Vâi mistiri-in Mizo nu a that! (a true story)

Hlauhawm lampang hrim hrim hmun hrang hrang a mi lakkhawm...
LalrinzualaChawngthu
Posts: 3
Joined: August 19th, 2020, 2:14 am

Vâi mistiri-in Mizo nu a that! (a true story)

Unread post by LalrinzualaChawngthu » August 20th, 2020, 2:07 pm

Vâi mistiri-in Mizo nu a that!
(true story a ni a, he thil thleng hi i hre chiang a nih pawhin comment etc-ah sawi chhuak kher lo tùra ngen i ni e)

- Lalrinzuala Chawngthu

Kum 2004 December ni 21 zân dâr 7:30 vêl chûan Aizâwl Police Station OC chuan he mi zân dâr 7:00 vêla Aizâwl khawpui vêng laili tak pakhata pitar, ràwng taka thah nia lang chungchângah first information report (FIR) a dawng nawlh mai.

OC chuan Aizâwl PS C.No, 764/04 u/s 302 IPC tiin a ziak lùt nghâl. He thil thleng chhui tùr hian Pu Lalsanglura SDPO, Aizâwl South kaihhruai investigation team din nghâl a ni bawk.

Investigation team hian thil thlenna hmun hi rang takin, dâr 8:20 vêlah an thleng a, Mûalpuia Forensic Science Laboratory (FSL) pawh chinchâng hriattîr niin rang takin an thleng zui bawk.

Ruang
He tualthihna vêng VCP Pu Roa chuan pitar thi tain a chhawr ṭhin vâi mistiri pakhat chuan hna a thawh lâia ṭum thum lâi In hungna banga a lâwn liam lâi a lo hmuh tawh a. Pitar hi nu chengvawng tak, mahnia awm, engtik lâi pawha inkhàrkhum khap ṭhin, inlêng nei zen zen lo a ni. Zan khat chu chu vâi mistiri chuan he In kawngkapui hi luh tuma a kik lâi te, pitarin zîng dâr 9:00 vêla kawngka a hawnsak lâi te a lo hmu tawh a. He vâi mistiri lèn luh dân anga lêng lùt mi dang a la hmu ngai lo!

Tlai khat chu he In kawngkapui inhawng reng a hmuh chûan telephone hmangin chu In neitu nu chu biak a tum a, mahse, landline phone chu tu mahin an chhàn loh avangin pitar laina hnài tak, chu In thlang lawka awm a tupa Pu Lala chu phone-in, a pi Ina kala chinchâg ngaihven se ṭha a tih thu a hrilh ta ràwih a. Rang takin Pu Lala leh a û Pi Puii chu an kal ta vat a.

Gate lo inkalh chu Pu Lala chuan zuan khûmin in chhûngah a lùt a. VCP Pu Roa lo thleng ve chuan Pu Lala chu a zui lùt bawk. Pu Roa lùt tùr leh Pu Lala lo chhuak chu kawngkapuiah an intàwk a, a pî chu thîa a hmuh thu a hrilh a.

An pahnih chûan in chhûnga lùt ṭha lehin Pu Lala chuan chokâa tuboh chu lain gate chu a va chhu hawng thuai a. Chutih lâi chûan Pu Roa pawhin mutna pindana blanket-a inkhuh zâna muhìl ang taka mû In neitunu thi khawng reng tawh chu a hmu ve ta bawk. Rei rial loin Pu Lala chuan a hmingin Aizâwl P/S-ah FIR a theh lùt ta vat a ni.

Pi Puii chuan a nuṭapa Pu Lala'n gate a chhut hawn veleh hmanhmawh takin in chhûngah a tlàn lùt a, a pî ruang a hmuh meuh chûan insum harsâ a ti ngei mai.

A pîin a mut apîanga pyjama a hàk ṭhin a ha lo te, a phelh mang mang loh rangkachak ṭhî, zungbun leh sana pakhat mah a awrh lo leh a bun lo te, mut dâwn sam phîar ziah si sam phîar lo tlat te, TV aṭanga Star TV cable a phawi ziah plug-a lo inphâwi daih te, a kâwr vel loa a ei ngai loh Apple kâwr velh loha keih hèk dawhkân tê pakhata lo awm te, a zàr loh lâia a thleh ṭhat thlap ṭhin thosilên khum bana lo inbât tlat te, chokâ, a hmun loa plastic no lo inhûng tlat mai te chu a pî sulhnu ni theiin a ring lo. Tu emaw a pî Inah chûan lùtin a pî chu a that ta niin a ngâi lo thei lo a ni.

Crime Scene:
Choka filter chunga dân pângngai lo taka inhûng plastic noa kutthlâ chu forensic team chuan an la. Ruang awmna pindana thinga siam thosilên banah chûan sawi tàk angin dân pângngai ang loin thosilên a inbât chho a, khum mawng lama khum dang pakhat awm chungah chûan Sêrthlum eng nge maw zât a awm bawk.

Pitar khawngaihthlâk tak kum 76 mi, amah chauha awm rek rek, tû pawi mah sawi ngai lo chu thlamûang taka a mutna ṭhin khumah blanket pahnih leh rizai pakhata khuh zarin lu lam khawchhak lam hawi leh ke lam khawthlang lam hawiin a mu bâm a. A mutna khum bul lawka dawhkàn tè chunga Apple pum sâwm vêl, pum khat a chanve dâwn keih hèk a let ram a. Steel safe pakhat chungah chûan safe chahbi ni âwm tak a bâwrin a awm a, almerah pathum awm chungah chahbi bâwr eng nge maw zât a inkhâi bawk.

Investigation team leh forensic team te chuan ngun takin ruang chu an zir chîang (inquest) nghâl mawlh mawlh a, VCP leh YMA Br President an awm ve bawk.

Mitthi kâ aṭang chûan thisen leh tuirìl inpawlh a lûang chhua ngîai ngîai a, a bîang ding lam leh mit vei lam hnuai lam chu a kak a, a hmui chung chu a kak a, a kut vei lam kutzunglâi chu tan ni âwm takin a bunga chuta ṭanga thisen chhuahna hnuhmâ chu a awm bawk.

Kawrlum phiar sen a ha a, kawrhnuai hain pawnfèn dum hnuaiah fènhnuai de ṭhek ṭhek a fêng a, a kawrhnuai leh fènhnuai te chu a hnute thlengin a inhlìm chho. A kam sîr ding lam leh hnârah chûan thisen a tling tùn a, a nghâwng leh âwm vel chu a duk ruih a, a pawnfèn leh malpui vei lamah êk them a lûang zûih a, a zahmawh kawngkâ chu kâuin chuta chûang mipa chi ni ngei tùr a awm (mipa chi hi forensic-in zir chian atân an la). Mitthiin engtik lâi maha a thlah ngai loh a rangkachak zungbun, ṭhi leh sana te chu bunin a awrh lo.

Police chuan ruang chu post mortem nghâl tùrin doctor an bia a, mahse, remchàn zâwkna avangin a tûka ti tùrin an ruahman ta zâwk a. Ruang chu la sawn loa police vènin an dah ta rih a.

Rinhlelh man:
Ruang zir chianna aṭang khân police chuan mî kut tûar ngei thî tih an ring tlat a, mitthi lainâ leh ṭhenawm khawvêng te chu mawhphurtu ni thei âwm an sawipui a. Mawhphurtu chu he In chinchâng hre tak a nih an ring hlawm a, chutiang a nih chûan he Ina eng nge maw lo ti tawh emaw hna thawk tawh tu ber emaw a nih an ring bawk.

Tichûan, he Ina cement hna leh rawnghnawiha thawk tawh vâi mistiri pakhat, Sultan Ahmeh (Mawia tia koh) chu a zân-a-zânin rinhlelh thu-ah ASI Zohmingliana leh a hote chuan an man nghâl a. A tûk December ni 22-ah mi dang pangâ rinhlelh thu-ah an man leh bawk.

Hnuchhuina:
Aizâwl P/S-ah chûan Apple pum him dang an lâk chu Mawia an tih vâi mistiri chu an keihtîr a, chuta a keihna thlâ leh ruang hmuhna Apple keih hèk thlâ chu FSL, Kolkata-ah zir chian tùrin police chuan an thawn a, Mawia kutze thlâ pawh lâksakin ruang hmuhna hmuna forensic team-in kuthnu thlâ an lâk nêna zir chian tùrin FSL, Mûalpuiah an thawn a, Mawia thisen sample pawh zir chian atân an thawn bawk.

Aizâwl Civil Hospital-a Dr Rozama post mortem result-a a lan dân chûan mitthi ka chhûng ril deuh takah ha lem hmuh chhuah a ni a (boruak mamawh tâwk hmuh loh vanga thâwk tuma a beihna lamah a ha lem chu a ka chhûngah a titla a ni maithei). A serh chhûngah mipa chi hmuh a ni a. Mitthi chu hmuh a nih hmâ nîa thi tawh a ni tih leh a thih hmâ hian theih tâwpa a ṭan avangin a taksa hmun ṭhenkhatah hlîam a tuar phah a, a âwm leh a nghâwng vêl a duk a, êk a cheh phah bawk a, mahse, a hlîam chu a thih chhan ni loin boruak tlâkchham vanga thî a ni tih a hriat theih ta a.

Mûalpui FSL chuan ruang hmuhna hmuna kutze thlâ leh Aizâwl P/S-a Mawia kutze thla lâk chu a inmil chiah tih an hmu chhuak a. A hnu deuhah, Director, Central Forensic Science Laboratory, Kolkata letter No. CFSL/EE/2005 (MIZO)-3 dt. 29.4.2005-a tàr lan angin ruang hmuhnaa Apple keih hèka ha thlâ leh Apple dang police-in Mawia an keihtîra ha thlâ chu a inmil thlap tih hriat a ni leh ta bawk. Mahse, he mi rûala Mawia thisen sample result erawh thubuai chin fel thlengin hriat a ni ta lo.

Inpuanna hmasa
Ahmed (Mawia) chu Aizâwl P/S police chuan case i/o SI Lalchia hoa an dâwp hnu-ah a inpûang ta a, chu tualthahna thawnthu chu a lang ṭan ta iarh iarh a.

Ahmed@Mawia chu
Kathali, Karimganj, Assam-a chèng Abdul Gori-a chuan fanu pali leh fapa pahnih a nei a. A fapa naupang zâwk Mohammed Sultan Ahmed-a chu kum 1982-ah pîangin pâwl sarih thleng lehkha a zir hnu-ah kut hna a thawk ta a. A naupan lâi chûan fel tak, nu leh pâ thu âwih thei tak a ni ṭhin. Kum 1997-ah in sak leh rawnghnawiha inhlawh tùrin Aizâwlah a lo kal a, a hlawh hîan a inchàwm bâkah a chhûngte a khât tâwkin Rs 1,000/- a thawn ṭhin.

Ahmed-a hi chhûngkaw chàwmtu ber niin pasal la nei lo zâwk a farnu pakhat chuan matric a fail hnu-ah a zir chhunzawm lo a, nu leh pâ kîanga awmin vun natna chi khat albino disease a vei avangin pasalah a hnawng deuh a.

Ahmed-a hi Aizâwla a awmna vêngah hian kum 5-6 a awm tawh a, mi fing fel ve tak, Mizo ṭawng pawh thiam tak, ṭawng duh tak a nih avangin mi ngainat a hlawh hle a, a chhawrtu apîangin a thu âwih leh zamṭhat avangin an duh ṭhin vîau bawk. Kristianah inpein Presbyterian Kohhran pastor pakhatin baptisma a chantîr a, non-Mizo Christian Fellowship lamah pawh a inhmang ve vîau nghe nghe a, Mizo pawhin an fakin an ngaina hle.

Sum Mamawh Vang?
Ahmed-a chuan a farnu pasal nei lo kum 16 mi, vun natna chi khat vei chu a lainat êm êm a, a natna vanga pasal la hmu lo tih pawh a hria. Ṭum khat chu vànneihthlâk takin mi pakhatin Ahmed-a ten Rs 5,000/- an pêk theih dâwn chûan nupuia neih a hnial lo tih a hre ta tlat mai. A phùr hle a, lehkha zir zawm thei tawh lo a farnu tân chu tluka hun ṭha chu awm theiin a ring lo.

Amah a inenkawlna bâkah a khât tâwka a chhûngte Rs 1,000/- a thawn avangin sum khàwl aram a nei lo a, a farnu îai lotu chu chhuah loh hrâm a duh bawk si, engtin nge Rs. 5,000/- chu a neih theih ang tih ringawt chu a ngaihtuah ta a.

Kum 2004 May thla aṭanga amah chauha awm pitar pakhat Ina a inhlawh hnu July ni 15, 2004-ah mi dang Inah a thawk a, chu mi hnu-ah pitar Inah bawk a hmâa a zawh loh thawk zoin a inhlawh leh a. Pitar chuan a sum mamawh chu a neih ngei a ring a, an lo inchhawr hnem ve tawh avangin an innèl vîau tawh avangin zah pawh dâwn loa dil chawt mai ṭhain a hre ta a.

Tichûan, December ni 19, 2004 (Chawlhni) zân dâr 7:00 vêlah pitar Inah chûan a kal ta a. Thira siam gate chu a lo inkalh avangin hungna bangah a lâwn liam a (a hmâ pawhin a lo ti fo tawh). In hi a hre bel hle. A rin lâwk ang ngeiin pitar chu amah chauhin a lo awm rak rak a.

Ahmed-a chuan a farnu chungchâng leh thil awm dân zawng zawng chu hrilhin Rs. 5,000/- pùk a dîl ta chawt a. Mahse, pitar chuan chuti maia chutiang zah zah sum a kawl loh thu a hrilh a. Ahmed-a chuan beidawng duh chuang loin thiam takin a dîl lui zêl a; mahse, pitar chuan a neih loh thu bawk hrilhin a kal bo vat loh chûan mi dang punah a vau ta a.

Chutîa a vau tâkah chûan Ahmed-a chu a hlàuthàwng ta thut a, a rawmawl phawrhin pitar kâ leh hnâr chu thâwklehkhatah a hup ta thut a, chu veleh pitar chu a taksa pumin a khùr sai ta hlawk hlawk a. Ahmed-a chuan tihhlum mai hlau leh hnuhnawhin a pawm lawka khumah a mut ta thlawp a. A thizui mai tih a hre ta thuai a. Chutiang a nih rau rau chûan tiin mipat hmeichhiatna tenawm tak a hmanpui ta a

Chu mi hnu-ah mutna pindana pawisa dahna safe chu hawn a tum a, mahse, a theih loh avangin a mi thah bun lâi rangkachak zungbun, ṭhi leh sana chu a la a, zân dâr 8:00 vêlah chu hmun chu a chhuahsan ta a. A thil lâk pawh chu kawlzui ta lo chûan a rawmawla tuamin a In luah bul hnawmhnawk paihna kawrah a paih ta daih a (he hmun hi a hnu-ah police-in an dap a, eng mah hmuh an nei lo).

Chu mi hnu chûan a tei a tei a, a ṭhian mistiri ve tho Abdul Kalam-a, Kanan Vênga mi In luah hnênah December ni 20, 2004 (Thawhṭanni) tlai dâr 4:00 vêlah kalin a riak nghâl a. A tùk nilênga a awm hnu, tlai dâr 4:00 vêlah a hawsan ta chauh a. A In luaha a haw chûan chhuak loin a inkhung ta a.

Chu mi zân chûan a awmna vênga tualthihnaa mawhphurtu nia ringhlelin police-in an man a. Police station hruai nghâlin lock up-ah eng nge maw chen khung niin thu zawh fiah thuai a ni. Hetih lâi hîan an rinhlelhna thilah chûan eng mah a hriat loh thu a la sawi pàng pàng.

A tûk Nilainî chûan police chûan Aizâwl Civil Hospital-ah IV Drip tihtîrin lock up-ah an khungzui leh a. Zân dâr 12:00 vêlah police chuan tûalthahna Inah kutkawl bun leh mit tuam chungin an hrûai a, eng mah a hmuh theih loh avangin a vàk kûal dun dun nghe nghe.

A tùka police-in Apple an pêk chûan a lakah police chu an làwm tâk deuh vangah ngâiin an hrilh angin a keih hlawih a, mahse, an lâksak ta daih si chu a hre thiam lo hle. A hnu lawkah tualthahna avanga rinhlelh man thar a ṭhiante pangâ nên jail lamah dah an ni ta a.

Court thuremna
April 25, 2006-ah chûan ADM (J), Aizâwl District chuan Mohammed Sultan Ahmed-a hremna tùr thuremna a tichhuak ta. Pitar kum 76 mi, mahni a chènnah ngei Ahmed-a'n a thah hnu-ah mipat hmeichhiatna bawlhhlawh tak a hmanpui leh a mi thah rangkachak ṭhi, zungbun leh sana te a rùksak avangin Sec 302 IPC tlawhchhanin hremna sâng tak (rigorous impresonment) kum 12 tâng tùr te, Rs 1,00,000/- châwi tùr te, Sec 376 (1) IPC tlawhchhana pawisa chawi tùr a neih loh chûan kum 3 dang tâng zawm tùr te, Sec 384 IPC tlawhchhanin kum 2 hreawm taka tâng tùrin a ti ta a (Crl. Trail No. 2561/2004)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)