A HANDSOME CREATURE - 4 : THE TWISTED WIFE

Hlauhawm lampang hrim hrim hmun hrang hrang a mi lakkhawm...
Aaron Dustin
Posts: 214
Joined: March 14th, 2018, 10:15 am

A HANDSOME CREATURE - 4 : THE TWISTED WIFE

Unread post by Aaron Dustin » March 27th, 2021, 1:40 pm

A HANDSOME CREATURE : AND THE TWISTED WIFE

VOL - IV

Written by : Aaron Malsawmdawngzuala

WARNING : 18+

****************

(HE THAWNTHU HI HMAIKAWRA PART-3 TAWP HNU, KUM 5 A LIAM LEH HNUA THIL THLENG A NI.)

College exam chawlh lai a ni bawk nen, bialnu hmu zo ve bawk silo chu tih tur a vang duh thin hle mai. Zing han tho ila, ka hman nghal hi a ni tawp mai. Thenzawl atanga zirna avanga Aizawla awm mek ka ni a, ka hming chu Zothanzuala a ni. Mi in luahin ka nau nen chiah kan khawsa a, mikhual ka nih vang pawh ani mahna, ka awmna vengah hian thian han tih tur leh hmelhriat vak pawh ka nei lem lo.

Kum 2 lai chu ka awm ve tawh a, kan inluah nei tute leh ka college thiante bak chu kan ina rawn leng lut hi an awm ngai meuh lo. Chubakah thian siam thiam lutuk ka nilo aniang nge, vengchhung mi han nel vak pawh ka nei lem lo. Ka classmate te erawh class khata awm kan ni bawk a, ka kawmngeih ve hle thung.

Ka classmate te tihloh chu thiandang ka kawm ngai lova, kan thenawm te tak ngial pawh an hming ka hrelo, tiang vel chu ka ni. Ka thian neih ve chhun te lah hi kan veng mi tumah an awm lova, veng hran vek an ni. A chang chuan kan khaw lama ka thiante leh ka chhungte pawh ka ngai thin hle, a lunglen thlak ve thin khawp mai.

Ka nau hi Sarah-i a ni a, kum 16 mi lek ani. Ka ngaihtuah thin em em a, keimah anglo takin ani erawh thian siam a thiam hle thung. KAn inluah ah te hian a thiante hi a rawn hruai lut leh teuh zel mai a, achang chuan chaw te an rawn eikhawm thin. Mahse ka ning lem lova, ka hau ngai lem lo bawk.

******************

Zan khat chu earphone nen rooma hla ka ngaihthlak mai mai lai chuan ka nau Sarah-i chu a rawn lut a, "U..saw i thiante an lo leng." a rawn ti a. "Tu ka thiante tak ni ang maw?" tia phun nuah nuah chung chuan room atang chuan ka chhuak a, ka classmate Bena leh Ruata te an lo ni reng mai.

"Ehe...ve teh hlawl che u chuan...enge in rawn tih dawn a?" ka han ti deuh luam a. Ruata chuan, "Aww...kan lo leng ve a nih hi. Iva induh ve a, i reh hmak mai bawk sia...tiraw Bena..." tiin Bena chu a han nek zeuh va. Bena pawh chuan nui chung hian, "Dik chiah mai, Whatsapp group ah lah i rawn tawng ve duh bawk silo, nizana kan thil rel vel te kha engmah i chhiar ve lo ami?" tiin min zawt ve leh a.

"Ka lo en lo reng reng, enge in rel a?" ka ti deuh hu mai a, min melhrum dun nasa kher mai. "Thingpui te min han lum ve phawt la, thingpui in pahin kan sawi dawnnia.." Bena chuan a la ti deuh ham ham zui. "Lo lut ru..ka roomah kan sawi dawnnia." tiin roomah chuan ka hruai lut a, Sarah-i chu thingpui lum turin ka tir nghal bawk a.

*****************

Room ah chuan kan thu khawm a, "Englo ania, kan class hovin picnic ang u kan tia...500 theuh thawh ila kan tia, mahse engmah i rawn sawi ve bawk silova. I tel ve ngei kan duh bawk sia, hei..kan rawn leng deuh tawp mai a nih hi." Ruata chuan a ti a. "E, alo nimaw...ka lo chhiar lo reng reng." tiin ka chhang mai a.

Bena pawh chuan, "I reh deuh hmak ringawt a, a hrim hrimin i hman ve dawn em?" tiin min han zawt ve leh a. "Ka chak a, mahse ka theih ka ringlo." ka han ti chiah chu an ner dun nasa kher mai. "Timaw? I mak thei e...kal theilo tur an tam si. Nang tal chu hman tum teh, chhungte dil i ngai ve bawk silo, tihtur engmah i neilo..i hman..i hman.." tiin Bena chuan min vin deuh hrep a.

"Ka chak ve reng alawm, mahse min hrethiam teh u. KA nau hi kum 16 chauh ala ni bawk sia, amaha ina kalsan tawp chu ka ngam lo." tiin ka chhang a, "Hruai ve mai la....hmeichhe dang an rawn kal ve dawn tho alawm." tiin min sawm leh tlat a. "Aaa..a chiloh. Ala naupang si..nidangah nimai rawh se." tiin ka han hnial leh a.

Mahse min la sawm lui ngar ngar a, "Duhleh pawisa pawh kan thawh kep mai ang che.." te an ti thul, mahse ka la hnial lui tlat tho va. A tawp a tawpah chuan ka nau Sarah-i chuan thingpui rawn chawi luh pahin, "In thil sawi kha ka hre pha vek, Au Zual, ka kal ve duh." a rawn ti ta nge nge a.

Han phallo viau dawn ila, ka nau hian chuti lutukin min hlau lem lo. Bena lah chuan, "Pawisa pawh thawh ve angailo Sarah-i chu.." a han ti phei chu Sarah-i pawh a phur phah hle mai. Ka hnial hneh ta ngang lo, a tawp a tawpah chuan kan unaua kal ve chu ka remti ta hram a. Rei vaklo chu kan han inkawm leh a, dar 10 velah chuan an haw ve ta a.

*******************

Picnic kan neih ni hma zan chiah a ni a, group ah pawh kan phur tawh thu te, kan chak tawh zia te sawiin kan hlim tlang hle mai. KA nau Sarah-i ber pawh a phur ngang aniang, a phi cheng mai hian ka hria. Zanlai dar 12 velah chuanka zunchhuakin min ti harh a, zung tur chuan ka tho chhuak nghal a.

Kan toilet hi pawnah a awm avangin inthiar tur emaw, zung tur chuan pawna chhuah zel angai a ni. Pawnah chuan ka chhuak a, toilet ah chuan ka va zung a. Ka zung zo ka chhuak leh chiah chu kan inkawtah chuan hmeichhe pakhat hi min hnungchhawn zawng hian a lo ding a, a kut hnung ala suih deuh tlat zui.

Ka phu deuh zuk nghe nghe, "Tun ang hunah, tunge mawni le?" tiin ka hriat tham lek chuan ka phun deuh sap a. Ka nau Sarah-i ti dawn ila, an pian a in an loh mai bakah Sarah-i anilo tih chu hnunglam atang pawhin ka hre thei nghal. Chutia zanrei a kan inkawta hmeichhe pakhat lo ding ngawi ngul mai han hmuh meuh chu zeplo chuan ka hlau ve lek lek, mak ka ti hle bawk.

Ka va pan hnai a, "Tunge i nih? Enge hetah i rawn tih?" ka han ti vin deuh thak a. Muang chang hian a rawn hawi a, ka rin ai daihin a hmeltha phian mai. Ft 5'1 vel baka sang a ni lovang, mahse a hmel ka hmu chiah kha ka hlauhna zawng zawng pawh a reh vek thei hialin ka hria. Ngo lampang a ni a, a sam chu a senduk lam a ni.

Chiang tak hian ka mitah min en a, a mitmeng erawh kha chuan mi rap lek lek. A mithmul dum tluk mai pawh khan tlem chuan mi rap deuh bawk, mahse inhmeh tak a ni thung. Min chhang lo chuan min en reng a, "Tunge i nih ka tih chu?" tiin ka zawt leh a. Min han thlek deuh ngawih ngawih a, a ngaihna ka hrelo hle mai.

Chutah zawi tak si, mahse chiang em em si hian, "RAwn kal suh u...in inchhir zawk ang." a ti ringawt a. KA hrethiam lo tulh tulh mai, "Engmaw i sawi a? Enge awmzia?" tiin ka zawt a. A ngai ang bawkin, "Rawn kal suh u...anih loh chuan.." a han ti leh a, mahse a sawi zawm tawh lo, a ngawi ta daih mai.

"Enge awmzia? Khawi hmunah maw? Tunge i nih?" tiin ka zawt leh a, thin a ti rim deuh lek lek tawh zawk. Chutah a nui sen sen a, zeplo chuan a nui hmel kha a mawi takzet. Zawi te te hian a nui ri deuh har har a, "Ka ti mai mai a nih kha....in ngam phawt chuan rawn kal rawh u." tiin min kalsan ta daih mai.

Ka ngaih chu a tha chiah lo, ka enzui vawng vawng ringawt. Inchhunga lut mai lo chuan rei deuh fe chu ka ding ngawi reng a, mak ka ti kher mai. Mahse ka han ngaihtuah leh deuh hnu chuan Youtube vela dah turin miin min prank a nih ka ring vel ta mai mai a, ngaih tha vak lo hle mahse inchhungah chuan ka lut ta a.

********************

A tukah chuan picnic tur chuan kan inhmukhawm ta a, an phur tlang hle mai. Kan class hi kan vaiin 20 chiah kan ni a, kan tam lem lo. Han insawi ve leh mai mai ila, MA English zirlai mek niin kum 24 mi ka ni. Sawi tawh ang khan kan class hi mi 20 kan ni a, mahse keimah chhiar tel chuan picnic naa kal thei tur chu mi 7 chiah kan ni a, ka nau Sarah-i nen kan vaiin 8 kan ni tihna a nih chu.

Kan class CR Matthew-a, Jason-a, Bena, Ruata, RAchael-i, Hmingi leh kan unau, chuzawng chu kan ni. "Kal kan va tlem leh lawi si ve.." ka han ti a, "Nia, chuvang reng chuan alawm lo kal ve rawh kan tih.." tiin Bena chuan min chhang a. Matthew-a pawh chuan, "Thenkhat damlo an awm a, a tam zawk chu an kahw lamah an lo haw hman a." a lo ti ve bawk a.

Diktak chuan keipawh hi exam chawlh lai a ni bawk nen, mahni khaw lama haw chu ka chak ve reng. MAhse ka nau SArah-i school kal lai mek a nih vang chauh va la awm ka ni a, picnic naa a lo kal ve theih nachhan pawh kan picnic tum ni hi inrinni a nih vang a ni. Keimah anglo takin lehkha a thiam thei a, pakhatna a ni deuh ziah bawk. Chuvang chuan in exam dawn hnai mahse, a lo kal ve chu ka remti ta mai chauh a ni.

Zan hmasa lama ka thil tawn chu BEna ka hrilh a, a lo la thutak vaklo lehnghal. Zingkar atanga rui a lo ni bawk nen, "I lo pawngsual hrep lo a nih chu..." te a ti vel mai mai a. Keipawh chuan ngaihtuah tawh loh ka duh takzet, mi anglo emaw, sawi tak ang khan prank vel mai mai a nih ka la ring lui fan a.

Mahse mi anglo ni dawn se, khatiang em em a nula hmeltha leh duhawm, rapawm lek lek tho bawk si kha mi anglo emaw, rilru kimlo a ni thei hian ka ring bawk si lo. Chubakah prank pawh lo ni tehreng se, prank a nih thu pawh min hrilh lova khatia ka kal bo leh hmak kha chu a mak ve hrim hrim.

****************

Ka thianpa Bena hi chhungkaw khawsa ve thei tak atanga seilian a ni a, ama pualin kum 22 mi lek si hi scorpio dum, lian tha tak leh nalh tak mai a chhungten an leisak a. Chutah chuan kan vaiin, kan pariat chuan kan leng vek bawk. Kan tlan lai chuan BEna bulah chuan, "Khawi picnic spot ah nge ni reng reng a?" tiin ka han zawt a.

A nui suk a, "Picnic spot te zawng, a boring tawh emai. Luiah zawk kan picnic dawn, keipawh ka la kal bik lo." tiin min chhang ta mai a. "Luiah a? Inthiarna vel pawh a awm dawnlo tihna mi?" tiin ka zawt nghal vat a. "Awm ang...awm ang, lungngai suh." a ti leh mai a. "Nihleh engtin nge a awmna hmun i hriat?" tiin ka zawt leh a.

"Ka sawi peihlo, nakinah ka hrlh ang che u. Tuna ka sawi chuan in hlau palh ang, in dawih ve hlawm ropui si." ala ti zui. "Hey, Lalben....kan kalna tur hi ahma pawh khan i sawi chiang tha duh miah lova. A hrang tihna em ni?" RAchel-i chuan seat hnung lam atang chuan a rawn zawt ve bawk a.

"Ka sawi peihlo, in dawih emai. Engmah a hrang lo, a nawm dawn zia chu.." a ti leh ringawt a, engmah kan zawt chhunzawm tawh lem lo. Tichuan kan tlan zel a, a thui em em mai lehnghal. Bena thil sawi vang a ni em chu ka hrelova, mahse a hma zan lama ka nula hmuh khan ka rilru ala luah reng mai, a hmelthat reuh em avangin ka vei zui pawh a ni ta ve ang.

*****************

DArkar dawn kan tlan hnu chuan kan thleng ve ta a, a hla ngat ngat hle mai. Sarah-i phei chuan motor a rui lek lek a, minute 5 vel dawn lai chu kan han inbuaipui leh phawt a. "Luia kal te chu a....picnic pawh a ni hleinem..Bena hi awww...sawi chiang duh bawk silo." tiin Jason-a pawh chu a phun nuah nuah a.

Rachael-i pawh chuan, "Ni ngawt mai, keipawh picnic spot ah emaw kan kal dawn ka lo ti ve char char a." a lo ti ve bul bul bawk a. "A hrim hrimin a hmingin class CR te ka ni ve a, keimah tal te chu min hrilh ve tur alawm." fiamthu ti tak deuh chuan Matthew-a pawh chu a rawn tawngchhuak ve a.

"500 theuh kan thawh ve a, khangte kha eng atan nge kan hman dawn? Picnic spot book nan leh chaw ei nghalna tur angin i sawi ve a, luiah kan kal leh daih dawn bawk sia. Engtin nge rawng kan bawl anga, sawi chiang teh." tiin Hmingi pawh chu a lo vin ve deuh hlur bawk a. Ngaihsam hmel zet hian Bena chuan, "Lungngai suh u ka tih kha, ka surprise ve chak che u alawm. Ruata nen hian engkim kan buaipui fel vek tawh, phun phun teh suh u." ala ti ham ham zui.

Ruata chuan kawng sira step chhukthlakna chu a kawk a, "Helai atang hian kaltur, abak chu motor a lut thei lo. Kea kal angai a, bugrua te kha pu thla ila. A nuam dawn tehmai ania, kal vat ang u." tih pah chuan a chhuk nghal a. Midang ho chu kan in melh deuh zeuh zeuh hlawm a, engmah sawi chhunzawm lemlo chuan kan mamawh tur te chu kan la a, kan inzui thla ve ta hnak hnak hlawm a.

*******************

Minute 20 aia rei chu kan kal ang ka ring, a tawp atawp ah chuan lui chu kan thleng ve ta. Lui bul lawkah chuan in lian lemlo tak, an sakna la rei em em lo tih hriat ve tak mai chu a lo ding ruah mai. Midangin chu in chu hmu ve se in pakhat ve mai angin an hmu maithei, ka hmuh ang hian an hmu ve kherlo maithei.

Mahse chu in chuan engemaw zawng tak chuan mi rap riau mai a, a awmna lai ve pawh chu a thim deuh ruih hian ka hria. "Saw saw inluah lai em ni?" tiin Bena chu ka zawt a. "Luah lai tih ah, saw saw kan rawngbawlna tur te, kan chaw eina tur te a nih saw...vawiin chu saw saw kan spot a ni dawn." tiin min chhang a.

"In chhungte tihna ami? Mi khawsa an awm nge...ka van hrethiamlo." tiin midang ho pawh chuan an zawt nghal sap sap hlawm a, Bena chu a nui leh deuh suk ringawt. "Lut phawt ang." tiin Ruata chuan hma a han hruai leh a, kan zui leh ta dam dam hlawm a. Inchhung chu kan lut a, a zau lutuk lemlo.

Choka a awm a, sitting room a awm ve bawk a. Fridge te, wash basin te, thleng te leh note chu a awmna tur diktak ah chuan alo inrem kim ve biai mai. "BEn, hei hi tute in nge?" tiin Hmingi chuan a zawt ve leh a, "VAwiin atan chuan kan in a ni hrih." tih ringawt chuan a lo chhang leh a. Chutah room pakhat atang chuan pa pakhat, kum 30-35 bawr vel niawm tak, hmel fai veng mai hi a rawn chhuak thut mai.

"Ehe...Bena, inlo thleng maw?" a rawn ti a, chupa chu a sang reuh phian lehnghal. "AW hei kan lo thleng e, kan rei em?" tiin Bena chuan ava chibai a. "Rei love, in va tlem leh si ve.." tiin chupa chuan a lo zawt leh a. "Nia, hmanlo an tam lutuk a..." tih pah chuan kan lam chu a lo hawi a, "Thiante u, hei hi U Victor-a a nih hi....hemi hmun enkawltu ania." tiin min inhmelhriat tir ta a.

Ka hrethiam ta, Bena leh Ruata te hian helai hmun hi an lo book lawk anga, tichuan min hrilh lovin min surprise an tum a ni ngei ang. Victor-a chuan nui sang hian, "Nuam deuhin in hmang dawnnia, zu pawh a in theih a, engkim tih a thiang vek...hehe, mahse bungrua tichhe lo turin min fimkhur sak ula kan lawm hle ang." a han ti leh a.

RAchel-i chuan min rawn sik zeuh a, ka beng bulah chuan zawite hian, "AWiiii....a chhiatloh zia hi...upat hmel tawh hle mahse.." a rawn ti zauh pek a, a awm ve tho mai, keini thingtlang tlangval chuan Victor-a chu kan tluk pha mawlh lo a ni e. "Ka pu, nangmah chauhvin em ni enkawl a?" tiin Matthew-a chuan a han zawt veleh a.

"Nilove, ka nupui nen kan enkawl a...a inbual lawk a." tiin alo chhang a. Rachael-i chu ka en a, ka nuih suk a. "Pawi thin vee..." tiin ka fiam zui a, min melhrum kher mai. Chutah room atang bawk chuan anupui ni ngei tur, hmeichhe ngo veng mai, hmelchhe lemlo zet hi a rawn chhuak veleh a.

"Ehe, inlo thleng maw?" a rawn ti ve nghal a, Victor-a bulah chuan a rawn ding a. "Hei hi ka nupui a nia, Angel-i anih hi." tiin min inhmelhriat tir a. Victor-a nupui, Angel-i chu ka en vang vang a, hmundang ka hawi san thei ta tlat lo. A hmelthat em vang leh a duhawm em vang chu thuhran nise, ka hmuh tawh hnu a ang ka ti tlat.

Hun rei tak inngaihtuah pawh a ngai lo, Angel-i chu ka hmu hnu ni ngeiin a lang. Kha nula, a hma zana kan in bula lo ding, "Lo kal suh u.." tia min hrilh tu ngei kha a ni tlat hian ka hria. "Tikhan insil fai ula, bathroom te pawh a awm a....keini nupa erawh hnathawh lai kan nei a, pawnlamah sawn kan lo awm ange." tiin pawnah chuan an inzui chhuak a.

An chhuak chiah chu Rachael-i chuan, "AWii....a chhelo sia, a nupui kha ka thik nghal." a han ti nghal chung chung a. Bena chuan, "I lerh emai, keichu a nupui kha a chhelo ka ti." a lo ti ve nghal bawk a. Mahse kei erawh ka ngaih ala thalo, kha hmeichhe mak tak, zanreia ka hmuh kha ni ngeiin ka hre bawk si. Mahse ani lo thei tho bawk, an chezia leh an awmdan kha chu a danglam hlak tho bawk si.

Jason-a chuan min rawn nghawk zeuh a, ka phu deuh zuk mai. Nuih huah huah pah hian, "Nangpawn chhelo i ti ve animaw, i en ngawih ngawih kha ka hmu reng che alawm." a rawn ti a. "Aaa...chupawh anilo, ka hriathnu a ang em a.." tiin ka lo chhang mai a. Midang ho chu an han insil fai hlawm a, thenkhatin zu an in nghal bawk a.

Mahse kei erawh ka ngaih a tha ngang lo, Angel-i kha zana ka hmeichhe hmuh kha a ni tlata ka hriat avang chuan pawn lamah ka chhuak ta nge nge a. Victor-a te nupa chu ka zawng ta a, in hnung lamah chuan an nupa chuan an lo thu dun a. Ka va pan a, min hmuh veleh chuan an ding dun nghal vat a.

Min rawn pan phei dun a, "Thianpa, enge mamawh i nei em ni?" tiin Victor-a chuan min lo zawt vat a. Sawi hreh tak chung si chuan, "Um..aaa...ka hresual pawh ani maithei a. Ihh...U Victor, i nupui Angel-i hi nizanah kan inbulah ka hmu tlatin ka hria. Kan inbe nghe nghe bawk, i ni tiraw...thiannu?" ka han ti nghal deuh thawr a.

An in en a, an nui dun huk a. Angel-i chuan hriatthiam loh hmel tak hian, "Keimah hi maw?" a ti hu mai. "Aw..., in inang lutuk a...i ni tlatin ka hria." ka han ti leh a. "I hresual anih dawn chu, nizanah chuan kan awmdun char char alawm." tiin Victor-a chuan min lo chhang a. Angel-i pawh chuan, "Nia, thianpa..i hresual aniang." a lo tive bawk a.

Ka zak angreng hle mai, "Nia, aaa...engamah ngai suh u. Engpawh nise, Zuala ka nia...Zothanzuala.." tiin chhuanlamah an nupa chuan ka han chibai tha leh vel a, "Umm..a ho lutuk..nuam deuh khan aw.." tih pah chuan min kalsan leh a, a zahthlak duh ngei mai. Nupa inhmeh tak zawng an ni, an insan hleih tih mai loh chu.

*********************

Nuam kan ti tlang kher mai, keipawh chuan zan hmasa lama ka nula hmuh kha ka ngaihtuah chhunzawm tawh lem lo. Zu heh tak chu ka nilo nangin, hetiang hun ah te hi chuan a lem hnem pawl hi ka ni ve ziah thin. Ka rui leh pek hle mai a, woofer ah hla play in a rik hian kan ri dup dup a ni ber mai.

Luiah chuan a then an cheng a, a then inchhung lamah an awm bawk. Ka nau Sarah-i pawh rin ai daihin nuam a ti a, kan class hmeichhe pahnih, Rachael-i leh Hmingi te nen chuan an inkawmngeih phian lehnghal. Victor-a te nupa erawh khawnge an kal ka hrelo, hmuh tur an awm tawh miah lo.

Mahse ngaihthat lohna pawh ka nei lem lo, an lo awm ve reng khan a nuam lo zawk. Ka duh aiin ka lem hnem deuh aniang e, ka pum chuan min rawn pump tan ta. Intih harh nan tiin tuiah chuan ka han cheng ve leh a, mahse ka lu ahai tual tual mai. Inkawm luak ila a zia mai ang tiin tui atang chuan ka chhuak a, lui ral lehlam, mau hmun lam pan chuan ka va phei a.

"Zuala, khawnge i kal dawn?" tiin Jason-a chuan min rawn au vak a. "Ka'n tei harh mai mai ange." tiin ka kalsan a, mau hmun lam pan chuan ka lut phei ta a. Nidangah pawh ka ruih deuh leh pum lamin min rawn pump deuh tawh hi chuan ka inkawm luak mai zel a, midang ho hian ti ve thin tak maw.

******************

Mau hmunah chuan ka lut ta a, ka ruih em vang pawh aniang, ka hmu vir chuai chuai hlawm mai. Ka kal ngil hleithei thak lo lehnghal, "Tunge kawngpui sawi?" tia han au vak vak mai pawh a chakawm rum rum hial. Tichuan hla deuh tak ka kal hnuah chuan ka ding a, inkawm luah hranpa a ngai hauh lo.

Ka pum chu a rawn thip vak a, ka luak ta nghal bawrh bawrh mai. Ka harh deuh huai in ka hria, mahse ka lu erawh ala na takzet. Zu han chak em em ka nei ngai lova, in zing pawh ka ni hek lo. Mahse hetiang nikhua a ka han lem ve hian ti hian ka awm ziah thung, mahse buaipui ngai lovin keimahin ka inbuaipui leh mai zel thin.

Ka luak zo chu ka han khuh deuh kharh kharh a, ka thiante awmna lam pan chuan phei leh mai ka tum a. KA han leh hawi chiah chu ka awmna atanga ft 30 dawn vela hlaah hian hmeichhe pakhat, ngo lampang, ft 5'2 vel leka sang hi a lo ding ran mai a. Ka phu zuk nghe nghe, kal mai lo chuan keipawh chu ka ding ngawi ve reng a.

Ka han enchiang a, ka lu ala hai deuh vang pawh a ni maithei, ka hmu phe deuh ruai mai. "Tunge i nih? Hmingi? Rachel? Tuber nge i nih?" ka han ti bah deuh nuai a, mahse min chhang miah lo. Ka va kal hnai leh deuh a, ka hmu chiang ta. A hmel chu a tha teh meuh mai, mahse a mit ko vel chu a dum tluk mai a, min melhrum em em lehnghal.

Mak ka ti lutuk chu ka hnungtawlh dawr mai, a chhan chu chu hmeichhia ka hmaa ding mek chu ka hriat hnu leh ka hmuh tawh hnu ani tlat. Ni e, nizana kan in bula lo ding, "Rawn kal suh u.." tia min vau tu hmeichhia ngei kha a ni. Victor-a nupui Angel-i nen an in ang em em a, mahse an chezia erawh lei leh van ang vela danglam a ni thung.

Rum em em hian min melh khur mai a, "NAng bawk maw? TUnge i nih a? Tinge min zui reng a?" ka han ti vin deuh thak a, mahse min chhang chuang lo. Min han thlek leh deuh ngawih ngawih a, a kut hnung chu a suih tlat bawk. Engemaw kawng zawng tak chuan he nula hian mi rap tlat, a chezia hi mihring pangngai chezia a ni mawlh lo.

Chutah min rawn pan hnai a, thinrim hmel em em hian a rawn tawngchhuak ta. Khur dar dar chung chuan, "Lo kal suh u ka ti ani lawm ni? Engvangin nge in rawn kal luih a?" tiin a mitmu fiah tha tak mai chuan min melh ran mai a, min thah chak niawm tak hian min melhdan chu a nelawm fahran lo kher mai.

Han chhan mai ngaihna pawh ka hrelo, "Eng..enge awmzia? Tunge i nih ka tih chu.." ka han ti leh a, chutah a kut hnung a suih chu a phelh a. Chemte a rawn lek chhuak ta mai a nih chu, "Hey..hey...enge tih i tuma?" tiin ka tawlh hnung nghal a, ani lah chuan min rawn pan zel mai si.

"Hey, Hmeli...kal bo rawh. Ka thin i ti rim ange aw...min ranw hnaih tawh suh." tiin ka vin vak vak a, mahse min rawn pan hnai zel a. Chemte chu ka hma zawnah tak chuan a lek kang a, chutah a au ta vak mai. A rawn tlan phei a, ka tawlh hnung zel a. Lung ka rap hrual a ni ngei ang, ka tlu a, ka tukhum a ri chawrh mai.

Ka thil hmuh chu a thim deuh nghal khup a, chutah fiah lo ruaiin van lam chu ka hmu thei. Kha nula ngei mai kha a hmai zawnah chuan a rawn kun hniam a, min thlek leh ngawih ngawih a. Mahse kei erawh ka che thei lo, ka lu ana lutuk tlat. Zawi zawiin chu nula hmel chu a fiah lo tual tual a, abak chu engmah ka hre chhunzawm tawh lo.

***************

KA harh leh chiah chu khumah ka lo awm reng mai, ka thiante chuan min en thap hlawm a. "Ilo harh tawh maw, Au Zual....engtin nge hliam i tawrh theih a?" tiin Sarah-i chuan min lo be nghal a. Ka lu chu ka khawih a, a lo intuam bur mai. Ka thuchhuak a, "Khawnge ka awm?" ka ti nghal vat a.

"Aww..hetah, inchhungah kan zawn lut che." Bena chuan a lo ti vat a. "ENgtin nge ka awm a?" ka ti leh hu mai. "I reh rei lutuk a, Jason-a nen kan rawn zawng che a. Mau hmunah khan nikhaw hrelovin i lo awm a, lungah i tukhum i lo sawh a. A thi nasa lutuk a, inchhungah kan zawn phei che alawm." tiin Matthew-a chuan min lo hrilhfiah ve leh bawk a.

Ka lu chu ana ngut ngut hle mai, ka dawm vawng vawng phawt a. RAchel-i pawh chuan, "Engtin nge i insawh theih a? Enge mau hmunah khan i va tih reng reng a?" tiin min lo zawt ve bawk a. Mahse ka chhan hma chuan Victor-a te nupa chu an lo lut a, "Zuala, i lo harh tawh maw?" a rawn ti lut a.

Ka chhang lo, a chhan chu Angel-i hmel ka hmuh khan kha nula mak tak mai bawk kha ka rilru ah a lo lang leh nghal vat mai. Ka en reng a, "Zuala, ala na em?" Angel-i ber chuan ala rawn ti zui. "Aaa..ihh, ka..ka tha e." ka ti bah nuai ringawt. Angel-i chu ka en leh vang vang a, kha nula nen khan an in ang tulh tulh mai.

"I tukhum kha tlem a kak deuh a, mahse a pawi tham lovang." Angel-i bawk chuan a han tih zawm leh zat a, rilru chu a nuam tawh lo ngang mai. Sana ka en a, tlai dar 4 leh a chanve a ri tawh. "Ka van muhil rei awm em em ve.." ka han ti nuah nuah a. BEna chuan, "Nia, darkar dawn chu nikhaw hrelovin i awm alawm." tiin min lo chhang a.

Hmingi chuan, "Rawng kan bawl zo vek tawh, chaw chu a ei theih a nimai." a rawn ti lut ve bawk a. "Nia, chaw ei ila..i haw teh ang u. Hei, Zuala a inhliam bawk si. Buaina dang kan tawk leh palh ang, i ti vat vat teh ang u." Matthew-a'n a tih chuan ka thla a muang huai mai, haw vat vat ka duh tawh ber.

**********************

Chaw pawh ka ei tui lo, ka mood a fuh lo takzet. KA mitthla ah chuan kha hmeichhe mak tak hlir mai kha ka hmu a, diktaka sawi chuan Victor-a nupui Angel-i chu hmeltha hle mahse a melh pawh ka melh tha ngam tawhlo a ni ber mai. KA ringhlel deuh tho va, mahse engmah hrelo ang maiin a awm bawk si.

In an chu an in ang teh meuh mai, mahse an pian te, an hmel te leh an ngo dante pawh in ang hle mahse in anlohna tam tak an nei leh lawi bawk si. Midang erawh an la hlim dar dar khawp mai, chaw ei pah chuan an titi a, kei erawh ngawi rengin ei thung. Bena chu lo kalin, "Bro, engtin chiah nge iva insawh theih a?" tiin min rawn zawt leh a.

"Aaa...ka rui lutuk kha ka va inkawm luak a. Ka phei leh tur kha ka tawlhthlu a, ka tukhum ka sawh ta nih kha." tiin ka chhang mai a. "I va che uih thei bik tak, zak reng reng suh.." tih pah chuan min la nuih vak vak zui. "Ka kham san phawt teh ang che." tiin ka kham ta daih a.

Thudik hrilh chu ka duh a, mahse tuman min awih dawn chuang lo. Chu mai nilovin kha hmeichhia ka hmuh kha Angel-i nen an in ang em a, chuvang chuan ka sawi ta lo mai chauh a ni. Chaw ka eikham chu pawnah ka chhuak a, meizial ka zu a. Chutih lai chuan ka bulah chuan Victor-a lo kalin, "I puar maw?" a rawn ti a.

"Aw puar e, lo ei ve nghal daih ta che u."

"Aaa kan lawm e, kan ei lo mai ang."

"U Victor, hetah hian in nupa in in awm tawp tihna mi?"

"Nilove, hei hi chu midang ta ania. Kan nupa hian kan enkawl a, chowkidar ang deuh kan nih chu..haha."

"Anih chu mawle, helai hmun hi ka la hre ngai lo reng reng."

"Nia, i thiante pahnih Bena leh Ruata te saw ka hrilh a. An lo phur khawp a, tihian pawisa tlem te kan hlawh ve a...kan nupa hian kan intuak ve thin a."

"Anih chu mawle...in fel khawp mai."

Victor-a chuan min han en vang vang a, "A nuam in ti maw...kha, hliam i tuar lehnghal sia...nuam lo i lo ti bik viau ang a?" nui sang chung chuan a han ti a. "A ho lutuk, anuam ka ti mah mah zawk a nih hi." tiin ka lo nuih let a. Kan han titi deuh luam hnuah chuan hreh deuh chung chung chuan, "Ti daih ila, helai ah hian midang awm ve an awm thin em? Ka sawi awmzia chu, mi mak deuh te in hmu thin em?" tiin ka zawt ta tawp mai.

Hriatthiam loh hmel tak hian, "Mi mak deuh a? Enge awmzia?" a ti hu mai. "Ihh..entirnan, hmeichhe mak deuh..rapawm deuh.." te ka ti deuh ta nuai mai. A nui suk a, "Ramhuai i tihna mi? Nge thlahrang?". "Aaa...thil mak deuh thleng te a awm tawh em? Helai hmunah hian?" ka han ti leh a.

"KA hriat ve dan chuan helai hmun ah hian hman kum deuh...kum 10 chu ala tling lo maithei, tualthahna a thleng tawh an tia." tia min chhang chu ka phu zuk mai, "Tual thahna a?" ka ti vak a. "Ka hre ve chiah lo, thian ho intihlim turin an kal a. Mahse an vai mai chuan mi pakhatin a that vek e an tia, mahse a hnuah pawh midang tamtak an kal a, engmah a thleng ngai lo. Hei keini nupa ngei pawh kan awm ve fo va, engmah kan hre ngailo." tiin min chhang leh a.

Han chhanlet mai ngaihna pawh ka hrelo, ka hmeichhe hmuh te kha ka ngaihtuah let a, ka ngaih chu a thalo tulh tulh mai. Chutih lai chuan kawngka bul atang chuan, "Duhtak, minlo pui lawk teh." tiin Angel-i chuan a rawn au va. "Ka va kal lawk ange.." tiin Victor-a chuan min kalsan ta a.

********************

KA hrethiam ta, kan kal dawn a kan picnic na hmun tur chanchin Bena kan zawh laia, "KA sawi duhlo, in hlau palh ang." a tih kual vel nachhan kha ka hrethiam ta chiah. Helai hmunah hian tualthahna a lo thleng tawh a, chuvang chuan a ni ngei ang, Bena te ang inla pa lutuk in helai hmuna kal kher a chakna chhan chu ni.

Tin, kha hmeichhia ka hmuh kha tualthahna a thlen laia mitthi zinga mi ani ve anga, a thla a hrang a ni thei mai angem? NGe miin min tih thaih mai mai zawk, Angel-i hian min tihthaih mai mai zawk a ni thei angem? Mahse kha nula kha thlahrang pawh lo ni ta se, engtin nge chemte kha a ken theih?

Chubakah engtin nge kha hmeichhia kha nizanah kan inah daih daih ka hmuh si? Ka thiante hian min fiam emawni le? Mahse thisen chhuak hial khawpin ka awm a, fiamthu anih ka ring chiah bawk silo. Ngaihtuahna a kal thui duh hle mai, ka buaina tizualtu ber chu kha hmeichhia leh Victor-a nupui Angel-i in ang lutuk ber kha ani.

*****************

Chaw chu an eikham ve ta hlawm a, keipawh lu tuam burin ka haw dawn tihna chu ania. Ka lo kal ve kher kher chu awww...te ka han ti hnuhnawh leh a, hun nuam tak zawng ka hmang ve lo chiang a ni. In hman man leh gas hman mante, thleng leh no hman mante chu Bena chuan a pe fel a.

Victor-a te nupa chuan thui vaklo min thlah a, "In lo kal leh thin dawnnia, kan lawm lutuk e." tiin min thlah a, kan motor awmna lam pan chuan ke-in kan chho ta hnak hnak hlawm a. Kan kal thui deuh hma chuan ka han leh hawi leh hram a, Angel-i chuan min lo melh deuh hraw hian ka hria.

KA ngaihtuahna kal thui lutukin ka hmusual nge, ka ngaihbel zawk pawh ka hrelo. Ka hawilet leh chiah, Angel-i hmel ka hmuh khan engtin emawni ka awm tlat a nih chu. Kha hmeichhe rapawm zetin min melhdan ang chiah chiah kha a ni, mahse engmah ka sawi lem lo.

*********************

Sawi tawh ang khan lui awmna atanga kan motor dahna hi a thui ve angreng a, minute engemaw zat chu kal nan kan hmang ka tih tawh kha. Ka haw chak tawh lutuk chu ka kal chak kher mai, kei leh ka nau Sarah-i leh Bena te chu kan kal chak fal deuh a. REi vaklo kan chhoh leh hnu chuan motor awmna kan thleng der mai, midang erawh an thawm pawh kan la hre phak lo.

Motorah chuan kan pathum chuan midang ho chu kan nghak a, ka lu lah chu a na ngut ngut lehnghal. Ka hah bawk nen, tui ka in nghal khawlh khawlh mai. Rei deuh fe kan nghah hnu pawh chuan an la rawn lang thei reng reng lo mai a. An thawm takngial pawh hriat tur ala awm lo, "An va rei ve mawle." tiin Bena chu a khat tawk chuan a phun leh sup thin a.

Sarah-i erawh a hah deuh aniang, a muhil nghal bawrh bawrh mai. Minute 10 dawn kan nghah hnuah pawh chuan an la rawn thleng tlat lo mai a, Bena phei chu a thinrim lek lek tawh. "An rei e...ninawm lutuk." tiin a phun deuh reng a. "Aww..thla an la kawi leh vel aniang chu.." tiin ka lo hnem a.

Midang ho rei kha chu ka ngaihtuah vak lo, keichuan kha ka hmeichhe hmuh bawk kha a ni ka la ngaihtuah ni. Thudik sawi chu ka duh a, mahse khawiah hian ka thiante hian min awih dawn silo. Mak ka tih em em bawk chu engvanga, "Lo kal suh u." ti ringawt nge a nih. Angel-i kha ka ringhlel angreng viau a, mahse danglamna an nei tho bawk si.

Chubakah chemte in min tin a, a rawn tlan phei vak kha ania. Mahse ka inchhuih a, tukhum vaw chawrh a ka tluk hnu khan min tihnat a tum leh chuang miah bawk silo. Thlahrang ti dawn ila, a ni theiin ka hre bawk silo. Ka ngaihtuahna a ti thui ngang mai, haw vat vat mai ka chak tawh a ni.

*******************

Midang ho, Jason-a, Hmingi, Ruata, Matthew-a leh Rachael-i te chu an rawn lang thei ta tlat lo chu Bena ngaihdan a ni talo. "Ka zuk chhuk anga, ka zu tur te ang. Hei, khua a thim mai dawn." tih pah chuan a chhuk leh a, engmah pawh ka sawi hman lo. Motor atang chuan ka chhuk ve ta chuang lova, ka nau muhil chu ka awmpui reng a.

Khua chu a thim a ni tawh mai, boruak lah chu a reh em em mai lehnghal. Bena pawh chu a reh ve leh ta vang vang mai, ngaihthat lohna nei sa nen awm a nuam tawh lo ngei mai. Chutah mipa mangang au thawm ka hre ta tlat mai, "Nilo, min pui ru." tiin a au vak vak mai a. Bena aw ngei a ni, ka va phu chiang teh kher em.

RAng takin motor atang chuan ka chhuak a, "Bena..Bena..khawnge i awm?" tiin ka au thla nghal a. Ka phone light nen chuan a tawlhin ka tawlh thla a ni ber mai, a thim em em mai lehnghal. Rei pawh ka chhuk hman lo, engemawni thil mum lian tak mai hi ka chhuih fuh a. Ka hma zawnah chuan ka bawk thlawp mai, ava na kher em.

Chu ka thil chhuih chu ka han en chiang a, karei ka duh theilo. Ka hma zawnah chuan ka thianpa BEna, a lubung chu a lo let reng mai. Kha ka thil chhuih kha Bena lu anih chu, ka hik chhuak vekin ka hria. A la meng kuau zui a, a hmaiah chuan thisen a khat vek bawk. "Ka duh lo...ka duh lo.." tiin mipa e tilo chuan a rak hian ka rak vak vak mai.

KA tawlh hnung nghal a, ka lu a hai nghal muai muai theiin ka hria. Tlanchhiat tuma ka han tho chhuak chu ka hma zawn atanga feet 20 velah hian mi pakhat, sang zet mai leh palian zet, hmaikawr ni awm tak, rapthlak zet mai vuah hi a lo ding run mai a, asam ala sei zui. Biak chu sawiloh, ka hlau lutuk chu motor awmna lam pan chuan ka tlanchhe chho lehnghal a.

********************

Ka tlanchhe chak bawk a, motor awmna chu ka han thleng thuai a. A chhungah ka lut nghal a, ka hlauh ang ngei ngeiin ka nau SArah-i chu a lo awm tawh lo. AWm ngaihna pawh ka hrelo, "Sarah, Sarah..khawnge i awm?" tiin ka au vak vak a, ka tap ka tap tawh mai. Motor chhungah chuan ka lut a, ka inkalh hnan a.

Ka lu ka dawm vawng vawng a, "Engtin nge ka tih ang? Engtin nge ka tih ang?" tiin ka phun mawlh mawlh a. Ka phone ka phawrh a, mahse signal chhete mah a awmlo. Motor atang chuan chhuah a, signal zawn ka tum a. Mahse ka chhuak ngam chiah bawk silo, ava mangan thlak tak em.

Hriam hrei engemaw tal zawngin motor chu ka dap kual a, motor chahbi bak thildang engmah a awmlo. Motor lah ka khalh thiam der bawk silo, khalh thiam pawh ni ila ka nau Sarah-i tellovin engtin nge ka haw theih ang...ka rilru a hah takzet. Rilru fim hman tumin ka maimitchhing a, ka han ngawi vang vang phawt a.

Victor-a nupa puihna tel lo chuan ka nau leh ka thian dangte kha ka hmu let thei dawnlo tih ka hria, mahse min pui thei angem? Engtin nge min puih ang? Engtin nge an awmna hmun kha ka zuk thlen leh theih ang? Kha hmaikawr vuah kha tunge anih? Bena thattu kha amah ani thei angem? Ka rilru ah chuan zawhna hlir hi a awm a, tanpuitu ka va mamawh tak em.

Tih ngaihna dang a awm lo, motor atang chuan ka chhuah ngei angai. KA phone lah chu battery 10% chiah a awm tawh lehnghal, abak eng(light) dang ka nei der mai silo. Chahbi chu ka phawi a, fimkhur tak leh thawm dim tak chuan motor atang chuan ka chhuak ta a. Ka hawi kual a, tumah ka hmu lo.

Motor ah hian let leh ila, tanpuitu ka lo nghak mai dawn mawni aw te ka ti hnuhnawh leh a. Mahse thil tih chi a niin ka hre bawk silo, ka lo awm lan ngei a ngai awm si a. Motor rawn tlan lah chu hmuh tur an awm der lo mai lehnghal a, a reh hian a reh tlawk tlawk a ni ber mai. KAWngsir vela thing bung lo awm chu inven nan tiin ka chhar a, ka hum ran a.

Lui lam pan chuan muang changin ka chhuk ta a, ava thlamuan thlak loh tehlul em. ZAwi muangin ka chhukthla zel a, Bena ruang leh a lubung ka hmuhna ah pawh khan thisen tihloh chu engmah a lo awm tawh lo, kha hmaikawr vuahpa pawh kha hmuh tur a awm leh tawh lo. Tichuan ka chhuk zel a, ka battery lah chu 6% chiah a ni tawh.

************************

Rei fe ka kal hnu pawh chuan engmah ka tawk lem lova, thawm pawh engmah ka hrelo. MAhse ka kalna kawng hi a dik em ka hrelo, a thim lutuk ringawt. Thla eng hmuh tur pawh a awm lova, a khat tawkin sihal an u leh chuah chuah thin bawk. Chutah le, thawm mak tak ka hre leh ta.

KA sir hnim buk chu a rawn che luih luih a, ka tiang ken chu ka hum nghet sauh sauh a. Hmeichhe tap ri niin ka hria, a thawm atang chuan a mangang hle ni tur a ni. Ka khur thei hial, zeplo chuan ka hlau takzet. MAhse ka inti huaisen lui a, lo chhuak se ka tiang ken lai chuan ka vaw khawpah tiin ka inseh ruh a.

Mahse thawm a rawn hnai tial tial a, a reh ta hmak mai. Thawm lo chhuahna lam chu ka han en a, a thim lutuk chu engmah ka hmu chiang thei lo. Ka kal thui leh deuh va, hnim karah chuan hmeichhe pakhat, bawkkhup zawnga lo tlu hi ka hmu ta a. A thawmhnaw hak atang chuan Rachael-i a ni tih ka hre thei nghal, rang takin ka va pan vat a.

A lu atang chuan thisen a lo chhuak zawih zawih a, a bul lawka chuan lung lian tha zet, thisen kai nuai hi a lo awm bawk. Ka sawi vak vak a, "Rachael, i harh em...min chhang teh." tiin tih harh hram ka tum a. Second 20 vel hnuah chuan a rawn meng a, "Ka lu ana lutuk.." tiin a rawn phun sap a.

Kaih thawh pah chuan, "I tha em? Enge thleng?" tiin ka zawt a, min hmu chiah chu min kuah nghal a. Tap chung hian, "Zuala, haw ang...ka duhlo. Ramhuai...ramhuai ka hmu." a ti nghal hlawp hlawp a. "Rachael, khawnge midang? Khawnge an awm?" tiin ka zawt leh a, a tap nasa lutuk chu min chhang hlei thei lo.

"Ja..Jason-a..Jason-a a that...ka hlau lutuk." a ti leh a, "Tuin? Tuin maw that?" ka lo ti leh vat a. Inhnit feih feih pah chuan, "Ka hrelo..tunge a nih ka hrelo. A hmel a rapawm lutuk, a sam a sei a. Ramhuai aniang, Jason-a...a ril a pawt chhuak vek." a la ti zui. "Enga...engaw i sawi?" ka ti nghal vak a.

Tap chung bawk chuan, "KA rap lutuk...midang khawnge an awm ka hrelo...thla kan lak laiin a rawn lang thut a. Jason-a...nilo..ka duhlo, haw ang." tiin min kuah leh a, ka dinpui a. "Rachael, midang kan zawn angai. Kan thiante kan zawn angai, ka sawi chu i hria em?" ka han ti leh a. Mahse a duhlo nasa mai, "Aih, haw ang...min that ve palh ang." tiin ka kutah chuan a vuan tlat mai.

"Rachael, ka nau Sarah-i pawh a bo. BEna pawh a thi, midang an thi belh tawh tur a nilo. Ka nau tello chuan ka haw dawnlo, U Victor-a te puihna kan dil dawn lawm. Lui lam panin chhuk leh phawt ang, i bulah ka awm dawn alawm." tiin ka thlamuan a, mahse keipawh ka thla a muang bik chuang hauh lo.

"Enga? Bena a thi maw? Ka duh theilo...engtin nge kan tih dawn?" tiin Rachael-i chu a phi chung tawh mai a, "Ka hrelo..nihleh Jason-a thattu chu khawnge a awm?" tiin ka zawt a. "Ka hrelo, ka hriat hnuhnun be chu thingkung phena ka biru lai min hmu a, abulah chuan hmeichhia a awm bawk. An pahnih chuan min um a, mahse ka tlanchhiat laiin ka lu a ri dawt a..." a tih lai chuan ka lo pawt chat nghal vat a.

"Hmeichhia a awm ve a? Eng ang hmel pu nge?" tiin ka zawt lehnghal a. "Ka hre lo, ka hmu chianglo." tiin min chhang a.

"Engtiang vela sang nge?"

"KA hrelo, kei ai chuan a hniam...tinge chu chu tun angah min zawh a?"

"Ka hriat angai animai....a vun rawng eng ang nge? A ngo em? A kuthnung a suih em?"

Rachael-i chuan min en ta hu mai, "Aw...a kuthnung a suih tlat. MAhse engtin nge i hriat?" tiin min zawt a. Ka rindan chiah, kha hmeichhia ka hmuh thin kha, khanu thil tih kha anih ka ring lawk reng a. Mahse abula mipa chu tunge ni ta ang, kha hmaikawr vuah kha a ni tih chu a chiang reng a, mahse tunge ni ta ang?

*********************

A duh lo chung chu ka hruai lui a, lui lam panna kawng nia kan hriat lam chu ka pan thla zel a. Kal lama kan kalna kawng kha ani em pawh ka hre tawh lo, a thim lutuk leh kawng peng thuam tam lutuk, thingkung leh hnim buk tam bawk si chuan min tibuai vek. Kan kal thla zel a, "Chawl ang, Zuala..ka chau tawh lutuk." tiin Rachael-i chu a thu hnawk a.

Keipawh ka chau ve tawh reng, "Hawh teh, sawlai thingkung hnuaiah sawn kan thu dawnnia." tiin kan piah deuh a thingkung buk tha zet bul chu ka pan pui a, kan chawl ta a. "Engchiah maw thleng a?" tiin ka zawt leh a. A hahdam deuh tawh bawk a, pangngai tak chuan a tawng ve thei ta a.

"Khatia in kal hnu khan thla kan la kawi a, kei leh Jason-a leh Hmingi kan nia. Ruata leh MAtthew-a te erawh kan hnungah daih an la awm. Tichuan thla chu kan la zel a, achang leh kan thu chawl a. Chutia kan pathuma kan thutchawlh lai, kan thlalak te kan en vel lai chuan Jason-a chu a rawn t(r)e vak a. Kan han hawi chho chu kan hnungah chuan pa lian zet mai, hmel rapawm zet, ka rehzau tak leh sam sei tak mai hi a lo ding run a. Jason-a chu a kek a, chuveleh Hmingi nen chuan kan awm sawn nghal a." tiin a han inhnit deih feih feih a.

"Kha kha a hmel anilo, hmaikawr a nih kha. Hmaikawr a vuah anih kha, keipawhin ka hmu alawm." ka lo ti vat a. "I hmu ve maw?" a ti hu mai a. "Aw hmu ve e, mahse ka tlanchhia a. Chuan..enge thleng zel?" tiin ka zawh chhunzawm leh a. "Chuan....hnunglam zawng chuan Jason-a chu a rek a, chemte a phawrh a. A lamah a kuai her a, a dulah chuan avit siah siah a. A dul chu a zen leh a, a ril a pawt chhuak a.." a sawi zawm theilo, a tap nghal hawm hawm mai.

Ava rapthlak tak em, tu phiangsen nge maw he Hmaikawra hi le? Enge a pawi kan sawi? Tinge kan thianho hi min thah nachhan? RAchael-i bawk chuan tap chung hian, "Tinge kan lo kal kher kher le? Tinge helai hmunah kher hian kan lo kal le?" tiin a hmai a hup a. "Rachael, nihleh khawnge Hmingi chu a awm ang?" tiin ka zawt a.

"Ka hrelo, kan tlanchhia a, kan inhlauh daih."

"Nihleh Matthew-a leh Ruata te chu i hmu em?"

"Anni pawh ka hmulo, khawnge an awm ka hrelo."

"Um..engtin mah kan awm velo ang. Hawh, kal leh phawt ang." tiin ka kai tho va, kan kal leh ta a. Ka thian dangte chu ka ngaihtuah lutuk tho, Bena leh Jason-a thah an ni ta mai pawh chuan min ti na takzet. MAhse chu zawng ai chuan ka nau kum 16 mi lek, class 10 zirlai chauh, ka nau neihchhun chu ka ngaihtuah ber zawk.

*******************

REi fe kan kal leh hnu chuan kan kalkawng chu ka hre tlat hian ka hria a, "Helai hi a niin ka hria, kan kalna hi a dikin ka hria." Rachael-i pawh chuan a lo ti ve bawk a. Kawng zawl deuh a lo awm leh a, a dik chiang e. A hma aia chakin kan kal leh a, a tawp atawpah chuan lui chu kan thleng ta.

Ka phone ka en a, battery 1% bak a awm tawh lo. Ka rin aiin min daih rei hial zawk, Rachael-i lahin a phone a thlauh bo thu min la hrilh zui bawk nen. Kan thaw huai thei hial a, Victor-a te in lam pan chuan kan kal ta nghal a. "U Victor.." tiin Rachael-i chuan a au nghal chiam chiam a, mahse kawngka chu a lo inkalh daih mai.

"Zuala, a inkalh daih?" tiin Rachael-i chu a mangang lehnghal der a, "An haw tawh aniang, an riak dawnlo aniang." tiin ka lo chhang a. "Mahse haw ta se...khawi atangin nge an haw anga? Kan hawna kawng a in ang vek ang chu, khawiah emawni an awm ang." tiin min zawt leh a. Ni e, haw ve pawh ni ta se kan tawk em em ang.

Enge awmzia ni ta le? Victor-a te nupa pawh hian buaina chu an tawk ve tihna em ni ang? "Helai bul velah in engmah a awm lova, thlam takngial pawh a awm bawk silo. An haw kawngah an ni pawhin kha tualthattu kha an tawk ve amawni le?" RAchael-i bawk chuan a ti leh nauh nauh va.

"Tala hi chhu chhia ila, a chhungah lut phawt ang." ka ti a, mahse Rachael-i chuan, "A chhungah hian tuathattu kha lo awm ta se..." a han ti leh a. "Pawn lam atangi a inkalh hi, engtin nge a awm ang?" tih pah chuan lung tum chu ka la a, tala chu chhu chhia in a chhungah chuan kan lut a a, inchhunglam atang chuan ka kalh a.

*********************

Inchhung chu a thim khup mai a, light ka han zawng kual a. Mahse plug vel ka on pawh chuan engmah a eng lo, current a awmlo a ni ngei ang. KA dap kual ka dap kual hnu chuan bati 3 vel chu ka hmu a, sitting room lamah chuan ka chhi a. Rachael-i nen chuan kan thu dun a, kan hah dun hle mai.

"Zuala, engtin nge kan awm zel dawn?"

"Ka hre biklo, keipawh ka rilru a buai a nih hi."

"Nihleh engtin nge Sarah-i chu a bo theih a?"

"Motor ah kan lo nghak che u a, mahse in lo lang ta mai silova. Bena kha a rawn chhuk veleh a, mahse a au vak a.." ka sawi zo hman lo, kawngkhar chu a rawn ri dawt mai. Kan phu nasa dun hle mai, ka zuang tho zawk thei hial. "Tah hian lo awm rawh, choka ah chemte ka va zawng ange." ka ti a.

"Aih, ka lo kal ve dawn..." a ti tlat mai, bati pakhat chu la in choka lam chu kan pan phei a. Choka ah chuan chemte chu ka han dap kual a, pakhat chu a lo awm hlauh mai. Kawngkhar lah chu a la rawn inchum vak vak a, Rachael-i chuan ka kawr hnungah pawtin min rawn zui ve zel a. "Tunge?" ka han ti vak a, mahse chhanna ka dawng lo.

Kan pan hnai zel a, "Tunge i nih?" ka han ti leh vak a, mahse chhanna ka la dawng chuanglo. Chemtea tin reng chung chuan kawngka lam chu ka pan hnai zel a, ka sa him nan chuan tualthah pawh ka hreh tawh bik hauh lo. Fimkhur tak chuan kawngka kalhna chu ka han hawng a, ka pawt hawng thuai a, rang takin ka tawlh hnung lehnghal vat a.

Chemte chu ka lek kang nghal a, mahse pawnah chuan tuman hmuh tur an awmlo. PAwnah chuan chhuah a, enkual ka tum a. Mahse Rachael-i chuan min pawt tlat a, "Chhuak suh...kawnga hi kalh lehnghal rawh." a lo ti nghal a. KAwngka chu ka khar leh a, kan in kalh hnan leh ta a.

***********************

Inchhunga zing khawvar nghah tawp mai chu thil tih chi niin ka hre silo, ka nau Sarah-i chu engtin nge a awm, a thi nge a dam pawh ka hre der mai silo. Helai hmun khera kan lo kal chu ka inchhir ta khawp mai, lo hnial tlang law law ila tha tur. Hmingi, Matthew-a leh Ruata te chu khawnge an awm kan hre der mai bawk silo.

Mangang taka kan indawm kun ngawih ngawih lai chuan a ngai te ang bawkin kawngka chu a rawn inchum ri leh ta bur bur mai, rang takin chemte ka chuh nghal vat a. "Rachael. hetah hian lo awm rawh." tiin ka tho chhuak nghal a, sitting room lamah chuan RAchael-i chu ka awm tir a. "Tunge i nih?" tia au vak vak chung chuan kawngka lam chu ka va pan leh ta, a zam awm duh ngei mai.

Tlangval huaisen tak leh chak tak ka lo ni sa bik lo nen, ka thiante leh ka nau chhan tura tlanchhe lova ka let leh ngat hi mak ka inti zawk hial. Kawngkhar chu a la in chum ri bur bur mai a, "Tunge ni ka tih chu?" tiin ka han vin leh thak a, "Lo hawng ru...min pui ru...khawngaihin." tih ri ka hriat takah chuan rang takin ka va hawng a, Matthew-a leh Hmingi te an lo ni.

********************

MAtthew-a chuan a ke a rawn bai lut a, Hmingi pawh a hnar a thi phung mai. Min hmu chiah chu mak an tih hmel zawk, "Zuala, nangmaw?" tiin Matthew-a chuan min en hu mai. Hmingi chuan, "Zuala, khawnge midang? Tu nen nge in awm? Khawnge U Victor-a te?" a ti nghal bawrh bawrh a.

"Rachael-i nen kan awm, midang khawnge an awm ka hrelo." tiin ka chhang a, "Khawnge Rachael-i chu?" tiin min lo zawt leh nghal vat a. Sitting room lam chu kawkin, "Saw tah sawn..." ka tih rual rual chuan ava tlan phei a, Rachael-i nen chuan an inkuah nghal a. Matthew-a chuan, "Zuala, khawnge midang? Khawnge Bena? A thi ve em ni?" tiin a tap deuh pur a.

Hnuailam melh chungin, "Umm.." ka lo ti zawi sap a. MAtthew-a chuan a lu a dawm vawng vawng a, "Jason-a pawh a thi, Ruata nen lah kan inhlauh daih bawk si. Engthil phiangsen nge maw thleng le?" tiin a insehruh a, a mittui a tla zawih zawih mai. Kan mangang tlang a ni, han tih vak ngaihna kan hre der mai silo.

**********************

Kan thukhawm a, bati pawh pakhat chiah kan nei tawh. Bati pakhat lek mai chu kan thut hual a, kan ngawi reng hlawm ringawt. Mathhew-a chu rawn tawng chhuak lehin, "Pali chiah kan ni tawh, midang chu an dam nge an thi kan hre lo. Chuan he tualthattu hi tunge anih kan hre lo bawk a, kan lakah enge a duh tih lah kan hre hek lo." a han ti deuh fak fak a.

"Enge sawi i tum a?" ka lo ti vat a. Matthew-a chuan chiang kek kawk hian min rawn en a, "Hetia kan tang reng nachhan tur hi a awm lo, kawng engemaw chu kan zawn ve angai. Hei, pali lai kan ni a, tualthattu kha chu pakhat chauh a ni." a han ti leh a. Rachael-i chuan, "Mahse hmanrua a nei a.." a tih lai chuan rang zet hian MAtthew-a chuan, "Keini pawn kan hmang ve mai ang, hei chemte pakhat chu a awm a. A dang pawh ala awm ang, kan zawng mai ang." tih pah chuan a sana a en zeuh a, "Tunah dar 8:30pm a ri rawh a, khawvar nghah ngawt chi a nilo." a han ti leh a.

Keipawh chuan, "Ni e, chubakah tualthattu hian puitu a nei a. A bulah hmeichhia a awm ve a, chunu chu a hma pawn ka hmu tawh a ni." ka han tih chuan min en thap hlawm mai. "I hmu tawh maw?" tiin Hmingi chuan min zawt a. "AW hmu tawh e, nizanah kan inbulah alo ding a. LO KAL SUH U a ti ringawt a, ka biak pawhin ka zawhna a chhang lo hrim hrim. Chuan vawiina ka tukhum ka sawh a ka tluk pawh khan ka hmu leh alawm, U Victor-a nupui Angel-i nen khan an la in ang em em lehnghal." tiin kha hmeichhe mak tak ka hmuh thin chungchang te chu chip chiar takin ka hrilh hlawm a.

Matthew-a chuan thutak zet hian, "Ngawi lawk teh, Zuala. Angel-i kha a ni mai lo maw? An inang i ti a, LO KAL SUH U a ti bawk a. Angel-i chu helai hmun enkawltu a ni bawk a, amah chuan helai hmuna kallo turin warning a pe lawk che tihna a ni mai angem?" a rawn ti chhuak mauh mai.

"Mahse, helai hmun leh kan in te chu...a inhlat e."

"Aww....eng ang pawhin inhlat mahse. A lo kal tihna a nimai alawm, motorin alo kal pawh a ni thei a."

"MAhse Angel-i a ni kher dawn mi? An inang tho va, mahse an danglam tho bawk sia."

Chutia kan inhnial lai chuan chiang fek fawk hian Hmingi chuan, "A awmzia chu Victor-a leh Angel-i te hi kha tualthattu te pahnih kha an ni." a rawn ti vin thak mai a, kan ngawi ta thiap hlawm mai. Chutah a rawn hawi chhuak a, "Victor-a hi Hmaikawra kha a ni a, tichuan a nupui Angel-i kha Zuala hmuh thin hmeichhia kha a ni. Make-up hmangin a inti danglam mai mai a ni." a ti leh fak fak mai a.

Rachael-i chuan, "Engtin nge i hria?" tiin a zawt a. Hmingi chuan hnualam a melh leh a, "Dawhkan hnuaiah hian thlalak a awm a, tunah khan ka chhar a. Ka en a, inthil sawilai khan...hei en rawh u." tiin thalak chu dawhkanah chuan a rawn dah a. Kan han en chu le, Victor-a thlalak a ni a, a kut lehlamah hmaikawr, kha kan tualthattu hmaikawr ngei mai a kenglai hi a lo ni reng mai.

KAn hre ta, tualthattu chu kan hre ta. Hemite nupa, Victor-a leh Angel-i te nupa ngei hi keini thianho ramsa ang maia min pel tu te chu an ni ngei e. Thei leh theilo hian Matthew-a chu ading a, "ZAwnga chuh....ka va han that dawn chiang em.." a ti khur khur a. Keipawh ka thin a rim takzet, "Tinge maw ka lo mawl em em le? A tir atang khan Angel-i a ni tih hrethiam tur ka ni asin." tiin ka lu ka dawm vawng vawng a.

"A hrim hrimin engtin nge Hmingi nen hian in inhmuh theih a?" tiin Rachael-i chuan Matthew-a chu a zawt a. "In hnung daihah khan kan kal a, in t(r)e ri kha ka hria a. Mahse a zawi angreng bawk nen, Ruata phei chuan engmah a hrelo. Tichuan kan rawn kal chho zel a, Jason-a ruang kha kan hmu ta a. Kan rap lutuk kha kan ding khawng reng ringawt a, mahse Hmaikawra kha alo lang thut a. Chemte a keng bawk nen, kan tlachhia a. Ruata nen khan kan inhlauh ta daih a, tichuan ka tlukna lamah ka ke hi ka sawhna lehnghal a. Hmingi nen hian kan inhmu leh thut a..." tiin a chhang a.

"Keipawh Rachael-i nen kan inhlauh khan keimahin ka tlan zel a, mahse min man hman a. Ka hnarah a hnek vak vak a, mahse engtin tin emaw ka rawn tlanchhe ve leh thei a, tichuan Matthew-a nen hian kan inhmu ta a ni." a lo ti ve bawk a. Kan vai chuan kan ding a, "Tunah chuan tute nge an nih kan hre tawh bawk a, ka nau Sarah-i leh Ruata te kan zawng ang." ka ti a.

**********************

Tih dan tur ngaihtuah a kan din khawm lai chuan RAchael-i chu a au vak a, "SAw...an lo kal." tiin tukverh lam chu a kawk a. Thla eng hnuaia Victor-a, a hmaikawr vuah chunga chemte leh meichher nena a lo kal chu a hmuh chian theih ngei mai. Chutiang bawkin Angel-i pawh a bulah lo kal vein tiang lian tha tak, a hmawr thirlen a invet nuai mai hi a rawn keng ve bawk a.

Chu veleh Matthew-a chuan, "An rawn lut tur a nilo, an lo kalhnaih hma sawn hmanrua chuh vat ru." a ti a, keichuan ka chemte chu ka hum nghat sauh sauh a. Tukverh chu an lo luh loh nan tiin thutthlengin kan dah vek a, choka lam tukverh zawng zawng nen kan kalh vek bawk. Kan awmkhawm a, kan in ral ring hlawm thap a.

"Victor...nangma thil tih a ni tih kan hre vek tawh. Duhtawk rawh, keini chu min that ve hauh lovang." tiin ka han vau ve ngawt a, ka vau zam pha lo dun chiang kher asin. Angel-i chuan Victor-a chu a en a, a nui vak vak mai. Chutah Victor-a chu a kalsawn a, in hnung lam pan chuan a phei a.

"Inring ru aw..in ring ru.." tiin MAtthew-a chu a au vak vak a, Angel-i erawh a dinna ngaiah a ding reng thung. Chutah le, Victor-a chu rawn let lehin khawnvar tui nge petrol anih ka hrelo. Galon bur khat vek hi a rawn keng phei a, tukverh chu a leih ta puat puat mai le. Hmundang te pawh a leih kual a, min hal hnan an tum a ni.

Kan chhuah ngei chu angai, anih loh chuan kan kang hlum vek dawn. "Min hal an tum ania, engtin nge nidawn?" tiin kan hmeichhe pahnih te chu an mangang nasa dun kher mai. "U Victor, khawngaihin ti suh. Enge i pawi kan sawi, khawngaihin min chhuah rawh." tiin Hmingi chu a au vak vak a, Angel-i lah za em em hian a nui vak vak reng bawk a.

"Khatia tihin awmzia a awm lo, an thil tih tur chu an ti dawn tho tho. Kan chhuah angai, kan tlanchhuah angai." Matthew-a chuan a lo ti a. "Engtin nge kan tih dawn?" tiin a auvin ka au vak vak tawh. Chutah Victor-a chuan lighter a hmet alh a, kan lamah chuan a rawn vawm phei ta, in sir tin mai chu a alh phei ta puat puat hlawm mai a.

Kawngkhar pui awmna lam, kan hmalam erawh a kang velo. Kawngka hmalam chu Victor-a chuan a pan phei leh a, hmu theilo mah ila kawngka hma takah dingin min lo chang tih chu a chiang reng. Khatih hun chhung zawnga chawl miah lova Angel-i, mit dum run mai leh hmai dang var pup chunga a nui char char khan mi rap lek lek zawk.

"Matthew, enge i plan chu sawi vat rawh." tiin ka vin leh tuar a, Hmingi leh Rachael-i te chu ann tap nasa tawh mai. Matthew-a erawh ala ngawi reng thung a, a chil a lem dawk dawk ringawt a. In hmunglam chu a rawn kang nasa chho tan ta a, mei alh chuan kan awmna lai a rawn thleng ve dawn hnai ta. MAtthew-a chuan, "Zuala, chemte kha min lo pe teh." a ti ringawt a.

"Engvangin maw?"

"A hma ka tawn ang, kawngka saw ka hawng anga..ka hawn rualin ka vit nghal anga. Midang pawh in rawn tlanchhe ve nghal dawnnia, a tha em?"

"Nilo Matt, i ke anat kha. Keiman a hma ka tawn ang, ka vit nghal anga. Tichuan min rawn zui chhuak zawk dawnnia."

Min hnial nasa viau a, mahse inlak pa vang anilo. Kan chetsual ka hlauh vang zawkin ka thiante tan, ka nunna in chan dawn mahse helai hmun atang hian damin ka chhuah loh hmel tho tho, thih ka inpeih vek tawh zawk. "Pathum thleng ka chhiar anga, kan tlanchhuak nghal ang." ka ti a, hreh tih hriat tak hian Rachael-i leh Hmingi pawh chuan an lu an bu dun nghat a.

**********************

Kawngka lam chu kan va pan a, kawngkhar kalhna chu ka han ban a. "In inring em?" ka ti a, an lu an bu sap hlawm a. Ava han zam awm dun tak em, "Kha...hnih...thum." tih leh kawngka kalhna hawn ka rual a, ka chhui hawng thuai a. Hmaikawra chu kan hma zawn takah chuan a lo awm ngei a, chemte a lo hum run a.

Men pawh ka meng lo, "Lalpa, ka thlarau i kutah ka kawl tir e." tiin ka rilruin ka tawngtai hman vek. Maimitchhing chung chuan ka va zuang a, Victor-a chu ka zuan fuh hlauh mai. Ka bawhthlu tawp a, chemte chuan a hnute zawnah chuan vawi hnih ka vit a. Ka phawi leh a, kan vai chuan kan tlanchhuak thei ta hlauh mai.

Victor-a chu kan va en let leh a, a la thal reng a. MAhse Angel-i erawh kan hmu leh ta hauh lo mai, "Khawnge Angel-i?" tiin kan hawi kual nghal a. Matthew-a chuan Victor-a let reng chu a en reng a, "A thi ngei tur ani...khawimaw chemte kha.." tiin min chhuhsak a, tawng pawh ka tawng hma chuan Victor-a lam chu ava pan lehnghal a.

"Matt...va kal suh." tiin ka au va, mahse min ngaithla lo. A va kal hnai zel a, "ZAwnga, thi rawh.." tih pah chuan chemte chuan vih a tum veleh a. Mahse mu reng chung chuan Victor-a chuan a kut a lo man chat mai, a kut lehlam chuan a hrawkah a rek leh a. "Nilo, Matt.." tiin va chhan ka tum a, mahse Hmingi chuan min pawt tlat a.

"Zuala, tlanchhia ang, tlanchhe mai ang." a ti vak vak a, mahse chuti maia ka thianpa Matthew-a chu kalsan ka tum lo. Hmingi chu ka nam vak a, a tlu bawk thlawp mai. Hmanrua han chuh tur ka zawng a, mahse engmah a awm mai silo. "Thih leh thih.." tiin ka va phei a, mahse pen hnih vel chiah ka pen hman.

Ka man chu a rawn thip zawk a, ka thingthi hnawk mai. A va han na ngai em, ka mal dinglam chu ka en a. Fei (thal mu - arrow) a lo bur va mai, ala tlang zui. A na lutuk chu a rum vawng vawng a, Rachael-i chuan min rawn pan nghal a. Chutah in sir atang chuan Angel-i chu a rawn chhuak a, lehlamah thal(bow) a keng a, lehlamah hreipui a keng bawk.

Min la rawn nuih ang vur vur lehnghal a, Victor-a lam chu a pan a. Victor-a chuan Matthew-a chemte chu a laksak a, a dulah a vit ta siah mai. A phawi leh a, a ri hrawk thei hial. Matthew-a chu a bawk thlawp a, kan lamah chuan thei leh theilo hian a rawn bawk vak phei a. Victor-a chuan muang changin a zui zel a, Angel-i hreipui chu a laksak leh a.

Bawkvak chung leh a ka atanga thisen baw hawk hawk chung chuan Matthew-a chuan a kut a rawn phar chhuak a, "Zua...Zuala...tlanchhe rawh u..tlan rawh u." a ti tawk tawk a. Ka va han tlawm tak em, ka thianpa tanpui ngai ngawih ngawih pawh ka pui thei der mai silo. "Matthew...nilo..thianpa." tiin ka au vak vak ringawt a, ka tap vak vak ringawt mai.

RAchael-i chuan min kai tho va, "Tlan ang, Zuala..tlan ang." tiin min kuah a, mahse ka ke na lutuk chu din pawh ka ding tha theilo, ka tlu leh zel a. Hmingi lah chu ka lo namthlu na deuh nge ni, a lo la tlu reng a. Chuveleh Angel-i chu a rawn phei a, Rachael-i hlau lutuk chuan min hnuk dawr dawr a.

Hmingi rawn tho chhuak chu a samah a tham a, Victor-a lamah bawk a hnuk phei leh ta daih mai. Hmingi chu a au tuar tuar a, "Nilo..Zuala...min chhan ru." a ti vak vak a. Chutah le, Victor-a chuan Matthew-a sam chu a tham a. Amah hnungchhawn zawng chuan a thingthit tir a, Matthew-a hmel mawlh kha, ka va kahwngaih tak em.

Victor-a chuan a hreipui chu a han lek kang a, Matthew-a dar ah chuan a chek ta siah mai. Matthew-a na ti lutuk chu a au vak vak a, thisen chu chikin a chik vak vak mai. Kei leh Rachael-i lah tihtheih kan nei der silo, kan au dun vak vak ringawt mai. Chutah dim baksak lo chuan Victor-a chuan MAtthew-a dar chu a han chek leh siah siah mai a, thisen chik nasa lutuk chuan Matthew-a hmai chu abual khat vek tawh.

A chek vak vak a, a chek thuk tawh ngei mai. Matthew-a ban dinglam mai nilo, a dar nen chawp chuan a chek phel titih ta mai a, a thi chiang kher mai. Khatia a cheh chhung zawng khan a bulah Hmingi man be tlat chungin Angel chu a lo nui thler duai duai mai a, thisen chuan a per ve nual bawk.

Ka luak thei hial dawnin ka hria, zan tihbaiawm tak chu ava ni chiang em. Chutah an la duhtawk lo cheu, Matthew-a ruang chu a bawkkhup zawngin Victor-a chuan leiah chuan amut a, a hreite chuan a lu chu a chek leh a, a bur ta vu mai. Hmingi lam ava pan leh a, Hmingi chuan a hlau kher mai.

"Nilo...nilo...min that suh. Khawngaihin min that suh, ka duhlo." tiin a rak vak vak a, mahse engah mah an ngai lo chiang khawp mai. Victor-a chuan Hmingi chu a hnung zawngin a rek a, chutah a kut pahnih chuan Hmingi ka(mouth) chhung chu a zen a. A kut dinglam chuan a ha chunglam chu a vuan a, veilam chuan a ha hnuailam a vuan leh a.

Chutah le, a ka chu a pawt kau ta vak mai a, zau takin a keu vak vak a. Hmingi biang chu a kamsir atang chuan a rawn thler phei a, thisen a chik tuar tuar mai. KA rap lutuk chu ka hlau takzet, Hmingi pawh chu a thi ve ta. Keini pawh kan thi ve ngei dawnin ka hria a, "Rachael, tlan chhe mai rawh." ka ti ta tawp a.

Mahse mak tak maiin Victor-a te nupa chuan min rawn en a, engtin mah min ti ve lo. Hmingi leh Matthew-a te ruang chu an hnuk a, ral lehlam panin an kal ta daih mai. Chuveleh RAchael-i chuan, "Tlan ang, din tum rawh." tiin min kaitho leh a, chu zan thim tak hnuaiah chuan eng(light) engmah awmlovin khawilam kawng nge kan zawh dawn tih pawh hrelovin thimzingah chuan thei leh thei lovin kan tlanchhe dun ta a.

************************

Ka malah chuan thal mu chu ala bur va mai a, ka pen tha hleithei lo. A na takzet, Rachael-i chuan min kuah hram hram a. Eng(light) engmah kan nei der mai silo, thla eng lah chu a nep em em mai lehnghal. Hetiang hi a thleng dawn tih lo hre lawk ila chu helai hmunah hian ka kal ve hauh lovang, Sarah-i mawlh chu ka ngaihtuah a ni.

Khawilam nge kan pan zel pawh ka hre tawh lo, ka ke chu ana em em a. A tur hian mi tur ngut ngut hi a ni ber mai, "Rachael, chawl lawk ang. Ka kal thei tawh lo, ana lutuk." ka ti ta tawp a. Thingkung pakhat ngheng in kan thu chawl ta a, ka dang ava ro tak em. "Zuala, engtin nge kan tih tak ang?" tiin RAchael-i chu a tap pur mai a.

"Ka hre biklo, khawvar hun nghah a ni mai."

"Mahse darzat takngial pawh kan hre silo. Phone kan nei bawk silo, eng engmah kan nei bawk silo."

"Tih ngaihna ka hre biklo, inngaihtuahna hun min han pe phawt teh."

Ka mala thal mu bur va mai chu ka han enchiang a, a thim em avang chuan ka hmu tha theilo. Mahse ka han khawih chhin a, thal mu pangngai a nilo tlat. Thing atanga an siamchawp mai mai a ni, a chang tha em em lo lehnghal. Rachael-i bulah chuan, "Thal mu hi ka phawi angai, min tibuai." ka ti a.

"Engtin nge kan phawi ang?" tiin min zawt a. A hmawr zum lam zawk chu ka han ulh vak a, a tliak ve mai. "A mawng lam atang hian 123 ah phawi pawp rawh aw..." ka ti leh a, a hreh kher mai. "Ana ang.." a ti deuh sap a. "NA dawn e..mahse tihdan dang a awm hleinem." ka ti vin deuh hlur a.

Hreh tak chung chuan a vuan a, vawi 3 kan chhiar a, a han pawt ta vak a. A na lutukchu leiah ka bawk thawp a, ka vial ngawl ngawl thei hial. Tichuan ka kawr ka phelh a, ka tawnzau ka phelh leh a. Ka tawnzau chu ka pawtthler a, ka mal hliam laiah chuan nghet takin Rachael-i chuan min t(r)awn sak a.

Minute 10 vel chu kan han thu chawl leh rih a, ava na ngat ngat tak em. Chhete chuan ka hahdam ve ta, "Um, kal leh tawh ang le." tiin harsa ti tak chung chuan ka tho a, kan kal leh ta a. Khua a var har hrim hrim nge, zan ala reilo zawk pawh ka hre tawh lo. Dar zat en turin sana ka bun bawk silo, chutiang bawkin Rachael-i pawn.

**********************

Chutia thei leh thei lova kan kal zel hnu chuan hmun zawl deuh mai ah hian kan chhuak hlawl mai a, thla eng pawh a lang chiang ta hle mai. Mahse kawngpui erawh kan la pawh lo, khawilam atanga kal tur nge pawh kan hre chuang lo. Rin ai daihin a zawl tha phian lehnghal a, alang chiang angreng hle bawk.

Kan kal phei zel a, "KAn awmna pawh kan hre bawk silo, engtin nge kan haw tak ang?" tiin Rachael-i chu a beidawng takzet, chutiang bawkin keipawh ka ni tho. "Hetah hian khawvar chu kan nghal mai dawnnia, ramhnuai pilril leh thim zeta nghah ai chuan a zia zawk ang." ka ti a. "Mahse, min hmu chiang thei dawn asin...hetah chuan." Rachael-i chuan a lo ti a.

"En ta che, a zawl that em hi. An thawm kan hria anga, tlanchhiat pawh a rem zawk. Ramhnuai thim deuha kan awm reng chuan min that awlsam dawn lutuk, hetah chuan kan insaseng hman ang."

"Umm a tha lawm."

Kan thu a, ka ke chu ana tawh takzet. REi pawh kan la thu hahchawl hman lo, thawm kan hre leh ta. Mahse mak tak a ni, kan awmna hmun hi ramhnuai a ni a. Mahse motor tlan ri kan hre tlat, motor tlan theihna kawng awm ang enmah kan hmu bawk silo. Chutah kan awmna atanga hla vaklo, thim vek atang chuan motor light eng em em mai hian min rawn chhun ta.

Kan ding dun nghal a, "Saw..saw motor..hawh...kal ang. Tanpuina dil ang, lo kal rawh." RAchael-i chuan a han ti nghal chul a. Mahse keichuan ka lo dang a, "Nilo, tunge motor khalhtu saw kan hrelo. Victor-a pawh a lo ni maithei asin, kal lovang." ka ti tlat a. "An ni dawn mi? An nilovang." tiin min chhang leh a.

Mahse ka hlauthawng tlat, "Angailo, kal lovang." ka ti leh tlat a. Mahse motor chu a lo hnai zel a, kan tlanchhe dawn nge tanpuina chu kan dil dawn..tih tur ber pawh ka hre bik lo. Kan dinna atanga ft 30 velah chuan motor chu a ding a, light chu ala on eng reng a. Keini pawh chu kan la ding reng a, engtia chet lak tur nge kan hre bik lo.

Chu motor chu truck lian tak mai hi ani a, a light pawh a eng tha khawp mai. Chutah a driver seat lo lam zawk chu a in hawng a, mihring niawm tak hi zawi vekin a rawn tla chhuak hlawl mai. Tichuan motor chu a back leh daih a, a rawn chhuahna ngai bawk ah chuan a tlan lut leh ta daih mai a.

********************

Rang takin motor a tlan liam veleh chuan kan va phei nghal a, leia lo let reng chu tudang nilovin ka nau Sarah-i a lo ni. A hmui chu puanin a lo intuam a, a kut pahnih chu phuar beh a lo ni bawk. "Nilo, bawihte..Sarah, harh rawh." tiin ka sawi vak vak a, mahse a harh thei tlat lo. KA tap nghal titih, "Sarah...harh rawh. I u ka nih hi, khawngaihin min chhang rawh." ka ti leh a.

A hmui tuamna te, a kut phuarna te chu ka phelh sak a. Chutah muang chang hian a rawn meng a, "Au Zual.." a rawn ti tham tiak a. Ka va han lawm tak em, "Bawihte...i tha em?" tiin ka kuah nghal a. Alu chu na tih hmel tak hian a dawm vawng vawng a, "Khawiah nge ka awm?" a ti zawi leh sap a.

"Ka bulah i awm...engtin mah i awm lovang. Hlau suh, i u ka awm alawm." tiin ka thlamuan a, mahse Sarah-i chu a chauh hmel em em a, ka ngaih a thalo hle mai. "SArah, i chungah enge thleng a?" tiin ka zawt leh a, a hawi a deuh hru mai. "Khawnge kha mite pahnih kha?" a ti leh ringawt a.

"Tute maw?"

"Tute nge an nih ka hrelo, khumah ka mu a. Chuan ka bulah hmeichhe pakhat a thu a, ka hma zawnah mipakhat hmaikawr vuah hi a ding reng bawk a."

"Anih leh truck atanga rawn namthla tu che kha tunge?"

"Eng truck maw?" a ti ta hu mai, a ngaihna ka hre lo takzet. A ban ka vuan chu, "Ana..ana lutuk." tiin a t(r)e vak a, ka han ensak chu a lo vung luk mai. Chiuna (injection) hnuhma tih hriat tak hi panga vel lai a awm bawk, Victor-a te nupa chuan ka nau hi an hrai rui tih a chiang ta, an va han nunrawng tak em.

"Bawihte, i ding thei angem?" ka ti a, din tir kan han tum chu a che tha hleithei ta tlat lo. A taksa chu a zawi vek a, an hrai ruihna damdawi chuan hna ala thawk tha hle tih a hriat. Han pawm nawlh dawn ila kei lah ka ke ana bawk si, Rachael-i lahin a zo bik awm der silo. Leiah chuan ka thut pui leh a, "Ka chau lutuk...ka che thei lo." a ti leh a.

"Chu mite pahnih chuan engtin nge an tih che? An khawihna che em?" tiin ka zawt leh a. "Aih...engkim kha ka mang hriat vek a. Chiang lo ruaiin an mahni kha ka hmu, ka harh pawhin ka harh chianglo zel, achang leh an inbia a, a chang leh an pahnih in an bo daih zel." tiin min chhang leh a.

Chutia ka nau nena kan inbiak lai chuan Rachael-i chuan hlauhthawng aw tih hriat tak hian, "Zuala...saw..a lo kal." a ti khur dar dar a. Hnunglam ka hawi chu nichin lawka motor lo chhuahna atang khan Victor-a ngei mai chu a lo kal phei mek a. Mahse hriam hrei engmah a keng tawh lova, hmaikawr pawh a vuah hek lo.

Chutah zet zawng, palian angreng viau mahse ka hlau lutuk tawh bik hauh lo. KA nau chu leiah chuan ka mut tir a, "Rachael, lo awmpui rawh." tiin Victor-a lam pan chuan zam hauh lovin ka bai phei auh auh va. Mahse a rawn thlen hma chuan a ding a, "Zuala, enge hetah inla tih a?" a rawn ti a.

Ka thinrim takzet, "I lemchan kha duhtawk rawh, ZAwnga. Tunge i nih ka hria, nang hi tualthattu i ni." ka ti vin thak a, a nui suk ringawt. "Enge i pawi kan sawi a? Enge i chungah kan tihsual a?" ka ti leh a, tham loh hmel zet hian min en vung vung ringawt. "ZAwnga, min chhang ta che." ka ti vin leh vak a.

Mahse engmah ala sawi chuang lo, ka thinrim lutuk chu ka puak keh hial dawnin ka hria. "Khang i thah tak te kha, ka thian neih chhun te an ni asin. Eng ang mihring nge maw i nih le? Hetia mi i thah hian nuam i ti ami? Inthiamlohna i nei miah lo ami?" tiin ka vin leh vak vak a. Fiamthu ka thawh amaw tih tur khawpin a nui leh deuh huk a, a lu a thing a.

Ka thinrim a tizual tulh tulh mai, "Tunah chuan a tawk tawh e, keini hi chu min that lovang. Lo kal ta che, mipa leh mipa te chu..insual ila. Ka that khawp ang che, i thil tih man hi chu i hmu dawn chiang khawp mai." ka ti ve ta siah siah mai. A thaw hak a, "Umm, lo kal la." a ti ringawt a, ka va pan phei ta a.

******************

VA hnek ka tum a, awlsam zet hian min lo bum a. Ka ke a na bawk nen, ka chau tawh bawk nen, ka che tha hleithei lo. Insual thiam tak ka lo nilo bawk nen, tuihal avanga dang ro vek chung chuan theihtawp chhuahin ka bei a, mahse ka hneh lo takzet. Min pet thal leh tawp zel a, a chang leh min hnek bawk.

Mahse tlawm mai ka tum lo, ka thi dawn a nih pawhin ka thih hma chu ka beilet ang tiin ka inseh ruh fan a. Awlsam zet hian min rek kang lawp a, chiang takin min en a. Thawk a harsa takzet, "I nau hmuh lai ngeia thih i duh ami?" tiin rum zet hian min melh a, chhan pawh ka chhang thei lo.

Chutah a hnung lamah chuan RAchael-i chuan a rawn zuan thut a, a bengah chuan a seh sak vak mai. Victor-a na ti lutuk chu a au vak a, min thlah nghal a. Leiah chuan ka tlu bawk thlawp mai, theihtawp chhuahin Rachael-i chuan a bei ve a. MAhse ka bul lawkah chuan a rawn theh thla ve thuai mai a, "Rachael, tlanchhe rawh u..ka nau saw hruai la tlanchhe rawh u." ka ti vak vak a.

Victor-a erawh chuan a beng chu a dawm vawng vawg a, a sehna ngang aniang, a thi zawih zawih mai. "Min seh khanglang le..phiangsen chuan.." tiin a rum nghut nghut a, a beng chu a hup vang vang a. "Rachael, tlanchhe vat rawh u. Ka nau saw pua la, ahla thei ang berah tlanchhe rawh u." ka ti leh a.

"Mahse nang ve?"

"Ka ngaihtuah awmloh, ka rawn zawng hmu leh mai ang che u."

"Nilo Zuala, khawiah mah ka kalsan dawnlo che. Kan thih pawhin kan thi dun ang, thih hi ka hlau tawh bik lo."

"Nilove, kan thiante zawng zawng kan chan tawh. Midang an thih belh tawh tur anilo, khawngaihin ka nau tal saw chu chhan him rawh."

Hreh chung chung chuan a tho va, ka nau chu a pua a. Victor-a chuan vin zet hian, "Khawiah mah in kal lovang." a ti khur khur a. Um a tum a, mahse ka theih tawp chhuah in ka lo dang a. Ka dulah chuan a khupin min do leh pawp a, ka thingthi hnawk mai. Mahse a keah chuan ka man bet ve tlat a, "Rachael, tlan ru." tiin ka au zui a.

Mahse Rachael-i te ka va en chu an lo tlan awzawng lo, an hmaah chuan Angel-i a lo ding khur mai. Engtik lai khan nge a lo kal ve hman ka hrelo, ahmaa a tiang ken, a hmawra thirlen zum invet kual bawk chu a lo keng leh a. Chuveleh Victor-a chuan min tham tho lawp a, Rachael-i leh Sarah-i te bulah chuan min theh phei dawrh mai.

********************

Kan hmaah chuan an nupa chuan an ding ran a, min melh rum dun nasa mai lehnghal. "Nang ni phiansen pahnih hian enge in duh a? Enge kan lak atang hian in duh?" tiin ka au vak vak a, ka kham takzet tawh a ni. Angel-i chuan min en vang vang a, "KA hrilh lawk che kha...lo kal suh u ka tih kha. Min ngaithla duh lova, hei hi a thleng ta a nih hi." a ti khur khur a.

"Enge heta kan lo kal chu a pawina? In pawi kan sawi em ni? In thil engmah pawh kan ru lova, kan tichhe hek lo. MAhse tinge hetia in hmelma niawm fahrana min beih chiam a?" ka ti leh a. Victor-a chuan vin zet hian, "Engkim hian chhan leh vang a nei, i hriat ve vek kher angai lo." tih pah chuan Angel-i tiang ken lai chu ala lawk a, ka lam pan chuan alo phei ta mai.

Ka hmai zawnah chuan a rawn vei ta fua mai a, vanneihthlak takin ka lo indang hlauh. Ka lu a vaw fuh lo hlauh, mahse ka darah chuan a vua a. A thip zawk mai, thrilen zum fer fur mai chu ka ban puam laiah chuan a bur fur mai a, ana ngei mai. Rachael-i chu a au vak a, Sarah-i erawh nikhawhre lovin a awm reng thung.

Chutah tiang chu a phawi a, a ri hrawk thei hial. Ana ka ti lutuk chu a tal vak vak a, zanin hian kan thi ngei dawn anih hi, tanpuitu kan va mamawh tak em. MAhse khawngaihna ka dil vel peih lo, min that dawn tho tho tih ka chiang. Thei leh thei lovin ka thingthi a, "Mipa chu i inti ve amaw? Tualthattu ni ve si, i va nep ve. I tiang kha paih rawh, kuttum hmangin insual ila." ka ti leh ngat a.

A nui a, "Ka kuttum te chu i dawn nual tawh kha...umm, a tha e." tiin tiang chu a paih a, min rawn tham tho leh a. Min hnek leh hrep a, ka lu a hai muai muai mai. Rachael-i chuan leia nikhawhrelova mu mek, ka nau SArah-i chu a veng tlat a, Angel-i chuan a hel kual reng bawk a. "Victor, ka naute pahnih saw chhuah rawh. Keimah hi in dun leh min that rawh u, in duhtawkin min sawisa rawh u. Mahse ka naute saw chu chhuah hram rawh, khawngaihin." tiin ka dil a.

Mahse a lu a thing a, "I duhdan angin awm ila kan nupa hian ahma daih atangin plan kan lo siam lawk angai nang, rilru tam tak kan sen angai nang. Ngaithla rawh, thawnthu ziaktu chu keimahni hi kan ni a, nang chu kan thawnthua kan ziah lan, mi pakhat, rapthlak leh hrehawm taka thi tur zinga mi mai chauh i ni." tiin min chhang a.

Angel-i pawh chuan Rachael-i leh Sarah-i te en reng chung chuan, "Mi 20 chuang an rawn kal dawn amaw tiin ka lo hlim ve em em a, pariat chiah inlo kal a. Chutah pawh nunna pahnih kan zuah leh si phei chuan...awi, a nawmna a tlem awm emai." tiin a nui leh vak vak a, a nui ri chu ka hne tawh ngawih ngawih.

"Chuan maw, he tualzawl nuam leh zau tak mai hi, ka nupui Angel-i infiamna tualzawl anih hi. In bihruk tumna a fulo hle mai, kan zui ru reng che u alawm." tiin Victor-a pawh chu a nui leh huah huah a, na em em hian min han tlawh leh pawp a. KA taksa zawng zawng chu ana chhuak vek tawh, thawk pawh ka thaw tha hleithei tawh lo.

Chutah Victor-a chuan Angel-i chu a en a, "Tunah hian ka zo law law mai dawn em ni?" tiin a han zawt a. Mahse Angel-i chuan, "Ala hma alawm, la infiam ka duh. Hei aia nuam hian, ka la khamlo." a lo ti a. Victor-a pawh chuan, "Kei pawh nuam ka la ti, ka la kham biklo." tiin an nupa chuan an nui dun vak vak a.

Angel-i bawk chuan, "Chubakah duhtak, hmaikawr pawh ila vuah hleinem. Hmaikawr vuah lova mi i that hi chu i inhmeh thlawt lo, keimah chiah min inchei tira. Vuah ve la, chuan zaninah zawh fel law law kan tum dawnnia." a lo ti leh a. Hemi te nupa hi eng ang mihring nge an nih le, an nunrawng takzet.

Victor-a chu a ngawi vang vang a, "Ummm..Zuala, tihian ti teh ang. I naute pahnih hi hruai la, tlachhe rawh u. I inla changtupa viau anilawm ni? Hero tak tak i nih chuan han che la, engtia thui nge kan lak atang hian i naute hi i tlachhiat pui theih kan en ang chu tiraw?" a han ti leh ham ham a.

Angel-i lah chuan, "Yes, nuam dawn lutuk." a lo la ti zui. Engmah ka sawi tawh lo, ka chakna zawng zawng sawm khawmin ka tho leh a, tichuan RAchael-i chu ka kai thova. SArah-i jacket hak lai chu ka phelh sak a, tichuan Sarah-i chu ka pua a. JAcket hmang chuan SArah-i chu ka pua a, Rachael-i chuan minlo pui bawk.

Tichuan kan pathum chuan kan tlanchhe ta a, a tlan pawh kan tlan muang tawh kher mai. Kei lah ka taksa na bawk, ka ban leh ka keah hlim ka tuar bawk. RAchael-i lah a chau tawh bawk, Sarah-i lah nikhawhrelovin a awm reng mai si. Thui fe kan kal hnu chuan ka hawi let a, rin ang chiahin an lo awm leh tawh miah lo.

Ramhnuai thim zinglam pan chuan kan tlanchhe leh ta, ava khamawm zozai tawh tak em. MAhse an mahni Victor-a te berin chance min pe leh a, kan chance neih hnuhnung ber a ni tawh dawn tih pawh ka hria. A tawp nan theih tawp chu chhuah leh phawt mai teh ang, beisei bo tak chung si chuan kan kal leh ta zel a.

********************

Taksa a chau tawh bawk nen, ka hliam te lah chuan min tur ut ut mai bawk si. Sarah-i lah chu a harh thei reng reng lo mai a, a khat tawkin a rawn rum leh nghut thin. Kan tlan thui thei ngang lo, a khat tawk chuan kan chawl leh thin a. Ramhnuai thim zingah chuan a khat tawkin torch light eng a rawn de leh zawk thin a, Victor-a te nupa in min rawn zawng ve zel a ni tih chu hai rual a nilo.

Ka rilru in ka tawngtai reng a, ka mangang takzet. Ka mitthla in kan khua Thenzawl lama ka nu leh pate, rilru hahdam taka an awm tur chu ka ngaihtuah a. An fate pahnih hian buaina kan tawk mek a ni tih leh zanin hian kan thi ve mai angem tih engmah an hre awm der silo, ka nu leh pate ka va han ngai tak em.

Kan tlanchhiat chhung zawng chuan engtin nge kan awm zel ang tiin ka inngaihtuah char char a, a chang phei chuan ka inthah tir ve law law mai dawn mawni tih ten ka ngaihtuah hman hial. Mahse thi tur chuan ka la inpeih bik silo, thih chu ka la hreh ve bawk si. Chu mai nilovin damloh vanga thi pawh nilo, rapthlak taka thah han nih tawp mai chu tufa mah hian an duh bikin ka ringlo.

***********************

Kan tlanchhiat chhung chuan vawi 10 vel lai chu kan chawl hman ang, mahse kan chawlh hlekin thawm kan hre zel bawk si. Kan awmna atanga hla lutuk lo tih hriat tak hian Angel-i nui uar uar ri chu a khat tawkin hriat tur a awm reng bawk a, a nui ri te kha a rapawmin a khamawm takzet tawh.

Hmeichhe hmeltha tak ni si kha, a chhungril erawh a nunrawng em em bawk si. Chutiang bawkin Victor-a pawh mipa hmelchhe zawk zawk chu a nilo, an nupa hmel en chuan mifel tak leh rilru tha tak tur chu an ni. An hmelthatna phena nunrawnna rapthlak tak chu kan thian ho chungah chuan an lantir mek a ni si a, mang ava han ang tak em.

*************************

Chutia kan tlan zel lai chuan engemawni hi ka chhui fuh a, ka han dap chuan torch light a lo ni. "Rachael, hei light ka chhar." ka ti vat a. Mahse Rachael-i chuan, "An dah chawp lui a nih ka ring, plan fel fai tak an nei a ni." a lo ti daih mai. Chhang lemlo chuan light chu ka hmet eng a, a la dim em em zui.

Eng anga an lo dah chawp pawh nise, light eng kan nei ve ta hrim hrim chuan ngaih a ti ngam ve deuh ta. "Kal zel phawt ang..." tiin kal kan tum leh a, mahse RAchael-i chu a bawk ta thlawp mai. Rang takin ka hawi let vat a, ka han en chiang chu a ke ah chuan hrui a lo in hling a. "Zuala.." a ti hman tawk, hnimbuk tak lamah chuan Rachael-i chu hrui chuan a hnuk phei ta daih mai.

A t(r)e vak vak a, kei erawh Sarah-i ka paw bawk nen. Ka man hman ngang lo, "Nilo, RAchael.." tiin ka au vak a. Victor-a te chuan thang an lo kam leh hman vek tihna a ni, helai ram hi an hrechiang thawkhat hle tih a hriat bawk. Mihring ve tho ni si, khatiang em em a an che rang bik khan ka mak tihna a ti zual.

Engtia tih tur nge? Engtin nge chet ka lak ve ang? Enge ka tih dawn? Zawhna hlir mai chu ka rilru ah chuan a khat leh ta a, ava han hrehawm zozai tawh tak em. KA nau SArah-i hi harh tal se ka va ti tak, Rachael-i chu theihnghilhin ka nau nen hian kan tlanchhe zel dawn nge Sarah-i hi hetah hian ka dah hrih anga Rachael-i chu ka zawng leh phawt dawn?

************************

Chet lak nachang pawh hrelo chuan ka ding reng a, ka hawi kual sek ringawt mai. Tihngaihna ka hre tawh lo, Sarah-i chu leiah chuan ka mut tir a. Tichuan ka ding chhuak a, "A tawk e, Victor. Lo chhuak rawh, min rawn that rawh. In infiamna hi kei chuan ka khel ve peih tawh lo, lo chhuak la kan unau hian min rawn that ve law law ta che." tiin ring takin ka au ta vak vak ringawt a.

Mahse a reh vung vung mai, thereng hram ri tih loh chu thawm dang a awm leh tawh miah lo. Second 10 vel hnuah chuan Rachael-i t(r)e ri ka hre leh a, mahse khawi lam atanga lo chhuak nge ka hre lo. Ka hmanraw neihchhun lah torch light chiah chu a ni bawk si, ka bula thing zar te tak te chu ka han ulh tliak hmawk a.

"VICTOR...LO CHHUAK RAWH." ka ti leh vak a, mahse a la reh vung vung mai. Chutah light eng ka hmu leh ta, rang takin ka en ve nghal a. KA hma zawnah chuan Victor-a, Hmaikawra ngei mai chu a rawn pen chhuak ta. A hmaikawr rapthlak zet chu a rawn vuah phei a, chemte hriam hmel zet mai hi a rawn hum bawk.

Hlauhvin awmzia a nei tawh lo, ka thih leh ka thi a ni tawh mai. A hnugah chuan lungawi loh hmel tak hian Angel-i chu a rawn kal ve bawk a, "Tinge hrui pangngai i hman loh? Khanu kha a tlanchhuak daih ania.." a rawn ti phei bul bul a, RAchael-i a sawina a ni ngei ang. MAhse Victor-a chuan a chhang lo, a mitmeng sen rum mai chuan minla melh reng a.

Angel-i bawk chuan min rawn en a, "Tinge bawiha, i inlak pa tehreng nen iva tlawm hma ve..." a rawn ti vel a, a han nui leh uar uar a. Vin zet hian, "Nang mi lepchiah kha lo tawng lo tawng ve tawh suh, ka thi anih chuan nangpawh kha hremhmun thlengin ka hnuk thla ve ang che. Hmeichhia te te lehnghal, i inla hlauhawm ve khanglang a. Ka hlau chhete eih lo che, in nupa khan ka hlau lo che u." ka ti ve ta phiar phiar mai a.

A nui lai chu a tapw hmak mai, a lung nilo takzet tih a hmel atang chuan a hriat. Victor-a chu en pahin min rawn kawk a, "That rawh....min tawngkhum dan kha ilo hria em. That raw...sat sawm vek rawh." a ti khur khur a, Victor-a chuan a lu a bu nghat mai. Ka lam a rawn hawi leh a, "I thi ang...i thi chiang khawp ang." tiin min vau leh khur khur a.

************************

Kan hun tawp a thleng ve ta, kan thi ve dawn ta ngei e. Sarah-i chu ka en a, engmah hrelovin a la muhil reng. KA mittui a tla a, ka nau neihchhun, ka fanu ang maia ka duat. Ka thian kawm ngeih ber, Sarah-i ka chhanhim thei lo tur chuan min tina takzet a ni. Ka kunhniam a, "Bawihte, min ngaidam rawh aw...i u hian ka venghim zo dawnlo che a ni. A pawi ka ti takzet, i u hi ka chak tawk lo a ni. MAhse ka theihtawp ka chhuah ve a ni tih hi min hriatsak hram ang che aw....KA HMANGAIH CHE." tiin ka tap zawih zawih mai.

Tichuan ka tho chhuak a, ka maimitchhing leh vang vang phawt a. Ka rilru chuan tawngtaiin, "Lalpa, ka thlarau i hnenah ka kawl tir e. Mahse Rachael-i tal kha chu chhanhim hram ang che, ka inpeih e." tiin ka meng leh a. KA inpeih ta e, thi tur chuan ka inpeih ta e. "Lo kal rawh le, ka inpeih e." ka ti a.

*****************

Ka lam pan chuan Hmaikawra chu a rawn kal phei ta chher chher mai le, kan in palen hleih ropui mai si a, ka hneh dawnlo tih pawh ka hria. Kan hmanrua lah a inthlau em em mai bawk si, anih chemte hriam tak a keng a, kei erawh chuan torch light leh thingzar tliak, sinte mai chauh chu ka keng thung a.

Kan inveh dun ta them them mai, Angel-i lah a ngai te bawkin a lo nui ri leh her her tawh. Min rawn vai thuak a, mahse min fulo hlauh. Ka theihtawp chuan ka indang ve zel a, min thamloh hmel zet hian a nui leh huk thin. Chutah ka han zuan thut a, chiang em em mai hian min lo rek chat mai.

Thingkungah chuan min nawr bet a, na em em hian ka hrawkah chuan a rek a. Chemte chu a lek kang ang ren rawn a, min vit ngei dawn tih pawh ka hria. Ka maimitching tawp, chutah ka hnute chung deuh hret ang chuan a rawn vit ta, a na lutuk chu au pawh ka au chhuak thei lo. Ka meng kawk a, mahse khati khawpa na si kha a lo vit thuk em em miah lo.

Hnai em emah chuan min rawn melh a, "Muangchangin le..." tih pah chuan min theh thal leh thuai mai a, muangchanga hrehawm taka min thah a tum tih a chiang reng. Ka hnute chu ka dawm a, thisen a chhuak zawih zawih mai. Thawk a harsa tan ta, zan hlimawm tak chu ava nilo chiang tak em.

"Awiiii.....a hmuhnawm lutuk." tiin Angel-i chu naupang chhia ang maiin a lo zuang vel anih chu, ka va han sawisa chak tak em. Leiah chuan ka bawk reng a, tho chhuak leh turin chakna ka nei tlem tawh lutuk. Mahse ka chakna tlemte te chu sawm khawmin ka tho chhuak leh a, ka ding ngil thei tawh lo.

Ka hmanraw neih ve chhun torch light leh thing zar pawh ka thlauh ve ve tawh, kan awmna zawl lai chu thlain a rawn chhun eng ve a, Angel-i'n torch light in Victor-a nen chuan min en reng bawk a, abak eng dang a awm lo. Min rawn pan leh a, na em em hian min hnek thal leh pawp mai.

Tha ka nei mang tawh lo, Sarah-i mutna lam pan chuan ka bawkvak phei a. Sarah-i chu ka kuah tlat a, abak tih theih ka nei tawh ngang lo a ni. KA samah chuan a rawn kek a, min theh phei leh dawr a. Thingkungah chuan ka chal ka tauh a, ka hai chhawk mai. Leiah chuan ka thal leh ta tawp mai a, ka ka chhunga thisen chu ka la hak zui.

Ka khuh vak vak a, a hrehawm takzet. Victor-a lah chuan Sarah-i chu a en vung vung a, a khawih ang tih ka hlau takzet. Ka lu a hai tawh em em a, mahse ka rilru erawh ala harh fim reng thung. "ZAWnga...i kut hmawr pawhin khawih suh. Ka la dam ania, min rawn that phawt rawh." ka la ti fan a.

Mahse ka tho thei tawh lo, chakna reng ka nei tawh lo. Min rawn pan phei a, min thut bet ta run mai le. Chutah ka hrawkah bawk chuan a rawn rek leh ta, ka kut chuan theihtawp chhuahin dan ka han tum ve a. Mahse a rekna tial tial a, ka beng a chhet telh telh in ka hria. Victor-a mitmeng sen rum mai chuan mi melh run a, mahse ka hmu fiah lo tial tial.

Ka ri hriatna te chu a zawi tial tial a, ka kut chu ka phar vak vak ringawt. Hmanrua chuh tumin ka bul vel chu ka dap kual ruai a, mahse lungte takngial pawh ban fuh tur a awmlo, leinawi leh hnim vek a ni. Mahse chutia ka tal velnaah chuan ka kekawr ipte ka dap fuh a, engemaw ka dap fu hlauh mai.

Ni e, Bena motor chahbi kha ka ak reng tak e. Thei leh thei lovin ka phawrh chhuak a, chutah a nakah tak chuan theihtawp chhuahin chahbi chuan ka vit ta a. Min rehna chu a ti dul deuh a, tlem chuan ka hmu fiah thei ta deuh. MAhse ala thlah chuanglo, chahbi chu ka han vit thuk leh a, ka theihtawp chuan ka herh kual bawk a.

Ana a ti ve ngang aniang, atawpah chuan min thlah ta, rang takin a ding chhuak a. A tawlhhnung nghal a, chahbi chu a nakah chuan a bur va mai. Tho chhuak chuanglo chuan ka va melh a, chahbi chu a phawi chhuak a. A rak that a, a nak chu a dawm vang vang mai. A thinrim hmel hle mai, a rum nghut nghut a.

Ka lam pan chuan a rawn kal leh a, min tham tho lawp a. Thingkungah bawk chuan lu tukhum sawh chawrhin min nambet leh a, "Ka thisen i chhuah ve amaw? Nang hian ka thisen i chhuah ve amaw?" tiin min hnek ta siah siah mai. Ka lu a hai muai muai a, ka harhfim tawh mawlh lo chu a ni ber e.

Hlauhthawn hmel taka Angel-i'n, "Victor..thawm ka hria ania.." a ti ri chu ka hre ruai ruai thei. Mahse Victor-a chu a thinrim laklawh tlat, "I thi khawp ang, ka hnek hlum thak dawn che." tiin min la hnek hawi siah siah mai. Ahnuah min rek leh a, a lu chuan ka luah a rawn tauh leh pawp thin bawk.

Chutah Angel-i bawk chuan ring angreng tak hian, "VICTOR...Mi an lo kal ania.." a ti leh a, mahse Victor-a chuan ala ngaithla duh chuang lo. Chutah leiah chuan dim baksak lo hian min theh tlu leh thuai a, a sil hian ka sil vek tawh. Ka chungah chuan rawn bawk lehin chemte chuan min tin a, "Mangtha le, Zuala." tiin chemte chu a lek kang a.

******************

Ka maimitchhing a, mahse ring tak mai hian Angel-i chu a au vak a, "VICTOR.." a ti tuar mai. Ka han meng chu Victor-a chuan alu alo dawm vang vang mai a, chutah a lu chu hnunglam atang hian tu emaw hian a rawn vaw leh pawp mai. A let tawp a, a vawtu ka han en chu Ruata a lo ni reng mai.

Ka bulah chuan a rawn thuhniam nghal a, "Zuala, i tha em? Khai aww....Lalpa leh, i va han thi nasa em em ve..." a ti tlawk tlawk mai a. Mahse Victor-a chu a rawn tho leh tual tual mai, kei erawh ka che thei eih tawh lo. A tiang ken chu Ruata chuan a chhar leh a, Victor-a chu ava vaw leh siah mai.

Mahse a tlu lo, a thingthi hnawk a. Thei leh theilo hian, "Ruata, vaw leh rawh." ka lo ti tawk tawk a. Ruata chuan a lu ah chuan a han vaw leh thuai a, a la tlu lo cheu. A awn deuh ruai ruai a, "ZAwnga...thi nghal rawh." tih pah chuan na em em hian a bek ah chuan a han hlap leh thuai a, thisen a per chhawk mai.

Khua chu a var deuh tan dawn tawh a ni ngei ang, kan awmna lai pawh a hmu chian ve theih deuh tawh. Victor-a chu a thal der mai a, a che tawh eih lo. Ruata chuan a han thut chilh ran a, a hnek ve ta siah siah mai. Mahse Angel-i a awm ve tih reng a hrelo aniang chu, Angel-i chuan chemte chu la in Ruata chu a rawn pan phei ve leh ta thung a.

Keilah ka che thei tawh der mai silo, "Rua...Ruata..i hnung.." tih chiah ka sawi hman. Angel-i chuan Ruata hnungah tak mai chuan a vit tlum ta pawk mai le, Ruata chu a eu zawk a. A au vak a, "KA pasal min thah sak i tum amaw? Nang hian ka pasal min thah sak i tum amaw?" tiin a vin vak vak a.

Chemte chu a phawi ri leh hrawk a, vih leh tum chuan chemte chu a han lek kang leh a. Mahse lungtum lian tak hi a rawn thlawk fua a, Angel-i lu ah tak chuan a ri pawp mai. Ka va hawi phei chu RAchael-i a lo ni, ka thaw huai mai. Angel-i chuan chemte chu thlauhvin a lu a dawm vawng vawng a, mak tak maiin a la rawn tho kang thei cheu nia.

Rum tak hian Rachael-i chu a melh a, a hmai dang var pup ah chuan thisen a luang zawih zawih mai. Rachael-i zawk pawh chu a zam hmel leh zawk em em a, a tawlh hnung hrut hrut mai. Chutah Angel-i chu a t(r)e vak vak a, Rachael-i lam pan chuan tlan pheiin a va zuan ta mai a. Leiah chuan a bawh tlu a, an insual dun ta.

A hliam tuar zawk Angel-i dinhmun chu a tha leh zawk ta tlat mai, Rachael-i chu a beng nual hman a. MAhse an insual lai lo en mai mai thei ka nilo, chau tawh hle mah ila Rachael-i chu ka chhan ve ngei a ngai. Ka taksa hmun tin deuh thaw ah hliam ka tuar tawh a, ka lu lah a hai em em tawh mai bawk si.

Tho tura tan ka lak chhung pawh a rei ngang mai, minute 2 dawn vel ka hman ka ring. Rachael-i pawh a thi phung tawh, mahse Angel-i chuan hliam a tuar vang nge, chuti maiin a hneh bik hauh lo. Chemte chu ka chhar a, Angel-i'n Rachael-i a bawhbet lai chuan a hnungah ka va vit ve ta siah mai a.

A eu zawk a, muangchang hian min rawn en a. A ka atang chuan thisen a rawh khuh chhuak kharh kharh a, "Ka...ka inthunun theilo a ni. Ka...ka tihpalh." a ti zawi sap a, a bawk nghal thlawp mai. Keipawh chu ka ding rei theilo, ka tlu ve nghal thlawp bawk a. Khua chu a var ve titih tawh, ni erawh ala chhuak lo.

************************

Angel-i chu thawk pawh a thaw tawh lo, a thi nghal a ni ngei ang. Chutah Hmaikawra chu a rawn la tho leh ta cheu mai, rang takin RAchael-i chuan min pawt phei ve lehnghal a. Mahse ka tho thei ngang tawh lo, kan lam pan chuan a lo phei leh a. Ruata'n a lu a avuakna chu na ala ti ve ngang aniang, a rawn pei phei chhu chhu mai.

Khati khawp khan a vaw nasa tawh a, chumai nilovin a nakah chahbi khan ka vit hrep tawh kha a ni si a. Mahse Angel-i zawnah chuan a tawp chat a, a thingthi a. Angel-i chu a en ngawih ngawih a, a thinrim hmel kher mai. Chunglam a hawi chho a, a au vak vak mai. Rapthlak tak a ni, kan awmna ramhnuai chu a khawk rum rum thei hialin ka hria.

Chutah thei leh theilo hian a pawm kang a, rum tak hian min en dun a. Mahse min ttihnat chhunzawm a tum tawh lo nge, lehlam a hawi a. Angel-i pawm chung chuan min kalsan ta a, umzui chu kan tumlo nasa. Ruata bulah chuan kan va kal nghal a, mahse Angel-i'n a vihna chu a tuar zo lo, a lo thi der tawh.

Rachael-i chuan tap chungin, "Ruata...avan pawi tak em!" tiin a ruang chu a kuah ngawih ngawih mai. Sarah-i erawh chu ala dam, ala harh lo hrim hrim. Jacket hmang bawk chuan ka paw leh a, khua a eng tawh deuh bawk nen. Ruata ruang pawh chu tih ngaihna awm hek lo, kan kalsan ta ringawt mai a ni.

*****************

Kawngpui lam zawnga kan kal zel lai chuan khua pawh a rawn eng ve tial tial a, ni pawh a tlang sang ve tawh khawp mai. Kan inbe miah lo, ngawi reng chuan kan kal zel a. Khua a eng tawh bawk nen, kan kal kan kal hnu chuan kawngpui kawng niawm tak chu kan hmu ve thei ta. Kan zawh chho zel a, a tawp a tawpah chuan kawngpui chu kan chhuak ta hlawl mai.

Sarah-i chu leiah chuan ka nghat a, "Bawihte, kan him tawh e. Harh tawh rawh, tho tawh rawh." tiin ka han sawi vak vak a. Mahse a taksa a zawi vek a, chet pawh a che eih lo. "SArah...harh rawh...harh rawh." tiin ka sawi vak vak a, mahse min chhan chu sawi loh, thawk pawh a thaw tawh lo.

ZAwi sap hian Rachael-i chuan, "Zuala, Sarah-i a awm tawh lo." a ti tham tiak a. Ni e, ka nau Sarah-i chuan Victor-a te damdawi pek chu a zo lova, a thihpui ta nge nge tihna a nih chu. KA nau, ka nau neihchhun tak meuh meuh, kum 16 leka upa chuan min kalsan ta. "Nilo SArah...kal suh...BAwihte.." tiin ka tap hawm hawm a.

*******************

Sarah-i ruang chu ngawi rengin kan thutpui a, Rachael-i nen chuan kan inbe lo hrim hrim. A khat tawk chuan ka tap reng mai a, ka khua ala sik lehnghalin ka hria. Ka taksa zawng zawng chu a na chhuak vek tawh, khua lah chu a vawt reuh phian lehnghal. Darkar 1 vel hnuah chuan sumo pakhat hi a rawn tlan a, Rachael-i chuan a lo phar vat a.

Driver leh mipa pakhat chauh hi an lo chuang a, min hmu chiah chu mak min tih dun hmel kher mai. "Ehe...thianpa, enge inchungah thleng a?" tiin min zawt a. Mahse keichuan zawi sap hian, "Ka pu, khawngaihin min hruai haw rawh u." tih ringawt chuan ka chhang a. Mahse RAchael-i zawk chuan thil engkim chu a hrilh fiah ta a, abak chu engmah ka hre mumal tawh lo.

Ka vai ruai a, engtin nge min hruai haw tak pawh kha ka hre tawh lo. Victor-a kha a dam chu ala dam chiang a, mahse khawnge a awm tih erawh tuman an hre lo. Hemi ni la la hian Victor-a chu zawn nghal a ni a, mahse amah chauh nilovin Angel-i takngial pawh an hmu zui talo a ni awm e.

************************

THE END



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)