ABNORMAL LOVE BY Ar eL' Khawlhring

Moderator: Ar eL' Khawlhring

Ngaia
Site Admin
Posts: 25813
Joined: April 30th, 2016, 4:07 pm

Re: ABNORMAL LOVE BY Ar eL' Khawlhring

Unread post by Ngaia » February 19th, 2017, 12:11 pm

Thlân ka thleng chu le, ka beisei miah loh thil hmuh ka nei ta tlat mai. Thlan chungah chuan lo ţhu thim deuh mûk mai ka hmu ta, khai aw, thlahrang tih vel hi ka hlau ngai lo asin le, a taka han tawn tak meuh erawh chuan....tlai lama ka lo kâi ve sek pawh chu ka harh kâwkin ka hria.
Ehe, a che deuh tlat. Ka light chuan ka'n ên hnai dawn a, a che leh hrut sia, ka tawlh dawrh a, ka ên hnai ţha ngam lo. Chutah mihring pangngai ang tihna riau ka neih tak avangin pan hnaih leh pah chuan, "Tunge?" vîn fahran mai hian ka han ti ta a. Chutah le chu thlahrang ngei mai chu rawn thawh hluai pahin a rawn nui chhuak ta mai. Ka phu chiang lutuk chu hnung lamah ka ţhu nuaih a, ka'n hmuchiang chu Wendy lo ni lekin. Ka va han ngei mai mai tak.
.
Ka va phei ve chuan za em em hian a lo la nui awr awr a, ka thinrim tihngaihna hre silo chuan, "Haw rawh," ka'n tingawt pek a. Ani lah chuan, "I thu lo," min lo ti, a nuihza a la reh thei lo, a la nui kiah kiah mai. Ka tihngaihna hre tawh silo chu a bulah ka ţhu ve a, ka nuihzâ a rawn chhuak ve ta le, kan nui dun ta ţiah ţiah mai anih kha.
.
Nuihza reh fel hnu chuan, "Engtin nge thlân hi i hriat a, i chhungte pawn an phal reng reng ami?" ka'n tih chuan, "I hre mai ang ka tih rêng kha, tak takin Siamtei nen kan kal tawh alawm, kan tifai a ka rawn awm lai khan," a ti ta. "Anih i chhungte chu?" ka'n tih leh chuan, "Kan group committee zan ania, lo len i tum si lova, hetah ka rawn committee ta mai," a ti sam êt a.
"Enge i lo tih ve dawn?"
"E, ka rawn tuarpui ve dawn che..."
Ka va duh lo mai mai tak. Hetiang te chuan engtin nge ka awm ang le...
.
Zu chu ka va phawrh rawk rawk a, ka thlit dawn chuan, "Ehe, Mama, zu in te i tum elo, Tinge a?" a ti ta ha ha mai le. "Hei vang hian alawm ka hruai ve duhloh che," ka han ti ringawt a, ka tlâk nghal pap a, ani a lo ner nâng nâng a.
"A van ţha lo ve hetiang chu," a tih lai chuan ka lo intulh leh mawlh mawlh tawh. Ngawi rengin min lo en a, ka inthlit zel bawk a. Ka inhnem ta, ka rui ta viau mai.
.
"Mesti paw'n hmu che sela hetiang chu a duh hauh lovang," a han ti, Mesti a sawichhuah takah chuan ka lungchhe ta thut mai le, ka mittui a tla ta. Nula bulah lehnghal ka inthiam chiah silo chu, "Kal rawh," Wendy chu ka'n ti leh ngawt pek a, ani chuan, "In tawh suh Mama," a tih chuan ka rui lungpuam tawh bawk nen, "Min sawisel tur si tinge i lokal, ka lakah eng thuneihna nge i neih, ka nupui a ni a, ka sûn dawn," ka ti a. Um pakhat ami chu ka inzo ta, um chanve a la awm, a va nuam pang pang ve.
.
Wendy chu a ngui lâp a, ka ţawng kha a na deuh tih pawh ka hria, pawilo, ka ţawng laklawh tawh, ka sût thei tawh chuang lo.
.
Ûm pakhat zawk ka han ban leh chiah chu, "A ţullo," tih pahin min laksak a, a tlanpui ta. A paih dawn emaw ka tihlai chuan a chhîn a hawng a, a in ve ta kiah kiah mai le. "Wendy, a ţullo," ka'n tih ngial pawh chuan, "Nangpawn ka thu i awih bik lo," tih pahin a intulh leh ta, a va zialo tak.
"Duhtawk rawh," ka'n tih leh chuan uak pap pap pahin zu ûm chu min han pe lêt a, tlem chu a in hman, mahse zu in ngai lo hmeichhia lehnghal chu a rui khawp ang le. A pawi ka ti hle mai Wendy lehzelin a in ve chu, mahse famkimlohna khawvel a ni miau alawm le....
Chutah a inbâng chu ka han in ve leh a, inngheng rialin Mesti thlan chungah chuan kan ţhu ta a.
"Mesti chanchin kha i nauvin min hrilh ţhin a, a pawi ngawt mai. Khatiang kha tawk lo la chu hlim takin in awmdun tur ania," tih pah chuan a mittui a hru zauh a, kan zu in avang chuan kan lungpuam dun ta tih ka hre mai.
.
Chutah Mesti ka ngaihtuah, a thih niah takngial pawh ka awm lo te chu hrehawm ka ti thar, ka mumanga, "Mipa nge i duh hmeichhia?" tia a dul min zûttir hauh hauh lai te chu ka han ngaihtuah chhuah meuh chuan ka ţap baw ta hawk mai anih kha... Wendy lahin ka samah duattea chûl pahin min lo ţahpui ve bawk. Chutah Mesti tana ka tihtheih hnuhnung ber pawh a ni thei tih hria in lungchhe lutukin ka'n ţap ham ham mai anih kha.. A va nuam ham ham tak....
~
Kan haw lai pawh ka hre tawh lo, ka khumah chuan ka lo mu ve thlap tho. Wendy message a lo awm nual a, zingah ka chhiar ve chiah.
.
Tunah chuan tihtur pakhat ka la nei e, phuba chu.
Exercise lak chu ka chhunzawm ngat ngat a, zingah ka tlan a, chhunah ka dawr lamah kalin tlai lamah ka tlan leh a, punching bag, kudam lama lo chu riap tawh mai chu ka chûl mam leh a, ka hnek ngat ngat bawk ţhin. Ka chhungte ngaih te pawh a ţhat loh hmel viauvin ka hria.
.
Chutah Sawmpuia chu a hman chang apiangin dawr ka nghah tir a. Kawihthleh chemtê nalh rêng râwng ka lei chuan insual ka zir a, ka châk et et tawh mai. Ka chêtphung chu Wendy'n a lo hre deuh nge ni, "Mama, phuba ngaihtuah suh aw, Pathianin phuba chu 'Keima lak tur' a tih kha," a rawn ti, chhân pawh ka chhâng duh lo.
.
Alana'n pistol min hawh phal dawn chuangin ka hre lova, a ţhianpa, a thawhpui tho chu ka kawmngeih der thar ta bawk a, a hnen aţangin mamawh thut takin tiin pawisa ţhahnem angreng tak pein ka kawlsak thei hlauh bawk a, engpawh thleng se tawrh ka inhuam thu leh a hming a lan ve miah loh tur thu te ka hrilh bawk a, min kawltir ta a.
.
Pistol kah zirna hmun tur a vâng si, a ri a ring dawn si, silencer awm lo a ni bawk nen, chhun lamah Zuangtui lamah tlan pheiin camping center lam ka pan a. Camp an awmloh lai tak a lo ni bawk nen a remchang hle mai.
.
Miten, 'Halleluiah' emaw 'Aw Lalpa' tia bulţana an au ţhin naah ngei mai chuan, 'Aw Lalpa' ti ta lo chuan tumah awm hek lo le, bul ţan nan, "Phuba" tiin ka au hmasa ve ta ziah a.
.
Pistol chelek dan te ka zir a, a mu tel lovin ka hmet per a, a mu nena kah ka zir tel zeuh ţhin bawk.
~
Kum 2 lai a liam leh ta, Mesti lung pawh kan phun fel tawh a. Ka mi chhui mêkte pawh chu tute nge an nih hrechiang tawh viau in ka inhria. Mesti nena kan inneih dawn a ka tihbuaipui te bak kha midang rinhlelhawm ka chhui chhuak zo lova, Alana pawh chu ka hrilh ve bawk.
Alana pawh chuan ka damloh lai aţanga an chhui char char thu min hrilh ta a, min lo ngaihtuah hle mai. Thilţha lo ka tih hlauvin min lo hrilh duh lo a lo ni a. Keipaw'n ka mi rinhlelh te ka lo hrilh har mah mah a ni. Anmahni âwm ang ka han sawi chu ani paw'n a mi rinhlelh te tho a nih thu a lo sawi a, mahse hlinna tur fak a la awmloh avanga chhuah zalen mai mai an la nih thu te min hrilh a. An lo man hman ang tih chu ka hlau hle mai, ka kutthak ka hnawih hman dawn si lova.
.
Kar 1 vel a liam leh tawh. Wendy te ina ka len lai chuan LPS lama chanchinthar an puan chu kan en ţhap a. Lengpuikai lama car accident an rawn puang a, a chhunga chuang mi pahnih boral nghal thu te leh car chhesawp vek tawh chu an lo tilang a, chu car senduk chuan thil hriatchhuah zawk min neih tir a. Chutah puan chhunzawm lehin chung mite chu tualthah avanga police ten an man, central jail an luhpui hma a tlanchhuak, tlanchhia a accident tawk an nih thu te a rawn puang bawk. An hming an rawn puang leh chiah chu ka tho zawk mai.... Pakhat zawk hming chu Andrew...
~
"Haw lawk ka ngai," tih paha ka kal thut chu Wendy te chhungkua ngaih a ţhatloh hmel hle.
In ka thleng a, jacket lum deuh ha a Alana te in lam pan tura ka chhuak tur chiah chu Alana a rawn lût hlawl mai. "Ţhianpa, i lo hre ve em?" hah hmel tak, thaw hlawp hlawp chung hian a rawn ti a, ka hre nghal mai.
"Kan dâwp a, an inpuang a, kan lo inthlahdah deuh aniang handcuff kan phelhsak lai takin an tlanchhuak a, kan umzui a, accident an tawk ta a ni," a ti ta a. Ka lungawi lo angreng khawp mai.
.
"Mesti nena kan chhuah zana min lambuntu te kha chu pathum an ni, khawnge pakhat?" ka han ti chang bang a.
"Ani pawh kan man, tlanchhuah pawh a tum ve lem lova, ţha taka inpe in a inpuang a, mipui kutthlak kan hlau si a, central jail lamah kan thawn ta a ni," a han tih meuh chuan ka thinrim chu ka insawh nghawng nghawng mai, ka chibai ve hlak châk asin le....
.
Zan ka mutnaah chuan lunghnûr takin ka inngaihtuah a. Kha chen ka lo zawn tawh, rei tak hrehawm ka tawrh phahna mihring te lakah chuan phuba ka la theilo maw?? A van hrehawm em. Mesti thlarau pawh ka va zah ve mawle...
Mahse Wendy thusawi ka rilruah a lo lang zawk mai. Pathianin, "Phuba reng reng la suh u, keima lak tur a ni, keiman ka thungrul ang," a tih kha..
Ka ngaihtuah chian meuh chuan keiman phuba chu la ngat ila, buainaah ka inhnuklût ngei ang a, damchhungin ka hrehawm tawh ang. Chutiang ngai miah lovin Pathianin phuba chu min laksak a lo ni reng zawk si a.
~
Tunah chuan Wendy nen pawh thlamuang takin kan inkâwm thei ta. Zan lamah ka leng a, hmangaih thu te kan infah mawlh mawlh a, leng hnawtchhuak ar khuang te chu ka haw ru hle tawh, an khuang hma mah mah thin a ni.
Haw mah ila mut hmun atangin kan intext leh tho zel a. Hemi zan pawh hian a tûk tûk leh lawk a kan hun hman tur hlimawm tak mai chu sawiin kan inbia a, kan phûr kher mai, 12 a lo ri leh ta.
.
"Fam hnu ngaih suihlunglen ban zai i rel tawh em?"
A va inla ril zei tak, ka nuih te chu a za.
.
"Fam hnu aiin ka ngai tawh che alawm, i thîk a nimaw, bakah i ţawngkam i tipuitling vei reuh haha"
.
"Thik nang le...ka puitling tawh alawm pasal neih pawh ka ngam tawh hi hehe, ka mu dawn aw a tlai tawh si, mangţha muttui"
.
"Awle, zîng zun nuam le".
.
"Bleh" a rawn ti leh hram a.
.
Hmangaihna hi ka hrethiam chiah lo na a, Wendy chu a nat ka phal lova, a hlim hi ka duh ber a, a tana tihsak theih apiang chu tihsak ka duh bawk a. A chhe ber dawttu dâwnin piansualna pawh lo tâwk ta pawh nise ka phatsan lovang a, a kiangah ka awm reng tawh ang. Chubaka hmangaihna chu ka hrethiam phak bik love.
~
Chawhnu dar 1 ah chuan inneih dar a ri val val a, ţhianpa Alan Khênga chu suit nen rawn langin a rawn nui lut var var a, a nalh hle mai. Darthlalangah kan han inen a, chhe lo pawh kan inti ve hle.
Inneih thutiam kan chham laite chuan Mesti'n hlim hmel takin van aţangin min lo thlir reng niin ka hria a. Ani a hlim phawt chuan keipawh ka ngaih a ţha ta e.
Tluang takin inneih chu kan zo a, kan va hlim tak em...

Zan lamah min lawmpuitu ţhiante an haw darh hnu chuan roomah kan lut chu min kuah nghal chat a, "Mam, mumang a van ang em..ka hmangaih lutuk che," a hmel chu a no sêrh mai, a van hmelţha chiang tak em...
"Keipawn ka hmangaih che," kan infawp vawng vawng a.
~
Tunah chuan nupa kawpchawi kan lo ni ta. Nupa chu pumkhat kan nih tawh avangin eng mai pawh ke aa 'ka' tih a lo rem tawh lova, chuvangin ka room pawh chu 'kan room', ka mimal bathroom ţhin pawh chu 'kan bathroom, chutiang zelin tun aţang chuan ka kekawrtê pawh chu 'kan kekawrtê' a lo ni dawn ta a ni.
*******A TAWP TA*******
.
Pathian zarah leh nangnin min supportna avang liau liauvin ABNORMAL LOVE ka lo ziak zo thei ta, ka lawm hle mai. Nangnin comment lamah min tiphûr ţhin lo ula ka ziak zo thei kher lovang. Ka thu fahrah ve te te min lo hlutpui ve avang hian nangni aia VIP ka nei chuang love.
FEEDBACK/COMMENT erawh ka hre châk leh hle mai, in comment te chhiarin ka lo hahchawl ve tawh ange. Click kha khawngaihin lo theihnghilh lo ula aw....
Ar EL Khawlhring .. 11.02.07



Link:
BBcode:
HTML:
Hide post links
Show post links

Lalmalsoma Ralte
Posts: 1
Joined: February 7th, 2017, 10:04 pm

Unread post by Lalmalsoma Ralte » February 20th, 2017, 3:09 am

:D

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)