A GIRL WHO SAW THE FUTURE BY Ar EL Khawlhring (Completed)

Moderator: Ar eL' Khawlhring

Ngaia
Site Admin
Posts: 25813
Joined: April 30th, 2016, 4:07 pm

Re: THE GIRL WHO SAW THE FUTURE BY Ar EL Khawlhring

Unread post by Ngaia » August 13th, 2017, 1:44 pm

THE GIRL WHO SAW THE FUTURE - 7

Goggy-te huanah chuan hlim zetin kan inchhaih a, kan inum kual a. Tuite chuan kan intheh a, tleirawl hawklak ang mai hian kan te tuarh tuarh a. Chutah Goggy inringlo lai chu ka va man a, ka awmah ka kuah bet thlawp a, hetiang ang reng reng a enghelh nei lova Goggy nen kan hlim dun pawh hi ka la hre ngai lo.

Goggy chuan, "En teh duhlai," min han ti chiah chu ka phu zawk mai, ka ka deuh hau mai bawk a. 'Duhlai' tia vawikhat min kohna ania, a mak ve asin. Mahse chu chu ka mak tih chhan ber a ni hauh lo! Goggy hnung chiah ami chu a ni ka mak tih ber zawk chu ni. Camera-a thla ka lak rose par var pathum ngei mai khan hnuailam an lo hawi thap mai le!!! An hawi dan leh pianhmang inang vek chu a ni, a tir atanga min tibuai bertu pawh kha. Mak ti zeta meng chung chuan, "Goggy," ka han ti chiah chu ka mumang ram atang chuan ka harh hlawl mai a. Mak ka tiin ngaihtuah a tithui vang vang hle mai. Engemaw thleng tur zawng a awm leh a ni chiang mai le.

Zing kawl a eng det det chauh na a, ka mutna chu thawhsanin chahbi ka la a, studio chu ka va hawng rawk rawk a. Computer chu tinung nghalin camera nen chuan ka thlunzawm nghal a. Goggyte huana ka thlalak kual chu ka'n en kual zung zung a. Chutah ka lo chik miah loh thil ka hmuh chu, rose par var kha pathum chauh emaw awm ka lo tia, 'Pot' hran hranah chuan a dang pawh a lo awm nual mai. Mahse ka thlalak dang hovah chuan rose par var dangte leh pangpar hrang hrangte chu an par hawi dan a danglam lo. Chu pot pakhata par za ho chauh chuan a ni an awmdan thlak ni. Leitha emaw tui emaw an dawng tha lo bik anih dawn hi tih dawnin an par a uai bik chuang si lova. An pianhmang a inang bik vek bawk si. Thil tam tak min ngaihtuah tir na a, ngaihtuah chhuah tur erawh ka hre chuang lo. Ka ngaih a tha lo satliah mai mai anih dawn hi tiin ngaihtuah loh ka tum ta a. Chuti taka tlangval ve pui si, pangpar lawm nihte chu ka duh love a, thirchhia hralh tur pawh ka duh zawk.

Tichuan zing thingpuite ka lo va lum a, ka chhungte ta tur pawh ka lo siam sak diam a. Ka nu a rawn thawh chuan ka va intithei chiang mai mai tak. Dar 5 vela han thawh vah mai hi a lo hrisel hle mai tihte ka ngaihtuah phah hial a. Zing danga chin zawm zel atana tha ka tih em em laiin ka ngaihtuah chian chuan ka peih leh vak chuang ta lova.

Ka nu chuan, "Bawiha, i mu thei nange, kha thingpuite i lo lum tawh elo?" mak tih hmel taka mi rawn tih chuan, "Hengte chu ka zingtin dan alawm," ka lo ti a, ka nu pawh a khi suk ringawt.

Ka ngaihtuah tawh loh tehlul nen, zing chaw ei lai chuan ka mumang bawk chu ka ngaihtuah chhuak leh a. 'Umn, heti hrim chuan a dik dawn love,' ti rilru chungin Goggy pa office chhuah hnu velah ka va kal leh reng reng ang tiin rilru ka siam a. E, taka, Mawitei pawh an school chawlh lai a ni bawk a sawm ve ila a tha ang. Ani hian engemaw hriat a lo nei zawk maithei asin.

Dar 10:30 a rik chuan Mawiteite kawtah ka ding vang tawh. Mawitei pawh chu lo chhuak nghalin kan inphur chhuak nghal a. Goggy-te veng pawh a hlat loh avangin reiloteah kan thleng mai a. A dik a dik chuan han tihbuai chhen pawh ka inthlahrung khawp mai. Sorkarin Higher School zirtirtu an lak thar turah test ve a tum nasa mai si. Amah ngei paw'n a beisei pawh a tisang ve fu reng a. Chumi inbuatsaihna chu ngawrh taka a kalpui lai mek a ni si, va len lehnghal ringawt pawh inthlahrunawm duh angreng tak a ni.

Phone chuan ka han be hmasa phawt a, ani chuan huan lamah lo lut tlang nghal mai turin min hrilh a. Kan va hmuh chuan bung zar hlim duai hnuaia thutna awm bulah chuan dawhkan te nen lo inchhawpin lehkhabu a lo chap darh nuaih a. Nui sang chung hian min lo hui nghal zauh zauh va. A bula kan thut fel hnu chuan Mawitei chuan, "U Goggy, i va tang awm em em ve a," a han ti a. Goggy chuan, "Awi, Mawite, nizan accident thil vel kha ka ngaihtuah chhuak leh thin a, ka thil chhiar pawh ka rilruah a lut hleithei lo," a lo ti a. Mawitei pawh chuan, "Keipawh chu chiah chu, ka rilru a la luah tlat mai a, a hrehawm angreng khawp mai," a lo ti ve a. Kei erawh chuan ngaihtuah pawh ka lo ngaihtuah chhunzawm tawh lem lo. Ka mumang lamin ka rilru a luah hneh vangte pawh a ni ang.

"Kal rawh Mawite, huan hi i fang leh lawk teh ang, a mawi si, thil hmuh chak deuh ka la nei," ka han tih chuan Goggy chuan, "Pangpar hi i ngaina ve siah..." min lo ti fiamthu zauh a, ka nuih pawh a za lo. Mawitei chu thil thenkhat ka hrilh lawk nual tawh avangin min zui mai a. Goggy hnenah chuan, "Lo zir char char rawh," tih pahin kan kalsan a.

Rose par var awmna lam pana kan kal lai chuan ka rilru te te chuan, 'Ka mumang anga hnuai lam hawia an lo awm tak tak chuan thil engemaw entirna a ni ngei ang,' ka ti a. Chutah chu pangpar awmna ngei mai chu kan han thleng ta le, a va mak ngai em! A par thum chuan hnuailam an lo hawi vek tak tak anih chu. Mak ti zeta kawh pahin Mawitei chu ka hrilhfiah nghal mawlh mawlh a. Chu aia mak dang a la awm leh tlat! Rose par a lai taka mi chu rawng sendang hian a lo inthlak anih chu.

"Mawite en teh," tih pah chuan ka camera a nimin lama ka lak zawng zawngte chu ka entir a. Ani chuan a lo chik ve lemloh thuin min chhang a.
"Mawite, thil pangngai satliahah ka ngai thei tlat lo. Nang hma hun hriat theihna nei tha zawk khan han ngaihtuah teh," ka ti deuh tawl a. Chutah Mawitei chuan pangpar pathum chu a han melh ngat ngat a, chutah a han maimitchhing leh vang vang a. A chhanna nghakhlel zeta ka lo thlir dauh dauh lai chuan ring deuh hian, "U Goggy, lo tlan vat teh," a rawn ti ta hluai a, min tiphu deuh dawt alawm mawle.

A au rin em avang chuan Goggy pawh chu mak ti leh hmanhmawh takin a rawn phei thuai thuai a. Kan bula a rawn thlen veleh chuan Mawitei chuan hmanhmawh zet hian, "U Goggy, in vengah damlo na tak in nei em?" a lo ti tawl mai a. Goggy nen chuan kan hawihai dun hle.

"Tinge!? Kan awmna a la rei vak bawk si lova engmah ka hre hleinem."
"U Goggy, he pangparte hi a awmdan ve reng a ni em?" tih pah chuan a han kawk a.

Goggy'n pangpar a han melh chuan a phu zawk mai. Mak ti hmel tak hian, "Ni lo, hetiangin an uai lo. A lai ami pawh hi hetiangin a sen lo," a lo ti ta a.
Chutah Mawitei chuan, "Reiloteah in vengin mitthi in nei dawn!" a ti ta mai a, kan hawi phawk chiang hle mai. Ka ngaihtuahnaah thil pakhat a rawn lut zawk a. "Nih leh a bula rose par uai deuh hnup tawh pahnih ve thung hi le?" ka han tih chuan sawi harsa tih hmel zet hian Mawitei chuan, "Ka sawi chiang ngam lo na a, mitthi pathum in nei maithei a ni," a la ti ta deuh deuh mai le!!! Goggy chuan rapthlak tih hmel zeta chek tlawk tlawk pah chuan, "Han ni lo hram thei se aw, Lalpa," a rawn tichhuak vawng vawng a.

Kan ngui nghiai a, chutih lai chuan Mawitei phone chu a rawn ri a, a nu a lo ni. Tum lawk vak lova a pa a rawn zin avanga rawn haw thuai turin a rawn ti a lo ni a. Tawng pawh tawng tawh lo chuan pheikhai zang lo zetin kan pen hnak hnak a. Chuta ka tum loh deuha ka thil va hmuh chuan a ni min thawng leh dawttu chu ni. Rose par var bik intlar dal zinga a hnuhnung ber chuan a hmaa kan hmuh ang tho khan a parin lei lam chu chhuk bih ngur chungin a vuai deuh sulh a.
Insum hman lovin, "Heipawh," ka'n ti thawt a. Goggy leh Mawitei chu rang lutuk mai hian an lo hawi nghal a. Mawitei'n an hmuh chuan a chal a dawm vawng vawng a. Goggy lah chuan, "Awi, heipawh zinga tui ka pek lai chuan a la pangngai vek," a rawn ti a. Mawitei chuan, "Pali an va nih hmel ta em," a ti ta hlawl mai a!

***************

Mawitei nen kan inphurh hawna kawngah chuan inbiak zai pawh kan rel lo. An in bulah ka dah a, "Ka rawn bia ang che u," ka ti ringawt a, ka haw nghal vang vang a.
In ka thlen veleh chuan kan pathum whatsapp group ka siam nghal a. Tichuan ka va be ta nghal a.

Keimah: Goggy, Mawite, in tha em?
Goggy: U Rin, a va hrehawm ve. Hmeichhe huaisen ve tawk takah ka inngai thin a, thihna lo thleng tur hi erawh ngaiah ka nei thei thlawt lo.

Keimah: Ni e tiraw, mahse Mawitei paw'n a lo hmu lawk dik lo ve thei tho asin.
Mawitei: U Rin, a dik ngei ang tih hi keimahah a rawn chiang tulh tulh mai, a hrehawm ka ti lutuk.

Chutah ngaihdan ka nei thut a. "Goggy, pangparte kha lo en zeuh zeuh chhin teh aw, an awmdan a danglam chuan i lo sawi leh dawn nia," tih ka han thawn leh a.
Reilote hnuah chuan Goggy message a lo thleng leh a, "A mak lutuk, a an sen deuh hlar vek tawh. A hmasa ber ami phei kha chu a sen lar tawh!" a rawn ti ta. Hmn, Mawitei hmuhlawkna hi a dik duh hmel ta hle mai a.
"Goggy, i pa lo haw veleh in vengah damlo na zual an awm leh awm loh lo zawt ve chhin reng reng la, chanchin kan inhrilh tawn hlawm zel dawn nia," tiin thu ka titawp ta rih a.

Ngaihtuahna dang put a har hle mai. Rilru a phawklek a, ka thiante pahnih lah kei aia rilru phawklek hma tur hmeichhia an ni zui lehnghal, kei tal a lang talin ka inthunun thei zel tur a ni. He thihna lo thleng tur hi tak tak ni ta se, kan lo dang thei angem? Pathian ruat lawk erawh kan dang zo chuang hauh lovang le.

Zanriah eikham hlim chuan whatsapp kan thian thum groupah chuan Goggy message a lo thleng a, "Ka pa chuan, 'Vengthlang lama chhungrual an tihte pitar kum 87 mi vel a damlo na hle a ni awm e, nizan paw'n an tlaivarpui tawh a,' tiin a sawi," a rawn ti a. Eheu! Mawitei hriatlawkna leh mak danglam ka lo hriat vena chu a dik hmel ta fu mai. Mahse a chhinchhiahna pangpar rawn sen tan dangte kha tute nge ni ta ang le???

Zan lam chu Goggy'n lehkha lo chhiar tak tak se ka duh avangin len chu sawi loh, biak pawh kan inbe mang lo. Chutih rualin Mawitei pawh a pa lo zin vang nge ni, a reh khawp mai. Keipawh rilrua vei nei run chung chuan thlalak vel ka han edit leh mai mai a, rilruah a lut lo chiang hle. Mut dawn chuan inmangtha pahin a tuka inhmuh leh theuh kan intiam ta a.

A tuk dar 11 velah chuan kan intiam ang ngei chuan kan inhmukhawm leh ta tham tham a. Tumah chu han phur hmel seng sawng leh thatho hmel vet vawt kan awm lo. Thildang pawh sawi lem lovin chu thihna entirna pangpar ni tur ni ngeia kan hriat lam chu kan pan tham tham a. Kan han hmu chiang leh chu kan ding chawih thei. Pangpar senlar ber kha a lo senduk ruih tawh a, pakhat sentak deuhin pakhat a sendal hret a, pakhat erawh a sendang hmel a la pu chauh thung. Mahse Mawitei sawi dan takah a rawng a inthlak chak em avang chuan 'Nikhatah thihna, hemi vengah, mi pali chungah a thleng dawn,' a tih chu ka pawm khawp mai.

Anih leh tihian kan lo nghak ve tawp dawn tihna em ni ang? tih chu kan inzawhna a ni ta. Goggy ber chuan, "Ka pain chhungrual a sawite in lam chu kan va pan ve chhin hrim hrim dawn em ni ang?" a rawn tichhuak a, kan pawm tlang hle mai.
Mawitei chuan, "Rinlawk thil deuh chu ka nei, mahse ka sawi lawk lo mai ang," a rawn tichhuak hlawl a.
Goggy lah pek chuan hmeichhia tih takah, "Enge, sawi chhin teh, awm i tinuam lo," a lo tih ve tak sek avang chuan Mawitei chuan, "Saw inah saw'n mite rin aia thil rapthlak a thlen ka ring, chubak ka sawi thei lo," tih chiahin a rawn chhang a.

Goggy-te veng hi a zau tham deuh avangin vengthlang pan tur chuan Goggy chuan car a la chhuak a. Bike ka lo keng ve tumhrang tawh si a, haw hma deuh hlek ka ngaih dawn bawk avangin an bulah chuang lovin bike chuan an hnung ka zui ta a.

Vengthlang kan thlen thlak chuan kan zawt chawp zel a, chhungrual na na na chu an lo hre hlawm tehmeuh mai. Car chu parkna remchang deuha an dah hnu chuan stepah kan pathum chuan kan chhukthla ta tham tham a. Step thlang, step tawp sira in lo lang chu a len danah chhungkaw lian tak luah tih a hriat theih nghal mai. Chutah kan pan thla ta zel a.

Mahse kan thleng thla tep tihah rawl chhuah meuha tap thawm a rawn ri ta rawih rawih a. Chutah stepah chuan mi an rawn chhuak phei hlawk hlawk a. Kan chian tum tak an pitar chu a boral ta tih a chiang ta e. Kan lut ve angem tiin kan han inrawn a, chutah Mawitei ber chuan luh ve a rawt ta tlat mai. An kawt tual zaupui maia kan awmlai chuan tap ri hi a ri chuah chuah a. Chuta putar tap ri chuan beng a verh hle mai. "Rova nu, tumah inkalsan bik lovang kan tih kha i theihnghilh ta em ni?" tiin a tap rawih rawih a, a aw atang ngawt pawh chuan a tar tawh hle ang tih a hriat theih. Ka kalpui hmeichhiate phei chu hnukulh tih hriat tak hian lo dingin an lo inkuah chaih chaih a.

YMA hruaitu niawm tak pakhat lo chhuak chuan bul ami hnenah chuan, "Mawia chu nangin chanchin lo hrilh la, a lo thlen har lutuk ka ring tawh lo. Lo hmanhmawh lutuk suh se, a dam thei ang ber khan i hrilh dawn nia," a ti a. An titi ka ngaihthlak ruk atang chuan Mawia an tih chu pitar thi ta tupa pakhat, anmahni hmangaiha duat deuh maitu a ni a. Hna lam tul thutna avangin Kolasib lamah langin a kal zawk a ni awm e.

Chutia lo din ve reng ringawt aiah tiin inchhungte kan han singsak pui ve a, vengchhung mi ka nih loh avangin ka lai angreng hle, mahse tuman min en hu hu chuang lo. Goggy-te pawh inthlahrung tak chungin an lo che ve a, mahse ani mithar mah nise vengchhung mi a ni tawh a, a hmel a lo thain hretu pawh a lo nei nual hman aniang, 'I va fel ve,' tihte a hlawh a, amah pawh a inthlahrun loh phah sawtin a lang.

Inhnuai lama almira kan zawn thla zo kawtah kan chhuak leh chiah tihah chuan inchhung lamah chuan an lo rak chel chul mai le! 'Tuiin a chalah dep ru. Thaw pe rawh u,' tihte a lo ri nuaih nuaih mai a. Hmanhmawh zeta inchhung kan han luh chiah chuan putar zawk chu pitar ruang bulah lo muttirin an thiam ang angin an lo buaipui a. Mi pakhat chuan beidawn hmel zet hian, "A marphu ka hmu zo tawh lo," a lo ti chuai raih a. Chu veleh, 'Ka pa. ka pu,' ti a tap riin a ri leh ta chuah chuah mai le! Mi reng reng chu a thawngin an chiai tih a lang vek mai. Mawitei chu ka va melh zawk a, hmel dang lap chung hian, 'Ka tih reng kha,' tih melhin min lo melh niin ka hria. An putar ber pawh chu a nupui boral tuar lovin a liam zui ve nghal mai anih chu.

Kan chhungte leh kan hmelhriatte pawh ni hek lo le, inchhunga thut ve reng chu nuam ti lovin pawn lamah kan pathum chuan kan thu chhuak ta a. Sawi tur reng reng kan hre lo. A bik takin Mawitei hrehawm ti hmel lutuk chu ka khawngaih a, mahse a phur ka chhawk then ve deuh a ni lawm ni? te ka ti rilru a.

Chhun vanglai mah nise mi an rawn thahnem nghal kher mai. Inchhung mai bakah kawt tual zau tak pawh chu kan khat nghuk tawh. Darkar chanve a liam meuh chuan khawhar hla sain an zai tluk tluk tawh a. Chutihlai chuan thawm a rawn ri leh huk a, zai pawh zai lo chuan kan beng kan chhi hru vek a. An punkhawm tak takna hmunah chuan a mipa ber ka ni bawk a tiin bengchhiin ka va tawlh hnai ve a. Ka thu hriat chuan a denin min deng dawt mai. 'Aizawl khawdaiah an tupa rawn haw mek Mawia chu bikein kawngthlangah a tlan liam, ka pawh chhawn lovin a boral,' tih thu hi.

Goggy leh Mawitei-te bulah va pheiin, "Haw phawt te'ng u," ka va tiringawt a. Anni pawh chuan zawhna pawh min zawt si se lo chuan min zui ve ta nghal a. Goggy car dahna kan thlen chuan car chhungah ka luhpui te te phawt a, thil awmdan chu zep hni hne lovin ka hrilh ta a. Goggy awmah Mawitei chu a bei thlawp a, a mittui a sur zung zung a. Rei tak chu kan ngawi thap a, chutah Mawitei chuan tah aw tiau hian, "Pakhat a la awm," a rawn ti sap a. Ka ngaihtuahlai ang chiah. Goggy pawh chu lungchhiat hmel tak si hian a intipachang hram hram tih a hmui a peh fan fan dan atang chuan a hriat theih mai.

Bike chuan hma ka hruai a, ka hnungah muangtein Goggy-te chuan carin min lo zui a. Kawng kawihnih vel kan thlen chuan motor an lo tlan let sup sup a. Pakhat chu a chhan ka lo zawt chawt a. Kan chhak lawkah chuan truck pakhat a chhiat thu leh two wheeler chu a tlan tlang theih thu min lo hrilh a. A va buaithlak mai mai e aw. Goggy-te han tlansan ringawt lah chu a ni thei bawk si lo. Thil awmzia ka hrilh hnu chuan a let zawngin kan tlan a, hma ka hruai leh a, veng hmawr lam atanga luh daih a ngai dawn ta a ni.

Kan tlanna lamah chuan thlanmualte a lo awm a, tichuan in a lo ding tan pheuh pheuh a. Goggyte'n min zui avangin ka hmaa car tlan chu lehpelh pawh ka tum chuang lo. Vawiina kan thil tawnte ngaihtuah chungin eng thil nge thleng leh ang aw? tia ka inngaihtuah lai tak chuan ka hnunga tlan Goggy-te chu an te thawt a. Ka han hawi let dawn chiah tihah chuan ka hma a car chu a ri bur a, a ding chawt bawk a. Kawng chhak lam atang chuan mi hi an rawn te teng tung a. Ka han hawi chhuah meuh chuan in sak lai, chhawng nga zeta sang a ni tih ka han hmu a. Chutah thil ka hrethiam chiah. Inchhawng sak lai atang chuan rawn tla thla an awm a lo ni. Ka ding vat a, mi pawh an rawn pungkhawm nghal tuk tuk a. Ka hma chiaha car chungah chuan mi pakhat hi luruh keh buaih hian a lo awm a, thisen a luang nguah nguah bawk. Kan vela mite pawh chu thlabar leh mak ti hian an au chel chul hlawm a. A va rapthlak ngai em... Kan lo hriatlawk, nikhata thihna vawi li thleng tur chu a thleng kim ta. Chet nachang pawh ka hre lo, lo hrelawk riai ruai mah ila min khawih na em em tho.

Chutihlai chuan ka banah hian kut pahnih hian min rawn chelh a, ka harh chhuak ta chauh a. Thlaphan hmel zet hian Goggy leh Mawitei chuan min lo en a. An pahnih chuan ka kuah chawt a. Chu thihna chu a pawi ka ti vawng vawng kher mai, mahse kan dan theih rual a ni si lo. Khawnge, chu ruang chu kan en chiang ve reng reng teh ang tiin ka thiante pahnih chu ka kalsan a. Chu ruang ka va hmu chiah chu a pawi chu ka ti vawng vawng, mahse... 'Vai' a lo ni hlauh.

TO BE CONTD/-
Commentte kha min han peksak ve leh teh un...
I CHHIAR AVANGIN KA LAWM E



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 13th, 2017, 1:44 pm

THE GIRL WHO SAW THE FUTURE - 8

Ka sual vang nge pawh ka hrethiam tawh bik lo. A, a ni bik lovang. Vaipa ber kher a lo ni chu ka thawveng huai mai. Dem chi pawh ka ni bik lo, mizo ni ta se, vengchhungah thihna tawk mizo pali ngawt an awm dawn tihna ania. Vaite chu an tam e.... Karimganj leh Silcharah ringawt pawh. Mizoram pumpui hian vai chhe chi ringawt pawh tam lamah te chuan kan pha lo chiang em mai. Chuvang chuan vaipa thi chu pawi ka tilo tihna ni hauh lovin mizo thi ai chuan a ziaawm deuh alawm.

Ka kalpui hmeichhe pahnih chuan rapthlak tih hmel zet hian an lo thlir ve a, an inkuah chawih chawih bawk a. Hmeichhe dawihzep zawk zawk an nilo ve ve hlauh zawk chu a tihzia ka ti hle. Kan piah atanga en chiang tura rawn kal, motor atanga rawn chhuak hmeichhe thenkhat erawh a rakin an rak teng tung thung a. Ni e, a rapthlak ve em alawm. Car sir leh side glass velah te chuan thisen a luang nguai nguai mai bawk si. Police station lam phone tuma ka phone ka han phawrh lai tak chuan mi pakhat hian a phone ri lauh lauh ka hre ta hlauh a. Hrilhtu nih pawh diktak chuan a chakawm lem loh. Chutia ruang hmuhtir reng chu thaa ka hriat loh avangin Goggy-te pahnih chu carah lut vat turin ka ti a. Motor lo jam phei deuh put tawh karah chuan muangchangin kan inchhawm phei thei ta a.

Haw hma hret tum ka nih vei nen, kan boruak tawnin a zir tak miau lovah chuan ka nu ka phone a, ka haw hma hman dawn loh thu ka hrilh ta a. Hmeichhe pahnih rilru thlaphang tak han kalsan nghal ngawt chu tihchi bik hek lo le.

Goggy-te in kan thlen veleh chuan engdang sawi lem lovin Goggy chuan a phone a phawrh a, Mawitei nu pi Thangtei chu be nghalin Mawitein an in-a chaw a ei tur thu a han hrilh ringawt a, Mawitei chuan mak a lo tih hmel hle. Chutih nakalaiin, "In lo ei ve ve ang, u Rin, i chhungte hrilh ve rawh," a rawn ti ringawt bawk a. Amaha han hawsan leh ringawt chu a khawharthlak a ti deuh pawh a ni mahna. Ka rilru tak chuan pawi ka tilo nasa. Goggy-te in-a ka vawikhat eina tur ania, Goggy bula chawhlui kil chu ka chak nasa alawm. An makpa hual pawh ka lo ni tawh reng maithei asin te ka ti rilru a. Ka ngaihtuah chian erawh chuan zakthei lo chu ka inti leh angreng si.


Thil ka ngaihtuah chhuak thut a. "Tikhan lo awm lawk r'u aw," tih pah chuan huan lamah chuan ka tlan lut nghal sawk sawk a. Thil mak danglam hmuh beiseiin ka tum lam ram chu melh nghalin ka pan sawk sawk a. Ka rin ang ngei maw! Ka va hmu tho nain kawng en lova kha pangpar lam ringawt kha ka en nasat lutukna lamah ka inchhuih khut a, rose par senduk vuai hnup mai pathum, leia lo tla reng hmaah chuan chiang takin ka bawkkhup thlawp a, hmun leh hmunah ka melh ta kur a, engemawti kawng zawng takin a nuam lem miah lo. Chutah ka khup rawn thip vat vat dan atang chuan a pilh tih chiang takin ka hre mai.

Si deuh hlarh hlarh chung chuan ka thova, fuh lo mange aw kawng en loh luatah. Ka t-shirt hak lai lah a bal zo, ka khup lah a thip. Chutah bai deuh saih saih chungin a piah tawpa pangpar chu ka va chian leh a, rin ang ngeiin a par a lo tla a, a senduk tluk bawk a.

Ka ngaihtuah ta neuh neuh a, ka lo hrefiah thiam har mai mai anih hi le. Mawitei zawk kha chuan a hrethiam deuh nghal ruak a, a sawi tlang duh lo kha a ni mai a. Pangpar pot pakhat atanga par pathum senduk vuai tla ta te khan chhungkhat atanga mi pathum thi tur a lo entir reng a. A piah tawpa rose par var senduk ta khan veng tawpa vaipa thi ta kha a entir reng mai tih ka hrethiam ta. An vuai hunte, an sen hunte kha uluk takin lo chhut ila chuan a indawt zel a ni a. Chutiang bawkin thihna indawt dan pawh kha a ni. Mahse a tira ka lo hrethiam nghal lo pawh chu pawi ka ti chuang lo. Tih theih ka nei chuang lo em mai a.

Rose par thi ta te chu inchhungah ka keng lut dawn nge ni aw tiin ka ngaihtuah rauh rauh va. Mahse kan nulate tih thlabarna mai mai a ni palh ang tih hlauvin paih daih ka han tum leh zet a, mahse chupawh tha ka ti leh lo. Goggy pa bulah chaw kan ei ngei anga, kan thiltawn chu kan sawi ngei ang. A hma a ka chanchin pawh Goggy'n a pa a lo hrilh vek tawh kha a ni sia. Insawifiah nan a awm ang ang chuan kalsan chu tha ka ti leh ta zawk a.

Inchhunga ka va luh leh lai chuan ei rawngbawl dun pahin an lo titi sep sep a, an hmel atang chuan vawiin kan thil tawn chanchin vel an sawi tih ka hre mai. Va biak bawrh bawrh pah chuan boruak thlak danglam tum takin titi dang ka han vawrh ngial a, mahse thil dang a leng ngang lo chu a ni ber e, a ngaiah bawk kan kir leh thin. Chuti na na na tiin ka thil hmuh theih tan dante, ka thil tawn tawhte, Goggy nena kan sual chhuah dun dante (The horrible future eye! chhiar tawh chuan in hria ang) chu Mawitei ka han hrilh tak tak a, mak ti leh ngaihnawm ti takin ka hau hian a lo ngaithla a, zawhna min zawt zeuh zeuh bawk a.

Ka han sawi zawh chuan Mawitei chuan, "A makin a va ngaihnawm si. U Rin, chung in thil tawn zawng zawngte chu a hma khan min lo hrilh tawh la chu he'ng ka thil tawn mek hneh zel tur hian chakna ka neih phah ngei ang," a ti ta a. Nih zawng a ni ngawt mai, mahse inhrilh hriat tak takna hun a la awm lo ve em bawk a ni, ama'n min zawt kher bawk si lova.

Ka chanchinte ka han sawi zawh chuan khua a lo tlai ruai tawh mai. Goggy paw'n a eirel a lo peih fel diam tawh a. Chutihlai chuan pawn lamah motor rawn inhung thawm a awm a rawn awm a. Goggy chuan phur hmel tak hian, "Ka pa a nih chu," tih pahin a tlan chhuak nghal a. Nakin deuhah chuan, "Vawiin kan veng chhiat tawhna chu a rapthlak hle mai a Mambawih," Goggy pa ni ngei tur hian a rawn ti lawng lawng a, kawngka chu a rawn inhawng zui a. Chu pa ngo hmeltha vuah maiin kei leh Mawitei lo thu reng min rawn hmu thut chu maktih hmel angreng takin min rawn en a. Tawng chhuah a tum zuau lai chuan Goggy chuan, "Pa, ka lo la hrilh lo che a, U Rina hi chu i hriat tawh kha, hei hi Mawitei, kan thiannu thar ka sawi kha ania, chaw ei turin ka lo sawm a," a ti zung zung a, an rawn inkuah lut ral ral a, pafa inngai tak chu an ni awm e.

Goggy pa chuan, "In va fel ve, nia, chaw eia sawm vat tur che u hi kan nia nangni Mami thiante phei chu. Keima hun neihin a zir ngang lova," tih pah chuan kan pahnih chuan min rawn chibai lawp lawp a.

Changkang deuhin chaw an ei ngei ang a, an sap angreng sia tia ka lo huphurh rilruk tehreng nen, rinloh deuhin pa ber chuan tawngtaina a hman zawh chuan a bar nghal buan buan a, mi a inti thlahrung lo sawt mai. Chutah, " Vawiin kan veng chhiatna lo thlengte kha in hre ve hlawm em? A rapthlakin a tuartu chhungte tana a nat tur zia kha," a rawn ti chhuak a. Goggy chuan lo chhangin, "Chu chu ania kan inhmuhkhawm chhan tak chu ka pa," a lo ti a. Rawn hawi chhuah pahin Goggy pa chuan, "Khawhar in kalte in rel deuh em ni?" a rawn ti a. Kei chuan, "Ni chiah lo, he chhiatna lo thleng tur hi nimin lam mai atanga Mawitei nena kan lo hmuh lawk riai ruai sa ania," ka han tih chuan mak tih hmel takin min han en a. Chutah Goggy kan rawn tlawh thute, huana pangpar ka hmuh atanga intanin Mawitei ka pun a, thil awmdan tur kan hmuh lawk thu te, tichuan vawiin lamah Goggy lehkha inbih lawk duh pawh zah zo lova finfiah tura kan rawn kal thu leh chu thihna chu a hmun ngeia kan va chian thute chu chipchiar takin ka hrilh ta a.

Kan reh thap a, chutah a tawp nan, "Pangpar kha in va hmuh duh chuan....," ka han ti zet na a, ka sawi loh tur ka sawi niin ka hre leh hnuhnawh a. Inthlahrung tak chunga hmeichhe pahnihte ka va melh chuan hrethiamin Mawitei chuan, "E, u Rin, ka zam tawh reng reng hleinem, i thil tawn i sawi atang leh u Goggy huaisen dan i sawi atangte khan keimahah chakna thar a awm tawh asin," a rawn tih takah chuan ka lawm hle mai.

Chaw eikham chuan a la thim chiah lo bawk a, huan lamah chuan kan liam dial a. Rose par var a senduka chang ta, a parna atanga thlawn tawh pathum chu ka han enpui a, chutah a mal a tla chu ka han enpui leh chuan chek deuh tlak tlak bak thawm hriat tur a awm lo. Chutah a vai chuan ka la a, "Hei hi a awmna hmun tur a ni tawh love," tiin ka hmet hlawm a, engmah an sawi hlawm lo. Tichuan a hlingte a awm lo bawk a, ka ak ta a, inchhungah chuan kan lut ta dial a.

Inchhungah pawh chuan kan la ngawi nghiai a. Goggy pa chu rawn tawng chhuak hmasa in, "In thil tawn chu a mak dangdai mange, Mambawih, i thiante hi an hlauhawm dawn riau mai," a rawn ti ta. Goggy chuan rang zet hian, "Pa, i ti mak em mai a, kan hlau reng reng hleinem," a rawn ti chhuak hlawl a. Mawitei nen chuan kan lo inthlahrungin sawi tur reng reng kan hre lo. Chutah Goggy pa zawk chu za deuh hian a rawn nui chhuak hawk hawk a. "Ka fiamthu mai mai anih kha, Pathian neitute kan nih hi, thutakah in lo la ange. Naute u, in thil chan mek hi Pathian thilpek a ni a, a hrehawm rih viau ang, mahse a tul a tih hunah amah Pathian ngei chuan a lak bo sak daih mai ang che u. Hei Mami pawh a tangkai vak lo maithei, mahse a tul anga nangni tanpui tura a inpe hi a lawmawm ka ti, a nu min hriatchhuahtir nasa hle mai. Ka chhuang hlawm takmeuh che u ania in huaisenna hi," a ti ta a, chu chuan boruak a ti zangkhai leh hawk a, hlim takin thildang dang sawiin kan nui ho leh thei ta a.

Dar 7 a lo ri der tawh a, chutia khawthim hnua awm reng chu Mawitei pawh a chhungten an lo ngaihtuah lutuk hlauvin kan inmangtha a, haw zai kan rel ta a. Mawitei chu an kawngka thleng ka thlah a. Thingpui in turin min sawm ngial na a, mut hahchawlh vat ka chak tawh avangin ka hnial a, ka kal zui ta a. Kan veng thlen hma deuh kawrpui remchang lai takah chuan ka pangpar vuai ah lai chu ka paih ta daih a.

**********************

Karkhat lai a liam leh ta. Goggy pawh a inbuatsaih ngawrh ka duhpui avangin ka be khat khawp a, amah hi a rawn vui lek lek zawk thin. Mawitei pawh a reh angreng khawp mai, kan reh tlang a ni e. Nikhatah whatsapp groupa vawikhat vel kan inbe kual tih bak chu kan reh leh thap thin. Goggy hian min rawn be leh zauh thin zawk mai pawh a. Ngaih zawng ka ngai khawp mai, mahse insum hun hriat hi mifing nihna a ni an ti bawk sia, mifing nih ka duh bawk si, be chak deuh chung hian ka be lo leh nge nge thin, ka va fing tak em.....

Mak ka tih deuh chu Pathianni atang khan Mawitei hian message a rawn la thawn ve miah lo, vawiin nilaini a ni tawh si. Goggy hnenah chuan Mawitei chanchin a hriat leh hriat loh ka han zawt ta chawt a, engmah a lo hre bik lova, mak a tih ve thu leh a nu pi Thangtei biak chian nghal a tum thu min rawn hrilh ta a, a va fel reuh thin tak Goggy bawihhnupi hi chu aw....

Rei rial lovin Goggy chuan min rawn phone let leh nghal a, "Pi Thangtei chuan Pathianni atang khan Mawitei hi a tap a tap ringawt mai a, a chhan ka zawh lahin a sawi duh lo nge, min chhang duh meuh silo, mi hi a kuah deuh ngawih ngawih reng mai a. 'Kan dan theih a ni silo,' te a ti leh ringawt a. A pa leh a u te rawn zin thla turin a chah ringawt bawk a, a tap leh thin a, thil awmzia a sawi chiang bawk si lo. Ka ngaih a tha lo riau mai, a pate pawh naktuk chuan lokal an tum a ni awm e. Hmuh lawk engemaw tak a nei nge amah hi a chiangkuang lo pawh ka hrethiam tawh lo. Ka mang a ang khawp mai, in theih chuan lo leng teh u a ti," a rawn ti ta mai a.

He thil chu mak ka ti angreng hle mai. Ka rindan chuan a chiangkuan loh vang ni lovin hmuh lawk engemaw tak a nei a ni ang. Huaisen tawh tur ang khan a insawi si a, thil danglam tak a ni ngei ang ka ti rilru a. Chutihlai chuan ka phone a rawn ri tat a, ka han en chuan rinloh deuhin Mawitei message a lo ni lawi a.

"U Rin, tihbuai kher loh che u ka duhin ka tum takzet na a, ka huaisennain a tlin ta ngang love, khawngaihin zaninah ngei ngeiin in lokal thei angem?" tih hi a lo ni. Ekhai...engemaw a inthlahrun le? A phur chhawk zangkhai then tura Pathian ruat nawn leh ka ni lawm ni....

"Awle, kan lokal ngei ang," tiin message ka thawn let ta a.

TO BE CONTD/-
I LO CHHIAR THIN AVANG HIAN KA LAWM EM EM A NI.
Hun ka nei lo ve thin em a, a tawi tih awih loh aw...in chhiar hman loh ka hlau tawh sia.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 13th, 2017, 1:45 pm

THE GIRL WHO SAW THE FUTURE - 9

(Eng engemaw harsatna neuh neuh avangin ka rawn post thei lo rei fu mai, in ngaihdamna ka dil hmasa e, Chhiar nuam vek ule)

Goggy chu in buatsaih ngawrh se ka duh avangin sawm ve kher pawh ka tum lo nachungin amah zawkin kal ve loh a hlauh em avangin a hmuna hmuh kan intiam ta ringawt a. Chhungte rual pawh a chaw ei lovin, tihtur pawimawh ka neih chhuanlamin mahniin ka bar hmasa mawlh mawlh a, ka ei kham veleh ka chhuak zui ta nghal a. Goggy hnenah ka kal thu message-in ka hrilh pah bawk a.

Mawitei-te in ka thlen chuan kawngka kik leh pawh hawn ka han rual nghal a. Ka beisei loh deuhin Goggy chuan min lo thlen khalh leh hman tawh. He nu hi chu a tluk theih tak tak dawn loh e. Mawitei chu Goggy kuah chung chuan a lo inhnit faih faih a. Mahse min hmuh veleh chuan Goggy kuahna atanga tal chhuakin a lo tlan phei a, min rawn pawm chawt pah chuan a tap ta hawm hawm a, ka hawihaiin ama nu ngei pawh a hrilhhai angreng hle mai.

"Mate, engtizia nge ni ta aw? Min han hrilh chiang teh," tih pahin a lu-ah chuan ka chul sak a. Mahse min chhang lova, a lungchhe hle ringawt a. Chutah ka rilru-ah, Mawitei hian a nu hriat ve a duh loh chi zep ngai a nei a nih ringin pi Thangtei hnenah chuan, "Pi Thangte, kawt lamah Mawitei hi kan va thut harhpui lawk ange aw," ka ti a. Pi Thangtei pawh chuan a lo hrethiam khawp mai. Goggy chuan min zui nghal a.

Chep angreng taka mi inluah an nih avangin pawnah thutna mai tur pawh a awm chuang lova. An in piah deuh a kawng sirah chuan kan thu tung ta at hlawm a. Tichuan chanchin ka han zawt chiang leh a, chutah chuan a rawn tawng chhuak ve ta nge nge a.

"U Rin, u Goggy, hmanni atang tawhin chiang takin ka hmu lawk tawh a. Sawi a hrehawm bakah tihbuai che u ka duh loh avangin ka zep tang tang a, mahse a hun a lo thlen dawn meuh chuan ka tuar zo ta ngang lo a ni. Ka nu hian min boralsan dawn," a ti ta mai le! Goggy nen chuan kan inen deuh hau a.

"Mawite, a ni thei ngawt dawn em ni? I nu-ah khan tinge engmah ka hmuh ve si loh, i hre sual chu a ni em si lo maw?" ka ti a.
"U..., hriat sual nise ka tingawt mai, mahse ka hre sual si lo. A chiang telh telh bawk si, ih maw, ka hmuh dan chuan naktuk maiah thihna hi a lo thleng tawh dawn" tih pah chuan a mittui a hru zauh zauh a. Tawng hauh si lovin Goggy chuan a lo kuah hle hle a, hmeichhia hi chuan tawng lo pawh hian inhnem dan hi an thiam teh e. Inkuah ringawt pawh hi mipa hi chuan thian thate chungah pawh kan ti zen zen lo ania, nula kuah chu thuhranah dah ta ila.

Kan ngawih tlan vang vang lai chuan Goggy chu rawn tawng chhuakin ka rin loh deuhin, "Tih theih engmah kan nei lo. Lokal ru, Chungnungbera hnenah i thlen phawt mai ang u kan Biak inah," a ti ta. Awiiiii....peih loh si ziaaa hi.... An tawngtai rei leh awm si, mahse Goggy han hnial zut zut lah ka hreh ve bawk si, thil harsa lutuk a ni lem bawk si lo. Mahse helna rilru ka la pu deuh tlat, engatinge ka hmuh ve si loh kei Lalhmudiktheia hian!? Ka en chiang lo em ni pi Thangtei kha? Thi tur ka hmuh lawk reng reng tunhnaia ka hmuh ho chu mit lawngin ka hmu chat chat zel bawk si. A ngaihna ka va hre lo em.

"Mawite, engtin nge i hmuh dan chiah han sawi reng reng teh," ka ti a.
Mawitei chuan, "Pathianni kha a ni tawh, ka nu nena kan thut dun vang vang lai hian tukverh lam ka han thlir chu chhum dum chhah zet mai, inhlawm a let but but hi ka hmu a, mak ka ti ngei mai. Ni a sa tha tho bawk sia, khua a thiang tho bawk nen. Chutah chu chhum dum chuan kan in lam rawn panin ka hmu a. 'Ruah a sur dawn,' tih pahin ka ding hluai a. Ka nu lah chuan, 'Awihawm loh em mai,' tih pahin a nui mai mai a. 'Ka nu, en ta che chhum khu,' ka tih lai chuan chu chhum dum chu a lo hnai hle tawh a. Ka nu chuan,'Uang uang teh suh, engmah a awm loh hi,' a ti mai a. Chhum chuan kan chung zawn a lo thleng ta, a ding ta chat mai a. Chutah chiah chuan tih danglamin ka awm tih ka hre chiah. A chhan chu inchhungah kan awm a, kan chung zawna chhum chu ka hmu thei tlat. A awmzia chu hei mi inhnuai luah kan nia, mahse inchungte in zawng zawng pawh ka hmu tlang vek a, chhum chu ka han hmu thei tlat a ni.
Chutah chhum chu ka zawnah ni lovin ka nu zawn ngei maiah chuan a lo ding ngur mai a. Chutah chiah chuan ka thinlungah hrilhfiahin ka awm zui ta nghal a ni. A tirah chuan ka te thawt a, ka nu paw'n a chhan min zawt nghe nghe. Ka sawi hman tep tihin hrehawm ka tih em avang chuan ngawih ka chuh ta zawk a ni.

Chutah a vawihnih nan ka mumangah ka hmu leh a, chhum chuan ka nu a lo hnaih sawt tawh. Vawiin chhun khan ka tihtur ka ti zo chu thutthlengah ka lo chhing sek a, a vawithum nan ka hmu leh ta a ni. Chu chhum dum chu ka nu lu chung lawkah a awm tawh a, ka thinlungah hian chiang takin naktuk maia thleng tur anih hriattirin ka awm nghal bawk a, Ka pa leh ka u lo chhuk turin ka be nghal a, thil awmzia pawh ka hrilh chuang lo. Ka nu lah ka hrilh hreh si, nangni erawh inthlahrung takin ka rawn hrilh tawp mai che u a ni," a ti ta a.

Kan han ngawi leh vang vang hlawm a, chutah, "Inchhungah i lut phawt teh ang u," tih pah chuan ka inrin lawksa deuh reng ka camera chu a bawm atang chuan ka han phawrh chhuak a. "Mawite, i nu thla chu ka la chhin dawn, hlim hmel put hram tum ang che," tih pah chuan a lut hmasa berah chuan ka tang ta a.


Inchhung kan luh hnu chuan Mawitei pawhin a awmdante tidanglamin nui hmelte a rawn pu tak nangin a tum lui hle a ni tih chu hriat loh theih a ni lo. Kan han thut leh thap hnu chuan Goggy chuan, "Ti rawh u, nu Thangte, thla la ho ve ang u. Hei u Rina'n camera tha deuh a nei reng a, a hmang hman dawn lo takngial, thla pawh kan la la ho hleinem," a rawn ti ta hlauh a. Tichuan an nufa thutnaah chuan thu phei nghalin an insiamrem nghal sat sat hlawm a.

Vawihnih vawithum vel ka'Click' sak hnu chuan an nufa chauhte chuan ka lak sak leh bawk a. Zahzelah 'Self timer'-ah te chuan dahin ka han tel ve lawp lawp bawk a, kan ri deuh ham ham a. Titi khawchang dangte kan han vawrh a, thingpui kan in zawh fel chuan dar 8 zet zawt chauh a la ni. Goggy bawk chu rawn tawng chhuak lehin, "Nu Thangte, Biak in lamah kan va tawngtai lawk ange. Tichuan zanin chu Mawitei hi lo riak se ka ti deuh a," a rawn ti ta a. Engmah sawi lawk awm bawk si lo chu Mawitei pawh a lo meng deu uau hman a. Chutihlai tak chuan a fanu hruai harh tumna angah min ngaih sak teh chek aniang chu, pi Thangtei chuan, "Mamte, i duh phawt chuan va riak rawh, in chawlh lai a la ni tho va, hei i u a awm tho bawk a, kei chu ngaihtuah ka ngai lo ania," a rawn ti ta a. Mawitei chuan, "Mahse nu," a han ti dek dek a, Goggy chuan, "Mahse tih a ngai lo, i la rawn riah loh kha," a lo tih hnu chuan a ngawi ta a.

Mawitei-te in atang chuan kan inzui chhuak dam dam a. Mawitei chuan a nu chu hmu leh tawh lo tur niawm fahran hian a han kuah leh vang vang a. Kan kal leh dawn lai chiah chuan pi Thangtei chuan min rawn kheuh zeuh a. Mawitei chungchang vel chu a rukin min zawt sa sa a. Goggy hnenah chuan, "Carah lo va thu lawk r'u, ka rawn kal ve nghal ang," ka han tih chuan thil hrilh duh ka nei a ni tih hrethiam takin Goggy chuan Mawitei chu a kalpui nghal sawk sawk a.

An kal fel veleh chuan zep kher pawh ngaiin ka hre ta lova. Pi Thangtei hnenah chuan, "Pi Thangte, hei i rin ang deuh ngeiin Mawitei hian hmuh lawk a lo nei a. Sawi hrehawm tak phei chu a ni na a," tiin thil awmdan chu ka sawi ta a. Pi Thangtei erawh chuan, "Aw, chungte chu sawi ve mai tur alawm. Pathian neitu ka ni a, ka hlau reng reng hleinem. Bakah sawi zawk ta se, a tak tak anih phei chuan inrinlawkna tha tak a ni zawk mai tur ania," a lo ti then a, a hmel pawh a danglam eih lo. Kei pawh chuan han thlamuan vein, "Mawitei hian a hrilh tawh ngei chein ka ring a, kei hi a zawmpui tho ka ni a, nangmahah engmah ka hmu lawk ve tlat lo, chu chu a makna ania. Mawitei hian a hmu sual ve thut a nih ka ring mange," ka han ti a. Pi Thangtei chuan, "In rilru tihah miah s'u aw, Pathian ruat anih chuan pumpelh theih a ni dawn lova, ka tawn tur tho tho anih chuan inralrinna dar a ni mai alawm," a la ti thei a, kan inmangtha a, ka kalsan ta a. Ka rilruah chuan, 'Ka lo hrilh ta kher kher a, rilru hah deuh hian zanin hun hi a lo hmang mai ang a, mahse a sawi ang khan inrin lawk theihna chu a ni ve angreng daih bawk sia,' te ka ti a. A tha zawk nge zawk lo pawh ka hrethiam ta lo.

Goggy-te bul ka va thlen chuan Mawitei chuan Goggy hnenah, "Ka nu kha ka ngaihtuah viau asin u Goggy," a lo ti ri ka hre hman a. Goggy erawh chuan, "Naktukah i tih kha, zanina thleng tur engmah a awm hleinem," a lo ti sam et a. Goggy vek chuan, "U Rin, min rawn zui rawh aw," tih pah chuan a car chu a tlantir ta nghal a. An hnungah chuan ka tlan ve zel a. An veng kan thlen hnu chuan an in lam pan ta lo chuan a khalh zel a. 'Na...a lo ti tak tak ka ti.' Biak in kan thleng hlawl mai. A la hma viau na a, inkhawm loh zan a ni bawk a, Biak in leh a velah chuan awm pawh an lo awm lem lova, an chowkider niawm tak erawh ka hmu zauh a.

Biak in chu hawngin kan han thu ho te te a, chutah Goggy chuan ding meuhvin, "He thil hi Pathianin a ruat anih ngat chuan tih theih kan nei lova, mahse Pathian hnenah he thil hi thlentir lo hram turin i dil chhin reng reng teh ang u," a rawn ti a. Chutah kan insem darh a, tawngatai hma deuh chuan, "U Rin, nang pawh lo tawngtai ve rawh aw," min rawn ti kher a, ka va run angreng tak, min rin loh hmel mai mai. A, min hrechiang ve bawk em atin ni.

Tichuan an pahnih chuan urhsun zetin ring takin an tawngtai zui nghal a, kei pawh chuan, 'Chhan loh aiah Luka ziak,' tih ang deuh khan ka'n chham liam ve puat a. A, dem vak theih pawh ka ni bik lo, ka tawngtai peih lo hlawm tawp bik lova, mahse hmuh engmah ka nei ve lo khan min la ti hel deuh riau va. Chutah ngaihtuah chhuah deuh zawk ka nei. Camera chu ka phawrh a, ka han enchhin vel ta a. Ka tilian (zoom in-out) pap pap a, chiang taka ka en ngial paw'n Mawitei nu chalah chuan engmah ka hmu chuang lo. Eng rau nge maw Mawitei hian a chan bik tehhrep le!?

Ka han en fiah a, ka ennawn leh vek hnu pawh chuan engmah ka hmu chuang lova, anni pahnih erawh an la tawngtai tui ngang mai. Chutah ka han maimitchhing ve leh a, ka theihtawpa ti tak chung chuan, "Lalpa, hei kan awmdan i hria, i thil min pek atang hian engmah ka hmu ve mang si lova, Mawitei lah a mangang si, chuvangin khawngaihin la kir hram rawh," tiin ka han tawngtai a, ka va han ti tak ve tehlul, in chung khi chu a thleng ve chiang sa. Chutah ka han 'Amen' leh a, an la tawntai zo ta chuang lo. A va han mak chen chen tak. Chutah camera ka han khawih leh dawn a, chutihlai tak chuan Mawitei tawngtai ri a tawp ta si. Camera ka lo khawih mai mai a hmuh chuan, 'Min tawngtaipui lo bik,' a ti anga, a vui ang tih ka hlau si a, ka dah leh vat a. Chutah ka han phun leh suap suap a, a hriat phak tawk vela ringin ka han 'Amen' tha leh ta a. Reiloteah Goggy pawh chuan rawn zo vein kan inzui chhuak leh ta dam dam a, an thawl hawk thute an la sawi ve ve zui.

Goggy-te in pawh tlawh kual tawh lova haw mai ka tum rilruk lai tak chuan Goggy chuan, "U Rin, editing i khawihnaah kan lokal ve," a rawn ti a. Ka chhang mai lova, a tihchi angem aw, Goggy ngau ngau chu ni se a pawi miah lovang, mahse Mawitei chuan computer lamah tumloh deuhin ka thil zawn tum, a nu chala kraws awm chu a hmu ve si anga, a rilru a na zual mai mai ang tih chu ka hlau rilru khawp mai. Mahse 'Aih' tih teh tung chu ni chiaha ka hriat bawk si loh avangin, "Lokal ve ula," ka ti ta a.

Kan in kan thlen chuan ka nau chuan tv a lo la en a, midang erawh an mu tawh a. Studio-ah lut nghalin 'Cable' ka han thlun zawm zung zung a. Chutah ka han en fiah ta a, anni pahnih pawh chuan uluk zetin an lo en ve bawk a. Engmah reng reng ka hmu mai chuan lo. Ka han tilian leh pap pap a, chuta chiang taka ka han en chuan Mawitei nu chalah chuan kraws ni si lo, 'C' ang deuha thil inrin reih hi ka hmu a, mak chu ka ti angreng. A chal chuar han ti dawn ila, thlalak tinah chuan ka hmu vek si, chal tichuar chu a ni thei lovang. A takah khan ka enchiang ru em em a, engmah a chalah danglam zeuh pawh ka hmu lo kha ania. Camera a ka 'Zoom' ngial paw'n ka hmu lo anih kha. Mahse hmu awm lo takin ka tuai liam puat puat a. Mawitei chuan zawhna mitmeng taka min en lai chuan, "Engmah danglam a awm loh hi, a tha vek e," ka ti mai a, an ngaihthat loh phah ting tang ka hlau a ni. Kei ngei pawh chuan eng thil tak tak mah anih ka ring lem chuang lo.

Dar 10 a rik vu tawh avangin haw mai an duh tawh ka ring deuh a, ka indah fel ta a. Mahse an che sawn chuang lova, ka lai letling tep. Chutah ka beisei loh deuhin Goggy chuan, "U Rin, lo riak phei ve mai la zanin chu, boruak han thlir hian a khawharthlak ruih sia, Mawitei tan pawh a nuam deuh ang," a rawn ti ta. A va pawi lo mai mai e, nulain riak turin min sawm. "A, rawn riah ve ringawtte chu a, mawi pawh a mawi nang," ka han ti khawmawi ve a. Goggy chuan, "A ho em mai, Mawitei a tel ve dawn tho alawm, ka pa pawh a lo la meng dawn a, a hrethiam vek ang. Room ruak lah pahnih kan nei a, Mawitei nena kan bulah i lo mut ve duh leh a zau em em bawk a," nui sang chunga a han ti chu sawmna aw mawi a va ni chiang em.

Ka nau hnenah chuan tihtur pawimawh lutuk avanga ka riah chhuah tur thu ka han hrilh vei ngial a, Goggy leh Mawitei nuih a lo zat hmel nasa mai. Dawr inhawngte a lo la awm hlauh avangin eiturte kan han lei a. Tichuan tlan zelin Goggy-te in chu kan thleng ta a.

Goggy pa chu a lo la meng run mai. Min han hmuh chuan mak a tih hmel deuh nachungin hlim hmel takin min lo dawngsawng a. Kan han inbiak lumlam zawh chuan Goggy chuan a pa chu kovin a room lamah chuan an han inbia a. Zanin kan chanchin vel a hrilh anih ka ring nghal mai a, rei riel lovin an lo chhuak leh nghal mai bawk a.

Goggy pa chuan reiloteah a mutchhuah thu sawiin min mutsan ta a. Tichuan thingpuite lumin kan eitur leite chu kan ei a, kan ri ve laih laih a, zantir lama kan thil tawnte pawh hre tawh lo niawm mai hian kan lang. Dar 12 a rik hnu erawh chuan mut mai an rawt ta a, keipaw'n pawi ka lo ti lem lo, ka mut a chhuak ruai tawh mai. Mahse thil pakhat erawh a pawi ka ti ta.

"U Rin, lokal teh, khawi room zawkah hian nge i mut duh? I duh chuan ka roomah pawh i mu thei thova, keini Mawitei nen room dangah kan mu mai anga."
An bula mu turin min sawm ve ta hauh lo mai, Goggy tak hi chu aw....va'n zei lo thei teh tuh tak. Room ruak chu ka han en ve ve a, a nuam dun dawn khawp mai. Mahse Goggy room hnaih zawk chu ka thlang ta a. Chutihlai chuan Mawitei a awm hnai lo bawk a, Goggy chuan min rawn 'Chuks' zeuh a, a va nuam veng veng mai em. An muthilh hunah an riahnaah ka va tho a vak maithei, a hriat lawk miah loh. Tichuan mu felin mut pah chuan Goggy nen chuan bang chhanah kan la in message char char a, dar 1 vel chuan kan mu ve ta awm e.

Mawitei a nu laka a awm a nawm loh deuh avangin zing chaw pawh ei tawh lovin kan haw nghal a, ka thlah kual a, chanchin danglam deuh a awm anih chuan min rawn hrilh vat turin ka ti a, kei pawh chu ka haw tlang ta nghal a.

Chawhma lamah chuan studio vel chei thain ka buai hle a. Thingpui ka in ve hman meuh chuan chawhnu dar 2 a lo ri dawn tawh. Thingpui in hahchawlh pahin Goggy nena kan thlalak hluite chu ka en kual vel a, kan inhriat tan dante ka ngaihtuah thleng a, ka lung a leng reuh hle mai. Folder hran hran ka hawng kual a, chutah ka tum loh deuhin nizan maia Mawitei-te in a thla ka laksak chu ka en fuh ta a, thil danglam awmin ka hre ta tlat mai. Chuta ka han zoom leh chiah chu ka thu ngil deuh zawt thei nia mawle. A chhan chu pi Thangtei chala ka thil hmuh kross lem pawh ni si lo, chhinchhiahna nge chal tichuar tih pawh ka hriat loh, ka lo ngaimawh lem loh 'C' ang deuh a lang kha a lo sen vek, sen lar tak a ni. Mak ka ti em em a, ka la tawn miah loh a ni sia hei kher chu. Kross ang chuan lo lang se ka hrethiam ang mahse 'C' ang deuha a lo lang chu ka hrethiam lo lutuk a, ka hrilhhai letling zawk, chutah a rawng a la sen zui leh ta nghal.

Ka rilruah ngaihthat lohna mak tak a lo luh tak avang chuan Mawitei chu biak ka tum ta nghal a, rei vak lo hnuah chuan a lo la ve mai bawk a.

"Aw u Rin, tehmial che chuan enge ni ta?"
"Mawite, khawnge i awm?"

"Hei ka pate kha an lo thleng dawn sia, hmuak turin ka nu nen kan kal mek a."
"Tunah tak khan khawnge in awm ka tia lawm," ka vin deuh lek lek mai, ka rilru a hmanhmawh lutuk.

"Tinge a? I va vin reuh tak. Bus a tawt lutuk a, kein kan kal a, zodin bulah kan awm mek. Milleniumah luh kawi phawt kan tum a."
"Aw, anih chu. Hei ka chhuak a, ka hmuh che u chuan ka rawn ko ang che, kawr eng rawng i hak?"

"Grey dal (Vutbuak rawng) ania, aw min lo ko vak mai rawh." Phone kan dah zui a. Pheikhawk pawh bun lovin chappal nen, bike ka tinung a, ka tlan phei nghal vang vang a. A hla lem lo bawk a, harsatna ka tawh loh chuan um phak har vak turah ka inngai lo.

Traffic a lo zam phei leh nasa mai. Mahse mi karah chuan chuhhelh fein ka inzep phei par par a. Ka melh phei zauh a, damdawiin peng thleng chuan ka la hmu lo. Chutah Civil hospital thlanga 'Two wheler parking' bulah chuan ka ding a, ka phone ka phawrh chiah tihah ka han hawi phei chuan traffic police chuan motor tidingin kea kal, kawng kan tum mek ho chu kawng kan turin a hui zauh zauh a. Chutah chuan Mawitei leh a nu niawm tak, police station lam pan zawnga kawng kan tur hi ka va hmu a.

Chutihlai tak chuan khawi lam atanga rawn chhuak nge tih mai tur khawpa chak hian bike a rawn lim phei puat a, a thawm a ring bawk nen, midang pawh a tiralkhel thei lek lek a. Trafficin din tur tia a lo phar pawh chu hmu lo niawm khawpa chak hian rawn tlanin hmeichhe te thawt, tlu deuh tawp leh a piaha midang hlawm tawp hi ka va hmu a, bike pawh chu chiang takin a thal bawk a. Parkna tur an siamah pawh dah hman ta lo chuan ka chhuk a, ka va tlan phei sawk sawk a. Pi Thangtei lo thu ngat, Mawitei'n hlauthawng hmel zeta a lo buaipui ka hmuh piah lamah, nu pakhat tlu ngat, miin buaipui tuma an pan tuau tuau ka hmuh rual chuan ka thleng phei ve chawpchilh a. Ka thinrim thut chuan engdang sawi set set lovin chu tlangval naupang tak, a bike tun thawh tum mek, traffic policein a pan mek chu pan phei nghalin a kawr awmah ka tham ding nawk a. Hnek chawrh mai ka tum lai chuan traffic zawk chuan inbengdai turin min lo ti a, chu rawlthar pawh chuan ngaihdam min dil nasa ngang mai. Kutthlak ta lo chuan, pi Thangtei awmna lamah chuan ka tlan phei a, midang paw'n an lo buaipui laih laih hman bawk.

"Pi Thangte, i tha em?" tih pah chuan a thu sawp niaih chu ka va kuah a. Mawitei'n min han hmuh meuh chuan, "U..," min tih pahin insum tum si hian a mittui a far nghal zawih zawih a, ka khawngaih reuh hle mai. Pi Thangtei chu a ngal atang hian thisen a lo chhuak tiam tiam a. Ka bul a mite hnenah, "Ti rawh u, casualty i panpui teh ang u," tih pah chuan ka kuah ding nghal a.

Pi Thangtei damdawi in lama kan kuah chhoh mek lai chuan a piaha bike-in a va sut, pitar lam deuh tawh kha ka han thlek zawk a. A su fuh viau nge ni, nikhua a hriat hmel tlat loh mai. Pi Thangtei ringawt ka buaipuina lamah ani kha ka lo mangnghilh deuh der mai a lo ni a. Mahse buaipuitu an tam bawk a, buaipui ngai dang ka nei bawk nen, ka ngaihven zui ta lo law law a. Kha rawlthar kha chuan 'Case' a awrh rip ve fu ang chu.

Casualty-a pi Thangtei an khawih mek lai chuan pawnah lo nghakin thihna a chunga a thlen teuh zia ka han ngaihtuah a. Tunah chuan 'C' sen vur mai awmzia pawh kha hrilhfiahin ka awm ta chiah mai. Kha chetsualna lo thleng tur khan pi Thangtei kal kanin a piah ami zawkah a thleng ta a ni. Bike khalhtu khan pi Thangtei kha a su dawn tih hriain a herh kawi zawk a, a piah zawk ami a va su ta anih ber chu.

Mawitei'n min rawn koh tak avangin casualty-ah chuan ka va lut ve a, an lo 'Dressing' zo tawh a lo ni a. Vanneihthlak takin a ruh a lo khawih lo hlauh e. Mawitei nen chuan a nu chu kan kuah chhuak a. Chutihlai chuan casualty kawtah chuan zin bag nen, pawr deuh phang hian Mawitei pa leh a u tlangval chu an lo thleng ve bawk a. Mawitei-te in kan thlen hnu chuan hliam na lutuka ni lo bawk a tiin rei thu lovin len leh vat intiamin ka hawsan ta a, Mawitei chuan ka haw hma chuan lawmthu min hrilh mawlh mawlh mai.

Zan mut hmunah chuan vawiin lama thil thleng chu ka han ngaihtuah let leh a. Pi Thangtei chunga thihna em a thleng lo chu a lawmawm ka ti takzet a. Engvangin nge thihna khan pi Thangtei kha a hel ni ang le!? Mawitei lah khan a hmu lawk sual ngai si lova, a nu pawh thi turah a dah sa vek tawh a nih kha.

E...ka hre chhuak ta, ka hre chhuak ta! Kha thihnain pi Thangtei a hel nachhan kha chu ka tawngtaina avang liau liau a lo ni, keimah bik bik tawngtaina vang chiah kha mawle....

TO BE CONTD/-
Nextah kan ziah zawh theih ka va ring tawh em....

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 13th, 2017, 1:45 pm

THE GIRL WHO SAW THE FUTURE - 10

Mita hmuh lawk theihna leh hriatna danglam ka neih nawn leh atanga chhutin thlaruk lai a lo liam leh ta reng mai. Hemi chhung hian thil tawn danglam tehchiam ka nei lova, thla erawh pangngai takin ka la leh tawh. Mitthi tur chhinchhiahna an chalah pawh hmu ila, ka ngawi thei khawp mai. A chhan ber chu a dik a dik chuan ka eizawnna ka thlak thiang tawh si lo, ti ila, thlak a harsa tawh a ni ber. Chutihlai kara an thla laksak seuh seuh a, an thih tur thu hrilh leh zut zut si kha a nuam ka ti tawh miah lo. Engtin nge miin min hmuh leh ang a, engtin nge min ngaih ang? Ka kutchhuak midang aia a lo that ve deuh vang nge, pan ka hlawh nasa leh em em tawh a. Chutih mek laia anmahni ti hlauthawng zawnga awm kha ka tan chuan a nuam tawh miah lo, ka eizawnna hi ka chan ang tih ka la hlauthawng ve tho si.

Mahse en liam ringawt chu dik ka tih bik loh avangin Pathian hnenah ka theih ang tawkin ka tawngtaipui thin, ka tawngtaina chu a chhan that theih em kha...in hriat kha. Hetiang ka tawn chang hi chuan ngei ngeiin Goggy leh Mawitei ka hrilh a, ka nu leh pa ka hrilh bawk a. Anni'n an thlarau nun leh an hun tlem la neih chu Pathian hnenah an hlansak zel bawk a. Chutiang deuh bawk chuan Mawitei paw'n a thil tawn chungchangah min ngen kual bawk a. Thuruk inzepsak thei tho siin, rilru hrehawm tehchiam lovin kan hun kan hman theih phah ta a. Hman ngaihtuah chuan thawventhlak tak a ni tawh.

Mahse mihring tungchhova kal, lungngaihnain a chim buai phak ni ta chu hrehawm tih ruk chang kan nei ve fo tih chu min hriatthiampui vek awm e. Chuti anih avang chuan Mawitei phei chuan amah avanga hetia kei ka lo awm ve leh ta zel hi hrehawm a tih dan a thuah hnih deuh a. Chuvang chuan a reh theihna turin an chhungkuaa Pathian hnena an tawngtai thin thu min hrilh fo mai. Kei chuan he thil hi min tih rehsak turin Pathian hnenah ka dil ngai lo. A chhan berah chuan Mawitei a reh phawt hma chuan kei chu a reh lovang tih ka rin vang a ni.

Goggy pa u, Goggy ni, mi vanduai tak mai chu pumpui cancer tih hmuhchhuah a ni a. An pa a sun a, chutah a fanu neihchhun a sun leh bawk a. A fapa sipai tang lah ral ramah kum sawm kal ta khan a chin hriat lohvin a bo bawk a. Ani lehzel hetianga a awm hi chu hriatthiam harsa a tiin Pathian lakah pawh a vui lek lek thin. Goggy-te pafa hian an rawn awm tirh khan an in a awm turin an sawm nasa a, mahse tlawmah a la nge ni, a lo hnial ve tumhrang bawk si. Tihngaihna hre lovin an sawm zui duh ta bik lova. Mahse a taksaah natna an hmuhchhuah takah chuan loh theih lohvin Goggy-te inah chuan a awm a lo tul ta a ni. Goggy hi a naupanlai atangin a ngai theiin fanu a sun tak achinah phei chuan a duat lehzual emaw tih tur a ni a, Goggy-te Shillong lama an awm daih thin avangin an inhmu khat mai pawh a, ngaih zawng a ngai thin ngang mai. Goggy lah chhun lama an in a khawhar taka awm thin a ni bawk a, chutia a ni-in damlohna vang pawh ni se, a rawn awmpui ta chu nuam a tih phah sawt nghe nghe a.

July thla chawhnu lam a ni tawh a, Goggy-te inah chuan a khat mawi tawkin ka leng zauh zauh a, Goggy ni, nu Ngaihi nen pawh chuan kan innel tawhin kan inkawmngeih phian bawk. Nu zawiawi te mah nise a tawng duh ve phian reuh a, a taksa natna a chhuah loh chuan mi hi a lo kawm ber zawk thin. Chutihlai tak chuan Goggy phone chu a rawn ri ral ral a, Goggy chuan lak nghal pahin, "Pa, enge ni ta?" a ti a. A hnu deuhah, "A van pawi ve," a tih chhunzawm leh lai chuan a hmel ka lo en a, hrehawm ti hmel ka va hmu a. Phone a dah veleh chuan, "Thil danglam deuh a awm em ni?" tiin ka lo zawt vat a. Goggy chuan, "U Rin, hnaah chuan min la ve ta lo anih chu," ngui deuh nghiai hian a ti a, ka khawngaih reuh hle mai. Nu Ngaihi nen chuan thiam ang anga hnemin a tana hna tha zawk chu Pathianin a pek leh em em tur thute kan sawi a, mahse a rilru chhungril kan hnem pha tak tak ngut angemaw chu le.

A written examah phei kha chuan mark hmu sang ber dawttu a ni a, interview-ah pawh a titha viauin a inhria a. A beisei pawh a sang ve em em. Mahse mi pali he hna a an lak tur zingah a tel pha tlat lo mai. Ka rilru te te chuan mi thiltithei deuh leh minister hial pawh an inrawlh leh nasat hi ka'n ring mai mai khawp a. Rin loh theih pawh ni hek lo le, kan zoram kalphung ni miau hek. Goggy chan anih avangin ka chan angah indah ve loh theih loh anih avangin ka thin a rim ru teuh mai.

Chutia thiam ang tawka kan inhnem ve mawlh mawlh lai ka phone a rawn ri a, Mawitei a lo ni.
"Hello, Mawite, tehmial che chuan, enge ni ta?"
"U Rin, thil lawmawm deuh hrilh tur che ka nei asin." A aw a zangkhai vah vah hle mai. Kan boruak tawn mek leh phone a midang biak chu hun leh hmunin a zir chiah lo nia ka hriat avangin, "Mawite, Goggy-te inah ka awm a, lo phei ve mai ta che, taxi lo hmang phei la, ka lo peksak ang che," ka ti a. "Aw le," a ti ve mai bawk a. Ka lo tumsak ve ang chu nauvi chu, tunlai chu hna ka hmu tha ve alawm le.

Rei vak lo hnuah Mawitei chu a lo thleng ve mai a. La naupang a zawk tih takah Goggy hmel hlim chiah lo chu a hmu thiam lem lo aniang, a rawn ri deuh ham ham a. Goggy chuan tha tak chuan a lo chhawn tho. Nia, a hmelah chuan midang chuan a hlim lo tih chu an hrethiam chiah lo maithei, mahse hei leh chen lo zui ve tawhtu chuan ka hre khawp mai thung.

"Mawite, eng thu lawmawm nge ni ta?"
Sawi chak si, lai hmel pu deuh bawk si chuan, "U, nimin piah khan ka awmdan ka nin tawh em avangin tawngtai dam thei ka pan a," a'n ti te te a.
Kei chuan, "Tichuan i thil dawn chu laksak i ni ta tihna em ni?" ka lo ti a.

"Ni love, mahse laksak a kan awm theih hun tur min hrilh." Mak ti deuhin ka han melh a.
"Engtin?"

"Nangmah lam hi ka sawi miah lova, mahse a hre nghal vek. 'He thilpek, i chan ang chi hi chang ve an awm a ni maw?' a lo ti nghe nghe a, mahse kei chuan nang nena kan chan hi a inan chiah loh thu ka hrilh," Mawitei chuan a ti a. Thudik a sawi anih ngat chuan thil mak tak zawng a ni chiang mai.

Tichuan sawi zawmin, "He'ng thil hi a reh hun tur min hrilh chu maw.....u Rin, Kawppui i neih hunah," zah hmel deuh hian a ti ta a. Goggy nen chuan kan inen rual thawt a, tih mai mai nge tak tak le....

"Tichuan i mi pan chuan a sawi maw!?"
"Aw sawi e."

"I awih em?"
"Ka thinlung takin ka awih. Chuan ka haw hnua-ah i nupui neih ni tur hriattirin ka awm bawk a," ka lo nui suk a, ka awih lo chiang khawp mai. Chutah nui chung hian, "Engtikah?" ka han ti a.
"October ni 2 -ah," ka nui chhuak hawk hawk a.
"U, i awih vak nange? Thil hmuh sual ka nei tawh ngai em ni?" a rawn ti ve sak a. Nih zawng a ni khawp mai, mahse ka awih chuang lo. A chhan chu ka kawppui ber Goggy nen hian vawikhatmah inneih chungchang kan la sawi ri ngai lo. Chu mai a ni lo, hmangaih thu chiangkuang uluk taka inhlan dun pawh kan la nei ngai lo.

"Nauvi, i va rawn ber pa chu zawlnei der anih chu," nui chungin ka han ti a.
"Tak tak asin, U Goggy innei mai ula," a la ti ta deuh deuh.

Goggy chu a nui mai dawn emaw ka tihlai chuan, "A theih loh, thil theih a ni lo," a rawn ti vei hmak a. Mawitei chu a ngui nghal rawih rawihin ka hria. Kei erawh chuan Goggy boruak tawn chu ka hrethiam khawp mai.
Goggy pawh a inthiam leh chiah lo aniang, "Mate, ka intiamna-ah chuan, hna ka neih hma chu pasal ka nei lovang ka lo ti a, hei vawiin result chhuakah ka tling ta bawk si lo nen," a ti a. Kan boruak a rit deuh nulh mai.
Chutah kei chuan boruak siam nan, "Mawite, a hrim hrimin i u Goggy hian min duh tak tak lovang, pasal tura fel leh hmeltha, hna sang tak tak thawk an tam si. Keini ang te chu engah tak tak min ti nang," ka han tih chuan Goggy chuan hmui ti sawi chungin rum deuhin min rawn melh a.
Chutah Mawitei chuan, "Duh chiang sa, hman zanah min hrilh vek alawm," a rawn ti ta.
"Engtin nge a hrilh che," ka han tih chuan rang deuhin Goggy chuan Mawitei hmui hup pah chuan, "Mawii, Lalhmingmawi, ngawi mai teh," a ti a. Hlim deuh chuan kan nui chhuak ta hawk hawk hlawm a. Umn, a va ngaihthatthlak angreng em.... Chutianga hlim taka nui bawk bawk chung chuan kan tin ta a.

Ka inngaihtuah nasa hle mai. Mawitei hian hmalam hun tur hi thihna chungchang chauh a hmu bik lo tih chiang takin ka hre tawh tlat. Thla kal ta maia ka nu damloh avanga kan rilru mangan hman ziate ka ngaihtuah kai a. Ka nu kha natna ber hmuhchhuah si lohvin a na vak mai kha ania. Damdawi inah kan lut a. A tirah chuan kal tha lovah an lo puh phawt a, a kal chu doctorte'n an han en chian leh chuan a tha an ti leh thul. Puh tur fak hre si lovin damdawi in atangin ka nu that deuh hret laiin kan inla chhuak ta kha ania. Mahse in kan thlen hnu lawkah a hma aia chauvin a khua a sik char char a, in lamah doctor kan ko tawp a, an inenkawl chawt a. Nachhawkna a inchiu leh thin mai bak tih theih tak tak a nei bik si lo.

Ka nu anih vang nge boral turin ka phal loh lutuk vang zawk pawh ka hre lo, a thlalakah takngial pawh a chalah eng chhinchhiahna mah ka hmu si lo. Chutihlaiin ka nu chu a tlahniam sawt sawtin a lang bawk si. Phai lamah kalpui mai kan tum rilruk tawh lai takin ka rilruah Mawitei a lo lang zawk a, engemaw a hmu mial maithei asin.

Mawitei chu a tuk chhunah kan inah chuan lokalin ka nu khum bulah chuan a thu vang vang a, a chalte chu a khawihsak a. Ka pa nen, ka naute nen chuan hlauthawng si, beiseina nei ru bawk siin Mawitei chu kan lo thlir thap. Chutah kan lam a rawn hawi chu a rawn nui ta ver ver mai le!
Ka pa lam chu hawi nghalin, "Ka pa, ka nu hi naktuk zing khawvar rualin chiang takin a dam ang," a rawn ti ta! Awih lo phal bawk si lo hian kan nui sang hlawm a. Ka nau pasal nei tawh phei chu a rawn tah nuih a, Mawitei chu a pawm vawng vawng a. "Mate, i sawi ang chu thleng tak tak se ka va ti em," tih pahin a mittui a hnam par a. "Mawitei chuan, "U Sang, ringhlel suh, chiang takin a dam ang ka tih chu," a ti tlat bawk si. Kei pawh chuan ka ringhlel rum rum hial zawk alawm le. Ka nu chu chiang taka dam turin a sawi a, tunah lah a la na em em mai chu a ni bawk sia.

Ka nu chu zankhua mai chuan a khua a sik leh a, keini chhung lah Mawitei thusawi avanga beiseina sang tak nei chung chuan mut zai rel lovin khum bulah chuan kan thu thap hlawm a. Zing khawvar tepah chuan kan lo chhing sek hlawm aniang, ka nu aw fiah fak rawn tawng chhuak chuan min tiharh zawk mai.

"Bawiha, ka tui a va hal ve, min lo bansak lawk teh," tih pah chuan a rawn thu chhuak hlawl mai le! Kan harh nghal vek a, mak kan tih lutuk avang chuan sawi tur pawh kan hre lo. Ka pa pawh a lo ding zum reng ringawt.

"Tui chu min pek i tum nange?" tih paha khum atanga chhuata a ke a rawn hlan thlak chuan kan harh chhuak hlawm chauh. Tui bottle chu ka pe nghal rawk rawk a, a tho a anih te ka la ring cheu mawle.
"Ka nu, i tha maw?" ka han tih chuan, "Bawiha, ka dam hmak. Na engmah ka nei tawh lo," a han tih chuan mak kan ti lutuk hi kan nui tawp. Hemi nite hian damkawr em em pawh nei lovin inchhung sekrek leh hnawk deuhte chu a khawih nghal bawrh bawrh mai nia.

*********************

Chutiang thil thla kal ta lawka kan tawn vel ka han ngaihtuah let chuan tuntuma Mawitei thil sawi awih loh ngawt chi niin ka hre si lo. Mahse ka awih chuang bawk si lo.

A tukah chuan Goggy ni-in min hmuh duh thu Goggy chuan min rawn hrilh a, teh tlat chuan, mak ka ti angreng. Lo hnial hranpa lem lovin, eng tak thleng ang maw ti rilru chungin ka va kal ta a. Ka va thlen hnu lawkah chuan nu Ngaihi chuan Goggy nen a khum lamah chuan phei turin min rawn ti a. Nu Ngaihi mutna pindan kan va luh chuan Goggy pa a lo thu ran a, thil muk taka ngaihtuah ni hian a lang a. Tichuan khum bul thutthlengah chuan kan han thu a. Chutah nu Ngaihi chuan pehhel awm miah lo hian, "Bawihte, i pa pawh ka lo sawipui a. Rina hi a rem a nih ngat chuan ka damlai ngei hian innei ula ka duh a ni," a lo ti ta mai le!

Goggy nen chuan kan inen ringawt a, chutah a pa lam kan hawi leh a, inngaihtuah muk hmel deuh hian a lo la awm a, engmah phei chu a sawi ve lo. Chutah Goggy chuan, "Mahse ka ni, hna ka neih hmaa pasal neih loh hi ka lo intiam tawh asin, ka thutiam hi ka zah em mai," a ti chuai deuh raih a. Nu Ngaihi chuan, "Bawihte, chu zawng ngaihtuah buai duh lo mai rawh. A tul em avanga thutiam tih hlawhtlin loh changte pawh a awm ve thin bawk asin. En teh, i hriat kha. Nang lo chu tumah neih ka nei tawh lova. Ka in zawng zawngte leh ka ro hi i khawm turin ka ziak fel vek tawh asin," a ti ta a. Goggy chuan hnukulh tih hriat tak hian, "Ka ni, ka lawm e. Mahse ka chhang nghal mai thei lo che, min hrethiam rawh. Hei u Rina paw'n inngaihtuah a duh ve ang chu. Bakah a chhungte pawhin engtin nge an ngaih ang," a ti a.

Ka rilru a buai kher mai, Goggy hian min hmangaih tak tak tih chu ka hrechiang ta khawp mai. Mahse ka la inpeih lo niin ka hre deuh bawk si, Goggy ngei pawh. Ka la inpeih lo ni a ka hriat rual chuan ka inpeih lohna awm ang ka han ngaihtuah a, engmah chhuanlam dap tur ka hre lawi si lova.

Kan pahniha kan awmdun leh hnuah chuan Goggy hnenah chuan, "Anih leh Goggy, hna chu lo hmuin pasal neih inpeih tawh ni la kei hi min nei duh reng reng em ni?" ka han ti a. Goggy chuan ka awm a rawn bei thlap pah chuan, "I ti mak em mai u Rin. Nang lo neih duh ka nei hleinem, ka thinlung zawng zawngin ka hmangaih che," a ti sep sep a. Chutah kan inkuah a, kan infawp ta vawng vawng a.

Thil a kaltluangin thil awmdan a mak ka ti telh telh mai. Chumi tuk lawkah Goggy chuan 'Phone call' dawngin, a hna dilah khan mi pakhat tling ta khan zir chhunzawm leh phawt a duh avanga a hna hmuh chu zawm ta lovin, a aiah Goggy chu an ko a lo ni a. Goggy pawhin a ni duhtak chu hnial theihna chhuanlam a nei dawn ta lo.

Keiman ka chhungte ka hrilh hreh em avangin Mawitei'n ka pate bulah min sawisak a. Ani, fanu ang maia an lo en tawh avangin keimah lam ka inpeih phawt chuan hnial enah pawh an en lo.

Thil mak deuh thleng leh ta chu palai kan tirh vawihnihnaah chuan palaite chuan thu lawmawm tak rawn hawnin kan inneih ni tur atan october ni 2, pu Gandhi-a piancham tak mai chu an rawn ruatfel ta thlap mai le. Goggy pa hian chawlh a neih theih loh em avanga he ni kher hi ruat an lo ni a, Mawitei chuan dawt a sawi lo leh ta phawt e. Mahse hriatna danglam kan neih hi laksak kan ni tak tak angem?

****************************

Inneih inkhawmah chuan ka hawi let ngam lo na a, zai thawm atang chuan miin kan inneihna chu an ngaihlu hle a ni tih ka hrethiam a. Goggy lah nidang zawng aiin a hlim hmelin a hmel chu tha sawt sawt tak a ni ringawt. A hmui apple rah ang mai a thianghlim leh vam ham mai chu tu tan pawh en nawn leh loh chi a ni lo. Pastorin inneih thutiam min chham zawh tir a, a tawngtai zo chiah tihah chuan keimah atang chuan tla deuh tawp, thlawk chhuak deuh nawlh ang hi awmin ka hria a, ka ruak deuh huai hian ka hre nghal bawk. Chutah chuan hriat chhuah ka nei ta. Mawitei awmna lam chu ka va hawi a, hlim hmel em em, hmel eng deuh phet chung hian min rawn melh a, hmuiphun hian min rawn bia a. Hetiang ang reng reng a Mawitei hlim hmel pawh hi ka la hmu ngai lo. Hrilhlawkna kha a famkim ta. Hemi a chinah hian Mawitei nen chuan vawikhatmah thi tur hriat lawk tirna thilpek kha kan dawng leh ta ngai lo.

***************

Nula hmeltha leh fel, ka beisei phak tur tak tak pawh a ka ngaih loh thin Goggy chu ka bulah chuan lungawi hmel fe hian a mu bem a, min nuih deuh sang bawk a. Shillong college atang tawh a mi beisei rawn nula kha ka lo rindan chuan vawihnih khat tal chu tlangvalin an bawhbet ngeiin ka lo ring a, chuvang erawh chuan ka iai phal chuang lo. Kei ngei pawh fa loh vanga pa lo chauh ka ni tih ka inhre ve reng tho alawm. Mahse ka beisei piah lamah nula thianghlim diktak a lo ni chuan hlimna mi va han pe hnem chiang em, teh sen rual a ni love.

Zing hma taka za deuh ner ner ka hriat chuan ka thil tawn zawng zawng chu ka mumang emaw tiin ui tak chungin ka han meng kawk a. Mahse ka mumang mai a lo ni lo ve, Goggy chuan hlim taka nui seng chungin ka beng min lo sehsak ner ner avangin ka harh ta chu zuk lo ni rengin...........

www.storyfb.com mizo story thar englai pawhin chhiar tur a awm reng
A TAWP TA.
(Hetiang lam story hi chuan chhiar a hlawh lo deuhin love story ka ziah tawh te nen chuan like leh comment pawh a inthat hleih hle mai. Mahse ka ziah chak zawng leh ka ngaihnawm tih chi a ni ve miau si a le. Engpawh ni se, a lehpekah chuan M&B lam hawi kan ziak ve thung turah ngai ang)

In comment dawn ve pawh inbeisei ve ta ila....
I CHHIAR AVANGIN KA LAWM E

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 20th, 2018, 7:21 pm

up

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)