KA U EMILY ZODINPUII KHA (by : Aaron Malsawmdawngzuala)

Hlauhawm lampang hrim hrim hmun hrang hrang a mi lakkhawm...
Aaron Dustin
Posts: 214
Joined: March 14th, 2018, 10:15 am

KA U EMILY ZODINPUII KHA (by : Aaron Malsawmdawngzuala)

Unread post by Aaron Dustin » February 29th, 2020, 2:46 pm

KA U EMILY ZODINPUII KHA
(Mizo Fiction Story)

Story by : Aaron Malsawmdawngzuala

Ka hming chu Lalthansiama a ni a, Siamte tiin ka thiante chuan min ko thin. Kan chhungkua hi pali kan ni a, ka nu leh pa, kei leh ka u Emily Zodinpuii te kan ni. Chhungkaw hlim tak leh inngeih tak kan ni a, ka u Emily nen pawh thian ang maiin kan inkawmngeih em em a ni. Ka pa hi Police Assistant Sub-Inspector a ni a, ka nu erawh inchhung enkawl tu ber a ni. Ka u hian college a kal a, kei erawh pawl 12 zirlai ka ni. Ka pa hnathawhna tur an sawn avang chuan khaw dangah kan pem angai ta a, pawl sawmpahnih pawh chu kal chhunzawm lo chuan ka chawl rih ta ringawt a. Chumi khua a kan awmhnu chuan pawl 12 pawh chu a bul atang bawkin ka kal leh a, ka u erawh engmah a tih zawm hrih talo thung a ni. A theih ang angin ka nu chu a pui ve thin a, ka nu pawh a hahdam phah thin hle. Kan in luah hi assam type a ni a, lian lutuk lo mahse kan chhungkua erawhin kan lungawipui em em thung. A hmun hi a fal angreng hle a, tuikhur pawh kan hnaih angreng hle bawk a ni. Kum chanve dawnlai mai kan awm hnu chuan ka u chu a damlo ta vak mai a, a khua a rawn sik a, a luak vak vak a, chaw pawh a ei ngai ta meuh lo. Doctor kan han rawn lahin, "Khawsik satliah mai mai a nih hi..." a ti liam mai zel a, mahse a dam thei tlat lo. Tlai khat chu ka pa chuan, "Bawiha, chhung inkhawm hmang ila, ril te pawh a tam tawh alawm, i u va ko rawh le." a ti a, ka u room lam chu ka va pan phei a. Ka kik a, "U..lo chhuak la, chhung inkhawm kan hmang dawn." tiin ka ko a, mahse min chhang lo mai pawh nilovin thawm engmah a awmlo. A muhil anih ringin a roomah chuan ka lut a, ka U chu khumah chuan lo bawkkhup in zawi te te hian alo phun sep sep a. Ka va kal hnai a, "Ka U, i tawngtai ami?" tiin ka fiam a, mahse ala phun char char. A phun ri chu ka ngaithla chiang a, engmah awmzia ka hrelo. Sap tawng a ni silo, mizo tawng pawh ani chuanglo, enge a sawi chu ka hrethiam thak lo ani. Ka ko leh a, min chhang chuang lo. A hnunga ben vak vak pah chuan, "Ka biak che chu i hrelo ami?" tiin ka vin vak a, harh chhuak thut ni awm tak hian a rawn thu chhuak hlawl a, phawk hru hian min en a. A hawi kual a, min en leh a, "Enge?" a ti hu ringawt a. Keichuan thinrim deuh tak hian, "Chhung inkhawm kan nei dawn ka tih mawlh mawlh kha.." ka ti a, Ka U chuan, "E..awle." tih pah chuan khum atang chuan a chhuk a, room atang chuan a chhuak ve mai bawk a. Mak ka ti angreng hle mai a, khatia ka U lo phun mawlh mawlh mai leh ka biak pawha min chhang miahlo kha amak ka ti a ni. Ngaihthat lohna em em pawh nei chuanglo chuan chaw chu ka ei a, ka u pawh chu engtin mah a awm leh tawh chuang lo. Lehkha ka zir duhtawk hnu chuan sana ka en a, dar 10 alo pel der tawh mai. Mut tuma ka insiam fel lai chuan ka u awmdan kha ka hrechhuak a, ka ngaihtuah riau mai a. A room ah chuan ka va kal a, mu chungin phone alo khawih mawlh mawlh a. A bulah chuan ka va thu a, "Enge ni ta Siamte?" a lo ti a. Keichuan, "Eng nilove, tlaia chaw kan ei hma khan ka koh vak vak che khan tinge min chhan miahloh a?" tiin ka zawt a, ka U chuan, "Aww..ka muhil aniang chu." tih ringawtin min chhang a. Engmah sawi lo chuan ka chhuak a, ka room lamah ka phei a. Zan dar 11 vel a ni tawh a, games ka la khelh tui em avangin ka la mu peih lo. Chutia tui taka games ka khelh lai chuan pawn lamah chuan phun bul bul ri hi ka hria a, tlangval ho leng haw titi ri mai mai angah ngaiin ngaihtha tak chuan games chu ka khelh zawm leh mial mial a.

Mahse chu tawng thawm chu a ring telh telh hian ka hria a, ka phone dah in ka'n ngaithla chiang a, chu phun ri chu ka hriat tawh hnu a ni tlat mai. Tlai chaw kan ei hma a, ka u khuma bawkkhup chunga lo phun bul bul ri nen khan a in ang chiah ani. Mak ka tih em em mai bawk chu khatia ka u a phun bul bul khan, a phun ri kha ka u aw a nilo hrim hrim bawk, hmeichhe dang daih aw a ang hle a ni. Chu phun ri bul bul mai chu ka u a nih leh ringin ka room tukverh ah chuan ka dak chhuak a, ka u ang deuh mai kan in kawt electric ban bula lo ding bu luk luk chu ka hmu a. A phun chu a ring telh telh lehnghal, ka room atang chuan ka chhuak nghal a. Ka u room ah ka va lut a, ka hlauh ang ngeiin alo awmlo. Pawnah chuan ka va chhuak a, alo la ding reng a. A ding lai chu a bu luk luk a, a rapawm angreng hle. Ka va kal hnai a, "Ka u...enge i tih a?" tiin ka va ko leh a. A ngai te bawkin min chhang lo chuan a phun zawm char char a, ka ngaih a tha tawhlo takzet. Ka va kal hnai a, ka sawi nawk nawk a, "Ka u, enge i tih, ka u ka u.." tiin ka be mawlh mawlh a. Ahma ang bawkin a phu zuk a, phawk hru hian min rawn en a, "Enge...tinge hetah ka awm?" a ti leh ta hu mai a. A ngaihna ka hrelo hle, "Tinge ti hian i awm a? Enge pawnah hian i tih? Chuan, tunge i biak a i phun mawlh mawlh a?" tiin ka zawt a, ka U chuan mak tih hmel tak hian, "Ihh..englo, ka chhuak mai mai, lo kal rawh, lut ang, mut a hun." tiin inchhung lamah min luhsan nghal daih mai a. Ka u awmdan chu mak ka ti hle mai a, mahse a tho a anih ringin ka ngaih ka ti tha lui a, mahse a nihna takah chuan ka ngaih athalo takzet. Inchhungah chuan ka lut a, ka roomah lutin ngaihthalo tak chuan ka mu a, hriatloh laiin ka lo muhil ve leh ta mai bawk a. Ka rilru chu a nuam chiah tawh lo a ni, ka u chungah hian enge thleng ta ang le? Tunge a biak thin hi ni ang, tumah awm silo khan midang bia ang maiin a phun ri bul bul zel a, mahse a bulah tumah an awm ngai silo. Chu mai nilovin a thil sawi awmzia hi ka hre ngai silo, mizo tawng anih loh mai bakah, sap tawng pawh anilo, vai tawng a ni pawn ka hrelo, eng tawng nge ka hrelo, zeplo chuan ka hlau deuh reuh a ni. Atuk zing chaw kan ei lai chuan ka u chu ka en reng a, pangngai tak chuan a awm a, thil engmah thlenglo ang maiin tui ti takin chaw chu a ei mawlh mawlh a. Ka nu chuan, "Emily, tukin chu i chaw ei a va tui ve...i dam deuh dawn tan a niang aa.." a ti a, Ka U chuan, "Ka hre biklo, tukin chu ka dam riauvin ka hria, chaw ka ei lohna a rei tawh bawk a, ka ei teuh dawn." tiin a bar mawlh mawlh a. Ka pa chuan nui sang chung hian, "Doctor pawh khan khawsik satliah mai chauh a ni e a ti bawk a, i dam tan tawh anih kha. Mahse indim tho la, damdawi te kha eiloh phah chuang suh aw?" a ti a, ka U chuan, "AWle ka pa.." tih pah chuan a bar chhunzawm leh mawlh mawlh a. Anihna takah chuan ka ngaih atha mawlh lo, ka U chungah hian engemaw tak chu a thleng ani. Chumi ni pawh chuan class kan lak chhung zawng pawh chuan rilru ka pe theilo, ka rilru ah ka U Emily ringawt chu a awm a. Zan alo thlenga, ka U chungah chuan engemaw tak chu a thleng leh dawn tlat hian hriatna ka nei ani. Zan dar 11 a ri a, keipawh zan dang ang bawk chuan ka phone-a games khel chuan ka tui leh malh malh hle. Chutah ring em em mai hian ka u room atang chuan hlauh hmel taka au vak vak ri ka hre ta a, ka phu chiang hle mai. A aw atang chuan ka U Emily ngei ani, rang takin ka tho a, ka U room lam pan chuan ka tlan phei nghal a. Room chhung ka lut chiah chu ka U khuma lo tal vak vak chu ka hmu a, ka nu leh pate pawh chu anlo lut ve nghal a. Ka U chu kan vuan bet a, a tal vak vak a, a mitmeng te chu a var vek lehnghal.

Rei fe kan bawihsawm hnu chuan ka u chu a harh chiang ve ta deuh a, hlauh hmel tak hian ka nu chu khuah in a khur char char a. Ka pa chuan, "Emily, enge awmzia? Tinge khatia i awm a?" tiin a zawt a. Ka U chuan hlauh hmel tak chuan ahma zawna a wardrobe chu a kawk a, "Tah sawn, ka wardrobe chungah sawn a thu a, min rawn melh reng a, min nuih vak vak a, ka hlau lutuk ka nu, ka hlau lutuk." tiin a tap nghal char char a. Ka pa chuan, "Tumaw? Tumaw i wardrobe chungah chuan lo thu a?" tiin hriatthiamloh hmel tak chuan a zawt a. Ka U chuan, "Tunge a nih ka hrelo, kawr dum vek a ha a, a hmel chu a rapawm lutuk, ka pa, ka hlau lutuk, keimahin ka mu ngam lo, ka hlau emai." tiin a tap zawih zawih a. Ka nu leh ka pa chuan ka U chu an bulah mut tirin, kei erawh ka roomah keimahin ka mu leh ta a. Hun alo kal zel a, ka U awm,dan chu amak tawlh tawlh a, adam dawn tan chauh emaw tih laiin a khawsik anasa telh telh a, khumbetin a na chu a ni der mai. Hun alo kal zela, ka U awmdan chu amak telh telh mai a. Achang leh bathroom ah nikhaw hrelovina lo tlu a, achang leh ama roomah chhuak em em hian a tap vak vak thin bawk a. Kan chhungkaw buaina ber chu ka U Emily hi a ni ta ber mai, ka nu leh pa te pawh chu an mangang hle tih pawh ka hria. Zan khat chu ka u room atanga thawm mak tak rawn ri chhuak chu ka hre leh ta a, zep lo chuan ka U hi ka hlau lek lek tawh ani. Mahse ka U a ni miau a, hreh tak chung chuan ka U room lam pan chuan engthil nge thleng tih hriat tumin ka room atang chuan ka chhuak leh ta a. Room chhung ka lut chiah chu ka U Emily chuan a room bang chu a lo hiat vak vak a, a hiat rang ruai lehnghal. Chutia a room bang a hiah vak vak pah chuan enge maw chu a sawi a ni, ka va kal hnai a, a thusawi chu ka ngaithla chiang a. A thusawi ka hriat theih awm chhun chu, "Chatuana i ta ani si a, ropuina te, thil tih theihna te, ram te.." tiin a lo phun mawlh mawlh a. A thu sawi chu a tir chuan awmzia ka hrelo hle a, mahse ka ngaithla chiang a, Lal Biakna/Lal Tawngtaina chu a let zawngin a lo sawi char char tih chu ka hre ta a. A awmdan chu a rapthlak ka ti takzet, va pan hnaih pawh chu ka ngam tawh lo. Zawi te hian, "Ka U.." ka ti a, ka U chuan, "Misual lakah chuan min chhandam zawk ang che.." ti a au ruai ruai pah chuan ka lam a rawn hawi a, a mit a sen vek a, a chilphuan a tla buah buah a, ka hlau lutuk chu ka au chhuak a, rang lutukin room atang chuan ka tlan chhuak nghal a. Ka nu leh pate ka kaitho a, thil awmzia ka hrilh hnu chuan rang takin ka U room ah chuan ka nu leh pate nen chuan kan va phei ta a. Ka U room kan lut chiah chu a rimchhe ngei mai, kan zawng kual a, ka U chu hmuh tur a awmlo. Ka pa chuan, "Emily bawihte..khawnge i awm?" tiin a ko vak vak a, ka nu pawh a tap pur tawh mai. Ka U khum bula Bible lo let reng chu kan hmu a, ka pa chuan a chhar a, alo thler nuai mai lehnghal a. Chhuatah chuan Bible pawhthler them te chu a darh nuai bawk a, a ngaihna kan hrelo hle. Chutih lai chuan inchung lam atang chuan rum ri tuah tuah hi kan hre ta a, ka nu chu a hawi chho a, a au vak a. Ka pa nen chuan kan hawi chho ve a, kan thil hmuh chuan min rap ngei mai. Ka U Emily ngei chu inchung ceilingah chuan in vuan tang miah chuang silo hian alo bet vu mai a, ka pa chuan, "Emily, enge awmzia?" a ti a, a hlau ve hle tih pawh ka hria, keipawh ka hlau a ni.

Thinrim hmel em em hian min en a, tichuan a room bangah te chuan a vak kual ta zawt zawt mai a, a au ruai ruai a, tih ngaihna kan hrelo, kan en char char ringawt mai a ni. A room tukverh lamah chuan a vak phei a, tukverh ah chuan a zuang chhuak ta daih mai a. Rang takin pawnah ka nu leh pa nen kan tlan chhuak ve nghal a, mahse ka U chu kan hmu hman lo. Ka nu mangang lutuk leh hlau lutuk chu a tap reng tawh mai a, ka pa chuan, "Siamte, i nu hi inah lo awmpui la, lo chhuak miah suh ang che u. I U chu keiman ka'n zawng ange, ka lo let leh vat ang." a ti a, ka nu chuan kallo turin a hrilh a, mahse ka pa chu a chhuak lui ta tho a. Minute 10 vel ka nu nen chauh a ina ka pa leh ka U lo let hun kan nghah hnu chuan kawngka a rawn in kik dat dat a, ka va hawng a, ka pa chuan ka U Emily chu a rawn pawm lut a. Ka U chu ka pa te room lamah kan phei pui a, khumah kan mut a. A ban te chu na taka vuak ang mai hian a duk thleh thluah a, a mal te, a chawn te chu kutthlakna ang tak hian a pilh nasa em em a, a hmai a vung bawk. Ka pa chuan, "Emily chungah hian enge maw tak chu a thleng a ni, ramhuaiin a tibuai anih ka ring tlat." a ti a, ka nu chuan, "Hetiang rigawt chuan ka fanu hi a damchhuak zo lo ang, Siamtea pa, pastor emaw speaker emaw biak mai chi ani." a lo ti ve bawk a. Ka pa chuan, "Naktuk khua lo var se, kan sawi zawm leh dawnnia." a ti a, ka U chu ka pate bulah chuan a mu a, tichuan keipawh mu turin ka room lam ka pan ve leh ta a. Atukah chuan ka U chu zing dar 9 vel a pelh nu pawh chuan alola tho lo a, kan chhungkua kan buai em avang chuan keipawh school ka kalloh phah a ni. Chaw kan ei a, kan eikham hnu chuan ka pa chuan, "Siamte, i U hi lo awm pui la, kan pastor te inah kan va kal ange. Nangmahin ilo awmpui ngam angem?" tiin min zawt a, keichuan hlau ru ve deuh tho mah ila, ka U a nih miau avang chuan ka awmpui ngei a ngai si, "Awle, ka lo awm ang." tiin ka chhang a, ka nu nen chuan min chhuahsan ta a. Zing dar 10 a lo ri a, ka U chu a room atang chuan samthur bum hian a rawn chhuak a, a mit veilam chu hnekna niawm tak hian a duk kulh mai a. Choka a luh pah chuan, "Ka ril a tam lutuk, ka sil vek lehnghal." a rawn ti nuah nuah a, a hmel leh a chezia en chuan mi anglo hi a ang ber tawh ani, ka lainat em em a, mahse tihtheih ka nei ve silo. Choka lam chu ka va pan ve a, ka u chu chaw ei dawhkanah a thu a, chaw ei te chu ka siam sak a, tichuan a bulah thuin a chaw ei lai chu ka en reng a. Pangngai taka chaw a ei mawlh mawlh lai chuan a melh ngai melh reng pah chuan chaw chu a bar ta buan buan mai a. A ka a lenglo khawpin a hnawh ta vak vak mai a, "Ka U muangchang khan ei rawh." ka tih pawh chu a ngaihsak lo, a bar mawlh mawlh a, a rum ngut ngut bawk a. Dawhkan chum bur pah in, "EMILY ZODINPUI." tiin ka vin tuar a, a phu zawk a, phawk hraw hian min rawn melh a, a chaw hmuam chu a chhak chhuak nghal a, a khuh bawrh bawrh a. Rang takin tui ka in tir a, a hnungah ka chum a, a rawn hawichhuak a, "Min ti phu chiang lutuk." a rawn ti a, a ngaihna ka hrelo hle. Ngaihthat hmel tak chuan a ei chhunzawm veleh mai bawk a, a kham a, sil hmunah chuan a chaw eina thleng ruak chu va dahin a room lam a pan leh nghal a. Ka rilru a van ti hah tak em, ka ngaihdan chuan ka u kawchhungah hian ramhuai a lut a nih ka ring ber.

Chawhnu lam dar 1 velah chuan ka nu leh pa leh pastor te chu an rawn lut a, sitting room lamah lut pheiin thingpui in pah chuan an titi a. Minute 10 vel hnuah chuan an lo phei a, ka pa chuan min ko a, kan vai chuan ka U roomah kan va phei ta a. Pastor chuan Bible a keng a, ka U Emily chu lungngaih hmel tak hian a room darthlalang hmaah mit khap miahlo hian alo in en a. Pastor chuan va pan hnaiin, "Emily, enge i an a?" a va ti a. Muangchang hian ka u chuan pastor chu a melh a, "Ka thi tep tawh ang, zantin mai hian min sawisa thin a, min kalsan tura ka ngen pawhin a ngaithla duh ngailo." a ti a. Pastor chuan, "Tuin maw? Tuin maw sawisa thin che?" tiin a zawt leh a. Ka u chuan, "Tunge a nih ka hrelo, mahse hmeichhia chu a ni, a hmai a dum vek a, sei tak tak hian a lei te a chhuah a, a kuttin hriamtak te chuan min ham a, ka room chhungah hian min theh leng dawrh dawrh thin a, min sawisa hlum lo chauh zel." tiin a mittui a tla zawih zawih a, ka khawngaih rual rual in a thusawi te chu ka hlau takzet a ni. Pastor chuan, "A hming i hria em?" a ti a, Ka u chuan, "Hming nei hmel pawh a pulo, ramhuai a ang ka ti ber. Ka nu leh pate bula ka mut lahin ka mumang lamah min tibuai chhunzawm zel tho a, dam pawh hi ka chak tawh lo." a ti a. Pastor chuan, "Anih leh i Bible hi tu pawhthler nge?" tiin Bible thler nuai mai chu la kangin ka u chu a hmuh tir a. Ka u chuan, "Amah tho kha ani, kha nu tho kha." a ti a. Pastor chuan zawimuang hian, "Umm..anih tak chu. Bible hi ka'n chhiar anga lo ngaithla rawh aw." a ti a, ka u chu bu nghut a. Pastor chuan Bible chu keuvin a chhiar ta a, ka u chu a tap zawih zawih a. Pastor chuan a chhiar zel a, ka u awmdan chu a diklo leh tan ta. Hnuailam bih chung chuan a khur dur dur a, a rum vak vak bawk a. Chu veleh rawn hawi chhuakin thinrim hmel em em hian Pastor chu a melh a, "Ngawi rawh...chhiar tawh suh." a ti khur khur a, ka hlau ngei mai. Pastor chuan a chhiar lui zel a, na tuar ang mai hian ka u chu a khur hlawk hlawk a, a au vak vak a. Chutah pastor chu a rek ta thut mai a, ka va han phuchiang tak em. Rang takin ka pa nen chuan ka u chu kan vuan bet a, khumah kan mut tir a, a tal vak vak a. A ban lehlam lehlam ah ka nu nen kan chelh a, ka pa in a ke alo chelh bet bawk a. Pastor chuan ring takin Bible chu a chhiar zel a, ka U chuan, "Tawp rawh...duhtawk rawh." tiin a au vak vak a. Pastor chuan chiang taka ka u en pah chuan, "Tunge i nih? Sawi rawh, tunge i nih? Engvangin nge helai hmunah hian i rawn kal?" tiin a vin vak vak mai a. Ka U chuan, "Ka sawi lovang, ka sawi chuang lovang." tiin rapthlak tak chuan a nui khek tuar tuar a. Pastor chuan, "Sawi rawh ka tih chu..engvanga he chhungkua hi rawn tibuai nge i nih?" ati leh a. Ka u hmel chu a rawn danglam tan ta, a biang ah chuan thisen zam ang tak mai hi a rawn awm t(r)uah t(r)uah a, a mit a rawn var vek a, aw rapthlak tak mai chuan, "KA IN A NIH HI..HELAI HMUN HI KA TA A NI." arawn ti ta mai a. Chutia kan buai lui luih lai chuan ka u khum zawna darthlalang chu ka en a, khuma mu mek chu ka U a ni hauh lo, hmeichhe dang daih a ni. A hmel chu a rapawm em em a, a dum vek a, sam tlemte chauh a nei bawk. Ka u lam chu ka hawi leh a, ka u hmel tho chu a ni si. Darthlalang lam ka va en leh a, khanu hmel kha ani leh daih bawk si, ka hlau lutuk chu ka t(r)e vak a, ka u ban ka vawn mek chu ka thlah palh ta a. Chutah ka nu samah kekin chhuatah a paih tlu thuai a, a ke lo vuan mek tu ka pa chu khum atang chuan a tlawh thla tawp bawk a. Pastor hrawkah chuan a rek a, chhuatah a bawhbet ta ran mai a.

Ka pa chu a rawn tho a, "Siamte...minlo pui vat rawh." tih pah chuan ka U chu a man bet a, mahse puihna chang pawh ka hrelo, ka hlau lutuk chu ngawi rengin ka ding ringawt a. Ka nu a rawn tho chhuak veleh a, ka U chu an man bet a, khumah bawk chuan an hruaiphei leh a. PAstor chuan vin zet hian ka U bulah chuan, "Chhuak rawh, he taksa atang hian chhuak nghal rawh. PAthian hmingin thu ka pe a che, he taksa hi chhuahsan rawh." a ti a. Ka nu chuan, "Emily..bawihte...tinge tiang hian i awm?" tiin a tap zawih zawih bawka. Ka u chuan rum taka ka nu melh pah chuan, "Emily a awm tawh lo, i fanu hi ka ta a ni tawh." tiin rapthlak tak chuan a nui vak vak a. Pastor chuan Bible chu la in ka u chalah chuan a dah a, na tih hmel em em hian ka u chu a au vak vak a, a tal vak vak a. Zawimuang chuan a thawm a zawi telh telh a, ka u chu a muhil ta a. Hriatthiam loh hmel tak chuan pastor bulah chuan hlauh hmel takin, "A chhuak tawh ami? Ramhuai chu?" ka va ti a, Pastor chuan, "La chhuak lo, thlarau sual leh luhlul tak a ni. Chhuah a tumlo a ang ber, ti hian muhil hrih rawh se." a ti a, ka pa te nen chuan an titi leh a, tichuan Pastor chuan min chhuahsan ta a. Zan alo thleng a, ka u roomah chuan kan chhungkua chuan kan thu thap mai a. Dar 9 a pel tawk ang tihah chuan kan Pastor leh mi pakhat hi anlo lut a, ka u chu a khuma a kut leh ke te phuar bet turin ka pa chu an hrilh a. Ka pa chuan hreh tak chung chuan ka u chu a khumah chuan a phuar bet ta a. Ka u chu ala muhil reng a, a cher em em a, a vun te chu a dang vek tawh. Pastor thianpa chuan a ipte atang chuan bottle tereuhte hi a rawn phawrh a, ka nu chuan, "Kha kha enge?" tiin alo zawt vat a. Chupa chuan, "Tui thianghlim (Holy Water) a nih hi." alo ti a. Pastor chuan Bible la chhuakin a chhiar leh tan ta a, ka u pawh chu a rawn che leh tan ta. Ka pa leh ka nu te nen chuan ka u chu kan vuanbet leh a, a rawn tal leh ta vak vak mai a. Pastor chuan a chhiar ring telh telh a, ka u chu chiang em em mai hian a rawn meng kawk mai a, a mitmu chu a var vek a. Pastor chuan, "Nang thlarau sual kha, Pathian hmingin ka zawt ache, tunge i nih? Engvangin nge hemite chhungkua hi i tihbuai?" a ti a, ka u chuan tal vak vak pah hian, "Ka sawi chuanglo ang." tiin hmuhsit hmel em em chuan pastor chu a nuih vak vak a. Pastor thianpa chuan a tui bottle ken lai chuan ka u hmaiah achhunga tui chu a va theh a, a khu rum rum a. Ka u chuan na tih hmel tak hian, "A sa...a sa lutuk." a ti vak vak a. PAstor chuan, "Min hrilh rawh...min hrilh rawh. Pathian hmingin ka zawt ache..tunge i nih?" a ti leh a. Ka u chuan, "Kal bo rawh, engtikah mah Emily chu alo let tawh dawn chuanglo..ka ta ani tawh." a ti a, a au vak vak a. Pastor chuan tui chu ka u hmaiah chuan a theh leh a, na a tih hmel kher mai. Chutah ka U aw ngei mai chuan, "Nu..ana, ana lutuk, min chhan rawh." tiin ka nu chu a melh a. Ka nu chuan, "Bawihi..nangmah tiraw? Bawihi..Emily?" tiin ka u chu a en a, mahse Pastor chuan, "I fanu anilo, a ti der a nih kha, ngaihsak reng reng suh ka pi." a lo ti ve bawk a. Ka pa chuan ka u hrawkah chuan a rek thut a, thinrim hmel tak hian, "Hey, nang ramhuai, khawnge ka fanu i dah? Sawi rawh, engvangin nge ka fanu kher i duh a? Keimah hi min la zawk mai rawh." tiin ka u hmaiah chuan a beng ta vak vak mai a. Pastor chuan hlauhthawn hmel tak chuan, "Nilo..ka pu, khatin ti suh." a ti a, asawi zawh hma chuan ka u chu a au tial ruai ruai a, kan phuarna hruite chu a tal chat vek a, ka pa chu a kawrawmah thamin bang deng dawt khawp chuan a nam leng dawrh mai a. A rawn tho chhuak a, a room tukverh kan kalh that sa thlap chu a tlawh hawng thuai a, a zuang chhuak leh ta daih mai.

Tukverh lam chu ka pan a, ka dak chhuak a, kan in thlang tui khur lama a vak thla zut zut lai chu ka zu hmu a. Kan vai chuan rang takin pawnah kan tlan chhuak a, tuikhur lam pan chuan kan tlan thla ve ta nghal a. Kan zu thlen chuan tuikhur bulah chuan min hnungchhawn zawng hian alo ding a, ka pa chuan zawi muangin ava pan hnai a, "Emily, i pa ka nih hi, min hria tiraw?" a va ti a, mahse ka u chuan a chhanglo. Ka nu chuan, "Bawihi..khawngaihin lo let leh rawh, ka fanu, khawngaihin." tap zawih zawih chung chuan alo ti ve bawk a. Chutah ka u chu a rawn hawi phei a, a hmai chu var vek a, ahmel chu ka u hmel a ni pawn ka hre tawh lo. Muangchang hian kan lam pan chuan a rawn kal phei chhut chhut a, Ka nu en pah chuan, "Emily chu a thi tawh ka ti anilawm ni? Thih ve induh loh chuan kalbo rawh u." a rawn ti ta chher chher mai a, ka hlau lutuk chu ka pa hnungah ka biru nghal. Pastor chuan ava pan hnai a, "He taksa hi chhuahsan rawh, helai hmun hi i awmna tur anilo." a ti a, chutah ka u chu rapthlak tak hian a nui sung mai a, pastor chu a kawk a, "Emily chu a thi tawh, ka ta a ni tawh." a rawn ti leh a. Pastor chuan a tuithianghlim ken chuan ava theh leh a, ka u chu a au tuar a, a thal nghal tawp a. Pastor chuan, "Engti kawng mahin kei Pathian chhiahhlawh hi min hneh chuang lo ang...tunge i nih sawi rawh." tih pah chuan a thut bet a, tui thianghlim chuan a khat tawkin a theh leh thin a. Atawpah chuan ka u chuan, "He taksa atanga ka chhuak anih chuan Emily hi a thih angai ang.." a ti ta mai a. Ka pa chuan, "Nilo...keimah zawk hi min la mai rawh, khawngaih ka fanu chu min pe let hram rawh." a lo ti a. Ka u chuan, "Atheih loh, siamthat theih a ni tawh lo, he taksa ka chhuahsan rual rual hian Emily nunna pawh a tawp ve nghal ang." a ti a. Pastor chuan, "Lal Isua Krista hmingin ka zawt ache...tunge i hming?" a ti a, ka u chuan, "Khawngaihin kha hming kha lam ri tawh suh..kha hming kha ka hua ni." a rawn ti a. Pastor chuan, "Sawi rawh..sawi vat rawh.." a ti vin tuar a, ka u chuan zawi te in, fiah fel fai tak si hian, "Ka hming chu Lalnunmawii a ni a, he in chenna in hi ka in a ni a, ka ta ani." a ti ta a, mak kan ti tlang kher mai. Pastor chuan, "Engvanga Emily hi tibuai nge i nih?" tiin a zawt leh a. Ka u chuan, "Tihsual engmah ka neilo, ka fate kha ka thah a nilo. Ani thah kha a ni, keichuan venhim tumin kalo bei let zawk asin. Ka kal ala hunlo, helai hmun hi ka ta ani a, tuman min chhuhsak lovang." a ti leh a. Pastor chuan, "Tunge i fate chu that a? Tunge i nih chiang takin sawi rawh." tiin a zawt leh a. Ka u chu akhur dur dur a, thinrim hmel tak hian, "Ka pasal thah anni, ka fate kha ka pasalin a that a ni. Khami zan khan ka mithmuh lai ngeiin ka fate kha a sat hlum a ni. Theihtawpin dan let ka tum a, mahse ka hneh silo. A thah zawh hnuah kei pawh hi min that veleh a ni. Mahse helai hmun hi ka kalsan theilo ani, he in hi ka in a ni a, ka awm reng a, ka veng reng a, tuman anrawn kal ngai lo. Mahse nangni hi in rawn kal a, rawn kal tur in nilo asin, in fanu Emily'n a tuar phah ta a nih hi." a ti a. Pastor chuan, "Anih leh i pasal chu khawiah nge a awm?" tiin a zawt leh a. Ka u chuan, "A thi tawh, keimah ngeiin phuba chu ka la tawh a ni. Ka fate rawng taka min thahsak tu chu ka chhuah phal reng reng hleinem." tiin rapthlak tak chuan a nui vak vak a. Pastor chuan, "I phuba chu i la tawh a, i duhthusam i hmu tawh a, he khawvel ah hian enge ila tih? Emily hian i pawi a sawi ve em ni? Engvanga Emily taksa hi chhuahsan duhlo nge i nih?" tiin a zawt leh a. Ka u chuan, "Nilo, he inah hian tumah an awm a thianglo, He in hi ka ta ani a, kumkhua in a ni reng bawk ang." tiin alo chhang a.

Pastor chuan Bible chu ka u awmzawnah chuan a dah a, "Lal Isua Krista hmingin thu ka pe a che, nang thlarau sual hian he taksa hi tunah chhuahsan nghal rawh." a ti a, tui thianghlim chuan a theh leh thawt thawt a, ring tak leh rapthlak tak hian ka u chuan, "Nilo, atheih loh, nilo" tiin a rak vak vak mai a. Zawimuang chuan a zal raih raih a, ka u chuan a hmel pangngai a pu leh ta. Rang takin ka pa chuan ka u chu a pawmkang a, damdawiin lamah kan kal pui ta nghal a. Mahse ka u chuan rei a daih dawnloh thu doctor te chuan min hrilh a, a nakruk a tliah mai bakah a tluak ah thisen a tling a. A keruh a tliak bawk a, a harh chhuah an ring tawhlo hrim hrim bawk. Mahse Pathian hnenah Pastor te nen chuan nasa takin kan tawngtai a, a tuk zing dar 8 velah chuan ka u chu a rawn harh chhuak ta hlawl mai a, kan va han lawm tak em, kan tawngtaina chu chhanin a awm ta. Thla 3 dawn lai mai chu ka u chu damdawiin ah a awm a, mahse chumi chhung chuan kha kan inluah, thlarau sual ina a chenchilh reng na inah erawh kha chuan kan awm duh ta biklo a, Pastor te inah kan awm hrih a ni. Zawi zawi in ka u pawh a tha chho ve zel a, mahse ka u chhanchhuak tu Pastor khan, "Kha in ah khan let leh tawh suh ang che u, kha thlarau sual khan khalai hmun kha a chhuahsan lovang, thlarau sual leh luhlul tak a ni a, a rang lamin chhuahsan vat ang che u." a tih avangin kha inah kha chuan kan let leh tawh lo. Ka u a that deuh hnuah chuan kan chhungkua chuan Aizawl lamah kan let leh a, ka pa thawhna a an pute pawn kan chanchin an hria a, ka pa pawh an hrethiam ta tawp a ni.

A tawp ta.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)