BÛNGPUI ZÛN

Hlauhawm lampang hrim hrim hmun hrang hrang a mi lakkhawm...
Pjsstephen1997@
Posts: 43
Joined: March 8th, 2019, 9:44 pm

BÛNGPUI ZÛN

Unread post by Pjsstephen1997@ » May 22nd, 2019, 8:11 pm

BÛNGPUI ZÛN


Pjs


"Inngaizawng tuakkhat chu an hlim dunin an inhmangaih êm em mai a, hun hlimawm tâk tak an hmang dun ṭhin. Vawikhat chu 'búng lianpui' awmna hmuna inhmuh an tum ta a. (chu bung chu a lian êm em maia, a kung bùl chu a kawrawng a, a kawrawng chhungah chuan mi pahnih aṭanga pathum pawh inhnawh se an duh dan danin an inherkual vel thei hial ang.)

Tichuan inngaizawng te chu chu bûng bulah chuan an inhmu ta a, Chu bungkung hlim chu a nuamin a dai hle a, hun zalen tak hman dun nan pawh an duhthusam tak a ni. Mahse chu bung hnuaia an inhmuh chiah chuan, a hmeichhia zawk chu mak tak mai hian a thinrim ta thut maia, eng nge a chhan tak tih mipa zawk chuan a hre thei ta reng reng lo mai, a thinrim lutuk chuan a bialpa chu a haw san nghe nghe a ni.

Nidangah pawh chu bung hnuaiah bawk chuan an inhmu ṭhina, a tirah chuan nuam titakin an titi a, a hlim em em a, mahse an hlim rei ngai lo, a pakhat zawk zawk chu an thinrim leh thuta, an inhniala, chhan em em awm lovin, tuemaw zawk zawk chu a haw tau ngei ngei ṭhin a ni. Mahse tlaitin inhmuh nan chu bung hnuai bawk chu an thlang tlat tho nia."


He bung lian tak hian zun a nei nge ni, chu inngaizawng inhmangaih takte pahnih chuan intihthiam loh nan hmang fo mah se, inhmuh nana an duh berna hmun a ni tlat tho si a ni.


Ngati nge, bung hlim nuam tak hnuaia an inhmuha, tuemaw zawk zawk an thinrim thut zel mai le..? Eng nge a chhan.?

I lo chhiar zel dawn nia..


"Hmaithai fanu nula hmelṭha zet mai hi a awm a, a nu chuan a duatin a hmangaih êm em mai a, a chevel leh a bula a awmdan vel chu a thlir ning ngailo, a en ngawih ngawih zel mai a ni. A duhthu a samin mipa hausa leh awmthei tak nupui ni tur atana a ruat a ni a.

Mahse a fanu chu mi rethei tak chhungkua aṭanga chawr chhuak tlangval pakhat hian a duh em em a, ani a hmuh theihna tur a nih phawt chuan engthil pawh tih a huam a ni. An inah chuan va lang ve fo mah se, a nu mit a tlung lo hle tih a hria a, mahse chu nula chu a rim zantin a, zan khat tê pawh a hmaih phal lo.

Chutia, a lenchilh tak rengah chuan chu nula pawh chuan a duh ve ta hle mai a, a nu'n an inneih phal dawn lo mah se, chu tlangval zui chu a duh a. Tlangval tam tak in rim ve ṭhin bawk mah se, ani chauh chu a thlang ta a.

Zan khat chu, chu nula chuan a inlengte thlah pahin chu a tlangval hmagaih chu a zui haw ta maia, mahse chu tlangval chuan a bialnu chungte'n an rawn hmuh mai a hlauh avangin an ina haw pui duh ta lo chuan khawihmunah emaw bul ṭan ṭha a, chhungkua te dinpui chu a duh ta zawk a. Chutia tlanbo tuma an chhuah hnu lawk chuan, chu nula chu a chhung te leh a nu'n a bo a ni tih an hriatin; umzui turin mi an tirve nghal mai a, kawng chanve vel ah chuan an in nangching ta, chu tlangval nula hmangaih em em mai chu an thah sak ta maia, a ruang chu la in, bung thing hnuaiah an phum a, chutih lai chuan bung chu a la lian lova, mahse kha tlangval an phum chiah khan a ṭhang duangin a duah ṭha ta em em mai a ni.


A bialnu lung leng leh rilru nâ chuan, awm ngaihna a hre lova, a bialpa ruang an phumna hmun chu a zawng ṭhin, an hrilh duh bawk si lo, a zawn fé hnu ah, tlangval pakhat; a nu'n a bialpa that tura a rawihte zinga mi chuan a hrilh ta a. Chutia a bialpa an phumna hmun a hriat takah chuan bung hnuaiah chuan a awm nitin zantin ṭhina, chu bung bulah chuan a ṭapa, a rilru natna leh a nu chunga a thinrimna zawng zawngte chu a laihbaw ta ṭhin a ni.

Zan khat chu a thinrim a zual hle mai a, a insumzo lo, a bialpa hmel chu vawi khat tal hmuh leh a chak em avangin bung bul chu a haih ta chiam mai a, a kuttin te tla vek khawpin a haih a ni, chutia a haih tak chiam hnu chuan a bialpa ruang chu a haihchhuak ta a, a rim a chhiain hmuh tlak lo awm tawh lo mah se, a bialpa ruang chu a awmah kuahbetin a bulah chuan a mu a, lei chuan a invur hnan ta a.


Tichuan a bialpa ruang bulah chuan mu in, a zal hlen ve ta a ni."


Kan naupan lai chuan bung kung bula kawrawngah chuan kan infiama, kan inbiruksiak chang pawha, kan birukna hmun ber a ni ṭhin, a bung rah chu savain a tlan ṭhina, Sava te chu an tam thei em em maia, chu bung rah chu a tui bik emaw tihmai tur hian a tlantu pawh an tam ṭhin khawp mai.

A hmun a ualau tawh hle a, a bulvel chu a faiin, tlang chungzawla awm a ni bawk nen, han ṭhut khawthawn nan pawh duhthusam a ni.

Tet tê aṭanga ka kawm ṭhin, tuna ka ngaihzawng lo nita, Ramthanpuii leh he bung inkara ka thil tawnte chu ka han hrilh zel ang che.

Ani nen chuan tettê aṭanga inhre tawh kan nih avangin kan mizia inmil lo hle mah se, eng emaw tihtur leh hmachhawp a awm a nih chuan kan inmil hle thung a, in thihthiam loh chang kan ngahna hian kan induhna a tizual zawk ṭhin. Bunghnuai chu keini pawhin nuam kan ti a, kan ingaihzawn hnu thleng pawh hian, mahse kha bung hnuaia kan inhmuh changa kan intihthiam loh ṭhinnna kha kan pahnih ngei chuan zawnchhuah kan tum ta a.

Zankhat chu Rami chuan bunghnuaiah chuan inhmuh dun a duh ta a, eng emaw tak chinfel a duh thu a sawi tel bawk, in tihthiam loh a duh leh nge pawh ka hre lo.

Chumi zan chuan ka han chhova, thla a en tawh avangin ral aṭang chuan ka han hmu thei nghal maia, mahse tuemaw a bula awm ve chu tunge a nih ka hre hauh lo.

Chu ka mi hmuh chu hmeichhia a nia, Rami chu a en ngawih ngawih renga, a bul maia awm hmeichhia chu Rami chuan a awm ve a ni tih pawh a hriat ka ring lo.

Tu tak ni ang maw.

Ka hnaih tial tiala ka han thlen chiah chuan ka mi hmuh nu kha a lo awm ve tawh lova, Rami bula ka sawi chuan a hlau ngei anga, sawi chi ah ka ngai lo, a dawih ang reng bawk nen.

Chutia a bul ka thlen chuan Rami bula awmve hmeichhia kha a ruk hian ka zawng ta renga, bung thing chu ka han kalkual a, a hnuaia kawrawngte chu ka han luhchhuah vel ṭhin, tumah an awm bawk si lo.

Rami chuan tuemaw zawn ka nei a ni tih chu a hre nghal mai a..mak tihhmel tak mai hian
"A mak iti ve lo mi. He bung hnuaia, kan awmdun apianga, kan awm ṭhin dan hi, a chang leh chhan nei lovin ka thinrima, a chang leh nang i thinrim bawka, eng emaw tak chu a awm a ni, chuvang a nia, zan inah hian he hmun hi ka thlan. Nichin khan ka bulah hian tuemaw awmve ang mai hian ka hre tlat maia, hmani aṭang tawh khan, he tia kan awmdun apianga, kan chezia zawng zawng hi lo thlirtu an awm a ni. A mak ka ti, chutiang ang rilru chu i la pu ve lo em ni." Tih pah chuan zawhna hlira khat a mit meng chuan min melh kal maia..

A ruk tak chuan ka hlau, mahse a ni hmeichhia zawkin zan zana he bung hnuai ber khera in hmuh a timai chu mak ka ti a, ramhuai an awm duh hmel ropui si..


Kei pawn chhan eng emaw ni tak a neih ka ring ṭhina, mahse chutianga, zawnchhuah theih chi ni a ka hriat loh avangin sawi pawh ka sawichhuak duh ngai lo,

Rami chuan zan lai thlenga awm chu a duh ta a, a chhan eng emaw tak a awm a nih chuan zawnchhuah a duh thu a sawi a, a rawtna pawh chu ka rem ti ta a.

Zan a rei deuh hnu chuan, khua chu a vawt ta hle mai, bung hnahte chu a rawn tla ri leh karh karh ṭhin, a rahte chu a rawn rawn ṭil leh hak hak ṭhin bawk. Mahse chung te chu chhunah pawh a nihdan ve reng a ni.

Eng emaw ni tak ngaihchan kan neih avang chuan kan meng harh kar renga, zan dar 12 a rik dawn chuan chhumin thla chu a rawn hliah taa, Rami chu ka kuai hnaia, kan inkuah bet ta tlat maia, thli a rawn thaw vuk vuk a, haw mai ka rawt chuan, ala phal tlat lo.

Thli chuan bung hnah leh rah te chu a rawn chhem ri ṭhuai ṭhuai a, thil thleng danglam tak a ni.

Chutia a vawt em em vang leh thli a rawn thawt takah chuan bung thing kawrawng chhungah chuan kan lut a, ka luh veleh chuan a kawrawng lehlamah chuan hmeichhe pakhat hi a chhuak zauhva, Rami chuan mak a tih em avangin umzui ve nghal maia, mahse tumah a va hmu leh chuang hauh si lo. Bung thing chu kan han kalhual leh a, tumah hmuh tur an awm leh si lo. Chutia pawna kan awm lai chuan bung thingkawrawng chhung aṭang chuan hmeichhe ṭap thawm a rawn ri chhuak ta a, a ṭah a chhuak hle a ni tih a hriat theih.

Ṭap thawm a hriat veleh, Rami chu a ṭe ta vak mai a, eng emaw ni tak a chungah a thleng a ni. A bullah ka va dinga, engvanga chutia awm mai nge a nih ka zawh chuan min chhang lo, a beng chu a hup ta tlat mai a..Hmanhmawh tak maiin ani chu ka pawma, ka haw pui ta a.

In ka thlen pui hnu chuan a khawsik chu a nasa hle maia, a tlun chiama, a taksa chu a khur dur dur reng mai bawk, eng nge a chhan ni ang.?? Kha hmeichhe ṭap thawm kha khawilam ami nge a anih ang lee??

Han chhoha, han hriatchian leh chu duh hle mah ila, Rami awm dan chu ngaihtuahin kalsan chi a ni hauh si lo. Chumi zan chuan zankhuain a tluna, tumah kan muhil thei lo. Chutia, a pang kan dep lai leh a bula kan ṭhu lai chu tuemaw hian min lo en reng ni mai hian ka hria a, ka han hawikual vel a, ka hmuh loh tur tawk chiah chiah hian a tlum bo leh ṭhin a, hmeichhe pakhat thawmhnaw ṭethnuang inbel bal em em mai, a hmel pawh a dang veka, a sam chu a pawr hle a, a mitkhur chu a duk vek bawk. Mahse ka chiai lutukin ka mitvai mai mai te pawh a ni ngei ang.


Zing lamah chuan a khawsik tlun chu reh tawh mah se amah chu a la harh thei lova, ni a rawn lan veleh chuan bungkung lamah chuan ka han chhova, nizana ka awmna hmun te chu ka han ena, kan kehniak hmuh tur pawh a lo awm reng reng lo. Bung hnah tla leh a rah nizana rawn tla te pawh kha an lo bo veka, bung hnuai chu a fai pehun mai a ni. Ka han enchiang a, rannung engmah hmuhtur an awm lova, fanghmir takngial pawh a a kung bul velah chuan an awm lo. Hmun danga thliin thingkung a chhem chet suau suau laiin bung zar leh hnahte chu an reh ruiha, an che ve hauh si lo.

A reh ruih a, a rahte chu a lo ṭil zo vek tawh a, eng sava mah hmuh tur an awm bawk si lo. Ni zan thil thleng vang khe em ni ang le..?


Bungbul kawrawng chu ka va en phei a, a lai takah chuan lei hi a lo phut serh a, ka luta, lei chu ka han kawiha , a lum vut vut mai a, ka han haih chuan, lehkha bu pakhat hlui tawh tak hi ka haih chhuak a, ka haihchhuaha ka han ken chiah chuan thli a rawn thaw vuk vuk a, thingkawngrawng chhung a rawn chhem tak dawt dawt hnu chuan hmanhmawh takin ka tlan chhuak ta thuaia a. Ka hlau lutuk chu ka hmul thi a ding ur ur thei hial a ni.

Bung aṭanga hla vak loah chuan ka tlan sawn thuaia, lehkhabu ka han keu chuan, a ziak a hlui tawh deuh avangin chhiar a har ngei mai.

A phek hmasa berah chuan hmeichhe hming hi a lo inziaka, a hmel ṭhat thu a sawi zawh chuan, tlangval pakhat nena an inngaihzawn thu a sawia, a thik ṭhin hle thu pawh a sawi tel nghe nghe..

"Chu nula chu he bung hnuaiah hian a lo thi tawh a, a bialpa bulah a zal hlen ta a ni. He bung bulah hian nula leh tlangval inngaizawng te chu a n rawn kal ṭhin a, Ani chuan a lo en ngawih ngawiha, a bialpa nena a hun tawn a ngaihtuaha, a awt em em ṭhin, mahse, a nu'n a bialpa chu min thah tir a,ka kut ngei hian ka that a ni. Hrehawm ti taka a nun kan hman tir avang khan a thlarau hi a la zalen thei lo a ni. Bung bula inngaizawng rawn kal ṭhinte a lo hmuh chuan a thik em em ṭhina, a bialpa nena an awmdun ve theihloh avangin, in ngaizawng tuemaw zawk zawk chu thinrim takin a lo siama, an intihthiam lohna turin engtin emaw ni tak a lo siam ṭhin a ni. Mahse kei chu hetah hian ka awm ve lova, a bialpa nena an ruang hi, a he hmunah hian a awm a ni. A nu chuan a fanu pasal atan min duh a, mahse ani chuan min duh lovin mi rethei fapa a duh zawk sia , a thihpui duh hial khawpa a lo hmangaih hi ka thik takzet a ni. " tiin. he thu hi a lo inziak a. Ka chhiar chiah chuan he nula thlarau hi a nih ngei dawn hi, nizan a kan hmuh kha. Bung hnuaia Rami nena kan inhmuha, kan intihthiam loh ziah chhan pawh kha a lo nih ngei hi. A lehkhabu ziaktu pawh hi a thi daih tawh awm si a, engtin nge he hmunah hian a lo awm theih le. Ka ti rilru ta neuh neuhva


Chhiar zawm atan inlamah chuan ka haw pui ta rih a. In ka thlen chuan Rami chu a lo la harchhuak reng reng lo mai, a mar chu a la phu a, mahse a la harhchhuak thei tlat lo. A changin a thawk a rang em em a, a chang leh a thawk chu a tawp mai dawn emaw tih tur khawp hian a rawn ri se se ṭhin. A biang leh chal velah chuan thlanfim a luang zung zung reng a, a mah chu a phu leh zawk zawk ṭhin bawk. Tu chu nge maw hetianga titu chu ni.

A tu te pawh mai chuan mak kan tiin, kan ngaih a ṭha thei thlawt lova, engtia tihchi nge tih lah kan hre hek lo.

Tlai lamah chuan Rami chu a rawn harchhuak ta hlawl mai, dik lohna em em awm lovin a meng harkar maia, a rawn ding chhuaka, kei chu min kaia, bungkung lam chu min panpui leh ta a. Bung bul kan thlen chuan a kawrawng chhungah a va luta, a ṭhingṭhi a, a ṭap ta vak vak mai a..kan pahnih chauh kan nih avangin hrilh a hai duh ngei mai. Ka han be ṭhin, min chhan a tum bawk si lo. Engvanga ṭap ta vak mai nge maw a nih chu ka hre si lo.

Chutia a ngaihna hrelo taka a mah ka en reng lai chuan a rawn hawi let a, rum fe hian min rawn melha, a mitmeng hlauhawm zia chu(h) chu ti khawpa Ramthanpuii thinrim hmel chu ka la hmu ngai lo hial. A meng sen rum a, mit tla lek lo a mim melh pah chuam "Khawiah nge he ta lehkha bu kha."Tih hi âw cher chhur mai hian a rawn sawi chhuak ta a.

Mak tak a ni. Engtin nge Ramin lehkhabu a awm tih a hriat theih? Nge he nu hi Rami a ni ta lo zawk.?


Hmun dang hawi thei lova ka din zum reng lai chuan, ani chuan "I chhiar vek tawh em?" Tih pah chuan a rawn tlan chhuaka, ka nghawngah chuan a rawn rek chawt maia, a tha a chak em em mai lehnghal, a ban chu ka thehthlaa, ka tha tawpin bùng kung kawrawng chhungah chuan ka nam phei a, chu hmun aṭang chuan ka tlan chhe ta chiam a, min umzui ta nge ta lo pawh ka hre ta lo, hawi pawh ka hawi kir ngam lo.

Lehkhabu chu engatan nge a tih, eng nge a tan a ṭangkaina ni ang..?

In ka thlen chuan tumah an lo awm lova, kawngkhar ka kalh nghal a, sitting room-ah chuan ka lehkha bu hawn kha ka la chhuak a, hmanhmawh takin ka chhiar a, eng emaw ni taka, Rami chhanchhuah dan a awm takin. Ka chhiar ta char char a, a phek tawp lam thleng chuan chutiang anga han tihna tur hmanrua awmang hmuh tur a awm reng reng lo mai a, mahse a phek tawp berah chuan "Nula ruang chu hal rawh, chuti chuan anchhia chu a bó ang". tih hi a lo inziaka.

Kawngkhar chu tuemaw hian a rawn pawt a, ka lo kalh avangin,a hawng thei ta lova, a hawn theih tak lovah chuan, a kik ri ta karh karh a, inchhungah chuan tumah awmlo ang maiin ka ngawi reng a, ka hawn sak duh ta lova,
Mahse rî inzawm zat mai hian kawngkhar chu a kik ta reng mai a, beidawn a tum lo a ang, engtin nge ka tih ang le..Rami a nih ngei ka rin avang chuan tih tur ber pawh ka hre lo.

A tawp a tawpah chuan a rawn ṭawng chhuak ta a.
"He tah hian ka awm reng dawn, lehkhabu kha nangma lak a ni tih ka hria, min pek hma chu ka kalsawn lovang". Ti thu hi chiang zet mai hian a sawi ta charh charh mai a.

Engtin nge nula ruang chu ka laihchhuaha, ka hal theih ang le..? Lehkhabu hi pe ila Rami hi a chhuahsan thei a ngem le..? Nilo, a ruang chu ka hal ngei ngei tur a ni.


Ruang laihchhuahna tur leh a halna tur oil leh hmanraw dang ka siama, tukverhah chuan hruiin ka uaichhuak a, lehkhabu chu inchhungah chuan ka hnutchhiah ta a.

Búngkung ka thlen veleh chuan a kawrawng chhunga lei chu ka lai ta chiam mai a, reife ka laih hnu chuan hmeichhe sam chu ka laichhuak ta ṭeuh mai a, a luhruh ral ṭep tawh nen chuan ka la chhuak a, a bulah chuan mipa luruh niawm tak a lo awm bawk a, pawita em em mai chu, an luruh kha a inang em em mai a, khawizawk nge mipa a niha, khawi zawk nge hmeichhia ka hre leh ta tlat lo. Mahse ka ngaihtuah a hal ve ve pawh ni ila a pawina a awm ka ring ta lo thung.

Ka lai zela, an ruh zawng zawng chu ka laichhuak fai ta vek mai a. Bung hlim hnuaiah chuan ka dahkhawma, hal tuma oil ka laihkual vel lai chuan, ka hnungah hian tuemaw hi a rawn dinga, hnehsawh tak mai hian min theh leng ta dawrh mai a. Ka tlukna lamah lung ka tauha, ka lu hai chuan tunge a nih ka hmuchiang thei ta tlat lo.

"Min hal i tum elaw...i va sual ve,'' tih pah chuan ka lam chu a rawn pan phei a, a kutah chuan Chemte hi a keng a ni tih chu ka hre thei, a rawn hnai zela, mi vih a tum lai chuan, tuemaw hian, "Khawngaihin tisuh, a tih ni loah, mi i that ang a maw.? An tihsual a awm hlainem..kei hi a lawm dik lo, i bialpa kha that lo tur ka ni asin.." tih hian tuemaw lo awm ve chuan damthlap mai hian a rawn be ta a..

Chutih lai chuan chhum a rawn zing khat veka, ruah a tla fuap fuap mai bawk.
Ka han menfiah deuh hnu chuan, mi vih tumtu kha, Ramthanpuii a lo ni reng a, mahse a mah a ni lo tih chu ka hre tho.
Chutia a rawn betu lam pan a han tum lai tak chuan ka ipte aṭangin lighter ka la chuaka, talh ka han tuma, ruah sur avang chuan a alh thei ta reng reng lo mai, nula ruang pawh chu hal ngaihna a awm dawn ta lo a ni.


Ruah chu a sur ta buan buana, ramthani chu chhan eng emaw vangin a ṭe chiam chiama, a ṭap vak vaka, khawpui a ri leh dur dur ṭhin bawk, ṭihbaiawm tak mai hian a ṭe hawm hawm mai bawk.

Ruhro awmna lamah chuan zawimuang hian ka vak phei a, ka lighter talh ka han tum leh chuan, Rami chuan min rawn hmu a, ka ke ah a pawta, a chemte ken lai chuan ka bawpah a rawn vit a,,ka tal vaka, thei leh thei loin ka tlawh thlu ta hnawka, ka bawpa chemte bur reng mai chu ka phawi a, vih let ve mai tuma ka han tinlai chuan. Tuemaw hian ka hnung lamah min rawn bia a, ka han hawi let chuan, tlangval pakhat hi ruhro bulah khan a lo ding a,
"Engtin mah tisuh hei, keiman kan hal a nge"..a tia, ka lighter chu a chhar a hal ta a, mak tak a ni..ruah chuan ruhrote chu nanhuh vek mah se a alh ta hluah hluah mai a a ni.

Chu veleh Rami chu a ṭe chiam chiama, a bawkkhupa, leiah chuan a let ta tawp tawp mai a, a. A bula ka va kalhnaih chuan, a zawi ta hnaka ka han pawm thawh chuan a rawn menga, zawi te hian "engtin nge ka awm a" a rawn ti chhuaka, chutia a rawn sawi theih takah chuan kha Thlarau sual khan a kalsan ta a ni tih chu ka hre thei ta a.

Ruhro kang mek lam chu ka va hawi leha, tuemaw nula duhawm zet mai leh tlangval pakhat hi hlim hmel tak maia aninkuah lai chu ka va hmu a. An piah chiahah chuan tlangval pakhat hian thik hmel taka a lo melh reng lai chu ka hmu tel bawk a , ruah chu a sur nasat em avangin rei pawh ka hmu thei ta lo a ni.

Rami chu búng thingbul kawrawng chhungah chuan ka pawm luta, duat tak maiin ka kuah ta hle hle a.





A tawp taaa..



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)