THEICHÊK RAHTLÂN By Hriata Tea

[Ngaia]

Thuziah lamah tuina ka nei rihlo nen, thiamna lamin min bawh hneh em bawk silo a, chhiartur post thar a van deuh takin, la chhiarlo tan ka rawn suan lut leh ange, minlo pawm thiam sak hram hram dawn nia.
.
Kum 2004 kha ni tain ka hria, tun ang hun vel, ruahtui erawh tun lai ang em em chuan a baw hawk tawh lem lo a, leilung erawh a la hnipin, hnahthel pawh a la ram em em hran lo. Mahse, ngaw chhung ni lem lo ah chuan vaivut te pawh awmin hnah ro pawh a ram viau tho.
.
Kan khua ațanga darkar 3 zet kal a hla, kum 10 chuang zet leng tawh, a kum leh maia kan khaw ram țheh tur a ni nghe nghe. Chu hmunah chuan kan ramvakin theichèk kung lian leh rah țha em em mai kan hmu fuh a, chepa, vahui, vahai, sazaw; hnuailamah vahrit, ramar, sanghal, sakhite chena an tlan kan hmu fuh a, chhûn êng ah sanghal sum ruk zet ka kap nghe nghe a. Mi pali in, a hring ngatin kan phur haw awlh reng a ni. Chu theichèk chu riahchilh tumin ṭhianpa HLU-A nen, thangchep leh beai te kengin ulhbun mal pakhat ve ve pu chungin kan thawkchhuak leh a.
.
A hmun kan thlen chuan a rah hmin vanglai tak a lo ni tawh a. Hnuailama lo tlantu vahritte chu kap nghal mai duh loin beâi thang sawm vel ve ve, kan han tlar hnan ta zawk a. Riah bûk tur hmun rem leh biru deuh, mei rim nam phak lohna tur si. Mahse, theichèk hnaih thei ang ber si chu zawngin kan vak vel a.
.
Khaw hnaih lam, theichek kung awmna piah mual lehlam pangper tlak déng hmun rem ṭha laiah riahbuk kan sual a. Kawrte tui chu mautlawn pali vel hmangin bûk kawtah kan la bawk a. Tlai ni tlâk hma hretin, a bang tih loh chu kan pum hman vek a ni. Nikhat atan chuan duh tawk rih phawt ang tiin, a chung ber a hul ta bawk a, sa pel zai kan relsan ta a.
.
Buk leh theichèk inkar kawng sial pah fâwmin kan pan phei leh a. Kan beâi thangah pawh vahrit pahnih leh varung pathum ngawt a lo inkhai der tawh mai. Kan phurin nuam kan ti khawp a.
.
Thangchepte kam pah zelin beâi pawh kan tlar belh zel a. Thim chhiat hmain bukah kan let leh a. Kan sava awhte chu rawhin, varung pahnih kan chhum a, a dangte chu kan rep a, chaw kan eifel meuh chuan zan dar 8 vel a ni der tawh a. Kan riahna hi mau hmun a ni a. Chuvangin vân vâr pawh, mau hnah karah a hmuh theih a, arsi pe tuarh leh khawthiang nuam tak chuan lung te pawh a tileng thei lek lek mai. Mahse, chulam zawng ka sawi tum a ni lem lo e.
.
Kan riahna leh theichek inkar hi pen(kar) zawng chuan pen zahnih ai tlem lo tur ani a. Theichék awmna hmunzawl hi, sangha dil lian ve tak awm theihna metre 40-50 bial vela zau ani a. A lai tak velah a kung hi a ding luah mai a. Patling pathum pawm vela lian a ni. A rah a tam bawk a, a hmin sen tuarh mai a. He hmun zawl bak hi chu kham chhia ti ila, hmun awih bung lutuk ni si lo, lung hmunin a hual vel ani a. Beai kam tur pawn a hmun zawl lai pawh lung a tam avangin duh na- na ah, a khen bur ngawt theih hek loh.
.
A chhak lawk theichek aṭanga pen sawmthum velah kham a ding chho leh a, awih bung lutuk si loin, ft. 20 ai hniam lo turin a inkhawh chho ut a. Saza te tana chenna nuam tawk vel a ni. Ramchhia a nih avang hian Lo atan pawh an vât ve ngai lo a. Thing lian tak tak a ding ngir khup mai a. A karah mautak leh rawnâl bakah phulruâ ten a pawlh ve lek a. Sanghal hnu leh saza hnute chu a chiar dup mai a ni. A ram hmelhmang chu duhtawk i la, ka sawi thiam chiah lo tlat.
.

Zing varṭianah tho in rawngbawl pah chungin bûk bang kan pin/ping, pah a. Chawei kan peih rual rual chuan kan bar sawk sawk a. Theichek lam panin kan tek chhuak ta vat a.
.
Kan han thleng phei chu zawngrual leh sazawin an lo tlan a. Chhak leh thlangah inṭhenin kan han inrawndun ta tak tak a. A nuam kher asin aw, tleirawl thaza zek zawk ṭuan ṭhat lai a ni bwk a. Zawng pahnih leh sazaw pathum ngawt ka kap tla nghe nghe a ni. Ṭhianpa Hlu-a pawn zawngchal pakhat leh sazaw pahnih a kap ve bawk a. Nuam kan tiin kan phur surh surh kher mai. Hah reng reng kan hre chang lo. Thangchepah lah chuan hleikapsen leh zuhrei an lo ṭhu chum but hlawm a. Thingtuai satin bùk lamah kan inkawt phei a. Kan puah zawhah hrawl zet zetin kanchan darh a kan rep dul mai a ni. Sarep dahtu tur zawk kan inphut fiam ta sek a. Kan phurin kan helhhawlhdun ngei mai. Chhun chaw kan fak zo te te a phur zetin kan thawkchhuak leh nghal vat a. Mahse beisei angin engmah kan hmu ta lo. Kan beäi kam lah chu a ngul a lo tliak fer fur mai a. A thang erawh a per der si lo. Ka ngaihtuah nawn leh hian ngaihṭhat lohna chang ka hre lo kha mak ka intiin kan phurna khan min hneh hle niin ka hre ta ber. Thangchepah lah hnahthel ro a lo inawk fur bawk si. Kan kam ve ve chu siam ṭhain kan thang la neih zawng zawngte chu kan kam zo ta ṭhak a. Theichek kung leh a hnuai vel lan chian theihna si, chan hmun rem zawngin thingkung dang kan melh a. Zairum kung zar ṭawi luih mai leh rem fahran ka hmu fuh a. Thingtuai pathum vel ka sat a. A hmawrah ramhruiin ka ṭawn khawm a. Ka lawn kai hnuah pawt chhoin ṭhuthmun rem takin ṭhangte ka dawh ta a. Ṭhianpa Hlu-a la vei kual lauh lauh chu nuih vur vur chungin ka thlir reng a. Phun deuh nung nung chung chuan ka piah lawk pen sawmhnih vela fah thing ding awnah chuan a lawn ve ta a. A zar satin ṭhutna tur a siam a. Hnang la turin a chhuk leh thul, tlailam dar hnih leh dar 3 inkar vel a ni tawh si, thawm a nei reng chu ka ning lek lek tawh a ni. A tawpah zawng a ṭhu ve ta vauh vauh a. Han inbiak lung lung chi ni hek lo, kan inen a kan innuih leh suk ṭhin a. A reh hian a reh vawng vawng mai si a. Phai khawlum a ni bawk si, bengte chu a kiu deuh rum rum thei hial a ni. Theichèk lam ringawt ka thlir avangin ka chhak tlang lam aṭanga lung rawn lum thla hek hek ri ka hriat rual chuan ka inher vat a. A rawn ri thla ta buan buan a. Saza ngei a nih ringin ka silai chu ka’n lek kawh a. Thawm rawn rikna lam chu ka lo tin zawn sa pan pan a. Mahse egmah hmuh tur a awm lo mai pawh ni loin chutiang khawpa thawm na leh lung lum si, hnim han che eih pawh hmuh tur a awm miah lo. Hlu-a chu ka va en phei a. Ka thawm hriat chu hre ve awm ang pawn a awm miah lo mai. Theichek lam thlirin a lo hawi vauh vauh mai si. Thawm rawn rikna chu kei aia hre chiang zawk tur awm tak a nih vei nen. Uhmm hu..ka beng chhe ri bak a ni lo a ni ange tiin ka inher a. Theichèk kung lam chu ka thlir leh ta a. Ni pawh a tla dawn ṭan suar suar tawh ang tih velah chuan kan piah lam kawr kam aṭang chuan sakhi a rawn huk ta kuk kuk a, kan inen a, innuih deuh var var chungin phùr takin kan insiam ṭha sauh sauh a. Chutih lai mek chuan theichèk kung zawn thlang lam aṭang chuan vahrit rual an rawn chho ta dam dam mai a. Hlu-a chu kap lo tur leh beai chu ring mai turin zaizirin ka’n hrilh a, kan thlir ta veng veng mai a ni. Beai thang hmasa ber an rawn thleng ṭep tih chuan a awk ngei dawn e kalo ti rilru rauh rauh a. Mahse mak tak maiin kan beai thang ho chu an hmabak ami apiang a per ta nghauh nghauh mai a. Mak ti takin phawk hruin kan inendun hau ringawt mai a ni. Hlu-a chuan ka kap mai dawn tiin mi rawn zaizir a. Mahse, sakhi huk leh salian lam beisei zawk turin ka kutzugchala ki lem siam meuhin ka’n chhang let a. Vahritho chu kan riahna lam kawng chhaka an liam tur kan thlir liam ta ringwt a. Kan sakhi huk hriat kha a rawn chhuah mai beiseiin kan ṭhu reng a. Mahse a reh vung vung mai bawk si. Ni a tla fel tawh a. Kan awmna leh theichek hnuai vel phei chu a thim deuh khung tawh a. Mahse engkim chu a la hmuh theih ruau ruau tho. Mawng a khamin ke a mu lek lek thei tawh a. Ka zun chhuak chu ka insum peih tawh lo a. Zun bur tura ka mau sah sa chu la chhuakin ka zung ta huau huau a. Ka nuam sawng sawng mai. Ṭhuthmun rem ṭhat pah a Hlu-a ka va en phei chu thlang lam kawkin mi lo signal zoh zoh a. A torchlight ah chu a phawrh zui nghal zat a. A kawhna lam ka zuk en chu theichek kung lam pan a perhte han che deuh laih laih chu ka zuk hmu a. Mahse lei lam chu a lo thim tawh em avangin engin nge tiche ka hmu thei lo. Ka light chu ka’n phawrh ve vat a. Thlifim vawt var mai hian mi rawn chhem mur sung sung mai a. Mak ka ti ang reng hle a. Hlu-a chu ka va en a, inkuah deuh ti tihin khawr hlän hian thlang lam a lo thlir vang vang a. Kan thil thlir lai chu theichèk hnuai thelh fai laiah a chhuak phei duh hauh lo mai. A hnim laiah zel kal kualin a vei tawn reng mai a. Khua pawh a thim a ni ruai tawh mai. Keini pahnih pawh kan inhmu chiang thei tawh lo. Kan thil thlir lai thawm chu hmun fai laiah a ri ta bap bap mai a. Sanghal a nih ngei ka ring a. A hmu hmasatu a nih avangin Hlu-a chu ka ngai chang deuh a. A èn ve leh ka chhun ve ang tih rilru puin ka lo inring ve ran a. A èn har hi ka ti khawp a. Mahse ka hnuaia thawm lo chhuak chuan minti harh zawk a. Theichèk lam pan chuan a ri thla sat sat mai a. Hlu-a chu aw…engtizia nge maw a reh vung vung le, ka hmanhmawh ru zek zek tawh a. Ka hnuaia thawm lahin min hlat thla tual tual bawk si. Ka’n chhun hmasa mai teh ang tiin ka torchlight chu silai nen ka’n hmehbel a. A rawn chhun eng ta pup mai. Rang takin ka’n hmet eng ve nghal zat a. A chhun kual pup pup hnu a kan light-in a zuk én fuh tak ve ve chu…. karei...!! Hmeichhe naupang ruak deuh keng mai, samsei hniang mai hian kan light engah chuan mit khap lek lo hian min lo thlir veng veng mai a nih chu!! Theichek rah chu a lo pawm deuh ṭun a. A ei lai mek chu a la ṭhial tuam tuam mai bawk a, mak tiin ka phu zawk mai. Chumi rual chiah chuan Hlu-a chu a rak ṭhawt a, a light pawh a thim hmak mai. Kei pawh ka au chhuak lo chauh reng a ni. Ka èn fuh reng chung chuan mitkhap kar lekin a lo bo daih mai a. Hlauh vanga khur zawih zawih chung chuan ka’n chhun kual pap pap a. Ka hmu zui mai hauh lo. Ka veilam sir fea han nui ri kak kak ka hriat rual chuan chu lam chu ka va chhun vat a. Kha naupang kal liam turin min lo nuih ver ver lai chu ka va èn fuh ta a ni. Ka mur sung sung mai a. Ka intipachang hlei thei der lo mai. Ram palailenga rin loh lutuk thil ka’n hmu chuan min barakhaih takzet a ni. Mak tia chetna chang pawh hrelo a ka ṭhut khawng reng lai chuan ka hnuaia thawm lo chhuak chuan min tiphu zawk mai. Ka phu nasa lutuk chu ka tla lo chauh a ni. Ka zuk èn vat a. Ṭhianpa Hlu-a hlau hmel chiai lutuk meng phawk hru hian mi lo chhoh thlir vung mai a. Khur deuh dat dat chung hian I lo hmu ve em….kha thil kha ka rap lutuk, i haw vat teh ang a rawn ti a. Ka mitvai mai zawng a ni lo tih ka chiang ta khawp mai. Ka intipa lui hram hram a. Awle, mahse lo lawn chho ve rih phawt rawh tiin vawt tih vang ni miah loa khur deuh dar dar chung chuan ka’n sawm a. Ka duh lo haw vat ka duh zawk, ka khua a sik sung sungin ka hria a ti a. Chutia kan inbiak lai mek chuan theichèk kung aṭang chuan thawm ṭihbaiawm zet mai a lo chhuak leh ta. Nausen ṭap han awngek ri a ni. Ka mur chuaih chuaih a. Ka hmulthite chu a ding a ni satliah lo, a thawh hian a tho huang a ni ber. Ka hnuaia Hlu-a awm pawh chu a rak tengtung mai a. Zawng harh ṭha tak ai pawn ka awmna chu a rawn lawn thleng rang zawk ang chu, mi rawn pawm deuh chuk chuk mai a. Kei lah hlau ve bawk. Mahse kei aia thlabar awm miau ta chu ka intipachang hram hram a ni ber. Hlu-a rak tengtung ri avang chu nge ni thawm chu a tawp hmak a. A rik lai ai mahin kan thlabar zawkin ka hria. Khawi nge min kuahbet tlat teh suh, kan haw daih dawn nia tiin a ban chu ka’n pawt a, a ṭang ṭung mai lehnghal a. Naupang thlabarin an nute ṭang an bel hi ka tehkhin ber. Kei lah hlauh vangin ka khur ve dur dur a ni si a. Ka äwma a bei tlun chuan ka lungphu su dup dup ri chu a hria ang tih ka hlau a ni ber. Kan inham buai viau lai chuan a ngai te bawkin a rawn ṭap(awngek) leh ta ṭhat ṭhat mai a. Min kuah nghet lutuk chu ka thawk thlengin a har sa ṭalh mai. Ka hlauhna avanga thlanfim rawn bawl ṭek ṭekte chu ka hre chianghle a ni. Hlau chung chung chuan kan èn ang e tiin ka light chu ka’n lek chhuak a. Én suh ènsuh tiin a hmai a thukru a. Kut khur hlawk hlawk chung chuan theichèk kunga nausen ṭap ngak ngak thawm chu ka’n chhun ta a. Ka light eng chu mitmeng sen deuh rem hian a rawn kap let ta a. Ka thaw deuh huai huai mai. Ka en chiang a Sazaw emaw ka ti hman a. Mahse a hnuai zar kakpui bera a’n ṭum thla chu vahluk a ni tih ka hre chiang chiah a ni. A kakpuiah chuan ka light èng lam rawn thlir reng chung chuan a ngai te bawkin a ṭap awngek leh ta hliam hliam a. Hlu-a chu ṭhiana khi en teh vahluk hram alawm maw phiangsen le, a hma khan lo rin hriat tawh awm a nia, kan ṭhenawmpa Zaia khan vahluk hi nausen țah ang chiah chiahin a hram bu ngak ngak ve ṭhin a. Belchiang lo leh finfiah lo chuan hlauin an sawi hrang zui chiam ṭhin a tih tak kha mawle. Khite han en ve teh a hram(ṭah) zawngin a buk nghat nghat khi ka’n ti a. Muangchang leh hreh zetin a rawn hawi chhuak a, a’n hmuh chian takah chuan mai mai tak che hian min va han tithlabar em em ve, ka thin a tirim tlat ka’n kap thla tawp ang e tiin la khur deuh dar dar chung leh thinrim avanga ha chang ṭhial bap bap chung chuan a silai chu lek kawhin insiam rem sauh sauh pah chuan a cheng a’n kau a. A’n tin chiah chu thlang lam zawngin a thlawk thla ta duai duai a. Kan hmu zui thei ta lo. Vahluk kan hmuh tak avanga kan thlamuanna chuan huaisenna thar min pe a. Kan thil hmuh erawh kha chuan min la fan hneh viau tho. Mitthlaah kha naupang awmdan leh hmel kha a cham a, tiril khur pawh a la reh hlei thei lo tlat. Hlu-a chuan kan haw mai dawn em ni a’n ti sa sa a. Ngawi rawh hei dar sarih vel bawr tur chauh a ni a. Sazaw an rawn chhuak ṭan ṭep ang reilote chu nghak leh i la, eng em kan ti bik nang. Naupang pawh a haw daih tawh kha ka’n tifiam zauh a. Sawi tawh suh ka tiril hi a la khur nasa a nia, ka lungphu pawh a la pangngai thei lo reng reng a ti hmuk a. Kei pawh ka ni ve tho alawm ti hian kan ṭhudun anga a thlamuanthlak deuh alawm. Dar kua vel thleng chu kan chang ang chu, i ril a ṭam tawh em ka’n ti zui a. Ṭam lo e, chhun chaw kha kan ei tlai bakah ka ei hnem em alawm a ti a. Chutih lai chuan theichek rah han tla ri dap thawm a lo chhuak a. Ka light chuan theichèk kung chu ka’n chhun èng a. Khai a….. An lo de thluah tawh alawm le.. Kan hlauhna leh awm nuam lo te chu kan hre chang leh ta lo. Phùr zetin kan silai kan lek kawh a, chan insemin sazaw mit de rä min thlir vauh vauhtute chu kan han sai ta pawm pawm mai a. An ngam bawk a pali lai kan kap thla a. An reh leh ta, haw dawnah kan chhar mai dawn nia, i kah thlakna lai kha chhinchhiah rawh aw ka ti a. Mahse a ṭul hran lem lo ang, hnim pik em em a awm loh bakah hmun fai laiah hlir an tla tlat a ni. Pahnih phei chu a kung bul lawkah light enga hmuh phakin an tlu ngat a. Kan ṭhuthmunte siam ṭha sauh sauhin kan phur thar leh ta hle mai. Hetiangah hi chuan sazawho hian rei an rial ngai lo tih ka hria, sava rah tlän chan ang deuh hi a nia, an lo lut(kai) leh zel dawn tih ka chiang ve tlat.

Ka rin leh beisei ang ngeiin theichèk kung bula thingkung zarho chu a ri sut sut a, a che ta laih laih mai hlawm a. Chu chuan sazawho chu thingkung dang aṭang theichek kungah an zuangkai tih min hrilh a ni. Hlu-a chu inring rawh le, an zuanglut tam leh viau tawhin ka hria, i han kap leh tak tak ang aw tih pah chuan ka silaimu chu ka thunran zawk theih nan pahnih ka hmuam lawk a. Ani pawn a hmuam ve bawk a. Khaile... Kan light chuan kan han en rualdun ṭhawt a. Ka hmuh hmasak apiang chu kan sai pawp pawp mai a. A mu thumna tur ka’n thun leh tur chu kartut chu a tang ta tlat mai a. A nawrchhuaktuin a rawn nawr dawk zo lo niin thinrim phun nung nung nung chung chuan phawrh tumin ka bei chát chàt a. Pahnih bak ka kap ve hman ta lo. Hlu-a silai chu vawi li lai a ri hman tawh a. An bo zo leh ta duak mai. Engzat nge i kah ka’n ti a. Pathum chu chiang takin ka kap thla e. Palina erawh kha chu a thi lo mai thei a ti a. Ka silaimu chu a tang nghet tulh tulh emaw tih turin ka chepuia ka’n kher ngial pawn ka kher chhuak thei si lo a. Kartut hi a puam nasa tawh deuh ka lo thun a niang, heti chuan a chhuak dawn lo tawp mai. A dawt lam aṭanga sawh thlak a ngai a ni. A hawlh(sawh)thlakna tur mau emaw thingṭang emaw ka zuk la ang e, tihian lo awm la, i chem khan kher chhuah lo tum ve chhin teh ka ti a, ka ṭhutna aṭang chuan chhukin perhte ngil leh khawng ṭha deuh chu ka’n zawngkual a. Ka hmuh mai loh avangin Hlu-a rawnal sahna lam chu ka pan ta zawk a. Rawnal chu ka sat a. Ka duh ang tawka seia ka tan hnu chuan silai dawta leng tur tawkin ka phel sin a. Ka suih mum hauh hauh lai chuan ka hnungah pen thawm zawi takin hnahthel a’n rah rik deuh thawm ka hre ta mai a. Hlua a rawn kal ve ta mai emaw ka ti a, tinge i lo chhuk ve duh a tih tumin ka inher a, ka ding khawng awt mai. Kan naupang hmuh ngei mai kha ka hmaah a lo ding reng chu niin, ka phu chiang lutuk chu ka zuang deuh euh hialin ka hria. Ka hamhaih lutuk leh ka hlauhna vang chuan ka ding khur zawih zawih mai a. A sam thlah hniang chuan a hmel chu a khuh deuh vek a, a sam kara a mit erawh a var bial kang mai a, kun deuh ngal chunga a sam kar aṭanga min rawn chhoh melh ru mai chu rapthlak tak a ni. A kut dàng var líp lép chu rawn phar chhuakin kan buk awmna lam kawh pah chuan a tet ang aia rapthlak leh a awka atana mawi lo khawpa rapthlak aw ka vin ṭeng pherh zet thum chher chuai mai hian, Haw nghal rawh u, ngahnge kan rah tlan min rawn tihbuai a ti ta mai a. Ka tawlh hnung deuh dawrh a. Hlu-a mangang rak tuarh tuarh ri chu ka hre zui nghal zat a. Ka mangang leh hlau thlabar lutuk chu insum hman hek lo. Ka theihtawp ai pawha ring zawk tur hian ka’n au ṭe ta tak tak mai a.. Khatia kan au thawm kha hria an lo awm a nih ngat chuan kan au ṭial nasa awm ropui si a keini tluk thawthangin an lo hlauin ka ring. Rilru mumal pua ka au ka chawlh meuh chuan engmah hmuh tur a lo awm tawh lo. Hlu-a mangangin mi rawn au chiam chiamna lampan chuan hmanhmwh zetin mawngtam za chuaih chuaihin ka tlan buan buan a, ka light-te chu ka hmang mumal pawn ka hre lo. Kan channa thingkung ka han thlen meuh chuan Hlu-a chu biak hleih theih pawh a ni tawh lo. A melh ngai melhin a meng pual deuh ru mai a. A khur nasain a ha pawh a inkhawng ri bawp bawp thei hial a ni. Thingkung bulah chuan sawp deuh nuaih hian a lo ṭhu a, a tla nge amaha chhuk pawh hriat ni suh. A silai chu piah deuhah a lo let ngat a, ka silai chu ka’n zawngkual a ka hmu mai hauh lo. Kan ṭhutna ṭhangte chu ka han en a, karei!! kan naupang bawk khan a lo pawm ṭu mai, thinrim mitmeng rang ruaiin mi lo chhuk en run mai chu niin, ka phu chiang leh hlau lutuk chu mawng sawh dawpin ka ṭhu hnawk mai a, ka light pawh ka thlauh nawlh mai. Ka intipachang hram hram a. Hetia ka tal buai ve mai chuan haw tur awm loin kan thih loh vék pawn kan ä mai dawn a sin tiin ka infuih a. Ka light chu a glass sir kual thimthama thingthlavar ang deuh a èng thei chi kha a nih avangin ka hmu vat a. Hlau leh khur zawih zawih chung chuan hreh em emin ka han chhun leh dè dè a, engtiang pawn han èn dim eng ang mah i la, a èn dan erawh a ngai tho si. Mahse vanneihthlak takin silai chu pawmtu awm loin a lo awm ta hlauh mai. Phùrna reng reng tel lo leh hlauhna avanga khur zawih zawih chung chuan ka han lawn chho a ka han la ta a ni. Ka chhuk tur chu theichek lama thawm lo chhuak chu engin nge maw mi mawlh tehreng ni ka duh leh tum reng ni hauh loin ka light chuan ka zuk chhun hram pek a. Kan sazaw kahho chu kan nau chimawm leh hlauh em em chuan a lo hnuk khawm mek tih ka zuk hmu a, ka en rei ngam lo chiang kher mai. Lei ka thlen dan pawh ka hre mumal lo. Hlu-a silai chu ka chhar a. Ka ak sawk sawk a, ka silai pawh a mu a tang tawh lo nge a la tang ka ngaihtuah lo. A hawlhna tur ka lak kha khawnge a awm pawh ka hre tawh nek lo e. Hlu-a chu ka pawm tho a. A riat deuh nawk nawk leh nghal, mangan tizual tur tingin biak lah chu a hre map lo mai. A ban chu ka darah bangliamin ka kuah a, biak hre hauh lo e ti lo chuan ka be mawlh mawlh a, ka theih angachakin ka kalpui dawt dawt a. Buaipui ngaia a awm vang chuan ka hlauh tur ang pawn ka hlau hleithei lo a ni zawkin ka hria. Engtin tin emaw buk chu kan inthlen phei ve ta mai bawk a. Ka mut tawp a, a ṭawngvai bual bual reng mai si a. A khua a sik niin ka hria, a khur nasa lutuk chu tih reh tumin ka bawhbet a, biak pahin ka sawi nawk nawk reng bawk a. Ka manganna chuan hlau hman pawn min siam lo a ni. Kan damdawi pai chu ka hrechhuak a. Ka rawtsawm nawk nawk a. Tui nen ka tulh ta ringawt a. Puan sintirin ka kuahlum a. Ka au a, ka sawi bawk a. Ka be mawlh mawlh a. Ani lah chu chunglam enin phawk zet hian a meng rang ruai mai bawk si. Ka mangan zia chu pui tak a ni. A ṭawngvai te chu a reh ve ta a, a mitmeng pawh a pangngai leh ṭan dawn a niang a khap ve ta fuk fuk alawm. Ka thaw deuh huai huai mai. A rawn pangngai a nih chuan zanin la la hian haw nghal nal nal chi a ni tiin kan sarep neihsate chu fun pawh fun buai loin iptepuiah ka rut mawlh mawlh a. Lo insiam lawk diam a, amaha a kal theih ve leh hawpui nal nal theih nan lo inhmakhua chu ka tum a. Ka pum rawn ri raih raih ri chuan ka rilṭam zia min hriatchhuahtir a, ka pum chhunga rulhutin um thawm chu ka tihreh theih nan mei ka nun a. Kan sarep chu a ṭhen ka hem ta a. Ka insiam peih thawkhat tawh a. Hlu-a puan sin laiho chu a ni tawh mai bawk a. Kan sarepna tulho te chu kan hmang tawh dawn chuanglo bawk a, ka meichhemah chuan sa hem nan ka tuah alh hluah hluah a, a hmin hmasa piai thla a ka ṭhial nuau nuau lai chuan kawngka lamah chuan min thlirtu awm tlatin ka hria a. Ka va hawi phei chu nau chimawm bawk kha a ni. Buk kawngkaah tak chuan thusawp niaihin a kut pahniha lei beng chung hian ka lam panin a rawn vak phei dawn mek a, a hmalama a sam tla hnuang chuan lei an dek suau mai bawk si, chumi kara a mit var ruau lo langin min melh kul mai chu rap tak ka ni. Ka sarep hem lai vuan chung chuan ka ding mar zawt mai. A lu tlemin a’n thle deuh bar a, a sam kar aṭanga mi rawn melh rù chung chuan kha pawh kha keima sa a nih kha a rawn ti a. Ka rak ṭhawt a, min rawn tibuai tawh lul suh, kan haw nghal dawn e. Khawngaihtakin min kiansan hram rawh. Kan rawn kal leh tawh ngai lo ang ka ti ṭial ruai a. A zawm ve nge ni, mitkhap kar loah a bo ta daih mai. Kei erawh hlauh vangin ka khur dawn ṭan chauh a ni. Ka sarepte chu hem tur pawn ka lek khawng thei tawh hek lo. Ka khabe sai dawt dawt avanga ka ha inkhawng ri bap bapte chu ka chip bet thei hauh lo. Mei eng chauh lo chu khawi dang mah ka en ngam tawh lo. Khawdang hmundang hawi sawn turin huaisenna ka nei tawh thlawt lo a ni. Ka hawi sawn a nih chuan hmu leh mai turah ka inngai tlat a. Mei eng thlirin ka thu kun tlawk tlawk ringawt mai a ni. Hlau leh thlabara mei eng ka thlir tlawk tlawk lai chuan Hlu-a chu rak ṭhawt chungin a rawn ṭhuchhuak phut mai.. Ka va han phu chiang lulai tak em!! Bomb ni i la zawng ka puak chiang dum dum ngawt ang. Ka per dawrh mai a. Ka lungphu te chu a inthum rawn tlut tlut mai a ni. Phawk zetin ka va en vat a. Pan pheiin ka va sawi a. I harh em engtizia nge ka’n ti a. Ani chuan khawnge ka awm, ka duh tawh lo, haw ang a ti a. A mit mengte chu a buaiin hlauhna avangin a phawk hru mai a, a khur dar dar reng bawk a. A hmel ringwt pawh chu hlauhawm tham a tling a ni. A tho hluai a, ka haw dawn a ti ta mai a. ka man bet a, awle awle, kan haw nghal dawn nia, kan mutbute hi nang ak rawh aw, kha i silai hi keng la a bak chu ka rawn ak ang e ka ti sawk sawk a, a phi cheng tawh mai si a, ka biaknate chu hre awm pawn a lang lo. Ka thilpek te chu ka bel ang ang a lain a keng ve mai bawk a, kei ngei pawh eng ruai ka ni bik lo. He hmun hi chhuahsan nal nal ka duh ve tho. Mahni tawka chak leh huaisen nia ka lo inhriat ve ṭhinna te, ka inrintawkna leh ka induhtawkna bakah hlauh nei lo leh intihuai em em ṭhin ka nihnate chu ka theihnghilh zo tawh a, chung zinga pakhat te mah chu ka nei tawh lo a ni. Ui dawih zawk ang maia meikhup a haw chu tlawmah pawh ka la thei tawh lo a, arpa tlan tur tak ngial pawn huaisenna ka nei tawh si lo. Ṭhianpa chu tirawh le i kal ang hmiang he hmun hi i chhuahsan vat teh ang tiin ka chhawm chhuak ta a, hlauhna avangin zan khawthim hnuaiah kan inak chhuak ta pùr pùr mai a ni. Kan kal lama kan phurna let hnih ai tam maha phùr lohna chu kan ak haw tel ta bawk a. Kalkawngah pawh chawl khawmuang hauh loin kan kal par par a, ka hnunga min thlir zuitu avanga ka mawng za lutuk chu hah hre lek loa min pen zautirtu a ni si. Kan kal chak bawk a niang zingkhawvar dawn ruaiah in kan thleng der mai. Ṭhianpa Hlu-a chu khawsikin a na zui ta char char a, a țawngvai bual bual reng bawk a. A changin a rawn au chhuak leh thut thut ṭhin bawk a. Kan chanchin chuan khawchhung a fan hneh ngang a niang. Tuk khat ka zing tho chu kan tapchhakah pu Ṭhuama a lo ṭhu vung mai a. Ani hi putar kum 70 aia naupang lo tur a ni tawh a. Ka hmaiphìh zo chu thingpui no dawm chungin a bulah ṭhuthmun ka’n rem a, ka pu enge ni ta zing zingah te i lo len ve teh tlat ka’n ti läng làng a, a beng dawhin ka lam hawi chuan a’n thle bar a, engtin à.. a’n ti heu mai a. A ai ring zawkin ka zawhna ngai bawk chu ka’n hrilh leh a. Chutia au vak vak a ngai em ni, ka hre thei reng alawm a’n ti deuh hmuk a. Nangni ṭhiandun thil tawn kha mi ka aṭang ka lo mang hriat ve ri ruai a, han zawh chian che ka duh a ka rawn zinglen a nih hi. I ṭhianpa kha tu maw a hming ni kha, Thanghulha fapa saw niin an sawi a, a hming koh pawh ka hre lem hlei law, naupang lam te in ni bawk a, ṭhangtharho hi ka hre hlawm mang bar lo che ua nia, nang hi chu ka tute zingah rau rau pawh ka hnungzuia sa min barh ngun bertu i ni a, ka hre fuh viau che a. Midang phei chu an insawi kher loh chuan ka hre ta hlawm lo chu a nih hi. Beng loa thuchâng, nilum aia mi ang lo ṭhut mai mai bak chu tihtheìh lah ka nei tawh lo. Ka rualpuite nen lah han inkawm turin kan inlen pawh hlei thei bawk si lo. A dam chhunte pawh kan inhmu ngai ta mang lo chu a nih hi. Mi lah hian biak leh kawm enah min en tawh si lo a, tarte khawvel hi zawng ṭhangthar zawmthaw leh inpenparhte hi chuan an hrethiam ve ngai te a nìh chuan ka kum ang zat an dam a ngai ngei ang le….a’n ti chuar chuar a, enge kan sawi lai kha a’n ti leh he haw a, ee..taka i ṭhian chu tumaw a hming a’n ti ṭha leh a, Lalhlupuia a nia, Hlu-a kan ti ṭhin ka’n ti a. In zuk kalna leh in thiltawnte chu min han hrilh chiang deuh teh. Hman kum Lalnem-i pa zau kan neih ṭuma Kungi pa nena kan thiltawnna kha a nih ka'n ring deuh a, a lo ni a nìh chuan kan thiltawnte pawh ka hrilh ve dawn che nia a ti ta a. Kan thiltawnte chu hrilhin kan kalna hmun pawh chiang takin ka hrilh ve ta a, ṭhenawmte pawn an lo ngaithla ve mahna. A’n zi ṭhalh ṭhalh a, a lo nih tak chu a, khu hmuna theichèk khu alawm Kungi pa nen pawh kan chana Kungi pa nun tawi tak nachhante pawh kha niin ka hria, a boral thleng khan a pangngai hlei thei ta lo a ni tak si a. Ka ngaihtuah chhuah apiang hian ka tlawmgaiin ka thinrim thar leh ṭhin asin a ti a. Chu in thiltawn chu ka va hre ve chak ve aw, hetianga kan han tawn hnu hian sawi tur nei leh hria hi an lo awm nual mai. Keini ṭhiandun lah chuan engmah hre lawk hek lo. Hmanni uChhunga hoa kan ram vak khan a hnuaia sanghal ka kah avang khan phur em emin kan zuk bawhzui ve chawt a, a tihchi loh tak tak a ni. Ṭhianpa Hlu-a lah chu saw a na zui ta char char mai si a, mihring kan inchan zo lo ang tih pawh hlauhawm tak a ni. Ka pu enge i ṭhianpa nen chuan in tawn reng reng a min han hrilh ve teh ka ti ta a. Ani chuan nia mawle, keini ṭhiandun pawh nangni ai chuan kan u deuh awrh chauh ang chu, khu vawngpui ram ṭheh kum khu a nia, theichek awmna chhak kham chung khu sang feah pu Luaia ten an nei a. An lo aṭang chuan a la zuk hla viau a, chhungrual deuh in thum vel lo atan pawha iaiawm loh khawpa zau vah loh ramchangin a daidan a, chuta kan vak lut chuan kan zuk hmu chhuak a ni. A lo hmin sen tuarh mai a, sakhi leh ramar, vahrit, varihaw tihte chu duh leh duh loha thu, kah mai mai theih khawpa mawi a ni a. Kan phurdun kher asin. Chan hmun kan insem a, inralpalh hlauhawm lo tawkin ṭhuthmun pawh chhak leh thlangah kan remdun a, chhun pachangah zawng pali leh sakhi pakhat kan saithlu nghal der mai a, tun lai angte ngaihtuah chuan sa pawh a la tamin a ram pawh khu tlawhpawh zen zen loh ramchang ṭha leh ngaw khung mai a ni bawk a, chhun pachangah pawh theichèk kung hmun zawl phei khu chu a thim deuh khung thei a ni. Kan zawng kah leh sakhi chu kan dahkhawm a, hawpui mai i la kan rih lutuk hmaa kan haw loh chuan kan inhawn seng lo ang tiin Kungi pa chu kan ràwn a, ani phur pheng lah chuan reilote i chang leh teh ang. Hei khua pawh a la tlai loh hi a ti ta tlat mai a, sanghal kah a chak em vang lo niin. Kan han ṭhu leh ren rawn a, tuibur hmuamda vel awrh kan la thu hman ang tih chuan ka chhaka kan zawng kah leh sakhi kan dah khawm chu an infiam a, mihring rawl chhuahin an inchhaih nui ta hawr hawr mai a. Chutia a sawi mawlh mawlh lai chuan kan kawt ațang naupangin min rawn au a, inchhungah rawn lutin uHlu-a a lo harh tawh a, a pute'n va ko rawh an ti a rawn ti a. La ngaithla chak viau mah i la țhianpa chu ka ngaihtuah si a, kan haw ațang khan a la pangngai leh ta miah lo kha a ni a, a lo harhchhuak thei chu ka lawm takzet a, eng thil nge a hmuh a hetiang teh hrepa a buai zui nachhan hi ngaihtuahin ka rilruah a riak reng țhin a ni. Ka pu ka ṭhianpa chu a lo harh tawh e an ti a, hei min rawn ko si a ka va chhuahsan mai ang che aw.. Nidangah ka la rawn zawt leh ang che ang a, remchangah kan inkawm leh mai dawn nia ka ti a. E..,va kal tawh khai, ṭhiante hi an hlu a mangan laia kan bula awm te hi ṭhian ṭha leh min hmangaihtu an ni ngai e. A lo thlamuanpui khawp ang che, inngaihsaktawnna tel lo chuan ṭhiandun pawh hi inngeih reng a harsa ṭhin. Ṭhiante tan chuan engtiklai pawn an tan din ngam tur a ni ngai e. Va kal vat rawh khai, khawinge kei pawh ka'n ti ti a ta langin ka lo ṭhu rei tawh mah mah a ni. Feh te kha an duh a, chawei an lo duh tawh ang ka va phei ve tawh ang e a ti a. eih, eih, eih khai aw ka zäng a va kham hman ve tiin a chhuak ta ṭuih ṭuih a. Kei pawh hmanhmawh takin Hlu-ate in pan chuan ka tek chhuak ve nghal a.

Ka va thlen chuan a nuin buh hawp a lo barh mek a, min han hmuh chuan a rawn nui var var a. A la chau hle tih erawh a hriat khawp mai. A awm bawk a ni. Kan haw atang khan ni li zet chu engmah eiin a in lo a ni a, a dawldangin a tla kawk mai a ni. E khai ṭhianpa i lo harh ta chu ka va lawm em, kan lo mangang lutuk asin, ti kha zawngin i dam leh vat mai ang. I chhel bawk a ka rin aiin ka rawn hmu țha daih mai che tiin. A sirah chuan ka'n țhu thla a, thàm chalin ka lawm e aw a rawn ti a. Engah ngawt chuan maw ka'n ti hu a, hei him takin inah min lo hruai haw a, kan haw dan pawh ka hre reng reng hleinem a rawn ti leh. Mai mai a, țhian inkarah lawmthu sawi a ngai lo, nangpawh ka chan ang hi chang la, kei ang thoin i ti ve dawn tih ka hria alawm ka ti vat a, a ni lo kei chu ka zàm hma em mai a, ka hlauhna khan mu leh mal nei loin min siam a. Awm lo la zawng haw tur pawh ka awm lo ang, ka hlauin ka zam chhe der a ni si a. Ngawiteh țhiana hahdam rawh khai, i la chauh em kha han mu hahdam la, nakinah sawina khua a tlai lo e, i la chauh em kha, indim rih rawh. Ka țha lutuk asin, ka chawei loh rei vang mai mai alawm min ngaituah suh a ti ve bawk a. Nih leh hei chawei a hun mai dawn ka va haw phei phawt ang e tiin ka tho chhuak a, a nu chuan aw heta ei ve nghal turin alawm kan rawn koh che, kan lo sawi lo a ni maw.., mama dam lawm nan a thla hual i la kan tia, artui lai kan lo talh a, i ei ve ngei a ngai ang. I chhungte hrilh turin naupang ka'n tir ang e tiin a tho chhuak zui nghal a. Tihngaihna awm tawh hek lo. Țhianpa lahin min thlahlel em em a, han țan luih țung țung chu a zia lo lam a ni zawk tlat. Țhiana chuan khawinge ka'n țhu mu ang e, ka nghen turin ka lukham hian ka hnung lamah min han kam teh a ti a, han pawm deuh pah chuan khumlu nghengin ka'n țhutmuttir a.

Țhianpa bulah chuan chawthleng nen țhuthmun remin chaw ka ei a, ani pawn arsa buh tuihang leh a thin te eiin a tep chap chap a. Țhiana vawiin chu hna thawk loin awm nileng mai la a țha ang. Thil sawi duh leh hrilh tur che ka ngah a nia. Min zawt chak viau tih pawh ka hria a ti a. Ni mai e, thawh tur em em pawh ka nei hleinem, i duh a thu a ni mai. Ramvah leh na turte kan rel ang chu ka tifiam a. Nuih suk pahin sawi teh suh, ka thauah hian ka thil hmuh khan min la man deuh tlat a nia. Ka nu awm lai khan ka sawi duh lemlo a, kan inah thleng hian minla rawn tlawh asin a ti ta mai a. Phawk deuh hrúin ka'n hnaih sauh a. Engtin a, chu a tibuai zui zel che tihna em ni ka'n ti hu a. Tibuai zui em em lo e, ka mumal loh vanga ka mitvai mai pawh a ni mahna, ka mitvai nge a tak tih chu a fiah theih mai ang. Nizan khan mi rawn tlawh leh a, min kiansan tur thu leh ka dam tawh tur thu min hrilh a min chhuahsan ta a ni. A țawng hauh lo na a ka thinlungah a chiang em em a ni. Ngawi rawh va indah fel phawt la, ka hrilh chiang ang che a ti ta a. Kan chawei thlengte chu ka seng phei a. A nu chiah a lo awm tawh a. Vawiin chu lo inawm ru aw, i awm bawk a thing ka'n phur lawk ange tiin a chhuak zui ve nghal a.

Ka va țhu phei leh a, ka chhungte chu an chhuak vek a mi a ti a. Buk nghat pahin ka țhu țha sauh sauh a. A țhat hlauh chu, ka nu hi a mangang hma țhin a, hre ve lo se ka duh a ni. Khua a lum em mai, ka rizai hi han thlep la, min han kam belh teh ka hnung a kham riau ka lo ngheng ang e a ti a, a duh anga ka tih zawh hnu chuan, ngawi rawh tui mi va bun leh phawt teh a'n ti leh rih a. Mai mai tak che hian min han tih zan dan vel chuh, lunghlu hmuamah emaw i inngaih le, pehhel kual loin i sawi tur chu sawi vat teh ka hawsan daih mai tur che a nia tih pah chuan tui chu ka pe a. Nui vur vur chung chuan i hre chak tawh mitmeng leh i han phusa vel khan min tilawm a i hmuhnawm em alawm. K'an fiam hlak che a nih kha. Nih leh le lo țhu hnai rawh. Kan tlangaupa awrawl chuai ber pawh ka la neih phak loh hi. I hre kim lo dah ang e a ti ta a.

Khatia silai kaw hawlhna tur lak tuma min han chhuksan ta kha ka hlauhnate a lo kiang ve deuh tawh bawk a ka phur thar leh viau tawh kha a ni a, i chhuksan tak i silai chu lain ka chempui chuan ka ker ta tlauh tlauh a, i rawn let leh hma ngeia lo ker chhuah diam tumin ka bei ngawrh khawp a, thildang pawh ka ngaihtuah chang tawh lo reng reng a ni. Ka mawnga min rawn hawlh niawm tak ka hriat te chu ngaihsak lem loin ker chhunzawm mawlh mawlh pah chuan ka'n kang deuh euh a, chet sawn hrut pahin ka bei zui zel a, mahse min rawn hawlh mai pawh a ni tawh lo. Ka mwngtam chu a rawn hiat niin ka hria, ka harh zawk mai a ni. Mahse, i rawn let lehin min rawn fiam emw ka ti leh ta zawk a, ngaihsak zui lem lo chuan uang uang lo khan lo chho vat mai teh, uan hun pawh a nih loh hi ti chung chuan ka ker beidawngin a tawp nan seh phawi ka'n tum leh a, awlsam takin a chhuak ta mai a. Chutih lai tak chuan na zetin mi rawn hawlh kang dawrh mai a. Hai der chi pawh a ni tawh lo. Nangmah ni turah riak ka ngai che a, thinrim ru tak chung chuan, lo lawn chho vat mai rawh ninawm lutuk, i rei lutuk a ka lo ker chhuak daih tawh tihpah chuan ka inher a, torchlight a rawn èn che ka tum a ni, chutih lai chuan rawn lawn chho thawm pawh ka hre tawh a. Ka hawi thla a thinrim ru deuh țul chung chuan, nangmah i nih ngei ringin ka zuk èn ta a.. Ka rei!!! Ka la țim sung sung thei, a hmaa kan hmuh ang deuh chiah mahse,hmeichhe puitling țhankin zet tawh hian thingkung chu a lo pawm bet thlur mai a, ka phu nasa lutuk chu ka tla lo chauh a ni. Ka lam hawiin a rawn dak chho a, a'n țhen țhu mai chu... ka khur nasa lutuk a, ka kä pawh a chih nghal vek a ni. Chutah ka lam panin a rawn vak chho ta țual țual mai a. A samte chu a hreu bum mai bawk si, amah lah chu tui tla ang maia däng var puap leh nghal a. Haw nge haw loh rawn ti mai hian ka hre leh nghal a, ka light chu off ngam tawh hek lo, ka en ngam chuang bawk si lo. A rawn lawn thleng dawn tak ngial tih chuan ka hlauhna chuan engmah min hriat chan tir tawh hek lo. Ka zuangthla ta tawp mai a ni. Vanneihthlak takin hei na leh ruhtliak kaneilo hlauh a nih hi. A hunlai kha chuan engmah ka hrechang tawh lo. Ding rawh, i tlan thei chuang lo ang rawn ti hian ka hria a, thawh a tlan nal nal chu ka la tum tho, mahse ka tho thei lo. Ka mu zangthal thei hram a, ka light chu ka lo la hum nghet fu tih ka hria a, a pawimwh zawk leh thlamuanpui awm zawk ka silai erawh ka zuan thlaksan daih. Ka light chuan ka han èn leh ngat a, kha i ralthuam tih leh ka silai chu rawn vawm thlak a rual a, a nui awr awr leh nghal, a mengrum thut a ka lam panin thingkungah chuan alu lei lam hawi ngei chuan min melh rùn chungin a rawn lawn lam ai chak daih chuan a rawn vak thla zut zut mai a, lei a rawn thlen dawn țep chuan a zuang thurh a mi rawn bawh ta mai a, chutah zet zawng ka theihtawp tawpin ka sa rak ta chiam mai a ni. A rim han chhiat dan em em chu a thång uih nghur tih chu nepte, min tidam lotu ber pawh hi a rim kha niin ka hre hial. Ka hmaiah tuaiin min han liak ta pek a, keipui pawn min liak se a ai chuan a thap lo zawk ang a, a nuam pawh ka ti zawk daih ang, engtiklaiin nge mi kalsan ka hrelo. Min rawn sawi nawk nawk khan ka harhfim chiah a ni. Ngawiteh chu..... ka nu a lo haw em ni va en lawk teh, midang hriatah chuan engmah ka sawi duh lo a nia. Chuvangin tukin pawh khan kan haw dan engmah hre lo angin ka insawi a nih kha. ka va chhuak vat a, an țhenawmnu lek chu lo niin. Ka lut leh vat a, țhuthmun remin a thusawi chu ka ngaihthlak zawm leh ta a ni.

Khatia min han sawi nawk nawk avanga ka rawn harh khan i hnungah a lo ding ve reng tih ka rawn hmu a, han au leh mai ka tum a, ka au thei tlat lo. Engmah sawi reng reng suh. I sawi chuan i thi ang rawn ti hian ka hria a. A bulah chuan kan hmuh hmasak zawk kha a rawn kal a, änü hawtir mai rawh an khawngaihthlak em mai a rawn ti ta reuh a, kan sa channaah chuan a lawn chho zui ta a ni. A nu chuan mi vel thut thut reng mai a, engmah ka sawi ngam silo a, keima thuin ka che thei heklo. Silai i zawn lai te khan min rawn kuah thuak thuak mai a, min han tun thawh a, min kalpui te kha min pawt a, min uai bawk a, ka hlauhna leh räpna kha a nasain a rimchhe lutuk mawlh mai khan ka awm a tinuam lo a. Ka lu a tihai chuai chuai mai a ni. Buk kan thlen khan nikhawhre loin min siam ti ila ka rilru erawh a harh a, ka taksa kha hlauhna avangin a che thei lo a ni ber ang chu, ka mumang erawh a ni lo a. Mumang ang mai hian nang leh kei kha ka inhmu thei a ni, ka thlarau a chhuak chu a ni si lo. Ka lu dawmin ka sirah khan a țhu khùr mai a, i hmu ve thei lo a ni tih ka hriat phei chuan ka mangang zual asin aw, i insiam vel lai te khan, i haw ve dawn lo min ti a, min dawm tlat mai a, a fanu kha koin nangmah tibuai turin a hrilh a, mahse khatia kiansan tura i'n auh takah khan a fanu khan a nu chu a kai chhuak ve ta a, pawn an thlen chiah khan min phuarna ti i la, min thunun beh tlatna kha phelhin a awm a, ka rawn au chhuak ta a ni. Kawngtluanin mi la rawn zui zel a, in kan thlen ațang khan zan tin min rawn tlawh deuh ziah a, ram lam pan turin min ti chämchì a, ka duh bik si lo a. Inchhung lumah zawng ka thla a muangin ka paukhauh ve ngam ta bawk nen, pu Hril-a kan upa hian min rawn țawngțai takah phei chuan, min hnaih ngam ta vak lo a. Min thununna pawh ka hneh ve telh telh zel a. Nizan khan tukverh ațang hian a rawn vak lut leh ti i la a rawn lawn lut a ni zawk mah. A hnena kal turin min rawn thlem ta thung a. A hmel råpawmna zawng zawngte chu vawm bo ang hmak a ni. Lei leh van nen pawha tehkhin chi rual lohin nula pian thiam, zei leh nalh lutuk tak mai niin a hmelțhatna chu finna leh thiamna zawng zawng pawhin an sawifiah theih loh tur a ni a. Fur khawthiang ang mai a en hahdam, a mitmeng paw hring no nghalh maiin min han ngaihmelh a, sum leh pai nawmsakna chi tin reng nen min thlem a, min han kuah a, min han pawm vel chu, ka mipatna leh mihrinna avang hian ka insum zo lo țep a ni. Ani ang reng renga hmelțha

kha ka la hmu lo a, piang thei pawn ka ring hek lo. Mahse, a hmel råpawm leh țihbaiawm zet kha ka mitthlaah a la cham a, ka hlauhnate khan min la kiansan loh avangin ka hnar fithla thei hram a ni. A beidawng thinrim hmel leh mitmeng chu hlauin ka khur leh zawih zawih a. Mahse, lungchhe takin a țap zui ta a, ka zui duh loh avang leh minlo tihhlauh hmasak avanga pawi a tih thute sawiin hei hi ka pe ang che, keimah avanga i tawrhnate chu lak kianin a awm anga, i lo dam țha leh thei dawn a ni a ti a. Lung chhe takin min tihbuai tawh loh tur thu tiam chungin min kalsan ta a ni a ti a.

Mak tih avanga mitkhap nachang pawh hre lo leh thaw dèp depin ka lo ngaithla a. A nih leh enge a pek che chu ka ti ta a. Ka la hre bik lo, i hnunga thùl kha han hawng la tah khan a dah alawm, hnahthialin a infun ang a ti a, thul chu ka'n en a, ka hmuh mai loh avangin ka'n hai a, hnahthial hring no nël thep mai hi a lo awm a, hrui sendang mawi takin a ințawn a. A suihna lai chu ribbon anga țawn par a ni a. Nangmah ngeiin han phelh teh le tih pah chuan ka pe a. Kut khur dar darin muangchangin a'n phelh a, thil mum dum fim nalh leh tle sar mai hi țhi anga inthil khawmin a lo awm kual ram mai a. A mawiin a nalh takzet a ni. Mak ti em emin kan thlir a. Muangchangin a rawn lek chhuak ta a, ni thlarah chuan a tle sep sep mai a. Mak ti a ka thlek vung vung lai chuan Hlua chuan a mak hle mai a, a sawi ang tak takin ka harh sawng sawng nia mawle a ti a. Han awrh chhin teh ka lo ti vat a, min en deuh hau chung chuan a tihchi dawn em ni. Thang hlauhawm tak pawh a lo ni reng thei asin. Han kawl zui pawh ka ngam meuh lo ka ti a ti a, ngahnge maw i hlauh teh vak le, a ngaihhruina che a ni mai a, i hlauhna i inhnehtir tlat a, khati te chuan enge maw hlek pawh i ngaihbel anga, kha thil vangah khan i puh zel dawn asin tiin ka'n hnem a, hreh hmel deuhin a awrh chhin ve ta a ni. E khai!! ka zang huai mai, khawinge zunram ka'n thiar ang e tiin a tho ta mai a, ka awih lo lek lek hial ani. Dam lo na chau em em si, kha thil avanga thawklehkhata a lo dam țha ta em em mai kha mak tih loh rual pawh a ni lo. Țhi chungchang leh a thiltawnte chu zeppui turin min ti a. Kan zep ta tlat a ni. Mahse hei țhangkhatlian pawh vawithum lai chu a lo liam ta reng mai. Țhianpa Hlu-a min boralsanna pawh kum 5 lai a lo ni ta.. He thu hi ka sawi chhuah vawikhatna a ni a, enge pawi tawh chuang ang le, tarchhia ka lo ni ve ta reng mai a, zankhat mitchhin leh tuisik lem sual i lo fahran pawh tawk mai thei ka nihna hi ka kum pawn a phu ve tawh reng reng a ni. Kan vanglai nunte kha ngaiin ka dawn kir a. Kan țuanna tlang leh ruamte, vanglai nun chena tudang engdang dawn loa hlimlaini kha kir leh hian an mawi tak si lo amaw.. Lenrual fam hnute ngaih ni bang hek suh, nunhlui dawna lungleng a kiu vawng vawng bak tih theih a awm si lo. In țhatlaite chu chen ula hlim takin hun hmang rawh u, mahse in tun hun khan in hma hun a hril zel tih hria la, uluk taka nun hman hi hlimna tluantling a ni a, i lo upat hunah i nunhlui i'n chhui kir anga, inchhirna i neih loh nan fimkhur hle ang che. Nangmah vaw let thei tur thil chu tih loh hram i tum dawn nia... tiin pu Thanrùma, kan thleninpa luțuak var vo tawh chuan kum 2004 khan an vanglaia a thiltawn chu min hrilh a. A lung a chhe lek lek hialin ka hria..

Tlawm hle mahse, he theichêk rahtlan hi, ka remtihna tello chuan, group danga post chhawn leh whatshap lama min lak chhawn saklo turin ka ngen tak meuh che u ani. Ka lawm e.