KA HRINGNUN (Short story) BY BRENDA CHHAKCHHUAK

Hmanlai mizo thawnthu, naupang thawnthu te, nula leh tlangval in hmangaihna lam te leh mizo history etc...

Moderator: writers

Brenda Chhakchhuak
Posts: 77
Joined: January 26th, 2022, 3:07 pm

KA HRINGNUN (Short story) BY BRENDA CHHAKCHHUAK

Unread post by Brenda Chhakchhuak » June 22nd, 2022, 10:17 pm

KA HRINGNUN
By Brenda Chhakchhuak




Kum 1993 June thla ani a, ruah a sûr duh ngei mai... Ka Nu damsam loh avangin Lo lamah pawh a riak lo a, ka Pi te ho chu an riak a; ruah a sûr duh êm vangin Inrinni pawh an lo haw lo ah kan ngai a, hun rapthlak tak an tawng tih rêng kan hre si lo.




Mitin in a kan nghahhlelh June Ni 29 lo her chhuak tur chuan kan chhungkaw tan chhiatna rapthlak tak alo her chhuahpui dawn tih rêng kan hre si lo.....



Ruahpui leh ṭek tla ri karah chuan hriat har tak si in ka tana hliahtu awmlo a thâwm ring ber mai chu lo ri in, luipui lian chuan fahrah te leh belh tur neilo te'n a an belh ṭhin Pi leLh Pu te chu kei ka tan chhui zui ngaihna awmlo in a her liampui ta mai si a!



Ni lo chhuak in mintin te chu hlim takin chung turni lo chhuak chu an lawm a... Mahse, ka han thlir ṭhin a, ka tan a hmuh tur rêngin a mawina a rawn chhuah ve si lo. Reilo te ah chhûm chhah tak chuan Ni chu rawn hliah in kawlkil chu a thim khup khup a, kâwl phe in ruah chu a sur zui nghal a...




Ruahpui sûr buan buan karah chuan zualko awrâwl chuan ka in nghahna awmchhun ka Pi chu lainatna nei reng reng lovin furtui lian chuan a hmangaih te uap tura a lo haw chu an Lei(Bridge) zawh lai nen lam chuan a hnawl ta si a!!!



Y.M.A information aṭang chuan mi 5 Lui-ah an tla tih awrâwl alo ri a, mangang takin chhûng leh khat te In(House) lam ka pan kual a, mahse tlamuanna rêng hmuh tur a awm si lo; mangang leh thlaphâng taka au ri leh ṭap ri chauh hriat tur a awm si a......



Nitinin Y.M.A information chu kan nghak ṭhap a, ruang an hmuh thu kan hriat apiangin ka Pi a tel ve em tih kan lo nghak ṭhin. Ni 6 lai a liam ta! Mihring lam aṭang chuan beisei tur a vâng khawp mai; mahse, thâwm mawi ber hriat hreawm tak si chu kan hre ta! Ka Pi kan tan a hlu em em mai chu a ruang an hmu tih thu kan han hre meuh chu awm ngaihna rêng kan hrelo....




A ruang a rawn thleng ta! Kuang mawi takah chuan an rawn khung a, vawikhat tal a hmel hmuh kan châk a sin. Mahse hmuh tlâk a awmlo tih chu a kuang hnuaia mihring taksa ṭawih lung lo vak neuh neuh chuan min va hrilh chiang si em....




Ka Pi kan thlahna pawh thla dâwn a liam ta. Keini chhûngkua pawh ka Pi boral ta nau ka Pu chhûng leh khat te hmangaih em em tu te hnên lamah kan riak a, mahse lungmuang taka kan mut laiin zan khat chu; zîng lam dar 2:00am vel ah kawngkhar chu kan hrelo ang tih hlau taka rawn sawi dawp dawp ri chuan kan mutui lai chu min kaitho in, kan In(House);Lalremtluang-i te In(House) a kâng tih an rawn sawi a nih chu!!!




Chu In(House) chu ka Nu te ho a kan lo chênna In(House) ngei kha ani si a. Naupang mai la ni mah ila an ṭawng chuan vanduaina khurah min hnûklut zel tih ka man tiam ve ṭan ta.... Ka Nu te unau ho rual chuan zîng khawvar rual chuan kan In(House) lamah ngei chuan kan chhuk ta a; a hmun kan thleng chu kan van hawihai tak em......




Ka zirlaibu kâng bâng ka hmuh chhun chu ka chhar khawm a, ka nui ber ber mai; mahse ka Nu leh ka Nutei te ṭap ri chuan ka nui lai chu an va ti tâwp chiang em..... Kan buh thar, kâng bâng tlawm ngâi te'n a an lo rih khawm lah chu a vûm thûr mai si a.




Nî a liam a, ka Pu te In (House) lamah bawk chuan kan haw leh ta. Nun bul kan ṭan ṭhat lehna tur ani tih rêng kan hre si lo. Hun a liam zel a, thla 3 lai a liam leh meuh chuan kan unau a a te ber mipa hmelṭha tak mai chuan he khawvel êng a rawn hmu ve ta....



Zîng ka tho chu ka Nu hmel hmuh tur reng a awm ta hauh lo mai!!! Mangang takin kan chhungkaw in châwm ve nan a Bazaar kâwn a ka thil zawrh pawh chu ka rilru rêng a lut in ka ngaihsak thei tawh mawlh lo. Mahse kan van hlim em.... Motor lo tlan chuan ka Nu leh ka Nau mipa hmelṭha em em mai chu a rawn phur haw ta!!! Nau pathum nei tawh mah ila he ka nau hi chu a hmelṭha in ka tan a hlu zual bik asin....





Kei kum 11 mi lek chuan hlim takin ka naute thar ngaihtuah reng chung chuan nitin nepnawi zuar in theih tâwp ka chhuah ve zel a. Kan Naute pian aṭanga zan hnihna ah chuan ka muhil chauh chu naute ṭap uar tak mai chuan min va kaitho chiang em..... Ka pawm a mahse bân zâi rêng a rêl si lo. Puan chhan a thisen lo val kalh ka hmuh chuan manganna hlirin ka khat a, mahse ka Pu(Ka Pi Nau) lo tho chuan "Naute lâi an hrenna hi a nghet lo anih hi" tih pah chuan a tuamna puan chu a phelh a, la hrual hmang chuan a ṭawn ta mawlh mawlh a. Naute pawh chuan mut zâi a rel ve thei ta. Mahse a va reilo tehlul em.....




Zîng lam dar 1 velah chuan theihpatawp in a ṭap leh ta a, engkim a ṭha bawk si.... Mangang taka kan awm laiin ka Nu hnute chu kan han sâwr a, a tui chhuak tur rêng a awm si lo. Mangang takin ka Pu tar ve tawh tak chuan "I nau hnute bûr lei tur in han zawng dawn em ni ang?" a tih chuan mangang takin ka chhang chiah kum 9 mi chu kai in kan awmna Vêng-a damdawi zuarte In lam chu ka pan pui dâwr dâwr a....





Damdawi dawr kan hmuh rual chuan inthlahrun theih pawh ani tawh lo. Theih tâwp in an kawngkhar chu ka sâwi a, an Nu ber chuan lo hawng in 'Eng nge in duh?' tih pawh min zawh hma chuan "Ka Pi naute hnute hnêkna bûr kan lei duh a" tih leh a bân a vawn chu ka rual nghal a... Ngun taka min en in "Mami, lungngai suh u. Kan nei alawm" tih pah chuan ka bân a min kâi in an dawr lam chu min pan pui a.






Naute hnute hnêkna bûr min pêk chu banin Rs.100 ka ken chu ka pe a, mahse dawr neitu neitu chuan "Mami....pawisa hi chu a ngailo ni mai rawh se. I naute hnute hnêk tur bawnghnute lei nan in hmang dawn nia" tiin Rs.100 chu min pe lêt leh a, Pathian hi alo van ṭha ngai em.....





Hmanhmawh takin In(House) lam chu kan pan a, In kan thlen chuan hnute bûr chu kan ṭhuah fai a, ka Pu bawnghnute chu thunin ka nau chu kan hnêk tir a, a hne dawk dawk chu ka thlir reng a, hmuh a nuamin ka lainat reuh ngei mai.... A puar ta aniang tui takin a muhil ta siai siai a.





Buai takin ni chu kan hmang liam ve zel a, ka thil zawrh pawh chu chhûnah chauh ni lovin zân nen ka ṭhu ṭhin a, chhûn lam hi ka buai zual in ka chhâng chhiah hian a khât tawkin "Ka U naute a ṭap lo kal rawh" a tih loh leh "Ka U chaw a ût ania" tiin min lo ko ṭhin a, hmanhmawh tâwk in ka tlân haw fo ṭhin.





A buaithlak na em em chu kan buhfai hi kan In(House) kâng a tlawm ngâi te'n a min lo ruhsak kha a ni a, a so ṭan chiah hi a kâng/ût rim a nam nghal zel a, naupang tan chuan a kâng emaw tih mai a awl ṭhin ani. Tun thleng in Mizo buh hi ka ngainat loh phah..... Buh kâng bâng tui loh zia mai chu a ei ve lo chuan in hria in ka ring lo.





Christmas pawh a lo hnai ve ta hle mai.... Chhûn zan zawmin ka dawr chu ka nghâk ṭhin a, zankhat chu vêngdang tlangvâl ho hi an lo kal a, ka cigarette zawrh chu min laksak in kan in chuh buai vel chu kan piah inchung aṭang chuan Y.M.A President chuan min lo hmu a, a thinrim chu lo kal in tlangvâl pakhat chu a bêng chawrh a, "Haw vek rawh u. Vawikhat mah rawn tibuai tawh suh u..... In tibuai leh anih chuan a pawi viau ang" tiin a hnawt haw vek hlawm a, vawikhat mah min tibuai leh tawh ngai lo.






Kan In(House) kan aṭang khan kan unau in Sikul kan châwl vek a, Pawl Nga ka zir ve mêk kha ania...a thiam thei pâwl ka ni ve a. Sikul ka bâng chu kan zirtirtute chuan min khawngaih in min lainat em em a, "Lo kal leh rawh, form leh zirlaibu kan tum sak vek ang che" ti mahse kal leh thei ka ni tawh si lo. Tunlai ṭhang thar hi an awhawm ka va ti tehlul em..... An Nu leh Pa ten kal tur a an nawr luih ngâwng ngâwng pawh a la kal duhlo te an nih laiin kal châk ngawih ngawih, kal thei si lo in kan awm kha ania.






Christmas hmang zo in Kum thar kan lo chuang kai a, ka naute pathum chu Sikul an lut ve a. Keipawh ka dawr chu nitin ka lo nghâk ve zel a..... Ka ṭhutpui ṭhin Nu pakhat hian min khawngaih em em a, chhûn Thingpui leh Chhang man min pêk sak ṭhin. Pathian hian min hmangaih in mite hmang hian nitin min kan a, kan chungah a thil tih theihna ava lan nasat tir tehlul em.....





Ka Pi te In(House) chu ka Putea rawngbawl a a chhuah daih avangin kan luah a, In(House)a lian si a, kan thâwl ngei mai..... Keipawh ka dawr(Dawhkan chaw sawn theih) chu ka nghâk ve zel a.




Kum 1994 December Ni 24 Zan ka haw tur chu Y.M.A President a hmaa ka thlavang hauh tu te khan an awmna a kal lawk tur a min tih vangin an dawrah chuan ka kal ta a.... Inthlahrung taka dawr chhûng ka va luh chuan ka naute dawhthlak tur Motor lem ṭha tak tak leh naute lem leh tea-set ṭha tak tak polythene khat in min hawn tir a, kan lei phâk loh hlir lenghal..... Ka lawm lutuk hi ka biangah lawmna mittui a luang zawih zawih a....





In(House) ka thleng chu ka naute chuan thlêng an lo dawh far mai a, an ta tur ṭeuh chu ka thlâk sak diat diat a..... Ka han enkual a, keimah ber chuan zîng ka nghak thleng zo ta lo. Ka naute ho chu ka kai tho a, an thlêng an han hmu chiah chu an hlim in an va lawm si em.... Zan lai lai ah chuan ka naute ho nen chuan motor chu kan han in bin tir ta tep tep a.... Kei leh ka Nu pawh kan hlim tak zet....





Christmas ni zîng chu hlim takin kan tho a, chaw ei kham chuan inkhawm turin kan kal ta diak a.... Christmas hlimawm tak ava ni chiang em......





Hun a liam zel a....keipawh ka dawr chu sawn in Hotel kawtah ka zuar thung ṭhin ani. Bus lo dinna hmun apiang ah kan in châwi kual ṭhin a, ka Nu chhâng chiah ka Nutei nen kan ṭhu dun ṭhin. Ka nau te ber pawh a changkang tawhin a châng chuan ka Nu in dawr min nghah chhâwk a, ka naute ka lo awm thung ta ṭhin ani.






Tûk khat chu Bus lo thlen laiin ka Nu leh ka Nutei lo ṭhu dun chu Bus Driver chuan ka Nu hnênah chuan "Ka Pi....i bul ami nen khan unau inni em?" tiin a zawt a, ka Nu chuan "Aw ni e" tiin ṭha takin alo chhâng ve mai bawk. Chutah Driver chuan "A ni rêng ang maw.....fêr fâwr che u chuan" ati ta zêk a, a inthiam lehlo chu Hotel chhûngah lut in rei a rial hma in alo chhuak leh a....




"Han ti mai ila(h)" inthiam lo zet chuan ati leh hnuhnawh a, ka Nu te unau hi an hâ a kuh ve deuh a, chuvang chu ani mahna..... Ka Nutei thinrim lutuk insum zo lo chuan "Mi piansualna i hmusit hi ka duhlo" tih pahin a dawr te ti ila Dawhkan chawi sawn theih ang chu châwi lawk in a kal ta nal nal a... Driver chuan ka Nu hnênah ngaihdam te a dil a, ka Nu zawk chu a thinrim lemlo bawk nen an nui dun ta mai mai a.....





Kan In(House) kâng ta hmun kha Rs.2000 lekin kan hralh a, chhûng leh khat te min puihna zârah leh mi hrang hrang min puihna nen ka Pi te In(House) thlangah kan chênna tur In(House) min sak sak ta ani.




Kan In(House) thar chu a nuam reuh khawp mai a, a chung dî niin a bang dâp, a chhuat pawh dâp tho ani a..... Kan bungraw neih ang ang mi min pêk khawm te nen chuan kan luah lut ve ta rawih a....





Ka naute ho pawh an changkang ve tawh hle a, ka chhang chiah mipa hi Sikul a kal peih thlawtlo a; achhan pawh a thiam theih hlawl loh vâng ani. In(House) ah awmin a naute pathum chu a lo awm ve ṭhin a, ka Nu chu in hlawh in keiin dawr ka nghâk ṭhin thung. Kan khawsak pawh a hma ngaihtuah chuan zia ve tawh tak ani.





Kum 14 lai ka ni ve tawh a, in hlawh ve hi ka châk ṭhin em em a. Nikhat chu ka Nu in buh sengah an thawhnapa hnênah chuan min lo dil sak in alo phal ve hlauh mai a; inhlawh tur chuan min hruai ve ta a. Ka Nu leh ka Nutei leh midang pali te nen chuan buh chu kan seng ho ta a.....





Midang chhûn rual a ka Dawrawn (Êm lian) a khah ve hmanloh hlauvin ka Nu leh ka Nutei chuan an in kârah min awm tir in an buh seng sa ṭhenkhat chu ka êm-ah an rawn vawm lut ṭhin a, midang rual chuan ka chhûng ve hman ta zel a.....




Kan thawhnapa in tlai a hlawh min han sem chu puitling hlawh zat lawih min pêk vangin ka hlim kher mai.... Mahse ka Nu leh ka Nutei chuan inhlawh ve min phal sak tawhloh avangin nitin dawr bawk chu ka nghâk leh ta ani.




Nikhat chu ka ngen luih tlat vangin ka chuan sawhthîng chawhna ah inhlawh ve turin min hruai leh a, a tak ṭha bawk nen chawh a nuam kher mai. Mahse a rih deuh vangin midang phurh zat chu ka phur ve thei meuhlo loh avangin hei bak chu Ram lamah ka inhlawh leh tawhlo. Mautuai awm hun lai chuan ka Nu leh ka Nutei pawhin inhlawh lovin nitin mautuai an khawrh ṭhin a, an lo haw hnuah zuar kual in mite'n an khawngaih bawk nen hralh lamah chuan harsatna em em an nei ngailo.




Khual zin an tlem deuh lai chuan keipawh ka Nu te bulah mautuai ka khawrh ve ṭhin a, zan lamah Night Bus dinna hotel kawtah ka dawr chu ka nghâk leh tho ṭhin. Nitin a kan chhuah ṭhin vangin ka naute In(House) nghâk pawh an che pui thei khawp mai. Ka Pi boral ta chenna kha ka Nutei tho ka nu chhâng chhâng leh hian a luah a, a huanah (a chhênna In(House) leh kan In(House) inkar) chuan balhla kung ṭha deuh mai hi a awm bawk a. Zîng tin ka Naute leh ka Nutei tho ka Nu chhâng chiah fate ho nen chuan balhla hung(Balhla mal ding ni lo a hlawm a awm sawina) lamah chuan an in zui diah diah ṭhin.





Nikhat chu ka Nutei Inpui(House) ami chu balhla bukhat a ler a thlâr khat tereuhte awm hi a rawn khâi lut a, ka Nu hnênah chuan "A U enteh i fa te hi" a tih chuan kan meng phâwk ngei mai!! Kawmchhak kan han en chu hnim kara kawng tereuhte hi balhla hung lam pan chuan alo bel hlarh mai a, tuk tin an inzui diah diah khan balhla tlu a a hmin awm apiang chu an lo ei ho ṭhin alo ni. Ka Nutei pawh chu a thinrim kan hlauh tehreng nen a nuih a za em em mai lehnghal a, balhla la awm chhun pawh chu "Ei zo law law rawh se" tih pahin a nui chhuak ta hawk hawk a...





Nikhat chu mautuai khawrh tur a kan chhuah dawn ṭep hian ka chhâng chiah mipa in kan te ber chu pua in chemkawm nen hmanhmawh takin a nau dangte nen chuan an chhuak hlawk hlawk a, an kal liam hnu chuan ngaih ṭha takin keini pawh chu kan chhuak ve nghal a.... Zanah chuan kan la hriat ngailoh tlangvâl hi lo lêng in ka Nu hnênah chuan "Ka Pi i fate ho hian kan thakthîng kung an khel hlum ṭhak ania" tih pah chuan a nui suk suk a, nitin in chemkawm nen an thakthîng zung chu an lo lai ṭhin hi alo ni. Ka Nu nen chuan kan zak em em a mahse, kan In(House) lêng chuan "A pawilo ania....hreawm ti duh suh u. Thinrim a lo kal ka ni lo va, ka nuih aza in an lawmawm ka ti reuh em a ka lo hrilh ve hrim hrim che u anih hi. Naupang aa an nia hauh pawh an ngailo" tiin min mangṭha hnu chuan a chhuak ta a. A haw hnu chuan ka Nu chuan ka Naute ho chu a hau ta hlawm a, mi thil khawih tawhlo tur leh pawi sawi zawng a awm tawhlo tur a a zilh hnuah mu turin room lam chu an pan ta sap sap a.




Kum tam alo vei leh meuh chuan keipawh nula hial ka lo ni ve ta a, kan chhungkaw khawsak pawhin zia lam panin tun hma ngaihtuah kha chuan lungngaih ni aiin hlim ni kan hmu tam ta zawk a, he ka HRINGNUN ZIN KAWNG aṭanga ka zir chhuah tâk chu Pathian hian amah theihnghilh ṭhak khawp a beidawng in kan awm a phal bîklo tih hi ani. I beidawn tâwp ah chauh Pathian bêl lo la, i hlim ni, lawm ni, ṭah leh lungngaih ni te ah pawh i Siamtu hre reng ang che.




A TAWP TA .......



Note: A sawi tu sawi ang chiah a ziah chhuah hi a har bâkah a rem teh chiam lo va, a chhiar dan tâwk min lo hriat sak mai dawn nia.... Ngaihnawm iti a ilo hlâwk pui ve ani emaw sawisel duh lai i nei anih emaw chuan comment lamah in lo sawi dawn nia.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)