A TLAI TAWH SI BY Ar EL Khawlhring

Moderator: Ar eL' Khawlhring

Ngaia
Site Admin
Posts: 25813
Joined: April 30th, 2016, 4:07 pm

A TLAI TAWH SI BY Ar EL Khawlhring

Unread post by Ngaia » December 28th, 2016, 9:56 am

(Based on a True Story)



Min chhiar sak avangin ka lawm e...
(Ziah ngaihnawm belh vak dan ka thiam lova, mahse amah hi a ngaihnawm sa hrim hrim a ni ti mai ang. A sei in chhiar tha peih si lova,a tawi thei angin ka rawn ziak e. Hmun,hun,hming etc. tih danglam a ni a,tin siamrem nual a ni bawk.A tawngtu te phalna ka la lem lova,rilru,thinlung a khawih em avangin ka rawn post tawp mai a. He hmangaihna chanchin zet hi zawng,thangthar lehzual thlenga an hnuk tiulh tu a la ni fo dawn a ni).

*.
Hun leh kum tam a her liam ta. Chu zan thla eng nuam zet chuan Tlanglian khua chu a chhun eng ruih a. Naupang pawnto an ri chel chul a, tlangval lungleng zual te chuan zan thla eng lawmin di ngaih lunglen zai an lo sa vawng vawng bawk a.
Chutih mek lai chuan mi pahnih inthlahlel ngawih ngawihte chuan a tuk mai a thenna kawl lo eng tur chu an huphurh lawk em em thung a ni. Zualtei chu an khaw nula hmeltha leh nungchang tha a sawi hat khawp a ni a. A ngaihzawng Thansanga lah mi fak hlawh leh pawisawilo,lehkhathiam thei zet mai a ni bawk. Kum 4 lai inzui tawhin inneih chungchang pawh an sawi ri ve zauh zauh tawh thin. Chutih rual erawh chuan nakin lam a rual awt lo leh nuamsa zawk a an la awm beiseina avangin Thansanga chuan Delhi lamah Msc chu zir zawh law law a,chumi zawh a inneih chu an thutlukna a ni ta a. An hmalam hun tawn tur reng erawh an hre silo.
.*

Tlanglian khua hi Aizawl atanga ni 1 kal vel a ni a. Motor kawng a la tlang that miau loh avangin motor kawngpui atang hia penginn ke a kal a ngai a,Km 10 vel zet kal a la ngai a ni. Thansanga pawh bungrua tlem azawng nen zing hma takah a chhuak ta. Zualtei chuan mittui nen a vai liam lap lap a.
.*
Zualtei chu a lungleng thei em em mai a, Thansanga nen an feh dunna hmun leh kawng te,engkim mai chu a lunglen mittui titla tu an chang zel mai si. Kum hial a lo vei ta, Thansanga pawh lungleng teh mahse an hma hun tur thlir chungin ngawrh leh tumruh takin a zir tauh tauh a. Semester exam ah pawh a ti tha pawl a ni ziah reng a ni.
.*
Hetih mek lai hian nula hmeltha ta nafam chu Zualtei chuan heltu pawh a nei nual reng a, mahse rinawm a lo tiam tlat tawhna Thansanga ah chauh lo chuan a rilru a pe thei lo. Mahse an khaw mi neinung fapa Lalmuana chuan a rim ngawrh hle mai a,neih ngei pawh a tumruh hle a ni. Lalmuana pawh hi misual zawng a ni hauh lo, a chhungte pawn an be chhelo hle tih pawh a hai lo, mahse Zualtei chuan mi pakhat tan chauh a lo intiam tawh si a.
.*
(Kaitawi puat puat ang aw)
Lenna tlang dang ah mah kawlvalenchham kar danah meuh zawng chanchin inhriat tawn a khat hle mai. Lehkha an inthawn zauh thin chu chanchin an inhriat tawn theih dan awmchhun a ni mai a. Tlanglian khua angah phei chuan telephone la lut pha ve hek lo le. Inngai ngawih ngawih chungin mahni tuanna mualah ve ve lunglen an tuar dun tlawk tlawk mai a ni.
.*
Chutia Zualtei mal leh khawhar taka a hun leh ni a hman mek lai chuan rin loh deuhin palai hmel an hmu ta thut mai le. Lalmuanan palai a rawn tir chu niin. Zualtei chu a hrilhhaiin a hawihai nasa ngei mai. Zualtei nu leh pa te chuan chhungkua an lo inrawn khawm ve phawt tur thu te hrilhin tawngkam tha takin palaite chu an thlah a. A nu leh pa te chuan Zualtei chu kovin a ngaihdante an zawt a, anni chuan tha an tih thu leh mifel tak an nih thu te, a nawmsakna tur a nih thu te an fah pah luam bawk a. Zualtei chuan pasal neih a la inpeih loh thu leh hmangaih a neih tawh thu te chu sawi ve sateh mahse Thansanga,a chin pawh hriat mang loh lo nghah ringawt chu ni thei in an hre bawk silo. Zualtei rilru chu a buai map map kher mai le.
.*
Chumi zan la la chuan Thansanga lehkha tur a ziak ta nghal a. “Duhtak,Lalmuana ten palai an rawn tir a, tihngaihna ka hre lo,a rang thei ang berin lo haw vat rawh,” tiin. Hun a kal leh hret a, Lalmuana palai te bawk chu an rawn lang leh ta. Chutah chuan inneih hun leh nite chu an ruat fel ta der mai le. Thansanga lah a la reh vang vang mai si, Zualtei pawh a beidawng tan titih der tawh mai a ni.
.*
Thansangan lehkhathawn a han hmuh meuh chuan hun a lo kal fe tawh mai. Zualtein a rawn thawn hun leh nite a han chhiar chian chuan thla 1 chuang tehmeuh dakah a rawn kal(thang) a ni tih a hre ta a. A bing mup mup a, va han tlai teuh tak em. Chutah hmanhmawh zetin rel ticket chu a han la nghal a, waiting list ah a la awm zui a.(kan sawi belh lawk- Rual u zawk te chuan in hre viau ang chu,Dak in(Post office) a lehkhathawn thlak a kal muan theih zia kha….keipawh ka tlangval tantirh khan khual khua ami ngaihzawng ka nei ve ngei alawm,…karleh lehpekah ka lo zin dawn tih kha ka va thawn ve ngei a,ka va zin ta ngei a, an khua ka thlen tukah ka lehkhathawn chu a dawng ve chiah, ka lehkhathawn ka thlen khalh vel ahahaha)
.*
Zualtei pasal neih ni tur chu a inher chhuak dawn ta der mai le. Beiseina mei chu a mit tan ta, a tuk mai a innei tur chu khumah a la hui pap pap mai a. A nu leh pa te pawh chuan tisual palh deuhin an inhria a ni ngei ang,an khawngaih leh hnuhnawh ngei mai. Mahse thu sut leh chu tihchi a ni mawlh tawh si lo.
.*
Inneih dar a ri val val a,mitin mai chuan Biak in lam an pan sung sung a. Monu chu nalh hle mahse lungngaihna nasa tak a tuar a ni tih chu a thlirtu tan chuan hai theih rual a nilo. Inneih thutiam an chham lai te chuan Zualtei chu a mittui a parawl kiang mai a, hlim hmel put luih zawng a thei mawlh lo a ni.
.*
Chutih lai chuan Thansanga pawh an khaw peng a rawn thleng ve chiah a. Kawng chhia nen,motor chiang lo nen a tum hun aia tlaiah a rawn thleng ta tlat mai. Chau tak leh hah hnep chunga an khua a han luh meuh chuan khua pawh a lo thim fel der tawh a. An inchhung a han lut fel chiah chu a nu,Zualtei nena an inhmangaihzia hrechiangtu chuan rawn pan nghalin a rawn tah khum nghal hawm hawm a, thil awmzia inzawh buai a ngai lo, a chiang sa vekin, inhnem tur bik pawh an awm chuang lo a ni.
.*
Thansanga rilru na lutuk chu a bag a nghat lawk a, room ah lut tlang nghalin a guitar chul deuh rap tawh chu va la chhuakin chaw pawh ei lovin an kawmchhak tlangah mittui nen a zai tlaivar zak mai a ni. Zualtei lah Thansanga zai ri hria in mut zai rel thei bik hek suh le, leikapuiah a thu tlaivar ve thak a, a indawm kun tlawk tlawk a, a tap zankhua ve thak mai bawk. A pasal thar Lalmuana pawh chuan hrethiam takin a en liam tawp mai a, chu lawithat zan chu nupa tuak thar te tan chuan zan duhawm tak chu a nilo chiang ngei mai. Zualtei chuan thawh lawka a hmangaih Thansanga han pan daih mai chu duh rum rum mahse Pathian hma ah thu an lo tiam tawh a, sut leh tur zawngin A TLAI TAWH SI.
.*
(Min dem lul suh aw ....
Khiangawia nuthai ka chan ni khan e,
Nang ngaiin ka lo tap a,
A tlai tawh si).........
.*
Thansanga hmel pawr fap mai leh dawldang,cher ta em em mai bawk si chu a nu chuan a lainat ngei mai. Biak lahin chhanna chang a hre bawk silo, a rilru a buai tan a ni tih chu a hrechiang ta kher mai le. A nu mangang lutuk chuan zah pawh dawn lovin Lalmuana leh a nu leh pa te a va pun ta ringawt a, anni mi tha nangiang chuan Zualtei chu nula anga va inlan tir a, Thansanga va kawm hlim turin an tir ta ngawt mai thin a ni. Chutianga an han tih takah chuan Thansanga pawh a harh chhuak ve hret hret zel a, a tawpah phei chuan a rawn tha chhuak ve ta nge nge a ni.
.*
Thansanga chuan an khua a awm reng chu tahkhua a seiin a hrehawm mai mai dawn tih hria in phai lamah a zirna chhunzawm turin a liam leh ta nge nge a.
.*
Nikhua a lo rei a, Thansanga chuan sawrkar hnuaiah officer dinhmun meuh a lo chelh ta in Aizawl lamah an awm ta vang mai. Chutihlai chuan Zualtei pawh chhangchhenu lo ni tawhin a pasal Lalmuanan a boralsan tak avangin a fate nen Aizawl lamah eizawngin an inbengbel ve ta bawk a. Aizawl bazarah seat te nei ve in thlai hnah,chawhmeh zuarin nitin a chhuak ve thin. Nikhat chu rinloh leh tumloh deuh main an han inhmu phut mai chu sawi tur an haihchham dun nasa mai a,chutah chiah chuan an inhmangaihna a lo la dai reng reng lo tih chu anmahni an inhrechiang dun hle mai. Chuta chinah chuan Thansanga chu Zualtei te in luahah chuan a kal ta zauh zauh reng a. Amah Zualtein a duh phawt chuan nupui atan pawh a a la duh reng thu leh a hmangaih reng thu a hrilh chamchi reng bawk a. Mahse Zualtei chuan a hmangaih em avang zawkin ani nuthlawi/hmeithai mai mai nei tur chuan a phal thlawt lova, a hnar fithla ta a ni.
.*
Chutia beisei tur awm lova Zualtein a siam takah chuan Thansanga chu nupui neih hun tawh tak a lo ni bawk nen, a thawhpui nula ngaihnobei tak Maremi nen chuan an innei ve ta a.
.*
Nikhat chu a nupui Maremi hruaiin bazar chawhmeh zawrhna hmunah chuan an inzui phei dat dat a. Zualtei chawhmeh zawrhna hma chiahah chuan an ding chat a. Thansanga chuan a nupui Maremi hnenah chuan,”Hei hi Zualtei,khawvela ka hmangaih ber,ka neih theih loh anih hi, a chawhmeh neih ang ang hi leisak rawh le,” a ti ta a. Zualtei chu nuih sang pahin a rawn hawi chhuak a,chutah Maremi hnenah chuan,” Khawvela ka mipa hmangaih ber hlim taka I lo enkawl avangin ka van lawm tak em,” tih pah a inchibaiin an kut an inhmer vang vang a……………………………

……………………….A TAWP TA……………………………..

'Ka nu, lungtlu lova khiangawih chu,
Tuahpui leh vau an vul lentu hnuaiah
Di kan tawng,kan tah a tul leh thin...........' 2.10.2016



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)