RAICHEH THLARAU IN A FAPA LAK A TUM

Hlauhawm lampang hrim hrim hmun hrang hrang a mi lakkhawm...
Hluhlu-i Khiangte
Posts: 93
Joined: April 7th, 2021, 10:04 am

RAICHEH THLARAU IN A FAPA LAK A TUM

Unread post by Hluhlu-i Khiangte » April 10th, 2021, 9:17 pm

RAICHEH THLARAU IN A FAPA LAK A TUM



By-Hluhlu-i Khiangte




'Aldrin a nu, duhtawk teh, i fapa leh i pasal hi min hmangaih anih chuan khawngaihin duhtawk rawh', tiin ka fapa Aldrin Lalnunkima chu tihnat hlau zet a kuah pahin a nu thla chu ka be pah mawlh mawlh.



Ka nupui, ka hmangaih em em Elizabeth Liandingpuii, thla li liam ta maia min boral san tawh ngei kha a ni. Minung hmel a pu lo a, a mit a sen rum a, a sam a thur bum a, a kawrfual hak, nau a neih dawn a a hak paw dal riai mai chu thisen in a chiahpiah nuai bawk, a landan chu rapawm tak ni mahse, ka tan erawh ka hmangaih, Lizi kha ala ni reng.



"Ka fapa min pe rawh", a ti ţeng leh chhuaih a, a au tuarh rualin kan khum lu lam a tukverh darthlalang chu a keh darh chuaih bawk. Ka fapa a ţap uar sauh a, a hlau takzet tih ka hria, 'Lizi, i fapa ngei thlaphang taka i siam hi thil ţha lo tak ani tih i hria em?', ka ti dam dap, chutah, ka nupui, ka hmangaih thlarau mit a ţang chuan mittui a lo luang chhuak a, a landan rapawm zet chu ral riai riaiin hmeichhe duhawm lutuk, khawngaihthla la zetah a chang leh, theih nise kuah a, ka ţang a bei tir a hnem ka duh takzet, mahse, ani chu thlarau mai a ni tawh.





A ngik faih faih a, "Ka hnute tui a mamawh, a nu ţangnem belh a mamawh asin, ka fapa duat khan, vawikhat, vawikhat tal pawh kuah a, pawm chung a duat zet a chulin, ka hnute tui mamawh a a ţap ngak ngak kha a mamawh pek ka duh asin", tiin a sawi a, a ţap pah miau a, a aw pawh a bah niaih, chutah, "ka lo kal leh ang",ti a sawiin a sawi rual rualin a bo leh hmiah, zan dang ang bawkin.




Khum ah ka ţhu hnawk a, hah zet a hui pap pap pahin ka fapa chu zeilo zetin ka pawm a, ka sawi ve hlu hlu a ,a ţap chau a ni mahna, reilo ah a muhil veleh mai bawk .'Bawihpui, iva rethei ngawih ngawih ve mawle', tiin ka thaw hap a, tihnat hlau fahran in khum ah ka mut riai riai a, kei erawh ka mut a chhuak tawh hlawl lo, mangang takin ka ţawngţai ta ngawt.





Ka hming chu Lalchhanhima a ni a,Tete tiin min ko ţhin, kum 30 mi ka ni a, Aizawl Bethlehen Vengthlang ah khawsa in fahrah ka ni, ka nu leh pa ka hrelo a, Home a seilianin kum 18 mi ka nihin ka chenna home ka chhuahsan a,.keimah in ke ka pen, ţawng tam lo fahran ka ni. Bethehem Vengthlang ah mi inhnuai luahin ka khawsa a, hnathawkin nitin mai kawla nichhuak chhiarin ka inhlawh, vai mistiri zuiin ni khatah khang hunlai khan cheng 300/- ka hlawh ve ţhin.




Mipa ta ngang chu mamawh ka ngah lo a, ka eikhawp chu ka thawkchhuak ve thei mai zel, nitin a ka inhlawh bakah bungrua, cement, balu leh rawra vel a lo thlen in ţheka in ka thawk bawk a, sum pawh ka harsa hran lo, chawm tur leh enkawl tur nei hek lo le.




Chhingaveng a kan insak lai kan zawh hnu in Republic veng, pi Pângi peng bul lawkah hna kan thawh zawm leh a, chutah chuan a ni ka hmangaih em em ka tawn tak ni.




An hna kan thawhsak te chu mi lian tak an ni a, an pa ber, ka pu Lawmzuala chu contractor niin a nupui, pi Mathari pawh sorkar hna a nei, eng hna ber nge ka hre lo na a, hna hniam erawh a thawk hauh lo tih ka hre ve thiam. Fanu duhawm zet mai, Elizabeth tih hmingpu an nei a, an fa mal niin a duat pawh an duat hle nghe nghe, kum sawmpakaw mi lek a ni a,.kei erawh kum 27 mi ka ni tawh, chhun chawlh laia thingpui leh a hmeh min pek chang te hian ka lo thlir leh dauh dauh ţhin a, min en ve rual rualin mipa e ti lo in ka lai ru deuh ţut ţhin.




A nui hmel a mawi em em a,.a mitmeng a mawiin a sí sap a, a sam a sei in a ngil a, a tle siau bawk, a hnute bu a ţha in a kawng a fék rât a, a mawngbawr a lianin a nalh zaih zaih hle, a mithmul a er tan a, a mitmeng a paw râm mai bawk, a biang a tài têk ţhin a, piai hlak ka chak ţhin teh e, chu zawng zawng aia ka mit la tu erawh chu a hmui duhawm zet, a hnuailam chhah tap, sexy zet a senno châk mai chu a ni, ka phuloh, ka neih phak loh tur mah nise muthmun ah ka suangtuah fo a, ka mit ka chhinin a hmel a lang a, a nui sen sen te, thingpui no a rawn seng zawng a a nui seih ţhin te khan Vala hi min lêm ve chiang em asin.




'Lizi, ka duh lutuk che a, mahse,ka phu silo che', ka ti bah nak a ,ka lai viau mai, Elizabethin min duh thu min hrilh miau a, "Ka duh lutuk che Tete", tiin zak hmel sen ap ap chungin min hrilh, ka hamhaih a, ani nen a kan kar ka ngaihtuah a, kan kar a hla mah mah.




Ka khawsak a hniam a, ani lakah chuan ek pawh ka tluk lo, mahse, hmangaihna chuan kan karah thu a thlung tlat a, kei lahin ka hnial hneh bik silo, ka duh a, duhawm ka tiin ka hmangaih hialin ka hria, chu ka hmangaih chuan min duhthu min hrilh a, mak ti taka en ngawt ngawt bak tihtheih ka nei lo anih kha.





'Mate, i nu in a ngai che a, a lo tlawh che anih kha, a hlauhawm loh ania, a duhawm in hmangaihna ngah tak a ni a, mahse, ilo pian khan a na tuar lo in a kal ta mai a ni', tiin ka ţawngţai zo chuan ka fapa Aldrin chu ka be mawlh mawlh a, ani erawh a thaw sak sak a, tui zetin a muhil daih, rapthlak taka rawn che ka nupui, Lizi erawh a reh hmiah tawh thung.




"Ka pu, khawngaihin rem min tihsak hram rawh, buaina min thlen sak miah lo ang, a la sen em a, keiin a ei leh in tur thawh ka ngai si a, amah awm tu nen chauh a kalsan chu ka ngaingam silo, khawngaihin", tiin ka hnathawhna pa chu a khawngaihna ka dil a, a kianga ţhu ve a nupui chuan lainat hmel zetin ka fapa ka pawm chu a en ngawih ngawih a, rawn ban da da in a pawm a, duat taka a kuah ka hmuh chuan ka mittui ka khap per sak thei.




Tuna pawm tu hi ka nupui, ka fapa hringtu kha ni se aw, tiin duhthu ka lo sam leh hmanhmawh.




"Ni e, han thawk phawt la, hei, ka nupui hi a khua a har thei lutuk a, a khawhar hnemtu te pawh ani ang chu, fanu hlir pali neiin an ni lahin pasal neiin in hrang an chang vek tawh si a, hna i thiam zia leh i taimak zia ka ţhianpa kâ aţangin ka hria a, chuvang chuan ka ngaithiam ang che, zawmthaw taka hnathawh ka duh hauh lo ania", tiin hna kal a ngaih tawh thu a sawi a, keipawh lawm takin ka fapa ka fawp zauh a, ka hnathawhna lam tur ah ka phei a, hna ka thawk mawp mawp.




Ka nau min awmsak tu nen chauh a in lama awmtir ka ngaingam ngang lo, chhun eng mah ni se a nu thla in lak a tum leh ka hlau a ni mah.




Chhun thingpui in hun a ni a, ei tur an rawn chhawp chu kalsan vutin ka fapa lam ka pan a, ka hnathawhna nu in duat takin a lo pawm a, a lo muhil sak sak, ka hnathawhna nu, pi Sangi chuan min lo nuih var var in Aldrin chu naute thuawih leh fel tak anih thu a lo sawi a, a lainat thu sawiin a nu chungchang min zawt nghal zat.




Ka nupui chu Elizabeth Liandingpuii anih thu leh kum 2 ngawt kan inneih hnu a nau a pai ve chauh thu te, nau a hrin hnu a a boral zui tak mai dan te sawiin ka fapa nen kan in awmdun rak rak ţhin thu te thiamlo tak chungin ka hrilh a, ţawngkam ka thiam loh bakah ka nupui chanchin tlem chauh ka sawi pawh chuan mipa hi min ti hnukulh ru ţun thei, mittui tling pam in ka thusawi a lo ngaithla, ka nupui ka sun avang leh ka fapa a la sen em avanga hna pawh thawk lo a thla li ngawt ka awm mawl tawp thu ka hrilh lai chuan sawi tawhlo turin min ti vat a, a ngaithla ngam tawh lo tih ka hria,.hmeichhe hnuk no a ni a, kei mipa ngei pawh ka huntawn in thawklak harsa khawp a min siam chuan ka chanchin ngaihthlak ringawt pawh a tan a hrehawm dawn tih ka hria.




Ka nupuiin min hmangaih luat avang a a chhungkua, nuamsa taka a awm theihna hmun kalsan a min zui a, kei, mi rethei bakberh tè min zui thu te ka hrilh hman lo. Hmangaihna in kan nupa nun a bu a khuar miau avanga retheihna in kan kar a pawhchhiat loh thu te kha ka hringnun thawnthu a ngaihnawm lai ber a ni a,.kawng bumboh ka zawh pui,.ka nupui in min kalsan erawh na ka ti hle, ka hnathawhna nu chu a ţap ţiau bawk a, ka fapa chu a mittui hru tawk chungin a en a, a mit aţang chuan ka fapa a melh zawngin lainatna, khawngaihna leh hmangaihna ka hmu a, keipawh ka mittui a tling ve hial.





Hna lama let tur leh Aldrin chu ngaihtuah lo turin min hrilh a, keipawh thuawih takin ka let veleh mai, darkar khat kan chawl a, ka thil ei a tui loh avangin an thingpui leh a hmeh min chhawp pawh ka ei mang lo.





Thawk leh mawp mawpin ban hun a lo nih chuan ka fapa leh ka fapa min awmsak tu Mapuii nen chuan kan veng lam panin kan chhuk hnak hnak a, in kan thlen chuan inbualfai sawk sawkin ka inbual zawh ah ka fapa ka buaipui vat a, Mapuii chuan ,"U Tete, kan in hla lo mahse ka lo awmchilh tawh mai dawn che u em ni?Kartawp ah ka haw mai ţhin anga, i hnathawh a rum si a, i chau ţhin ngawtin ka ring, chhun lam a i chau nen zan lam tal Aldrina ka lo enchhawk thei dawn che a, zan ţah te a neih palh phei chuan mutmu i tuah thei lo anga, i hriselna pawhin a tuar mai ang, aaa, kha a tuar der tawh chu a nia", a tih chuan ka fapa hnute siamchawp hnek tir pah chuan ka melh a, ni e, mutmu ka tuah ţha mawlh lo, ka taksa ah lang chhuakin ka tla kawk kawk nghe nghe, ka fapa vang chauh a nilo, a nu ka sûn nen, a nu leh chuan min rawn tibuai fo mai bawk si a, a boral aţanga thla khatna ah rawn inlar ţan in a rei deuh hnu phei chuan zantin deuhthaw a rawn inlan ta ziah.





'I theih chuan a pawilo a, mahse, hlawh ka pe ţha thei silo che a, in riahchilh phei chu itan i hah nen a inmil lo èm bawk a, i chhungte lung pawh a awi zozai lo ang', ka tih chuan thawmhnaw a va lak zawk tur thu sawiin ka fapa min awmsak tu, nula fel leh mawng zang zet Mapuii chu a chhuak nghal nalh a, ka fapa pawm chungin a chhuahna kawngkhar chu ka melh tawp.




Lo riak mahse pawi ka ti chiam lo, midang hmai zahin Lizi pawh a rawn inlar loh phah deuh mahna le.





Rei thang lo in a rawn let vat a, zanriah eiin rei meng lo in kan ei puar hnu ah kan mu a, kan in a lian lo a, pindan pakhat chauh a awm bawk si, pindan lamah mu turin ka hrilh a, kei chu ţhutthleng sei ah hian ka mu mai ange tiin mutna ka insiam a, Mapuiin tih tum viau mahse Aldrin-a ngaihtuah turin ka hrilh thung, nau enkawl hi a namai lo a, keiin ka hunawl apiangah lakchhawk ţhin mahila a hah viau tih ka hria, Mapuii te hi an khawsak sàng tak nilo mahse kei ang em a bet erawh an nilo a, engvanga ka kiang a thawh duh tlat nge anih pawh ka hrelo, dawr lian vak lo an neih bakah a pa hi Sorkar hnathawk a ni a, unau pahnih chauh niin mi hnuai a inhlawh tur êm chuan an khawsak a harsa lo, BA a graduate hnu ah a hrisel loh em avangin zirna a chawlhsan thu a sawi tak kha maw....A felin a mawng a zang em em a, kei leh ka fapa tan chuan malsawmna a ni hawt.





Hetia min riahchilh chuan a hlawh te pawh ka san ve ang chu, Pathian zarah mi chawkhawn em chuan kan khawsak phah bik lo ang.




Ka tlangval lai chuan hna ah ţha viau mahila ka hah chhuanlam a hmangin zu in ka ching a, ngawlvei erawh ka ni hran lo, min khapbet tu, nu leh pa ka neilo nen zu kha ka in awmtlei ve na a ni ber a, ka hnathawh pui te bak ţhianţha ti a chhiar tur lah ka nei hek lo.




Chutia zu ka in chhung chuan ka hriat lohin ka thawh hah sa, thlan tui luang zawih zawih a hah hnepa ka thawh sa kha ka taksa tichhe turin ka lo lei reng hi a lo ni a, ka harh tlai ţhelh. Mahni chauh a khawsa, inkhawl ţinţen tawh tur kha zu ka in tam tial tial a, ka mamawh ka inluah man leh ka inchhung mamawh ka lei bak kha chu a zawng zawng deuhthaw in zu in nan ka hmang ta hial mai.




Hma hun thlir a rilru nei ran a khawsa ka ni lo a, chu chuan min vaw chhia in ka hmangaih Lizi lakah pawh ka inthlahrun phah, a kum a kum chuangfe hna ka thawk a, chawm leh hrai tur nei hauh silo khan sum khawl ka nei mang lo, chuvanga Lizi nu leh pa te pawhin min iai a an hna pawh ka thawh ve remti ta lo an ni nghe nghe a, mahse, Lizi min hmangaihna kha a nasa em a, an hna aţanga min ban thu a hriat zan la la in ka in ah a rawn lut hlawl anih kha, a luggage lian fahran lo nen khan.




Nunhlui ngaihtuah a ka hmangaih Lizi hmel duhawm tak ka mitthla a ka chàmtir rauh rauh lai chuan pindan lamah hmeichhe hlau ţê thawm ka hria a, rang taka inperh tho zawtin ka tlan lut vut a, thla èngin tukverh aţanga inchhung rawn chhun lut raihin a thim mup lo a, êng fiah tak erawh a nilo.




Light on na plug dap in ka hmet eng khap a, Mapuii leh Bawihpuia ko chungin ka hawi kual vat vat.




Karei maw!!!




Mapuii chu Aldrin-a pawm chungin bangkil ah a lo ţhu tawm kak a, hlau takin a khur dawt dawt. Ka nupui chuan a hma lawk, hlam hnih awm lek a thui a ding chungin nasa zetin a lo insiamchhiat khum anih chu!




A kâ te chu a lo keu a, zau takin, a mit lah a rapawm takzet, rapthlak thei ang berin a lo tihţhaih chu niin, Mapuii, hmeichhe awmnem tan hlauh loh chi rual a nilo. A kuttin sei sín sang ţhin chu rapawm khawp a ti seiin ham tum ni awm takin Mapuii chu a pan a ,'Elizabeth', ka tih vín ţhak rual chuan lungchhiat hmel em em in min rawn en.





A hmel rapawm zet chu dahţha in ka hmangaih, nunnem em em hmel chawplehchilhin a pu leh der tawh.



Lungngai hmel pu chunga min melhin min rawn panhnai hrat a, "U Tete, ka fapa ka duh, hmeichhe dang in an kuah ka remti lo, a nu kiangah ngei hian a thla a muang dawn asin, ka kiangah awm se, ka enkawlna hnuai ah ngei awm se ka duh asin, tinge i hriatthiam loh, min hmangaih lo em ni?", a tih chuan min ti hamhaih in min ti thinrim kher mai.




'Lizi, ka hmangaih che, keimah ka in hmangaih aia nasa zawkin ka hmangaih che a, chutiang bawkin kan fapa pawh, hrethiam zawk ta che, nang chu minung khawvel ah minung tisa pu in i awm thei lo a, i fapa pawh i enkawl thei tawh hek lo, khawngaihin lo inlan tawh suh', tiin ka thinrimna dahţha in ka ti dam dap a, thawklehkhat ah thinrim hmel pu in Lizi chu a in hrosa nghek nghek.




A sam thur bam mai chu a kek nawk nawk a, a ràk ruai ruai bawk, rapawm takin, chechang lo lekin ka en ngawih ngawih a, ka thawk ipik lutuk chu ka mit ka chhing vang vang a, meng chhuakin ka chhipsam tuai vut in na zetin ka mit ka chhing sawk, ka hah a ni, ka hah ngawih ngawih, ka fapa uar fahran a a ţap ri raih raih ka hriat chuan mengchhuak in ka hawi vat, Lizi chuan a kut tiseiin a kutţang rapawm em em mai hmangin lak a tum a, Mapuiin a theihtawp a nghetin a kuah ve tlat bawk. An inchuh a, Mapuiin a tha tawpin a kuah bet ve tlat nen Lizi pawhin a la thei mai bik lo.




Ka fapa Aldrin, a hringtu nu thla ngei a hlauh avanga uar zeta ţap chuan ka mipa thinlung a kaitho tlat, choka lam ah ka tlan vut a, bangrel a ka chempui thiah chu la in pindan lam ah hmanhmawh zetin ka tlan lut leh a, Mapuii kut aţanga lak tum a Lizi'n kan fapa a pawh hrawk hrawkna kut chu ka tha tawpin ka sat hmiah a, a bung hmawk mai!



Ka nupui Lizi kut ka fik aţang chuanin thisen, duk em em mai a chhuak zur zur a, a rim a chhe kher bawk.



'Kal bo rawh, rawn inlan tawh suh, keimah ngei hian ka that nawn leh palh ang che', tiin ka thinrim insum zo lo chu ka au chhuak ţhawt a, Lizi chuan a ban, a kiu aţanga ka fik hmawk chu dawmin min melh ngawt ngawt, rapawm zetin a nui uarh uarh a, thinrim avanga rang taka thinphu dawt dawt chungin ka melh run thung.




A nui a tawp chawt a, a nuih tawp rualin lungchhe zetin a ţap zawm zat, thinphu dawt dawtin ka en a, ka tha te zu khur thei a!






Ţap chung chuan min rawn en a, a mitmeng zet chu(h)!




Natna in a khat a, khawharna a langchhuak a, a lainatawm lutuk,a landan a inthlak zut zut a, rapawm taka a khawsak hnu ah khawngaihthla la thei ang berin a lang leh a,hriatthiam har lutuk mai Lizi....




Lungkuai zeta a ţap chu hmangaihtu tan hian ngaihthlak a hrehawm lutuk, mipa pawh ka mipa thei lo, ka hmangaih rauthla, a fapa ngaihluat avanga lungleng a a thlarau pawh hahdam thei lo, lungchhe fahran a ţap chu ka thlir a, a ţap ri in ka beng a luh ngut ngut, a ţap ri a zawi tial tial a, a fiahlo tual tual bawk, a ţap ri a reh a, a mit a mittui la tling pam chungin min melh a, hawi kualin a fapa Aldrin chu a melh leh, min rawn en leh in zawite in a nui seih a, aw...Mihring tisa pu tawh lo mahse ava duhawm kher èm.




Min nuih rualin a ral riai riai a, a bo ta hmiah!




Ka dinna chhuatah ka ding reng a, ka melh ngai melh ngurin ka ding ngawi ngul ringawt.




"U Tete", min ti ţiak ri ka hriat chuan ka hawi a, Mapuiin ka fapa pawm chung leh hlauh avanga khur deuh bap bap chungin zawite in min lo pan a, ding vutin ka pan a, thlamuan tumin ka kuah chawt, a khur dar dar a, ka fapa erawh a nu a bo rual rualin a ţap a bang hmiah. 'Mu tawh rawh u, a lo kal tawh lo ang', tiin khum lam ah ka kai a, ka muttir a, puan silh tirin hlau lo turin ka hrilh sup a, ţhutthleng lam pan ka tum chuan Mapuiin min ko dingin, "U Tete, ngaih loh lamah ngai lo la, khawngaihin kan bulah i mu ve thei angem?Ka, ka hlau a", a ti bah niai a, ni e, a hlau khawp ang, ka en a, ka bu nghat.





An kiangah ka inthawlh a,Mapuii pawh tui takin a muhil sak sak tawh, an mu nghet ta ni a ka hriat hnu ah thawm dim zetin ka tho a, choka lam ka pan vut, bang a sana intar ka en a,zinglam dar 3(thum) ala ri lo deuh, cigarette leh lighter ban vutin ka ţan a, ka pak khu hlat hlat, tukverh ah dak in ka hawi a, Lizi ngaihtuah chhuakin ka hui leh pap ţhin.




Ka Lizi thihdan leh a thih hnu pawh a a khawsak dan hian ka lài a ti na em em a, ni e, a fapa hi vawikhat tal, a hnute tui pe in duat takin chul hman se a lung a dam ve deuh tur. Mahse le, kan nunna ah thu kan nei mawlh silo.




Cigarette a ral a, sana ka en leh chuan dar thum a lo ri vâ tawh, engemaw a thlen leh ka hlauh ve deuh tho avangin khum lamah bawk ka inthawlh leh a, rei meng lo in kar lo ah tui zetin ka muhil.




Phul hring mawi zet chung ah mipa naupang lian zet, chum biang mai, hian hmeichhe naupang tetak te mai, duhawm fahran, a sam pawh kir deuh bep mai hi a lo chhaih nui iar iar a, chu naupang pahnih duhawm dun lutuk chuan a lo thlir tu keimah ngei pawh hlimna, chhungril hlim veng vengna min pe hial nia!




Hmuhnawm ti taka naupang pahnih infiam nui hak hak ka thlir lai chuan ka bul lawk aţangin "I fapa, kan fapa Aldrin leh i fanu Saron te an nih saw", ka nupui Lizi aw ngeiin a ti a, phawk zet a aw lo chhuahna lam ka en chuan Lizi in min lo nuih var var.




Hamhaih zetin ka melh a, Lizi ti a ko chungin kuah mai ka tum a, ka tawk thei hauh lo!



"U Tete, kei chu thlarau ka ni tawh, ka fapa ka ngai a, ka pasal, nangmah nen hian, i thlazar hnuai a khawsak leh ka chak a, ka fapa nen, kan chhungkua a chhungkaw hlim tak din a, fapa chauh nilo i awh em em fanu pawh hrinsak leh che tluk a chak ka nei lo ,mahse, ka thei ve tawh silo a", tiin a mit a natna lang chung si chuan a nui lui var var a, lainat lutuk a thlir ngawih ngawih bak tihtheih ka nei lo chuan ka tha a ti na lutuk.




'Lizi', ka ti chhuak sup a, a mittui tlak hlau taka in pet fan fan in min melh a, "Mahse, i awh em em i fanu hringtunu ka ni dawn silo, ka fapa, ka hrin ngei pawh nu dangin a chawilian dawn a, kei chu theihnghilh ka ni dawn", tiin a ţap chhuak hawk a, a mit ah chuan thikna te, natna te leh khawharna a lang dawt zut.




Mangang taka kuah ka tum leh pawh chuan ka tawk thei chuang lo, ka hmangaih lungkuai zet a a ţap ka hmuh chuan ka tawt lutuk chu hah zetin ka au chhuak ţhawt a, ka hah hluah hluah.




Rei fe a ngawi a, chutah, "Mahse maw U Tete, ka fapa in 'ka nu' ti a a koh tur chu a fel a, kei tluk chiahin ka fapa a ngaihsakin a hmangaih dawn tih ka hriatna hian ka inhnem a, ka kalbo dawn a ni, ka tibuai tawh lo ang che u a, zalen tak leh hahdam takin in nun in hmang thei tawh dawn ,i nupui ni tur, ka fapa in a 'nu' ti a a koh tur chu Mapuii hi a ni, hlimna tamtak neiin malsawmna dawng ula, mahse, min han hre ve reng ţhin rawh aw", tiin a ral riai riai a, 'Lizi' ti a au ka tum chuan ka hming ngeiin Mapuiin min ko ri ka hria a, ka hawi vat.




Ka fapa Aldrin leh hmeichhe naupang kai a hlimhmel pu chungin min nuih var var in ka lam an rawn pan a, 'Apa' ti a fiah lo zet a min ko in hmeichhe naupang zawk chu a rawn tlan tar tar a, ka kiang alo thlen chuan ka pawm phut zetin a ban a phar deuh hliai a, ka lo pawm ve mai bawk.




Ka harh zawk a, ka ţhut chhuah hlawl rualin ka hawi kual vat a, ka fapa leh Mapuii ka hmu hauh lo.



'Mapui', tiin ka fapa min awmsak tu chu ka ko a, rang taka pindan lam a rawn lutin thingpui min rawn chhawp a, nui sen sen in "Ka mang ah Bawihpuia nu ka hmu asin", a tih chuan kanhmuh ve thu sawiin ka lo chhawn sup.




(A tawp ta)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)