LAWMNA MITTUI BY Ar EL Khawlhring

Moderator: Ar eL' Khawlhring

Ngaia
Site Admin
Posts: 25813
Joined: April 30th, 2016, 4:07 pm

LAWMNA MITTUI BY Ar EL Khawlhring

Unread post by Ngaia » December 28th, 2016, 8:50 am

[attachment=0]lawmna mittui.jpg[/attachment]


"Kha lo man r'u, ka pawisa bag min ruksak a nia," tiin nu pakhat hi mangang takin a au lawm lawm a. A bula mi te pawh chuan, "Kha, mi sual kha lo man ru, rukru a nih kha," tiin an au chel chul bawk a, mahse chu rukrupa chu chu bazar chep leh tawt zetah chuan mi karah inzepin a put phei zung zung a. A piah deuhah phei chuan mi pangngai kalin, rukru ni awm lo takin a inzep phei ve hmiah hmiah a.
.
Lo man tura au tute tan lah han um zui ngaihna thlawt awm lo khawpa chêp a ni bawk si. A ruksaknu lah a mangang, a bul vela mi te lah an thinrim kher mai, han tih vak ngaihna lah an hre bik der si lo. Chutih lai chuan chu rukrupa chu mipui karah a pil bo ta a.
~
***********
Pi Sangi chu a dawr lian zet chhungah chuan a buai ve kher mai. An dawr a lunin a lian tham a, krismas dawn kher lovah pawh dawr lun leh hlawk pawl tak an ni. Thawktu chu a chhawr ţhahnem ve viau, designer leh puan ţhuitu te nen lam, mahse manager tur rintlak a hmuh loh avangin amahin a nghak ve ta mai a ni.
.
Chutiang dawr lian leh changtlunga manager nih chu thil chakawm tak a ni a. Pi Sangi chuan a lo rin ve em em, pawisa pawh mi dang leta tam zet a hlawhtir a manager chuan pawisa a lo chheprelh nasa tih a hriat chhuah a, chiang taka a man chhuah avangin thla kal ta mai khan a ban ta a ni a. A kut a engkim a han awm meuh chuan buaithlak a ti hle mai, mahse a duh ang mi thawhpui tur erawh a hmu zo si lo.
~
*************
Ramtea chuan a awh ţhin em em leather Jacket man tur chu a tuak ngah khat tain cheng 7000 lai a khawl tling ve ta der mai. Jacket quality tha ve deuh, to uchuak si lo, mahse thil lei nazen harsa a nih si avanga chhe lutuk ni si lo chu kumtir aţangin a inhlawhna aţanga tlem tlem khawlin a lo tuak ve ţang ţang a ni.
.
Sipai-ah te inziak tling ve mahse a nu a damsam theih miau loh avangin chu hna chu ui tak chungin, a nu phal lo chung chung a hnawl ta a. Hmeithai nufa an ni a, inhlawhfa chawpin a nu a chawm a, harsa takin hringnun an chhiar ve mek a ni.
.
Inthlahrunawm ti hle mahse thawmhnaw ţha dang nei tawh chuang hek lo le, a nu damdawi tur leh inchhung khur mamawh an in lei ngah deuh tawh bawk a, a pawisa khawl tlemte atang chuan sawm a pakhat Pathian ram atana pek tur chu a han dah hrang leh te te a, tichuan jacket lei tum chuan bazar lam panin a chhuak ve ta rawih a.
~
************
Pi Sangi chuan an dawra leather jacket lo en mektu tlangval pakhat chu va chhawnin," Tlangval, cheng 6000 man anih kha, hei 5000 man a nia, helaia mi hi 8500 man," tiin a lo hrilh zung zung a, mahse ani ang mi rethei tan chuan a to hlawm deuh lua chu a ni.
"A tlawm deuh hi ka lei mai dawn em ni aw," tiin a inngaihtuah vang vang a.
~
**************
Chutih lai chuan Pi Siami chu lungchhe taka inhnit faih faih chung chuan a kal zel a. A pawisa bag a chân tak avang chuan lungngai rilru buai zet chuan a pan lam pawh hre mang lovin a kal mawp mawp a. Aizawl a kal dawn laia an hlim ve zia te, a pasal nena an tar lam fate pahnihin thil an chah nasatzia te a han ngaihtuah a, a lungchhiat a zual telh telh mai.
.
A pasal chu mi in an sakna lamah inchung aţangin a tla palh a, a kawng achin hnuai lam zawng a zeng ta a. Mipa zawkin hna a thawh theih miau loh avangin Pi Siami chuan leipui chhete siam vein leh mite khawngaihna azarah an nung khawchhuak ve hram hram chauh a. Tunah pawh fate rual awt lutuk tur ngaingam lovin, an neih zawng zawng keng chhuakin, an pa damdawi lei pah tur nen, cheng 5000 zawng kengin Aizawl a rawn pan ve tawp mai a ni.
.
A han ngaihtuah nasat phei chuan Pathian chungah pawh a vui lek lek a, chutah a rilru na lutuk chu a awmna hmun reng a hrechang tawh lo, a ţhu hnawk a, awrawl chhuah meuh chuan insum hman lovin a tap ta hawm hawm mai a ni.
~
************
Kawngkhar bul maia thawmhnaw lo en kual mek Ramtea chu dawr kawtah chuan a tlan chhuak nghal a. Chu nu tar lampang tawh, a hmel en mai pawh a pawisawi lo tih hriat hliah hliah, khawngaih thla la hliah hliah pi Siami darah chuan a va dawm chawt chawt a. "Ka pi, eng nge harsatna i neih le?" tiin a han zawt a. Pi Siami chuan, "Tlangval, ka tihpalh a ni, ka insum hman lo a ni, min kalsan rawh," a han tih pawh chuan Ramtea chuan a kalsan duh der lo. A han zawh tak chhenah chuan rilru lo tawt tawh bawk nen, pi Siami chuan zak tak leh inthlahrung tak chung chuan a chanchin leh tawh sual a tawh dan zawng zawng Ramtea chu a hrilh ta vek a.
.
Ramtea'n a khawngaih lutuk chu a mittui a hnâm ve sawk mai. Inngaihtuahna hman vak pawh awm lovin a kekawr iptea a wallet chu la chhuakin pawisa chu a han chhiar sawk sawk a, chutah inngaihtuah chhuak lehin a hawna tura a tih cheng 100 pawh chu dah let lehin, a vaiin pi Siami kutah chuan a hmehbel ta chawt chawt a. Pi Siami chu ţang teh mahse, "Ka pi, kei aiin in mamawh zawk," tiin a hnar kir leh hma chuan a tho lawk a, an in lam pan chuan Ramtea chu a kir ta vang vang a. Pi Siami chuan han au zui lawm lawm mah se Ramtea chu a hawi let tawh lo. Chuti a nih takah chuan pi Siami chuan mak ti em em chungin lawmna mittui nen Pathian hnenah ţanpuitu angel a rawn tirh avangin lawmna mittui luang chungin lawmthu a sawi ta mawlh mawlh ringawt mai a ni. Chutia a kal liam tur chu an inbe lai leh pawisa a pe lai lo hmu a lo hretu pi Sangi chuan mittui parawl ţeuha lo thlir chungin a rilru a khawih kher mai.
.
Ramtea chuan jacket thar hawn ta lo mah se rilru hlim veng veng chungin a haw ta a, a pian a hnu lama a hlim ber ţum niin a la hre hial a ni.
.
In a thleng a, kawngka a han hawn dawn lai tak chuan a tîm hlek a, a nu ngaih dân tur te a han dàwn a. Mahse a nu pawh a lo lawm ve tho a ring leh ta zawk a.
.
A fapa hlim hmel sarh maia a lo haw chu Ramtea nu chuan chanchin lo zawt vatin khaw'nge a thil lei chu tiin a lo ngaihven a. Ramtea chuan a thil tawn zawng zawng chu hlim takin a nu chu a hrilh ta vek a. Chutah a thusawi tihtawp nan,"Ka nu, pawisa ka pek dawn lai tak khan van lam ka han hawi chu ka pain hlim hmel em em mai hian min lo thlir reng asin," a han ti a.
.
Ramtea nu chu a hnuk a ulh ţeuh mai. A fapa chu chhuan hmel takin a han en a, "Bawiha, keini aia la nei lo zawk i ţanpui a, Isua chu a lawm ngawt ang, tin, mal a la sawm ngei ngei ang che," ţah aw ţiau hian a han ti a.
~
************
Zan a lo thleng a, mu tura an insiam lai tak chuan Ramtea chuan phone call a dawng ta tlat mai. A phone upa tawh tak chu a han lek kang a. Vawiina a kalna dawr atang khan a lo ni a, thil a theihnghilh thu an lo hrilh a. Ni e, kha thil thleng avanga a hmanhmawh luatah a pheikhawk siamtir tur, polythene bag-a a dah kha a lo tlansan daih a ni tih a hre chhuak hnuhnawh leh a.
~
~
"Lo ţhu lawk rawh aw, saw lamah kan dah ţha a," tia nula hmeltha tak mai a kal phei lai chuan nimin lama a awh em em leather jacket lam chu Ramtea chuan a han thlir phei a, mahse a lo awm ta hauh lo, a ui kher mai. Han lei thei se chu tunah pawh hian kha ngei kha hain he dawrah hian nalh takin a kal thei tur a nia le... A mamawh takzet alawm, mahse, a thiltih avang khan inchhirna pakhat mah a nei lo.
.
Chutia thawmhnaw zawrh lam thlir chunga rilru a lo kawm mawlh mawlh lai chuan hnung lam atang chuan pi Sangi aw ngei mai chuan, "Kha le tlangval, i thil theihnghilh chu le," a rawn ti ta a. Ramtea chu a han hawi lêt chuan bag lian nalh zet khaiin pi Sangi chuan a lam a rawn pan mek a. Chutah pi Sangi chuan a han pek dawn chuan Ramtea chuan, "Ka pi, kha chu a ni tlat lo, in hre sual aniang, polythene a nia ka khaina chu," a han tih chuan pi Sangi chuan, "Nia, i khaina ip kha a chhia a, kan nauten an lo thlak a nih kha, a ni ngei em han en chhin teh," tih pah chuan a han pe a. Chutih lai chuan dawr a thawk dangho zawng zawng chu a bulah an lo chhuak khawm ţak ţak a. Bag chu a han hawn chuan a meng phawk chiang kher mai le. A pheikhawk hlui tawh tak bula leather jacket a awh tak mai lo inthlep than mai a han hmuh chuan sawi tur reng a hre lo.
.
Zawhna hlir mitmeng pu chung chuan dawr neitu pi Sangi chu a han melh a, chutah pi Sangi chuan mittui tla deuh par chung chuan, "Krismas present anih kha, i rinawmna leh mi chan chhe zawkte i khawngaih avangin Pathianin a rul let ve ta che anih kha."
A han hawi phei a, chutah, "Naute u, hei hi in thawhpui, in manager thar tur Ramtea a nih hi, lo lawm r'u le," a han tih takah chuan hlim hmel takin kut an lo beng dar dar a. Ramtea chu a hrilh a hai zawkin a hawihai kher mai. Chutah pi Sangi chuan, "Ramte, hetah hian lo thawk ve ta che, nang ang mi fel hi hnathawkte enkawltu atan kan mamawh che a ni," a han ti ta a.
~
**********
Thil awm dan chu hetiang hi a ni. Ramtea'n nu khawngaihthlak tak a sum neih zawng zawnga a ţanpui ta khan pi Sangi rilru a hneh kher mai. Eng dang mah sawi tawh lova a kal tak daih avang khan pi Sangi chuan a naute zinga pakhat chu bike-a um zuitirin a enthlak tir nghal a. Ramtea kha pawisa nei tawh lo, a neih zawng zawng kha nu khawngaihthlak tak hnena pe zo vek a ni bawk a, ke in a kal hnak hnak a.
.
Rei vak lo hnu chuan pi Sangi nau tirh chuan Ramtea chu a va hmu leh ta mai reng a. Chutah chhui zui zelin, Aizawl veng hmawr lamah chuan an inchhui lut ta a. An in thleng a chhuiin an ţhenawmte hnenah an chhungkaw chanchin chipchiar, hna a mamawh ve ngawih ngawih chungchang leh a phone number chenin a hre ta a. Tichuan dawra a thil theihnghilh hmangin an ko let leh ta a lo ni.
~
~
Ramtea chu a hlim kher mai. Amah aia nei lo zawk a lo ţanpui avangte, a rinawmna avang leh Pathian hnena ui hauh lova a neih ang ang a lo pek ve thin avanga malsawmna a dawn let ve a ni tih chu amah aia hre chiangtu an awm lo, a biangah lawmna mittui a lo luang thla a, a rilruin Pathian hnenah lawmthu a sawi mawlh mawlh mai a ni. A tuk aţangin dawra thawk nghal tur chuan hlim takin an inthlah liam ta a.
~
~
Chutih lai mek chuan bazar atang chuan police station lam panin mi pakhat hi an rawn chhawm chho hnak hnak a, kutkawl an rawn buntir ran bawk. Ţhenkhat chuan kutthlak an chak hmel hlawm kher mai. Mi pakhat hian,"Niminah pawh nu pakhat bag a ru tawh, an man har ngawt zawk alawm," a rawn ti chho bai bai a.
Lal Isua tel bawk si lo, thawk chhuak peih bawk si lo, awhna sual hmanga mi dangte neih sa dik lo taka laksaka krismas hman nawm lo tum lutuk mai chuan, a tum loh lam, jail rûn thimah krismas a hmang zawk dawn ta a ni.
~
************
Ramtea chu a thiltih tlawmtê avangin Pathianin he leiah pawh mal a sawm let a, chu mai a la ni lo, vanah chenin ro a khawl khawm a lo ni reng si a.
~
~
***** Pe rawh u, tichuan pekin in awm ang,
pekah Pathian i hneh ban thei ngai lo vang****
~
*****A TAWP TA*****
.
I CHHIAR AVANGIN KA LAWM E
Attachments
lawmna mittui.jpg
lawmna mittui.jpg (34.75 KiB) Viewed 15854 times



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)