RO BAWM

Hlauhawm lampang hrim hrim hmun hrang hrang a mi lakkhawm...
Hluhlu-i Khiangte
Posts: 93
Joined: April 7th, 2021, 10:04 am

RO BAWM

Unread post by Hluhlu-i Khiangte » May 26th, 2021, 4:09 pm

RO BAWM



By-Hluhlu-i Khiangte



(Aw le, vawiin May ni 26 hi ka ţhianţha tak Melinda Lalhlupuii, ka chak loh lai pawha min fuih a min zilh tu, kawng engkima ka rawn leh ka zawng zawng ka hrilh ngamna ni pawimawh tak, a piancham a ni a, atan tihtheih ka nei tlem em a, ka theih ve chhun tiin atan he story hi ka hlan ni rawh se, Mely, happy birthday, hlim takin a awm reng theih loh tih chu kei aiin i hrechiang, chak tura min fuih tu ini a, i chak tih ka hria, eng harsatna pawh tawk la i tlawm thiang lo, ka hmangaih che.)





Khawchhung aţanga hla tak in ah chuan pindan thim khup maiah ka ţhu ran a, min vuakna ka hnung leh ka naknem, ka taksa pum mai chu a nat em avang chuan ka ţhen leh chak chak ţhin, ka kut chu phuar a ni a, ka theihtawp chhuahin ka tal ve fat fat a, ka hawi kual leh hrak hrak ţhin, khang ramhuai rilru pu ho khan tlan chhuah ka tum leh a ni tih hria se min chansawm duh dawn tih lah ka chiang ngang mai si.



Theihtawp ka chhuah a, a tawp a tawpah chuan ka tal chat ve hlawl, ka thaw hawk a, mahse, thawm ka hria, ka lam pan a penthawm a ni.
Ka thin a phu dawt dawt a, hlauhna in min tuam chhuak vek tawh emaw ka ti a, mahse, a hma ai mahin ka hlau zual zawk.



Fahrah niin hnuchham enkawlna in ah ka khawsa a.
Kum 17 mi ka ni a, ka phirpui nen kan awm a, kei hi Emily niin ka phirpui hi mipa a ni a, a hming chu David a ni, piang hmasa zawk niin ka nuţa aiin darkar hnihin ka upa bawk, ka nu hi kan awmna hnuchham enkawlna in a thawk te zing ami a ni a, fahrah ve tho a ni. Chutiang bawkin ka pa pawh, ka nu hi mi hausa tak fanu mal niin an sawi a, mahse, ka pa a hmangaih avangin a chhungkua a thlauhthla a ni awm e, ka nau nen a kan pian hian ka nu chu a thi a, ka pa tuar thiamlo lutuk pawh a hnu rei vak lovah a inawkhlum.



Ka pa chu ka dem takzet a, ka chanah dahin ka zawmpui neihchhun lak bosakin awm ve ta ila dam ka thlahlel bikin ka ring lo, mahse ka la ti leh ţalh, ani kha chuan keini unau hi min nei si a, fahrah ah pawh fahrah lehzual turin min kalsan a ni hawt.


Engpawh nise ka nuţa nen kan zirna ah theihtawp kan chhuah dun ang a, nu leh pa la nei te aia sangah kan la ding dun ang tiin duhthu ka sam ve ţhin.



Nilai ni tuk a ni a, ka muhil ka harh chuan ka hlim takzet, zâng vah a tho in ka mang ka ngaihtuah zui rauh rauh a, ka nu leh pa te nen phul hmun hring dup leh zau tak, thlifim ngainatawm zet thaw heuh heuh karah hlim tak a infiam in thinlung chhungril ber aţangin kan lo nui ho a, ka class kalna chanchin te ka lo sawi siam siam bawk anih kha, ka mangramah tal an rawn inlar chuan min ti hlim takzet.



An thlalak mai nilo an chetla lai ka hmuh chak ţhin em avangin Sister Maria min hrilh ţhin angin ka ţawngţai naah ka mumangah tal rawn lantir turin Isua hnenah ka dil ţhin a, minung tisa pu in a tak ramah hmu in khawih theilo mah ila ka mangah tal ka khawih a ka kuah thei te chuan hlimna nasa tak min thlen a ni.


Nui var varin ka nu lak aţanga ka ro neih ve lunghlu ţhi chu ka tuai hauh hauh a, a mawi dangdai takzet.



Ka bedsheet te pawt marin ka puan silh te chu ka thlep ţha a, hlim takin ka zai pah rat rat bawk, chutia ka zai lai chuan ka room kawngkhar a rawn inkik karh karh a, ka puan thleh lai chu dahţha in ka va hawng vat a, lungngaih hmel takin ka nau a lo ding ran a, thil awmzia ka zawh chuan inla pa ve tak, mipa diktak ka ni ti ve ngat mai ka nuţa David chuan mittui far kauh chungin min kuah thlawp.




Kan nu leh kan pa home enkawl tu te chuan an thawhpui ţhin te fa kan nih vangin min duat viau mahse duh loh, accident vang leh thildang vang ni lova kan pa in min kalsan dan avangin min hnuaichhiah ru hlawm a, home enkawl tu te hriat loh karah kan natna turin min ţawngkhum fak fak ţhin.


Chung hunah te chuan inhnem na atan te inkuah fo mah ila tun ţum chu a dan a dang tlat, ţawngkam na tak kan dawn changin kei hi hnem ka ngai zawk ţhin a, ka nuţa hian min kuahin ka chalah a fawp a, ka lû min chul sakin reilo te lo nghak turin min fuih ţhin, nakinah hlawhtlinna ka la chang ve ang a, hlim takin, mite hmuhsitna tuar tawh lovin lal fanu ang maiin ka cheibawl ang che min ti fo, mahse tun ţum chu a mittui hial a far.



Ka hamhaih luatah kuah let nachang pawh ka hre lo.



Thaw hrawihin amah kuah let turin min hrilh a, rang taka kuah letin amah in a min hnem ţhin dan angin a lu ka tuaisak ve hauh hauh a, tlem a nawr hla hlekin ka kuai kun a, a chalah ka fawh sak vawng vawng.



A banah kaiin ka khumah ka ţhut tir a, a kiangah ţhu ve in thil awmzia min hrilh tura ka tih chuan kan inţhen a ngaih thu harsa tih hmel takin a sawi a, min ţhawn em avangin ka ka deuh hau ringawt.



Kan nu leh pa te kan lak ata an hrang tawh a, keini unau hi chu hrang ve thei kan nilo. A theih loh bur.

Fa atana min la duh tu an awm thu min hrilh a, mahse, kei chauh min duh a ni.


Rang taka tho in Mother Liliah room lam panin ka tlan vat a, kik pawh kik buai lovin ka hawng rawp a, ka hah avangin thawk ka la halh halh.


Mak tih hmel takin minlo en a, a bulah chuan pa valai tak mai hi a lo ţhu run bawk a, ani pawhin min lo en ngur.


Eng thil nge ni ta tiin min lo zawt vat a, la thaw halh halh chungin kan unau a kan awm hran theih loh thu ka sawi mawl tawp, ka ţawng zawngin ka mittui a far fap fap bawk a, khawdang hawi lek lo a min en hnuah thawk a la hawk a, heng thil hi chu lo la thleng tur anih thu min hrilh ţhin thu bawk min hrilh nawn leh fak fak hnuah a kianga ţhu mipa chu Mr. William ti a ko-in a hriatthiamna a dil nghal sap.



Duh lo lutukin ka lu ka thing nak nak a, Mr. William a tih pa chu hnaih rawk rawkin a hmaah ka ţhingţhi rawp a, mittui far zung zung chungin a hmaah chuan ka kut ka suih a, kei chauh nilo, ka nuţa pawh hruai ve turin ngenngawl thei ang berin ka dil ngawng ngawng, Mother chuan min khap ţhin a, mahse luhlul ka chhuah ve ngar ngar, Mr. William erawh chuan ngawi rengin min en ngur a, a tawpah chuan min kaitho a, ka dilna chu hnawl a ni dawn emaw tiin khawngaih ka la dil ţang ţang.


Mahse, dam dapa min kaitho in ka dar ah a dawm chawt a, nelawm taka min nuih vur vurin lungngai lo turin min hrilh sup a, ka thaw huai thei nia.


"Anih chuan kei leh ka nau min hruai dawn tiraw?", Ti a ka zawh ha chuan nelawm taka min nuih chungin a bu nghauh a, Mother in "Mahse, Mr. William", a lo tih chuan hlauhthawnna in ka khat lehnghal. "A pawi lo Mother", tiin a chhang sup a, packing ti tura min tiin min nuih leh vur vur. Kan insiam chhunga lehkha pawimawh vel an lo tihfel tur thu sawiin ka lu-ah min tuai sak leh zauh a.



Lawm avanga mittui far fap chungin ka chhuak a, ka pindan lam ka pan hnak hnak, ka pindan ka thlen chuan David a lo la ţhu run a, kan unau thlalak chu ka khum a ţhu chungin a lo en ngur.



'Dave', tiin ka ko sap a, rang taka ka lam lo hawiin a mit a tuai zeuh a, zawhna mitmeng nen min en chungin a ding hluai ringawt, a hlauthawng tih ka hai lo.



Nuih var varin ka buk khum nghat nghat a, hriatthiam loh hmel fe a min en hnuah a nui chhuak hawk a, min rawn hnaih ruakin min kuah nghal chawt.



Ka theihtawp a nghetin ka lo kuah let ve a, packing ti tura hrilhin a biangah ka fawh sak zeuh a, phur zetin a pindan lam pan turin a chhuak ve vut. Pathianin kan unau tan a vantirhkoh chuam a rawn tir ang maiin ka ngai a, ka hlim veng veng, hmuhsit kan nihna hnuchham in chhuahsanin pa kan nei dawn a ni a, nupui a neih ngei ka ring bawk, nu tia koh tur nei tura insuangtuahin ka lung te hi a su dup dup hial a, phurna, hlauhna leh hlimna in min chiah pawlh nawk nia.



Hlim deuh tak chungin ka thawmhnaw te chu bagah ka vawmlut mawlh mawlh a, a chang leh ka nui ri leh hawk ţhin, rei rial lovin ka inkhung fel vek a, lawm avanga ka mittui tla chu thup tumin ka hmai ka phih leh hnuah ka bag nen ka inhnuk chhuak a, kawngkhar bulah ka nuţa David inpeih thlapin a lo ding ran tawh.




Ka nuih var var a, a kut laksakin ka hum vang vang a, nun bul kan ţan ţha leh dawn ta tiin ka phun sap, thaw hawkin a bu vei nghut a, ka awmdan chiang niallo zet ang hian phurna leh huphurh rukna in a tuam ve tho tih ka hre thei.



Kan bag chu khaiin kan chhuak dun a, engkim a ti fel tawh tih hriat zetin home kawtah chuan Mr. William chuan min lo nghak ran a, kan unau a kan chhuak chu min hmuh veleh min nuih in min lo hui a, tim deuh daiin kan pan chhat chhat a, a motor changkang ve takah chuan kan bungrua hlang lutin kan ţhu lut a, tukverh ah chuan dakin kan seilenna hmun chu ka thlir dauh dauh.



Rei rial lovin kan tlan chhuak a, kan home hi khawchhung laili lamah a awm a, khawdai lam panin kan tlan tih ka hria.



Khawchhung kan chhuah san a, khua aţanga hla ve tawk takah hian kawngpui aţanga peng awmin kawng chu metal loh a ni a, fai erawh a fai phian, chu lamah chuan tlan zelin kan tlan thui tawh hle, mak ka ti viau a chutiang em em a hlaa han khawsak chu, mahse mi hausa ho chuan khua aţanga hla takah ram neiin mi chimbuai phak lova khawsak an duh ţhin tih te chu ka hriat ve tho avangin zawhna ka nei lem lo.




Compound zau nuam tak fai hun mai kan thleng a, Kan chuanna motor chu a ding dat a, motor aţang chuan chhuakin ka hawi kual ruai a, kei ang bawkin David pawh, kawtzawl zau tak awmin tuikhuah te a awm a, sava chiar nak nak thawm pawh chu a ngaihnawm kher mai.



Pangpar enkawl ţhat tih hriat tak te chu a vul chûk a, hmuhnawm ka tiin chung sava hram thawm te nen chuan a inchawih kher mai.



Engdang mah ngaihtuah lovin ka kal kual a, tuikhuah chu va hnaihin hnai takah ka bih a, sangha duhawm leh mawi tak tak an lo tleng zar zar mai, nui var varin ka thlir kual sek a, ka mitchhingin boruak thiang zet te chu ka hip leh kawk ţhin, ka kut chu tuiah chiah in sangha te chu tihnat tum si lovin ka infiam pui a, rang tak taka an leu zar zar chuan a ri meuhin min nuih tir hawk hawk thei.



Chutia hlim taka ka awm lai chuan ka hming a min ko ri ka hria a, ka hawi vat a Mr. William a ni. Inchhung lamah rawn lut ve phawt la tiin min bia a, keipawhin thuawih takin ka zui ve mai bawk, kawngkhar chu hawngin kan lut a, Mahse, ka nui hmel tawp tir riai riai tu a awm tlat.
David chu phuar hlawmin a lo awm a, a kut chu hnung lamah an lo phuar a, a kerek ve ve chu chair ke nen chain in an phuar belhbawm ran bawk, che thei lovin a awm a, a chal aţanga thisen luang chhuak ngiai ngiaiin min lo melh ţawk ţawk a, ţawng tumin bei mahse a ka chu hnawhphui a ni. A kiangah Mr. William chu va ding hnaiin hamhaih taka ka ding sai dar dar chu min nuih a, mak takin an thawm ka hre hauh lo!



Mak ti tak leh hlauthawng takin ka hnaih ruak ruak a, David kiang ka thlen chuan ţap deuh purin ka theih ang angin phelh ka tum a, hlauhna avanga ka tha khur chu a nasat avangin ka che hleithei lo, ka thlan a luang zawih zawih a, ka khawr vek!




Beidawng deuh takin Mr. William chu ka en a, nelawmna reng reng nei lo in thinrim hmel takin min lo melh chhuk run a, ka phu dawrh a, ka petek sawn hial! Mipa nelawm leh hnaih chakawm tak ni tawh lovin mi hlauhawm tak a ni ka hmachhawn ni, amah Mr. William ngei kha a la ni si.



David lam chu ka hawi leh a, ţawng tumin a bei tih ka hria, hnaih leh ruakin a ka hnawhna chu ka lak sawn sak vat a, "Emily, rang takin insaseng rawh, an thil duh pe hauh suh", tih chauh a sawi.



A lu a hai tih hriat takin a lu chu a thing deuh nawk nawk a, mahse, silai a puah dur rualin a ţhutna chair nen chuan a let tawp. Rak ţhatin ka khur zaih zaih a, David ka en chuan nunna nei tawh lo tih hriat takin che tur a awm tawh lo.



Ka hamhaih a, ka hlau nge ka awmdan ka hrethiam lo ka mang vek, thil thleng chuan min ţhawng lutuk tih chu ka awmdan ka sawifiah thiam dan ber a ni.



David hnaih a bawihsawm ka tum chu ka chhip samah min phih dak awrh a, na tih avanga rak chûl chungin ka tal ve chiam, tha tawpa tal ka ni bawk a a duh angin min thunun thei bik mai lo.




Chutia kan inchai lai chuan William ti vin fiak ţhak ri ka hria a, min chelhna a thlah ruai ruai rualin aw lo chhuahna lam kawngkhar lam chu ka hawi nghal vat. Mother Liliah a ni, min enkawl ţhin tu te zinga Father Jerome nen!



An hmel ka hmuh rualin ka thla a muang huai huai a, rang taka hnaihin an pahnih chuan ka melh tawn sek a, ţawng ka tum a ri hnawk deuh ţuak tih loh chu ka aw a chhuak thei lo.
An pahnih a an banrek ve ve a manin ka kai a, David leh rengna ah chuan ka kai phei dawt dawt ringawt.



David let hlawm reng chu kawkin Mr. William chu ka kawk leh tawp a, a hmel ka hmuh erawh chuan hlauh luat vangin Father Jerome chu ka ngheng rawk rawk, a mitmeng chu a sen rum a, huat hmel zetin min melh ngur bawk.



Father chuan amah a ka tlu lut rawk rawk chu nghet churhin min kuah a, duat taka ka sam thur hiang mai chu min chul sakin ţhutna awm ah chuan min ţhuttir a, ka chala min fawh sak vawng vawng hnuah thinrim hmel em em in a inher nghut a, Mr. William chu hnaih chilh nghalin a rem dan ang angin a khawih nawk nawk.



A lo indang zeuh zeuh tih loh chu engtinmah a khawih let hauh lo.



Nasa takin a khawih a, Mother Liliah a lo rak ţhat ţhat.



"A nuţapa i that anih pawhin ani hi hlauhlawpin siam suh ka ti lo che em ni?", Ti ţhawtin a hnek leh chawrh a, kei erawh ka nghing lawih thung. He mite hi William nen an inthurual!




Sawi sual inti zetin a kut kal lai chawl hmakin min rawn en a, 'Father', zawite in ka ti sep ringawt.



Anni ho hian inthurual in heng thil hi an ruahman a, chuan, ka nuţa pa hi that mahse an pawi ti lo, kei hi, kei ve hi engatan tehlul nge min duh tih erawh ngaihtuah ngaihna ka hre lo.


'Eng thil nge ka lakah induh?', Zawite tak tak bawkin ka ti leh sap a, "naupang fing tak ini", tiin Mother chuan min chhang ve thung.



"David hi i hnena kal tir duh ve tlat lo la chu nungdamin a la awm tur, i thiamloh a ni, i thah a ni", a tih zawm leh zat a, kei erawhin duh lo lutukin ka lu ka lo thing nawk nawk thung.
Ka unaupa hi ka thah a ni lo.
Heng ramhuaiho thah hi a ni. Kei ni lovin.



Mahse, kei hi engatan nge min duh?



"I rilru a zawhna awm kha keiman ka chhang ang che", tiin Mother chuan min rawn hnaih a, ka ţhu tawm chaih a, ka kut chu ka hum thlan dap, ka zam takzet.



"Rohlu kan duh", a ti nghat a, a nui var var bawk.



'Mah, mahse kei hian eng rohlu mah ka nei hleinem', ka ti bah niai a, za lo tih hriat takin a nui hak.
"Fahrah hausa tak ini tih i inhre lo em ni?", min ti leh in ka hmaah chuan a ţhingţhi a, ka mal chunga ka kut ka hum thlan dap mai chu a rawn hum vang vang bawk a, kei erawh chuan thil thleng avanga amah ţihna ka neih tawh avangin ka kut chu ka lo lasawn vat a, thinrim tih hriat taka ding chhuakin, "Chabi min pe rawh", tih fiak ţhak pahin ka hmaiah min beng a, ka hawi sawk thei.



Ka biang chu a thip vawt vawt a, chabi chu nei ila ka pe em em ang, mahse eng chabi mah kei hian ka kawl lo, ka mittui a luang zung zung a, 'eng chabi mah ka kawl lo', ka ti ţiau.



"Luhlul chhuah lovin min pe mai rawh, i nu khan ro hlu tak a hnutchhiah che a, he in ah ngei hian, mahse, chu ro bawm chu hawn theih a ni lo, chabi tel lo chuan, nang hian chabi chu i kawl a ni", tiin zawi dam dap, hlauhawm ru zet siin min be leh a, min melh chhuk ngurin a mitmeng hmang chuan warning min pe a ni tih ka hmu thiam ve mai bawk, mahse, eng thil mah pek tur ka nei hauh lo!




Ka khur dar dar a, engmah ka neih loh thu sawi leh tumin ka kâ ka ang ziai a, mahse ka ţawng thei lo, ka khabe chu a inkhawng dat dat a, vawt ka tih vang ni hauh si lovin ka taksa chu a khur dawt dawt, a nasa telh telh bawk, a hnuah phei chuan ka khurh nasat avangin ka taksa chu ka duh vang ni hauh lovin a che hlawk hlawk hial a, ka mur ar ar bawk nen khawi hmunah emaw anni ho hi pilbo san ka duh hluah hluah.



"A ţha dawn lo tawp mai", ti a phun supin father Jerome chuan min hnaih a, choka ni awm tak lama kal vutin rei rial lovin a rawn let leh vat a, a kutah syringe leh bur te takte a awm vâ bawk.




Bur chu hawngin a chhunga thil awm chu syringe chuan a hip a, min rawn hnaihin ka ban a la kang a, hlau takin tlanchhiat tum mah ila ka taksa chu ka thunun theih phak bakin a che nasa.



"Rawn dawm rawh u", a ti vin ţhak a, ka ban rekah Mother in rawn dawmin a chhak deuhah Mr. William chuan a rawn dawm ve bawk a, hriau chu ka banah Father chuan a vit lut riai riai a, na engmah ka hre lo.



Rei vaklo ka awmdan pangngai chuan ka la khur che hlawk hlawk reng a, min chiu na hnathawh nge ka zawi tial tial tih ka hre thei, ka vâi riai a, ka khur pawh a reh ta, anni pathum chuan min thlir ţhap a, engemaw an sawi tih pawh ka hria, mahse an thusawi ka hre lo, ka thil hmuh phe riai mai chu hmuh fiah tumin ka bei ngial a mahse zawimuangin ka tawp riai riai.




Nu hmelţha tak mai hian min pan a, ka nu a ni, ka fanu tia min ko in min hnaih a, a sam chu a var hnalh a, awmze nei tak leh nalh takin a kawi a, a hmel nung sarh a a mitmengah chuan min hmangaihna ka hmu thei, ka kiang a rawn thlen chuan min pawm vang vang a, "Ka lak aţanga i rochun i ţhi, mawi ti taka i chul ţhin i hlut em em kha ro awmna chabi chu a ni, mahse, i pe tur a nilo, i chanpual a ni a, i humhim tur a ni", tiin ka beng bulah min hrilh a, eng ro nge khang misual
pathum leh ka nu ngei pawh hian an sawi hi ka hre lo, mahse ka humhim ang, ka chanpual a nih phawt chuan tihna rilru pu in ka bu nghat nghat a, ka nu chuan min nuih var varin min chhem a, thlifim in min chhem heuh heuh rualin ka meng chhuak hlawl.




Ka harh rual rualin ka hawi kual nghal ruai a, pindan zau fahran lova khum dup takah ka mu tih ka hria, a thim ruih a, zan a ni tawh.



Eng inchhi a awm lova, tukverh aţanga thla eng rawn lut chuan pindan chu a chhun eng deuh raih thung.




Ka tho ţham ţham a, he in aţang hian chhuah ka mamawh a ni, anih loh chuan min that ve mai ang, tukverh chuan ka mit a la a, ka hawi thla a a sang hran lo, fit 3 awm vel
lek a sang a ni a, heta ţang hian chhuak pawh ni ila ka nat a rin awm loh.



Pindan chhungah chuan ka indap rak rak a, ka thawmhnaw bawm pawh an lo dah tel, vanneih thlak lutuk.



Bawm chu hawngin thawmhnaw ka la chhuak a. hmanhmawh taka inphelh sawk sawkin ka inthlak a, pheikhawk bunin tukverh ah chuan ka ding a, ka awmna pindan kawngkhar chu a ri rawk rawk, "Hrep hian Emily", ti vin fiak ţhak ri ka hriat rual rualin ka phu dawrh a, tukverh aţang chuan pawn lamah ka tla hlawm tawp, hrep hian, ka ke chu na tak a ni. Ka ke chu ka tlakna lamah rap lekin ka ulh a ni mahna, a hun lo kher mai.



Innemkhalhin ka ding a, pen hnih awrh ka pen a ka tlu leh hnawk.



Intipaukhauhin ka ding leh a, ţhen chak chakin ka kal lui leh chhat chhat.
Gate lam chu ka pan zel a, ka hnung lama ke pen ri pawh chu ka hria. Mahse ka hawi let lo.





Ka kaihza a thlep hnawk a ka ţhingţhi dawt, Father Jerome chuan a tiang ken a lei khawng dat datin min kal hual a, amah pawh en lovin ka inpetruh fan fan tawp.




"Tihnat a tihthlabar che tum mahse ka chhan che a, nang chuan luhlul chhuahin min tlanbosan i lo tum a", tiin min kal hual zel a, a rum leh nghut ţhin, thinrim tih hriat taka thawk na taka la leh hawkin, "ka biakna che pawh min chhang duh lova", vin taka tiin a ţawng a tawp rualin ka hnung chu a vaw leh pawp, ka bawk rawp a, a remna lai apiangah chuan min vaw ta zawt zawt.



Na ka tih avangin ka vial ngawih ngawih a, ka nak nemah te chuan min chhir leh zawt ţhin.



Kut min thlak chu a duhtawk a ni mahna a tawp a, min kuai zangthalin a rawn ţhu hniam a, ka biang chu chul riak riakin lainat hmel fe in min thlek ngawih ngawih.




Chau tak chungin a hmel chu ka en a, ka mitmengah chuan ngenna a hmu ngei ang, "kan fahrah hausa chuan tlanbo a lo tum a maw", tihel aw lek lek ka hriat rualin hlau takin Father chu ka en a, "he thil hi ti lo thei ka ni si lova", tiin a chhing sawk a, a hming a ko ri a awm rualin ka bekah tak min hnek dawt.



A thim leh ta mup mai.




Ka harh leh chuan a thim mup a, chair ah phuar beh ka ni tih ka hria, ka kut chu hnung lamah la kawp a phuar a ni a, ka ke pawh a pahnih in an phuar bawk. Min vuakna kha a ni ngei ang ka taksa chu a na thip hlur hlawm a, ka lu lah chu a na in a rit kher bawk.



Ka tal fat fat a min phuarna chu a nghet kher mai.


He hmun ata hi ka chhuah ngei a ngai tiin tal chhuah tumin ţan ka la leh fat fat a, chau eng ang mah ila beidawng thei ka ni lo a, ţap hman ka ni hek lo.




Theihtawp ka chhuah a, a tawp a tawpah chuan ka kut an phuarna hrui chu ka tal chat ve hlawl, ka thaw hawk a, mahse, thawm ka hria, ka lam pan a penthawm a ni.
Ka thin a phu dawt dawt a, hlauhna in min tuam chhuak vek tawh emaw ka ti a, mahse, a hma ai mahin ka hlauhna a zual zawk.




Hmanhmawh takin thawm awmna lam en zuk zuk pah chuan ka ke an phuarna chu ka phelh a, indap chawp takmeuh meuhin ţan hmun ka siam ve a, thir tlawn ni ngei tur ka dap fuh chu ka hum ve ran bawk.



Ka piah deuh chu a rawn inhawng a, eng nasa lo te a rawn lut raih, Father Jerome a ni, ka ţhutna chu enin ka awm lo tih a hriat chuan ka hming lamin a phun sup a, engkhaw sawi set set lovin ka thir tlawn ken chuan a tukkhum ah tak ka tha tawpin ka vaw chawrh a, a bawkkhup thlawrh mai, a lo luhna lamah chuan ka chhuak vat a, ka ke ulh kha a la na bawk nen ka kal chak thei silo ka thin a rim takzet. Midang ka tawh leh hlauin inven na atan ka thir tlawn ken chu ka la chelh reng a, rei ka la kal lo kailawn indawh chho zui mai hi ka hmu a, ka zawh chho ve tawp.



Kailawn tawp ka thleng a, kha in chhung kha a ni, a awmzia chu lei hnuai in an siam tihna! In lian tak a nih loh nen mak ka ti viau a chu mak ti hman ka ni lo, kawngkhar lam ka pan vat a, hawn mai ka tum chu pawnlamah a lo inkalh leh tlat, thinrim takin ka sam ka ţham tawk a, ka hawi kual vat vat. Tukverh pawh ka hmu lo.



A hmaa min khungna pindan ka hre chhuak zawk a, pindan zawngin ka kal kual leh, ka hmu ta hram e, ka thir tlawn ken chu hnutchhiahin a hma a ka chhuah na tukverh ngai aţang bawk chuan ka chhuak leh a, ka intih nat belh lo hlauh e, mahse hliam ka tawrh sa avang chuan ka na ţhem ţhum tho, ţhen chak chakin chungin ka ding sai dar dar a, gate lam panin ka kal chhat chhat, mahse, motor rum ri ka hre tlat mai le.



Ka ke na avangin ka tlan chak thei dawn lo tih ka hria, hmanhnawh taka gate chhuahsanin kawng thlang lama hnim pik zingah chuan ka vak lut a, ka biru fel deuh awrh tih ah motor pawh a rawn thleng ve vat.



Min hmuh hlau tak chungin ka bih dak dak a, Mother Liliah leh Mr. William te an ni.



In lam an pan a, kawngkhar hawnga in chhunga an luh veleh ka theih tawpa chakin ka kalsawn nghal, an rawn kalna lamah chuan kal lovin ramhnuai lam chu ka pan a, ka awmlo tih an hre vat dawn tih ka chiang miau, motor kawngpuia ka kal chuan phen tur nei lova biru ang lek ka ni dawn tih ka hre ve thiam tlat, pan lam tur bik hre lovin ka kal zel a, ka kal ril telh telh a, ramhnuai pawh a pilril telh telh.



Ramhnuai chu a ngaw a ţhat avangin a thim deuh ruih lehnghal.




Hawi tawn sek chungin ka kal chhat chhat a, hnuchham in aţanga min hruai chhuah aţanga ei leh in ka la hmuh loh avangin ka ril a ţamin ka chau viau, hliam ka tuar bawk nen ka ke pen a sak ţalh.





Ka awmna aţanga ral hla ve fe ah chuan silai thawm ka hria a, ka phu dawrh, ramhuai ho kha an nih ka ring, an silai hmehpuah chhan ka hre lo naa ka lawm viau mai, ka tan inralrinna dar a ni, thing lian pui pui a ding ngir khup a, thing lian tak hmanga inphen pah zelin ka theihtawp a chakin ka kal ve zel a, kawng mumal awm hek lo ka hma zawnah chuan ka kal miah miah.



Silai a rik dur rualin ka malpui a thip zawk a, ka ţhingţhi hnawk.



Ka mal thip zawk lam chu ka bih thla a, kah chu min kap fuh lo, a thawi a ni mahna le.



Mak takin thawm ka hre lawk hauh lo.



Min umpha ta e, ka thi ngei dawn anih hi ti rilru in ka bei ka dawng viau a, ka rilru in ka nu hnenah ngaihdam ka dil mawlh mawlh.





An hmel ka hmuh duh avangin harsa ti tak chungin ka inlet a, ka kianga thingkung chu belin ka ngheng a, ka awmna aţanga hlam 10 awm velah chuan silai a min tin ran chungin Mr. William a lo ding ran a, midang erawh ka hmu lo, ka beidawng lutuk chu hul zet a nuiin ka ţhen sak ringawt.




Thinrim hnel fe a min enin ka lam panin a rawn pen pawk pawk a, kan inkarah hlam hnih awm vel chauh a tla tawh tih ah chuan mak takin thli hi a thaw vuk vuk a, Mr. William pawh a ding chawt, thli thaw chu a nat avangin thing zar te chu a ri tuar tuar a, a thawm a ţha kher mai, khawpui a ri dur dur bawk a ruah erawh a tla hauh lo.



Mahse, mak takin chu thli chuan Mr. William awmna vel chauh chu a nuai tlat!


Chutiang thli na em em thawk si chuan ka kianga tla thinghnah takngial pawh chu a che eih lo a.
Nek tu nei ang mai hian a her sawk sawk a, a pai leh khut khut ţhin, mak ti taka lo thlir tawp bak tihngaihna ka hre bik lo, mahse, mak takin ka thla a muang ru huai huai nia.



Thli na tak chuan a chhaih kual emaw tih mai tur a ni.



A chunglama thingzar chu a tliak ri tuar a, rawn tla vawn vawnin Mr. Williama lu ah tak chuan a deng dawt, a tlu hlawm tawp a, ka mit ka chhing sawk, ka hlau nge vawt ka ti zawk ka khur leh ţan der nia.




Thawklehkhatah Williama leh rengna ah chuan hlimthla a rawn insiam a, chu hlimthla rawn fiah tial tial chu khur dat dat chungin ka lo en ran, khawdang ka hawi thei lo.



Ka nuţa David a ni.




David chu a thi tawh si a! A chalah tak mai a kap anih kha! Mahse, ka mit ngeia ka hmuh hi amah David ngei kha a ni si!




Ka mitvai anih ringin ka mit chu ka nuai nawk nawk a, mahse, a ngai reng!



David chuan Mr. Wlilliam let reng mai chu rei vak lo a en chhuk ngur hnuah ka lam a rawn hawi a, duhtawk mai lovin min rawn pan, minung hmel a pu lo a, nilo, minung hmel a pu lo a ni satliah lo, a chal, kah a nih na zawn chu chu a kaw hawng a, a chal hliam aţang chhuan thisen duk ţha zet hi a luang chhuak ngiai ngiai bawk. Chu thisen luang chhuak chuan a biang a luan sen nguai a, a rapawm kher mai.



Hlau takin ka inkuah khawr hlân a, ka ip chawih chawih bawk.



Min hnaihchilh takzet tawh, pen 3 awm vel lek kan inkarah a awm tawh tihah chuan a ding a, min en chhuk run bawk, ka mit chu chhinsan a hmuh loh ka duh a, mahse ka mit ka chhing thei lo, aikaih ka ni berin ka hria, a hmel chu en lo thei lovin engemaw in min siam a ni.



Hmui phun hauh si lovin min bia a, ka thinlungah thu a sawi a ni mah, "I kawng daltu te chu an thi tawh, hlauh tur a awm tawh lo, an khung na che inah khan let leh la, inhnuai pindan ah khan RO bawm chu a awm, i ţhi locket kha chabi a ni a, ro bawm i hmuh hunah i ţhi locket kha i chhu keh ang a, a chhungah chabi a awm, ro chu la in nun bul ţan rawh, kei leh ka nu leh ka pa te i kiangah kan awm reng ang, kan hmangaih che Emily", tiin min hrilh a.




A thusawi a tawp rualin a thamral riai riai.



Mittui luang ngiai ngiai chungin ka tho chhuak a, ka kalsan tawh in lam pan chuan ka pen let leh chhat chhat.




In ka thleng a, khawnvar zawngin inhnuai pindan lamah chuan ka lut thla a, min khungna pindan ka thlen chuan engemaw palin ka tlu hnawk, rak ţhatin ka theih anga rangin ka tho leh a, ka khawnvar ken hmanga ka thil pal ka en chu, karei maw, Mother Liliah leh Father Jerome te an ni.




An hrawk hrui chu zai chak tih hriat takin a lo inthai phei hrawk ve ve a, an chal pawh chu a khuar dâwk ve ve. Liliah phei chuan thawmhnaw a inbel hauh lo, an ruang chu ngaihsak loh tum hram hramin ro bawm chu ka zawng a, rei fe ka zawn kual hnu ah ka hmu ta.




Ti tur a hriattir ka nih anga tiin ro chu ka la chhuak a, Mr. William a motor chu khalhin nun bul ţan ţhat tumin khaw chhung lam pan chuan ka inkhalh chhuak ta a.



(A tawp ta.)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)