Dârlàwn khawtlângin tûalthattu an dah ṭha!

Hlauhawm lampang hrim hrim hmun hrang hrang a mi lakkhawm...
LalrinzualaChawngthu
Posts: 3
Joined: August 19th, 2020, 2:14 am

Dârlàwn khawtlângin tûalthattu an dah ṭha!

Unread post by LalrinzualaChawngthu » August 19th, 2020, 12:23 pm

Dârlàwn khawtlângin tûalthattu an dahṭha!
(Based on a true story)

- Lalrinzuala Chawngthu

Kum 2003 December ni 24 zîng Ni chhuak chu a fiah kûk mai. Thlasik lâi tih takah a vawt vur a, khawchhak lama Chalfilh tlâng to lurh mai kârah chûan Ni chhuak chu a rawn êng phât a, naupang leh puitling chenin khaw vawt chuan a hmer a ni ang e, tûk dang ang bawkin tu mah thawh hma tum pawh an awm lo. Dâr 7:00 a rîk chûan mi an rawn tho ṭan ṭak ṭak chauh a.

Khawlâiah mipa naupang ṭhenkhat chuan thokêp silai an kâp ri ṭhang ṭhang a, a ṭhenin silai lem ri thei leh ri thei lo chi lek chhuakin ṭhiante nên in-ṭhengkahin an tlân kawi zawr zawr a, an chhûngte leh puitling ṭhenkhatin an han hâu ve sateh náin tu mahin tih tak meuha hauh an tum bîk lo, an hriatthiampui tlat. Nulâte chuan urlâwk zân lo thleng mai tùr hre rânin tûal an phiat fai sauh sauh a, tui nei lo deuhin tui an châwi pàr pàr bawk. Chutiang bawkin tlangvâlte pawh chuan eng mah thawh an hreh tawh lo, a ṭûl ṭûlah tirh an nuam hle a, an che ve sawk sawk a ni ber.

Ni dang ang bawka tûkṭhuan an kîl sap sap hnu chûan a tûk Krismas lo thleng mai tùrin mipui thinlung a chiah hneh hle, pa lunglêng deuh leh a uar zualten Krismas hla sak tape recorder-a an play ral ral hriat tùr a awm reng a. Puiltingte chuan Krismas an lo hman tawh dân te chu an han suangtuah lêt a, lunglêng lo fa an awm meuh lo. Naupang lahin a tûka Krismas thawmhnaw thar hâk tùr chu khêk har an ti tawh hle, an melh melh a, an nu leh pate’n an la khêksak si avangin eng mah an sawi ngam lo si lo.

Krismas hmâ, ni 24 a nih mîau avangin hna thawh nî a ni tawh lo a, tu pawh chuan kûtpui era an lo inbuatsaihna chu a taka chen an tum tawh avangin khawlâiah mi an zi huai huai a, Krismas chhangban fûnna tùr la la lâwk lo chhûngkaw ṭhenkhat chuan he mi nîa lâk an lo tum lâwk sa angin lamhnai an pan ṭan a, thingfawm tùr nu ṭhenkhat pawhin ram lam an pan sap sap bawk.

Nu pakhat a bo!
Tûkṭhuan ei khama thingphur tùra chhuak, rûalbanlo deuh nu pakhat Chhani chu losûl haw hun (tlài dâr 4-5 vêl) thlenga a lo la hâwn loh avanga a chhûngte hrilhhai chu tu ma’n an hriatpui lo. Khûa aṭanga km 3 vêl leka hlâ Thanmûal an tiha thing dah sa va phur mai tùr a nih avangin chuti chen chen a thang chu thil mak a ni rêng a. An hriat theih chinah amahin a kal a, eng mah dam lohna a neih an hre bawk si lo, eng vanga chutîa thang rei ta vîau nge a nih han rin ngaihna an hre lo hle. Khaw chhûng tû Inah emaw khaw lâiah emaw Ina haw nghâl loin a tàwi khawtlài a nih an ring zet a, khaw chhûng chu an chhûngkua chûan an rin zawn nghâl chung chung a, an mi nêl leh kawmngeih deuh deuh an hmuh fuhte chu Chhani an lo hmuh leh hmuh loh an zâwt chawt zêl bawk.

Theih anga khaw chhûng an fan kual fê hnuah pawhin Chhani chu hmuh a hnêkin a chanchin hria aih pawh an lo awm hauh lo mai! Mahse, vânneihthlâk takin chhûn lama Sêrzâwl mi ṭhenkhat Dârlàwn rawn kalte chuan thu lêng vâk an han hriat chuan Sèrzâwl pênga nu pakhat leh pa pakhat an hmuhte kha mi sawi chu ni theiin an ring ta deuh a. Dârlàwn mite hnênah chûan an mi hmuh pahnihte chu, “an inchhaih a, an nui dûn awr awr nghe nghe…,” an ti a.

Thawnthu chu
Kum 34 vêl mi, Ringliana nupui pawm lâi Chhani, rualbanlo deuh chuan khûa aṭanga hnài tê, km 3 vêl leka hla Sailutâr kawnga Thênmûal ram an tihah chûan thingphur tùrin fehrehsânah (tûkṭhuan ei kham dâr 9-10 vêl) amahin a kal hnak hnak a. He mi ni hmâ lawk hîan an khaw tlangvâl pakhatin a lo mutpui tawh thu nu ṭhenkhatin an lo hriat avangin tu paw’n mutpui tum se mutpui tawh loa ṭang tlat tùrin an lo fuih tawh a, ani pawh chuan ‘tu mah mutpui tawh lo tùrin’ a intiam awlsam ve mai bawk. Tichuan, thutiam kenkawh tum chungin he mi nî pawh hîan amahin lamhnài panin thingphur tùrin a kal ta a ni.

Kum 40 mi vêl, pa dawrâwm ve tak, lian lo leh thâwm na lo zet, kawp lâi nei Lawma, Dârlàwn khûaa kum 15 vêl zet awm tawh chu he mi nî hîan kûtpui urlàwkna nipahfâwmin zîng zû a rui deuh chhak a. A ṭhianpa pakhat nên ramkal an tum kha a ni nain a ṭhianpa rui tha zawi chuan a ṭhulhsan leh si avangin Inah chûan a tei vêl ta mai mai a. Chutia pa ber awm mai mai tùr chu ngâi ngam loin an nu chuan chhangban fùnna tùr hnah la tùrin a tîr a. A nupui thu awihin hnah la tùr chûan a chhuak ve ta mai bawk a.

Khaw lâiah chuan amah chauha thingphur tùr ni âwm taka èm phura Chhani kal chu a hmu fuh ta hlauh mai. Mi kâ aṭangin an khaw tlangvâl pakhatin a lo mutpui tawh tih a lo hre ve kher bawk nên, a zîng zu rui la reh bawk si lo, eng nge maw zâwng taka la phùr deuh chhak chuan chutia amah chauha Chhani kal hnak hnak a hmu chu Bethsebi chhûn pachang inbûal lâi Davida’n ît taka a thlîr ang maiin hnung lam aṭang chûan a thlîrzui vawng vawng a, Chhani chu a zui ru ta nge nge a.

Thui pawh an la kal hmâin a mipa zâwk na nâ nà chuan a ûmpha thuai a. A thiam ang tâwka hawihhâwmin Lawma chuan a kalna tùr leh eng ti tùr nge a nih a zâwt a. Chhani pawh chuan ṭha takin Thanmûala a thing dah sa phurh tuma chhuak a nih thu a hrilh ve mai a.

Khaw dâi an thlen chûan Lawma chuan phùr ru angreng takin fîamthu te a thawh a, an nui dûn phei zêl a. Hetîa an nui phei har har hi Sèrzâwl mi ṭhenkhat Dârlâwn pana lo kalte nên an intâwk nghe nghe.

Lawma chuan thu ho tê tê sawiin Chhani chu a fiam pah zêl a, ani lah chuan a lo làwm phîan zêl bawk a.

"Hnah la tùra chhuak ka nia, i thing dahna hmun thlengin ka kalpui che ang a, thing ka fawm ngahsak hnuah hnah ka la ve ang a, haw rual leh ang hmiang," tiin a sâwm a. Chhani pawh chuan nui hawr hawr chung chûan ngaihṭhat lohna eng mah nei loin a aw liam ve thuai a. Chutîa Chhani’n eng mah ngaihṭhat lohna a nei lo tih leh a hnial loh avang chûan Lawma chu a lâwm hle.

Thenmûal hmuna Chhani thing dahna hmun chu an thleng ta a. Lawma chuan Chhani chanchin: tlangvâl pakhatin a hmâ lawka a lo mutpui tawh tih kha hre rengin chu hun chu holam taka raltîr a tum hauh lo, Chhani rualbanlohna leh sihhnipna chu remchânga laa mutpui ve ngei a tum tlat.

Tuakthahna râpthlâk!
Chhani chuan eng mah tikhawmûang loin thing chu a fawm nghâl zung zung a. Lawma chuan lo thlîr dauh dauhin a chhûngril aṭanga a mihrinna sual koham tak lo chhuak vàng chûan Chhani chu a hmu phe deuh rîai taw. A nupui fanaute a ngaihtuahnaah an leng ve tawh lo; Chhani chauh lo chu. Victoria’s Secret model nalh ria tak tak kal aih aih ṭhinte âia a nalh lohna bîk a hre tawh lo. Sakhi lui te tui chàk thaw huam huam ang maiin chawplehchilhin a chhâwl chu a rawn hàl huam huam a, a kawchhûng aṭanga tlâng kàng tùr inmun ang maia rawn sa chho hum hum chuan a lungphu a tirang tawh hle. A thisenzâm rawn lian tawlh tawlh chuan a thluak fan chhoin a tukkhumah hmun a luah ta mup a. A mipatna hmêlma hlun ber a nupui hmâa zàm ngai lo vâl mipatna lo chhuak chuan a ngaihtuahna zawng zawng thuhnuaiin eng dang mah a ngaihtuah thei tawh lo, a thlang lawka a hmêlma eng mah hlauhthawnna nei lo Chhani chu Adama tha chakna hmang ngeia tlàwm ngei a tum tlat a ni.

He lâi hmun hi awih ang reng tak niin an thlang lawkah chûan kawr tè a awm a, chu mi kam tawn tawn chûan khàm a awm bawk. Chu lâi hmun awihtlân deuh taka Chhani thing fawm târh târh lâi chu Lawma chuan a pan thla ta chhet chhet a. Chhani bul a zuk thlen chûan aw lawi lek lekin mutpui tùrin a sâwm ta chawt a. Chhani lah chuan a hma lawka tlangvâl pakhat a lo mutpui tawh avanga nu hovin an kamkhat leh pasal nei chunga mi dang mutpui chu sual a nih avanga vawi khat mah ti tawh lo tùra an lo hrilh kha hre rengin Lawma chu lo hnialin, “Ka duh tawh lo,” a lo ti bul hmuk a.

A thluak nu mup tawhin a taksa pêng pawimawh tak tak a fuihpawrh thinrim kim tawh mîau avangin lei lehna hmun ata hnung lam hawi thei a ni tawh lo, a chhûngril sa huam huam avanga dang a ro hulh tawh, a chil neih chhun chhun lem khawlh khawlh Lawma tân beidawn a thîang tawh lo. A thlèm leh a; mahse, Chhani chuan nuho hnênah pawh vawi khat mah a pasal ni lo mi dang tumah mutpui a tum tawh loh thu a tiam thlenga hrilhin a hnial tlat zêl a. Lawma chuan thuin a thlèmtlu dâwn lo tih a hre ta. Chutah le, a thawk lawka a mipatna hmêlma Chhani chu a bawh ta thut a. Chhani chuan a lo dawh mai lo, chu sa koham tak laka chuti maia tlàwm chu a tum bîk awkawng lo. Ṭhankin ve ve, ngam leh ngam chu an inchai ta ngìan ngìan mai le. Lawma chuan a chhûngrilah tisa châkna chak mah se pa lian leh tharum ngah mi a nih bîk loh avangin theih tâwpa lo ṭang Chhani chu chuti maiin a thehthal thei mai bîk awkâwng lo.

Chhani puanbih chu a pawhthlaksak a, mahse Chhani ṭan a la pheh phah chuang lo. A pawnfên pawh chu pawhthlâksak leh a tum ngial a, mahse a thain a tlin bîk loh avangin a hlawhtling ta bîk lo. A tihngaihna hre lo chuan a chempui ah lâi a phawrh lawk a, a vau ta a. Chhani chu a la zàm chuang map lo; mahse, eng ruai a ni dâwn lo tih erawh a hre ve ta. A ṭe nghâl ta tuarh tuarh a. Lawma chuan a thil tum chu puitlin ngei a tum nghet tlat. Tuifîmin daiha a hriat tawh loh avangin tui nû tal a hman mai loh chûan kawng dang awm tawha a hriat loh avangin a chempuia Chhani lu sah tumin a tin ta teu mai. Chhani hlau lutuk thaw hlawp hlawp tlànchhe thei chuang si lo leh tihngaihna dang hre tawh chuang si lo chuan a kut tawn tawnin a lû dawmin a invêng ta ringawt a. Tlêma a kùn deuh lâi tak chûan Lawma chuan a chempui hriam pângngai tak chûan zak kau zawka chhîpthlâkin Chhani lû chu a sât ta sawk a.

A lo indanna lamah Chhani kutzungchal vei lam chu a chhum nghâl hmawk. Chu mi rûal chûan a kutzungṭang dang pawh chu hlàwih hlawihin a kutzungpui ding lam pawh a chhum nghâl hmawk bawk. A kut bung leh hlîam aṭang chûan thisen a chik chhuak nghâl puat puat a, a tukkhum chu a ri leh sawk a, thisen a lo chik chhuak nghâl puat puat bawk.

Lawma chuan a la duh tâwk mai lo. Chhani na tûar khur chur chur lû-ah bawk chûan sah leh tumin a chempui chu a lek leh a, a bek tawn tawn chu na takin vawi khat ve ve a sah leh sawk sawk hnuah a nghâwngah a zai leh a. Chhani hlîam chu a thûk bawka thisen chhuak a nasa kher mai. A tàl chawr chawr a, rei lo têah a thizui ta nghâl a.

Lawma chuan a la duh tâwk lo fo! A chempui thisen kâi hnuang chûan Chhani serh chung lam aṭanga hlepin a hlep tla têp tihah a bul lawka hmawlh, sikret (wills flake) bâwm hmeh khàwr tiat vêl chu lain a hmâwr a zum sauh sauha kutphah chen vêlin a tan leh tê tê a, a serh a hleh thlâk ṭêpah chûan a chhu tlum ta hmawk a. Chutîa a tih zawh chûan ruang chu chu lâi âwihtlânah chûan a nam lum ta a.

Tualthattu sûlhnu.
Sùlhnu thup pawh tum chuang loin Lawma chuan a duh thâla Chhani a sawisak hnu chûan chu lâi chu a kalsan ve thuai a. A thawmhnawa thisen kâi hnuang chunga khaw chhûng luh chu thil tih chi nia a hriat loh avangin sil faina tùr a zawng a. Mi hmuh loh tùra insil faina tùr reifê a zawn hnuah lui te pakhat va hmuin chutah chûan a thawmhnawa thisen kâi leh a chempui leh iptepuia thisen kâi chu a sil nawk nawk a, a huh ta pùr a. Han nghah ro ngawt chu rei dâwna a hriat avangin huh pùr chung chûan a haw ta a.

Tlài lamah chûan ramkal haw hun vêlah Thanmûal pêng a thleng a, chutah chûan a hlauhthàwn rûk ang ngeiin Ngâite ram lama ramkal mi ṭhenkhat a hmu ta thut a. Chutîa patling ramkal huh pùr, hmêl danglam deuh leh hlauhthâwn hmêl tak, hah hmèl vîau bawk si chu anni chuan eng nge maw tak a tawn ringa ngaih ṭha chiah loin a kalna chin an zâwt a. Lawma chuan thingzaina hmuna kal niin a insawi ve mai a.

Mipui an phêk buai.
Zanriah ei hun pawha Chhani a la haw loh fo avang chûan YMA aurinna hmangin Chhani ramkal la haw loh thu leh zawng tura YMA member a thei thei thawk chhuak tùra hriattîrna khawtlâng hruaitute chuan an puantîr ta dum dum a. A hre pha apîangin hmanhmawh takin Thanmûal lam an pan nghâl sung sung a. Khua aṭanga hla lo tè, km 3 vêla hlâ Sailothangi Kàwnah mipui chu an innghâk khâwm ṭhup phawt a, mi bo zawn dân tùr chu Joint YMA hruaitute kaihhruaiin an rêl ta a. Zân dâr 7:00 vêl a ni tawh a, mi bo zawnga chhuak mi tam tak chuan chûng lái ram mûal hran hranah chûan insem darhin an phèk zawn ta nghâl ta chîam a.

Ngâite lama ramkalin Thanmûal pênga huh pùr chunga tlài lama hmêl phâwk tak Lawma an hmuh thu chu mi ṭhenkhatin an sawi chhuak ta a. Sèrzâwl aṭanga lo kalte’n chawhma lamah Lawma leh Chhani te ram lam pana kal an hmuh thu leh hlim taka an nuih dùn hawr hawr thu mi ṭhenkhat sawi chhàwn te chu a lungfingzual ṭhenkhat chuan an han chuktuah rem vêl a, Chhani chungah chûan eng pawh lo thleng palh se Lawma chuan eng nge maw chen a hriat tùr thu leh chinchâng hre hnai ber tùrah an ngâi ta a.

Khawtlâng hruaitu ṭhenkhat chuan khaw chhûnga awm mêk Pu RD Lawma, VCP chu an zèldin dân leh Lawma an rinhlelh dân akipakàwiin mobile phone-in an hrilh ta vat a. Mahse chu mi hmâ chûan khaw chhûnga a hmun lo nghâk mi ṭhenkhat chu Lawma Inah kalin khuma a lo mu thân tawh chu kai thoin mipui thinrim sosâng lutuk laka a him zâwk nân police kutah awm se ṭha bera an hriat avangin Dârlàwn Police Station-ah an lo dah dêr tawh zâwk a lo ni a. Mi ṭhenkhatin a Ina Lawma an hmuh chûan a lo phâwkin a lo hlauhthâwn hmel hle. A iptepui chu thisenin a bual huh zuih mai nghe nghe.

Chu mi thu an hriat veleh mi bo zawng mipui chu khaw lamah an haw ta sup sup a. Mi tlêm tè la châmbâng te chuan mi bo chu zawn hmuh ngei tumin Sailothangi Kàwnah bawk chûan ṭhu khâwma ro an rêl ṭhat leh zet hnuah Sèrzâwl pêngah chàwlin mei an chhêm ta rih a. Khua chu a vawt kher mai lehnghâl.

Tualthatu thukru.
Khaw lama mipui haw hum hum chuan thil awm dân an hriat chian tawh avangin khawi dang mah pan loin police station an pan ding nghâl a. An thlen hmâin Dârlàwn Joint YMA hruaitute chuan boruak sa tawh lutuk leh mipui thinrim sosâng hlauhawm lutukin Lawma chu an pawt sawm duh dâwna an hriat avangin khawi lâi hmun biru lâiah emaw Lawma chu thukru tùrin police an hrilh thuai a. An hrilh ang chûan SI Lalnithanga, Dârlàwn Police Station OC chuan khua aṭanga km 2 vêla hla, Aizâwl lam ram, Kàwnpui mûal, Kàwntlingi pa Lui hnâr hmunah Constable Vanlalchama chu Lawma birûkpui tùrin a tîr vat a. Rang takin Vanlalchama chuan Lawma chu chu mi hmunah chûan a hruai ta vat a.

Ruang lainatawm!
Khawvâr dâwn lamah Vâl Upa Pu Vanlalchhuanga chu Sèrzâwl pêng lamah a va kal veleh a, chutah chûan ṭhianho mi tlêm tè, mi bo zawn zêl tuma meichhêma lo hahchâwlte chu a va pawh a. Lawma chu police-in an dâwp ngial hnuah pawh engtin mah a inpuan duh chuan loh thu te hrilhin Vâl Upain ṭha taka a kawm hnua a inpûang tâk chauh thu a va hrilh a.

Vâl Upa chuan Lawma chu chhimbudàwi titihin Chhani thattu a nihzia an hriat vek tawh thu leh a thah dân pûang mai tùrin thiam takin a kar a. Ani lah chuan Thanmûala Chhani thingphur tùr a hmuh chu a hmuh ngei thu leh engtin mah ti loin a kalsan a, a kalsan hnu lawkah ri rum rum a hriat avanga a ngaih ṭha lo chuan Chhani chu a àu vak vak a, a reh dak si leh ngaih ṭhat lohna pawh nei zui lêm loa a kalsan tâk mai thu sawiin a insawi thiam ve tlat thung.

Mahse, Vâl Upa chuan Sèrzâwl aṭanga lo kal te thu sawi te, tlài lama Ngâite rama ramkalte’n an hmuh dân te, a iptepui aha thisen kâi hnuang te avang chûan Chhani hmu hnuhnûng bertu leh thattu ngei a nih thu thiam taka a sawi hnuah Lawma chu a ṭang zo ta ngang loa a inpuang ve ta nge nge a ni.

Chu mi thu a sawi zawh hnu lawkah Vâl Upa ho chûan ṭhianho tlêm tè chuan Thanmûal pêng aṭanga ding lam hla lo tè, Lawma’n ri rum rum a hriatna lâi nia an rin hmun, âwihtlàn zet maiah chûan Chhani ruang chu an rin chhuk zawn thla ta a. Thui pawh an la kal thla lo ang tihah hmeichhe silipar khing khat an chhar ta nawlh mai le!

Chu lâi hmun chu sawi tawh angin âwihtlàn zet mai a nih avangin zân thil a lo ni kher bawk nên chêt vêl pawh a harsa hle. Beisei nei takin an zawng thla zêl a. Silipar khing khat an chharna aṭanga hlam sâwm vêlah èm an hmuh leh a, thingfawm sa ni âwm tak tlêm a inthiat nghe nghe. An zawng thla zêl a. Khàm sâng vak lo a lo awm a, chu mi thlangah chûan kawr lian lêm lo tak hi a awm a, kawr tawn tawn chu a khàm hle. An zînga mi Pu Hlimawma chu chu lâi thlang lawka kawrah chûan a chhuk thla zêl a, a hnung deuhah a thiante, Pu RL Pianmawia (ex MLA) leh mi dangin an zui thla a.

Pu Hlimawma'n kawr a zuk thlen chuan lûina chhak lam hawi, vei zâwnga thle, a bawp lo tawm chàiha Chhani ruang kawra lo let reng chu a zuk hmu ta a. Chhani chuan pawnfên a lo fêng a, a khûp chin a khuh a, a mawng lam chu a thi sûng a, a lû chu sahna hnu tih hriat takin a kak duai a, chuta ṭanga thisen chhuak tih hriat tak a baw nuai a, thikhàr a lo tling tûn bawk. Chhani ruang chhak lawkah chûan a puan ni âwm tak a lo awm bawk a, puan chu Pu Hlimawma chuan lain ruang chu a khuh thuai a, a ṭhiante an thleng thla zui thuai a.

Tichuan, tih zêl dân tur an rêl nghâl ta zung zung a. Pu Hlimawma leh Pu RL Pianmawia te chu khaw lamah zualkoin an kal nghâl a, Pu Vanlalchhuanga leh mi dang chuan ruang zàwnna tùr hlàng an siam nghâl zung zung bawk a. Khûa a vârzui thuai a, khaw lamah Chhani ruang chu an zàwn ta a ni.

Hmun dang panpui loin Chhungi ruang chu Dârlàwn Primary Health Centre panpuiin doctor-in a lo post mortem nghâl a. Post mortem zawh an In lam an panpui ta a.

Dârlàwn Police Station chuan Chhani tualthihna chu PS Case No. 21/2003 dt.25.12.2003 u/s 302 IPC hmangin thubuai an ziak lût nghâl.

Tualthatu dahṭha!
Zîng dâr 3:00 vêlah chûan mipui thinrim chuan Dârlàwn Police Station chu an pan thla ta mup mup mai. Police Station kawtzâwl zâu angreng takah mipui an ding khat nghûk a, Lawma an kawl tih an hriat tawh avangin mipui kuta pe tùrin police chu an kar a. Police chuan an kawl tawh loh thu leh Aizâwl lam an panpui tawh thu an lo hrilh a. Mipui chuan chu mi zâna Aizâwl pan lirthei a awm leh awm loh an chhui leh zung zung hnuah police chuan dâwt an sawi tih an hre chhuak ta thuai a.

An kuta Lawma an pêk thuai loh chûan police station chu tihchhiatah an vau ta a. Police mi tlêm tè chu an ṭang rei ngam tawh lo. Ramhnuai lamah an thukru tih an hrilh ta nge nge a. Chu veleh mipui chuan police station kawta chhuaka intlar tùrin police chu an hrilh a, police chu lo chhuakin mipui duh dân ang chûan an han intlar a. He station-ah hîan police an tam loh avangin mipui hian an hming lamin an hre vek a, an zîngah Constable Vanlalchama a kim lo tih an hre thuai a. Tichuan, police station chhehvêl ramhnuai chu an phêk zawn ta hum hum mai a.

Mipui ṭhahnem takin chutîa an han zawn tâkah chûan rei lo têah khûa aṭang km 2 vêla hla, Aizâwl lam ram, Kàwnpui mûal, Kàwntlingi pa Lui hnâr hmunah Lawma chu Constable Vanlalchama’n a lo birûkpui mêk chu an hmu chhuak ta thuai a. Lawma chu a kut leh keah constable chuan a lo phûar nghe nghe.

Constable Vanlalchama chuan huaisen takin a vênhimna hnuaia awm Lawma mipuiin tharuma chhuhsak an tuma an beih chûan theih tâwpin ṭan a lo khawh tlat a (he constable hian a mawhphurna leh hna chu huaisen taka hlen a tum a ni), mahse, mipui chuan an tam hneh êm avangin a tân rei ṭan khawhna theih ni hek lo le, rei lo têah mipui chuan Lawma chu an man ta a. Constable hian ṭan a lo khawhna lamah hlîam pawh a tûar nûal nghe nghe.

Mipui chuan Lawma chu kut an thlâk nghâl chawrh chawrh a. Lawma chu pa derdêp tak, pa tè lam a lo ni bawk nên, nikhua a hre rei lo hle. Mahse, chu lâi hmun aṭang chûan mipui chuan a chhak lawk kawngpuiah an zàwn chho a, kawngpui an thlenpui meuh chûan Lawma nunna chu a awm tawh lo!

Mipui chuan Dârlàwn PHC-ah Lawma ruang chu zàwn chhovin doctor-in a lo post mortem ve leh a. Post mortem zawh hnuah a puzawn Pu Vanlalmuana Inah a ruang chu nghatin, Joint YMA chuan Chhani kuang tùr leh Lawma kûang tùr an siamzui a. Kohhranin dân ang thlapa an vui hnuah he mi nî la lá hîan Lawma leh Chhani te ruang hi Joint YMA chuan an phûm nghâl.

Tlângkawmna:
He mi nî, December ni 25, 2003, Krismas nî tak hîan he thil thleng chanchin hriain Aizâwl aṭanga Dârlàwna kal Addln. SP, Aizâwl District chuan boruak sâng lutuk vangin khûa a lût mai ngam lo a, chawhnu dâr 2:00 vêlah a lût ngam chauh a ni.

He mi hnu hîan buaina eng mah thlengzui loin Joint YMA chuan mitthi pahnih Lawma leh Chhani te chu dân ang thlapin tu mah thliar hranna awm loin khawhar an lênpui a, khawhar inah tlangvâl pawh an riak bawk.

Lawma hi Dârlàwn Forest vêng an tih maia chèng niin Dârlàwnah hîan kum 15 vêl zet a lo khawsa tawh a. Amah hi mipat hmeichhiatna lamah he mi hmâ pawh hîan sawi zeuh tùr ting chûan chanchin a lo nei tawh a, Keprân pa pakhat sipai bâng chuan ṭum khat chu Zemabâwkah Kèl chi ṭha leh ṭha lo a hriat êm avanga a mak ti chuan a engtin nge a hriat a zâwt a, Lawma chuan sipaia a ṭan lâiin Kèl vêngtuah a lo ṭang tawh niin a hrilh tih a sawi. Arunachal Pradesh lam mi nia rin niin sipaia a ṭan lâiin eng thubuai emaw a neih avangin a tlânbo a, Dârlàwnah thing zaiin a awmzui ta nia rin a ni.

#Note: Mitthi pahnih, mitthi pasal hming te hi thlâk a ni a; mi dang hming leh a hun leh hmun erawh thlâk a ni lo...



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)