ABNORMAL LOVE BY Ar eL' Khawlhring

Moderator: Ar eL' Khawlhring

Ngaia
Site Admin
Posts: 25813
Joined: April 30th, 2016, 4:07 pm

Re: ABNORMAL LOVE BY Ar eL' Khawlhring

Unread post by Ngaia » February 19th, 2017, 12:09 pm

Tunah chuan ka dam fel ta, ka la ţawng theilo tih mai lohah chuan ka ziaawm ta deuh e. Mahse huphurh deuh pakhat ka nei. Chawlhni(sunday) a lo thleng ang a, inkhawm te a ngai ve ngei awm sia, kei tumah hriat nei lo hi ka va'n mikhual dawn tak em... Miten min lo be ngei a maw a ni ang a, tumah lah ka hre dawn silo. Pawn chhuah loh theih dan mawlh ngaihtuah a ngai a ni. Mahse pâwn ka chhuah loh lutuk chuan ka inkhung â thei mai dawn tih ka'n ngaihtuah thlen chuan keimah pawh chu ka innuihzat a.
.
Tlai chaw ei hma deuh chuan Sawmpuia, pa Rova driver chu ka roomah a lo lut a. A dân pangngai tê bawkin zanriah chaw kan kîl tur chu huaisen taka hmachhawn ngam lovin ei huaina a rawn tawk leh hlak tih ka hre mai a. Tlai chaw hi a hlau deuh ţhin aniang, hepa pui hi a dawih thei roh e...
A rawn titi leh suam suam a, a kai ţha bawk a, a rawn vir kual leh thet thet a, an khua-a a luckzia bawk min han fah leh tak tak a, khawiah a luck dawn lo tih lah a hmel leh a pian atang pawn a chiang reng.
Chutah chaw ei tur a Siamtei'n min rawn koh aţang chiah chuan ngawi a dawh leh a, chaw ei lai te chuan kan inang chiah, a ţawngthei bik lo.
~
Chhun lamah min chhuahsan leh vek a, Sawmpuia pawh a awm loh avang chuan a khawharthlak hle mai.
Ka tihtur hrelo chu pawn lamah ka chhuak phei a, compound velah chuan ka tei vel mai mai a. Thil engemaw hriatchhuah teuh deuh si, hriatchhuah theihloh ka neih chuan min tibuai takzet tawh.
Chutah ka vah kual vel naah chuan pa Rova garage ka thleng hlawl mai. A chhung chu ka han bih vel mai mai a, thildang tehchiam awm lovin Karisma bike, a tanky sâwi deuh bâi hi a lo awm a, hriatchhuah ka va'n nei teuh tak em...ka maimitchhin ngial pawh chuan ka hre chhuak zo ta chuang lova.
Mahse chu bike chu khalh tawh ţhin tlat a inhriatna ka nei, ka lo khalh tak tak ţhin thovang a.
Kal mai ka tum lai chuan khawih vel chhin châkna ka nei ta tlat mai. Mahse khawnge chahbi a awm ang le...?
Choka lam te chu ka va zawng chiam a, a vâng ngei mai. Chutah ka room a chahbi inkhai reng thin pakhat chu ka hrechhuak thut a, la turin ka kal ta nghal a. Umn, chahbi pahnih a ni, pakhat zawk hi garage kawngkhar chahbi anih dawn chiah hi.
.
Ka han hawlh rak rak a, a inmil chiah mai le, a inhawng ta. Bike chu an khawih chet khât hmel kher mai, a paw vek a, a ţhen lai chu a khir deuh un a, a tanky sir a khuar duk a, oil a hmu ngai lo tih a hriat reng a, a pang vel te chu a khem nen nuan mai bawk..Chahbi pakhat zawk chu ka han vit lut a, a lo mil chiang mai.
Tihnun tumin ka han bei ngial a, a nung theilo. Chutah ka han kick ta tlauh tlauh a, beisei loh hnu, thlan tla hluam a ka kick hnuah a nung ta le...ka khalh chhin ngei tur a ni, tumah pawh an awm hleinem.
Kawtah chuan ka han tlan kual vel chhin a, khalh hrep ţhin tawh ang maiin ka lo thiam ngei mai. Ka han tlan kual vel lai chuan Mesti kha ka hnungah chuang tlat anga hriatna ka nei tel tlat lehnghal. Chutah a ngai ang chiahin, ka khawih tih hriat miah loh tur chuan ka dah leh ta a.
~
Keimah ngei ka ni ang tih inhriatna, inrinna ka nei chho ve hret hret zel chuan ka hria e, mahse tunge ka nih ka hre chuang silo hi a ni ka buaina chu ni...Mahse hma ka sawn deuh a ni lawm ni, hmalam ka pan ang a, ka hmuchhuak vek bawk ang.
~
Ka chelh din theih loh inrinni chu liamin ka hlauh leh peih loh em em chawlhni chu a lo thleng ta ngei mai le... Ka van han châk lem lo tak. Inkhawm loh mai duh rilru mah ila pa Rova te ka hmaizah ve bawk si, peih lo chung chuan ka insiam ve ta nge nge a. Siamtei, Sawmpuia leh Alana bulah chuan inthlahrung takin ka kal ve dân dân a. Kalkawngah te chuan min be ve hlawm nasa mai a, chhâng thei chuang hek lovi le, ka lo nui ve sak sak ringawt a. Mite chuan ka dam tak avanga min lawmpuina thu te min hlan ve liam liam a, ka nui lui ve sak sak a, chhungril erawh a nui thei ngang silo..
.
Ka mi hmuh apiang mai te chu ka hmuh hnu an ang hi ka'n ti hlawm khawp a, tuamah chu ka hre dêr chuang silo. Ka awmdan, ka khawvel chu rapthlak tak a ni ringawt. Pa Rova te chhung leh Wendy paw'n ka awmdan diktak an hre miah lo. Anni chuan ka aw chhuak thei lo, ka ţawng thei lo tih lovah chuan normal angah min ngai vek a, diktak chuan 'ABNORMAL' zawk ka ni chiang mai si.
~
Biak in kawt kan han thleng a, biak in chhung kan lut ţep tihah chuan finfiahna pakhat ka hmu leh ta tlat mai le! Ka meng kâwk a, ka ding chat mai a ni.
Biak in hma lam chu thlalakah khan ka hmu tlat, Mesti nen inneih thawmhnaw nen a kan lakdunna ngei kha a ni, ka hai lo chiang lutuk. Biak in kawngkhar rawng te, a design te, kohhran lehkha tarna bawm lo lang te, engkim mai chu a inang thlap, ka rilru a lokal thui hman hle mai. Chutihlai chuan, "Mama, tinge i din daih a, ţan a hun ţep asin," Siamtei chuan a rawn ti a, ka harh zawk mai.
.
Inkhawm chhung zawng chuan thildang reng reng rilruah a awm leh ta lo. Mesti, ka la hmuh ngai reng reng loh chu mitthla in ka hmu uai uai a, a changin Wendy a rawn lang a, accident rapthlak tak tuar ang ten ka inhria a, ka buai nuaih mai, ka chiang lo hlen dawn a ni ngei ngei ang. Ka au chhuah vak loh nan ka hmui chu ka hup a, ban hla sa tur a an din lai pawh hre lovin Alana'n min rawn kheuh avang chauhin ka harh chhuak a, an lo ding vek tawh a, ka va'n zak tak. Mi te chuan min en ţhup nia hriatna(feeling) ka nei zui lehnghal a, chu inkhawm zet chu a van hrehawm tak.
.
Inkhawm ban a dam lawm nan a min chibai te chuan anmahni pawh en lem lo te chuan ka chibai ve lawp lawp a, min lo betu nazawng phei chu melh pawh ka melh peih lo, ka thaw a ipik lutuk.
.
In kan thlen chuan ka mu thlawp a, ka manganzia hi tuman an hre silo. An hriat turin ka hriattir bawk silo, mahniin, tuma hriatpui lohvin hrehawm ka tuar tlawk tlawk mai a ni.
~
Zan lam a inkhawm tura min sawm leh pawh chuan ka duh tawh lova. Nu Muantei'n, "Mama, inkhawm tam te hi a tha asin, ţawngţai tam te hi kan damna, i dam zelna tur ani asin," a han tih kauh kauh pawh chu ka bengarawngah a lut thei lo. 'Duh leh inah pawh ka lo ţawngtai mai ang chu mawle' ka ti rilru a, ka inkhawm ta lova, ka lo ţawngţai ta chuang lem hlei lova.
~
Zan ka mu chu ka buai hle mai, mumang chhepui pui, rapthlakpui pui hi ka nei ngar ngar mai a. Damdawi inah ka lo awm a, doctor pakhat hian min zai hlum a lo tum a, chutihlai chuan midangin an lo hmu hlauh a, an pawt chhuak nawk nawk a. Nakin lawkah chuan a lo lut leh a, min rehhlum ngei tum chuan min rêk leh ngat ngat a, ka thaw a chham hman dawn tihah chuan Wendy chu nurse uniform nen ngei a inthuam chuan doctor hnungah chuan lo dingin drip khaina thir chu a la lawk a, doctor tukhumah chuan chiang fahran mai hian a hêm pawp a, doctor a tluk rual chuan ka harh hlawl mai a, ka lo thaw kâwk kâwk mai a ni.
~
Ka muhil tawh lovang tiin phone te ka han khawih viau na a, mahse khawvela insûm har ber, lalber pawh pawh zah zo lo, mutchhuak ngei mai chuan min man leh ta. Ka inthing harh lui thei ngang lo a ni.
.
Mite chuan rilru kimlo tiin min lo kâwk luai luai a, ka hrehawm ti lutuk chuan inawhhlum tumin hruihrual ka lo valh a, ka han inngaihtuah ţha leh a, Wendy, Mestie ka hrechhuak, pa Rova te chhungkua pawh ka chungah an tha ropui si. Pa Rova te in ngeia mahni nunna lak chu ka tihmingchhe lutuk ang tih hlauvin pawnah ka chhuak a. "Mesti, Wendy, nangni pawn min dang chuang lovang" tih pahin khâmah ka lo zuangthla a, ka ri chawrh a, ka harh hlawl mai a, khum aţang chuan ka lo tla niin. Ka hnar chu ka sawh na fu lehnghal.Zing kawl a lo eng ţan tawh tih ka hriat chuan ka thaw huai mai.
~
Chhun lamah chuan pa Rova chu office dawr kual a ngaih avang chuan keimah chauhvin ka awm leh ta, a va khawharthlak thin em... Hetiang hi ka nih avangin chhuahvah pawh ka peih lova, in lamah han thawh em em tur a awm chuang silo, awm pawh nise ka tun dinhmunah chuan ka peih chuang lovang.
Hriatchhuah tur thildangte a awm leh lo maw tiin inchhung chu ka han dap mai mai a. Inchung lam room ruak, kudam ang deuh mai a hnawk nuaihah chuan ka lut a. Engteh vak chu ka hmu lo. Thing almira inhawlhkalh satliah ringawt chu ka han hawng a. Musical instrument a lo awm niaih mai. Keyboard chu ka'n enchiang a, yamaha psr S- 500 model hi a lo ni a. A sir a electric(solid) guitar intung chu ka'n enchian chuan video, phone camera a lak ka perh ngei kha a lo ni. Umn, tak tak anih chuan ka la play (tum)thiam ngei hlawm ang.
Keyboard chu ka roomah chawi thla-in C scale in ka'n ţan a. Ka kut chu a khawr deuh viau nangin thiam sa thlap angin ka hmet thei nghal mai. Engkim, minor chord emaw, augmented, diminish, half note hmeh thleng chuan engmah bahlahna ka neilo. Hla erawh han play tur pakhatmah ka ngaihtuah chhuak zo thung lo.
Chutah chiah chuan keimah ka infiahna leh ka chhuina kawngah chuan hma ka sawn zel tih ka hre mai a, keimah chu keimah nia inhriatna ka neih belh hret hret zel e... Mahse hriatloh leh rilru hahna tur thil a van la tam tak em...
~
Ka hrehawm tihna, nun beidawnna, ka rilru hahna zawng zawng sawi chhuak turin ka ţawng thei lova, sawichhuahna tlak a ngaih tumah ka nei hek lo. Sawi chhuak ta ila, mi min en dan tur te ka ngaihtuah lo thei si lova, chuvangin mi pangngai NORMAL awmin ka awm ve hmiah hmiah ringawt mai a ni. Wendy takngial pawh ka hrilh duh lo, hrilh ta ila, min hmusit zui mai angem le??? Mahse sawi chhuak lo mah ila, engtikah emaw, tu emaw tal chuan an la hrechhuak ngei ngei dawn tho si, huiham....
~
Ka sawi hmaih miah loh tur erawh chu Wendy min hmangaihna hi a ni. Heti chung hian min hlatsan ahnêkin min hmangaih zual sauh emaw tih tur hian min rawn be peihin min tlawh peih a. Min hmangaih thu min hlan fo va, mahse kei erawh chuan ka ngaih thu bakin ka text ngai lo. Mahse hrehawm ti awm hmel pawh pu lo hian a pangngai reng mai a ni. Mipa dang lakah nise, rinhlelhawmin a awm ka ring miah lo bawk, min awmpui lai aţang khan engkim a chiangin ka hria. A tirah lerh hmel ka tih nen nen, a lerh lo reuh lutuk. Ka lo ngaihdan ţhin hi hria se chu a duh lovang chu aw....
~
Ka beisei loh deuhin chhun lamah Wendy'n chawlh a rawn nei ve ta hlauh a, ka hlim a, nuam hi ka ti veng veng mai. Ka aw hi a ţhat leh a beisei thu hi a sawi fo na a, han ţha leh thei ta tehreng se hlimna a thlen angem le? Buaina a thlen fo dawn a, rilru hahna leh tawrhna a thlen fo dawn tih hi a dawn pha hauh silo.
Chawhma chhung chu a rawn leng a, chutah chawhnu a lo her chuan a ţhiannu boral ral a duh chhuanlamin min hawsan ta a, khua a har zui leh ta vung vung mai.
~
Wendy haw hnu chuan ka inngaihtuah fuh lo laklawh lehpek a, mahni intihhlum châk tlatna te ka nei a, mahse chu em zawng ka ngaihtuah tur a nilo, ka sual chhuak anga, ka zalen tur a ni...fighting..
.
Chaw kan ei laite chuan Siamtei chuan, "Mama, vawiin tlai chu i awmdan a dik lo, na i nei em ni?" min tih chuan ka lu ka thing mai a. Ka awmdan chu a diklo sa reng, engmah lah chu an hre ve si lova.
.
Zanah chuan ka mu hmak a, ka muhil thei lah chu a ni der chuang silo. A pawilo, mahni a awm veng veng ka duh, hlim phah lo mah ila.
Muthilh a engkim theihnghilh ka duh, mangchhia ka mang leh anih dawn loh phawt chuan.
Muthilh mai chu a lo har ngang mai, a lum bawk si. Chutah Sawmpuia lah chu zai play pahin a be ve nasa bawk si, ka va han ning tak em. "Ka thianghlimna parmawi thliak a min liamsan leh si chuan," tiin a zaipui tak ang ul ul a, mi rilru hah nakalaiin, ka nuih pawh a tiza love. Chumi zan chuan mangchhia ka mang lo hlauh mai a, ka lawm kher mai.
Mahse mumang dang ka nei thung. Ka mumangah chuan Mesti nen bawk chuan hlim em emin kan lo lengdun a. Kan inchhaih a, kan in ûm kual a, kan nui uar uar a. "Mama, ka ngai thei lutuk che, min kalsan ngai miah suh aw, ka hmangaih lutuk che" tih pahin ka biangah chuan min lo fawp a.
Ka kut chu la in a dulah chuan a'n nem bet a, a lo rai ve alh mai. "Fanu nge i duh fapa?" a han tih chhunzawm a. "Awh bik pawh ka neilo...ka hmangaih lutuk che," tih pah chuan duhthawh zetin ka han fawp a, ...ka harh ta hlawl chu ka ui lutuk, ka lukham ka lo fawp huh hlup lehnghal. Mesti ngaihna ringawt chuan ka thinlungah hmun a chang chhunzawm ta lehnghal, ...

Zing atang chuan Mesti zunzamin min phuar hi a ni ringawt mai. Ka lung a leng veng veng a. Wendy ka ngaihtuah chhuah erawh chuan inthiam lohna ringawt hian ka khat thung bawk a.
.
Chhun lampang chu sawrkar chawlh anih avangin chhungkua kan awm kim ve khiah mai. Nidang ai chuan ka khua pawh a har lo sawt e.
Sitting room lamah chuan Sawmpuia pawn fiamthu a thawh lehpek aniang, Siamtei pawh a nui har har reng a. Zanah khan ka lukham kha ka lo kiss na deuh nge mawni, a ţhuina a peh tlat mai.
Siamtei chu min ţhuisak lawk tura va koh ka tum chu sitting roomah chuan a lo awm tawh lova. A roomah chuan ka va lut tlang mai a, ka hmu mai bawk silo, ka au thei bawk silo. Bathroomah a lut anih dawn hi ti rilru chunga a dawhkan tê bula ka va kal chu ka tum loh tawp thil ka hmu ta.
Dawhkanah chuan chhungkaw thlalak hi a lo awm a, chutah chuan tlar hma-ah pa Rova leh Nu Muantei an ţhu a, an hnungah chuan sir he deuh tlaih, ke lehlam khai deuh va chung hian Siamtei chuan min lo ngheng al mai le... Ka beisei loh lutuk a chu thlalak ka hmu chu mak tiin ka meng bial kawk kawk a. An fapa maw ka lo nih, chuti nise engatinge anni tal pawh ka hriatchhuah theih miah loh mai le...??? Anni tal pawn tinge min hrilh loh le, hrilh ngai kherah min ruat lo tihna em ni ang? Chhungkaw zing ami ka nihna chu ka la ringhlel cheu mai....
.
Thlalak mak ti taka ka en avang chuan Siamtei ka bula a lo din lai reng reng pawh ka lo hre lova. Mak tih hmel tak zawka min lo en ka hmu thut chu a aia mak zawk ka tawng leh ta... Siamtei chu ka en ang he haw a,
"Tunge i nih a?" Ka ţawng chhuak ta hlawl mai le. Mahse chu tak chuan ABNORMAL ka nihzia chu a tarlang chhuak ta lek chauh a ni si a, a la tarlan phah dawn chauh pawh anih hmel e.
To be contd/-
(Belh lawk- Episode/part nei a post lo hautakzia ka hre ta. A ţhenin min lo nawr nasa si, buai a na ve si, computer muang bawk si.. lehlamah keia thuziak ve tehlul in lo chhiar ve chak tih ka hriatin ka lawm em em bawk si. Min tiphur zel turin comment leh like te lo pe sauh sauh teh u, advertisement hnuaia picture kha lo click leh hram bawk ru aw)
I CHHIAR AVANGIN KA LAWM E .... Ar EL Khawlhring
07.02.17



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 19th, 2017, 12:09 pm

ABNORMAL LOVE - 4


Postby Ar eL' Khawlhring » Thu Feb 09, 2017 11:47 pm
~
Siamtei chu phâwk zet hian a meng a, min chhân zai reng a rel lo, a ding ngawi reng ringawt a. Kei ngei pawh chuan mak ka ti lutuk chu ţawng zawm zai pawh rel lovin ka hrawk ka dawm thul, Siamtei ka en thul. Chutihlai tak chuan engmah pawh sawi lovin Siamtei chu a tlan chhuak ta daih mai a, chutah keimah a nasa taka inhmuhhniamna lo awm tawh nen, engkim mai chu lemchanna ni vek tawh a ngaihna rilru pu tawh thinrimna a rawn sosang thut mai. Thlalak chu keng a chhuah ka tum lai tak chuan Siamtei aw chuan, "Ka pa, Mama hi," a ti ţuau ri hi ka hre ta a. Pa Rova aw ri ngei chuan, "Mate, enge, tinge ni ta?" a lo ti a. Enge an sawi zui erawh ka hre pha lo. Siamtei room kawngkhar aţanga ka chhuak tur leh an lo lut tur chu kan intawk thut a, kan ding chawt ve ve mai.
Chutah Pa Rova chuan hlim hmel takin, "Mama, i ţawng chhuak thei ta maw? Ka van lawm em..." lungchhe hmel lek lek, aw sai deuh dar dar hian a rawn ti a. Min rawn kuah a tum lai tak chuan thlalak chu lek chhuah pahin, "Pa Ro, engkim tlang tak a sawi a hun ta viau a ni," tih pah chuan thlalak chu ka'n lek chhuak a. Ka insum hman leh ta lo.
"Pa Ro a?" a hnunga ding Nu Muantei chuwn aw ki sang, vîn lam lek lek hian a rawn ti ta. Ngawi mai mai tur ka ni asin le, ka zah ngawih ngawih tur te an ni asin.
Nu Muantei vêk chuan, "Ka pa ti ta che Mama," a rawn tih zawm leh a. Ka meng hnuai raih mai.
"Ka pa," zawi sap hian ka ti ta a, a va lem tak.
Ka roomah ka luhsan daih a, ka inngaihtuah zui nasa ngang mai. Ka ţawngthei ta chu ka lawm em em rualin harsatna min siam nasa dawn tih ka hmu lawk thiam nghal riak ruak tlat, chu chuan rilru a tibuai a ni.
.
Miin hmelhriat biak leh nêl taka min biak chang a awm fo dawn a, keiin anmahni ka hre dawn der silo. Induh emaw, mi â emaw, â der nih ka hlawh chang a awm fo tawh ang. A chhan chu a langah chuan ka harhfim kur si a, damdawiin atanga ka tawn chin phei kha chu theihnghilh nei miah lovin ka harhfim chu a ni lawi si.
~
Mut ka tum tawh lai chuan ka phone a rawn ri a, a mak hle mai, phone call ka dawn ngailoh tehreng nen. Ka han en chuan Wendy a lo ni reng mai, nidangah min call ngai tawp si lova. Siamtei'n a lo hrilh hman tih a lang reng mai.
"Hello"
"Mama, i aw ka hre chak lutuk a, ka lawm lutuk...tinge engmah min hrilh loh a? I va induh ve"
Kan inbe char char a, ka mood fuh lo pawh chu a rawn ti ziaawm sawt mai. Min ngaih thu a rawn sawi chamchi a, kei lahin ka ngai bawk nen. Hun remchang hmasa ber a lenchhuah dun a rawn rawt ta a, châk chiah lo mah ila han hnial teh ţung chu a nuam ka ti bik chiah si lova, a tawpah chuan 'aw' ka pawh ve ta nge nge a.
.
Inchhungkhurah chuan ka ţawng pangngai theih tak avang chuan nuam ka tisawt miah lo mai, diktak chuan nuam lo ka ti zawk. Zawhna min zawhin chhan loh theih loh thil a tam ve ţhin si, engmah lah hriat alawi ka nei bawk silo.
Ka inhriat dan diktak chu he khawvelah hian puitlingsa nilovin ţhanglian sa a rawn piang chhuak ve hlawl, kum pawh la tling lo, chhungte tih sa engkim ring vek, mahse thil zirtir chawp ngai lem chuang si lo, chulamah erawh puitling sa ûl si ni hian ka inhre ber mai.
Ka nih dan ang ang hian inchhungkhurah tal hian langchhuak ngam ila chuan ka zia sawt maithei, mahse mi anglo ang hial a min chhawnchhaih tawh tur te ka ngaihtuahin ka insawi ngam teuh silo. Wendy bulah pawh ka insawi ngam lo anih phei chuan pawn lamah phei chuan ka ngam lo lehzual, chuvang chuan pâwn lam pawh ka chhuak lo rêng bawk a ni.
~
Ka taksa a dam chiang tawh bawk a, zingah leh tlai lamah pawh taksa leh rilru a fit theih nan exercise ka la nasa tlauh tlauh hle mai. Ka tum ber pakhat chu ngaihtuahna fim a ni. Tuna ka dinhmun ngau ngauah chuan fîm viau chuan inhre mah ila hun kal tawh hriatna ka neih tak loh avangin ka fîm lo anih tih ka hre chiang hle lawi si a, chumi ka neih lêt leh theihna tur chuan ka beih tak tak a ngai a ni.
.
Ţawng thei tawh si ka ţawng tlem lutuk vang chu nge ni ka chhungte chu an titi melh melh a. A hnu lawkah nu Muantei chuan, "Mama, vawiin chu doctor bulah va kal ang aw, in check up i ngai leh tawh a, bakah chaw te hi i ei tlem riau, va inentir teh ang," a ti a, hnial ka tum lem lo. Mahse ka rilruah chuan kan doctor pan tur chu ka hrethiam nghal mai.
.
Chawhnu dar 2 vel chuan nu Muantei office kal chu a rawn haw hlawl mai a. "Mama, lo intifai la, lo inhnawh puar la, inentir tur chuan kan kal dawn nia," a rawn ti ta a. Phur lem lo mah ila, ka tana ţha an ngaihtuah a, min ngaihsak tih ka hre bawk a, ka insiam ve ta a.
.
Ka rin ang ngeiin kan kalna chu chaw ei tui loh doctor ringawt zawng a nilo, psychiatrist doctor ngei a ni e. Mi an lo tam vak lova, mahse tlangval ve pui, nu nen psychia lam pana han kal chu min en duh deuh nia hriatna te ka nei a, mahse enge maw an nih bik em em le...anni pawh an chhungte kalpui an ni ve tho alawm le. Ka hming chu a hmasa lama a lo awm avangin kan lut hma thei hlauh mai a.
.
Doctor chuan min zawt chîk ngang mai. Keipawn ka hriat ang ang te chu zêp awm miah lovin ka hrilh ve zel a, ngaihzawng ka neih leh neihloh thleng chuan min zawt a, ka neih thu ka hrilh ve mai bawk a, nu Muantei lo ţhu ve reng erawh chuan ka awm a tinuam chiah lo. Mahse nu Muantei ka'n melh leh zeuh ţhin pawh chuan makti hmel awm a pu hauh lo, hriat zawng an lo nei tawh chiang a ni.
Chutiang em em a min en uluk leh min zawt chîk leh min ngaihsak doctor ang hlir hi doctor dangte an nih ve chuan an hlawmchham tam vak hian ka lo ring lo ve khawp a. Min jection ang tih mawlh erawh ka lo hlau ber mai. Doctor chuan nu Muantei biak fâl a duh thu sawiin lo va chhuahsan rih turin min ti a. An thusawi ka hre châk bawk si chuan kawngkhar te chu ka khar nghet duh lo lui vel a, ka khar nghet lo tih an hre dawn chuan lo, chhung lamah parda a inzâr miau alawm.
.
Doctor chuan nu Muantei bulah chuan hetianga ka awmdan anga awm hriatna hloh hi an awm ve leh zauh ţhin thu te, tlemtê chuan an hriatna an neih lêt leh ţhin thu te, chu erawh hmangaihna enkawl ngai an nih thu te, hmangaihna chuan ka dam leh mai theih a rin thu te, beidawng miah lova min enkawl zui tur leh khawvel danga zin rih mai mai ka nih thu te a fah malh malh lai chuan kawngka zimtea inhawng aţang chuan ka lo ngaithla kawr mai. A lo chhuah dawn takah erawh inentir tur te ţhutna lamah ka lo va ţhu fel leh âwt thung a, nu Muantei chu damdawi ţhahnem tak khaiin a rawn chhuak zui ta bawk a.
~
Doctor chuan ka damna turin hmangaihna leh dawhtheihna a pawimawhzia fah chiam mahse hei baka hmangaihna hi chu an lantir leh thei tawh chuang lovang tihtur khawpin an ţha in an fel a ni.
Damdawi min chawh te chu a hming chuan ka ei ve bawk a, mahse hei chuan min tihdam ka ring lem lo khawp mai. Khuanu rorel ania, a hunah chuan ngai ka awh leh em em ang tih hi ka ring bur mai a ni.
Chutia kan inentir hnu pawh chuan medical doctor pawh kan hmu leh tawh, damdawi pawh ka ngah ngang mai. A duh chuan min rawn dil ţhen ve rawh se, chhungten doctor min entir a, damdawi min chawh si a, chhungte zah avangin ka ei ve mai mai zawng a ni.
He thilah kher chuan psychiatrist emaw trist lo emaw, medicine doctor emaw cine lo doctor pawh nise damna chu min chawh ka ring thertê lo.
~
Zan tir lam aţang chuan Wendy nen chuan message in kan inbe char char a, a tuk chu chawlh a neih theih dawn hlauh avangin lenchhuahpui-ah chuan min rawn sawm ta nge nge a. A hma a min sawm khan 'aw' ka lo ti laklawh tawh bawk si, ka châk tehchiam lo, ti ila ka huphurh a ni ber zawk e. Ka awmdan avang hian mi bula awm ka huphurh hluah hluah a ni. Ka ţawng theih leh hma kha nise chu a zia tak pawh a awm zawk ka ti.
.
"Ka chhungte pawh hian chhuahvah an remti kher dawn emaw ni le?" tiin chhuanlam dawrâwmtê chu ka han siam ve bawk na a, "Ka pa kha ka lo dil ang, ka dil chuan a phal lutuk ang," a rawn ti zung zung a, chutah thil thar a neih thu leh min surprise a duh thu min hrilh tel bawkin kan inbiakna chu kan titâwp rih a.
Tunlai chu Mesti pawh ka ngaihtuah ngai meuh lo amah tak hmuh tur awm ta lo bawk chu. Dam hmak ka tumna hi ka ngaihtuahna luahtu ber chu a ni tawp mai a ni. Han vak chhuak ve deuh ila keimahah pawh awmzia a nei dah law maw tiin Wendy bulah a ni dawn tho bawk a, ka remti ve ta mai kha ania, ani bulah chuan mualphovin ka chhuak em lovang chu.
~
Chawhma dar 11 vel chuan ka room kawngka a rawn ri rak a, Wendy chu helmet thar ver vawr khum chungin a lo lut heu mai le. A inchei dan zawng zawng chu sawi vek lo mai ang, a chhe lo thlawt a ni tawp mai. Midang tâ tur anga ka'n dah chhin ringawt pawn ka ngui nghal vek thei, chutiang khawp chuan a nalhin a hmeltha, a .. Chhe lo tawr tawr tak a ni tawp.
"Scooty thar i nei tihna nimaw?" ka lo ti nghal a.
"Nia, kan chhuah dun nan liau liauva ka lei anih hi,"
"Ka va awih kher kher lo tak"
"Ania lawm le, lendun a khât sia ka tia, ka nikhat pocket money in ka lei mai," tih pah chuan a nui vei ar ar a, a lawm awm thin reuh mange...
~
A nula zawk chuan min phur chhuakin hmun hran hranah kan kal a, khawpui chu kan fang chhuak a ni ber e. Ka tan lah thil thar ang diai, la fan ngai loh hmun hlir ang a lo ni bawk nen, nuam hi ka'n ti mai mai khawp a.
Chutah scooty park fel te te in Millenium-ah te min luhpui a, hetiang hmun changkang leh thil zawrhna hmun nuam te Aizawlah a lo awm reng a, mak hi ka'n ti nasa khawp a.
.
"Bazar lamah chhuk ang hmiang, i thuamhnaw tur te kan en pah ang chu" a rawn tih chuan, "A ngailo, thil lei a ngai lo ka ta tur chu," ka tingial na in a kal nghal mai bawk si, zui ve mai loh chu tih theih dang vak pawh ka nei love. Bakah bazar an tih fo pawh chu hmuh ve pawh a chakawm reng reng alawm le...
~
Bazar chu kan han thleng ngei a, a pui ka tiin hmuhnawm ka ti hle mai. Ka lo chhuak khât mah mah anih mawle ka ti rilru a. Heng hmun lehzel ka hre lo hi chu mak ka inti in hrehawm ka ti ru angreng hle mai. Ka kal ţhin fo na hmun a ang ka ti bawk a, ka kal fo rêng bawk ang. Chutihlaia harhchhuah ka châkzia chu tuman an hrethiam phak lovang. A chhan pakhat berah chuan ka bulah Wendy a kal ve si a, makti awm deuha ka awm fo chuan ka nihna diktak hi a hrechhuak ang tih ka hlau em a ni.
~
Mahse, thup theih reng a ni dawn silo, a hriatchhuah hunah meuh chuan engtin tak ngai ang maw le... Chutih hunah meuh chuan min kalsan mai lawng maw..??
~

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 19th, 2017, 12:09 pm

Chhak lam deuhah kan han chho a, computer zawrhna dawr kawt kan thlen lai chuan mi pakhat hian min rawn kova, "Mama, pawisa chu i remchang thei tawh em?" a rawn ti ta mai. Wendy nen chuan kan en he haw a. Wendy chuan, "I hriat ngai mi ni em?" min ti a. Ka lo hre lo nasa mai.
Tlangval pakhat hian nuisâng hian min lo en reng a, chutah kei chuan, "Eng pawisa nge nita ţhinpa?" ka'n tih chuan chupa hmel chu a dur ta khap mai.
"Computer part i lakna kha, ka rin aiin i rei ta phian a, a tuk maia pe tur ang khan i sawi sia," a rawn ti ta mai, ka va han bo tehreng em.... Wendy lah chuan min en ha tawh mai a. Ka thin a rim ta thut mai a, "Ţhianpa, min hai a nilo maw?" ka'n ti vin ve tâk a, nula bula ba lo inţhin ve ngawt a, zahthlak lutuk.
Chupa lah chu a la thinrim zawk tak deuh deuh. "E, Mama, haider duh suh, graphic card i lakna kha min pek loh kha aw," a ti ta. A ţawng ring tawh si, ka chhan leh dawn lai tak chuan Wendy chuan a va be ta a, pawisa te an inpe ta in ka hria, mahse ka ngaihdan a ni vak lovin va pan ka tum chu Wendy chuan min rawn nam sawn nawk nawk pah chuan, "Mam, kal mai rawh," a ti a.
"Wendy, pawisa i pe mi? Ka inhûmsek tawp.
Ka inhrechhuak thut mai le, tinge ka inhriatchhuah har em em mai le....
Hrehawm ka ti thut chu, "Kal ang" ka tia ka pawt kal dawr dawr a.
"Pawisa i pe mi a, engzat nge i pek?" vîn tak hian ka han ti a.
Wendy chuan ka dar a chul pah chuan, "Mam, theihnghilh rawh," aw nem takin min ti a...
Mahse ka rilru chu a na ngei mai. Khatiang ringawt kha chu a, ka awmdan ka hriatchhuah vang mai mai khan ka dâi mai kha ania.
.
A van makin a van hrehawm chiang em... Ka chianlohzia chu ka hria, mahse....khatiang ang thil êm anih ka hre phak lo, ka ngaihtuah phak lo a ni zawk e.
~
Kan haw lam chu keimah zawkin ka khalh a, ka tlan fua fua mai a. Wendy chu a hlauthawng tih ka hrereng, mahse ka thinrimna, lungawi lohna, mahni inngaihhniamna zawng zawngte chuan min thunun a, kan in ka thleng hram chu a ni e.
.
Thildang sawi tawh lovin Wendy nen chuan kan infawp vawng vawng a, a mittui a rawn tla ta, enge a ngaihtuah le?.... Keipawh ka hnuk a ulh deuh tlat alawm, chupawh mipa ka nih vangin ka mittui a tla lo mai mai, ka zêp peih love. Vei kan nei ve ve.....
~
Chaw ei lai bak a room chhuahsan ngailo ka ni bawk a, ka awmdan tak tak chu ka chhungten an hre fumfe ngailo. Mshse chaw ei lai chuan min en hrek hrek....ka melh ve hrek.
.
Ka mut thleng a, Wendy text ka hmuhloh avang chuan ka ngaih a ţha lo takzet tawh. Mahse vawiin thil vang khan text hmasak nuam ka ti lo a ni. A message châng reng chungin ka text hmasak hreh em avang chuan dar 9 thleng chu ka text hmasa ta lo. Khawnge, ka call chhin dawn Lal Wendy chu...
.
A la thei miah lo mai, vawi 5 a ring ral ta..... Vawikhatmah ka call miss ngailo chu mak ka tiin rinhlelhna in ka khat rum rum mai, mipa dang inleng a nei a ni em lawng chu maw... Dar 10 thleng pawha a rik ral ţhak ţhak avang chuan ka rilru leh ngaihtuahna chu a dang leh ta vek mai. Vawiina kan thil tawn avang min hmusitin min be duh ta lo maw....ka rilru a van na tak.
.
Mahni inngaihhniamna ringawt ka nei leh ta... Vawiin khan Wendy nen kan chhuak dun a, kha thil avang khan min be duh lo ta a ni e... A awm ve thove, engmah ka hrilh chiang ngai hleinem. Khapa kha ka lo bat sak a ni thei...mahse hmangaihtu tan phatsan nihna tham em ni....???.
.
Khawvelah hian a der hlirin min lo hmangaih hlawm anih hi.... Ka van na tak em. Heng natna zawng zawng pumpelh a kalsan dan tur ka hre ta,..tuman min enhniamin min hmusit tawh ngai lovang.
.
Chahbi, bang a inkhai chu ka en ran ran a. Bike chu ka nawr chhuak a. Kick fe loh chuan a nung lovang, tihnun khât a ni bawk si.... Ka nawr chhuak a, chhungten a ri an hriat phak loh turah ka nawr phei a, ka va na tak em.
.
Ka phone ka theihnghilh a ni tih ka hriat rual chuan Wendy message a lo awm palh mial takin tih thu-ah va la leh zawk turin ka kal ta a. Room ka lut a, ka phone chu a lo let bal mai. Phone ka en chuan Wendy message a awm chuang lo. Ka rilru na bawk si chuan Sawmpuia chu kawngka lo kalh tur a tih tumin ka han chho a. A room a la eng kalh, kawngka a la inhawng huau bawk. Hmanhmawh taka Sawmpuia koh mai tum a ka kâ ka an zuau lai chuan ka tâwp leh hmiah. A chatthla nge ni, a lo mutui nasa mai. Chutah a bul a zu ûm mawi tak chuan ka mit a la ta tlat mai le....
Ka thinrimna leh rilru natna chuan chu thil chu ti ngei turin min nawr a...ka inthlit a, ka tlâk pawp pawp a, ka rilru vang nge, ka in thei khawp mai...
Um ruak dang a awm avang chuan Sawmpuia chuan a inhnemin a hnutchhiah hnem tih ka hre mai... Ka in leh ţeuh mai. Ka rui chhia chu a ni ta.
.
Bike awmna ka thlen leh chuan mumal ka neilo ti ila, ka hrechiang tho niin ka inhria...mahse, ka rilru chuan thihna bak ngaihtuah a nei ta lo.
In lama chhungte timualpho zawnga thih ai chuan tiin bike chuan chak takin ka tlan a... Ngaizel Khâm chu panin ka tlan ngat ngat a, Sikulpuikawn ka thleng chiah chu truck lo lut pakhat hian min lo dang chaih mai le...ka speed chak lutuk ka su pawp chu ka hriat hnuhnung ber a nita...
~
'Mama, Mama,' tih ri ka hriat chuan ka harh ruai ruai a, ka lu natzia mai chu. "A insawh na lem love," tia mi pakhatin a lo sawi lai chuan ka lo harh tawh khawp mai.
.
A van mak em!!!. Ka lu chu na viau mahse ka thil tawn azawnga mak danglam ber mai ka tawng ta le....!!!
.
Khum bula mangang taka lo ding Nu Muantei chu ka hmu ta, min hringtu ka nu ngei chu "Ka nu" zawi raih mai a ka han ti chu a phu zawk mai.. Chutah lawm tih hriat zet hian, "Ka fapa" tiin zah pawh dawn lo hian a au chhuak ta rawih rawih a. Engkim mai chu a chiang ta... Nu Muantei chu min hringtu, ka hmangaih, ka nu a ni tih ka chiang ta. Siamtei lam ka hawi hret a, "Mami," tia tunhma a ka koh thin dan a ka han ko mai chu le... "Mama" tiin, ka tanna ram atangin ka harh chhuak chiang ta tih hria in lawm leh lungchhe takin a rawn ţap chhuak ta hawm hawm a...
.
Ka zalen ta, tunhma thil zawng zawng ka hrechhuak thei ta....
...
To be contd/-
(Mi thiltithei leh milian hi ka vip an nilo, nangni a chhiar tu ngei hi ka VIP DIKTAK in ni e. Ka sawi lawk ve sia, in chhiar loh chuan min hau leh dawn si hahaha.. Kan WIFI a lo chhia chu niin, tlai tawh takah ka thianpa te inah ka tlan chhova, ka rawn pawsttt ta hram e, computer atang lo chuan post thui theih hek loh le, in va pawimawh tak em....zan atangin ka type ve a, a phuailuai ang...min hrethiam hram ru aw)
I CHHIAR AVANGIN KA LAWM EM EM A NI.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 19th, 2017, 12:10 pm

ABNORMAL - 5
~
Pa Rova, ka pa diktak lam chu ka'n melh a, ani pawh hnukulh tih hriat tak, hlim hmel pu si hian lehlam hawiin a lo inher mek a.
"Mama, a va lawmawm ve," rawn titu lam ka han hawi chuan amah chu ka hriat mi a ni hauh lo mai. Pa hmai fai veng vawng, ngo deuh vang, zahawm hmel tak hi a ni.
Ka pa chu lo kal hnaiin, "Bawiha, Wendy pa anih hi," a rawn ti ta...
.
Wendy hming a han sawi chiah chu mi khei deuh zar mai. Ka message a chhang lova, call a la duh bawk lo kha ania. Heti hian ţhat phah ta hlauh zawk mah ila, ka thin a la rimin ka rilru a la na reng.
.
"Wendy chu a la mutui khawp mai," tia ţawng ri ka hriat chuan ka phu deuh zawk mai. Chu ţawng ri ka hriatna lam chu ka hawi phei nghal a, nu pakhat hian khuma mu dam lo ni ngei tur hi a sam dimtein a huihsak a.
Ka han enchian nak chuan khum a mu chu Wendy a lo ni reng mai. Ka makti chu ka ţhu kâng âwk a, a ngaihna hi ka hrelo takzet a ni.
Insum hman lovin "Tinge Wendy saw?" ring fahran hian ka han ti a, thawhchhuah nghal mai ka tum bawk a.
"Mu rawh, mu rawh, la tho rih suh," tiin ka pa chuan min rawn nam mut leh mai a tum chu, "Ka pa, ka ţha alawm, na tehvak ka nei hleinem, tinge Wendy hi, enge a awmzia?" tih pah chuan ka tho chhuak lui ta a, ka lu chu a hai chhalh chhalh hle mai.
Chutah khum bul a ţhu Wendy nu niawm tak chuan, "Mama, nimina in lengchhuak a rawn haw aţang khan a pum a na char char a, a zan a zanin a thawhna damdawiin kan panpui nghal alawm, nang lah i lo heti ve lehzel a, a pawi ngawt mai, ani chu tunah chuan a ziaawm tawh e," a lo ti ta mai a.
.
Wendy chu ka han en a, a hmel dang lep mai te leh a hmel pawisawilo, nunnem hmel em em mai chu ka lainat takzet mai. Kei tehreng pawh tinge ni...ka phone a chhang thei lo anih te chuan harsatna a nei aniang tih ring thiam ve mai tur ka ni asin le. Mahse khatih lai kha chuan ka thluak a buai miau si alawm le....
~
Chau chhia ka ni lova, ka lu ka sawh leh hret bak chu na engmah ka neilo. Kha truck ka sut dawn khan ka lo tlan kawi hman deuh aniang, a ke ah ka va intauh deuh hlak chu a ni awm e. Mahse ka per phei leh chu a piah lungah ka va insawh a, helmet pawh a khi vek, a phel lo chauh a ni. Thihna zawng a tlan chhuak ni ve si khan ka thih teuhzia chu ka hmu chiangin ka thi ta lo chu vannei ka inti leh em em lawi a.
~
Wendy nu chuan, "Mama, lo ţhu hnai teh, hrilh tur che ka nei ania," a rawn tih chuan nuam lo ka ti angreng khawp mai, a chhan chu a ţhing rim ka nam nasa em a ni.
Tawlh phei pah chuan,"Enge ni ta?" ka ti a.
"Matei hian in inkar chanchin hi zêp pawh nei lovin min hrilh ţhin asin, kan fanu mal, pianpui pawh neilo anih avang hian kan duat em em a, ani pawn nu leh ţhian ang tak takin min en a, in inkar pawh hi kan lo hre ve vek asin," a ti a. Engtin tak lo sawi ang maw tia ngaihtuahin ka lo bu tlauh tlauh a.
Chutah, "Nangmah vang hian pasal tura kan lo duhsak, amah rawn betu pawh kan lo hnar asin," a'n tih chuan mak ka lo ti hle, engmah Wendy'n a sawi ngai si lova. Ka rilru hrethiam ni awm takin,"Ni e, i rilru nat a hlau anga, a hrilh lo che aniang. In in lama a enkawl lai che khan in chanchin engmah pawh kan hre lo, a damlo enkawl a khawngaih vang anih dawn hi kan tia, kan chhuang ve em em ringawt a. Mahse khami kara a rawn haw khan i chanchin engkim kan hre ta a. Hriatna hloh i nih thu te, a hmangaih thu te chenin min hrilh ta a. A tir chuan kan lungawi lo khawp mai, mahse hetiang lamah chuan a rilru luhlulzia kan hrechiang a, a rilru a thlak dawn chuang lo tih kan chiang si a. 'Ka theihtawpin ka enkawl anga, Pathian hnenah ka dil reng bawk a, a ţha chhuak leh em em ang' a tih lai phei chuan a tumruh leh beidawn duhlohzia hria in kan chhuang em em tawh zawk a. Chuvang chuan kan dang lui duh lova, tun hun hi in lo thleng ta a ni. Nizan damdawiin kan luh tirh pawh khan i hming ringawt hi a lam asin," a han ti charh charh a.
Wendy muhil bâm mai chu ka han en a, ka khawngaihna mittui chu ka dang zo lo lek lek a ni. Chutiang khawpa ka tana inpe min hmangaihtu chu ka tan hian a va hlu tak em...
.
"Diktak chuan ngaih huatah lo la lo la, ţhen tir che hi kan tum nasa alawm. I chanchin diktak kan hriat phei kha chuan mi pangngai lo tana kan fanu pek chu ka ui hluah hluah asin, mahse amah hian a thei thlâwt si lova", a ti a.
'Chanchin diktak' tih lai tak chuan ka beng a verh zar mai. Wendy hian ka awmdan diktak hi a lo hre ru reng maw ni a! Tichung chuan min kalsan chu sawiloh, min hmangaih em em chu a ni si maw!!...
"Mama, Matei hian i hming a lam zin tak em avangin bag a phone a dah chu kan han en a, i call a lo tam ngang mai. Rawn biak lêt che kan han tum a, a ring ral ţhak ţhak zel bawk si a. Tihngaihna kan hrelo chuan 'Siamtei sis' tia a dah chu tîm tak chungin ka han dial ta a, i nau ngei a lo ni a. Chutah chuan accident i tawh thu leh i chetsualna hmun an pan mek thu min rawn hrilh ta a. Damdawiin in rawn thlen chuan serious tak i nilo bawk a, Matei te thawhna hmun a lo ni kher bawk nen, helai cabin hi kan lo dilsak ve tawp che a, an lo phal hlauh anih hi, va mu hahchawl leh tawh rawh," a ti ta a. Mahse mut leh chu ka tum lo chiang kher mai, min mamawhtu ka tana inpe zo ngei chu tawlh hlatsan ka duh bik lo.
.
Wendy chu a rawn che ţial ţial a, mitmeng dava riai hian a rawn meng a. Min rawn hmuh rual chiah chuan,"Mam, i ţha maw?" te chu min la rawn ti hmasa ta deuh deuh a. Ka chetsual chungchang chu a lo hre ve vek anih dawn hi.
"Wendy ka ţha e, a van pawi tak e aw, hetianga i lo nat mai le," ka han ti ringawt a. Midang bulah lehnghal, sawi tur ka haihchham tlat.
"Ka ţha tawh alawm, ka mutui tawh lutuk, i insawh na em?" min la ti ta, min lo ngaihtuah hle mai.
.
Chutihlai chuan kawngka rawn inhawngin Alana a uniform famkim nen a lo lut hlawl mai a, ani pawh midang daih a ni ta.
"Khênga, i induh bawk a, makpa hual dang ka nei tawh," fiamthuin ka lo ti a, Siamtei zak pawh a lo sen ţan ţan a.
Alana chuan, "Khaih khaih, inah pawh ka lokal ziah a, min ngaihsak ve ngai hleinem, nurse bak ngaihsak pawh i neilo anih kha," a tih lai chuan Wendy pawh a lo kiai ve sak sak a.
Alana pawh chuan ka pangngai ta tih a hrethiam aniang chu, a hlim hmel ve hle mai.
Alana hi ka ţhianpa, ka kawmngeih ber, engkim ka thlenna ţhin a ni a, ka hna pawimawh avang hian duh angin kan inkawm thei ta meuh lo zawk a. Ani lah CID a nih avangin a buai thei si a, kan inbe zeuh zeuh tih lovah chuan inhmuh a khat pharh mai. Siamtei nen hian an inzui ngun ve viau bawk a, ka ţhianpa a ni chungin, 'Makpa, Khenga' ti hian ka ko ber ţhin. An thil chhuina lamah misual kut a tawrh deuh avangin a lu-ah hian ser a awm a, chuvang chuan 'Khenga' tiin ka koh phah ta a ni.
~
Na lutuk ka neih lemloh avang chuan a tuk lamah ka chhuak zui thei ta mai a, Wendy erawh ni 2 vel chu a la awm a ngaih hmel e.
.
Ka harh chhuak ta erawh chuan keimahah natna, thinrimna leh phuba lak chakna a siam nasa ta ngang mai le.
Ka chhungte chuan ka rilru tihnat belhchhah an hlauh avangin engmah min hrilh duh lo a lo ni tih ka hrethiam ta. A hma khan mi pangngai angin min ngai se ka tih avangin ţha awm deuh te khan ka lo awm ve vel kha ania, a rilru pangngai zawk chu ka lo bum lo chiang teh e maw...
Damdawi in a ka awm hmasak zawk ţuma ka harhchhuah hnu aţangte khan Mesti lam ngaihvenna rilru ka pu lo tih an hriat te khan ka pangngai lo tih an hre daih tawh a lo ni a. Pangngai ni ila chuan ţawngthei lo pawh ni ila ka ngaihven chung ngei ang tih an hrethiam vek a lo ni.
Khati taka Wendyn min ngaihsak avang khan ani pawh engkim an lo hrilh ve vek tho tih ka hre leh hnuhnawh a, ka bum emaw ka tih khan mahni ka lo inbum lek a, anni'n dawhthei leh hmangaih takin min enkawl zawk a lo ni reng si a. Anni rilru pangngai ta chuan engkim mai chu ka harhchhuak leh thei anih chuan ka hrechhuak leh vek dawn tho tih an lo hmu thiam sa vek a lo ni.
.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 19th, 2017, 12:10 pm

An rin ang ngei chuan engkim mai chu nimin lawk a thil thleng ang maiin ka hrechhuak leh ta uai uai mai reng a. Khatianga mi pangngai lo ka nih chhan chu hetiang hi a ni...
~
Mesti nen kan intawn atang khan kan hlim dunin midang awh leh thik tham kan lo ni reng a. Ani Lunglei lam mi niin sokarah hna chhete a neih ve avangin Aizawlah mi in luahin a awm ve a, zantin deuhthaw hian ka leng ţhin. Chutihlai chuan ani ang nula hmelţha chu hêltu a ngah ve hle mai. Mi fate aiin ka hmelin 'pûak' ti bik mah suh se, a duhzawng chi ka ni ve tehreng aniang chu, milian tak tak faten hêl nasa teh mahse kei min thlang ve tlat kha ania.
.
Khatiang zingah khan min ngaihthei lo fal pakhat Andrew-a an tih hi a lêng ve ţhin bawk. An ţhian ho chu an ţawng a phawkphawhraw theiin an chapovin chaltlai taka ţawng an ching hle mai. Kei aia an la naupan hret avang chuan ka dawh hram hram ţhin kha ania. Alana phei chuan a ngaithei lovin a ter deuh at ţhin rêng a, ka lo khap dai hram hram ţhin zawk thin.
.
Mahse zankhat chu Alana kan inah hnutchhiahin Siamtei nen lo inkawm turin ka kalsan a, mahniin ka va leng ta a. Ka va thlen chuan Mesti inluahna kawtah chuan an car man to hmel zet chu a lo inhûng leh tawh, ka kal hma tehreng nen. Ka rilru te te chuan, "Umn, hepa hian tihtakzetin a ngaizawng ve anih hi, Mesti chanloh hlau ve ve," ka ti a.
Ka va luh ve chuan ţha deuh hian min lo dawngsawng a, inlengte erawh an ngawi ţhap a min ngaihtheih vak hmel loh lehnghal, ve ekuih hlawm chuan....
.
Mesti bula ţhu ka la hriat ngailoh pakhat chuan Mesti chu a intitâtu riau hian ka hria a, ka ngaitheilo kher mai. Mesti chuan min hmelhriattir nghalin a 2nd cousin, Aizawl a awm nghet an lo ni a, Andrew-a ţhianpa a lo ni awm e. Min rawn melh dan kher kher lah chu a ngeiawm tawp a ni mai.
Andrew-a te neihnun zia, hausakzia ringawt chu a fah mawlh mawlh a, mahse Mesti chuan ngaithla awm paw'n a lang lo.
.
Anni ţhian ho lah chuan an bike, an car chungchang ringawt an sawi a, an hausak hmel hlawm khawp mai. Mahse an pa te thawhchhuak bak va ni nek suh.
An incheina te chu a sâng hlawm khawp mai. Andrew-a phei chu a pawisa tel lovin a thawmhnaw hak lai ringawt pawh chu rawk tham a ni, chêng sing fe man aniang chu, class thlarh thlarh tak a ni. Mahse kei aiin a chhe fe.... Kekawr mawng ţet pawh ha ila ka ţha fe....
.
Ka rin aiin an haw hma ve tlat mai, huai tak ei....siai siai mai a. Mesti chuan ka lungawi vak lo tih a hria aniang, min rawn ţhut hnaihin ka âwmah chuan a bêi chial a, khang mite kha chu engahmah a ngaihloh thu min hrilh pahin min hmangaihzia min hrilh siam siam a.
"Mesti, hetiang ringawt chuan a dik dawn hauh lo mai, palai rawn tirh mai ka duh tawh,"
"Mam, i hmanhmawh e, ka hnaah promotion ka hmu ţep a, i nghak law law thei mai lawm ni?"
"Thei lo thei lo, ka hmanhmawh, hetiang ringawt kara awm hi ka peih tawh lo,"
"Hmn...anih chuan keimah bikah chuan thildang remchan lohna pawh ka nei hran lo, palai chu rawn tir ta che, naktuk maiah ka patea a lo zin dawn alawm"
Ka va han lawm tak, Mesti nen chuan kan inkuah a, kan infawp vawng vawng a.
~
Dar 11 a lo hnai kuar tawh mai, vengdang ka ni bawk si a, haw turin ka ding ta a.
"Mam, palai chu rawn tir ngei ngei rawh, Lunglei lama in zin chhoh chu a ngai ngei ang, ka hmangaih che," tih pah chuan ka biangah min rawn fawp leh zeuh a, ka chhuak ta a. "Ka lo thlir liam ang che," tiin kawngka bulah chuan dingin min rawn thlir dauh dauh a.
.
Ka bike awmna bul ka thleng ţep tihah chuan ţawng ri deuh bul bul ka hria a, ka'n enchiang chu ka piah mai kawngsirah chuan Andrew-a te ţhian ho chuan zu an lo la in laih laih mai le. An ruih hmel hlawm em em lehnghal. Hmu lo anga lan a kal mai ka tum lai chuan an zinga pakhat chuan min lo hmuin, "Saw le, Zâwnga chu" tih pahin min rawn pan phei ta chher chher mai le.
Ka awmah rawn ţhamin, "Hmela, Mesti hi lo ngaizawng buai duh tawh suh aw, Andrew-a nupui tur anih hi," a rawn ti chu ka sa phat mai, hnapkhira mai mai chu a, kei ai naupang lehnghalin ka âwmah te a ţham khanglan chu le...
A kut phihthlak ţhuai pahin a dulah ka'n tlawh nghek mai chu a hlawm tawl mai a. "Ehe Zâwnga" tih pahin pakhat a rawn tlan phei ţuang ţuang a, inring lawk sa pen pawn ka ni bawk a, ka bul a rawn thlen rual chuan theihpatawp a na in a khabe-ah tak chuan ka'n hnek chawrh mai a, a thal chiang teh e...arsi chu a hmu ve chuai chuai ang chu.
.
Midang rawn thlen ve hma chuan Mesti chu rawn thlengin min rawn ţhelh ta hlauh zawk a, a cousin chu a hau bawrh bawrh a, ka thiamloh a nilo tih a lo hmuin a hre ve vek tlat alawm. Min lo ţhelh lo law law se mi pali han thal ţhak chu ka chak asin le, Alana bula insawitheih nan reng reng pawh. A hrim hrimin anni ang zurui chhe lutuk sawmkua leh pathum phuar khawm te chu ka hlau lo ve chiang em mai, bêih bêih mai a.
~
Ka tlan chhuah dawn lai te chuan min lo thlir ţhap a, Andrew-a leh Mesti cousin ( a hming pawh ka hre lo e a, Dailova pawh ni fahmiang) te chu an la pâwr khawp mai. Ka va hawi leh chuan mi pahnih chu an lo la ţhu ngal a, pakhatin a pum a la dawm a, pakhatin a khabe a tuai hauh hauh bawk.
Thinrim thapui chhuah a khawih ka ni bawk a, a na ve viau aniang le. Tinge min lo tihbuai ngawt tehreng...an chawh.
.
Ka tlan vang vang a, in ka thlen chuan an lo mu ţhap tawh a. Roomah lut tlang nghalin ka phone ka phawrh nghal a, Mesti message a lo awm a.
"A pawi ka ti hle mai, keimah vang vek anih kha"
Ka reply nghal a,
"Ni love, nangmah vang a nihna a awm lo, hetiang thil te chu thleng ve ţhin reng ania. Hei vang tak hian alawm palai rawn tirh ka duh nachhan"
"Ni e, i rawn tir vat dawn nia, ka hmangaih che"
"Ka hmangaih che, mangtha le."
~
Harsatna em em awm lovin inneih chu kan peih ta mai a, kha mi ni, Mesti nena kan inneih ni a kan hlim dunzia te kha aw,.....ka mitthlaah a lo lang nawn a, ka lung a kher mai.
Inneih tukah lah khan ka hlim lutuk hi ka chhungte zawng zawng kha han chibai vek mai kha ka'n châk mai mai khawp a, "Ka pa, a man pek belh leh mai teh u a," han tih mai te kha ka duh a, a ni thei chiahin ka hre bawk silo. Kawmthlangpa'n," Khawimaw kan mo thar chu ka'n chibai teh ang," tia zing hma deuh-a a lo leng te kha ka hmu keu vuk mai a, "Ţhenawmpa, engmah lah hi i hre ve dêr mai si lova," han tih mai te kha ka duh rum rum asin. Khati khawp khan kan hlim a, kan inhmangaih a, mahse a daih rei ta lo mai pawh a.
.
Zan 2 bak a ral hman lo, Mesti pi tar tawh tak mai, kan inneih ni pawh a lokal ve thei lo tlawhin Falkland-ah zanah kan kal a. Kan haw lehlam chu alawm vanduaina kan tawh tak ni. World bank road lam a hnai zawk ang, bakah a free ţha a tiin chulam kawngah chuan kan tlan a. Thui pawh kan la tlan lo, kan hnunga rawn tlan te chuan min zui ve zel a hriatna ka nei tlat mai. Ka tlan zawih leh an tlan muang ve zel a, ka tlan chak leh an tlan chak, ngaih a ţha duh lo khawp mai.
Chutah kan hnunga car chu a rawn dawk chhuak zawk a min tlan pel ta. Kan hnungah chuan bike pakhat chu a la awm a. Ka tlan leh chiah chu kawng kual lai takah car chu a lo inhûng ngût a, mi pahnih hmaituam hi lo dingin,"Ding rawh," min ti tuar a. Mesti hlau lutuk chuan,"Ding suh," min tih ruala speed ka han la ka tlan leh chiah chu, thingfâk hi ka lu-ah a ri chawrh a, Mesti kha engtin nge a awm zui ka hre ta lo. Ka harhchhuah leh chuan damdawi inah che thei lovin ka lo awm ta kha ania.
Tunhnu a ka hriat leh danin bike tlan chak force na tawh lutuk si, min lo vuak tak bawk si-ah khan Mesti chu kawngthlangah lêng thla lawpin, kawngthlang sâng vak chu nilo mahse lung chang tak maiah a zuk insawh a, a boral zui ta a ni.
~
Ka ngaihtuah chhuah hian ka rilru a na vawng vawng a. Chu mite ngei chu chhui chhuah a, an chantawk pek ve chu ka bat a niin ka hria a, phuba ringawt chu ka ngaihtuah tawh a ni. Chutihlai chuan Wendy pawh damdawi in atanga lo chhuak tawhin a hna pawh a chhunzawm leh thei tawh bawk a.
~
To be continue/-
(Hemi zawh ami tur part 6 hi last part a ni tawh ang, tunah ka rawn chhunzawm leh nghal ang, lo click phawt mai teh u hehe)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 19th, 2017, 12:11 pm

ABNORMAL LOVE - 6
~
Mesti thlan chu ka la tlawh hauh lo, tlawh duh viau ţhin mah ila tlawh turin huaisenna ka nei zo ngang lo a ni. Mahse ka tlawh ngei ngei a ţul dawn si a, ka va huphurh tak em...zanin la la hian kal mai ang, chhun lama ka kal chuan ka insum zo pek lovang a, miten min lo hmu reu reu ange.
Sawmpuia ka kova, whisky um khat min lo laksak turin ka ti a, pawisa ka pe bawk a, mak min tih hmel hle mai. Umn, pawi love, dawihzep tihdan mah nise zanin chu ka ri pawp pawp ang.
.
Chhun lama ka chhuak chu Wendy duty ka tlawh kawi pah e ka tia, an chawlh laiin rei vak lo chu kan inhmu thei a, min lo ngai ve hman hle mai. A damdawi in chhuah lai kha chuan leng ve bawk mah ila inleng an awm ve nek nek bawk ţhin nen, ka ţhu rei ngai lova, hun fal pawh kan nei thei bik lo.
Zan lamah leng turin min sawm a, mahse Mesti thlân tlawh ka duh avangin chhuanlam ka siam a, ka tihtur min zawh ngial pawhin ka sawi ţhat duhloh avang chuan a lungawi vak lo. An duty a hun leh ta mai bawk si nen, ka kalsan ta a.
.
In ka thlen hnu chuan Sawmpuia thil min lo hawn pawh chu a lo awm vâng tawh mai. Ka han thlek vang vang a, a ţha lo ka tiin ka inthiam chiah lo.
Inchung zawlah no nen, tui bottle nen ka keng chho va, tlai ni tla tur mawi em em mai chu ka thlir a, ka hmangaih ber Mesti chu ka mitthlaah a lo lang a, ka lung a leng chiang ngei mai.
.
Mahni inthiam chawp chungin zu chu ka han inthlit ta a, 'a ţha lo asin mawle' ti chung zelin no 2 chu ka lem fel ta dêr mai. No 1 ka han inbelh leh hrâm a, Mesti ngaih lunglenna nen ka ţah hi a chhuak deuh tlat tawh. Ka inngaihtuah chiang a, a hun lo viauin ka hre ta a, ka zu in chu ka duhtawk rih a. Mahse Mesti, ka hmangaih kha ka ngaihtuah lo thei lo a ni e, Wendy lam pawh a lang theilo. Tlai chaw ei lai te chuan inthlahrung dûkin chaw ka ei ve a, chhungten min melh hrek hrek ka hlau tlat, pawilo Sawmpuia pawn a in ve leh awm tho em mai.
~
Zan dar 7 rik hma chuan Wendy message ka hmu a,
"Zanin chu enge i tih dawn tâk?"
"Ka awm mai mai ang"
"Chuti tih tur i neihloh chuan lo leng rawh"
"Zan dangah le, chhuah lawk ka ngai a"
"I van phakar tak, nula rim i tum ni maw?"
"Tum nang le".
.
"Chuti min lo hrilh chiang ve la i tihtur"
Ka han inngaihtuah zet a, chutah
"Mesti thlân tlawh ka tum a"
"Zanah maw?"
"Aw"
A reh deuh vang vang a,
"Chuti ka lokal ve dawn"
A va han chiloh ţhin tak...
.
"A ngailo"
"Kal dawn tho"
.
"A ţul bawk lo aw, thlân awmna pawh i hre lo"
"Chiah maw? I la hre mai ang" whatsapp aţang chuan a out nghal a.
Henu han luhlul dan hi chu aw...
Roomah ka lut a, zu chu a la tam ngang mai. Pawlh chawp a buaithlak tiin bottle dang ka la a, ka duhtawk chiahin ka pawlh a, um khat leh a chanve ngêt ngâwt chu a la ni e. Zanin na na na chu ka thlep hnawk anga ni mai lawm, khawnge ka hnâr ti khawpin aw niang... Chuti anih loh chuan Mesti thlân ka hmachhawn ngam nâng. Thlanmual ka hlau tihna phei chu a ni law.....
~
Dar 8 a ri ta maw tihah chuan bagah ka thil vel chu ka ak chhuak a, ka chhungten makti takin min lo en a, ka kalna tur te min zawt a, ka ne ne kual vel mai mai a, an ngaih chu a ţha vak lovin ka hria.
Kawt ka thleng tihah chuan Wendy message tho a lo thleng leh a,
"Thlanah chuan i kal dawn ta mi?"
"Aw, ka kal mek, enge i tih a?"
"Ka mu, rawn kal i phal bawk silo"
A reh leh ta hmak mai, a lungawi chiah lo aniang, mahse min hriatthiampui ang tih chu ka ring em em tho mai.
.
Mesti thlân chu min kawhhmuh mai bak kha ka la hmu bik lova, thlang deuhah, step sirah, ka chhinchhiah dan chuan Sailungvar thlân thlang chiah kha a ni. Zaninah ka sûn anga, tichuan phuba la turin ka inbuatsaih ţan tawh ang.
.
A thim kher mai, ka phone light chuan a ên thui bawk silo. Rei ve thawkhat ka zawn hnuah chuan sailungvar thlan chu ka hmu ta a, a vâr vo bawk a, thlân dang ai chuan thim thamah pawh a lo langsar khawp mai, chumi thlang chiah chu ka zawn ber a nih kha.
.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)