VICTOR LALTHANMAWIA (aka A HANDSOME CREATURE - 6)

[Aaron Dustin]

VICTOR LALTHANMAWIA (A HANDSOME CREATURE SPIN-OFF)



[MIZO FICTION SLASHER/HORROR STORY]



WARNING : 18+



Written by : Aaron Malsawmdawngzuala



Chapter - 1









*******************



(5 YEARS LATER, AFTER VICTOR DIED)



Pu Sawma, kum 57 a upa chu an arbai huana riak tur leh mahnia hun hmang tu chuan a second-hand maruti, t(r)awng ve tawh tak nen chuan a inkhalh thla mek a. Car tape chu play in a zai rut rut a, chutih lai tak chuan a phone a rawn ri a. A han en chuan a thianpa, a tlangval lai atanga a kawm ngeih em em, Pu Muana a lo ni.



"Hello Muana, enge ni ta?" tiin a phone chu a chhang a, Pu Muana chuan hlauhthawn hmel tak hian, "Sawma, khawnge i awm?" a rawn ti hluam hluam mai. "Hei...kan huana riak turin ka inkhalh thla mek a, enge ni ta?" tiin Pu Sawma chuan a lo zawt let a. "Ka hmuh sual a ni lo, nizan hmasa a ka thil hmuh kha.." a rawn ti leh vak vak mai.



Pu Sawma ngaih chu a tha chiah lo, "Enge i sawi awmzia ni a? Eng maw i hmuh sual nilo chu?" tiin a han zawt leh a. Mangan hmel tak hian, "Nizan hmasa a kan inkawt a hmaikawr vuah, chemte keng lo ding ka tih kha...kha kha i hmusual mai mai a ni ang min ti a. Mahse nizanah a lo ding leh a ni, dawt ka sawi lo." a ti leh ta mai.



Pu Sawma chu a ngawi vang vang a, "Ti hian ti teh, rang takin police call vat la. I thil hmuh te chu hrilhfiah vek ang che. Engmah i chungah a thleng lovang, khawi lai tlangval zurui emaw mai mai a ni ang." tiin a hnem hram hram a. Hlauh vanga aw khur dur dur chung chuan, "Sawma, hman kuma kan thil tih vang kha ani thei angem? Tu emaw hian kan lakah phuba a la a ni mai lo maw?" a han ti leh a.



Chutah vin zet hian Pu Sawma chuan, "Ngawi hmak rawh...kha thil kha ngaihtuah tawh suh ka tih kha. Tuman min man chhuak lovang, chuan theihnghilh hmak tawh ang che." tiin a phone chu a dah hmak mai. "Dawih lutuk mai, min man chhuah phah vaih chuan a chak lo viau ang." tiin a phun zui nuah nuah a.



Kawng kawia a tlan leh tur chiah chu a hma zawn takah chuan mipa pakhat, kawr dum ban tlawn ha, sam sei leh hmaikawr, vawk hmel ang chiah (Pig-faced mask) vuah hi a lo ding thut mai. Pu Sawma phu nasa lutuk chu a buai ta, chu hmaikawr vuah chu a su teuh hle a, a motor steering chu kuai vakin kawngsira thingkung lian em em mai chu a va su bur mai.



Seat belt a lo hreng bawk silo nen, a speed a chak bawk si nen. Amah lah pa cher ve lam, tawi ve tak a lo ni bawk nen a in vawrh chhuak lawp mai a. A motor hma darthlalang keh chuai khawp chuan a invawrh chhuak a, a thingkung sut ah tak chuan a lu chu a sawh bawk a. Leiah chuan a let thla tawp a, a car hma chu akhu vut vut mai.



A lu chu na a ti em em a, chet a han tum chu a kur dinglam zawk chu a ti che thei ta reng reng lo mai. A ruh a tliak tih a hre nghal a, "Min pui ru, khawngaihin.." tiin a au ta vak vak ringawt mai. Hetih hun lai hi zing dar 4 vel chauh ala ni a, khua pawh a la var tha thum lo a ni. Huan kal kawng a nih avang chuan a awmna lai chu a reh em em a, motor dang tlan lah an awm hek lo.



Chutia mangang taka kawr sira a leh reng lai chuan kha vawk hmel hmaikawr vuah khan a rawn pan a, a bulah tak chuan a rawn ding a. Pu SAwma chuan a en chho va, "Min....min pui rawh...khawngaihin tlangval, min pui teh." a ti tawk tawk mai. Mahse Hmaikawra chuan ngawi rengin a en reng a, a che eih lo.



Pu Sawma chuan a han en chiang a, hmaikawr a vuah tih a hmuh chuan a thianpa, Pu Muanan, "Hmaikawr a vuah a, kan in bulah a lo ding reng a.." tia a hrilh lai chu a ngaihtuah chhuak zawk mai. "Tunge i nih?" a han ti zawi sap a. Chutah Hmaikawra chu a thu hnai a, chiang tak hian a en kur mai.



Chutah Hmaikawra chuan fiah tak hian, "Mangtha le, Pu Sawm." tih pah chuan a dulah tak chuan vawi 5 vel a vit siah siah mai. Pu Sawma chu a khur chur chur a, reilote ah chuan a thi nghal a. Hmaikawra chuan Pu Sawma banah chuan a chemte hmang chuan #1 tih hi a ziak a, thisen hmang chuan motor hmaah tak chuan "VICTOR LALTHANMAWIA." tih hi chiang takin a ziak leh a. a kalsan ta a ni.



*************************



(2 DAYS LATER)



Miriami chu darthlalang hmaah chuan a insiam mawlh mawlh a, chutih lai chuan a phone a lo ri a. A han enchuan a thiannu Ruatfeli call a lo ni a, "Hello, bawihte..ka hman tep." a han ti nghal zung zung a. "Ti vat ta che, hei in inbulah ka awm der tawh ania." tiin Ruatfeli chuan a lo vin hlur tawh mai.



"Ehe, kan inbulah i awm tawh amaw? Ka lo kal nghal e." tiin phone chu a dah a. A purse chu la vatin room atang chuan a chhuak a, "Nu..pa..ka kal aw.." tiin a nu leh paten an chhan hma hma chuan a chhuak nghal a, kawngpui bula Ruatfeli tum bur chunga scooty-a lo thu chu ava hmuh chuan a inthiam lo kher mai.



Nuih tlawn pah chuan, "Awii ka tihpalh lutuk, i lo ning hman em?" tiin ava pan phei a. En pawh en lo hian Ruatfeli chuan, "Thu vat mai teh." a lo ti hlur mai. Scooty hnungah chuan Miriami chu chuangin, "Thawh ka hai chiang lutuk a, alarm ka set reng a, ka lo silent tih ka hre miah lo alawm." tiin a insawifiah zung zung a.



Scooty chu Ruatfeli chuan a han ti nung a, "Enge i silent ziah a? Silent thin tawh suh ka tih kha...engmah hrilh theih reng reng loh mai." tiin a hau chhunzawm char char a, an tlan ta a. "Englo....Lawrence-a bawk kha mawle, renew a duh a.." a han ti zawi deuh sap a. Vin lek lek hian Ruatfeli chuan, "Kha mihring kha ka haw lutuk, a la rawn be ngam che amaw?" a ti nghal pung pung mai.



"Umm...a tlawm duh lo."



"I reply ami?"



"Vawi hnih khat vel bak ka chhang chuang lo, chuvang ania ka silent daih."



"Vawi hnih khat lek pawh nise, reply lo hrim hrim rawh. A nih loh pawn block mai la, a harsa lo e."



"Han block em hi chu a nep thlak ka ti deuh mawle."



"Nep thlakna a awm lo, enge a rawn tihbuai zel che ni?"



"A ho lutuk, ka block dawn lawm..sawi tawh suh."



Reiloteah chuan Miriami te thiandun chuan an kalna hmun tur chu an thleng ta, in pakhat bulah chuan an ding a. Scooty atang chuan an chhukthla ve ve a, inkawtah chuan mi an lo tam tawh mai. An zinga patling chuan, "In van tlai ve...dar 9 kan tih kha. Hei tunah dar 9:15 a ri der tawh ania, ngati nge?" tiin a lo zawt a.



"Englo ania, Sir...thawh ka hai alawm mawle." inthlahrung tak chuan Miriami chuan a lo ti vat a. Chupa, Pu Rinnunga chu a khi suk a, "A tha e, hei tawngtaina te pawh kan lo hmang zo tawh a. Va in make-up vat ula, kan shoot nghal mai dawn nia." a ti a, tichuan Miriami te thiandun pawh chu an make-up artist chuan a chei nghal mawlh mawlh a.



Miriami leh Ruatfeli te thiandun hi Pu Nunga project neih lai mek, mizo film thar an shoot mekah changtunu te pahnih an ni a. A awmzia chu Pu Rinnunga hian film a siam a, Miriami te thiandun hi a changtunu te pahnih an ni tihna a nih chu. Kum 5 liam ta a Mizoram ti ral ti em em tu, Victor Lalthanmawia, Hmaikawra tih a an hriat, boral ta thawnthu behchhanin film chu an shoot mek a ni.



***************************



Tlangval pahnih ram kal chu an kal pah chuan an titi dun a, eng enge maw sawiin an hlim dun kher mai. Pakhat zawk chuan, "Kan va thleng har ve mawle....i chiang chiah maw kan kalna hi?" tiin a zawt a. A thianpa chuan an hma zawn, kawng chhe tak leh awih angreng tak chu kawk chhovin, "Khi kawngpui pawh a lang tep alawm, kal hram hram ang." tiin a lo chhang a.



Kawngpui an thleng dawn tihah chuan thingkung bula motor, ahma sawi vek mai chu an hmu ta. "Ehe khi..motor khi a accident a ni chiang mai, hawh teh i kal chak deuh teh ang." tiin pakhat zawk chu a tlan chho a, a thianpa chuan a zui ve nghal a. An thleng chho chiah chu pakhat zawk chu a rak tuar mai, "Enge ni a?" tiin a thianpa chuan a zawt vat a.



Pu Sawma ruang chu kawkin, "Enteh hei...mihring ruang." a ti vak a. A thianpa chuan a han en ve a, "Ehe..engtin nge kan tih dawn?" tiin a mangang kher mai. Ruang chu a lo nam ve deuh tan tawh lehnghal a, Hmaikawra'n a vihna, a dul kaw huau mai te chu thovin an bawm luai luai mai.



Motor hmaah thisena inziak, VICTOR LALTHANMAWIA tih chu an han en a. "Victor Lalthanmawia...enge maw awmzia le?" tiin pakhat zawk chu a phun nuah nuah a. "Thisenin a inziak lehnghal, tualthattu hming tihna em mawni le?" a thianpa chuan a lo ti ve bawk a. "Ka hrethiam biklo, engtin nge kan tih dawn?" tiin a lo zawt let a.



"Police kan hrilh mai dawn em ni?"



"Nia..mahse min ringhlel ange?"



"I mawl ami? Engvangin nge maw min rinhlelh ngawt ang le?"



"Anih chuan call rawh nangman."



Police chu an phone nghal a, an awmna te chu an sawi a. Police ho lo thlen hma chuan ruang chu chumite thiandun chuan an awmpui ngat ngat mai. An awmna a hla bawk a, arbai kalkawng a lo ni bawk nen. An nghak dun rei ngat ngat khawp mai, darkar dawn a liam hnuah chuan Police te pawh an lo thleng ve ta.



Police motor atang chuan SI Remruata chu a rawn chhuak a, police dang te chuan an rawn zui bawk. Ruang chu a han en a, "Amah hi in hre ngai em?" tiin tlangvalte chu a zawt a. Pakhat zawk chuan, "Aih hre ngai miah lo ka pu." tiin a lo chhang a. Remruata chuan constable Kima chu a ko va, "Hemite pahnih hi a pawimawh ang ang lo zawt ang che, ruang hi kan enfiah lawk ange." tiin ruang chu ava pan hnai a.



A hliam chu a han en vang vang a, "Accident vanga thi a nilo, thah ngei a ni. A accident hnu hian ala thi lo tih a hriat bawk, tualthattu an awm a ni." tih pah chuan motor chu a en a, motor hmaa thisen hmanga Victora hming lo inziak chu a hmu ta. A police lukhum phelh meuh chuan a han en chiang a, "Victor-a? Victor Lalthanmawia ala dam amaw?" a ti hu mai.



"Kima, lo kal lawk teh." tiin constable Kima chu a ko va, a lo tlan vat a. "Hei en teh." tiin motor hmaa Victora hming inziak chu a kawh hmuh a, Kima pawh chuan mak a tih hmel kher mai. "Ehe Sir, kha Victora bawk kha tihna em ni?" a ti ve hu mai. Remruata chuan a lu thingin, "A thi tawh...a ruang an phum naah pawh ka tel ve alawm. Amah a ni theilo, midang thil tih a ni." tiin a chhang a.



"Anih chuan tunge ni ta ang? Engvangin nge Victor-a hming hi a ziah kher?" Kima chuan a han ti ve nuah nuah a. "Engpawh nise, forensic ho lo thleng se. Motor chhung hi han enfiah se, chumi hnuah chauh chuan ruang pawh post mortem turin kan phur phei chauh ang." Remruata chuan a lo ti leh a.



Remruata bawk chuan constable dang ho chu a ko va, "Mitthi chhungte hi hriat vat tum ula, an address kimchang zawng zawng ka hre duh a ni." a han ti leh a. Tichuan ruang chhartu, tlangval pahnih te chu ava pan a, "Khawia kal tur nge in nih?" tiin a zawt a. Pakhat zawk chuan, "Lui kal tum kan nia, mahse thil kan theihnghilh avangin let leh kan tum a. Helai atang hian kawngpui a short cut zawk a, chuvang chuan kan chho mawle." tiin a lo chhang a.



"In phone number hi ka chhinchhiah anga, mamawh in la ni maithei a, phone call in lo ngaichang dawnnia. Chuan he mitthi hi in hmuh thu tumah hrilh suh ang che u, a chhungte kan hriat hunah chauh duhleh insawi dawnnia. In kal thei e.." tiin a kaltir ta a. Forensic ho pawh an lo thleng a, tichuan ruang leh motor chhung chu an enfiah nghal a.



************************



Pu Rinnunga te chuan chumi hmuna an chan tur scene chu an zo ta, crew member te chu a ko khawm a. "A lawmawm e, tunah chuan a pawimawh lai ber scene kan chawng tawh dawn. Tunah ramhnuaiah chuan kan chhukthla anga, engmah theihnghilh loh tur aw.." a han ti lauh lauh a.



Tichuan an in-pack fel a, ramhnuai lama chan chhunzawm tur chuan an inzui thla hnak hnak hlawm mai. Rei fe hnuah chuan an thleng a, an han in-set fel leh zung zung a. Chutia an in-set fel chhung chuan crew zinga mi, pawimawh lem lo ber chu damdawi ti ru turin ramhnuai pilril lai deuh chu a pan zuk a.



Midang chu an buai em avang chuan an crew zinga mi, Zaia pit ru zuk chu an hmu hauh lo. Tichuan Zaia chuan a pan hla telh telh a, tichuan insulin chuan damdawi chu a han hip a. A banah chuan a inchiu a, a maimitchhing vang vang mai. Tichuan a indah tha sawk sawk a, a phei leh ta a.



Chutih lai chuan midang ho chu an in-set zo ta a, shooting an tan dawn ta. Director chu a hawi kual a, "Kan kim vek em?" a han ti a. Miriami chuan, "Khawnge Zaia kha?" a han ti a. Midang ho pawh chu an hawi kual a, Zaia chu an hmu ta hauh lo mai. Pu Nunga chuan a lu a dawm vawng vang a, "Aww..hepa hi chu, reflector light a ken a ngai ka ti mawlh mawlh a." tiin a lungawiloh hmel kher mai.



An Assistant Director, Robert-a chuan, "Damdawi a ti ru leh tawh aniang." tiin Pu Nunga chu a hrilh ru zauh va. An camera man pakhat zawk, Jonas-a chuan, "Ka va zawng ange.." tiin ramhnuai lamah chuan a kal nghal a. Pu Nunga chu a thinrim kher mai, "Hetianga kan awm leh a nih chuan kan film siam mek hi kan cancel hmak ang, a ngaihna a awm lo, hetiang mai mai chuan kan chang chhuak zo lovang." tiin a phun bul bul mai.



*******************************



Zaia chu a kai nuam khawp mai, a zai phei rut rut a. Chutih lai tak chuan thingkung phena mipakhat, pil zuk mai chu a hmu a. A phu zuk a, a ding chat mai. "Tunge? Tunge ni?" tiin a pawr nghal kher mai, mahse crew zinga miin an tihthaih a nih ringin a nui vur vur a. "Zawng ho, min tihthaih reng reng su aw.." a han ti vak vak a.



Mahse thawm chu a reh leh hmak mai si, "Uang lo teh u...lo chhuak mai mai teh u." a han ti vin leh thak a, mahse ala reh thiap mai si. Thingkung chu zawi muang chuan ava pan a, "Mawl mawl lo teh, lo chhuak mai teh." a han ti leh a. Ava thleng a, mahse thingkung phenah chuan tumah an lo awm lo.



A mit a han nuai a, "Ka hmu sual em mawni le?" a ti nuah nuah a. Chutah a khi suk a, "Ka kai deuh mah mah animaw...zialo thin ve." tiin kal leh mai a han tum a. A leh hawi chiah chu a hmaah tak chuan Hmaikawra chu a lo ding reng mai, "Zawnga...min ti phu nasa lutuk." tiin a awm chu a dawm vawng vawng mai.



Hmaikawra chu a ngawi reng a, Zaia bawk chuan a hmaikawr chu en in, "Ehe...William, Hmaikawr thar em ni..vawk hmel ala ni zui, a engemaw rapawm reuh khawp mai. Engtik laiin nge kan thlak ka hre miah lo, a hmaa mi kha dawrah in return leh ami?" tiin a be nghal mawlh mawlh a, William-a a tih chu an film siam tura Hmaikawra lem changtu tur ber a ni.



Mahse Hmaikawra chuan a chhang lo, a kawnghren ah chuan chemte chu a pai nalh tak nen a lo pai reng mai. Chemte chu a phawrh a, Zaia chu a en ta run mai. Zaia chuan a uang turah a la ngai a, "Chemte pawh chu ava nalh ve, mahse a tak ang khawp mai." a han ti leh a. Mahse Hmaikawra chuan ala chhang chuang lo, Zaia pawh chuan mak a ti tan.



Chutah Hmaikawra chuan vih tum niawm tak chuan chemte chu lek kangin a pan hnai ta mai a, Zaia chu a hrilhhai kher mai. "Hey, enge maw i tih le?" a ti khur deuh dar dar a, chutah Hmaikawra chu a rawn kal chak tulh tulh mai. Zaia chuan a hlau ta, "Mawla..enge maw tih i tum le?" tiin a tawlh hnung hret hret a.



Hmaikawra lah chuan a pan hnai zel mai si, chutah Zaia chu a tlanchhe ta a. Au a tum chiah chu Hmaikawra chuan chemte chu a vawm vak a, Zaia tukhumah chuan a bur chat mai. Leiah chuan a bawk thlawp a, second reilote hnuah chuan a thi nghal. Hmaikawra chuan Zaia ruang chu a va pan hnai a, chemte chu a phawi a.



Zaia kawr chu a phelh sak a, a hnungzanga chuan chemte hmang chuan VICTOR tih chu lian takin a ziak a, a hnuaiah chuan #2 tih a ziak tel bawk. Tichuan rawmawl a phawrh a, chemte a thisen kai chu a hru fai a. Zaia ruang chu a en leh vang vang a, "A pahnihna i ni e." tiin a kalsan ta a ni.



***************************



Jonas-a chuan Zaia chu a au vak vak a, a zawnkual hrep hnuah pawh chuan a hmu zo ngang lo aniang nge. A let phei leh a, "Ka hmu zo thak lo." tiin Pu Nunga chu a hrilh a. Pu Nunga chu a thinrim hle mai, "Umm a pawi lo, midang an awm tho. Lo let leh se, ka ban nghal ang." a ti khur khur mai.



Tichuan shooting chu an tan leh ta a, Williama..Hmaikawra lem changtu tur chuan a hmaikawr chu a vuah a. Tichuan Miriami chu a han zawng kual a, Miriami leh Ruatfeli te chu thingkung karah te chuan an biru a. A chan pawh an chang thiam narawh e, lungawi hmel tak chuan Pu Nunga chuan a en reng a.



Chutia an chan lai chuan actor zinga mi tho, a sira meizial lo zu mek, Vena chuan a phone chu a khawih mual mual a. Chutah message a dawng a, number hriat loh atangin a ni. "Victor Lalthanmawia ala dam." tih ringawt hi a lo ni a. Mak a ti angreng kher mai, "Tunge aw?" tiin a reply a.



Reiloteah chuan a phone chu a rawn vibrate leh a, "Keimah." tih ringawt chuan a rawn thawn leh a. A thiante zinga mi tute emawin an rawn fiam a nih ringin, "I hming chu amak hle mai, ka buai..nih phawt." tiin a reply a. Mahse a rawn thawn let leh tlat, "I awihloh chuan naktuk zingah in zinga mi pakhat an bo ang." a rawn ti leh a.



A thianten an fiam a nih ala ring cheu va, "A va nuam dawn ve...kan inzawng luai luai anga a ni mai alawm." tiin a reply leh a, a phone chu Airplane mode ah chuan dahin a ak ta daih mai. An chawl rih a, lunch te chu an ei hova. "Zaia chu khawnge maw a awm le?" Jonas-a chuan a han ti leh nuah nuah a, cameraman pakhat zawk, Isaka chuan, "Ho lutuk, a lo let ve mai ang." a lo ti sam et a.



Pu Nunga chuan vin deuh thak hian, "Tuman ngaihsak loh tur..a tir pawhin rui suh ang che tiin ka hrilh mawlh mawlh a, tuman kan ngaihsak tur a ni lo." a ti hmak mai. Chumi ramhnuaiah chuan riah an tum nghal a, chuvang chuan Vena message rawn thawntu pawh khan a tuk zinga mi pakhat a bo tu thu a rawn sawi a ni mahna le.



***************************



SI Remruata dawhkan hmaah chuan Forensic Doctor chuan report a pe mawlh mawh a, "Kha, thlalak kha en teh. A ban dinglam ruh kha a tliak a, #1 tih a inziak bawk a ni. A awmzia chu vihna hnuhma kha chu thudang nise, tualthahna a ni tih tiching leh zualtu a nih kha." tiin thlalak chu a en tir a.



Remruata chuan a han en vang vang a, thlalak ah chuan Pu Sawma ban ruh tliak lam, a ding lama #1 tih lo inziak chu a hmu ve a. "A nih chuan he tualthattu hian hepa hi a that hmasa ber a, midang thah tur a la nei tih chu a chiang reng mai." a han ti nauh nauh va. "Remruat, Victor Lalthanmawia tih inziak khan ka ngaihtuahna a ti thui angreng khawp mai." Doctor chuan a han ti a.



"Engti zawngin maw?"



"Aww..a thi tawh si a. Tualthattu hian Victor Lalthanmawia a nih thu a tarlang tihna nge ni anga, Victor-a angin a che zawk ni ang le?" a han ti a. "Nilo...Victor-a lem a chang mai mai a ni. Victor-a kha a ruang an phum phawh khan ka tel ve alawm, kum 5 lai a liam tawh." tiin a lo chhang a.



Chutih lai chuan constable Kima chu lo lutin, "Sir, mitthi hming chu kan hre tawh e. Pi Lalkungi pasal, Pu Lalsawmliana a ni e." tiin an address kimchang nen chuan a hrilh vek a. "I ti tha e, Kima...anih chuan kan va kal dawn em ni?" a han ti a. "I thu thu le, Sir." tiin Kima chuan a lo chhang a.



An pahnih chuan carah lutin Pu Sawma te in lam pan chua an kal ta a, an tlan pah chuan an titi a. "Sir, Victor-a kha Hmaikawra an ti thin tiraw?" a han ti a. "Aw..kan hriatdan ber alawm." tiin a lo chhang a. "Ala dam chu ka ring chiah lo nangin a ruang laih chhuah leh hial chi a nilo maw?" a han ti a.



"Ngai lul love...reiloteah kan chhui chhuak vat ang. Victor-a lem changin a rawn che vel mai mai a nih hi....mi engemaw zat thah a tum a nih hmel a. Pakhat chu a that ta phawt a, midang chu ka thah belh tir tawh hauh lovang." a han ti khur khur a. Reiloteah chuan Pu Sawma te in chu an thleng ta, motor atang chuan an chhuak dun a.



Kawngka chu an han kik karh karh a, Pu Sawma nupui Pi Kungi chuan a rawn hawng a. Chutia police pahnih an lo ding khur mai chu a phu deuh zuk a, a ngaih a tha lo nghal kher mai. "Enge ni ta?" tiin a zawt a. Remruata chuan a aw a han thian kharh kharh a, "Pu SAwma te in a ni em?" tiin a han zawt a.



"Aw ni e, mahse inah a awm lova."



"Khawiah nge a kal aw?"



"Arbaiah riak turin a kal a, zan 3 lai chu a riak tawh."



"In phone ngai lo em ni?"



"A riak fo thin a, kan phone ngai lem lo. Chubakah signal a awm tha ngai silova, ramhnuaiah chuan...enge nita a?"



Inthlahrung tak leh sawi hreh hmel tak chuan, "Englo ania ka pi, arbai kalkawngah ruang chhar a ni a. I pasal ruang ni ngeiin kan hria a, in motor number hi MZ 01 C 5764 a ni em?" a ti ta mai a. Phawk hru hian Pi Kungi chu a meng a, "Aw..kan motor number ngei a nih chu..enge awmzia, ka pasal chu a thi tihna em ni?" a ti nghal chel chul mai.



Remruata chuan Pu Sawma ruang thlalak, a hmel chauh lanna chu a hmuh a, chutah Pi Kungi chu a hmui hupin a tap ta ruih ruih mai. A fapa chuan a nu tap thawm chu hria in a lo tlan vat a, "Engati nge ka nu? Enge awmzia?" a ti a, police pahnih a han hmu veleh phei chu a ngaih a tha lo zual kher mai.



Pi Kungi chuan a fapa, Peka chu kuahin, "Bawiha, i pa a thi an ti, a ni thei lo." tiin a tap ta hawm hawm mai. Peka chuan mak a ti em em a, "Engmaw? Enge awmzia?" a ti vak vak mai. Remruata chuan, "Tlangval, i pa ruang chhar a ni a, chumi hrilh tur leh thu zawt fiah tur che u in kan lo kal a ni." a lo ti ve leh a.



Peka pawh chu a tap nghal der mai, chutih lai chuan thenawmte pawh Pi Kungi tah rin em avang chuan an lo kal khawm a. An thenawmpa, Pu Dinga chuan, "Enge ni a? Enge awmzia ka pu?" tiin Remruata chu a rawn zawt ve leh a. Remruata chuan a lo hrilh leh a, "Aw..ani maw? Ava pawi ve aw...kan han inhrilh darh ange." tiin midang ho chu an inhrilh chhawng ta hlawm a.



*******************************



Tlai dar 3 a ri tawh a, Zaia chu a lo la let thei reng reng lo mai. Pu Nunga ber pawh chu a mangang tan ta, "Mipa thenkhat ho khan zawng mai teh u...a lo OD reng te hi a niang nge." a han ti a. Tichuan Jonas-a, Williama, Vena leh Isaka te chuan an zawng ta a, midang zawng chuan rawng an bawl a.



Miriami phone chu a rawn ri a, a bialpa hlui Lawrence-a a lo ni. A nihna takah chuan midang laka a lo phatsan avangin Miriami hian haw hle mahse, a duhna ala reh chuang lova, a block phal lo bur a ni. An awmna atanga hla deuh hlekah chuan ava phei a, "Hello..tinge min la rawn call fo va?" tiin a vin nghal deuh hlur mai.



"Miriam..khawngaihin min ring hram rawh. Ka bum lo che...khanu kha engatan mah ka ti lo."



"Engatan mah tilo si tinge in inphurh fo si? In tawmdun lai pawh Ruatfeli'n a man che u a nih kha, khumah inlo awmdun lehnghal. Kha bak bak a inbumna a awm lo, min rawn call tawh suh."



"A damlo a, ka thian hlui a ni ve a. Ka kan a, khatih lai khan tawnzau chiah ka ha hrim hrim a. A lukham ka siamthat sak lai takin a lo lut a nih kha, abak engmah a awm lo."



"I chhuanlam a nih chu...ka dah, bye."



Miriami chuan a phone chu a dah hmak mai, "Buai nen..rilru hah nen, ka kham lutuk." tiin aphun bul bul a, midang ho awmna chu ava pan leh ta a. Ruatfeli chuan rawn pan vatin, "Tunge i va biak a? LAwrence-a bawk a mi?" tiin a lo zawt vat a. "Aw..a rawn insawifiah leh a." tiin a lo chhang a.



"Awwiii ka hmu ve chiang e...Sentei nen khan an inkiss chiang lutuk, LAwrence a khan a bawh vel alawm. Va lut lo phei ila chu an che nasa hman viau ang, a tir atang khan ka ring tawh lo hrim hrim." a lo ti nghal zuah zuah mai. "Huiham ka ning, sawi tawh lo teh." Miriami chuan a lo ti hlur a.



DArkar 2 vel hnuah chuan mipa ho chu an rawn let leh a, an hmuh loh thu chu an rawn sawi ta mai. Pu Nunga chu a ngawi vang vang a, "Umm..engpawh nise, chaw kan ei phawt anga, a lo let ve leh mai turah ngai ang." tiin chaw ei chu an siam ta a. MAhse chaw an eikham vek hnu pawh chuan Zaia chu a lo la let hauh si lo, khua pawh a thim chu a ni tawh mai.



*************************************



TO BE CONTINUE

VICTOR LALTHANMAWIA (A HANDSOME CREATURE SPIN-OFF)



[MIZO FICTION SLASHER/HORROR STORY]



WARNING : 18+



Written by : Aaron Malsawmdawngzuala



Chapter - 2









*******************



Pu Sawma ruang chu a lo thleng a, a nupui leh a fapa chuan an tah nghal a. Thenawm khawveng te pawh chuan a tul tul an buaipui nghal a, an veng thalai te pawh chuan thutthleng te an rem sawk sawk bawk. SI Remruata leh Kima te pawh chu an la awm ve reng a, Pu Sawma te thenawm chiah ami, Pu Biaka chu an be mek a.



"Engtia rei nge in inhriat tawh?" tiin REmruata chuan a han zawt a. "Kum 10 kal ta khan hemi vengah hian kan rawn awm ve a, kum 10 chhung chu kan inthenawm tawh tihna a nih chu." tiin Pu Biaka chuan a lo chhang a. "Eng ang mizia nge a nih reng reng?" tiin a zawt leh a. "Pa fel tak chu a ni chuan ka hria, an chhungkua sawn an hlim em em tawk em em a, mi pawi an sawi ngai awm pawh ka hre lo." tiin a lo chhang leh a.





"Nupa a han inhauh bur bur chang te an neih i hre mial em?"



"Hre ngai lo, kan inhnaih viau a, inhau thawm hriat tur a vang thei khawp mai. Keimahni chhungkua zawk hi kan inhau zing zawk ang, an hre pha fo zawk ang."



"A nih leh ka pu, mi han rinhlelh deuh te i nei em?"



"Rinhlelh tur ka van hre lo ve...amak ka ti khawp mai, ani ang pa zaidam leh fel hetia thah a ni ringawt mai hi."



Chutih lai chuan constable Kima chu a lo kal a, "Sir, Pi Kungi chu a inpeih tawh e." a rawn ti a. "Anih Pu Biak, nakinah kan inbe leh dawnnia." tiin inchhung lam pan chuan an kal ta a. Pi Kungi chuan tah aw tuau hian, "Room lamah min lo zui chho ru." a ti a, an in zui chho ta hlawm a. Pu Sawma fapa, Peka erawh chu apa ruang chu thutchilhin ala tap nasa kher mai.



An nupa khumah chuan Pi Kungi chu a thu a, a hma takah chuan Remruata chu a thu a. "Ka pi, inpa hian hmelma a neih awm i hria em?" tiin a han zawt a. "Neilo, tumah hmelma a nei lovang. PA fel tak leh zaidam tak a ni a, hmelma chu a nei lo tawp ang." tiin a lo chhang a. "Anih leh tunhnai velah emaw, in inbul velah motor rawn ding emaw? Mihirng rawn vei ngun deuh bik an awm em?" tiin a zawt leh a.



"Chutiang engmah a awm lo, ka pu."



"Thian kawm deuh bik te a nei em?"



"Aw nei e, a tlangval lai atanga tun thlenga kawm chu a nei alawm."



"Tunge a hming?"



"Zomuanpuia a nia, Pu Muan kan ti mai thin."



"Khawi veng nge?"



"Kan veng tho."



"Amah chu inah hian a awm ve em?"



"Aw..ruang kil ber khu ania, ala thawhsan lo reng reng."



"Inpa hi a ruang kan chhar khan a mobile phone hmuh anilova, a wallet pawh hmuh a ni lo bawk. Rukrukna avanga tualthahna a nih hmel a, khawimah lo kal bo lovin lo zin bo suh ang che u. Engpawh nise hnuchhuina kan kalpui mek zel a, kan kal phawt anga, kan mamawh hunah kan rawn be leh dawn che u nia." tiin Remruata chuan a chhuahsan a.



Ruang kil tuber, Pu Sawma thianpa Pu Muana lo tap hawm hawm mai chu Remruata chuan a en vang vang mai. Rei fe a en hnu chuan a chhuak ve leh mai a, Kima chuan a zui ve nghal bawk. Motor-ah chuan an chuang a, Station lam panin chak tak chuan an tlan ta a. An tlan pah chuan, "Kima, Pu Muana hmel kha i lo en chik ve em?" tiin a han zawt deuh thut a.



"En chik lem nang, a tap tih chu ka hmu a, ngatinge?" tiin a lo zawt a. Remruata chu a han thaw deuh hak a, ""A tap mai a nilo, hlauhthawnna nei a ang ka ti." a lo ti daih mai. Kima chuan a melh hru a, "Enge i sawi awmzia?" a ti hu mai. "Kan tah hian chhan hrang hrang a nei thin a, lawm vanga tap te, lungngaih vanga tap te, hlauh vang te, engkim a hrang vek." a han ti leh a.



"Ka lo en chik miah lova, engtia hlauh hmel maw i sawi?" tiin a lo zawt leh a. Remruata chuan khik suk pah chuan, "Aa..patling pui si kha, a thianpa ruang kha a melh khan hlauhthawn rukna riau a nei a, a meng deuh zawk zawk bawk a." a han ti leh a. "I ringhleh deuh tihna em ni?" tiin Kima chuan a lo zawt leh vat a.



"Thil engemaw zawh fiah deuh chu ala ngai a ni...zanah kan inah lo phei rawh aw...he case hi nangmah nen kan khawih ang."



"Awle Sir."



***********************************



Khua athim vek tawh a, riah buk tur pawh an siam fel vek tawh. MAhse Zaia ber lah a lo la let der mai si lo, Pu Nunga chu a mangang tawh kher mai. An Asst Director Robert-a nen chuan an titi a, "Ani hi a lo OD tak tak hi aniang nge, nge ni a kawng a bo zawk." Pu Nunga chuan a han ti nuah nuah a.



"Ka hre tawh bik lo, hmanni khan kan lo ban tlang law law lo a ni." Robert-a chuan a lo ti a. "A buaithlak zawng anih hi...engpawh nise, kan shoot tlang law law dawn nge, Zaia chu kan zawng leh dawn pawh ka hre tawh lo ve a." tiin Pu Nunga chuan a lu thak lo pui chu a hiat nauh nauh mai.



Midang ho pawh chuan Zaia chungchang chu an sawi sap sap hlawm a, Camera man pakhat zawk, Jonas-a chu Director te bulah chuan a va phei a. An bulah chuan va thu ve in, "Sir, hei en teh." tiin a phone chu a en tir a. Whatsapp Group pakhat ah chuan, "Kum 5 liam ta a tualthattu boral ta, Victor Lalthanmawia, Hmaikawra tia kan hriat thin chu a rawn let leh niin an sawi." tih hi an lo post a.



"Ehe..enge awmzia?" Robert-a chuan a lo ti nghal vat. Mahse Pu Nunga chu a ner sak a, "A awihawmloh thei emai, mizo pawh hi inlak engemaw hi kan tum leh lutuk a. Khatianga fake news lo phuah chawp tawk te kha chu an awm ngei ngei, whatsapp group tinah." a lo ti daih mai.



Miriami chuan a lo hre pha a, "Ruang an chhar a, Pu LAlsawmliana, kum 57-a upa chu Arbai kawngah a ruang chhar a ni a, ni 2-3 vel a ruang hi hmuh lohvin a awm hman nia rin a ni. A bulah hian a motor, maruti chu a hma sawi vekin a lo awm bawk a, thingkung a su niin a lang. Hei en ve teh u, motor hmaah VICTOR LALTHANMAWIA tih a inziak bawk." a rawn ti ta lauh lauh mai.



Midang pawh chuan news chu an lo chhiar ve a, Victor-a chungchang sawi chuan an phun ta sap sap hlawm mai. Vin deuh thak hian Pu Nunga chuan, "Ngawi rawh u, a ho emai. Puitling rual thah si, mi tu emaw tih mai mai a ni. Thudik pawh va ni suh, ruang an lo chhar a nih phawin accident a ni mai." a han ti a.



An zinga actor pakhat, VEna chu a nui huk a, "Tuna kan riahna tur hi arbai kawng a nih hi aw..." a ti mai chu hmeichhe ho chuan an hlau kher mai. "A hlauhawm loh emai, keimah hi alawm Hmaikawra chu." tiin Hmaikawra role changtu tur ber, Williama chu a lo fiam thu ve bawk a. "Mu phawt ang u, zingah Zaia chu a lo let ve tawh mai ang." tiin Pu Nunga chuan mu turin a ti ta hlawm a.



*********************



SI Remruata te inah chuan REmruata leh Kima chu an inkawm mek a, Remruata roomah chuan thingpui an indun a. "Crime scene han en chuan doctor report zawng zawng nen, tualthattu hian motor kha a phar ding anga, chuan a dil ve pawh a ni thei. Tichuan silaiin emaw, hmanraw hmangin a vau thut anga, tichuan an insual buaina lamah thingkung kha a su niin a lang." a han ti nuah nuah a.



"A nih duh hmel khawp mai, mahse motor hma darthlalang kha a keh vek bawk si a?" Kima chuan a lo ti a. "Pu Sawma khan seat belt a hreng lova, a speed a chak tawh nen a in theh chhuak tih a chiang reng alawm. Tualthattu kha kawnglaiah a lo ding thut anga, Pu Sawma chu a buai ta pawh a ni thei tho mai." tiin Remruata chuan a lo chhang a.



"Engpawh nise engtin nge kan chhui zel dawn?"



"Pu Sawma thianpa, Pu Muana kha kan biak a ngai dawn. Naktukah kan hmu dawnnia, mahse hrilh lawk ve hrim hrim chu tha ka ti."



"Sir, anih leh tualthattu hi Hmaikawra kha a nih i ring em?"



"Ava mak e aw...a thi tawh, Victor-a kha chu...vawi engzat nge ka sawi dawn?"



"A hming kha a ziak miau sia, a lo dam leh te hi a ni lo maw?"



"Engtin nge mithi tawh na na na chu a lo dam leh ang, a vai film emai."



Chutia an titi lai chuan Remruata nau, kum 21 leka upa, Sentei chu a lo lut a. Sentei hi Miriami bialpa hlui, LAwrence-a nena lo chesual dun anga Ruatfeli'n a sawi kha a ni. An thingpui inna no chu a rawn seng a, "Ehe Sente, i dam tha tawh em ni?" tiin Kima chuan a lo zawt a. Sentei chu a nui sen sen a, "Um, ka tha zel a nimai." tiin a chhang a.



Sentei chu a chhuak leh mai a, "Sir, ngati nge a? A mit te kha a bui vek a, a tap leh tawh em ni?" tiin Kima chuan a zawt a. Beidawn hmel tak hian Remruata chuan, "Lawrence-a bawk kha...a kalsan hleithei lo a ni e." tiin a lo chhang a. Kima chu a ngaiw vang vang a, "Kha tlangval kha chu a ngeng ve bawk a, ka beng chak a nia aw.." a ti deuh vawng vawng mai.



"Ka hrilh ka hrilh alawm, Sentei pawh hi a dik lo ve tho. A hmelhriat tho, Miriami bialpa a nia. A duh tlat a, a buaithlak a nih hi."



"Mahse Lawrence-a pawh a lerh ve tho alawm, hope a siam sak zel bawk sia."



"Chupawh nise Sentei pawh inthiarfihlim luih ve mai tur ania, a mipa va dem chiam chi pawh a ni chuang lo."



Kima chu a tho va, "Engpawh nise, Sir. Ka haw phawt ange, naktukah kan inhmu dawnnia." a han ti a. Remruata pawh chu a tho va, "Nia..pawn thleng ka lo thlah ang che." tiin an inzui chhuak ta a. Pawn thleng chu a thlah a, tichuan inchhungah chuan a lut leh a. Choka lama a melh ngai lo melh reng, a nau Sentei lo chu tum bur mai chu ava pan a.



A bulah chuan dingin, "In zir phah nan te hmang zawk ta che, a duh lo che, nawmchen nan bak a duh lo che tih i hre chiang tawh awm ropui si a, mahse tikhan amah ngaihtuahin biak ila chak em em mai chu ania." tiin a hau nghal mawlh mawlh mai. Tap tuau chung chuan, "U...ka nu leh pate chu hrilh lul suh aw.." tiin a inhnit feih feih mai.



A bulah chuan Remruata chu a thu a, "KA sawi lovang, kan pahnih..kan unau thuruk a ni reng ang. Mahse hetia i awm renh hi ka hmu thei lo a ni, hmalam pan tum ve tawh rawh." tiin a hnem a. "U..Lawrence-a chu engtin mah ti suh aw...ka t(r)an vang a nilo, midangin an hriat ka duh loh vang zawk a ni." tiin a tap hawm hawm mai.



"Tap ring suh, ka nu leh paten an hria ange. Awle, engtin mah ka ti lovang. Mahse nangpawhin biak tum tawh bik lola, a number pawh delete ang che." a lo ti leh a. "Um..ka delete ang, ka ngaihtuah tawh lovang." tiin a lo chhang a. "Anih chuan ka mutsan ang che aw..mengrei suh ang che." tiin a mutsan ta a.



*************************



Lawrence-a chu a best friend, Jerome-a roomah chuan Jerome-a nen zu in dunin an la titi tui kher mai. Lawrence-a rui lung puam chu a duh loh ber mai, Sentei nena an CK ta mai chu a inchhir thu a sawi vak vak a, Miriami a ngaih zia leh a thiannu Ruatfeli a ngei zia thu chu sawiin a au lung lung mai.



"Nang pawh hi i mutpui kher a, a tul lo ve em alawm." tiin Jerome-a chuan a hau va. "Nangpawh ni la i hmanpui ve thovang, Miriami a period rei tawh em alawm." LAwrence-a chuan a lo la ti zui. "I hru thak ve hrim hrim a nih hi." tiin Jerome-a chuan a nuih liam ta vel mai mai a. An titi leh fe hnuah chuan dar 12 a lo ri dawn der mai, Lawrence-a pawh a haw ta a.



Rui tak chung chuan a bike-ah chuan a chuang a, chak mang kheng hian a ving phei fua mai. A tlan pah chuan, "Lalruatfeli, tul lo lutuk. Rawn lut thut ringawt a, keia pawh kawngka kalhna chang reng reng ka lo hrelo kha ka van mawl tak." tiin a phun phei char char mai. Reiloteah chuan a thleng a, a bike chu garage-ah chuan a dah a.



An garage bulah hian step chhuk ve tak mai a awm a, an in panna kawng a ni. Rui tak chung chuan a chhuk a, "Ava han pawi vawng vawng tak...Lalruatfeli vang vek." tiin a phun thla mawlh mawlh mai. Step chanve vel a thlen hnu chuan a tukhum chu a ri fawk mai, lungin an rawn vawm ni ngei tur a ni.



A hawi chho vat a, mahse tumah a hmu lo. Mak a ti angreng kher mai, "Tu tak chu nimaw?" tiin ngaih tha lo tak chuan a chhuk leh a. MAhse a aia lung lian chuan a hnungzang ri dawp khawp chuan an rawn vawm thum leh ta dut mai, a na a ti em em a. Rang takin a hawi chho va, "Tunge a?" a ti vin tuar mai.



Chutah le, Hmaikawra chu a pig-faced mask vuah chung chuan a lo ding khur mai a, chemte a la keng zui. A palen em avang leh chemte a hum run mai bawk si nen, Lawrence-a chu a pawr reilo kher mai. "Tu..tunge i nih?" a ti khur dar dar a. Mahse Hmaikawra chuan a chhang lo, stepah chuan muang chang chuan a rawn chhuk ta.



Lawrence-a chuan Hmaikawra chu en reng chung chuan a chhuk ve zel a, "Hey...tunge i nih ka tih chu...enge tih i tum?" a ti khur leh dar dar a, chutah Hmaikawra chu a rawn chhuk chak tulh tulh mai. Lawrence-a chuan a hlau takzet, chak takin stepah chuan a tlan thla nghal a. Mahse a ruih ala reh chiah bawk silo, a inchhuih palh ta.



Stepah chuan a lum thla ta tup tup mai, step lam a tam si, a insawh thla ri bawp bawp mai a. A tawp a tawpah chuan a lu sawh dawpin a thleng thla ve ta a, a ke ruh pahnih chu a tliak lehnghal. Lawrence-a chuan na ti hle mahse a au chhuak thei lo, a hnang awl awl mai. Hmaikawra chu a rawn chhuk ve zel a, a bulah chuan a rawn ding ta.



Lawrence-a chu tawng a tum a, mahse engmah a sawi thei lo. A hmai chu a thi phung bawk a, a ke veilam phei chuan hnunglam a hawi daih. Hmaikawra chu a thu hniam a, chiang tak hian Lawrence-a mitah chuan a en a. A thlek leh deuh ngawih ngawih a, "Nilo...nang chu i thi ve tur a nilo." a ti ta daih mai.



Lawrence-a chuan a hlau hle a, a thlan a tla zawih zawih mai. Hmaikawra bawk chuan, "Nang chuan ka pawi i sawi lo, mahse hmeichhe pakhat, a thianghlimna i laksak avang chauhvin na ka tawrh tir che a, ka hrem che a nih hi." a ti leh a. Thei leh thei lo hian Lawrence-a chuan, "Tunge i nih?" a ti tham tiak mai.



Hmaikawra chuan chiang fek fawk hian, "Ka hming chu Victor-a a ni, Victor Lalthanmawia." tiin a kalsan ta daih mai. LAwrence-a chuan a en zui vawng vawng a, step-a a chhoh chhung zawng chuan a en a. A kal liam ta maw tihah chuan a chhungte chu kovin a au vak vak a, a tawp atawpah chuan au harh thei hramin an fapa lo let reng mai chu an va hmu ta a ni.



**********************************



Zinglam dar 2 leh a chanve a pel tawh a, film chang mek te pawh chu an muhil thap mai. Mahse William-a, Hamikawra lem chang tur ber chu a muhil ve thei ta tlat lo mai. Hmeichhe ho riahna lam chu ava melh a, Hmaikawra anga inthuama va tihthaih chu a chak ta tlat mai. A muhil thei bawk si lo nen, a tho ta nge nge a.



Hmaikawra dress chu a ha mawlh mawlh a, tichuan chemte lem keng chuan hmeichhe riahna tent lam chu ava pan ta. Mahse a thleng tep tih ah chuan tent atang chuan actress zinga mi tho, Bawihi chu a rawn chhuak thut mai. Rang takin Wiliam-a chu thing buk phenah chuan a biru vat a, Bawihi chuan hmun fal deuh lam chu ava pan a.



A va zung a, William-a chuan tihthaih a tum ta. Muang chang chuan Bawihi awmna lam chu a pan zel a, hnimbuk karah chuan a biru phei zel a. Bawihi pawh chu a zung zo ta, a kekawr chu aha tha mawlh mawlh a. Williama chu fimkhur tak chuan Bawihi hnung lam chu ava pan zal zal a, chemte lem chu a han lek kang vel a.



Bawihi rawn hawi thut chu a phu nasa kher mai, mahse a au hman lo hlauh. William-a chu a nui ri kur kur a, "I hlau hmel mawlh kha." tiin a pum dawm meuh chuan a nui tiah tiah mai. Lungawi lo leh thinrim hmel tak hian Bawihi chuan, "I mawl ami? Au vak ta ila midang zawng zawng an harh dawn asin, mawl lutuk mai." tiin a vin hlur mai.



William-a chuan awmze nei tak hian a han melh a, "Nangmah kher i rawn chhuak chu khuanu ruat a ni chiang mai, hawh..kal fal leh deuh ila." a han ti a. Rum zet hian Bawihi chuan melhin, "I duh leh nangmah khan kal fal la ti nia." tih hmuk pah chuan kalsan a tum a. William-a chuan a banah vuanin, "Lo phei mai mai teh." tih pah chuan alamah chuan a pawt hnai a.



A kiss ta mai, Bawihi chu tang deuh mahse a tang rei lo kher mai. Bawihi leh William-a hi inndaizawng mek an ni a, kum 2 lai an inzui tawh a ni. Chuvang chuan Willima-a pawn a zunglai pawh a bihthla vek a, hmeichhe dang chu nise a ti bik kher awm love. An inkiss duhthawh telh telh a, "Hawh..kal fal leh deuh teh ang." tiin William-a chu a phur sawt kher mai.



"A chi loh..duhtawk ang. Midang kan ti harh palh ang, insum ve thin teh." tiin a lo hnial a. Mahse William-a chu a insum zo ngang lo, Bawihi chu a pu nawlh a, a aia fal deuh ah chuan a kal pui ta daih mai. Bawihi pawh chuan a hnial peih ta lem lova, a tih dan ang ang chuan a awm ta tawp a. Hla deuh fe a put phei hnuah chuan thingkung lian tak hnuaiah chuan a mut a, a thawmhnaw chu a phelh sak nghal mawlh mawlh mai.



Tichuan an duhtawk chuan an han injection a, mahse Bawihi chuan nuam a ti ve hauh lo. Tu emaw hian a enthla tlat chuan a hria a, William-a hna thawk mek chu a zawh hma hma chuan a nam sawn a. "A tawk...phei ang." a ti ta daih mai. Lungawi lo tak hian William-a chuan, "Kan zawh tep tawh kha mawle..tinge khatia i awm thut a?" a lo ti hlur mai.



"A nuam ka tilo alawm, a hmun hi a hlauhawm si." tiin a phei ta daih mai, William-a chu a thinrim hle a. Bawihi chu hawi letin, "Lo kal ta che." tiin a au vak a. MAhse William-a chuan en pawh en lo hian, "I duh leh phei la, ka lo kal ve mai ang." a lo ti hmuk mai. Bawihi pawh chu a titau va, "A tha alawm." tih pah chuan a kalsan ta daih a.



Muangchang chuan William-a chu a inha tha ve nghal a, "Ngeiawm lutuk mai, mi pawh nghah ve law law tur ania." tiin a phun nuah nuah a. Chutih lai chuan a sir hnimbuk chu a rawn che lawih mai, a phu zuk nghe nghe. Thehlei vel mai mai an nih ringin a kekawr chu a ha tha sawk sawk a, a kawr a ha leh tur chiah chu hnung lam atang chuan ban tha chak tak mai hian a rawn rek thut mai.



A au hman teuh hle a, mahse chu ban tha chak tak mai chuan a hmui chu a hup nghal bawk. Thingkung ah chuan a lu chu a tauh tir siah siah mai a, leiah chuan a thutbet leh a. William-a chu au tur reng a awm tawh lo, a chal vun te chu a thler vek lehnghal. Mahse ala dam a, a au chhuak thei lo mai zawk a ni.



Amah sawisa tupa hmel chu a han en a, hmaikawr a lo vuah daih mai. "Hmaikawra maw i nih a? Nang hi maw Hmaikawra lem lo chan vel tum tu chu?" tiin a phu ri bul bul a, a kawnghren atang chuan chemte chu phawrhin Williama mit veilam zawkah chuan a chhun siah mai. William-a chu a tal vak vak a, mahse Hmaikawra chuan a ka ahup tlat avang chuan thawm a chhuah thei si lo.



A mitmu velam zawk chu a kher chhuak der mai, thisen a rawn chhuak zawih zawih mai a. Mahse William-a chu a la thi mai lo, Hmaikawra chuan a mitmu dinglam zawk chu a chemte hmawr zum chuan a chhun leh ta. A mitmu pahnih chu kher chhuak ve ve in Williama mint chu a del ta der mai.



A tal nasa em em a, thisen lah a baw hawk hawk bawk. A hmuia hup reng pah chuan Hmaikawra chuan a beng bulah chuan, "A pathumna i ni e." tiin a hrawkah chuan a vit siah siah mai. William-a chu a thi chiang hle a, a hrawk atang chuan thisen chu rawn baw chhuak zawih zawihin grass ah chuan a kawi nuai mai.



Tichuan a bawkkhup zawngin a kuai let a, a kawr hnung chu a hlim a. Chemte hmang chuan VICTOR tih ziak lehin a hnuaiah #3 tih a ziak leh ta. Muang chang chuan a tho va, midang ho campna lam pan chuan ava phei ta. An tent hrang hrang, inhnaih taka lo awm fur mai chu a mal te te chuan a en a, ramhnuai thim lam pan chuan a kal leh ta daih mai.



***************************



Lawrence-a chu hospital ah chuan a mu bar mai a, a ke pahnih chu tuam khawng niin a lu pawh chu an tuam bur mai. A bulah chuan anu chu a thu a, "Engtiang fakauva tam nge maw i in le? Zu hi chuan a tichhe zo vek dawn che a nih hi." tiin a hau mawlh mawlh mai. MAhse a fapa chuan a chhang lo, ngawi reng chuan a melh ngai chu a melh reng ringawt.



A mitthla ah chuan Hmaikawra chu a lang sek mai a, thildang a ngaihtuah thei lo. A hlauh em avang leh mak a tih em avang chuan a chhungte pawh chu engmah a hrilh duh lova, an biak pawhin a rul tawk te te bakin a chhang lo. A chhungte bulah chuan a zui ruih vangin a lum palh niin a insawi a, thudik chu a zep rih tlat a ni.



A chhan pawh an awih loh a hlauh vang te, a ui lutuk chhuanlam mai mai a nih an rin a hlauh vang a ni deuh ber. Hmaikawra thil sawi te chu a han ngaihtuah let a, "Hmeichhe pakhat thianghilmna i lasak vangin ka hrem che a ni." tia a sawi chu a bengah chuan a ri nawn tluk tluk mai.



A ngaihtuah thui zel a, "Victor Lalthanmawia ka ni." tia a sawi te chu a ngaihtuah let a. "Victor Lalthanmawia, hman kuma tualthattu Victor-a, Hmaikawra an tih kha em mawni le?" tiin a rilru chuan a inbe mual mual a. Sentei phuba lakna a ni thei mai angem tih te thleng chuan a ngaihtuah ta, "A u hi police a ni bawk nen, a u..U Remruata hi a ni mai lo maw?" tiin a inzawt thul.



Chutih lai chuan nurse a rawn lut a, "I tho nuam maw?" a rawn ti a. Remruata chuan a lu a lo bu nghut ringawt a, "Tunah na i nei em?" tiin nurse bawk chuan a zawt leh a. "Aih neilo." a lo ti leh hmuk a. "Nachhawkna ka pe leh hrim hrim ang che aw.." tiin nurse chuan nachhawkna chuan a jection leh a.



Tichuan nurse chu a chhuak leh mai bawk, Lawrence-a chuan a nu chu a en a. ZAwi sap hian, "Nu...Victor Lalthanmawia kha i hre ve em?" tiin a zawt a. Anu chuan phawk hru hian a melh a, "Victor-a a? Tualthah hmang kha maw?" a lo ti hu mai. "Aw ni e...a thi tawh an ti tiraw?" tiin a han zawt leh a.



"Thi tawh e, mahse tinge min zawh a?" tiin anu chuan alo zawt let a. "Ka zawt mai mai che." tiin a chhang a. Anu chuan rum zet hian a melh a, "Min ti hlauthawng hman alawm." a ti nuah nuah mai. "Ngati maw? A thih tawh te chuan tinge i hlauh a?" tiin Lawrence-a chuan a zawt leh nghat a. "Aw..khapa kha chu tun thleng pawn mizo mipui te hian a hming kan hriat ringawt pawhin kan la hlau thei alawm." tiin a chhang a.



*******************************



Dar 7 velah chuan film chang turte pawh chu an tho kim ta, Pu Nunga chuan a han chhiar den den hlawm a. "Kan kim lo tlat a ka hriat...khawnge William-a ber hi?" a han ti a. Bawihi thin chu a phu nghal dup dup mai, a hma zan lawk khan William-a chu an awmna atanga hla ve takah chuan a kalsan daih kha a ni si a.



"Zaia pawh chu alo la let chuanglo ani maw.." Robert-a chuan a lo ti ve bawk. "Tunge nizanah William-a bulah mu?" tiin Pu Nunga chuan a han zawt leh hlawm a. "Keimah..ka bulah a mu. Mahse engtik laiin nge a chhuah ka hre lo, kei leh Williama leh Vena kan mu." tiin actor zinga mi tho, LAwma chuan a lo chhang a.



Bawihi hlauthawng chu a hma zana William-a nena an inhmuhna lam pan chuan a tlan thut mai, "Bawihi, khawnge i kal dawn?" tiin Miriami chuan a au zui a, mahse a chhang lo. Midang ho zawng chuan an zui ve nghal a, chutah Bawihi t(r)e ri an hre nghal. Rang takin an va pan a, William-a ruang chu an va hmu ta.



Miriami leh hmeichhe dang chua an au nghal vak vak a, a then an tap bawk. "Ekhai leh...saw saw William-a em ni?" tiin Pu Nunga pawh a rak that mai. Mipa ho chuan an va pan hnai a, William-a mitmu chhuak pur mai chu choak ten an lo la ei mek zui a, Bawihi rap lutuk leh hrilhhai lutuk chu a thidang hial mai.



William-a ruang chu a seisir zawngin, an mahni lam hawi zawng hian a mu a. VEna chuan ruang hnunglam chu a en a, "Ehe..enge awmzia?" a ti vak mai. Isaka chuan ruang chu bawkkhup zawngin a kuai vak a, chutah VICTOR tih chemte hmanga inziak chu an hmu ta a, a hnuaia #3 tih lo inziak chu an hmu bawk.



Pu Nunga chuan ava en ve a, "VICTOR...enge awmzia? Hei hi tu tih nge? William-a hi tu thah nge?" a ti vak vak mai. Jonas-a chuan zawi tak si, fiah tak si hian, "Ala dam...news kha a dik a ni." a rawn ti a. "Enge awmzia? Eng news maw dik?" tiin Pu Nunga chu avin hlur tawh mai. "Victor-a ala dam, ama thil tih a ni." tiin a chhang leh a.



VEna pawh chu lo tawng chhuak ve in, "A hnuaiah hian #3 tih a inziak a, awmzia a nei ngei ang. William-a hi a thah te zinga pathumna a ni tihna nita se, pahnihna chu Zaia a ni ngei ang. Zaia pawh tun thlengin a la bo va, Victor-a'n a that ve a ni ngei ang." a lo ti ve bawk a. "Anih chuan tunge a pakhatna ni ang?" hlau tih hriat tak hian Miriami chuan a lo ti khur dar dar a.



"Pu Sawma...ruang an chhar kha pakhatna chu a ni." tiin Isaka chuan a lo chhang a. Heng crew member te hi an hming tarlang lawk ila, Director Pu Nunga, Asst Director Robert-a, Cameraman pahnih, Jonas-a leh Isaka. An mahni puitu tur Zaia leh cast member ho te an ni a, cast member ho hi mipa pathum leh hmeichhe pathum an ni.



Cast member ho hi Miriami, Ruatfeli, Bawihi, Wiliam-a, Vena leh LAwma te an ni bawk. An vai hian mi 11 an ni a, Zaia leh William-a te an thi tawh a, tunah chuan pakua chauh an ni ta. An mangang hlawm hle mai a, "Pu Nung, keichu haw ka duh....haw mai ang u." tiin Ruatfeli chu a tap pur tawh mai.



****************************



TO BE CONTINUE

VICTOR LALTHANMAWIA (A HANDSOME CREATURE SPIN-OFF)



[MIZO FICTION SLASHER/HORROR STORY]



WARNING : 18+



Written by : Aaron Malsawmdawngzuala



Chapter - 3









********************



Remruata leh Constable Kima te pawh chu Pu SAwma thianpa, Pu Muana te inlam pan chuan an sawi lawk tawh ang ngeiin an kal ta a, Remruata chuan kawngka chu a han kik dat dat a. Mahse chhangtu an awm mai lo, an in en deuh hu ringawt a. Vawi nga vel a kik leh hnuah chuan Pu Muana chuan a rawn hawng ta hram a, a chauh hmel kher mai.



A mit te chu a bui vek a, a mu tlem hle tih a hriat bawk. Remruata leh Kima a han hmu chiah chu a phu deuh zawk a, "Ehe..nang..nangni maw?" a ti bah nuai mai. Polite tak hian Remruata chuan, "Pu Muan, kei hi SI Remruata ka ni a, hei hi ka thianpa Kima a nih hi. Englo ania, Pu Sawma thihna chungchang kha keimahni hian kan buaipui a, thu engemaw zawh che kan duh a." a han ti dam diai a.



Mahse Pu Muana hmelah chuan hlauhna a awm ta tlat mai, hnunglam hawiin an inchhung chu a han thlek kual a, "Ihh..aw...nia, englo..engmah ka hrelo." a ti bah leh nuai mai a. Remruata ngaih chu a tha tawh lo kher mai, "I tha maw, Pu Muan?" tiin a han zawt leh a. Harh chhuak zawk ni awm tak hian Pu Muana chu a phu leh zuka , "Aw, ka tha..lo lut ru." a ti ve leh mai bawk a.



Mak tih hmel tak chuan Remruata leh Kima chu an in en a, an lut ta a. In chu a lo reh thuap mai, zing dar 8 a pel vel chauh bawk. "Chaw in ei tawh em? Khawnge i chhungte?" tiin Remruata chuan a han zawt leh a. Thutthlenga thut pah chuan, "An awm lo, an chhuak vek a. Lo thu rawh u, thingpui ka'n lum ange." tiin Pu Muana chuan a chhang a.



Choka lam pan phei a tum chu Remruata chuan ko dingin, "Nilove, kan in lo mai ang. Lo thu ve zawk la, rei kan awm hman bik lova, khawngaihin.." a tih takah chuan Pu Muana pawh chu a ding a, ngawi reng chuan an bulah chuan ava thu ve a. "Pu Muan, Pu Sawma hi accident vanga thi nilovin thah ngei a ni tih kan nemnghet tawh a, tualthattu hi tunge nia i rin? Pu Sawma hian hmelma a nei em? I hriatpui em?" tiin zawhna chu an inzawt tan ta.



"Aih...neilo ang. KA hrelo, nei se chuan ka hre em em ang."



"Anih leh nangman han rinhlelh deuh i nei em?"



"Aih neilo."



"Anih leh nangmah hrim hrim hian hmelma i nei em?"



Pu Muana chu a phu leh deuh zuk mai, "Nei lo..tumah hmelma ka neilo hrim hrim." a ti deuh nghal chel chul mai a. Kima chu lo inrawlh ve in, "I va hlauhthawn hmel ve a, i tha chiah amaw?" tiin a han zawt ve a. Pu Muana chuan a mit chu a han nuai neuh neuh a, "IIhh..englo ania, ka thianpa ve ber ania, hetia min thihsan ta mai hian min thawng em a, ka rilru ala buai deuh a ni." tiin a chhang a.



Rinhlelh hmel tak hian Kima chuan, "I chhungte chu khawiah maw an chhuah a?" tiin a han zawt leh a. Zawi sap hian, "An chhuak, hmun dangah an riak." tih ringawt hian a chhang a. Remruata chuan mak a ti angreng kher mai, "Enge awmzia, khawiah maw an riah?" tiin a zawt ve leh a. Pu Muana chu za lo tak chuan a khi suk a, "Tlangnuamah, ka ni te inah an riak vek." tiin a chhang leh a.



"Engvangin maw?"



"Englo ania ka pu, mahnia awm ka duh a. Chuvang chuan ka riah chhuah tir vek a, ka thianpa thi hi ka sun em a ni."



"Nangmah chauh a i awm hi a him lo maithei asin, hei i hriat angin i thianpa ve ber a boral a, chupawh tual thi lehnghal. Nangmah thleng hian tualthattu hian a rawn umzui ve thei che ania, fimkhur angai takzet ania."



Pu Muana chu a hawi leh hru a, "Ka pu...tualthattu chuan min umzui dawn maw?" a ti leh nghal chel chul mai. "Nilove, thil thleng thei kan sawi mai chauh ania. Engpawh nise khawiah mah chhuak bo lo la, zawhna dang zawt tur che in kan lo kal leh maithei ania." Remruata chuan a han ti leh a.



An ding a, "Engpawh nise Pu Muan, kan haw phawt ange aw...sawi tak ang khan lo fimkhur la, i chhungte pawh chu ko let leh la kan ti khawp mai. Nidangah kan lo kal leh dawnnia, anih phawt le." tiin an chhuak a, kawngka bul thleng chuan Pu Muana chuan a thlah a.



Remruata leh Kima chu motorah lutin Station lam chu an pan ta a, an tlan pah chuan an titi a. "Sir, Pu Muana awmdan kha a mak i ti ve em?" tiin Kima chuan a han zawt a. "Nia, engemaw diklo chu a awm a ni." tiin a lo chhang a. "Anih chuan tinge kan va kal hma ve, engemaw zawh belh tur alawm." Kima chuan a han ti leh a.



"Engthil nge kan zawh belh vak anga?"



"Aw..hriat a nei alawm, engemawni chu a hre chiang a ni."



"Kan dawp dawn i tihna em ni?"



"Aw ni e."



"Zawh belh vak chi pawh a nih loh kha....chubakah evidence engmah kan la nei bawk silo nen, kan enthlak zui deuh chu a ngai dawn a nih kha."



*******************



Film chang mek te pawh chu an boruak tawn mek avang chuan an ngui bur hlawm mai a, Bawihi thidang pawh ala harh lo. Chumai bakah buaina dang an la nei cheu, William-a ruang an hmuh vang leh Zaia lo la let miah loh vang chu thudang nise, khatia Williama ruang an hmuh avanga an buai sup sup lai khan an tent chhunga an mobile phone zawng zawng chu a lo bo vek mai.



"Police call dawn pawh ni ila, kan phone zawng zawng a bo vek tawh bawk si. Zaia lah a chin hriat a ni bawk silo, Williama lah ti hian a ruang kan chhar nawlh mai chu a ni sia, kalkawng hre ber lah Williama bawk...engtin nge kan tih tak ang?" tiin Lawma chu a phun nuah nuah mai.



Miriami leh Ruatfeli chu inkuah chungin an thu khur dun hlawk hlawk a, Vena, Jonas-a leh Isaka te chuan Bawihi nikhawhrelova mu reng chu an buaipui mek bawk a, Robert-a leh Pu Nunga chuan engtia awm zel tur nge ni ang tiin an titi dun melh melh bawk a. Chutah VEna chuan thil hriat chhuah zawk a nei ta tlat mai, a ding deuh thut a.



"Taka...nimin khan...Zaia bo hnua kan shoot leh khan..shooting kan neih lai khan message pakaht ka dawng." a rawn ti chhuak hlawl mai. Rang takin Pu Nunga chu a rawn ding chhuak ve a, "Tunge chu chu? Eng message nge?" tiin a lo zawt vat a. "Tunge a nih ka hrelo, whatsapp ah ania. Ihh...ihh..number hriatloh ania." tiin a chhang a.



"Enge a rawn sawi...mawh?" Pu Nunga chuan a han ti leh a, midang pawh chuan VEna chu an en thap mai."Victor Lalthanmawia ala dam..tih hi min rawn thawn a. MAhse ka thianten number dang atangin min rawn fiam a nih ka ring a, engah mah ka lo ngai duh lova." tiin VEna chuan a chhang a.



Jonasa-a mangang leh thinrim tawh bawk si chuan, "Chungte chu ngaih serious tur alawm, kan hun tawn mek hi i hmu ve lo em ni?" a lo ti vin hlur mai. A aia vin hian Vena chuan, "Hetiang kan tawng dawn tih ka hre bik hleinem, chubakah kan film chan mek nen hian a inhmeh si a, min rawn fiam anih ka ring alawm." a ti let ve hrep mai.



"A hrim hrimin tu phiangsen in nge maw kan phone pawh chu lo ru hman thawt thawt le....tinge thawm pawh kan hriat miah loh?" tiin Isaka chu a inhrosa tun tun a. Mittui tla phung chung chuan Miriami chu rawn dak chhuak in, "Tudang vak nge ni anga? Tualthattu, William-a thattu hi...midang tunge ni se i tih a?" a ti khur dar dar mai.



Director ber, Pu Nunga chuan a melh ngai a melh reng a. Chiang fek fawk hian, "Kan bul hnaiah hian a awm ve reng tihna animai, mi fing tak a ni. Min enthla reng tih a chiang, kan che zia engkim hi a thlir reng a ni." a han ti deuh charh charh a. Hlauh hmel tak hian Ruatfeli chuan, "Enge awmzia? KAn bulah a awm reng maw? Tunah pawh min enthla reng tihna em ni?" tiin a t(r)e nghal chel chul mai.



"Ni love, chutiang ka sawi lo. Williama ruang kan buaipui lai kha remchangah la in kan phoen zawng zawng a lo la vek a, a chhan chu he tualthattu hian tum a nei a ni. Kan zavai hian min thah a tum a ni ngei ang, chuvang chuan police kan call theih loh nan kan phone a la vek a ni ngei ang." tiin Pu Nunga chuan a chhang a.



Robert-a pawh chu a ding ve a, "KAn vai hian min hrechiang hle bawk, a mal te te in min hrechiang hle bawk." a rawn ti chhuak nawlh mai. "Enga? Enge i sawi awmzia?" tiin LAwma chuan a zawt a. "William-a chiah in kalkawng a hria, ama min kawh hmuh a ni, he kan location pawh hi." tiin Robert-a chuan a chhang a.



Isaka pawh chuan a lu a bu nghat nghat a, "Umm ka man thiam e, Williama ber a thah nachhan pawh a kalkawng hre ber a nih vang a ni...motor kan park-na lah a hla ropui si a, kalkawng lah a kual kawi thui em em mai bawk si." a lo ti ve nuah nuah bawk a. "Haw ang u, eng tin tin emaw kawngpui chu kan thleng thei awm emai." tap pur chung chuan Ruatfeli chuan a rawn ti veleh a.



Chutia rilru hah taka an titi nak nak lai chuan Bawihi chu a rawn meng hrawk a, a thu chhuak hlawl mai. A thaw hlawi hlawi a, "William...Williama kha..." tiin a au vak vak mai a. Midang ho chuan an bawihsawm nghal vat a, "Hahdam rawh...Bawihi, hahdam teh." tiin Robert-a chuan a hnugah chuan a chul sak a.



Chutah BAwihi chu a tho thut a, an awmna sira thingkung lian tak bulah chuan ava tlan phei a. Thingkung chu vuanin a luak ta bawrh bawrh mai, midang chuan an rawn zui nghal a. A luak tam ngang mai, tichuan a thingthi hnawk a, a tap leh nghal hawm hawm mai a.



Miriami leh Ruatfeli chuan an va hnem a, "Bawihi, i tha em? Tho teh...i tho thei angem?" tiin an be mawlh mawlh a. Chutah mit bui vek hian BAwihi chu a rawn meng a, ahma hnimbuk kara a thil hmuh chuan kaihthawh chawp ngai lovin a zuan thawh tir rang kher mai.



BAwihi chu a rak vak a, a tawlh hnung nghal dawrh mai. "Tinge...ngati nge?" tiin Miriami chuan a zawt a, mahse Bawihi chuan a chhang thei lo. A hma zawn chu a kawk a, chutih lai chuan mipa ho pawh chu an rawn tlan phei a. Miriami leh Ruatfeli te chuan BAwihi kawhna zawn chu an va en a, anni pawh chu an rak ring ngang mai.



Hmeichhe pathum chu an rawn tlanchhe phei a, mipa ho chu an hrilhhai kher mai. Miriami te thiandun chuan Bawihi ber pawh chu an rawn tlan chhiat san daih mai, Pu Nunga chu va tlan vatin Bawihi chu ava kai tho nghal a. Bawihi chuan a kut chuan ahma zawn chu ala kawk reng bawk, Pui Nunga ava hawi phei chu patling pui e tilo chuan a rak nasa ngang mai.



Rang lutukin mipa dang ho pawh chu an rawn tlan phei ve nghal a, an thil hmuh chuan a ti ding rual thup mai. An thianpa, crew zinga mi tho, Zaia lu bung chu hnim karah chuan a lo let reng chu niin. Pu Nunga chuan BAwihi chu a kai tho vat a, Zaia lu bung awmna atanga hla vak lovah chuan a phei pui a.



Mipa dang ho pawh chuan tawng ngaihna reng an hre lo, "Zai..Zaia...saw saw Zaia a ni em?" tiin thei leh thei lo chuan LAwma chu a tawng chhuak tawk tawk a. Isaka chuan thinrim hmel tak hian, "Zawnga...tunge i nih? Lo inlan ta che, i ngam anih chuan min rawn hmachhawn rawh." tiin a au pung pung mai.



"Khatia auh vak vak khan awmzia a nei lo, helai hmun atang hian kan chhuah vat angai." tiin Jonasa chuan a lo vin hrep mai. Chutah Isaka a thinrim ta thut mai, "ENgtin nge kan chhuah vak anga? Kalkawng i hre bik tihna em ni?" tiin a cho ta khur khur mai. Jonasa pawh chu a thinrim kher mai, "Khatia mi vin ve khanglang le? Kan ti dawn mi?" tiin a va pan phei ta mai.



Isaka lah lo chet sawn a tum bik hauh lo, "Lo kal ta che, Zawnga!" tiin a lo pawr nasa mai. Vin zet hian Pu Nunga chuan, "Ngawi rawh u...mangan mah nak alaia nangni leh zel in lo intih buai le...ngawi hmak rawh u." tiin a hau dun hrep mai. Tap chung hian Bawihi chuan, "Williama a thi tawh bawk, Zaia lah a taksa takngial pawh kan hmu lo chu ania, kan thi vek dawn a nih hi.." tiin a mangang kher mai.



Chutah Miriami chu phawk hru hian a meng a, "Ngawi teh u, khawnge u Robert-a?" a han ti chiah chu an in enkual sap sap hlawm a. An Asst Director, Robert-a chu an zingah a lo awm ve ta hauh lo mai. "Robert..Robert..." tiin Pu Nunga chuan a au vak vak a, mahse hmuh tur a awm der mai si lo.



*********************************



Chhun dar 12 a ri a, Lawrence-a muhil pawh a rawn harh ta. A khum bulah chuan anu chu a lo ding a, "Ehe i lo harh tawh maw? I mutui tiah tiah hle mai." tiin a lo nuih sang a. A mit nuai nuah nuah pah chuan Lawrence-a chuan, "Dar engzat nge ni tawh a?" tiin a ham bui bui a. "Dar 12 a ri tawh, e taka...tu emaw ni in a rawn kan che a." tiin a nu chuan a chhang a.



Chuveleh LAwrence-a chu a meng phawk hru mai a, "Animaw? Tunge?" tiin Miriami a nih ngei beiseiin a phur ru kher mai. Anu in a chhan hma chuan bathroom kawngka chu a rawn ri rawk a, Sentei a rawn chhuak hlawl mai. Lawrence-a mood chu a off vek thei hial a, a melh rum kher mai.



Polite tak hian Sentei chuan, "I accident tih ka lo hria a,tinge engmah min hrilh ve loh va?" a han ti dam diai a. Mahse LAwrence-a chuan chhan pawh a chhang peih lo, melh pawh melh lo chuan a ner nung ringawt mai. "Tikhan lo inkawm rawh u, canteen ah ka zu kal lawk ange." tiin Lawrence-a nu lah chu a chhuak daih mai a.



Khum bulah chuan Sentei chu ava thu hnai a, "Lawrence, ngatinge min huat em em a? Ka tenawm viau em ni?" tap lek lek chuan a han ti a. Mahse LAwrence-a chuan a la chhang chuang lo. "Haw zawk tur che ka nih laiin tinge min huat daih a? Tunah pawh i dam lova, ka u hriat lohvin ka rawn kan hram hram che a nih hi.." Sentei bawk chuan a han ti leh a.



Chutah vin zet hian Lawrence-a chuan, "Aww..anih chuan min haw ta che. Tinge i rawn kal? Tunge lo kal tura hrilh che?" a ti ta hrep mai. Sentei chuan tawng ngaihna reng a hre lo, a ngawi reng ringawt a. Chutah Lawrence-a bawk chuan, "NGaithla rawh Hmeli, nangmah vang vek a nih hi...nangmah vangin Miriami'n min kalsan a, ka hmaah ila rawn inlan ngam cheu amaw?" a han ti leh khur khur a.



Sentei chu a insum thei ta lo, a tap zawih zawih mai. "Chhuak rawh...i hmel hi ka hmu peihlo, ka na i ti zual, haw vat rawh." tiin a hauh chhunzawm char char a. Sentei chuan a mittui hru in, "A tha e, ka hmangaih em vang che in ka taksa i chen ka phal a. MAhse min lo kawp reng a, chuti chung pawh chuan i lakah beiseina ka la nei a. Mahse ka tisual a ni e, ka kal ange." tiin a chhuahsan ta a.



***************************



Robert-a chu thil chhu bur bur ri chuan a ti harh a, a han meng chu a awmna room chu a lo thim ruih mai. Kudam zau tak niawm takah hian thutthlenga phuar behin a lo awm a, a hmui chu tuam sak a ni bawk. A tal vak vak a, mahse amah phuartu hrui chu a hrawl em em a, a nghet nasa mai bawk si nen, ani pate lampang, ft 5'5 vel lek tak chuan han tal chhuah ngaihna a awm lo.



A hma zawna thil chhu ri bur bur chu ava en a, amah hnungchhawn zawng hian pa lian lampang, ft 5'10 vela sang chu a lo ding khur mai. Chupa hmaah chuan dawhkan a awm a, dawhkan sirah chuan hmaikawr pakhat, vawk hmel ang chiah chiah hi hma zawngin a lo inhung ran mai bawk a. Chupa chuan tuboh lian tak mai hian dawhkan chu a chhu bur bur mai a, tawnzau dum pan tak a ha bawk.



Robert-a chuan a ngaihna a hrelo kher mai, a tal vak vak ringawt a. Chutah chupa chuan a thil chhut lai chu a duhtawk ta a, tuboh chu dawhkanah chuan dahin hmaikawr chu la in Robert-a hnungchhawn reng chung chuan a vuah ta a. Tichuan a rawn hawi phei ta, Robert-a chuan a hlau rilru kher mai.



Hmaikawr vuah pa chuan a thil chhut chu a rawn lek kang a, thir tlawn ling vut mai hi a lo ni. Chutah ava pan phei a, Robert-a chuan a hlau kher mai. A tal vak vak a, mahse a tal chhuak zo si lo. Tichuan Hmaikawra chuan hnai takah chuan a en a, "Hello Pu Robert...ilo dam thin maw?" tih pah chuan a ka tuamna chu a phelh sak a.



Chuveleh Robert-a chuan ring zet hian, "Tunge i nih? Engvanga min phuarbet nge i nih? Min chhuah rawh...min chhuah vat rawh." tiin a vin vak vak mai. Thirling sa em em leh ling vut mai chu Hmaikawra chuan Robert-a hmui zawnah chuan ava tin chiah chu a ngawi chiang kher mai, "Bengchheng suh...thudik takin min chhang ang che." tiin a vau ta khur khur mai.



RObert-a pawh chu a tawng ngam ta bik lo, thla tla zawih zawih chung chuan a thu ngawi ta ran mai. Hmaikawra chuan chiang tak hian a en a, "Khami zan khan Pu Sawma hnen atang khan pawisa engzat nge i lak?" a han ti chiah mai chu Robert-a chu a meng phar awn awn mai. "Eng..engmaw? Engtik zan maw? Tunge Pu SAwma chu?" a ti khur dar dar a.



Vin zet hian Hmaikawra chuan, "Hrelo der suh...kha hna tenawm tak kha pawisa vangin i pawm a...ka hre vek. SAwi rawh...engzat chiah nge i lak?" tiin a han vau leh khur khur a. Mahse Robert-a chuan tap chung hian, "I sawi awmzia ka hre lo." tiin a kun tlawk tlawk tlawk mai. Chutah Hmaikawra ngaihdan a ni ta lo, a thir sa ling vut chu a han lek kang ta va mai a.



Robert-a malah chuan a dep ta mai a, a ri sur sur mai. Robert-a sa ti lutuk chu a au vak vak a, chu veleh Hmawikawra chuan rang tak hian puanchhia chuan a ka chu a hnawh leh vat a. Robert-a na ti lutuk chu a khur ngar ngar thei hial a, "T(r)an tha leh ang aw...khami zan khan Pu Sawma khan engzat nge a pek che?" tiin a han zawt leh a.



Thei leh theilo hian Robert-a chuan, "Nuai 1...cheng nuai 1 min pe a ni." a ti tawk tawk a. Hmaikawra chu a thaw hak mai, "Animaw? Tichuan kha thil kha i ti ta a...tihna animaw? Cheng nuai 1 lek vangin maw? Thinlung i nei ve lo em ni?" tiin a vin hrep mai. Robert-a chuan thaw hlawp hlawp chung chuan, "Abak engmah ka hre lo, pawisa vang chauha ti ka ni...khawngaihin min chhuah rawh." a ti chel chul mai.



Rum zet hian Hmaikawra chuan a en a, "Hei hi i phone a ni a, tukin zing khan Williama ruang in en a in buai lai khan ka la ru a ni." tiin Robert-a phone chu a phawrh chhuak a. Mak ti tak hian, "Kha..kha kha..a awmzia chu..Williama leh Zaia thattu pawh nangmah tho hi maw?" a ti hu mai. Hmaikawra chu a nui suk a, "Ni e, tunah chuan thil pakhat ka finfiah leh angai." a han ti leh a.



"Eng..engthil maw?"



"Le..i phone password hi sawi rawh le."



"Maw..maw..ka password maw?"



"Aw...sawi vat rawh...anih loh chuan na i tuar leh ang."



Robert-a chu a ngawi vang vang a, engemaw hrechhuak zawk ni awm tak hian a phu zuk mai. Chutah tap chung chuan, "Ka hre tawh lo..ka...ka thihnghilh daih." tiin a chhang a. Hmaikawra chuan a mal lehlamah chuan thir ling chuan a dep leh ta, Robert-a chu a rak leh ta chiam chiam mai.



Chuveleh a ka chhungah chuan puan chu a hnawh lut leh a, Robert-a mal chu a khu vut vut thei hial. Chutah puanchhia chu a pawt chhuak leh a, "Tikhan i hre chhuak tawh em?" tiin Hmaikawra chuan a samah thamin a han vin leh hrep a. Mittui tla zawih zawih chung chuan Robert-a chuan a password chu a sawi ta a, tichuan Hmaikawra chuan a phone chu a check sak ta a.



Minute 2 vel a check hnuah chuan video pakhat chu a play ta a, za lo tak chuan a khi suk mai. Robert-a hmuh tur chuan video chu a entir a, Robert-a'n video a en chu a meng phawk nasa ngang mai. "Nilo..off rawh...khawngaihin.." tiin a tap zawih zawih mai. Hmaikawra chuan Robert-a chu a rek a, a thinrim hmel kher mai.



Chiang fek fawk hian, "I nupui...i nupui bumin ti hian i thawhpui hmeichhiate i lo mutpui thin amaw? Hmeichhe engzat chiah nge ti hian i tih thin?" tiin a zawt a. Robert-a mangang leh tih ngaihna hrelo chuan, "Min pui ruuu...khawngaihin min pui hram teh u." tiin a au vak vak ringawt mai a.



Hmaikawra chu a nui a, "I duh tawkin au rawh..tuman an hre pha dawn chuang lo che." a lo ti hmak mai. Tap chung hian RObert-a chuan, "Min chhuah hram rawh...khawngiahin min chhuah rawh." tiin a ngen lawm lawm a. Mahse Hmaikawra chuan chhuah a tum loh hmel khawp mai, "Tunah chuan in nu pawhin engkim a hriat a hun ta, in video hi ka thawn dawn." a ti ta mai a.



Chuveleh Robert-a chuan, "Nilo...nilo khawngaihin...khawngaihin thawn suh." tiin a hlauthawng kher mai. Mahse Hmaikawra chuan a ngaithla lo, Robert-a phone atang ngei chuan Robert-a leh an actress pakhat, Bawihi mudun lai video chu Robert-a nupui chu a thawn ta nge nge a. "Aw...a insent e." tih pah chuan a nui suk a, Robet-a chu ala hmuh tir zui.



Robert-a tih ngaihna hrelo chu a thu kun tlawk tlawk a, a tap khur char char mai. Chutah a rawn dak chhuak a, rum zet hian Hmaikawra chu melhin, "Tu phiangsen nge i nih a? Ka nun ania, ka duh duh ka ti ang. Nang hian engvanga min lo ngaithei lo nge i nih?" tiin a vin hrep mai a. Chutah Hmaikawra chu ngil zet hian ahma zawnah chuan a ding a, muangchangin a hmaikawr chu a phelh ta.



Robert-a'n Hmaikawra hmel diktak a han hmu chu a meng phawk nasa ngei mai, "Nilo..nang...nang maw?" a ti tawk tawk a. Hmaikawra chu a khi suk a, "Engtin nge ka chungah i tih theih? Robert...ka thianpa amaw i nih ka tia, engtin nge i tih theih?" tiin a zawt a. Robert-a chuan chhan dan tur a hre lo, "Ka tihpalh..thianpa, ka tihpalh." a ti vak vak ringawt mai.



Chutah a hmaikawr chu a vuah leh a, "Tunah chuan i hun a thleng ve ta...tun atang chuan i thianpa ka ni tawh lo. KA hming chu Victor-a a ni, Victor Lalthanmawia.." tih pah chuan a thir tiang ling vut mai chuan Robert-a chu a tin ran mai a, "Nilo..ti suh...ka..ka.." a sawi zo hman lo. Robert-a ka(mouth) chhungah chuan thir ling vut mai chu a hawlh lut ta pawk mai, a chil te chu a rawn phuan zo bawrh bawrh mai a.



Robert-a ka ah chuan chu thir tiang chu a tang vu mai a, tichuan Hmaikawra chuan a ipte atang chuan pocket knife hi a phawrh chhuak a. Robert-a chu a che tawh lo, a thi chiang hle. Tichuan a chalah chuan #4 tih chu ziakin, "A pali-na i ni e...a nuam dawn tan e." tiin a nui var var a, kudam chu a chhuahsan ta a ni.



**********************



Police Station bula canteen ah chuan SI Remruata leh Constable Kima te chu thil eiin an titi mek a, "Keichu mak ka la ti tawp thei lo, Pu Muana awmdan kha ka ringhlel riau mai." Kima chuan a han ti nuah nuah a. Remruata chu lo khi sukin, "Engah chuan maw i rinhlelh? Hmaikawra anga rawn insawi thar leh hi..Pu Muana a ni i ring tihna em ni?" tiin a zawt a.



"Chutiang pawh a nilo, amah ah khan diklo a awm chiang alawm."



"Zu ngawlvei tia an sawi kha ania, a thianpa a thi bawk nen...amah kha a diklo hrim hrim a nih kha."



"Chupawh nise...a phu leh deuh zuk zuk a, chubakah a chhungte a riah chhuah tir vek te kha enge awmzia ni ang?"



"KA hre bik lo...enthlak ruk chu a ngai dawn a ni. Engpawh nise thil ei zo ila, hna kan thawk tan leh dawnnia."



An ei zo chu Station lamah an let leh a, an lut chiah tih ah chuan Nu pakhat hi a lo lut a, a rawn mangan hmel kher mai. "Ka pu...in puihna ka mamawh a ni." a rawn ti lut nghal chiam chiam mai a. "Lo thu phawt teh ka pi, enge ni a?" tiin Remruata chuan thutna a kawh hmuh a. Chunu pawh chu a thu ve mai a, "Engthil nge ni a?" tiin Remruata bawk chuan a han zawt a.



Chunu chuan, "Ka hming chu Lalbiaksangi ania, ka fapa hi tukin atang khan ka phone tlang thei miah lova. Film chang mek an nih avang leh ramhnuaia riak chhuak an nih avangin a buai a nih ka ring a, engvakah ka la ngai lova. MAhse minute 20 vel liam ta khan he thlalak hi min rawn thawn a, chuan he thu hi min rawn thawn tel bawk a." tiin a phone chu a hmuih a.



Remruata leh Kima chuan Pi Biaki phone chu an han en a, thlalak pakhat hi a lo ni a. A fapa sana, thisen kai hnuang mai, hnim kara let reng mai thlalak hi a lo ni. "Hei hi engtikah maw a lo thawn che?" tiin Remruata chuan a han zawt a. "Minute 20 vel kal ta khan ania, ka pu." tiin a lo chhang vat a.



"Anih leh call back i tum em?"



"Tum e, mahse out of service a inti vek a."



"Tunge i fapa chu a hming?"



"William Lalduhawma."



"Khawi hmunah nge film chu an chan a?"



"Ka hre lo, ramhnuaiah a ti ringawt a. Tih ngaihna ka hre lo, ka hlauthawng a ni, ka pu."



"Enteh ka pi, ramhnuaia an film chan chu eng lampang nge ni a?"tiin Kima chuan a lo zawt ve a. "Tualthah lampang, an film hming chu VICTOR LALTHANMAWIA tih a nia." a han ti chiah mai chu Remrauta leh Kima te chu an in en hu mai. "Thawm chu ka hre deuh alawm, khami film siam chungchang vel kha chu." Remruata chuan a han ti nuah nuah a.



Kima chuan a aw a han thian deuh kharh kharh a, "Ka pi, an film shooting-na vel thla a la kual mai mai te a nilo maw, an film thawnthu in a lo zir bawk nen." a han ti leh a. Mahse Pi Biaki chuan a lu a thing a, "Nilo..hei..he thu hi min rawn thawn tel ka tih kha." tih pah chuan whatsapp ah a lut a, a fapa Williama nena an conversation chu a han hmet chhuak a.



A phone chu a en tir dun leh a, "I fapa hian thil sual lian tak a tih avangin a nunna in a tawrh angai ta a ni. Ka tihpalh takzet , ka pi...min hrethiam dawnnia." tih hi a lo ni a. "An thawhpuite zinga mi tu emawin a rawn prank mai mai che a ni lo maw?" Kima chuan a han ti leh hram a. "Nilo...tunah pawh call ka tum nasa, mahse a tlang thei lo." tiin a lo chhang a.



"Anih leh a film chanpui te, hruaitute number i nei em? Midang tel ve hrim hrim ho te...an number i call tel ve hlawm em?"



"A bialnu BAwihi a tel ve a, ani pawh ka call nasa, mahse a la thei bik lo."



"Anih leh BAwihi chhungte chu i bia em?"



"Aw bia e, engkim ka hrilh vek a. Mahse an rawn fiam che aniang tiin engah vak mah an ngai lova, mahse ka pu...keichu ka hlauthawng a ni."



Remruata chu a ngawi vang vang a, "Engpawh nise ka pi...i fapa phone number leh BAwihi number chu min pe la...theihtawp kan lo chhuah ange. I number pawh dah tel la, chanchin kan lo hrilh leh ang che. Kima..FIR ziah sak rawh le." a han ti a. Kima chuan FIR a ziah fel sak nghal a, "Kima, BAwihi te in chu lo zawng chhuak la, midang ho va kal tir ang che..nang leh kei erawhin phone number ho trace kan tum dawnnia." Remruata bawk chuan a han ti leh a.



******************************



TO BE CONTINUE

VICTOR LALTHANMAWIA (A HANDSOME CREATURE SPIN-OFF)



[MIZO FICTION SLASHER/HORROR STORY]



WARNING : 18+



Written by : Aaron Malsawmdawngzuala



Chapter - 4









************************



Pu Nunga leh a nau te pawh chu an buai nak nak ta hle mai, Robert-a lah an zinga a awm ve reng emaw tih laiin a bo thut mai si. An vai mai chuan tih ngaihna hre lovin an ding ngawi reng hlawm a, Pu Nunga chu a vai kual sek mai. Isaka chu a ngawi vung vung a, "Kan zinga mi thil tih hi a ni thei mai angem?" a rawn ti chhuak hlawl mai.



"I mawl ami? Tuin nge hetiang thil rapthlak hi ti duh anga...Victor-a hi ala dam ani ngei ang, ala dam chiang a ni." tiin Miriami chuan a lo vin let hrep mai. "Engpawh nise helai hmun hi kan chhuahsan angai." Jonas-a chuan a rawn ti ve leh a. "Mahse kalkawng tuman kan hre hleinem, kalkawng hre ber Williama a thi tawh bawk si...i hre ve lo em ni?" tiin LAwma chuan a lo vin hlur mai.



"Anih chuan ti hian kan awm reng dawn tihna em ni? Kan dap chawp ve ang chu...kalkawng te chu kan zawng chawp ve mai dawn alawm." tiin Jonas-a chuan a chhang let a. Tap tuau chung hian Ruatfeli chuan, "Kan awmna lah a pilril mai bawk si a, tualthattu in min veh reng bawk nen..aww tinge maw ka lo tel ve kher kher le?" tiin a inhnit feih feih mai.



"Chutiang ngaihtuah a hun lo, engpawh nise Jonas-a sawi ang chuan kalkawng kan dap chawp ang. Kan camera leh thildang zawng zawng hi tent chhungah hian dah tha ila, heng thil ai chuan kan nunna a pawimawh zawk. Khawchhung kan lut hlauh a nih chuan tanpuina kan dil anga, kan bungrua hi chu kan lam leh mai dawnnia." tiin Pu Nunga chuan a hrilh hlawm a.



"Ni e, Pu Nunga sawi ang chuan kalkawng kan dap chawp angai a ni. Inven nan hmanrua kan neih ang ang te kha keng vek ula, helai hmun atang hian kan chhuak em em ang." tiin Jonas-a pawh chuan a lo tui hnih ve bawk a. Chuveleh Lawma chuan a bula thing tum lian tha nelh nawlh chu a chuh vat a, midang ho pawh chuan hmanrua tur an zawng ve nghal bawk a.



Mipa thenkhat chuan an chemte ken te chu an pai nghal sap sap bawk a, tichuan an bag theuh chu ak in kalkawng dap chawp tur chuan an inpeih ta. "Tumah kal hrang lo ula, a huhovin kan kal zel tur a ni. Tunah dar 12 a pel tawh a, khaw thim hma ngeiin kawngpui chhuah chhoh kan tum dawnnia." tiin Pu Nunga chuan hma a hruai a, an inzui ta hlawm a.



**************************



SI Remruata leh Kima te chuan Wlliama phone chu an trace zel a, mahse signal a bo zeuh zeuh zel mai. Bawihi phone number pawh an trace tel bawk a, phone pawh chu hmangtu an awm ngei ani tih leh ala chhe lo va, sim card thleng pawhin a la nung tih a chiang bawk. Darkar chanve dawn an chhui hnuah chuan Pu Sawma ruang an chharna lam, arbai kalkawngah bawk chuan signal a tawp leh ta chat mai.



"Ngati nge, a bo leh tawh em ni?" tiin Remruata chuan a han zawt a. "Umm a bo leh tawh...ramhnuai chhungah hian luh a ngai dawn a nih hi." tiin Kima chuan a lo chhang a. Remrauta chuan tracking device chu a han en vang vang a, "Umm...inkhalh lut pawp mai ang." tiin ramhnuai thim em em mai ah chuan a tlan lut ta a.



Kawng a bumboh mai bakah a zim bawk nen, a tlan chak hleithei lo. "Sir, ke in kan zawng kual tawh mai dawn em ni? A hrehawm emai, motor pawh a uiawm alawm." Kima chuan a han ti deuh nuah nuah a. "A chhe rei nang, chubakah kea kal ralah chuan a thui dawn emai." tiin Remrruata chuan a lo chhang a.



A sawi zo chiah chu motor chu a rawn thi hmak mai, a la hniam suih zui. REmruata chuan start a han tum leh a, mahse a nung thei ta hauh lo. "Ava han buaithlak tak em." tih nung nung pah chuan Remrauta chu a chhuk a, a han enchian chuan a ke hnung a lo thep chu niin. "Ehe...enge maw kan chil le...ava hun lo tak." tiin a chal a dawm vawng vawng mai.



Kima pawh chu a rawn chhuak a, "A ke a thep elaw?" a rawn ti ve bawk a. "Umm a nih hi...buaithlak thei khawp mai, hnu chhui lai lai a." tiin za lo tih hriat tak chuan a khi suk a. "A ke spare kha kan pai tho a, thlak lawk ila a ni mai alawm. Wrench vel kan pai tho a, a rei nang." Kima bawk chuan a han ti leh a.



"Umm...nangman thlak la, kei aiin i rang zawk ang."



"Awle Sir, mahse kan device ken ve hian signal ala hmu lo ve ve tho ania aw."



"Nia chuvang tak chuan hmanhmawh deuh la, hei chawhnu a ni leh der tawh ania."



Kima chuan Motor ke chu a siam a, chutih lai chuan Remrauta chuan ramhnuai vel chu a han en kual a. "NGah nge maw ramhnuai pilril lutuk ah te film an chan reng reng le? T(r)ul hi ka han tilo mai mai khawp ahh...rul an tam hmel si." tiin a han nui deuh var var a. "Chu chu alawm, hlawh a chhe leh awm ropui si...thosi karah nen, chutah hei...buaina an tawk chu a nih hmel ropui sia." tiin Kima chuan a rawn chhang a.



"A thawntu chu Williama emaw, Williama kidnaptu emaw, phone ru ru emaw, a tua pawh chu lo nise...i fapa in thil a tihsual a, hremna ka pek angai tih vel kha enge awmzia ni reng reng ang le?"



"Sir, ka ngaihdan chuan tu emaw phuba lakna a ni mai lawng maw? Chuan Victor-a anga inchhal hian Victor-a cetdan style la kual velin ti hian phuba a la tihna ani mai lawng maw le?"



"Pu Sawma thihna leh Pi Biaki complain rawn thehluh hi a inzulzui vek i ring deuh tihna em ni?"



"Thildang a ni thei dawn chuang em ni? Hei tunah pawh kan tracking device pawn helai hmun pilril lutukah min hruai thleng a, chupawh Pu Sawma thihna, arbaoi kalkawngah bawk."



"Nia, keipawn ka ring tho alawm. Engpawh nise tikhan lo siam la, ka va zung lawk ange." tiin Remruata chu kal a tum a, "Awww...kha laiah khan zung lawk mai la, kal hlat vak angai hleinem." Kima chuan a lo ti vat a. Nuih suk pah hian, "I hlau em ni? Victor-a alo kal i hlau animaw?" tiin Remruata chu a nui huah huah mai.



"Hahh..va kal mai mai teh anih chuan...hla deuhah khan va zung rawh." tiin Kima pawh chu a lo fiamthu ve bawk a. REmruata chu zung tur chuan Kima awmna atanga hla deuh hlekah chuan ava phei a, a va zung ta a. A zung zo chu phei leh mai lo chuan a phone a phawrh a, mahse signal pakhat mah a awm lo.



Phei leh mai a tum chu a hma zawn hnimbuk chu a rawn che deuh hrut mai, a ding chat a. A han enchiang a, mahse engmah thawm a awm zui lo. Kal mai a tum a, mahse enchian a duh ta tlat mai. Kima awmna lam chu ava hawi phei a, motor ke chu a lo la siam mek a. Hrilh kher lo chuan a thawm hriatna lam chu ava pan hnai a, hnimbuk kar vel chu a han enchiang a.



A keu vak vak hnuah pawh chuan tumah a hmu chuang lo, "Ava ho e aw...rul te hi a lo ni riau riau ange." tia khik suk pah chuan lehlam a hawi a. Kal a tum chiah chu hnibuk kar atang bawk chuan, hnunglam atang hian kut chak tak mai hian a hrawkah chuan a rawn rek thut mai. Au a tum chiah chu chu ban tha chak tak mai chuan a ka a hup sak a, lehlam kham awih vakloah chuan a zuanthlak pui daih mai.



MAhse a awih lem loh em avang chuan REmrauta leh a mantu pa chu an lum thla dun a, a zawl lai a thlen veleh chuan Remruata chu a tho vat a, na a nei lutuk lo hlauh. Rang takin a hawi kual nghal vat a, mahse tumah hmuh tur an awm lo. "Tunge? Tunge ni?" tiin a au vak vaka , mahse boruak chu a reh diak mai si.



A pistol chu a dap a, mahse motor chhungah a dah daih mai si. "Tu phiangsen nge ni ang? Nilo..Kima kha...Kima..Kima." tiin a au vak vak a, mahse Kima erawh hla play pahin motor ke a la siam mek bawk sia, a hre pha hauh si lo. Remrauta chu a mangang hle mai, a bula thing bung chu la in a hawi kual a, "Tunge i nih, i ngam chuan lo chhuak ta che." tiin a au pung pung mai. A phone lah a thlauh bo daih mai bawk si, a lu a dawm vawng vawng ringawt mai.



A lumna chu a han en chho vang vang a, awih em em lo mahse lawn chhohna chi zia zang erawh a nihloh mai bakah rin aiin a sang phian lehnghal. "Khawiah nge a kal hman ang? Engthil nge ni ngai...tu phiangsen nge mawni le?" tiin a insehruh nasa kher mai. Motor awmna atanga let leh tur chuan hel deuh hrep angai bawk si, rang tak chuan a sir atang chuan hel tumin a tlan chho nghal a.



***********************



Sentei chuan in a thleng a, tala in a lo in kalh a. A bag chu a han zen rak rak a, chabi chu la chhuakin tala chu a hawng ta a. A tah nasat em avang chuan a mit te chu a bui luk mai, a inhnit feih feih reng a. Inchhungah chuan a lut a, kawngka chu chhunglam atang chuan a kalh tha nghal bawk a.



Haw viau mahse a rilru ah chuan Lawrence-a bak a awm thei lo, a phone chu enin Lawrence-a nena an infawp lai thlalak chu a en ngawih ngawih ringawt mai."Bialnu nei reng chung siin ka bialpa angin i awm a, ka taksa i chen bawk a. LAwrence, tinge hetia min tih? I pawi ka sawi em ni?" tiin ama hriat tham lek chuan a phun sep sep a.



A mitthla ah chuan LAwrence-a'n duat taka a fawp lai te, an lendun laite leh inngeih taka an inkuah vawng vawng laite, a hmangaih thu a hrilh laite chu a hmu a. A tah a chhuak bawk si, a thinrim bawk si nen. "I va han tenawm tak em, i lo rapthlak kher mai." tiin tap khur tlawk tlawk mai.



Chutih lai tak chuan kawngka chu a rawn inkik dawt dawt mai a, a phu zawk nghe nghe. A mittui te chu hru hul vatin room atang chuan a chhuak a, "Tunge ni?" a han ti deuh lauh lauh va. MAhse tuman an chhang lo, kawngka chu a la in kik reng thung. Ngaih that lohna em em nei lo chuan kawngka lam chu ava pan a, a thlen dawn velah chuan kawngka inkik ri chu a tawp daih mai.



Kawngka chu a han hawng a, mahse pawnah chuan tumah an lo awm hauh lo mai. Mak a ti angreng kher mai, "Tunge maw ni dawn ni?" tih pah chuan a khar leh mai a, mahse second 5 pawh ala ral lovang tih ah chuan a rawn in kik leh ta vak vak mai, "Ava mak tak." tih deuh hlur pawh chuan va let leh a.\



A han hawng a, mahse angai te ang bawkin tumah an lo awm lo. "Au Remruat, nangmah em ni?" tiin a u Remruata'n a fiam a nih te chu a han ring thul, mahse chhanna reng reng a dawng si lo. A khar leh a, mahse a ngai te ang bawkin a rawn inkik leh ta vak vak mai a. Chutah zet zawng, Sentei ngaih chu a tha ta hauh lo mai.



Va hawn leh pawh chu a ngam chiah tawh lo, "Tunge? Tunge ni?" tiin a han vin vak ringawt a, mahse chhangtu an la awm chuang lo. KAwngka chu inkik mai pawh a ni tawh lo, pawn lam ami chuan a chumin a rawn chum bur bur tawh zawk. Sentei chuan chaw ei dawhkana chemte chu a chuh lawk a, a hum ta ran mai.



"Tunge i nih ka tih chu...police ka ko dawn ania." a han ti leh vak vak a, mahse kawngka chu ala in hum ri bur bur tho va. "Ka u hi police anih hi aw...tunge i nih sawi rawh ka tih chu.." tiin a han vau ve leh vak ringawt a, mahse mak tak maiin kawngka inchum ri bur bur pawh chu a reh hmak mai.



Zawi muang chuan a chemte hum reng chung chuan ava pan phei a, chhun pachang mah nise Sentei chuan a hlau rilru kher mai. A thlanfim a tla zawih zawih a, "Tunge ka tih chu..." tiin a han au leh vak a, mahse a reh thuap mai. A huaisenna zawng zawng sawmkhawmin kawngka chu ava hawng leh a, a hawn rual rual chuan chemte chu a lek kang nghal vat a.



Mahse tumah an lo awm chaung lo, khawlai pawh chu a lo reh diak mai. Pawnah chuan chhuakin an verandah zawng zawng leh an inkawt tual zawl zawng zawngte chu hel kualin a en chhuak vek a , mahse tu mihring mah a hmu lo. Ngaih tha lo tak chung chuan inchhungah chuan a let leh a, kawngka chu tha takin a kalh a.



"Lo kik leh pawh nise ka va han hawn tawh awm lo, kan veng tlangval zurui ho bawk an ni lehpek ang." tia ang bawrh bawrh chung chuan a room lam chu a pan a. MAhse a room kawngka lo inhawng a hmuh chuan a ding chat mai, kawngka va hawng tura a chhuah pah khan a khar ngei tih a chiang bawk nen, mak a ti kher mai.



"Ehe..engtin nge? Engtin nge ka room kawngka hi.." tiin hlauhna chuan a rawn man leh ta, chemte a lo la hum sa bawk a, a han hum nghet leh zual a. Muangchang chuan a room lam chu ava pan a, mahse thawm erawh engmah a awm lo thung. "Room chhungah khan awm in awm em?" a han ti khur dar dar a.



Mahse chhanna a dawng chuang lo, zawimuang chuan kawngka chu a han bih dek dek a, mahse tumah a hmu lo. A room chhungah chuan a lut a, tu mihring mah an awm lo. MAhse a ngaih a la ngam chiah lo, a wardrobe zawng zawng te chu a han check leh vek a, tumah a hmuh tak lovah chuan a thaw huai mai.



A nui suk a, "Thil tul lovah ka hlauh chiam chule, ava atthlak tak." a ti nuah nuah a. Chutah a chawl deuh dat a, "Mahse...ka room kha ka chhuah dawn khan ka khar thlap bawk sia.." tiin a han ngawi leh deuh vung vung a. "Aaa...ka khar nghet lo aniang." tiin a ngaih chu a ti tha lui a. Mahse a dressing table chunga paper ava hmu chu mak a ti kher mai, rang takin ava pan nghal a.



PAper chu a han hawng a, "JUSTICE WILL BE SERVED." tih hi lian kelh kawlh hian a lo inziak a, Sentei chuan a hrethiam lo kher mai. "Hei hi tu dah nge, nichin lawk pawh khan ka dressing table bulah hian ka awm reng sia, tu dah nge ni ang?" tiin a inbe mawlh mawlh mai a, a hrilhhaiin a hrethiam lo takzet.



************************



Pu Nunga leh a naute pawh chu an kal zel a, tlai dar 3 a rik meuh chuan an chau tlang tawh kher mai. "Pu Nunga, ka kal thei tawh rih lo, ka chau tawh lutuk." tih pah chuan Ruatfeli chu a thu hnawk a. "Awle, in hmanrua te kha inring reng ula, reilote chu i chawl hrih phawt ang u." tiin Pu Nunga pawh chuan alo chhang a.



An chawl rih ta a, an mangang tlang hlawm kher mai. "Darkar 2 chuang kan kal tawh a, kawngpui pawhna awm reng reng pawh kan la hmu lo chu ania, engtin tak awm ang maw?" tiin Lawma chu a indawm kun tlawk tlawk mai. "Mihring pakhat chauh vangin ti khawp hian kan thlabar tur a nilo, kan tan rual chuan he tualthattu hi kan hne me me ang." tiin Jonasa chu a insehruh nasa mai.



Rum fe hian Isaka chuan Jonas-a chu melhin, "Tunge mi pakhat chiah an ni ti a? I hria a mi? Mi pahnih pawh an lo ni thei asin, i duh duh hi sawi pawp pawp suh." a lo ti chu Jonas-a thina khei zak mai. "Nang ve kha, enge maw ka thusawi apiang i hnial zel le, ka khawih deuh tak tak dawn ceh em mawni le?" tiin a vau ta khur khur mai.



Mahse Isaka chuan a lo cho nasa mai, "Engmaw i sawi a? Ve khanglang che chuan, ka ben nek nhgal loh che?" tiin a lo vin hlur mai. Chuveleh Jonasa thinrim chu a ding a, "Zawnga, nang actor atana kan lak maio mai, chang thiamlo ropui si..nang ai chuan camera-man te hi kan pawimawh fe zawk aw..ngawi mai mai rawh." tiin a vin hrep mai a.



Isaka lah a lo tlawm duh bik lo, 'Hemi project kan neih hma atang tawhin nang hi ka ei vak tawh lo che tih i lo hre dawnnia, i duh phawt chuan mipa leh mipa te chu kan innuai9 dawn mi?" tiin posi a la ta ur ur mai. Pu Nunga ngaihdan a ni ta lo, "In va han tawng hnem dun ve mawle, ti khawp hian kan amngang a, camera-man leh actor chungchang mai mai a inlo inhnial thinrim le....insual inla tum zui amaw ni...ngawi hmak ru, in pahnih khan." tiin a hrawk hrep mai.



Chutih lai chuan BAwihi chuan an hma zawn chu kawkin, hla taka in niawm tak chu a va melh a. Ring zet hian, "Saw en teh u..saw saw in ava ang ve....mi in luah lai te pawh a lo ni maithei asin." a han tih chuan a kawhna zawn chu an en thap mai. Kudam ni awm tak, lian angreng tak mai hi a lo ding luah mai a.



Pu Nunga chuan a han en vang vanga , "Ehe..a nih saw, va kal teh ang u, tanpuina kan hmu maithei asin." tih leh kal a rual nghal mai a. MAhse Jonasa chuan lo dang vatin, "Ngawi lawk teh, Pu Nung...a chi dawn em ni?" a lo ti vat a. "Engvangin maw a chi lovang, tanpuina kan mamawh lai tak a nih hi.." tiin Pu Nunga chuan a zawt let a.



"He tualthattu, kan thiante thattu cehnna in te pawh a lo ni maithei asin." Jonasa chuan a han ti leh a. Chuveleh pawr zet hian Isaka chuan, "Aww..lo ni pawh nise enge pawi? Ti zat mipa kan awm a, ani mi pakhat lek te chu engvangin nge kan hlauh ngawt ang?" tiin a inhrosa nghal pung pung mai.



Jonasa chu a nuisuk a, 'Nangman a ni lawm ni, mi pakhat chauh an ni lo maithei titu kha...i va pawr leh si ve.." a han ti deuh kher a. Vin zet hian Miriami chuan, "A tawk...nangni pahnih kha, inhnial reng suh u. Chuti taka in inhua anih chuan kal hrang ula, hmundangah in duhtawkin va insual rawh u." tiin a vin dun hrep mai.



Pu Nunga chu a ngawi vang vanga , "Umm...engpawh nise, va kal ang u. In hmanraw ken theuh kha nghet takin hum ula, inring rengin awm rawh u. Mi in luah lai pawh a ni thei a, Jonasa sawi ang khan tualthattu chenna in pawh a lo ni thei. MAhse kan mamawh ber chu ei leh in tur te, thil dang mamawh tam tak pawh kan nei. Kal phawt ila, kan va finfiah dawnnia." a han ti a.



Tumah chuan chhan let an tum lo, amah bawk chuan hma hruai leh in an zui leh ta tham tham hlawm a. REi fe an kal hnu chuan an thleng ta, an hma zawna kudam niawm tak, lian angreng tak mai lo ding ruah mai chu an zavai chuan an thlir thap hlawm mai. Pu Nunga chuan a han thlek vang vanga, "Ngawiteh, helai hmun hi ka hriat hnu ava ang e." a ti nuah nuah mai.



"Enge awmzia, i kal tawh tihna maw?" tiin Lawma chuan a lo zawt vat a. "Nilove..hmuh tawhna ka nei a ni...ka hre chhuak zo lo, ka hre tawh tlat a ni." a han ti leh nuah nuah a. "Hemi in hi i hmu tawh tihna em ni?" tiin Isaka chuan a lo zawt ve bawk a. "Nilo, a hmun vel hi khawiah emaw hmuh tawhna ka nei a ni, sawlaia far kung awm phei ruah te saw, ka hmu tawh a ni." tiin a chhang a.



A han maimitchhing vang vang a, seond 4 vel hnuah chuan rawn meng phawk hru in, "Ka hre chiah...thlalak ah ka hmu tawh a ni." a rawn ti chhuak hlawl mai. "Engthlalakah maw?" Lawma chuan a lo ti hu mai. "Helai hmun hi Victor Lalthanmawia thihna hmun, a kan hlumna hmun ngei kha a ni." a ti ta mai a.



An in melh hru hlawm mai, "Sawi takah chuan keipawn ka la hre deuh, ka mitthla thei." Miriami chuan a lo ti ve bawk a. "Mahse, in kha chu a kang chhe vek tawh bawk sia...he in hi sak that a ni leh tihna em ni?" Isaka chuan a han ti vin hlur a. "Tu emaw tak chu Victor-a anga insawi leh in tual a that thin a ni ngei ang, chuan ehlai hmun kher hi a thlang bawk a ni." Pu Nunga chuan a han ti a.



An ngawi deuh thap hlawm a, "Chuan...kan lut dawn nge, enge kan tih dawn?" Ruatfeli chuan a rawn ti chhuak deuh hlawl mai. "Luh chi dawn mi? Pu Nung..i sawi hmang ah phei chuan va luh a phurawm tawh loh e." tiin Bawihi chu a tum bur tawh mai. "Kan lut ang, inring reng khan awm rawh u." tiin Pu Nunga chuan a chhang a.



A hmasa berah chuan Isaka chu a kal a, chemte a hum ran bawk a. Midang chuan a hnungah chuan an rawn zui a, kawngka bul an va thlen chuan, "A boruak a dang riauva ka hriat.." Pu Nunga chuan a la ti nuah nuah zui. Kawngka chu Isaka chuan a han kik karh karh a, "Awm in awm em?" tiin a han au lauh lauh va.



Mahse a reh thuap mai, chhangtu an awm tlat lo. A han kik nawn leh a, "AWm in awm em aw..." tiin a han zawt nawn leh a. Mahse a ngai te ang bawkin a la reh thuap mai si, "A inkalh lo tlatin ka hria." tih pah chuan kawngka chu Pu Nunga chuan a han nam chhin a, awlsam tak chuan a inhawng ta mai a.



A chhung chu a thim em em mai lenghal, "Kan lut dawn em?" ISaka chuan a han ti a. Chhang lo chuan Pu Nunga chu a lut hmasa ber a, midang chuan an zui lut ve nghal bawk. A thim em avang chuan an hmu tha hleithei lo hial a, "Bang vel ah khan plug a awm lo maw, han dap teh u." Jonasa chuan a han ti a, Miriami chuan a dap fuh nghal chat mai.



A han on a, chhete chuan a rawn eng ve deuh ta. Mahse light chu a dim em em a, inchhung pumpui chu a en zo meuh lo. Chhun pachang mah nise, chu inchhung chu a thim hian a thim ruih mai a, a hnawk em em mai bakah inluah lai a nilo tih a chiang bawk. Bang kil tawpah chuan puan dum, bal zet mai hian engemawni hi a lo inkhuh bawk a.



Bawihi chuan hmu hmasa berin, "Enteh u, saw thil saw.." tiin a kawk a. Midang pawh chuan an va en ve a, "Ehe..engthil nge ni ngai?" tiin an phun sap sap hlawm mai. A lan dan chuan thutthlenga mihring thu lai, puana inkhuh niawm tak a ni a, mahse a lu zawn chu a zum leh daih bawk si.



"Mihring pian chu a ang bawk sia, mahse a lu zaw hi...engemaw ni chiah le.." tih pah chuan Pu Nunga chu ava phei a, "Hey..va kal ringawt suh." tiin Lawma chuan a lo dang a. Mahse Pu Nunga chuan, "Tumah an awm loh hi..chuan saw saw enge anih ka finfiah dawn hrim hrim." tih pah chuan ava phei lui a.



Muangchang chuan an zui a, chutah Pu Nunga chuan puan chu a han pawt sawn ta thut mai a. An phu nasa hlawm kher mai, Robert-a ruang chu an hmu ta. A ka chhungah chuan thirtiang chu a lo la tang vu mai a, a hrawk kang nasa tak mai te chu a lo khir uar tawh a, a mal kang te pawh thovin an lo bawm nuai nuai mai.



Hmeichhe ho chu an au vak vak a, Pu Nunga ber paw a rap lutuk chu a per dawr mai. A tawlh hnung a, an chiai tlang hlawm kher mai. Pu Nunga chuan bang ava nek a, thirzai sin, mar taka in zam phei chu a vai chat a. Chuveleh inchung atang chuan rul lian em em mai hi a rawn tla a, Pu Nunga darah tak chuan a rawn tla ta mai.



Chutah rang zetin rul chuan Pu Nunga mit chu a chuk ta mai a, ana ti lutuk leh hlau bawk si chu a phili ngei mai. Hmeichhe ho hlau chu an tlanchhuak ringawt mai a , mipa dang ho chuan rul chu laksawn an tum bawk. A tawp ah chuan Isaka chuan rul chu a mei ah pawtin bang kilah chuan a theh phei thei ta hram a, Pu Nunga chu an buaipui nghal a.



Mahse kawngka a rawn ri rak a, an va hawi phei chu Hmaikawra a lo ding run mai a, chem lian em em mai hi a la hum run zui a. A vawk hmel hmaikawr vuah chung bawk chuan a rawn kal phei ta, "ZAwnga, tunge i nih a? Nang hi em ni kan thiante thattu hi?" tiin Isaka chuan a vin pang pang mai.



Mahse Hmaikawra chuan a chhang lo, a chem hum chung chuan a pan hnai zel a. Chutah Isaka chuan a tiang kenlai chu lek kangin ava pan phei ve ngat a, "I thi khawp ang, zawngsen." tiin Isaka chu a au phei vak vak a. MAhse Hmaikawra chuan rang lutuk hian a chempui ken lai chu Isaka hma zawnah chuan a vawm vak a, a chalah tak a bur chat mai.



Thisen a per chhawk a, Isaka chu a thal hiang kher mai. "Nilo..Ssak-a..Isak." tiin LAWma chu a au vak vak a. Hmaikawra chuan Isaka chal dar a chem bur vu mai chu a phawi ri hrawk a, "Lawma, tlanchhia ang...tlanchhe mai teh ang." tiin a tap titih nghal pur mai. "Mai mai chuan, i thi khawp ang." tiin LAwma chuan a chemte hum lai chuan vih a tum a.



Mahse awlsam tak hian Hmaikawra chuan a kut chu a lo mansak a, a chem ken lai chuan a nakah chuan a sat mai pawh nilo, a cheh hian a chek ta siah siah mai a. Lawma chu a au nasa kher mai, mahse a au rei lo, dul vun thler vek khawp chuan chhuatah chuan a let thla tawp mai a, a ril a chhuak pur bawk.



Vanneihthlak takin Jonas-a erawh a hmuh loh laiin a lo pil bo hman hlauh mai, Hmaikawra chu a hawi kual a. MAhse Jonasa hmel reng reng a hmulo, "Hrep tak chuan le...ka la man thovang." tih nuah nuah pah chuan Lawma ruang leh Isaka ruang chu a hnuk ohei a. Chutih lai chuan mihing na tuar ri, patling rum ri niawm tak chu a hria a.



Thawm lo chhuahna lam ava hawi phei chuan Pu Nunga a lo ni a, rul tur chuan a lo fan vel mek a, a lo la chatthla lo hi a lo ni. Hmaikawra chuan ava pan phei a, "I dam thin maw, Pu Nung." tiin hnai takah chuan a en a. Pu Nunga chu a lu a hai em em a, a mit hmuh te chu a fiah lo hle bawk. "Tu..tunge i nih?" thei leh theilo hian a ti tawk tawk a.



Hmaikawra chu a thaw deuh hak a, "Huiham, ni e...hriat i phu alawm." tiin a hmaikawr chu a phelh a, "Ti khan min hria em?" a han ti a. Hmaikawra hmel diktak a han hmu chu Pu Nunga chu a meng phar awn awn mai, "Nilo..min..min chhan rawh..min chhanhim hram rawh." tiin a ngen a, rul tur chuan hna a thawk na tulh tulh mai bawk si.



Mahse Hmaikawra chuan a hmaikawr chu vuah leh in, "Tihian a chak zawk ang, hrehawm i tuar rei lo zawk ang." tih pah chuan Pu Nunga lu chu a han siam rem a, a chek ta chawrh chawrh mai. Pu Nunga pawh chu a thi chiang hle a, thisen chu a kawi hian a kawi nuai mai. Ruang pathumte chu Hmaikawra chuan a tlar khawm a, ruak vek chuan a dah hlawm a.



Isaka dulah chuan chemte hian #5 tih a ziak a, Lawma chalah chuan #6 tih a ziak thung a. Pu Nunga dulah chuan #7 tih a ziak leh a, chhuatah chuan an thisen chuan lian kelh kawlh hian VICTOR LALTHANMAWIA tih chu a ziak leh kuau mai. Inchhung chu a han en kual leh te te a, tichuan chung ruang pathum te chu a chhuahsan ta a.



*************************


VICTOR LALTHANMAWIA (A HANDSOME CREATURE SPIN-OFF)



[MIZO FICTION SLASHER/HORROR STORY]



WARNING : 18+



Written by : Aaron Malsawmdawngzuala



Chapter - 5









*******************



SI Remruata a lo let har em avang chuan Kima chu a ngaih a tha chiah tawh lo, motor ke pawh a thlak zo vek tawh. "Ava rei ve mawle..khawnge maw a kal daih le?" tiin a phun nuah nuah a. A han ko vak vak a, mahse chhangtu reng an awm lo. Minute 5 vel chu a han nghak leh deuh va, mahse Remruata thawm reng reng a awm lo.



Chutih lai tak chuan a hma zawna thingkung awm phei ruah mai kara mihring niawm tak, phei zuk mai chu a hmu a. A phu nasa kher mai, "Ehe..tunge ni kha kha?" tiin a rak tuar a, mahse thawm chu a reh leh hmak mai. A ngaih a tha ta hauh lo, "Sir..Sir nangmah em ni?" a han ti lauh lauh va.



Mahse tuman an chhang lo, rang takin motor chhunga Remrauta pistol chu a chuh vat a. Tichuan a hma zawn mau hmun lam pan chuan a kal ta, silai chuan ahma zawn chu a tin reng bawk. A han hawi kual a, "Tunge awm? Police ka nih hi...rawn inlan vat mai teh." a han ti vin deuh thak a. Chutah a hnung atang chuan enge maw ri deuh hrup mai a hre leh ta, rang takin a leh hawi nghal a.



Mahse tumah a hmu chuang lo, "Ka uang hauh lo ania, ka hmuh fuh vaih che chuan ka kap hreh dawn miah lo che ania." a han ti leh pung pung a. MAhse a ngaite ang bawkin thawm chu a reh leh hmak mai, "Tu phiangsen nge mawni le?" tiin ama hriat tham lek chuan a phun nuah nuah mai. Thawm dang a hriat tawh loh avang chuan let leh mai a tum ta a, a kal tur chiah chu a hnunglam atang bawk chuan thawm a hre leh ta.



Rang takin a hawi vat a, tumah chu hmu hman lo mahse hnimbuk che luih chu a hmu hman tlat. Pistol chuan a tin ran mai a, "Tunge i nih? Lo chhuak rawh, silai ka keng ania." tiin a vin vak vak a, mahse chu hnim buk che luih luih pawh chu a reh leh daih mai. Kima chuan a hlau ve deuh ta, "Ka kap dawn che, ilo chhuah vat loh chuan ka kap ang che." a ti khur deuh dar dar mai.



Zawi muang chuan chu hnim buk lam chu a pan phei zel a, "Lo chhuak vat rawh...ka kap tak tak dawn che ania." tiin a vau deuh chhen bawk. A hnaih zel a, chutah ava keu thut mai. Mahse mak tak maiin tumah a hmu chuang lo, "Hrep tak chuan le...thehlei mai mai bak an nilovang." tiin a khi suk ringawt a.



Motor awmna lam chu ava pan phei leh a, "Khawnge maw Sir pawh chu a awm daih le? Zung tur ringawt khan a kal sia, ava rei ta ve mawle.." a ti phei bul bul a. Motor a thleng chiah chu motor hnung lam phen atang chuan Remrauta chu a rawn lang thut a, thing tum lian em em mai hi a lo la keng run zui.



Kima chu a vaw fuh teuh kher mai, "Hey hey hey...tinge min vuak i tum a?" tiin Kima chuan pistol chuan a lo tin ve bawk a. REmrauta'n Kima hmel a hmu chu a thaw huai a, a thing tum ken lai pawh chu a dahthla a. Kima chuan a hrethiam lo kher mai, "Sir, enge awmzia?" a ti hu mai a.Remruata chuan Kima pistol ken lai chu en in, "Kha kha ka ta a mi?" a ti vin deuh hlur a.



"Ihh.aww..aw ni e." a lo ti bah nuai mai. Laksak pah chuan, "Pistol nen enge i lo va tih a? Khawnge i kal daih a?" tiin a zawt a. "Thawm ka hria a, ka va enfiah mawle...nangpawh khawnge i kal daih a?" tiin Kima chuan a lo zawt let a. Thlamuang lo tih hriat tak hian Remruata chuan, "Helai hmunah hian a awm a ni." a ti zawi sap ringawt.



"Tumaw? Tu chu maw awm?"



"Tualthattu...min that hman tep alawm."



"Enga? Khawiah maw?"



"Darkar chanve vel liamta khan...khamah ka lum hrep phah lehnghal a, mahse a awioh vak lo hlauh va, ka ke veilam hi a na deuh a, chuzawng chu a nimai."



"Chuan khawnge tunah chupa chu a awm?"



"Ka hrelo...saw..sawlai deuh ah sawn ka zung a, ka zung zo kha thawm ka hria a. Ka hnung atangin min man thut a, khamah min lum pui alawm."



Kima chuan mak a ti kehr mai, "A hmel i hmu em? Chuan..tualthattu i ti ringawt a, Victor-a chu em ni?" tiin a han zawt leh a. "Ka hrelo, a hmel ka hmu lo." tiin a lo chhang a. "Mahse tualthattu i ti bawk sia, a hmel i hmu bawk silova." Kima chuan a han ti leh deuh hu a. "Aww...kan mibo zawnte phone kan trace a, helai hmun min hruai thleng a, khatia min thah tum tu te chu tu vak nge nise i tih a?" a ti vin deuh lek lek mai.



"I tha maw, Sir? Na dang te i nei em?"



"Nei love, ka rawn hel ngat ngat alawm, ka ke ana deuh bawk nen, rawn lawn chhoh lehnghal ka tum a, mahse ka thei ngang lo a ni."



"Avan mak dawn ve..tunge maw niang le?"



"A hrim hrimin ka pistol nen chuan engmaw i lo va tih a?"



"E...ihh, thawm ka hria a, chubakah i rei ropui sia...ka hlauthawng deuh va, ka va check mawle." inthlahrung tak chuan a han ti a. "Anih leh motor ke hi i thlak zo tawh tihna em ni?" tiin a zawt leh a. "Aw Sir, ka zo deuh chiah." tiin a lo chhang a. "Anih chuan kal vat ang." Remruata'n a tih chuan, "Khawiah maw?" a lo ti hu mai.



"Helai hmunah hian a awm ngei a ni, motorin a kal theihna chin chin kan kal zel anga, chuan a bak chu ke in kan zawng tawh mai ang." tiin a chhang a. Motor ah chuan an lut dun a, Remruata mitah chuan hlauhthawnna a la awm tih chu Kima chuan a hmuh hmaih hauh lo. Mahse engmah chu a sawi chuang lem lo, motor chu ti nungin an tlan ta a.



************************



Jonasa chu ramhnuai thim khuih maiah chuan a tlan chhe chiam mai a, khawi lam ber nge pan tur pawh a hre lo. Chumai a ni lo, a thian hmeichhiate pathum, Bawihi, Miriami leh Ruatfeli te chu khawnge an awm pawh a hre der mai si lo. Thui fe a tlan chhiat hnu chuan a hah lutuk chu leiah chuan a bawk thlawp a, a thaw hlawi hlawi mai.



"Ni lo, ka thil hmuh kha..engthil nge ni ngai? Vic..Victor-a ala dam maw? A ni thei lo...enge awmzia?" tiin a thaw hlawi hlawi mai. Chutia mangang taka a awm lai chuan motor tlan ri a hre ta tlat mai, rang takin a tho vat a. "Motor...motor ri ka hria.." tiin a hawi kual vak vak a. Thawm lo chhuahna lampang chu zawngin ka tlan lehnghal a, mahse a hmu mai thei lo.



Minute 20 dawn motor ri lo chhuahna lampang zawnga a tlan kual hnu chuan a awmna sir hla vak lovah chuan motor tlan mek chu a hmu ta, police motor a ni tih a han hre leh phei chu a lawm kher mai. "Helamah...helamah...min pui ru." tiin a au vak vak a, motor chu a um nghal a. Mah se an inhlat em avang leh a sir atanga a um avang chuan motor chhung a chuang mek, Remruata leh Kima chuan an hre pha lo tlat.



A um zel a, "Min pui ru..thainte u, khawngaihin min pui ru.." tiin a au lawm lawm a. A hma zawna hnim tam tak te chu a tawn phei buan buan a, mahse thawk leh khatah engemawni hi a su chawrh mai a, a thal tawp mai. A hma zawnah chuan Hmaikawra chu a lo ding run mai a, a chempui hriam zet chu a lo la hum reng bawk.



Jonas-a chuan a hlau kher mai, "Tu..tunge i nih? Min tina suh, khawngaihin..min kalsan rawh." tiin a ngen nghal lawm lawm a. Hmaikawra erawh chuan a chhang lo, Jonas-a keah chuan a man lawk a, ramhnuaiah chuan a hnuk kual ta chiam mai. Jonas-a chu a tal vak vak a, mahse Hmaikawra chuan a ke chu a man ngheh em avang chuan a tal chhuak zo thak lo.



Mahse rei pawh a hnuh hma chuan vanneihthlak takin lung tum a chhar fu hlauh mai, a theih tawpa na huan Hmaikawra luah chuan a vawm ri chawrh mai a, ani pawh chuan a thlah ta hram a. Chuveleh rang lutukin a tho vat a, tlanchhiat nghal a tum chu Hmaikawra chuan ava zuan hman hram a.



An inbawh thlu a, Hmaikawrah chuan a rek bet ta ran mai. Na em em hian a rek a, Jonasa chu a thaw hleithei ta lo. A kut chu a vai vak vak a, hmanrua a dap fuh hlauh takin tiin lei chu a dap ruai a. Hmaikawra lah chuan a rek na tawlh tawlh mai si, a khaw hmuh te chu a fiah lo tan ta hial mai.



A tawp a tawpah chuan a dap fuh ta, Hmaikawra chempui ngei mai chu a dap fuh a, a bekah tak chuan ava sap ta. MAhse a hriam lo lam zawngin a sat a, a ri fawk ringawt. Hmaikawra pawh chuan na a ti kher mai, Jonas-a a rehna chu a thlah a, a bek hu a dawm vawng vawng a. Chutia ana tuar lai chu remchangah la in Jonas-a chuan sah leh a han tum a, mahse Hmaikawra chuan a kut a lo man sak a.



A elh sak vak a, a ri thawk lehnghal. Jonas-a na ti chu a au tuar a. Hmaikawra chuan zo em em hian a chaw lawp mai a, thingkung deng dawt khawp chuan a vawp phei ta mai a nih chu. Jonas-a hnungzang ru chu a ri thawt mai, leiah chuan a bawk thla leh thlawp bawk a. A na ti lutuk chu a rum ngawt ngawt ringawt mai a, tawng pawh a tawng hhuak hleithei lo.



Hmaikawra lah chu na engmah nei lo ang mai hian a lu a bu nghut ngut a, Jonasa awmna lam chu a rawn pan leh ta mai. Jonas-a chuan beilet turin chakna reng a nei tawh lo, a hliam tawrh chu na a ti hle bawk. Mahse chutia thih mai chu a tum bik hauh lo, Hmaikawra hmuh loh hlan chuan lei nawi chu a tham a.



Hmaikawra a rawn thleng chiah chu a hakna zawng zawng sawm khawmin a tho thei hram a, amitah tak chuan leinawi chuan a vawm ta. Hmaikawra mitah chuan lei nawi chu a lut nual mai a, a hmu tha thei ta lochu remchangah la in Jonasa chuan ava zuan vak a, a thutbet ta ran mai. A theih tawpa na chuan a hnek vak vak a, a hmaikawr chu phelhsak a tum bawk.



Mahse Hmaikawra chuan a lo phal hauh lo, a dang tang tang a. Tha an in neih tam hleih bawk si nen, Jonas-a chuan a phelhsak thei ngang lo. A thinrim bawk si chuan, "Zawnga...thi rawh, thi rawh..thi nghal rawh." tih pah chuan a hnek siah siah mai a, mahse a hmaikawr phelhsak a tum apiang chuan a lo dang zel mai bawk si.



Jonas-a chu a tho va, chempui chu a zawng kual leh a. A hmuh veleh chuan a chhar a, Hmaikawra tlukna lam ava hawi leh chu a hrilhhai kher mai. Hmaikawra chu a lo awm tawh hauh lo, a hawi kual vak vak a. Mahse thawm chu a reh thuap mai si, "Hmela chuh...khawnge maw a kal hman ni." tiin a thaw hluam hluam ringawt mai.



***********************



Miriami leh Ruatfeli te pawh chu pan ber pawh nei lo chuan an tlanchhe dun chiam a, chumi ramhnuai pilril tak maiah chuan an au dun vak vak ringawt mai. An hah em avang chuan thingkung lian tak pakhat bulah chuan an ding a, a thaw dun hlawi hlawi mai. Miriami chu a han hawi kual a, "Khawnge Bawihi? Kan bulah khan a rawn tlan ve reng amaw ka tia, khawnge a awm?" tiin a mangang kher mai.



"Ka hre tawh bik lo, kha..kha hmaikawr vuah kha..kha kha Victor-a a ni thei angem?" Ruatfeli chuan a ti tawk tawk a. "Nilo...ka hrelo..chu ai chuan khawnge Bawihi kha a awm? A chunga thil tha lo a thleng ngei ngei ang, kan zawn vat angai." Miriami chuan a han ti leh a. Mahse Ruatfeli chuan a lu thingin, "Nilo, a chi loh." a lo ti daih mai.



"Enga? Engvangin maw? A chungah thil tha lo thleng ta se, i ngaihtuah ve lo em ni?"



"Keini pawh kan chungah thil tha lo a thleng mek chu a nih hi...engtin nge ani chauh kan ngaihtuah bik theih ang?"



"Mipa ho kha...engtin nge an awm zel ang le? Pu Nunga kha rulin a chuk lehnghal a, engemaw kan chungah hian thleng ta le.." tiin Miriami chu a thu hnawk a, a lu a dawm vawng vawng mai. "Miriam, engin nge kan awm tak ang? Keini pawh hi min that ve ngei ngei ang, kan damchhuak hauh lovang." tiin Ruatfeli chu a tap titih leh der mai.



"Nilove..kan dam chhuak ang. Lungngawi suh, kan dam chhuak em em ang." tiin a beiseina chu tlem ve hle tho mahse a thiannu chu a thlamuan hram hram a. "Engtin nge kan damchhuah theih ang? Ala dam ngei a ni, Victor-a hi ala dam ngei a ni." tiin Ruatfeli chu a tap hawm hawm mai. Mahse Miriami chuan a hmui chu hup sakin, "Bengchheng suh, i tap ri a hria ange?" tiin a khap vat a.



"Miriam, engtin nge kan awm dawn? Keichu kan damchhuah ka beisei hlawl lo, min man anga, min that ve ngei ngei ang."



"Min man lohna turin kan inveng dawn lawm?"



"Engtin nge kan inven zawh ang? Mipa rual pawhin an hneh lo ni khan an sawi thin kha ania, engtin nge keini hmeichhe awmnem zawk te hian kan hneh teh lul ang?"



"Victor-a tak tak a nih pawh ka ring lo, Victor-a pian zia an sawi te, a san zawng te kha...Victor-a a ni thei lo hrim hrim."



"Engtin nge i hriat?"



"Victora chu khapa ai khan a sang, chuan a palian zawk bawk. Victor-a ani lovang, ani chu a thi tawh a, a ruang pawh an phum tawh alawm."



"Anih tunge ni ang? Victor-a a nih loh chuan...enteh, ramhuai a ni mai lo maw?"



"I mawl ami? Khawia ramhuai mah a nilo, engemaw thil duh a nei pawh a ni mahna, engpawh nise...hawh teh, tanpuitu tur zawng vat teh ang." tiin Miriami chuan a kai tho va, an kal leh ta a. An kalpah chuan Ruatfeli chuan, "Miriam, LAwrence-a thil tih te hi a ni mai lo maw?" a han ti chu Miriami chuan a melh hrawk a.



"Mawl viau thin suh...LAwrence-a'n hetiang em em chu a ti duh teuh lo mai, chubakah kha mi dawihzep lutuk khan hetiang thil hi a ti ngam lo hrim hrim." tiin a chhang a. "Anih chuan tunge ni ang le? A pawi sawi kan nei em mawni le?" tiin Ruatfeli chu a inhnit feih feih a. "Tual thah a duh hrim hrim vang pawh a nithei, rilru lama harsatna nei a ni maithei bawk." tiin Miriami chuan a hhang a.



Minute 10 vel an kal leh hnu chuan motor ri an hre ta, "Lawk...chu i hre ve em?" tiin Miriami chu a ding a. Ruatfeli pawh chu dingin a han ngaithla chiang ve a, "Motor ri a ni tiraw...awii, kawngpui kan hnai tawh ani ngei ang." tiin beiseina pawh a neih belh ve ta. Mahse Miriami chuan an hma zawn, kawng chho tak leh hnim hlira khat chu a han en chho a.



A la thim khuih mai bakah ni zung eng takngial pawh hmuh tur ala awm der mai silo, "Nilo, kawngpui kan la hnaih thei lo hrim hrim. He ramhnuai chhunga ngei hian a ni, kan awmna atang hian a hla lutuk miah lovang." tiin a chhang a. "Anih chuan zawng ila, tanpuina te kan dil anga." Ruatfeli chuan a lo ti leh a.



"A chi ngawt loh, kha Hmaikawra tho pawh kha a ni thei. Thawm neih tam loh a him ber, hawh teh...fimkhur takin i kal zel phawt teh ang." tiin Miriami chuan a chhang a, Ruatfeli pawh chuan a hnial ta lem lo. Mahse thui pawh an kal hma chuan an bul lawk thingkung chu a che deuh luih a, thingzar tliak hmawk ri an hre nghal bawk.



Chutah Bawihi chu a rawn tla bawk thlawp mai a, Miriami te thiandun phu nasa lutuk chu an t(r)e ring dun kher mai. Mahse BAwihi a ni tih an hmuh chuan an va pan vat a, Bawihi lah chuan na tih hmel tak hian a ke veilam zawk chu a dawm vawng vawng a, "Ana lutuk...awi ka nu." tiin a then tlawk tlawk mai.



"Bawihi..ka van lawm tak. I tha em? I tha tiraw?" tiin Miriami chuan a zawt nghal chiam chiam a. "Ka..ka ke..ka ke hi, ana lutuk." tiin a ke chu a kawk a, a ruh a tliak tih chiang tak hian a ke veilam chu a lo inthlep hnawk mai. "Ehe...a ruh a tliak a nih hi." Ruatfeli chuan a han ti a. "Enge thingkungah i han tih reng reng a?" tiin Miriami chuan a zawt a.



Na a tih em avanga mittui tla zawih zawih chung chuan Bawihi chuan, "Khatia kan tlanchhuak kha ka hloh daih che u a, bihrukna tur ka hre silova...tah hian ka lawn ta mai a ni." tiin a si deuh hluam hluam mai. "Engtin nge i rawn tlak theih a?" tiin Ruatfeli huan a lo zawt veleh a. "In thawm kha ka hria a, Hmaikawra a nih ringin ka insiamrem vat a. Mahse ka rahna lai hi a tliak daih a, awii..ana lutuk." tiin a sawi zawm hleithei lo.



"Engtin nge kan tih dawn?" tiin Ruatfeli chuan Miriami chu a en a. Miriami chu a ngawi deuh vang vang a, "Ruatfel, hetah lo awmpui la...tanpuitu ka han zawng anga, ka lo let leh vat ang." tiin a chhang a.Mahse Ruatfeli chuan a lo duh lo nasa mai, "A teuh lo, i mawl em ni...nangmahin ka lovang." a lo ti hlur mai.



"Hetia kan awm reng te chuan engtin mah damin kan chhuak lovang."



"Anih nang i damkhaw chhuak bik dawn tihna em ni?"



"Kei emaw, nangni pahnih tal hi in damchhuah angai."



"Engemaw i sawi awmzia le?"



"Kan pathuma heta riltama thih emaw, khapa kut tuara thih ai chuan engemaw kan tih ve angai a ni. Tihian lo awm ula, tanpuitu chu ka han zawng ang."



Za lo tih hriat tak leh thinrim tak chung chuan Ruatfeli chu a khi suk a, "Huh..animaw? Changtunu emaw i inti em ni? Miriam...mipa pawh i nih loh kha. Khapa khan a that dawn tho tho che, keini pawh min that vek dawn." tiin a vin lek lek mai. "Anih chuan heti hian kan awm tawp mai dawn em ni?" tiin Miriami chuan a vin let hrep mai.



Chutia an inhnial lai chuan Bawihi chuan aw khur dar dar chung hian, "Mi..Miriam...Ruatfel, saw..saw a lo kal ania." a ti ta mai a. Rang lutukin Bawihi kawhna lam chu an thian dun chuan an va en nghal a. Hmaikawra chu an awmna atanga pen 20 velah chuan a lo ding leh khur tawh mai a, mahse hmanrua engmah a keng tawh lo thung.



Chuveleh Ruatfeli chu a au vak a, "Nilo..Miriam, tlanchhia ang." tiin Miriami kawrah chuan a pawt nghal vak vak a. MAhse Miriami chuan tlanchhiat a tum hauh lo, a ding lui tlat mai. Bawihi pawh chuan mangang tak hian, "Nilo..min kalsan bik suh u..khawngaihin min kalsan suh u." tiin a lo tap tuau bawk a.



Miriami chuan Hmaikawra en reng chung chuan, "Nilo...khawiah mah ka kal dawn lo." a ti ta tlat mai. "I mawl em ni? Saw kan hmaa saw a awm reng saw, a lo phei hma hian tlanchhe vat ang." tiin Ruatfeli chu a vin hlur tawh mai. Miriami chuan rum tak hian a melh a, "Nangmah a nih hi mawl zawk chu, hetah kan thiannu kal theilovin a awm a, i tlanchhiat san ang maw?" a ti hrep mai.



Chutah Hmaikawra chu ava en leh a, a din ngaiin a lo la ding reng a. Hlau chung chung chuan Miriami chuan Hmaikawra chu a melh ran mai a, "Tunge i nih? Engvanga kan thiante hi that nge i nih?" a han ti vin khur khur a. Mahse Hmaikawra chuan a chhang lo, a thlek deuh vang vang ringawt a.



"Victor Lalthanmawia i nilo tih kan hria, chubakah Victor-a lak atanga lo damchhuak tawh te pawhin khatiang hmaikawr a neih awm an sawi ngai lo. Nang hi midang i ni, sawi rawh...tunge i nih?" a han ti leh a. Mahse Victor-a chuan ala chhang chuang lo, chutah a rawn kal hnai ta mai. Ruatfeli hlau lutuk chuan, "Miriam..kal vat ang, saw alo kal ania." a ti chel chul mai a.



Bawihi lah chuan, "Nilo..ka kal ve thei lo. Min kalsan bik suh u, khawngaihin." tiin a lo tap vak vak bawk. Miriami chu a hawi kual a, a bula thing t(r)ang, lian lemlo tak chu la in Hmaikawra chu ava pan ve ta mai. "Nilo..i mawl ami? Va kal suh, lo let vat rawh." tiin Ruatfeli chuan a au vak vaka .



Chutah Miriami chu ava tlan phei a, Hmaikawra chu vuak ava tum ta mai. Awlsam lutuk hian a lo man a, Miriami hmaiah chuan a hnek siah mai a, a let tawp mai. Miriami chu nikhaw hrelovin a awm nghal der mai a, a che tawh eih lo. Ruatfeli hlau lutuk chu a meng phar awn awn a, a tlan chhe ta ringawt mai.



Bawihi chuan a hlau takzet, a tlan chhe ve thei der mai si lo. "Khawngaihin, khawngaihin ka pu...min that suh, min that lo hram rawh." tiin a ngen lawm lawm mai. Ahma takah chuan Hmaikawra chu a ding run mai a, "Bawihi, tunge ka nih i hria em?" a ti ta mai a. BAwihi hlauthawng hmel pawh chu mak tihna hmel chuan a thlak nghal a, a ka hau mai.



"Tu..tunge i nih a? Engtin nge ka hming i hriat?"



Hmaikawra chu a thu hniam a, "Min hre tawh lo amaw? Ka aw atang te hian tunge ka nih i hre tawh lo amaw?" a han ti leh a. Mahse BAWihi chu a bo tulh tulh mai, "Tunge i nih?" a ti leh ringawt a. Chutah muang chang chuan Hmaikawra chuan a hmaikawr chu a phelh ta a, Bawihi chu a meng bial kawk kawk mai.



"Nang..nangmaw?" a ti thei tawk a, tawng pawh a tawng tha hleithei lo. Hmaikawra chuan rum zet hian Bawihi chu a melh a, "Ka chunga i thil tih rapthlak tak te kha...ka la theihnghilh reng reng hleinem Bawihi.." a han ti leh a. Bawihi chuan a hlau takzet, "Ka tihpalh..ka tihpalh, min ngaidam rawh." a ti chel chul mai.



Chutah Hmaikawra chu a ding a, "Tunah chuan i hun a thleng ve ta...thi turin inpeih rawh le." a ti ta mai a. Bawihi chu a khur zawih zawih mai, "Nilo...ka tum a nilo...ka insawifiah thei. Khawngaihin min that suh, chance vawikhat chiah min pe leh rawh." tiin kut suih meuh chuan a dil lawm lawm a.



Hmikawra chu a khi suk a, "Chance...chance min pe leh rawh a? Ani kha chance in pe bik em ni? Duhthlan tur pakhat mah in pe lo, a nun zawng zawng inti chhe vek asin. Tunah chuan a inhnamhnawih zawng zawngte hi a mal te te in ka dahtha vek dawn che u, chuan he film in buapui mekah pawh hian in thuruk ka hre vek....in puitlin lovang, kei hian ka phal tawh lo a ni." tih pah chuan a hmaikawr chu a vuah leh a.



"Nilo..min that suh, min ngaidam rawh. Ama min tih tir vek kha alawm, ka thiamoh a awmlo. Min chhuah hram rawh, khawngaihin.." tiin Bawihi chu a tap vak vak a, mahse Hmaikawra chuan a ngaithla tawh lo. A han hawi kual a, thing lian tha nelh nawlh mai chu a chhar a. Bawihi chu a mangang kher mai, "Khawngaihin...min tina suh." tiin a la ngen char char a.



Chutah dim baksak lo chuan Hmaikawrah chuan Bawihi lu chu thingkung nen chuan a vuak chilh siah mai a, thisen a per chhawk mai. Vawikhat chauh chu a duhtawk lo, vawi sarih vel lai chu a vuak chilh siah siah mai a. Bawihi hmel chu hmuh tlak reng a awm tawh lo, thisen chu a kawi nuai bawk a, Bawihi pawh chu a thi chiang kher mai.



Hmaikawra chuan Bawihi ruang chu bawkkhup zawng chuan a kuai let a, a ipte atang chuan pocket knife leh mobile phone pakhat hi a phawrh a. Phone chu Bawihi kekawr iptea chuan ah tirin lian tak hian pocket knife chuan #8 tih ziakin a hnuaiah chuan VICTOR tih chu a ziak leh a. Ruang chu a pu nawlh a, "A pariatna i ni e, BAwihi...hetiang thil ka tih angai hi a pawi khawp mai." tiin a phun sup a.



***********************



Khua a thim tan dawn tawh a, ramhnuai chhung phei chu thim tawh tak a ni. Motor light pawh chu on a ngai hial tawh a, Remruata leh Kima chuan tu mihring mah an la hmu chuang lo. 'Sir, kan haw tawh mai dawn em ni? Hei khua a thim dawn a, kan haw na tur kalkawng ala thui si.." Kima chuan a han ti a.



"Nia, a ni khawp mai. Mahse kha mihring, min thah tumtu kha man ngei ka duh a ni. Ka inring lo lai tikhan min rawn bei a, ka phone ka thlauh phah daih lehnghal."



"Ka hriatthiam pui che alawm, mahse hei khua a thim zel bawk si a. Ramhnuai pilril takah kan awm bawk nen, khua a thim phei chuan haw na tur kalkawng kan bo palh ang tih te pawh a hlauhawm alawm."



"Umm..ni e, i haw phawt mai teh ang. Chuan..thawm ka hria i ti tiraw nangpawh khan?"



"Aw hria e, chuvang alawm i pistol pawh kha ka lo ken."



"Eng thawm nge, mihring tawng ri nge..englam nge?"



"Tawng ri pawh a nilo, hnim che deuh hrut hrut a awm a. Chuan mihring kalphei zuk niawm tak ka hmu bawk, mahse ka mitvai a nih ka ring mai a. I thil tawn i han sawi takah chuan ka mitvai chu a nih ka ring bik tawh hauh lo, tu emaw chu a awm ngei a ni."



"Aa..engpawh nise, ka phone pawh chu zawn chi pawh a ni tawh lo. Haw phawt ila, naktuk zing ah hma deuhah chhuak ila, kan zawng tawh mai dawnnia."



"Nia, i nau pawh a ngaihtuahawm emai. I haw phawt mai teh ang, kan hmu em em ang."



Remruata chu a in-turn a, tichuan haw chu an tum ta a. Thui pawh an la tlan lo tih ah chuan an motor hma chu a rawn ri dawp mai a, darthlalang a keh vek bawk. Leiah chuan engemaw a tla ri leh dup mai a, an phu dun nasa bawk a, motor pawh chu an ti ding nghal. An motor hma darthlalang keh ah chuan thisen a kai hnuang bawk a, rang takin an chhuk dun nghal a.



An han enchiang chu an rap dun kher mai, hmeichhe pakhat ruang hi a lo ni a. A hmel te chu hmuhtlak reng a awm lo, "Ehe...engthil nge ni ngai?" tiin Kima phei chuan en pawh a en tha ngam lo. Ruang chu Remruata chuan a han en a, "Ekhai aw...ava han sawisa nasa em em ve...hmeichhia a ni lehnghal." a ti vawng vawng mai.



Chutah motor chhunga an tracking device chu a rawn ri tut tut mai a, rang takin Kima chuan ava la a. "Enge awmzia?" Remruata chuan a lo ti vat. "Sir,Bawihi phone a man, device hian..hetah tak hian location a tawp." a ti ta mai a. RAng takin chu nula ruang ipte chu REmrauta chuan a dap nghal a, mobile phone pawh chu a lo awm ngei a.



An in endun vang vang a, "Anih chuan hei hi...hei hi Bawihi tihna aniang maw?" Remruata chuan a han ti a. "Anih ngei dawn hi." tiin Kima chuan a lo chhang a. Remrauta bawk chuan, "Anilo thei bawk, hmeichhe dang ruang ah Bawihi phone hi a dah pawh a ni thei." a han ti leh a. Kima chuan phone chu on a han tum a, a screen chu a keh nual bawk.



Mahse a rawn in on thei hlauh mai, "Ehe, Sir...a in on e." a ti a. Remruata pawh chuan phone chu a han en ve a, home screen ah chuan BAwihi thlalak chu a lo lang ta ngei mai, Remruata chuan ruang chu a han en leh a. A lu bu deuh nghat nghat in, "Bawihi ngei chu a nih dawn hi." a ti chuai raih mai.



Kima chu a hawi kual a, "Khawi atangin nge maw a rawn tlak reng reng ni...tualthattu hi kan bul hnaiah hian a awm hial lo maw le?" tiin inring reng chuan a awm a. An sira kopang sang tak mai leh awih em em mai chu Remruata chuan a torchlight chuan en chhovin, "Khita tang khian a rawn lum thla a ni ngei ang, tualthattu hian a duhthu ngeiin a rawn lum thlak tir a ni." a han ti charh charh a.



***********************



TO BE CONTINUE


VICTOR LALTHANMAWIA (A HANDSOME CREATURE SPIN-OFF)



[MIZO FICTION SLASHER/HORROR STORY]



WARNING : 18+



Written by : Aaron Malsawmdawngzuala



Chapter - 6



LAST









*******************



Zan a ni tawh a, mahse a u Remruata a lo la haw loh avang chuan Sentei chu a mangang tawh kher mai. A phone lahin a tlang thei bawk silo, anu leh pate lah chaw eiin an chhuak daih bawk si. Inchhungah chuan a tei kual reng ringawt a, "Ngati em em nge mawni le? Buaina a tawk te hi a nilo maw le?" tiin a phun nuah nuah a.



Chutih lai chuan kawngka a rawn in kik leh ta karh karh mai a, "Lo lut rawh.." tiin a lo chhawn vat a. Mahse tumah an rawn lut lo, kawngka lam chu va panin, "Tunge ni?" tih pah chuan kawngka chu ava hawng a. MAhse tlai ami ang tho khan tumah an lo awm leh ta chuang lo, a ngaih chu a tha lo kher mai.



A han ngaihtuah let a, tlai lama kawngka tu emaw in a rawn chum rik bur bur te, mahse a chumtu a hmuh siloh te, a room chhunga a hriat loh hlana paper lo awm ringawt te leh a chhunga thu inziak te chu a ngaihtuah let a. A u Remruata tun thelnga lo la haw lo leh phone a la thei bawk silo te nen chuan engemaw inzawmna a neih a ring ta tlat mai, a hlauthawng ta hle mai.



Anu chu a phone a, vawi nga vel a ring hnuah chuan a rawn pick up hlauh mai. Sentei chu a thaw huai mai a, "Nu...engtik nge in lo haw dawn?" tiin a zawt a. "Aww...ngati nge? Kan sawi lawk vek kha, hei i pa nen chaw eiah i pa Rina ten min sawm kan tih kha..tunah chaw pawh kan la ei reng reng lo." a rawn ti a.



"In rei angem?"



"NGati nge? Buaina i tawk em ni?"



"Tawk hran love...keimah chauhvin inah ka awm a."



"Ehe, ngati nge? Khawnge i u?"



"Alo la haw lova, ka phone lahin a tlang thei bawk silova."



"Aaa..ala buai deuh te pawh aniang chu...hlauthawng mahta che."



"Buai chu nise min rawn phone em em ang, a rawn sawi lawk vek ang. A haw har dawn chuan min hrilh lo ngai lo tih pawh i hriat kha, ka ngaih a tha lo ania."



"A phone a thi pawh a ni thei asin, Police Station lam va phone la, chanchin te va zawt la."



"Awle, aa..alo haw mai ang, nangni pawh chaw eikham veleh lo haw rawh u aw.."



"Ni e, hei kan ei tep, anih phawt le."



Phone chu an dah a, Sentei chuan Police Station lam chu a phone ve leh nghal a. "Hello...ihh, Pu Sangte, Sentei ka nia, Remruata nau..ka u Station ah a awm em le?" tiin a han zawt a, Pu Sangtea hi Remruata te Station-a an Inspector a ni. "Case buaipuiin Kima nen an la chhuak a, engmah chanchin an la rawn sawi lo." tiin Sangtea chuan a lo chhang a.



"An chhuahna a rei tawh em?"



"REi ve tawh e, mibo case thar a awm a. Chumi thilah chuan an chhuak a, biak tlang kan lo tum chhin ange."



"AWle, ka lo ngaichang dawn che nia."



Sentei chuan minute 10 vel chu a han nghak leh ngar ngar a, a phone chu a rawn ri leh ta. Pu Sangtea a lo ni a, "Aw Hello, Pu Sangte..enge chanchin?" tiin a han zawt nghal vat a. "Kan be tlang thei miah lo mai, Constable Kima pawh kan be tlang thei lo. Signal awmlohna hmunah an awm pawh a ni maithei, ngaihtuah lutuk suh...an rawn haw mai ang." tiin a rawn chhang a.



Chutih lai tak chuan kawngka chu a rawn inkik leh thut mai a, a phu nasa kher mai. Phone lah chu a lo dah hman chiah chiah bawk si, a ngaih a lo thalo sa nen, a hlau ta kher mai. Choka ah va tlan vatin chemte ava zawng nghal a, ala hmu mai lo zui. Chutah kawngka kha chhunlam atangin a kal lo tih a hre chhuak thut a, a thil zawng lai chu a tawp chat mai.



Lehlam a hawi a, a hma ah tak chuan Hmaikawra chu a lo ding run ta mai a nih chu. A hlau lutuk chu au a tum a, mahse a au hman lo. Hmaikawra chuan a hmuiah chuan a hup saka , bangah a nam bet a. Sentei chu tal chhuah tumin a tal nasa mai, mahse Hmaikawra tha chu a hneh mawlh si lo.



Hmaikawra chuan a kut dinglam chuan Sentei chu a rek bet a, a kut veilam chuan a ipte zenin rawmawl hi a phawrh a. Sentei ka(mouth) chu rawmawl chuan ava hup hnan a, a tal rei lo kher mai. Zawi zawiin Sentei chu a zawi tial tial a, a tawpah chuan nikhawhrelovin a let der mai. Hmaikawra chuan a pu nawlh a, pawnah a chhuah pui ta daih mai.



***********************



Remruata chuan a sana chu a han en a, "Dar 7 a ri mai dawn, engtin nge kan tih ang? Ka nau lah amahin inah ka awm tir daih bawk si, hetah lah ruang kan la chhar zui chu ania. KA phone lah a bo daih bawk si a, back-up kan koh mai angai dawn a ni." a han ti nuah nuah a. "Sir, tracking device kan kawl tho va, i phone chu kan trace zuai mai dawn em ni?" Kima chuan a lo ti a.



"Aih, chu aia pawimawh chu tih tur kan nei. Engpawh nise i phone kha signal a awm em han en teh.." Remruata chuan a han ti a, Kima chuan a phone chu a en a. "Tum khat chu a awm e, nichin kha chuan a bo char char alawm." tiin a chhang a. "BAck-up ko la, ruang kan chhar thu hi Sir Sangtea hrilh bawk ang che." a tih lai chuan thawm an hre tlat mai.



Rang takin Remruata chuan a pistol a phawrh nghal a, "Chu i hre ve em?" tiin Kima chu a zawt a. Kima pawh chuan a lu a lo bu nghat mai, thawm awmna lam chu an va hawi nghal a. Mahse a thim em avang chuan engmah an hmu tha thei lo, chubakah thingkung leh hnimbuk hlirin a khat bawk si.



Torch Light chuan Remruata chuan ava en phei a, mihring thaw hlawp hlawp ri chu an hre ta. Thawm atanga a lan danah chuan tu emaw chu hah takin a rawn tlan phei mek ni ngeiin a hriat a, REmruata leh Kima pawh chuan hmachhawn turin an lo inring dun khawp mai. Chutah a rawn hnai zel, thawm pawh a ring telh telh mai.



A tawpah chuan mipa pakhat hi a rawn chhuak hlawl mai a, "Ding rawh...che tawh suh." tiin Remrauta chuan pistol chuan a tin ran mai a, chupa pawh chu a ding chat mai. A thaw hluam hluam a, a ngaihna a hriat loh hmel khet mai. Mahse a mitmengah chuan hlauh a nei tih a chiang a, a thlan zawih zawih bawk.



"Tunge i nih?" tiin Remruata chuan a han vin leh thak a, mahse chu tlangval chuan a la chhang chuang lo. A aia ring hian, "SAwi rawh..tunge i nih? Tunge i hming...sawi vat rawh.." Remruata bawk chuan a han ti vin leh hlur a. Chupa chuan a ban a phar a, "Ka pu..ihh, engmah tihsual ka nei lo." a ti nghal vak vak ringawt mai.



"Tihsual i neih leh neih loh ka zawt lo che, tunge i hming sawi rawh.."



"Ih..Vena ka nia..Lalvensanga..ka pu, misual ka nilo."



"Enge helai hmunah i tih?"



"Ih..movie..movie shoot turin kan kal a. Chuan tu tih hriatlohvin min tibuaia , ka thiante pawh a that nual mai."



REmruata leh Kima chu an in endun a, "Enga? Nangpawh movie crew zing ami tho maw i nih?" tiin Kima chuan a han zawt ve a. "Aw...ka thiante hi khawnge an awm pawh ka hre tawh lo." tiin a mangan hmel khawp mai. "Anih leh hetah engtin nge nang i awm daih theih?" tiin Kima bawk chuan a han zawt leh a.



"SAwi tan dan tur mai pawh ka hre lo, zinga kan tho kha kan zinga mi Wlliama ruang kan chhar a. Chuan a hnuah ahma ni daih a kan hmuh tawh loh, Zaia ruang kan hmu leh bawk a. KAwngpui pawh chhohna kawng kan hre ve silo a, Williama chauhvin a hre sia. Tichuan kan zawng chawp a, in pakhat kan hmu a. Chumi chhungah chuan kan zinga bo tho, U Robert-a ruang kan hmu leh a. Chutih lai chuan Hmaikawr vuah palian deuh pakhat hi a lo lut a, a rukin ka tlanchhe theih hlauh va. Ka thiante kha engtin nge an awm zel pawh ka hre tawh lo, ka pu..khawngaihin min pui hram rawh u." tiin tap pur chung chuan a sawi bah deuh nuai mai.



REmruata chu a thaw hak a, "Lo kal hnai deuh hlek teh." tiin pistol chuan ala tin reng a. Chhe te chuan a rawn pen hnai a, "A tawk...tah khan ding rawh." a han ti leh a, Vena chu a khur deuh dar dar mai. "Kima, va dap teh...hmanrua te kha a lo pai ru reng ange." tiin Kima chu a tir phei a. Kima chuan a va dap a, VEna chu a che ngam eih lo.



Kima’n a dap zawh hnuah chuan Remruata bulah chuan ava let leh a, “Engmah hriamhrei a pai lo.” tiin a hrilh a. Remruata chuan Vena chu a han en vang vang a, “Tunah i thiante chu khawnge an awm i hre miah lo amaw?” tiin a han zawt leh a. “Aw..khawnge an awm ka hre lo, ka hlau lutuk a, mahni sa him nan tiin keimahin ka rawn tlan chhe tawp mai a ni.” tiin a chhang a.



"Anih leh chumi in awmna kalkawng chu i la hre thei angem?"



"Aih ka pu, khawi khawi ah nge ka tlanchhiat pawh ka hre tawh lo, ka hma zawnah ka tlan vak vak ringawt a, kalkawng engmah ka hre lo."



"Anih chu hmaikawr vuah i tih chu, palian lampang a ni em?"



"Aw ni e, ka pu..engtin nge i hriat a, i hmu ve em ni?"



"Hmu hran love, engpawh nise lo chuang ve phawt la, Police Station lamah min lo zui phawt rawh."



Vena chu a hlauthawng kher mai, "Mahse ka pu, engmah ka ti sual hleinem. Min ring rawh u, engmah ka ti sual lo." a ti nghal chel chul mai a. "I tih a ni kan tilo, thil thleng zawng zawng hi Stationah i sawi angai alawm...kan hnu chhui mek naah hian min pui thei dawn a, chuvang zawk chu a ni." tiin Kima chuan a lo hrilh fiah vat a.



VEna pawh chu a thaw deuh huai a, Bawihi ruang chu a en leh vung vung a. Inthlahrun hmel tak hian, "Anih ka pu, min man dawn lo tiraw?" a han ti khur deuh dar dar a. "MAn dawn love, engpawh chu nise.." a tih lai chuan motor sira BAwihi ruang lo let reng mai chu VEna chuan a hmu thut mai.



"Nilo..saw..saw ruang." tiin a rak vak a. "VEna...bengchheng suh, henu hi in crew zinga mi tho, BAwihi a nih hmel a, a hmel erawh hmuh tlak loh khawpin tualthattu hian a sawisa a ni." REmruata chuan a lo ti vat a. Vena chu a tap nghal a, "Nilo..Bawihi, ava pawi tak." tiin a thingthi hnawk mai.



REmruata chuan VEna chu va panin a darah chuan a vuan a, "Vena, inti pachang hram hram rawh. I thiante a mal te te a thattu hi kan zawng mek a, chtuah chuan i puihna kan mamawh dawn ania." a han ti leh a. VEna chu mittui tla phung chung chuan a rawn hawichhuak a, "Anih leh ruang hi kan kalsan tawp mai dawn em ni?" a han ti tham tiak a.



"Ni e, Sir..back up kan koh vat loh chuan...hei rannungin an bawm anga, reiloteah a rimchhe vat mai ang." Kima chuan a lo ti ve bawk a. "Nia, i phone ah signal kha ala awm em?" tiin REmruata chuan a zawt a. "Aw, tum hnih a awm e." tiin Kima chuan a chhang a. Remruata chuan Kima phone chu la in back up chu a ko nghal vat a, Inspector chuan a nau Sentei'n a rawn phone thu leh a ngaihtuah thu a rawn hrilh nghal bawk a.



Remruata chuan phone chu dah vatin, "Ehe...ka nau hi...ka nu leh pate chaw an ei chhuak daih bawk si a, amah chauhvin a awm tak e." tih pah chuan Kima phone atang bawk chuan a nau chu a call lehnghal a, mahse a in ring quit thak thak mai. "NGati nge mawni le? A mu tawh amaw nile?" tih pah chuan a call nawn ngat ngat a.



A tawp a tawpah chuan a rawn la ta, "Hello Sente, i mu tawh em ni?" tiin a zawt nghal a, mahse Sentei chu a ngawi reng mai. "Sente, BAWihi...ngati nge i ngawih reng a?" tiin a zawt leh a. Chutah mipa aw thum tak mai hian, "I nau chu ka kawl e." a rawn ti ta mai. REmruata thin chu a phu nghal dup dup mai, "Tunge i nih?" a han ti vin thak a.



Chuveleh Kima leh VEna pawh an rawn hawi nghal hru mai, "Tunge i nih ka tih chu.." a aia vin chuan a han ti leh hlur a. Phone ami chuan chiang fek fawk hian, "Hmaikawra...Victor Lalthanmawia ka ni. Lungngai suh, i nau chu ka lo enkawl ang." tih leh phone chu a tawp hmak mai. "Sir, ngati nge?" tiin Kima chuan a lo zawt vat a.



"Victor-a..Victor Lalthanmawia...a insawi dan a ni. Mahse...a thi tawh sia, enge awmzia ni ta ang?" tiin Remruata chu a mangang kher mai. Chutah zawi tak si, fiah em em si hian VEna chuan, "A dik, a sawi dik a ni." a rawn ti khur dar dar mai. "Enge awmzia? Engmaw dik?" tiin Remruata chuan a lo zawt vat a.



VEna chuan hlauthawng tih hriat tak hian Remruata chu melhin, "Film kan shoot lai khan...ihh..message ka dawng a. Number hriatloh atangin, VICTOR LALTHANMAWIA A LA DAM tih min rawn thawn a ni." a han ti leh a. "Chuan...enge thleng zel?" tiin Kima pawh chuan a lo zawt veleh a.



"Ka thiante zinga miin min rawn prank mai mai a nih ka ring a, mahse a tuk atang khan Williama ruang kan chhar nghal ringawt a...chuan kan phone zawng zawng pawh.." a tih lai chuan an awmna atanga hnai takah chuan motor ri an hre ta tlat mai, Vena tawng lai pawh chu a tawp hmak a.



"Chu..motor ri chu in hre ve em?" Kima chuan a han ti hu a, "Avan hnaih hmel ve.." REmruata chuan a lo ti ve bawk a. Chutah motor ri chu a rawn ri hnai ta hle mai, light eng em em mai hian an pathum chuan a rawn chhun thut mai a. Hnim kar atang chuan Truck lian ve tak mai hi a rawn tlan chhuak hlawl mai a, horn lah chu a ring em em lehnghal.



VEna chu a tlanchhe hman lo, Truck chuan a su leng lawp mai a, thing kungah chuan a taksa ava sawh a, a ruh tliak ri pawh a ring ngei mai. Kima pawh chu a su thawi hman fua a, mahse a ke dinglam chiah a hliam thung. Remruata erawh a zuang sawn hman hlauh thung a, hliam a nei ve lem lo.



Truck chu a ding a, Kima chu a ke a nat em avang chuan a che tha hlei thei lo. Truck atang chuan tu emaw hi a rawn chhuaka, sa sah chem lian tha nelh nawlh tak mai hi a hum run bawk. Kima leh Remruata'n an han en chian chuan Hmaikawra a lo ni reng mai. Remruata chu a zuang tho nghal a, "Hey Zawnga, khawiah nge ka nau i dah?" tih pah chuan ava tlan phei nghal a.



Mahse Hmaikawra chuan a chem chuan a lo tin a, Remruata pawh a ding leh chat mai. Hmaikawra chuan fiah tak hian, "Tu i nau maw? Enge i sawi awmzia?" tiin a lo zawt let a. Remruata chuan thinrim tak hian, "DAwt sawi kual lo mai teh, khawiah nge ka nau Sentei a awm?" tiin a zawt leh a.



Hmaikawra chuan vin deuh tak hian, "Tunge i nau chu ka hrelova, Sentei tih hmingpu tumah hriat ka nei lo. Nau i nei tih pawh ka hrelo, Remruat." a han ti chiah chu REmruata chuan mak a ti kher mai, chutiang bawkin leia lo mu reng Kima pawh chu a meng hraw mai. "Ka..ka hming i hria amaw? Tunge i nih?" tiin a han vin vak a.



Mahse Hmaikawra chuan a sawi zawm duh lo, "Kal bo rawh, anih loh chuan ka sat hlum che animai." tiin chem chuan at tin reng a. Chutih lai chuan Kima chuan Remruata pistol thlauh chu a lo zawng kual ru nasa kher mai, mahse a thim tawh bawk nen, a ke a nat em avang chuan a che tha ngam bawk silo.



"A tha e, mipa tak tak i nih chuan i chem kha dahthla la...insual ang hmiang." Remruata chuan a han ti a, Hmaikawra pawh chuan Remruata chu a en ta vang vang mai. "Dah thla ta che, mipa diktak i nih chuan insual ang hmiang." Remruata bawk chuan a han ti leh a. Hmaikawra chuan chem chu a dahthla a, Remruata lam chu ava pan ta.



"Tu pawh ni la, min hretu i ni tih ka hria, keipawh hian ka hre chiang che a ni. Eng ang pawhin hmaikawr kha vuah mah la, tunge i nih ka hrechhuak tho tho ang, i hmaikawr kha ka phelh sak tho tho ang che." tiin Remruata bawk chuan a vau khur khur mai. Hmaikawra hma ah tak chuan a ding a, hnek tumin a han vai a.



Mahse awlsam lutuk mai hian Hmaikawra chuan a lo bum tlat mai, han tum viau mahse a hnek fuh hleithei lo. Hmaikawra chuan chiang em em hian a khabe ah a hnek chho pawp mai a, ke vawr meuhvin Remruata chu a thal thuai mai. Hmaikawra chuan Remruata chu a sawisa hi a ni zawk mah awm e, a theh thal zing khawp mai.



Chutih lai chuan Kima chuan pistol chu thei leh theilo hian a lo zawng kual ve mek zel bawk a, mahse a che tha hleithei bawk si lo. Hmawikawra chuan Remruata chu thutbetin a rek ta mai a, mahse REmruata chuan a bul vel chu a dap nghal ruai mai a, thing tang a ban fuh hlauh mai. A theih patawpa na chuan Hmaikawra malah chuan a vin siah mai a, a tlum thawih mai.



Hmaikawra na ti lutuk chuan a thlah nghal a, leiah chuan a vial ngawl ngawl mai. Thing tang, a mala bur vu mai chu na ti chung chung chuan a phawi a, a rum vawng vawng mai. Thaw hlawi hlawi chung chuan Remruata chu a rawn tho chhuak a, Hmaikawra erawh a thinrim ta kher mai. Remruata chu a kawr awmah tham sakin a hnek ta siah siah mai a, a truck bangah chuan tukhum vaw chawrh khawpin a intauh tir ta siah mai.



Remruata pawh chu nikhawhrelovin a let der mai a, Hmaikawra chu a thaw halh mai. "Che tawh suh.." tih ri hi a hria a, hnunglam a han hawi chu Kima chuan pistolin a lo tin reng mai. Hmaikawra chuan zawi muang chuan a ban a phar chhova, "Ngawi reng khan i hmaikawr phelh rawh." tiin Kima chuan a han vau leh a.



Hmaikawra chuan a hmaikawr chu phelh tum niawm tak chuan a han vuan a, mahse chaing tak hian Kima pistol ken lai chu a han en leh a. A kut chu a dahthla leh daih mai, "Zawnga, phelh rawh ka tih chu.." tiin Kima chuan a han vin tuar a. Mahse Hmaikawra chu a ngawi reng mai, "I phelh loh chuan ka kap hreh miah lo che ania." tiin a han vau leh a.



Chutah Hmaikawra chu a nui ta vak vak mai a, Kima chu a hrilhhai kher mai. "Min kap la, min han kap chhin teh." tiin a lo hlau lo nasa mai. Kima chuan silai chu a han hmet a, mahse a ri khep ringawt. A han enchian nak chuan a maxine a lo awm reng reng lo mai, Remruata chuan a lo thlauh daih a ni tih a hrethiam nghal bawk.



"Hrep taka.." a ti hman tawk a, Hmaikawra chuan chiang em em hian a bekah a hnek siah mai a. Kima chu a thal tawp a, nikhawhrelovin a awm nghal der mai. Hmaikawra chuan Vena lam chu ava pan leh a, a lo la dam a. Mahse a ruh a tliak nasat em avang chuan a che hleithei lova, a thaw tek tek ringawt mai a ni.



Hmaikawra chu a kun hniam a, a chek tlawk tlawk mai. VEna mita en pah chuan, "Ava pawi thin ve aw...midang emaw ka ti che a, ka lo su palh che a ni. Nang kehr hi chu thah ve che pawh ka tum lo asin, mahse tih theih dang a awm tawh silo. Min hrethiam dawnnia, ka tihpalh a ni." tih pah chuan a rek hlum ta daih mai.



***************************



LAwrence-a chu ngawi reng chuan a mu meng kur mai a, a awmdan chu boring a tih hmel kher mai. Chutia amaha thil a ngaihtuah vung vung lai chuan kawngka chu a rawn inhawng a, anu a lo lut a. Eitur rawn ken luh pah chuan, "Hei..chaw eitur ka lo keng a. Ei rawh aw...ka'n siam sak ang che." zaidam tak chuan a han ti dam dap a.



Mahse LAwrence-a chuan, "KA ei peihlo." a lo ti hmuk mai. "Amak e aw...thil i ei tlem si, tlem tal ei teh." anu chuan a han ti leh a. Vin zet hian Lawrence-a chuan, "Ka ei peihlo ka tih chu.." a lo ti leh hlur mai. Anu chuan tihngaihna a hre bik ta lo aniang chu, "I peih hunah i ei dawnnia." tiin dawhkanah chuan a dah a, a chhuahsan leh mai a.



Minute 1 pawh ala liam lo tih ah chuan kawngka a rawn in kik leh a, doctor niawm tak hi surgical mask vuah chung hian a rawn lut a, "Drip thlak lawk ang aw.." tiin damdawi bur vel chu a rawn chhawp hnawk nuai mai. Lawrence-a hnungchhawn zawng chuan damdawi vel chu a khawih mual mual a, "Doctor, eng thleng nge ka la awm ang le?" inthlahrung tak chuan LAwrence-a chuan a han zawt a.



Chutah Doctor chuan a lu ah chuan engemawni hi vuah pah chuan, "I thil tihsual rah i seng kim hunah aw.." tiin a rawn hawi let a. Lawrence-a chua meng phawk chiang kher mai, "Nang..nang hi.." tih chiah a sawi thei, chu doctor chu tudang nilovin Hmaikawra a lo ni reng mai. Rang zet hian Hmaikawra chuan LAwrence-a hmui chu a hup thut a, reiloteah chuan nikhawhrelovin a awm der mai.



Minute 5 vel a liam leh hnu chuan Lawrence-a nu chu a lo let leh a, mahse khumah chuan a fapa a awm ta hauh lo mai. Bathroomah a kal a nih a ring a, mahse a ke ruh tliak vangin amahin a kal thei dawn lo tih a hrechhuak leh a, a ngaih a tha lo tan. Bathroom chu a han check a, mahse a lo la awm chuang si lo.



************************



Room thim ruih mai, bang kaw tereuh te te atanga nizung rawn eng pheih pheuh bak eng dang awmlohna room ah chuan Sentei chu a kut hnung lama phuar beh hian a lo awm a, a rawn harh thut mai. A awmna chu a en kual a, a thim em avang chuan room chhung chu a hmu tha hleithei lo. Chutah mipa rum thawm niawm tak chu a hre leh a, a phu chiang kher mai.



Light dim em em mai hi room lai takah chuan a rawn eng deuh pup a, room chhung pawh chu a lang chiang ve deuh ta. Sentei'n a bul vel a han enkual chu mihring dang an lo awm nual mai a, a mal te te chuan an rawn harh ve liam liam bawk. A u Remruata lo tel ve reng a hmuh chuan Sentei chuan mak a ti kher mai, "Ka u..harh teh..ka u." tiin a ko nghal chiam chiam a.



Remruata pawh chu rawn harhin a kut chu hnung lamah phuar a lo ni tih a hriat chuan a tal nasa kher mai, "Sente, BAwihi..enge awmzia?" tiin a au vak vak a. "Ka hre bik lo, tinge hetah kan awm? Chuan tute nge heng ho hi?" tiin Sentei pawh chuan hlauh hmel tak hian a lo zawt let a. Lawrence-a pawh chu rawn harh in a rawn tho chhuak a, "Sente...enge awmzia? Khawnge ka awm?" a rawn ti chhuak ve vak vak bawk.



Chumi room-a awm te chu Sentei, Remruata, Kima leh Lawrence-a te an ni. Kima pawh chuan a ngaihna a hre lo kher mai, "Sir..enge awmzia? Enge thleng a?" a rawn ti ve chiam chiam bawk a. LAwrence-a lah chuan tap pur hian, "Ka ke..ka ke hi ana lutuk." tiin a ke ruh dam pawh la dam chiang lo chu na tiin a lo vial pui ngawih ngawih bawk.



Chutia an pali a mangang taka an awm lai chuan kawngka a rawn ri rawk a, Hmaikawra leh mipakhat hi an rawn lut a. Hmaikawra chuan a mi man pa, a lu puana a tuam tlat pa chu a rawn tham lut nawk nawk a. Remruata te bulah chuan a rawn paih thlu tawp mai a, chu a mi man pa pawh chu a kut hnunga phuar beh ve tho a ni.



Hmaikawra chuan chupa lu tuamna chu a phelh a, film crew zinga mi, an cameraman pakhat zawk Jonas-a kha a lo ni reng mai. A ngaihna hre lo tak hian Jonas-a chu a hawi kual a, "Tute nge in nih? Enge awmzia? Min chhuah rawh..khawngaihin!" tiin a tap tuau tawh mai a, mahse Hmawikawra erawh a ding ngawi reng thung.



REmruata chuan rum zet hian Hmaikawra chu a melh a, "Enge i duh? Kan lakah hian enge i duh a? Mawhh..sawi rawh." tiin a vin vak vak mai. Chutah muang chang chuan Hmaikawra chuan a hmaikawr chu a phelh a, a hmel dik tak a lo lang ta. REmruata leh Kima chuan an en hu ringawt a, tunge a nih an hre lo.



Mahse Jonas-a, LAwrence-a leh Sentei chuan tunge a nih an hrechiang ngang mai, mak an ti dun lutuk chu an meng bial dun kawk kawk mai. "Tunge i nih?" tiin Remruata chuan a zawt leh a, "Nang maw?" tiin Sentei chuan a en tlawk tlawk mai. "Sente..i hria em ni?" tiin Kima chuan a zawt a.



Lawrence-a phei chuan mak a ti lutuk chu a ka a chip lo hrim hrim, ang phuau chung chuan a en reng mai. Chu Hmaikawra chu tudang nilovin, Lawrence-a thianpa leh a bestfriend, Jerome-a a lo ni reng mai."Je..Jerome?" tiin Lawrence-a chu a phun sap a, "Jerome-a a? Tunge chu chu, hepa hi maw?" tiin Remruata chuan a lo zawt ve bawk a.



Chutah Jerome-a chu a rawn tawng chhuak ta, "Mak i van tih hmel ve, Lawrence? Nangpawh Sente..Jonas, Hmaikawra chu keimah hi alawm, enge mak in tih em em a?" tiin a nui vak vak mai. Thinrim hmel tak hian LAwrence-a chuan, "Engvanga ti nge i nih? Mawhhh...engvang nge?" tiin a vin vak vak a.



"I bialnu thiante kan ni a, kan crew zawng zawng a mal te te in i that vek bawk a..enge i hriat a?" tiin Jonas-a pawh chuan a lo vin ve hlur bawk a. Chutah thinrim hmel em em hian LAwrence-a leh Jonas-a chu Jerome-a chuan a melh a, "A chhan maw? A chhan tur awm ang chu han ngaihtuah ta che u...in hrethiam mai ang chu." tiin a chhang a.



"Keiman ka hre thiam lo, Jerome? Engvanga ti nge i nih ka hrethiam lo." tiin Sentei chuan a rawn zawt ve leh a. MAhse Kima leh Remruata erawh chuan a hrethiam lo kher mai, "Enge thil awmzia? SAwi teh u...engmah ka hrethiam lo." tiin Remruata chu a hawi hu tawh mai a, chutiang bawk chuan Kima pawh a hrihhai kher mai.



Jerome-a chuan thawk a han la te te a, "Ni e , kei hi Hmaikawra chu ka ni, Victor LAlthanmawia anga insiamin...phuba ka la mek a nih hi." tih pah chuan a han vei kual a. "Jerome, i pawi sawi ka nei em ni? Tinge hetia min tih? Ka thianpa amaw ka ti che a, mahse ka keruh i ti tliaka , tunah ti hian min la kidnap zui bawk a, enge i lakah ka tihsual a?" tiin LAwrence-a chuan tap pur hian a zawt a.



Thinrim hmel tak hian Jerome-a chuan LAWrence-a chu ava pan a, "Chu chu keima zawhna tur zawk a ni asin LAwrence, enge i chungah ka tih? Tinge hetia min tih? Tinge min bum? Mawhh?" tiin a vin let hrep mai. "A bum che amaw? Enge awmzia?" Sentei chuan a lo ti ve leh a. "Ni e, min bum chiang alawm." tiin Jerome-a chuan a chhang a.



"Enge ka bumna che?"



LAwrence-a tawng zawh hma hma chuan Jerome-a chuan, "Hey, ngawi hmak rawh. I pawisa duh vangin ka bialnu ngei pawh i lo thlem vel a, he film tlak tlai lo leh mi tenawm hlir telna a tel ve tura titu leh thlemtu kha nang hi i ni lawm ni?" a ti ta siah siah mai. Chutah Jonas-a chu a en leh a, "Nangpawn i hria tiraw...hmangaihna avangin ka a zo tawh a nih hi. Tunah chuan tumah ka chhuah tawh dawn lo che u, ka dahtha vek dawn che u." a ti zawh leh nghal zat a.



"Enge awmzia ka la hrethiam lo, tinge kei hi min man ve..chuan ka u Remruata leh U Kima pawh an tel ve bawk a...enge a chhan?" tiin Sentei chuan a rawn zawt ve leh a. "Sente, thudik engkim hre turin helai hmunah hian ka hruai ve che a ni, engkim ka sawi anga, i hrethiam mai ang." tiin Jerome-a chuan a chhang a.



"He film cast member zinga mi, BAwihi kha ka bialnu a ni a, keimah ngeiin ka that bawk. A chhan chu min bum a, na takin min siam a, min kalsan ta a ni. Ka nu damlo enkawl nan tiin hah takin hna ka thawk a, mahse ka pawisa khawl sa zawng zawng chu a vaiin BAwihi khan min laksak a ni. Min bum a, a mamawh thu min hrilh a. Min rulh leh ngei a tum thu pawh a sawi, mahse keichuan ka hmangaih vangin ka pe vek a, mahse ka nu ka chan phah thung. Kha pawisa ka pek ni atang khan ka hmu leh tawh ngai mang lova, ka call pawhin min chhang duh tawh lo. Thudik ka hriat meuh chuan a nawmchen nan leh a ruka a lo kawp thin, film Director Pu Nunga tana ti lek a lo ni bawk. Chumai ala ni lo, he film crew zawng zawng te zinga mi pakhat tih loh chu he ruahmanna ah hian an tel vek bawk." Jerome-a bawk chuan a han ti leh a.



"Enge maw i sawi awmzia le? He film ah hian cameraman ni turin min sawm a, ka tel ve mai chauh a ni. Eng ruahmanna nge i sawi ka hrelova, an thil plan engmah pawh ka hre ve lo." tiin Jonas-a chu a ang pung pung mai. Jerome-a chu a khi suk a, "Animaw...ni e...crew zinga pakhat chu a tel velo ngei alawm, mahse chu pawh chu bum an tum tho. Chuan, chu pawh chu nangmah i ni chuang lo." tiin a chhang a.



Vin zet hian Jonas-a chuan, "Anih tunge?" a han ti hlur a. Bang kil thim kar atang chuan hmeichhe aw hian, "Keimah mawle." a rawn ti thut mai. An zavai chuan an hawi phei thap a, chu hmeichhia a rawn chhuak chiah chu LAwrence-a, Sentei leh Jonas-a te bawk chu an meng bial leh kawk kawk mai.



Chunu chu film crew zinga mi tho, Miriami a lo ni reng mai a. Jonas-a chuan mak ti tak hian, "Miriam, nangmaw? Kan..kan tlanchhe ho vek amaw tia, hetiang tualthahna rapthlak lutuk ah hian inhnamhnawihna i lo nei ve reng amaw?" tiin a zawt a. Miriami chu a nui sen sen a, "Aw...a chhan chu in thil plan engkim kha ka hre vek." tiin a chhang a.



"Tun thleng pawh hian ila pha ngam a nimaw Jonas? Ni e, pha char char rawh. Mahse thudik chu kan puang dawn tho tho, i inpuan chawp leh vel kha angai lovang." tiin Jerome-a chu a lo nui huah huah a. "Jerome-a nen hian kum 5 chuang college khatah kan kal ho thin a, tiang khawp chuan kan inhre chiang a, kan inkawm ngeih bawk asin. Thudik engkim a hria a, tichuan keimah min hrilh bawk a. Plan kan siam a, tichuan tihian keipawh phuba la tur ringawtin lem ka chang ta a nih hi." tih pah chuan LAwrence-a chu ava melh zeuh va.



"Chuan nang mihring kha, min bum char char thin tih leh hmeichhe dang dang i kawp kual char char thin tih hi ka hriatna a rei tawh. Min hrilh thintu ber chu i thianpa, Jerome-a tho hi a ni. Chuan maw,Sentei hi ka thik reng reng lo. Ka khawngaih takzet zawk, mahse thik angin ka lang mai mai a nih kha. A chhan chu nang mihring hur lutuk leh tenawm lutuk hi i nihna diktak ka hriat atang khan ka ten ngawih ngawih che a, mahse Jerome-a'n hria angin awm suh a tih vang chauhvin lem ka chang char char a ni. Tichuan Sentei i lo mutpui thu kha ka hre leh a, mahse khapawh kha Bawihi Ruatfeli...keima thiannu ngei thil plan vek a ni. Chu chu tangkaiah hmangin then nan ka hmang che a, Ruatfeli pawh khan a bum che a, keimah pawh min bum bawk tihna a ni." a ti leh ta siah siah mai.



"Eng a? Plan lawk sa vek maw? Enge awmzia?" tiin Sentei chuan mak a ti kher mai. "Aw ni e, Ruatfeli khan anihna takah chuan LAwrence-a hi a duh a, mahse a thainnu ber Miriami nen an nih avangin a thik em em a. Chutih lai karin he mihring tenawm leh lepchiah lutuk LAwrence-a lah hian amah duhtu leh hmangaih em em tu, Sentei chu a lo beisei ve chhen bawk a. Chu chu Ruatfeli chuan a hre ru kar a, tichuan khami nui, Sentei nena an chetsual ni khan Ruatfeli hian plan siamin chance a pe ta a ni. Mahse Ruatfeli zawk chuan thla lo la ru in, Miriami bulah a hrilh leh a. Ama ruahmanna vek a ni, tichuan Pu Nunga te, Pu Robert-a te nen an vaiin a hma atang daih tawhin anlo inhre hlawm tawh a, tenawm tak takin an lo che thin tawh bawk. Miriami pawh hi Director ber Pu Nunga hian a beisei a, chuvang chuan Ruatfeli chu hmang tangkaiin Miriami pawh he film ah hian a tel tir a ni." Jerome-a chuan a lo ti ve bawk.



"Dawt vek a ni, chuan Jonas-a hi tunge a nih ka hre ngai lo. Engmah ka hre ve lo, Sentei nena kan chetsual kha chu thil thlegn palh ve mai a ni." tiin LAwrence-a chuan a pha nasa kher mai. Ei loh hmel tak hian Miriami chu a nui lui sak a, "Ni e kan hria alawm, Jonas-a hi i hre ve ngai lo. MAhse khawvel hi a lo zim a nih hi tiraw...hei, mi tenawm leh mi tenawm chu in thil tih sual avangin in inhmu khawm ta chu ania. LAwrence...nang ang mihring tlak tlai lo lutuk hi engtin nge ka lo rin theih che le? Ka taksa pawh i tan ka phal a, mahse ilo duhkhawp ngai lo chu a ni sia." tiin thinrim hmel tak hian a chek tlawk tlawk mai.



"A awmzia chu kan ina paper rawn dahtu leh min rawn tibuai thintu, min kidnaptu pawh nangmah vek tihna em ni, Jerome?" tiin Sentei chuan a lo zawt veleh a. "Ni e, rorelna dik hi tuman kan chang dawn lo. Police pawh hrilh mah ila, mi thiltithei, milian leh mi hausa te chu keini ang chuan kan hneh dawn chuang lo. Chuvang chuan rorelna dik chu mahni ngei hian siam ila, hrem ngaite pawh an phutawk hremna an hmu thei chauh ang. Chuvang chuan Miriami nen hian inthurualin heng thil hi kan ti ta a ni, Sente...hetiang thila ka hnuk lut che hi min hrethiam ang che aw.." tiin JErome-a chuan ngaihdam a dil a.



"Hepa nen hian engtia inhria nge in nih?" thinrim hel tak hian Remruata chuan anau Sentei chu a zawt a. "Mipa ah chuan ka thiantha ber a nia lawm, min venghimtu ber a ni thin." tiin Sentei chuan a chhang a. "A dik alawm, u Remruat. Sentei hi ka thiannu a ni a, Bawihi vanga ka rilru natna pawh ka hrilh thin. Min hnem a, ka mamawh ber lai pawhin ka tan a awm reng thin. Mahse ka unaupa ang maia ka en, ka thiantha berin a taksa a lo chen a, a duh leh tak tak silo tih ka hriat khan ka thinrim lutuk kha min hrilh lai pawh khan nuih luih a har khawp mai. Sentei hian min hriulh lo, mahse LAwrence-a hian intihtheih nan ka bulah a sawi vek a ni." tiin Jerome-a chuan a chhang a.



Jonas-a chu a thinrim hmel kher mai, rum tak hian Miriami leh Jerome-a chu enin a rawn hawi chhuak a. Vin zet hian, "NAngni pahnih kha a ni mi tenawm dik tak chu....khawnge ka thiante kha an awm? Khawnge an awm?" tiin a au vak vak mai. Miriami chu a khi suk a, "An thi vek tawh...e..taka, ka thainnu hmeltha em em mai leh mi bum thiam em em mai Ruatfeli kha chu ala dam tak e." a han ti chiah chu Jonas-a chu a m,eng kawk mai.



"Khawiah nge...khawnge Ruatfeli chu a awm?" tiin a au leh tuar tuar a, bang kil thim lam bawk chu JErome-a chuan a pan a. Bawm lian em em mai hi a rawn nawr phei a, a chhung chu a hawng a. Ruatfeli chu a hmui tuam chung leh a kut phuar behin a lo mu a, dim baksak lo chuan Miriami chuan a samah a kek lawp a.



Ruatfeli chu a rawn harh a, a hlau kher mai. Chutah midang ho chu a han hmu leh a, a hrilhhaiin a mangan hmel kher mai. A hmui tuamna chu Miriami chuan a phelh sak a, "Nilo...enge awmzia? Miriam, tinge hetia min tih? Tinge min man a? Min chhuah rawh..khawngaihin min chhuah rawh." tiin a rak nghal chiam chiam a.



Vin zet hian Miriami chuan, "Bengchheng suh, bum hmangnu....min bumna zawng zawng te kan hrechhuak vek tawh...ngawi reng khan awm hle hle rawh." tih pah chuan midang ho bulah chuan a nam phei a, a kut hnunga phuarbeh chung chuan a bawk thlawp mai. "Miriam...enge awmzia?Engmah tihsual ka nei lo, min chhuah rawh." tiin a rak zui leh chiam chiam a.



Miriami chu a nui a, "Tihsual i nei lo maw? Ava mak awm ve...anih leh i sugar daddy kha tunge a hming kha? Pakhat chauh pawh i neilo, Pu Robert-a leh Pu Nunga kha i sugar daddy an ni tiraw?" tiin hmuhsit hmel tak chuan a nuih tiah tiah mai. Chutah zet zawng mak tiin Ruatfeli chu a ka hau mai, "NGawi hmak tawh ang che, a nih loh chuan i thi hmasa ber ang." tiin Jerome-a chuan a lo vau ve bawk a.



"KA thianpa Jerome-a'n a neihchhun, a nu a chan phah a, a thiantha ber leh a rin ber, Lawrence-a'n a bum bawk a. Hmeichhe thian a neih zinga a mi rin ber, Sentei rilru a lo tihnat sak bawk a, a hmangaih ber Bawihi'n a bum bawk a, bialpa dang, Williama..Hmaikawra role changtu tur kha, a neih san hmak bawk. Chutiang chiah chuan ka lo hmangaih ve em em thin LAwrence-a'n min bum a, ka thaintha ber anga ka ngaih Ruatfeli'n min bum bawk a, mipa dang mutpui turin he film ah hian dawt hmangin min hruailut ve bawk. Ni e, a ruka ka chunga chet in tum dan zawng zawngte kha ka hre pha vek asin, in sawi lai khan." tiin Miriami chu a ang nasa kher mai.



"Hamngaihna, hmangaihna avangin kan na a, kan keh chhia a ni. In thil tih man chu in hmu khawp ang, ka hrilh lawk a che u...in phu tawk hremna chu in hmu dawn khawp." tiin Jerome-a chuan a lo tui hnih ve bawk a. Remruata chuan a kham ta deuh nge ni, "Awle, a tawk e. NAngni hmangaihna thawnthu vangin kei leh ka thainpa leh ka nau te hian enge hetah kan tih ve? Enge awmzia ni ta ang?" a rawn ti vin thak mai.



"Ni e, keini chuan Pu Sawma thihna chungchang daih a ni kan chhui ni. HEng nen hian enge inkungkaihna a neih?" Kima chuan a lo ti ve bawk a. Remruata bawk chuan, "Pu Sawma motor ah khan VICTOR LALTHANMAWIA tih kha a inziak a, chuan a taksa ah #1 tih a inziak bawk. A nih chuan i thah tihna tho ania, enge a chhan?" tiin a han vin deuh thak a.



Mahse Jerome-a chuan a lu thingin, "Ka thah a nilo, kha putar kha ka that lo." a ti ta daih mai. Remruata leh Kima chuan an hriatthiam loh hmel kher mai, Miriami chu an han en leh a, "Ka thah a ni bik lo." a lo ti ve leh a. "Anih chuan tu thah nge? Enge thil engkim hi a buai nuai le? Ka hrethiam lo...nangni pahnih chauh nilo, midang an la tel ve tihna em ni?" tiin Remruata chuan a zawt leh a.



Chutah kawngka a rawn inhawng thuai a, Hmaikawra ang chiah a inchei, pig faced mask vuah tho hi a rawn lut leh ta mai a. Miriami leh Jerome-a chuan nui sang chung chuan an lo en a, midang zawng chuan mak tiin mit khap miah lo hian an thlir thup thung. Hmaikawra pakhat zawk chu a rawn kal phei a, Miriami leh Jerome-a bulah chuan a rawn ding a.



Remruata chu za lo tih hriat tak chuan a nui huk a, "Aww..Hmaikawra dang maw? Engzat chiah nge Hmaikawra awm che u....lo chhuak vek law law ta che u." tiin a vin hlur tawh mai. Chutah chu Hmaikawra thar zawk chuan a hmaikawr chu a hlip a, a hmel diktak a lo lang chiah mai chu Kima leh Remruata chu an meng bial kawk kawk mai.



Mahse Jonas-a, Ruatfeli, Sentei leh Lawrence-a te chuan tunge a nih an hre hauh lo. Mak tih avanga ang phuau chung chuan Remruata chuan, "Pu..Pu Muan, nangmah maw?" a ti hu mai. Kima pawh chuan, "Enge awmzia, Pu Muan?" a lo ti ve bawk a. Chu Hmaikawra pakhzat zawk chu Pu Sawma thianpa, Pu Muana kha a lo ni reng mai.



Pu Muana chuan zawi sap hian, "Ni e, keipawh ka tel ve a ni." a han ti dam diai a. "Mahse, enge awmzia? Pu Sawma kha nangma thah maw? Enge a chhan?" tiin Remruata chuan a zawt a. "HEpa hi tunge a nih a? Enge thil awmzia hi?" tiin LAwrence-a chuan tap tuau chung chuan a lo zawt ve chhen bawk a.



"Sawma kha keima thah a ni, ni e..ka thianpa a ni. Mahse min bum a, ka that ta a ni." Pu Muana chuan a han ti a, "Engvanga that nge i nih?" tiin Remruata chuan a zawt leh a. "Sawma kha ka thiantha ber anga ka ngaih a ni a, mahse ani khan min bum a ni. Nikum hmasa khan Sawma nen hian damdawi tawlh rukah kan inhnamhnawih ve a, mahse vawi hnih bak an tel ve lo. A hnu khan ka hriat loh hlanin Sawma chuan ka nupui leh ka fanu kum 13 mi lek chu kan thiul tih ruk chu chhuanlamah hmangin ka hriat loh hlanin a lo vau thin a. Ka fanu leh ka nupui chuan jail ka tan an hlauh avangin an lo sawi ngam lova. A awmzia chu maw...ka fanu leh ka nupui chu a duh duh hunah ka awmloh hlanin a lo mutpui thin tihna a nih chu. Chutiang chuan kum 2 lai mai hun a lo hmanpui thin a, a tawpah kan nu chuan a tuar thei ngang tawh lova, thudik min hrilh ta a ni." tiin Pu Muana chuan a sawi fiah ta a.



"Chuvang chuan phuba i la amaw? Engvangin nge police i hrilh mai loh...engvangin nge i thah kher?" tiin Remruata chuan a lo zawt a. Chutah vin zet hian, "A chhan chu amah khan min that hmasa a ni, Inspector....ka taksa chu a la dam, mahse ka chhungril chu a thi tawh a ni. Chuvang chuan ka thinrimna hian min thunun tawh a, ka tih tur diktak ka ti a ni." a ti hrep mai. "Mahse...hetia i tih avang khan i nupui leh i fanu te zahawmna kha a lo let leh dawn hleinem." Kima chuan a lo ti ve bawk a.



Pu Muana chu a nui khi suk a, "Sawma pawh jail a tang ringawt anga, a thil tih te kha a sut thei tawh bik hleinem. Chuvang chuan thih kha a phu, thih a phu ngawih ngawih. Chuvang chuan ka that a ni mai, khami ni kha, a thih ni pawh khan a rukin bike-in ka zui char char alawm. Tichuan ka tlan pel a, tunge ka nih erawh a hre lo. Tichuan ka phone a, dawt sawiin Hmaikawra ka hmu angin ka sawi vel a, ka phone nachhan pawh a motor ri ka hriat duh vang leh khawilai nge a lo thlen tawh ka hriat duh vang a ni. Tichuan kawng laiah ka lo ding a, thingkung a sut phah a. Ka that ta a nih kha...hlauh hmel deuhva ka awm te, ka chhungte hmun dangah ka riah tir vek ka tihte kha chu maw, dawt vek, ka phuahchawp vek a nih kha." a han ti leh a.



"Anih leh Jerome-a te nen hian engtin nge in inthurual theih?" tiin REmruata chuan a zawt leh a. "Jerome-a hi ka student ani thin a, zirtirtu ah chuan a ngainat ber ka ni bawk. A rilru hahna engkim min hrilh thin a, tichuan a bialnu in a bum thu min hrilh khan hetiang hian ruahmanna kan siam ta a ni. KAn thiantha ber ber ten min bum a, kan chhung leh kua te kan chan phah bawk a. Tichuan Police ten min man chhuah vat loh nan tiin kum 5 kal ta a tualthattu lar tak, VICTOR LALTHANMAWIA hming chu kan hmang tangkai ta a ni. Plan kan siam a, a mal te te in tihian kan hmelma te lakah phuba chu kan la ta a ni." tiin Pu Muana chuan a chhang a.



"Kan mi thah turte hi kan chhinchhiah thlap thlap a, number pawh kan pe thlap thlap bawk. Film an shoot-na hmun tur nen lam hian kan hre sa vek a, mahse Sentei kan man tel ve a ngaih avangin Hmaikawra chu pakhat chauh nilovin, pahnih ah kan insiam a ngaih phah ta a ni. Williama, Zaia, Bawihi, Pu Robert-a leh VEna te kha keimah thah a ni. A awmzia chu Pu Inspector, i insual pui kha keimah zawk tihna a nih chu." tiin Jerome-a chuan a lo sawi fiah ve bawk a.



"Pu Nunga, Pu Robert-a, Issac-a, Lawma leh Bawihi te kha ka thah an ni ve thung bawk a, chuan Williama ruang an hmuh avanga an buai nuai nuai lai khan film crew ho zawng zawngte kha an phone kha ka laksak vek bawk a ni. Chuan, Jonas-a nena insual kha chu keimah ve thung ania, thah law law kha ka tum a, mahse a tlanchhuak hman khangang a. Jerome-a hian a lo man hman leh hlauh va, chuan Ruatfeli erawh Miriami'n a man thung a ni." tiin Pu Muana chuan a lo sawi zawm velah a.



"Chumai ala ni lo, Robert-a...Assistant Director kha ka thianpa a ni a, Robert-a kha. Sawma leh kei leh Robert-a te hi kan inkawm ngeih thin hle a. MAhse Sawma khan a lo thurual pui a, vawi engemaw zat ka nupui leh ka fanu te chu a lo mutpui ve thin bawk a ni." tiin Pu Muana chuan a lo sawi veleh bawk a.



Jerome-a chu a thaw hak a, "Awle, tunah chuan thudik engkim in hre tawh bawk a. Enge sawi duh te in nei ve em?" thawven hmel tak chuan a han ti a. "Engtin nge keini hi min tih ve dawn a? Mawhh...anih engvanga min thah tuma, khama min namthla nge in nih? Kha kha tu zawk nge, Jerome-a nge Pu Muana?" tiin Remruata chuan a zawt a.



"Aw..ni tak. Nia, kha kha chu Jerome-a a nih kha. Thah ve che a tum a, mahse ka lo dang hman hlauh va. Khatia kan buai nak nak na lamah khan kha khamah khan i tla palh ta a nih kha, ka lo theihnghilh daih alawm mawle." Pu Muana chuan a han ti vel ham ham a. "Min chhuitu ber i ni bawk sia, mahse misual in ni lo tioh chiang takin Pu Muana'n min hrilhfiah avangin ka that ta lo che anih kha, i vannei ngawt mai." Jerome-a chuan a lo la ti zui.



Lungawiloh hmel tak hian LAwrence-a chuan, "Anih chuan keini hi min that bik dawn tihna em ni? Tu nunna mah ka la ve hleinem, nangni hi alawm nunna la tu te chu...eng ang rorelna nge ni ngai? A fair lo lutuk, in thil tih man hi chu in la tel khawp ang." tiin a thinrim kher mai. Jerome-a chuan nui chung hian, "Kan thil tih man chu nakinah kan la tel mai ang, tunah chuan in thil tih man zawk in tel dawn mek a nih hi." tiin a lo chhang a.



"Film siam thin ah chuan nangni crew tluka tenawm hi ka la hre lo, chuvang chuan thil tisualtute chuan hremna an phu reng a ni. Chuan maw LAwrence, i keruh ti tliaktu kha i thianpa Jerome-a hi a nilo, keimah zawk alawm." tiin a beng hawi sawk mai. "A tir khan Jerome-a hian engmah tilo turin min ti a, mahse ka fanu leh ka nupui chunga thil thleng nen ka ngaihtuah zawm a, Sentei chunga i thil tih kha ka thinrim em avangin zirtirna ka pe hmasa phawt che a nih kha." tiin Pu Muana bawk chuan a han ti leh a.



Miriami chuan phone pakhat chu phawrhin a han lek kang a, "Darkar 2 liam ta vel khan he phone atang hian police kan phone tawh a, tunah hian kan location chhuiin min rawn zawng mek. Police Force an lo kal dawn, silai nen...an lo thleng tawh maithei." a han ti a. "Enge..enge in tih dawn?" mangang tak chuan Remruata chuan a han ti a.



Chutah Pu Muana leh Jerome-a chuan an mi mante chu an hmui an tuam sak ta liam liam mai a, Kima, Remruata leh Sentei te chu bang sira an phuarbet a, midang ho zawng erawh a lai takah kawngka lam hawi zawngin an kut chu an khaikang a. Miriami chuan pistol lem pathum hi a rawn phawrh a, super glue a rawn phawrh tel bawk.



An hmui an tuam tlat avang chuan an tawng chhuak thei der mai si lo, Jerome-a te lah chu an duh dan dan chuan an chet chhunzawm miah miah bawk a. Miriami chuan LAwrence-a, Ruatfeli leh Jonasa kut phahah chuan super glue chu a tat a, pistol chu a hum luih tir vek bawk. An kut khaina ah theih chuan hruidang chu thlung bet leh in hrui chu a pawt phei vak a, chung hrui pathumte chu kawngka puiah chuan a suih leh a.



Chutah police motor ri an hre ta, an mi man te ho chu an tal nasa kher mai. MAhse an tawng chhuak thei der mai silo, an tap pur hlawm ringawt mai a. Pu Sawma chu a khi suk a, "An lo thleng e, a tawp a tawpah chuan.." a han ti a. Pocket khnife hriam zet mai hi Miriami chuan a phawrh leh a, Ruatfeli dul chu hlimin #9 tih a ziak a.



Jonas-a dul a hlim leh a, #10 tih a ziak leh a. Tichuan a tawp ber atan LAwrence-a chu a han en vang vang a, a dul chu hlim lehin a melh vang vang a. "Mangtha aw...duhtak dear ex." tih pah chuan #11 tih a ziak ve leh a. Chhuatlaiah chuan lian em em mai hian Pu Muana chuan VICTOR LALTHANMAWIA tih chu meihawl hmangin a han ziak kuau mai a.



Remruata te awmna lam chu ava en a, "Lungngai suh u, engtin mah in awm ve dawn lo. Chuan min rawn zawn tum hlek suh ang che u, anih loh chuan a pawi zawk ang." a han ti leh a. Chutah kawngka chu a rawn in chum ta dawt dawt mai, "Police kan ni a, hualbeh vek i ni tawh. Lo chhuak rawh, anih loh chuan kan kap ang che. Kawngka hi kan ti chhe dawn ania, rawn inpe mai rawh." an rawn ti ta lauh lauh mai.



Jerome-a chuan ring tak hian, "Lo lut suh u, anih loh chuan heng mite hi ka that vek ang." a han ti vak vak a. Miriami chuan, "Khawngaihin min that suh...min pui hram rawh u." a han ti vel a. LAwrence-a te chuan tal chhuah an tum nasa kher mai, an kutah lah pistol a tang far hlawm bawk nen.



Pu Muana chuan bang sir lam chu panin chhuat chu a hawng a, inhnuai lam panna a lo awm reng chu niin. "He in hi chu VICTOR-a thihna kha a ni bawk a, kan sak chhung a rei loh nen, kan va design fuh ve tiraw?"tiin Jerome-a chu a han nuih sak a. Tichuan an pathum chuan inhnuai lamah chuan chhukin an khar leh ta daih mai a, Police ho lah chuan warning an rawn pe sek tawh mai.



Chutiang bawkin Remruata te pawh an mangang tho, mahse an talchhuak thei bawk silo, an tawngchhuak thei bawk silo. A tawp a tawpah chuan Police ho chuan kawngka chu an ti chhe ta, chuveleh hrui chu a inpawt vak a, LAwrence-a, Ruatefeli leh Jonas-a te kut chu Police te hma zawn takah chuan a awm ta.



Pistol an keng vek bawk si nen, Police te chuan tualthattu an nih an ring nghal mai a. Force rual chuan chung mi pathum, Jonas-a, LAwrence-a leh Ruatfeli te chu an kah rawn ta chiam mai a, an thi chiang hle bawk. Chutih lai chuan Pu Muana, Jerome-a leh Miriami te chu ramhnuai lamah an lo awm daih tawh thung.



Silai kap ri pawh chu an hre reng a, mahse an ding ngawi reng hlawm a. Miriami chuan Pu Muana chu a en a, "Kan hna kan zo tawh bawk a, enge a dawt leh ni dawn?" a han ti a. "Ni e, Pu Muan. Engtin nge kan awm zel dawn?" tiin a lo zawt ve bawk a. Pu Muana chu a nui sak a, "Hun in ala hril ang chu." tiin a kal a, Miriami leh Jerome-a chuan an zui ve bawk a.



**********************



THE END