WORLD TRADE CENTRE 9/11

Hlauhawm lampang hrim hrim hmun hrang hrang a mi lakkhawm...
HLalthazuala
Posts: 142
Joined: March 19th, 2018, 6:51 pm

WORLD TRADE CENTRE 9/11

Unread post by HLalthazuala » May 5th, 2018, 8:02 pm

BY RAWNA FANAI

9-11 (World Trade Centre chim) KHA I HAN KEULET LAWK ANG U HMIANG .....

PART 1

Thangkhat lian dawn a liam ta. He khawvela ram hausa ber zinga mi leh thilti thei ber nia an sawi thin, USA chu Terrorist te kut tuarin; New York a, Lower Manhattan kawtthlera an building chhuan em em mai, TWIN TOWERS...World Trade Centre an tih chu thlawhna HIJACKED pahnihin an rawn su thawr a nih kha. Hetiang vel hi chu sawi thui ngai pawh ka ti hranlo a, a hijack tute etc etc pawh sawi a trul pawn ka hre lem bawk heklo. Kan hre vek ti ila, a dik ber awm e a.
Ka sawi tum zawk tak a chu, kha thil thleng kha US SORKAR leh MAINSTREAM MEDIA ten an puanzar ang kha a ni chiah em? Helpawl thil tih nge a niha, Conspiracy rapthlak tak alo inphum ru zawk tih lam han keu hawn ve chhin ka duh a...A tawi thei ang ber turin I han hai chhin dawn ang u aw.
1. WTC SU-TU THLAWHNA KHA PASSENGER PLANE ANI CHIAH EM:
Youtube velah video tam takah hmuh theihin a awm a, a then te phei chuan "It has been DEBUNKED" (A nihna diktak hriatchhuah ani tawh e tihna lam a niang chu) te an lo ti vei rawl nen, enge dik a..enge diklo pawh hriat thiam a har a. Mahse inlo chik ve anih chuan, an chhuina hrang hrang han en lawr chuan rilru hi a phel hian a phel ve phawk thei tlat mai a ni.
9-11 Commission in report a thehluh atanga a lan danah chuan September ni 11, 2001 zing dar 8:46 AM ah chuan, thlawhna hmasa zawk 'American Airline FLIGHT 11' chuan WTC Building pakhat zawk, North Tower an tih chu a rawn su ngheng mai a...He a thawhkhatna hi video emaw Still Image emaw tal pawha lo la tu an awm mangloa... A awm viau mai lah taka, tumahin khatiang a thleng ang tih ve hre bik suh le. Mahse vanneih thlak takin, hetih hunlai..(zingkar anih chu) ah hian Naudet Brother te chuan New York Firefighter te chungchang (i ti mai ang) Documentary an lo siam lai mek alo ni hlauh pek a. A awm na hmun tur dik takah leh a hun diktakah an lo awm ti ta ila a dik ber awm e. Anni video chiah hi UA FLIGHT 11 in North Tower a su lai evidence awmchhun a ni ta reng a. Mahse a thawh khatna bi a han kim meuh kha chuan, New York a Camera nei tawh phawt te kha chuan WTC lam hawi khan an tin deuh vek tawh ti ila, ka sawi sual thui ka ring lem lo, chuvang chuan 2nd Impact phei kha chu lo Document tu an tam em em a....360 Degree in an cover ti ila a dik ber awm e.

Awle, point ah lut ang. Mi tam tak chuan khang thlawhna pahnih te kha Passenger Airline an nilo an ti mauh mai a. Amateur Video tam tak Youtube upload ho zingah pawh, khawlaia mi tawng thawm atanga thil hriat theih te chu,"Kha kha Passenger phur thlawhna ang a nilo" tia sawi mawlh mawlh thawm te a ni nawk hlawm a. Hetiang anih avang hian chhuizui pawh a hlawh narawh a...a chhuitute ti vir tham lek turin chhuizui alo dawl lo riau mai lehnghal nen. 9-11 Commission chalah chil an hnawm ta mawlh mawlh hi a ni ta ber mai. An chhuizuina atanga an thil hmuhchhuah (nia an ngaihte) chu :-
(i) Sawi tawh ang khan a hmasa zawk kha chu video a lo latu kha pakhat chauh an awm avangin han tih vak theih a ni loa....a pahnihna erawh zawng duhpathala thlir zui theih tur khawpin evidencial Video (I ti kher teng) a tam tawk bawk a. An chinglet nasa kher asin. Chuta an thil hmuchhuah liantham/Langsar em em te chu :-
(a) A thlawhna kha a pianhmang leh a landanah chuan Boeing 767 (TOwers sutu thlawhna) pianhmang chu a ang nameuh mai a. Mahse chiang taka kil tin kiltang an han dap meuh chuan mit tlunloh na lai alo tam nangang mai pek a. Chung zingah chuan a rawng, a thlawhna rawng mawlh mai kha sawi zui hlawh ber ani awm e. Thlawhna Company te chuan an thlawhna te cheidan bik "DESIGN" an nei vek a. Hemi truma thlawhna pawh hi theih ang anga chei danglam chu ni ve mahse...a ang diak chuan an cheilo deuh ni tur a ni...a landan ringawtah pawh Passenger Plane a nilo tih chu an thutlukna hmasa pawl a ni ta reng a. Chubakah a hnuhnung zawk, FLIGHT 175 an tih phei kha chu, South Tower a sulai thlalak lo la tu an tam bawk a. Duhtawk chu a ni em lo anga, mahse an chingkual phar nasa na ngang bawk a....chung karah chuan thil pawimawh deuh mai an hmuchhuak tlat mai a. Chu chu kha FLIGHT 175 hnuaiah khan "THIL PAWNG DEUH" a awm tih chu a ni. Thil pawng naran te chu a pawimawh loh hmel tehlul nen, mahse hemi chungchang bik ah kher kher hi chuan, FLIGHT 175 ang chi...BOEING 767 te khan an dulah (A hnuailam ah) hahaha...eng thil pawng mah vuah a ni lova... A thlalak han en pawn BOEING 767 hnuailam pang chu a mam parh tlat mai a. Mahse engatinge WTC South Tower sutu khan a hnuailamah khan thil pai nei ni awm fahrana thil pawng a awm bik tlat tih chu an (a chhuitute) mit fukna lian ber zinga mi a ni ta reng a ni.

Rindan a tam, ngaihdan a tam an tih ang deuh tak takin...mahni ngaihdan fahrah te te lo vawrh ve sek tam tak an awm reng a..mahse chutiang karah chuan rin tlak tak tak a awm lawi bawk si a. Col. George Nelson US Air Force (RTD) Kum 30 chhung Thlawhna leh thlawhna part lo zirchiang tawh thintu chuan he ti hian a ti a," Video tam takah khan thlawhna hnuhnung zawk in South Tower a su lai kha a hmuh theih a. Thil ka hmuhchian em em mai pahnih te chu, thlawhna hnuaiah khan thil pawng a awm a...khatiang kha FLIGHT 175 ang chi, BOEING 767 hian a neilo tih hi ka beng tih tlukin ka chiang a. Chubakah chiang leh zuala video hrang hrang te ka ennawn khan...kha thlawhna in South Tower a sut hma chiah khan...slow motion in han en ila, thlawhna hmawrin building a tawh hma chiah khan, thil lo puak lawk ang tak..eng deuh zuai a hmuh theih a. Enge a nih chu ka hre lo a, tin enge a hnuaia thil pawng pawh kha a nih ka sawi fak thei hauhloa. Mahse ka thil hmuh atanga rindan ka neih taka chu, kha thlawhna khan thil puakthei alh zui vak thei chi (Incendiary) a pai niin ka ring a, building a sut hma khan a then a zawng chu a tipuak tran ni maiin ka hria" a lo ti ve bawk a. Lt. Col John Marks 303 Fighter Squadron, Whiteman Airforce Base, USAF chuan, "Kha thil pawng kha enge a nih ka hre chiang ngam bik lo na in, Missile kahchhuahna emaw thil puakthei paina emaw pawh a ni thei bawk a. A mak ka tih ber erawh chu, leh ka rindan min nemngheh tir deuh roh tu chu...Flight 175 in South Tower a sut hma chiah khan thil lo puak (Blast) lawk a awm tlat mai a. Chuvangin a sut dawn trep khan, kha thlawhnain a sut chhiat baka nasa lehzuala chhiatna (Destruction) thlen turin missile in an kap nge..thil puakthei an ti puak lawk tih kha a ni. A interview naah pawh Rocket Pod (Rocket kahchhuahna, helicopter/fighter vela an dah thin) chu a rawn tilang a. A sawi dan chuan....He rocket pod hi 2.75 inch Unguided rocket kahchhuah nana kan hman thin a ni a, he thilin rocket a pai te hian WHITE PHOSPHOROUS (?) an pai vek a, chu chu kan han kaha a han puah hian...thil var tak mai hi a phuhchhuak tel/siamtel/langthei/hmuhtheih thin a" a ti mauh bawk a. South Tower thlawhnain a su lai video thenkhatah khan chutiang ang thil var rawn inkap chhuak chu hmuh theihin a awm tlat bawk a. Rindan tur ber pawh thiam a har ta map mai ani.

(b) KEY WITNESS BER CHHAN HRIATLOHIN A THI RINGAWT :

Heta Key Witness kan tih hi a hming chu William Rodriquez a ni a, ani hi chu Thlawhna in a sut hmasak zawk North Tower a awm kha a ni a. A sawi dan chuan,"He chhiatna thlen lai hian WTC Basement ah kan awm a. Khatia thlawhna in North Tower a rawn sut hma deuh chiah tak tak khan...kan hnuailamah hian thil puak ring leh na mangkheng hi kan hria a, Basement a awm ho te pawh chu mi a vawrh kang deuh dawrh thei nghe nghe ani. Ka rindan tak chuan kan hnuai leh chhawnga Maintenance room-a generator lian ho te zing ami pakhat a puak a nih ka ring a. Thil ka sawi chian duh chu, kum 20 chhung; kha building ah khan hna ka lo thawk tawh a, in chung lam leh inhnuailama thil thleng te chu hre hrang ve thei tur chu ka ni ang tih chu in hre chiang anga. Tichuan, inhnuai lama thil puak chu, "generator a puak aniang a" tih ka tum lai tak chuan, in chung sang lampangah chuan a rawn puak leh ta dum mai a...chuta ka sawi chian duh em em chu, "North Tower ah khan a hranpa hlakin, hun inkar hlatlo teah, thil puak na tak pahnih a awm tih chu a ni" tiin a thil hriat chu a sawi ve bawk a. Mahse hepa testimony hi ngaih pawimawh sak a ni ta lo nge, Official ho thu puan dan nen a inmil miau loh avangin, an telh lo lui zawk tih pawh hriat a har ta nuaih mai . Rodriquez a testimony hi WABC News chuan an tilang ve tak naa, mahse thiam takin thil puak pakhat chiah thleng angin a thusawi chu an edit sak ta hleuh thung a. Hetianga a hmuna tawngtu ngeiina a sawi, thuneituten an pawmsak tak si lohah chuan, William Rodriquez chuan a kalna apiangah conference te emaw neiin, a thil hriat chu ama thahnem ngaihna in a puang zui ve ta zel a....mahse kum 2008 khan hepa, William Rodriquez pawh hi vauna namen lo a dawn treuh hnuah (A hna atanga ban te, a chhungte an tihnat sak ang etc etc te) thiin an chhar ve leh ta nawlh mai ani.

(c) WTC BUILDING KHA ENGVANG TAKA CHIM NGE A NIH ????

He thu hi sawi a tam em em mai a, a vai vai chuan kan lawr seng dawn lova, a chiang ka tih deuh ho ka han lawr zuai zuai mai ange.
(a) A building tluk dan mawlh mai khan zawhna a siam tam ber ti ta ila, kan lo daw a nih pawn kan daw thui lutuk em lo ang chu. Official lam sawidan chuan, "Khatia thlawhna in building a sut khan a tuialhthei pai te kha kang chhunzawmin, chumi chuan a building support Column (a Beam) thir hmanga siam te kha a tichaklovin a sat luatah an lo nem (weak) a...an hna thawk thei lovin... a chim phah ta a, pakhat a chim chuan a indelh thla a, tichuan a inkahpukchaw thla ta zut mai ani" an ti a ni awm e. Mahse ram changkang nge nge chu, mi thiam bik te leh thil chik peih tak tak an lo tam ve leh zel si a. He theory hi pawm thei bau lo tam tak an awm ta reng a. An thil hriat leh thil nihdan phung chu an rawn au chhuah pui ta luai luai reng mai ani. Dr Jim Fetzer chuan, "WTC Building an sak lai hian an thir hman te hi an uluk em em a. Khatih hunlaia thlawhna lian ber Boeing 707 pawn su ta se...chumi avanga kangmei chhuak thei laka him tur te chuan an lo duang lawk vek a. Kan hriat angin Boeing 707 leh WTC sutu nia an sawi Boeing 767 te hi an intiat em em a...an pianzia ah te, an rih zawng ah te leh an tuialhthei phur theih zawng te thlengin an inang em em a. Khatia 767 thlawhnain building a sut khan, kangmei na tak chu a chhuak hlut ngei a, mahse chik taka thil thlen dan han ngaihtuah kilkelh chuan....thir hian tuiral theihnan, sa (heat) 2800*F a mamawh a, mahse Jet Fuel (Thlawhna Petrol) alh te hi, an sat vanglai ber pawn 1800*F bak an pel thei silo a. Chubakah a building kanglai kha chiang lehzuala han en chuan, meikhu rawn chhuak kha adum nguah nguah mai a....chumi awmzia chu, mei khan a kan dan tur ang taka kang tura a mamawh, oxygen a hmu tha tawk lo tih a chiang reng bawk a, chuti anih chuan a hmaa kan sawi 1800*F a sa pawh khan a kang lo tihna a lo ni ta a. National Institue of Standard and Technology (NIST) chuan WTC a kangmei chhuak te kha 500*F vel ani e an ti bawk nen. Anih chuan WTC a kangmei chhuak te kha, engti kawng zawng mahin....a building thir te ti tuiral emaw, ti nem tur tak ngial pawn an sa tawk lo tihna a nih ber chu. Chutiang te pawh chu lo dahtha in, a thir chu lo tinem thei ta tehreng pawh ni se..(A chimdan kha, Pancake collapse an tia...ngil taka rawn chim thla kha) Pancake Collapse ang kha chuan a tlu theilo hrim hrim a, meialh khan a rual thrawtin kil tina thir te kha a tihnem rual thrawt a ngai dawn a ni ber a. Thil nihdan phung leh mimawl ber ngaihdan ah pawh thil ni theilo thawthang a ni a....a thir te kha khawilai emaw a lo nem ta bik anih pawn, sir zawngin..a nem lampang chu trang zo loin a rawn tlu tura ngaih a ni a. Engti kawng zawng mahin Pancake Collapse ang khan tluk theihna a awmlo a ni" a lo ti ve bawk a.

Khatia a chim hnawk an then fai trantirh lai vel khan, thlalak pakhatah chuan a foundation thir lian tak te chu an lo la fu hlauh mai a. Chuta a lan dan chuan, khang thir te kha 45* angle in a in tan chhum hmawk mai tih a hmuh theih a chu bakah a thir kang bangah khan enge mawni sawr bawk luai hi a awm bawk a...45* angle ka tih awmzia chu, mau kan han fik hmawk a..a fikna lai chu a awn deuh raih ang hian a ni mai awm e. Chu thil chuan ngaihdan dang a rawn vawrhchhuak leh ta zel a. Sapramah te chuan building hlui ti chhiaa eizawng te anlo awm ve leh zel a. Heng ho hian building chu bomb hmangin awmze nei takin an tichim thin a. A bul vela building te tichhe lo turin leh, a awn zawnga tlu lo turin a banah te chuan awmze nei takin bomb an kam a. An han tihpuah chiah khan building chu, a hmaa kan sawi PANCAKE COLLAPSE an tih ang khan ngil takin a rawn chim ta thin a. Chutianga chim tura bomb an kam reng reng chuan...a supporting column ah khan 45* in bomb (Plastic Bomb aniang, hre toh biklo) kha an kam kawisawi a..a puah chiah khan awn miahlo turin an kamna ban kha a bung ta hmawk mai thin ani. Hemi ka han sawi duah na chhan chu, WTC Building pahnih te kha..an tluk dawn khan, thil puak ri indawt zawt zawt kha hriat ani tlat mai a. Chubakah video thenkhatah chuan, building rawn chim thla in a la rawn thlen phak siloh, a hnuai lam deuh zelah khan, rual mangkheng leh inkar hlat dan inang thrapa thil lo puak lawk zawt zawt hmuh tur a awm tlat vangin a ni a..chubakah ahmaa kan sawi, thir chuangbanga thil sawrbawk luau kan tih te kha....heng thir ti chaklo awlsam tur leh, meialh te..an alh dan aia nasa fea ti alh thei tur compound pakhat, THERMITE ekchhia/kangbang a nih an ring a. A beam bung vel ah sulhnu eng eng emaw a lo awm ve leh zel nen. An han test a, thermite hnuhma/chuangbang chu an han hmu lehzel bawk si a. Heta trang hian mi tam tak, a bikin mithiam tam tak te chuan WTC kha CONTROLLED DEMOLITION hmanga tihchim a nih an ring ta bur mai ani.

*********,,,,,,,,,********,,,,,, *********,,,,,, ********

PART 2

A hma khan ka sawi tawh na a, thil pahnih khat han sawi belh leh ka duh a. A chhan chu documentary te zau zawkin ka en a, chhiar theih ang ang...eye witness report te bakah, file pawimawh, hmanni hun la reilote maia an DE-CLASSIFIED chauh te ka zu bih thleng ve ta hial a. Chuvang chuan ngaihdan ka siam ve tawp tawh mai. Ngaihdan te chu neih thiang a ni lo em ni. I luhchilh leh lawk ang aw.
1. WTC BUILDINGS TE KHA "CONTROLLED DEMOLITION" HMANGA TIHCHIM ANI ??? :-
Ka tawng huai bang bang khawp mai. US Department of Homeland Security te hian min rawn hual tuau tuau mai angah hahahahahaha.....beisei sang mah mah e. Tak tak ana, keichu ka hmuh leh hriat chinah chuan heti lamzawng lo chuan rilru ka siam thei ngang ta lo a ni. A hnuaia link ka rawn dah hi en ula, "911 Ripple Effect" tih a ni a...Hetah hian chiang takin building a chim laia, awmze nei fahrana, ala chim lo china bomb puak kual/lawr pawp pawp hmuhtur a awm tlat mai a. Chubakah, hetiang building thriata eizawngin, bomb hmanga building an tihchhiat dawna an bomb kam dan kalphung a rawn sawi chian hnuah phei chuan. "Ehe" pawh ka tibuai duh ta lo mai. A video ka rawn dah ah hian Minuite 23 na vel atang hian chung ho chu an thlur bing tran a, in lo en ve mai dawn nia. Sawi ai chuan hmuhin a chiang zawk.

A hnuai ami hi..link chu aw...en duh in inawm m tak in...
https://www.youtube.com/watch?v=bwThcdIoufc

Chubakah khatia building a rawn chim dawn leh, a chim hnua khawlai a lo awm ve..... Building chim khu in a tih pawt phek phuk te kha, News Crew te khan a theih theih an lo interview bawk a. An vai mai hian building chhungah khan vawi tam tak thil puak thawm an hriat thu an sawi a. Mahse chu aia beng verh zawk chu Fire Fighter ho titi lai an capture kha ani (anni chu an awm hnai thawkhat turah ngai ila) An sawi dan chuan khatia building No 1 a rawn tluk thlak dawn khan thil puak ring deuh mai an hria a, tichuan kar lovah a rawn in pangpawzial thla ta tup tup mai ani awm e. Chumai ala nilo...an zinga pakhatin a sawi dan chuan...."building rawn awp thlak ruala thil puak ri pawp pawp te kha in hria em?" a tih lai pawh capture fuh a ni a. He a thusawi tak hi a video ah hian chiang mangkhengin an rawn highlight ta nghal bawk a. Hemi hmaa post ah khan ka sawi zuai dang pakhat chu..... Main eye witness ka tih pa sawi kha inla hria ange maw. "North Tower Basement ah kan awm, kan hnuaiah thil ring mangkheng a rawn puak a, a nghawr a nat em avangin basement a awm te chu kan kang suau nghe nghe a...chumi hnu lawkah in chung lamah thil puak ri ring tawk kan hre zui leh a" a tih kha. Chuti anih chuan Tower tluk dan chu tihian ka hmu ta ni. A tir berah a foundation tih khawbaw tumin, in hnuai berah bomb na tak an ti puak phawt a...hei hi thlawhna in building a rawn sut lai nena in synchronise tura an hisap, mahse in rual ta chiah silo niin a lang a...chumi hnuah thlawhna atang khan thil enge mawni...a building a sut hma chiah khan kahchhuah/tihpuah a ni leh bawk a. Tin, a kan chhung zawngin thil puak ring tak tak an hre fur hlawm a. Chuan a chim dawn chiah khan ring mangkhengin thil a puak ri leh dura, tichuan a rawn sawp thla ta kha a ni a. A rawn tluk thlak laiin awmze nei taka kam tih hriat reng reng in bomb ni ngeia ngaih theih chu a puak kual zawt zawt hlawm bawk a. Chuvangin He WTC Buildings te INTENTIONAL taka tihchhiat a nih ka rinna hi a lian ta em em a. Heading ka hman dan atang khian ka perspective chu in hrethiam mai ang chu.

2. THE BBC REPORT (Engtinnge an lo hriat lawk theih le??)

Kha ni lungchhiat thlak takah khan, media awm zawng zawng emaw tih mai tur khan khawvel pum hmuh theih turin kha chhiatna inmung vel kha an cover ti ila, kan uar mah mah mai thei a. Mahse engapawh chu lo ni se...khami ni ber kher kha chuan NEWS channel awm ka hriat te leh, an lo awm ve tih ka hriat ngai loh thleng khan WTC chungchang ringawt kha nilengin an tichhuak tih chu ka la chiang khawp mai.
Hetah hian thil mak tak a awm tlat mai a....London Time-a Zan dar 10 PM.....(chu chu Tlai dar 5 PM, Eastern Standard Time, USA lam ah chuan tihna) ah chuan Building 7 (Sulliman Brothers Building) an tih mai WTC Building kianga building pawimawh deuh mai pakhat chu a chim tih an lo report daih mai a. A nihna takah chuan he building 7 hi Tlai dar 5:20 PM EST (Lonon Time ah chuan 10:20 pm nih chu) ah a chim choh a ni si a....engtin nge he building chim hi an lo puanlawk daih theih ni ta ang le. He thil hian min ti ralkhel hle bawk a, a chhan chu ngaihdan pakhat min siam ta tlat mai a. America sorkar te leh Mainstream Media te khan thilthleng tur hi an lo hrelawk vek a, script awm sa angin an che tlang ni tlatin ka ring a. A nih ngawt loh chuan BBC, tuifinriat rala inkulh te khan...Biuilding 7 chhiat tur thu kha eng ti kawng zawng mah hian Minute 20 dawna hmaah an lo hriatlawk theih dan tur a awmlo. Zawlnei tha mi an lo kawl ru khiau te a nih ngawt loh chuan hahaha.
He building chim dan te leh zel hi a awihawm lo lulai lutuk a. WTC hnaia awm a nihna laiah chuan a mei si per te lo dawngin kang mei tlem chu chhuak ve mahse, han chim pui tur tham a tuar lo nasa rapthlak a. Chuan a chim dan pawh a hmaa kan sawi fo PANCAKE COLLAPSE kan tih ang chiah khan a ni ve leh bawk a. Mahse he thil hi chu a hnuah a neitute, Sulliman Brothers te chuan thil kalhmang an rawn puang chiang (?) hlauh a. Mahse an sawi dan thungah erawh chuan,"Thuneituten Building 7 hi a chim dawn tho tho a, chuvangin tichim chawp mai ang" tiin thu an rawn a. Tichuan a hmaa kan sawi fo thin Controlled Demolition hmang ngei chuan an tichim ta a lo ni a. A tluksawp dan lah chu Tower pahnih te tlukdawp dan nen Zawng fian phel ang hlauh.
Ka sawi tum tak a chu, BBC khan engtin nge Building 7 hi a chhe dawn tih an lo hriat lawk tih chu a ni? Sorkarin mipui bum nana an plan lo siam lawk angin thil a kal diak diak thei ta silo anga...BBC lam erawh chuan an thu dawn angin, a hun takah an lo puang hmiah mai tihna em ni dawn?

3. PENTAGON LAM KHA I HAN DAK ZUAI ANG AW !!!!

Official in an thuchhuaha an tarlan dan chuan "he thlawhna FLIGHT 77 hian Eastern United State huam chhung vel chu a thlawh kual khum sek phawt a, tichuan Ohio khaw chung zawn velah inherin Pentagon a rawn pan a, a rawn su ve ta ni" tih a ni a. Chu chu WTC te sut an nih hnu darkar khat hnu velah a ni awm e. Mahse i han bihchiang leh zual ang aw...a awlsam nan point in dah leh ta mai ila :-
(a) Flight 77 hi Pentagon bawr velah chuan a thlawk kual phawt tia sawi a awm bawk a. A enga pawh chu lo ni se, engtin he thlawhna hian, khawvela hmun him bera ngaih...khawvela venhimna uluk berna hmun leh sipai hmunpui lian ber mai chu, dodalna emaw lo beih let tumna eih awmloa a sut theih tlat mai hi thil mak a ni.
(b) Glen Stanish...Kum 20 chuang Professional Pilot lo ni tawh chuan ti hian a sawi a," Ka ngaihdan tlang takah chuan, Pentagon kha eng thlawhna mahin a su lo, Boeing 767 te lei lei chuan a su lo chiang tih hi a ni. A chhan chu su ta se, a hnuhma hnuchhiah tur a tam dawn lutuk a, entirnan a mei (Tail Section te, a engine pahnih leh a trumna tur ke, fuselage te ho... chhe thei lo tura duan te kha recover tur a awm miahlo a. Thlawhna tlaah reng reng te chuan hetiang te hi chu a chhe ve ngailo a...a thla te pawh hi a chhe mawh khawp mai...mahse chupawh a them takngial pawh hmuhtur a awm lo bawk a, chuvangin Sorkar report hi ka pawm theilo ani a ti mauh mai a.

(C) Boeing 757 hian engti kawng zawng mahin Pentagon kha, a sutna hmunah khan a su theilo hrim hrim mai a, a chhan chu a va sutna kua (Hitpoint/Impact point) kha feet 10 vel chauha sang a ni a, feet 16-17 vela zau chauh a ni a.....Boeing 757 thla hi feet 125 vela thui a ni a...chumi in a hrut tur ni ngeia lang tukverh leh building structure threnkhat te chu him pialin a awm bawk si a. A landan atang chuan engti kawng zawng mahin Boeing 757, Multi ton a rit leh thla hlai zawng feet 125 nei a, a mei san zawng ringawt pawh feet 40 chuang kha...khalai kaw tereuhteah khan engti kawng zawng mah hian a inhnawhlut theilo hrim hrim. A kehthem, a thla te, a mei te, a engine leh alluminium darh neih nuai ang te pakhat mah hmuh tur a awm bawkloh chu lo dahtha ta zawk mah mah ila. Thil mak chu a ni ve ngei alawm tiro?
(d) A awmzia takah chuan, thlawhna thla neilo, mei pawh neilo....bang ava sut ruala a taksa thamral nghal vekin a su a nih ngawt loh chuan he thil hi a dik thei ngang lo ani. Thlawhna chuan lo su ta se, a thla parh thui lutuk in a hnuhma hnuchhiah te pawh a awm anga...(WTC ah kha chuan a thla hnuhma a lan avangin, a sutna te pawh a kak phei ruak kha) Chubakah chunglamah a meiin a tauhna hnuhma pawh awm tur a ni bawk. Engmah chutiang chu hmuhtur a awm silo a. Awihawm loh ta em em mai ani. Firefighter pakhatin thla alo la hlauh mai a, chuta a lan dan chuan, a thlain a sutna zawn tur laiah te chuan hnuhma a awmlo ni mailovin, tukverh lo awm te takngial pawh chu chhe lovin a lo awm a...a meiin a hlapna tura ngaih zawnah pawh chutiang chiah. A khaikhawmnan Maj. Gen Albert Stublebine, Two Star General in the US ARMY in a sawi dan hi hmang tawp mai ang. a sawi ang diak diak in," Ka hunlaiin Soviet ho hmanrua te ralkhat emaw hnaihchilhin emaw teh dan thiam bik ka nih avangin ka lo teh hnem tawh a. Thlawhnain a sutna kua an tih kha ka en a, a sutu thlawhna nia an sawi pawh ka belchiang vek a. Chuta ka sawi duh chu...kha thlawhna kha, khami kuaah khan a leng lo tih hi a ni. A nih chuan eng berin nge Pentagon kha su ta ang?" a ti hial a ni. Sawi tur a tam lutuk a, thur chhuah tur ber pawh ka hre lo hial. Duhtawk rih phawt ang. Sorkar report in Thlawhna rawn thlawh thlak dan, a thlawh chak zawng, a thlawh san zawng, a kawng rawn zawh nia an sawi te pawh sawi fe tura awih awmloh a awm, mahse a tam tawk tawh thoa..a peih tana bih zui veah dah tawh mai ang.
(e) VIDEO SURVEILLANCE :- Pentagon te chu CCTV tha chi ber ber a awm ther fur tih mipui ten an hre ve vek ang tih an hrethiam ve tawh a ni mahna. A tih awihawm nan an ti nge, chu camera in picture a lo lak te chu an han tichhuak ve ngei a. Chu pawh a ngai te bawk. A hmasa berin an picture tihchhuah ah hian thlawhna hmel reng reng a lang lo a, thil khu/kangalh lai a lang ringawt a, chutah an cctv a date and time te chu ala diklo zui a. Khawvela hmun pawimawh ber leh, venhimna khauh ber nia an chhal thin hmuna CCTV Camera Date and Time chu a diklo anih chu..nuih ti za hian. A inziah dan chuan September 12, Dar 5:37 a in ti vah anih chu...hei phei hi chu America Sorkar hi heti em em hian an lo mawl ani maw ka tichhuak hial a ni. Thlawhna lo thlawhna lam nia an sawi zawnah hian CCTV 10 vel zet a hawi thiang rual a, mahse chutiang zozai zingah chuan thlalak pahnih chiah a inla tlat mai a. A camera dangte kha an lo chhia tihna a mi niang, he khawvela building him ber leh venhimna ulukna ber hmunah hian. A thlalak pahnih ah lah chuan thlawh reng reng hmuh tur a awm lo bawk. Huiham. FBI chuan thlawhna in Pentagon a sulai video chu clip 80 chuang kawl angin an insawi a. Mahse hetiang lam zirbing mi leh a mi nawlpui thleng te pawh aniang chu...ti chhuak tura an tih pawn...an tawng ka in la lawk ila "National Security" avangin an ti chhuak theilo an han ti leh mauh pek ah...

Hunion mi daih ta lova, chawpchilh takin ka han ti chawt chawt a, lungthlu lo lai te, thu inmillo te leh typing mistake te a lo awm nawk thei a...chhiartute hriat thiamna ka han ngen lawk a. Ka thutlukna ni ta ber chu Pentagon kha thlawhna in a sulo tih hi a ni a. Mahse min ti luhaitu thil pakhat erawh chu, a su tu thlawhna an tih chhunga chuangte kha an thi vek an ti a...kha kha enge awmzia ni ta ang. Pentagon hi thlawhnain su ta lo se, FLIGHT 77 Passenger te kha khawnge an awm tak ang tih hi a ni.
WTC Building te kha, US Sorkarin an duh reng vanga tichim lo ni ta se, enge an AGENDA ni ta ang? A building a hlui tawh sia, han thriah ngawt dawnin Monumental Value alo nei ve hman tawh sia, mipuiin an ngaithiam awm silova..,.heti hian i ti mai ang u an ti ta em ni niang. Nge nianga..a building leh infrastructure te hrim hrim hi a world class tawhloa, a hmunah vek, a aia changkang..khawvela kan ram pholang larh thei tur sa ang u an ti zawk ami niang. Keichu ka rindan nghet bur mai chu...khatih Laia President, George W Bush a pa, George Bush a hunlai atang tawh khan. Chhuanlam beitham te te hmangin Middle East an bei chamchi reng a. An beih chhan pawh a chiang "OIL" a ni. Tin Bush chhungkua hrim hrim hi World Most Powerful Family an tih zinga tel pha ve ngat an ni tih hi ka han zeptel duh lawk bawk a. Khatia American Economy a lo hniam tran khan, solution tha ber nia an hriat chu Middle East a OIL laihchhuahna khur te, a tam thei ang ber control leh a...chumi hlawkna hmanga an economy siamthat bakah an family business inhaivur pah kha an tum niin ka ring a. Chumi ti hlawhtling tur chuan khatih hunlai khan OSAMA BIN LADEN a lo lar veleh zel bawk nen...nang ni la, Al Qaida ho tih anga lantir hmiah a, phuba la ni awm fahrana an ram zu run a...oil zu inchhek par leh triah triah mai bak option dang i hre dawn chuang a mi. Lungte pakhata sava pahnih vawmthlak an sawi ang hi ni ringawt mai alawm le. In ngaihdan chu ka hreloa, hei hi ka ngaihdan chu a ni e.

*********************👇👇*******************

BY - VALPUIA LEO CHAWNGTHU

*SEPT 11: WORLD TRADE CENTER ATTACKED*
( _Tawite in_ )

September 11, 2001 (Thawhlehni) zinga USA tawrhna rapthlak tak mai thlen champha a lo ni leh ta reng mai.
.
Islamic Terrorist Al-Qaeda (Bin Ladena hote) mi 19 ten Thlawhna 4 an hruai kawi avanga chhiatna thleng rapthlak zia kha kan la hre țheuh awm e.
.
Kha chhiatna rapthlak tak thleng avang khan mi 2978 + 19 Terrotist = 2997 in nunna chanin mi 6000 vel zetin hliam an tuar a nih kha. Chhiatna thleng hlut zawng kha Dollar Billion engemawzat a ni.
Khang thil duhawm lo tak kha Zing Dar 8:46 - 10:28 (darkar 1 leh minutes 42) chhunga thleng a ni a.
.
New York khawpuia World Trade Centre Building a țhianga ding, chhawng 110 zet chu Boeing pahnih - American Airlines, Fl 11 leh US Airlines Fl 175, Terrorist hruaikawi chuan an su dun pawp mai a. Kangmei nasa tak chhuakin Building 2 te chu kar lovah an sawp chhe ta rup mai a ni.
.
US Defense Hqrs.Building Pentagon, Arlington County, Virginia a mi pawh American Airlines, Flight 77 hruaikawi chuan khawthlanglam building suin Hijacker leh Passenger te bakah a chhunga hnathawk engemawzat an thi a. Tamtakin hliam an tuar bawk.
.
US Airlines Flight 93, Washington DC lam pana thlawk mek hruaikawi erawhchu passenger ten hijacker te huaisen taka an beih let avangin Stonycreek Township, Shanville, Pennsylvania ah a tla a. Chhiatna rapthlak a thleng zui ta tho. Passenger te hian bei let lovin thlawk tlang ta zel se Washington D.C ah eng ang taka rapthlak chhiatna thleng ang maw??

*Thubelh*: Al Qaeda hotupa ber Osama Bin Laden chu USA chuan a veh ta char char mai a. Ani lah a biru kual zak zak bawk nen. Mahse a tawpkhawkah chuan an innang ta. US in chhiatna rapthlak an tawh ațanga kum 10 na, May ni 2, 2011 1:00 am khan Pakistan a a bihrukna hmun Abbotabad ah US Navy SEALs ten an kaphlum ta a ni.
..........................................................................

BY - LALTHA ZUALA HMAR MCF

=^= 11th SEPTEMBER CHHIATNA =^=

*9/11* sawilan ringawt pawh hian mi tam tak chuan he huna khawvel nghawr nghing dawt tu Chhiatna rapthlak thleng kha kan hrechhuak mai awm e.
.
Kum 17 zet a liam ta... Khawvel ram ropui ber tia chhal ngam USA chuan *11th September, 2001* khan Firfiakte Kut a tuar ta hlauh mai.
An ram sana a zing dar 8:46 atanga 10:48 inkarah khan Chhiatna rapthlak tak mai an tawk a. Firfiaka chete hruaikawi Thlawhna 4 chuan hmun hrang hrangah Chhiatna a thlen a ni.

##. American Airlines Flight 11, Boeing 767 ah chuan Thawktu 11 leh Paasenger 76 an chuang a. Zing dar 7:59 ah Logan Airport chhuahsanin Los Angeles an pan a. He Thlawhna ah hian Hijacker 5 an lo inphum ru reng mai. He Thlawhna hruaikawi hian a thlawh chhuah atanga minute 47 na, zing dar 8:46 ah New York City a World Trade Centre hmarlam building chu a su ta pawp mai a. Kangmei rapthlak tak a chhuak zui ta a ni.

##. United Airlines Flight 175 Boeing 767 chu Hnathawktu 9 leh Passenger 51 phurin zing dar 8:14 ah Logan Airport atangin Los Angeles pan tur bawkin a thlawk chhuak a. Hetah pawh hian Hijacker 5 an lo in phum ru. He Thlawhna hian a thlawh chhuah atanga minute 49 na, zing dar 9:03 ah World Trade Center chhim lam building chu a rawn su ve leh pawp mai a. A hmaa building pakhat lo kang khu mup mup tawh chu a rawn belhchhah ve ta a ni .
.
##. American Airlines Flight 77 Boeing 757 chu Hnathawktu 6 leh passenger 53 phurin zing dar 8:20 ah Washington chhuahsanin Los Angeles a panin a thlawk chhuak a. He Thlawhna ah pawh hian Hijacker 5 an lo inphum ru. He Thlawhna hian a thlawh chhuah atanga darkar 1 leh minute 17 na, dar 9:37 ah chuan Wahington DC a US department of Defense building Pentagon western side chu a su ve leh ta a. A tum tak chu Pentagon building lai tak ni Mahse Thlawhna chhungah inbeihna a thlen avangin a tum tak a su ta lo niin sawi a ni..WTC lamah mi zawng zawng rilru a awm laiin Pentagon lamin chhiat an tawk ve leh ta. USA mipui te an ralmuang lo hle a ni. He hmunah hian mi 343 in nunna an chan.

##. United Airlines Flight 93 Boeing 757 chu Hnathawktu 7 leh passenger 33 phurin Newark International Airport atangin zing dar 8:42 ah San Francisco panin a thlawk chhuak a. He Thlawhna ah pawh hian Hijacker 4 an lo inphum ru. He Thawhna hian khawilai nge beih a tum hriat a ni lo va. White House emaw Capitol emaw a bitum ngei rin a ni. Mahse passenger ten Hijacker te hi huaiaen taka an beih let ve avangin a thlawh chhuah atanga darkar 1 leh minute 21 na, zing dar 10:03 ah Stoneycreek Township, Shanksville, Pennsylvania ah a tla ve ta ni. He Chhiatna ah hian mi 72 in nunna an chan.
.
Heng Thlawhna 4 hijack avanga Chhiatna thleng hi a turu hle mai. Mihring 2977 in nunna an chan a, heng zinga 19 hi hijacker an ni. Hliam tuar hi 6000 vel zet an ni bawk. Khawvela Firfiakte chetna ah chuan rapthlak ber a la ni. A tirah chuan tute nge an nih hriat a ni mai lo va. Mahse Islamic Firfiak Al Qaeda (Osama Bin Laden a hote) an ni tih hriat leh thuai a ni.
.
World Trade Center bikah hian bungrua leh thil pawimawh tihchhiat hlut zawng hi US Dollar 3 Trillion vela chhut a ni a (Trillion hi Mizotawngin ka dah thiam lo. 1,000,000,000,000 ). Building ding thiang 2 chu kangmei chhuak avanga darkar 1 leh minute 42 chhung leka a sawprawp bakah a bula building 10 vel zet a chhe tel bawk.

Hijacker te hi 19 an ni a. Saudi Arabia - 15, UAE - 2, Egypt leh Lebanon mi 1 ve ve an ni. Anmahni kaihruaitu ber chu Egypt mi Mohamed Atta a ni.
Al Qaeda ten USA chunga kut an thlak chhan hi *USA in Israel a support vang te*, *Saudi Arabia a US Sipai inkhuar avang te* leh *Iraq chunga USA chet dan duh loh vang te* a ni.
.
USA chuan Firfiak te lakah Indo a puang nghal a. Afghanistan a Taliban hmunpui beih a nih tur thu pawh a tarlang nghal bawk. Al Qaeda hotupa Osama Bin Laden zawn hna pawh rim taka thawkin kum 2011 May thla ah Pakistan ah kahhlum a nih tak nghe nghe kha.
.
World Trade Center tlusawp kara mitthi leh Hliam tuarte zawn hna chu rang taka thawh nghal a ni a. Mihring inla chhuak kima an hriat hnuin Building tlusawp chu thenfai nghal a ni a. May 2002 khan an insingsa fel thei chauh a ni. Kum 2006 November atangin Building dinthar leh hna thawh tan a ni a. Kum 2014 November Ni 3 ah Building thar hawn a lo ni leh ta a ni.
Pentagon Building chhe lai pawh chu kum 1 chhungin an thuam tha leh vek hman bawk.

He chhiat tawhna avanga Building an din thar leh rual hian Chhiat tawhna hmun 3 ah Memorial Building ropui tak sak nghal a ni a. World Trade Center bulah hian *National September 11 Memorial and Museum* din a ni a. Pentagon bulah hian *Pentagon Memorial* din niin Stonycreek Township ah hian *Flight 73 National Memorial* din a ni bawk.
.
NOTE: Hei aia chipchiar leh ngaihnawm zawka tarlang thei tamtak in awm ang. A tlangpui zawr zawr ka rawn thai lang a. Tih dik loh palh a awm anih chuan inhriatthiamna ka ngen nghal e. - ṬRI ZET A
.
_Thlalak indawt dan_
*Tlar Chung ber*
- WTC Building kang lai
*Tlar 2 na*
- Pentagon chhe lai
- Flight 175 in WTC a su lai
*Tlar 3 na*
- Kangthelhtu in puihna a ngen.
- Flight 93 Engine hai chhuah lai.
*Tlar 4 na*
Flight 77 in Pentagon
a su lai CCTV in a record dan.

**********Advertisement click ************



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)