A HANDSOME CREATURE : HIS NAME IS VICTOR

Hlauhawm lampang hrim hrim hmun hrang hrang a mi lakkhawm...
Aaron Dustin
Posts: 214
Joined: March 14th, 2018, 10:15 am

A HANDSOME CREATURE : HIS NAME IS VICTOR

Unread post by Aaron Dustin » November 5th, 2020, 11:04 pm

A HANDSOME CREATURE

[HIS NAME IS VICTOR]
(A SEQUEL TO 'A HANDSOME CREATURE - THE BEGINNING')

Written by : Aaron Malsawmdawngzuala

(Ka story te hi i lo share ve duh a nih chuan khawngaihin a link nen zel hian aw..)

*****************

Dan ngaite bawkin nakin lawka ka pasal nimai tur, ka bialpa duh em em mai Ms-a chuan kan office kawtah min lo nghak leh ran tawh mai. Kan bang har thei bawk si a, ka khawngaih thei ngawt mai. Ka office ban veleh a lengchhuak dun tura ruahmanna siam kha kan ni a, mahse duh aiin ka bang tlai leh ta a nih hi.

Msa hian tlai tin min nghak ziah a, min thlah haw ziah thin. Kum 3 chhung kan inzui tawh a, thla khat chiahin kan inneihna a dal tawh. Kan ban hma deuh ringin 'Kan lengchhuak dawnnia.' tiin a hma zan khan ka han tiam ve ngawt tak na a, duh aiin ka bang tlai leh ta si a, kan leng leh hman dawn ta lo a ang khawp mai.

"In van rawn bang tlai leh si ve, hei..khua a thim leh vat mai ang tiang te chuan.." a ti deuh nung nung a, a lungawi vaklo tih ka hria. "Nia, ka boss hi lawm, extra work min pe leh khanglang a." tiin ka han insawi thiam ve zung zung a. A ngawi deuh vang vang mai, "Vawiin tlai te chu, haw tlai law law ila nimai. Khawnge kan kal ang?" ka ti ta tawp a, ka khawngaih ve em em tawh.

Phur fahran hian, "Tepuii Coffee Shop ah kan kal dawn em ni? Kan chawl khat tawh emai." a lo ti vat. Tichuan a motor kawngka chu min hawn sak deuh thlap a, inla lalfanu tak chuan ka lut a. Kan tlan pah chuan ka pa chu ka phone a, ka haw tlai tur thu leh chaw min lo eisan mai tur thu te, ka pasal huan Msa bulah ka awm mek thute chu ka hrilh a.

Ani pawh chuan a lo phal ve mai bawk, tichuan reilote hnuah Coffee Shop chu kan thleng ta a. Mahse mak tak maiin Coffee Shop bul kawr chu mi 20 rual vel hian an lo bih duk duk hlawm a, Police 3 vel an lo awm bawk. "Enge maw an tih sup sup le?" ka han ti nuah nuah a. "Hawh teh, iva en ve chhin teh ang." tiin Msa chuan min kai phei deuh dawr dawr a.

Ka lo sang vak biklo nen, ka hmu ve hleithei tlat lo. Msa chu a zuk dak deuh vak a, "Ekhai aw.." tih pah chuan min kai hrang leh nghal vat a. Hrethiam lo tak chuan, "Tinge a? Enge awm a?" tiin ka han zawt a. "Ruang...mitthi ruang." a ti ta mai a. Ka khur nghal thei hialin ka hria, "Awii...ruang a?" tiin ka t(r)e deuh thawt.

"En ve suh, a rapthlak lutuk....tual thi a ni ngei ang." a la ti ta deuh deuh, min enluih tir pawh tum se ka maimitchhing lui tlat ang. "Sangte, hawh teh...ka thlah haw zawk ang che." Msa bawk chuan a han ti leh a. "Ngati maw?" tiin ka lo zawt vat a. "Aaa...ka ngaih a thalo, hmun danga kal kawi leh nan a tlai tawh bawk si." a han ti leh ringawt a.

Chutih lai chuan pa pakhat hi alo kal a, "Ka pu, min lo hrethiam lawk." tiin MSa chuan a ko ding a. Chupa pawh chu a ding ve mai a, "Engthil nge thleng a?" tiin kan han zawt a. "Hei, ruang an chhar a. Nichin deuh lawk khan waiter pakhat in tuichhia ava paih a, a t(r)e vak a. A rawn tlan lut leh nghal a, customer ho kan ngaih a tha lova, kan va en a, ruang hi a lo awm a." a han ti a.

"Ekhai aw..kha thisen a luang nasa ropui si a, engtia thi nge in hre thei em?" tiin Msa chuan a zawt leh a. "Tualthahna a nih hmel khawp mai, a lu kha a kak thuk em em a, a taksa dangah hliam dang a nei nual bawk a, a dul pawh a thler vek." a han ti mai chu, a lo khur dar dar thei hial.

"MS, hawh...min lo thlah rawh." ka ti deuh hmuk, ka awm a nuam tawh mawlh lo. Mitthi kawngsir kawra lo let reng, chupawh tual thi lehnghal. A tak ngeia ka vawikhat tawnna a ni a, hmu ve kher lo mah ila mi rap takzet. Msa pawh chuan min thlah haw nghal vat a, ka mood a fuh lo zo vek.

Inchhung ka luh dawn chuan, "Zanah ka lo leng ang aw.." a rawn ti deuh lauh lauh a. "Aih, chhuak suh..a hlauhawm." ka han ti ringawt a. Min ti t(r)i zo vek a ni ber mai, a nui suk a, chak mangkheng chuan a tlan nghal vut a. Inchhung ka luh rual rual chuan, "Nu...inlo hre ve em? Tepuii Coffee Shop bulah..." ka tih lai chuan ka nu chuan, "I pa pawh tun deuh lawk khan ava phei ve alawm, a rapthlak khawp mai kha.." a lo ti nghal zung zung a.

******************

Zanriah kan ei mek lai chuan ka pa chu a rawn haw ve chiah a, "Lo kil ve nghal mai rawh.." ka nu chuan a lo ti vat a. Ner nung pa hian, "Chaw ei pawh ka chak lo ve..." tih nung nung pah chuan ka pa chuan pindan lam a pan nghal daih a, kan in en deuh hu hlawm ringawt. KAn chhungkua hi pali kan ni a, ka nu leh pa, kei leh ka nau mipa kum 18 mi, Francis-a te kan ni.

Ka hming hi Lalsangzuali a ni a, Sangte tiin min ko thin a. Ka pa hi Lalthlamuana niin ka nu hi Lalmuanpuii a ni. Kum 28 ka ni tawh a, ka senior ve lek lek tawh. Mahse ka bialpa Malsawmtluanga, Msa nen hian thla leh lawk khian kan innei dawn a, a ni pawh kan ruat fel vek tawh.

Chaw eikham hnu pawh chuan ka pa chuan chaw chu a la rawn ei ta chuang hauh lova, TV en pah a kan thut thap lai chuan a rawn chhuak a. "I ei dawn lo em ni? Ruang pawh chu i va hmu ve em? Engtia thi nge in hria em?" tiin ka nu chuan a lo zawt a. Ka bulah chuan rawn thu in, "Ekhai, ka hmuh vang alawm chaw ka rawn ei peih ngang loh ni." tih pah chuan a zozial chu a zu khu hluah hluah a.

"Tinge? A rapthlak viau em ni?" tiin ka nu chuan a lo zawt leh a. A ner leh deuh sak a, "Rapthlak tih piah lam a ni tawp mai, a mitmu a inkher chhuak a, a dul a thler vek bawk a. Kawr atanga ruang an zawn chho laiin a ril a rawn uai hnuang bawk a, ka ten lutuk ringawt. Tunah pawh ka mitthla in ka la hmu thei, rapthlak tak a ni." a ti nuah nuah a.

"Awiii...Mama a awm ve reng hi, chutiang te naupang awm laia lo sawi.." ka lo ti vat a, ka nau ka sawina a ni. Francis-a lah inla pa rual a lo ni bawk nen, chutia amah kan vengthawng deuh chu a lo duhlo nasa mai. "Ve mai mai ache, chutia dawihzep ka nilo aw.." tiin min lo melh rum kher mai.

"Aww...min zawt miau a nih kha." ka pa chuan a lo ti sam et a, "Eng ang mi nge ni ang le chutiang teh hrep a tual that duh tu chu?" ka nu chuan a han ti leh a. "Mitthi hi khaw dang ami ania, a hmel lah hmuh tlak a ni bawk silo. A wallet a lo la ak a, Lalrindika..kum 30, Thenzawl ami daih a inti." ka pa chuan a lo ti a.

"A wallet a la ak bawk si amaw? Rukruk vanga inthahna chu a ni lo phawt tihna animaw?" ka lo ti a. "Nia, pawisa lah kha a lo awm nual a, a credit card te, a ID te pawh a kim thlap." tiin ka pa chuan min chhang a. Francis-a pawh chu lo tawng chhuak ve in, "Anih chuan a haw ve hrim hrim aniang, a thah duh vang hrim hrim a that a nih dawn chu." a lo ti ve bawk a.

"Bawiha, zan lenchhuah loh vang vang angai dawn anih chu. Kan veng nen a inhnaih ropui si, keichu ka thla a muanglo zo vek." ka nu chuan a han ti leh nung nung a, "Nia, a den emai, chhuak ngam teuh lo." tiin Francis-a pawh chuan thuawih takin a lo chhang ve mai a. Ka nu sawi ang deuh khan Tepuii Coffee Shop hi kan in atang chuan hla viau mahse, kan veng bul deuh lawk a awm a ni.

*******************

Mahse mak tak maiin kan ti dawn nge ni, boruak chu a reh vang vang mai a. Kha ruang an chhar bak kha chu thawm danglam leh chanchin duhawm lo engmah a thlen chhunzawm lem lo, mipui pawh kan lengchhuak leh ngam ta. Mahse kei erawh chu ka la hlau takzet, ka tiril ah hian min la fan ngawih ngawih ni ber hian ka hria.

Kar khat vel lai a liam leh hnu chuan keipawh ka ziaawm chho tan a, ka hlauhna pawh chhete chuan a reh ve tan ta. Zan erawh ka la chhuak ngam lo, Msa erawh a ngaite ang bawkin zantin a rawn leng ve leh ta a. Kan inneih ni pawh a hnai ve tial tial a, ka phur tawh takzet.

**********************

Zankhat chu ka thiannu te inah ka leng a, kan inkawm khat tawh bawk nen duh ai chuan kan lo titi rei deuh hlek ni ngei tur a ni, ka haw dawn meuh chuan dar 11 a lo pel der tawh. Kan inhlat em em loh avang chuan kein ka kal mai a, mahse chutiang zanrei tawh lam, thim tak hnuaia ke a han haw phei chu a dawih chi lo nih sa bawk nen, ka hreh ru angreng hle mai.

Ka thlen dawn tep ah chuan kawngsir street light hnuaia mipa leh hmeichhia niawm tak, lo inkuah ngawih ngawih hi ka hmu a. Inngaizawng chance nei dun an nih ngei ringin keimah zawk chu ka lai hialin ka hria. Nui deuh put put chuan kawngsir lehlam atang chuan ka en reng a, ka hmulo der tawp.

Mahse an han inthlah chiah a, a mipa zawk chu a kalsawn a. Hmeichhia zawk chu a ding khur ta chur chur mai a, chutah le..a ka(mouth) atang chuan thisen a rawn baw zawih zawih mai. A dul a dawm a, a dul pawh chu thisen hlir hian a lo khat a. Street light hnuai chiah a ding an ni bawk nen, hmuchiang tak ka ni.

Ka taksa pum chuan ka sa chhuak nghal vek a, rang lutuk tak maiin a thim laiah chuan ka phei nghal vat a. Kawngsira motor lo ding phen ah chuan ka biru vat a, ka khur nghal zawih zawih mai. Ka mumang nise ka va ti tak em, mi pakhatin tual a that mek lai chu ka mit ngei hian ka hmu ta mai chu ania.

Ka thlan a tla nghal zawih zawih a, ka tap nghal pur bawk. Mipa zawk chuan hmeichhia chu a en reng a, hmeichhia pawh chu a thingthi hnawk a. Chutah dim baksak lo hian a chemte ken lai chuan chu misual, rapawm em em mai chuan a hrawkah chuan a han vit leh hrawk mai a, ka au teuh ngei mai.

Ka thawm a hriat ka hlauh avang chuan ka hmui ka hup a, mittui tla zawih zawih chung chuan chu thil rapthlak tak, ka hma zawna thleng mek chu ka en ta tlawk tlawk mai a nih chu. Hmeichhia chu a thi ta, chhuatah chuan thisen nen a let reng mai a. Chupa lah chuan a nuih vak vak lehnghal a, ka rap lutuk chu zun ka cheh hialin ka hria.

Mahse chu tualthattu nunrawn chuan min la hnungchhawn reng a, tunge a nih a, eng ang hmel nge a put ka la hre thei lo. A jacket ipte chhunglam chu a zen ruk ruk a, hmaikawr niawm tak hi a rawn phawrh chhuak a. Chu hmaikawrah chuan sam lem a awm bawk a, a la inphiar deuh lehnghal amawni, ngawi reng chuan a chetdan chu ka en reng a.

Hmaikawr chu a vuah a, a hawi kual hruk hruk a. Chutah ka lam a rawn hawi thut mai, ka phu nasa lutuk chu ka thlarau a thlawk chhuak lo chauh. Street light hnuaiah chuan a hmaikawr chu lang chiang tak a ni, a var deuh pup a, a mei bul vel chu a dum hian a dumkual ruih mai.

A then ang thu lehnghal a, a palian em em bawk si. Ka rap lutuk chu zun ka cheh ta nge nge a, chet pawh ka che ngam lo. Chumai ala nilo, chu Tualthattu Hmaikawr-a chuan ka lam a la rawn pan ta deuh deuh a, ka lo leng chhuak kher kher chu ka va inchhir tak em. Min hmu a maw ka ti hman hial tawh a, mahse ka bihrukna mek motor chu ama motor ngei ani tih ka man thiam ta.

A lo kalhnaih hma chuan thim zingah chuan rang tak leh thawm dim thei ang berin ka in sa seng vat a, thingkung phenah ka biru a. Motor bul chu a lo thleng a, kawngkhar chu a hawng a. Mahse a thaw ri a hria nge mawni, a ding deuh dat a. A hawi kual a, thawk pawh ka thaw ngam tawh lo.

Mahse vanneihthlak tak maiin motorah chuan a lut a, chak mangkheng chuan a tlan ta a. Ka thaw huai mai, chhuak em em hian thawm dim thei ang ber chuan ka tap vak vak ringawt mai a. Chu hmeichhe ruang lah chu ala mu zun mai bawk si, en pawh ka va en ngam lo. Ka phone ka phawrh chhuak a, Police ka phone ta ringawt mai a.

*****************

Police te chuan ruang chu an buaipui nghal a, mipui pawh zanrei tawh e tilo chuan an rawn pung chak khawp mai. Tualthahna thlenna hmun hi hmun fal em em pawh a ni chuang lo nangin, a bul velah tak hi chuan in a tlem em em a. Tlangval hawklak deuhte pawh tunhma deuh kha chuan helai hmun hi an thutkhawmna ber a ni thin a, mahse YMA hruaituten an kamkhat deuh tak avanga thukhawm ta lo mai chauh an ni.

Ka nu leh pate pawh reiloteah an lo thleng a, mahse chunglai vel chu ka manghriat ruai ruai. Ngaihtuahna fim ka la pu thei meuh lo, ka la hawi a hru hian ka hria. Ka nu mangang lutuk leh hlauthawng lutuk hmel kha chu ka hmu chiang a, mahse min biakna erawh ka hre manglo.

Msa pawhin chanchin a lo hre ve vat a, reiloteah a rawn thleng a. Chu mitthi, Hmaikawr-a'n a thah tak chu tudang nilovin kan venga mi tho, ka thian nilo mahse ka hmelhriat tha tak. Kum 26 mi lek, nula hmelchhe lemlo tak Estheri a lo ni reng mai. A mimal tak chuan ka hre chiang em em lo, a nu leh pate pawh ka hre lo.

Kan vengah a awm tih ka hria a, a hming pawh Estheri tih bakin ka hrelo. Msa ka hmu chu ka tap a, ka kuah nghal thlawp. A thiam ang tawk chuan min hnem a, mahse a hlauthawng ve tho tih chu ka hai mawlh lo. Police te chuan thu min zawhfiah an duh avang chuan tha takin Station lama zui turin min ti a, ka nu leh pa leh Msa te nen chuan Police Station lam chu kan pan ta a.

******************

"Tualthattu chu a hmel i hmu miah lo amaw? Chuan..a thah zawh ah hmaikawr a vuah i tia mi khah?" awihloh hmel tak chuan chu Police Inspector chuan min han zawt a, a la nui deuh khanglang lehnghal. Ka khur a la reh theilo, Msa kut vuan chung chuan, "Aw...ka pu, a hmel ka hmulo." ka lo ti zawi sap a.

"Anih leh hmaikawr chu eng ang hmaikawr nge ni reng reng?" tiin min han zawt leh a. "Ihh...a var, a mit zawn a dum, a sam a sei a, a phiar bawk..a kareh a zau lutuk." ka ti bah deuh nuai mai a, ka sawi lai pawh chuan ka mitthla ah a rawn lang zawk zawk thei hial. Inspector chu a han nui leh suk a, "A va mak awm ve...nihleh a lem ziak dawn ta ila, a hmel put hmang i sawi thei angem?" tiin min zawt leh a.

Ka la hlau bawk si, mangang bawk si chu ka insum zo lo. Ringzet leh vin zet hian, "A hmel ka hmulo ka tih chuu.." ka ti tuar mai. Zai zirin ka nu leh pa te chuan min lo khap vat a, "Hehe, nilove...a hmaikawr awmdan zawk ania ka sawi..a hrim hrimin eng ang hmaikawr nge? Hmaikawr common deuh te a ni em, a hmaikawr ang chu nidangah i hmu tawh ngai em?" Inspector chuan a han ti leh a.

"Aih..khatiang em em a hmaikawr rapthlak kha ka la hmu ngai lo, a rapthlakin a hlauhawm takzet." tiin ka chhang a. Inspector chu ahan thaw hak a, "Umm..Richard, lemziak thiam kha va ko teh." tiin constable pakhat chu a tir a. Reilote hnuah chuan lemziak thiam chu a rawn thleng a, ka thiam ang tawk chuan chu tualthattu nunrawng Hmaikawr-a hmel chu ka sawi ta a.

Darkar khat dawn a ziah hnu chuan a zo ta a, min rawn hmuh chiah chu ka phu zuk thei. A ziak ang em em a, kha khawngaihna neilo, mi nunrawn Hmaikawr-a ngei a ni. Inspector chuan a han en leh vang vang a, "Umm...a lawmawm e. Lo zin bo lo ula, inah lo tawm hram hram ang che u. Kan mamawh hunah kan lo ko leh dawn che nia, in kal thei e." tiin min kal tir ta hram a.

********************

Ka mit hmuh lai ngeia thi ta, Esther-i thihna pawh ni thum lai a lo liam leh ta. Police te chuan Hmaikawr-a chu an zawng reng a, mahse a hnuhma takngial pawh hmuh tur a awmlo mai nilovin, amah hrim hrim chu hmuh tur a awm leh ta miah lo. Zan ka chhuak ngam tawh lova, dawr kal ringawt pawh ka ngam lo. Khua a thim tawh chuan ka zun dawn ringawt pawhin ka nau ka in kalpui tir ziah a, zan mai nilovin chhun pawh nise ka hlau tho.

KAr khat vel a liam leh hnu chuan keipawh chhete chuan ka ziaawm leh tan a, ka thla erawh ala muang hlawl lo a ni. Ka ngaihtuah chhuak leh thin a, a chang phei chuan ka tap leh tawp zel. Mahnia room hran nei thin kha ka ni a, mahse kha tualthahna ka mit ngeia ka hmuh atang kha chuan nula senior ve lam tawh hi ka nu leh pate inkarah ka mu ta ziah mai a nih kha.

Msa pawh zan lama lo leng sek tawh lo turin ka ti a, ka nin vang leh ka hne vang nilovin ka hlauhthawn vang zawk a ni tih a hre ve tho a, a thinrim ngai lem lo. Boruak te a han reh leh deuh hnu chuan keipawh ka room lamah keimahin ka mu ve leh ngam ta hram a, ka hlauh tawh loh vang nilovin ka inthlahrun ve deuh tawh vang a ni mah zawk.

*******************

Zankhat ka muhil lai chu engemaw ri rek hian min ti harh thut mai a, ka phu zawk mai. Ka tho kang a, khumah chuan ka thu a. Light on ka han tum a, mahse a eng thei miah lo. Current a awm lo ti dawn ila, pawn light lah a in on eng vu mai bawk si. Ruah lah chu nasa em em silo hian a sur sep sep reng a, mahse lum ka ti em em mai bawk si.

Ka khum bula tui bottle chu la in ka in khawlh khawlh a, pawn lama thawm ri rek chu ka hre leh ta. Ka tui in lai pawh chu ka hak thleh a, rang lutukin tukverh lam ka va hawi phei nghal vat a. AWi ka duh theilo, palian em em mai hi ka tukverh zawnah tak chuan a lo ding run mai a nih chu.

A thla chauh ni mahse a sam a sei tih a hriat hle a, tunge a nih inzawh hranpa a ngai lo. A pian ka hmuh veleh khan ka hre nghal, ka hlauh em em, amah vanga zan tam ka mut ngamloh phah na, ka mithmuh lai ngeia kan veng nula Esther-i thattu Hmaikawr-a ngei a ni. Au vak ka tum a, mahse ka thei tlat lo.

Bang kilah chuan ka tawlh phei nghal a, "Tu..tunge i nih...mawh.." tiin ka t(r)e chel chul mai, chutah a kut a rawn phar a, chem lian em em mai hi a lo la keng zui. Chutah tukverh chu a chem ken lai chuan a rawn vaw vak a, ka au nasa ngei mai. Ka khum atang chuan ka tla tawp a, ka nu a lo lut nghal.

"Enge...enge ni ta?" a rawn ti a, ka han hawi kual a. Khua a lo var vek tawh, ka mumang vek a lo ni hlauh mai. Ka thaw huai mai, "Aaa...mumang thalo ka nei a." tih ringawt chuan ka chhang a. "Tho tawh rawh, hna i tlai mai ang. Saw tukinah kan thenawmte ui an lo sat hlum a ni awm e, an fapa Timothy-a phei chu ala tap reng mai." a ti ta mai a.

Rang takin ka tho a, hmai pawh phih lo chuan kan thenawm Pu Thianghlima te inah chuan ka va kal ve nghal a. An ui vulh hi ui lian tak mai ani a, a dum a ni. A luah tak chuan sah a lo ni a, ala bung tep zui. Mak ti tak chuan an ui ruang an buaipui lai vel chu ka en reng ringawt a, hlauhna chuan min man leh ta.

Nizan ka mumang kha ka ngaihtuah chhuak a, Hmaikawr-a khan chempui chu a keng ngei a. tin, ka harh dawn khan ui beleuh tuar ri ka hre bawk. Anih chuan kha kha ka mumang a nilo tihna em ni? Mahse kan tukverh kha chhete mahin a keh bawk silova, ka mangphan em ni zawk?

******************

Nileng mai chuan ka rilru a nuam theilo a, ka mood a fuh lo takzet. Msa nena kan inneih ni pawh hnai hle tawh mahse, ka rilru a nuam thei ngang lo a ni. Kan thenawmte ui Jerry-a thattu kha tudang nilovin Hmaikawr-a a ni tih chu sawi kher ngai pawn ka hrelo, mahse tinge ui thleng thlenga a thah tak mai le?

A ni tel mai chuan ka rilru a nuam lo telh telh a, Hmaikawr-a chu ka mumang ah ka hmu ziah lehnghal. Ka thi ve dawn, min la that ve dawn ni ang tlat te hian ka hria a, ka inngaihtuah nasa thei hle. Ka mumang te chu Msa hnenah ka sawi thin a, "I vei zui lutuk a nih kha, engah mah ngai suh." a ti sam et zel mai bawk si a, mahse thildang ka ngaihtuah thei mawlh lo chu a nih ber hi.

******************

Zankhat chu hma takah ka mu a, Msa pawh lo leng lo turin ka hrilh tawp. Zanlaiah chuan ka thangharh leh hlawl mai, ka sana ka en a, zing dar 1 a ri tep tawh. Kan in kawngkhar in kik dat dat chu ka hre chhunzawm nghal a, ka phu chiang tehkher asin. Muangchang chuan ka tho a, ka room kawngka chu hawngin ka han dak a.

Kawngka lah chu a in kik ring tulh tulh lehnghal, "Tunge..tunge ni?" tiin ka han au vak ringawt a, mahse min chhang lo. Thawm chu hria in ka nu leh pate pawh chu an lo chhuak a, "Tunge ni a? Tun ang zanrei tawh ah?" tiin ka pa chu a rawn phun phei nuah nuah a. Kawngka chu ava hawng a, kei leh ka nu pawh chuan kan zui phei nghal a.

Mahse tumah an lo awm lo, ka pa chu pawnah chhuakin a han hawikual vel a. Tumah hmuh tur an awm lo, a kik zawh rual deuh chiah a hawng kha kan ni a, khawiah mah han pil bona hman kha a awm lo hrim hrim. Mahse tumah hmuh tur an awm leh miah silo chu mak kan ti tlang hle a, keiphei chu ka khur leh der tawh.

"Tlangval zurui ho rawn uang mai mai an niang, mu leh tawh rawh u." tiin ka pa chuan kawngka chu a kalh a, kei erawh mahnia mut ka ngam leh tawh tlat lo. Ka nu leh pate bulah bawk chuan ka mu leh a, ka tha a khur leh char char tawh. Hemi zan hian chhin khat pawh ka chhing lo, thawm ri hlekah ka phu zuk zuk zel.

******************

A tuk zanah pawh chuan a ngai te bawkin zinglam dar 1 velah chuan kan in kawngka chu a rawn inkik leh ta, ka chhuak ngam tawh eih lo. Ka pa chu ava chhuak a, second sawm hnu velah chuan a lo lut leh a. "Tumah ka hmulo..tunge maw ni thin dawn le?" a ti nuah nuah mai a, kei erawh chuan rin chu ka nei...ni e, Hmaikawr-a lo tudang vak nge ni chuang ang?

ZAntin mai chuan zinglam dar 1 a rik veleh chuan kan kawngka chu a rawn inkik ta ziah mai a, tumah lah chu hmuh tur an awm ngai bawk silo. Zan khat chu ka pa chuan a thianpa Pu Siama chu riak turin a sawm ta tawp a, tichuan zanah chuan an chang dun ta a. Keipawh muhil thei bik hek lo le, room atang chuan ka lo chang ve ran mai.

Dar 1 a ri a, mahse eng thawm mah a awm lo. Dar 2 a pelh hnu pawh chuan thawm a reh vang vang mai bawk si, "Tlangval zurui hawklak mai mai an nih dawn hi...hlauthawng lutuk suh u. Keipawh ka va haw ange, engmah hlauhawm a awm lovang." tiin Pu Siama chu haw mai a tum a.

"AWww...hei zing dar 2 a ri tawh a, riak ve law law mai la. Khawvar hunah i haw mai anga, hei thutthlengah hian i mu mai dawn alawm." tiin ka pa chuan riak turin a sawm a. Mahse a hnial tlat mai bawk si, Pu Siama pawh chu a haw lui ta nge nge a. Ka ngaihtuah angreng hle mai, Pu Siama chu Hmaikawr-a khan a lo that mai ang tih ka hlau takzet.

******************

A tuk zinga ka thu hriat hmasak ber chuan min va thawng tak em, ka hlauh ang ngeiin thil a thleng leh ta. Pu Siama, tukin zing dar 2 thlenga kan ina awm, ka pa thianpa ngei mai chu kawngsir side-drain ah thi a chhar a ni. Tualthahna ngei a ni tih chu aruang en ringawt pawh chuan a chiang em em a, a ke veilam chu a ruh a tliak a.

A mit mu lehlam chu kher chhuah niin a ban dinglam chu sah chhum a ni bawk, a rapthlak takzet. Chupawh chu ka pa sawi atang chauh a ka hriat a ni a, a ruang erawh ka hmuh veloh mai bakah ka hmu duhlo hrim hrim. Chutia tualthahna a thlen leh tak si ah chuan Police te chuan Hmaikawr-a chu an ringhleh lehzual ni ngei tur a ni, police station-a lo kal tur chuan min ti leh ta a.

Keimah chauh nilovin ka nu leh pa leh ka nau Mama pawh an ko tel ve a, achhan chu Pu Siama kha a thih hmaa a kalna hnuhnung ber chu kan in a nih vang a ni. Kei erawh chuan ka ring mai nilovin Pu Siama thattu hi Hmaikawr-a ngei a ni tih ka hria, hmu lo mah ila ka chiang a ni.

*****************

Police Stationah chuan kan va thleng a, tleirawl rual 6 vel leh nutling 1 leh patling 2 hi an lo awm a. Mibo report ni ngeiin a lang, chu nu lo awm ve phei chu a tap a tap mai a. "Ka fapa hi min zawnhmuh sak hram rawh u, ka pu." tiin police te chu a ngen a. Kil khatah chuan kan chhungkua chuan kan ding a, kan lo en reng ringawt mai a.

"Nichina in mi hmuh thin, hmaikawr vuah in tih kha chiang deuhin han sawi leh teh u." tiin Inspector chuan tleirawl ho chu a han vin deuh that hlawm a. An zinga pakhat chuan, "Kan school thlang deuh, Pu Mawia te huanah khuan tlai tin kan school ban apiangin meizial kan zu thin a. Kan awmna atanga hla vak lo, ral lehlamah hian mipakhat hmaikawr vuah hian min lo en reng zel a." a ti ta mai a.

Ka phu zawk mai, "Enga?" tiin ka va kal phei nghal a, "Ka pi, lo nghak lawk rawh..." tiin Inspector chuan min lo dang a. "Nilo..in thil sawi kha...chupa hmaikawr vuah chu in hmu chiang amaw? A palian em? A sam a sei em?" ka va ti nghal chiam chiam a. Tleirawl pakhat leh chuan, "Aww....ngawireng hian che miah lo hian min en vung vung zel a, mak kan ti thei lutuk." a lo ti a.

Pakhat leh chuan, "A tir chuan engahmah kan ngai lo, mahse tlai tin mai chuan kan hmu ta ziah a, vawikhat phei chu chemte a keng lehnghal a." a lo ti ve leh a. "Nihleh in thianpa Samuela bo dan nen enge inzawmna a neih?" tiin an zinga mi pa pakhat chuan a lo ti ve leh a. Tleirawl pakhat leh chuan, "Samuela kha a bang hma a, sikret te lo lei lawkin a lo zu awm hmasak tur thu leh min lo nghah tur thu a sawi a. Tichuan kan ban veleh kan zu chhuk ve a, mahse a lo awm lova. Tichuan chuta tang chuan hmuh tur ala awm miah lo a, keini pawhin khawnge a awm kan hre bik lo." tiin a lo chhang a.

"Engtika bo nge?" tiin ka lo zawt ve leh a, "Niminah.." tiin min chhang a. "Anih leh nimina in zuk kal chuan chupa, hmaikawr vuah chu in hmu leh em?" ka han ti leh a. "Aih hmulo, nimin kha chu a lo lang miah lo." tiin min chhang leh a. Inspector chuan min en a, "Nang hi...hmanzana Esther-i tualthihna a witness anga insawi kha i ni tiraw?" tiin min zawt a.

"Aw ni e...vawiinah pawh hian min koh vanga lo kal ka ni." tiin ka chhang a. "Vawiina boral, Pu Siama thihna chungchangah pawh biak in ngai...in chungkuain in.." a tih lai chuan, "Aw aw...kan vaiin kan lo kal." ka ti deuh hmuk a. Mibo Samuela nu chuan, "Ka fapa chu engtin nge a awm zel ang le? Chu hmaikawr vuah in sawi pa chuan a rubo tihna em ni?" tiin a lo tap char char mai a.

A pasal, a bula ding mek chuan a kuah a. Inspector chu a ngawi vang vang a, "In thil sawi hi, engkim hian inzawmna a nei vek a ni. Richard...hmanzana henu sawi, lemziak kha va la teh." min kawh zeuh pah chuan constable chu a tir leh a. Hmaikawr-a lemziak chu a rawn la a, kan vaia hmuh tur chuan a lek kang a.

"Hepa hi a ni em?" a han ti a, tleirawl ho chu an phu deuh zuk hlawm mai. "AW..aw khapa kha.." an ti ta sap sap hlawm a, ka rindan ang chiah a ni. Kan chhungkua chuan a mal te te in thu min zawtfiah ta hlawm a, chung tleirawl hote erawh chu an haw tir a. Samuela zawn hna pawh chu an buaipui zui nghal a, keini pawh reiloteah chuan min haw tir veleh ta a ni.

*****************

Zan a lo thleng leh ta a, dar 9 ala ri lo deuh tihah chuan kan kawngka chu a rawn inkik leh ta dat dat a. Ala hma deuh bawk nen, ka hlau em em tawh lo. Kawngka ka va hawng chu rinloh tak maiin Nu Pari, hman zan lawka ka mithmuh lai ngeia Hmaikawr-a'n a thah tak, Esther-i nu a lo ni reng mai.

"Lo leng rawh." tiin ka luh tir a, a hmel ka han en chuan a serious hmel kher mai. "In chhungkua hian titi pui che u ka duh a." a ti a, tichuan kan thukhawm ta a. "Enge ni ta, U Par?" tiin ka nu chuan ahan zawt a. "Aa..englo..ka fanu chungchang kha ania, thil engemaw hriatchhuah zawk ka nei a, a inmil tlata ka hriat vangin ka rawn sawi tawp mai dawn amawni ka tia." tih pah chuan thingpui chu a han lem khawlh a.

Sawi zawm zelin, "Nikum hmasa khan intihhlim nan tin ramhnuaiah thian ho hi an kal a, an riak khawm bawk a. Mahse chumi hmunah chuan mi pakhat, hmaikawr vuah hian chumite thian ho chu a mal te te in a that vek a, a damchhuak awmchhun chu an zinga naupang ber, hmeichhe tleirawl pakhat, Lalrozami a ni a. An thian ho chu pariat an ni a, amah chiah chu a dam chhuak a ni. Mahse Police te chuan ruang an hmuh kimloh an nei a, chu chu tualthattu bera an sawi, Victora ruang a ni. A tir chuan Lalrozami, Zamzami chauh chu damchhuak a nilova, a thianpa Jeffrey-a pawh a damchhuak ve a. Mahse Jeffrey-a chu an phurhna Ambulance chawpin hmuh tur a awm talova, mahse Ambulance driver ruang, nurse pakhat ruang, doctor pakhat ruang leh constable pakhat ruang erawh an hmu thung a. Ka han sawina chhan ber zawk chu chumite thian ho zinga thi ve, Zorama chu ka fanu Esther-i bialpa hlui a lo ni reng mai a. Mahse keipawhin hmanni deuh khan ka hre ve chauh, Esther-i khan min hrilh ngai miah lova, zankhat kha engemaw a hriat ni, min hrilh deuh thut a.." a ti ta mai a, mak kan ti tlang kher mai.

"Anih leh khawnge Zamzami chu tunah a awm?" tiin ka lo zawt nghal vat a. Nu Pari chuan, "Mental Hospital ah...khami zan atang khan a buai tan a, amah leh amah chu a insawisak vak vak zel a. Tichuan mi a dahna ah an dah ta an ti, chupawh Estheri min hrilh vek tho ania...engmah ka zawt chiang hman ta silova." tiin ainhnit deuh feih feih a.

********************

A tuk zingah chuan Police Station ah chuan ka kal a, Inspector bulah chuan ka thu hriat ang ang te chu ka va sawi ta a. "Nikum hmasa khan Pu Zamawia huan mawng lamah intihlim turin thian ho pariat an kal a, chumi hmunah chuan hmaikawr vuah pakhatin an thian ho chu a mal te te in a that ta a. A dam chhuak awmchhun pahnih, Jeffrey-a leh Zamzami te chu chhanchhuah an nih hnuin Jeffrey-a an phurhna Ambulance chu a motor chawpin a bo a, driver, police constable, doctor leh nurse te ruang chu kalkawngah hmuh niin Jeffrey-a erawh hmuh a nilo." ka han ti deuh nghal bawrh bawrh a.

Hriatthiam loh hmel tak hian, "Engmaw i sawi a? Chu chu tuin nge hrilh che?" tiin Inspector chuan min lo zawt hu mai. "Estheri, hman zana boral ta kha..kha nula nu kha nizanah a lo kal a, min rawn hrilh a ni." tiin ka chhang a. Inspector chu a ngawi vang vang a, "Anih leh a damchhuak awmchhun Zamzami chu khawnge a awm?" tiin min zawt leh a.

"Mental Hospital..mi a dahna ah..ka hmu duh a ni." ka han ti leh ngawt a. "Khawi Police Station nge ni ang le? Kan lo buaipui ange, chuan Estheri nu pawh chu thu zawhfiah kan duh bawk ang. Chu tualthahna chu he kan case chhui mek nen hian inzawmna a nei ngei ang, Zamzami chu a hmingpum i hria em?" tiin min zawt leh a.

"Aw..Lalrozami an ti a, Jeffrey-a hmingpum erawh ka hrelo." ka ti a. "A tha e, Zamzami chu a chhungte hriat kan lo tum anga, nangpawh lo in veng fimkhur ang che. I rilru ti hah lutuk duh suh, kan lo buaipui ang." tiin min lo hrilh a, rei fe kan inkawm hnu chuan keipawh chu ka haw ve leh ta a.

**********************

"Khatia an thian hova riak bo tura an kal hnu khan ngaih tha takin kan lo awm mai a, mahse a tuk tuk leh velah pawh biak pawh theih a nih tak silovah chuan kan mangang tan a. Police te hnenah pawh kan report ngei a, anni pawh chuan theihtawp chhuahin zawn hna an buapui nghal a. Mahse an riah chhuah atanga a ni 4-na zing ah chuan Police te chuan kan fanu Zamzami an hmuh thu leh, a thiandang zawng zawngte chu an tualthih vek thu min hrilh ta mai a ni." tiin Zamzami nu chuan min hrilh a.

Inspector Ramzauva chuan Zamzami te inah chuan min kalpui a ni, "Anih leh Zamzami chu an rawn hruai haw em?" tiin Sangtea chuan a zawt a. "Aw...mahse a hlau lutuk a, JEFFREY-A A THAT..ALA DAM..ALA THI LO tiin a rak vak vak a. Ni 2 vel chu kan enkawl a, mahse a ziaawm thei bawk silo nen. Hreh chung chungin Mental Hospital ah chuan kan dah angai ta a, kan va tlawh ve zeuh zeuh thin." tiin min chhang leh a.

"Ka pi, anih leh a lo be ve thin che u em..enge a an tawh hrim hrim?" tiin ka lo zawt ve vat a. "A tawng duhlo, hei kum 2 dawn chu a ni tawh a, mahse engmah a sawi duh lo. A ngawi reng a, mi a diktak a ni tawh." tiin a inhnit feih feih a. Police te chu khawilam police nge an nih tihte leh khawi Police Station nge tihte chu Ramzauva chuan a zawt a, an inchhan fel hnu chuan kan chhuak ta a.

"Sangte, Zamzami chu keiman ka va hmu ange...mi a leh rilru buai a ni si a, i tan chuan a him lovang." Ramzauva chuan a han ti a. Mahse keichuan, "Aih..keimah ngei hian ka hmu duh a ni." tiin ka tang ve tlat mai a. Kan inhnial fe hnuah chuan, "Awle...mahse fimkhur la, kan pahnihin kan kal dun ang. He case hi ka kuta awm a nih angin ka chingfel ngei anga, tualthattu pawh hi ka man ngei ang." a ti deuh fak fak mai a, a thil sawiah chuan a tum ruh hmel kher mai.

*******************

Zan a lo thleng leh ta a, dar 8:30 pelh deuh hret ah chuan ka mu nghal daih a. Mutthilh mai erawh a har takzet, ka let ka let ringawt a. Ka rilruah chuan Zamzami hmuh hun mawlh mai chu a awm a, chubakah he tualthattu Hmaikawr-a hian min zui zel ni tlat hian ka hre bawk a ni. Msa pawhin min ngaihtuah khawp mai, rilru ti hah lutuk lo tur leh hahdam taka awm turin min hrilh fo.

Dar 10 a rik meuh chuan ka chhungte pawh an mu ve ta aniang nge, an reh ta thap mai. Ka room bul deuh lawk atang chuan zawhte hur hram ri hi ka hria a, a ninawm takzet. Rei fe a hram hnu chuan thawk leh khatah a rawn ngiau vak a, a tawp chiang ngei mai. Chutah ka tukverh chu a rawn ri dawt mai a, ka va phu nasa kher em.

Rang takin ka zuang tho nghal a, "Tunge..tunge ni?" ka ti vak vak a. Mahse thawm chu a reh leh hmak mai si, ka hlauthawng takzet. Khum atang chuan ka chhuk a, ka room light chu ka on eng nghal a. Ka tiang inchhawp, sei tha ve tak, ka khum bula ka chhawp thin chu la kangin tukverh lam pan chuan ka va kal hnai a.

Ka kal pah chuan, "Nu..Pa..Mama.." tiin ka chhungte chu ka au vak vak a, mahse tuman min rawn chhang eih lo. Tichuan parda chu ka keu a, ka rei maw...ka tukverh ah chuan thisen a lo kai nuai mai anih chu. Ka ding chat mai a, ka khur nghal zawih zawih. Chutah le, ka tukverh atanga ft 30 vel dawna hla ah chuan tualthattu nunrawn, Hmaikawr-a ngei mai chuan min lo thlir reng a nih chu.

Mit khap lek lo chuan ka en reng a, amah pawh chuan min lo thlek ngawih ngawih mai. Ka thinphu a rang tial tial a, hlauhna hlirin ka khat. Ka room kawngka chu a rawn inhawng thuai a, ka phu nasa lutuk chu a au tuar mai. Ka nu leh pa leh Mama te an lo ni a, ka thaw huai mai. "Pa..sawpa saw.." tih pah chuan ka tukverh chu ka kawk nghal a.

Mahse ka va hawi phei leh chuan Hmaikawr-a chu a lo awm tawh awzawng lo mai, a lo bo daih tawh. "Enge..enge ni?" tiin ka pa chuan min rawn pan hnai nghal a. Tukverh lam chu a han en a, "AWii..thisen.." tiin ka nu chuan a hmui a hup nghal a. Mama chuan tukverh chu ava hawng a, a hnuai a en chuan a ner sak mai.

"ZAwhte...zawhte thi a awm." a ti ringawt a. Kan va kal hnai ve a, ka room tukverh zawn takah chuan zawhte ruang, a ril nena inzam nuai chu a lo let reng mai a. "Kha zawhte ngei kha a ni...a hram vak vak a, a tawp thut a.." ka ti bah deuh nuai a. "Enge..enge i sawi awmzia?" tiin ka pa chuan min lo zawt vat a.

"Pa..zawhte hi a hram vak vak a, mahse a ngiau tuar a, tichuan ka tukverh hi a rawn ri leh dup a..." ka han ti leh hluam hluam a. Ka pa chuan a lu abu nghat nghat a, "Umm..zawhte hi a that phawt a, tichuan zawhte ruang hian i tukverh a rawn vawm a nih dawn chu...tu phiangsen nge maw kan chhungkua min ti buai ziah tu hi awww.." tiin a inseh ruh nasa mai.

********************

A tuk zingah chuan Inspector Ramzauva nen chuan Mental Hospital lam kan pan ta a, Ramzauva pawhin nikum hmasa lama Zamzami te police koh hote chu khawilam police te nge an nih tih leh khawi Police Station nge an nih tihte pawh chu a lo chhuichhuak vek tawh a. Kan inah chuan hma takah min rawn sawm a, tichuan Mental Hospital lam chu kan pan ta a ni.

Motora kan tlan pah chuan Ramzauva chuan, "Case an lo ti tawp fel der tawh a, Jeffrey-a pawh a bo hlen angin an khawtlang chuan an lo ngai hmiah tawh a ni awm e. An ram riahna hmun ah te pawh an veng tlangval leh pa ho ten an zawng nasa a, mahse an hmuh silovah chuan thu an ti tawp ta mai a ni awm e. Zamzami erawh a biak tlak tawh lova, tunah phei chuan a tawng duh ngai lo hrim hrim an ti bawk si." a han ti nuah nuah a.

"Nizanah ka hmu a ni." tih ringawt chuan ka chhang a. Phawk lutuk hian min rawn melh a, "Engmaw? Tumaw i hmuh?" a ti hu mai. ZAwi sap hian, "Hmaikawr-a.." ka lo ti ringawt a. Thinrim hmel tak hian, "Tinge min rawn call loh? Chuan tunah khawiah nge?" a ti leh vak vak a. "Ka hrelo..a tlan bo hman daih alawm." tih ringawt chuan ka chhang leh a.

"I chhungten an hmu ve em?" tiin min zawt leh a, "Aih hmulo...enteh ka pu, he Hmaikawr-a hi tunge a nih kan hre thei em em ang...nizan pawh khan ka rawn hrilh ta lo law law mai che anih kha...ka hamhaih vek a, chubakah a bo leh daih bawk sia." ka ti a, a lung nilo tih chu ka hai mawlh lo.

*******************

Kan thleng ta a, motor atang chuan kan chhuk a. Doctor te bulah chuan Zamzami kan hmuh duh thu te, thil pawimawh tak a nih thute leh Ramzauva chu Police Inspector a nih thute, a case chhui lai mek avanga lo kal kan nih thute chu kan hrilh a, tichuan min luhtir phal ta a. Zamzami room lam kan han pan phei a, damlote chu an lainatawm rual rualin ka rap hlawm ngei mai.

A then bangah an lu an lo tauh chawrh chawrh a, nurse thenkhat ten an lo dang thul. A then lahin hmui sawi bawk bawi hian min lo nuih a, hmeichhe samthur vek pakhat, cher em em mai, a hmel en reng reng pawh a mi pangngai nilo tih hriat tak pakhat phei chuan ka banah a rawn vuan thut a, "Inkawm ang..hawh..inkhual telem ang.." ala rawn ti zui.

Duty te chuan an lo pawt hrang vat a, hmun nuam tak chu a ni lemlo chiang a ni. Zamzami room chu kan thleng ta, kawngkharah chuan LALROZAMI (ZAMZAMI) KUM-20, WARD NO 202 tih hi a lo inziak kulh mai. "In pahnihin in luh chuan a hlau ang che u, pakhat chauh in lut thei ang." doctor chuan a ti a.

"Keimah ka lo lut ange.." Ramzauva chuan a han ti a. "Aih, keimah ka lut ang." ka lo ti vat a. "I tan a hlauhawm, a tullo." tiin min dang tlat a. MAhse ka tang lui ve tlat, "Keimah ngei hian ka kawm duh a ni, hmeichhia ka nia, min hlau lovang. Engmah ka chungah a thleng lovang, min ring rawh...keimah ka lut duh." tiin ka tang tlat a, a tawpah chuan a remti ve ta hram a.

"I phone, i kawnghren, lighter leh thir lampang chi hrim hrim kenluh phalloh.." tiin doctor chuan min hrilh a, tichuan ka kawnghren leh phone chu ka pe a, tichuan ka lut ta a. A room chu a rimtui lemlo ngei mai, min hnungchhawn zawng hian a lo thu khur a. Ka aw ka han thian a, "Zamzam.." tiin ka han ko a.

Mahse a che eih lo, min chhang lo hrim hrim. "Ka hming chu Lalsangzuali ania, biak lawk che ka duh a ni." ka han ti leh a. Mahse ala ngawi reng a, min chhang chuang lo. "Nikum hmasa a Pu Zamawia te huana in picnic kha..khata i thiante tualthih chungchang kha..ihh..khami chungchangah khan biak che ka duh a." ka han ti bah nuai a.

Chutah muang chang hian a lo hawi a, a sam te chu hraw tak leh balh hmel tak niin a mit te chu bui luk mahse hmeichhe hmeltha tak zawng a ni tih chu phat rual a nilo. A nui suk a, "Police dang leh maw? Engmah ka hrelo..chhuak rawh." a ti hmuk a, lehlam a hawi leh daih. "Zamzam, police ka ni lo...mi pangngai, sawrkar hnathawk pakhat ve mai ka ni...ka thusawi hi ngaithla hram teh." ka han ti dek dek chu a ding hluai a.

Min hnungchhawn reng chung chuan, "I nihna min hrilh turin em ni ilo kal? Tumah ka mamawh lo..chhuak rawh." a ti vin tuar a. Ka chil ka lem dawk a, "Zamzam, kha tualthattu Hmaikawr-a khan tual a that leh tan tawh a ni, a tualthah lai ka mit ngei hian ka hmu a ni." ka han tih takah chuan a rawn hawi rang kher mai.

"Eng a? Anih chuan kahwnge a awm? Jeffrey-a a la dam em? Khawiah nge kha mihring tenawm khan Jeffrey-a a dah?" a ti nghal chiam chiam mai a. "Kan veng nula pakhat, Esther-i chu ka mit hmuh lai ngeiin a that a, tichuan keimah hi min target leh niin ka hria." ka han ti leh a. A ngawi vang vang a, "Alo kir leh... a lo kir leh a ni." a ti tham tiak mai a.

Chiang tak hian ka en a, "Zamzam, i puih ka ngai a ni. He tualthattu nunrawng tak hian kei hi min bei mek a ni. Tunge a nih, hepa hi tunge a nih min hrilh rawh." tiin ka ngen a. A nui suk a, "Hneh theih a nilo, a thi theilo...ramhuai..ramhuai ang mai a ni." a ti leh ringawt a. Thawk ka han la leh te te a, "Enteh Zamzam, enge ti tura min duh..i duh duh ka tihsak ang che. Pawisa i duh chuan ka pe ang che...enge ti tura min duh...ka ti veka ang." ka han ti leh a.

Min rawn pan phei a, "Engkim min tihsak tak tak ang maw?"tiin ka mitah tak chuan min melh a, ka lu ka lo bu nghat ringawt a. Thutak hmel zet hian, "He hmun atang hian min la chhuak rawh, tichuan ka pui ang che. Mahse keini pahnih chauh tan chuan dolet chi a nilo, puitu kan neih angai a ni." a ti ta a.

"Lakchhuah theih dan che ka lo ngaihtuah ang, nang pawh ka sawi angin awm ang che. Ka thianpa hi police inspector a ni a, ani hian he case hi a chhui mek a. Min pui thei ang, a hrim hrimin..he tualthattu hi tunge a nih reng reng a?" tiin ka zawt leh a. Zamzami chuan chiang kek kawk hian min en a, "A hming chu Victor-a a ni...tlangval hmeltha tak leh mitmeng mawi tak, mahse a chhungril chu bawlhhlawh tak...tualthattu hmeltha nunrawng..Victor-a a ni." a ti khur dar dar a, a thinrim hmel kher mai.

"Esther-i, ka mit hmuh lai ngeia a thah nu chu in picnic tuma in zinga tel ve, Zorama bialnu hlui a nih thu Estheri nu in min hrilh bawk a." ka han ti leh a. A hmui ahup a, "Nilo...tinge Estheri kher? Inzawmna engemawni chu a awm ngei a ni, keini hi min thah a tum bik hrim hrim em mawni le?" a ti nuah nuah a.

"Engpawh nise, helai hmun atang hian ka la chhuak em em ang che. Mahse ka la chhuak che a nih chuan min puih i intiam tawh ang ngeiin min pui ang che, i rilru i thlak loh ngei ka beisei." ka ti a. Ani pawh chuan, "Tehreng mai, ka hmelma lian ber a ni a, keimah ngei hian thah ka chak takzet a ni, kum 2 chhung tehmeuh chu amah haw reng rengin hun ka hmang tawh alawm." a ti deuh fak fak mai.

******************

"Enga? Hruai chhuah a? Mi a anih saw...engemaw i sawi le?" tiin Ramzauva chuan min vin lek lek mai. "Mi a chu ni e, mahse tinge kan pan si? Mawhh..ka pu, khawngaihin, Hmaikawr-a hming pawh a hria a, keini aiin a hlauhawm zia a lo tem hmasa tawh a, a hlauh vang mai mai a buai a ni. Khawngaihin min pui rawh, hruaichhuah ka duh a ni." tiin ka ngen lawm lawm a.

"Khawiah nge a awm chuan anga, chubakah he case ah hian ka pute remtihna la hmasa lovin thil ka ti hnem tawk tawh, suspend ka ni mai ang tih pawh ka hlau ania. Dan ang zela ka kallo a nih chuan ban ka tawk thei asin, i hrethiam pha ve lovang."a han ti leh deuh bul bul a. "A hming pawh min hrilh a ni, Victor-a a ni." ka han ti leh a.

"Huiham...khawiah nge a awm chuan ang ka tih chu?" tiin min vin leh hrep a. "Kan inah pawh a awm mai ang, kha chu ka ngaihtuah mai ang." tiin ka lo chhang a. "I mawl em ni? A tina palh che anga sin, mi a anih saw.." a han ti leh a. Nilo, a a tak tak lo...Hmaikawr-a chungchang ka sawi khan, a hmel kha a danglam vek a ni. Ka pu, heichiah hi ka ngen tawh ang che, min pui hram teh." tiin Ramzauva chu ka ngen leh a.

A ngawi vang vang a, "Umm..nia, kan sawitha leh dawnnia." tih ringawt chuan min chhang a, min thlah haw ta a. Ani erawh Estheri nu thu zawtfiah tur chuan police dangte nen an kal leh a, kei erawh inah ka awm tawh thung. Ka ngaihtuahna a kal thi hle mai, Hmaikawr-a hian tinge kei ber kher hi min umzui reng? Tinge min tihthaih reng a? Enge a pawi ka sawi le tiin nileng mai chuan ka inngaihtuah a.

************************

Ramzauva puihna hmang chuan a tukah chuan Zamzami chu Mental Hospital atang chuan kan la chhuak thei ta a, a chhungte inah erawh chuan a awm duh tawh hauh lo. Ka nu leh pate bulah chuan dawt sawiin ka thiannu, khawdang ami angin ka sawi a. Min ringhlel deuh chuan ka hria, mahse kan ina awm ve chu an remti ta hram a.

Chumi zan chuan ka room ah chuan Zamzami nen chuan kan titi ta a, mi a ani pawhin ka hrelo. Nikum hmasa lama an thian ho ramhnuaia riakchhuak tura an kal tuma Hmaikawr-a'n a lo tihbuai dan te, a thiante zawng zawng a mal te te a alo thah vek dante leh a tawpa Jeffrey-a nena an inkalsan dan te, engkim chu min hrilh ta vek a.

"Anih chuan Zamzam, Victor-a chu a thlalak tal i nei em?" tiin ka han zawt a. "Engtin nge ka neih ang? Thlamah kha chuan a awm ngei a, mahse thlam chu a kang ral vek tawh a, a thi amaw kan ti a, mahse a lo la thi hauh silo. Jeffrey-a pawh tunah hian a thi nge la dam pawh ka hrelo, Police te lah chuan an hmu thei bawk silo." tap tep chuan a han ti a.

"Anih leh tinge Mental Hospital ah an dah che a, hei tunah pawh i pangngai viau si a?" ka han ti leh a. A ngawi deuh vang vang a, "Diktak chuan, ni e...khami ni khan Police te chuan damdawiin lam panin min phur a, Jeffrey-a erawh Ambulance ah an hruai thung a. Ambulance kha a kal hmasa a, a hnu fe ah chauh kan zui ve a." a ti a, a chawl deuh dat a.

"Kan kal fe hnuah chuan ka bula chuang police te chuan call an dawng a, Victora ruang an hmuh loh thu an sawi a. Ka hlauthawng em em a, chutah kan tlan leh deuh a. Doctor leh Nurse, Constable pakhat leh driver pakhat te ruang chu kan hmu leh ta a,Jeffrey-a erawh a chuanna Ambulance chawpin a bo daih mai bawk si. Ka hlauthawng lutuk kha ka chiai a, engvak mah ka hre chhunzawm lo." tiin a inhnit deuh feih feih a.

"Jeffrey-a chu ala dam i ring em?" tiin ka zawt leh a. A lu thingin, "A thi daih tawh ang." a ti zawi sap a. "I at loh thu chu tinge i sawi mai loh?" tiin ka zawt leh a. "A tir kha chuan ka a tak tak alawm, ka hlauh em avang khan ka ngaihtuahna abuai vek a. Mahse ka harhfim hnu khan chhuah ka dil a, tuman ka thusawi an awih silo a ni. Ka thinrimin doctor pakhat chu a kutah forsep hmangin ka vit a, khata tang phei kha chuan eng ang pawhin ka a lo ti mah ila, min awih tawh lo hrim hrim." tiin min chhang a.

"Anih leh tuna mi hi Victor-a chu ala ni kher angem? Midang pawh a lo ni zawk maithei a.." ka tih lai chuan rang zet hian, "Ni e..ani ngei kha Hmaikawr-a diktak chu a ni. Engang piang nge a neih..ft 6 chuang daih, palian lampang, leather jacket dum ha, boot dum bun, samphiar...a dik em?" a ti ta zat zat mai a. A thusawi zawng zawng chu hmaikawra inthuamdan leh pianzia a ni vek bawk si, "Aw..dik e." ka ti chuai raih ringawt.

"Esther-i a that lai chu i hmu chiang amaw?" tiin min han zawt veleh a. "Hmu e, ka awmna atanga fit 30 velah an lo inkuah a, inngaizawng amaw tiin ka enliam mai a, mahse a lo vit siah siah mai hi a lo ni a. KA hlau lutuk chu ka biru ta tawp a ni...chuan chutah chuan hmaikawr ala vuah lo." ka ti a.

"Anih chuan eng ang hmel pu nge? A hmeltha tiraw?" a lo ti vat a. "Aih...ka hmulo, min hnungchhawn a, min hnungchhawn chung reng chuan hmaikawr chu a vuah a, a lo hawi chauh." tiin ka chhang a. "Anih leh ila hmu thin em? Tunhnai ah?" tiin min zawt leh a. "Aw...min umzui reng nimaiin ka hria. Chuvang ania nangmah pawh hi ka rawn zawn chhuah che, zantin kan kawngka hi a rawn kik ziah a, ka pa thianpa pawh a lo that a ni. Ka hriat duh ber chu tunge a nih a, engvanga min umzui reng nge a nih tih hi ka hre chak ber?" ka ti a.

Chutah Zamzami chuan rum zet hian min en a, "A hria.." a ti ringawt a. "Enge awmzia?" ka lo ti vat. "A hria...Estheri a that lai i hmu tih a hria...chuvang chuan a umzui che a ni." a ti ta mai a. Ka hrethiamlo kher mai, "Mahse tinge chuti ni si...min man ve loh? Min hmu reng awmsia, ka bihrukna atanga min rawn hnukchhuak lovin tinge a kal daih si?" tiin ka zawtlet a.

"I hrethiam lovang, keipawhin tun thleng hian ka hrethiam lo. Enge a duh? Engvanga tualthat thin nge? A nu leh pate thalrauvin tualthat turin a ti niin ka bulah a sawi a, mahse enge hlawkna awm?" a ti nuah nuah a. "A nu leh pate pawh i hria amaw?" ka lo ti leh vat. "An thi tawh...a nu zawkin apa chu a that a, chumi hnuah amah a inthat leh niin a sawi a.." tiin min chhang leh a.

*******************

A tuk zingah chuan Zamzami chu Police Station ah ka kal pui a, Ramzauva bulah chuan a thu hriat ang ang te chu a han sawi ve leh a. "Anih leh Zamzam, Victor-a hmel awm ang ila hre thei em?" tiin a han zawt a. "AW....tun thleng hian ka theihnghilh theilo." tiin a lo chhang a. "A that chu, lemziak thiam kan ko anga, a hmel put hmang i sawi thei angem?" tiin a zawt leh a.

"Tehreng mai." tiin a chhang a, Ramzauva chuan lemziakthiam chu phone ah bia in a ko ta a. He an lemziakthiam chhawr mek hi Police a ni ve lova, lemziak tura an chhawr pangngai niin hlawh pawh an pe ve thin tho. Police Station atanga hla lo teah hian a inluah a awm a, an koh apiangin a lo kal mai thin a ni awm e.

Darkar khat chuang kan nghah hnuah pawh chuan a lo kal thei silova, an nghak rei ta ngat ngat khawp mai. "Ava rei ve mawle..." tiin Ramzauva chuan a han call leh a, mahse a ring quit thak thak zel bawk si. "Umm...vawikhat kan call leh anga, a la lak theih loh chuan an inah kan han kal mai dawnnia." tiin a phone leh a.

A rawn pick up ta hlauh mai, Ramzauva chuan loud speaker ah a dah nghal a. "Hello.." a han ti dek dek chu phone atang chuan mipa aw pangngai tak hian, "Hello Zamzam...i dam maw? Inhmuh lohna ava rei ta ve.." a rawn ti ta mai a. Ramzauva nen chuan kan hawi a hru mai, Zamzami chu ading hluai a.

"Nilo...nilo.." tiin a thaw nghal hlawp hlawp mai. "Hey...tunge i nih a?" tiin Ramzauva chu a han vin deuh thak a, mahse phone ami chuan a hlauh loh hmel kher mai. A nui huah huah a, "Amak thin e mai Inspector, in mi chhawr lai te tal hi chu venhim ve thin tur alawm." tih pah chuan phone chu a dah daih mai.

"Zamzam...tunge..tunge khapa kha?" tiin ka zawt a, mahse min chhang lo. Ka sawi vak vak a, "Mawwhh...i hria tiraw?" tiin ka rak chel chul tawh mai. Mahse min chhang lo, a tap deuh pur lehnghal. "Kal vat angai.." tiin Ramzauva chu a tho a, police dang ho te nen chuan an chhuak ta nghal a, keini pawh chu min phur tel ve a.

******************

He an lemziak thiam hi a hming chu Dawnga a ni a, tlangval kum 30 mi a ni. DAwnga te in an thleng chu motora lo awm turin min ti a, mahse ka zui lui ve zel tho. Rin ang ngeiin Dawnga chu a room ah chuan a lo inkhai a, ka va han au ring tak. Zamzami pawh chuan a kawrah vuanin, "Nilo...a in ang chiah." a lo ti ve bawk a.

"Engmaw? Engmaw in ang?" tiin ka lo zawt nghal vat a. Ramzauva chuan pawnah chuan min chhuah pui dun nghal a, "Enge i sawi awmzia?" tiin Zamzami chu a zawt ve a. Zamzami chu atap a, "Tiang chiah khan...khatiang chiah khan..ka thiannu Bsi..ihh..ihh..Nicky-a nen...tiang chiah khan a lo khai ve a ni." tiin min kuah a.

Ramzauva chuan a lu a bu nghat nghat a, "A voice kha ka record hman vek alawm...chuan saw ta saw....Dawnga phone pawh a la awm alawm, finger print te pawh a awm ngei ang...kan man em em ang." a han ti deuh fak fak a. "Zam...min rawn phone tu kha Victor-a chu a ni ngei ang tiraw?" tiin ka han zawt ve leh a.

Mahse a lu a thing ta tlat mai, "Enge awmzia? Victor-a a nilo maw?" ka lo ti hu mai a. La inhnit feih feih chung chuan, "Nilo..kha kha Victor-a aw a ni lo." a ti zawi leh sap a. "Mahse...a rawn hre bawk che sia...tunge ni ta ang?" tiin Ramzauva pawh chuan a lo zawt ve a. Ramzauva nen chuan kan pahnih chuan min melh relh relh pah chuan, "JEFFREY-A.." a ti zawi sap a.

***********************

Zan dar 8:30 a ri a, ka room ah chuan Zamzami chu a muhil bawrh bawrh a. Ka chhuak a, sitting roomah chuan Ramzauva leh ka pa te chu an lo titi mek a. Ramzauva'n min hmuh veleh chuan, "Mut duhna damdawi chu i pe ta em ni?" a lo ti a. "Aw...a inturah khan ka pawlhsak tawp." tiin ka lo chhang a.

"Ni e, ti sawn muhil hrih teh se, a tha zawk. Kan la mamawh dawn si a, a buai leh phah hlauh dah ange." Ramzauva chuan a han ti leh a. "Hmaikawr-a chu Jeffrey-a zawk tihna em ni ta ang?" ka han ti a, engmah ka hrethiam nei nuai tawh lo. "Zamzami ber lah a buai leh nghal der mai bawk si a, kan hruaichhuak hi kan ti fuhlo angem aw?" a han ti vawng vawng a.

Ka nu leh pate bulah pawh ka inpuang vek ta tawp mai, ZAmzami chu Esther-i nu rawn sawi ngei mai, mi a dahna ina an dah tak, Zamzami ngei mai kha anih thu leh Ramzauva hnuchhui mekna a pui theitu a nih kan rin avanga kan lakchhuah a nih thute pawh ka hrilh ta vek tawp mai a nih kha.

"Zamzami chhungte tal hi hrilh ve ila a tha lo maw?" tiin ka pa chu arawn tawngchhuak ve a. "Kan hrilh vek tawh a, mahse Zamzami ber hi a haw duh tlat lo alawm." tiin ka lo chhang vat a. "Anih leh Pu Ramzau, in lemziak thiam Dawnga thihna chu tihian inchhui mek zel tihna em ni?" tiin ka pa bawk chuan a han zawt leh a.

"Midang kutah ka dah hrih a...englo ania, tualthahna thleng zawng zawng hi a in zawm kual vek a, a thattu pawh Victora vek niin kan ring. Mahse kan buaina ber chu Victor-a hre tu awmchhun chu Zamzami chauh hi ani a, mahse tunah lah a biak tlak bawk siloh. Dawnga phone atanga Zamzami rawn be tu lah kha Zamzami ber chuan Victor-a nilovin a thianpa bo ta, Jeffrey-a aw a nih thu a sawi leh mauh mai bawk si...engtia hma han lak tur nge kan la hre bik lo." a ti nuah nuah a.

"In theihtawp chhuah ang che u, keini pawh kan lo tawngtai ang..abak tihtheih kan nei silo." tiin ka nu pawh chu a lo tawngchhuak ve a. Rei fe kan inkawm hnu chuan, "Ka kal ange, Dawnga thihna chungchangah pawh tih tur kan la ngah si...naktuk lamah kan inbe leh dawnnia. Chuan constable pathum ka lo tir anga, zaninah in in hi an rawn veng dawnnia." tiin min chhuahsan ta a.

*********************

Police pathum laiin min ven reng vang nge ni, ka muttui angreng khawp mai. A tuk zingah chuan kan inkawta ui bauh vak vak ri chuan min ti harh a, Zamzami erawh ala muttui ngang mai. Ka chhuak a, tute ui nge pawh ka hre ngailo. Kan in bula kudam chu enin a lo bauh vak vak mai a, ka ngaih a thalo kher mai.

Ka han hawi kual a, min veng tu Police te pawh chu hmuh tur an awm tawh miah lo. Zingkarah hna an nei anga, min hrilh lovin an haw aniang tiin ka ngaih chu ka ti tha lui a. Mahse chu ui bengchheng zet chu a bauh uar tulh tulh mai si, kudam hnung lamah chuan thil engemawni tak a awm tih chu a chiang reng.

Hreh tak chung chuan kudam hnung lam chu ka va pan a, sana ka han en a, zing dar 6 a pel chauh mai bawk si. Kudam hnug lam ka va en chiah chu ka va han t(r)e ring tak em, ka ding chat mai. Police Constable ruang pathum te chu kan kudam hnungah chuan an lo let reng mai a, a then chuan lu an nei lo, an kut a bung rum bawk a, ka kawng nghal vek.

***********************

"Thawm engmah i hre lo em ni?"

"Engmah ka hrelo tak tak, min venghim turin police pathum lai an awm tih ka hria a, thlamuang taka ka mut ve theih zan a ni a, engmah thawm ka hrelo."

"Dar engzat ah chiah maw ruang hi i hmuh?"

"Zing dar 6 pelh vel a ni....ui a lo bauh vak vak a, kan kudam hnung ah ka va hmu a ni."

Ramzauva chuan a lu a dawm vawng vawng mai a, "Anih leh ka pu, nangni tal pawhin thawm engmah in hre lo amaw?" tiin ka nu leh pate chu a han zawt veleh a. Kan harh eih lo hrim hrim, kan muttui zan a niang nge.." tiin a lo chhang a. Constable pakhat lo lutin, "Sir, Dawnga khumah mihring DNA hmuh a ni a, chhui chiang turin kan thawn tawh e." a rawn ti a.

"A that hlauh chu, engemaw tal kan hriat belh mahna." a lo ti mai a. Min han melh leh a, "Sangte, hetiang chuan a tha dawn lo tawp mai. Zanin hian keimah zawk hi in inah chuan ka lo duty zawk ange, he tualthattu hi ka chhuah hauh lovang." a ti a. Chutih lai chuan in lama awm mek ka nu chuan min rawn phone a, "Zamzami a bo." a rawn ti ta mai a.

Zan hmasa lama Zamzami mut duhna damdawi ka pek hnua a mutthilh khan a la harh miah lo, mahse engtin nge a bo theih? "Nu, engemaw i sawi le?" tiin ka chiai nghal em em a. "Inah ka awm char char a, police te pawh pawnah an vei sup sup a. Mahse room ka va en a, ka hmu tawh miah lo." tiin ani pawh a mangan hmel kher mai.

Ka pa chuan phone chu rawn chuh vatin, "Hello, Mami nu...bathroom te kha han en teh, a lo inthiar te hi nilo maw?" a han ti ve nghal chel chul a. Mahse ka nu chuan, "A awmlo, kan au vak vak a, engtin nge a bo kan hre bik lo. Inchhung zawng zawng pawh kan en vek tawh, mahse a awm lo." a rawn ti tlat mai bawk si.

*******************

Nilenga kan buai hnu chuan tlai dar 4 velah chuan ka haw a, ka chauh lutuk chu haw tlang mai lovin kawngsira waiting shed ah chuan ka thu a. Reiloteah ka hmangaih em em Msa nen kan innei thuai dawn a, mahse tuna ka thil tawn mek hian min va ti hlim lovin min va ti thlamuang lo si em.

Fate kan nei ve anga, hlim takin Kristian Chhungkua kan din ve tawh ang tih laiin hetiang thil rapthlak lutuk tak mai hi ka tawng leh ta bawk si. Ka inngaihtuah nasa kher mai, a tawpah phei chuan ka mittui atla hial a. Chutia ka mituui hru a ka inhnit feih feih lai chuan ka bulah hian mipa pakhat hi a rawn thu a, ka zak angreng hle mai.

Ka inhruk fai zawh hnu chuan pangngai thei ang berin ka han thu tha leh vel a, chupa hmel ka va en chu ka phu deuh zuk mai. Mizo mipa hmeltha tak hi ka la hmuh tlem vang nge, ka la tawng lo hrim hrim. Mahse tuna ka bula rawn thu hi chu a palian bawk a, a sang tha a. A mitmeng pawh a pawl ram mai, belhchian dawl tak a ni.

Min rawn en a, a rawn nui suk leh ta nghal a. A nui hmel pawh a mawi narawh e, mahse ka ngaizawng tihna erawh a ni hauh lo. "I tha maw?" a rawn ti a. "Aaa..aw tha e...ka tha alawm." ka lo ti bah deuh nuai mai. "I va that hmel siloh ve, i tap elaw?" a han ti leh a. Ka zak ru takzet, "Hehe..nia, ka rilru ahah lutuk a." ka ti ta ringawt a.

A kut chu rawn lek chhuakin, "Tunge i hming ni a, Thanmawia ka nia..Lalthanmawia." tiin min han nuih leh suk a. Chibai pah chuan, "Sangtei ka nia.." tiin ka lo chhang a. "Min hrilh duhlo mahla apawi chuang lova, mahse i rilru hahna te chu ka hriat ve chi a ni em? Han sawi la, i thawl hawk maithei asin. Chuan ka pui thei maithei bawk che a, engin nge i rilru chu ti hah a?" tiin min zawt leh a.

Ka nui suk ringawt, "Min pui thei lovang, thawnthu thui tak a ni. Kan vengah hian tualthahna vawi engemaw zat a thleng tawh tih i hria ang tiraw?" tiin ka han zawt ve a. "Aaa..hemi veng ami hi ka nilova, mahse...aw hriat chu ka lo hre ve alawm. Tukinah pawh police pathum an thih thute kha ka lo hria a, chumi vel chu i hlau tihna em ni?" a han ti leh a.

"Hlauh mai bakah...khang police pathumte ruang kha, keima hmuh ania...kan in min vensak a." ka han tih chuan mak a tih hmel kher mai, a awmlo hran love. "Anih chuan...tinge in in chu an vensak che a?" a han ti leh hu mai a. "He tualthattu hian kei hi min umzui a, min thah a tum ve ni maiin ka hria." tiin ka chhang leh a.

A ngawi vang vang a, a sana a en a. "Ka tlai dawn tlat mai, enteh...puih i ngai anih chuan i number min lo pe la...ka awm reng ang." tiin a phone chu a phawrh a. Keipawh chuan engmah sawilo chuan ka number chu ka lo chhu kai ve mai a, "Kan inbe leh dawnnia." tiin min chibai leh a, a kal ta a.

********************

"DNA result a lo chhuak a, Dawnga DNA a ni hauh lo. Mahse tu DNA nge kan la chhui mek a, kan hriat vat kan beisei." tiin Ramzauva chuan min hrilh a. "Anih tak chu...rilru a hah hle mai." tiin ka pa pawh chuan a lu a dawm vawng vawng mai. "Hlauthawng suh u...zanin chu kan chhuah tawh hauh lovang." tiin Ramzauva chuan ka nu leh pate chu a hnem a.

"Anih leh Zamzami kha.." ka lo ti vat a. Beidawn hmel taka min en pah chuan, "Aaa..nia, an la zawng mek." a ti zawi sap ringawt. Diktak chuan Zamzami ka ngaihtuah ber, min pui theitu leh Victora hmel hretu awmchhun a ni bawk si. "Zan a rei ta, mu tawh rawh u....chuan hlauthawng reng reng suh u." Ramzauva chuan a han ti a.

"Keichu nangmah chauha i duty hi tha ka tilo, nizan lawkah pawh constable pathum lai an duty a, mahse thawm nei miah lovin a that vek thei ania." hlauhthawn hmel tak chuan ka nu chuan a lo ti a. "Ka pi lungngai reng reng suh, thawm ka hriat veleh back up ka ko nghal vat dawn alawm." tiin Ramzauva chuan a chhang a.

******************

Msa nen chuan hmun pakhatah kalin, kawngsira thutthleng ah chuan kan thudun a. Hlim taka inkawmin kan inneih huna kan awmdan tur te, fa kan neih huna kan buai dan turte sawiin kan hlim dun kher mai. Chutih lai tak chuan thi hnuang hian Zamzami chu kan hmaah tak chuan khawi atanga rawn chhuak nge tih pawh hriat loh hian a rawn bawk thlawp mai a, kan phu chiang kher mai.

"Nilo..Zam..tinge? Khawnge i awm daih a?" tiin kaihthawh ka han tum a, mahse min hmu chiah chu a tawlh hnung a, a hlauh hmel em em a. A kut chu rawn phar chhuakin, "In..inhnunga kha.." tiin a tap ta vak vak mai a. Hnunglam ka han hawi chiah chu Hmaikawr-a, Victor-a ngei mai chu a hmaikawr tihbaiawm leh rapthlak zet nen chuan alo ding khur mai nih chu.

Chem hriam hmel tak, tle sar mai hi a lo keng bawk a. Chutah ka bialpa, ka pasal hual MSa lu chu a fik ta hmawk mai, thisen a chik zuai zuai ta mai a. Ka hlau lutuk chu a t(r)e chel chul mai a. Tlanchhiat ka tum a, mahse ka hma zawnah tak chuan Hmaikawr-a chu a lo awm leh daih tawh.

A tlu hnawk a, ka tho thei ta reng reng lo mai. Chutah le, ahmaa ka mithmuh lai ngeia Esther-i a thah ang chiah khan ka mit hmuh lai ngei chuan Zamzami dulah chuan a vit leh ta siah siah mai a, a ril a uai hnuang mai, thisen a bawk hawk hawk bawk. Chutah min rawn pan a, min sah a tum chiah chu ka mumang ram atang chuan ka harh zawk mai.

Ka thaw hlawi hlawi a, ka thlanin min bual huh vek bawk. Mumang a ni tih chu hre tho mah ila, a tak ang chiahin ka hmu a ni. Msa hmel kha chiang takin ka hmu a, Zamzami hmel pawh. Tin, kha misual Hmaikawr-a hmel phei kha chu chiang tak a ni...ka rap ngawih ngawih. Msa chu ka ngaihtuah em em a, ka phone phawrin ka call nghal a.

"Hello, Duat...enge ni ta? Tun ang hunah...i va meng rei ve?"

"Ihh..MS..Duhtak..i tha maw?"

"Aww tha e...ka lo muhil tui lutuk a..enge ni reng reng a?"

"Aaa..engmah nilove..ka....ka ngai che a.."

"Thil thalo a awm em ni?"

"AWm love..ihhh...englo..i aw ka hre chak a, muttui aw...ka hmangaih che."

"Awle...muttui le, keipawn ka hmangaih che."

Phone chu ka dah a, ka thaw huai mai. MAhse ka ngaih a la tha chuang lo, Zamzami kha Hmaikawr-a khan ka mumangah khan a that chiang bawk si a. Msa chu a him tih ka hre thei mai a, mahse Zamzami erawh a awmna ka hre der mai bawk silo. Mut leh mai tuma ka puan sin lai ka han siamthat lai chuan pawn lama thawm awm chuan min ti phu zawk mai a, ka thin a phu leh nghal ta dup dup mai.

Room atang chuan ka chhuak a, Ramzauva..thutthlenga mu reng kha a lo awm tawh miah lo. Kawngkhar lam ka va pan a, ka hlauh ang ngeiin a lo inkalh hauh lo mai le. Ramzauva chu a chhuak tih chu a chiang reng mai a, mahse enge a tih ang? Chhuak ve ngawt ila, pawnah chuan Victor-a'n min lo chang reng si mai ang tihte thleng chuan ka ngaihtuah nghal a.

Ramzauva chu au vak ta ila, ka nu leh pate ka ti chiai ang tih ka hlau bawk si. Mahse enge maw ka hriat ni, kei..hmeichhe dawih em em thin leh thim hlau em em thin hian pawn lama thawm lo ri chhuak chu eng chiah nge a nih tih fiah ka duh tlat pek a nih chu. Choka lamah ka kal a, chemte hriam tak lain pawnah chuan ka chhuak ve ta rawih mai a.

Ramzauva chu zawngin hlauh avanga thlan tla zawih zawih chung chuan ka hawi kual vak vak a, thawm dim tak chung si chuan, "Pu Ramzau....Pu Ramzau.." ka han ti a, mahse tuman min chhang der mai silo. Chutah kan inbul, huan panthlakna bula hnim buk deuh mai atang chuan mi pakhat hi a lo chhuak thut mai.

Ka phu nasa lutuk chu ka zuang lo chauh, mahse Ramzauva a lo ni hlauh mai. Ani pawh chu a phu nasa ve ngang aniang, "Hmeli.." min ti vak mai. "Enge i tih a, min ti phu nasa lutuk." tiin ka vin deuh lek lek a. "Tinge ilo chhuah? Lut leh vat rawh.." a ti deuh khur khur a. "Thawm ka hria a, i mutnaah i lo awm tawh bawk silova..ka hlauthawnga ka lo chhuak tawp alawm." ka ti a.

"Keipawh thawm ka hria a, ka chhuak a, mihring niawm tak..hemi hnimbuk a alut lai hi ka hmu a. Mahse mihring pawh a nilo maithei, ka hmu sual aniang...a hrim hrimin tinnge i lo chhuah a, i tan a him..." a sawi zo hman lo, hnim bukah bawk chuan Ramzauva chu engemaw ni hian a pawt lut leh daih.

Ka au vak a, ka hlau lutuk chu tlanchhiat mai ka han tum a. Mahse lung liang tak mai chu ka chhui palh a, kan huan lamah chuan ka lum thla ta. A thim em em lehnghal a, thingkung pakhatah ka la intauh chawrh zui. Mahse ana lutuk lo, ka lu chu ka dawm vawng vawng a, hmu theilo mah ila ka kut hnawng chap atang chuan ka lu chu a thi tih ka hre mai.

Din mai ka han tum a, mahse ka kawng chu a na takzet. Ka mangang lutuk chu ka hawi kual a, karei...kan huanah hian ka kal ngai lo bawk a, ka awmna chu ka hre ta hauh lo. A thim em vang pawh a ni mahna, mahse ka phone lah ka thlauh bo daih mai bawk si. "Ramzau, Ramzau.." tiin ka au vak vak ringawt a.

********************

DArkar chanve dawn Ramzauva chu ka zawng a, thim hnuaiah nen, thla lah a eng nep em em mai bawk si. Ka hlau lutuk chu ka thlan zawih zawih a, ka kawng a nat em avang chuan ka kal tha hleithei bawk silo. Chutia thei leh thei lova ka bai auh auh lai chuan ka hnung lamah thawm a awm leh ta tlat mai, ka ding chat a.

Ka leh hawi vat a, tumah ka hmu lo. Chutah ka ban chu tu emaw ni hian a rawn vuan thut a, "Tlan ang.." tiin min kai phei nghal dawr dawr a, Ramzauva a lo ni hlauh mai. Engmah ka sawi lo, ka tlan ve nghal tawp. Hnunglam ka va hawi zeuh va, kan hmelma pa Hmaikawr-a chuan min rawn um anih chu.

Ka hlauh a zual a, ka kawngna theihnghilh thak khawpin ka han tlan ta mai a, khawi khawiah nge kan tlan tak pawh ka hre tawh lo. Mahse kan in chhona lam kan pan mek tih ka hre thei hlauh mai, thla eng pawh a chiang ta deuh e. Hmaikawr-a lah chu a rawn tlan hnai tulh tulh mai si, ala rawn rum nghut nghut lehnghal.

RAmzauva Police Motor awmna lam chu kan pan nghal a, achhan chu kan in lam kan va pan anih chuan min man hman ngei dawn si. Motor chu kan thleng a, Ramzauva lah chuan chahbi a han phawrh leh te te a. Motor kawngka chu hawn a han tum a, ala thei lawk lo zui. Hmanhmawh a na duh kher mai, "HAwng rawh..hawng vat rawh." tiin ka rak chel chul tawh mai.

Hmaikawr-a chu a rawn thleng chho ve ta, motor kawngkhar hawn tuma kan buai mek chu min rawn hmu a, a ding chat mai. Ramzauva lah chuan a hawng hleithei lo, "Hrep taka...tinge ka hawn theih loh?" tiin a au vak vak a. Hmaikawr-a chuan hmanhmawh lo tak hian min rawn pan a, a rawn nui phei ta huah huah mai.

"Min pui ru...Ramzau...tlanchhe mai ang." tiin tlan ka tum ut ut tawh a..ka au chel chul tawh mai. Mahse vanneih thlak takin a hawng hlauh mai, rang tak chuan a lut a, chuveleh Hmaikawra chu a rawn tlan phei nghal vat a. A zuanin ka zuang lut hialin ka hria, min va han man teuh tak em.

KAwngka chu ka khar a, ka ke a rawn khawih fu hman zui. A kut chu ka kharh chilh a, a rak thawt a, a tawlh hnung nghal. Tukverh ah chu a ban hliam lo lam zawk chuan a rawn chum vak a, a mitmeng mawlh kha, rapawm tak a ni. Chutah kan hmazawnah chuan a ding a, rum zet hian min melh reng a.

Thinrim tak hian Ramzauva chuan, "ZAwngsen, ka that dawn che..." tih pah chuan motor chu a start a, chuveleh rang em em hian Hmaikawr-a chu a tlan thut mai. Rang takin kan um ve nghal vat a, mahse maw...mak tak a ni. A tlanchak dan em em kha, ka rap hial zawk. Kan umpha reng reng lo, he tualthattu Hmaikawr-a, Victor-a an tih hi mihring pangngai a nih ka ring ta hauh lo mai.

***************

Thui deuh fe kan tlan hnu chuan in pakhatah a lut a, kan awmna lai chu khawilai tak nge pawh ka hre tawh lo. KAn veng hi chu hrechiang viau mah ila, helai kawng hi chu ka hre ngai hauh lo, ka vawikhat kalna a ni. "Motorah hian lo awm rawh aw...." tiin Ramzauva chu chhuah a han tum ngawt a, ka lo dang nghal vat a.

"Nilo..min kalsan suh, ka lo kal ve dawn.." ka ti a. "I mawl em ni? Keimahin ka va kal ang, i tan a himlo." tiin ka kal ve chu a remti tlat lo. "Invenna i nei bik em ni? Khawnge i pistol?" tiin ka zawt a. A thaw hak a, "Ka thlauh daih alawm...khawimaw i phone lo phawrh lawk teh." a han ti veleh a.

"Keipawh...ka phone ka thlauh daih.." tiin ka chhang a. KAn mangang dun hle mai, "Sangte, ilo kal ve anih chuan i tan a himlo, thi palh ta la, ka mawhphurhna a ni dawn asin." a ti a. "Anih leh nang pawh...lo that ta che sela, kei hi min zuah bik i ring em ni?" ka ti let ve sak a, "Huiham...kan nih nih kan ni tawh anga a nimai." tiin motor atang chuan a chhuak a, ka zui ve ta nghal a.

********************

Inchhungah chuan kan lut a, a lo thim khuih mai. Ramzauva chuan a torh light chu a han hmet eng a, plug awmna tur awm ang vel chu a han zawng a. Second 10 vel kan zawn hnu chuan kan hmu ta, mahse kan on eng thei hauh lo. "Current a awm lo amawni le?" ka ti a. "Nilo...a ruahmanna vek a ni...line a cut vek a ni ngei ang." Ramzauva chuan a ti a.

KAn kal kual zel a, invenna tur hmanrua engmah kan nei der mai silo. "Choka zawng ang, chemte a awm maithei asin." tiin Ramzauva chuan min kai deuh dawr dawr a , chutah hmeichhe na tuar niawm tak, rum vawng vawng ri kan hre ta tlat mai. "Chu..tunge?" ka ti vat a, bengchheng lo turin Ramzauva chuan ka hmui a rawn hup nghal a.

Thawm lo chhuahna lam chu kan pan zel a, chhuatah chuan thisen kan hmu ta tlat mai. Thisen chu kan chhui zel a, bang kila hmeichhe pakhat, saruak deuhthaw a lo mu chu kan va hmu ta. A bul velah chuan thisen a lo tling nuai mai a, a hmel kan va en fuh chiah chu ka hmui ka hup nghal.

"Nilo..Zamzam..nilo.." tiin ka tap a, kan va tlan phei nghal a. A ka chhungah chuan puan a lo inhnawh a, Ramzauva chuan a phawrh sak a. A thaw vak vak a, "Zam..nilo, i tha leh mai ang..." ka ti a, ka mangang takzet. A kut phuarna te chu kan phelh sak a, mahse a tawng hleithei tlat lo. "Zamzam..enge..enge i chungah thleng?" tiin Ramzauva pawh chuan a zawt ve a.

A pum a dawm vawng vawng a, kan han ensak chiah chu apum chu a lo thi nasa ngang mai. Vihna hnuhma pathum lai a lo awm a, tihngaihna avan vang tak em. Zamzami chuan ka kutah nghet takin a vuan a, ka mitah tak chuan min en a. Thei leh theilo hian, "Sangte...in...inchungah...inchungah..." tiin a thaw muang tial tial a.

"Enge? Enge inchungah awm?" tiin ka lo zawt vat a. "In,,inchungah...bawm..bawm pakhat..." tih chiah a sawi thei, min vawnna chu a thlah a. Muangchangin a maimitchhing a, a thi ta der mai. "Nilo, nilo..Zamzam...nilo." tiin ka tap a, ka tap ring ngam silo. "Lo kal rawh...inchungah chuan han kal chhin teh ang..hei...dawhkana hi chemte pawh a awm ania, hawh teh, kal vat ang." tiin Ramzauva chuan min pawt tho vat a.

Mahse Zamzami chu ka kalsan hreh ngawih ngawih, "Nilo..Zam...nilo." tiin a biangah te chuan ka chul a, "Hey...Sangte, i tap ri a hria ange...lo kal vat rawh." tiin min pawt lui a, hreh tak chung chuang Zamzami chu kan kalsan a ngai ta. Inchung lam pan chuan min kai chho va, chemte hum ran chung chuan, "Hlau suh..i bulah ka awm hi.." tiin min hnem hram hram a.

****************

Room pakhat chiah a lo awm a, chu room chhungah chuan engthil emaw tak chu a awm chiang ngei ang le. Ramzauva chuan hawn a han tum a, mahse chhunglam atangin a inkalh tlat. "Pu Ramzau, haw mai ang." ka ti dek dek chu room kawngka chu a chhui siah mai a, a inhawng chiang kher mai.

Room a inhawng chiah chu a thang huam mai a, a rimchhe takzet. Maimawm ril a lo inzam nuai bawk a, sazu thi uih rim a nam rum rum bawk. Ka hnar ka hup a, ka luak lek lek. Chutah kan hma zawn takah chuan bawm lian tak mai hi a lo awm a, Zamzami khan a thih hma khan bawm tih kha a lam ri tak e.

Tukverh zawnah tak chuan a awm a, thla eng chuan a rawn chhun bawk nen, lang chiang tak a ni. Muangchang chuan chu bawm chu kan pan hnai a, chutah le, bawm chu a rawn che ta dut dut mai. Ka hlau lutuk chu Ramzauva hnungah chuan ka biru nghal a, Ramzauva pawh a ding chat mai.

Mahse kan panhnai zel a, bawm chu a lo inkalh a, mahse tala a inkalh a ni lo hlauh. "Kan hawng dawn em?" tiin Ramzauva chu ka zawt a, mahse min chhang lo. "Tah hian lo ding rawh.." tiin bawm chu ava pan hnai a. Rang takin a hawng a, a rawn tawlh hnung leh nghal vat a, chemte chuan a tin nghal a.

Chutah bawm chu a rawn tlu rup a, a chhung atang chuan mipa pakhat hi thi hnuang hian a rawn tlu bawk thlawp mai. A thaw hlawi hlawi a, min rawn en dun a. "Nilo..he..helai hmun hi kan chhuahsan vat a ngai." a rawn ti a, a kut leh ke chu phuar beh a ni bawk. A ngaihna kan hrelo dun hle mai, "Tunge i nih?" tiin Ramzauva chuan chemte chuan a tin a.

Chupa chuan thawk hluam hluam pah hian, "JEF..JEFFREY-A ka ni...Jeffrey-a.." tiin a tap lek lek lehnghal a.....

***************

"Jeffrey? Jeffrey-a chu nang hi maw?" ka ti hu mai a, mahse a thaw a chham nge mawni, min chhang hleithei lo. "Nangmah hi tiraw Zamzami'n Jeffrey-a a tih chu?" tiin Ramzauva pawh chuan a lo zawt ve a. Chuveleh phawk hru hian a rawn meng a, "Zam...Zamzami a? Ala dam amaw? Khawnge a awm?" a ti nghal vak vak mai a.

"Jeffrey, nang hian Victor-a hi i pui a ni tiraw? Kan lemziak thiam Dawnga pawh kha nangma thah hi a ni tiraw?" Ramzauva chuan a han ti leh a. Jeffrey-a chuan a chil a lem dawk a, "Nilo...tumah ka that lo. Kum 2 chhung, kum 2 chhung teh meuh Victor-a hian min kidnap a ni. He bawm chhungah hian nitin min khung ziah bawk a, a duh ang zela thil a kallo a nih chuan min sawisa a, ti tura min tih ang zel ka ti thin." tiin a tap deuh pur mai.

"Jeffrey, nihleh Dawnga a thih ni a Ramzauva call lo chhangtu kha nangmah i nih thu Zamzami'n asawi si a, enge awmzia?" tiin ka han zawt ve leh a. "Min tih tir a ni...chemte in min tin reng a, min sawi luih tir a ni." tiin athaw hluam hluam mai. "Kal ang u, helai hmun atang hian chhuak vat teh ang u." tiin Ramzauva chuan a kai tho a, inhnuai lamah kan chhuk ta a.

A thim em em mai bawk si a, kan torch light ken lah chu a thim ang zuk zuk lehnghal a. Inhnuai kan thleng chiah chu choka light a rawn eng thut mai a, chiang lutuk tak mai chuan Zamzami ruang chu a lo lang ta. Chuveleh ring mangkheng hian Jeffrey-a chu a au vak a, "Nilo..Zamzam..nilo." tiin thei leh theilo hian ava tlan phei a, kan dang hman ngang lo a ni.

Ruang chu ava kuah a, "Zamzam...harh rawh..heta hi ka awm, Jeffrey-a ka nih hi...khawngaihin harh hram teh." tiin a tap ta hawm hawm mai a. Chutah le, bang kil thim zing atang chuan Hmaikawr-a ngei mai chu a rawn pen chhuak ta a, ka hlau lutuk chu Ramzauva hnungah ka biru nghal.

Jeffrey-a te lam chu ava pan a, chem hriam hmel zet mai hi a la hum run lenghal. Jeffrey-a chuan rum zet hian Hmaikawra chu a melh a, "Enge a tulna? Mawh? Tinge ani lehzel hi i thah a? Engvang nge? Mawh min hrilh rawh? Kei hi i duh hun huna i sawisak turin min kawl tawh a, kum 2 chhung lai min sawisa tawh a, tinge ani hi i thah ve kher a? Mawwwhh?" tiin a vin vak vak mai.

Hmaikawra chuan Jeffrey-a chu a en reng a, mahse keini erawh min hmulo thung. Jeffrey-a bawk chuan, "Victor, ka ngaidam ngai lovang che...zanin hian ka thi a nih loh pawhin ka that tal ang che.." tiin ava pan phei ta mai a, Hmaikawr-a chu a va bawh thlu tawp mai. Hmaikawr-a pawh chu a lo inring lo deuh nge ni, a chem thauh meuh chuan a lo thal ve tawp mai.

Jeffrey-a chuan a theih patawp chuan a hmaiah chuan a hnek vak vak mai a, mahse awlsam te hian Hmaikawra chuan a leh thal nghal a. Ramzauva chuan puih tumin va pan a tum a, mahse ka hlauh em avang chuan a kawr hnungah chuan ka pawt tlat a. "I mawl em ni? Saw..a that mai dawn asin." tiin min hau a.

"Nilo, min kalsan suh...a that ve mai ang che." ka lo ti ringawt, ka thlan fimin min bual huh vek tawh. Thinrim deuh tak hian, "Anih chuan ti sawn a that lai kan en mai mai dawn em ni?" tiin min vin leh deuh hrep a. Hmaikawra chuan Jeffrey-a chu a hnek siah siah a, a theh thal thuai thuai a, a sawisa hneh khawp mai.

"Tlan chhuak vat ang, police dang va pun vat ang." ka han ti leh ringawt a, a ngaihdan anih loh hmel kher mai. "Jeffrey-a sawn puih a mamawh a, ka kalsan thei lo." tih pah chuan min namsawn vak a, ka tlu tawp nghe nghe. A chemte chu hum tha sauh sauhvin, "ZAwnga...thlah rawh." tih pah chuan Hmaikawra chu va vih a tum a, mahse Hmaikawra chuan a lo hmu hman.

A lo awm sawn deuh a, a dar hnung lamah chuan ava vit tlum thawih mai a, a rak deuh thawt mai. Na em em hian Ramzauva chu a hnek siah mai a, a thal tawp mai. A dara chemte bur vu mai chu a han phawi a, a rum deuh that ringawt. Chutah RAmzauva let reng chu vih a tum a, mahse a theihtawp chuan a lo indang hman a.

Jeffrey-a pawh chu lo tho lehin Hmaikawra chu hnunglam atangin a rawn rek a, mahse a rek rei lo kher mai. Hmaikawra chu a tho thut a, Jeffrey-a chu a pua hi a ni ringawt. A banah chuan a hmer sak vak a, chhuat vuak nan a hmang ta siah mai le. Rang takin Ramzauva a rawn tho a, Jeffrey-a chu a kai tho nghal a.

Hmaikawra chuan chemte chu ala keng ran mai a, Jeffrey-a leh Ramzauva te erawhin hmanrua engmah an nei ve ta lo. An insual leh ta buan buan mai a, Chutah Ramzauva keah chuan a vit ta, ana ti lutuk chu a rum vawng vawng mai a. Jeffrey-a chu a khai kang lawp a, silhmun bula wash basin lamah chuan a va vawm phei a, wash basin te chu Jeffrey-a chuan a delh chhe ta rum rum mai.

Jeffrey-a chu tho leh tur a awm tawh lo, a let reng ringawt mai. Ramzauva chu a tham tho leh a, bangah chuan a rek bet a, ke khai meuhvin a rek kang ta mai a. Mangang tak chuan ka lo thlir reng ringawt a, ka va chhan ngam bawk silo. Ramzauva hmai chu a dang vek tawh, a thi mai dawna ka hriat avang chuan va chhan ngei a ngaiin ka hre ta a.

Thih leh thih tiin hlau chung chung chuan ka va phei ve ta a, vanneihthlak takin ahmaa Hmaikawra chem thlauh chu ka hmu fuh ta hlauh mai. Ka chhar vat a, ka va tlan phei a, Hmaikawra chu a hnunglam atang chuan ka han vit ta siah mai a, ka tlansawn leh nghal vat. A eu zawk a, Ramzauva pawh chu a thlah ve nghal.

Ramzauva chuan a hrawk dawmin a khuh vak vak a, thinrim hmel tak hian a rawn ding chhuak a. "ZAwnga, thi rawh..thi mawlh rawh.." tih pah chuan a hnek siah siah mai a. Hmaikawra pawh chu a thingthi hnawk a, a mitmeng sen rum mai chuan ka lam rawn hawiin rum em em hian min rawn melh a.

A kut rawn phar chhuak in min rawn kawk a, chhuatah chuan a bawk thlawp mai. Ka thaw ta huai mai, Jeffrey-a chu ka va buaipui vat a. "Jeffrey, i tha em?" tiin ka sawi vak vak a. Vanneihthlak takin a lo la thi lo hlauh mai, "KArei...ana lutuk.." tiin a lu a dawm vawng vawng mai a.

"Sangte, chhuak vat teh ang u. Phone tuman kan nei bawk silo, police dang ho phone vat angai ania." Ramzauva chuan a rawn ti a. Jeffrey-a chu ka kai tho a, mahse a tho hleithei tlat lo. Chutia kan inbuaipui lai chuan Ramzauva chu a rawn t(r)e leh ta thut mai, ka va hawi phei nghal vat a. Hmaikawra chu a lo la thi reng reng lo, Ramzauva chu a hma ang bawkin bangah chuan a lo rek bet leh a.

A kut khing khat chuan a rek bet a, lehlam chuan a hnunga ka vihna chem lian tak mai chu a phawi zal zal mai a, thisen a far zawih zawih mai. KA rap lutuk leh tihngaihna hrelo chu ka au vak vak ringawt a, chutah RAmzauva chu a vit ta siah siah mai. "Nilo..ti suh...ti suh.." ka ti a, mahse Hmaikawra chuan a ngaipawimawh lo, a nui vak vak lehnghal.

VAwi thum vel a vih hnu chuan a thlah a, Ramzauva chu a tlu bawk thlawp mai. Chutah kan lam a rawn hawi a, min rawn pan dawn ta mai. MAhse a keah chuan Ramzauva chuan a lo man a, "Sangte, tlanchhe ru..hmanhmawh ru.." tiin a rawn au tawk tawk a. Jeffrey-a chuan min pawt a, "Thiannu, tlan ang..tlan vat ang." tiin min chhuahpui a tum a.

Mahse a tir atanga min pui ngar ngar tu, min chhanhimtu leh ka tana inpe em em Inspector Ramzauva chu ka kalsan thei mawlh lo a ni. Hmaikawra lah chuan Ramzauva hnungah chuan a tum hian a tum nghek nghek mai a, a ka atang chuan thisen a lo chhuak bawk a. Mahse thei leh thei lo hian, "Tlan rawh u...Sangte, min ngaihtuah suh.." tiin min la rawn au hram hram a.

"Kal ang, kal vat ang.." tiin Jeffrey-a chuan min pawt a, mahse ka thei ngang lo a ni. NAsa takin ka tap a, "Ramzau...nilo..a ni theilo..hey, chhuah rawh..khawih tawh suh.." tiin ka rak chiam chiam a, Jeffrey-a chuan min pu lawp a, kawngka lamah chuan min tlanpui ta a. Kawngka lah chu pawn lamah a lo inkalh leh daih tawh, kan hawng thei ta reng reng lo mai.

Hmaikawra chuan Ramzauva chu a sat ri chawk chawk tih chu ka hre thei, mahse let leh chi a ni tawh silo. "Hrep taka..inhawng vat rawh.." tiin Jeffrey-a chuan kawngkhar chu a chum vak vak a, a tlawh bawk a. Kawngkhar bula dawhkanah chuan mobile phone a lo awm a, ka la nghal vat. Ka han enchiang chu ka alo ni reng mai, ka ak nghal vat a.

A tawp atawpah chuan Jeffrey-a chuan a chhuih hawng ta, rang lutuk tak mai chuan kan tlan chhuak nghal a, kalkawng pawh hre mumal lo chuan a hla thei ang berah kan tlan ta nghal vang vang a. Hnunglam ka hawi kir eih lo, Jeffrey-a nen chuan inkaiin kan tlan dun char char a, hah pawh a sawi theih loh, kan chawl eih lo bawk.

**********************

Kilometre chanve dawn lai chu hawi kir miah lovin kan tlan ang tih theih tur a ni, a tawpah chuan kan hah ve ta ngang aniang, kan bawk dun deuh thlawp mai a. Jeffrey-a chuan hnunglam a hawi a, "Min rawn umzui lo aniang, chawl lawk teh ang." tiin a thaw hluam hluam a. Kawngpuiah chuan thuin ka tap hawm hawm mai a, Zamzami leh Ramzauva chu keimah vangin a thi ta der mai ni hian ka hria a, ka na takzet.

Jeffrey-a chuan min rawn thut hnaih a, "Engtin nge Victora hi in hriat reng reng a?" tiin min zawt a. Ka mittui hruk pah chuan, "Khawlaia a tual that lai ka hmu a, mahse ka biru a, min hmulo angah ka ngai mai a, ani pawhin min rawn pan lem lo. Chuta tang chuan kan vengah hian mitthi an awm ta zeuh zeuh a, tichuan he tualthattu nunrawng tak hian min umzui ta zel a ni." ka ti a, ka sawithui peih lo zawk hial.

"Tenawm lutuk...zawnga chuh...ZAmzami min thahsak bawk a, kum 2 chhung tehmeuh min khung bo bawk..mi hlauhawm tak a ni." Jeffrey-a chuan a ti nuah nuah a. "Jeffrey, enge thil awmzia? Ka mangang takzet ani..enge kan tih tak ang?" tiin ka han tap leh a, tah mai loh chu tih tur ka hre ngang lo ani.

"ZAmzami khan Victora kan tawn dan hi a hrilh che u em?" tiin min han zawt a. "AW..ramhnuaiah intihlim turin in kal a, tichuan a mal te te in i thiante chu a that a, chuan a tawpah a thi amaw in ti a, mahse nangmah a kidnap leh che..chu thleng chu ka hria." tiin ka lo chhang a.

Jeffrey-a chu a thaw hak a, "Ni e...khatia Ambulance hmanga min phurh bo hnu khan nikhua ka hre ta lova, ka harh leh chuan hemi inah hian ka lo awm leh daih tawh. A chang leh nurse te an rawn kal a, ka hliam te chu a enkawl dam a. Min chhuah turin ka ti thin a, mahse ka thusawi a ngai pawimawh ngai lo. Ka dam tha ta maw tih ah min phuar bet a, min sawisa vak vak zel a, ka taksa a chauh hnuah min enkawl leh ang lawi bawk si a. A awmzia ka hrelo, chuan vawikhat chu..hmanni deuh lawk kha ani nghe nghe, ka aw(voice) record a duh thu a sawi a, tichuan sawi tura min tih chu ka sawi ta a, tichuan he inah hian min khung leh a, a chhuak leh a, khaw eng ka hmu ngailo, sawilai room thim tak bak saw chu ka chhuak ngai lo." a ti a.

"Anih chuan Dawnga phone atanga i aw kan lo hriat pawh kha record chawp, a play leh mai mai tihna animaw?" ka lo ti vat a. "Aniang, ka hre biklo...Zamzami hi engtin nge in hmuh a? Engtin nge in intawn theih? Engtin nge in awmho theih?" tiin min zawt veleh a, "Thawnthu thui tak ani...Estheri nu in min hrilh a..Estheri pawh chu nikum hmasa a inthian ho zinga mi tho, Zorama bialnu hlui kha a nia." tiin ka chhang a.

"Zorama a? Ehee..Zorama hi a that ve em le?" a ti ta hu mai. "Aw...a ruang an chhar thu chu ka hria.." ka lo ti a. A lu a dawm vawng vawng a....avan pawi tak em...hawh teh...mi in ah..tute emaw ber inah lut tawp ila, tanpuina dil teh ang." a ti a. Kan tho chhuak a, kan han hawikual a, kan awmna lai chu kawngpui mah nise a fal in a reh em em mai bawk si, in hmuh tur pakhat mah a awm lo.

"Kalkawng i hria ami?" ka han ti ngawt a. "Hre lo..kan veng a nilo..a veng neitu zawk i nia, i hria ang chu.." min ti let hlur mai a. "Ka hre biklo, kan veng a ni pawn ka hrelo." ka lo ti a. Ka hrechhuak thut, ka phone chu ka phawrh a, miss call 100 chuang alo awm. Ka han en a, ka nu leh pa number te, ka nau Mama number te leh ka pasal hual Msa number atang te in min lo call nasa mai hi a lo ni a.

"Awii ka duh theilo.." ka ti chhuak hlawl a, ka hmui ka hup nghal. "Enge? Engthil nge ni leh ta?" tiin Jeffrey-a chu aphawk nghal hru mai. "Ka nu leh pate...in kha kalh lovin ka kalsan ringawt...hei..minlo call nasa lutuk." ka ti a, ka tap lehnghal titih der mai. "Call back vat rawh..tute emaw ber kha." a lo ti nghal a.

"Ka thiante zawng zawng ka call a, mahse an muttui hle nge mawni, tuman an la thei lo. Ka nu leh pate ka call a, a ring quit thak thak bawk a, Msa ka call a, a ring quit thak bawk. Police Station lam ka call leh a, ala tlang theilo zui. Signal lah chu a chhe em em mai bawk a, ka mangang takzet.

"Tu emaw tal chu call teh...ti hi chuan min rawn zawng hmu leh vat mai ang." Jeffrey-a chuan a lo ti chhen lehnghal, ka thlan a tla leh ta buah buah mai. Ka contact te chu ka han check thla a, Thanmawia tih chu ka hmu fuh hlauh mai. Ka ngaihtuah vang vang a, nimin tlai a waiting shed-a min rawn betu, ka number min diltu, tlanval hmeltha zet kha a ni tih ka hrechhuak thut.

Beiseina sang tak nen chuan ka han call leh a, a ring ta hlauh mai. Mahse mak tak maiin kan bul hnaiah chuan phone call ri kan hre ta tlat mai, Jeffrey-a nen chuan kan in en hu ringawt mai a. Kan hnunglam atanga rawn ri chhuak ngei a ni tih kan hria, kan va hawi phei chiah chu kan hnungah chuan Hmaikawra chu phone kengin a lo ding run mai.

Kan hlau lutuk chu tlanchhiat nachang pawh kan hrelo hial zawk, mak ti tak chuan kan ding reng ringawt mai a. Chutah le, a hmaikawr chu a phelh ta. Ka meng phawk vak a, mak ka ti takzet. Chu tualthattu, min zui ru rengtu leh ka thianpa Inspector Ramzauva leh Zamzami te thattu ngei mai, Hmaikawra chu Thanmawia, hmaichhan ngeia ka lo kawm kha a lo ni reng amaw?

"Nang...nang hi?" ka ti thei tawk. A nui suk a, "Tinge? I hmuh hnu ka ang em ni?" tiin minla melh run zui. Thanmawia hmel chiah chiah a ni, an danglamna chu an mit rawng chauh a ni. Thanmawia kha chu a mit kha a pawl deuh ram a, mahse hepa hi chu a sen hian a sen rum mai. Thim hle mahse thla eng hnuaiah khan chiang takin ka hmu thei a ni, Jeffrey-a pawh a ding ngawi reng.

"Thanmawi..nangmah maw?" ka han ti leh a, a la nui vak vak zui. "Ka hmingpum ka hrilh theihnghilh che alawm mawle...Victor Lalthanmawia a ni..kei hi tualthattu chu ka ni." a ti ta mai a. Jeffrey-a chuan min rawn kai a, "Tlan ang." tih leh min tlanpui a rual nghal a. Mahse rei pawh kan tlan lo, a chem ken lai chuan min rawn vawm a.

Jeffrey-a chu a eu zawk a, a bawk thlawp mai. Keipawh chu ka tlu a, Victora chuan min rawn pan hnai a. Jeffrey-a hnungah chemte bur vu mai chu a phawi a, min en vung vung a. Na em em hian min hnek siah mai a, ka hai chhawk mai. Ka hnar atangin thisen a lo chhuak tih ka hria, mahse ka mit hmuh a fiah lo tial tial a, abak engmah ka hre chhunzawm ta lo.

*******************

Ka harh leh meuh chuan kawlaiah tho chuan ka lo awm a, tui luang ri hum hum ka hre bawk. Ka kut leh ke chu phuar beh a ni a, che theilovin ka lo let reng mai. Ka hmaah chuan Victora chu a lo kal phei a, "Khua a var tep tawh....tiang hun ang chiah tho kha a ni." a ti ringawt a. Tawng chhuah ve ka han tum chu ka thei ta hauh lo, ka hmui chu nghet taka tuam a lo ni a.

Ka bulah chuan a rawn thu hniam a, "Tiang hunah chiah hian a ni Zamzami nena thutawp kan siam kha..mahse min bum a, a tlanchhuak thei hram a. MAhse nangchu i thei ve dawn hauh lo ania, i thi dawn tih inhre tawp rawh." a la ti zui. Ka hlau em em a, ka tap vak vak a, mahse a sawt der mai silo.

Chutah a let leh a, Jeffrey-a ruang chu a rawn hnuk ta mai. A rawn hnuk phei zel a, a bula khamah chuan a paih ta mai a, kham tawpah chuan lui a awm a ni ngei ang, tuia tla ri niawm tak ka hre zui bawk. Min chhuah hram tura ngen takngial pawh ka thei silo, min kal tir mai lah a tumloh hmel em em mai bawk si.

"Min ngaidam rawh Sangte, ka tih angai a ni...ka tih ngei angai a ni. Ihmaw, achang chuan mi thah hi ka duh bik lo asin, mahse ka nu leh pate thu ka awih a ngai si a ni. A hmasa berah chuan Coffee Shop bula ruang in hmuh kha, khapa pawh kha ka thah a ni. Chhan a awmlo, ka hmelma a nilo, mahse mikhual a ni tih ka hria a, a remchang bera tiin ka that ta mai a ni." tiin a nui suk a.

A tho a, a vei kual a. "Chuan..Estheri kha...khanu pawh kha e..ka pawi a sawi lemlo. Mahse nikum hmasa lama ka thahte zinga mi, Zorama bialnu hlui a lo ni awm a, an thianho, awmtha duhlo....ka zalenna rawn tichhetute kaih hnawih zinga mi a ni tih ka hria a, ka ngaizawng der a, tichuan ka that ta a nih kha. Engtin nge Zorama bialnu hlui a ni tih ka hriat theih i ti maithei a, haha...Jeffrey-a'n min hrilh a ni." tiin anui leh huah huah a.

Ka bulah chuan lo kal hnai lehin, "Sangte, inchunga ka thil tih te avang hian min ngaidam rawh aw...Zamzami pawh kha keima ruk chhuah ani. Mak i ti maithei, engtin nge police venhimna hnuaiah khan ngawi renga ka ruk chhuah theih? Eng dang anilo, ka nu leh paten min pui thin a ni. Thawm awm miah lovin police pathum te kha ka that a, khapawh kha ka nu leh paten min pui ani." tiin a mittui te chu a tla vel a, ka hlauhna tizual tu mai chauh a ni si.

A ding hluai a, min tung ding ve a, ka ding thei tawk a ni. Chem a phawrh a, min en vang vang a, "KA tihpalh aw.." a ti tham tiak a. Chuveleh silai a puak dur a, Victora chu a eu zawk mai. A puak nawn leh a, a eu leh zawk a. Hnunglam a va hawi a, mahse tunge silai hmet puaktu erawh ka hre ve thei lo, min hliah tlat vang a ni.

Chutah a rawn kal phei chhut chhut a, "Ala tawp lo ania Sangte, ala intan dawn chauh....ka thiltih avang te khan ka tihpalh takzet a ni..min ngaidam tiraw..in vaiin min ngaidam tiraw..." tiin a nui suk a, khamah chuan a tla ta a, tuia tla ri burh chu ka hre zui bawk. Hmalam ka va hawi chu Police 10 rual vel hi an lo awm a, min rawn buaipui nghal vat a.

Ka nu leh pate ka hmu bawk a, Msa ka hmu bawk. Ka lawm lutuk leh la hlauthawng bawk si chu ka tap vak vak a, ka hmui tuamna te chu an phelh a. Ka nu chuan min kuah a, "Bawihte, Mamte...min va ti hlauthawng hman ve." tiin a tap ve bawk a, ka pa pawh chuti bawk. Msa chuan min rawn kuah a, "Tap suh duhtak, a tawp tawh e, a tawp vek tawh e." tiin ka samah chuan a chul a.

****************

THLA KHAT HNUAH CHUAN....

Msa nen chuan kan innei ta ngei a, kan hlim dun kher mai. Khang hun zawng zawng te kha theihnghilh a har takzet, zan tamtak min ti mu theilo tu an la ni. Tun thleng pawh hian ka la hrechhuak thin a, chempui nena ka mut chang pawh a la awm fo mai. MAhse ka pasal Msa hian min hnem hram hram thin a, pasal tha tak a ni.

Ramzauva, Zamzami leh Jeffrey-a te pawh ka theihnghilh lo, ka theihnghilh ngai heklo bawk ang. An thlanah chuan kartin deuhthaw ka kal ziah a, abikin Ramzauva phei chu min puitu a nih avangin ka ngai thin hle mai. Mahse tunah chuan min tibuaitu ber Victora a thi tawh a, ka pasal Msa ka bulah a awm reng bawk a, ka hlim tawh takzet a ni.

(THE END)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)