Mizo Suicide Bomber (a true story)

Hlauhawm lampang hrim hrim hmun hrang hrang a mi lakkhawm...
LalrinzualaChawngthu
Posts: 3
Joined: August 19th, 2020, 2:14 am

Mizo Suicide Bomber (a true story)

Unread post by LalrinzualaChawngthu » August 22nd, 2020, 2:51 pm

Mizo suicide bomber

-Lalrinzuala Chawngthu

(Thil thleng tak tak, vêng, hmun leh mihring hming thlâka ziah a ni. He thil thleng chungchâng hi i hre chîang a nih pawhin khawngaih takin a tûartute tân a hreawm theih avangin sawi chîang lo tùra ngen i ni e)
*****
Chawlhni zân dâr 10:00 a pèl hret tawh ang tihah bomb a puak dùr mai! Chutiang zan rei tawh lama thil ri ring tak puak chuan a bul vêla mite a thâwng kher mai! March 9, 2003 (Chawlhni) zân dâr 10:25 vêlah thil puak ri dùr hi mipuiin an hria niin an sawi.

Aizâwl Thakthing Bazâr kawng lùn lâi tak, Dâm Vêng panna kawng pêng, Pu Lalbuaia building bul mai kawngpui chu thil puak ring tak lo chhuahna chu niin thâwm hre phâkte chuan an ngâi.

Chawlhni zân inkhâwm bân hnua TV en leh thil dang tih vanga la meng te, ṭhalâi meng rei ṭhang te leh nulâ leh tlangvâl inrîm te tih loh chu meng an awm tawh meuh lo. Chawlhni zân a nih avangin lîrthei leh mihring veivâk pawh zan dang âia a tlèm zân a lo ni kher bawk nên chu thâwm chu a ring duh kher mai.

Thàwm hre phâk la meng apîang chu awmhmun aṭangin chinchâng ngaihvenin tîm ru tak siin an chhuak phak phak a. Thakthîng kàwnah chûan rei lo têah mi an pung khâwm ta thuai reng a, mu tawhte pawh an tho chhuak phak phak bawk. Hre chîang bîk awm chuang loin an inzâwt tawn sup sup a ni ber mai.

Thakthîng Bazâr, Dâm Vêng panna pêngṭhuamah chûan kâr loah mipui an pung khâwm tam hman hle. Khawtlâng hruaitu leh mi puitling deuh chuan theih ang tâwkin thil thlenna hmuna mipui fuan khâwm ṭuk ṭuk chu an thunun hrâm hrâm a. Pi Marami an tih chuan an hnaih ber, Kulikâwn Police Station chu phone-in thil awm dân a hrilh ta thuai a.

Thakthîng Bazâra Pu Lalbuaia building bul, kawngpui dung, Dâm Vêng panna kawng pêng taka mi pakhat ruang charna hmun chu Kulikàwn PS-a police duty-te chuan thu an dawn zawh rûal rûalin an pan ta vat a.

#Crime scene
Mi pakhat kum 30-35 inkâr vêl, jacket hring ha, kamis de ṭîal ha, tawnzau vâr, kekawr dum leh kekawrte hring ha hi a lu lam hmâr lam, a ke lam chhim lam hawiin, kut pahnih phar hûanga zangthalin a mû a. Kâwnghrên dum a hrêng a, mawza vutbuak rawng a bun bawk.

Police chuan mipui pung khâwm chu insaseng tùra hrilhin uluk theihtâwpin ruang chu an zir ta zung zung a. Chinchâng hre âwm deuha ngaih apîang thu an zâwt zèl bawk a.

Police-in ruang awmna leh a chhehvêl ngun taka an zir hnuah thil puak them tlêm tlêm an char khâwm aṭang leh ruang âwm leh dul vêla na taka hlîam hnuhmâ aṭang te chûan geletine bomb puak vanga thî niin an ngâi.

Ruang âwm leh dul chu bomb chak tak chuan na takin a hliam a, a kawchhûng a lang thei hîal a ni. A taksa dangah erawh hliam lian tham dang hmuh a ni lo. A thawmhnaw hrang hrang chu ngun takin police chuan an dap zêl a, pawisa ip dum a chhûnga chêng 4/- te, gas lighter sen 1 te, zozial tlâwn 4 te leh ball pen 1 te an chhar a. Chu bâkah thil pawimawh tak pakhat envelop chhûnga lehkha ziak hi an chhar bawk. Chu lehkha leh ruang chhar chuan inzawmna pawimawh tak a neih ngei police chuan an ring.

#Mahni inti hlum!
Chu lehkhaa thu inziak aṭanga a lan dân chûan mi ruang chu Laltea kum 32, Aizâwl chhuahchhawng lam vêng niin a lang. Lehkhaah chûan – a sual êm avanga inti hlum a nih thu te, a sualna vanga ngâidam tùra a hringtu a pa a ngènna thu leh a mangṭhana thu te a inziak a (he lehkhaa thu ziak hi a hnuah police chuan mitthi chhûngte entîrin an fin fiah). Tichuan, mi ruang chhar chu mahni intihlum tih chîang khatah police chuan an ngâi rih ta thlap a.

Suicide note chu fîmkhur takin police chuan ngun zâwka zir chian atân an kawl ta a. Telephone number inziak chu nakinah thil pawimawh tak a la ni ang tih rêng an hre phâk lo. Mitthi chu Laltea a ni chiah em tih police chuan an chhuizui nghat vat a, rei lo têah a ni ngei a ni tih an fin fiah ta thuai a.

#Laltea chu
Police-in Laltea chanchin kimchang an chhuizuina aṭangin Tuirialah sangha mana inhlawh ṭhin, tui pawh thiam tak, a kâwngah lung rit nelh nawlh thlung chunga tuia a lûh hnuah pawh buai miah loin a duh tâwk hnuah mahni bawka awlsam têa lo chhuak ve leh mai thei a ni tih te, sangha mana inhlawh ṭhin a nih avangin sangha bomb nân geletine a hmang ṭhin tih te, geletine eng nge maw zât kawl lâi pawh a nei tih te an hre chho ta zêl a.

Kulikâwn Police Station chuan PS Case - UD (unnatural death) Case No. 2/2003 u/s 174 Cr PC ziak lûtin Aizâwl Civil Hospital-ah post-mortem tùrin an dah phei ta a. Zân hi a rei deuh tawh avangin a tûk March ni 10, 2003 chawhma dâr 9:30-ah post-mortem tih niin dârkâr chanve chhûngin an ti zo.

#Hmeichhe pakhat ruang chhar a ni!
March ni 12, 2003 chawhnu lamah Aizâwl chhuah lam vêng pakhata Pu Kapa lakhuihthei huana mau hung kârah hmeichhe pakhat saruak vek ruang chhar a ni. Hmeichhia hi mau hung hlim, hmun rûalrem lâiah rem takin a lo mu zar a. A hmu hmasatu he lâi hnaia awmte chuan tu nge a nih an hre lo a. Ruang nghâwnga ramhrui chu suih hnih ngawtin a lo la insuih thlap a, inawhhlumna hrui ang lo takin a suihna bâwk a hma lamah a awm tlat!

A chhehvêlah chûan mihring chêtna sûlhnu ni âwm a bel deuh sun a. Chuti a nih chûan hmeichhia chu tuin emaw ramhrui hmangin a nghâwnga vêtin a rêk hlum ta a ni maithei. Mahse, engvangin nge ruak ngalngata a awm kher? Mipat hmeichhiatna hmang tùrin a inphelh ruak vek ang a, mipat hmeichhiatna an hman zawh hnuah mipa chuan hrui hmangin a rêk hlum ta pawh a ni thei tho.

Police chuan khawtlâng hruaitute nên chu vêng community hall-ah hmeichhe ruang chu a duh apîang en theih tùrin an dah a. Ruang chhar a nih thu Aizâwl mipui hriat tùrin an puan zàrtîr nghâl bawk.

Hall-a hmeichhe ruang mipui en tùra dah a nih aṭanga rei lutuk loah chûan mi ṭhenkhatin Mazari, pasal la nei lo, kum 27 mi vêl, thingtlâng khaw pakhat mi, a û Ruati, Bàwngkàwn Salvation Mûala chêng bula hun eng nge maw chen lo khawsa tawh ṭhin nia an rin thu an rawn sawi ta hlawl mai.

Tih theih dang a awm tawh chuan loh avangin police chuan post-mortem tùrin Aizâwl Civil Hospital-ah ruang chu an thawn phei ta a.

#Hnuchhuina
Police chuan Mazari û Ruati chu hnuchhuina hmasa berah hmangin an kâwm vat a. Ruati chuan an hnênah Mazari chu a awm ngei thu lo hrilhin, zû a in ṭhin tih an hriat hnuah vawi tam tak sim tùra an tihin awmzia a neih loh avangin a tâwp a tâwpah an tihngaihna hre loin an khaw lama haw tùra an tih tâk thu te an lo hrilh a.

Mahse, Mazari chuan an khaw lama haw chu a lo duh îkhaw lo mai. Haw âi chûan a ûte ṭhenawma muṭia hnathawka awm Mawia nên chûan an lo inhmêlduh hman tho bawk nên a luhkhung ta daih a. Mawia chu police chuan thu an han zâwt fiah ve leh a. Ani chuan nupa angin an han khawsa dûn rênrâwn ṭhin tak nain Mazari chu patil pakhat Sawmtei nên an inkawp bawk tih rei lo têah a hre chhuak thuai a, chuvang chûan chênpui rei duh loin a lo chhuahtîr ve leh hi a lo ni a. Chuta ṭang chûan khawiah nge a kalzui tih a hriat tawh loh thu a lo sawi a.

Police chuan Mawia thu hrilh angin Mazari chanchin chu an chhuizui ta zêl a. Khatla vênga a awmna ṭhin nia an sawi te chu an han zawng nghâl zung zung a, mahse, an beidawng ta rih.

March ni 13, 2003 tlai dâr 4:30 vêlah Aizâwl tlâk lam vêng pakhatah chhûngkuain Sawmtei te chu an chêng tih an hre ta a. Rang takin Police chuan chu vên chu an pan nghâl a.

#A éng a lang ṭan
SI Pu Lalnitea ho chuan hmeichhe police hruaiin Sawmtei chu an hmu chhuak thuai a. Kulikâwn PS lamah hruai chhoin thu an zâwt fiah ta a.

Sawmtei chuan Mazari nên chuan kum eng nge maw zât aṭanga lo inhre tawh an nih tih sawiin 2001 kumah thla thum vêl an chêng ho a, chumi hnu chûan an inkawpzui ngai vak lo a, Bâwngkâwnah an inhmu zeuh zeuh ṭhin a. March ni 8, 2003-ah an inhmu leh a, chumi nî chûan an vêngah hruai hawin an Inah a riak ve nghe nghe a.

A tûk March ni 9, 2003 chu Chawlhnî a ni a. Tûkṭhuan ei khamah an vêng aṭangin Zodin Square lamah an chhuak chho dûn a. Mazari chuan pawisa a neih loh avangin “Mipa ‘bêm’ tùr zawng ang,” a ti a.

Zodin Square vêlah hian Chawlhnî-ah lang sâr lutuk lo, a duh mite hmuh awlsam theih tùr siin zû standing ṭhin an awm nûal a. He mi nî pawh hîan Mission Vêngthlanga chêng Pana te nupa pawh chu zîng dâr 8:30 aṭangin he lâi vêlah hîan an awm ṭan a. Chutih lâi chûan Pana nêna inhmêlhriat sa Laltea chu dâr 9:00-9:30 inkâr vêlah Zodin Sq. vêlah chuan lo kalin hmeichhe kawp tùr a duh thu Pana chu hrilhin zawnpui tùrin a ngèn a, a telephone number leh a chênna hmun ziahna lehkha them a pêk hnuah Treasury Square lamah Laltea chu a phei leh ta a.

Dâr 10:00 vêlah Mazari leh a ṭhiannu Sawmtei te chuan Zodin Square chu an lo thleng ve a. Sawmtei leh Pana nupui Ma-i te chu lo inhre sa an lo ni bawk a, an inbe lûam a. Anni nupa chuan Mazari thil zawn chu ngaihtuahpuiin Treasury Sq. lama liam phei deuh hlawt Laltea chu bêm mai tùra kawhhmuhin a lo kìr leh thuai an rin thu hrilhin lo nghâk tùrin an ti a. Tichûan, SBI Main Branch Office kalna step-ah Mazari te ṭhian dûn chu an ṭhu ta rih a.

#Intawnna
Rei pawh an la ṭhu hman lo ang tihah Treasury Square lam aṭangin Laltea chu a lo phei leh ta chhat chhat a. Pana chuan lo koin Mazari te ṭhian dûn nên chûan a inhmêlhriattîr vat a. An pangâ chûan dâr 11:00 vêlah Treasury Square lamah pheiin vawksa zawrhnaah zû an inho ta dar dar a. Zû an in zawh chuan Mazari leh Laltea te chu Vênghlui lamah an kal hrang ta a; Pana te nupa leh Sawmtei te erawh chu Zodin Square lam panin an lêt thung. Hemi hnu hîan an inhmuzui ta lo, niin Sawmtei chuan a sawi.

Laltea leh Mazari te chu kein Republic lam panin an kal zêl a. Laltea hian Mazari hnênah chêng 2,000/- nei angin a insawi a. Laltea chuan T.Romana College bul maia an chhûngte Inah kalin a pum nat avanga taxi-a haw nân tiin chêng 200/- a dîl a; mahse, anni chuan chêng 50/- chauh an lo pe a.

He Ina hmeichhe naupang kum 13 mi lek, fing leh thil chîk zet chuan chhûn dâr 12:00 rîk dâwn ṭêpah Laltea chuan hmeichhe pakhat a rawn hruai tih sawiin, Laltea chu In chhûngah a nu pawisa dîlin a lût a; hmeichhia erawh chu T.Romana College kawtah a ding a. Chu nu chu chêr lam deuh, kawr senlâr bân bûl ha, T-Shirt chuar angreng tak leh jeans kekawr pâwl ha, sleeper ke hnuai chhah chi bun, hmai pawh bîal lam niin a sawi.
…………..

March thlaah hian tui a harsa hle ṭhin a, thlasik zo hlawt, khaw ro vânglâi tak a la nih bawk si avangin tui a harsa leh hle a ni. Chawlhni chhûnah pawh tui châwi an awm deuh reng tih theih a ni.

Mapuii pawh chuan Pu Kapa huan chhak lawka tuikhurah Chawlhni chhûn dâr 1:00 vêlah tui a châwi a. Chutîa tui a thàl lâi chûan tuikhur thlang kawng pawh awm mumal lo ramhnuai aṭanga hah hmêl taka Laltea lo chhuak thut chu a hmu a, a tiphu zawk nghe nghe.

Mapuii chuan engvanga kawng pawh awm mumal lo ramhnuai aṭanga lo chhuak ta thut nge a nih a zawh chûan ani chuan, “Mapui, nang i ni maw? Tui i chawi elaw,” tia bul ṭanin a hmanhmawh deuh avanga kawng tlûang pângngaia kûal loa chu lâiah chuan kal ta mai niin a insawi a. Khawmûangzui lêm loin tuikhur chhak lam panin a kal liam ve leh mai a.

Chuta ṭang chûan Laltea chuan a ṭhian pakhat Sanga te In, tlai dâr 4:00 vêlah tlawhin zu in tùr a dîl a. Sanga’n zu in tùr a lo neih mai si loh avangin a chhuak leh thuai a. Sanga zanriah eirawng bawl zawh âwm vêlah Laltea bawk chu Sanga te Ina kal lehin zû a hmuh zawh loh avanga zawnpui tùrin a sâwm a. Sanga pawh chuan tih tùr ṭûl a neih tawh rih loh avangin a ṭhianpa sâwm ang chûan kawngpui lamah zû chu a va zawnpui ta zak zak a.

Zu in tùr an hmuh zawh chuan loh avangin Sanga te In lamah bawk chuan an lêt dûn leh a. In an thlen chûan Laltea chuan kawr hâk hawh tùr Sanga chu a dîl ta a. Sanga chuan a jacket hring inkhâi chu ui ru tak chunga pe a, “A faiin min pe leh ang che” tiin a chahzui nghê nghê. Chumi hnu chûan Laltea chuan a chhuahsan ta a. Laltea hmêl leh cheziaah eng mah danglamna a awm a hriat loh thu Sanga hian a sawi.

Chaw te an eikham hnuah Sanga chu lêng chhuak loin TV te a en hnuah a mû a. A mut hnu lawkah YMA information mike aṭanga chêt sual vanga Laltea thih thu a hriat chûan tho nghâlin a lumenpui ve niin a sawi bawk.

Chumi vênga mi bawk Kima chu a chhûngte chhuah bo avanga tlai dâr 5:53 vêlah amaha zanriah a ei lâiin a tuizêm khâwr chânga helper atâna a lo hruai ve tawh ṭhin Laltea chu an Inah a kal a. Chaw ei lâi a nih angin Mizo ze mâwi leh tih dân mâwi pângngai angin chaw ei ve tùra sâwmin a chaw ei tawh leh tawh loh a lo zâwt a. Laltea chuan, “Ei tawh ang reng, ei lo ang reng,” tia chhângin a riat nawi mai mai a.

Khawhaiah tuizêm khâwr tùra a han kal thu sawiin tuizêm pasarih khâwr tùr a neih thu leh a mawng siamna tùr hmanrûa a ken loh avanga lam paha rawn haw thla niin Laltea chuan Kima hi a hrilh a. Rei an inkâwm hmâin Laltea chu a chhuak leh thuai a. Jacket hring a hâk thu leh savun pheikhawk a bun thu Kima hian a sawi nghe nghe.

………………………

#Chapal chiah!!
Kulikâwn police chuan SI Lalnitea, case i/o hoin Mazari ruang chharna hmun hi ruang chhar ni tûk March ni 13, 2003-ah ngun zâwka a hmun hma en tùrin an pan leh a. Ruang chharna hmun leh a chhehvêl ramhnuai leh huan chu zâu takin hnuhma chhui tùr hmuh inbeiseia an dap chîam hnuah Mazari ruang chharna hmun aṭanga thlang lam hla ve fê kawngpui sîrah Mazari chapal bun ni âwm tak khing khat, a vei lam an chhar ta hlauh mai.

Mazari ṭhian leh lainâte he chapal hi an entîr a, Mazari chapal bun lâi ngei niin police an hrilh. Ruang chharna hmunah chûan sûlhnu chhar tùr dang a awm mial beiseiin police hian vawi 3/4 vêl ngawt tlawhin an dap leh nain Mazari thawmhnaw hâk emaw sûlhnu rin tlâk emaw he thubuai chhui nêna inkungkaih thei tùr thil pawimawh eng mah an chhar ta lêm lo.

#Mazari chu tû thah nge ni ta ang?
Aizâwl Civil Hospital-ah Mazari ruang post-mortem examination result chuan a thih chhan chu thawchham (asphyxia) a nih tih leh reh hlum a ni tih a târ lang a.

Laltea ruang chhar a nih khân (suicide note) a pa hnêna a thupha chawina thuziak an chharah khân Mazari a thah thu a chûang lo nain thil sual lian tak a ti ngei nia rin theih tùr ṭawngkam a hmang a. Tin, Zodin Square-a zu standing Pana hnêna a address leh phone number ziahna lehkha them a pêka kutziak leh suicide note-a kutziak chu mi pakhat kutziak ngei a ni tih police mi thiamte chuan an fin fiah a.

Mazari leh Laltea te hi chhûn dâr 12:00 rîk hmâ deuh lawkah Treasury Square aṭangin Vênghlui lamah kea kalin Mazari ruang chharna hmun lam an pan ngei tih police chuan an ring nghet hle. Vêng mawnga Pu Kapa lakhuihthei huan chhak lawk tuikhura tui châwi Mapuii’n chhûn dâr 1:00 vêlah tuikhur thlang ramhnuai kawng awm mumal lo aṭanga Laltea lo chhuak hlawl a hmuh avang khân Pu Kapa huan lam aṭang ngeia lo kal niin a ngaih theih.

PME result aṭangin Mazari kha reh hlum ngei a ni tih a chîang a, chumi nemnghet tùr chuan Mazari ruang chhar a nih khân a nghâwngah vakau hrui a lo la insuih a, amaha inrêk hlum a ni lo tih hriat takin chu hrui chu hma lamah suih hnihin a insuih zaih a ni. Hei vang hîan amaha inrêk hlum ni loin mi dang tuin emaw hrui hmangin an rêk hlum ngei niin a ngaih theih bawk.

Mazari ruang saruak vek chhar a nih avang khân Laltea nên mipat hmeichhiatna hman dun tumin an inphelh ruak niin a rin theih a. Mahse, PME result-in Mazari serh chhûngah mipa chi hmuh a nih thu eng mah a târ lan loh avangin an inpâwl hman lo a ni mai thei. Mazari thuamhnaw hi Laltea khân khawiah emaw a thukru ang a, a chapal erawh thlang lamah a paih thla nawl nawl a ni maithei.

Treasury Square aṭanga an ṭhiante an kalsan dân aṭang leh kalkawnga Laltea'n an lainâte In a tlawh tih fin fiah a nih aṭangin chîangah a ngaih theih. Mahse, heti chin bâk eng mah fin fiahna dang police-in an neih si loh avangin Laltea chu Mazari thattu a ni ngei tih a chîang chuang lo!

Case IO Lalnitea thluak a buai map map hle. Kil hrang hrang aṭanga thil thlen dân leh fin fiahna an neih te rem khâwma a chuktuah kual vêlin Mazari chu Laltea thah ngei niin a pawm theih tih a hria; Mahse, tûal thattua puthlu nalh tùr erawh chûan fin fiahna chîang tak dang a mamawh a, chu chu a nei thei chuang si lo a ni.

Thih dân pângngai ni loa thihna pahnih hun inhnaih takah a thleng a. A thi pakhat chu mahni inti hlum ni ngeiin a pawm theih, thil khirh a ni lo. Pakhat zâwk erawh thah ni ngeiin a ngâi a, mahse, a thattua puhthlûk fak theih awm thei si lo chuan han tihzui vak dân tùr a tihre lo hle a. Mazari thattua rinhlelh ber Laltea ber a thih si avangin Mazari tûal thihna hnuchhuina leh thubuai chu titâwp tùrin hmâ a la ta ringawt mai a ni.
*****

#Mi pahnih thih dân chu.
He thil thlen aṭanga kum riatna, 2011 kum khân crime lam tuichilh tak mai Zonunmawia chuan mî kâ aṭanga he thil thleng râpthlâk tak mai chanchin hi hriain thu dik tak hmuh chhuah ngei tumin a chhui ve ta a.

Kulikàwn Police Station aṭanga bul ṭanin he thil thleng kaihhnawih case record zawng zawng hài chhuakin khatih hun lâia hnuchhuia tel police zawng zawng, case I/O Pu Lalnitea tiamin a zawng chhuak vek a, police hnuchhuinaa mihring hming chhinchhiah zawng zawng kawm kûalin thil thlenna hmun leh thil thlenna vêng te a hmunah kala ngun taka a zir chian hnuah mi pahnih thih dân dik tak chu a chhui chhuak ta a.
.....
Khatîa Laltea leh Mazari te an intawn khân Laltea khân chêng 2,000/- nei angin Mazari hnênah khân a insawi a, Mazari lahin sumtuak nâna ‘mipa bêm’ a duh thu a ṭhiannû Sawmtei hnênah a lo sawi tawh a. Chutiang bawkin Laltea khân hmeichhe kawp tùr (mipat hmeichhiatna hmanpui tùr) a duh thu zu standing Pana hnênah a sawi chhuak bawk a nih kha. Chuti a nih chûan Mazari khân suamtuak nân Laltea hi a kawp a; Laltea’n tisa châkna hrîkthlâk nân Mazari kha a kawp ve thung a, tichûan, zawn thuhmun; tum hrang si an inkawp ta ni ta berin a lang.

Hei vang hîan an pahnih khan an duh ve ve hmuh theihna tùr a nih phawt chûan hlâin pan hautak deuh mah se khawi hmun pawh pan an inhûam a. An ṭhiante Treasury Square aṭanga kea an kalsan khân case record-a tàr lan a nih ang khân T Romana College bula Laltea lainâte kha an tlawh ngei a. Mazari khân Laltea'n pawisa eng tham mah a nei lo tih a hre rêng rêng lo a, Laltea lah Mazari'n a rin theih tùr ang berin pawisa nei âwm taka awmin a insawi a. A hnathawh ṭhin leh sum hài luh dân te tui takin kawngah a sawipui bawrh bawrh a, la inhmu ngai hauh lo ni mah se an inkawmngeih hle tawh a ni.

An tumna hmun an zuk thlen chûan rei vak lo ṭhu dunin an titi leh phawt a, an zu inin tlêmin a la khawih avangin tisa châkna pawh an inkaihthawhsak tawn thuai a. Laltea tihluih miah lohin Mazari pawh phùr takin a inphelh ruak mai rêng a. Mahse, Laltea inphelh pah vêl lâiin Mazari rui chhe si lo chuan Laltea pawisa ip hmuin a chhûnga pawisa awm zât âwm a hre ta tlat mai. Mipat hmeichhiatna hman hrim hrim châk vanga heti chen chen thleng ni loa sumtuak a duh vang chauh a nih mîau avangin sum hlawh loa mipat hmeichhiatna hman ringawt chu a duh ikhaw lo mai si a.

Laltea lah mipa zâwk tih takah a phurin a tisa châkna a sosâng tawh hle. Mazari'n mipat hmeichhiatna hmang duh loa a lo dan pawh pawisa loin a châkna puitlin tùrin a nawr lui zêl a. Mahse, Mazari'n duh loh tak têa a duh loh tâk avangin Laltea chuan a châkna chu a puitlin thei ta bîk lo.

Laltea thinin a tuar ta lo. A tho lawka an piah lawka ram hrui, vakau chu chhatin Mazari chu a nghâwngah vêtin a rêk ta châwt châwt mai a. A tha neih zawng zawnga rêk a nih avangin Mazari chu rei a ṭang lo, rei lo têah a âng hlâwi hlâwi a, a leng âwrh âwrh a, thawchhamin a thi ta thuai a. Port mortem result-ah khân Mazari serhah Laltea chi âwm hmuh sawi a nih loh avangin mipat hmeichhiatna an hmang hman lo ngeia ngaih a ni a, Mazari ruangah kutthlâkna hnuhmâ emaw hmuh tùr a awm loh avangin Laltea khân hruia a reh bâk a taksa pêng dangah kut a thlâk loha ngaih a ni.

A tum lâwk pawh ni lo a thinbutut thawkin rilru fîm pu loa chutia Mazari a that ta mai chu a hlauthàwng leh hnuhnawh hle, tihngaihna dang awm tawh chuangin a hre si lo. A sûlhnu chhuizui theih tùr nia a rin Mazari thawmhnaw chu a tumtêl sawk sawk a, tû'mâ hmuh theih loh tùrah a thukru thuai thuai a, a chapal erawh chu thlang lamah a thlawh thla ta nawl nawl a.

Mapuii tui châwiin Laltea a lo hmuh khân thawmhnaw a ken âwm eng mah a sawi loh avangin Mazari thawmhnaw hi a kengzui lo niin a ngaih theih.

Tûalthat a nih tâk avangin Laltea chu a rilru a hreawmin a hlauthâwng ta êm êm a, a rilru hah tâwt lutuk chu zu ruiha tihreh a tum ta a. An vênga zu zûar ṭhinte hnênah zû a zawng nghâl a; mahse, a hmuh mai loh avangin a ṭhianpa Sanga eirawng bâwl lâi chu panin zû in tùr a dîl a; mahse, ani chuan a lo neih bîk loh avangin a chhuak leh mai a. A hnu deuhah Sanga te Inah bawk kal lehin zu zawnpui atân a sâwm chhuak a. Mahse, Sanga nên pawh chuan zu in tùr an zawng hmu zo ta chuang lo. Sanga te Inah an inzui haw leh ta a. In an thlen chûan Laltea chuan Sanga jacket hâk hawh a dîl ta a, Sanga pawh chuan ui ru tak chungin a jacket hring chu a hâk hawhtîr ta a.

Chuta ṭanga a chhuak chu kalna tùr ber pawh hre chuang loin a tei kûal a tei kûal a, a hnuah tuizêm khâwra a lo zui fo tawh Kima chu tlai dâr 5:53 vêlah a tlawh a, chuta ṭanga a chhuak chu an Inah a haw ta a.

Sual râpthlâk tak tia tûal a thah avanga a rilru hah tâwt lutuk tihngaihna dang hre tawh si lo chuan mahni intihhlum ṭha berin a hre ta a. Engtia intihhlum nge ṭha ber ang tiin ngun takin a inngaihtuah a. Chutih lâi chûan sangha manna tùr geletine eng nge maw zât a la kawl tih a hre chhuak zawk a, chumi hmanga intih hlum chu a tum ta a ni.

Amaherawh chu, a chhan tû'mâ hriat loha intih hlum ngawt chu ni theiin a hre si lo, engtin emaw tala a intih hlum chhan chu a thih hnuah miin an hriat nâna puan zàr ngei ṭhain a hria a. Mahse, engtin nge miin a intihhlum chhan chu an hriat ang? Rei a ngaihtuah lo, lehkha puan leh pen a la a, a intih hlum chhan chu a ziak ta a. A ziah lâi hîan a rilru a kalding hle. Kut khur buai map loin a hmâa a address leh phone number a ziah, Pana a pêk nêna kutziak inang thei khawpa buai lo leh zâm loin a ziak ta a. Amah hringtu a pa'n thil sual lian tak a tih vanga amah a inthiam loh êm avanga inti hlum a nihzia a hriata a lo ngaihdam theih a duh ber a nih angin chutiang chûan a ziak a ni.

A ziah zawh chûan lehkha ipah a khung fel leh thlap a, a jacket ipte-ah a thun ta thân a. Tichûan, tum râpthlâk tak, nakin lawka a chhûngte leh vêngte bâkah a hria apîang la tithinthâwng tùr thutlûkna a siam tawh tihlawhtling tùr chûan phûrna eng mah nei lo, pawisak nei tawh chuang si loin an In ngei mai chu a chhuahsan ta hnak hnak a. An In chu vawi tam tak a lo chhuahsan tawh ṭhin; mahse, hemi ṭuma a chhuahsan dân erawh kumkhûaa haw leh tawh lo tùr a nih avangin a thlir tlawk tlawk a, insûm zo loin mittui a far fap hîal.

Mahni inti hlum thei khawpa beidawng a ni nain pawisak tihnêp nân zu tlêm tal han tauh zauh erawh ṭûl a ti a. Mahse, tlaiah khân an vêngah a lo zawn hlawhchham tawh avangin vêng danga zawn a tum a, Thakthîng lam muangchângin a pan ta chhat chhat a.

Vânneihthlâk takin zu in tùr chu a hmu ta hlauh. A pawisa neih chhun chu zu lei nân a hmang ral titih nghe nghe. A ruang chhar a nih khân pawisa chêng 4/- leh zozial tlâwn 4 chhar a nih avangin chhûn lama a pawisa neih sa bâkah a lainâte pêk chêng 50/- kha hemi zân hian a hmang zo titih tihna a nih chu.

Zû a in zawh chûan Thakthîng bazâr vêlah a’n tei kûal lâuh lâuh a. An vêng lamah a thil tih tùr hlen chhuah a tum zet nain a hlat tham deuh avangin a zu in hnathawh a reh hman ang a, pawisak lohna a bo hman ang tih a hlauthâwng leh si. Chu bâkah a hmêlhriatten a thil tih tum lâi lo hmu palh ta se an lo dang anga a hlawhchham phah ang tih a hlauthâwng bawk a, chuvangin tu ma’n an hriat lohna hmun Thakthîng bazâr vêlah a ‘mission’ chu tihpuitlin a tum ta zâwk a.

Zân dâr 10:00 a pêl hret tawh. Latea thisen chu a lum pap pap a, a chaldârah thlantui a lo luang thla ngîai ngîai a, a thil tih tùr chu a hrehin a huphurh kher mai. Zûin pawisak lohna pe tùrin a ring kha a ni a; thâwklehkhatah a rilru a fîm ta thut ni maiin a hria a, a geletine ah chu a dap rak rak a, a kut a khur deuh dar dar. A thil tih tum chu ṭhulh leh mai a duh thut thut; mahse, mipa a ni a, ti tùra thutlûkna a siam tawh chuan tihhlawhtlin ngei a tum tlat si. Phûrna tel hauh loin geletine chu a phawrh chhuak ta zâl zâl a.

Vawi eng nge maw zât a thil tih tum chu ṭhulh leh mai a rilrûk hman; mahse, chhun lama mi sual tâwpthangte chauh tih duh nia a lo ngaih ṭhin anga tûal a thah tâk dân kha a rilruah a lo lang zut zut a. Mi sual ber, nung ve tlâk tawh lo nia inngaihna chuan pawisakna a neih tlêmtîr telh telh a. Inchhîrna leh insiam ṭhat duhna a lo lût a. Chu chuan dâwihzepna a rawn hring chhuak nghâl bawk. Mahse, chu dâwihzepna chu inhnehtîr a tum lo bur.

Mazari kha a hmâ aṭanga thah tum sa rêng ni se hetianga mahni intih hlum duhna nei khawpa suala inhriatna a nei hauh lo ang. Chuvangin Mazari ruang chharna hmunah khân a tisa châkna sosâng tawh tak dan beha awm ta tlat khân a thinbutut a ko chhuak a, rilru mang mulhin a rêk hlum ta mai kha a ni a. Pawisawi lo nunna a lâksak avangin amah pawh chu thi ve tlâk niin a inhre ngawih ngawih a, a thil tih tum chu a tih tur âwm rêng niin a ngai a ni.

A jacket iptea gas lighter sen chu a phawrh chhuak a. Gas lighter chu a talh alh phat a, geletine fuse chu muangchângin a hlîau ta a. Kut khûr dar dar chungin gas lighter chu a jacket ipte-ah a khung leh zet a, tichûan, bomb chu a âwm hnuai, a dul leh âwm vêlah chûan a kut khinghnihin a dawm bet ta rân a. Chu bomb chak tak a chatuan kawngka hawnsaktu tùr leh mi sual hremtu tur hnathawh chu maimitchhîng dîar dîar chungin a nghâk ta a…..
.....
#Tlângkawmna
Mazari thattu hi Laltea a ni ngei tih fin fiahna ṭha leh chîang fak a awm lo a, mahse, police chuan thil awm dân kil hrang hrang aṭanga an han chhui a, an han rem khâwm nep nep hnuah Laltea thah ni ngeiin an ring. He thubuai chhuitu case i/o chuan Kulikâwn PS Case No. 37/2003 dt. 12.3.2003 u/s 302 IPC hmanga thubuai ziak lûtin, a theihtâwpa ngun leh zaua a chhui hnuah duh tâwk ngahin Final Report (FR No. 8/2003 dt. 19.9.2003) a theh lût ta a. He tûalthahnaa rinhlelhawm ber (prime suspect) Laltea ber a thih si avangin he tualthah thubuai hi tihtâwpzui a ni ta a ni.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)