chhuah hnu
khan Hminga khan rawn umzui che a tum a, mahse kan hlau lutuk khan kan pawtbet tlat
a. Tichuan thlam kawngkhar chu kan khar a, kan kalh a. Thlamah chuan khur zawih
zawih in kan thukhawm a, kan thlam lampang rawn pan ni ngeiin kan hria, pen thawm
chu kan hre ta a, a rawn hnai zel a. Chuveleh kan thlam chu kal hualin kan thlam hnung
kan mutna lam zawk ah chuan a thawm chu a reh hmak a. Hlau taka kan reh thap lai
chuan thlam hnunglam bang chu a rawn beng ri ta vak vak a, aw rapthlak zet hian, "HAW
RAWH U, KA HRILH TAWH CHE U A NI LAWMNI?" tiin a rawn rak vak vak a. Kan
hlau lutuk chu kan tlanchhuak vek a, a thim em avangin kan tlan darh nuai a, tichuan ka
tlanchhiatna lamah ka hmu ta che a nih hi.." a ti khur dar dar a. Kan lui kal tawh ah chuan
ala fuhlo ber mai awm e, zan hrehawm tak chu ava ni chiang em. Ka rilru chu a hah
takzet, engtia chet han lak tur nge pawh ka hre tawh lo, ka buai vek hi ni ber mai. Zodini
bawk chuan, "Marcus, haw ang, haw vat ang, ka hlau emai.." a sawi zawh hma chuan a
chal ah chuan tui ni awm tak hi a rawn far a, a la phuan suah zui. Muangchang chuan
hawi chhovin ka phone light chuan kan han en chho a. Kan thil hmuh chu, ava rapthlakin
a va run thlak tak em. Kan thianpa Zautea ngei mai chu thing zarah chuan leichhuah tutin
chilphuan tla zawih zawih in alo in khai a, Zodini chala far pawh kha Zautea chilphuan
ngei chu a ni. A mitmu te chu a pawng chhuak vek a, "Khai leh." tih bak ka sawi thei lo.
Zodini chuan, "Awii ani theilo, Zaute.." tih pahin a au a, a tap a, keipawh nasa tak chuan
ka inseh ruh a, ka mittui a tla zawih zawih a. Zodini leh Zautea hi thla leh lawka inneih
tum an ni lehnghal. Zan lungngaihthlak tak zawng a ni, Zautea ruang chu lakthlak ngei ka
duh a, thingkunga lawn chu ka tum a, mahse Zodini chuan tilo tura min ngen avang leh,
chulai hmun chu kalsan vat zawk turin min tih avang chuan hreh tak chungin Zautea
ruang chu kan kalsan ta a. Kan kal ngai lohna anih avang chuan kawngpui chhuahna tur
kawng kan hre silo, kalkawng hre ber Sangtea lah chu khawnge a awm kan hre silo.
Sangtea chauh nilovin, Hminga, Estheri leh Kimkimi te pawh khawnge an awm kan hre
der silo. Mahse engpawh thleng se, kan thian zingah hian nunna chan chu an awm tawh
tur a nilo tiin ka thiante chhanhim chu ka hna ah ka dah tawp, achhan chu kha palian
khan haw tura min tih lai khan ka thiante bulah ka zep a, ka thiamloh angah ka ngai tlat a,
chuvang chuan ka thian dangte, Hminga, Estheri, Kimkimi leh Sangtea te venhim chu ka
kutah a awm a, ka zawng hmu ngei ang.
Zodini bulah chuan, "Zo, thlam lamah chuan va kal leh ang, khawnge midang te pawh an
awm tih te kan va en anga." ka tih chuan Zodini chuan alo duhlo nasa mai, "Aih...kha
thlamah khan ka let leh duh tawh lo, thlamah ber khan alawm a awm." a ti tlat a, mahse
keichuan, "Kan motor chahbi te pawh thlamah vek a awm a, chubakah nunna dang kan
chan belh ka phal tawhlo." ka ti a, min hnal nasa viau mahse ka tihluih tlat avang chuan
thlam lamah chuan kan let leh a. Sana ka en a, zing dar 3 a ri tep tawh. hun ava kal
muang tak, khua var vat se ka va ti em. Thlam chu kan thleng a, ka kawr hnungah chuan
Zodini chuan min pawt tlat a, thlam chu alo la inhawng huau mai a. A chhungah chuan
hlau chung chung chuan muangchangin kan lut a, tumah anlo awm lo. Kan motor chahbi
leh ka bike chahbi chiah kan la, abak kan bungrua te chu lak chi ah pawh kan ngai lo, kan
sangha man pawh kan ngaihtuah tawhlo. Thlam chu chhuahsanin kan motor dahna lam ni
a kan hriat kawng chu kan pan zel a, kan kal lam ang khan kawng te chu a awm tawh
miahlo hialin ka hria, kawng dang hlak ni mai hian ka hria. Kawngpui lam zawnga chu
ramhnuai tihbaiawm taka kan kal zel lai chuan, awi leh..patling rum ri kan hre leh ta. Kan
ding chat a, Zodini chuan min lo kuah nghal a, keipawn ka hlau ani. Rum ri chu thinrim
taka rum ri hi a ang ber. Kan hma feet 20 vel leka hla ah chuan thinkung atang chuan chu
kan ramhuai hmelchhe pa, palian tak mai chu a rawn zuang thla a. Rum em em hian a
mitmeng sen vek chuan min melh dun a. Thla eng lai takah a din avangin a hmel pawh
chu a hma aiin kan hmu chiang ta deuh. Mahse a hmuh chian lutuk theih chuangloh, a
hmai chu a hmul vek a, a kareh erawh a zau em em thung. a la rawn th(r)en th(r)u zui a, a
ha lah chu a sen huam lehnghal. Khur hlawk hlawkin Zodini chu ka hnungah a biru a, au
pawh a au ngam ta biklo. Ka chempui chu ka hum ruh a, "Tunge i nih? Engvangin nge
min tihbuai reng? Enge i duh?" ka ti vin tuar a. Chu palian chuan, "HAW TURIN KA
HRILH CHE U A NI LAWMNI? ENGE INLA TIH?" a ti vin khur khur a, a aw chu ava
han nelawmloh teh kher em. Keichuan, "Kan haw ang, mahse khawngaihin min kal bosan
rawh." ka ti a. Chu Palian chu thawk leh khatah a au ta ruai ruai mai a, chu kan awmna
ramhnuai chu a khawk rum rum mai a. A ring lutuk chu Zodini nen chuan kan beng kan
hup a, kan maimitchhing a. Thawm chu a reh a, kan han meng leh chu a lo awm tawh lo.

Hlau chung chung chuan kan kal ta zel a, khua lah chu a var thei lo amaw tih tur a ni, hun
a kal muang em em a, dar 3:30 a ni. Thui ve deuh kan kal hnu chuan kawng kawia kan
kal leh tur chu kawngsira Sangtea lo let reng chu kan hmu ta a. Rang takin kan va pan a,
kan sawi vak vak a, minute 10 vel hnuah chuan a rawn harh a. A rawn thu chhuak hlawl
a, "Khawnge.....khawnge khapa kha?" a rawn ti a. A meng phi ruai mai, keichuan ka kuah
bet a, "Sangte..Sangte....hahdam rawh..keimahni kan ni e, hlau suh." ka ti a. A zia deuh
hnuah chuan thil awmzia ka zawt a, Sangtea chuan, "Khatia thlam atanga hlau taka kan
tlanchhuah khan Estheri nen kan tlan hrang dun a. Kan hlauh em avang chuan midang
pawh ngaihsak tawh lovin kawngpui lam kan pan nghal a. Kalkawng ka hriat avangin
Estheri nen chuan kan kal zel a, mahse ka hnungah Estheri'n min lo zui ve reng amaw ka
tih lai khan ka hawi let a, alo awm tawh miahlo. Tichuan ka zawng kual a, ka au vak vak
a. Mahse min chhang silo, ka hnung atang chuan kut vawt tak hian ka tukhumah a rawn
khawih a. Ka rak vak a, ka hawilet a, palian em em mitmeng sen rum leh hmai hmul vek
hian minlo melh reng a, ka au vak a, ka thidang aniang, engmah ka hre zui lo." tiin a thil
tawn chu min hrilh a.

Kan pathum chuan kan thukhawm a, Sangtea bulah chuan, "Sangte, kalkawng i hre tho a,
nangin Zodini hi lo han haw pui la, ka thian dang te hi ka lo zawng anga, khaw var hunah
khawtlang ho leh venghnai thenawmte emaw hrilh ula, engkim a fel leh vek mai ang." ka
ti a. Sangtea chuan, "Enga? I mawl ami? Tunah haw ang u...mahse ala hla ania, kan kal
chhungin khua chu a var mai ang, anih loh chuan helai hmun hi damin kan chhuak lo
ang." a ti a. Mahse kei chuan ka thiamloh vek a nih thu leh, ka thil tawn te, Zautea boral
thu te chu ka hrilh ta vek a. Sangtea chu a kun a, a in hnit feih feih a, a rawn hawi chhuak
a, "Nangmah mai chuan ka awm tir lovang che thiana...kan thian dangte chu kan zawng
ho tur a ni." a ti a. Mahse haw tura ka tih tlat avang chuan a car chahbi te chu pe in min
hawsan turin ka ti a, hreh tak chuan an kal ta a. Keipawh chu ka chempui leh ka phone
light dim tawh tak nen chuan lui lam chu phur fahran lo chuan ka pan thla leh ta a. Sana
ka en a, dar 4 ala ri lo, khua ala thim vek tho, ka phone battery pawh tum 2 chiah a awm
tawh. Midang phone dawnin signal chu chhete mah a awm silo, mahse ka intiam tawh
angin ka thiante chu ka zawng hmu ngei ang, ka nunna in chan dawn mahse, ka zawng
hmu tho tho ang tiin ka infuih hram hram a. Lui chu ka thleng a, ka thingthi a, ka
tawngtai a, "Lalpa, khawngaih takin min pui ang che...ka nunna pawn chan dawn mahse
he ramhuai lak ata hi ka thiante tal chu chhanhim hram ang che." tiin ka dil mawlh
mawlh a, ka tawngtai zo chu ka tho chhuak ta a.

Ka chem chu hum ruh sauh sauh in,
"Zawnga...hmela..lo chhuak rawh le, hei ka lo kal leh ania, khawnge ka thiante i dah,
sawi rawh...i ngam chuan mipa takin in hmachhawn ila." ka ti a, ka inhrosa nasa kher
mai. Ka nghak vang vang a, boruak lah chu a reh em em lehnghal. Chuveleh nasa takin
thli a rawn tleh a, tui te chu a so bulh bulh mai a. Chutah tui a tang chuan mihring pahnih
hi an rawn lang nawlh mai a, khawmual ah chuan tui chuan a rawn len chhuak a. Rang
takin ka va pan phei nghal a. Chumite chu ka thiante pahnih Estheri leh Kimkimi te an ni.
An bul ka thlen chuan boruak thaw vuk vuk te leh thli thaw nasa tak te chu a reh nghal
thiap mai a, ka thiante chu an lan dan chuan an thi tawh a ang khawp mai. Nasa takin an
awm te chu ka nem a, an ka chhungah te thaw lutin ka thiam ang ang chuan chhanhim ka
tum a, ahnu deuhah chuan Kimkimi zawk chu a rawn harh a, tui a rawn chhak chhuak
bawrh bawrh a. Min hmu chu lawm tih hriat tak hian min rawn kuah nghal a. Kan pahnih
chuan Estheri chu kan buaipui leh a, theihtawp kan chhuah hnu pawn a harh ve thei tlat
lo. A taksa chu a vawt vek a, Kimkimi chuan tap chungin, "Harh rawh, Essy,
khawngaihin.." a ti a, a awmah chuan a nem vak vak a, mahse a harh theilo. Estheri chu a
mar ka'n dek a, mahse nunna a nei tawh lo, Kimkimi nen chuan kan tap dun a. Chulai
hmunah chuan minute 10 vel Estheri ruang kan thutchilh hnuah chuan Kimkimi chuan,
"Marcus, enge thil awmzia?" a ti a, tichuan ka thil tawn te leh Zautea pawh a thih thu te,
Sangtea leh Zodini te chu haw kawng an pan mek thu te leh an mahni zawng tura kal ka
nih thu te chu engkim ka hrilh ta vek a. Kimkimi chuan tap zawih zawih in, "Engati nge
helai hmunah hian kan kal kher le? Kan damchhuah ka ring lo, thilthleng hi a rapthlak
emai.." tiin a tap zawih zawih a. Keichuan kuah pahin, "Kim, hlau suh...khua pawh a var
tep tawh ang, ahrim hrimin engtin nge luiah hian i awm theih a?" tiin ka zawt a. Kimkimi
chuan, "Kha ramhuai khan i chhuah hnu khan kan thlam riahna atang khan min um
chhuak vek a, keichu Hminga nen kan kal a. Sangtea leh Estheri te chu an tlan hrang
bawk in ka hria. Hminga nen chuan kan tlanchhe zel a, nui thawm hian kan hnungah min
zui char char bawk a. Ka hlau lutuk, ka chau tawh bawk si chu ka ke ka bilh a, tichuan ka
tlu ta a. Ka lum tih chu ka chiang, mahse khawi lai lai ah nge ka lum ka hrelo, chuan tui
ah ka tla tih ka hre leh a, abak chu ka hre tawh lo. Tunah hian khawnge Hminga chu a
awm pawh ka hre lo, ka hlau takzet ani." a ti khur dar dar a.

Keichuan, "Kimkim, hawh teh..tilai hmun hi chu a him lo ang, in tlanchhiatna lam chu
min kawhhmuh la, khawnge Hminga pawh chu a awm kan zawng dawnnia, kan hmu em
em ang, hlau suh..ka awm hi." ka ti a, Kimkimi pawh chuan min zui ve mai bawk a,
mahse a phur loh hmel kher mai. An tlan chhiatna lam awm angah chuan min hruai ta a,
khua pawh chuti lutukin a thim em em tawh lo, mahse light tel lo chuan kalkawng hmuh
a la har em em thung. Eng em em tawk lo chuan kan kal zel a, Hminga chu kan au a,
mahse chhanna engmah kan dawng lo. Thui fe kan kal leh hnu chuan zinglam boruak
vawt ve pangngai tak ni si kha a rawn lum ta pup pup mai a, thil tawih rim ni awm tak
rimchhe zet mai hi a nam em em bawk a. Chuveleh kha paliana aw ngei mai khan
tihbaiawm tak hian, "HE LAI HI KA RAM CHHUNG A NI A, KA LUI A NI KA TI
TAWH ANI LAWMNI? I LA RAWN LET LEH NGAM A NIMAW?" a ti dur dur mai a,
Kimkimi chu a au tuar a, min rawn kuah nghal. Ka chem ka hum a, ka huaisenna zawng
zawng leh ka pa huaisenna tlem puk belhin ka inti pa lui ve ta a, vin zet hian, "Aw...ka
thiante pahnih nunna ila a, tunah chuan ka that ve thung tawh dawn che..lo chhuak ta
che." ka ti a. Kimkimi chuan kuah nghet tawlh tawlh lehghal. Chutah le, ka lo cho chhuak
kher kha ka va inchhir em. Chu kan ramhuai paliana chu kan sira kham awih vaklo atang
chuan a rawn vak chhuak a nih chu, muangchang chuan Kimkimi nen chuan kan tawlh
hnung a. A chetdan rapthlak tak avang chuan keipawh hlauhna hlirin ka khat leh ta. In tih
huaisen chawp ka tum a, mahse a har a ni. Chu palian chuan bawkvak chung chuan min
rawn pan phei a, a rap hian ka rap ngawih ngawih a ni ber mai. Chuveleh a rawn tho kang
a, a nui ta vak vak mai a, hall chhung ang mai hian chu ramhnuai chu a khawk leh ta rum
rum mai. Ka hnunga ding Kimkimi chu a t(r)e thawt a, a thal nghal tawp. Ka hawi let a,
ka hma zawna thil dum rawn thlawkfua chu ka hmu hman, mahse ka bek a ri chawrh a,
leiah chuan ka tlu thal ve tawp bawk a. Ka lu a hai em em a, engmah ka hre mumal lo. Ka
mit men ka tum a, chianglo ruaiin chu paliana chuan ni zung lo chhuak set set chu a thlir
a, muang changin a kham lamah chuan a bawkvak thla leh ta a, keipawh chuan engmah
ka hre zui tawh lo. Ka harh leh chuan kan kal lama kan motor park naah khan ka lo awm
a, mi 10-15 vel hian minlo bawr hut hut a, khua pawh alo var tawh. Ka harh tih an hriat
chuan minlo be sap sap hlawm a, Kimkimi, Zodini leh Sangtea te ka hmu a, tichuan ka pa
pawh ka hmu bawk a, ka dam huai thei hian ka hria. Kan venga ka hmelhriat te ka hmu
nual bawk a, Sangtea leh Zodini te chuan buaina em em tawk lovin kawngpui an han
thleng a, mi tanpuina dil in kan chanchin te an sawi a, tichuan venghnai thenkhat te chu
in phone kualin min zawng turin an lo kal khawm a, Kimkimi'n tih harh tuma minlo sawi
vak vak lai chu min rawn hmu ta hi alo ni a. Kan thianpa Hminga erawh an hmu zo talo a,
mahse ahnu kar 2 hnu velah a ruang an chhar a ni.

Kha kan ramhuai palian chungchang
kan han sawi leh pawh khan khami lui bula venghnai ber a pitar pakhat sawi dan chuan,
kum 1990 kum khan khami luiah khan a fapa alo tlak hlum tawh thu leh, kumdangah
pawh kan lui kalna ah khan mitthi ruang tam tak an lo chhar tawh thu min hrilh a, kha
kan ramhuai palian pawh kha tunge a ni tih hai rual a ni talo, kha lui khan huai alo nei
ngei a niang. Hemi hnu hian ram kal leh sangha man tih vel chu ka kal tawh ngai miahlo
a, mahse kum a vei deu hnuah, zan riak nilo, thim hmaa haw leh hman tur chuan ka kal
ve leh zeuh zeuh tho a. Khati lai hmun kha vawikhat mah ka kal leh ta ngailo a, ka thiante
pathum ngawt kan chan phahna, kha lui tihbaiawm takah khan ka thian damchhuak te
pawh kha an kal nawn leh tawh chu ka ring biklo. Tun thleng hian ka la dawih phah a,
tlema palian hang deuh ka hmuh phei chuan kha kan ramhuai paliana kha ka hrechhuak
ziah. Mahse khami hnu atang khan ka thiannu Kimkimi nen khan kan inngaizawng ta
daih a, tuna ka nupui ni mek pawh hi a ni. An college-a a bialpa nen khan an inthen nghal
hmak a, khami kan thil tawn rapthlak tak atang khan kei val senior lam pan tawh hian a
vawikhatna atan kum 10 chuang ka thiannu lo ni tawh, ka duh ngai miahloh Kimkimi chu
ka bialnu a ni ta daih mai kha chu a dangdai ka ti ve hrim hrim. Thil mak deuh pakhat ka
tih chu ka thianpa Sangtea khan ahma pawn kha luiah khan kan kal tawh a ti si a, mahse
an kal t(r)um a engmah an tawng velo kha a ni.

A tawp ta.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)