PATLING PATHUM CHUL RAMRIAK

Hlauhawm lampang hrim hrim hmun hrang hrang a mi lakkhawm...
Pjsstephen1997@
Posts: 43
Joined: March 8th, 2019, 9:44 pm

PATLING PATHUM CHUL RAMRIAK

Unread post by Pjsstephen1997@ » March 22nd, 2019, 8:10 pm

PATLING PATHUM CHUL RAM RIAK



Pjs



"Tikhan, thlam hnuaiah khan i bàn kha han zen thla teh, a nuam vak bik lo ang... Ramhuai chuan a lo man nghal chat maithei a nia."

Zurui awkà tih hriat tak mai hian, ka rí pà chu a thlam chhungah hian a lo ṭawng bai bai mai a, a inleng pà nen a ti ti thawm pawh a ṭha khawp mai, chutia thlam chhung ka luh chiah chuan, min lo en hru mai a, Kan rì pa chuan a chem chu a lo hum ran hman tawh a.

Ka ṭhu lut min han hmuh chuan, keimah ka ni tih an hriat veleh thlamuan hmel tak hian thawk an han la siai siai mai a,
Ngaihṭha hmel lo taka ka mit meng an hmuh chuan ka pa Lura kan ri pa inleng chuan
"Min tiphu a lawm mawle, hei i pa Zama nen hian, Ramhuai thawnthu kan lo sawi a, a ngaihnawm ṭhin sia, mi tihlau a, kan han phawk deuh hru a nih kha." A lo ti ta vat a.

Kei chuan "Eng lam nge maw in han sawi le, sawi chhunzawm leh ila.." ka han ti ve mai a..

Ka pa Zama chuan "Nia, nizan ka Vaithang vel naah, ka Sàzú awh hi, mi tuemaw hian a lo ei lai chu ka zuk hmu a, a thawmhnaw hak te chu a ṭial vek hi a nia..Ka hlau lutuk a, vaithang dang en chhunzawm pawh chu ka ngam ta lova, ka hlauh teh reng nen ,hei tukinah i pa Luran sanghar a nih chu min rawn tihsak mai mai, ka mit ngei hian ka hmuchiang si a..' Henglai ruamah hian thlahrang a awm a ni' ka tih pawhin zuk awih tlat lova...a awm zia hi chu a hmuh ve hunah min hrilh pawh nise ka awihsak bik lo vang..". A han ti leh bai bai mai a..

Kan han nui dar dar a, thingpuite kan lum a kan han in zawh hnu chuan zan a lo rei ta deuhva, ka thlam chu ka pan chhuk leh ta a, kawngah chuan sazú thawm hi a ri leh ṭak ṭak ṭhin a, ka awh ṭeuh pawh ka beisei, kumin chu sazu tam kum a ni nen; buh seng zawh, hmarchha lo a riak kan ni hlawm a, zan lama vaithang te kan kam a, sazu sa ringa ramriah chu a hlawkthlak ṭhin hle a ni..
Thlam ka tlen chuan mei chu ka han nun leh a, mutbute ka han siam zawh chuan mu tur chuan ka inbuaitsaih ta a, chutia zan boruak a han reh tak diak hnu chuan, ka rilruah ka pa Zama thilsawi thlahrang kha a rawn lang ta uar uar mai a, lo han leng lo law law ila ṭha tur ka han tileh hnuhhnawh a..Boruak chu a vawt deuh suk bawk nen...

Ka mut hnu reilo teah chuan thlam hnuaiah hian sazu pakhat hi a rawn chik ṭawt ṭawt mai a, rei pawh a chik hma chuan chu sazu chu eitu an awm tih hriat tak mai hian a ri hmarh hmarh mai a, ngaih a ṭha lo ang reng hle mai..zuk bih lah chu ka peih tawh mai si lo..sate emaw sanghar emaw a nih ngei ka ring ta ringawt a.

Mahse thlam hnuai chu a ri leh set set ṭhin, achang phei chuan thlam ban chu a ri hruih hruih a, a su leh deuh delh delh ṭhin bawk, ka ngaih a ṭhat theih thlawt loh avangin thlamhnuai chu ka hmehen nen chuan ka han bih ta ngat a, thlam chhuat dap ka han keu kau chiah chu, thil ṭial ruan mai hi a lo ni a..
Ka phu chiang lutuk chuan ka hmehen chu ka thlauh ta, thlamhnuaiah chuan a let ta reng mai, hmanhmawh zet mai hian ka tlan chhuak a, thlamhnuaia sanghar chu ka vawm ta chiam mai a, ka haw tak tak a ni. Vaithang ka kam hnem zan ber kher a, lo-a sanghar a rawn chhuak ta mai chu, ka awh tlem phah vek dawn ta a ni...



Ramhuai lo ngaihtuah lai lai a, ka thinphu chu a reh lawk thei ta lo mai lehnghal.
Varṭianah chuan tui taka ka mu lai hi ka harh hlawl mai a, a vawt em em a, ka thawh peih rih loh avangin han mut lum leh rih chu ka duh ta a, ka rizaia ka intuam leh chiah chuan zana ka mumang kha ka rilruah a rawn lang ta uar uar mai a,
Ka mumangah chuan zanah hian ka lo harhchhuak zawk a, khum aṭang hian ka ṭhu chhuak nghal hlawl mai bawk, a thim deuh khup a, thla eng chu thlam bang kara awng lai aṭang chuan a lang thei set set a, a no deuh suk a, rannung hram chiah chiah thawm te chu ngaihthla pah chuan thla eng rawn lang set set chu nalh ti ru angreng tak mai hian ka han thlir a..nui deuh suk pah hian ka rizai ka pawt hnai ka han mu leh tur thlam chung lam ka han melh chiah chuan, thlam liangah hian ramhuai pahnih hi a letling zawngin an lo inkhai zuar mai a, ka han enchianga, ka mit vai emaw ka tih avanga ka mit ka nuai hnu pawhin an bo thei chuang si lo..
Pakhat zawk chu zawimuang hian a rawn hawi thla a, min nuih suk suk a, a ha var ṭha tak mai chu a ṭhen êng phet phet thei lehnghal...

Ring fahran mai hian ka han barakhaih ṭhuai mai a, an hlau lutuk chu an thlawk kual chiam a, thlam chung âwng te reuh têah hian an thlawk chhuak ta daih a...

Chutia ka zing thawh veleh a, ka mumang ka han ngaihtuah chhuak thut mai chuan ka awm a tinuam thei ta tlat lo mai a..tun ṭum ka ramriak chu eng emaw ka tawng nual dawn ni tlat hian ka inhria a, mi dawihzep tak lo ni ila chuan inlamah ka haw tawh ngei ang..
Tukṭhuan ei hma a ka vaithang kam sut tur chuan ka chhuak ta a..Ka pa Rema te thlam thlanga ka kam te sut tuma ka han kal chu, hla ve tawk tak aṭang hian Pa rema te thlam namthlakah chuan mi tuemaw hi a ṭhu a, a ke a then a then a, pa Rema hmel nen chuan danglam tak a ni..a ke then chu a rang tial tial a..a chang leh zawimuang hian a vei leh thul..a mak ka ti hle mai a, enchian tuma ka han panhnaih zel chuan a phe zeuh zeuh a, a hnai tial tial a, a fiah lo tial tial mai bawk si..ka lam a rawn hawi a, min hmuchiang hle mai a, hmuh loh der hram tum chuan ka chho zel a..an thlam bul lawk ka thlen chuan chu pa ka mi hmuh pa chu ka han en chianga, min lo nuih sun sun a..a nui hmel hlauhawmzia chu sawi mai hian a siak lo...mit khap lek lova ka en lai chuan chu pa chu a rawn ṭawng chhuak thut mai..
"Ngati nge khatia min en a..?"
Tiin..
Ka hlau lutuk thlam ah pa Rema a awm lo nge ni..
Pa Rema chu ka au vak a..
"Pa Rem, i thlamah ramhuai a awm a nia..!!!!!!" tiin ka hawikual vel ruai a

Ring fahran leh aw lawi deuh ṭuau mai hian ka han auchhuak ta chiam chiam mai a..Chu pa namthlaka ṭhu pa chu a che sawn a..Rang fahran hian thlam aṭang chuan a rawn tlan chhuak a..
"Engtin maw..khawi maw ramhuai chu..thlam chhungah khian em ni..ka hlau lutuk..Ka sazu awh eitu kha a nih chian chu, engtin nge maw ka hmuh loh theih le..???!!!!"

A rawn tichhuak chiam mai..ka bul ah a rawn tlan phei a, hnai setsawt a ka han melh chian chuan ka pa Rema lek chu lo niin..Ramhuai emaw ka tih kha Pa rema lek chu lo niin.. a va han mak ngai vee.........
Ka tih ngaihna hre lo lutuk chuan "I dawih ve ang reng sia, ka rawn tihṭhaih che nih kha.."
Ka han ti ta ringawt a...a ni chuan, a namthlaka a ṭhut laia ka melh dan vel aṭang chuan mak min ti hle a, min lo hlau hman viau pek a ni awm a..
"Min en run run a, achang leh min en ṭha ngam lova, i rawn thlen dawn ṭep phei kha chuan min melh kawk kawka, ngaih i tihṭhat loh zia chu..." a ti hial a ni..

Tichuan a thlamah chuan kan inkawm ta a, zana ka mumang ka han hrilh chuan, mangchhia maiah min ngaihsak tlat lo..ani pawhin zanah a thlam chhungah bak pahnih an thlawk lut a, chhan leh vang ṭha lo eng emaw nei turah a ngai a, a ngaih a lo ṭha thei bik lo hi a nia...

Eng nge maw kan thil tawn hi ni dawn le...?
Chumi ni chuan ni a sa hle a, ka hmarhcha lo pawh ka chawl sek reng mai a, chu nitlang san lai chuhin ka thlam chungah chuan ka mutbu chu ka pho ta a..chaw ka fak zawh veleh thlamah chuan ka mu hahdam ta a..Chutia thlam namthlak lam hawia ka mutzal lai chuan ka thlam chung chu a ri a ri mai a, thlamchung atana rangva ka hman avangin a thawm a na sam viau ni tur a ni...a ri ṭuk ṭuk reng a, ka mutbu phona zawn a thlen veleh a thawm chu a tawp leh hmak ṭhin a...Chhun khaw en lai ngang a nih avangin thlamchunga thil awm chu finfiah tumin ka han bih chho ta a..Ka thil hmuh chu a mak hle mai...ka mutbu chungah chuan mihring ang tak mai pianze nei, a taksa chu a fawn hlarh hlarh a, boruak ang mai hi a ni a, amah pawh chu a langtlang thei vek mai lehnghal...ka han hmuh veleh chuan min rawn hmuh ve ka hlauh em avangin rang fahran hian thlamchhung lamah chuan ka tlum lut leh ta rih a..ka ri te han au dawn ila..thlamchunga ka thilhmuh chuan ka au ri a hria ang a, min rawn luhchilh mai dawn si...tihngaihna hriat ava han har em...

A tawp a tawpah chuan zawimuang, thawm dim thei ang ber hian thlam ban rinchhanin thlamhnuai lamah chuan ka tawl thla ta a..
Chutia ka thlen thlak hnu pawh chuan rilru a la insualbuai nasa mai..ka thlam hmalam aṭanga ka kal a, ka pa Zama thlam lam ka pan chho a nih chuan thlamchunga awm khian min hmu ngei dawn si a..ka lo mawng lam vau-ah ka luh mai a ngai dawn ta a ni...

Tichuan zawite leh muangchang tak, thawmdim fahran hian ka lo mawng lam chu ka pan thla ta a..chutia vau ka thlen hnu chuan ka thlam chu ka han en chhova, ka mutbu pho chungah chuan tumah an lo awm awzawng ta lo mai a..Ka hlauh a zual ta sauh mai..ka thil hmuh khan ka kalsawn tih a hria ang a, min lo zui ru ve reng lo maw... Vau ah hian ka bul maiah hian a lo awm ve reng lo maw..???E he le...engtin nge ka tih tak ang le...tunah pawh hian min hmu reng awm si a...ka hmul thi chu a ding ur ur a..ka hnung lamah chuan thawm a ri rek rek a .Hawi pawh ka hawi let ngam lo...
Chutia chechang ngam miah lo a ka din reng lai chuan vawilehkhatah ka hnung a mi chu a rawn ṭe thut mai a..a au ṭe chiam chiam a..ka hlau lutuk phu nasa bawk si chuan ka thlam lam pan chuan ka tlanchho ta buan buan mai a..Ṭanpuina au a, han ṭe chhoh chiam lah chu ka tlawm la ve bawk si..thlam chu ka thleng chho rang hle mai...

Chutia thlam ka thleng chho chu ka pa Lura hi kan thlam kawtah chuan a lo ding to mai a..phawk fe mai hian min lo melh a..kei lah ka thlanchho luam mai bawk si...a kut veilam chuan a chem chu a lo hum ran mai a, min sat mai ang a tih tur khawp hian a lo meng nasa mai lehnghal..

Ka han hmuh chiah chuan, ka thaw a veng huai mai a..ka hlauh chu tlemin a kiam ta deuh..

Ani chuan aw khur hlak hlak hian
"Ngati nge i rawn tlanchhoh tak vak mai a..? Min timangang alawm mawle.."

Kei chuan "Nia..ka tui lakna ka siam ṭha a..ka lo mawng ami kha...a tuidawn khu a fuh hleithei lova, hmanhmawh taka tuibur rawn lak a, zuk dawh leh vat ka tum alawm mawle.." tiin ka thil hmuh leh hriatte chu ka zep bo ta a..

Ka sawichhuak a nih chuan dawihzep min ti dawn si a..

Ka thlamah chuan kan lut a, rang fahranin ka mutbu pho pawh chu ka hlip ta daih a..thlam char daihlim laiah chuan kan ṭhu dun a..ka thlam char aṭang chuan ka buhzem chunga, laikingbel rawh phe hlep hlep chu a lang thei a, ani chuan min kawhhmuh pah hian hmuh nuam a tihthu leh lunglenthlak a tih thu te chu min han hrilh luam a, chutia buhzem chunga a lan theih chuan thlam chungah pawh a lang ve em em ang tih pah chuan ka thlam chung chu kan han en chhova, a lo lang nasa mai...a phe hlawp hlawpa, Zem chunga mi ai pawhin a lang chiang zawk lehnghal..

Tihian ka ngaihtuah ta a..”Nichina ka mut bu chunga mi tuemaw mu ka hmuh kha, laiking belrawh mai mai hi a lo ni lo maw le” ka ti rilru ta neuh neuh a...tlemin ka hlauh a kiam leh ta...


Chutia kan inkawm lai a rawn hmuh chuan, Pa Rema pawh a rawn chhuk thla ni ngei tur a ni..silai hi a rawn ak thla a..
"Pa Lur, zanin chu sâ ei ang aw..kan ri pa vau a vahlah khu ka zuk kap ang e..nichin khan an hram thawm ka hria a, a vau mawng lam ah ni in ka hria". A rawn tithla lauh lauh mai a..ka thlam kal pel chuan ka vau mawng lam chu a pan thla ta a. A thlenthlak hnu reilo teah chuan a silai chu a ri dur a..a rawn chhoh leh lam chuan vahlah pakhat hi a rawn khai chho ta a...


A va han tui dawn emm..kan eikhawm ngei ang le...

Tlailamah chuan pa Rema vahlah kah chu ka thlamah chuan kan puah ta a..chaw tam tawk tak kan chhum a, chu vahlah sa chuan chaw ei a titui ngei mai..ei deuh reng tur awm sela..kan titlang hle....

Chutia chaw eikham kan ṭut chawlh lai chuan, vawiina ka thil hmuh leh vaua ka thawm hriat kha ka han ngaihtuah ta a, laiking belrawh leh, vahlah hram mai mai a ni ka lo hlauh ve em em mai ni..ka ti ta a..
Anni bulah chuan sawichhuah ngam chi pawh a ni lo..ka hmuhlai kha chuan thlahrang an ang bawk em tak a, an ni pawh hian hmu se chu thlahrang emaw an ti ve tho ang mawle..

Rei pawh kan ṭhutchawlh hma chuan Pa Lura chuan a iptepui aṭang hian zù hi a rawn phawrhchhuak ta luau mai le...A va han tihchi teh reng mai ve le..

Pa Lura chu intithei fe mai hian a han nui huah huah a, no chu a han la thla a, a han thli ri ta karh karh mai a..zan hun nuam tak hman kan tum tlang a ni..

Keini pathum zingah chuan ka naupang ber a..Nupui nei lai ṭhah kan ni a, kan khuaah pawh "Kei ka ni" inti ve chin ngat kan ni..Kan inri fuh ṭum a ni nen kan thu a rual ṭhin hle..

Ka Pa zama chu kum upa tawh lam nimah se, a la chak ṭha hle mai a, zu hi duh lutuk lo phei sela chu a la phiar ṭha si a..a chak lehzual ngawt ang..Tù pali neiin fa paruk lai a nei tawh a ,amah hian ramriah leh sazu thang kam hi nuam a ti ve hrim hrim a ni..Ani ka Pa lura erawh chu a la upa chhe lova,fa pali neiin tumawng a la beng ve lo thung, mahse, ani chu kan khawtlangah chuan parawn pawl tak a ni a, keini pathum zingah pawh kan rinrawl ber a ni nghe nghe..Kei ka nupui neihna a la rei lova, ka kum pawh a la upa lem lo, kan pathum zingah pawh tuichawi tura tirh tham lek ka la ni..fa pakhat chiah ka la nei bawk..

Chutia zu ka han in tak tlak tlak hnu chuan boruak a nuam chho hle mai a...Ti ti a kalin a tho ṭha em em mai lehnghal...
Ka pa Zama bawk chuan nizan hmasa a, a thil hmuh kha a rawn sawichhuak leh ta hlawl mai..sawi lo sela ṭha tur ka lo ti rilru neuh neuh va..
Mahse sawi nuam a ti lutuk chu a sawi ta buah buah mai le.. hman zana a sawi ai mah a hlauhawmin a han phuah belh leh zui bawk si..

Duh tawk tawh se ka tih em em lai chuan ka pa Lura lah chuan a la rawn sawi chhunzawm zui..
Kan han ngaihtuaha..ka ngawih reng chuan dawih min ti dawn si a..ka sawi ve a ngai a ni..ka ti ta a..
Ka sawi ve ta alawm..vawiina ka thil hmuh leh hriatte chu a awihawm thei ang berin ka han sawi chhuak ta, Ka Pa Lura’n ka thlam kawt a min rawn hmuh a, hlauh hmel taka ka awm chhan te chu a aia tuihnang zawk hian ka han sawi ta a..
Ka sawizawh meuh chuan kei chauh chu a hlautu awmchhun ka ni ta lo..an phawk ta hru hru mai le..

Ka mutbu chu an han ena..pathum lenna a ni si lo. Rui buai tawh nen.. kan mu leng mai ang an han tithla ta rawk a..

Patling fa nei duah tawh mahni thlama haw ngam tlat loh mai chu(h) Ti ila..kei ngei pawh chuan haw lo mah se pawi ka ti lo hle a ni..
Chatthla lo chauhva kan inhnu chuan mu tur chuan kan han inbuatsaih ṭan ta a..ka mutbu te tham tak maiah chuan zu rim hnam rum rum chung chuan kan han inhnawhkhawm ta a..a laiah tak mai chuan mut kan han inchuh ta lawm mawle..a buaithlak ngang mai..rui zawi tawh nen..hlauh a zual tulh tulh mai lehnghal..patling pathum lai e ti lo chuan kan ri ta ṭuk ṭuk mai a, ka thlam lah a lian vak bawk lo nen, a su dul dul mai bawk si, chu ka thlam su dul dul mai lah chu kan hlauhna tizualtu a lo ni ve lehzel nen..kan ṭe teng tung mai a, a tawp a tawpah chuan..a laiah tak mai chuan ka inhnawh thei ta hram a..chutia ka mut beh tlat tak avang chuan, min luahlan thei ta lova, kan inchuh na lamah tha kan seng nasa bawk a niang...Kan zawi tawh lutuk chu kan mu ta hle hle mai a...

A tukzing ni a rawn lan chuan ka han harh hlawl mai, ka Pa Zamate pahnih chu an lo awm ve ta hauh lo mai a, varṭianah an lo chhuak tawh chu niin..Ka han ngaihtuah chiang a, ka nuih hi a za ta tlat mai peka..

Inrinni a nih tawh avangin tlailama haw tur chuan ka inbuatsaih ta a..ka sazu awh tawh sa te chu ka han fun ṭha a, tihfel ngai te ka tihfel zawh chuan thlam chu ka chhuahsan ta a..Pa Zama pawh a lo ipeihfel chiah a, a thlam kawt ka thlen chiah chuan, min lo melh run mai a,
"Sanga, nizan thil thleng kha tu bulah mah a sawi chi loh ang.." a lo ti chhum hmak mai..
Lehlam hawiin nuih ka insum ngar ngar a, bawng nuih, kan zirtirtu pa min zirtir ang kha apply a ngai, nuih rik chi a ni hauh lo tih ka hrechiang. Lehlam hawi chung si, che bawk chuang si lo chuan ka hah fu mai thung, nuih insum chu. Min han ngaihchan deuh hnu chuan,
"Ti teh, i inpeih tawh chuan kal ila.." nui sang hian ka han ti ta ringawt a.. zawimuang hian a thlam aṭang chuan a rawn chhuak ta a.

Tichuan inlam panin ka haw chho ta a..

Fehkawng a thui tham avangin in kan thlen chuan ni pawh a tla lo chauh tawh a, chutia inchhung ka luh chiah chuan ka lu a hai ta, thil engkim mai chu a vir muai muai vek mai a..ka nupui mangang chuan kan khaw health sub-centre a zuk bia a, doctor a lo thlen chuan min han check ta a..Ka thisen a lo chaklo hle a ni awm a, vitamin leh thisen chakna damdawi min chawh nghe nghe..

Ka han ngaihtuah chiang a, ka ramriah laia ka thilhmuh mak tak te, ka thawm hriat vel vei te pawh kha, ka thisen chak loh lai a lo nih vang vek alawm lo ni mai mai thin le...🤣🤣🤣🤣🤣😝🤣😝😝





I ngaihnawm tihzawng a nih chuan comment na-ah eng emaw min lo hnutchhiah ve dawn nia..



Link:
BBcode:
HTML:
Hide post links
Show post links

[email protected]
Posts: 1
Joined: February 19th, 2019, 10:06 am

Unread post by [email protected] » May 26th, 2019, 11:55 am

Ngaihthlak a nuam hle mai

Link:
BBcode:
HTML:
Hide post links
Show post links

Pjsstephen1997@
Posts: 43
Joined: March 8th, 2019, 9:44 pm

Unread post by Pjsstephen1997@ » June 15th, 2019, 5:40 pm

😗😗😗😆

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)