KA CAR BO KHA

Ar eL' Khawlhring
Posts: 64
Joined: December 28th, 2016, 1:46 pm

KA CAR BO KHA

Unread post by Ar eL' Khawlhring » March 6th, 2018, 6:42 pm

KA CAR BO KHA
By: Ar EL Khawlhring

Ka Swift car var, la upa lutuk lo chu ka hru fai hlarh hlarh a. U Vungi zantin rim ringawt chu ka hne ve deuh tawh bawk nen, zanriah eikhamah khawpui fangin ka leng chhuak ve mai mai ang ka ti rilru a.

Dar 7 a rik chuan khawpui chhungah ka leu kual zek zek tawh. Nula phurh tur ka hre lo bawk nen ka rilru-ah veng tlafual lama hmeithai pehțeh chu a lo lang a. Khaw’nge ka han rui chum hmawk teh ang. Ka wallet ka han en a, cheng 100 chiah a lo awm a. Umn, pawi lo ve, a kalna tur ber motor ka nei tho alawm.

Ramhuai speed aia muang deuh si chuan ka tlan fua fua a. Mahse mak tak a ni, zan dangah duty an awm ngai si lo helai hmunah ber kher chuan, a hmun ka thlen teuh tawh nen nen. Traffic police-in min lo tiding ta hlauh mai le! Ka licence lah a fel bawk si lo. Ka car chu ka hûng rem a, hlauthawng rilru tak chung chuan ka chhuk a. Pawisa min chawitir teh chuan aw…a ho der a ni mai.

Ka hlauh ang ngei chuan min ‘Check’ ta. “License ka theihnghilh,” ka han tih chuan a ner nung a, a hmel lah chu a buh hle mai, a rui nge mawni zawk ni. Chutihlai chuan midang dang an rawn thleng ve ṭak ṭak a. Ani chuan a lo tiding zel a, license keng lo, nei lo an lo awm ve fur mai. Tichuan nei lo ho chu kan ding khawm ta ṭhap a. A nei erawh a tlan tlang tir a.

Midang an rawn thlen belh ve zel avang chuan chu traffic chu a buai ta deuh nge ni, buh zet hian, “Kal mai r’u, naktukah office-ah cheng 500 ṭheuh rawn dah ang che u, in hmel ka chhinchhiah vek a nia,” a ti a. Kan inmelh a, kan nui tet tet a. Traffic mak tak zawng a ni e, kan motor number pawh a chhinchhiah chuang lo reng reng.

Mahni motor-ah chuan kan lut sap sap a, kei pawh chu ka car kawngka inhawng sa-ah chuan ka lut a. Tichuan ka han ‘Start’ a, muangchang chuan ka tlan thla ve ta a. Mahse thil dik lo a awm ta tlat mai! A brake chu a chiangkuang lo tih ka hre ta. A mak hle mai, vawiin lamah ka check-tir vek a, a ṭha reng sia. A gear vel pawh chu a dik lo reng reng, a sak lutuk tlat, nichin lawk pawh khan a dik vek sia, mak ka ti kher mai. Chutah ka tiding ta ringawt a, kawngka hawngin ka chhuak zui ta a.

Chutah ka car chu a hma lam aṭanga ka han bêl chiang chu le… A va han mak ngai em! Swift car var chu a ni ve thlap, mahse ka car number chu a lo dang ta daih mai a nih chu! Mak ka ti lutuk chuan ka en tlawk tlawk a. Ngaih dan ka nei ta. Ka car ang chiah keng ve an awm tihna a ni chiah mai. Traffic mawl deuh khan min lo tih din lai khan car kawngka ka khar lo va. Ka car ang keng ve, kha lai hmuna lo ding ve tho inchei 'Smart' tak kha ka car zawkah lo lutin a lo khalh daih tih ka hre mai, chahbi pawh ka phawi lo a nih kha. A va han pawi tak em, pawi tak a ni.

Ka car ka ti ve ngawt tak nain ka pa-in sawrkar motor, an office motor a kawl a ni bawk si. Min va han hau nasa dawn tak em. Ama ‘Private car’ zawk kha lo keng ila chu a zia tak pawh a awm zawk tur a nia le….

Ka mangang chuan ka thlang lawka duty niawm tak mi pali ṭhu khawm, mei lum ai te chu ka pan thla a. Ka harsatna ka han hrilh chuan an nui sûng vek a. Ngaihsam em em hian, “I hmu ve leh mai ang,” min lo tihsak ringawt lehnghal, ka lawm lo khawp mai.

Chutihlai chuan kan piah lawk a nu thau pui lo ding chu lo phei nghalin, “Vala, kha’ng zurui ho kha râwn tlak an ni lo. Engmaw I harsatna tak chu?” a rawn ti phei lawng lawng a. Chutianga min lo ngaihsaktu ka hmuh chuan ka hahdam deuh sawt a.

Car awmna lam pan chuan chhovin ka harsatna tawh chu ka hrilh mawlh mawlh a. Chutah, “Khi pa ve ziah lah khi, mi ang lo a nih khi. Traffic thawmhnaw a ha a, mi tibuai tam lutuk mai. Miin an hre si lo va, tikhian a lo check a, a lo tiding fo alawm. Traffic ho hian form te hi an lo pe ve reng reng pawh hi a fuh lo. Midang harsatna a thlen hnem lutuk,” a ti tawn tawn a. A va han pawi tak, mi ang pha vak lo avangin car ka hloh ringawt mai chu a nia le.

Chu nu thau fel deuh nen a car awmna kan thlen dawn lai tak chuan ka tlai muhil chu ka harh zawk a, ka thaw huai huai mai. Ka va han lawm tak em. Ka car ka tibo lo hlauh, ka mumang mai a lo ni. Pathian hi chu a ṭha teh e.

Mahse le, a aia chiang lehzuala ka han harh leh zet chuan ka hlimna leh lawmna chu thinrimna-ah a inthlak ta thut mai le! A chhan chu hei hi a ni: Car awzawng ka lo nei hleinem le, ka pa paw’n a nei hek lo. Kan chhungkua hian car kan lo nei lo hrim hrim. Ka film en a mi kha ka lo mangphanin ka lo hmu zui tih ka hre ta. A va han thinrimthlak tak……. Lo tibo tak tak zâwk ila aw....

Chutihlai tak chuan kan ṭhenawmpa aw ngei mai chuan ka pa chu rawn auvin, “Rina pa, I chhuak hman tawh em? Khaw thim hma hian lui thleng thla ila,” a rawn ti ta. Ka pa leh kan ṭhenawm pa chuan an nitin eizawnna ‘Chengkawl khawrh’ hna an ṭan leh dawn ta tih ka hre mai. Huiha…,ka mumangah kha chuan ka pa kha a hausa asin le………….

************JAI HIND************
19122017
(Hemi ka ziah tûk tûkleh hian ka scooty a bo tak tak a. Kan webmaster Ngaia hovin bawngkawnah kan va zawng hmu hram haha)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)
Post Reply

Who is online

Users browsing this forum: No registered users and 1 guest