THE PATIENT-Bed no.2 BY Ar EL Khawlhring

Moderator: Ar eL' Khawlhring

Ngaia
Site Admin
Posts: 25813
Joined: April 30th, 2016, 4:07 pm

THE PATIENT-Bed no.2 BY Ar EL Khawlhring

Unread post by Ngaia » December 28th, 2016, 8:44 am

THE PATIENT-Bed no.2

“Doctor, Doctor.....duty in awm em?” .... Chhangtu reng an awm lo. Chu aw bawk chu a ngai ang chuan a rawn au leh lauh lauh a, chhangtu an awm loh avang chuan chu hmeichhe aw ri thangkhawk bak chu a reh tlawk tlawk mai. Mangang au rawl tih a chian em avang chuan ka inthiar zo chu hmanhmawh zetin corridor ah chuan ka tlan phei nghal a.
~
Nurse te duty na room ka thlen phei hma chuan chu nu aw vek chuan, “Ka pi, khawngaihin female medical bed no.2 ah lo phei lawk teh u hmanhmawhin,....ka pi, min va va ngaihsak lo ve,” thinrim hmel taka a tih ri ka hriat rual chuan ka va thleng phei a. Nurse pahnih hi an lo inbe siam siam a,chu nula mangang tak chu lo ngaihsak awm hmel reng an pu lo. An bul a chair ah chuan male nurse pakhat hi a lo muthlu lawp lawp bawk a,nia, a chau aniang, zan dar 11:30 a pel der tawh bawk nen. Mahse tinge chutia mangang rawn pantu an ngaihsak miah loh chu le!!! An hma ah chuan ka va ding dawt a, an sawi lai an chawl hmak a,min rawn en ha a. Kei chuan thinrim zetin, “Duty in ni lawm ni, in patient te ngaihsak ta che u,mangangin an rawn pan lawm lawm che u a,” ka va ti hrawk a. Mak tih hmel zet a min en chungin, “ Enge ni ta?” an rawn ti he haw a. Chhan pawh ka chhang tha peih love a, zawmthaw lutuk mai. “Chiang hrek hrawk in,” Female Medical khum no.2” ka ti bung nghut a. Nula, ward lam pan mek chu ka zui phei nghal a.
~
Chu veleh Nurse te chu an che sawk sawk a, male nurse rawn hmasa berin, ward ka luh ve hma chuan min tlan pel dawr dawr a. Nula chu a lut fel tawh a, nurse te chu lut ve zui nghalin luh ve chi a ni angem aw ti a ka in ngaihtuah lai chuan,” A mar ka hmu tawh hauh lo mai,” ti ri ka hre bawk a, midang thawm a lo awm nghal tak tak bawk. Chu veleh chuan ka lut zui ve nghal a. Mak ti hmel tak hian patling kum 60 bawr vel hian nurse te leh khum a mu a fanu ni awm tak chu a entawn chhen a. “Eng maw in sawi?” na tih hmel fe hian chu pa chuan a lo ti a. “Ka pu, pawi kan ti takzet a ni.”
~
“Pawi ti tur si in va hmanhmawh lo ve,” han tih tum a ka an zuau lai chuan khum ami chu ka han en chiang a, nichina nula mangang nurse te rawn au tu kha a ni chiah mai le. Mak tiin ka ding chawt a, ka hrawkah hnawhtu rawn awm ang mai hian ka tawng chhuak thei lo. Ka hmu zo chiah a, duty te ka va koh pui a, a lut leh chiah kha a ni si a. Ka hmu chiang si, ka buai mup mai, kawngka chu ka su hawng rawk a, ka chhuak ta daih a.
~
Kei hi eng ka ti zo leh ta nge!! Hmanah kha chuan ka hmu thei ngei alawm. A reh fel tawh a maw ka lo tia, zanin ka thianpa damlo male medical lam a ka riahpui zan tak a hetiang bawk ka tawn leh tak..... “ A chhungte phone rawh u,” an tih lawng lawng thawm chu ka hre riai ruai a,kei erawh ka ngaihtuahna ah chuan ka lo cheng leh veng veng tawh thung.
~
Hman kumah tawh Rv kawng a car leh bike insu ah khan bike a chuang zawk kawngthlang lam a tla, a thla in a chhuahsan tur ka hmu a, a thla chuan a taksa chu a thlir vawng vawng a, a mangan hmel em em bawk a, chutah ka lam a rawn hawi thut a, min rawn melh kur a, ka tim uai thei, tichuan lungngaih hmel takin lei lam a melh a, inherin thlang lam panin a kal hnu hnu a,a thamral ta daih kha ania. Chumi tum phei chuan mak ka ti takzet a, a hnu thleng pawn ka chiangkuan loh phah lek lek kha a ni si a. Durtlang road accident na ah ka hmu tawh bawk a. A reh zuiin ka hmu tawh dawn lo aniang ka tih hnu ah tunah hian ka hmu leh ta chu anih hmel viau si a. Chutah ka inngaihtuah harh a, kha nula hmeltha tak mangang hmel tak mai te, a pa lungngai lutuk mai hmel ka hmuh avangte khan chu hlauhna keimah a awm te chu vawm bo ang duak lo niin ka theih phawt chuan tanpui duhna chuan ka khat ta a.
~
Kawngkhar chu hawng dek dekin ka han lut chu inthlahrung leh inthiamloh hmel fe hian nurse te chuan min lo en a, khawdang ka hawisan daih a. Nula in mangang taka a va koh lawm lawm khan an lo hmu thei hauh lo a ni tih ka hrethiam mai, a thla mai chauh kha a ni si a. Damlo awmpuitu dangte chuan an chhungte lo phone sakin a pa erawh a fanu banah vuanin a mittui a lo sur zung zung a.
~
Chumi kara ka mit la tu tak zawk chu an sir a mangang taka lo tei ve sek zawk chu a ni,chu nula-i thla ngei mai chu.... A pa chu han khawih a tum a, a khawih fuh thei bawk si lo. A bia a, a hre thei si lova, midang lo awm ve an han au a, tuman an chhang thei si lo. Chutah a taksa khum a mu chu a han chul leh vel ruai thin, a rawn ding chhuak leh a, a hawi ruai ruai a, keiin khawngaih hmel takin ka lo en reng lai chuan hriathchhuah thut nei ni awm tak hian ka lam rawn hawiin kan mit a intawk ta sak mai le........ Hmanhmawh zetin min rawn pan a, ka kutah a rawn vuan chawt a. “Nang chuan min hmu thei tiraw?” a rawn ti ta a. kei chuan ka lu ka lo bu nghauh a,” Nichina nurse min koh sak kha ka hrechhuak thut a,” a ti a,amah ka hmuh theih avanga lawm tih hriat zet hian min nuih ver ver a. Mi an awm nual si, ka tawng chhuah chuan miin mak min ti dawn si a, chuvang chuan tawng rih lo tura signal in ka kut chuan ka hmui chu ka han chuktuah zauh a.
~
Ka thianpa Rsa, damlo ka riahpui chu a chhungten min rawn chhawk theih tak avangin vuina hunserh an hman lai chuan ka va thleng hman hram a. Sir kilkhat a nula lungngai hmel tak chuan min lo hmuh veleh min lo pan nghalin a hlim hmel leh deuh hretin ka hria a. Ka bulah chuan lo dingin,”I lo kal dawn ta lo anih hi ka lo ti hman asin,” a lo ti a. Thlanmual lamah vui liam,phum turin an kalpui ta. Nula chu a hawi vak vak a, a hnung lam a kal kan ni bawk a, tawng pawh ka insum duh tawh lo. “Tunge i zawn?” ka han tih chuan,”Derrick-a, chumi chanchin chu ania hrilh che ka tum,ka hmangaih ber a ni. Kei hi Marami ka ni e,” a han tih chhunzawm a.
~
Ruang an phum dawn lai chuan Marami nu chu a tap nasa ngei mai, Marami chuan pan nghalin a nu chu khawngaih hmel zetin a kuah a, a samah te chuan a chul sak a, a nu erawh zawngin engmah a hre lo. A pa erawh mipa tih takah mi hmuh lai chuan a insum thei hle. Mi an haw zo ta maw tih ah chuan muangchangin kan kal ve tan ta hnak hnak a. Tichuan a chanchin chu heti hian min hrilh ta a......
~
“He thu hi Derricka hnenah min thlen sak hram la, min lo ngaidam anih chuan thlamuang takin ka chawl thei tawh ang. Min ngaidam thei lo anih chuan hahchawlh reng nei lovin ka vakvai reng dawn si a..... Derricka nen hian kan inhmangaih khawp mai a, mahse zirlai ve ve kan la nih avangin kan inzui langsar lem lo, kan inngaizawng tih min hriatpuitu pawh kan thiante tlemte chauh an ni. Anni mi chunga leng an ni a, duh apiang nei thei an tih ang chi hi an ni. Amah a hmeltha, lehkha a thiamtheiin a fel si a, fapa duat a lo ni bawk nen, a luck nasa mai si, kei tehlul min han duh ve te kha mak ka tiin a tir phei chuan ka awih lo hial thin a. Mahse Kum 2 zet inthen lova kan han awm leh leh ngaihzawng dang nei awm ang miah lova a han awm takah chuan ka ring tawk ta khawp mai, ka hmangaih em em a ni. College te kan han chhuah hnu ah, hna te kan han nei ve anga tiin duhthu kan sam thin. Chumi hnu a inneih te kan sawi hman a ni.Amah zawk tak erawh chuan inneih mai te a duh a, sawrkar hna thawh a tum loh hrim hrim thu leh a pa sumdawnna enkawl zui a tum thu a sawi thin a, chuvang chuan kan subject lak pawh inang lovin ani chuan B.Com a zir daih thung a. Mahse ka hnial a, zahpuiawm lo tawk tal nih ka duh vang a ni. Ka hmel erawh mite chuan a tha tiin an sawi ve thin ( a nui sak a).
.
Tumkhat chu class ban hian min rawn sawm kawi lo chu mak ka ti hle a, ka phone a, min chhang thei silo. Keimahin bus pawh chuang ta chuang lo chuan ke in ka haw hnak hnak a, Chanmari atanga bus chuan mai tuma ka intintuah lai tak chuan kan college a inla starring deuh mai,min er zet maitu Heleni, Derricka rawn ngaizawngtu deuh mai nen chuan an rawn inphur ka hmu ta tlat mai. Mak ka ti em em mai a, mi hmuh loh lai te chuan bus chhungah ka mittui a tla leh thin. In ka thlen hnu chuan ka bawk thlawp a, ka mittui a dir zung zung a, inphatsanna maw! ka lo rin ve hman tehreng nen. Zan lam thleng pawh a min lo la phone loh cheu avangin chanchin va zawh vel chu ka tum buai duh ta bik lova, diktak chuan a phone ah harsatna a lo nei anih pawhin a lo leng thei alawm.
.
Ka thiannu Mahmingi ka call a, kan chanchin ka hrilh a, mak a ti hle mai. A lo ngaihven zui tur thu min hrilh nghal a. A tukah kan inhmu lova, min rawn la be hek lo. Zah pawh dawn lovin ka han call a, a in switch off hmak mai bawk si. A hma ni a Heleni nen an rawn inphurh khan min hmu lo der mai mai ni a ka hriat bawk avang chuan ka rilru ka siam a, ka phone ka switch off ve hmak bawk a. Mahmingi khan chhunah a hmuh zuai thu leh hmanhmawh taka tlan anih avanga a auh hman loh thu min hrilh a, zanah a lo leng chuang lova, rilru na takin ka mu ta a.
.
Ngawi teh, a tawi zawngin kan sawi ange. A tuk lawkah chuan thudik chu ka hre ta thova, thil hriatsual palh a awm thu Mahmingi chu a lo hrilh a. Khami ni khan canteen ah a phone a lo theihnghilh a, a bo zui tak dan te, tin Heleni kha a patea parawl a khawsa a boral avanga thlah thut anih thu leh in lam thlenga buaipui zui a ngaih avanga rei ta anih thu te, tin a tukah ama nu damdawi inah hruai a ngai thut si a, a pa a lo chhuak hman tawh nen, buaipuia a kal thu te, chhunah amah hmu tur leh phone bo ngaihven pah a college a a lokal zawk thu te, class lak laklawh lai anih avanga damdawiin lam a pan lehnghal thu te, zanah a chhungte phone hmanga rawn biak a tum nasat thu leh switch off a intih tlat avanga a rawn phone theih loh thu te thlengin chanchin ka hre ta a,ka thawl huai huai mai. Mahse ni 2 zet na taka min siam avangin reilote hrem ve rih chu ka duh ta a, ka be duh ta miah lova,a awih pawh ka ring chuang lo nachungin Mahmingi hnenah chuan ngaihzawng ka neih tawh thu lo hrilh turin ka ti vel ta a, ka nuih chu a za ru ngang mai. Mahse ka rin ai daihin a lo la na ta si.
.
Chutih chhoh mek lai chuan thil pawi tak ka chungah a lo thleng ta. Ka kal na thin a lo chhuak leh ta tlat mai. Inentir a kan han kal chu, ‘Kal’ thlak ngai ka nih thu doctorin min lo hrilh a, ka tliak hnawp a ni ber e. Engpawh nise Derricka chu hrilh rih loh phawt tha in ka hria a, Mahmingi hnen atanga ka hriat zui dan chuan Derricka chu a nu a damloh avangin a pa in a lo awmpui anga, sumdawnna thil vel buaipuiin Shillong lamah a lo zuk kal lawk dawn a ni awm e. Chutia a zin chhuak tih ka hriat chuan ka ngai leh hnuhnawh hle mai,ka lo damlo nen ka khua a har vawng vawng mai ani. Chuta karah zan lamah chuan ka khua rawn sik ser ser reng a, ka tlun zui vak a, chuta chin chu engmah ka hre zui ta lo a ni. Zana ka han harh chhuak leh chu damdawi inah ka lo awm reng a, Doctorin zawitea ka pa a be thawm chu ka hria a, min lo en zo chiah a ni awm e,khawsikpui thluak a lut ka nih thu chu a lo hrilh a. Vanduai tak ka ni, harhchhuak tur ka awm lo zui a ni ta der mai a. I hriat tak ang khan nurse ho koh tuma ka thla chhuak kha ka hriat leh hmasak ber a ni ta, a bak chu engkim i hriat kha.... Min tihsak la ka duh ber chu Derricka hnenah engkim chiang takin hrilh la, a awih lo anih chuan tihdan tur dang ka hrilh leh dawn che nia, min tiam rawh aw khawngaihin,” a ti ta a.
...................................................................................................................
~
Derricka te in ka va thleng chu Marami sawi ang ngeiin an lo hausa nangiang mai a, an gate chu tleirawl pakhat hian min lo hawnsak a, Derricka a awm leh awm loh thu ka han zawh chuan, “ An rawn zan tlan a, a chau deuh aniang, mahse hei chhun a ni tawh thova, a harh tawh ang, ka han enchhin ange aw,” “Thil pawimawh tawpkhawk a ni tih i lo hrilh dawn nia.”
Tleirawl chu rawn chhukthla lehin, “Han lut rawh le,” a rawn ti a.
~
Sitting roomah chuan tlangval hmeltha tak leh tlawntlai tha zet hian min lo nghak a. “Leng thu rawh, eng nge i duh tehmial le?” a lo ti a. Ka han enchian chuan zan lamah leh vawiin lamah pawh a muhil miah lo ang a, tiin Derricka mitmeng bui leh sen ram mai ka hmuh atang chuan ngaihdan ka lo siam ve ngawt a. Marami thla chuan min uap reng bawk a. Pehhel kual duah lem lo chuan, “ Marami khan thu min chah a,” ka han ti chiah chu a thu ngil zawt mai. Chutah thinrimna in a mitmeng chu rawn luahlanin a ding nghal at mai a. “Nangmah hi em ni Marami bialpa thar chu?” min han ti kha kha ta mai a, a inhum sek kher mai. “ Ni lah love thianpa, thu teh, a hmelhriat chauh alawm ka nih, a hma phei chuan kan inhre ngai lo hrim hrim,” ka han ti leh a. Muangchanga thut pah chuan, “ sawi ta che,” a ti ram hmak a.
~
A bul te atang chuan engkim chu zep awm miah lovin ka han sawi ta a. Ka sawi lai chuan a mitmeng chu a inthlak thut thut a. A chang chuan lungngai hmel te, a changin ringhlel hmel fe in min en a, a changin hlim hmel a pu a, a chang chuan na vawng vawng hmel a pu bawk a. Lungleng khawhar hmel em emin a rawn inthlak leh bawk a. Ka han sawi zawh chuan ngaihtuah muk tih hriat fahran hian a ngawi vang vang a. Chutah inngaihtuah buai tih hriat tak hian ka lam a rawn hawi a, “ Awih lo ta ila, i phuahchawp lo ni ta se,” a han tih chiah chuan ka sa deuh phat a, “ I awih lovang maw,” ring leng lawng hian ka han ti a. Anmahni avanga ka buai tehlul nen min chhan dan chuan ka lung a tiawi vak bik tlat lo. Mahse Marami rauthla chu ka bulah lo awm nghal vatin tihdan tur min han hrilh zung zung a. Derricka chuan, “ Enge i en veng veng a?” min lo ti hmanhmawh a.
~
Ka ding chhuak a, “ Derrick, Marami nen a zungbun inang, a ruka inhual nan a in inbuntir kha ni tlemte chhung lekin i bun ta nange, ani chuan a hmangaih em che avangin thlan khur thuk-a a zal thlengin a la bun asin. I coat chhung lam ipte-a i dah kha va phawrhchhuak rawh le,” ka han ti meuh chuan a meng phar awn awn mai. Chutah engdang sawi leh tawh lovin a room lam pan chuan a kal hnu hnu a. A zungbun rawn lekchhuah chu a nalh kher mai, rangkachak fir (pure gold) a ni ang tih hi a rin theih nghal a. Ka han enchian sak chuan zunbun hmai lamah chuan D&M (Derrick&Marami) tih hi tereuhte hian a lo inchhu kalh a.
~
“Derrick, Marami chu i be chak em?” ka han tih chuan thinrim hmel lek lek hian, “Be chak pawh ni ila pialralah bak ka be thei tawh nang,” a han ti chuai raih a. Kei chuan, “ Ka bulah hian a awm reng asin,” ka han tih meuh chuan a rawn hawi phawk kher mai. “Ding chhuak rawh le,” ka han tih chuan amah si chet chuan Marami pawh chu a lo ding chhuak ve nghal a, “Maimitchhing rawh le,”ka han tih chuan thu awih takin a maimitchhing ta a. “ A hmel tak chu i hmu thei dawn ta rih lo a ni,” ka han tih chuan a bu nghauh a. Chu veleh Marami chuan a pawm chawt a, a darah a chul hliau hliau chungin a awmah a bei ta thlap a, chutah chuan Derricka pawh chuan kuah ve nghalin a sam te chu a chul sak ve hliau hliau a. Midangin lo hmu ve se chu boruak kuah ang lek a ni anga,a nuihzatthlak duh fu ta ve ang. Mahse Derricka pawh chuan a tak angin,a thinlung chhung ni siin a kawm (feel) thei a ni tih ka hre ta a, ka lawm hle mai. Nakinah chuan Derricka chuan, “Maram,ka hmangaih, ka rawn haw hun thleng tal chu min lo nghak ta che le,ka ngai che asin,” tih pah chuan tlangval a pumpa meuh a mittui a far zung zung a.
~
An han inthlah chuan Marami chuan ka lam lo hawi pah chuan, “Ka kal a hun ta, thlamuang takin ka chawl thei tawh ang,” tih pah chuan lawmthu min rawn hrilh sep sep a. Chutah a tham ral ta riai riai a. Boruak han inthlak danglam ta chu Derricka pawh chuan hrethiamin min rawn pan a, “Thianpa, i chungah lawmthu sawi sen loh ka ba a ni,” a han ti a,a mitmengah chuan a lawmin a hlim takzet a ni tih chu ziak ni lo mah se hmuh hmaih rual a ni lo.
Keipawh chu hlawhtling inti tak chung leh chumi te pahnih inkar a hriat zui leh chhuifiah zawh tawh loh tur hmangaihna kuhmum tir a, pialral thlenga vawn tirtu hmanrua atana ka awm thei chu nuam ka tiin hlim leh lawm takin ka haw ta a.
(Min chhiar sak avangin ka lawm e- Ar EL Khawlhring)
******************* A TAWP TA************************



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 27th, 2018, 8:46 pm

1

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)