MAWLHTU THLARAU

[Pjsstephen1997@]

MAWLHTU THLARAU


Pjs



Heng thil hi ka phuahchawp an ni lo va, thil thleng tâk tâk vek an ni tih ka sawi hmasa duh a, a tawng ve tawh pawh kan awm ngeiin ka ring. Eng nge an nih tak hriat an ni lova, mahse min mawlh tlat ṭhintu thlarau eng emaw hi chu an awm ve hrim hrim a ni.


Engtik zân nge a nih tak chu ka hre ta lo, ka nu leh ka naute pathum nen kan mu reh ṭhiap tawh a, kan mut hma pawha eng emaw ni tak lo kal tura ka nu'n a ngaih tlat avangin ka pa ramriah hun chu fuh lo a tihle mai bawk. Kei chu ka khumah ka mú a, ka naute pahthum chu khum pakhatah an mŭ bawka, an khum piah chiah-ah chuan ka nu chu amah chauhvin a mû bawk, zân a la rei lutuk lo, a reh ṭhiap lai chuan ka nu hian eng emaw ni tak a hmu a nih ka ringa, a rawn thochhuak hlawl chu a hlauhhmel êm em mai a, he ti'ang taka ka nu hlau hmel hi ka la hmu ngai miah lo. Mak tak a ni.


Ka naute nen chuan kan en ṭhapa ani chuan "Mama Ka ngaih a ṭha thei miah lo mai a," tiin ka lam hawi chuan a rawn sawichhuak ta hlawl mai, chuti khawpa a hlau hmel ka hmuh chuan min tihlau ve zo vek a ni ber mai..

Ka nu chuan pâwna chhuaka, kan inbul leh kâwm vel te chu en turin min ti ta ringawt mai a, Nú-te berin an hlau tawh miau mai si a, kei ngei pawh chuan a rúk tak chuan ka hlau êm em mai a ni..Mahse a fapa upa ber ka nih avangin mi a ring a, hlau lo turah min dah hmiah. Chuti chuan pawnah ka va chhuaka light nena ka han chhun kual vel pawhin engmah hmuh tur a awm der mai si lo. Kan kawmthlanga kan theichhungsen buk tak lamah chuan ka zuk kala, chutih lai chuan tukverh aṭang hian an ni chuan min lo thlir ṭhap a, theichhungsen bukhnuai ka lut dawn light-a ka chhun chiah chuan ka nu chuan min rawn au tuarh mai a,
"Mama lo chho vat rawh.." tiin

Hlau tak si, hlau hmello taka ka han din lai chuan ka nu chu a rawn tlanchhuaka, ka lam pan chuan a rawn tlan thla ta vawn vawn mai..ka banah min vuana min hnukchho ta dawt dawt mai a nih chu, thilawmzia hriat a har duh ngei mai..

In chhung kan luh veleh chuan hmanhmawh zet mai hian tapah chuan mei a nun nghala, a khur zawih zawih, a ṭawng buai nawk nawk mai bawk. Ka naute pathum hlau chuan pindan aṭangin an rawn tlan chhuak ve nghala, a mangan thlak duh ngei mai.

Tichuan zankhuain tapah chuan kan ṭhu tlaivar ta ringawt mai a, khua a lo var veleh chuan ka nu chu a rawn ṭawngchhuaka, huana ka kal laia, theichhungsen buka ka luh tum lai vel khan ka pi thlarau hian min man tuma min lo chang lai chu a lo hmu a ni awm a..
Chutia a sawizawh veleh chuan ka lo zuk lut ang tih ka va han hlau em!..lut ila chuan engtin tak min lo ti ang maw..??? Kan theichhungsen buk lah chu a chhah ṭha si a..


Mak ve tak a ni, chumi zinga ni a rawn chhuah chiah chuan Kan khaw YMA informaition Centre aṭangin ka pi a boral thu an rawn puang a nih chu. Ka nu chu a hawi vual vual a, ka pi thih thu an rawn puan zawh chiah chuan a thaw a veng ta hawk a, pindan lamah a luta, ka pite inlama kal tura a insiam zawh chuan, a chhuak ta daih a..

------------------------------------
Kan lui kal na ah.


Vawikhat chu ka ṭhian kawmngaih bik takte pahnih Rama leh Zova te nen luiah kan kal a lawm, sangha manna tur hmanrua kan kente chu ṭha kan tiin kan lung a awi tlang hlê hlawm mai a, lui kan thlen huna kan hmandan tur leh ruahmanna te chu kan han sawi thla zel a, lui kan thlen chiah chuan eng e a nih chiah chu ka hre bik lo, ka bulah chuan tuemaw awm tlat mai hian ka hre ta a.

An ni pahnih bula han sawichhuah ngawt chi lah niin ka hre silova, luitui luang lai ka han en chuan a let zawng hian an luang nimai hian ka hre ta tlat a, a chho zawnga luiluan tlat mai chu mak ka tihlê a, an ni pahnih bulah chuan chu pawh chu ka la sawi duh chuang lova, eng nge a chhan ni ang tih fiah tumin lui hnar lam ni a ka hriat chu ka pan ta ngat ngat maia , an ni chu ka bulah an kal ve ta nge ta lo pawh ka hre tawh lo..


Tui luanglai chu ka en pah zela, ka han kalzel chuan ka ngaituah chianga, nitheia ka hriat ngang loh avangin ka kalna lamah chuan ka let leh ta a, li pakhatah hian an ni pahnih chuan sangha hi an lo mana a lo ṭawng chel chul maia , chutia an awmna li ka han pawh chiah chuan pangai takin ka awm thei ta a, luihnar emaw ka tih kha luimawng lam a lo ni ta daih mai a nih chu, tui kha a let zawnga luangin ka hmu tlat mai si a. Luihnar lam emaw tiin lui mawnglam kha zawhthlazel ta ila, engthil nge ka zuk tawh ang le aw.?.ka han tileh hnuhnawh a..


Chutia, sangha kan man lai chuan sava rual chikhat Vâzâr rual hian kan lui kalna kawr chu hmanhmawh lo zet mai hian an rawn kân a, ṭhianpa Rama'n a seirawkherh a phawrh chhuaka, perhthlak ngei tumin a han umzui ta maia, a perh ri ṭhak ṭhak reng a, seirawkherh a lo keng hlauh chu a hlimpui ngei mai, a rik ṭhak ṭhak zawh hnu chuan a rawn let tawh mai dawn emaw kan tih hnu laiin, a rawn let ta mai si lo..Keini sangha man pawh chu kan chawl ta rih a, mei te kan han zu a, kan han chawlh deuh vang vang hnu pawh chuan, kan ṭhianpa Rama chu a rawn let duh ta reng reng lo mai a, kan han auh vak vak pawhin a min chhang thei si lo, luihnar lamah a chhoa kan hriat avangin kan han zawnga , kan auh vak vak pawhin koh eih tur a awm ta si lo..


Tlailam ní a tlak dawn ṭep ah chuan luimawng lam aṭang hian a rawn chho ta hnu hnu maia, a mit a sen vek a, a thawmhnaw te chu a huh deuh hluam mai bawk..kan han kó a, kan han biak vel pawhin mi a chhang duh reng reng lo, Ngaih a tiṭha duh lo ngei mai..
Zova ngaihṭha lo chuan a han thing nawk nawk mai a,
Chutah Rama chuan "Nang ni pawh hi a tak in ni leh chuang lo vang", tih pah hian hnuailam a melh ta ngur mai a, beidawn hmel tak mai hian ka hming leh zova hming chu a han ko ta chiam mai a, a bul maia awm keini pahnih tân chuan thilmak tawpkhawk a ni.

Hriatthiam a har duh ngei mai..mahse kei chuan engemaw ni tak a tawng a ni tih ka hrethei nghal mai a, a hmelah hlauhna hmel a lang a, a mah lah chu a dáng vek tawh mai bawk si..

A bul maia kan awm thu kan han hrilh mawlh mawlh hnu chuan a zia ve ta tial tial a, chiang taka a han men hnu chuan a hmai dang velte chu a reh ta duaka a hmui duk te chu a reh a, a taksa khur dut dut pawh a reh chuan, min han melh kawk kawk a, a hlauhna te chu a reh ta a, chutia a pangai deuh hnu a a rawn sawichhuah hmasak ber chu "Haw vat ang u.." tih te mai hi a ni a, haw kawngah leh in kan thlen thleng pawhin a thil hmuh chu kan zawt chhuak thei tlat lo..eng tak chu hmu ni maw..

-----------------------------------

Ka pa'n min hrilh a..


Vawikhat chu ka pa nen kan ram kala, kan kalna hmun ah chuan thang kamna khan hi a tam êm em mai a, varung leh vahrit hnu pawh a tam khawp mai, thang kan han kam chu kan en apiangin ka hawn ṭeuh zel maia, midang kam an awm ve lo bawk nen..,


Tlaikhat chu ka pa damṭhat vak loh avangin keimaha thang ên tur chuan kan kamna hmun lam chu ka pan ta a.

Chumi tlai chuan keimah chauh ka nih avangin eng emaw hian min mawlh leh ta tlat maia, ka kallam chuan ka hnungah hian mi tuemaw kalve awm tlat hian ka hre leh ta a, ka ngaihṭhatloh avanga ka han din leh vang vang chang chuan a reh ve leh maia, ka hnunga hnahthel te chu an ri leh sel sel ṭhin a; ka dinin a ding ve a, ka kalin a kal ve leh a, ka kalchak pauh leh a rawn kalchak ve leh zel a ni mai..ka kal thui deuh hnu chuan ka hawilet ngam ta reng reng lo mai.

Thang en lova hawh leh ngawt lah chu a nep thlak viauin ka hre bawk si, kawng chanve vel ka thlen hnuah kawngthlanga kham sang tak mai awmna hmun ka thlen chuan thli hi a rawn thaw chho vuk vuk reng a, ka pa nena kan kal chang pawhin thli chu thaw vuk vuk fo mah se chumi ni ber kher chuan a thawt dan a dang ta tlat mai a, ka hnunga min zuitu eng emaw khan chu kham ka thlen chiah chuan min kalbo san ta daih mai a.. Mahse kha kham aṭanga thli rawn thaw chho vuk vuk mai karah khan hmeichhe mangang au thawm hi a rawn ri ruai ruai mai a, ka bengchhe ri nge pawh ka hre lo..hnimte chu a pe thla sel sul mai a, kham awih tak ni mah se, kham pathum inchherchuan an nih avangin a chhawrdawh zai zai chu a lang thla thei vek a, sang tak a ni..

Thang kan kamna hmun ka thlen chuan thangawk a ṭha leh ngang mai a, ka lak zawh chuan hmanhmawh zet mai hian ka kir leh ta a, kham awmna hmun ka thlen chhoh leh chuan kawngchhak lam aṭang hian lungṭhil hi a rawn tla ṭhet ṭhet a, khua a thim dawn hnaih tawh avangin eng ramsa emaw a nih ka ring ta ringawt a, mahse chung lungṭhil rawn tla te chu awmze nei hian a rawn lum hek hek reng a, kan han enchian fe hnu pawhin engvang nge a nih ka hre thei tlat lo, chung lungṭhilte chu kawngthlang kham lamah chuan an liamthla zela, kalpelh mai tuma kân ka han tum chiah chuan kawngthlang kham aṭang bawk chuan kal lama hmeichhe au thawm kha a rawn ri leh ta a, a au vak vaka, puitu a au chiam a, mahse ka chang ngam reng reng lo..chhan chi ah ka ngai lo..ka hlau lutuk chuan tlanchhiat ka han tuma, mahse a nepthlak ka tih em avangin ka kalchhe ta zawk a.
Ngaw dur thimkhup hnuaia mahni chauha kal rak rak chu zamawm duh tak a ni..


In ka thlen chuan ka thil hmuh leh hriatte chu ka pa hnenah ka sawi ta a, ani chuan ka bula mi kalve ka tih kha ka thlâ a nih a ringa, "kawng i lo kian lo a nia" a lo tisam ta et maia, a chhan ka han zawh chuan "Kan bulah hian kan thlâ hi a kal ve renga, kan hnunga a kal chuan kan hmaah thil ṭha lo kan tawng ṭhin a, chu vangin kan hnungah kan thlâ chu a kal ni a kan hriat chuan kawng kena, kal hmasa rawh tih ṭhin tur" a han tileh a. Mak angreng tak a ni..


Kalkawnga khamsang tak kan kal pelhna hmuna ka thawm hriat te chu ka han hrilh leh a, chutia ka hrilh zawh chuan chu khamsang tak mai phena thawnthu awm chu a sawichhuak ta a. Kan khuaa nula upa ve tawh tak mai chu, chu kan kalna kawnga kham sang takah chuan a lo tlahlum tawh a, chu nula chu hmaithai fanu a ni a, tlangval pakhat nen hian an inngaizawng a, nupui atâna neih a duh thu, chu nula nu hnenah pawh chuan a sawi nghe nghe, mahse chu nula chuan a nu kalsana Pasal neih chu a hreh angreng hle mai a, mahse a nu pawh chuan nei turin a tilui a, chutia an rem tak hnu chuan zankhat chu tlangvala chhungte chuan palai an tir ta a, chutia pasal neih duh ve bawksi a nu kalsan a hreh bawksi rilru buai chuan a tukzingah chhuakin khamah chuan a lo va zuangthla hi a ni a, ka pian ve hmaa thilthleng a nih avangin kei chuan chu nu chanchin chu ka hre ve lo.

Ka pa chuan chu khama thil thleng avang chuan chu kham bula kawngah chuan mi an kalngam ta lova, kei ni chu, chu nula thih hnua kal leh hmasa ber kan nih thu a sawi nghe nghe. Chuvang chuan sava an tama thangkam an awm tawh ngai loh avangin. Chuvang chu a ni, kan thangkam a khan em em mai ni, kan en apiangin ka awk ṭeuh ṭhin renga.

Mahse chung thilthleng ka hriat hnu ah chuan khama ka hmeichhe authawm hriat kha ka bengchhe ri mai an ni lo alo ni tih ka hria a, ka hlauh a zual ngei mai..

Ka pa chuan, chu nula chu eng emaw ni tak hian a tibuaiah a ngai a, a zuan thlakna kham ko a lungte chu a hamrang nen nuan mai a, a chhawng khatna a tlak thlen hnuah a la thi lova, a chhawng hnihnaah hnukthlatu an awm a nih a ring a, a chhan chu lungah a kuttin a la tan thu a sawi bawk, a chhawng thumna a thlen chuan a luruh a keh a, thisen nen lungah chuan a kai ta nuan mai a, a thluak per vel pawh a hmuh theih a ni. "A chhawngthumna a tlak thlen chuan a ruh te chu a tliak ta deuhvek mai a ni", a ti ta a, Chutih lai chuan Pawiho thingzaiin chu nu authawm an lo hriat chuan mi an hrilh a, a awmna hmun leh a tlakna hmun pawh kan hriat theih phah ta a ni...

A lainat awm ngawt mai..
------------------------
Chingpirinù thizŭn thawm leh "thi tâk tâk zŭn" ti a a hramte hian awmzia an lo nei vek mai hi a lo ni a, zânlaia chingpirinù in thi ták tâk zún ti a a hram chuan mitthi an awm ngei ngei ṭhin. Chung mitthite chuan an thih hmain an thlá a chhuaka, an ṭhenawm chhung leh khatte an tlawh kual ṭhin a ni. Tar chaklo leh upa tawh lam deuhte chu an thlâ a ruma, thlanmual leh a vel an fangkuala, a rum nghut nghut zel bawk, chung thlarum leh thlarau vakvai ṭhin chu kan upâ te pawh hian sawi tur an hre ṭeuh a ni. Heng thlarau vakvaite hi kan bulah an awma, kan kalna hmun apiangah min lo zui ve zel ṭhin a ni lo maw...?

Tiin kan tawp ang e..