)REVIEW
U Malawmi lam pan chuan ka kal ve nghal a,kawng ka cross dawn lai tak chuan horn hi arawn ri tuarh a,sir lam ah hian min pawt hrawk tu an awm rual in ka au that!
•Here with me•
Chapter 2🪐
Hlauthawng lutuk chuan ka hawi chhuak vat a,mipakhat kawr ban hi nghet lutuk in ka lo hmer ngawng ngawng chu ni in,mipui ho phun ri mur mur chu ka hre deuh vuai vuai mai. Ka hawi chhoh chuan min lo pawt tu ni awm tak chuan min lo melh run a.
A mitmeng ah chuan min puih kha a lawm hmel teh chiam loh.A mitmeng chu a hriam hrak a,mahse a hmel chuan a zir mah mah,thil ti sual ta ang mai hian min en run run a,enge ka hriat ka hre lo ka en ve ta reng a.
Eng dang ka sawi hma in min thlah thut a,chhuat ah chuan mawng sawh dawt in ka thu nghal,chupa ka han melh chhoh chuan en pawh min en tawh lem lo hian a kawr ban a beng fai thuak thuak a,a kal nghal hmak anih chu!
“Aw! Mami i na em?" Nutling pahnih hian min lo kai tho a “A...na lo e" ti ve zen mah ila ka mawng na chuan min tur deuh ut ut in ka hria,ka hawi phei chuan chu pa awm reng reng chu an lo awm tawh lo,ni tak..min thlah chawrh hnu khan a kal vang vang alawm!
“A thlah deuh thut che sia,i inring lo ve em anih kha" Pakhat chuan tiin ka lehkhabu chu min rawn pe a,nuih pawh ka nuih tha thei tawh lo,min effect lutuk deuh ani. Kan thlang atang hian U Malawmi alo au lang lang a.
“Puii tinge a??? Iva paw ve?" Arawn ti nghal chiam a,ka thinphu ala reh fel lo bawk nen ka chhang lawk thei lo. Kan thil lei ho chu a nghat a,min rawn beng fai mawlh mawlh. Kan chanchin chu midang chuan an lo hrilh nak nak a,U Malawmi chu a lungawi lo hle,mahse sawi erawh a sawi chhuak lem lo.
Kan bul lawk a dawr ah chuan min luh pui a,kekawr dum ka lo ha bawk nen ka paw deuh phuk mai,tui nen chuan min han ti fai nawk nawk a,reilo te ah chuan kan zo ve thei ta hram. A tir lam ah thil kan lo ei nual tawh vang in muangchang lo chuan kan haw ta nghal a.
Ke a haw tawh lo in taxi chu kan hmang a,kan thil lei sa alo tam ve neuh neuh bawk nen a hahdam thlak phian. Thil thleng chu min zawt a,tha tak chuan thil thleng chu ka hrilh ta mai a “Ava mawl awm ve a,chu tia alo thlah thut che!" Ati ve hlak hlak a.
Taxi chuan U Malawmi te in lam ah chuan min drop a,keipawh ka awm ve ta reng a. Thil min lei ho chu hnial ve viau mah ila a ti lui tlat sia,ka inkhai bawr deuh theuh a ngai ang. Pi Pawli(U Malawmi nu) chuan chaw ei ah min sawm a,mahse ka nu leh pa chauh an nih dawn vang in ka hnial ta hram a.
“Ka ti buai ropui che sia,ka va thlah ang che Puipui" U Malawmi chu a inbual zo deuh chiah aniang sam huh deuh hnuang hian kitchen ah alo lut a “A ngai hleinem,keimah pawn ka haw thei alawm! I zar ah thil thar ka ngah sia a inthlahrun awm" ka lo ti vat a,Nu Pawli lo nui chu ka en hau mai.
“Lalsarah-i han intih puitlin tawh zia hi chu aw!" Alo ti a,keipawh ka nui ve tawp. Story chhiar than hi chuan kan hriat loh lai hian kan thusawi hi alo ni deuh khap zel anih hi.
U Malawmi chuan min va thlah ta ngei a,ani pawh awm rei lo in a haw ve nghal vat. Ka room ah chuan inti fai tur in ka lut a,ka thawmhnaw hlip in bal bawm ah chuan ka vawm phei a,inbual tur in ka lut nghal vat.
Vawiin ami pa mai mai kha! Ka ngei leh hnu hnawh,ka thut apiang in ka ngei hi ani mai. Mahse a dam leh vat tur ah ngai ang. Ka chhungten engmah an hre lo a,an hriat pawh ka duh lo,an lungawi vak dawn lo tih hriat reng reng,ka nu phei chuan min zilh leh nasa dawn lutuk.
A ruk tak chuan ka nuih aza ve ang reng,ka awm dan tur ka mitthla a,ka nuih chhuah hak chu ka nu in min lo melh kiau a “I a deuh mawnle?" Arawn tih chuan ka nui leh sak a,inchung ber lam ah chuan ka chho nghal vat.
Electric veng lam thlir pah chuan tunlai tak a ka hla duh em em ‘Here with me -D4vd' sak chu earphone nen ka ngaithla a,engtik ah nge ka hringnung Hrangchhuana hi ka tawn ve ang le(Jerome Zothansanga ang han ni mai se ehhh).....
Ka nu in chaw ei tur a min lo koh chuan khua alo thim tep tawh a,inhnuai ah chuan chaw ei siam fel sa thlap hian alo awm a “I pa thian pa te chhung in chaw an lo ei dawn a,min rawn hrilh thut sia" ati a,thleng a tam ka ti reng ani.
“Khawnge tun ah?" ka tih chuan “An lo thleng tep,in lo va ti fel deuh la,chuan...reilo te thu chawl se zan riah kan kil dawn nia!" ati a,keipawh sitting room lam ah ka phei a,chanchin bu kan centre table a lo awm chu ka ti fel nghal vat.
Naupang in ti hnawk tu tur neih loh hi chuan kan in hi a hnawk vak ngai lo,ka nu te hian thenawm te naute chum zet mai hi an awm thin a,ka vawikhat pawm na ah ka kut a hik chuai thei!
Pawn lam ah motor ri kan hriat chuan ka nu a chhuak vat a,kei chu choka lam ah ka awm daih. Theih chu nise ka room lam ah pil bo daih ania ka duh,inleng hi keimah tak phei hi chuan ka welcome khat khawp,mi thenkhat phei chuan ka nu leh pa in fa an nei lo amaw an ti chawk ania!
“Bawihte,lo kal teh!" ka pa in arawn tih chuan ka thaw chhuak hak a,peih lo zet in ka phei ve hram. “Hei i Pa Henry-a te chhungkua an nih hi!" Arawn ti var a,a kut arawn phar chhuah vang in ka chibai nghal vat.
“I va hmel tha reuh ve" Nui chung a arawn tih chuan “Nia..." ka ti sap a ka nu chu lo chek hlak in “Ka lawm e ti ta che" arawn ti a,an nui deuh fur hlawm mai.
“Khawi in chibai ve ila,Nu Ruatpui min ti mai dawn nia,chuan hei hi ka fate an nih hi" atih chuan ka hawi phei a,mipa leh hmeichhe lo ding chu ka hmu ve chiah.
“Jeremy Zolawmsanga ania,chuan kha kha Baby Lalhmunmawii a nih kha!" arawn ti vat a,ka va chibai ve nghal vat,mipa lah chu ka hmuh hnu a ang em em lehnghal!
“Chaw kan ei dawn em ni?" Ka pa in atih chuan choka lam ah kan inzui phei nghal vat ,Nu Ruatpuii chuan tawngtai na a hmang a. Zanriah kil lai chuan kan nui leh dar dar thin hlawm a.
Jeremy nen chuan kan in melh fu thei hle,min hre ve in ka hria,keipawn ka hre tep! Chaw ei na vel chu Baby-i nen kan seng fel a,a tawngtlem ve hle in ka hria. Tawng tlem ta ve ve chu kan inbe tam lo khawp mai.
“I pass i in ring em?" Rawn ti sup tu ah chuan ka hawi chhuak a Jeremy chu ka bul ah alo ding ve reng. Chaw ei na vel ka tih fel zawh ah khan corridor lam ah ka phei daih a min lo zui ve anih dawn hi.
“Ring ve tho mahse..." Ka melh ha chuan nui suk in “Kan in classmate tih i hre lo ami?" arawn ti a,ka hre chhuak ta chiah! Kan house leader chu lo ni in!! A lar tehreng nen ka lo hrechhuak har lutuk chu ka inthiam lo leh hnuhnawh a.
“A pawi lo,nang chuan tumah i hriat hmel hleinem" arawn ti a,ka zak viau na chu zak anga lan ka tum lo bur mai ni. Kan inbe ve ta reng a,a tawng tam lo na chu zawhna min zawh a peih ve hle a,min zawh ho chu tha tak in ka chhang ve ta zel a.
Dar 8:00 vel ah chuan an haw a “In biak reng ka la duh dawn nia!" Motor chhung a a luh hma chuan arawn ti sup a,ka buk khum nghat chuan a nui suk a.
_________________________________________________
Zing dar 7:00 vel ah chuan ka harh a ka rin ai ka mu rei lo zek,ka thian te nen zan ah online games kan khel ve ngei a,ka la thi hnem em em zui. Min hau leh ngei dawn e!
Inhnuai lam ah chuan ka chhukthla a,ka nu in chaw alo chhum mek a,thawh a hai/hei anih hmel. Dar 5 hma hian a tho ngei ngei a,min kaitho ang tih ka thlauh thin vang in ka room kawngkhar pawh ka lock daih zel.
Dar 8:30 vel ah chuan chaw kan ei a. Keipawh chaw ei zawh chuan tih tur thul ang ang te ka ti a,ka mawza(Socks) ho ka su a,ka thawmhnaw bawm vel ka thlep fel bawk.
“Puii khu i thian nu alo kal ania?" ka inzar mawlh mawlh lai chuan ka nu in arawn ti a,bucket chu la in inhnuai lam ah ka chhukthla nghal vat. Dorkey-i lo thu awn duai ka hmuh chuan ka nuih suk a.
“Hmai tal phih ve ta che" arawn tih chuan ka melh rum der a “Ka insu lawm,enge?" ka tih chuan “Mimi-i te in a leng tur in ka rawn sawm che,han inthlak vat teh" atih chuan ka room lam ah kan inzui chho a.
“In leng dawn mi?" ka nu nen kan intawk a “Aw,kan rei lo ang" tiin ka room ah kan lut a,ka inthlak chhung chuan ka khum ah alo mu dar dar a. Scooty chuan kan inzui chhuak a,Mimi-i te in chu kan thleng a.
A cousin te an lo leng ve nak nak a,kei ni chu a room lam ah kan awm daih. A hnu reilo te ah arawn chho ve a,thil ho te te chu sawi in kan nui leh hak hak a. Nimin thil thleng ka sawi phei chuan khum atang an let thla tawp dawn amaw tih tur khawp in an nui.
Thil kan chhum a,thleng sil tu bawk ah ka tang leh ta,a cousin te nen chuan kan ti ti a,ti ti han ti ila kei erawh nghate rep ang kar ka ni.
Scooty bawk chuan Dorkey-i chuan min thlah a,kawng kual lai a ka mi hmuh avang chuan Dorkey-i dar ka beng deuh vak a.
“Ana!!!" hma lam atang chuan arawn ti vak a “Saw pa saw lawm min thlauh tu kha!" Tiin ka kawk a,a melh ve chiah chuan a break thut a,a helmet ah ka intauh chawrh.
“Ramdinsanga nih saw!!".
(A tir atang a a tawp thleng ilo chhiar avang in khamsamida
)(Chuan thu dang daih, video a mipa khi Ramdinsanga tluk ah ngai teh u,mahse khi tiang em em khian a nasa lo nia aw
)