ABNORMAL LOVE BY Ar eL' Khawlhring

Moderator: Ar eL' Khawlhring

Ngaia
Site Admin
Posts: 25813
Joined: April 30th, 2016, 4:07 pm

ABNORMAL LOVE BY Ar eL' Khawlhring

Unread post by Ngaia » February 19th, 2017, 12:06 pm

ABNORMAL LOVE
BY Ar eL' Khawlhring
~

A link nen lo chuan khawiahmah copy/paste phal a ni lo.
A link nen a share dan
http://storyfb.com/viewtopic.php?f=2&t=917
A share dan tur nen lam kan inkawhhmuh chung pawh a, a full a whatsapp lama la copy lui in awm anih chuan Police ah FIR kan thehlut anih pawhin nangmahni chochhuah liau liau a ni ang...
Copyright © Ar eL' Khawlhring
All rights reserved
http://www.storyfb.com

"Hei a harh dawn e," hmeichhe pakhatin a tih ri chu ka hre riai ruai a. "Awi, ka van lawm tak em," midangin an tih chu ka hre bawk. Nu pakhat aw hian, "Mami, i pa phone vat rawh," a tih chu chianglo ruai chuan ka hre bawk a.
.
Ka han meng riai riai a, ka khawhmuh a fiah thei lo. Chêt ka han tum a, ka che thei reng reng lo mai. Ka taksa, ka ring thleng chuan cher khawng tlat ka ni tih ka hrethei a. Chêt ka han tum leh deuh chuan ka taksa khawilai mai pawh hi a na zawk zawk vek mai hian ka hria. "Nachhawkna khan chiu rawh," pakhat hian a rawn ti leh a.Chutah min rawn jection a, ka muhil ta siai siai a.
.
Ka han harh leh chuan ka mit pawh a lo fiah ta khawp mai. Mahse ka hawisawn thei chuang lova. Êng dul deuh ruai hnuaiah hian ka lo mu a, zan tlailam tawh anih ka ring mai a reh dan em em-ah chuan. Ka theih ang tawk chuan ka sir lam chu ka'n melh kual a, ka khum bawh chuan hmeichhe pakhat ka hriat ngailoh hi muhilin a lo thle lâk lâk a. Ka hrethiam lo ngei mai ka awmdan hi. Engtin nge heti hian ka awm theih! Engtia awm ve ringawt nge ka nih!!? Khawilai nge ka awmna hi? Ka va han bo tak. Han chesawn thei tal ila aw....
.
Nui har har thawm ka hria a, ka bul hnai lawk niin ka hria. Ka taksa chu a rawn na leh ţan tluk tluk tawh bawk si a, ka che thei bawk silo chu ka thlan hluam mai. Ka au chhuak thei bawk silo, mahse ka rûm chhuakin ka hria.
"Mama, i harh em?" Keimah min ko tih pawh a hma chuan ka lo hre lo,. "Mama i harh em?" tih pah chuan dimte in ka bul ami chuan min lo sâwi a.
"A harh anih saw, damdawi pek a hun tawh," tih ri ka hriat rual chuan hmeichhe pakhat hi a lo thleng nghal a, ka lo enchian chuan nurse a lo ni. A hmel lah chu a ţha reuh em em lehnghal, hmai sîn lampang deuh, ngo vah mai hi ania. A rual deuhthaw chuan attendant (nurse puitu) chu a lo thleng bawk. Min jection dawn chuan drip an lo khai tih ka hrechhuak chiah.
.
Zawhna zawh tuma ka han insanmar lai chuan nurse chuan, "Ţawng tum suh," min rawn ti a. Nia, ţawng pawh ka ţawng thei lo nge mawni le! A va harsa ve. Zawh tur ka ngah tehreng nen, mahse ka chau deuh chu a ni. Ka bp a rawn check zawh chuan, " Enge a an?" tih ri ka hria a. 'Mama' min titu aw kha ni ngeiin ka hria.
"A khawsik hi a sâng leh deuh a, mahse nachhawkna hian a chhawk vat ang, a bp erawh a hniam deuh, ngaihtuahawm lutuk a ni love, zaninah chuan tun bak damdawi pek a ngai lovang, harsatna deuh in neih chuan min lo ko vat dawn nia aw" a lo ti a, an kalsawn ta nghal a.
.
Ka inngaihtuah nasa hle mai. Ka bula awm nula chu ka hriat ngai mi a ni lova,'Mama' tiin min ko bawk si, ka awmna hi damdawi in ni ngeiin ka hria a, chupawh khawi damdawi in nge ka hre hek lo. Min ţhawng dawttu zawk erawh chu hei hi a ni, ka ngaihtuah ngial pawh a tunge ka nih ka hrechhuak thei tlat lo mai chu! Nachhawkna hnathawh vel kha aniang tia ka ngaihtuah lai vel chu anih ka ring ka muthilh zui tak kha.
~
Zing a ka han meng chu khua a lo var chiang tawh hle mai. Thawm a lo awm nak nak a tawh , ka hawisawn chak ţhin. Ka na pawh a hma ai ngawt chuan a ziaawm deuh e. Ţawng an phal bawk si lova, ka ngaihtuahna kawm leh ngawt mai loh chu tihtur dang pawh ka nei lo.
.
Ka ngaihtuah nasat viau pawhin ka nihna reng reng ka chhui chhuak zo ta lo mai. Ka chhungte awm reng reng ka hre lova, ţhian ka neih awm pawh ka hrechhuak zo lo. Ka ngaihtuah uluk poh leh ka buai uluk a ni ber mai. Engtia lo piangchhuak ve nge ka nih a, engtin nge hringnun hi ka rah chhoh a, engtin nge damdawi in khum niawm tak a ka lo mut ngawt ka hrechhuak zo reng reng lo mai le!
~
Ka dam sawt hle mai. Ka chhût dan chuan thla 1 vel zet chu ka awm ta in ka hria. Khumah ka ţhu thei tawh a, ka hawisawn thei bawk. Mahse ka aw bawm lam hi a chhia nge, ka ţawng chhuak theilo chu ka buai a, ka mang a ang ru em em mai a. Ka kerèk ruh lehlam hi a tliak a, ka ban ruh dinglam a tliak bawk, ka lu hi a kak nasa aniang, an tuam luk bawk a. Ka lu a rawn nat apiang chuan thil hriatchhuah hi ka nei dawnin ka hre tlat zel mai...
.
Hetih chhung hian ţawng insum ţhin viau hlawm mahse muhil reng lo ta chu an thil sawi ka hre ru zeuh zeuh a. Mi kut tuar, sawisak ka nih thu te, ka aw chhuak thei tlat lo te hi mak an tih thu te leh eng engemaw an sawi hi ka lo hre ve nual thin. A mak tih bak sawi tur ka hre lo ti ila, ngaihtuah tur ka hre lo a ni zawk e. Min sawisa tih pawh ka hre chuang lo. Mahse ka awmdanah chuan ka pawm lo thei silo.
.
Hetih chhung hian min enkawltu te nupa, an fanu leh a pasal nge bialpa zawk leh an fanu upa zawk te chu ka chungah an ţha em em a, inthiar ngaih chang pawn mahni in tithei hek lovi, min buaipui vek zel a, enge an hriat tehreng a hetianga ka chunga an ţhat em em nachhan te hi zawh ka châk em em a, ka theih hunah ka la zawt khawp ang. Nileng zankhua chawhma ţhak a zawhna zawh tur ka nei tawhin ka hria.
.
Nurse nula Wendy tia an koh ţhin lah chuan min ngaihsakin min be siam siam reng a, keipawh chuan ka ngaina ta khawp mai. Damlo dangte pawh chuan an ngaina tih ka hre mai, tu mai pawh chu a be peihin a nui sang reng a, mahse ka chan a chhiat vang deuh nge, min biak danah ka lungawi thei khawp mai a, ka khum bulah pawh a ding rei bik ţhinin ka hria. Damlo dang khum bula a din rei deuh chuan engmah sawi thei silo hian ka lo thik ve ziah, tikhawp chuan kan inchenchilh rei ve tawh a ni.
.
Ka lu chu a na leh tluk tluk ţhin a, min vaw na viau anih ka ring, an dressing rei ta tlauh tlauh em mai. Hetia damdawiin-a ka awm chhung hian mi pangngai chiah tawhlo ka nihna chu a langchhuak vak lem lo a ni ber ang chu, tu mai pawh chuan min be pangngai vek a, keipawh ka rilru a fim vek. Mahse a pawi ta ber chu ka tunhma nun engmah ka hre ta lo chu a ni. Hun a rei anga, ka la buai zual sauh ngei ang le...
~
Zan khat chu nurse Wendy chuan damdawi min rawn pek pahin, "Mama, naktuk atangin ka chawl rih tawh dawn asin, chawlh ka la a," tia min han hrilh mai chu ka hawi phâwk ho mai. Ka bp check leh mawlh mawlh pah a, "I ngaihawm dawn hle mai," min han ti chiah chu sawifiah thiam hleihtheih loh engemaw hian min man a, a kutah chuan ka lo dawm chat ringawt, zah pawh ka sawi thei lo. Ţawng thei ngat ila sawi tur ka van ngah tak em, khawvel hi a chuai rawih rawih ni nghal mai hian ka hria. Ani lah chuan min hriatthiam hmel takin ka bp a check pawh ngaihsak ta lo chuan ka kut chu a hmer ve vang vang a. Mahse a inhrechhuak thut a ni tehchêk ang chu, a kut chu a lasawn vat a, midang chu a melh kuak zak zak a. Chutah zawi sap hian, "Nurse hmeltha deuh deuhin an enkawl tawh che ang a, nuam i ti ngawt ang," a han tih chuan ka thin a lo ur ru ţeuh a, ka rilru hi a na vawng vawng bawk. Min han kiansan hnu pawh chuan rei tak chu ka chechâng duh eih lo. Chutihlai chuan min awmpui ţhintu Siamtei tia an koh chu a lo lut a, ka hmel hlim lo chu a hrethiam nge ni, min thlek ha ha pah chuan ka rizai chu a siamţha mawlh mawlh a, "Mama, mu tawh rawh le," min ti a. Mut chu ka mu mai, mahse dar 9-ah damdawi min pe turin a lokal leh dawn, naktukah a kal bo dawn si, engtin nge ka lo hmachhawn ang? Ka lo ngaina hman lutuk chu pawi hi ka ti em em a, khawhar turin min kalsan leh dawn si..
.
Sana chu ka melh chhen a, dar 9 chu a ri dawn ta. Ka'n maimitchhing vel a, hrelo ang deuh a lo awm a, lo tihtauh dersan chu ka tum a ni. Ke pen ri a rawn ri phei tlak tlak a, ka thin chu a lo inthûmrawn ve tluk tluk bawk.
"Mama, harh rawh le, damdawi ei a hun e," ka harh chuang lo.
Min awmpuitu nula chuan min han sâwi dat dat a, ka la harh ta chuang lo.
"A va mutui ve mawle, a khawsik en hmasa phawt mai ang aw," tih pahin nurse Wendy chuan ka Tshirt chu rawn hlîmin khawsik enna chu ka zak hnuaiah a rawn rawlh lut ta, a za lutuk chu ka phu uih a, ka nui chhuak ta vur vur a.
"Hmela, i muhil der a law?" tih pah chuan min awmpuitu nen chuan an nui ta vak vak a.
.
Damdawi ka ei lai chuan Siamtei chuan, "I va duty rei ve u Wendy, i tlang a ni maw?" A ti a. Wendy chuan, "Nia, naktuk aţangin chawlh ka tum si a, hei Mama hi a ngaihawm dawn em a ka tia, ka duty tlang law law mai," tih pah chuan min han nuih seih a, ţawngkamţha mai mah nise ka va hlim si êm.
A lêt leh lam chu kawngka a chhuah thleng mai chuan ka lo thlir zui vung vung a. A chhuak fel chiah ka hawi lêt leh chu Siamtei chuan mak tih hmel deuh hian min lo en kiau mai. Chutah a nui suk a, ka mutna chu min siamsan ta daih a, ka va ngei reuh tak.
~
Siamtei te chhungkua pawh hi an felin an va ngainatawm tak. A changin a nu, a changin a pa-in min riahpui bawk, an inchhawk kual zak zak chu a nia, an hah tawh ngawt ang, thla 2 dawn chu min buaipui tawh ania. An hmel lah hi ka hriat hnu, ka hmuh tawh hnu an ang em em mai lehnghal.
Ka chungchang pawh hi an hre ngat ang, tunge ka chhungte ni a, ka ţhiante, ka veng leh khua engkim an hre ngei ngei ang mawle. Nu leh pa thihsan ka lo ni anga, ka rilru tihnat hlauvin min hrilh duh lo a ni ngei ang, ka dam anga ka la zawt dawn khawp mai.
Inthlahrunna pawh ka nei lian ta hle mai hetiang chen ka tibuai ta hi. Mi kut tuar ka ni tih an sawi ka hre ru a, chuvang chuan em ni le min lainat em em le... Damlo kanna pawisa pawh ka dawng hnem narawh e. Eitur tui ţha ţha lah ka dawng nasa, mahse ei thei chuang hek lovi, Siamtein a ei ţun ţun ta zel mai anih kha, a thau kûng kûng maiin ka hria. Ka hming pawh hi Mama a ni ngei ang, min ko fo mai.
.
Muhil thei lovin ka ngaihtuah chhunzawm zel a. Wendy awm tawh lo tur chuan ka khua tihar ngei mai. Ka lo ngaizawng ru reng tawh zawk em ni?? A hmaifang sîn lam ngo siah mai, a mitmeng zîm lam meng sexy, meng please tia sawi tur ang chi, a hmui vàm ham mai, nui hmêl deuh sâng mai te chu ka ngaihtuah zui niap niap a. E...mahse ka lo inngaihtuah chiang lo a ni, ka nihna ka lo hai leh ta. Mi pawh phalo piangsual lek lek, ţawng pawh ri chhuak theilo, vanlai a tla ang mai a mi mal leh nunkhawhar, chhung leh khat pawh neilo hian ani nurse hmelţha leh luck ngawih ngawih tur tih hriatreng hi ka lo beisei ngawt em ni? Ka ngaihtuah thui phei chuan ka zak ta ngawih ngawih a. Nurse te chuan an damlo enkawl tupawh an ngaihsak ang chu, an duty a ni miau alawm. Theihnghilh hmak ka tum tur a ni.
.
Zingkar-a a haw tur min rawn tlawh kawi pawh chuan ka lo naupangchhia lehpek tawh a, ka lo beisei ruk ve ngawt avanga ka zak rilru bawk nen, ka muhil der tlat a, Siamtei hnenah, "Tiharh lo mai ang, min lo mangţha sak mai rawh aw" tia a chhuah dawn chuan arpui mitmen a meng chungin ka thlir ru leh dâwk dâwk tho si. Siamte in min lo hmu ru kur lehnghal, ka zak lutuk.
Nileng mai chuan ka mood a fuh thei lova, Siamtei pa lokal pawh chu mitmei pawn ka lo ûksâk peih lo. Chutah Siamtei pasal nge a ţhianpa zawk Alan tia an koh kha a lokal ve bawk a, an inbe ru deuh sur sur reng hlawm a, ser sur hlawm chuan. Ka muthilhsan daih asin le, an chawh e...
.
Ka harh leh chuan tlai thim dawn ruai a lo ni tawh a, Siamtei chauh chu a lo awm tawh. Buhhâwp ngei mai chu min han hlui leh a, ka va ning tak em...chaw rum êl âwl ei theih ka châk tawh mange.
~
Zingah chuan Siamtei pa chu hma deuhah a lokal thut mai a, nidang a office kalpah a lokal ţhin a ni sia mak chu ka lo ti deuh hlek.
Rinloh deuhin Siamtei pa chuan, "Doctorte ka dil a, in lama inenkawl theih tho a ni tawh bawk a tukţhuak eikham felah kan chhuak thei dawn anih chu, Mama pawn in lam nuam a ti zawk ang," a rawn ti ta mai a. Nia, Wendy awmloh hnu kha chuan damdawiin chu ka ning tawh takzet. Mahse in lama inenkawl an la tizui chu ka inthlahrung sawt mai, hmelhriatloh inah lehnghal..
.
Chaw eikham chuan bungrua vel an han khâwm a, tichuan kei wheelchairah min nawr chhuakin car i10 vâr thar nalh deuhah hian min hlâng lut a, chu chu Siamtei pa chuan a khalh a. A hnungah Siamtei nen kan ţhu thung a. Ka rilru te te chuan, "Siamtei te chu mi pangngai tak chu an nih dawn hi a," ka ti a.
.
Ka rin rilruk ang ngei chuan in kan thlen chuan an lo mi pangngai khawp mai. Inchhung chu a thianghlimin a zau ţha a, an bungraw hman a changkang hlawm hle mai bawk. Ka kal tawhna hnu a ang ka ti rilru hle mai.
An room min pek te chu a nuam kher mai, mahse ka inthlahrung tlat, tinge heti rêng rêng a ka chungah ţhat an chhuah mai le!...
.
Zanah chuan ka roomah chuan awl lovin Siamtei a awm reng a, Alana pawh chu police uniform nen a lo lut a, inspector lai a ni tih chu arsi pathum a bel dan aţang chuan a hriat mai a. Chutah, "Ţhianpa, i va ţha sawt tawh ve, a lawmawm hle mai, kan hna tunlai kan buai deuh a, duh angin ka rawn lang zing theilo" a rawn tilût bawrh bawrh a. Siamtei chuan ţhutna a lo kawhhmuh a. Hepa pawh hi a fel roh ngei mai, Siamtei pasal chu a nilo phawt a, a chhas a ni phawt ang.
.
Dar 8:30 vel a ri ta tihah chuan ka room kawngkhar chu a rawn inhawng a, Siamtei nu leh pa chu suitcase nen, bag khai chungin an lo lut hlawl mai a. Enge maw an rawn la khai belh teh ţeuh ni? A ngaihna hre lo deuh a ka hawi lai chuan Alana chuan kawngka lam hawiin, "Welcome nurse," a han ti a. Kawngka lam ka'n hawi chu mak tiin ka kà ho mai. Wendy chuan min lo nuihsâng chung hian, "Min lo ngai tawh em Mama?" a rawn ti ta. Ka hamhaih zia chu pui tak a ni. Ka chhungte lam ka'n hawi leh chu an lo nui sung hlawm mai. Chutah chuan ka hrethiam ta, an tum lawk sa vek a lo ni. A hnu a an titi chhunzawm dan aţang chuan ka khua a har tih an hria a, Wendy laka ka awmdan te, a haw tur ka melh vung vung leh a haw hnu a ka nungchang danglam lutuk te kha Siamtei hian lo hrilhin Wendy chu Siamtei pa chuan hlawh ţha zawk nen min enkawl turin a sawm chawt mai hi a lo ni. Ka zak bawk si, ka lawm bawk si. Damdawi in-a an inbe ru sur sur te kha hei vang lek hi maw lo ni... An va ngeiawm thiam tak, ti ila ka ngei phal thlawt lo.
~
Tichuan nitin zantin mai Wendy chuan min awm a ni deuh tawp mai a, ka changkâng chak khawp mai ka taksa chu. A changin Bible te min chhiarsak a, a ţawngţai a, min ţawngţai tir bawk a, ka ti ve zel mai a. Pathian hi a lo awm ngei aniang, kei tehlul pawh mahnia ţawngţai zauh zauh ka ching ta tlat, ka dam huai zel hian ka hre tlat zel lehnghal.
.
A chang leh thawnthu te min chhiarsak a, paranormal lam Andy K Zarzoliana ziah te, Hriata Tea ziah sazuk ki bung tih Thu Ngaihnawm leh Finna Khawvel group ami te min chhiarsak chuan beng dawh ha hian uluk leh ngaihnawm ti lutuk mai hian ka lo ngaithla a. A châng leh thildang min chhiarsak pawh ngaithla lêk lovin a hmel chu ka lo thlir deuh deuh a, a chhiar laia a hmui kechheh han nalh theih dan te chu aw...
~
Last edited by Ar eL' Khawlhring on Sat Feb 04, 2017 11:23 pm, edited 2 times in total.
Show post links
Last edited by Ngaia on February 19th, 2017, 8:35 pm, edited 2 times in total.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 19th, 2017, 12:06 pm

Ka taksa chu a dam ta khawp mai, ka kut pawh ka hmang leh thei ţan tawh a, ka lu ţhuina pawh an phelh tawh, ka ke hi a la pangngai theih chiah loh avangin crutch (zak dawh tiang) ka hmang a. Hetih chhung hian kan inchenchilh nasa bawk a, Wendy nen chuan kawng engkimah kan inpawh ţha hle. A chhuah bo hlek chuan ka ngai em em a, ani pawn min ngai der mai nilovin min ngai tak tak ţhin tih ka hriatna chuan min tihlim ve ţhin. Mahse ka nihna ka hriatchhuah theihlohna hian min ti ngui leh ţhin.
A awmloh hlek chuan ka khawvel hi a ruak ngawih ngawih a, a zim a, a chêp a, mal lutuk nia inhriatna hian min man a, ka ngui leh rawih rawih ţhin. Min awmpui tute hian min khawngaihin min hmangaih mai pawh a, ka la nung ve ţawk ţawk ni mai hian ka hria. Anni ho hi ka tan chuan an va hlu tak em aw.
.
Nikhat chu tukţhuan eikham hian Wendy chuan chhuah lawk a ngaih thu min hrilh a, midang an chhuah a lo ngai ve tho si nen keimah a in ka lo nghah a ngai dawn a ni. Ni e, ngaihtuahawm ka ni tawh hleinem tunah chuan. Chhun dar 12 velah a rawn haw hman tur thu min hrilh a, ka lung a leng leh dawn mange.
Ka khawhar tihtur hrelo chuan khum bula laptop min chhawp sak chu ka lo khawih kual vel mai mai a. A mak khawp mai, khawih fo ţhin tawh ang maiin bahlahna pakhatmah ka neilo.
.
Folder hran hran chu ka'n hawng kual vel a, chutah folder (2) inti, rename lêm loh ka han hawng chiah chu alawm le, mak hi ka ti vawrtawp thei lo.
Mipa leh hmeichhia inkutsuih riala an thlalak lo awm chu!!! Hmeichhia chu a hmelţha kher mai, a sam chu zialin a chhipah a bâwk a, a buang lam lek lek a ni. A nui sêng a, a ha rual var mawi em em mai chu a lang bawk a. Mo thuam famkim nena inthuam a ni bawk nen a chhe lo kher mai. A mak em em na chu a kutsuihpuipa chu tudangmah nilovin KEIMAH ka ni tlat mai !!! A chungah chuan bold letter in -
MALSAWMSANGA (Mama)
WEDS
MALSAWMTLUANGI (Mesti)
tih a lo inziak kalh mai le!!!
.
(Like leh comment te kha min lo peksak leh ula aw, click keuh pawh. A remchan chuan naktuk zanah chhunzawm ang aw...)
04.02.17------------------------------- Ar EL Khawlhring

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 19th, 2017, 12:07 pm

A mak em em na chu a kutsuihpuipa chu tudangmah nilovin KEIMAH ka ni tlat mai !!! A chungah chuan bold letter in -
MALSAWMSANGA (Mama)
WEDS
MALSAWMTLUANGI (Mesti)
tih a lo inziak kalh mai le!!!

ABNORMAL LOVE - 2
~
Ka makti lutuk chu ka bing mup mup a, minute 5 vel lai chu chechang lo hian ka awm a. Ka rilru a fim vekin ka hre bawk si, laptop screen te chu ka chûl thul. Ka back a, ka han lut ţha leh a, ka mitvai a lo ni awkawng silo. Nupui ka lo nei reng maw! A ni thei lovang, anih leh Mesti chu tunah khawnge a awm si? An sawi anga sawisak, mi kut tuar ka nih si chuan tinge ka bulah tunah pawh a awm loh le? Ngaihtuah tur a va tam ve....
.
Ka han enchian leh ngial hnu pawh chuan edit chawp mai mai a nihna engmah ka hmu zo lo. Mesti thlalak chu ka'n ennawn leh a, a hmelţhatna chuan ka mak tihna chu a hliah zo chuang lo. Mahse a hmel zawng a ţha a ni, han en mai pawh chuan a ngaihawm vawng vawng thei tlat a ni. Keipawh chu lang chhe lo ka in ti, inneihni te chuan nidang ai chuan chhiatloh chu a âwm ve reng.
.
Chutah ka piah mai a Wendy'n darthlalang tê a dah chu ka ban a, ka han inenchiah mai chu ka nuih za lutuk nui ri chhuak thei silo hian ka inkherh ngawt ngawt mai a. Ka thlalak nen chuan ka va danglam chiang tak, ka lo inzuah buk chhûm mai chu niin. Khatihlai kha chuan ka hmuihmul awmdante kha a vai pathian, ka khabe hmul lah a chinese master, ka sam lah rapper awmţha duhlo sam ang vel ni berin ka hre ta.
.
Mahse ka nui reilo ngei mai thlalak ka va hmuh leh chuan. Thil awmzia chu ka chhui chhuak ngei tur a ni. Aw...dam ver vawr ka va châk tak.
.
Chutia ka ngaihtuahna a vah kual mek lai chuan ka mit chu steel almira-ah chuan a fu ta chat mai. Chu almira chu heta ka awm hnuah kan hawn âwm reng reng ka la hre lo. Engemaw hriatchhuah tur thil te a awm takin tiin ka zak do tiang chu ka han ban a, almira chu ka pan ta a, midang an lo haw mai êm lawng chu maw...
.
Almira kawngka chu a lo inkalh lem lova, ka han hawng ta a. Ka beisei ang hmuh tur chu a van hmel fu mai. Thawmhnaw chu a inkhai ve dul a, mahse ka zawn rûk lehkha emaw thlalak lampang leh document pawimawh âwm ang ka hmu miah lo mai. Thawmhnaw inkhai ho ipte chu ka han zen dan dan a, engmah hmuh ka nei lem lo. Mahse coat chu ka han enchiang a, inneih thlalak a ka hak nen khan a va inan hmel si em...
Coat chu ka la chhuak a, laptop bulah chuan ka khai phei a, ka'n enchian chuan a inang ngei mai, mahse thlalak ania, a chiang chuang lo.
A lining na ipte chhunglam ka han zen leh a, thil ka zuk dap fuh tlat. Ka han la chhuak a, silver zungbun mawi tak a lo ni a. Uluk zawk a ka'n enchian deuh chuan tereuhte a thil inziak chu hmu in ka han chhiar a, M&M tih a lo ni a. Enge a awmzia ni ang aw? Ka ngaihbel nge ni, Mama & Mesti tihna a ni chiang ang le!!
~
Tlem chuan ka thil chhuiah chuan hma ka sawn deuhin ka hria. Nge awmze awm lovah ka intihah thlawn zawk le? Umn, ka kal zel ang, ka kal zel ang. Thil inthup chu he inchhungah, he ka khawvelah hian a awm chiang a ni.
Coat ka khai ţha leh tur chu coat hma lam, vei lam âwm zâwn vel a ipte tepen awm chu kuthlei thilthu-ah ka han zen leh kher a, dap fuh zawng ka nei leh ngei e. Ka han zen chhuak chu pangpar lem violet rawng hi a lo ni leh tlat mai. Laptop awmna lamah chuan ka bâi phei leh sawk sawk a. Thlalak a coat hma a ka pangpar târ nen chuan a rawng a lo inang leh ta thlap mai le, hai rual a awm lo. Chu inneihna chu tider mai mai kan nih ngawt si loh chuan khawnge Mesti ka nupui chu a awm tak ang le?? Pasal dang min umsanin kei a rilru hrehawm hian intihhlum ka lo tum ang a, tichuan tuna ka dinhmun hi ka lo thleng ta em ni ang? Anih leh inneih thlalak te, Mesti sulhnu te a va han vâng em em si ve, thlalak pakhat computer ami lah chu tihpalh thilthu a ka hai chhuah liau liau chauh a ni bawk si... Ka awmna chhungte hian an hria anga, kei fahrah mai lehnghal chu min khawngaihin min thupsak an tum aniang tih chu ka rindan ber a ni ta.
~
Mahse rinhlelhna ka la nei cheu mai, engkim fiah felfai taka hmuhchhuah dap ka duh. Ka nihna chu engang a mawilo leh bawlhlawh pawh lo ni palh se a tawp ka thleng law law tur a ni. Rilru hrehawm takin ka awm rei ve tâwk tawh alawm.
.
Haichhuah theih dang a awm beiseiin almira chhung chu ka dap leh ruk ruk a, beisei tur dang a vâng ta viau mai. Safe lah a ruak hiau mai si. Mahse a lang theilo lam chu ka han zen chhin reng reng e tiin ka han dap chuan engemawni ka va dap fuh ta tlat mai. Ka lakchhuah pah chuan thil ka thai ri tel rak bawk.
Chu chu ka han la ve ve a, ka han enchian chuan diary te tak tê leh lehkhathem tereuhtê a thil fun a ni. Lehkhathem chu ka han phelh a, engdang nilovin memory card 16gb tih inziak hi a lo ni a, hmanna tur ka neih ka hre love. A ngaiah ka va dah leh ta a, chutih pah chuan diary chu a tangkaina a awm ring em em lo mah ila ka han keu ve reng reng a.
.
Kutziak awm chu ka hmuh hnu ang riauva hriatna ka nei, mahse hetiang niawm anga hriatna hi chu ka neih fo kha, tak tak pawh va ni lehpek suh.
A ziaktupa, diary neitupa chuan a ziak thatchhe ve awm hle mai. A chang leh bible chäng chhinchhiahna te a lo awm a-
.
January 5
Kan band kan jam, kan hlim hle, kumin a kan inhmuhkhawm vawi 1 na a ni.
.
Feb 2
Charity concertah kan perform, a va nuam em.
.
Feb 11
Harhna ropui...
tih hla note a lo awm leh daih a, ziak taima lo ve hle mai.
.
Feb 25
A chhe lo lutuk, kan veng ţhenawm mai a lo ni zui... M kha...
---
M maw, awmzia a nei deuh, ka keu lehnghal vat a.
.
March 2
M inah ka leng, a va nuam tak, hmeltha si, fel si, ka theihnghilh lovang.
.
March 28
Hmangaih biahthu kan inhlan, khawvel a mi hlim ber ka ni ang.
.
Ziak awm lovin a blank phei char char a. Phek lai tak velah chuan

April 6
Mesti, i tello chuan tlaini ka leng zo lo...
M
Le... !! Mesti hming a lo lang ta...
Phek dang ka han keu thuak thuak a, thildang hmuh tur a awm mai lo, ngaihtuah a va thui duh tehreng ve...
~
Kawngkapui a rawn ri rak a, pên thawm a lo awm a, bathroom lam a kal thawm hriat tur a rawn awm ta. Chutih chhung chuan ka inkhar fel zung zung a, diary erawh ka lukham hnuaiah ka dah hmiah thung, khum a lawn kai leh pah chuan laptop pawh ka shut down (tihlum) ta nghal a.
.
Ka room kawngka a rawn rik chuan ngaihsak awm lo deuhin ka lo awm a. Chutah Wendy chuan aw han then (thian) kharh pah chuan, "Mam, i lo ţha em? Ka ngai tawh lutuk che a, ka tum aiin ka rei palh," tih pah chuan a rawn nui lut sâng a, a va nalh tak, a chhe lo tawp, ka bul a rawn thut pah chuan ka biangah a rawn chuk zauh a, ka mûr chuai mai.
.
Ka hmelah chuan vei nei tih ka lo hriat deuh nge ni, "Mama, i va hlimloh hmel ve," tih pah chuan min rawn kuah a. Kha thlalak leh thildang kha hmu fuh lo ila chu ngai em emin ka lo kuah lêt ngei awm si a. A ngaihţhat nan ka nui lui sak ringawt a. Mahse thinlung chhungril hlim lo chu a hai bik lo tih ka hre mai.
Chutah, "Thil ţha deuh ka lo hawn che asin, ka leave lak a zo tawh dawn sia, naktukah in lamah ka haw ve tawh ang a, a tuk lehah hnaah ka kal chhunzawm tawh dawn a, ka ngai ngawt ang che," ngui raih hian a ti a. Chutih pah chuan a thil hawn chu a rawn phawrh a.
Ekhai a...mobile phone var nalh zet mai a ni tlat mai le! Chutiang reng reng ka beisei pha lo. Ka'n enchiang a, Xiaomi Mi Note 2 hi a lo ni a. Ka lawm lutuk chu ka kuah vawng vawng a. Ka phone thar chu ka han en leh vel a, chutih laia Wendy lam ka hawi leh chuan hmangaih hmel zet hian min lo en vawng vawng mai.
A man tur awm ang te ka lo chhut kual vel a hre ve hawt lo chuan, sing chuang fe man chu a ni dawn sa tih chu ka hre ve mai, chumi lei tur chuan a chhuak a lo ni...
.
Zawhna mitmeng taka ka va melh chu hrethiamin nui sêng chung hian, "A man sawi a ngai lova, ka pa in pawisa min pe a, min pe hnem lutuk a ka duh lo chung chung," a tih lai chuan ka hrethiam lo tih hria in, "Aw, ni tak, ka pa Rova, Siamtei pa, i pa," nui har har pah chuan a ti ta a.
Ka hrethiam ta, Pa Rova chuan min enkawlna man, a hlawh tur chu a lo pe a, chu chu ka tan tiin ka phone tur lei nan chuan a lo la hmang zui anih chu!
Ka han ngaihtuah chiang a, chawlh a hmang tur chu ka hlim loh hlauvin hahthikûlin min enkawl zui a, ka tan vek a thawh hnuah a hlawh neihchhun pawh ka tan a lo la dah vek chu ania. Aman chan tur a neih ka ring lo reng reng.
Chutiang em a inpekna leh hmangaihna ka ngaihtuah chian chuan ka mittui hi a tla sawk a, ka pawm thut a, ka fawp ta vawng vawng a. Ani pawh chuan a thiam ang tawk chuan min chhanglet bawk a, a insût ve deuh fap fap bawk nângin a hlim hle a ni tih chu a hmel nungsarah chuan ka hrethei a ni.
.

~

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 19th, 2017, 12:07 pm

Mahse ka thil hmuh vang vek kha a ni, heti khawpa min hmangaihtu chu kei chuan khawngaihna chauhvin ka en tih ka inhria. Keia kara engmah tithei lo, ţawng pawh ţawng chhuak theilo kebai la ni zui hian ka khawngaihna chauh maw a hlawh tak, khati khawp khan ka star thin zawk kha a ni sia...ka va'n inten tak em.
'Thlalak vang vek kha a ni, mahse ka tum reng vang a ni lova, ka tihluih a nilo' tite in ka inthiamchawp leh ta vel mai mai a. Ni e, hriat ngailoh ka nupui ni si kha ka lo hmangaih hman em atin ni, a hlimthla chauh mah nise.
.
Wendy'n eirêl a ţan aţanga rei pawh nilovah chuan Siamtei chhuak pawh chu a lo haw a, eng engemaw an sawi a, an hlim hle mai, mi pawh an rawn ngaihsak hman meuh lo, mahse chu chu ka duhdan zawk a ni.
~
'Mesti, i tello chuan tlaini ka leng zo lo'.
Chu thuziak ringawt chu ka bengah hian a ri tlut tlut reng a. Tu ziah nge ni ang le, a hawrawp lah kha ka hmuh tawh hnu a ni ngat mai.
Dawhkan a pen chu ka la a, diary chu ka phawrh chhuak a. Ziak hmasa pawh ennawn leh miah lo chuan ka han ziak ve ta a, ka kut chu a lo khawng ngang mai, pen ka hmang ngai si lova...
.
Mesti, i tello chuan tlaini ka leng zo lo..
Ka ziah zawh chuan diary a inziaksa nen chuan ka han enmil a.. Ekhai, a danglamna a tlem hle mai, ka ziak chu a chhe zawk deuh emaw tih tur chu a ni na in 'a' ka thai dan te, 'e' ka thai kual dan zawngte chu danglamna pakhatmah a awm lo. A hma ami chu ka ziah tho hi a lo ni thei reng angem le???
.
Ka awmdan chu mak ka ti tawlh tawlh mai. Ka hun hmasa hre tawh hauh si lovin thiltihdan tur leh awmdan tur chu zirtir chawp ngai miah lovin ka hre vek lawi a, ka che zei thlap thova. Mahse ka bul ami ten hman deuh a thil thleng emaw, mi hming emaw sawi se ka bo hu zel mai. Mahse damdawiin atanga ka chhuah hnu kha chuan engmah hi hriathmaih emaw theihnghilh emaw nei tawh lo khawpin ka rilru chu a chak leh lawi si.
~
Chhungkhat boss pa Rova leh Nu Muantei an lo haw lai chuan Wendy aw chuan, "Ka pa, in lo va thleng hma angreng ve, hei kan inrêl peih ţep e," a lo ti lang lang chu ka lo hrethei a. Pa Rova chuan, " I nu office a bang hma ve thei hlauh a, nidang ai chuan kan hma ve anih hi," a lo ti a.
Aw...Wendy hi chu a fel mang tak e, 'ka nu, ka pa' tiin a ko thei mai ania, kei ve hian ţawngthei lo chung pawn, 'pa Ro, pa Ro, pa Rova, pa Rova,' ka lo ti rilru ve mawlh mawlh chu a ni tak si a le, kan va inang lo tak em.
.
Pa Rova te rêng rêng pawh hi an rilru a ţha mange. Heti khawpa ka bawrhsawm chung pawh a min buaipui nasat dan te hi, nurse thlengin min la rawihsak(ruai) zui a, tu tih pawh an hriat hleihloh hetia min dawngsawng mai hi an rilru a ţha mange aw, ka dam chian hun chuan rulh lêt tur ka ngah mange te ka lo ti rilru mai mai a.
.
Ka room kawngka chu lo hawngin Siamtei chu a lo lut a, "Mama, chhung inkhawm kan hmang lawk dawn ami ka pa in a tia, chaw ei kan peih tawh a," a rawn ti a.
Ka inhawl phei bauh bauh a, pa Rova chu hun hmang turin a lo ding rân tawh. Ka mobile thar ka hum phei ve ţat ţat chu Siamtei chuan a lo hmu duh hle mai. Pa Rova a ding tawh si, zawhna min zawh hi a'n châk hmel mai mai khawp a, ka lo nui tut tut a.
.
Pa Rova chuan hun a hmang rei nek zui a, a awm ve tho ve. Wendy awm lai a chhung inkhawm hnuhnung ber a ni dawn si a. Wendy chu a fak em em a, 'Hei kan fapa' min ti deuh sek bawk a, ka va phulo em... Pa Rova ka tih rilruk thin chu ka thlak daih dawn emawni le... Chutah Wendy chu min rawn tlawh fo tur leh an fanu thar anih thu a sawi te chuan ka lo lawm em em a.
.
Pa Rova tawngtailai chuan Wendy zakah chuan ka va dek leh zauh thin a, ani'n ka malpuiah a rawn chum, a puam ţawlh ţawlh mai. A nuih chhuah ngam si loh, a va tihchi loh tak.
.
Chaw kan han ei chiah tih chuan Siamtei chuan, "Mama, phone thar i nei a ni maw, nge u Wendy ta?" a rawn ti ta mai. Wendy chuan pawi hi a lo tih hmel khawp mai a.
Zêp theih ni ta hek lo le, min leisak ve hrim hrim anih thu Wendy chuan a sawi ta.
Pa Rova chuan, "Ehe..pawisa i neih awm loh nen, engah nge i lo leisak a, leisak chu kan tum tho va, awmdam deuh se kan tia, saw laptop pawh a nei tho asin mawle, biak tur a nei tak tak dawn chuang lo, a kut a la dam chiang chiah lo kan lo tih deuh vang ania," a rawn ti a. Chutah "Engzat man nge ni reng reng a?" a han tih zawm a. Wendy chuan zawi sap hian, " Tlawm te chauh," ti ringawtin a chhang a.
Chutah ka bula ka dah reng chu 'Ka lo enchhin' tia rawn lak pahin Siamtei chuan, "Ehe...singthum man vel niin ka hria," a ti ta. Wendy chuan a lo khap hman ta ngang lo a ni.
Pa Rova chuan, "Khai aw... 25000 ka pe che a, i lo thawh belh ţeuh zui maw, a van zialo tak, kan hawi ngam dawn hleinem le" a ti ta hluai mai a. Wendy erawh a ngawi reng thung.
Chutah Nu Muantei chuan mittui hruk zauh pahin, "Wendy bawihte, i ţhianpa chu i lo va'n hmangaih em ve le," a rawn ti thung a. Wendy chuan boruak rawn thlak tum takin, "Ho lutuk, kan hlawh chhuak leh vat mai dawn alawm. Mama hi a luck awm lo sia, phone thar ţha deuh tal a neih loh ten," tih pah chuan a nui sen sen a, a va hmelţha reuh tak em...
~
Chaw kan eikham fel chuan Wendy nen room lamah kan lut phei a, a tuk zing chaw eikham a chhuak mai tawh tur anih avang chuan a insiam lâwk a, keiin phone ka lo khawih mai mai a. Thil hriatchhuah thut ka nei, almira-ah khan memory card a awm tak e. Engemaw tak a awm angem le...??
.
Mahse Wendy hmuh lai a vuah chhin chu a tihchi chiah dawn a hriat tlat lohna ka nei a, chuvang chuan thildang ka tihsan a.
.
Wendy haw dawn zan anih tawh bawk si, lung te chu a lêng lawk ruih mai. Siamtei a rawn lut ve a, Wendy thawmhnaw te chu a rawn thlehpui a. Unau inpawh leh inthlahlel tak ang mai hian an inpawh a, an nui dun vak vak reng a. Ka rilru-ah chuan laptop a thlalak mawlh mai kha a lo lang leh tawh, mahse an awm laia en chu ka duh tawh silo, ka lung a leng leh dawn chiang lutuk. Siamtei chu ka duh ai chuan a chhuak har hret, insum zo lovin ka lo en leh dûk dûk ang tih ka hlau tlat.
.
Dar 9 vel a rik chuan Siamtei chu a room lam pan chuan a chhuak phei ta a.
.
Kan hun hnuhnung a ni bawk a, Wendy chu hlim taka siam ve chu ka tum tlat a. Thlalak mawlh kha en ka chak leh tet tet ang tih ka hlau ber.
Chutah inthiar tura a luh zawk lai te chuan memory card zawk chu ka rilruah a lo lang leh tet tet thung a, mawnga hawlh ang cheng ka ni leh tawh. Ka vuah vaih chuan kan endun leh a maw kha a ni ngei ang a. Thil pawi deuh tak a lo awm takin tiin ka insûm ţang ţang a, ka hah viau in ka hria.
.
A rawn chhuah leh pah chuan, "Chu, damdawi inah khan min lo star viau a maw?" tih pah chuan a rawn nui har har a. Siamtei khan a lo sawi vek a ni ngei ang, ka va lai reuh e... Ani pawh chuan min ngainat bik tlat thu te min han hrilh chuan ka lawm hnuhnawh kher mai, chutih rual chuan inneih thlalak mawlh kha rilruah a lo lang leh ţhin, a hrehawm mange...

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 19th, 2017, 12:07 pm

Dar 12 a rik te chuan wai wai te kan han chhum leh vel a. Kan ei zawh chuan mut tumin kan insiam a, kei chu ka mu fel ta thên mai
Wendy chu parda zar phenah chuan a va inthlak rak rak a, chutah mut thawmhnaw nen chuan a rawn chhuak phei leh a. Ka bulah chuan rawn pheiin ka biangah a rawn chuk zauh a, 'Mangtha aw' a ti dawn a maw tih nakalai chuan, "I bulah ka lo riak ve dawn aw," a ti ta mai..
.
Lo hnar teh ţung chi a ni bawk si lova. 'Umn' tih nan a ka lu ka lo buk zauh rual chuan rual chuan a lo inthawlh fel der tawh.
Kan inkuah chial a, ka titipui thei der bawk silo, a van hrehawm tak, engtikah tak kiang ang maw??
Ka ke na hre chang lek lo chuan kan han let dun leh thial thial a, a chang leh kan in 'muah' a. Mipa leh hmeichhia inkhan chial a riak dun ta chu rilruah sual a lo lut lo thei bik lova, mahse ka rilruah thlalaka ka nupui lem ka ti dawn nge, Mesti a lo lan apiangin khap daihin ka awm hram hram ţhin.
.
Wendy pawh chuan, "Kan inneih hunah thianghlim takin la hmang aw," a la ti ta sauh sauh bawk nen, muah velah chuan lungawi kan zir a, kan hlim em em tho mai, thawmhnaw nen ve ve kan mu a, a sesy lo angreng. Ramri pel si lovin, a tûk inţhen huphurh tak chung leh kei phei chu hmabak a ka nihna diktak hailang a, chhui chhuah ngei ngei tum rilru tak chungin kan muhil ta siai siai a.
.
"Ka â lo, ka â lo...kal bo ru"
Min thlirtute lah chuan hmuhnawm thlirin min thlir ţhup mai si, ka mang a va ang tak em. Chutihlai chuan ka darah a dimtea min rawn khawih a, ka han en chuan Mesti a lo ni reng a...
(To be contd/-) 04.02.17

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 19th, 2017, 12:08 pm

Min thlirtute lah chuan hmuhnawm thlirin min thlir ţhup mai si, ka mang a va ang tak em. Chutihlai chuan ka darah dimtea min rawn khawihtu an awm a, ka han en chuan Mesti a lo ni reng a...
ABNORMAL LOVE - 3
Mak ti deuh a ka en lai chuan kalsawn a tum ta mai a, "Mesti, Mesti tiin ka ko vak vak a, chuveleh a ral ta riai riai a.
Ka tâl nasa nge ni, ka ţang lutuk aniang, ka harh zawk chu ka lo thlan hluam mai a, hah takin ka lo thaw huam huam bawk. Min si deuh rial chuan ka lam hawiin thlamuan hmel tak hian Wendy chu a lo thaw sêk sêk a, ka khawngaih reuh hle mai, kei ang tehchai min la thlamuanpui ve chu a ni sia.
.
Ka mumang chu ka ngaihtuah zawm a, mak ka ti hle mai. Miin mi â tiin min thlir luih luih mahse ka ţawng chhuah ve theihna leh Mesti ka tawn theihna tur anih dawn phawt chuan kha tawnmang kha man(g) chhunzawm leh mah ila pawi ka ti therte lo. Kan intawng leh dawn tihna em ni ang le? Ka bul a nula thlamuang tak leh min thlahlel tak a mu sêk sêk mai ka han en leh chuan ka ngaihtuahna te chu aw.....ka inthiam lo ţhin mange.
A chalah ka fawp zauh a, ka thawhsan ta a. Zing dar 4:30 a lo ri der tawh, Wendy nen a kan ţhenna kawl a lo eng ta.
~
A tana ka tih ve theih tawk tiin Wendy thingpui tur ka lo va lumsak ve a, bawnghnutê te chu ka va pawlh hnem tak e aw, chini lah thirfiante 3, cial chu a ti ve ngawt ang.
"Min lo thawh khalh a ni maw, a va zahthlak ve," tih pahin a mit a nuai chat chat a, thingpui chu a han in a, engmah sawi lovin a ner nang nang a, a nui tet tet a, "I va fel em em, a thlum tui hle mai," a ti a, ka lo lawm ve hle mai.
"Hetianga mut i duh te chuan cheng dun ta ila ka thaibawih awm mange," tiin ka lo fiam rilru ţhuai ţhuai a, ţawng chhuah theih ka chak thin ngei mai. Thawh hlim atang chuan kan infiam a, Siamtei a lo thawh hnu phei chuan ei kan rel hova, ka theih ang tawk chuan ka lo pui ve a. Chaw eikhamah a kal tawh mai dawn si, ka lung a va leng lawk reuh tak em.
.
Chaw eikhama a inphih fai laite chuan ka lo ngaihtuah thui leh hle mai. Min hrethiamtu ber, ka hlimna neih ve chhun chuan min chhuahsan rih dawn ta chu ania. A van hrehawm dawn ta ve.
~
"U Wendy, i inpeih tawh em? Ka pa a hman tawh a," Siamtei'n a rawn ti lauh lauh a.
"Aw, ka lokal dawn," tih pah chuan hmanhmawh fe in a lo phei a.
"Mam, ka ngai dawn lutuk che, ka hmangaih che," tih pah chuan min rawn fawp chawt a.
"Ka hman apiangin ka rawn tlawh ang che, ka pa khan a phal kha maw," tih pah chuan mittui tling deuh pam si hian a nui seih a. "Mangtha aw," tih pah chuan min chhuahsan ta a ni.
~
Wendy han kal ta chu ka ruak huai hian ka inhria, ka khua hi a har veng veng a, engkim mai hi an chawl ţhuap a, an hlui bul vek maiin ka hria.
.
Ka tihtur hre lo leh ka lungleng lutuk chu ka mu tawp a, ka maimitchhing vang vang a. Damdawiin atang khan ka han ngaihtuah lêt leh a, ka khua hi a har ngawih ngawih mai. Hei hi em ni hmangaihna chu le??? Mahse a ni thei lovang, ani aia ngaihsak ka nei tlat.
.
Hriatchhuah thut ka nei... Safe chu ka va hai rawk rawk a, memory card chu.. Hmuhchhuah tur neih kha ka inbeisei hle a ni lawm ni kha. Ka han kheuh hawng a, ka han vuah a, a lo lang ta ţhat mai. Single pal ngheng a thla ka lak pawh a lo tam narawh e. Mahse chu chu ka hmuh duh ber a ni hauh lo. Chutah ka mit la chat a awm ta, Mesti nen a kan lakdun ngei mai chu!
Ka han en zel a, kan lo la dun hnem ngang mai. Khawi hmun hmun nge tih erawh ka hre lo. Nun zawng kan lo chên dun tawh chiang mai le.
Ka han en zel a, Siamtei nena kan thlalak te pawh a lo awm nia! Ani nen pawh kan lo inhre tawh chiang anih hi.
Eheu, hei Alana nen pawh pawh kan lo la dun reng mai. Mahse mak ka tihdan pawh a ziaawm deuh tawh, engkim hi a mak vek dawn tho ka tan chuan.
A dang chu ka han en leh thuak thuak a, ka hriat ngailoh hlir an ni thla ka lakpui te chu. E, pahnih, pathum vel hi chu ka hre leh si e, hmanni pawn ka dam lo min rawn tlawh kha. Ka lo hriat awm vel mai mai anih tak kha mawle, ka ţawng chhuak thei chuang si lova, ka hre lo tih pawh an hre tawp nang...a ţha letling phian e.
.
Video vel ka'n en kual leh thuak thuak a, ka guitar perh, ka zut lai ka hmu leh ta tlat mai le, tu lo lak tak ni ang maw.... Mahse, a dik ang, diary-ah pawh khan kan jam thute kha ka chhiar chiang alawm. Kha diary kha keima ziah ngei chu anih hmel viau si kha mawle.
.
Phone chu ka dah a, ka maimitchhing leh vang vang a, thil reng reng hi a lem huih vek mai hian ka hria. Mi â diktak chu ka lo nih hi. Mahse ka â lo, chutiang turin ka inphal bik lo.
~
Chutiang chuan khawhar takin ka hringnun chu ka hmang chho ve nawk nawk a. Tlai lamah Siamtei a lo haw hma ţhin hlauh zawk a, ani chuan min kawm hlim ţhin. Mahse thla kan lo lakdun tawh reng thu vel kha chu ziak pawn ka zawt lo. Pangngai hmel takin ka awm ve tawp dawn, an hriatchhuah hma chu....
.
Mikhual kan nei tlat mai, mahse ka'n hriatchian chuan pa Rovan driver thar a lo nei chu niin. Ka khawhar lutuk hlauvin office kal leh ban hunah bak chuan in lamah an awm tir ve chawt a, a phûnglûng viau roh lehnghal. An sawidan chuan an chhungte ve tho thingtlang lam mi a ni awm e. Chhun lam a kan han awmdun hi chuan ka khawhar pawh a nêp sawt ţhin. Nuih hi a ti za em em mai a, a han khulh ve zauh chang phei chuan a phawk hi a chhuak zual thin a, zaizir hian ka bawl ve e ka tia, ka hlimpui ve hle ţhin. Inchung room, ka room zâwn chiah hi roomah an pe a, zai hi a play dup dup a, a kel râwl takmeuh hian a lo zaipui ve a, mahni hian ka lo nui leh vur vur ţhin.
~
Wendy nen chuan whatsapp lamah kan inbe deuh reng a, zingtin min rawn wish a, mut dawnah min rawn mangtha thlap zel bawk a, min ngaih thu hi min rawn hrilh châmchî bawk thin. Kar 1 ah vawi 1 te, a changin vawi 2 te min rawn tlawh a, min tlawh khât hi ka ti ţhin, ka lung a lo leng hman em em zel mai a ni.
~

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)