Miau

[Cck Lalchhuanawmi]

Miau-3
Mizo Psychological Thriller
Ziaktu: Cck Lalchhuanawmi

Beiseikima Mualchin...
"Mazo, khawiah nge i kal dawn?", mak tih hmel deuhin min lo en kiau.

"Aw, a, hnathawk turin ka kal dawn", bai auh auh chungin a ti a. A luhlul hmel reuh tlat.

"Malsawmi ka bia ang a, i ai kal rawh se, nang chu chawl rawh", ka ti chu rang lutukin, "A ngai lo", bak hlar hian min lo ti nghal a.

A awmdan chu mak ka ti lek lek, mahse; a inthlahrunnaah ka ngaihsak a.

Dam dup hian, " Keimah ngei kal ka duh zawk, ka dam ṭha tawh lutuk, ani kha chu lehkha ṭha deuhin zir zawk rawh se", tiin, a nui tawi tâk.

A luhlul dan chu ka duh chi tak.

Motor-ah chuan luih tirin MC panin ka tlanpui a, mak tih hmel deuhin min lo en leh zuk zuk ṭhin, zawhna engmah siam lovin ṭawng pawh a ṭawng lo.

Lehlamah chuan a ṭha zawk, ka hna a tiawlsam a ni mai.

MC kan thleng, a thawhna dawr thleng ka pawm a, a ke a dam hma chawlh ka dilsak a, Mazoin min lo hnial nasa mai.

Nui ver ver chungin a hotu ber chuan a phal thu a sawi a, " Dawr ka lo kan ni a ni hlauh a, Mazoi hian ṭhian a lo nei chhe lo hle mai", tiin, min fiam pah zeuh a, nu valai tih takah, nu valai nge nge, sawi thui lo mai ang.

Lawmthu hrilhin motor thleng ka pawm leh a, min en duh hlawm lutuk ringawt, a nawm phian chu a!

Kan veng Bethlehem lamah tlanpui lehin, MC kan chhuahsan hnu aṭangin a ṭawng leh tawh lo reng reng.

Keipawh ka ngawi reng a, ka khi leh sak sak ṭhin. Mazoi pawhin a mit sirin min lo en hrek hrek ve ṭhin bawk.

Kan in kan thleng a, Malsawmi pawh a lo la kal lo.

Mazoi a hmu chu a meng phawk hru a, zawhna a ngah lutuk tih chu hairual a ni lo.

"Ka kal thei", a tih tlat avangin a kawngah leh kutah vuanin ka kal bai pui auh auh.

" I hna i chawlh chhung leh i ke a dam hma chu kan inah tihian i awm reng dawn nia", zawi sapa tiin in ka chhuahsan a.

Malsawmin min lo umzuiin, " U, eng emaw ret ret a awn ni maw? I van care em em",

" Ka bialnu i sut manah ka tan tir lo che a lawm hle tur i ni", ka ti chiah chu, "Awiii", tuarin inchhungah a tlan hlawk hlawk. Engtin tak chuan va ti ang maw, ani ṭawng thei lutuk khan a ngawihbo pui mai mai hauh lo ang.

Station ka thleng a rilru senna tur hlir, hei ha...

Kan case kal lai mek hian min tihah ber mai ni!

" U",

" Eng nge i rawn tih dawn?", sana en nghalin dar sarih lo ri der, khua pawh thim tawh.

Malsawmi chuan, " I ril a ṭam lo mi? Chaw ka lo pe che uMazoi thlah pahin, vawikhat mah min lo call si lo a, i haw hman loh kan ring leh deuh a", a ti dap dap a. Mazoi kha ni tak e.

Mazoi chanchin ka zawt vat, " I buai tehreng nen engtin nge bialnu i neih peih zawk le, i ngaihsak ṭha hman bawk si lo",

" Sawi vat mai teh", tiffin box hawng pahin ka ti a. " Ka nu leh pate nen an lo awm a, tlaiah chaw a ei ve nghal a, ṭawngṭai zawhah ka lo thlah a nih hi, ka pa chuan uMazoi bulah 'a bialnu dang te aiin i hmelṭha zawk daih nih hi", a ti a, uMazoi a lai lutuk mahse maw, u, bialnu dang ka pain a tih khan a lungawi lo deuh hlekin ka hria", ka chaw ṭhial lai ka hak.

Ka hnungah min lo chumin tui ka in khawlh khawlh, " A awihawm lo lutuk, bialnu ka neih ngai lo kha maw", ka lo ti hlak.

" Ka pain a fiam ve ni mai lawm, awi, lehkha zir ngai, ka kal dawn bye, auMawi bye aw", ti zui lung lungin a kal ta a.

Mawia nen chuan chaw ei sawk sawkin duty turin kan chhuak leh a.

Mazoi ngaihtuah hman loin ka buai nileng a, ṭha taka a awm thei chu a lawmawm e.

Ka sil ṭhem ṭhum mai hian ka hria.

Station-a bathroom-ah ka intleuh sawk sawk a, inbual loh ai chuan a la zia tho tho, ka harh kâwk phah thei bawk, a man hla hrim hrim.

Nilengin ruang chharna hmun thum ka kartawn sek a, beiseinain ka han enfiah leh dun dun ṭhin. Mawia sawi dan takah Hunthar peng ami hi chu mi thah pawh a ni lo ang.

Hetiang em em chu, Khawmu te hi a lo ni reu reu nge mawni?

"Ka nu, hei ka lo haw hman leh dawn lo a nia aw",

"Awle, fimkhur la aw, i hun awm apiangah mu ṭhin la", ka nu hi chu aw, a mut mai mai theih loh.

"Awle...", ka nu nena inbiak hi chuan call cut vat zel a ngai, kan be rei telh telh a, hlauhthawnna tur hlir ni mai.

Kan case buaipui lai ni lo pawh case neuh neuh hi a awm ve reng a, achang chuan a hlimawm phian.

A ṭhen chu nupa intithiam lo an ni a, kan hmeichhe Officer-ten an han zilh luam luam ṭhin. A kar lakah ka lo inrawlh ve sek ṭhin a, thubuai tak takah han la dawn ila nupa nge nge hi chu, nge nge hi chu tih a ngai leh ṭhin a, station chhungah han inbak hnawk nuai ṭhin mah sela, inngaidam tawn leh hlim tak hian kan haw tir leh nge nge zel.

" Ka kekawrte hi a uih tawh, a thar ka va lei mai teh ang", Mawian a tih chuan ka lo nui hak hak a, kan chah ve nghal mai bawk.

Chutih lai chuan, " Ka pu, Kulikawn venga ruang kan chhar chanchin hrilh duh che an awm", tiin, min rawn hrilh ta mai!

Aw hawle, Mawia ko let nghalin address min hrilh lam panin kan tlan vawn vawn nghal a.

Beidawn ṭep hnuah beiseina mei a rawn êng ṭan dawn e, han zuzi lo hram teh se.


Hmeichhia a ni thei lo ang", tiin, Mawia a chek tlawk tlawk a.

Video-a a lan dan hi chuan hmeichhia a ni ngei bawk si, keipawhin mak ka ti; a pawi a sawi em ni zawk? Patling rui mai mai hian engtin nge a pawi a sawi ang aw...

Mawia nen chuan video chu kan han en ṭha leh ṭhin a, a khat tawkin Mawian," Hmeichhia a ni lo ang", a ti leh ṭhin.

Mawia bulah tumah hrilh lo turin ka ti a, a rukin he video min petu chhungkua pawh veng turin ka hrilh bawk, eng emaw thulhah tualthattu hian a lo hriat palh takin.

Tluangi call-in inhmuh puiah ka sawm a, " Kan office-ah lo kal mai teh", a ti thla rawk a, phone a dah nghal daih, henu chhip chhep tak hi chu aw.

Office-ah chuan ka va kal a, an lo buai hlawm nak nak mai. Min hmuh veleh min lo panin, " Reilo te min lo nghak lawk la, dawrah kan chawl law law dawn nia", a ti a, ka lo bu zeuh.

" Eng nge ni ta?",

" Aw, kha i hmaa mi kha ei ve phawt rawh",

" Sawi rawh, a ei pah theih tho lawm", thaw halh chungin a ti a.

Video chu a thil ei lai chawl meuhin a thlek vang vang a, " Hmeichhe thiltih atan chuan a awihawm lo lutuk", he thu hi a sawi ka ring reng a.

"Hmeichhe ho hi in lo rapthlak khawp mai", ka ti chu min rawn melh hriam hraih nghal.

Copy min dilin tumah hmuh lo tur leh case chinfel a nih hma vawng ṭha turin ka ti a, hotu te lam hmuh ve turin min ti a, mahse; hotu te lam pawhin la hmuin la hre suh se.

Station-ah bawk ka kir leh a, kekawrte thar ka nei ta.

Zoramsangi Zote...
"Za*wngi, khati khan min melh ve khanglang alaw", ti pahin ka nu chu a va hnek nghal chawrh chawrh a, " U*ch*nu, i pasal ka nih hi i hria em, ka chawm leh hrai i nih hi i hria em?", ka nu chu a vaw leh nghek nghek a, ka nu chuan ngaihdam dil mawlh mawlhin a theih ang angin a indang ṭawk ṭawk ve bawk, ka nau chu pawmin a beng ka hupsak tlat bawk a.

Ka pain kan unau min vuak tel tuma thinrim ṭeuh chunga min lo pan lai chuan ka harh chhuak leh hlawl!

Thlanin min chiah zâwp vek a, ka thinphu ran lutuk avang chuan ka thaw kâwk kâwk a, ka thaw a chham dawn dawn.

Bawkvak chungin bathroom ka pan a, a chhung ka luh rual rualin bucket-a tui awm chuan ka inleih nghal vat.

Tui herh hawin ka inleih mial mial a, ka thawk pawh a ziaawm deuh tawh e.

Bathroom aṭanga ka chhuak chu ka pa ân hla chhe tak tak te chuan min umzui leh a, ka beng hupin kil khatah ka ṭhu a, ka nuin an khum ngeia ka pa uire lai a hmuha a rilru nâ lutuk tih theih nei bawk si lo ṭap vak vak lai te chu ka hmaah ngei chiang lutukin an lo lang leh zut zut.

" Ka duh lo, duhtawk rawh u", mit chhingin tham chhalhin ka au ruai a, awmzia awm chuang lo.

Inchhirnain min rawn deng lehnghal, ka thin tawt up up chu gas bur bula ka dah thirtiang chu la lawkin in ka chhuahsan a.

Zanlai a ni tawh bawk a, veivak an awm tawh mang lo.

Khawlaiah thirtiang chu puin ka tei ruai a, ka awmdan chu a nuihzatthlak zawk.

Zawhte han hmu hlauh ila!

"Miauuuuuuuuuuuuuuu", tleirawl insual pui tur han awm sela aw...

Zanin chu Tleirawl chu sawi loh Zawhte pawh an vang hle mai.

RV lama kal nan a tlai leh tawng ang bawk si, zan dangah pawh ka kal tho a lawm le, mahni leh mahni inbiak hi chu a tiihchi vak loh.

Duh leh mahni leh mahni inbe mai mai ila.

Police motor vawchhe mai teh ang.


Mahni chauha cheng tih takah ei rawngbawl hranpa a ngai lo a, chubakah engkim a hek lo vel vek.

Ka nau erawh ka ngai a ni!

Hnathawk turin ka chhuak a, dik taka sawi chuan ka hnathawh hi ka ning, nilenga hlim reng anga awm leh dawrtu te chhawnchhaih vel hi ka nin zawng tak.

Lei tum anga awma an enkual dun dun hnua lei loin an han chhuak leh a, ka thu chu nise umzuia chhut thluk pawp hi nia ka duh ṭhin.

" Atu chuan nge maw Police motor vawchhia ni? Kan Ṭhalai ho sual tawh dan hi aw", taxi driver chuan a ti nuah nuah a, " Kan chhak lawka Police Station-a motor saw maw i tih?", engmah hre lo awm takin ka han zawt a, a vawchhe tu ka ni reng sia.

"Ni e, zan reh lam tawh a ni sia cctv an dah lo bawk nen, tu tih nge an hre lo ta nih kha",

" Cctv te chu dah tur a lawm le aw", pawi tih hmel taka ka tih leh chuan, " Ni e mawle, Bsa khan a dah tir nghalin ka hria, hepa hi chu aw a ṭha sin, makpa atan ka awt ngawt mai", nui sun sunin a ti a.

Bsa, ka thinrim thut chu a rukin ka inseh ruh ṭeuh a, ka lo ring hman ve tawh sin.

Engvangin nge amahah rinna ka nghah rikngawk le?

Ka la tawn ngai loh ngaihsakna a lak aṭangin ka hmu a, mahse; tunah lah a reh vung vung.

Hun reilote chhunga min ngaihsakna kha ka tan chuan a hlu hliah hliah, khatiang kha dawn leh ka duh, ka thlahlel leh ngawih ngawih!

Mahse, ka tan chuan Vana rah ang a ni, engtikah mah ka dawng leh tawh ngai lo ang.

Tuna ka nihnaah hian ka lungawi a ngai.