Miau

Hlauhawm lampang hrim hrim hmun hrang hrang a mi lakkhawm...
Cck Lalchhuanawmi
Posts: 323
Joined: August 5th, 2022, 8:54 pm

Miau

Unread post by Cck Lalchhuanawmi » October 20th, 2022, 5:53 am

Miau-1
Mizo Psychological Thriller
Ziaktu: Cck Lalchhuanawmi

Beiseikima Mualchin....

" He thil hi han sawifiah teh u", chanchinphek kan hmaa dawhkan chungah chuan a dah chawrh a, a kawng dawm nghal vangin a thinrimin a meng pawng zawr zawr bawk.

Khawng takin kan ding dun tlat a, Laptop chu kan hmaah a rawn dah leh, " Delhi tlang aṭang pawhin an rawn ngaihven tawh hi, nep hlawm lutuk", Hotupa ber chuan a ti leh charh charh a.

Kan thiam loh pawh a ni lo, hepa hiba fing em a ni, hepa ka ti tak naa mipa a ni ngei em phei chu kan hre bik law. A mi thah te lah hi chhungkaw tana hnawksak an ni zel a, a lehlam taka ngaihtuah phei chuan a lawmawm zawk.

Tluangi chuan, " Ka pu, theihtawp kan chhuah mek zel a, kan chhuichhuak ngei ngei ang", inringtawk tak hian a ti a, henu hi chu a va han duhawm tak.

" Nang kha, eng nge sawi tur i neih ve le?", dam dupa min lo tih chuan, " Ka pu, Mizoram Police-te hian kan chhuichhuak ngei ang, hetiang hi kan ramah a thleng leh tawh ngai bawk lo ang", ngher cher chawrha ka tih chuan beidawn hmel takin, " A ṭha e, in kal thei tawh", a ti a.

Ka va hawi let zeuh chu beidawng leh chau tih hriat hriat ngawih ngawihin ṭhutthlengah a ṭhu thla nghal a, a indawmkun tlawk tlawk.

Hei avang tal pawh hian kan hlawhtlin ngei a ngai a ni.

Office pawn kan chhuak chu, " Mizoram Police ho ve hi in laktlak lo ngawt mai", ka lo khi sak, a duhnaah chuan chimawm thiam tak a ni.

Keipawh chuan motor chhunga lut pahin, " Dear ex, ni e Mizoram Police ho hi kan laktlak lo ngawt mai", kut vai pahin ka ti a, a lo ner nasa, side glass-ah a lang kuau.

Ka inbual zo inthlak peih loin towel ven nen khumah ka bawk thlawp a, rilru sen luatah taksa pawh a chau vek thei lawm.

" Eng nge chanchin ni zel?", tia ka pain min zawh chuan a pangngai reng thuin ka lo chhang.

" E khai, ka pa, kei chu ka beidawng der mai",

" Mi pathum chauh ni lawm ni an la nih, an ruang bulah hnu chhuina tur te chu tlem azawng tal pawh a awm ang chu", ka pa chuan chanchinthar ngaithla pahin a ti leh a.

Hnuchhuina tur tlem azawng tal pawh hnutchhiah se kan man daih tawh ang, ka man daih tawh ang.

Ka pa pawh chhang tawh lem chuang loin chaw ei sawk sawkin Station lam kan pan nghal a.

Ni tak e, Mental Home-a kal a ngai tak.

Driver chu hrilhin Tanhril lam kan pan leh ta zawk.

" Kha lo man rawh u", pui turin ka tlan ve thuai a, " Khaw'nge ka pasal?", tiin, chu nu chu pawr chip chep tak chuan a au ruai a, a vir muai muai a, ka va pawm chawt chu nasa lutukin a ṭe vak vak a, a hmai lah chu a bal kawi niau mai bawk.

A pasal that tu-ah min la puh zui!

Insil fai thuak thuakin Head Office lam ka pan nghal.

" A pasalin a boral sanna a tuar lutukin khatiang khan a rilru ngaihtuahna a chian loh phah ta a nih kha. Dam lohna zawng zawngah chuan rilru lama dam lohna hi a hlauhawm ber a, natna zawng zawng zingah pawh ṭihbaiawm ber a ni", Pu Hriata chuan a ti a.

Hei vang tak hian nia ka pan, kan mi zawn mek rilru sukthlek tur awm ang ka han zawt a, " Zu in mi leh nupui fanaute rikrapa kutthlak ching mi a hua a ni ngei ang a, chumi awmzia chu a naupan laiin chutiang chhungkua aṭangin a seilian a ni ngei ang", tiin, Pu Hriata chuan muang cher chawrhin a han ti a.

" Chutiang a ni thei dawn em ni?", ring vak lo chunga ka zawt leh chu, " Bs, thei lo tak tak pawh hi a awm lo", ka dara rawn vuan chungin a ti a, a tho nghal zat bawk.

Chutianga kan mi zawn mek chet chhan awm ang Pu Hriatan min hrilh hnu chuan keimah pawh ka buai map!

Lo dik ta sela, khawi hmunah pawh hian chhungkaw pa ber zu in an awm thluah a, a that seng dawn mawni aw...

A bitum leh tur hriat a har ṭalh ṭalh khawp mai.

" A mi thah te lah hi hmun hrang hranga ami an ni a, a remchang apiang a that emaw tih mai tur a ni. Hmun reh lai leh cctv pawhin a pawh phak loh hmun a ni zel a", Tluangin a tih chuan, " Cctv chu khawi hmunah pawh vuah kûr lek luk ila ni mai lawm", ka va siai zeuh pah a.

" Fiamthuna chi pawh a ni lo",

" Awle ka pi, ka tihpalh ni e", min melh rawm rawm a, a duhawm zual sawt.

Ngawi rengin chanchinthar ka en a, Pi Vanlalchhuangi'n CID leh Mizoram Police ṭangkawp pawhina Mizorama tualthahna thleng ṭhin kan la chhuichhuak lo chu demna leh vuina lek lek thu a puang a.

An Editor thiltih ṭul lo zet chu aw.

Mizoram Police ho nep te min ti mai mai; nep ila hei chen kan kal thei lo ang, misual chu a kawng a tluang hrih pawh a ni mahna tunah chuan, kan kawng a inhawn hun a la thleng thuai ang.

Duty turin kan chhuak a, zanlaia tleirawl ho vak kual dun dun tur kan veng a ni ber.

A chang chuan heng ho hi ka khawngaih ṭhin, mi ram changkang tak tak angin an intihhlimna hmun tur nuam leh ṭha, him a la awm hrih bawk si lo.

Zirna lah a phena nâwmna duh avang chauha din leh hawn a tam si.

Lu hi a hai ve chhap thei.

Kan hmaa mipa naupang pakhat a nu nghenga muhil siai siai chu ka en a, an chhungkaw boruak eng nge ni ang a, zan pawh sawi loa an nufaa chawhmeh an ṭhutpui chhan eng nge ni ang?

Pa ber hi khawiah nge a awm ang a, eng nge a tih ve ang?

Mizorama Psychologist kan neih ṭhat ber Pu Hriata thu min hrilh lah, a tam lem lo nain ngaihtuahna tihai chhap thei zuk ni mauh mai si!

Ka awih vak lo na chu a dik ve thei tho bawk si.

Tluangi call-in station-ah mim lo hmu turin ka ti a. Phone-a sawi mai turin min lo ti vin ṭhawt, " Hmeli, lo kal hle hle mai teh", ka ti let a. A enga mah hma hian min tham lo ziah mai.

Chawhnu lam dar thumah a rawn lang chauh. Han thinrimin lo ânkhum thei chiam pawh ka ni lo, kei aiin a hna hi a sang leh chhawng tlat.

Tluangi chu Pu Hriata thu min hrilh ho hrilh vein, lo ngaihtuah ve turin ka ti a, " A engti tia Mental Home-a kalna changte i hriat a, kan mi zawn mek rilru sukthlek awm ang chhuina changte i hriat?", phawk hru hian Tluangi chuan a ti a.

Intivei takin, " Mizoram Police ka ni miau a", ka lo tihkhum, a nui hak a, tum hmukin a chhuak zui.

Keipawhin engvanga kan mi zawn rilru sukthlek chhuia Pu Hriata han hmu nge ka nih pawh ka hre lo, tumahin min hrilh hriain min rawn hek lo, mahse; keimahah chhui duhna a rawn awm tlat. Mi ṭhahnem tawk fang ka zawngin ka lo man tawh a, mahse; tun ang hian an rilru sukthlek tur ang hi ka la chhui ngai lo.

A awihawm lo zawk.

Mental Home...
" Thisen... Thisen...Thisen...Ṭangkaina nei lo thisen, a va nuam em!", a nghawng aṭang chuan thisen a lo baw chhuak zawih zawih a, a ang phual phual a, a khur ngawr ngawr bawk.

" A va han hmuhnawm tak em!", tiin, Pu Hriata chu a au ruai ruai a.

"Zoramsangi rawn hruai nghal rawh u", a hmaa chatthla fel chiah chu a han chhir zawt pah a.

A lu chu chhuatah tauh tir chawrh chawrhin, reiloah a lu kehin thisen a rawn chhuak ṭiam ṭiam a, thisen sen ṭha tak zu han nia mawle!

" Zu ka in i ti maw? Zu manah inchhung bungrua i hralh maw? I nupui fanaute hlau leh thlabar mangangin i siam maw. Chuti chung chuan chapo takin i la leng ar ar amaw, i zak nange?", a lu a sâwp vek a, a thluak a darh nuai.

Lawm fahranin chu a thluak darh nuai chu huiin a âwmah a pawm hle hle a.

" Hey putar, min hmu duh em ni?", hmeichhe âw fiak leh zangkhai lutuk tak mai hian a lo ti a, Pu Hriata chu tu nge a nih hrilh nawn kher a ngai lo.

" I va lo thleng hma ve",

" Helai hnaia ka kal lai tak a nia, i nau te ho hi enkawl ṭha deuh rawh, min zah lo mah mah", kawngkhar khar ri ṭhuai chungin a han ti a.

Pu Hriata bulah kal thuaiin thisen tling leu luau nui ver vera a lo khal mial mial chu a khalhpui ve a. An pahnih chuan thluak te chu hmet sawra hlum velin bang vawmna atan te chuan an hmang a, infiam nan an hmang a ni ber, an nui uar uar pah a.

Zoramsangi chuan, " Hei hi lawm, aw...hei hi lawm, i z*ng hur lutuk avang khan ka nu i uire sana tiraw, a dik em?", fiak lutukin, thinrim âw vin ṭeuh chungin nunna nei tawh lo tih hriat ngawih ngawih chu a aukhum nghek mai a.

A ipte ah(ak) aṭanga chemte hriam zum ṭha lutuk rawn phawrh chhuakin, chu ruang z*ng chu a zai ta nghek nghek!

A nui uar uar pah bawk a, " Tunah hian nuam i la ti em? A nuam i la ti em ka tih chu min chhang rawh?", a dula chemte vit tlum hmawk pahin a han ti leh a.

Pu Hriata chuan, " A hre thei tawh lo che", za em ema lo nuih chung hian a ti a.

Zoramsangi thinrim chu a zual sauh em mawni, duhdah takin chu ruang roluahpuitu chu a zai leh hmawk hmawk a.

Chu chuan a thisen lum tawh sa tizual lehin, Pu Hriata nen ruang chu an sawisa zui lehnghal a.

An hlim thawm nui ri thang vel chuan Mental Home chu a fan vel ruai a!


Beiseikima Mualchin...
" Hepa hi chu accident pawh a ni thei tho, an chharna hi Hunthar peng a ni a, RVah a kal tih a hriat a, a thiltih tur lah hriat sa, a rim pawh a nam em kha", Mawia chuan a ti a.

Lo inrawlh vein, " Accident chu a ni thei lo deuh ang, thlalak kha ngun lehzualin han en teh, a lu a keh a nih kha. Accident atan chuan a lu tihkeh theihna hmun chu a ni lo an chharna kha", Mawia a bu lawp lawp a.

Pakhat hi chu Kulikawn, Presbytarian Biak in bulah chhar a ni a, pakhat hi chu Lawipu daihah, a inkarki ve khawp mai.

Hunthar peng ami tih loh hi chu an chenna veng ngeia an ruang chhar a ni a, Hunthar peng ami hi chu Zonuam daih!

Mawia chu a ngaihdan sawi leh tura tiin, " Ka pu, ka hriatthiam theih loh chu Hunthar peng ami hi a lu a keh a, Lawipu ami a nghawngah zai a ni a, Kulikawn ami phei hu chu a rapthlak ka ti a saxu zai darh sak nuai a nih hi; kum tam he hna hi ka lo thawk ve tawh a hetiang hi ka la tawng ngai lo, chubakah Biak in bulah kher an dah a, mihring thiltih a nih pawhin ka hre thei hlawl lo, mihring thiltih tur atana ka ruat hian ka tiril a khur thei", muang cherh chawrh, nghet tak si hian Mawia chuan a ti a.

Ni e, keipawh hetiang hi ka la tawng ngai lo, kum bul kan ṭan phat aṭang hetiang case mak lutuk kan chhui nghal a ni a, tunah kum chanve dawn a ni tawh, chhuichhuah chu ka ha se, hnuchhuina tur takngial pawh kan vai a ni der si.

" Ka pu, station dang aṭanga kan dawn danin zu in mi vek an ni a, midang sawi dan nen nupui fanau rikrap ching an la ni zui, hei avang hian an chhungte hian that turin mi an ruai a ni ngei ang, pawisa hlawh duh avanga tual pawh that hreh lo te hi kan awm ta pawh a ni mai thei ni", Mawia chuan a ti leh a.

Mawia ngaihtuah chu dik lo viau mah se, kan chaina a rei ve thawkhat bawk a, a ngaihtuahna pawh a hriatthiam awm khawp.

In lam panin ka tlan zel a, chuti chungin ka duty ka ṭhulh chuang lo. Haw kawngah pawh nise buaina hi a awm ve chawk ṭhin si a.

Hman zana mipa naupang kha a nu nen an lo la awm hlauh a, bike hung ṭhain ka va pan a.

Chawhmeh ho chu tlem tlema lo vuai te an awm a, sit chuang loin cheng zahnih man dawn ka dawr.

Mipa naupang chuan min lo chho en ha chung hian, " Ka nu, ka pu kawr hak ang hi ka la ha ve dawn", a ti ta roh a.

A nuin, " Duata tak hi chu aw", a tih chuan Duata chu ka pawm kang a, " Duata, ka kawr hak ang hi hak ve i duh chuan lehkha ṭha deuhin i zir dawn nia aw, chuan ṭanpui theihna che ka neihna apiangah ka ṭanpui zel ang che", a nu mittui hru zeuh hmu lo derin, " Min mamawh hunah chuan i tan ka lo awm vat zel ang", ka ti zui a.

Duata pawh a nui var var.

Chutih laiin, " UMaawm, in lo la haw lo maw?", âw ngaihnobei tak hian a rawn ti a, rang lutukin chu âw lo chhuahna chu ka hawi vat.

A âw a ngaihnobei ang bawkin, a hmel pawisawi lo tak pawh chuan min hip nghal vawng vawng mai.

Duata nu hming pawh ka hriat leh phah ta, tuna kan hmaa UMaawmi nen inbe mek hming tih chauh lo chu.

Remchangah lain a number dil hlawhtlin ka tum ngei ang, " Zoramsangi ka nia, Mazo min ti mai", Mazoi...



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)