BEISEINA (Heart Touching)

Moderator: Ar eL' Khawlhring

Ar eL' Khawlhring
Posts: 75
Joined: December 28th, 2016, 1:46 pm

BEISEINA (Heart Touching)

Unread post by Ar eL' Khawlhring » May 5th, 2017, 5:31 pm

****BEISEINA**** (Heart Touching)

A nu thlan dai riai mai chungah chuan a bawk thlawp a, lungchhe vankaiin a ţap hawm hawm a. A bul a lo ding a ţhiannu Sawmtei pawh chuan hnem ngaihna reng hre bik lovin mittui far zung zung chungin a lo thlir reng a.

"Ka hming chu Laldinsangi a ni a, 'Dinte' tiin min ko ţhin. Thingtlang khua, Aizawl atanga nikhat kal a hlaah hian kan khawsa ve a. Fanu mal ka ni a, unau pianpui ka neihloh avang leh tar lam fa ka nih avangin ka nu leh pate hian an theihtawpin min duat ve hle ţhin. Mahse kum 6 mi lek ka la nih lai chuan ka pa chu thing aţangin a tla a. Lu lei vit zawnga tla anih avangin ţhenrualte'n damdawiin panin tlanpui mahse a hmun thlen hmain min boralsan ta a ni.

Ka pa in min boralsan lai hian nikhua chu ka hre ve tawh tho nain a hunlai chuan ţap ve vak vak mah ila, han tawrh dan em em pawh la thiam lovin tawrh nachang pawh ka hre vak lo. Mahse chuta chinah chuan kan harsat a zual hle a ni tih chu kan nundan atangin ka hrethiam ve mai a. Chutia kan harsat zual chhoh tak avang chuan ka nu chuan amahin leipuite a siam a, mi chawhmehte a zuar kual bawk a, chu chuan kan intungnung ve hram hram a, sikul pawh ka kal theih phah ve hram hram thin.

Pathian malsawmna kan dawng a, ka nu hi a la hrisel that hlauh avangin middle school ka kal chhung zawng paw'n sum lamah harsatna lian tham lutuk kan tawk lova, ka zirpuite zingah pawh pakhatna ka ni zat zat thin. Mahse unau pawh nei lo leh pa pawh nei lo ka nih avanga hrehawm tih chang ka ngah thin mai.

High school ka rah ve tak hnuah chuan a lo hautak tawh bawk nen, kan khawsak a harsa lehzual sawt a, ka nu tar lampang a lo ni chho ve ta bawk nen, damloh zeuh zeuh a nei chho ve ţan ta a, ka khawngaih thei hle ţhin.

Tleirawl niin thingtlang lamah phei chuan nula hriatin min hre chho ve ţan a, khaw chengker lutuk kan ni bik lo nen. Ka rualpuite chu an incheina a nalh thei thin si a, kei lah thawmhnaw mawi leh nalh pawh ka neih zawh ve loh avangin ka inkiltawih a, thiltih khawm nikhuate hian kal lovah ka tlak mai thin. Mahse kohhran lam erawh ka nu hian thlah a phalloh avangin ka lang ve hram hram a, chutianga ka chhuak tih lovah chuan ka nu ka pui a, a bak zawng chu lehkha zir nan hun ka hmang a, pawl 9 ka zir kum phei chuan ka pawlpuite chuan min tluk lovin kumtawpah phei chuan ka result a sang fal nalh a ni.

Pawl 10 ka zir kum hian harsatna namenlo kan tawk a. Ka nu hrisel lohna avangin chawlh tawh mai ka tum rum rum hman a. Mahse ka nuin ka zir lehna tura pawisa tlem a lo khawl leh special scholarship ka lak vete hmang chuan ka kal chho ve leh hram hram a. A changin school ţhulhin ka nu ai ka awh a, chawhmeh phurte'n ka vak kual ve lawp lawp a, class phei chu ka kal chhe takzet a ni.

Kumtawp dawnah phei chuan exam thei tura kal ngai zat class ka kal tling lova, mahse kan zirtirtuten min hrethiam a, board exam chu ka hmachhawn ve ta a.
Matric result a lo chhuah chuan first divisionah ka pass a, distinction ka phak lohna pawh mark tlemte chauh a ni. Ka ngaihtuah lêt phei chuan distinctiona ka tling pha lo chu ka ui em em a. Ka nu dam ţha se, class kal ţhain lehkha zirna hun nei ţha ila chuan ka tling var varin ka inring ve. Mahse chunglamin a ruat chu keini sawisel theih rual a ni silo. A chang chuan Pathian lakah pawh ka vui ve lek lek thin a, mahse ka nu chuan Pathian dem hauh lo tura min tih thin avangin rilru hel ru deuh chung si hian ka phunnawi zui ngai lo.

A tawi zawngin sawi ta mai ila, ka nu pawh a lo dam chhoh ve leh tak avangin higher kal ngei turin min duh si a, ka nu ka khawngaih avanga bansan ka tum tawh chung chung chu min nawr luih tak tlat zawk avangin Aizawl lamah pawl 11 chu ka zawm ve ta a.

Ka patea, ka unaupa neihchhunte inah chuan ka awm ve chawt a. Amah hi pa zaidam, nupui ngamlo chi ti mai ang, hetiang mi hi anih avangin ka nuamsa lem lo hle, nuamsa tura kal ka nilo rêng bawk a. Mahse lehkha han zirna hun tha pawh neilo khawpin ka buai thin a. Inchhung sekrek khawih, insuk, eirawngbawl piah lamah vawkchaw chhum, pek leh tuichawi neuh neuh nen, ka kut a tla vek a ni mai e, nau awm a lo ţul ţhin bawk nen. Lehkha zir tura ka inbuatsaih ve meuh hi chuan zan dar 11 chho hi a ni zel tawh thin a, zingah hma takin, an thawh hmaa thawh lo ngai ţhin nen, ka taksa leh rilru pawh a rim tlauh tlauh hle. Mahse ka nu ka ngaihtuahna chuan huaisenna min pe a, hlawhtlin ngei ngei chu ka tihtur a ni.

Pawl 12 ka zir kum chuan mahni tawkah ka tituai a lo nalh ve tawh hle a, san lamah pawh 5'5 lai ka ni ve a, hêltu pawh ka nei ve neuh neuh mai. Mahse zirlai ka nih avang leh kan retheihzia ka hriat reng avangin ka lo um ê ngai lova. Diktak chuan ka classmate te chuan ngaihzawng an nei fer fur hlawm. Class in picnic kan neih nikhuate hian midang chu an nalh theiin incheina an nei tha thin si a. Hrehawm ka tih ka hlauh avangin ka kal ve ngam mang ngai lova, in lamah hna ka lo thawk zawk mai thin. Tichuan buai tak chung chuan pawl 12 kan exam a, result a lo chhuah chuan first ah ka pass leh hlauh mai a. Ka lawm viau rualin kal lehzelna tur kawng a ping tawh dawn nia ka hriatna chuan min tihnual leh vek thung a ni.

Result chhuah hnu feah ka patea-te phalnain ka haw ve hram a. Kum zet inhmu tawh lo kan nih avangin ka nu nena kan han inhmu chiah chu mittui tla pûr chung hian kan inkuah a. Ka tan hna a thawk rim tih hriat zet hian a lo chêr dêk a, a mitkhurte chu a tla dâk mai bawk. Chutiang ka han hmuh meuh chuan ka mittui hi dan rual lohvin a luang zung zung a. Chutah ka nu chu kuah pahin, "Nu, ka kalsan tawh lovang che. Zir zawmna tur nei pawh ni ila, a ţul tawh lo, i hrehawm rei tawh em mai, ka phak ang tawk hnate ka dil chho ve anga, ka thei ta lo anih pawhin eichawp kan zawng ve tawh mai dawn nia," ka han tih chuan ka nu chuan khawngaih hmel tak hian ka lu-ah min chul hliau hliau a.
"Mate, hei Pathian zarah ka hriselna a ţha leh tawh alawm, i zir thei anih phawt chuan zir zawm la, a ţul leh i inhlawh pah anga, kei chu ka lo inchawm thei em em ang Pathian zarah," a ti a. Kan retheihzia ka ngaihtuah chhuah leh chuan mahni inkhawngaihna lo chhuakin ka ţap hawm hawm a. Ka nu pawh chu a intipachang thei meuh bik lo, ţawng lo mahse a hnuk a ulh nasa tih ka hre mai.
.
.
Belh tur dang neilo khawpa baihvai kan ni bawk a, Pathian, kan innghahna ber hmaah chuan tlu lut lehin ţhingţhiin mittui tla zawih zawihin kan ţawngţai leh a. Pathian hma a kan inlan zawh hi chuan kan rilru pawh a thawl ve duak zel mai.

Tichuan ka nu nen chuan awmdun chhovin a ţul ţul kan thawk a, kan ei ve ţawk ţawk hi a ni ber mai.
Nikhat chu chanchinbuah, Singapore hotel pakhatah Mizo hmeichhe tana hnaruak a awm thu leh receptionist hna mi pali tana a ruah thute, pawl 12 pass chin an duh thute ka chhiar fuh a, hlawh lah keini ang tan phei chuan a ţha nasa mai si a, ka rilruah hian a awm veng veng reng a. Mahse dilin, lo thawk ve thei dawn ta pawh ni ila, ka nu hi kalsan chi niin ka hre tawh lova, chuvang chuan ka nu pawh ka hrilh duh lem lo. Mahse kal hun dawn hnaih a lo nih chuan ka rilrua a awm len em avang leh ka ui rilruk em avang chuan, 'Kal dawn kher lo mah ila,' ti rilru chung chuan ka nu bulah chuan ka sawi chhuak ta nge nge a.
Ka nu chuan a lo bengkhawn khawp mai a, kal ve tur chuan min tur ta sek mai a. "Nu, a ţhat hmel em a, a uihawm tih thu-a sawi chhuak mai mai alawm ka nih, kal ka duh tak tak vang pawh a ni hleinem" ka han tih ngial pawh chuan amah zawk chuan, "Hei ka la hrisel ţha a, ka hrisel ţhat chhung tal hian kal ve phawt la, tlem tlem pawhin kan inkhawl ve theih phah anga, tuna hrehawm chu nakina kan hlimna tur zawk a ni tih hre reng ta che," min tih tak tlatah chuan ka inngaihtuah nawn leh a. Ni e, kal man ngai lovin min hruai dawn a, kum khat han awm ve phawt ila, hlawh a ţha angreng bawk a, ka inkhawl ve nual hman anga, 'Bul ţanna tur talin mawle,' tiin ka 'Aw' ve ta nge nge a.
Tichuan kal a lo hun chuan 'Dam takin,' tiin mittui nen kan inthlah liam ta a ni.

Saptawng lamah harsatna lutuk ka neihloh avangin nuam pawh ka tiin mi ngainat ka hlawh chhova, hotute duhsakna pawh ka dawng nasa hle mai. Ka thawhnaah tak phei chuan Mizo thawk ve pawh an awm lova, ka kalpui thenkhatte chu mi in-a inhlawhte an nih daih avangin chanchin pawh kan inhre zui lem lo.
Thla 5 lai ka thawk ve ta a, hetih chhung hian ka lung a leng theiin ka mittui a tla ru fova. Ka nu hi ka phone fo bawk a, mahse phone a neih loh avangin ţhenawmte phoneah ka be mai ţhin a, inthlahrun a na duh khawp mai. Phone zawng ka leisak dawn chiang khawp mai, thlalehah ka thawn ngei ngei ang ka ti rilru a.
Accomodation free vek anih avangin pawisa ka hmang ngai mang lova, ka inkhawl zel a, ka inren thei hle mai.
Mahse nikhat chu ka nu phone lei dan tur vel ka ngaihtuah lai tak chuan thu thinţhawng zet mai ka hre ta thut mai le!! Kan ţhenawmnu hnen aţangin a ni a, chu chu ka nu a tluk buai thu a ni. Doctorte'n an sawi dan chuan taksa hah rimtawng lutuk vang ni berin an lo hrilh a ni awm e.

Chutiang chu kan dinhmun anih chhoh tak avang chuan haw lo thei dinhmunah ka ding ta lova, kan pute paw'n min ui chung chungin ka nu ka ngaihtuah em avang chuan a tuk maia haw tur chuan kan intifel ta nghal a.

Mizorama ka kir a kan khua ka thlen leh hnu chuan ka nu chu ka beisei aiin a lo harh tawh a, ka lawm hle mai. Ka thiannu Sawmtei chuan a lo awmpui a. Khawpui damdawiin ţha zawk panpui an duh viau laiin amah a inthlahrung nge ni, ngai a tih tlat loh avang chuan kan khaw damdawi inah an lo la awm a lo ni a.
Chutah kar khat damdawi in a kan awm hnu chuan ka nu chu a ţhat deuh tak avangin kan chhuak ta a. Sum ka la khawl hnem hman si lova, damdawi leina man velah a hek leh heuh heuh hle mai.
.
.
Tichuan kum 1 chhung chu eizawnna dang pawh dap ta lovin ka nu nen chuan eikhawp chu kan nei ve hram hram a. Nula ve lem chawhmeh zuara han chhuah duk duk thinte, mi tui chawi a inhlawhte, rawra chhu-a inhlawhte hi chu thil nuam tak chu a nilo asin. I rethei ngailo anih chuan i hrethiam pha ngai lovang. Ngaihzawng tih vel hi chu rilru hian a ngaihtuah ngam ve lo hrim hrim. Chutiang chuan hun han hmang leh mah ila, ka nu avang chuan Singapore lama let leh lam chu ka tin chhin tawh lo.
.
Kum a lo ral hnu chuan eizawnna leh khawsakna lamah nawmsak hret beisei chungin Aizawl lamah ka patea te ţhenawmah kan pêm ta a. Lehkha ka zir zawm theih nan tiin dawrtê, nepnawi dawr ka siam bawk a. Hetihlai hian ka phallo chungin ka nu chuan chawhmehte a lo phur chhuak leh a, chu erawh chuan khawsak a ti ziaawm viau mai. Mahse taksa hrisel lohnain ka nu chu a tlak buak chho zel a, duh ang pawh chuan a thawk thei meuh lo.
.
Hetihlai vek hian inleng tlangval ka nei ve zeuh zeuh thin a. Chung ho zingah chuan ngainat ve deuh pawh ka nei rilru ve. Amah lah a fel si, min 'Care' thei em em bawk a, a hming chu Mawia a ni. A rawn leng fo va, a polite bawk si, tlangval inleng dang ka neihte ai chuan ngainat pawh ka ngaina fe tawh zawk a.
.
Zankhat chu palai rawn tirin ka nu bulah an rawn ngenngawl nghal khawp mai. Amah hi neih ka hreh hauh lo, mahse ka nu kalsan chu ka hreh a ni. Mahse ka nu chuan 'Aw' pawh mai tur chuan min nawr ta sek zawk a. Anmahni milian chhung an nih chu thuhran, min hmangaih ve hle-a a hriat avangte, ka nawmsakna tur zawk anih beiseiin nei mai turin min ti sauh sauh a. "Mami, inngaihtuah chiang la, keiin rei pawh ka dampui tawh kher lo thei che a. Ka mitmen chhung ngei hian pasal nei la ka duh a ni. Mawia hi mifel tak niin ka hria a, anmahni lah neinung tak an ni bawk a. Ka awm lohsan hun che a hrehawm taka i lo awm loh zawk nan, i hreh viau anih loh chuan i neih a ţhain ka hria," a ti charh charh a.
.
Ka nuin chutia nei tura min duh avang leh amah u Mawia nen pawh kan lo inhmelduh ve avang chuan palai an lokal leh chuan hlawhtling takin kan hawtir ta a. Hei hi ka damchhunga ka thiltih sual lian ber a lo ni zui ta a ni.
.
Thlakhat kan innei hman awrh tih atang chuan inchhung khurah hrehawmna nasa tak ka tawng nghal a. Hmuhsitna, deusawhna engkim mai hi ka tawng a. A nu in min ankhum a, dawt a min puh a, min hauh hrep changte hian ka tuar tlawk tlawk a, ka pasal Mawia chu hrilh ve thin mah ila min chhan hi a tum ngai reng reng lo. Thlahnihna chhovahte chuan inchhung chu ka tan hremhmun a ni ringawt tawh. Inchhungah chuan Pathian hian hmun a chang lo hrim hrim a. An hausa a, mahse hlimna hi a awm lo reng reng ringawt.
.
Thla 5 vel erh awrh chauh kan la innei hman tihah min hringtu ka nu chuan thluak a khawsikpui lutin min thihsan ta ringawt mai a, hrilh a va'n hai duh chiang tak. Ama duhdana a damlaia pasal ka lo neite chu ka inchhir lutuk a, ka ţap vawng vawng ţhin.
.
Lêt leh ta lawk ila, u Mawia nen kan inneih aţanga rei vaklo hnuah khan u Mawia chu a nungchang a danglam ka ti ta hle mai a, a zia a thlak zeuh zeuh a, a zawi em em bawk a, nupa nun pawh kan hmang tlem. Hotea thinrima kut min thlakte a ching ta em em bawk a. Mak ka tih deuh em avang chuan ţhenawm khawvenga ka mi ngainat deuhte chanchin ka han zawt chiang chiah chu u Mawia chu no.4 addict a lo ni tih ka hrechhuak ta a ni. Mak ka tih deuh mai chu kha chen kha kan inzui ve a, ka ât vang pawh a ni ange, damdawi a khawih ţhin tih ka hre ngai lo reng reng.
.
Mak ka tih leh em em pakhat chu, u Mawia a ruih changa kut min thlak hian ka nu, u Mawia nu khan ka thlavang a hauh ngai reng reng lo, chawh min tih hmel takin min en thei tlat ţhin.
Damdawi a khawih tih ka hriat hnu phei chuan vanduai ka inti lutuk hi zan mut hnuah a ruka ţah loh hi ka nei ngai lo. Varandaah ka chhuak a, van lam ka thlir a, ka mittui hi a sur zung zung ţhin.
Ka nu pawh ka hrilh a, ţhen daih ka duh a, mahse a la reilo lulai bawk nen, ka nu chuan dawhthei taka awm a ţawngţaisak ţhin tura min tih avang chuan ka ţhen lo hram hram a.
Mahse a hnu lawka ka nuin min han boralsan leh chiah phei chuan ka tan vanpui hi a chim tak meuh meuh tawh a ni. Khawvelah hmangaihtu ka nei ve ta lo.
.
Ka naupanlai atanga ka nundan retheihthlak ziate ka ngaihtuah chhuak a, sawi vek sen pawh a nilo. Chutah tleirawl chhoh a rual pawh pawl pha lo leh inti nula ve ngam miah lo leh hrehawm reng reng a ka nundante ka ngaihtuah kir a. Chutah kan tan kawl a eng ve tan dawn chiah emaw tih laia beiseina aiah beidawnna rapthlak tak a lo thlen lehzel dante ka ngaihtuah a, ka hnuk a ulh a, Pathian pawh ka dem ta hial mai.
'Aw Lalpa, i awm ve si maw? Ka piang ve tih hi chu i hre ve si maw?' tiin ka ţap tlawk tlawk ţhin.
.
Mahse Pathian chuan ka hrehawm tawrh chu tawk a lo la ti awzawng lo aniang chu. Ka nu thih hnu lawk chuan ka awm a rawn nuam lova, ka luakte a rawn chhuak a, Pathianin naute, ka hrehawmna min chhawktu tur min pe ve dawn ta a ni ngei ang tiin midang pawhin an kalpui lohvin damdawiinah ka va in check up ta a.
'Lalpa, i va timak tak em aw, i chungah hian enge maw ka tihsual le? Kan chhungkua, kan thlahtute hian i pawi enge kan sawi le!!??' Nau ka pai a lo ni awzawng lo ka nawmsamloh chhan chu.... Hei vang zawk hi alawm, natna tihbaiawm Hiv positive ka lo vei anih chu!!!
.
Hemi ţum hi chuan ka mittui pawh a tla thei tawh lo, ka na lutuk chu ka mittui hi a hulin a hul phak tawh zawk. Ka thinlung hi a rûm a, ka melh ngai ka melh tlawk tlawk a. Inawhhlum a, thih ka châk, mahse mahni nunna lak chu ka ngam chiah silo. Pathian hnenah erawh thih ka dil fo mai.
.
Kan pa chu ka chungah a sual zel avang leh a chhungte min hmuhsitna ka tawrh theih piah lam anih tak avangin kan inţhen ta nge nge a. Mahse ka chhuah dawn pawh chuan an chhungkua chuan min ui der eih lo hrim hrim.
.
Ka ţhiannu ber Sawmtei hian Aizawlah pasal a neih ve avangin ka nu thlan tlawh puiah ka sawm a. Chhun laiah, ka nu thlan kan thlen meuh etawh chuan ka mittui ka lo sûm tawh chu ka dang thei tawh lo, chau vek khawpin ka ţap hial a, Sawmtei paw'n min hnem ngaihna a hre bik lo. Hetihlai hian ka nu leh pate khan Van aţangin min lo thlir ve ngei anga, an fanu khawngaihthlak tak min lainatna avangin an mittui a tla ve ngeiin ka ring.
.
Ka patea-te bulah chuan ka awm ve leh ta ren rawn a, a ţul angin ka pui ve leh ta a. Khawvelah hian beiseina pakhatmah ka nei tawh lova. Ka intehkhin dan berah chuan tawlailir, nunna neilo, kawng chhova an nawr kal, a nawrtu tihdan dan a kal mawl ve tawp ang mai hi niin ka inhria.
.
Hetihlai hian kan vengah team pakhatin camping an rawn nei a. Ka patea te nupa chuan lut ve tura min tih miau avangin beiseina pakhatmah nei chuang lovin ka lut ve a. Thute chu ka ngaithla liam ve mai mai a. Mahse kar tawp lamah Pathian beiseina chungchang an han sawi chuan min khawih ve ţan ta a. Pathian hmangaihna chungchang an sawite chuan a tirah chuan min ti hel a. Ngaihdamna chungchang an han sawi ngatte phei chuan ka luak a tichhuak lek lek zawk a ni. Mahse camp chhuah dawn zanah Pathian Thlarau Thianghlimin min han khawih takah chuan thlamuanna mak tak neiin chhandamna changin ka chhuak ve ta a.
.
Chanchin ka hriat zui dan chuan u Mawia khan kan inneih hma khan Hiv positive a lo vei daih tawh. Engmah min hrilh duhloh a min nei anih avang leh chumi aţanga kai ve ta ka nih avang chuan ka thin a rim ta em em a. Ka patea-te chu ka hrilh a. Ka chanchin hretu mi tlemte chuan ka patea hnenah FIR thehlut turin an ti bawk a. Mahse ka patea hi pa ţha duam mai chi a lo ni bawk nen, a tawpah chuan ngaihdam mai chu min sawi hmuh ta a. Ka thin hi rim teh mahse Pathian chhandamna chang a, ngaihdamna zir turin camp ka chhuak fel chauh a ni si a, chuvang chuan thu chu kan titawp ta a ni. Phuba reng reng keima lak tur titu Pathian kutah engkim ka dah ta mai.
Tichuan hei kan awmna vengte kan sawn ta bawk nen, ka chanchin hria chu mi tlemte bak an awm lova. Ka thian zingah pawh Sawmtei chiah ka hrilh a, chutah nangmah ka rin ngam che avangin ka hrilh leh ta che anih hi," tiin mittui tla zawih zawihin ka ţhiannu Dintei chuan a chanchin chu min hrilh ta a ni.
.
He thu hi rei tak sawi lovin ka awm a. Mahse hei ama phalna thlapin ka rawn ziak ta a, thu thluaithlum vak nei lem lovin ka rawn sawi mawp mawp mai a ni.
Mizoram hi zimtê anih avang erawh chuan hming leh hmunte thup a ngai a, tin anih ang diak diak a sawi remchang lo a awm bawk tih min lo hriatsak ula. Amah lo hre remchang in awm anih hlauh pawhin zawtin emaw, hmuhsit nana hmang lo turin ka ngen ngawih ngawih che u a ni.
.
Dintei hi a hmel a lo chhe lo bawk nen, hetia mahni in lama a kir leh hnu hian amah hrechiang lem lo hêltu a nei nual a. Mahse amah a inhriatchian em avangin ngaihzawng lam hawiin tumah a biain a en ngam ngai lo.
Hetihlai hian tlangval fel tak pakhat, amah enkawl pawh inhuam, hna ţha tak mai nei chuan a hmangaih bur mai le!! A chanchin zawng zawng amah Dintei'n chiang taka engkim a hrilh hnuah pawh a mipa hian a hmangaih em avangin a tawpah chuan 'Tiam tlat e,' chu an ti ve ta nge nge anih kha.
A tirah tak chuan Sawmtei nen pawh kan inthlahrunpui a, mahse Pathian rorel hi zawng dan theih a ni love, a mipa hian engkim hre vek chungin a hmangaih bur mai si a.
.
Pathianin hetiang taka thinhrik miah lova Dintei pawmtu hi malsawm sela, amah Dintei ngei pawh a beisei tlat ţhin Pathian chuan damna pein awmpui tlat se tih hi ka duhsakna leh ka ţawngtaina a ni e.
Tak tak a ni em? tia zawhna min rawn zawh chhen hmain hei thil thleng tak tak, amah ngeiin min hrilh a ni e.

Pathian beisei rawh:
A hmel a damna avangin
Amah chu ka la fak dawn si a. (Sam 51:5)

BEISEINA tih hla tawite ka phuah ve hi a satu tur diktakten an rawn sak chhuah hma hian in duh leh lo ngaithla 'Advance' ve teh u. A hnuaia linkah khuan in download mai dawn nia. Demo/Test liau liau anih avangin duh angin music pawh ka la khawih fel hman lo. A size 2.64mb lek a ni e.
.
BEISEINA
http://f22.wapka-files.com/download/a/b ... iseina.mp3
.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)