TWIN SISTERS by Aaron Malsawmdawngzuala (Completed)

Hlauhawm lampang hrim hrim hmun hrang hrang a mi lakkhawm...
Aaron Dustin
Posts: 214
Joined: March 14th, 2018, 10:15 am

TWIN SISTERS by Aaron Malsawmdawngzuala (Completed)

Unread post by Aaron Dustin » April 13th, 2018, 8:41 am

TWIN SISTERS

Translated into Mizo Version by : Aaron Malsawmdawngzuala

Based on : ALONE (2007 Thai Movie)

Ruah chu sur lo mahse, kawl a phe zuai zuai a, thli a thaw nasa hle bawk. Khawpui a ri rum rum a, ruah a hmi seng seng bawk a, avawt hle ni tur ani..pi Siami pawh chu amuhil tha theilo, khumah chuan a inlet a inlet a, inchung lama a fanu room ah chuan a han chho a, afanu chu amuhil thei nge theilo tiin a han enfiah a, tui takin alo muhil a, anui suk a..a chhuk leh a. Inhnuaia aroom lam apan dawn chiah tih ah chuan kawngkhar kik thawm a hre ta tlat mai. Atir chuan a hawn mai duhlo a, mahse vawi 3 lai a rawn kik hnuah chuan hawn tumin ava phei a, "Tun ang hunah tunge maw lo leng dawn le...dar 11 a pel tawh a, ava hunlo tak..." ati phei nuah nuah a. Kawngka chu ava hawng a, mahse tumah anlo awm lo...thli a thaw nasa si, avawt si, mak ti em em hian kawngkhar chu a khar leh mai a. Mu tura aphei leh tur chiah chu a rawn in kik leh a, a lungawi lo tawh hle mai. "Tlangval awmtha duhlo ho an ni ngei ngei ang, an zurui hi tihian mi chhungkua an tibuai a, zanrei tak tak ah.." a ti khur khur a, thinrim tak chungin kawngka a va hawng leh a, ahma ang bawkin tumah anlo awm lo. Pawnah chuan a chhuak a, ahawi kual vel a, kawl lah chu a phe zuai zuai a. "Lo kik leh pawh nise ka hawng tawh lovang." ti rilru chungin inchhunga alut leh tur chiah chu hmeichhe tap thawm ni awm tak hi a hre tlat mai. A ding chat a, ahawi leta, an in atanga hla vaklo ah chuan hmeichhe pakhat, amah hnungchhawn zawnga lo ding hi a hmu a, a tap ani tih hriat tak hian a lo ding kun lap a, a kutin a hmai a hup bawk a. Pi Siami chuan mak a ti hle mai, chutia zanrei tawh a hmeichhia lehnghal, mahni a lo awm chu, atap lehnghal a, a hlau lek lek zawk. Muangchang hian ava pan hnai a, "Mami, enge awmzia? I tha maw?" ava ti a, chunu chuan a chhanglo, a tap ring tual tual lehnghal. Ava pan hnai zel a, adarah a va vuan a, alo vawt vek mai a. Chunu chu muangchangin a lo hawi a, Pi Siami chuan chunu hmel ahmu chiah chu a meng phawk chiang hle mai, a phu nasa tih hriat tak hian a tawlh hnung dawrh a...chu hmeichhe nu chu chutia hmel thlahrang leh hlauhawm ani hauhlo, hlauhawm chu sawiloh, nula hmeltha tak ani lehnghal...chunu chuan rum em em in Pi Siami chu a melh a, chutah chiang tak leh fiah tak hian, thinrim aw leh tah aw tuau hian, "Ka nu, min bum amaw, ka unaunu nen khan ka chunga khatiang thil in tih tawh hnuah pawh duhtawk lovin min bum leh amaw, ani kha ka hmangaih asin, ka ta...ka pasal hual anih kha...tinge ka pasal hual kha midang i pek? Min hmangaihlo a mi ka nu???" a rawn ti ta mai a, Pi Siami hlau lutuk chu a meng phar awn awn a, a tawng hleithei lo, engemawni in a hrawkah a hnawh ang mai hian a ang phuau phuau a..nikhawhrelovin a let ta tawp a. Chuveleh hmeichhia chu a kalsan a, a kalsan rual rual chuan thli tleh leh kawl phe te chu a reh nghal vek a. Chu aia thilmak pakhat chu, kha nula kha ramhuai hmel pawh pulo, thlahrang pawh nia lang silo kha tinge Pi Siami khan a hlauh em em? KA NU tiin kha nula khan pi Siami ako kha amak hle mai. Chubakah eng nge a thusawi kha awmzia ni ta ang?????

[5 days later]

Zing nichhuak eng mawi tak chuan tukverh atangin a hmai a rawn en ser ser a, muangchangin khum atang chuan Angel Lalremruati chu a tho a...a ban pharin a zi mar trial trial a, tichuan muangchangin bathroom lam chu apan a. Angel Lalremruati hi nula hmeltha over tih tur chu ni lo mahse, a pian analh in a kawng a fek rat mai a. A mitmeng fiah tak leh pawl ram mai te chu lens avuah amaw tih hial mai tur ani, ft 5'6 inches vel laia sang a ni a, a mawi tawk chauh hian a khal reuh a, a awmbawr pawh a mawitawk lekin a lian bawka, cher lutuk lo, mahse thau ni silo, vun ngo lam leh sam sei ngil tak, a mawng thleng trep khawpa sei a nei bawk a, avun te chu anun hian anung sar reng mai a ni. Amah hi kum 25 mi a ni a, kum 24 anih lai khan a phirpui, amah nena hmel in ang chiah Jenet Lalsangzuali chuan accident vangin a boral san tawh a ni. A unaunu boral ta Jeneti erawh hi chu a phir pui tih takah an hmel in ang hle mahse, adanglam bikin an unau pawh hian an hriat hran angreng hle a, ani erawh chu a thau in, a tawi bik bawk a. Apian pawh chuti lua a ni velo, Angeli anga mitmeng pawl ram mai te chu anei ve heklo a, chubakah a mithmul bul velah hian ser tereuh te a nei bik a, Angeli angin asam pawh asei velo a, adar thleng vel chauh niin, ala kir zui bawk a, hmel in ang chiah chiah si ah chuan an inhmelthat hleih ve hle a, mahse Jeneti pawh hi hmelchhe em em ani chuanglo a, sawi tawh ang khan Angeli nen an hmel a in ang miau a, mahse Angeli hian a khum em avangin an veng tlangval ho pawn Angeli zawk hi an ngaina zawk fo reng a ni. Mahse vanduai thlak takin kum 24 an nih khan Jeneti zawk chu an inchung atangin atla a, a boral zui bawk a ni.

Zing dar 9 a rik meuh chuan Angeli pawh chu damdawiina a nu damlo awmpuitu an thenawm nu Pi Rinsangi thlak turin a chhuak ta a. Angeli te unau hi kum 5 an nih laiin apa in a thihsan tawh a, anu hovin an pathum hian an khawsa a, Jeneti thih hnu hian an nufa chauhin an awm ta a ni. Anu hi natlawkna awm miahlovin ni 5 vel liamta khan an inkawtah zanlaiah nikhawhrelova a let reng chu tlangval nula rim leng haw ten an hmu a, damdawiin panpui nghal niin doctor te chuan a harh chhuah leh hun tur an hriatloh thu an sawi a, nimahsela a mar phu leh lungphu te a dik vek bawk si, chutia coma a a awm ringawt chu mak an ti hle mai. Angeli hian awmpui duh viau mahse a hna lam a thulh theih siloh avangin an thenawmnu hian a riahpui thin a, mahse hemi ni hian chawlh alak avangin chhun a awmpui tur leh zana riahpui nghal turin damdawiin lam apan mek a, damdawiin a thlen hnu chuan pi Rini nen chuan an inthlahfel a, tichuan nileng chuan anu chu a awmpui ta a.

Ni 6 lai ani dawn ta, anu chu ala biak theih chuang loh a, Angeli pawh a hlauthawng tan ta khawp mai. Mi rethei an ni lemlo a, mi hausa em em pawh anni hran lo. Angeli hi a unaunu Jeneti thih hma kha chuan an unauin college an kaldun thin a, an graduate dun nghe nghe bawk. Jeneti thih hnu hian Angeli hian apa thawhna hlui Company pakhatah employee hna a thawk ve ta a, a pa pension hi an la bawk a, an harsa lutuk lemlo. Ni khat chiah day off anei bawk si, anu bulah chuan hun tam zawk hman duh hle mahse athei silo, chutih lai karin an thenawmnu pi Rini lah a zin dawn bawk si. A phone chu a phawrh a, inthlahrung tak leh hreh tak chungin a bialpa, a hmangaih em em leh a pasal hual ni bawk Sangtea chu a call a.

"Hello?"

"Aw..hello Sangte, i buai em?"

"Buai love...enge ni ta?"

"Ihh englo nia, ka nu hi naktukah i awmpui hman angem? Pi Rini naktuk ah a zin dawn sia, awmpui tu tur neiloa amaha a awm tawp tur hi chu ka ngaingam lo, private ward a ni bawk si."

"Aww...i inthlahrung lutuk anih kha, ka hman lutuk alawm, ka nu chu enge a an tawh a?"

"A la ngai reng, ICU atangin kan la chhuak tawh a, mahse ala biaktheih chuang loh...a BP athra a, a marphu leh engkim a dik in a tha vek a..amak ka ti emai."

"Atha leh mai ang..lungngai suh, naktukah chuan ka nu chu ka lo riahpui nghal law law ang."

"Awi ka van lawm awm, ka lawm e aw duhtak.."

"Awle keipawh le..naktukah chuan kan inhrilh tha leh dawnnia..zanah ka rawn text ang che."

"Awle."

Sangtea hian an inngaihzawn lai atang tawhin Angeli nu hi KA NU tiin a ko ziah thin. Chumi zan chuan zan rei tak thleng Sangtea nen chuan an in-text a, inneih huna an awmdan tur te, fa an neih huna an fa hming tur te chu an sawi lawk dun a, an hlimdunin an inhmangaih thu chu an in hrilh tawn dun mawlh mawlh a. Dar 10:30 pm arik meuh chuan an in mangtha dun thei ta hram a. Mu tur chuan akhum a siam fel a, a mut hma chuan zung turin bathroom lam chu apan a, a zung zo a chhuak chu a nu hmai a mittui luangthla ngiai ngiai chu a hmu a, ava thu hnai a, akutah ava vawn sak a. Anu chu a rawn tawngvai a, "Angel, ka fanu...min ngaidam rawh, ka hmangaih che asin, ka tihpalh ani." a ti nuah nuah a. Chuveleh Angeli chuan mak a ti em em a, enge ngaihdamna tur awm, eng thil nge anu hian a tihsual a hre silo...rang em em in doctor te chu a ko a, an han enfel hnu chuan doctor chuan, "Angel, that lam apan chho zel anih dawn hi..hei a mumangah engemaw a hmu a, a tawngvai anih hi, a ziaawm tan dawn e." a ti a, mahse Angeli chuan ngaihthatlohna a nei tlat mai, anu tawngvai kha mak a ti a, ngaihdam ngai khawpin anu hian enge a tihsual tih chu a hre silo, chumi zan chuan ngaihtha lo deuh chung chuan a muhil ve ta a.

Atuk zingah chuan Angeli nu chuan ziaawm lam pan ahnekin ahma ang bawkin coma in a awm leh a, biak theih a ni leh ta chuanglo. Doctor te pawn mak an ti in an beidawng takzet tawh a ni. Angai te bawkin BP an check a, normal a ni bawk si. A marphu leh lungphu an check leh a..engkim chu a pangngai vek leh tho bawk sia, a awmzia chu Angeli nu hi mi hrisel tha pangngai ang chiah a ni. Ahma zana a tawngvai bak kha chu a tawng leh tawhlo, angai ang bawkin a awm leh tawh. Mahse Angeli chuan hlauhthawn rukna riau a nei, chu chu ahma zana anu tawngvai kha a ni. Tinge anu khan ngaidam angaih a, enge a tihsual? Chubakah Angeli hming alam a, ngaihdam adil lehnghal. Thil awmzia hriat chak hle mahse anu ber chu biak theih a ni tlat silo, chu mai bakah a rilru tibuai zual tu ber chu coma a awm reng chung si a anu bianga mittui luangthla kha a ni. Chung zawng zawng chu a rilru ah a awm a, a rilru a hah hle mai, mahse tihtheih vak anei si lo.

Zing dar 9:30 ah chuan a pasal hual Sanga pawh chu a lo thleng a, ahma zana a nu tawngvai vel te pawh chu a hrilh a, Sanga chuan ngaihtha zet hian, "A zia tawh nih chu, a tawngvai thei tawh a alawmawm ngawt zawk alawm" tiin a lo chhang mai a. Tichuan an inthlah fel hnu chuan Angeli pawh chu a haw ve ta a. Angeli chu in a thleng a, hmanhmawh takin a insiam a, dar 11 a thleng hman ngei ngei turin a inti fel sawk sawk a, an in chu a phiat a, Jeneti nena an room, an mutdunna thin chu a tifai a, tichuan fai takin a inbual a, a inbual zawh hnu chuan pawhdawh a a thi (necklace) chu la in a en vang vang a, a locket chu LOVE sign a ni. Chu locket chu a lai takah a inhawng thei a, a chhungah thlalak tereuhte pahnih a dah theih bawk a, inngaizawng te tana siam thi (necklace) a ni. A locket chu a hawng a, a chhungah chuan Sanga thlalak leh ama thlalak chu a lo awm a, anui suk a, a khar leh a, a ngaihlu takzet ani tih hriat tak hian a fawp vawng vawng a, tichuan a awrh ta a. Chu thi chu Jeneti dam lai a Sanga nen an inngaihzawn tirh lai vela Sanga pek ngei kha a ni. Hemi ni hian Sanga hi Angeli te inah a leng a, anu chuan an mut tawh thu a sawi a, "Angeli chu ala mengin ka hria, han chho la.." tiin a makpa hual chu a rin ngam em avangin a fanu te room lamah chuan a chhoh tir a, an roomah chuan han chhovin Sanga chuan Jeneti lehlam hawia a mutthilh hlanin Angeli a han present a ni. Thi a awrh hnu chuan Angeli chuan a wardrobe chu a hawng a, a bag alakchhuah pah chuan lehkha them hi a lo tla nawlh mai a, chu lehkha them chu a en vang vang a, ahlui tawh tih hriat tak mai hian a hmuar deuh hlek tawh nghe nghe a, lehkha chu an hawng a, Jeneti nena an naupan laia an thutiam an ziahna ngei kha alo ni. Angeli chuan hman atangin a chhiar fo tawh, mahse a chhiar nawn leh a, achhungah chuan tihian alo inziak a...

"Hei hi kan unau Jenet Lalsangzuali leh Angel Lalremruati te thu tiam a ni. Kan unau hian engtikah mah kan inphatsan ngailo anga, thih thlengin kan awm dun ang. Kan inhmangaihna hi tuman an tichhe theilo anga, kan inkarah tumah an tla zep tur ani lo, chu chu kan thutiam a ni."

Angeli chuan a unaunu chu a ngai hle ni tur a ni, a mittui aluang a, a chhiar zawh chuan paper chu thlep tha in a pawhdawh ah chuan a dah a,tichuan hna kal tur chuan a chhuak ta a. Angeli leh Jeneti te unau mizia hi sawi leh lawk ila...Angeli hi chu naupan lai atang tawh a mahni in vawng uluk leh naupang fel tak a ni a, a unaunu hi ahmangaih in a duat em em a, eitur chhe te pawh nei se a sem ve zel a, chu bakah a nu thu a awih em em bawk a, chuvang pawh chu aniang nge, Sanga te ang tlangval fel leh hmeltha em em a tawn tak ni. Mahse Jeneti erawh hi chu a rilru a te in a nelawm loh em em thung a, sual em em hran lo mahse a thinchhe phian a. Chubakah a unaunu Angeli hi a nau zawk angin a en tlat a, athuhnuaia dah hi a tum kher zel a, mahse a hmangaih lo bik chuang miahlo. Tette atangin an nu hian engkim hi a in ang aleisak a, kawr rawng in ang, kekawr in ang, kawrfual in ang leh pheikhawk in ang thlengin a lei sak a, chu mai bakah an nu hi puanthui thiam a nih avang hian a fate kawr tur hi a thuisak ziah thin a, an len hnu, an nulat hnu thlengin thawmhnaw in ang hlir aleisakin a thui sak thin. Hemi ni pawh hian Angeli chuan kawr ban bul dum leh jeans pawl dal deuh, a unaunu Jeneti ta ang chiah chu a ha a, hna kal tur chuan a chhuak ta a.

Office a thleng a, a staff member pui te nen an han inchibai vel phawt a, chumi hnu ah elevator lam panin a kal a, elevator a thlen chuan achhungah lutin a office awmna, 6th floor lampanga chho tur chuan a'n hmet zeuh a, tichuan lift chu zawi muang chuan a chho ta riai riai a. A thleng tep tawh tih ah, 4th floor vel a thlen lai chuan current a rawn thim thut mai a, lift pawh chu a tawp ta daih a, lift chhung chu a thim vek a, Angeli chuan zawite hian, "Hrep tak chuan.." a ti zawi sup a. Minute 1 vel lai chu a thim tawh, an siamtha har a ti ngei mai. Lift chhung chu zawi muang hian a rawn eng riai riai a, Angeli pawh a thaw huai mai. Mahse a hma zawna lift kawngkhar a ama thla fiahlo deuha lo langah chuan amah chauh alang ta hauh lo, abulah chuan amah ang tiat vel hmeichhia lo ding ve hi a hmu tlat mai, an thawmhnaw hak lah chu a in ang chiah chiah lehnghal. Atir chuan mak pawh a ti lo, mirror reflection vel mai mai a nih ringin a enliam mai a, mahse amah aiin a chu hmeichhe thla chu a tawi zawk tlat. A ngaih tha lo chuan a ban avai chhin a, mahse abula hmeichhe thla chuan a vai ve hauh lo. A hlauthawng tan ta, lift lah chu a la kal mai silo a, chu hmeichhe thla chu a enchiang deuh a, a unaunu Jeneti nen danglamna an awmlo, a unaunu Jeneti thla ani ngei ang le. Mahse ani kha chu a thi tawh a ni lawmni...engtin nge abulah a awm theih teh lul ang? A bul vel chu a hawi kual a, tumah an awm silo, mahse ahma a lift kawngkhar a en chuan abul lawkah chuan Jeneti chu a lo la ding reng bawk si. Hlauhna chuan a thau ah a rawn man a, athlan fim a tla zawih zawih zawih a, lift chhunga bang kil lamah chuan a tawlh phei a, a maimitchhing ta tawp a, a meng ngam tawh lo. A beng bulah chuan thaw ri set set ri ala hre zui, a hlau takzet tawh a ni. A au chhuak ngam silo a, chutih lai chuan zawi muangin lift chu a kal leh mek a ni tih pawh a hre hauh lo. Chutia meng tha ngamlo leh hmaihup tlata a awm lai chuan enge maw ri tut tut hi a hria a, lift kawngkhar inhawng ri hi a hrezui bawk a, a mit a han meng chu staff pathum velin lift kawngkhar bulah chuan ngawi rengin an lo en reng chu niin. Angeli pawh chu a hrilhhaiin mak a ti hle mai a, a zak hle bawk. Staff zinga pakhat chuan, "I tha maw? Enge ni ta a?" tiin a zawt a, Angeli chuan, "Engmah nilove" tiin hmanhmawh takin lift chu achhuahsan a.

Chumi ni chuan Angeli rilru chu a nuam thei hlawl lo, lift chhunga a thilhmuh kha mak a tiin a ngaihtuah apiang hian a la khur thei hial a. Manager in abiak te chuan aphu zuk zuk zel a, achungah hian thil thalo tak thleng dawn ang mai hian a hre tlat a, ahlauhthawng tak zet a ni. Lift chhunga a hmuh nula kha a unaunu ngei kha ani tlat, mahse a thi tawh si a, a thla ahrang tihna ani mai angem tih te chu a inzawt a, a hna ah a in concentrate theilo. Chumi ni pawh chuan a haw dawn chuan lift chu hmang ngam tawh lovin stairs (step) ah chhuk thla ta zawk a. Zanin pawh hian inah amah chauhin a awm dawn chu a nia, a hlau rilru hle mai a, mahse, "Ka mitvai mai mai a ni.." tiin a inti huai lui hram hram a, tlai dar 5 vel a rik chuan in a thleng ta a. In a thleng chu a roomah lutin vawiin lama a thil tawn te chu a ngaihtuah zui a, a la khur thei hial a ni. Chaw te eiin a chaw eikham hnu chuan inbual turin bathroom ah a lut a. Shower tui lum nuam tak chuan a taksa mawi tak chu a phuh seng seng a. A hlauhna te chu theihnghilh tumin a maimitchhing a, zawi te hian a zai rat rat a. Chutia a zai paha a sam a tuai vel lai chuan a sam chu nidang zawng aiin a hraw bik riau hian a hria a. A sam a nuaina kut a en leh chu a kutah chuan samzai alo awm nuai mai a, aphu zawk nghe nghe. Asam a tuai apiang chuan a sam chu a tla zel a, a sam tla te chu bathroom chhuatah chuan a tla kawi nuaih mai a. Ahlau lutuk leh mangang chu a au vak a, amaimitchhing a, abeng a hup a. Second 30 vel a maimitchhin hnu chuan zawi muang hian a meng a, bathroom chhung chu a lo fai leh vek bawk si a, asam tla nuaih te kha a lo awm tawh lo. A kut a en a, samzai pakhat hmuh tur pawh a awm lo. A sam chu a khawih chhin leh a, ahma a asam ang khan a lo mam thlapa, alo pangngai vek bawk si. A inbual fai nge failo pawh ngaihtuah lovin bathroom atang chuan hmanhmawh em emin a chhuak a.

Sanga pawh chuan Angeli nu chu damdawiin lamah a awmpui mek a, Angeli nu pawh ahma ang bawkin biak theih ala ni ta chuanglo, a khum bula thutthlengah chuan Sanga chuan chanchinbu a chhiar a. A chhiar ning ta deuh aniang, pawna meizial zu tura a chhuak tur chu Angeli nu kut chu a rawn che a, chu chu Sanga chuan alo hmu hman ni ngei tur ani...ava kal hnai vat a, "Ka nu, ka nu..i harh em ni?" a ti vak vak a. Doctor te chu au nghalin doctor leh nurse te chu an lo thleng a, Angeli nu chu an buaipui nghal a. Chiang mang hlei lo hian muang changin a rawn meng a, doctor leh nurse te chuan an be lawm lawm a, mahse a chhanglo. A melh kual a, Sanga a hmu chiah chu chiang em em hian a meng kawk a, Sanga hnungah chuan Jeneti thla lo ding ve reng hi a hmu ta a. Angeli nu chuan a kut chu khur dur dur in a rawn lek kang a, tawng tum ang deuh hian a ka a ang zuau a, mahse a tawng theilo, a ang phuau phuau ringawt mai. A kut chuan muang changin Sanga awmna lam chu a kawk a, Sanga chuan a hrethiamlo hle mai, "Enge awmzia ka nu, tinge?" tiin a zawta, mahse a chhang thei silo. Sanga chuan a bul vel te leh a hnunglampang te chu a en kual a, nurse te leh doctor te bak tumah an awm silo. Mahse Angeli nu chuan Sanga hnunga Jeneti lo nui vur vur chu a hmu chiang em em thung si, chutah Jeneti lah chuan a damlaia a nu ina Angeli nena a in ang chiaha a thuisak kawrfual dum kha ala ha zui a. Chutin Jeneti hmel chu a rapawm lemloh, amaherawhchu hmel pangngai tak angin lang mahse a fanu thi tawh a hmu leh chu a lawmawm lam ai mah chuan a rapawm takzet zawk a ni, chubakah anu damlo na tuar mek chu ala nuih zui. Minute 3 vel lai chutia an buai hnu chuan Angeli nu chu a thidang leh ta thut a, ahma ang bawk khan biaktheihloh chuan a awm zui leh ta.

Angeli pawh chu mu tur chuan a inbuatsaih mek a, a khum chu a'n en a, a unaunu Jeneti nena an mutdunna khum ngei a ni tih chu a hre chiang ngei mai, chuvang tak chuan a mu ngam chiah biklo a ni. Diktak chuan chu an in lian tak maia amah chauha awm chu a ngam vak tawhlo a ni ber e. A mut hma chuan a nu leh Sanga te chanchin hre turin a pasal hual Sanga chu a phone a, Sangtea chuan thil awmdan zawng zawng chu a lo hrilh a, Angeli chu angaih atha ta hauh lo. Vawiin lama a thil hmuh te kha Sanga chu hrilh ve mai chu chak viau mahse a awihsak a rin chiahloh leh a mitvai mai mai bak a nihloh thu velin a rawn hnem dawn tih a hriatlawk vang pawh a ni mahna. Engmah sawilo chuan thildang sawipuiin minute 10 vel an inbiak hnu chuan an in mangtha ta a. Khumah chuan Angeli chu a inlet a inlet a, a muhil thei thlawt lo a ni. Atawpah chuan a tho a, inhnuaiah chhuk thla in choka lam a pan a, "Thingpui hi in ila, ka zia deuh mahna." tiin ama hriat tawk lek chuan a phun sap a. Thingpui chu a siam a, an gas stove (double) ah chuan, a dinglam zawkah chuan ketli chu a chhuang a, banga sana intar chu a han melh chho a, dar 12 alo pel daih tawh mai. A thingpui chhuan lam a en leh chiah chu gas stove veilam zawkah a lo insawn daih mai. A mak a ti hle mai, dinglam zawkah khan a chhuang ani lawmni, a chhuangtu ngei a nia, a chiang ani, mahse tinge a hawisan hlek chhungin veilamah a lo awm daih tawh bawk si. Inah chuan amah chauh a awm si a, nge ni a midang awm anlo awm ve zawk em ni ang tihte chu a rilru in a inzawt nghal mawlh mawlh a. A thlanfim lo chhuakin a khur deuh titih nghal a, thingpui pawh chu in lovin gas chu a off a, hmanhmawh takin a room ah a tlan chho a, enge achungah hian thleng ta, khumah chuan mu in a inlukhup nghal a. Inchhungah hian a unaunu boral ta Jeneti thlarauvin a chenchilh tih chu a ring nghet bur tawh a, a hlau lutuk chu a thlan zawih zawih a, arilru in, "Zanin pawh khan damdawiin lamah ka unaunu thlarau hian ka nu a han tlawh ve tihna ani maw.." a ti a, mutthilh tum eng ang mahse a thei lo. A tho a, a room pawhdawh a, sleeping peels chu mum 4 vel a hmawm pawp a, tui a in khawlh khawlh a, tichuan a mu a, reilote ah chuan a muhil ve ta a.

Angeli te thenawm Pi Rini pawh alo haw leh tawh bawk a, Sanga pawh in lamah haw in a hna atangin ni 5 lai chawlh a la tawh bawk a, hna tan leh tur chuan a insiam a, a insiam zawh chuan hna tan leh turin in chu a chhuahsan ta a. Sanga hi High School zirtirtu a ni. Tlai dar 4 a lo rik meuh chuan school atang chuan a haw a, inbual faiin, a room ah chuan alut a, dawhkana a laptop a'n hawng a, thuthmun rem felin a zirlaite question tur vel chu buaitsaih turin computer chu a on a. Wallpaper ah chuan Angeli leh amah leh Jeneti thlalak, an in inhriattirh lai, an inkawm nel tan laia an thlalak hmasa ber a ni. A mitthla ah chuan khatih hunlai vel kha a rawn lang zung zung mai a, a hmangaih ber Angeli nen a an intawntirh ni hmasa ber kha a ngaihtuah chhuak a....

Kum 2016, November 7th a ni. Sanga chu chutih hunlai chuan ngaihzawng a la nei lo a, hmeichhe ngaihsak lemlo tak a ni. Amah hi palian chu ni hauh lo mahse a pate lutuk lo. Ft 5'9 vel laia sang a ni a, cher lampang deuh, hang lampang, sam buk lampang deuh a ni a. A hmeltha in a pian pawh a sek tawk viau, a school zirlai hmeichhe naupang te pawn an star hlawm hle a, tumkhat phei chu class 10 hmeichhe naupang pakhatin love letter a thawn avangin a hrem nghe nghe a ni. School a ban hnu chuan a motor lam pana a kal chiah chu a hnunglam atang chuan a thianpa Tluanga chuan a rawn ko a..

"Sanga, i va induh ve a, vawiin te chu i hre ve reng a nilawm ni, thiantha ah pawh min ngailo nih hi.."

"Ehe Tluanga, enge ni ta?"

"Ekhai, i hrelo tak tak elaw...i reh hmak a, mi biak pawh i tumlo. Vawiin hi kan graduation day nia..i hrelo maw, kan thianho group ah pawh ka sawi vek tawh kha."

"Awww...ni tak maw khah, tihpalh lutuk, ka hna lamah ka buai em a ka lo theihnghilh lawm. Ka lawmpui lutuk che, degree i nei ve tawh a, ka hnung i rawn zui thei ta, haha.."

"Ka lawm e, mahse ka nuih pawh aza lo keichu, i lakah ka lungawilo."

"Awww..nihleh zanin chu no kan dawm dun dawn mi? Ka tum vek ang.."

"Huiham..engmah i hrelo tak tak nih hi, vawiin tlai hian ka classmate thenkhat te nen kan inah chaw kan eikhawm dawn, kan party nghal bawk dawn. Lo kal ve ang che, chhuanlam ka ngaithla peihlo, kan thiante ho pawh an lo kal ang, kan kim vek tur a ni."

"Awleee...i tih tlat te chuan"

"Dar 6 ah chuan lo thleng tawh ang che, hei dar 4 a ri tep, hmanhmawh rawh. Chicks pawh an tam dawnnia."

"Haha awle ka lo kal ang."

Chumi zan chuan Sanga chu a thianpa Tluanga te inah chuan kal vein chaw te an eikham hnu chuan inchung lama inzui chho diah diah in Tluanga room zau nuam em em, mi hausa fapa room tih hriat em em mai, keini ang tan chuan kan in pangngai aipawn a zau hial ang tihtur vel khawpa lian leh changkang ah chuan an awmkhawm a, bathroom pathum a awm a, pawn verandah lah chu Millenium Centre roof top amaw tih mai tur hian a zau nuam em em mai bawk si. Hla an play a, an lam a, a then an zai a. Sanga erawh chuan nuam a ti vak lo, achhan chu Tluanga hi chu an thian zingah pawh a naupang ber a, chuvang chuan a nau angin a en a ni. Amah hi la upa vak biklo mahse college naupang te hi chu a nau en ve thei em em a, a inla senior ve hrim hrim bawk a, haw mai tumin a tho a, Tluanga bulah chuan haw mai a duh tawh thu va sawi turin Tluanga chu a va pan hnai a. Tluanga bul a thlen dawn chiah chuan hmeichhe pahnih, hmel in ang em em mai lo kalphei dun hi a hmu a, an hmeltha dun phian lehnghal. Pakhat zawk chu a sam a ngil a, amitmeng a pawl ram mai a, a sang tha zeih zawih in a pian pawh a khal mawi tawk ngang mai. Pakhat erawh zawk chu, a hmel chu a tha ve em em tho a, mahse a mit ko ah chuan ser tereuhte a awma, a sam a tawi bik a, a kir bik bawk a, chuan tarmit a vuah bik bawk a, (Ka lo sawi theihnghilh daih a, Jeneti zawk hian tarmit a vuah a, a mit a tha vak lo ani.), chubakah a tawi zawkin, tlemin a thau zawk bawk a, Sanga chuan unau an ni tih a hrethiam nghal a, phir an ni ngei ani tih a hre nghal bawk. Tluanga bulah chuan hmeichhe hniam deuh zawk chuan, "Tluanga, ka nu amah chauhin inah a awm si a, kan haw tawh mai ange." a ti a, Tluanga chuan, "Ala hma lawm, zu in induh silo a, beer tal saw va in ru, chuan in va hmanhmawh ve Jenet?" a ti a, hmeichhe sang zawk, Jeneti lo zawk chuan, "Beer pawh kan in ngailo alawm, anuam kan ti viau nanga ka nu inah amah chiahin a awm sia, kan haw mai ange." a lo ti ve bawk a. Sanga chuan a lo en renga, pakhat zawk hming chu Jeneti a ni tih a hre phawt a, mahse a mit la tu ber Jeneti unaunu zawk chu tunge a hming ala hre ve tlat lo. Sanga chuan chu a hmeichhe hmuhte zinga pakhat zawk, Jeneti lo zawk chu...enge a chhan pawh a hrelo, a hmeltha a ti em em in a ngaizawng nghal em em ringawt mai a ni. A tawng pahah a hmui senno chek mai te chuan a mit ala em em a, a mitah a enchho a, a mitmu pawl nalh tak mai te chu, lens avuah amaw tih hial tur khawp hian a pawl ram mai a. Tluanga chuan, "Zanin chu haw hma bik awmlo se ka'n ti asin, i nu chu amaha awm a hlau tihna mi, Angel?" a tih veleh chuan Sanga chu a lo nui suk a, ama hriattham lek hian, "Angel...Angeli maw?" tiin a phun sap a. An inhnial an inhnial hnu chuan Tluanga chuan, "Zan a rei tawh sia, nangmah ni chuan hmeichhia in ni sia, ke a inhaw tur ka ngaihtuah emai che u...mahse keichuan ka thlah hman silo che u a, midang ka'n au ange aw.." a tih lai chuan Sanga chu lo kal hnaiin, "Keiman ka lo thlah ang." a rawn ti a. Tluanga pawh chuan a remti ta a, tichuan Sanga chuan an unau chuan a thlah ta a. Motor seat hnung lampangah chuan an unauin an thu dun a, an ngawi thap mai a. Sanga chuan a motor front glass chu kuai herin Angeli hmel lang thei chiah chiah tur hian a siam rem a. A va en leh zeuh zeuh zel a, Angeli chu a lai chhe der mai a. Sanga chuan chutia ngawi renga awm chu a boring a ti deuh a niang...

"Ihh..in unau hian phir in ni tiraw Jenet?"

"Um, minute 1 in ka upa zawk..hehe."

"Umm a nihtak chu..in hmeltha dun hle mai."

"I van ti lawmawm ve aww.."

"In graduate tawh sia, anuam tawh awm bik."

"Haha nia, tunge i hming ni ve a?"

"Lalremsanga ka nia, Sangte min ti dawnnia, Sanga pawh min ti ula ka pawm vek."

"Hehe...nihchuan Sanga tiin kan ko ang che."

"Awle, tinge Angeli chu i va ngawi thei bik ve, tawng ve la."

Angeli chu a nui suk a, zawite hian, "Tah hian ding rawh, helai hi kan in chu a nia." a ti a, tichuan an inthlah a, Jeneti bawk chuan, "Min thlah a, kan lawm lutuk aw." a ti a, Sanga chuan, "Awle, khawi..lawmthu sawinan kan pathumin thla la ho ang u, in selfie lawk ang u." a ti a, a car chhungah chuan an pathum chuan thla an la ho a.

(Back to the present time)

Sanga chu a ngaihtuahna atang chuan a harhchhuak thut a, sana a en a, dar 8 a lo ri tep tawh chu niin. A tho thut a, "Ka van theihnghilh teuh ve.." tiin a insiam sawk sawk a, a phone a phawrh a, number a type a, "Hello, ka tihpalh lutuk, minlo nghak ru, aww chahbi spare chu ka kawl a lawm, in awm vek tawh maw..ka lo kal nghal, engkim in ready vek em?.... Awle ka lo kal e." a ti a, achhuak nghal a. Zanin chu Angeli pawh a bangtlai deuh a, office lamah an buai bawk nen. Dar 8:30 dawnah chuan in chu a thleng ve chauh a, motor a park that hnu chuan inchhung lam a pan a. Kawngkhar a luh dawn tep ah chuan a ding chat a, kawngkhar ah chuan TALA a awm lo, a lo inhawng sa a. Zawite hian kawngkhar chu a nem hawng a, a lut a. Ahma ang bawk khan Jeneti thlarau chuan a tibuai leh dawn ani tih chu a ring nghal mai a, a hlauvin a khur leh nghal zawi zawih tawh a, avan khawngaihthlak tehlul em. Inchhung a lut chu alo thim vek a...light on tuma a ban a pharchhuak tur chiah chu na em em mai hian kawngkhar chu a rawn in khar bur a, a au thawt a. Tichuan vawileh khatah light chu a rawn eng chiah chu a thil hmuh chuan a ti hrilhhaiin mak a ti hle mai. An thenawmte, an venga a thiante, office lama staff te leh a bialpa Sangtea thian te chuan anlo dinhual thap a, athen chuan present bawm an lo keng far hlawm a. Chhuatah chuan pangpar nalh tak tak hi a lo tla nuai mai bawk a, inchhung vel chu a enkual a, balloon alo intar far hlawm a, a in chu mawi taka chei a lo ni. Hnunglam atang chuan mipa pakhat hian, "Ehem" a rawn ti a, Angeli chu a hawilet a, Sanga chu Birthday cake, LOVE sign lemchuang, bati pali inchhi kengchunga a lo ding hi a hmu a, Angeli lam panhnai pahin, "Happy birthday to you, happy birthday to you, happy birthday dear Angel, Happy birthday to you.." tiin a rawn zaiphei a, midang chuan an lo zai pui bawk a. Angeli chuan Sanga chu a mit takah a melh a, hlim em em mai hian a nui vur vur a, cake chunga bati chu a chhemhlum a, midang chuan kut anlo beng dur dur bawk a. Chumi ni chu Angeli birthday a ni a, a birthday neitu Angeli ber pawn a birthday a theihnghilh a nih chu, Jeneti dam lai kha chuan a theihnghilh ngailo, Jeneti zawk hlir khan an birthday hi a theihnghilh ziah a, Angeli hian kumtin deuhthaw a hrilhchawp ziah thin kha ania, tinge maw a thih hnu a Angeli hian ama birthday ngei te a theihnghilh tak mai ni, a buai em vang pawh a ni mahna. Chumi zan chuan a bialpa Sanga hian athiante thurual puiin Angeli hi an surprise a ni.

Chumi zan chuan Angeli birthday lawm chuan an party nghal a, zan dar 10 vel ah chuan a then chu an haw tawh a, mahse Sanga te thianho bik chu an awm hnufual a, dawhkan pakhat kil hovin an thu khawm a. Sanga thianpa Robin-a chuan, "In inneih ni a hnai tawh ropui sia, hei...thlakhat leh a chanve chiahin adang tawh che u a, anuam awm bik mang e awww..". a ti a. Sanga leh Angeli chu inmelh dunin an nui dun ver ver a, an hlim dun hle mai. Sanga thiante chuan an fiam dun vela, chumi zan chu hlim leh nuam ti takin an hmang zo ta a.

Midang zawng an haw fel hnu chuan Angeli chuan Sanga chu a motor thleng chuan a thlah dawn mek a. Angeli chuan inthlahrung tak si hian, "Sang...zanin chu lo riak ve mai la, ka khum bula sofa ah khan i mu mai anga.." tiin a sawm a. Hetia a sawmna chhan tak zawk chu Angeli hian anu damloh hlana Sanga nena nuam lo chen dun a duh vang ani hauh lo, a unaunu thlarauvin a tihbuai thin avangin mahni a awm a, buaina a tawh leh a hlauh vang zawka sawm a ni. Mahse Sanga erawh chuan, "Nupa pawh kan la ni si lova, keipawh ka khua a har alawm, mahse kan innei tep tawh a...arei tawh hleinem." tiin a chhang a, Angeli chuan, "Eng thil thalo mah kan ti dawn chuang hleinem, chubakah ka ring tawk che a, engmah i ti dawnlo tih ka chiang alawm." tiin a sawm lui hram hram a, a duh vanga sawm a ni bik lo, a hlauh vang chauh a ni. Mahse Sanga chuan, "Angel, a chi loh ang, min hrethiam mai rawh, chubakah a mawilo emai min hre ta se a zahthlak dawn si a, kan inneih hunah kumkhua in kan la awmdun dawn alawm, i khawharna te chu a reh thuai dawn lawm." tiin a hnem a, Angeli chuan a hnial hreh tawh bawk si, zawi te hian, "Awle.." tih chauh hian a chhang a...an inthlah fel ta a.

Zan ah chuan Angeli chu a muhil thei lo, lum a ti em em mai a, a inlet kual reng a. A rizai sin lai chu hlipin chhuatah chuan a paih thla a. Ala lum tho mai, a kawr hak chu hlipin tawnzau nen chuan a mu a. A lum a la ti em em tho a, a tuar thei ngang lo. A tho a, a room fan chu a on a, khumah chuan a mu leh a, mahse fan pawh chuan a la chhawk zangkhai lo cheu aniang, a thlan a la tla bawrh bawrh tho mai a. A ngaihna ahrelo hle mai, a tuk zing hna kal tura a thawh hma a ngai bawk si. A kekawr chu a phelh leh a, tawnzau leh boxer nen chiah a mu ta. A maimitchhing a, muthilh a tum. A muhil trep tih ah chuan khawpui ri dur dur chuan a ti harh thut mai a. A phu chiang kher mai, tichuan muhil thei talo chuan a meng kur ringawt mai a. A la lum bawk aniang, a thlan a tla leh nghal bawrh bawrh a. A tho a, bathroom ah alut a, darthlangah chuan a in en vang vang a, a hmel chu a tha chiang a ni. Tichuan a hmai a phih a, a phih zawh chuan a in en leh a, a mu tlem bawk aniang nge, dark circle pawh chiang kelh kawlh hian a nei hial a. Darthlalang chu a hawng a..(a darthlalang hi a hawn theih a, a chhungah chuan damdawi chi hrang hrang a dah thin) a chhungah chuan sleeping peels chu a la chhuak a, mum 4 vel chu a hmawm pawp a, tap water chu herh haw-in harsa tih hmel takin a lem hrawk a. A hmai a phih a, a thaw hawk a. Darthlalang chu a khar leh chiah chu ahma a darthlalangah chuan ama hmel ang chiah, mahse sam tawi zawk, sam kir, tarmit vuah leh a mit kotlanga ser nei, rum taka meng chu a hmu thut mai a, ama thla reng reng a lang hauh lo. A phu nasa lutuk chu a tawlh dawrh a, a khur nghal zawih zawih a, che miahlo hian ahma a darthlalanga hmeichhia chu mitkhap miahlo hian a en reng a. Chu darthlalang lehlama mi chu tudang nilovin a unaunu Jeneti a ni. Second 10 vel mitkhap miah lova an in en reng hnu chuan Jeneti chu a rawn tawng chhuak thut a, "ANGEL, ANGEL LALREMRUATI..HMING NALH TAK ANI TIRAW..." a rawn ti ta mai a, Angeli erawh chuan a chhang ngam lo, a meng phar awn awn a, chu veleh darthlalang lehlama jeneti chuan darthlalang keh thawt khawpin a kutin a rawn nem a. Chu veleh Angeli hlau lutuk chu a tawlh hnung dawrh a, chhuata sahbawn phuan nal chu rap pial in tukhum vaw chawrh khawpin a thal thuai mai a, nikhaw hrelovin a awm zui nghal a.

Zing dar 8:30 vel a ni a, Sanga chuan a hna lampang pan turin motor chu a khalh chhuak a. Angeli te in zawn a thlen chuan a ding a, Angeli te in kawngkhar inkalh lo a, lo inhawng huau a hmuh chuan motor atang chuan a chhuk a. Angeli chu hna ala kallo anih ngei a ring a, kalrual pui a rem dawn em avang chuan Angeli te in lam pan chuan a kal phei a. Inchhung a luh hma chuan kawngkhar chu inhawng sa reng mahse door bell chu a hmet phawt a, mahse tuman an chhang lo. A hmet leh a, chhanna ala dawng chuang lo. A vawi thum nan a hmet leh ta, tuman anla chhan lo cheu avang chuan inchhungah chuan a lut ta a. Inchhungah chuan a hawi kual a, "Angel?" tiin a nupui hual chu a au a, chhangtu an awm lo. Vawi li vel lai a auh hnuah pawh chhangtu an la awm chuang lo a, inchhung velah chuan Angeli chu a zawngkual a, mahse a hmu hauh lo. Inchung lamah a chho a, Angeli roomah chuan a lut a. Angeli room chu fel fai takin alo awm a, mahse Angeli hmel reng reng hmuh tur a awmlo thung. Amak a ti angreng hle mai a, mahse ngaihthatlohna em em pawh ala nei chuanglo. Angeli room atang chuan achhuak a, inchung ber (roof top) ah chuan chhovin Angeli chu a zawng leh a, mahse Angeli hmel reng reng hmuh tur a la awm chuang lo. Inhnuai lamah chuan a chhuk leh a, sitting room leh choka vel chu a check kual leh a, Angeli chu a la hmuh loh miau avang chuan in chu chhuahsan mai a tum a.

Chhuah mai a tum lai chuan bathroom lamah chuan thawm enge maw a hre ta tlat mai. Chu veleh hmanhmawh em em chuan bathroom lam chu ava pan a, bathroom kawngkhar a hawng chiah chu a thil hmuh chuan a barakhaih hle mai. Angeli chhuatlaia nikhaw hrelova lo let reng chu a hmu a, hmanhmawh takin ava pan hnai a. Angeli chhuata lo mu reng chu kaihthawh tumin a sawi nawk nawk a, "Angel, bawihte, i tha em?" tiin a be mawlh mawlh a, mahse Angeli chu a harh theilo. Sanga chuan Angeli chal chu a dawm a, a sat hian alo sa vur mai a, a khawsik a sang hle tih chu a hre nghal mai a. Angeli chu tui tlem te in ahmai ah a theh that that a, chuveleh Angeli chu a rawn meng a, a rawn thaw nghal hrawk hrawk a. Sanga chuan, "Bawihte i harh em? Enge thil awmzia?" tiin a zawt a. Angeli chuan a chhang mai loa, bathroom vel chu en kual in a hawi hru hru a, darthlalang lam chu a en leh a, diklona engmah a hmu lo, zawite hian, "A keh miahlo.." a ti ringawt a. Sanga chuan Angeli chet dan chu mak a ti ngei mai, "Engmaw keh lo a? Angel, tinge hetia i awm a? Ka biak che chu i hrelo ami?" a ti a, Angeli chuan Sanga lam chu a en a, a hnuk a ulh nghal ringawt mai, "Sanga..." tiin tap tuau chungin a kuah a. Sanga chuan a ngaihna a hrelo hle mai, "Tinge a, tinge hetia i awm?" a ti a, Angeli chuan a thil tawn te chu hrilh duh viau mahse zep hrih phawt chu tha in a hria a, "Ih...englo ania, tukin zing khan ka tho hma a, ka hmai phih tur bathrooma ka luh hian chhuatah sahbawn phuan alo awm a, ka rap pial palh a, ka tlu alawm mawle, tunah pawh ka lu a na lutuk.." tiin dawt a sawi ta zawk a. Sanga chuan, "Ava zia lo thin e aw, kawngkhar pawh i kalh silo, in khawngkhar hi a lo in hawng huau a, ka lo lut tawp alawm." a ti leh a, Angeli chuan mak tih hmel deuh hian Sanga chu a melh a, "Kawngka a inhawng amaw?" tiin a zawt a, Sanga chuan, "In hawng e, chuvang alawm ka lo luh theih, nangma hawn anilo mi, mak i va tih hmel ve a?" a ti a. Angeli chuan mak a ti hle mai, ahma zan khan kawngkhar te kha chu a mut hma in a kalh thlap si a, inah tumah dang an awm ve silo, mahse a rilru in a unaunu Jeneti thlarauvin a chenchilh mek tih a hrechhuak leh thut a, Jeneti thil tih a nih a ring nghal a. Angeli chuan bah deuh nuai hian, "Ihh... englo...nia, tukin zing khan ka hawng alawm." a ti leh a, Sanga chuan, " Chupawh nise, i khua ava sik nasa ve a, i sa vek alawm." a ti a, Angeli chuan a chal a dawm a, alo sa vur mai a, amah pawh chuan mak a ti zawk hial a. Muangchanga thawh pah chuan, "Ka tha mai ang, i hna i kal dawn nange, i tlai ange, keipawh ka insiam anga, ka kal thuai ang." a ti a, mahse Sanga chuan, "Vawiin hian tu mah mah hna kan kal lo ang, in hotute phone la, i damloh thu sawi mai rawh. Khatianga khawsik chung chuan i kal ka phallo, keipawh kan principal ka phone anga ka kallo mai ang, chubakah i tlukna a i lu i sawh te kha, khate kha entir angai alawm, damdawiinah kan kal angai." a ti tlat mai a. Angeli chuan hnial eng ang mahse, Sanga chuan hnathawh a phal tlat siloh avang chuan damdawiin lam chu an pan ta zawk a.

Damdawiinah chuan an in entir a, Angeli chu doctor chuan damdawi te chawh in eidan tur leh ei hun tur vel a hrilh a, tichuan damdawiin chu an chhuahsan ta a. An haw meuh chuan tlai dar 4:30 alo ri leh der tawh mai a, Sanga pawh chu ina haw lawk lo chuan Angeli te inah chuan a leng tlang nghal a. Angeli nen chuan inkuah dunin an titi dun mial mial a, an hlim dun ngei mai. Angeli chuan Sanga chu chaw ei ve tura a sawm tlat avang chuan Sanga nen chuan zanriah an kil dun nghal a, chaw eikham hnu pawh chuan haw mai lovin Angeli bulah chuan a awm a. Angeli chu a hlim ngei mai, zan alo thlen hian a huphurh em em thin a, achhan pawh zantin mai hian a unaunu Jeneti thlarauvin a tihbuai thin vang a ni. Dar 10:30 a rik meuh chuan Sanga chuan haw mai atum ta a, Angeli chuan hawlo se a ti ngei mai. Angeli chuan zak deuh bawk si, inthlahrung tak hian, "Sang... lo riak mai la...diktak chuan mahni a awm hi chu hmeichhia ka ni bawk sia, ka hlau deuha." a ti a, Sanga chu a nui suk a, "Engmah hlauhawm a awm lo, chubakah duhtak, thu kan tiam dun tawh kha, kan inneih hma chu khum khatah kan mu dunlo ang tiin kan tiam tawh kha.." tiin a lo chhang a. Mahse Angeli chuan Sanga haw tur chu aphal tlat lo, "Chupawh nise duhtak, min ngaihtuah lo emai. Ihhh....ka room a sofa ah khan i mu anga kei khumah ka mu anga, engmah kan ti dawn hleinem.." a ti a, Sanga haw tur chu chelh din ngei a ngai miau si a. Mahse Sanga chuan, "Hlauhawm engmah a awm lo, chuan ka ngaihtuah che lawm. Mahse ka chhungte bulah enge ka sawi ang? Ka riahpui tur thu che hi ka sawi dawn em ni? Engtin nge min ngaih anga? Thil dik a nilo alawm, ka thiante bula riak tur ang chuan ka insawi thei mai anga, mahse ka nu leh pa bulah dawt ka sawi ngailo tih i hriat kha. Pathianin mal min sawmlo palh hlauh ang tih ahlauhawm alawm. Chuvang chuan rinawm taka kan awm angai alawm." a ti a, Sanga chuan sawi dik viau mahse Angeli'n riak tura a sawm nachhan hi a hre hauh si lo, hria se chuan a riahpui ngei awm si a.Tichuan Sanga chu a haw a, Angeli chuan chu zan huphurhawm tak mai chu amah chauha a hmachhawn leh angai dawn ta.

Dar 12 a ri tep tawh a, Angeli chuan mumang anei a. A mumangah chuan an naupan lai, kum 15 vel an nih lai a Jeneti nena khuma an infiam lai hi a hmu a. Khumah chuan an kut pahnih invuanin an zuang dun vak vak a, an room bula sofa ah chuan a nu a thu a, afate pahnih kawr tur chu a phiar mek a, a fanu te infiam chu a en a, Angeli nu chuan, "In tlu sual palh ange aw, zuang tawh su." tiin a lo hau a. Angeli te unau pawh chu an tawp ve mai a, khumah chuan thu dun in an nui dun kur kur a, an zuang hah dun bawk aniang, an thaw dun hluam hluam a. Khumah chuan thu dunin ROCK PAPER SCISSORS....tiin an infiam leh a, Jeneti zawk chu a chak zel a, an nui dun vak vak a, Jeneti chuan, "A upa zawk ka nia, nau zawk chuan min hneh thei dawnlo nih hi." tiin a unaunu Angeli chu a fiam vel a, an nui dun vak vak a.

Angeli chu a mumang ram atang chuan a harh hlawl mai a, sana a en a, zing dar 2:30 alo ri der tawh mai. A tho a, akhum bula tui bottle chu la in tui chu a in khawlh kawlh a. Tichuan a mu leh ta a, mahse a muhil theilo, zandanga a tih ang bawkin a inlet a inlet a. Achang leh dinglam hawi zawngin saisirin a mu a, achang leh veilam hawiin a mu leh a. Chutia dinglam leh vei lam a athlek kual a thlek kual hnu chuan ding lam hawiin mu leh a, a muhil tep tawh tih ah chuan, veilam zawnga a hawi leh chiah chu a bulah chuan hnai set sawt a Jeneti alam hawi zawnga saisira lo mu ve reng chu a hmu thut mai a. Jeneti hmel chu a rapthlakin a tihbaiawm kher mai, ahmel chu hmuh tlak reng a awm lo. A hmai chu a dang vek a, a var deuh pup a, a sam chu a thur bum bawk a, mitmu a nei lo, a kaw dum huau a ni ber mai. A mit atang chuan thisen dum nguk mai hi alo luang thla a, a rimchhe em em lehnghal. Angeli chuan che chang lo hian phawk em em hian a unaunu Jeneti chu a en reng a, Jeneti chu vawi leh khatah a rawn tawng chhuak thut mai. Nutling 10 rual vel aw(voice) ang mai hian ring zet leh thinrim aw tih hriat zet hian, "SANGA HI KALSAN RAWH.." a rawn ti ta mai a, a ha a la dum vek zui. Angeli hlau lutuk chu a au vak a, khum atang chuan a tla tawp a, bangkil ah chuan tawlh pheiin mittui tla zawih zawihin a khur hlawk hlawk mai a. Khum lam chu a va en a, mahse tumah an lo awm lo, Jeneti pawh alo awm tawh lo. Mahse a che ngam tawh lo, a tap zawih zawih a, puitu a mamawh takzet a ni. Reife chutia a awm hnu chuan Angeli chu engemawni hi a mitah a rawn lut thut a, amit chu a thip ngei mai. Anuai nghal a, anuai vak vak a, tichuan thawk leh khatah a mut a rawn chhuak nghal em em mai a, reiloteah chuan a room chhuatah chuan a muhil der mai. Atuk zingah chuan Angeli chu a tho a, ahawi kual a, a awmdan chu mak a ti ngei mai. Khumah alo awm reng chu niin, a hma zan lawk khan chhuatah a mu a ni si a, chutia khuma alo awm leh daih chu mak a ti ngei mai. A lu a dawm vawng vawng a, "Ka mumang, ka mumang vek maw lo ni a, ava rapthlak veleh.." a ti zawi sap a, tichuan a tho chhuak a. A hmai te a phih fai a, inhnuai lamah achhuk a, choka ah chuan eirawng a bawl a. Thingpui a lum a, chumi pah chuan hmarcha rawt a siam bawk a. Thingpui chu a in a, a phone chu a khawih melh melh a, "Vawiin chu Sunday a ni hlauh mai, ka inkhawm peih angem aw?" a ti nuah nuah a.

Chutia thingpui a in lai chuan door bell a rawn ri a, ava hawng a. A hmangaih, a duatlai Sanga alo ni. Sanga chuan ui a rawn kai lut a, Husky dum leh var inpawlh, lian tha nelh nawlh, duhawm em em mai hi a ni a...

"Ehee, he ui chu ka va duh ve awww..i ta mi Sang?"

"Ka ta nilovin, i ta tur zawk."

"Enga?"

"Aw ni e duhtak, i birthday khan cake chiah ka pe che sia, hei hi present ni mai rawh se."

"Awi ka van lawm tak duat, mahse tinge ui kher min pek a?"

"Nangmah chauhin i awm si a..he ui hi tun atang chuan i best friend a ni tawh ang..zanah pawh i khawhar a hnem anga, chuan hlauhawm lakah a veng dawn che lawm."

"Um duat ka lawm e aw."

Angeli chu a thla a muang sawt mai, amah veng tu tur leh a khawhar hnemtu tur a hmu tawh bawk a. Chumi ni chuan a inkhawm a, tichuan chawhma, chawhnu leh zan thleng chuan a inkhawm a. Chumi zan inkhawm naah chuan tawngtai rualna an nei a, tichuan Angeli chu ti hian a tawngtai ta a...

"Lalpa, ka unaunu hi ka ngai a, achunga thil thleng ta te kha a pawi ka ti takzet. Mahse a thlarau hi khawngaihin hahchawlh tir tawh rawh, i hnenah chawlh hahdam tir tawh la...muang takin chawlh tir tawh zawk ang che. Tin, ka nu damlo pawh hi a natna te lakkian sak la, dam taka a awm leh theih nan ka dil ache. Amen."

Reilote ah zan alo ni leh ta der mai, Angeli tan chuan a va huphurh awm leh dawn em. TV a en a, thutthleng sei ah chuan a thu a, a ke a hlang a, a bawp sei nalh leh mam nalh em em mai chu a thluang zar mai a, a malchuangah chuan a ui thar chu a bawk vang bawk a. A TV enlai pawh chu a ngaihsak em em lo, a ui thar chu a chul hiau hiau a, "Tun atang chuan ka bestfriend ni tawh rawh aw...chuan tunge hming niang awww...enge i hming a tan i duh?" tiin a zawt a, ui chuan a zawhna chu hrethiam awm deuh hian a bu nghut nghut a, Angeli mal chu a liak hleuh hleuh a, " Awi ivan cute tak, ihh...a nu (female) i ni bawk a, 'Rosy' tiin ka ko ang che aw?" a ti a, ui chuan a hrethiam a ni ve ngei ang, zawi te hian a bauh lauh a...Angeli chu a nui vur vur a. Minute 5 hnu velah chuan Rosy chu thutthleng atang chuan a chhuk a, tukverh bula thutthlengah chuan a lawn kai a, tukverh lam chu hawiin a bauh ta nghek nghek mai a. Angeli ngaih chu a thalo ngei mai, "Rosy, tinge...enge i hmuh a?" a ti a. Rosy lam chu a pan phei a, tukverh ah chuan a dak a, tumah an awm silo, mahse Rosy lah chu a bauh uar tulh tulh lehnghal a. TV a off a, Rosy chu inchung lamah kai chhovin a room ah a hruai lut a. Rosy chu khumah chuan a awm tir a, "Rosy, hetah hian lo awm la, ka inbual dawn a, thuawih deuhin lo awm la, misual anlo kal chuan lo seh hrep rawh aw.." a ti a, inbual tur chuan bathroom ah chuan a luhsan ta a.

Bath-tub a tui phuan suah ah chuan Angeli chu a inchiah dai vang vang a, a maimitchhing a, a dai sawng sawngin a inhria hial a ni. A mut a chhuak em em mai lehnghal a, a muhil diar diar a, reilote ah chuan a muhil ta mai a. Minute 5 vel mutthilh hnuah chuan Rosy bauh thut chuan a ti harh zawk a, a meng hrawk a. Chuveleh a awmna Bath Tub hnuai atang chuan kut vawt thlur mai hian hnung lam atangin Angeli hrawkah chuan a rawn rek thut mai a, tuiah chuan a hnim pil a. Angeli chu a tal vak vak a, a ke a leng awrh awrh a, tal chhuah a tum a, mahse a hrawka man tu chuan nghet takin a man a, thlah a tum reng reng lo. Tui atang chuan a rawn dak chhuak thei zeuh zeuh a, mahse a rekbettu kut bawk chuan a rawn rek leh a, tuiah bawk chuan a hnim pil leh zel mai a. Reife an inbeih hnu chuan Bath Tub atang chuan a zuangchhuak a, a zuanchhuah rual chuan inchhung light zawng zawng chu a thim nghal vek a. Towel a dap nghal a, adap fuh hlauh mai. Towel chuan a taksa chu tuamin slipper pawh bun lovin ke lawngin rang em emin bathroom chu a chhuahsan nghal a. Inchhung chu a thim em avang chuan engmah a hmu tha theilo a, "Rosy...Rosy.." tiin a ui chu a au vak vak a, mahse Rosy chuan a chhang let lo, a bauh thawm hriat tur pawh a awm lo. Inhnuai ah chuan harsa takin a chhuk thla thei mai a, tichuan light on natur plug chu bang velah chuan a dap kual a, a dap kual hrep hnuah chuan a dap fuh ta. Light chu a on a, inchhung chu a eng nghal uar mai a, mahse...ahma khan tu off nge ni ta ang?

Door bell rawn ri chuan Angeli chu a ti phu chiang ngei mai. Hlau deuh tho si, mahse hawn lo chi siloh, huphurh deuh chung chuan kawngka chu ava hawng a, Sanga alo ni, Sanga hmel a hmu chiah chu a tah a chhuak nghal em em a, Sanga chu kuahin a fawp vawng vawng a, Sanga chuan angaihna a hrelo hle mai.

"Angel, tinge i tah a, chuan towel chauh i veng lehnghal..chuan tinge i huh dup bawk si?"

"Sang...ka hlau.."

"Eng chu? Enge i hlauh a? Ui thar ka pek che kha rawn en pahin ka tia ka lo leng anih hi..mahse tinge hetia i awm a?"

"Sanga, Je...jeneti..."

"Enga...tu Jeneti maw? Enge awmzia?"

"Sang...Jeneti hi he inah hian a awm ani...min thah a tum.."

"Angel, enge i sawi a..enge awmzia..Jeneti chu kum 1 kalta khan a thi tawh..i hriat kha.."

"Ka hria lawm..mahse a thlarauvin min tibuai thin..min that mai ang..min pui rawh."

"Jeneti thlarau maw? Angel enge maw i sawi le? Hahdam rawh..."

"Min ring lo tiraw...mi a amaw min ti tiraw? Ni e..min ringlo mahla ka demlo che..mahse ka hmu chiang alawm."

"Nilove...ka ring che alawm...ka ring lutuk che...anih chuan zanin chu ka hawlo ang.. I bulah ka awm ang..zankhua in..atha em?"

"Sang......tak tak aw, ka hlau ania, min awmpui tak tak rawh aw, min kalsan suh."

"Awle...ka hawlo ang...i bulah ka awm ang."

Zanah chuan khum khatah chuan Angeli leh Sanga chu mudun in Angeli chuan Sanga chu nghet takin a kuah a, Sanga chuan, "Bawihte, i bulah ka awm tawh hi aw, engmah hlau suh." tiin a hnem a. Angeli chuan, "Um...i bulah chuan ka thla amuang veng veng mai." tiin Sanga chu a nuih ver ver a. Sanga chuan, "Ka hmangaih che duhtak" a ti a, Angeli chuan, "Duat...min fawp rawh.." tiin pangchang tak chuan Sanga chu a ngen vel a..Sanga chuan Angeli hmui nem tak leh senno hlarh mai ah chuan a fawp a, Angeli pawh chuan thiam takin alo chhanglet a. Sanga chu a duhthawh telh telh a, Angeli pawh chuan Sanga tukhum sam a th(r)am meuhin alo fawp let ve a...an thisen a lum dun tan ta hle mai. Sanga chuan a kawr a phelh a, Angeli pawh chuan rang takin a kawr alo phelh ve bawk a, tichuan ahma aia duhthawh leh nasa zawk chuan an in fawp leh ta bawrh bawrh mai a. Reilo te ah chuan ruak ngalngatin an mudun ta mai a, an taksa lum veve chu an thunun zo ta ngang lo, chumi zan chuan an pahnih chuan an thutiam dun, inneih hma a mipat hmeichhiatna hmang lo tura an intiamna chu an bawhchhe dun ta der mai. Chutia nuam an chen zawh hnu chuan ruak ngalngat chuan mu dun in, inkuah rialin an muhil dun ta a.

Zan alo rei zel a, Angeli chuan lum a ti em em a, a thlan atla bawrh bawrh mai a. A rizai sin lai chu a hlim a, a taksa mawitak mai pawh chu thlanin a bual huh vek mai. A taksa zawng zawng lang vek chuan a mu a, mahse a lum a la ti em em tho. A bula mu Sanga chu a va en a, ani erawh chu tui ti takin alo muhil a. A tho a, fan ava on a, a mu leh a. Fan chu an khum zawn chiah ah a awm a, fan vir chuan Angeli taksa chu a chhem dai sawng sawng a. Chutia a taksa lum lutuk a reh deuh hnu chuan Angeli pawh chu a zia ta deuh aniang, a muhil deuh siar siar a.

Room chhung chu thim deuh vek mahse thla a eng tha hle mai a, chu thla eng chuan Angeli te room chu a en pha hial a.
Chumai bakah dimlight an on tel bawk avangin a thim lutuk lo. Angeli chu saisir zawngin a mu a, a muhil tep tawh tihah chuan fan vir chu a tawp ta daih mai. A rawn lum leh ta pup pup mai a, a harh a, a thlan a tla leh nghal bawrh bawrh a. Current a awm lo ti dawn ila room chhunga dimlight kha ala in on reng bawk si a, mak ti tak chuan muang changin a zangthal a, fan lampang a han hawi chho chiah chu a thil hmuh chuan a barakhaih hle mai. Fan ah chuan Jeneti, saruak veka lo inkhai chu a hmu a, ataksa zawng zawng chu a var pup a, a dang vek bawk a. Zawi te te hian fan chu ala vir kual zui bawk a, Jeneti chu, chu fan vir chuan a then delh delh lehnghal a. Angeli chu a meng phar awn awn a, a thaw hrawk hrawk a, a au chhuak thei lo, ring tak leh rang tak hian a thaw vak vak a, chung lama a unaunu Jeneti inkhai chu mitkhap miahlo hian a en reng bawk a. A thaw hrawk hrawk a, a thaw rang bawk si, thawchham tur ang mai hian a awm a. Chutia minute khat dawn lai a awm hnu chuan a thawm chuan Sanga chu a ti harh ta a. Sanga chuan Angeli awm dan a hmuh chuan mak a ti hle mai, a sawi nawk nawk a, a be mawlh mawlh a, mahse Angeli chuan a chhang lo, a awm ngai chuan ala awm reng a. A kut chu rawn phar chhuakin inchung lam chu a kawk a, Sanga chuan inchung lam chu a han hawi chho a, engmah a hmu silo. Chuveleh Angeli chu a rawn thuchhuak hlawl mai a, a thaw hlup hlup a.

"Angel, enge awmzia, tinge khatia i awm a?"

(Thinrim hmel tak hian Angeli chuan a kut a hum ruh a)

"Sang...min that dawn, min chhuah a tumlo a nih hi."

"Tuin maw...tunge thah tum che a?"

"Ti mai mai hi chuan min chhuahsan tawp lovang, min thah hma chu min kalsan a tumlo nih hi."

"Angel, engemaw i sawi le..Jeneti bawk ami i sawi leh tawh a, a thi tawh tih chu i hriat kha, i mumang mai mai niang."

"Min ring lo ang tih ka hria lawm...mahse ka chiang ani. He inah hian a awm ve, tunah pawh hian kan bulah hian a awm ve alawm."

"Angel, duhtawk teh. Engpawh nise mut hahdam i mamawh...mu phawt ang."

Atuk zingah chuan Sanga chu a tho a, abulah chuan Angeli chu a lo awm tawhlo. A thawmhnaw te chu ha in inhnuai lamah chuan a chhuk a, Angeli chu a la hmu chuanglo nangin rawng alo bawl sa vek tawh a. Pawnah chuan chhuakin ahawi kual a, Angeli chu pipu ah thu in, tawnzau leh boxer chiah ha in thingpui in pahin chanchinbu a lo chhiar a. Sanga chuan Angeli chu a en vang vang a, amal var tak leh ngo tak chu a melh vang vang a, a enthla zel a, a chawn mam nalh tak te, a kesir senno chuk mai leh a ke zungtrang, nail polish dum-a hnawih te chuan a ti lang sexy zual em em a, a ke atang chuan zawimuangin a melh chho leh a, a awmbawr vel chu a'n thlek leh vang vang a. A hnute chu lian lutuk ni silo hian, a mawi tawk chiah mai hian a kawh lah mai a. Tichuan a enchho leh deuh a, a hmai mam tak mai leh a mitmeng pawl ram mai te, a hmui senno hlarh mai te chuan Sanga lung hi a dum hliah hliah mai a. A hmel lah a tha in a duhawm em em a, Sanga tan chuan Angeli chu vantirhkoh ang mai a ni, chuvang chu a ni mahna, a hming pawh Angeli ani miau a. Sanga chuan vannei a inti hliah hliah a, mahsela a rilru tihah tu ber chu ahma zana Angeli awmdan kha a ni. Angeli chu a va pan hnai a, Angeli chuan Sanga a hmuh veleh chuan alo nuih seih a...

"Ilo tho tawh maw..pa-a"

"Ivan tho hma ve a, ka duat."

"Nia, vawiin chu hna kallo in ka bulah awm nileng rawh aw?"

"Khai a...nang ang nula hmeltha leh piannalh bawk si ina min sawm chuan hna atanga ban hial pawh huamin i bula awm ka thlang daih zawk ang chu mawle."

"I van over tak...ti teh...chaw va ei ila.?"

Chaw an eikham hnu chuan Sanga leh Angeli chu titi dun in an inkawm melh melh a. Angeli chuan, "Sang, vawiin tlai chu ka nu han kan ve ang aw, hna kan kallo ta sa sa bawk a." a ti a, Sanga chuan, "Awle, mahse vawiin chhun hian ka nutei alo kal dawn a, i hmel a hmu ve chak a, khawdang daih ami ania, in ina lo kal tur hian ka sawm ania aw.."a ti a, Angeli chuan, "Ka nutei a? Nutei i neih awm i sawi ngai silova..mahse pawilo, lo kal rawh se..a monu hual hmelthat zia hi rawn hmu ve teh se." tih pah chuan a nui hawk hawk a. Hun alo liam zela, chhun dar khat a rik meuh chuan Rosy chuan pawn lama motor an inkawt lam pana rawn tlan phei a hmuh chuan a bauh lauh lauh a. Chumi thawm chu hria in Angeli leh Sanga te pawh chu pawn lam ah chuan an rawn inzui chhuak ve bawk a. Motor atang chuan nu pakhat, kum 40-45 vel ni awm tak, hmel zahawm tak leh hmeltha tak mai hi a rawn chhuak a, Angeli leh Sanga te lam chu ava melh a, a nui suk a. Sanga chuan Angeli beng bulah chuan, "Ka nutei a nih saw.." a ti a. Tichuan Angeli nen chuan Sanga chuan a inhmelhriat tir a, inchhung lamah an inzui lut ta a. Inchhungah chuan an thu ho a, eng eng emaw an sawi a, tichuan Angeli chuan, "Thingpui ka va siam lawk ange." tiin choka lamah chuan a phei a. Chutia a awmloh hlan chuan Sanga chuan chu nu chu zawi te hian a bia a...

"Doctor, ilo kal chu ka lawm e aw..."

"Nia nizan khan i message kha ka hmu a, hetia a buai tanna hi a rei tawh em?"

"Ka hrelo, ahma chuan hetia a awm ngai pawh ka hrelo..mahse nizan khan a awmdan kha a mak lutuk a.."

"Anih tak chu, ka lo kal dawn tih hi a hre lawk em?"

"Aw hre lawk e, ka hrilh a, mahse ngaihloh lamah a ngaih ka hlau a, a thinrim ka hlau deuh a, chuvang chuan ka nutei angin ka sawi ta mai che a nih kha, min hrethiam mai aniang chu."

"Apawi love..."

Angeli chu a lo let leh a, doctor nu chu thingpui pek pah chuan, "Sanga hian nutei a neih ka lo hre ngai miah lova...i lo leng chu ka lawm hle mai." a ti a, chunu chuan, "Nia, ka hmu ve chak hrim hrim che a, ka hming chu Lalbiakzuali ania, nu biakzual min ti mai dawnnia." a ti a. Angeli chuan, "Anih leh nu Zual, enge i tih thin a?" tiin a zawt a..Nu Zuali chuan, "Doctor ka nia.." tiin a lo chhanglet a, Angeli hmel nui sang chu a tawp deuh hmuk a, "Eng lampang doctor nge?" tiin a zawt leh kher a, Nu Zuali chuan, "Psychiatrist ka nia.." a ti a, a sawi zawh hma hma chuan thinrim em em mai hian a tho thut a, rum tak hian Sanga chu a melh a, Sanga chuan inthiamloh hmel tak hian a lo en a. Tichuan room lam pan chuan a chho ta daih a, Sanga chuan, "Nu Zual, minlo hrethiam lawk teh aw." tih pah chuan Angeli chu a zui chho a. Angeli chu umzui pahin, "Angel, hriatthiam tum rawh.." tiin a au lawm lawm a. Angeli chu a ding chat a, rum deuh hian Sanga chu a melh a..

"Mi a angah min ngai a ni tiraw? Min ring lo amaw?..atha e."

"Angel, hriatthiam tum ta che, i damlo a nih hi.."

(a roomah a phei a, Sanga chuan a zui zel a)

"Min hrethiam dawn chuanglo, ka ring che a ka hrilh ve che a, mahse min awihlo a, mi rilru buai angah min lo ngai vela...amak khawp mai."

"Angel, chutin ngai mah ta che, i tana tha tur anih hi."

Motor chahbi a la a, room atang chuan a chhuak a, ahnungah chuan Sanga chuan a umzui zel bawk a. Sanga chuan Angeli chu hrethiam turin a ngen lawm lawm a, mahse a hrethiam duh tlat lo. Tichuan Angeli chu pawnlam ah a chhuak a, Sanga chuan, "Angel, khawnge i kal dawn?" tiin a zawt a, Angeli chuan thinrim zet hian motora luh pahin, "Mi rilru buai leh mi a anga min ngaitu hi ka mamawhlo che, ka nu bulah ka kal dawn." a lo ti vin hlur a, Sanga chuan, "Kal suh, lo chhuak rawh..mawhh khawngaihin, Angel..tihian awm suh." a ti lawm lawm a, mahse Angeli chuan a ngaithla duhlo.

Motor chu a start a, Sanga chuan, "Angel...khawngaihin...lo chhuak la kan sawi tha leh dawn lawm." a ti a, mahse Angeli chuan ngatan mah ngailovin chak takin garage chhung atang chuan motor chu a 'back' chhuak a, Sanga chuan ring tak hian, "Angel...nilo Angel..Rosy, Rosy-i khaaa..." atih rual rual chuan ui beleuh tuar ri chuan Angeli chu a ti phu zawk a, motor chu a ti ding chiang ngei mai. Muangchangin mittui tla phung chungin Angeli chu motor atang chuan a rawn chhuak a, Sanga pawh chu a rawn tlan phei vat a. Angeli chuan motor hnunga Rosy-i nunna nei tawhlo tih hriat taka thisen nena lo let reng ahmuh chuan a hmui a hup a, a tap a, "Sanga, ka Rosy-i, ani theilo..." tiin Sanga chu a kuah a, a tap hawm hawm a. Sanga pawh chuan lo kuah let ve in a insum thei bik lo, Rosy-i ruang chu a en a, a mittui a luang zawih zawih a. Angeli chuan, "Sang, doctor hnenah min hruai rawh...ka diklo, ka a tawh ani." a ti a.

Chumi tlai chuan Doctor Zuali chuan Angeli chu a private office ah chuan a awmpui a. A BP te a check sak a, damdawi ei tur vel te a chawh fel hnu chuan doctor chuan thlalak lian deuh mai hi a la chhuak a, bangah chuan ava tar a. Doctor chuan, "Angel, thlalak saw en vang vang teh." a ti a, Angeli chuan thlalak chu a en a, chhum (clouds) tam deuh thlalak chauh hi a ni a, ho a ti angreng hle mai a. Doctor chuan, "Enge i hmuh le?" tiin a zawt a, Angeli chuan, "Chhum bak engmah ka hmulo." tiin a chhang a, doctor chuan, "Chhum chauh maw i hmuh a, chhum zia rang saw en chiang la, sakei zuang lai saw i hmu lo mi?" tiin a zawt leh a, Angeli chuan chhum thlalak chu a enchiang a, doctor sawi ang ngei chuan sakei zia rang chu a hmu a, "E..aw a nih tak khi." tiin a chhang a. Doctor chuan, "He thil ka entir nachhan che chu nakinah ka la hrilh ang che. Ahmasa in Jeneti nena in chanchin hi min hrilh phawt teh le..." a ti a. Angeli chuan tukverh lam chu a en a, tichuan Jeneti nena an chanchin chu a hrilh ta a....

"Ka unaunu Jeneti nen hian kan inhmangaih em em a, unau chauh nilovin, thian tha tak pawh kan ni tel bawk. Kan naupan lai atang tawh khan ka nu hian engkim hi a in angin min tihsak vek zel a. Kawr in ang, kawrfual in ang, kekor in ang, pheikhawk in ang thlengin min leisak thin a, chubakah puan a thui thin a, Jeneti nen pawh hian a in ang vekin min thui sak thin. Jeneti hian a naupang zawk ang mai hian min en a, kan naupan lai a school kan kal lai pawn mipa naupang ho takngial pawn min tibuaiin min chhaih ngam ngailo, achhan chu Jeneti hian min chhan thin vang a ni. A tetlai atang tawh hian ani hi chu a kawlh em em a, a kawlhrawng hle bawk. Chuan kan birthday te hi a theihnghilh ziah a, kumtin mai hian hrilh chawp ziah angai a, kan nulat hnu thleng pawh khan ala theihnghilh fo thin. Engtik lai pawh a awmdun tur leh inkalsan lo turin kan intiam a, kan thih thlenga inphatsan lo turin kan intiam a ni. Kan hmel a in ang chiah chiah a, mahse danglamna tamtak kan nei thung. Ani chuan tarmit avuah a, amit hi a tha lutuk lo a, chuan a sam a kir a, kei ai hian tlemin a tawi deuh zawk bawk. Chuan tlemin kei aiin a thau deuh bawk a, chuan a mithmul bulah hian ser tereuhte a nei bawk a, chu zawng chu kan taksa ah chuan danglamna kan neih chu animai. Keichu hman atang tawh in ka dawih a, ka tuar a zuau em em a, ka zaidam a, ka thinrim har hle bawk. Mahse Jeneti erawh chu a thinchhia a, a vin hlur zel a, mahse mi fel tak ani, min duatin min hmangaih em em thung a ni."

Doctor chuan ngun takin a lo ngaithla a, "Anih leh Angel, chuti khawpa inhmangaih in ni si a, mahse tinge Jeneti thlarau hian thah che a tum anga? Enge maw intih thiamlohna leh inhauhna in nei mi, athih hma vel khan?" tiin a zawta, Angeli chu a thu kun lap a, ahnuk a ulh a, atap dawn titih der mai a. Doctor chuan inthiamloh hmel tak hian, "Awle awle...vawiin atan chuan tawk phawt rawh se..i kal thei ang..naktukah kan inhmu leh dawn nia." a ti a, Angeli chuan Hospital chu a chhuahsan ta a.

Chumi zan chuan Sanga nen bawk chuan an riakdun leh a, anu dam hma chu Sanga chuan awmpui a tum tawp tawh a ni. Vanneihthlak tak maiin chumi zan chuan Jeneti a rawn lang lo tlat, tichuan chumi zan chuan tui takin an muhil ve thei ta hlauh mai a. Atuk zingah chuan hma takin Angeli chu a tho a, an inkawtah chuan a vei a vei a, ahma zan khan ruah alo sur nasa bawk nen, an inkawt vel chu a huh nuai mai a. Tichuan kawngpui ah chuan a kalphei a, enge maw hi a ngaihtuah neuh neuh a, zingkar a ni bawka mipui veivak hmuh tur an la awmlo. Tichuan minute 3 vel a kal hnu chuan inlama let leh tura a inher chiah chu a thil hmuh chuan a ti phu chiang kher mai. A kehniak bulah chuan abula kal ve niawm tak hian kehniak hi a lo awm a, mahse chu kehniak ah chuan thisen a kai bik a, chu kehniak thisen kai chu a chhui zel a, a kalna hnu velah chuan kehniak thisen kai chu a lo awm ve zel chu niin. Chu kehniak chu an in gate zawnah a tawp ta chat a, rang em emin inchhungah chuan a tlan lut a.

Sanga chuan thingpui a lo in a, "Ehee..khawnge i kal daih a?" tiin alo zawt a. Angeli chuan Sanga bana va vawn pah chuan, "Sanga, min ringlo tiraw, min ring lo ani tiraw..lo kal rawh ka hmuh tir ang che..thudik ka sawi zia ka hmuh ang che." tiin Sanga chu pawnah chuan a kai chhuak dawr dawr a. Sanga chuan hrilhhai zet hian, "Khawnge kan kal dawn?" tiin a zawt a, Angeli chuan, "Lo kal phawt rawh.." a ti a, gate bul an thlen chuan Angeli chuan kawngpui lam chu kawk in, "Saw en rawh.." a ti a, Sanga chuan kawngpui lam chu a en a, "Enge?" a ti deuh hu a, Angeli chuan kawngpui lam chu a en ve leh a, mahse kehniak zawng zawng te kha a lo awm tawh lo, kawngpui chu alo fai em em lehnghal. Angeli chuan, "Sanga, dawt ka sawilo, helaia ka kalphei khan ka kalna bul zelah a kehniak a rawn awm ve alawm, ka ti tak tak..Sanga dawt ka sawilo min ring rawh." a ti chiam chiam a, Sanga chuan a kutah a vuan a, "Hahdam rawh..Angel, ka ring che lawm.." a ti a, Angeli chuan, "Doctor bulah khan ka kal duhlo..min hruai suh aw..i bulah ka awm duh zawk.." tiin a tap tuau a, Sanga chuan a kuah a, "Angel hahdam rawh...i kal lo ang..i kal miahlo ang..doctor bulah chuan ka hruai miah lo ang che." tiin nghet takin a kuah a.

Sanga rilru chu a buai hle mai a, Angeli hi mi a ang maiin a khawsa thin bawk si a. Nge ni anga Jeneti thlarau chu inchhungah hian a awm ve tak tak zawk, mahse ni theiin a ring silo, Jeneti thlarau tih vel ai mah chuan a hmangaih em em leh a nupui hual ni bawk Angeli chu a ngaihtuah zawk a, mi rilru buai ang mai a nih tawh avang hian thil thalo zawk a thleng ang tih a hlau a ni. Sanga chuan Angeli hi awmpui reng mahse, a awmpui char char thei dawn bik siloa, Angeli nu a damthat hunah damdawiin atangin alo chhuak anga, chutah chuan ani chu an in lamah a haw ngei angai tawh dawn si a. Angeli nu chuan Angeli awmdan chu a hmu ve ngei anga, eng angin nge a ngaih anga, afanu chu mi anglo ang maiin a awm thin a ni tih a hmuh ve hunah chuan engthil nge thleng zel dawn tih thleng chuan a ngaihtuah a. A bula Angeli tui taka muhil siai siai chu a en a, Sanga chuan a lainat hle mai, a mittui a tla hial a. Kun hniamin Angeli hmui ah chuan a zu fawp zeuh a, "Bawihte, ka van khawngaih tak che em...i tawrh ai hi tuar zawk thei ila ka van ti tak em." tiin Angeli sam chu a chul heuh heuh a.

Sanga chuan Angeli chu inhnuai lamah a chhuksan a, choka lamah chuan a phei a. Zing chaw a eikham hnu chuan pawnah chhuakin pawna pipu ah chuan thu in meizial a tan a, a zu khu hluah hluah mai a. Thil tamtak angaihtuah a, a rilru a buai ngei mai. Chumi ni pawh chuan a hna ah akalloh phah leh ta ringawt a, mahse a nupui hual Angeli tan vek ani. Sanga chuan a rilru in, "Angeli nu dam hunah damdawiin atangin alo chhuak anga, kei chu ka haw ngei angai tawh awm si a. Ka nu hian Angeli awmdan a hmuh ve hunah chuan a mang ang dawn si a, Angeli veng tu ber Rosy-i lah a thi tawh bawk si, amah vengtu tur dang ka ngaihtuah sak leh phawt mai teh ang." tiin a ngaihtuah a. A insiam sawk sawk a, a thianpa Tluanga (Tluanga hi chu inhriat tawh kha..) te in lam pan chuan a kal nghal a. Tluanga hi ui ngaina mi tak a ni a, ui chi hrang hrang, breed changkang tak tak a vulh teuh a, Rosy-i pawh kha Tluanga ui a ni a, Sanga hian cheng 15000 laiin alei a, chupawh Tluanga hian ala pe tlawm zawk a ni.

Tluanga te in a thleng chu inchhungah a lut a, an han titi luam hnuah chuan Sanga chuan...

"Taka thianpa, hmanni a Husky ka rawn lei kha, khatiang ang deuh hlek kha ila nei em?"

"Husky hi chu Mizoramah an vang em em a, ui tha leh man to tak an nia, pahnih chiah ka nei a, ahmaa mi pawh kha ka thianpa i nih vangin ka leitir phal mai mai che anih kha.."

"Ih...pakhat ila nei tihna nimaw?"

"Aw nei e, tinge?"

"Ka duh leh a...ka lo lei leh mai teh ang."

"Ehee..khawnge ahma ami kha?"

"Englo ania, ka thianpa pakhatin cheng 50000-i'n lei min dil a. Pawisa tam tham tak ani bawk sia, ka leitir ta mai nih kha."

"Khai aw...i lei tir a, mahse i duh leh tho sia, enge awmzia..pawisa hek mai mai."

"Awww thiana, ahma ami ka hralhna pawisa hian ka lo lei leh mai dawn alawm. Ahma aia to pawn pawi ka tilo."

"Ka phallo chu anilo a, mahse plan kalo nei ve tawh a. Tuna ka Husky neih hi a nu(female) tho ani a, ka uipa pakhat Alsasian nen hian inpawl se ka tia, a hur hun ka nghak a.."

"Bawiha please...ka mamawh a nia."

"Awle awle..nih leh ka rilru ka thlak hma hian la vat rawh."

"Ka lawm e."

Pawisa te an inpek fel hnu chuan Sanga chuan a ui thar chu a kai chhuak a, ahma aia to daihin a lei lehnghal a. Tluanga bulah khan Rosy-i chungchang kha dawt a sawi a, achhan pawh thudik sawi se chu Tluanga khan Sanga chu a vaw hlum duh hial ang. In lam pan chuan Sanga chu a inkhalh phei a, Angeli te in zawn ah chuan car chu a park tha a. A ui leithar chu kaiin in lam chu a pan pui a, in kawta Angeli pipu a lo thut pah a phone lo khawih nuap nuap chu a hmu a. Angeli chuan Sanga a hmuh veleh chuan a thuthmun atang chuan a ding chhuak a, Sanga chuan Angeli lam chu a va pan phei a...

"Angel, vawiin chu ka thianpa te inah ka leng a, chuan he ui hi an lo vulh a, Rosy-i nen an in an em avangin i duh ka ringa, lei ka dil a..ka lo leisak che."

"Sang..Rosy-i kha chu a thi tawh a, hetia tih kher angai hleinem."

"Mahse Angel, vengtu i mamawh ka tih kha, he ui hi Rosy-i nen an in ang em a, a nu(female) ve tho a nia...ka leisak ve tawh che sia, min pawmsak hram la."

"Awle a pawi love, nihleh ahmingah enge kan phuahsak ang?"

"Rosy-i nen danglamna an nei em em lo bawk a, Rosy-i ti leh mai ila.."

"Awle..apawi hleinem."

"Ihmaw Angel, kan inah ka va haw ve phawt ange aw, lo in enkaw tha la, tlai lamah ka lo phei ang."

"Awle....anih phawt aw...lo kal rawh le Rosy..i lut ang hmiang."

Inah chuan Rosy-i chu Angeli chuan a kai lut a, chaw eitur te siam sakin choka ah chuan aluh san a. Angeli te choka luh dawn chiah ah hian parda an zar a, chu parda rawng chu a var a ni a, parda puan chu puan pan te mai hi a ni a. Sanga pawh chu motorah lutin an in lam pan chuan a inkhalh phei nghal a. Kawng chanve vel a thleng trep tawh tih ah chuan a phone a rawn ri a, doctor Biakzuali a lo ni.

"Hello, nu Biakzual..enge ni ta?'

"Sanga, khawngaihin Angeli kha damdawiinah i lo hruai thei angem?"

"Aw thei e...ka va kal ange."

"Awle ka lawm viau ang."

Sanga chu Angeli te inlam pan chuan alet leh ta a, reilote ah a thleng nghal mai a. Inchhungah chuan a lut a, Rosy chu sitting room ah thutthleng sei ah lo bawkin a lo muhil siai siai a. Sanga chuan Angeli chu zawngin a vei kual a, tichuan choka lam a thawm chu a hriat avang chuan choka lam chu a va pan a. Choka a thleng tep tihah chuan a thil hmuh chuan a ti ding chat mai a, mitkhap miahlo hian choka lam chu a en tlawk tlawk mai a. Choka luh dawna parda in zarah cuan Angeli thla (shadow) hnunglam hawi chunga lo ding chu a hmu ngei a, mahse amah chauh a hmu lo. Jeneti ni awm tak, amah ang tiat vel, mahse samkir deuh bik leh tlema tawi deuh bik hi a bulah chuan alo ding ve hi a hmu a, Jeneti chuan zawimuang hian Angeli darah chuan a lu ala nghat zui a. Sanga chuan athil hmuh chu mak a tiin a awihlo hial zawk a, mahse a hmu chiang em em mai bawk si. A thlanfim aluang nghal zawih zawih a, mitkhap leklo hian Angeli te unau, parda phena an thla chu a en tlawk tlawk a. Muangchagin choka chu ava pan hnai a, parda chu va ban dek dekin vawileh khatah parda chu a hlim thut a, mahse Jeneti a hmu ve tawhlo, Angeli chiah alo awm bawk si. Angeli chuan Sanga a hmu chiah chu a phu zuk a, a tomato sause bur (glass) ken lai chu chhuatah chuan a thlauh keh ta nuaih mai a, chu tomato sause chu chhuat laiah chuan thisen ang mai hian a luang del del lehnghal a, chungte chuan Sanga chu a ti hlau zual em em a. Angeli chuan, "Awi Sanga..min ti phu chiang lutuk..enge ni ta a?" tiin a zawt a. Sanga chuan.."Ihh..engmah nilove, englo ania. Doctor khan..ih...ih..lo kal rawh a ti che." a ti bah deuh nuai a, Angeli chuan, "Sanga...i tha maw?" tiin a zawt nawn leh a, Sanga chuan, "Aw..ka tha e." tih ringawt hian a chhang a, Angeli chuan, "Awle, kan kal dawnnia mahse heng ho hi kan tifai lawk ang." a ti a, mahse Sanga chuan, "Aih..tunah lo kal rawh..nakinah i tifai mai dawn lawm" a ti a, Angeli chuan, "Mahse..hetia kan dah tawp chuan a chiloh emai.." a tih pawh chuan Sanga chuan Angeli ban a pawh dawr dawr pah chuan, "Aho emai..doctor a hmanhmawh tawh...kal vat ang...nakinah kan tifai mai dawn nia.." tih pah in Angeli chu choka atang chuan a pawt chhuak dawr dawr a. Angeli pawh chu a kal ve ta mai a, pawnlam an pan lai chuan Sanga chuan choka a parda chu ava en leh a, Jeneti thla amah chauh a lo la ding chu a hmu a, mak a ti hle mai. Tichuan in chu chhuahsanin motor ah chuan an lut a, Rosy-i an hruai bawk a, damdawiin lam pan chuan an tlan ta a.

Damdawiinah chuan doctor Biakzuali chuan a private roomah bawk chuan Angeli chu a ko lut leh a, "Angel, nimina ka zawh che kha, min chhang tawh la..." a ti a, Angeli chuan, "Engchu maw?" a lo ti hu mai a. Doctor chuan, "I sawi dan hmang kha chuan tikhawp khan Jeneti nen khan naupan lai atang tawhin in inhmangaih em em a, in inkawm ngeih em em a, mahse tinge tunah a thlarau hian thah a tum tlat mai che le? A thih hma khan intih thiamlohna emaw in nei em ni?" tiin a zawt a, Angeli chu a ngawi vang vang a, abiangah mittui a rawn luang thla ngiai ngiai a, a inhnit faih faih a, doctor lampang chu hawiin, chiang takin doctor chu a melh a.

"Ka pi, Jeneti nen khan unau inhmangaih tak kan ni a, kan innel in kan in duhsak tawn hle bawk. Vawikhat chu kan graduation day ah kan thianpa Tluanga te inah graduate lawm nan tiin kan party a, chumi zan chuan he khawvela ka mipa hmangaih hmasa ber, ka vawikhat hmuhna atanga ka lungdum nghal em em tu Sanga hi ka tawng ta a. Ka vei ngawih ngawih a, min melh te hian ka lai vek zel a, awmngaihna ka hre ngailo. Mahse kei aiin ka unaunu Jeneti nen chuan an innel zawk a, an inbe reng zel a, ka thik tep hial thin zawk asin. Nikhat chu Jeneti nen kan leng chhuak a, kan in atanga hla lutuklo ah hian park a awm a, chutah chuan thu dunin lehkhabu kan chhiar dun a. Kan hma takah chuan, pen sawmhnih vela hla ah hian Sanga chu a rawn ding a, paper lianpui hi a rawn keng a, ti chuan kan hma zawn takah chuan thu in a bag atang chuan pencil ala chhuak a, kan unau a min rawn en zeuh zeuh pah chuan thil lemziak ni awm tak hian paper ah chuan thil hi a ziak mual mual a. A ziah mawlh mawlh lai chuan Jeneti chuan min rawn nghawk zeuh a, "Sawpa saw hman zan atang khan kan pahnih hian min umzui reng in ka hria, tunah pawh sawn kan pahnih hian min rawn en zeuh zeuh reng a..kan pahnih a kan thu dun lai lem hi a ziak a ni ngei ngei ang." a ti a, keichuan, "A nilo ang, chubakah min zui ru lo ang, mi fel tak a nih ka ring." tiin ka t(r)an tlat a, achhan chu ka hmangaih em vang a ni. Chutia Jeneti nena kan inbiak lai chuan Sanga chuan phone call a dawng a, a chhang a, phone a mi a biak mawlh mawlh pah chuan a thil lem ziah lai chu kalsanin hmun dangah a kal ta daih a. Jeneti chuan, "Kal ang le...enge a ziah saw va en ang." a ti a, mahse keichuan, "Jenet, a chiloh, min hmu hman ang." ka ti a, mahse Jeneti chuan, " Lo kal mai mai teh." tih pahin min kai phei dawr dawr a, Sanga thil lem ziahna paper chu kan en ta a."

(A inhnit feih feih phawt a, tichuan a sawi chhunzawm leh a...)

"Paper ah chuan Jeneti nena kan thu dun lai lem chu a lo ziak ngei mai a, lemziak thiam tak a ni, a ang em em mai lehnghal a. Jeneti chuan, "Ka sawi reng kha..kan pahnih hian min zui ru alawm...Angel, fimkhur ang che aw, mi hlauhawm tak pawh a ni maithei asin." a ti a, mahse keichuan, "Kan pahnih thudun lai lem a ziak ve animai a, keichuan mifel tak a nih ka ring." ka ti lui tlat a. Chutia kan titi lai chuan Sanga chu a rawn phei a, kan bulah chuan a rawn ding a, min rawn en a, min nuih vur vur a, ka lai nghal der mai. Tichuan kan han titi deuh luam a, chumi hnu chuan kan haw ta a. Zanah chuan ka muhil thei tlat lo mai a, Sanga chu ka rilru ah a awm reng a, a nui hmel te kha ka mitthlaah a cham reng a, a pa hliah hliah bawk si a, ka hmangaihin ka ngaizawng tak zet zet a ni. Atukah chuan Jeneti nen bawk chuan park ah chuan leng dun lehin ahma ni a kan thutna ngaiah bawk chuan kan thu leh a, Sanga bawk chu lo kal lehin a tih dan pangngaiin kan lem chu a ziak leh ni ngei tur a ni. Kan lem a ziah pah chuan min melh zeuh zeuh a, min melh apiang chuan kei chu ka lai deuh nghal zel mai a. Tichuan Sanga nen chuan kan innel tawlh tawlh a, kan inah hial te a lo leng ta a, ka nu nen pawh an inmil khawp mai. Kan inngaizawng dun tan ta a, zantin mai hian a lo leng a. Zankhat Sanga lo leng chu sitting room lamah kan pathumin kei leh Jeneti leh Sanga te chu kan thu ho a, kan titi hova. Jeneti chu a titi tui hle mai, mahse enge a sawi erawh Sanga nen chuan kan ngaihtuah lo, kan inmelh dun reng a, kan innuih ver ver a. Chuveleh Jemeti chuan rum tak leh thikna mitmeng a min melh chung hian ka kut ah chuan a thingpui in lai chu a tilui tih hriat tak hian a rawn tibua a, a sa kher mai. Ka t(r)e thawt mai a, Sanga chu rawn tlan phei nghalin min rawn buaipui vat a, chutia duat taka min buaipui lai a hmuh pawh chuan Jeneti chuan min thik tih hi ka hria a, rum deuh hian min melh dun a. Chumi zan atang chuan ka hre ta a, Sanga hi Jeneti hian a thik a, kan unau a kan inhmangaihna tichhe tuah a puh ta tlat mai a. Khami zan atang khan Jeneti chuan ahuat hian min haw hluah hluah tawh a, min be tha duh tawh lo a, kan unau inkar chu a chhe chho tan ta hle a, a thih hnu thleng pawh hian min haw ta nih hi."

Angeli thusawi chu doctor chuan uluk takin a ngaithla a, abu nghauh nghauh a, "Chumi vang ringawt chuan ti hian a tibuai dawn che mi? Tun thleng pawh hian?" tiin a zawt a. Angeli chuan, "Um min la hua a ni, min la haw takzet. Achhan chu tunah Sanga nen kan la inzui zel a, tunah phei chuan kan inhual tawh lehnghal, kan inneih na tur hian thlakhat bakin min dal tawh lo." tiin alo chhang a. Doctor chuan, "Awle Angel, vawiina ka hriat duh chu ka hre tawhin ka hria...i kal thei e." a ti a, Angeli pawh chu a haw ta a.

Zan alo ni a, Sanga leh Angeli pawh chaw te an eikham hnu chuan TV te an endun leh phawt a. Dar 8 a pelh hnu chuan Angeli chu a mu ta daih a, Sanga erawh chu sitting roomah thu in laptop chu a khawih mial mial a. A laptop khawih lai pawh chu a ngaihtuah lo, a mitthla ah chuan chhuna a thil tawn mak tak mai hlir kha a ngaihtuah a. Thil pakhat hriatchian deuh mai chu a nei, chu chu Angeli khan dawt a sawi lo, Jeneti thlarau chu inchhungah chuan a awm ve a ni...achhan chu amah pawn a hmu ve tawh tlat a ni. Chu tia a inngaihtuah melh melh lai chuan sitting room bula lehkhabu dahkhawmna wardrobe chunga 'tennis ball' chu a rawn tla a, a sawt bauh bauh a, Sanga hmazawn chiahah chuan a rawn lir phei a, Sanga ke zawnah tak chuan a ding chat mai a. Sanga chuan mak tihna em em pawh a nei chuang lo, a thutna atang chuan a tho a, ball chu lak tumin a kun hniam a, a la dawn chiah chu ball chu amah in a lir phei leh ta daih a.Sanga chuan mak a ti ngei mai, ball chu a zui zel a, inchung room pan chhohna step zawnah chuan ball chu a ding chat a. Sanga chu va kal pheiin ball chu lak leh a tum chuan a ban a, mahse amahin ball chu a lir phei leh ta daih mai a. Sanga chuan mak ti tak chungin ball chu a umzui lei a, sitting room lamah bawk chuan a lir phei leh a, lehkhabu dahkhawmna wardrobe hnuaiah chuan a lir lut ta daih a. Sanga chu a thingthi a, wardrobe hnuai ah chuan a ban a rawlh lut a, ball chu a dap kual a, paper ni awm tak hi a dap fuh a, a la chhuak a. A rin ang ngeiin paper in zial, lian tak hi a lo ni a, chu paper inzial chu a hawng a, chu paper chu a hmuh hnu a ni. Paper ah chuan Jeneti dam lai a park a Angeli leh Jeneti an thutdun a, Angeli lem chauh a ziah bikna a ni, Jeneti lem erawh a ziak velo. Mahse chu papar chu a lai takah chuan a lo thler a, mak a ti hle mai. A mitthla ah chuan chumi hunlai vel chu alo lang chuai chuai a...

February ni 14, 2017 a ni a, Valentines day a ni a, chuan chumi ni chu Jeneti thih ni kha a ni. Sanga chuan Angeli lem a ziah chu a zial a, Angeli te in lam pan chuan a inkhalh phei a, Valentines day gift atana pek a tum a ni. Hemi ni hian Sanga chu Bangalore-ah a hna avangin thla 6 lai cham turin a zin dawn a, a kal hmain chu a lemziah chu Angeli pek ngei a tum kha a ni a. Angeli te in a thlen chuan an inkawtah chuan dingin Angeli chu a au vak vak a, mahse chhangtu an awm lo. A phone a, a pick up thei si lo. An inkawtah chuan darkar chanve lai a nghak a, mahse Angeli hmel reng reng a hmu lo. A chhungte chuan rawn phone in a tlai tawh thu leh thlawhna a thlawk chhuak hnai tawh dawn tih thu an rawn hrilh chhen bawk si, a mangang hle mai. An thenawm te inah chuan a lut a, Pi Rini bulah chuan a lemziak chu a pe a, Angeli lo pe tur chuan a ti a, lungngawi lo tak chuan Lengpui Airport lam pan chuan a inkhalh phei ta a.

Sanga chu a ngaihtuahna atang chuan a harh zawk mai a, lemziak chu en vang vang a. A tho a, a theih ang tawkin fimkhur takin paper thler chu a char tha a. Roomah chuan a han chho a, Angeli chu a kai tho a. Angeli chu a zi mar tual tual a, "Mi muttui ve theih lai lai a, enge ni ta a?" tiin Sanga chu a zawt a, Sanga chuan, "Titi dun lawk ang, sawipui tur che ka nei tlat" tiin a chhang a. Angeli chu a hrilhhai hle mai, "Tun ang huna mi muttui lai titi tura inkaih thawh chu a hunlo emai, naktuk zingah sawi mai ang." a ti a, mahse Sanga chuan, "A pawimawh ka tih chu, sitting room ah ka lo nghak ang che, lo chhuk ang che." a ti a, a chhuahsan ta daih mai a. Angeli chuan mak a ti em em a, a lungawi vak lo hial reng bawk a. Peihlo tak chuan a tho a, inhnuai lam pan chuan a chhuk ta a.

Inhnuai sitting room ah chuan Sanga chu amah in a lo thu a, abula lehkha inzial chu a hmu bawk a. Sanga bulah chuan a thu a, "Sanga engthil nge ni a? Ava pawimawh awm ve a?" tiin a zawt a, Sanga chuan lehkha chu a pe a, Angeli chuan lehkha chu a la a, a hawng a, lehkha chu a en a, ama lem, ang em em leh nalh taka lo inziak chu a hmu a, a lungchhe lutuk chu a hnuk a ulh nghal der mai. Sanga chuan, "Khami ni kha ila hria ang tiraw?" tiin a zawt a, Angeli chuan a lu a bu nghauh nghauh a. Sanga bawk chuan, "Ka au che a, i lo chhuak duh lo a, khami ni khan Bangalore ah ka zin dawn kha a ni a, ka cham rei dawn sia lo hmuh che ka duh a. Chubakah Vday ani a, gift atana pek che ka tum a, ka thei silo a. Pi Rini bulah khan ka dah ta tawp a, tichuan ka zin san ta che a. Bangalore ka thlen khan ka phone leh che a, mahse min chhang duh silo. Ahnu a ka thil hriat leh kha chu Jeneti boral thu kha a ni a, thla 6 hnuah ka lo haw leh a, he ka lemziah hi chu ka lo theihnghilh tawh avangin ka zawt tawh lem lo che a. Angel, min hrilh teh..Jeneti kha engvanga thi nge, inchung atanga tla hlum a ni tak tak em? Nge ni a thildang in inkarah hian a awm zawk?" tiin a zawt a. Angeli chuan Sanga kutah chuan nghet takin a vuan a...

"Sang...nang hi ka hmuh hmasak ber ni atang che khan ka duh che a, ka hmangaih nghal che a ni. Mahse maw...nang hi kei chauh hian ka hmangaihlo che, Jeneti pawh khan a hmangaih ve che asin, a hmuh tirh che atang khan a hmangaih ve tho che alawm, keimah aia nasa zawk mah hian a hmangaih che asin. Zankhat thi (necklace) min rawn pek zan kha ila hria em? Khatih lai khan ka bulah khan Jeneti a mu a, keini chuan amuhil tawh amaw kan ti a, mahse lehlam a hawi avang khan kan lo hrelo mai zawk chauh a ni. Khatia kan pahnih a hlim taka kan awm lai khan lehlam hawiin rilru na takin mittui tla zawih zawihin a lo awm ve asin. Tichuan khami ni, a thih ni ah khan, ilo kal hma deuh hret khan kan inhau a.

'Jenet, vawiin chu Sanga a zin dawn a, Lengpui ah va thlah liam ve ang hmiang.'

'A tul lo, inah tih tur a tam, a cham hlen dawn pawh nilo, alo haw leh mai dawn alawm.'

'Jenet, kan inhmulo rei dawn si a, ka ngai dawn em alawm.'

Chutah thinrim tak hian min melh a, 'I mak hle mai, i bialpa vang hian kei hi min hlat tawh zia hi hre rawh. A kohna che apiangah i kal a, nang lah chuan ui ang maiin i zui duam duam a, kei chu min ngaihtuah tawh lo.' a ti ta phiar phiar mai a, ka na takzet a ni. Jeneti hian tawngkam vin in vawikhat mah min la hau ngai silo a, chutia min vin chu ka lung achhe kher mai. Chutia kan inhauh lai chuan kan inkawta min rawn ko lauh lauh ri kha ka hria a, chhuah ka tum a, mahse Jeneti chuan min man bet a, khumah min thlehtlu thuai a, ka hneh lo em em mai bawk si a. Jeneti chuan kan room kawngkhar chu a kalh hmak a, a bulah chuan a ding tlat mai a. Keichuan a kutah vuanin, 'Jenet, khawngaihin min kal tir rawh, vawikhat chiah ka hmu leh duh a ni.' tiin ka ngen a, mahse a phal chuang lo. Ka tap vak vak a, nang lah chuan min la rawn au vak vak bawk si a. Jeneti chuan, 'Amah vang sawn i â zo tawh anih hi..' a ti a, keichuan ka ngen a, 'Jenet, khawngaihin...Sanga nena kan inhmangaihna hi hrethiam ta che..' ka ti a, vin zet hian min nam thluk pahin, 'Nang ni pahnih hian ka hmangaihna hi in hrethiam bik lo.' tiin min vin khur khur a. Chutia Jeneti mizia inthlak ta thut leh min haw ta em em mai chu ka rilru ana em em a, kut min thlak vawikhatna a ni. Tichuan i motor start ri ka hriat chuan ka mangang hle mai a, 'Jenet, khawngaihin mawhhh...a kal tawh dawn nia saw, khawngaihin?' tiin ka ngen lawm lawm a, mahse ngawi rengin thinrim hmel zet hian kut kuankuah chungin kawngkhar bulah chuan a ding tlat bawk si, tichuan nang chu i tlan liam ta a."

Sanga chuan, "Anih leh he ka thil lem ziah hi engtin nge in inchhungah hian a awm a? Pi Rini chuan a pe che em ni? Chuan Jeneti thihdan kha kimchang deuh hlekin min lo hrilh teh.." tiin a zawt leh a, Angeli chu a thu kun lap a. Zawi muang hian Sanga chu a melh chho a..

"Khami ni khan chhun ah Pi Rini chu a rawn leng a, tichuan lemziak hi min pe ta a. Tichuan choka ah chuan keimaha ka awm lai a ni a, lemziak chu ka en a, ka lawm em em a, a mawi ka ti ngei mai. Hnunglam atang chuan Jeneti chuan, 'Kha kha enge?' a rawn ti thut mai a, ka phu chiang hle mai, lemziak chu ka zial tha vat a, ka hawi let a, lehkha chu ka hnunglamah chuan ka thukru a. Jeneti chu lo kal hnaiin, 'Khawimaw lo la teh..kha kha enge?' tiin min zawt leh a, kei chuan, 'Engmah nilo...a..aho lutuk." tiin ka lo chhang a, ka tawng bah deuh nuai mai a. Jeneti chuan vin zet hian, 'Ka hmu hman vek alawm mawle, lo la rawh.' a ti khur khur mai a, ka hlau ngei mai. Aw khur dur dur chungin, 'Jenet, ihh..ihh.' ka ti dek dek a, 'KHAWIMAW' tih pahin ka ban a rawn pawt vak a, lehkha chu min phih thlak sak thuai mai a. Lemziak a hmuh chuan a thinrim hle mai, rumzet hian lemziak chu a en a, 'Nangma lem chauh a ziak a, kei ve chu mi mawl ang maiin i bulah ka lo thu ve tawp a, mi â ang maiah min ngai a nih hi..' a ti a, lehkha chu pawh thler a tum a, keichuan ka lo dang vat a, 'Nilo..khawngaihin Jenet, ti lo hram rawh.' ka tih pawh chuan a ngaithla duh lo, min nam sawn a, tichuan lemziak chu a pawtthler ta a. Ka tap zawih zawih a, chu lehkha a pawhthler hnu takngial pawh chu min la pe duh chuanglo, lehkha chu keng chhuakin a kal ta daih a. Tichuan chumi hnu chuan Jeneti chu ka hmu leh ta miah lo mai a, tlai thleng chuan a bo hmak mai a. Khawthim dawn tep ah chuan kan kawmthlanga Jeneti lo let reng chu ka hmu a, ka nu ka au a, alo tlan chhuak a, thenawm khawveng te anlo tlan khawm a, Jeneti chu a thaw tawh lo, a awmzia chu a thi der tawh tihna a nih chu. Jeneti khan a hmangaih em vang che leh, a ta i ni thei silo hi a rilru a na a, chubakah nang leh kei hi kan lo inhmangaih em bawk si nen, hmelma kan nih phah ta chu a ni si a, chu chu tuar zo lovin a inthat ta a ni."

Sanga pawh chu a inthiamlo hial zawk a, Angeli chauh nilovin a unaunu Jeneti pawn alo hmangaih ve reng tih a hriat chuan a inthlahrung takzet a. Angeli kutah chuan avuan a, "Bawihte, lungngai suh, engkim a tha leh vek dawn alawm." tiin a hnem a, Angeli chuan, "Sanga..." a ti tham tiak a, a kuah a, Sanga pawh chuan nghet takin a lo kuah let ve a. Tichuan room lamah chuan an chho a, tui ti takin an muhil ta a. Angeli sawi kha chu a rinthu mai mai a ni a, Jeneti mahni inthat a, inchung atanga zuangthla a ni ti erawh chiang taka proof-na a awmlo a, a thihchhan dik tak erawh hriat ala ni lo.

Angeli leh Sanga pawh chu an hna tan leh tawhin an nun pangngai chu an tan leh tawh a, Jeneti thlarau chuan a tibuai tawhlo a niang chu. Hlim takin an hna ve ve chu an thawk dun leh ta a, mahse Sanga chuan Angeli chu ala riahpui reng tho. Chutia karkhat lai mai an riahdun hnu ah pawh Jeneti chuan a tihbuai ngai tawhloh avang chuan an him tawh turah an ngai ngawt a, mahse an hma huna thil lo thleng tur erawh an hre lawk hauh si lo.

Zankhat chu Sanga chu a hna atanga a ban hnu chuan a chauh deuh avangin a thianpa Tluanga te inah chuan a lengkawi a, a'n lem dun sak nghe nghe a. Sanga hi zu in thin a ni lemlo a, mahse in ngailo erawh a ni lo thung. Engemaw nikhuaa han lem deuh sak erawh a ching rauh a, mahse a rui nawi ngai lo. Chumi zan pawh chuan a chauh em avang chuan tlem a zawng chu a in ve a, mahse a rui nawi em em lo. Inah a haw a, tlem chuan a kai ve deuh ni ngei tur a ni, a zai lut rut rut a. Inchhungah chuan a lut a, kawngka a kalh a, sitting room ah chuan a lut a, woofer ah chuan hla play pahin thutthleng seiah chuan a mu, a maimitchhing diar diar a. Inchung lam hawi a, ameng leh chiah chu Angeli chuan alo nuih ver ver a, Angeli chu a duhawm in a va han sexy teh kher em. Angeli chuan mutkawr dum(black) a mawng khuh t(r)awk hi a ha a, amal a lang vek a, kelawngin a awm bawk a, bra a ha lo tih hriat tak hian a hnute hmur pawh chu a lang thei hial a. Sexy tak mai hian muang chang hian stepah chuan a rawn chhuk a, Sanga chuan mitkhap lek lo hian alo melh reng a. Sanga bul hnai a lo thlen chuan Sanga chu a lo ding a, Angeli chu alamah a pawt hnai nghal a. Angeli chuan tisa chakna mitmeng tih hriat tak hian a melh a, an taksa chu a lum dun ngei mai. Sofa ah chuan Sanga chu a thu a, Angeli chu a pawm a, duhtawh tak hian an infawp a. Sanga lah tlem alo lem sak tawh bawk nen, a duhthawh sawt hle mai. Chutia Sanga nena nuam an chen lai chuan Angeli chu a mit a chhing diar diar a, a thla a muang ngei mai. Zawi muanga a meng leh chiah chu a thil hmuh chuan a ti phu chiang ngei mai. Inchung step tawp bera Jeneti, thikna mitmeng leh thinrim hmel em em a lo ding chu a hmu thut a, Sanga chu anam dawrh a, Sanga pawh chu sofa atang chuan a tla tawp mai a. Angeli chu a khur nghal char char a, a melh ngai chu a melh reng a, Jeneti chuan thinrim em em hian alo la melh reng a, Angeli hlau lutuk chu zau tak mai hian a ka a ang vak vak ringawt mai a.

Sanga chuan mak a ti hle mai a, sofa-a Angeli che chang lova a khur dur dur chu a sawi nawk nawk a, "Angel...i tha em?" a ti a, mahse Angeli chuan a chhanglo, a kut chu phar chhuakin inchung lam chu a kawk a. Sanga chuan inchung lam chu a hawi chho a, tumah a hmu bawk si lo. Woofer-a hla a play chu a off a, Angeli chu a awmdan ngai rengin a lo la awm a. Angeli chu a sawi nawk nawk a, Angeli chu a rawn harh chhuak hlawl mai a. A hawi kual ruai a, "Sanga..khitah khian Jeneti ka hmu...minlo en reng a..ka hlau lutuk." a ti ta chiam chiam mai a, Sanga chu a hrilhhai hle mai. Sanga chuan, "Angel, engemaw i chungah hian thleng ta le...tumah an awm loh khi.." a ti a, mahse Angeli chuan, "Ka hmu alawm...ka hmu chiang alawm Sang...ka hmu alawm, kan awmdan zawng zawng kha a hmu vek." a ti a, Sanga chuan, "Awle..engpawh nise..han chho ang..mu phawt mai ang." a ti a. Tichuan Angeli chu a mut tir a, Angeli chuan, "Sanga..min kalsan suh aw..ka hlau a nia." tiin a banah chuan a vuan tlat a, Sanga chuan, "Ka kalsan dawnlo che bawihte..mahse i mut angai..i bulah hian ka awm reng dawn lawm, mutthilh tum rawh" a ti a. Angeli chu a chul heuh heuh a, reilote hnu ah chuan a muhil ta tih hriat tak hian a hnar suk suk a. Sanga pawh chu a huaisen lutuk vak tawh bik lo, achhan chu Jeneti thlarau kha a hmu ve tawh tlat a ni. Angeli bulah chuan a mu a, nghet tak mai hian a kuah a, mahse a muhil ve thei tlat lo. Jeneti khan a lo hmangaih ve a ni tih a hre tawh a, amah vangin a intihlum a ni tih a hre tawh bawk a. Mutthilh a tum poh leh a harh tual tual mai si a, a rilru a hah ngei mai. A muhil thei ngang si lo a, a tho a, inhnuai lamah chuan a chhuk a, intih harh nan tiin thingpui te alum a, choka a chaw ei dawhkanah chuan thu in thingpui chu a in a, a inngaihtuah nasa hle mai. Angeli muhil pawh chu enge maw hian a ti harh zawk mai a, a meng hrawk a. A khum bula Sanga lo awm tawh miahlo chuan a ti mangang hle mai, a tho a. A room bathroom lama thawm awm chu a hria a, aphu zawk a. Sanga a nih ringin bathroom lam chu a pan a, mahse bathroom chhungah chuan tumah an lo awm lo. Bathroom a hmaiphihna ah chuan a hmai a phih a, darthlalang chu a hawng a, sleeping pills ala chhuak a, darthlalang a khar leh chiah chu darthlalang ah chuan thisen-a 'TWIN SISTERS' tih lo inziak chu a hmu a, aphu nasa kher mai, a tawlh hnung dawrh a. Rang em em in bathroom chu a chhuahsan nghal a. Room a lut leh chiah chu light ala thim vek zui, Sanga chu a au vak vak a, mahse Sanga chuan a chhang hauh si lo. A wardrobe chhungah chuan thil ri rek rek hi a hria a, wardrobe lam chu zawi muangin a va pan hnai a. Wardrobe chu a hawng thut a, enge maw hi a rawn t(r)ek chuai a, amitah a la lut zui a. A thil hmuh zawng zawng chu a phe ruai vek mai a, wardrobe chu a khar lehnghal a. Engmah a hmufiah thei lo, a kalna tur te chu mitdel ang maiin a dap kual ruai mai a. Chutihlai chuan bathroom atang bawk chuan thawm a rawn ri leh rek rek a, bathroom lam chu a hawi phei vat a. Kawngkhar chu na em emin amahin a rawn inhawng thuai mai a, hmeichhe pakhat ding hi a hmu a, chunu chu a sam a kir tih chu a hmu a, mahse a hmu chiang thei lo, a phe ruai mai a, tunge a nih erawh a hria, a unaunu Jeneti thlarau a ni.

Jeneti chu a hmel tak chu a hmu fiah thei lo, mahse amah a ni tih erawh a chiang a ni. Jeneti chu a en reng a, pen sawm(10) vel hian an inhlat a, Angeli hlau lutuk chuan ngawi reng hian a en char char a. Jeneti chuan muangchang hian Angeli chu ava pan phei a, thinruim hmel em em hian a rum ngut ngut mai a. Angeli hlau lutuk chuan mitkhap leklo hian a unaunu Jeneti rum ngut ngut chu a en reng a, zawimuang hian a tawlh hnung zel a, Jeneti lah chu a rum ring tulh tulh mai si. Angeli chu a room kawngkhar bul thleng chuan a tawlh hnunga, chuveleh Jeneti chu au vak a, Angeli hnunglam a tang chuan kut nem thlur mai hian Angeli darah chuan a rawn vuan thut mai a, a phu chiang kher mai. Angeli chu a t(r)e thawt a, rang takin ahawi let a. Chumi rual rual chuan light chu a rawn eng a, a thil hmuh pawh chawp leh chilhin a fiah nghal vek a, a dar a rawn khawihtu chu a en a, Sanga a lo ni.

Sanga chuan, "Angel, enge thleng a? Tinge hetah i awm?" tiin mangan hmel deuh hian a zawt a, Angeli chuan tap tuau chung hian a kuah nghal a, "Sang, ka hlau emai...min hruai bo mai rawh ramdangah.." a ti ngawih ngawih mai a. Sanga chuan, "Angel, enge i chungah hian thleng ta le? Enge awmzia?" a ti a, Angeli chuan a room chhunglam chu a en a, mahse tumah anlo awm silo. Angeli chuan a room chhung chu a kawk a, "Tah sawn, tah sawn..alo kal a, mahse bo leh daih." a ti a, Sanga chuan, "Tumaw...tumaw lo kal?" tiin hrethiam lo tak chung chuan a zawt a, Angeli chuan tap chungin, "Jeneti, ka hmu leh tawh.." a ti a, Sanga chuan a mit a chhing vang vang a, Angeli kuah pah chuan, "Lo kal teh...inhnuaiah i chhuk teh ang..kan sawidun dawnnia." a ti a, inhnuaiah chuan an chhuk dun ta a.

Angeli chu sofa-ah chuan a thutpui a, tui a in tir a. Angeli hlau lutuk chu a la khur thei hial a, Sanga chuan, "I bulah ka awm tawh hi, hahdam rawh." tiin a hnem hram hram a. Angeli chuan a melh ngai melh vung vung pahin thinrim hmel zet hian, "Min chhuah lo ang, kan dam ve hi a phal tawh bik lo a ni. Phuba la turin alo kal a nih hi, min that dun ngei ngei ang." a ti khur khur a. Sanga chuan, "Angel, i bulah ka awm hi, tuman an tihnat che ka phal hleinem. Hawh teh, tho la...i mu ang hmiang, ka kalsan miahlo ang che." tiin Angeli chu a kai tho a, Angeli chuan Sanga chu a kuah a, "Sanga..a hrehawm ka ti emai.." tiin a tap zawih zawih a. Sanga chuan sofa-a Angeli thutna bul chiah chu a en a, midang thu ve ni awm tak chuan sofa khuar dûk mai a, mihring mawng thla a lang kalh leh nghal a. Mak ti tak chuan Angeli kuah reng pah chuan a en reng a. Sofa khuar duk mai chu muang changa rawn tho chhuak ve niawm tak hian a rawn puar t(r)ulh t(r)ulh mai a, mak a ti hle mai. Sanga chuan Angeli hian a tir atang tawh khan dawt a sawi ngailo a, Jeneti thlarau hian a tibuai thin tih chu a hre chiang tawlh tawlh ta. Mahse engmah sawilo chuan Angeli chu roomah a chhoh pui a, tichuan chumi zan chuan buaina dang tawk lovin an mu ve thei ta hram a.

A tuk zingah chuan Angeli chu a hna lam panin a kal a, mahse Sanga erawh a kal lo. Angeli hna a akal hlan chuan inlamah Sanga chu a awm ve thung a, a in ngaihtuah nasa ngang mai. Atir ah kha chuan Angeli a buai hmasak ber kha chuan a rilru a buai a nih a ring a, psychiatrist a koh sak hial a. Mahse aman a hmu ve ta hial kha a ni a, khatia a nupui hual mi â anga a ngai ta mai kha a inthiamlo hial zawk a. Jeneti thlarau chu vawihnih lai a hmu ve tawh a, Angeli dawt sawiloh zia chu a hrechiang tawh hle ani. A phone a phawrchhuak a, Doctor Zuali chu a phone a, doctor pawh chuan damdawiina hmu turin a hrilh a. Sanga pawh chu insiam sawk sawkin damdawiin lam chu a pan nghal a, doctor Biakzuali nen chuan an inhmu ta a.

Hospitalah chuan doctor Zuali chuan a private office ah chuan Sanga chu a ko lut a, an inkawm ta a.

"Sangte, i nupui hual Angeli vang khan amah enkawl turin min ko a, pawisa tam tak pawh i sen phah a, tunah nangmah zawk ilo kal a, enge awmzia?"

"Englo ania thil zawh duh che ka nei a.".

"Min zawt ta che."

"Ihmaw...doctor..phir unau te hrim hrim hi intih thiamlohna avangin lo inhau ta se, chumi hnuah pakhat zawk chu thi ta hlauh se, a unaunu thlarau khan phuba a la thei angem? Chutiang thawnthu chu i hre tawh ngai em?"

"Sangte..NO CHANCE..engemaw i sawi le..Angeli hi ka sawi tawh ang khan natna a vei a, a rilru abuai ani. A awmdan mak lutuk hian a ti hlau ve che ani maw?"

"Aaa...nilove ka zawt mai mai che."

"Sangte..ka hrethiam che alawm, a awmdan kha i tan chuan ngaihthatlohna tham a ni. Mahse maw...hmanni khan Angeli kha chhum (clouds) thlalak a sakei zuanglai ziarang awm hi ka en tir a, ani chuan chhum chiah chu a hmuh thu a sawi a. Khatiang chiah khan Angeli natna hi ka hriatdan chuan bipolar disorder a nih ka ring a, chhum a sakei zia rang kha a hmu thiamlo a. Ka sawitum chu Angeli hian a thil hmuh te kha a enchian phawt loh avangin a unaunu Jeneti thlarau angah ngaiin a hlau em em a, chu chu a buaina niin ka hria."

"Awle doctor...ka lawm e. Ka haw phawt ange, mangtha aw."

Sanga chu a haw a, a rilru hahna chu a la dam thei thlawt lo. A inngaihtuah a, doctor bulah khan a thil hmuh kha sawichhuah chu a duh reng a. Mahse doctor khan amah Sanga pawh chu a rilru a buai ve ta aniang tih a rin ahlauh avangin a zep mai zawk a, a awm a nuamlo ngang mai. Angeli duty a la haw lo a, a lo nghak a, a rei a ti tawh ngei mai. Intih harh nan tiin a inbual a, bathroomah chuan shower a in phuh seng seng pahin a suangtuahna chu a kal thui hle mai a. Chuveleh bathroom kawngkhar chu rawn ri rawk mai a, Angeli saruak veka kawngkhara lo ding reng chu a hmu a. Angeli chu a hma ai khan apian chu alang nalhin a sexy zawk daih leh nghal a, Sanga chuan mak a ti hle mai. Sanga chuan, "Angel, engtik lai khan nge ilo haw a, chuan tinge saruaka i awm a, tinge thawmhnaw i hakloh a?" tiin a zawt a, Angeli chuan, "Ka tellovin ilo inbual vel amaw? Inbual dun ang hmiang." tih pahin Sanga lam chu panin Sanga chu bangah anam bet a, a kiss ta bawrh bawrh mai a. Sanga chuan mak ti hle mahse chutia a hmeichhia zawkin a bul a t(r)an hmasak zawk avang chuan engmah sawi lovin a tisa chakna nasa lutuk tawh avang chuan a lo kiss let bawrh bawrh a, an thawm chu a ring tial tial mai. Chutia nuam an chen dun lai chuan door bell a rawn ri a, ava hunlo tak em. Sang chuan Angeli hmaiah chuan vuanin, "Bawihte, tikhan lo awm rawh aw, kalo kir leh vat ang." a ti a, Angeli chuan, "Awle...ka lo nghak reng che nia, ka taksa hian a mamawh che, rei suh ang che." a lo ti tham tiak a. Sanga chu hmanhmawh em em in towel a veng a, bathroom chu a chhuahsan a.

Inhnuai ah chhukin kawngka lam pan chuan a kal a, kawnga a hawng chiah chu a thil hmuh chuan a ti phu chiang hle mai. Angeli kawngka bula lo ding reng chu a hmu a, mahse Angeli te kha chu bathroomah a awm a ni lawm ni, enge awmzia ni ta ang le? Angeli lah chuan, "Ilo va hawng har ve a, ka chau ania.." tih pahin inchhungah chuan alut a. Sanga mak ti lutuk chu tawng ngaihna pawh a hrelo, Angeli chu a en tlawk tlawk ringawt a. Sanga chuan Angeli chu a umzui a, "Angel, i lo haw daih tawh ani lawmni?" tiin mak ti takin a zawt a, Angeli chuan, "Sanga, tikhawp hian kan buai tawh a, intihthaihna hun anilo ania, chubakah ka chau, fiamthu thawhna huna nilo." a lo la ti deuh hmak zui a. Sanga hrethiamlo lutuk chu a lu thaklo pui chu a hiat nauh nauh a, chutih lai chuan Angeli chuan, "I inbual ami, han inthlak ta che..towel chauh i veng lehnghal." a ti a. Sanga chuan, "Aa...ih...aw..nia." a ti bah nuai a, Angeli chuan choka ah a luhsan ta daih a.

Sanga chu rang em emin inchungah a tlan chho a, roomah a lut nghal a. Angeli room chhunga bathroom chu a hawng a, mahse tumah a hmu tawh lo. Amak a ti hle mai, hlauhna chuan a thau ah a man a, athlan fim chu a tla nghal bawrh bawrh a. Angeli alo haw chauh anih si chuan, tunge bathroom ami kha ni ta ang? Jeneti thlarau em ni? Mahse mihring ang mai khan a taksa a lum ve tho si a, engthil nge ni ngai?

Zanah chuan Sanga chu a muhil thei miah lo mai a, abula mu chu Angeli tak tak a ni angem, nge Jeneti zawk ni ang...a va en a, a lo hnar suk suk mai si a, bathroomah chuan inthiar turin a luhsan a. Reilote hnuah chuan Angeli pawh chu a rawn thangharh thut mai a, abula Sanga lo mu ve tawhlo a hmuh chuan a mangang hman tep a, mahse bathroom light eng chu a hmuh theih avangin a inthiar a ni tih a hrethiam ta a, a thaw huai mai a.

Angeli chu mutthilh leh a tum a, inhnuai lama bel tla ri ruk ri chuan a ti phu zawk a. Sanga inthiar lo nghah phawt nge tha anga mahni a zu enfiah tiin a inngaituah rauh rauh a, Sanga lah chu a lo chhuak har tawh em em mai lehnghal a. Thawm engmah dang a awm leh tak siloah chuan Rosy-i anih ringin mutsan leh mai a tum a, a aia ringin a rawn ri leh bur bur mai a. Angeli chu a tho a, inhnuaiah chuan muangchang hian a chhuk a. A thim em avang chuan torch light chu a la a, a enkual a. A kal kual pah chuan, "Rosy..Rosy." tiin a au a, mahse Rosy-i hmel reng reng a hmu bawk silo. Chhoh leh mai a tum lai tak chuan choka lamah chuan zawi te a zai ri ret ret hi a hria a, a ding chat a, choka lam chu a va hawi nghal a. Inchhung leh choka chu thim vek mahse thla a en em avangin chu thla eng chuan choka tukverh chu a chhun eng pha hial a, choka parda phena hmeichhe pakhat thla ding reng pawh chu chiang takin Angeli chuan a hmu thei bawk a. Angeli chuan choka lam chu a en renga, muang changin a va pan phei a. Chu hmeichhe zai ri pawh chu a ring tial tial mai a, hmeichhe thla pawh chu a la lang thei bawk. Muangchangin a pan hnai a, a thlan lah chu a tla bawrh bawrh a, chhuatah te chuan a far hial a. Parda chu a va ban de de a, chutah a hlim thut a.

Choka chhungah chuan tumah anlo awm silo, mak a ti em em a. Choka light chu a dap a, a on a, a eng ta pup mai. A hawikual a, bungbel te chu alo inrem fel thlap mai si a, a mak a ti kher mai. Chhuahsan tum a hawilet dawn chiah chuan chaw ei dawhkana a thil hmuh chuan a ti ding chat a, Jeneti tarmit leh a tarmit bawm a lo ni a. Angeli chuan tarmit chu a la a, bawmah chuan a khung a, "Hei te hi chu wardrobe ah khan ka dahtha reng sia, tunge la ang le?" tiin a inngaihtuah vung vung a. Chutia a din reng lai chuan a hnunglam atangin a darah kut hian a rawn vuan thut a, a phu chiang kher mai. Rang takin a hawilet a, Sanga alo ni a.

"Angel, enge he tah i tih a, dar 2:30 am a nih tawh hi...zan lai lai ah."

"Awii Sanga..min ti phu chiang lutuk. Thawm ka hria lawm hetah hian, chuvang ania ka chhuk."

"Thawm te chu awm se keipawn ka hre ve ang chu mawle.."

"Engmah i hre velo amaw?"

"Aw ka hrelo, ka inthiar zo kha ilo awm silo a, ka rawn zawng che nih hi."

"Sang...ka ti tak tak, choka parda phen atang hian Jeneti thla pawh ka hmu a, chuan en teh hei (Jeneti tarmit bawm chu a pe a) he thil hi ka hmu bawk."

"Ehe...tarmit maw..tu ta nge?"

"Jeneti ta a nih hi, a boral hnu khan ka wardrobe ah ka dah a."

"Engtin nge hetah a awm theih anga?".

"Chu tak chu alawm ka hriatloh, tunge la ang?"

"Engpawh nise zan a rei tawh emai...mu ang hmiang."

Roomah chuan an inzui chho a, Angeli chuan tarmit chu a wardrobe chhungah chuan a dah a, tichuan an mu ta a. Atuk ah chuan Angeli leh Sanga te chu an hna veve an thawk leh thei ta hram a, Sanga pawh hna akallo rei ta bawk a. Chumi ni chuan buaina em em tawk lovin hun chu an hmang ral ve ta mai a, tlai dar 4 alo rik meuh chuan an bang ta ve ve a. Sanga chu in lama haw tura a kal lai chuan Angeli chuan hnunglam atang chuan a rawn ko a...

"Ehee...Angel, enge kan school ah i rawn tih a?"

"Vawiin tlai chu thil min tihsak ta che."

"Engthil nge tihsak i duh a?"

"Ihh...Jeneti thlanah kal dun ang hmiang."

"Enga? Enge kan tih anga?"

"Sanga khawngaihin achhan min zawt suh...kal ka duh animai."

"Awle anih leh kan kal ang."

Thlanmual lam pan chuan an kal ta a, an thleng chiah a, motor atang chuan an chhuk a. An pahnih chuan inkaiin Jeneti thlan lam pan chuan an kal dun a, an hnaih tawlh tawlh a, Angeli chu a hnuk a ulh nghal a, a mittui a luang thla nghal zawih zawih a. An thleng tep tihah chuan Angeli chuan, "Sanga tah hian min lo nghak la, keimahin ka va kal ange, ka lo kir leh vat ang." a ti a, Sanga pawh chuan, "Awle" a ti a. Angeli chu Jeneti thlan bulah chuan a thingthi a, thlan lung chu a kuah a, a tap hawm hawm mai a. Sanga chuan ralkhat atang chuan a lo en reng a, a khawngaih takzet a ni. Minute 10 vel lai mai aliam hnu chuan Angeli chu a lo let a, tichuan an haw ta a.

Motor chhungah chuan an chuangdun a, Angeli chuan, "Sang, doctor Biakzuali te in zawnah khan min drop lawk la, lo va haw mai rawh." a ti a. Sanga chuan, "Ngati nge..enge thleng a?" tiin hrethiamlo tak chuan a zawt a. Angeli chuan, "In entir leh deuh ka duh a....taxi in ka lo haw mai ang." a ti a, Sanga chuan, "Ka lo kal pui dawn che em ni?" tiin a zawt leh a, mahse Angeli chuan, "Aih angailo ang. Keimahin ka kal thei alawm, lo va haw rawh." a ti tlat mai si. Sanga pawh chuan, "Anih chuan kei pawh kan in lamah ka va haw phawt anga, ka va insawifel ve lawk anga chuan ka lo haw lehnghal vat ang, nangpawh reilo la aw.." a ti a, Angeli pawh chuan, "Awle.." tiin a chhang a. Doctor Biakzuali te in zawn an thlen chuan Angeli chu a chhuk a, Sanga erawh chu a tlan tlang ta a.

Sanga a tlan liam chiah tih chuan Angeli chu doctor te inah chuan a lut a, "Doctor Biakzuali te in a ni em?" a ti a, Doctor Biakzuali pasal ni awm tak chuan, "Aw ni e, enge i duh a?" tiin a lo zawt a. Angeli chuan, "Biak lawk ka duh a.." a ti a, chupa chuan, "Tunge i nih a?" a ti leh deuh kher a. Angeli chuan, "A patient ka nia, Angel Lalremruati." tiin a chhanga. Chupa chuan, "Eee...Angeli chu nangmah hi maw..Biakzuali hian a sawi thin che alawm...stepah hian chho la, room pahnihna ah." tiin nel awm tak hian a lo chhang a. Doctor in tih takah an inchhung vel chu a namai lo hle mai, inchung stepah chuan chhovin Doctor Biakzuali room zawnah chuan a kik karh karh a. Room chhung atang chuan Dr Biakzuali aw ngei mai chuan, "Lo lut rawh" a rawn tih avang chuan alut ta a.

Inchhung aluh chiah chuan Doctor chuan Angeli hmel a hmuh rual rual chuan, "Angel..ilo kal animaw lo thu rawh." tiin polite takin a lo welcome a. Mahse Angeli erawh a hmel a danglam tlat, thinrim hmel em em hian doctor chu amelh a. Rum em em a melh chungin, "Doctor, a tawk e....i bulah hian ka lo kal tawh ngailo ang, zanin hian engkim ka ti tawp dawn, ka kham tawh lutuk. A ni chu kum 1 kal ta khan thi tawh mahse a thlarau lo kalin min rawn tibuai a, ani chu hmanah thi tawh mahse kei chu minute tin mai hian ka thi ziah thung asin." a ti ta phiar phiar mai a. Doctor chuan a hrethiamlo hle mai, zaidam takin, "Angel, engemaw i sawi le....ka rindan chuan i natna hi a zual telh telh in ka hria." a lo ti a. Angeli chuan ahma aia vin zawk hian, "Keichuan ka mit ngeiin ka hmu, nang chuan mi â angah min ngai a tiraw....i hmu velo, keichuan ka hmu asin. Zanin hian Jeneti hi hrehmunah ka thawn liam dawn, thlamuangin min awm tir a tumlo, mahse kei hian zanin hian engkim ka ti tawp vek dawn. Chuan tun atang chuan i patient ka ni tawh lo, ka hmu tawh ngai lo ang che...mangtha le." a ti khur khur a, doctor chuan chhanlet tumin a ang zuau a, mahse a chhan hma chuan Angeli chu a chhuak ta daih a.

Hmanhmawh em emin pawnah a chhuak a, taxi a phar a, hmanhmawh takin in lam pan chuan a haw ta a. Angeli thil tum ber chu zanina engkim tihtawp vek ani a, Jeneti thlarau ina a tibuai hi a kham tawhin a ning tawh takzet a ni. In chu a thleng a, Sanga chu a lengkawi leh a ni ngei ang, alo la haw lo a, mahse chu chu a duhthusam zawk a ni. Inchungah chuan a chho a, a room ah a lut a, Jeneti thawmhnaw bik ni awm tak ho chu a la chhuak a. Buara ah a khung khawm a, pawnah chuan a dah a. Inchhungah a lut leh a, khawnvar tui a va la a, pawnah chuan a chhuak leh a, buara chu khawnvartui chuan a leih a, tichuan tichuan lighter chu la chhuakin thawmhnaw ho chu a hal ta a, a alh hluah hluah mai a. Chutia a unaunu thawmhnaw zawng zawng a hal hnu chuan inchhungah luh leh a tum chiah chu hmeichhe nui ri a hre ta tlat mai le. Rang tak chuan a hawilet a, mei alh kara Jeneti lo ding chu a hmu a, Angeli melh reng chung chuan zat hmel tak hian a nui uar uar a. Angeli chuan a hlau ngei mai, a meng phar awn awn mai a. Mei alh kar atang chuan zawi muangin Jeneti chu alo chhuak a, a taksa chu a alh hluah hluah mai a. Chutia taksa alh hluah hluah chung chuan Angeli lam chu a pan hnai a, nasa em em hian a nui uar uar lehnghal a. Angeli hlau lutuk chu a khur dur dur mai a, Jeneti lah chuan a rawn pan hnai telh telh mai a. Angeli zawnah chuan a ding a, a nui lai chu a tawp ta hmak mai a, rum em em hian Angeli chu a melh a, Angeli hlau lutuk chu nikhaw hrelovin a tlu tawp mai a.

Zan dar 9 velah chuan Sanga pawh chu a rawn thleng ve ta a, gate chhung aluh veleh chuan Angeli nikhaw hrelova in kawtah lo let reng ahmuh chuan rang takin a va pan hnai a. Angeli chu a sawi nawk nawk a, aharh thei silo, a bula mei alh hluah hluah te chuan a rilru a ti nuamlo zual em em mai a. Inchhungah lutin tui bucket khat a va la a, pawnah chhuak lehin tui chu a leih hlum a. Angeli chu a pawm kang a, damdawiin lam a panpui vat a. Sanga pawh chu a rilru a hah tawh hle mai, "A tawk e... ka kham tawh lutuk, ka tuar thei tawh lo. Zanin hian engkim a tawp ang, a tawk zozai tawh e." tiin ama hriat tawk lek chuan a phun nuah nuah mai a. Sanga pawh chuan tiang reng reng chuan Angeli nen an innei thei dawn lo a ni tih a hria a, Jeneti thlarau pawh chu a haw takzet a ni. Chutia a inngaihtuah mek lai chuan phone call a dawng a, Angeli nu Pi Siami enkawltu, Doctor Samuela alo ni a.

"Hello..Sanga maw?"

"Aw keimah Sanga..enge ni ta?"

"Thu lawmawm lampang ania, Angeli phone ka tum a, mahse a phone ala thei silo a ka lo call tawp che."

"A nih chu, enge ni a?"

"Hei...Angeli nu hi coma atang khan a harhchhuak tawh a, a rilru pawh a fimin engkim a hre thei vek tawh a."

"Enga? Doctor....i ti tak tak ami? Ava lawmawm ve."

"Aw ni e...tunah chuan hahchawlh a mamawh a, kan chiu muhil hrih a, arang lamin inlo kal vat dawnnia aw."

"Awle..kan lawm lutuk ania."

Sanga chu a lawm hle mai, chu thu lawmawm tak mai chu Angeli hrilh a chak tawh ngei mai. Chutia a inngaihtuah lai chuan Doctor chu a lo chhuak a, Sanga chu ava pan hnai a. Doctor chuan, "Sanga, Angeli chu a tha vek ania, a harh tawh e, i duh chuan iva hmu thei ang." a ti a, Sanga chu phur tak chuan Angeli mutna lam chu ava pan a. Angeli chuan a lo nuih sang mai a, Sanga chuan duat tak maiin Angeli chu a hmuiah a zu fawp a. Sanga chuan, "Bawihte...thu lawmawm pahnih hrilh tur che ka nei." a ti a. Angeli chuan chauh hmel tak hian, "Animaw? Min lo hrilh ta che." a ti tham tiak a. Sanga chuan, "Thu lawmawm pakhat zawk chu ka nu a harh chhuak tawh a, a dam tha vek tawh." a ti a, Angeli chuan, "Awi Sang...tak tak em ni..ka van lawm tak." a ti a. Sanga chuan, "Aw ni e, Pi Rini pawn a hawsan hrih a, doctor chuan kan hman hun hunah kan hruai chhuah theih tawh thu a sawi a ni." a ti leh a. Angeli chu lawm avang chuan a mittui a tla hial a, "Thu lawmawm tak anih chu..anih leh thu lawmawm pahnihna chu enge?" tiin a zawt leh a, Sanga chuan, "Nang leh kei leh i nu hi ka nu te khuaah kan pem tawh ang. Chutah chuan ka hruai ang che u, Jeneti thlarau chuan engtikah mah min tibuai leh thei tawh ngai lovang" a ti a, Angeli chuan a mittui a dang zo ngang lo, a lu a bu nghauh ngauh a. Sanga bawk chuan, "Angel...taxi in i duh leh lo va haw la..chawl hahdam la..ka nu chu ka va hmu ve lawk ange." a ti a, tichuan an in kalsan ta a.

Sanga chu Angeli nu awmna, hospital-ah chuan a inkhalh phei a. Pi Siami ward ah chuan lutin pi Siami chu ava hmu a, alo muhil bawrh bawrh a. A kutah vuanin, "Ka nu, tun atang chuan nang leh kei leh Angeli hi nun bul kan tan tawh ang. Khaw dangah kan pem anga, chhungkaw hlim tak kan ni ngei ang tih ka tiam a che. Jeneti thlarau chuan min tibuai thei tawh lo anga, engkim a pangngai vek tawh ang. Ka nu, naktukah i harh hunah ka rawn hruai chhuak ang che aw...muttui le" tiin Angeli nu muhil lai chu a be mawlh mawlh a, kalsan tuma a hawilet leh chiah chu Pi Siami chuan nghet takin Sanga kut chu a man beta, Sanga chu a phu zawk mai. Rang em emin a hawi let vat a, Angeli nu Pi Siami chuan rum em em hian alo melh a. Sanga chuan a hriatthiamloh mai bakah chutia Pi Siami lo harh thut leh a kuta vuan reng chunga rum em ema a melh chu a hlau lek lek zawk a. Pi Siami chuan aw khur hlawk hlawk hian, "Nang hian engmah i hrelo a ni." a ti ringawt a. Sanga chuan hrilhhai tak hian, "Ka nu, enge maw i sawi le?" a ti a. Pi Siami chuan, "Jeneti thlan ah hian i kal tawh em, a thlan lunga hming inziak te hi finfiah i tum miahlo ami?" a ti khur khur a. Sanga chuan a hrethiamlo hle mai, "Ka nu...enge i sawi a?" a ti a. Pi Siami chuan, "Mimawlpa....tuna i awmpui, i hmangaih em em saw...ANGELI A NI LO...JENETI ZAWK ANI. ANGELI CHU KUM KHAT LIAMTA KHAN A THI TAWH. ANGELI AMAW I TIH SAW...JENETI A NI."

Ruah chu a sur bur bur mai a, kawl a phe zawk zawk bawk a. Chuzan khaw nuamlo tak karah chuan Sanga chu a motor chuan thlanmual lam panin chak takin a tlan a, ahmel chu a nel awmloh hle a, a thinrim hle a ni tih a hriat bawk. Khawpui ri dur dur te chuan a ti hlau ve lo, thlanmual chu a thleng ta. Thlanmual ah chuan tlan phei bawrh bawrhin tu thlan ber emaw ni chu a zawng tih a chetzia atang chuan a hriat hle a, thlanmual pakhat zawn a thlen chuan a ding ta chat a. Chu thlanlunga thil inziak chu a chhiar ta, a meng phar awn awn mai a, amak ti lutuk chu mit pawh khap leklo hian a âng phuau mai.

'IN LOVING MEMORY OF
ANGEL LALREMRUATI

KUM 2017, 14th FEBRUARY-A HUN LO TAKA ACCIDENT VANGA CHATUAN RAM MIN PAN SAN TA HI ANA KAN TI A, I NU LEH I UNAUNU HIAN KAN TUARIN KAN HRETHIAM THEI MAWLH LO. NATNA AWM TAWH LOHNA VAN IN NUAMAH CHUAN MIN LO NGHAK RENG ANG CHE AW...

A PHUN TU : (I NU LEH I UNAUNU)
LALNUNSIAMI
&
JENET LALSANGZUALI."

Sanga chu thlanlung bulah chuan a thingthi hnawk a, ruah lah chu a tla hnem tawlh tawlh mai a. Chutah chhuak em em hian ring takin a tap hawm hawm mai a, "ANGEL
.ANGEL..ANI THEILO..DUHTAK." tiin thlanlung chu kuahin a au hian a au vak vak mai a. Angeli amaw a tih thin kha Jeneti alo ni reng si a, kum khat leh achanve teh meuh alo hmangaih em em kha, Angeli nilovin Jeneti zawk alo ni si. A rilru chu a na em em a, Angeli chu a ko vak vak a, thlanlung te chu a chum a, "Bawihte..ka tihpalh ani, khawngaihin lo chhuak leh rawh...ka hmangaih che asin." tiin a au chiam mai a. A va han khawngaihthlak tehreng em..a mittui chu a tla zawih zawih mai a, thlanlung chu a kuah ngawih ngawih a, a fawp bawk a, a va han lungchhiat thlak tak em.

In lamah chuan Angeli (tunah chuan Jeneti ani tawh zawk mah ang chu) pawh chu Sanga surprise turin nalh tak mai hian kawrfual var nalh tak mai hi hain alo inchei a, a hmaiah chuan make up chi tinreng chu hnawhin Sanga'n Angeli amaw a tih theih nan lens pawl ram mai chu a mitah chuan ahma atang daiha alo tih thin tawh ang chuan amitah chuan a vuah leh ta a, darthlalangah chuan a in en a, Angeli nen danglamna an nei lo. Door bell ri a hriat chuan Jeneti chu phur takin Sanga a nih ringin inhnuai lamah a chhuk nghal a. Kawnga a hawng chiah chu Sanga chu hlimloh hmel deuh hian paper pakhat keng hian huh hnuang hian a lo ding a, Jeneti chuan, "Ehee..duhtak, lo lut vat teh, enge i chungah thleng a?" a ti a. Sanga chuan chhang lemlo chuan tum hmuk hian inchhungah chuan a luh san daih a. Jeneti chuan kawngkhar chu kharin a kalh a, Sanga lam chu ava pan a. Jeneti chuan, "Ruah rawn do kher angai hleinem, a ban hun nghah mai tur alawm...en teh duhtak..ka nalh em?" tiin a han zawt vel a, Sanga chuan nui miahlo hian, "I nalh e...mahse he paper ah hian doctorin i hming sign turin a ti che a." tih pahin paper leh pen chu a pe a. Jeneti chuan paper chhunga thil inziak chu chhiar lem lo chuan a sign ta a. A hming sign chu Sanga chuan a lo en reng a, "Angel" tih chuan a sign a. Sanga chuan vin tak hian, "Hey.." tih pahin Jeneti paper leh pen ken lai chu na takin chhuatah a ben tlak sak a. Jeneti chu a phu zawk a, "Awi..tinge a?" tiin hriatthiamloh hmel tak chuan a zawt a. Sanga chuan thinrim hmel tak hian vin zet in, "Engvangin nge Angeli hming anga i sign vel a, i hming diktakin sign ta che." a ti ta mai a. Jeneti chuan hriatthiam loh hmel tak chuan, "Sanga, ka hmingin alawm ka sign, tu hmingin nge ka sign chuang anga?" a ti a. Ahma aia vin hian, "Angeli i nilo...Jeneti i nih kha, min bum tum tawh suh..engkim ka hre tawh." a ti ta mai a. Jeneti chu a meng phawk nasa hle mai, zawi te hian, "Sanga, eng..enge i sawi a? Ihh..An..Angeli ka nia lawm." a ti bah nuai mai a. Sanga chu a thinrim tawlh tawlh mai, vin zet hian, "Hmeli, i nu in min hrilh vek tawh, Angeli chu a thi tawh..nang hian min awmpui i duh vangin Angeli angin i insawi mai mai a ni." a ti khur khur mai a. Jeneti chuan, "Ka nu te chu a damlo a, engpawh sawi mahse thudik a ni lo ang..a damloh vangin a sawi vel mai mai aniang..Sanga, min ring hram rawh...Angeli alawm ka nih." a la ti talh a.

Sanga chu a insum thei ta lo, a thinrim tawh tak zet a ni. Jeneti hrawkah chuan a rek ta thut a, bangah chuan a nem bet a. Sanga chuan Jeneti mitah tak a en a, "Tenawmnu, nichin lawk khan thlanah ka kal a, thlanlunga Angeli hming chiang taka inziak kha ka hmu asin. Nang hian i itsik vangin i that a, ti chuan amah angah insiamin ka bula i awm duh vangin min bum a. Vawiin tlaia thlanmuala kan kal pawh khan thlanlunga Angeli hming inziak ka hmuh ve i hlauh avangin lo kal ve pawh i phallo a ni tiraw..Angeli amaw ka tih vang che in ka chetsual pui hial che a..ka inchhir hle mai. Nang hian ka Angeli chu i that ani." a ti ta phiar phiar mai a, Jeneti chuan Sanga kut chu laksawn tumin, "Sanga...min thlah rawh...ana ania." a ti a, Sanga chuan, "Ka thlah lovang che...ka that khawp ang che." a ti a. Jeneti chuan Sanga kut phih thlak pah chuan, "KA THAT LO." a ti vin tuar a, Sanga chuan rum takin a melh a.

Jeneti bawk chuan, "Ka that lo, Sanga, Angeli kha ka that lo asin. Khatia ama lemchauh i ziak bik kha ka thinrim em avang khan ka thikthuchhiatna chuan min bual â zo tawh a, ka pawhthler sak ta a. Angeli chu nasa takin a tap a, kei chuan, 'Saw mihringpa vang sawn kan inkar hi a chhiat phah anih hi...' ka ti a. Angeli chuan tap chungin, 'Misual tak i ni Jenet, misual mai pawh nilovin ramhnuai i nih hi. Ka hua che, ka nun atang hian hla takah kal bo rawh.' min tih pah chuan inchungah a chho ta daih a. Ka rilru ana em em a, tette atanga thu tiama, thih thlenga awmdun tura thu min tiamtu in khatia min mamawh tawhloh thu a sawi kha ka thin a rim em em a. Inchunga a chho chu ka umzui a, inchung (roof top) zawlah chuan lehlam hawiin alo tap a. Ka va pan hnai a, ka kuai her sawk a, 'I zak lawm ni...i u ka nih hi hre rawh, engvanga khapa vang mai mai a min mamawh tawhlo nge i nih a?' ka ti a. Angeli chuan tap chung hian, 'Ka u i nilo, kei aiin i upa lo bawk. Ka phirpui i ni a, ka hmangaih em vang che in ka u ang maia i awm pawhin ka thinrim ngailo. Mahse mipa ka hmangaih leh hmangaihloh thu ah hian inrawlhna tur i nei lo.' tiin min chhanglet a. Tichuan min nam sawk a, ka tlu tep a. Ka thinrim lutuk chuan ka duh aiin ka nam na deuha, tichuan inchung atang chuan a tla ta a, a thi ta a ni. Ka mangang em em a, ka nu ka au chul a, ka nu nen chuan Angeli ruang chu kan bawihsawm a.Tichuan khami ni atang khan ka nu pawh chuan min haw em em a, min be tha duh talo a, hrehawm ka ti a, ka inchhir asin. Angeli lehkha i rawn thawn te kha ka chhiar thin a, mahse ka nu hian min laksak vek zel. Angeli a thih thu i hriat hi ka hlau em em a, i tuarna lutuk tur hi ka ngai ngam lo a ni. Chuvang chuan Angeli anga lan ka tum ta a, ka nu ka dil a, atawpah chuan a rem ti ta a. I zin chhung zawng khan ka taksa chu Angeli ang thei tur berin ka siam a. Ka sam ka pawt ngil a, ka mit ser ah hian eyebrow ka hnawih a, ka sam ka zuah bawk a, ka tarmit chu vuah tawhlovin lens ka vuah ta zawk a ni. Sanga, Angeli vanga i rilru nat ka hlauh vang zawk a ni asin. I tan Angeli angin ka awm a, ka thianghlimna pawh i lakah ka chan tawh a sin..(Sanga kutah chuan a va vuan a) Sang..kei pawh hian ka hmangaih em em che a, ka thianghlimna pawh ka hlan tawh che. Khawngaihin engkim theihnghilh ila min pawm hram rawh...Angeli nen danglamna kan awm loh hi..mawh min hmangaih ve thei mai lo em ni?" tiin tap tuau chung chuan Sanga chu a ngen mawlh mawlh a.

Sanga chu na tak maiin akut chu a phih thlak sak a, "I zak miahlo ami? Keichuan Angeli bak ka hmangaih lo. Angeli chu engtikah mah i tluk thei lo, achhan chu Angeli i ni lo. Chuan i thi(necklace) awrlai kha min rawn pe rawh, kha kha i ta anilo, Angeli ta a ni." tih pahin thi chu pawh thlak sak a tum a, Jeneti chuan alo dang a, "Sang nilo..khawngaihin.." tiin a ngen a, mahse Sanga chuan a pawh thlak luih sak ta a. Jeneti chu a tap zawih zawih a, Sanga chuan, "Ka nun atang hian kalbo la, ka hmu peih tawh lo che. Min rawn umzui anih chuan ka that ang che, chu chu hria ang che." tih pahin a hawi let a. Pawnlam pan chuan a kal a, Jeneti hmel tap tuau chu thinrim hmel hian a rawn thlak thut a. Vin em em mai hian Jeneti chuan, "Hey...Hmela..." a rawn ti ta mai a, rang takin Sanga chu a hawi let a. Jeneti chuan thinrim hmel tak hian, "I sawi dik e, Jeneti ka nih hi. Ka thulo chuan he inchhung hi i chhuahsan lo ang." a ti a, Sanga chuan, "Nang hi..." a ti dek dek a, a sawi zawh hma hma chuan a bula pangpar khawina pot chu la in Sanga lu ah chuan a theih tawpin a vaw thuai mai a, Sanga chu nikhaw hrelovin a awm ta der mai.

Darkar chanve vel lai aliam hnu chuan Sanga chu a harh a, alu chu a hai ngei mai. A thil hmuh te chu a fiahlo ruai mai a, a lu a thing vak vak a. Chet sawn a tum a, a thei ta hauh lo. Thutthlengah chuan nghet em em mai hian hruiin a taksa chu phuar behin alo awm a, a tal vak vak a. A bul vel chu a en kual a, kawrfual mawi tak, ahma lawka Jeneti'n a hak kha t(r)et hnuang chunga chhuatah a lo let reng chu a hmu a. Chubakah a bul velah chuan hmeichhe samzai ni awm tak, chhuat laia let rem rum mai chu a hmu bawk a. A en kual leh deuh a, chhuat ah bawk chuan hmeichhe sam rollna ni awm tak samkhui bial chu a hmu leh bawk a, mak a tiin a hrilhhai ngei mai. Inchung step lam chu a hawi chho a, Jeneti lo ding reng chu a hmu a. Jeneti chu hmana Jeneti ang chiah chiah kha a ni, Angeli dam laia Jeneti ngei mai kha. T-Shirt dum a ha a, jeans kekawr pawl a ha a, sneaker dum a bun bawk. A sam chu a tawi a, a kir bawk a, tarmit a vuah bawk. A rawn zai thla rat rat mai a, huat hmel em em hian Sanga chuan alo melh a.

Jeneti chu Sanga hma takah chuan a thingthi a, a tarmit chu a phelh a, a mit hmul chu a nuai deuh nawk nawk a, chutah tak chuan a mithmul bula ser kha a lo lang ta, Sanga chu ala nuih vur vur zui. Jeneti chuan Sanga samah chuan a chul heuh heuh a, "Sanga, Angeli anga min ngai theilo anih pawhin min nei hram rawh....ka hmangaih che ka tih kha...luhlul lo la..tha takin min pawm mai rawh..umm? A tha em?" tiin a zawt a. Sanga chuan, "I mumangah pawh kan innei lo ang, mi tenawmnu." tiin alo chhang a. Jeneti chu a mit a chhing vang vang a, Sanga bulah chuan, "Sang...mi thinchhia leh rilru te tak ka nih hi aw...ka thinrim hma teh mai a nia. Tunah a tawp nan ka zawt leh ang che...engkim theihnghilhin bul i tan tha dun ang hmiang?" tiin a zawt leh a, mahse Sanga chuan vinzet hian, "Vawi 100 pawh piang nawn leh mah ila nang kher hi chu ka nei lo ang che, ka ten ngawih ngawih che." tiin alo chhang leh a. Jeneti thin chuan a tuar ta lo, na em em mai hian Sanga hmaiah chuan a hnek siah mai a, Sanga chu a t(r)e thawt a. Jeneti chuan inthiam loh hmel tak hian Sanga chu a kuah a, Sanga ka atang chuan thisen alo chhuak a. Jeneti chuan, "Awi bawihte, tinge kutthlak ngaia i awm a? Luhlul chhuah lo hram teh. Min pawm mai rawh..engkim a fel vek a ni mai." a ti leh a. Sanga chuan, "Ateuhlo mai...kalbo rawh." alo ti leh a. Jeneti chuan vin zet hian, "Mi mawlpa, ngaithla rawh. Angeli kha kan naupan lai atang tawh khan ka venghim thin a, mipa naupang ho lakah pawh ka chhan thin. Ka hmangaih em em a, mahse nang ilo inrawlh atang hian kan unau inkar hi a chhe tan a, min hmangaih em em tu khan kei aiin nang a lo thlang ta zawk che a, mahse ka hmangaih ve tho che asin. Chuan ka bum lo che, i rilru anat ka hlauh vang zawkin Angeli angin ka awm mai chauh a ni. Enge kan danglamna? Enge a that viau bikna? Kan hmel a in ang a, kan engkim a in ang..enge min pawm duh miah loh a?" a ti phiar phiar mai a. Sanga chu nui lui tih hriat tak hian a khi suk a, "In anna in neilo, Angeli chu vantirhkoh ang maia thianghlim a ni, nang erawh ramhuai bawlhhlawh ber ai pawn i tenawm zawk. Min that pawh nila, pawi ka tilo. Nang neih ai chuan thih ka thlang, mihring pawh i nilo..ramsa i nih kha." alo ti hrep a. Jeneti thinrim chuan Sanga chu kutthlak leh tumin ava pan hnai a, mahse door bel rawn ri chuan a ti ding chat a.

Jeneti chuan ahnunga thingtum dah thuhruk pah chuan kawngkhar lam chu a va pan a, kawngka chu a hawng a, an thenawmnu Pi Rini alo ni a...

"Awi leh..Angel bawihte, Jeneti a maw ka ti dawn che alawm..i inchei dan chu."

"Enge i duh a?"

"Ihh...i nu kha a hruai chhuah theih tawh ania aw, doctorin minlo phone nasa tawh ania."

"Atha e, lo buai suh...a hunah chuan ka hruai chhuak mai ang."

"Bawihte i mizia ava dang ve..chuan nichin khan in in atang hian mipa au thawm ka hria a...enge thleng a?"

"Engmah a awmlo, kal tawh rawh ka mu duh."

"Ngawiteh..diklo chu a awm a ni, khawimaw ka lo lut ve teh ang."

Jeneti chuan Pi Rini lu ah chuan a thingtum ken lai chuan a vaw chawrh mai a, thisen a per chuai mai. Jeneti te inkawtah chuan nikhaw hrelovin alet reng mai a, Jeneti chuan inchhungah a luhsan ta a. Jeneti a let leh chu thutthlengah chuan Sanga alo awm tawh lo, a phuarna hrui chu chhuatah a lo let nuai bawk a. Jeneti chuan thinrim em em in, "Hrep tak chuan.." tiin Sanga chu a zawngkual ta a. Sitting room lamah chuan a zawng a, ahmulo, chokaah a zawng leh a, ala hmu chuanglo. Inchung lamah a chhoa, roomah chuan a zawng kual leh a, mahse ala hmu chuanglo. Inchhung zawng zawng chu a zawng chhuak deuh vek a, mahse Sanga hmel a hmulo, thawm pawh a hre silo, amangang em em a. Chutih lai chuan pawn lamah chuan Pi Rini chu a harh thut a, a lu chu na a ti ngei mai, a dawm vawng vawng a. A lu-ah chuan thisen alo kai nuai mai a, a tho tuih tuih a, inlamah a tlan haw a, police a phone nghal a.

Jeneti chu roomah chuan chho leh in khum hnuai te chu a bih a, mahse Sanga chu a hmu chuang lo. A thinrim tawh lutuk chuan lighter a la chhuak a, a hmet alh a. Jeneti chuan ring tak hian, "Sanga..min bihruk san thei lo ang, ilo chhuak lo anih chuan he in hi ka hal darh vek anga, kan pahnihin kan thi ang. Pialral ah tal chuan kan leng dun ve mahna..i thidun ang hmiang." a ti ta phiar phiar mai a. Chu veleh hnunglam atang chuan Sanga chuan Jeneti chu a rawn bawhthlu thuai a, lighter chu a ben per sak a, parda ah chuan a kang kai ta a, a alh ta hluah hluah mai a. Sanga chuan Jeneti chu a bawhbet a, a hmai ah chuan a beng thuai a, a tarmit pawh a beng per lawp mai. Hnek tuma a kut aphar lai tak chuan Jeneti hmel chu chiang takin a en a, tarmit a lo vuah tawh tak silo ah chuan Angeli a ang em em a, hnek ta lo chuan a en ngawih ngawih a. Chutih lai tak chu Jeneti chuan hun remchangah la in Sanga mitah tak chuan a hnek a, Sanga na ti lutuk chu a let tawp a. Hmanhmawh em em in Jeneti chu room atang chuan a tlan chhuak a, Sanga chuan a umzui a. Mei alh chu kang kai zelin inchhung pum mai chu a alh ta hluah hluah mai a.

Sanga chu room atang chuan chhuakin Jeneti chu a zawng a mahse a hmu lo. Step zawn a thlen chuan hnunglam atangin Jeneti chuan Sanga chu a tiang ken lai chuan a lu ah na em em hian a vua a, Sanga chu stepah chuan a lum thla ta a. Jeneti chu muang chang hian a chhuk thla a, Sanga chu a pan hnai a. Sanga bul a thlen dawn chiah chuan Jeneti dinna lai bik chu a rawn alh kual pup mai a, Jeneti pawh chu a phu dawrh mai a. Jeneti tan chhuah ngaihna a awm ta lo, mei alh chuan a dang tlat tawh.

Sanga chu rang em emin pawnah chuan a tlan chhuak nghal a, a thi phung lehnghal. In kawta Angeli nu Pi Siami lo tlan phei hlawk hlawk chu a hmu a, ava pan hnai a. Sanga chuan, "Ka nu police phone vat rawh..." a ti a, Pi Siami chuan, "Enge ni ta..tinge kan in hi a kan hluah hluah a?" tiin hrilhhai takin a zawt a, Sanga chuan, "Nakinah engkim ka hrilhfiah ang che, helai hmun hi kan chhuahsan angai." tiin Pi Siam kut chu a vuan a, mahse Pi Siami chuan thinrim em emin a kut chu a phih thlak sak a. Sanga kawr awmah chuan a th(r)am a, "Heyy...nang hi...nangmah vang hian ka fanu pakhat zawk ka chan tawh a, khawngaih takin ka fanu neihchhun hi chu min laksak tawh suh. Heng thil zawng zawng hi nangmah vang vek a nih hi hre ta che. Unau inhmangaih tak an ni a, mahse an inhmangaihna karah chuan i lo tla zep a, hmelma ah i siam a ni. Coma-a ka awmhma zan pawh khan Angeli thlarau chuan min vau tawh asin, tichuan nikhaw hrelovin min siam a, chutia ka damloh lai chu remchangah hmangin in pahnih chungah phuba a la ta a nih kha. Jeneti hi Angeli anga ka awm tir avangin Angeli thlarau hi a thinrim a, ka bulah pawh Jeneti ang hlirin a rawn in lar a, in bulah pawh Jeneti ang hlir a inlar a, a tihbuai tur thu che u hi ka mumangah min hrilh fo asin. I tan tiin i natloh nan tiin ka fanu neihchhun Jeneti hi ka pe leh che a, mahse nang chuan thi turin i kalsan leh si a maw? Angeli thlarau lak atang hian Jeneti hi keichuan ka chhanhim thei lo, mahse nang chuan i thei...khawngaihin ka fanu neihchhun hi chhanhim hram rawh." tiin kutsuih meuhin tap zawih zawihin a ngen ta a, Sanga pawh chu a insum theilo, a mittui a luang zawih zawih a.

Chutih lai chuan inchhungah chuan Jeneti dangtu mei alh chu a alh nasa tual tual a, Jeneti chu a thinrim ta. Vin zet hian, "Atha e..Angel, min that rawh...i thlarau thiltih vek a ni tih ka hria. Kan pahnih te chuan pumkhat kan nih kha, i thi dun ang hmiang...pawi ka tilo. Sanga ka hmangaih ve avang hian min thik tiraw....ni e ka hmangaih alawm..enge ka tihsual..hmangaih ka nei ve thiang lo em ni? Lo kal la..min that ta che.." a ti khur khur a. Chutih lai chuan mei alh kar atang chuan Sanga a rawn zuang lut a, "Jenet.." a rawn ti vak a. Jeneti chuan Sanga a hmuh chuan a lo nam sawn a, "Enge i rawn tih a? Thi turin min duh ani lawmni? Kal bo rawh." a lo ti a. Sanga chuan jeneti manbeh pah chuan, "Ngawi rawh." a ati a. Tichuan Sanga chuan mei alh hluah hluah chu a en a, "Angel, lo ngaithla teh. Kum khat leh achanve chhung zawng nang mah anga insiama min lo bum avang hian Jeneti hi thah mai chu ka duh ngei alawm. Mahse ngaihtuah chiang rawh, min hmangaih ang chiah hian a ni pawn min hmangaih ve ani mai a, enge a tihsual a? Tunah hian ani hi chhuah rawh, i chhuah lo anih chuan tunah ngei hian a bulah hian ka thi ve ang, achhan chu kei pawh hian Jeneti hi ka hmangaih ve tawh tlat a ni." a ti a. Jeneti chuan Sanga lam chu a hawi a, amittui a dang zo lo, "Sang.." tih pah chuan tap chungin a kuah a. Sanga chuan lo kuah let ve in mei alh lam chu melh reng chung chuan a tap zawih zawih mai a. Chutah le...Angeli thlarau thin ur chuan hna a thawk ta ni ngei tur a ni, thutthleng te dawhkan te chu amahin a thlawka, a vir kual ruai ruai mai a, darthlalang te chu bangah amahin a in vaw keh chhuai chhuai a, Sanga leh Jeneti chu hlauvin maimitchhingin nghet tak chuan an inkuah a. Minute 5 vel hnuah chuan boruak a reh ta, mei alh te chu a reh ta vek a, inchhung chu a khu ta rum rum a. Sanga leh Jeneti te chu inchhung atang chuan an chhuak ta a.

Pawn an chhuah chiah chuan Jeneti nu chuan Jeneti chu alo kuah nghal a, Jeneti chuan tap chungin, "Ka nu...ka tihpalh..min ngaidam rawh." a ti a, Jeneti nu chuan, "Bawihte..ka fanu..chutiang sawi suh..himdam taka i awm hi ka lawm ani." tiin ani pawh chu a tap a. Reilote hnuah chuan police ho pawh Pi Rini'n akoh avang chuan an lo thleng ta a. An buaina vel an sawifel hnu chuan buaina awmlovin an chingfel thei ta a, Pi Rini bulah pawh chuan dawt eng enge maw an sawi ta ringawt a. Sanga chuan mittui tla zawih zawihin in khu hluah hluah mai chu a en a, kalsan har a ti ngei mai. Ama hriat tham lek hian zawite hian, "Angel, ka hmangaih che. Mangtha aw.,," a ti chuai raih a, a kalsan ta a.

Atuk zingah chuan Jeneti leh Sanga chu Angeli thlanah chuan an kal a, pangpar an va dah a. Jeneti chuan thlanlung chu kuahin a tap zawih zawih a, Sanga pawh chu Jeneti bulah chuan dingin Angeli thlanlung chu a en reng a, tichuan motor lam pan chuan a kalsan ta a. Sanga chu muang changin a hawi let a, Jeneti bula Angeli lo ding ve chu a hmu a. Mak ti deuh hian a en a, Jeneti chuan Sanga chu a rawn pan hnai a, mahse Angeli thlarau erawh chu ama thlan bulah chuan ala ding reng a. Sanga nen chuan Angeli chu an inmelh reng a, zawimuang hian Angeli chu a rawn nui ta a...ava han duhawm kher em. Sanga pawh chuan a nuih let ve a, tichuan thlanmual chu an chhuahsan ta a.

THE END
Last edited by Aaron Dustin on March 30th, 2020, 4:15 pm, edited 1 time in total.



Link:
BBcode:
HTML:
Hide post links
Show post links

RSA khiangte
Posts: 1
Joined: January 1st, 2019, 8:20 pm

Unread post by RSA khiangte » January 13th, 2019, 11:49 pm

Ngaihnawm ve

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)