CHHANNA A AWM LO By: ArEl Khawlhring

Moderator: Ar eL' Khawlhring

Ngaia
Site Admin
Posts: 25813
Joined: April 30th, 2016, 4:07 pm

CHHANNA A AWM LO By: ArEl Khawlhring

Unread post by Ngaia » May 14th, 2016, 8:56 pm

CHHANNA A AWM LO By: ArEl Khawlhring


4:30AM


Fela chuan a motor steering chu uluk taka veng chung chuan mutchhuak inti harh lui hram hramin,chu chhumin a bawh chuai mai kawngah chuan khawthlang lam atangin Aizawl lam panin a tlan mek zel a. Zan a tlan an nih avangin a mut a chhuak tawh hle. A bulah chuan a thianpa Jerry-a lah a khulh hnem deuh avangin a hnar nasa mai si. Seat belt chu hreng engang ve mahse a thil in chu ring tizawi damdawi ni awm ang mai hian a kawngkhar glass chu a va tauh leh chawrh thin a. Rawn meng ve uau mahse a ngaite bawkin a va tauh leh chawrh thin.



Fela chuan Jerry-a nena an tunhma nun te a ngaihtuah chhuak a,an sual dunin an rui nasa dun thin khawp mai. Mahse amah erawh Pathian chhandamna changin chhanchhuah a ni a. Jerry-a erawh sualah la tang mahse an inkawm an la thulh thei tak tak chuang lo. Fela chuan Jerry-a hi a veiin a thiam ang tawkin Pathian thu a hrilh ve thin a, Jerry-a erawh a nui mai a,"Thianpa, ka la sim ve mai ang" a ti a,sim tum tak takna erawh a nei lem lova, Fela rilru a na thei hle a ni. Sihhmui an lut chho a, Fela chuan Jerry-a chu va nghawk pahin aizawl an hnaih tawh thu leh intiharh ve tawh turin a ti a. Jerry-a chuan rum tuah tuah chungin,"umn,kan la thleng em hleinem" tih pahin a muhil zui leh mai a. Phunchawng an thleng chhova, RV an lut leh a ,.



A la hma vei nen mi an lo awm laih laih tawh a,an lo hawi phawk hru hlawm lehnghal a,thilthalo hmu ang maiin. Tichuan zing dar 4:30 a ri ta. Chutah Nu pakhat rui aw deuh hian vin takin,"Lalhriatpui,inti kris nu,khawnge tun ang hunah i chhuah bo,zu zuar tawh lovang te in ti vel a,ka tihpui duh love te min ti vel a,ka hnawt chhuak mai tur che ania,i zak lawm ni, khawnge i awm,i hur bo ami? tiin a lo au tawn tawn a,mahse .....chhanna a awm lo.




AIzawl 4:30 AM

Pu Mawia chu a zunchhuak chuan ti harhin an bathroom urinal chu a pan chhat chhat a. Amah hi Kohhran lamah Pavalai Chairman niin,mi fel,mi ngainat,mi zau tak mai ani, Tual upa thlan leh hunah pawh a tlin an ring fur a. Tin,sawrkar lamah nihna dinhmun sang tak a luah bawk a,mi zah kai si,chapo hauh silo a ni a,chutih rual erawh chuan Pathian nen inzawmna tak tak an nei hauh lo tih chu amah pawn a in hrechiang em em a ni.

Inthiarna hmun a thlen phei hma chuan a ding chat a,a fanu Mahriati room la eng leh choka light la eng a hmuh chuan mak a ti hle a. Kawngka pawh a lo la in kalh lovin Mahriati khum pawh tumah an mu lo tih hriat takin a lo la inkhuh tha pangngai thlap bawk a. Mahriati hi nula hmeltha leh Pathian tih zet mai a ni. Mahse a hrechhuak leh thut,a hma zana an committee,an ban har deuh chuan a thiannu Lyni te inah a riak dawn tih a sawi kha a hre chhuak thut,a thawveng deuh huai mai.

Zing dar 4:30 a ri ta. Bathroom atanga a chhuak chiah,roomah a lut leh dawn chiah tih ah chuan thawm danglam tak a hre ta. Chu chu rimawi mawi em em mai, chutiang anga mawi pawh a la hriat ngailoh chu a ni. Zawi angreng tak si,mahse fiah fai em em mai si hian a lo ri chhuak a... Mahse rapthlak tih rukna riau a neiin a thauvah a man a,a hmulthi a ding sung sung thei hial a. Chutah ngaihthatlohna a nei leh thut mai,a fanu Mahriati lakah a ni,enge a chhan pawh a hrethiam lo. A phone atang chuan a fanu Mahriati number chu a dial ta ngawt a.


Car chuan kawng thlanglam thirban chu a su bur mai a, Jerry-a chuan a kawngkhar a khar nghet lo nge,a tla chhuak nawlh a,kawng thlangah thui vak lo a lum a,ram hrui leh hnim vel a man fuh hlauh a,a rui pawh a harh chiang ta kher mai. Harsa em em lovin a in pawt chhuak chhova,car pawh kawngthlangah a liam thla teuh ther ther kher mai. Tichuan Fela a hrechhuak thut a,a han au a,chhanna a awm lo. Car chhung a han en a,Fela thutna bul glass pawh a la in 'up' thlap a,a kawngkhar pawh a chhung lamah a in lock thlap bawk a,tlak chhuahna tur a awm ve lo. A bul vel a han zawng ruai a,hmuh tur a awm chuang lo. A han au vak vak a,chhanna reng a awm chuang lo. Chutihlai chuan ri mawi lutuk hi chung lamah a lo ri a,.mahse Jerry-a tan chuan rapthlak lamah a kal tlat.


Mahriati phone chu a ring ral thak a, Pu Mawia chu ngaihthat lohna hlirin a khat tawh. A han dial nawn leh chuan thophang hmel tak hian 'hello' a rawn ti a. Pu Mawia chuan thawk huai pah hian,"Bawihi,i va mutui awm ve,ka....' a tih lai tak chuan,"ka pa Mawi,Lyni zawk ka nia,hei a thawh lai pawh ka hrelo,a inthiar aniang,phone hi ka va pe ange,rawn ti tha leh mai rawh aw,' tih pahin choka lam a pan phei a. "Mahriat.....," CHHANNA A AWM LO. " Mahriat Mahriat," a reh vung vung mai. A phone a rawn rik leh veleh chuan,"ka pa Mawi,Mahriati a awm lo,kawngkhar leh tukverh pawh chhung lamah a in kalh vek sia," mangan hmel takin a lo ti ta a.



Aizawl mai a lo nilo,Mizoram district tinah mibo report a lo tamin, zan lam tlan chi motor accident thawm nen a luah khat ta a. Zing dar nga vel atanga thawm a rik luih luih tawh avang leh information mic atanga thupuan a rik dum dum tawh avangin dar 6 vel pawh a la tho chhuak lo chu mi mut duh tak an nih loh pawhin bengchheng ngaithei tak an ni ngei ang. Chhungtin deuh thaw atangin bo an awm tih an in hriat belh zel a, chhungkua-a bo miah lo an awm laiin chhungkua-a bo diak pawh an awm nual mai bawk. Tin,chu mai a la nilo, BBC leh CNN lamin thlang sappui buai dan an rawn report in bo an tam dan leh ruang leh motor accident tam zia an rawn puangin an rawn tilang reng bawk a. Mizoram lama buaina chu nepte a la ni zawkin a lang.



Police station lamah chuan phone a ri nasa kher mai. Mi pawimawh tak tak leh mi naran deuhte,Kohhran Hruaitu Upa leh pastor thenkhatte thlengin station bul velah chuan report tumin an an insulpelin an zi nuaih nuaih mai a,a tu ate hmelah pawh chuan manganna,mak tihna, lungngaihna hmuh tur a awm vek mai,Upa leh Pastorte hmelah pawh a lang chhuak ve tho mai.



Pu Mawia chu sawrkar lama mi challang tak a nih ve avang leh Police Inspector Pu James-a chu a thianpa ber a lo nih ve bawk avangin phone call tlang thei lo mahse mipui chu a rawn tawn tlang bawrh bawrh a. Inspector Pu James-a room pan ding nghalin kawngkhar ring taka kik vak vak pahin "Thianpa, Pu James" tiin a ko tuar tuar a. CHHANNA A AWM LO. Chutah kawngka chu chhunglam atanga rawn inhawng riai riaiin constable pakhat hi hmel thlaphang tih hriat tak hian a lo lang a. "khawnge in pu?" Police Constable chuan meng dul raih chung hian,"ka pu, Inspector Pu James-a pawh kan hmu zo ta lo" zawi sap hian a lo ti a.



Pu Mawia chu mumang lam atanga thangharh thut ang mai hian a harh thut a. A hmel chu hrehawm tih lehzualna hmelin a lo khat ta. A mittui a khap per sawk a, "MI THIANGHLIM LAWR chu a lo thleng ta maw" a ti chuai ta raih a.


Luka 17:34- KA HRILH A CHE U, CHUMI ZANAH CHUAN KHUM PAKHATAH MI PAHNIH AN AWM ANG A, PAKHAT CHU KAL BOPUIIN A AWM ANG A, PAKHAT CHU HNUTCHHIAHIN A AWM ANG.

12.8.2014



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)