NGULZAKÂPA LEH RAMHUAI BY Hriata Tea

Hlauhawm lampang hrim hrim hmun hrang hrang a mi lakkhawm...
Ngaia
Site Admin
Posts: 25813
Joined: April 30th, 2016, 4:07 pm

NGULZAKÂPA LEH RAMHUAI BY Hriata Tea

Unread post by Ngaia » March 7th, 2019, 9:27 pm

NGULZAKÂPA LEH RAMHUAI.
Ka remtihna leh ziaktu hming dah tello chuan, copy paste ngawt lo turin, ka ngen a che.
.
By, Hriata Tea

*

Ekhai,, Zabiaka pu lah ni reng che,, Nang leh nanglo a, ilo lan ve teh tlat a. ,, Rothanga pa ka rawn râl ve e katia, ka rawn lut kawi anih hi. Nangni chhung in damlai ani ang chu maw,,

*
Anih chu mawle, lo țhu thlan dai rawh khai. Thingpui te kan lum dawn nia. Hei, kum tir lama kan chhiava ang aiin, kan țhat tlan lai tak anih hi maw, hlotlawh țul zuallai khan, nuber apum tluk rên rawn a. Tunah zawng kan țha tlang tawh e.
*

Alo nih chu mawle,, vengkar a hla tham ta deuh a, ka chakvak tawh lo nen, ka tuallim ta vaklo a, ka beng angawng khawp mai. Kum in enge, in thlawhhma lak te in an a.. Sawi tawh angin, kum tir lam kan chhiava lai khan, hmeithai ba hmun tiah zet chu kan ma țhen a. chumi tihloh chu, hei kan in thlo awl ve ta hram e. Buh kung han en chuan, hawp khawp te chu kan thar ve mai lo maw kan ti. Nangni enge in an zawk.

*

Ka awngrawp alei ah, Lo lam pawh kala hmuhpui lo. Roliana te sawi hmang ah kha chuan, phur za te chu kan neih mai hmel ani awm e. Inlama thiam hnang deh hi ka tihtheih tawk ani ta lek mai si a. An hnathawh dan pawh ka hriatpui ve hlei lo a. Ti daih ila, kan thudang alai chuan, Rothanga pa thih dan chanchin hi i hrechiang deuh ang chu katia, ka rawn luh kawi pui alawm mawle..

*
Ani maw,,, Nangni chhung zawng in thawk awm bawk a, buh ngah ber pawl chu ini hrim ang le. Hrechiang han tih lem ah, mi hriat bak chu, ka sâwn bik hlei lâw. Kan puh mawh tak ber chu, kumin an thlawh hma lak khu ani ta ber mai. Vahsan lak lai khan, buk khatah kan lawi ho a. A vah hmabaka zawng luruh ro arawn ak haw țeuh mai a. Kan duhlo hlawm khawpa. Upa in hetiang hi chu, serh leh sanga anlo neih ani a. dah leh la, ilo pawh khu chhuahsan mai rawh tiin kan râwn a. Ani lah pa tumtlang rilru sehhel chi alo ni bawk si. Engah mah a ngai duh hlei lo a. Zawng luro te chu, tar mawiah tiin a hawn ta anih kha. Fur lai khan a thlam hnuaiah leiruang tuam arawn vung leh thur mai a. Ka ngaih hi ațha thei ta law. eng han tih theih awm hek suh. buh lah kawng athleng suau tawh bawk nen. Ani ber in, eng hê hu ah ngailo ta chu, ka thlir liam ta vel mai mai a, kan heti ta anih hi.

*

Sawi tur atam, rammi hi pâwng tâwngtaw nam nul ngawt chi anlo nilo anih hi maw,, A damlai khan sawi duh nise, sawitur angah ngawtin ka ring. A lo reng reng khu, ramhuai liamkawn ani tlat mai a. Lo vah lai pawh khan, riahbuk ațang thawm hriattur kha atam thei khawp a, hlothlawh lai te thleng mai khan, alo lam ațang khuan, patling kûk rûih rûih thawm a awm fo țhin, han zawt ila, engmah ahriat loh thu in min chhang liam mai țhin si a. Amak teh zawng anih hi. A fapa lah saw, apa siar apa siar. An inchhun pafa dawn khawp mai. Mi ngawichawi, thin phût neilo. Zaidam dup mai anih ve saw.

*
Alo nih chu mawle,,, titi kan hre thawi deuh em a. Ka rawn zawt fiah che ani e. Khawnge, thingpui in zo chauh mah ila, a kuang âwmlo in ka’n haw dawn ange. In nghak an awm mumal silo a, ramkal anlo haw tawh takin kava țin ta nge ati a.
*

Chuti mai tur emni, ala hma alawm mawle,, han țhu khawmuang ve bawk la ni tur, chutia itih tlat chuan, mangțha țha le tiin, an in thlah liam ta a.

*
ROTHANGA PA NGÛLZAKAPA.

*
Zoram buai hma kristianna lo luh tirh khan, thingtlang khaw pakhat Zawlnghak antih mai khua ah chuan, Ngulzakapa chu alo pianga. pianpui unau neilo, mal khalh ngang ani bawk a. A țhang duangin asan a țha hle a. Mahse, mihring te hi zawng hma hun hriat ni hek lo le. Kum sawmpanga mi anih laiin, a nu leh pa a chân ta hlauh mai a. Chhung leh khat dang nei heklo le. A nu in, adamlaia alo hrilh țhin, Zohmun khua a, apu bêl turin, arawn tla lut ta a ni.

*

Zohmun khua hi in zanga vel zet niin, Sailo lal fel leh rorel thiam takin a awp khawm a. Sap ho sawi khawm khua anih avangin, akhaw hlun tak tak hi chu tlemte kutzungțang thliaha chhiartham lek anni. Ngulzakapa pu chu lal khawnbawl niin, pa awmthei leh into delh tak alo ni a. Fapa nei heklo le, Ngulzakapa an hmu chu, alawmin alung a chhe ngei mai. A farnu boralta hming chhal meuhin alo țah khuma.Țha taka enkawl turin a intiam nghe nghe a ni.

A tupa thla hual nan, vawkpa sum nga leh sepachal talh in, khawtlang a hrâi a. Fapa ka neive ta tiin alawm kher mai. Ngulzakapa pawh a thla amuangin, a nu leh pa angaihna pawh a kiang huai huai reng a ni. A pu lah chuan a tupa, dawng ngo mai chu a chhuangin, a enkham thei lo aninber e. Ngulzakapa lah chhuan tham khawpin arawn tlangval chhuak ta reng a.

*

Ngulzakapa rawn tlangval chhuak chu, amah alian in, a fuke leh kimtlang ten alo zir bawk nen, nula lakah pawh ato vet vet kher mai. Mi huaisen anih zia pawh kar lo ah hriat ani thuai a. Venglai tuikhur kawnga hmeithai pi Nemi vawk, sakeiin arawn lak țumin, chempui nen chauh sakei lak ata, vawk chu a chhuhsak nghe nghe a ni.

*

Val to tih takah apu chuan, hetia lentir reng zawng, se chawi hun te a awm palh hlauh ange tiin, an khaw nula hmelțha leh mawngzang. Lal upa ve tho saihnuna fanu chu bia in, a neih sak ta vat a. Tunah hian fapa pakhat leh fanu pahnih neiin mual aliamsan ta a ni.

*

NGULZAKAPA LO.
*

Sawi tawh angin, hemi kuma alo neihna hi Ramhuai liam kawn niin, zawng lu ro pawh a chhar kan tih tawh kha. Khang zawng zawng leh athih chhan i han khaikhawm dawn teh ang.

*
Ngulzakapa lo en chuan, Ramhuai liamkawn hmun zawl leh ruam ramchang țha chu it in, kum dang zawng zawng aia zau apawm tehrenga. alu lamah bak rî pawh anei dawn talo ani. Lo vah alo hun chuan, midang sawmhnih lai nen. Riahbuk sualin an vat țan ta a. Vah hmabakah beâi thang a tlar a. sava zanriak leh zawng hmaisen a kap zauh zauh bawk a. A riahpui te sa barh tu ber ani bawk a. Duhsak pawh a hlawh na laileng. A chhun chawfun ah te vahrit awmti an paitir bik țhin a ni. Tuichawi leh rawngbawl thlengin an awl a. Riahbuk chawhmeh erawh an tum tir ani ber mai.

*
Nithum zet a en tawh loh avangin, vah hmabaka a beâi thang chu a en lawr a, sava thai na atam tehreng nen, pakhat ah mah a awk tlat lo. Mak pawh ati rilru viau mai. Saphai mual anih dawn hi a.. khawnge sut vek ila, hmun dangah kam teh ang tiin a sut ta vek a.

*

Avah hmabak tho ramhuai liam kawn hmun zawl in ruam aluh thlakna laiah chuan thang sawm vel zet a tlar a, a bak zawng chu, riahbuk kalkawng sir velah a kam zo ta vel mai mai a.

*

Chumi zan ațang chiah chuan Ngulzakapa nunah Ramhuai ho an rawn in rawlh ta a ni. A zan mumangah chuan, a beâi kamna ah khan alo awm a. Mi pakhat hian, i thang hi sut vek rawh. Kan nauten an pal per a, an tang hlum anih vaih chuan, nang pawh i thi ve ang alo ti a. Mai mai a. Ka Lo pawm chhung ani a. ka duh duh naah ka kam ang chu, khawilamah mah mihring awh hlum thu va awm suh. I naute chu, nausen nghal lo. Ka thang reu reu hi, anlo pal per ngawt ange. Ka hlap sak hrep mai ang che alo ti let erh a. A zing tho in, a mumang an ngaihtuah let chuan, tu hriatpui hlei loh in, anui tut tut mai a ni.

*

Chumi tuk a, a zuk vat leh chu, chhun chaw fak antum a, a chaw fun alo bo daih mai. An zawng țhin a hmu silo. A dahna a hai tih dawnin, a silai lah a intung fel thlap lawi si. A tuithawl nen a bo tak daih si ah chuan, chawfak lo in, a bung tlang ta ringawt mai a ni. Chaw hnu lamah nidang ai hma fe in, tuihal zetin a bang ta a. kalkawnga sihtui deuh roh chu, hre ru rânin, hmanhmawh zetin a pan a. a thlen chhoh chuan, a beisei ruk ber sihtui hnam pir per lah chu, sakhi in alo dai nu vek lehnghal. Mai mai chuan, țhataka in awmlo a. alo dai nut vek chu le, alu azuar ani maw, Ala kal hlat dawn loh tawp hi tiin, a chhui zui ta vat a.

A rin ang ngei ngeiin, chhak lawkah. Fah kunga apang thak alo nawt lai hi ahan hmu ta a. Veh hnaih chi ni heklo. Țhingțhi in an sai dur mai ale. Sakhi pawh alet tawp mai. Mahse, sakhi chuan thawm danglam a chhuah ta tlat. An kah thluk rual deuh thaw khan, awi ka nuu.. tiin, sakhi chu, a chiau vawng vawng mai a ni. Ngulzakapa makti pawh a ka deuh ho mai. Makti rilru zetin a pan chho a. Hlauhna erawh anei hauhlo thung. Sakhi chalchang leng vel chu, tawlh thla in, pâng kung lianzet bul hian alo dang a. A ke leng awrh awrh chiah alang thei a ni. chutia ke leng awrh awrh chung chuan, hmeichhe lungchhe tak ang maiin, a insut ta hlep hlep mai a.

Ngulzakapa pawh a dingve chawih mai. Engti tih a, chutiang thawm chu han chhuah ta mai nge tih a hrethiam biklo. Sakhi kha hmusualin, mi a ralpalh ta mai emni dawn, ni theiin aring chiah silo. Sakhi kê lah chiangtakin a hmu thei reng bawk si. A mit an nuai ngial a. Sakhi ke dik tak ala ni tho. Hman hmawh zetin a panhnai ta zawk a.

*
Ava thlen dawn thleng chuan, ala in sut hliam hliam kha ani a. A pum a an hmuh theih takah chuan, areh leh hmak lawi si a. Mak ati ngei mai. A tuihal zia pawh hre chang lo lêkin, a ding veng veng mai ani. Makti rilru zet chung chuan, buk lamah a ak chho ta a.

*
Chumi zan chuan mumang anei leh a. chhun lama a chawfun dahna bulah khan lo awmin, a chawfun leh tuithawl chu, naupang pathum hian anlo la a. A beai kamna lam ah, an phei pui ta nal nal mai, a zui ve zel a. Hmunzawl ava chuan chhuah chuan, țhutchilhin anlo kil bial a. An lo eisak mial mial mai chu ava hmu ta a ni. A thinrim thut chuan, han umdarh mai antum a. A che thei ta hauhlo mai. Chutih lai chuan, ahma zana ami hmuh pa bawk kha lo kal in, arawn be leh a.

*
Ka sawi tawh ang in, i beâi thangte hi sut la. He hmun hi chhuahsan ang che. Kan chênna hmun hi min tihchhiat sak itum avangin, kan lungawi lo khawp mai. Kan mi leh sate thinrim pawh kala khap dai hram hram anih hi. Vawiin ah kan nula ramkal ilo kap ngawt a. Hei lusun in, kan thin arim khawp ania. Heng naupang i chawfun eitu te hi, hmahruaitu niin, i buaina chu hetiang mai mai ani tawh tawp lo ang. Tun bak chu ka hrilh tawh hauhlo ang che arawn ti leh a ni.

Han chhan ve mai atum lai chuan, ngawi rawh. Kala sawi zolo. Vawina i sakhi kah kha, kan nula ani a. A lu kha he hmun ah hian, naktukah rawn dah ang che. Țha taka vuiliam ve kan duh ani. Tichuan he hmun hi chhuahsan la. Keini pawn kan tibuai zui lo ang che. Kan chên na hi daidar kan remti lo tih i hre dawn nia. Ka thu i awih loh chuan, i chungah zahngaihna kan lantir dawn miah lo tih hria ang che ati a. A bo zui ta a ni.

*
Zing an tho chu, Ngulzakapa rilru pawh enge mawti tak chuan a awm ve hial a. Mahse, tlawmah ala ta tlat mai. Mai mai a, ramhuai thu awih in, ka tha sên tawh hi ka kalsan nguar ang ati ni hmiang. Sakhi lu chu a thlir vung vung a. Meiah a rawh ta hmiah mai a ni. A riahpui te makti mitmeng avang chuan, la chhuak leh in, a hmul a ziat fai ta vel mai mai a.

*
Chumi ni a, azuk bung leh chu a chawfun pawh nghat duhlo in, a ak ta hmiah a. Mahse, sadai ek in an rawn vawm fur fur ta mai a. A ni leh nilo angin, a thinrim hle a ni. A chhun chawfak zo chuan, a mumanga a hmuh, naupang chawei na hmuna a tuithawl chu, alo awm tak tak takin tih thu ah, a beâi en pah fawma chuan ava kal a. A tuithawl chu, alo keh vek mai. Thinrim ru țeuhin a beâi te chu an en vel a. Sawi sak tih hriat zet hian, a thang ngul te chu tliak in, alo phe vêk vûk mai a. A thinrim kher mai. Ramhuai liam kawn ruam ah chuan, va phei in, kawr dung khawk rum rum khawp chuan, Ramhuai mimawl ho, ka chhuahsan dawn tawp lo mai. Ka tuithawl in ti keh a. Ka chawfun in ei bawk. Ka thang in sawi sak manah vah chapah ka rawh ral vek dawn che u. In duh leh nangmahni kha chhuak rawh u. Ramsa angin, inlar tawh suh ang che u. In sa atui loh loh nen ati ve ta liah liah mai a. A haw lam chuan, sawntlung pawng sira zâwng luruh ro lo awmkhawm raih hi, a hmu fuh pek a. Tarmawiah țha dawn riaua a hriat avangin a ak haw ta a ni. (Hemi chanchin hi chu, kan sawi tawh kha.)

*
Chutianga atih vang chu ni maw. chumi ni a, sadai ek a, an vawm nileng deuhthaw tih loh chu, an reh ta vang vang a. Zan lamah erawh. Riahbuk ațanga hriat theih tur hian, Ngulzakapa lo vah lamah chuan, thing tlu ri leh leimin ri te, patling kûk ri te, hriattur a awm ta fo mai a. Zing khawvar hnua azuk kal lah in, zanlam thawm ri a nasat țhin tehreng nen, hnu hma erawh engmah a awm ngai hlei lo a.

*
Engmah dang thleng zui lo in, Lo a vat zo a. A vah chap pho erawh mak tak maiin, a lang hring nghulh reng mai a. Ral ațanga thlirtu apiang in, mak tilo reng an awmlo. Midang vah chap a ro êng țhêt țhut a. Ani Lo erawh a hring dup reng thung. Ani ngei pawn mak ati hle ani. Mahse, a hmunah ngei a zuk fiah meuh chuan, ralkhata alan ang ngawt zawng alo ni biklo. Midang Lo ang tho in alo ro ve tho si a ni.

*
LO hal ni a, a vah chap kâng in, thawm a chhuah erawh a hre phakte hlauh leh maktih a tling a. Amah ngei pawn makti in a ngai thla vung vung reng a ni. Kang varah thlai chi an thlak a. Bal an ling bawk a. A nupui thlai chi thlak tu ber chu, a damlo nghal ta pang mai. Mangan thlak khawpin a khawsik a sang a. Midang pun buai ai chuan tiin, a zan la lâ chuan a paw haw ta ringawt mai a ni. In thlen hnu ah lêm chiang em em in adam leh vuk lawi si a. Ati der han tih rualloh in, a khawsik lah kha, atlun nasa mai bawk si.

*
Amah tih loh chu, lo lama riakve thei reng reng an awm ta lo mai a. A riahpui apiangte chu, buaipui ngaiin an damlo ta ziah mai si a. Ama hahna bawk anih zel tho avangin, tumah riah ve a phal talo a. Lâng a an rawn feh ve bak chu riahpui anei ngai talo a ni. A fapa Rothanga rawn feh te hian, riah atum pawn a phalsak ngailo. Rothanga lah chuan, kapa kan lo hi, thâwk ahar bik iti ve lo mi ati mauh mai.

*
Buh chi thlak zawh ațanga, hlo thlawh hmasak ber tur hun alo thlen leh meuh chuan, Thawm chhuah lo leh riva nei tawh lo emaw atih Ramhuai ho chu an rawn inlar leh țan ta a ni.
*

A INȚAN TA.
*

A thlam hi hmun zawl thlanglam sirah asa a. A thlâm kawt phei zawng zawng chu, hmun zawl niin kawngpui dung ang maia zawl dup in, vauah khãm chhia ah ava inkhawh lut a. Chutak chu, ramhuai liam kawn an tih chhan pawh ani reng a. Nitla van vuaia bung ta chu, thim hlimah chawbel a so ve thei chauh a. Chhun chawlh paha vau luite a, a chakai khawrh chu, buhchiar tumin, alian zual alo keu phel mek a. Chutih lai chuan, a thlam luhka/leihka chu, rawn chuan in, Ngulzakap haw rawh. Kan lo kir leh tawh ania. A rawn ti thum hlut mai a. Lo leng lut ve ta che, hei thingpui hâng ka chhuang țeuh ania tiin alo chhawn thunga. Areh zui ta vang vang mai. Chutih lai mek chuan, a thlam kawt ah chuan, mi tamtak kal thawm alo chhuak a. Vau sir lam panin an ri phei nuaih nuaih mai a. E, he he, ka buh an chil chhe vek ang kati, ti rilru chungin a tlan chhuak vat a. Mahse, thawm ri phei nuaih nuaih bak chu, engmah han hmuh tur reng a awm silo. Kan ramhuai ho chu an rawn kir leh tak tak ani maw ti rilru chungin alut leh ta a ni.

*
Chu mi tuk ațang chuan, ninawm khawpin anti buai a. Thawm a hre awl heklo. A chhungte an rawn feh țum erawh chuan, theh hmeh ang hmak in, thawm an chhuah duh hauhlo thung. Hlo a thlawh lai te hian, a thlam ațang Ngulzakap haw tawh rawh ti ten an rawn au țhin a. Talhkhuang vua in an zai leh țhap țhap țhin bawk. Zanah nise, a mulai hi an rawn pal harh fo a. A chawhmeh țhing te lah eizui tlak hauh loh in, tui anlo leih khat leh pum țhin a ni. An tih buai nasat em avangin, ani hnathawk hah bawk si chu, a thin a chhe zo a. Hlauh ahnekin, ngaiah anei a. A cho dum dum reng mai a ni.

*
Lo lu ațang te hian, an rawn au ta țhin a. Thlam hnuai ațanga a mutui lai hawlh thawh lah an ching em em mai bawk. Patling pui si hi, zanlaiah thlam hnuaiah anui leh huk huk țhin a. Ngulzakapa thinrim hian an cho ngawt țhin a. An in lan duh der silo a ni.

*
Țumkhat chu, thlawh laia ala awm laiin, thlam ațang chuan Ngulzakap min cho em, keimah KHIANG ZAIPA, HUAITIN KAWM. Rawn ti mai hian a hria a. Ani thinrim leh thinchhe sa tawh chuan, Cho e, cho e, tumah ka hlau lo che u. Min bei ngam pawh in awm loh kha, ngawi mai mai rawh u a han ti a. Chu ve leh huih chhuk thli arawn tleh a. Buh kung khup chen lai tawh leh, hnuhhram te chu, hlamkhat azau chin hi, alam panin, enge lo kal tehreng ni, an ri seng seng a. An kun dial dial mai. Hmawlh sei taka di hmun han hrut hniam ang mai hian, a mithmuh ah ngei chuan, alam pan in thil alo kal ani tih a hrethiam mai. Ani lah thinrimna in a, a kam ul sa alo ni bawk nen. A ipte pui nghatin, chemkawi a theh thla lawk a. Rawn pan mek tu hmuh theih siloh chu, hmun zawl deuh laiah alo nghak ran mai a.

*
A rawn bawhchilh chiah chu, thlawh laiah an in elh ta ngat ngat mai a ni. Vantlang chunglam aia chak ani na chungin, ami beih mek. Hmuh theih siloh chu, man in khawihve thei tho mahse, a hneh lo lam mah ani a. Mahse, avawn erawh a thlah duh bik der lo. An inbeihna chu, a pe vêk vûk tawh a. A chângin an han lum leh nawk nawk țhin a. Hrehawm atih ber zawk chu, a beihpui pa, thaw uih lutuk chu ani. Ama rim ve reng nge, tih pawh hriat va ni suh.

*
Ngulzakapa thinrim lah chuan, thlah atum der mai silo a. Min tibuai tamtawk ta. Ka buan hlum țhak dawn che ati chher chher mai. A beih pui pa chuan, a hlau ta deuh aniang chu, tal chhuah tumin a țang ta thung a. An inbei rei tawh bawk a. An awm hmun an lo san fe tawh niin, a ipte pui dahna an lo thleng ta reng mai. Chem chu han lak a, sah chawrh chawrh mai aduh tehreng nen, a thlah palh ahlau si. A chem kawm a hrechhuak thut a, asir lawkah alo awm hlauh kher bawk a. A chhar lawk a. A kut leh lama vuanbet tlat chungin, khawinge thaw uih rimchhe pa kan chek hlum teh ang che tih pahin, arin cheh chawrh chawrh mai a. A beihpui pa chu, a au țe nasa ta mai a. An sapatal tak tak chu, amanbet zo ta bik lo a. A thlah ta nge nge a ni.

*

Khatia, patling mangang rawl au țe ta vak vak mai chu, ari te ho, an thawm hre phâk anlo tlan khawm a. Ani lah, hah em em in, thlawh laiah alo țhu hle hle mai a. Chanchin an han zawt chianga. Ramhuai ka vel anih kha, ati duh lek a. An in beih na sulhnu chu, țin chanve hmun dawn azau hi, a phe hun mai a ni.
*

RAMHUAI NULA.
*
Khatia ramhuai a inbeihpui hnu khan, sil awng viau mahse, an reh ta hmak mai a. A lawm ru kher mai. Zanah lah tih buai loh in, tui takin a muhil thei tawh a. Thawven thlak tak tur a ni. Ramhuai ho pawn kan ngamlo emai anti ni hmiang. Kawng dangin chet an rawn thawh ta thung aniang.

Zankhat chu, a sa châng a haw har deuh a, vau sir luite ah in sil in, tuium a thal lai mek chuan, a thlâm chhung mei êng in a kah en ri ruai chu a han hmu a. Hmeichhe zai thawm an hre zui leh a. A tu chu ni maw, kan nu âw lah chu ani silo a, Zualko nise, hmeichhia nih ngawt thu awm hek suh. Engti tih a, tun ang huna rawn riaklut ve ta mai nge maw ni. Tu tak ni ang maw ti rilru chung chuan, thlam lam panin a kal chho vat a.

*
Thlâm châr a thlen thleng chuan, thlâm chhunga zaithawm chu ala hria a. A âw an thian kharh kharh a. Thlâm leika chuang kaiin thlâm kawngka ah a dâk lut a. Tumah hmuh tur an awm hauhlo. Tapa mei chu, a alh hlap hlap a, thingpui bel a in chhuanga. Thuk sirah chuan, meiling thai chhuah chungah, chawbel a in pang hem bawk a. changel hnaha khuâng tuam thlap ani leh nghal.

*
Mak ati nasa mai a. Tu chu nge rawng lo bawl sak tu chu nita ang. Kha hmeichhe zaithawm lah kha, thawm neilo leh hmuh hman miahlo a, a bo dan ah mihring chu anilo tih a chiang hle si. Kan ramhuai ho bawk emni aw ati rilru vang vang mai.

A maian sih thar chu, a tui tur chhuan tumin bel an chhuang dawna, sarep tuihnai zet alo awm reng mai. Chhum hmin tih hriat zetin ala lum vat vat lehnghal. Leh zel chuan, engti tih a hetiang te lo awm ngawt nge ni aw, ei ngam chi pawh ani dawn emni ati ru neuh neuh a. Chutih lai chuan, thlam chhaka hmeichhe nui phei her her ri an hre zui leh a. Mai mai chuan, ramhuai sa ka ei duhlo e a tiin, a ruak chhuak a. Maian chu a bai ta thung a. Chaw erawh ama buhfai tho anih avangin a ei ta tho a.

*
Chuta țang chuan, tlaitin chaw hmin sa leh sarep chhum hmin sa in alo nghak ta ziah mai a. Ani em em tawh lo e, rawngbawl mah ninawm in, duhsakna thilpek ani alawm le tiin a ei ve ta a ni. Chumi zan azanriah eikham chu, bathlarah vaihlo zu in a țhu ar ar a. A tuk lama a hmabak te ngaihtuaha alo țhut veng veng lai chuan, thlamchhak ațang hmeichhe aw hian, a hmingin arawn au a. Vawili ngawt arawn auh nawn takah chuan, enge ni, tunge inih tiin, an chhawn a. Chu aw chuan, lo lên i phal em arawn ti leh a. hmeichhe pahnih thawm hi, an nui zui har har bawk a.

*
A tu chu ni cheu maw. Lo leng ta chu, phalloh a awm hleinem tiin an chhawn a. Chumi rual chuan, mei chhem ên țhat tuma han thawh mai atum chu, a che thei ta hauhlo mai. Luhka an rawn chuangkai thawm chu ngaithla in, kawngka lam chu alo en tawp mai a ni.

*
Kawngka ah chuan, hmeichhe pahnih an rawn lang hlawl mai. Puan an bih ve ve a. Kawrsen dang ha in, an sam asei hnalh bawk a. Zonu ah chuan, lian leh hleitling tak tur ve ve anni bawk. An hmel tak erawh chu, chhum varin a bawh emaw tihturin, a paw chûk a. tapa mei eng rem tawh lam ni bawk si nen, a hmu chiang thei hauhlo thung. Inthlahrun hmel deuh hian an rawn lut chu, thimtham lamah an ding dun rial a.

*
Ngulzakapa chuan, khai â, țhu ta chu, khatia chingal dil din reng tur ani hleinem, kha khalai tukchawp țhutthleng te kha inban ve mai teh u. Hei ka che thei der lo mai. Mei te kha han chhawm țha nghe nghe teh u. Khawilam mi nge in nih reng reng anti zui zat a.

*
Henglai hnaia awm hi kan nia, tlaitina i rawng lo bawl sak țhin tu che kha, kei hi ka ni. Hei hi ka țhiannu anih hi. Mahni mai chuan, ka rawn pawh hreh che avangin, ka rawn hruaive anih hi. Tihpahin, tap sir dawhthlengah țhuthmun arem tir a. Mei chu, a chhawm țha dawn emaw alo tih laiin, a lhawng hlum vek a. Vut ah thingthu nung chu, a hawlh phum zui nghal daih bawk a.

*
Tikhan i che thei tawh ang, mei êng kan duhloh vangin kan phuar che nih kha. I inkawm ho ang u. Vawiin lam te i châu em tiin, ațawng zui siam siam a. Ngulzakapa chuan, chau lêmlo e. Mahse, mahni mai ka nisi a, induhthawh zawng ana țhin khawp mai. Eng tia, rawngte minlo bawlsak ngawt țhin nge in nih ahan ti a.

*
Kawm che ka châk țhin sia, i hnathawk leh che vel hi kalo thlir reng țhin che alawm. Puih che ka châk sia, ka pawh ngam țhin silo che a. Chuvangin i eitur lo siamsak che kha, ka tihtheih tawkah ngaiin ka țhawng lâwkna che ani ber mai. Ka sa chhum sak che lah i ei duh ngai silo a. Hrehawm kati țhin asin aw. Zantin lo leng ta ila, minlo kâwm duh angem anti nem diai a.

*
In peih athu ani mai lawm. Keia kara min kawm chak te chu, ka inhawng khawp ang chu tiin, a chhânga. Enge ti taka, an hmel hmuh chian hram dan mawlh a ngaihtuah a. A vaihlo chu zial tumin a dumbur an ban a, nula lian zawk leh chawchhum saktu zawk chuan, khawinge keiman kalo zialsak ang che arawn ti ta hlauh pek a. Angailo e, ka zial thei alawm anti ve tak naa, nula chuan, arawn ban khalh ta daih si. A tum rilruk ber chu, ala tlawlh vek biklo.

*
A tum dan ber chuan, vaihlo zial chu, meitalh hmanga țanin, meitalh êngah an hmel en chian atum rilru a ni. Nula lah chuan, arilru a hre tehreng emaw ni, vaihlo zial chu, vut dura meiling hmangin, arawn țan sak nghal thlap mai bawk si. Lungsi lo zet in, apak ta talh talh a. Mahse, reiloteah tih dan tur a ngaihtuah chhuak leh thuai a. Meizial chu, a thih hma zawng chu, a fawp duh ta miah lo a ni.

*
Pakhat zawk chu ala țawng ve miahlo a, lehlam hawiin, thlam kawngka lam thlir reng mai. I țhiannu chu, ava ngawichawi ve mawle,, thingpui te lha, han chhuang ula, i in ang u hmiang anti a. Mei tih en dan mawlh ngaihtuah hek. Anni lah chuan, Awlsam zetin, thingpui sa var mai hi, an rawn thlit sak nghal mai si a. Mak ati in, a thin arim lek lek zawk hial a ni.

*
A meizuk chu, a thi ta maw tih ah, a meitalh a phawrh a. A talh țek ta sek sek a. Chu ringawt zawng a êng phak hauhlo. Nula bawk chuan, min kawm duh zel chuan, kan hmel zawng ila hmu em em ang. Zanin erawh chu, kan inhriat țan zan ani bawk a. Ti hian i inlawm phawt teh ang arawn ti ta a. Ani pawn, ani tak e a, țum dang hun dangah ala awm tak alawm ati rilru ve ta a ni.

*
Khami zan ațang khan zantin, nula chu, amah in arawn leng ta țhin a. Ngulzakapa pawh arilru hel leh venthawn neih rengte alo zia a. Nula chu angaina sawt hle a ni. Tin, a hmel alo țha em kher bawk nen, ngaihzawn loh rual ninheklo. Tupa fa mah hian, an dem bik hauhlo ang. In lama a haw ve chang pawn lo lam mawlh mai arilru ah a awm a. Hlo thlawh awl lai hun tawite te chu, rei ati hial ani. Silai nen aram vah phah ta fo bawk. Sa lah akap thei em em renga.

*
pawhchhiat hlo thlawh alo hun dawn hnai a. Riak bawkin a thlo leh a. Nula lah chuan alo ngai em em tawh mai bawk a. Fur ruahtui avanga hnathawh theih loh ni ah pawh thlamah an in awm nilenga nuam anti țhin hle a ni. Mipa hrisel leh chak alo ni bawk nen, hmeichhe hminsa nena in pawm nel reng ta chu, insumtheih loh hun alo nei a. Tum loh ruamah tla lutin, damlai pialral a perkai ka fo mai a. Chutak chu amah ti chhe tu tur alo ni reng si, apawi teh zawng a ni.

*
Nula chuan, a nupui fanaute kalsana, an mi leh sa nive turin a thlem ta fo a. Ngulzakapa lah in, chutiang lam alo nhaihtuah der silo. A tum bau lo bawk nen. Nula chu a thinrim ta a. Ka ruak lo anih a. I fa ka pai chunga min thlauh thla anih phawt chuan, nang emaw i chhungte pakhat tal in an tuar ve ang. Hre reng ang che. Tun ațang chuan, kan inhmu tawh lo anga. Kalo râi ta anih chuan, i thlâm hnuaiah hian, leiruangtuam ka rawn dah anga. Min pawm thei dawn anih chuan, chumi ah chuan hei hi ilo dah dawn nia tiin, mau ang tak. Kutphah chen vel, tliang fim ral mai hi ape a ni.

*
I dah lo anih chuan, in chhungkaw zinga mi pakhat tal an thi ngei anga. Nang hian an ai i awh thei bawk ang. Nangmah i inpe anih chuan, leiruangtuam chu, hai darh lo in, i dah reng tur ani. I hâi darh anih vaih chuan, i chhungkaw zing ami an thi thung ang ati hmiah mai a. Chu zan ațang chuan an in hmu ngai talo a ni.

*
Hun alo kal zel a. Nula sawi ang tak tak khan, thlâm hnuaiah chuan, leiruangtuam arawn vûng ta turh mai a. Ngulzakapa pawh a in ngaihtuah nasa ta mai a. Mahse, a nupui fanaute kalsan a. Ramhuai mi leh sa han nih ngawt mai chu, a duh bik silo. A haw ta nal nal a, a fapa hnenah chuan, arukin thil engkim a hrilh a. Nula in, dah tura a pek thil tliang fim leh mawitak chu, a kutah a hlan bawk a. Kalo thi ta anih pawn, i nu bulah sawichhuak hauh suh ang che ati a ni.

*
Tichhuan, pawhchhiat hlothlawh a zawh in, Ngulzakapa lo zo chu inlamah a haw leh phawt a. zanthum riak tura in sawiin, a riak lut leh a, chumi a zuk riak chu, a nili naah pawh alo hawta silo a. A fapa Rothanga chuan, apa thusawi leh hrilh lawk te ahriat vek si avangin, a zuk ngaihven ta a. Thlam chhuatah, mutbu kawi nuaihin alo thi fel der tawh mai a. A thin leh alung phawrh ani a. Mahse, thisen far engmah hmuh tur a awmlo.

*
He a thin leh alung an lak sak nachhan hi, sarep chhum a ei tawh zawng zawngte rulh let na ani awm e. Tichuan, Ngulzakapa hringnun chu, Ramhuai nula a pawl avangin alo tawp ta ni.

A TAWP TA.
*
CHhiartute in zavaia chungah ka lawm takzet e. Hei nizana ka post mai si kha, tukinah, ziaktu hming dah tel hauhlo in, whatshap lamah ka hmu zui nghal zat a. Hetiang tih ching in awm țhin hi chu apawi khawp mai. In copy paste anih pawn a ziaktu hi dah lang tel țhin ula, mite thuziak tluk ve lo mah ila, kan hming chuang han hmuh te hi anuam kan ti ve a. Kan phûr phah țhin a ni. Ziaktu hming pawh tarlang tel peihlo leh dahlo chunga in copy țhin hi chu, in thatchhiat zia alang reng mai. Nuam pawh hi inti emni aw,,,,, ziaktu thawhrimna dawn pui hauhlo a. Copy paste hi lo sim thei hram teh u.

Ka tum dan lo puiin, nangni copy paste ching, mi kuhmuma partum te avang hian, he post hi alo zuzi ta anih hi. Ka tum dan chuan, he Ngulzakapa hi, thu hmahruai ang lek niin, a fapa Rothanga chanchin hi story a kal tir tum ka ni a. Chuvanga, atirah pawh Rothanga hming ti lang kher kani a. Mahse, ti hian post chu khar ni mai teh se..

Comment leh liker te in chungah lawmthu ka sawi bang lawng e. Hlim ula, hriselna țha neiin damreng ang che u. Ka lawm e.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)