THE EXORCISM OF ISABELLA : Darkness Lives Inside.

[chester]

THE EXORCISM OF ISABELLA : Darkness Lives Inside..
By Chester Ralte

.( TRAILER)..

Lincoln Road,Bellerose, Hempstead, NEW YORK- veng tawp lam a chhungkaw pakhat, Mr.David Walker-a leh Mrs. Lucy Smith Walker- i te fanu tleirawl Isabella-i chunga thil thleng rapthlak tak..

Itsikna a vanga Setanist rual ho in a tleirawl khawngaihthlak Isabella- an nghaisak dan leh an thunun dan.

Methodist- Pastor meuh pawh ina a kawchhunga ramhuai a hnawhchhuah theih loh chu eng ramhnuai nge?

Detective David Walker- an a fanu chhan nan Setanism a luhchilh phah hial lehnghal.

Itsik na nge chhungkaw inrelbawk dikloh vang zawk in thim thiltihtheihna in chenchilh.

Bellerose Detective rual pawh in tihngaihna an hriat loh leh kohhran rawngbawltu Pastor te meuh pawh ina an beidawn san khawp a thim thiltihtheihna chu enge ni chiah le?

Dawi rapthlak tak tak leh inthawina rapthlak tak tak te, Setanism sakhua hi enge anih chiah tih te leh Kristian sakhaw ropui zia te zeh tel ani a. In hruaisualna na zirtirna diklo a i ngai anih chuan chhiar lo mai ang che.

Mahse heng a bu chhunga dawi leh inthawina te, dawi hla te bak ah, chhinchhiahna hrang hrangte hi lo ti ve chhin suh ang che, a tak tak leh vek anih avangin, i tihsual hlek chuan ramhuai tihbuaina leh chenchilhna in i nun mai nilo i thlarau thlengin a chawk buai ang che..


GENRE : Horror, Supernatural, Thriller, Mystery, Dark Fantasy.

BIBLIOGRAPHY :

Magic Voodoo Spells by
Douglas Hensley.

Exorcism: A Christian Manual- Definitive Guidebook to Performing Effective Exorcisms by Dr.Carson Michael.

Manual of Minor Exorcisms by Bishop Julian Porteous.

An Exorcist's Field Guide: to Blessings, Consecrations and the Banishment of Malevolant Entities
by Pastor Swope.

Exploring the Occult by Douglas Huth.

Telepathic Impressions by Ian Stevenson.

Sense and Nonsense in Psychology by HJ Eysenck.

.(CHAPTER 1).

Ni tlak na pawh darkar khat emaw vel lai ani tawh ang, thlasik lai anih avangin khua chu a thim hma in boruak pawh a vawt chak hle a, pawnlam ah chuan vur a sur nasa in kawtthler vel ah pawh mi veivak hmuh tur an awm meuh lo.

Chutiang ang tlai tawh a a pasal alo la haw loh avang chuan Pi Lucy-i chu a mangang hle a, an zanriah kil pawh chu a ei tui loh hmel in a beng chu a tun hra reng a.

A fanu tleirawl hmeltha tak tak te pahnih Isabella leh Michelle-i te erawh chuan an pa lo haw har pawh chu an ngaihtuah vak loh hmel hle a, an school chanchin te sawiin hlim deuh hian zanriah chu an ei melh melh a.

Chutihlai chuan an zanriah eina pindan kil khat a telephone hlui tawh tak chu alo ri ral ral a.

Chuveleh Pi Lucy-i chu rang tak a tho vat in, telephone awmna lam ah chuan a phei nghal a.

Hlauhthawn hmel ang reng tak hian,
" Hello " an ti a. Chutah mipa aw nalh tak hian phone atang chuan,
" duhtak, Dave, ka ni e," alo ti let a.

Ngaihthatloh hmel deuh hian Pi Lucy-i chuan,
" Dave, engti zia nge? Tawhsual i tawk chu ani em lo maw? Khawiah nge i awm? Tinge chanchin minlo hrilh vat loh?" ati chul a.

Chu a tawng ri an hriat chuan a fanu pahnih te chuan an thusawi lai chu tawp in, an nu phone dawm lai chu hrilhhai hmel tak hian an en haw a.

Chutah Mipa aw chuan,
" kan veng tawntirh ah khan vur in kawng zawng zawng a hnawh phui vek a, vur a sur nasat avangin vur paih tu motor a rawn kal mai thei lo va, hei tunah chuan kawng atlang tep tawh e, ka rawn thleng har tawh lovang," a ti a.

(vur paihtu motor hi kan hrethiam chiah lo maithei a, vur tla ina kawngpui vel a hnawh khah vek hian JCB ang deuh hian chung kawngpui hnawh tu vur te chu nawr sawn in a paih thin. CR)

Chutah Pi Lucy vek chuan,
" Nizan a Radio a an thupuan te kha i theihnghilh leh tawh em ni? I theihnghilh ka hlau va, chuvangin i kal hnu pawn ka rawn hrilh leh che anih kha," a ti a.

" Ni e, ka lo mangnghilh palh alawm le, Office thil ah kan buai lutuk a, engpawh nise ka lo thleng vat ang, rilru nuam takin lo awm rawh, ka hmangaih che," tiin chu mipa aw chuan alo chhanga, chutah phone chu a dah hlum ta nghal daih a.

Phone chu dah ta mai lo chuan eng emaw chen chu Pi Lucy chuan ala hum reng a, chutah zawi sap hian,
" keipawn ka hmangaih che, Dave," ati sep a, zanriah kil tur chuan muang fahran hian a phei zui lehnghal a.

A fanu te hrilhhai hmel a hmuh chuan a nuih sak a, chutah,
" in pa chu alo thleng tep tawh ang, vur tla in kawngpui a hnawh a, an thianfai mek e," a ti a.

A fanu upa zawk Michelle-i chuan,
" ka nu, zanin ah vur leh thlipui a tleh dawn ani lawm ni, ka pa chu ka va ngaihtuah em," a ti a.

Pi Lucy chuan Glass no tung lian tak a bawnghnute chu tlem an in zauh a, chutah,
" Ni e, mahse zanrei lam ah ani maithei, ngaihtuahawm anilo vang ipa chu, alo thleng tep tawh ang," a ti a.

Phur fahran lo hian chu zanriah chu an ei tlingtla ta hram a, chutah Michelle-i chuan a nu chu puiin an zanriah eina hnawk chu a tih fai pui leh zung zung a.

A naupang zawk Isabella-i erawh thutkhawmna pindan lamah pheiin TV a en zui nghal daih a.

An in tihfel zawh hnu chuan Pi Lucy chuan,
" in room lamah han chho tawh rawh u, lehkha zir te pawh in ngaih kha, Bella, nang phei chu kartawp ah Test in neih dawn kha, vawiin ah in zirtirtu nu Miss Kate-in min rawn phone lehnghal ania," a ti a.

" ka enlawk vek tawh alawm, Test tur zawng zawng ka thiam vek tawh," pangchang ang reng tak hian Bella-i chuan a ti a, chutah a thutna atang chuan a tho vut a, pangchang deuh leh nghet deuh hian a nu chu a kuah a,

a nu chuan a hnung ah an beng a, nui deuh kur kur chung hian,
" in lamah hian pangchang viau lo mai teh o, in school a i nun dan ka hre vek ania, tunge Chester-a hi?" a ti a.

Chu veleh an pian lawk a a u Michelle-i ding chu rum deuh hian an melh zui nghal a.

Michelle-i chuan nuih ralh ralh pah hian,
" ka hrilh lo, eng mah ka nu hnenah ka sawi lo ania o," a lo ti zui nghal vat a.

A nu pawh chuan nuihzat hmel deuh hian,
" i u in min hrilh ani lo ania, a hming chauh alawm ka hriat,
tunge Chester chu ni reng reng a," a lo ti vel leh bawk a.

Chutah Bella-i chuan,
"ka hre lo, ka hre lo, tumah pawh an ni lo," a ti vin tak a.

Chutah a u lamah chuan tlan pheiin, an in um kual hrep a.
Pi Lucy lah chu alo nui tlawr tlawr lehnghal.
Isabella-i chuan a u chu sofa ah chuan a thut bet run a.

Chutah an nu in a,
" duhtawk ru, in room lamah chho ula, in mu vat dawn nia, thlipui a tleh dawn kha, in pa erawh ka lo nghak ange," a tih chuan thuawih tak hian la in chhaih hawr hawr chung in inchung room lamah chuan an in zui chho ta a.

Chutia a fa te an room lama an kal hnu chuan sofa chungah chuan zawi deuh hian a thu hnawk a, a thutna sir a Oak thing atanga siam dawhkan te reuhte, mawi tak chung a Radio te reuhte chu muangchanga ban in an herh nung zui nghal a.

Radio chuan Hempstead khaw mipui te chu chumi zan chuan fimkhur turin leh chhuak vak lo turin a chah nasa khawp mai, chumai bakah an State thenawm lawk Connecticut leh Pennsylvania State ah pawh thlipui nasa tak a tleh mek tih anlo puang ve dum dum bawk a.

Pi Lucy chuan a hlauhthawn hmel ngei mai, chutiang chhiatna leh buaina chanchin an puang dum dum lai a an khaw mipui te thlamuanna leh fimkhur tur a chahna thu an khaw rorel tu Mayor Henry J.Schreiber-an a lo puan ve te pawh chu hria awm pawh in alang lo.

Banga sana lian inkhai chu che changlo hian reife a melh ngur ngur a, chutah muang fahrana tho vin chaw eikhawmna pindan (choka) lamah chuan a phei hnu hnu a.

Coffee tih lumna khawl ti nung in, abulah chuan nghah pah in a ding a, chutih lai mek chuan doorbell a rawn ri thut a, a phu nasa ngei mai, hmanhmawh deuh in kawngka lamah chuan a tlan phei vat a.

Kawngkhar an hawn chuan an pa chu alo ding reng tawh a, a in thuam lum viau na in vawt a tih hmel tho mai, an nu hlauthawng hmel a hmuh chuan anui var var a, chutah rang fahran hian inchhungah lut in kawngka chu a khar zui nghal a.

" duhtak, i va hlauhthawn hmel ve, thil diklo a awm em ni? Nge lungawilohna inei zawk? I thusawi kha ka lo mang nghilh daih a, min ngaidam dawn nia?" tiin thupha an chawi nghal zung zung a, riltam hmel tih hriat tak hian zanriah eina dawhkan bula chair ah chuan thuthmun an rem leh nghal sawt sawt a.

" engmah nilo ve, Radio a an thupun khan minti hlauthawng deuh a, nang lah i rawn thleng thei bawk silo." a Coffee tihlum chu plastic no tung sei tak a thlit chhuah pah hian an nu chuan a ti a.

" duhtak, ngaihdam ka dil tawh che kha, dawhkan chung ah lawnin beng ka pawt mai dawn em ni?" nuih rulh rulh pah chuan Dave-a chuan an ti a.

" fiamthu na hun pawh anih loh hi," titau deuh roh hian Pi Lucy-i chuan an ti vin deuh tak a.

An pa zanriah tur buatsaih sak a chhangthawp zai lep a butter a tah mek lai chuan Dave chu a thutna atang chuan rawn thovin hnunglam atang chuan an nu chu nghet deuh mai hian a rawn kuah a.

"duhlai, thinrim tawh lo teh, vawiin nilengin ka rilru ah i awm char char ania," an nu bengbul ah chuan zawi fahran hian an ti ser ser a. Chutah an nu nghawng ah chuan dim fahran hian a fawp zui lehnghal a.
" Dave, a hun loh em hi o, khatin ka lung iti awi chuang lo ang," an nu chuan a ti a.
Dave-a bawk chuan,
" i lung te chu a awi sa reng ani lawm ni, vawiin a office a ka awmlaiin thil hriatchhuah ka nei a.." a ti a.

" eng chu maw "

an nu chu alam hawiin an kuaiher a, chutah a kawnga kuah a, alam a pawh hnai pah hian,
" e le.. Kum sawmhnih lai kan inneih hnu pawh hian ka la hmangaih reng che a, kan in neihtirh lai a ka hmangaihna che ang tho khan vawiin ah pawh, tunah pawh hian ka la hmangaih reng che tih hi maw le," an ti a.

Chutah an nu hmui vam har mai chu dim te hian an fawh sak zui nghal a.
Pi Lucy pawh chuan alo dawh mai mai bik lo, a pasal hmangaih tak ngawngah chuan lo kuah let ve in a fawhna chu thiam tak in a lo chhang let a, chu zan khawvawt tak a an choka zau vak lo ah chuan an in hmangaih na chu hlim tak in an chen dun a.

" Dave " an pa a kuahna chu thlah in an pa chu an ko nawn leh a.

A nu hawina lam chu hawi ve in, muang fahran hian a hnunglam chu an hawi let a.

Chutah an fanu naupang zawk Isabella- chu inchung panna kailawn tawp ah chuan a mutkawr fual var ha chung hian che changlo hian lo ding reng a, tlem in dinglam ah chuan a lu chu a thle deuh a.

" Bella- engti zia nge, i va mu har ve a, thlipui a tleh dawn kha," Dave-a chuan an ti a.

Mahse Bella-i chuan a chhang lo, a pa biakna chu hria awm pawh in alang lo, a melh ngai chu a melh ngawr ngawr a, a mit pawh a khap lo reng reng anih chu(!)

" Bella, lokal teh, vawiin ah minlo ngai em?" an ti leh a. Mahse chu pawh chu ala chhang chuanglo.
Milim ang maiin a dinna ngai ah chuan che lo hian a ding reng a.

Chutah an nu lam chu hawiin, zawi deuh hian
" a nuamsam lo em ni? nge vawiin lamah te thil tawn anei em ni zawk?" an ti leh a.

Chutah an nu chuan,
" tunlai chu Bella-i khawsak dan hi amak riau mai," a ti a. Bella-i lam pah chuan a phei ta nghal vat a.

Chutah Bella-i chu an kuah a,
" natna i nei em ni, nge thlipui tleh tur kha i mangphan zawk, i u a mu tawh em?" an ti a.

Mahse anu pawh chu a chhang chuang lo reng reng.

An pa chu Pi Lucy-i chuan an melh zauh a, an pa lah chu a dinna ngaiah chuan lo la ding rengin a ngaihna hriatloh hmel deuh hian a dar alo ti sang deuh uk a.

" ka han mut tir lawk ange," tiin Bella-i chu a kaihkuah a, inchunglam chhohna kailawn ah chuan an in kuah chho zui ta nghal a.
Inchung lam atanga Pi Lucy alo chhuk leh lai chuan Dave-a chuan ngawi reng hian newspaper hi lo bih in, coffee no chu a kut lehlam hian alo dawm bawk a.

" i han mut tir thei maw? Enge a an a, a damsam lo em ni?" tiin hawi chhuak chuanglo chuan Pi Lucy-i chu an bia a.

Hmanhmawh taka an pa zanriah tur chhawp pah chuan,
" a nawmloh awm pawh ka hre lo, mahse tunlai chu Bella-i mizia hi a dang riau mai," tiin a chhang a.

An pa zanriah a buatsaih sak zawh chuan a bul a chair ah chuan a thu ve nghal a.

" hei kar khat lai chu ani tawh, ka hriatchian loh avangin ka la hrilh duh lo che a, a remchan veleh Bella-i hi damdawiin a hruai ka duh ani, hman lang chuan kan pahnih hian hruai thei ila ka duh khawp mai," tiin Pi Lucy-i chuan an sawi zawm leh a.

An nu in a a eitur siam tui ti tak a ei pah chuan,
" damdawiin a? Han sawi chiang deuh teh?" a ti a.

Pi Lucy-i bawk chuan,
" zan a kan mut hnu te hian Bella-i hi kan room kawngkhar bulah te hian alo ding ngawi leh reng mai thin a, a room a ka luh chang pawh hian khum ah hian a melh ngai reng melh hian a lo thu leh vung thin," tiin a sawi zawm leh a.

An pa chuan,
" an school lam ah eng emaw harsatna a tawk te ani zawk lo maw, a zirlai ah te pawh, an zirtirtu te i be tawh em?" tiin ngaih thutak lo hmel deuh hian a sawi a.

" zawt tawh e, mahse chutiang lam anih ka ring vak lo, a rilruk lam hi anih ka ring deuh zawk," Pi Lucy-i chuan a ti leh a.

" engpawh ni se an school chawlh veleh va hruai la, kar tawp ah pawh," Dave-a chuan a ti satliah leh mai a.

Chutah thudang sawi zawm leh daih in,
" vawiin chu kan buai nileng ani mai, Eric-a nen ruk ru pakhat kan buaipui nileng ani ringawt alawm le," a ti a.

" in man thei em,"

" man hram e, silai alo kawl ve khanglang lehnghal a, tlem a tlem ah vanduaina kan tawk lo chauh alawm le," a ti a.

Chutah Pi Lucy-i chuan an pa zanriah eina nawi chu a ti fel swk sawk a.

Chutia tihfel pah chuan,
" a hrim hrim in sakhaw lamah hian kan rilru hi kan pe lo lutuk a, nang lah i hna hi i atchilh bur mai bawk si, karleh atang khian Baldwin- ah Dr.Billy Graham-a ho ten crusade an nei dawn a, kan veng atangin a hla lo bawk a, kan chhungkua hian va chhim ve ila ka ti deuh asin, vawiin ah Pi Jones-i khan min lo bia a, anni pawh an chhungkua in an kal dawn ani awm e, an pa pawh in chawlh ala ati bawk a," mei nei fahran hian an ti a.

Dave-a chuan,
" kan la ngaihtuah ang chu, a hunte lo thleng phawt se, a hrim hrim in Pi Jones-i pasalte ang in duh hun hunah chawlh ka la ve thei hleinem," tiin a chhang a. Chutah an nu chu hnunglam atanga a kuah in, a nghawngah chuan an fawp zauh a.
" ka lo va intifai ange, " a ti a.

A bag lianpui leh jacket pawm chung chuan an mutna pindan lamah chuan a phei zui ta nghal a.

Zai rut rut chunga in dahfel mawlh mawlh in a in thlak nghal mawlh mawlh a, chutah towel ala a, bathroom ah a lut zui lehnghal a.

Pi Lucy-i pawh chuan an thil atih fel zawh hnu chuan light te a off a, mu tur in an room lam a pan zui ve a.
Dave-a intifai zo rawn chhuak pawh chuan engmah ti tawh lovin khum lam chu a rawn pan ve nghal a. Tichuan inkuah rial in chu zan hun chu an hmang dun ta a.
Zan rei a vur leh thlipui thawk chiam pawh chu an hre zui tawh lo, Dave-a phei chu a hna lama a buai theih em avangin a chau chu mutui thei hle a.

Dave-a hi a hmingpum chu David Walker- ani a, an nu nen hian Charlottesville, Virginia- chhuak ve ve niin Virginia University-a an luh lai atanga inchhar an ni a, kumhnih vel an in zui hnu in an in nei zui ta nghal a.
Dave-a hian hna zawng nghal in, a pa thian hlui puihna in VPD( virginia police department. CR) ah a in tat lut ve a, Pi Lucy-i pawh in an veng charlottesville-a Elementary school pakhat ah zirtirtu hna a hmu ve bawk a.

Tichuan an fanu upa zawk Michelle Walker-i lo pian hnu lawk hian a hnathawhna chu transfer avangin New York lamah pem in Bellerose, Hempstead- ah awmhmun an bengbel zui leh ta ani a.

Tichuan a hna pawh chu chhunzawm leh in, An nu erawh chu an fanu enkawlin inlamah a awm ta chawt a, chutah reilo te ah fanu bawk nei leh in, a hmingah an veng Bellerose- hming chawiin Isabelle Walker- an sa a.

An fate pawh anlo lian ve zel a, tichuan tunah hian tleirawl, puitling chu anlo ni ve ta mai a, an veng thenawm lawk a Floral Park School ah an unau hian an lut mek ani.
Tin, Pu David Walker-a te chhung hi Methodist- kohhran an ni a, Pu David-a hi a pi leh pu te atangin Methodist- kohhran an ni sa hrim hrim a, an nu Pi Lucy-i erawh American Presbyterian Church-a lawi thin ani a, mahse an pa te kohhran hi an awmna lai ah hian an tam a, chuvangin Methodist ah hian an lawi ve mai a, mahse kohhran chu an bel vak em em hran lo khawp mai.

(end chapter 1)

[Joshuachozah]

Engtikah nge i chhunzawm dawn le??

[Sangbawiha]

Rawn chhunzawm leh vat teh..

[Bob vl ralte]

Thil hi pui hmel deuhvin kan ti ve hluah a, nghakhlel em2 in kan chhiar a, chapter 1 bak phuah tur hi a awm hlawl lo em ni? Hetiang tingtang tur chuan post loh law2 mai awm ka lo ti ve a nih chu.. a rei tawh hle bawk si a!!!

[Zoda Hmar]

Tih ve ting tang loh mai awm.. tin post loh law law ah ava tha ve