SÛAKI THLAHRÂNG KAN ÛM! Ziaktu: Chhantea Pautu

[Chhantea Pautu]

SÛAKI THLAHRÂNG KAN ÛM!
Chhantea Pautu, Paradise Logde
©
Pa Mawia'n luikalnaah min hruai duh tawh lo tih in hre ve reng a, "Rul a niang!" in ti lui tlat a! Keite kan hmuh ve lah, "Rul a niang!" min tihsak zel a! U Taia til tihpalh tih tak meuh meuha ka man palh lahin, "Rul a niang!" in ti tlat a! "A pâwi viau ang!" ka tih lahin ka bialnu pa kha, "Rul a niang!" inti lui zel a! U Taia tiltè(a tét leh tét loh phei chu ka hre tak tak lo!) a lai taka chhun pheltu rawtûai lah, "Rul a niang!" in la tilui char char duh a nia! Ka inringhlel zo vek tawh; hei pawh hi rul a niang!

Thianpa Thuama kaihnawih thil hi a ngaihnawmna leh a hlimawmna lam ai mahin, mak danglam a nihna hi ka thianpa 'tithianpa' em emtu a ni!

MIPA RÂWLTHAR NUN!
- - - Zânah kan lêng a, kan ti ti khawm lêt lêt a, kan nui leh huk thin. Mipa rawlthar reng reng chuan Êk-Ina 'nupa nun' hmante hi an hrât em em thin...an ti! Thuama pawh hian a sawi ngun khawp mai, "Kut ka neih chhung chu sex lamah na na chuan ka mal bîk lovang!" a ti a, eng a sawina nge phei chu ka hre ve tak tak lo; nangni...in hria em!?

THLAHRÂNG CHU!
- - - Kan In piah lawka awm, vêngthar leh satlavêng inrina thelrétkawr kha a thim thei hle a, ka zân lêng hàw pawh hi chu lai zawn ka thlen chuan ka tlân phei fua fua zel! Chutih lai chuan hmeichhia leh naupang chuan thelrétkawra Sûaki thlahrâng awm thu an sawi sep sep a, a hrechîang deuhte sawi dàn chuan, 'thlarùm' an sawi ang hian a rùm thin a ni awm e; mahse, tlangval leh patling ho chuan an hre ve lem lova!

Vawikhat chu Lungdawhkawna lungdawh bula awmtûalmei chhêma kan aikhawm lêt lêt laiin kan kawm ve thin pakhat Rozîka hian, "Tun lawk khan thelrétkawrah Sûaki thlahrângin mi a rùm khum leh tawh!" a rawn ti a, a hmêl chu a tuitla ruang hmêl lap mai a, a hlau viau a niang. A rûk tak chuan kei paw'n ka hlau em em a, curent a awm bawk si lo, ka hàwna lam a ni dawn si; ka thiante chu min thlah turin ka tur ta sek sek a! Hemi zân hian a intihûai ber Remruata chu kan zîngah a rawn lang ve lo tlat lehnghal a.

ÛM ANG!
- - - Kan kal phei ta tham tham a, panga lai kan ni. Thelrétkawr kan thleng têp tawh a, Thuama chuan, "Ka r'u...thlahrâng chu ûm ang u!" a rawn tichhûak phut a. Kei chuan, "A chi dawn mi; kan hmuthei awm si lo...!?" ka lo ti a; mahse midang chu an lo phur ta viau mai si...

Sûaki thlahrâng rùm thinna chu thelrétkawr sir kawngchhak lam, Pu Mana huana khiang buk vel niin an sawi a; kan thleng phei chu Thuama'n lung lian takin khiangbuk chu, "Khi lai khi maw thlahrâng awmna chu?" tiin a han deng dawp mai a...! Heiraw...thawm a ri phut a, thlahrâng ngei mai chu kawngchhak atang chuan a rawn tlânthla(tlathla) ta nawlh mai, kan phu zuk vek a; Sûaki thlahrâng chu mipa a ni! Thlahrâng chu rang zet hian a tho a, a tlân ta nal nal a. Mak hi ka ti em em mai a, ka phutzuk bâkah engmah tih nachang hre lovin kan ding ho hlawm a! Chutia rin loh tak maia kawngchhak atanga thlahrâng rawn tlathlaa hmuhtheiha a rawn inlar chu kan tawn ngai loh thil a ni! A thlahrânga ber lah a tlân nal nal mai si!

Thuama chu harhchhuak hmasaah a tang a, "Hawh u, ûm ang ule, thlahrâng a tlânchhia a nia..." tih pahin thlahrâng tlânna lamah chuan a tlân ve ta nghal a, ûmzui ve loh theih ni tawh hek lo, kan ûm ta a ni; kei chuan lung lian vak lo ka chhar nghal a.

Kan han ûm ta tak tak mai a, chu thlahrâng chu a tlân chak ngei mai, a tlân zel a, Pu Thanfala kawt awihthlaah a inpaltlu a, Thuama chuan, "Saw...thlahrâng a tlu..." a ti a, a phur ta em em mai a; ni, thlahrâng ngei mai chu a inpal tlân bawkvâk thla nawk nawk a! Kan ûm zel a, reserve ngawah kan ûm lût a, a thim si, a hmêl kan hmu thei lova, a thawm erawh kan hre thei. A nakinah chuan kan hlauh ta tlat mai, thim karah chuan thlahrâng chu kan zawng ta zak zak a! Thangmawia'n, "Helai pik karah hian a awm, a hah a niang, a thaw ri hrûk hrûk mai!" a han ti a; thlahrâng hah thaw ri hrûk hrûk ka vawikhat hriatna!

Kei chuan ka lung ken chuan hnim pik chu ka han vawm risk a, chu veleh hnimpik karah chuan a 'awiah' thawt ta mai...Thuama'n, "Aaah...'awiah' a ti...thlahrângin na a hria...ka r'u man ang u..." a ti ta mai...chu veleh hnimpik kar chu a ri buan buan a, thlanglamah a rithla buan buan a, keini'n kan ûmthla buan buan bawk; kan thlahrang ûm chu kan râk teng tung mai a; mahse kan man hman ta ngang lo! Sûaki thlahrâng chu tlân chak tak a lo ni a; Remruata ang chiahin!

A tûka sikul kan han kal chu Remruata'n a lu a rawn tuam bur a; mak ka va ti tak! A nat hmel si! Kan thlahrâng ûm thu kan sawi chu ngawi reng hian a lo ngaithla kar a!

CUBIC DESIGNER!
- - - Vawikhat chu Remruata hian Aizawlah nuthlawi bialnu a nei a, Phone-in an inbe uluk thei khawp mai a, a hnua Aizawla an han inhmu chu nuam hi a tikhawp a, kha nutè kha a lo hmeltha fêt reuh a, an ti ti pawh a inrual viau a niang; a bialnu chuan, "Eng hna nge i thawh?" a ti a, Remruata chuan, "Cubic Designer!" a han ti a, englam hna nge a han zawh leh lah chuan a sawi tha duh tawh der lo! A nihna takah chuan Lung Mistiri Helper-ah a tang thin!