Miau

Hlauhawm lampang hrim hrim hmun hrang hrang a mi lakkhawm...
Cck Lalchhuanawmi
Posts: 323
Joined: August 5th, 2022, 8:54 pm

Miau

Unread post by Cck Lalchhuanawmi » October 23rd, 2022, 6:38 pm

Miau-2
Mizo Psychological Thriller
Ziaktu: Cck Lalchhuanawmi

Beiseikima Mualchin...
Ka thiamna zawng zawngte vawilehkhatah an bo duak ni ber hian ka hria, chung lam aṭang min rawn nawr ve sek bawk nen, Mawia phei chuan, " Ka pu, kumin hi kum chhia a nih ngei dawn hi", beidawng tak hian a ti thla leh hrawk ṭhin a.

Boruak tih daih nana a bialnu nen an chanchin ka sawipui lahin a tirah han nui bawrh bawrh ṭhin mah ila, a tawpah, " He tualthattu hi man vat vat a, thlamuang taka awm ka chak tawh", a rawn ti chhuak leh nge nge zel.

Station-a awm reng pawh rilru hahna hlir, Station chhung chauh ni lo, Mizorama in tin titi luahtu ber a ni a, tunah phei chuan Delhi tlang aṭang an rawn hre rawh lehnghal, hre awm reng pawh an ni, media a chak tawh em a.

Mahse, Mizoram Police-te ngei hian kan chhui chhuak tur a ni ringawt mai ni.

Tun thleng hi chuan thu thar la awm thei bawk si lo, 'ka bei nge sei Run dung' tiin, kan la kal hram hram chu nia.

"Bs, case hi engtin nge kan tih zel ang, kan titawp mai dawn nge, kei chu tihngaihna ka hre tawh lo, vawiinah pawh ruang chharna hmunah ka va kal leh a, engmah hmuh alawi pawh ka nei thei lo. Tualthattu hi mi hrang an ni ngei ang, engmah hriatthiam ka nei tawh lo", Tluangi chu a thaw halh halh a.

"Lungngai mah ta che dear ex",

" Zawnga, khati khan min ko ziah suh", min lo ti vin nghal, ka âw thian kharh kharhin, "Keipawh ka bo map, ka hrethiam tawh bik lo, case tihtawp ngawt thu lah va ni suh",

" A tuartu chhungte pawhin case an file lo a ni a, tunah phei chuan hriat pawh an hre tawh tawp nang",

" Engvangin nge an hriat loh ang, tun thlengin chanchin tharah an puang dum dum a, The Hindu Times-ah lah a chuang tawh a, Delhi tlang mai pawh ni lo ram pawn aṭang pawhin an hre hial tawh zawk ang", vin deuh lek leka ka ti chu a tim deuh dai a.

" Ka ngaihdan ka sawi mai a nia, thinrim kher a ngai lo", zawi sapa tiin, "Ka kal tawh mai ang", ti zuiin a tho nghal vut a.

Kan inngaihzawn lai pawhin ka âw vin a hriat deuh hlek chuan, min hlau ni chuang si lo hian a tim deuh dai zel a, chhuanlam siamin a kalsawn daih zel bawk.

Dear ex tak hi chu a...

Ni dawn tak e, tunah chuan dear ex aia khirh hmel zawk leh, kan case kal lai mek ai pawha khirh hmel zawk tur a awm thar tak alawm.

'Zoramsangi', a hming satu chuan kan ram hi a hmangaih ngawih ngawih a ni ngei ang.

Kei pawhin kan ram te chu ka hmangaih alawm.

UMaawmi te nufa bulah kalin, Duata tan ei tur te ka ken sak a, chawhmeh tlem azawng ka dawr pah bawk.

Zoramsangi, aw ni tak, Mazoi nghah pah ni fawmin thu ho mai mai ka sawipui duah a, ka hawi kual deuh chhen bawk.

UMaawmi chuan a hrethiam ni ngei tur a ni, " Zanin chu Mazoi hi a bang tlai deuh dawn pawh a ni mai thei a ni, a lo lang har em mai, zan dangah te chuan tun ang hun hi a lo lan hun a ni tawh a sin le, tiraw Duata?", a ti a.

Ka zak tho nain ka mood a off nghal vekin ka hria.

"Takah Bs, MC-ah te i bazar ve ngai em?", ka lo bu zeuh, " Khawi maw thawmhnaw dawr berah Mazoi a thawk ve a, i bazar ṭhin a nih chuan dawr ve ziah rawh aw", nui sun sun chungin a rawn ti leh a.

Min chhaih pah ni fawm hian nge ni min melh zuk zuk ṭhin a, va han fing reuh tak. Ka awmdanah a hriat mah mah nge ni.

Reilote hnuah Duata pa inhlawh bang lo kalin kan inthlah liam ta a.

Case pakhat buaipui tur ka nei thar tlat, MC-a Mazoi thawhna dawr zawn, Umaawmi hnena a phone number dil ka inthlahrung ang bawkin a thawhna dawr chat ka zawt ngam si lo.

Bazarna hun ka nei mang lo a ni a, engtin nge ka tih ang aw...

Ni tak e, lungngaihna tur a awm lo, Police ka nih hi mawle, case thar a ni tlat.

Information pawh ka dawng ṭha bawk lawm.

"In thubuai chu aw...fel thei vat vat tawh se, mahni tawkah thin hi a tawt thei lutuk", ka nuin a ti dat dat a.

"Tu tak ruang chhar leh ang che u maw, a thuhrimah fimkhur hle ang che, ka ṭawngṭai reng ṭhin che a nia, nangpawh ṭawngṭai theihnghilh ngai lo la, a chang chuan i nau college kal te hi lo haw tur a awm lo palh ang a tih te hi ka ngaihtuah ziah zel", ka nuin a ti leh chuan ka nau Malsawmin, " Ka nu, i ti rapthlak em mai a", âw ki sang veh vawh, thluk kual duah chungin a ti a.

A rukin ka lo nui kur kur.

Ka nu chuan, " Eng nge, thin thi pawhin kan awm thei tawh lo chu a nih ber hi, nang chauh ni lo, keini te pawh hi a bitum kan ni thei a", a ti leh dap dap a.

A va hahthlak ṭhin em, thla hi a muang lo ṭhin teh e maw.

" Ṭhiani, ṭawngṭaina hian thil a tithei a, chuvang chuan i ṭawngṭaina kha ring tawp la, a chhang ṭhintu pawh ring tawp rawh", ka pa a rawn ṭawng chhuak ve ta nge nge e.

Ka pa nge nge, a va han ṭha ṭhe ṭhaw ṭhin tak em!

Chhungkaw kim lai chuha ṭawngṭaina neih a rawt nghal a.

Kei ka hna avang hian ina han awm loh ka ching zeuh zeuh a inkhawm zan a nih loh hi chuan ka nau nen ka nu leh pa, an pathumte hian ṭawngṭaina an lo nei mai ṭhin.

"Bs, Mizorama Police ṭha ber i ni a, State dang aṭang pawha an lo rawn ber i ni; eng nga tinge he case hi, tun thlenga a la ṭhuanawp hi ka awih lo hial zawk", chhan dan tur pawh ka hre teh hrep lo.

Mizorama Police ṭha ber leh State dang aṭang pawha an mi rawn hi tunah hrih chuan ka thangtlawm chiang hle a ni, ka zak ngawih ngawih.

Pen tuai vir vat vat chungin thlalak ho chu ka en leh ngat ngat a, mi hrang thiltiha a ngaih theih laiin mi thuhmun thiltih pawh a ni thei tho.

Mi thuhmun thiltih a ni thei lo ang, mahse; an ruang kan chharna hi a inhlat mah mah.

Mahse, mi hrang thiltiha ngaih theih a ni chiah lo bawk, heng ho hi zu in mi vek an ni, mi hrang ṭheuh tih atan chuan...huiha, ka lu a puak keh dawn!

Hriatthiam zung zungna te pawh an ral zo ta nge mawni.

Control room-ah kalin Mazoi ka zawng a, ka chhui a ni mah zawk.

A pa a boral tawh a, a pa boral hnu lawkah a nuin a nuṭapa nen a tlansan, a nuṭapa pawhin a boralsan tawh.

Chenna-Kamlova Building, Dawrpui, ehe hei chu Station aṭanga hla lo te.

Zoramsangi Zote, kum 24, Irene Men's and Women Day Dream, MC-a thawk, a phone number pawh ka nei ta e.

"U, hmeichhe pakhat ka su a nia, Civil-ah emergency room-ah kan awm mek, lo kal vat teh", Malsawmi tak hi chu.

Mawia nen kan chhuak nghal a, kan va thleng chu ka mi hmuh avang chuan ka ding deuh chawt.

Malsawmi sut chu Mazoi lo ni rengin, ka nau chuan ngaihdam a lo dil mawlh mawlh a, Mazoi zawk chu a inthlahrun hmelin a inthiamlo daih zawkin ka hria.

" Malsawm?", an pahnihin an rawn hawi nghal a, Mazoin min hmu chu a meng phawk nasa mai.

Malsawmin, " U, tihpalh liau liaua ka sut a nia, jail-ah min khung lo ang tiraw?", ṭap ṭuau chungin min lo ti nghal.

" I mi suta thu a ni mai", ka ti chu, " U", a ti chuai raih a, Mazoi bulah ngaihdam dil leh nghal mawlh mawlhin FIR thehlut lo turin a ti a.

Malsawmi tak hi chu aw, a rukin ka lo zak chem chem.

Mazoi hrilhhai lutuk chuan min lo en chhen a, kei lahin ngawi rengin ka lo en tlawk tlawk mai bawk si, Malsawmi lah ṭawng tawp mai a tum si lo, a ṭawng thei dan lah hi aw.

A tawpa tawpah Mazoi chuan, " Aw, aw FIR ka thehlut dawn hleinem, hlauthawng duh suh, keipawh ka ṭha leh vat mai ang", dam dup hian a ti a.

Malsawmi lawm lutuk chu a zuang lo chauh, nui var chungin, " U", min lo ti a.

" A nih chuan Mazo,I ngaidam dawn tihna em ni?", a lo bu zeuh.

" In inhria em ni?", mak tih hmel deuhin Malsawmi chuan a lo ti vat a, ka nau chu ni lo se ka kuk ngei ngei tawh ang.

A scooty pawh a hmelhem lo e, Mazoi khup a ulh leh a chawn thla vel a pilh tih loh chu, Malsawmi pawh tlemin a kut a pilh tih loh chu.

Mawia, a scooty-a Station-a thlah turin ka ti a, jail-a ka khung dawn leh dawn loh min la zawt hram, " Ka khung tak tak dawn che mawni le", ka ti chu a tlan rang teh e.

Mazoi bula kal leh vatin ka nau aiawhin ngaihdam ka han dil ve leh, kiai sak pah hian, " A ho lutuk", a ti a.

A inenkawlna senso tur zawng zawng kan tum sak tur thu hrilh pahin ka pawm a, Police motor-ah chuan tirin, " Min man chu i tum em lo ang tiraw?", fiamthu titak deuh pahin a la ti zui, ka lu ka lo thing nar nar a.

Malsawmin bul min ṭansak a ni hawt lawm le, ka nau fimkhur loh luat pawh ka tan Malsawmna, a hming a pu zo ka tih ṭum ber.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)