A GIRL WHO SAW THE FUTURE BY Ar EL Khawlhring (Completed)

Moderator: Ar eL' Khawlhring

Ngaia
Site Admin
Posts: 25813
Joined: April 30th, 2016, 4:07 pm

A GIRL WHO SAW THE FUTURE BY Ar EL Khawlhring (Completed)

Unread post by Ngaia » August 13th, 2017, 1:41 pm

the girl.jpg
the girl.jpg (12.18 KiB) Viewed 17025 times


Part 1 THE HORRIBLE FUTURE EYE! BY Ar EL Khawlhring
viewtopic.php?f=38&t=2135


A GIRL WHO SAW THE FUTURE BY Ar EL Khawlhring

A link chiah tih loh hi chu khawiahmah copy/paste phal a ni lo.
A link share dan
viewtopic.php?f=2&t=917
A share dan tur nen lam kan inkawhhmuh chung pawh a, a story full a whatsapp lama la copy/paste lui in awm anih chuan Police-ah FIR kan thehlut anih pawhin nangmahni chochhuah liau liau a ni ang...
Copyright ©
All rights reserved
http://www.storyfb.com


A GIRL WHO SAW THE FUTURE!

Ka thawnthu hmasa 'The horrible future Eye!' chhunzawmna tur a ni a, keia ziak ve tehlul min hlutpui a, a tawp min phalsak lo tu in lo awm ve nek nek a, a lawmawm ka ti. Nia, ka tih tawp dan kha a bûl ve rêng bawk a ni. Chuvangin hei a kalhmang dang hretin ka rawn ziak leh e. Thlahrang hlau tan pawh chhiar nuam tawk....hmangaihna hmangaihna.....umn..Chhiar nuam ţheuh ule.
.
PART - 1
Khatia mi thi tur lo hriat lawk theihna, an chal a kraws inrîn ka hmuh ţhinte, kha thil, thilpek nge anih anchhia ka chunga lo tla pawh ka hriatthiam si loh, mangang tak, tih bo dan pawh ka hriatthiam si loh, Pathian vanga lak bosak a ka awm atang khan kum 1 zet a lo vei ve ta reng mai.
.
Englai mai pawh a min ţanpui peih reng thintu, ka manganna zawng zawng ka thlen ve na ber, ka ţhian ţha ber tia ka lo chhal ve, mahse a ruka ka hmangaih ni si Goggy pawhin an awmna Shillong lamah a pa hna ţulna avangin min chhuksan ta vang vang kha ania. Ruak huai mai hian ka inhria a. Keimah a hriatna awm thin lak bosak ka ni pawh chu pawi ka ti ta lek lek zawk mai. A chhan chu ka hriatna danglam tak kha la neiin, mangang ru tak, puitu ngai tak khan awm reng ta ila, Goggy hian a pa hna ţulna vang pawh ni raw sek sek, min ngaihtuah em avangin min hawsan hauh lovang tih hi ka beng tlukin ka chiang ve tawk tlat, ti ila, ka chiang thawi a ni mah zawk e a. Keima beng ngei pawh hi a nihna takah chuan a awmdan diktak ka lo la hrechiang reng reng hleinem mawle.
.
Ani ang nula hmeltha leh hleitlingin, kei tehlul, tu khaw kha mahin ka ui ka ar an tih duh loh zûnah a lo uai ru ve a, kei ka lo uai ru bawk nen. A tawp a tawpah zawng, beisei loh lutukin 'Muah hlup,' kan ti ve ta kha ania. Chu pawh hmeichhia zawkin zak tak chunga bul a ţan zawk lehnghal, ka va pa lo thin tak e aw. Mahse khami ţum tluka nuam tih leh hlim kha ka la nei lo hial awm asin.
Khatih lai tak khan thianpa Muanhnapa kha chuan min lo hmu ru ta se chu, midang bulah thukhuh inti ve deuh si khan, an infawp ti duh bik si lovin, 'An khâk chhâkna ve ve an insiktir a,' a lo ti leh zuah zuah roh ngei ang.
Kum 1 zet min han bosan chhung hian phone te chuan inbe chamchi mah ila, sakhmel tawnni her thei ta si lo chu, ka khua zawng a va har vawng vawng tak em.
.
Mite chuan an thiltawn atanga hmangaihna lo par a, lo vul chhuak thin chu mawi taka phuah chhuakin, 'Mittui kara hmangaihna, 'Chun leh zua hrang kara hmangaihna,' leh eng engemaw an lo vuah a. Kei ka thiltawn teh hrep avanga hmangaihna lo piang chhuak ve teh hlawl hi engtin nge maw a hming ka phuah ve ang le...
THLAHRANG KARA HMANGAIHNA te han ti ngawt dawn ila, ka tawn kha thlahrang chu a ni chiah si lova. Ka thil tawn khan midang a ti hlau ve lem lova, keimah min ti hlau han ti dawn ila a dik ber bawk silo, min ti hrehawm kha a ni ber zawk a. A, ka phuah thiam love, a thiam chuan lo phuah chhuak mai teh se. Anih dan takah chuan hlauhawm danglam engmah a rapthlak zawngin mite chungah a thleng lova, mi thi tur ka lo hmuh lawk thin avang khan miten min râp a ni ber mai. Kha ber kha a ni hrehawm thin chu ni. Mahse tunah zawng a tawp tawh e.
.
Mak deuh mai chu khatia ka hriat lawkna, mitthi tur ka camera atanga ka hmuh làwk theihna lak bo saka ka awm hnu, Goggy pawh an awmna Shillong lamah a liam fel hman ţawk tihah khan, kha ka hriatnate kha midang hnenah hlanchhawnin a awm tih ka hre tlat mai. Chu chu ka thinlungah hian min hriattirtu a awm a ni.
.
Mahse tu hnenah nge hlanchhawn a nih a, tu chungah nge kha thil kha lo tla ta tih erawh ka hre der silo. Ka thiam ang tawka chhuiin ka ngaihven reng a, mahse ka chhui chhuak thei bawk silo. Ngaihven viau turin ka hunin min daih bik em em lova. Hriattirna ka chungah a lo thlen mai beiseina nen ka lo rin nghah ve tawp mai a ni.
.
Ka camera chhuanvawr ve em em mai ţhin, ei zawn nana ka hman ve lah kha, ka almira-ah ka khung bo hmiah a, ka la khawih zui leh ta lo reng reng. Ka hmuh theihna lak bosak ka ni tawh tih inhre reng mah ila, mihring lam inrinhlelhna a lo chhuak lo thei lova, chuvang chuan a ngai ang tê khan ka mit tih varin a awm leh roh ang tih ka hlau rilru tlat a ni. Kum 1 a ral hma chuan ka hmang leh tawh lovang ti khan ka intiam rilru ta kha ania, ka studio ngei pawh a chul ţhiap tawh mai. Mahse hei kum 1 a tlin nan chawlhkar khat vel bak a awm tawh lova, huntiam a ral chuan ka tuaihnum ve leh ţan tawh ang chu.
.
Darkhuang a ri tuvu hlurh hlurh a, kan veng thenawm chiah atanga rawn ri a ni. Zan dar 10 vel a ni chho chiah a, ka leng chhuak chu in ka thleng tep a. Hemi zan kher kher hi engtizia nge mawni, zan lah chu a reh hma em em lehnghal. Thli lah chu a thaw ang vuk vuk a.
.
Darkhuang an rawn vuak nawn leh chuan kan kawtkai ka thleng chiah. Hetianga darkhuang an vuak chuan ţhalai lam ni lovin upa pawl mitthi an nei tih a chiang hle mai. Veng thenawm nen kan veng hi a inep that em avang hian mic a thupuante, thawm riva hi a inhriattawn theih viau a ni.
.
Inchhungah ka lut a, mut tumin ka intintuah deuh uaih lai chuan darkhuang a lo ri leh a. A mak ka ti angreng khawp mai, darkhuang rite chu ka hre fo. Mahse tuntum ami rik dan hian ka thauvah min man deuh tlat. Engtizia nge ni tehreng le!??
Thil hriatchhuah ka nei thut. Kar hmasa khan ţhianpa Remtea pu kum 80 mi vel damlo kan va menpui tak kha mawle. Kha kha a ni thei mai angem aw? Chanchin lah ka la zawt zui leh miah lo lehnghal. Khawnge, chanchin ka'n zawt ve reng reng teh ang. Ka phone ka han phawrh a, message a lo awm rân mai, Remtea message ngei a lo ni. Ka han hawn chuan ka rin ang ngeiin a pu zan dar 9-a a thih thu min hrilhna a lo ni a.
Chhan let loh chi ni hek lo, "A va pawi ve aw, ka lokal nghal ange," tih ka han thawn let a. Ka va peih lem lo tak. Vawiin ka hnathawk ka chau riau mai lehnghal. Mahse thiante an lo ni ve lehzel si a. Lo muhil tawh ila emaw, ruah tal sur se chu vengchhung a nilo bawk a, chhuanlam a ţha deuh tur ania. Mahse chhuanlam siam theih a ni ta love.
.
Phur lo zeta ka insiam mual mual lai chuan message a lo thleng leh a.
"Ţhianpa, a zana zan chuan lokal kher a ngai hleinem, naktuk chhun lamah i duh leh lokal zawk la," tih hi a lo ni a.
.
"Aw," tih mai ka duh hman rum rum. Mahse chhang ta lo chuan ka insiamsan leh ta a. Veng ţhenawm mai a ni sia, minute 15 tlan pawh nilo lehnghal a han kal loh ringawt chu a tlawmngaih loh thlak ve bawk alawm le.
Ka chhuak dawn chiah tihah chuan message a lo thleng leh a.
.
"Lo kal i tum anih rau rau chuan camera rawn keng rawh aw."
Ka phu deuh zuk thei. A teuh lo lutuk, ka intiam hun a la thleng lo. Bakah mitthi thlalak nan lehnghal chuan ka duh rih lo reng reng, krawste hi ka hmu leh reu reu anga, awm a tinuam lo zo leh vek ang. Ka reply lova, ka nu chu kaithovin thil awmdan ka hrilh a, tlaivar kher ka inrin lemloh thu ka hrilh hnu chuan ka chhuahsan ta a.
*********
.
Thingpui lumte leh a chhunga luh tum lem lo ni awm tak tlangval thenkhat chu kawtah an lo ţhu dul mai. A ţhen chu sir kilkhatah eng engemaw sawiin an lo nui ham ham reng bawk a. He thil hi ka vei ve angreng thin. Khawhar chhungte hnem tura kal si, inchhunga lut miah lova ţhenkhat pawn lama an ri dur dur thin hi. An rawn thawkchhuak ve hrim hrim hi an fakawm. Mahse inchhung a ruak huai tih hmu reng chung si a pawna ţhut tlat ching an awm hi.
Thingpui lum ho hrim hrim hi chu thudang ania, tum miah lo an awm hi ka vei ve ţhin. A chhunga kan awm ţhahnem ve hrim hrim anih hi chuan khawvar lamah pawh zaite hi kan intuichhuah a, khawhar chhungte tan lah lawmawm, a lenpuitute tan lah hmingţhatna ni bawk.
.
Mahse zan tlai lutuk a la nilo bawk a inchhung pawh an la khat ţha angreng hle. Remtea chu ka hmuh mai loh avangin varandaah chuan ka han ţhu ren rawn a. Ka tlangnelna in tho mah nise zanin chu ka mal angreng hle mai. Hetih hun tak hian Goggy awm se zan kan han tumtawi dun tur ania, a ngaihawm vang vang mange.
.
Remtea chu messagein ka thlen tawh thu ka han hrilh a. Ani pawh rei rial lovin a lo chhuak nghal a. Min rawn hmuh veleh chuan nui var var pahin,
"Khawnge camera?"
"Ka rawn keng lo ţhianpa."
.
"Eheu, ka lo ring tawp che asin. Tinge a? A chiang lo nge?"
"Nia," ka han ti zet na a, nuam ka tih leh chiah loh avangin, "Ţhianpa, kum 1 chhung vel chu khawih tawh rih lo turin ka lo intiam alawm le."
Mak tih hmel zet hian min en deuh hau a.
.
"Ka chungchang chu i hriat vek kha," ka han ti leh a.
"A reh vek tawh i ti emaw tia."
.
"Nia, mahse maw, hmu leh thut mai tura inngaihna ka nei leh tlat thin a," ka han tih chuan a nui kar kar a. Ni e, a tan chuan a nuihzatthlak maithei, mahse ka tan chuan a ni ve mawlh si lo.
.
Remtea inchhunga a luh leh hnu-te chuan ka ngaihtuah chhunzawm a. A tir takah kha chuan mi thla ka lakte computer atanga thlalak ka editin an chalah kraws chhinchhiahna ka hmu a. Chumi hnuah camera lawng lawng atangin thi tur chhinchhiahna an chalah ka hmu chhunzawm leh a. Hrehawm tih tawh nakalaiin ka mit tih vara a awm lehzual hnu phei kha chuan mit lawngin ka hmu ta mai kha ania, a va nuihzatthlak duh lo tak khang han hmuh kha chu aw, miin min ţih phah vek bawk si, Muanhnapan a lo sawichhuah zut zut vangin. (Hetiang chungchang chu part hmasa The Horrible future Eye! ah khan ka ziah vek kha)
.
Remtea'n, "Ţhianpa, rawn ţhu lut la," tia ka darah a han ben dat dat chuan ka harh zawk a.
Chutah, "Hei ţhian rawn kal thar lo chiauau tur vel leh chhungte lokal an awm zeuh zeuh sia, kei chu pawnah ka lo ţhu anga, saw lai tlar hnung awlah sawn lo va ţhu ve tawp mai rawh, saw, nulate saw be bawrh bawrh la, an fel hlawm ania," a tih hnu chuan ka luhsan ta a. Tlar hnung bera nula lo ţhute bulah chuan ka ţhu ve ta kak a. Ka mutchhuak lutuk chu zai lai chuan ka lo muthlu leh bak bak thin. Ka han men leh zeuh chuan ka bula nula ţhute chu an nuih a za tih hriat tak hian kun chungin an lo lo nui dir char char thin a, min lo melh leh zauh ţhin bawk a.
Intihharh tum viau mah ila, khuang ri chuan min awi a, ka mit chunglam hnuailam hi unau tih takah reiloteah an inkawmngeih lehnghal em em zel mai a, buaithlak tak a ni.
.
"Duhtak, lokal rawh, hmangaihna par chu i lo thliak dun teh ang," tih pah a Goggy'n a hmui a rawn dawh hnaih chuan phur lutukin ka ban ka han phar chhuak a. Chutihlai tak chuan a ri deuh huk a, ka mumang aţanga ka harh chhuah chuan ka bul a mite chu an ding suau a. Harh hlawl pah chuan ka'n ding ve ringawt a, mahse ka ding chhuak hman chiah lo. Ka va ţhu leh rangin ka va han zak tak em. Hnar chu hnar chu Sai tiat a ni ringawt. Nula ho thingpui sem tur an tho chhuak chu lo ni lekin. Ka ţhutna a hnung ber a ni hlauh a, min hmu an tam lo hlauh zawk. Mahse ka bula ţhu nulate erawh insum thei lovin nuihza lutukin an tlan chhuak chawn chawn mai anih kha. A va nuam lo ber mai em.
.
A kil a âwl ta bawk a, zah pawh dawn lovin ka tawlh phei hmak a. Pawi lo, tu ta mah a ni bik hleinem. Ka mutchhuak lutuk vangin ka mualpho zau ţep lehnghal. A kil berah hian ka muthlu sek sek tawh ang.
.
Thingpui an rawn sem a, nula ho lah chuan min rawn nuih tet tet lehnghal. Za lo deuh hian ka lo nuih let ve ringawt hlawm a. Chutah thingpui kan han in zo va, nula ho pawh chu an lo lut leh a. A kilah chuan ka lo ţhu vung si, an inmelh hrek hrek a, an nui tet tet a. Ka bul chiaha rawn ţhu nula hnenah chuan, "Ka lo ţhu ringawt mai asin, i ţhu leh duh zawk em?" ka han ti mawihnai ve bawk a. Ani chuan, "Duh lo mai, i mut a chhuak em mai, ţhu daih rawh," tih pah chuan a nui zui hak hak a. Inthiar lawk chu ka duh viau nain ţhutna ţha chân mai ka hlauh avang chuan zun chhuak zet chung chuan ka ţhu ta hle hle a.
.
Kan han zai ţan leh a, khuang ri bawk chuan min awi leh ta. Ka maimitchhing leh diar diar tihah chuan pawn lamah ring mangkheng hian darkhuang an rawn vua chu ka phu zawk a. Hriatthiam si loh hriatna mak tak keimahah chuan lo awm nghalin hma lama ka han hawi chhuak chu ka hma zawn, kan thutna ep tlar hma a nula ţhu chuan mak tih hmel deuh hian min lo melh kiau mai le! Nula han tihah kum 20 pawh a la tling lovang tih a hmelah chuan a rin theih nghal a.
.
Chutah thil thleng pangngai ve mai anih ringin ka mit ka la sawn a. Han hawi kual deuhin ka han melh nawn leh pawh chuan min lo la melh ta tlat mai. A hmel lah chu a ţha reuh em em mai lehnghal. Engtizia a chutia min melh reng ringawt nge mawni le!?? Ngaihzawng melh chuan min melh lo a ni tih ka hrethiam mai. Chu nula hmela ka chhiar theih chhun chu mak tihna hmelte, hlauhthawnna hmelte, lungngaihna hmelte leh beiseina hmelte chenin ka chhiar thei nghal a. Thil awmzia diktak ka hrethiam lo nachungin hrilhfiahin ka awm dawn a ni tih ka hrethiam nghal a. Chutihlai chuan ka mitthlaah mi thi tur chala kraws chhinchhiahna ka hmuh lawkte, kohhran upa thi tur chal a kraws letling ka hmuhte kha a rawn lang thar chuai chuai a, hrehawm ka ti chu ka maimitchhing ta ringawt a.
.
Ka phone rawn nghawr dat dat avang chuan ka rilru a harh thut a. Ka han meng a, kha nula kha ka han melh leh chuan a lo awm tawh hauh lo mai. Chutah ka bula ţhu hnenah chuan, "Khawnge khulaia ţhu kha, i hriat zawng a ni em?" ka han ti thawr a.
"Tu maw?" mak tih hmel deuh hian a rawn ti he haw a. Zahah pawh la duh tawh lem lovin a ţhutna lai chu ka han kawk a.
"Ka hre miah lo mai," tih pah chuan a ţhiannu chu a han zawt sa sa a.
"Kan hre miah lo anih chu, kan lo en chiang miah lova," tih pah chuan an nui sang a.
.
Kha nula khan engemaw ti tak hian min mawlh tlat. Ka va ngaizawng tihna pawh a ni bik chuang lo. Ngaihzawng ang chi a melh tur paw'n ka duh aiin a naupang reng reng, mahse hriatchian chaknain ka khat tlat mai.
.
Thawh deuh hluai pah chuan, "Ka va zung lawk ange," ka ti a, ka chhuak ta nghal a. Pawnah chuan ka han hawi kual ngial a, mahse hmeichhe hmel reng reng ka hmu lo. Tlangval ho lo titi mam mam leh lo muthlu bawk bawk ho bak chu hmuh tur an awm lo. Ka sana ka han en a, zing dar 1:30 a lo ni a. Ka han hawi kual leh ngial hnu pawh a ka hmuh tak lovah chuan Remtea chu ka hawsan mai tur thu message ka hnutchhiah a, bike chu tinungin ka tlan haw ta vang vang a.
.
In ka thleng a, mu tura ka insiam fel hnu chuan ka phone ka han bih zawk a, Goggy message a lo awm kiau mai. Mitthi in a ka awm laia lo thleng kha a ni ngei ang. Ka han chhiar nghal a,
"Naktukah ka pa nen kan lo chho dawn, kumkhuaa rawn awm hlen tawh turin," tih a lo ni.
Ka han reply ve leh hnuhnawh a.
"Enge a awmzia? In rawn pêm dawn tihna em ni?"
Chhanna ka dawng lo, a lo muhil hman a ni ngei ang. Engpawh nise, Goggy ka hmu dawn tih ka han hre thut chu ka phawklêk nghal a ni ber mai. Ani tê lah hi sawilawk lutuk mang si lova min ţhawn thut thut hi a ching reuh a, a ngeiawm thin rualin a lawmawm em em bawk si. Ka hlim nghal veng veng, zan mut pawh a tui dawn e.
.
Mut pah chuan mitthi in a ka nula tleirawl hmuh kha mitthlaah a rawn lang leh a. A mak tih mai bak chu han ngaihtuah zui dan vak pawh ka hre lo. Engemaw tak chu a lo thleng ngei dawn tih bak sawi theih ka nei lo. Umn, ngaihtuah zui hrih lovang. Goggy nena kan hun hman dan tur chauh lo hisap lâwk teh ang. Naktukah Goggy a lo thleng ang, zanah kan inhmu thei ang. Naktuk zan zet chu aw.... Waa nuam dawn em....
.
(Zankhat kartla zelin tih chhuah kan tum dawn nia)
Inhriattirna awm lo chuan copy phal loh - Ar EL



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 13th, 2017, 1:42 pm

A GIRL WHO SAW THE FUTURE - 2
.
THUHMA LAWK chhiar ngei chi: Nimin piah khan kawng chhe sawt karah ka phone ka ipte atangin a sawt chhuak hlauh mai a. A chhartuin min chhâng duh bawk si lo. Phone ka tibo chu a ni ta der mai a. Ka sawi tum ber chu kei a thawnthu ziah fahrah ve tê tê, mi ziah sa han cho pha ve hlek lo hi min hlutpuitu zinga pakhatin ka harsatna hriain PHONE tha deuh mai min present hlauh mai a, thinlung takin lawmthu ka sawi mawlh mawlh e. Hming tarlan a duh lem loh avangin ka tarlang ta lo mai.
***********************
PART - 2
.
Dar 6 a rik chuan ka harh vah mai. Goggy lo chho tur chuan min tiphur em em mai a, ka chhungten chaw eitura min rawn koh pawh chu ka ngaihsak reng reng lo. Mahse rei vaklo hnuah chuan ka va kil ve ta hram a. Chaw ei laite chuan ka lo khi leh suk suk thin. Ka nau chuan min melh hrek hrek a, hre awm pawhin ka lang duh lem lo.
.
Thlalak ka khawih loh chhung khan sawrkar hna lamah mi ai kalin thla 8 zet chu ka thawk ve a. Mahse ka hna hmasa nen a inpersan bawk nen, tuina tak tak pawh ka nei lova, ka thlawn leh ta hlawl mai kha ania. Tunah chuan mahni in lamah a ţul apiang thawkin ka nu dawrtê siam ka nghahpui ve ta mai mai rih anih hi. Hna tha dang erawh ka ngaihven pah reng tho va.
.
Ţhutthleng seiah ka mu zal mai mai a, chaw eikham mutchhuak in mihur ang maiin min chul mu leh ta, siai siai mai a. Pawi love, tihtur hranpa ka nei rih hleinem. Ka muhil nghet hman ţep tihah chuan mumang lam atangin min thawng tho dawttu a awm tlat mai le! Zan lama ka tleirawl hmuh ngei mai khan chhun mumang inţan lai takin chiang takin min lo melh leh kiau mai! A hmelah chuan chuan manganna, hlauhthawnna leh ţanpuitu beisei ngawih ngawih hmel a pu a, midang pawh melh lovin ka mitah tak a lo en kiau lehnghal. Biak pawh ka tum lai tak chuan ka harh chhuak zawk a. Engthil tak chu thleng ni maw aw.... Mumang satliah anih ka ring thei lo.. Chhungrilah hriattirna sawifiah thiam si loh ka dawng nghal chat bawk nen.
.
Ka harh thut chu ka phu zawk mai. Ka chhungte erawhin min lo hmu lem lova. Chutih rual erawh chuan ka nu chuan,"Mama, tihtur em em i nei lo bawk a, compound vel hi hmanhmawh lem lovin lo tifai ve mai mai ta che," a rawn ti a. Ka phur viau lo na a, fapa awmchhun, ka kova tla chu a ni ve si. Chemkawm nen hmunphiah leh a ruhna nen ka chhuak ta a. Tih fai mawlh mawlh pah chuan zanin Goggy nena kan inhmuh hun tur ngawt ka suangtuah a, a chang leh ka lo nui leh vur vur a, miin min hmu ang tih a hlauhawm thin ania aw. Hnim pawh fai pah chuan rilruin, ' Goggy Goggy' a ti mawlh mawlh a, ka thawk sawt phian. Mahse a chang chuan tunge anih hriat loh tleirawli kha a lo lang leh thin. Ngaihtuahna a pêng leh vung vung thin bawk.
.
Ka thian fai thawkhat tan tawh tihah chuan phone call a lokal a. Goggy..... Kûk ruih mai ka va chak em.
"Hello duhtak." A reh vung vung, "Duatte, i hrethei nange," ka han ti leh a. A la reh cheu.... Ka thin a ter leh et et tawh.
"Ka tawng i hria em eki eki?"
"Hria e,"
Mipa ţawng a ni daih mai le.... Khai aw, Goggy mi thianghlim tia ka rin ve tehreng nen, khawvel hi chu a mak mange. A bialpa a ni ngei ang.
Sawi tur hre lovin ka ngawi reng a. Chutah zah pawh sawi lovin, "pawimawh thilah ka be duh a," inthlahrung takin ka han ti a. Le! Ka rilru leh thinlung a nghing lawih mai. Mipa in maw phone lo la.
"Tunge i nih a?" A la rawn tizui. Thinrim insum takin, "A thianpa," ka ti hram a.
Thinrim tawh nakalaiin, "Tu a thianpa?"
"Hmela, i bialnu anih chuan khatia min tih vel kha a ngai lovang aw," tih pah chuan thinrim zetin phone ka dah ta a.
.
A rawn ri nawn leh ta, ninawm e.... Ka la leh hram a. Chu aw ngai bawk chuan, "Vala, Goggy a inbual a, kan thlen thu min lo hrilhsak mai teh a tia,"
"Chuti tunge i nih a."
""A pa.""
.
Min va han ţhawng chiang tak. Ka zak chem chem. Hnar chu hnar chu Laipuitlang tiat.
"Aw ka pu, min ngaidam rawh, inbawl kual hi an hrat lutuk a, in tluang maw, in va lo thleng hma," te chu ka'n ti khawmawi leh a.
.
Nakin deuhah chuan phone call a lo thleng leh a, " Aw ka pu" ka han ti dek dek a.
"Ka pu a?"
.
Kan nui dun ţiah ţiah a.
"Hmeli, i pa kha hmangaih biahthu ka hlan hman hrep asin, suali, tinge i sawi lawk loh," ka ti a.
"A tlang thei si lova, inbual ka duh sia, ka pa hnenah lo phone mai tur chein ka ti anih kha," a ti a.
.
"Zahthlak, eng angin nge a ngaih?"
"Kan chungchang ka hrilh vek alawm, ka thian tha ber ania, a hmu chak tawh lutuk che."
Ka thawveng ta huai mai.
*******

Zan dar 8 a rik meuh chuan Goggy te innghahna in, chandmari a a nî te inah ka ţhu vang tawh. Goggy pa in min lo hmu chiah mai chu ka lai chhe lutuk tawp. Zahzelah ka ke zungpui tin ka seh lo chauh a ni ber e.
"Bawiha, Rina maw i nih?" a rawn tih chuan chuan ka khur dur dur thei, nuam lo thraksss...
.
Goggy sawi hmang ang chiahin pa sa tha tak a ni. A taksa a fit tih a pian atang leh a che vel atang chuan a hriat vek. Goggy inven nana kungfu leh a dangte a lo zirtir thinte chu a tha ka ti ta hluah hluah a. Nu hnapin a enkawl seilian thei tho bawk si, Goggy pa zet chu patling tak a lo nih hi ka ti rilru nep nep a.
.
Goggy inbual zo rawn kal phei chu a chawnban, a fuke, aaaa, sawi lo mai ang. Leonardo Da Vinci nula lemziah kha chu e.... Bleh ni mai, a mawi uchuak chungchuang a ni e.... Ngawi teh ka sawi tam lo mai ang.
.
A pa chuan min rin tawk hmel bawk a, mitmei veng lem lovin pawn thutthleng lamah kan insawnchhuak a. A thim deuh raih bawk nen, kan hlim tih hian a sawi chhuak zo lo. Kha chen pehpawrh insiktir tawh lo, a... Vawikhat chauh lehnghal kha, chupawh ama bul ţan, sawi pawh ka zak deuh. Zanin zet chu bul ka va ţan dawn chiang tak.
.
Mahse engtin nge niang le? Kha chen ngai em emin ka awm a, ka â lo chauh kha nia. Intawn tak a lêmah sawi tur reh leh daih si hi hi Pathian pawh hian a ti mah mah chu a ni. A zei lo ka ti dawn nge...hmn, a ţul hunah a che leh mai ang chu maw....
.
"Engvangin in lokal tur a hma daih a min hrilh lawk loh?" Ka han ti ve chawr a.
"Surprise nuam i tihzia ka hria alawm," a ti mai a.
.
'Chupawh nise,"
"I lawm viau hi aw."
.
Engdang sawi lovin kan inkuah chawt chawt a, lungchim takin a eiin kan in ei tawn ta bawrh bawrh mai anih chu, mahse zu na hauh lova, kan thî pheng phung chuang miah lo mawle.
.
Phone atanga inngai leh inthlahlel, tawn leh ni chuan ti a sawi tur ngah inti dun em em si khan sawi tur reng reng hi kan hre dun leh ta pek lova. Kan titi hi a nawi dun em em ringawt. Han innghengin, tangnema bei an tih thin angte hian han awm ve ngawt dawn ila, bang lehlam maiah a pa leh a nî an titi zuah zuah bawk si. Lo inchukha ve ta ila an lo chhuah leh thut si chuan hnâr bawk kha....Sai ai paw'n a lian tawh ang. Thawh lawk a, 'Thiante u, min lo va hawsan phawt mai ta che u,' tih mai a va chakawm em. Kan in lah a ni der bawk silo.
.
Tichuan tawng ka han chuh hmasa a, kan inhmuh loh kar kumkhat zet chhunga ka nundante ka han sawi hmasa a. Sawi tur pawh a awm tan ta. Mi thi tur ka hmuh lawk chungchanga kan buai dun thin dante kan sawi a. A changin kan nui a, a changin kan ngawi leh vang vang a. A, inngai em em intawng leh si-ah chuan hemi zan kan inkawm dan hi a romantic lutuk lem lo.
.
Zin chaute an ni bawk nen, dar 10 a rik chuan kham lo tak chungin ka hawsan ta hram a. A tuk lamah an pafain chhuahna tur an neih avangin kan inhmu thei dawn lova. Zan lamah erawh kan in lamah min rawn tlawh ve ngei an tum thung.
.
Tichuan mut hmun lamah ve thung chuan ka zawh hmaih, in luah an tumna hmunte ka zawt a. Aizawl chhim lam venga insak thar, a putean a lo hauh lawk sak thumin hrilh a. Hlat zawng kan inhlat dawn angreng viau. A pa hi Mizorama transfer anih avangin office atanga hla lo tê an duh ve bawk si a.
.
A tuk chhun chu ka thawh vena ka chawlh tawh avangin tihtur em em ka nei lem lo. Lehkhabu ka hmuh theih ang te chu ka chhiar mai mai a. Goggy nen message kan inthawn zeuh zeuh bawk a.
.
"Min tanpui hram thei angem? Nang lo chu min tanpui theitu tur tumah ka hmu zo lo. Miin an hriat ka hlau si. A rukin kan upa pakhat chu ka hrilh a, min tawngtaisak ngei a, engmah a la ang chuang lo. Kawng min kawhhmuh theitu tur chu nangmah chiah i ni," lungngai hmel fea rawn titu chu ka hmuh hnu ni tlat a hriatna ka nei a. Enge maw a sawi awmzia hi ni chiah le! Biak chian ka tum lai tak chuan ka harh ta hlawl a.
.
Ka lehkhabu chhiar mutchhuak ka lo muhil lek chu lo niin. Ka mumang chu ka ngaihtuah kir vang vang a. A ngaihna ka hre lovin mak ka ti ngei mai. Ka mumang hmasaa ka hmuh bawk kha a ni.
.
Chawhnu her ani vel ang tihah chuan Goggy message a lo thleng leh a. An tihtur an zawh fel tawh thu leh min rawn tlawh kawi an tum thu min rawn hrilh a. Umn, pawi hleinem, zan lamah kan inkawm chhunzawm thei tho bawk anga, hun kan ngah ting a ni mai alawm.
.
Rei rial lovin Goggy leh a pa chu an lo thleng mai a. Goggy chuan hlim tak maiin ka nu chu a kuah chung chung a. An innel tawh hle a ni tih a hriat mai. An han inchibai fel hnu chuan Studio ka cheihnum tawh loh zet lamah chuan kan inzui phei tham tham a. Goggy'n a pa hi tunhma chanchin vel a hrilh ve vek avang chuan studio leh kan sulhnu min hmuhpui ve hrim hrim a duh a.
.
Computer ka han tinung a. Mitthi tur, an chala kraws inrin ka hmuh bik ho ka dahna folder ka han hawn dawn chuan ka tîm khawp mai. Hmuh thut a awm leh mai anga(h) tiin ka zam rilru deuh a. Mahse Goggy pa hmuh laia zam hmel put ka duh awzawng lo. Chu folder chu ka han hawng thut a. Engmah a lo lang ta love. Thaw deuh huai chung chuan a dawt leh ka tiphei zel a, engmah danglam ka hmu ta lo, ka va lawm em.
.
"Ka pu, a pangngai thlap tawh," ka han ti ringawt a.
"A lawmawm anih chu, in buai theih dan Mami hian min hrilh nasa thin alawm. Anih leh ka lo va phei ange, tikhan hlim deuhin lo inkawm ru," tiin choka lamah min pheisan leh ta a.
.
Goggy pa a chhuak fel chiah tihah chuan engdang mah kan sawi tawh lo. Kan inkuah nghal thlawp, a hnar zum mawi tawk teah chuan zawitein ka seh sak ner ner a, a thaw ham ham a, a ngîk feih feih bawk a. Chutah a hmui itawm zet chu a rawn dawh kau tiar a. Ka tihtur ka hai ta bik hauh lo. Chutah ka hmui ka han ti er kum ve phût chiah chu studio kawngkhar a rawn ri rak a.
"Mama, inleng i nei." A va han 'Hit' lo ber mai. Kan lai chhe lutuk. Ka nu lah a lai bawk.
.
"A hman lo, a buai ti rawh," thinrim zet chuan ka'n ti rilru thuai thuai a. Aw.......a va han hun lo ber mai. Goggy phei chu hawi pawh a hawi chhuak ngam lo. Tûm deuh bur chung chuan, "Tunge a, rawn luh tir rawh," ka ti ta nge nge a.
.
Inthlahrun hmel taka rawn lut tleirawl ka han hmuh chiah chuan hmuh theih khawpin ka phu zawk mai. Goggy pawh chuan mak min tih hmel deuhin min en ha a.
Mak ti, tawng sai deuh hlak hlak chung chuan, 'Mami thu rawh, enge i duh teh mial?" Ka tawng chhuak pawh chu ka thunun hleithei lo chu a ni e.
.
A mak em alawm. Mitthi in a ka hmuh, ka zawn zui, ka hmuh tak si loh. Ka mumanga ka hmuh zui ngei mai, tanpuina min diltu ngei, ka hriatchian chak em em-i kha a ni tlat mai le!
.
"Ka pu, min tanpui theih beiseiin ka lo kal tawp mai a ni," inthlahrun hmel zetin a han ti a.
"Enge i harsatna chu ni le Mami? Tih theih ka nei ve ngut na maw chu...."
Ka pu min ti chu ka nuih a za deuh tlat. Manilomaha intih tlangval nakalaiin.
.
"Englo ania ka pu....." A ngawi ta reng a, a thil melhna lam kan va thlir ve chuan computer chhunga thlalak nichina kan lo en kha, 'Close' leh lovin ka lo dah a. Chutah chu tleirawl lam ka va hawi phei leh chuan mit la lêk lovin computer chhunga thlalak chu mak ti leh rapthlak tih hmel zet hian a lo melh tlawk tlawk a.
TO BE CONTD/-
***************
(A sei lo khawp mai, awl ngawt aiah remchan laiin ka rawn dah leh ta hram e.)
I CHHIAR AVANGIN KA LAWM E

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 13th, 2017, 1:42 pm

A GIRL WHO SAW THE FUTURE - 3

Chu tleirawl awmdan, a awmzia chu ka hrethiam lo kher mai. "Enge ni ta Mami?" ka han tih pawh chuan mit la lek lovin computer lam chu mak tih hmel deuh hian a en char char a, ka biakna pawh chu hria awm ang pawn a awm lo. Goggy lam chu ka va melh a, ani pawh pawh chuan hriatthiam loh hmel zet hian keimah zawk chu zawhna mitmeng hian min lo melh a.

Mi ang pha chiah lo a ni em ni zawk le!? Nge ni chhul tha lo nei a lo ni reng zawk. Chhul tha lo anih teh chuan keimah chauh a ka lo awm lo chu pawi ka ti lo kher mai. Hmanah lah khan mikhual chhul tha lo pakhat khan min beisei tlat tawh lehnghal, chi loh tak a ni. A hmel en khan a fel fai vung si, a tawngah buaina leh harsatna engmah ka hmu bawk si lo. Mi kha a rawn hel tih kha ka hrereng a, a hmel a lo that ve phian si avang leh a pian lah a dik fu si avang khan kei, ngaihzawng nena lo inthen hlim tan kha chuan lo melh tai(h) ve mai kha a awl sia. Mahse kan chhungkaw chaw kil lai laite a min rawn len chilh tak zauh zauhah khan ka ngaih a tha lo tan ta anih kha. A, a thiante pawh kha an va nikhua lo reng reng tak.... Ka tihpui e te an la rawn ti deuh deuh a. Kei ka ngaih a ngam zan tawh loh avangin a message pawh ka chhang duh lo ta lova. Amah a natna atanga a harhchhuah chiah atang khan min vei tlutna kha reh chhovin ngaihdamte min dil ta hial anih kha. Ka hmusit lova, ka khawngaih reuh khawp mai. Mahse....chi loh eee....

Tuna ka inleng pawh hi chutiang mi chu a lo ni reng angem? A inchei felfaiin a hmel lah chu a chhe lo zek lehnghal bawk si nen. Zawhna min chhan zai a rel tak si lovah chuan tihdan ka ngaihtuah chhuak a, computer monitor chu ka va tithim ta hmak a.

"Mami, puih theihna che ka nei em, computerah khan thil mak deuh hmuh i nei em ni?" ka han ti leh a. Chutah harh chhuak thut ni awm tak hian thawk hawk pah hian ka lam a lo hawi ta a. Chutah tawng tumin a ka a han ang zuava, mahse engmah sawi leh ta lo chuan Goggy chu a han en ringawt a.

"Mami, sawi rawh, ani nen hi chuan thuruk engkim kan inhriatpui vek asin. A ka atangin engmah a chhuak lovang," ka han ti a.
"Ka pu."
"Ka pu min ti suh, u Rin tiin min ko mai dawn nia. Nang engtin nge kan koh ve ang che?" ka ti a.
"Lalhmingmawii ka ni a, Mawite tiin min min ko mai r'u," tih pah chuan a awmna veng, Aizawl tlak lam venga khawsa anih thute min min hrilh a.

"Anih chuan enge i rawn kal chhan le? Min lo hrethiam la, ka hriat ngai mi i ni bawk si lova, hman zan khan mitthi inah ka hmu than chein ka hria," ka han ti a.
"Ni e, min hmu ang. Khami atang khan alawm in chenna hi ka hriat theih," a ti ta a. Mak ka ti angreng hle.

"Anih chuan zep kual vel awm lo se, i chanchin diktak, i harsatna, helaia i rawn kal chhan diktak chu min hrilh tawh rawh le," ka ti a.
Chutah sawi hreh hmel zet hian, "Mi thenkhat chunga thihna lo thleng tur hi ka lo hmu lawk thin a, chu chuan min tibuai a ni, thihna chauh lo pawh ka hmu lawk thin" a ti ta a. Goggy nen chuan mak ti takin kan in en hau a. "Chu pawh nangmah atanga ka chhawm niin ka hre lehnghal," te chu a la ti tak deuh deuh a.

Ka hriatna danglam tak thin kha midang hnenah hlan chhawn a ni tih hre tho mah ila chutiang naupang lutuk, hmeichhia lehnghal chungah hlan a nih ka rin phak miah loh avang chuan mak hi ka ti zual em em bawk a.
"Keimah atangin maw!? Mami, i chiang meuh maw? Ka chanchin hi i hre tawh reng reng em ni?" ka ti a.
"Hre tehreng mai, i chanchin a thang nasa em alawm. Mahse kei tak chuan mak ka ti lem lo. A chhan chu naupang tak ka nih lai atangin hetiang deuh hriatna hi ka chang tawh a. Ka chhungte bula ka sawite hian min hauh phah a, mahse a thleng dik tho thin si a. Mahse kum 10 vel ka nih khan a reh ta daih a," a ti a.

Kei chuan, " Ni e, i hriat ang ngei chuan ka thlalak editna lam atanga rawn intan chhovin kha hriatna mak tak kha ka nei thin ngei alawm. mahse a reh tawh," ka ti a.
Ani chuan, "Nangmahah a reh chiah khan keimahah a intan chhunzawm nghal chiah," a ti ta mai a.

"Engtin nge keimahah a reh a, nangmahah a intan chiah tih i hriat?" mak ti takin ka han zawt a.
"Keimahah hriatna a rawn thleng tlat a ni. A ni pawh ka sawi thei ang, nikum october ni 21 atang khan he thil hi ka nei tan, nangmah hi i ni tih pawh ka hre chuang lova, mahse tuemaw atanga hlan chhawn ka ni tih chu ka hrechiang a ni" a ti ta mai a. Goggy nen chuan mak ti takin kan in en leh ringawt a. He nu hi mi a, chhul tha lo chu a ni hauh lo mai le! A chhan chu ka hriatna, ka hmuh theihna danglam tak lak kian saka ka awm ni kha october ni 21 a ni tlat, chu chu Goggy nen pawh chiang takin kan chhinchhiah nghe nghe a ni.

"Thil mak tak anih chu," ka ti ringawt a, sawi tur a vang duh hle mai.
"Anih engtin nge chu thil lo tawngtu chu keimah a ni tih i hriat a, engtin nge kan in nen lam i rawn hriat theih?" ka ti leh a.
Ani chuan, " Ka sawi tak ang khan nangmah ngei i ni tih ka hre lo a tir chuan. A kual hret zawngin ka'n sawi ange. Thingtlanga awm kan ni a, Aizawlah tunah pawl 12 zirin ka awm mek a. Chhungte hnaivai ka neih loh avangin ka cousin nen in kan luah ve rawih a. Tichuan hman zan khan ka thiannu thiannu lehchhawng pu a thih avangin scooty hman tur a nei tho bawk a, ka rawn kalpui anih kha. Mak deuh maiin inchhung kan rawn luh khan hriatna mak deuh mai ka nei ta a. Chu chu kha mitthi in chhung ngeiah khan ka chan ang chang ve tawh, min tanpui theitu tur a awm tih hi a ni. Mak pawh ka ti, zah pawh dawn lovin ka hawi kual vak vak a, ka zawng ruai ruai a. A tawpah nang ka hmuh che khan nangmah ngei hi ka zawn chu i ni tih ka hre thei tlat a ni," a ti ta a.

He tleirawlte hian dawt a sawi hauh lovang tih chu ka ring thlap mai. Khami zan khan keimahah pawh danglamna a awm tlat kha mawle.

"Tichuan ka thiannu nen inthiar turin kan chhuak lawk a, kan rawn luh leh chuan i lo awm ta si lova. Hmuh che a, belhchian ngei che ka duh si avangin ka rawn chhuak leh a. I bike bula i ding kha rawn hmuin ka thiannu hnenah chhuanlam siamin, dawr inhawngte a lo la awm tak mialin ei tur lei tur zawn tum angin ka insawi a. I hnungah khan scooty in, in inbul thleng khan ka zui ta che a ni," a ti a.

"Anih leh mitthi tur chalah chuan kraws inrin i hmu ve thin tihna em ni?" ka ti leh a.
"Aih, hmu ngai miah lo, mahse nichina ka rawn luh laia computera i lo tihlanah kha chuan ka rawn hmu tlat a ni," a ti ta mai a.

Chutah computer monitor chu ka va 'On' leh a. Khawmpui lian a hruaitute, puipate thlalak chu a lo lang thap mai. Upa Zawna, a chal a kraws letling ka hmuh, a fapa nena an intihbuai avanga tukverha tla thla a thi ta thlalak chu ka han kawk a. "Hemi chalah hian em ni kraws chu i hmuh," ka'n tih chuan, "Nilo, a bul chiah ami zawk kha a ti ta tlat mai le! Goggy nen chuan kan 'Ehe' rual thawt a.
"Anih leh kraws ding nge i hmuh kraws letling?"
"Kraws ding ka hmu."

"A sen lar em?"
"Sen lar tak a ni."
Eheu leh! Dawt a sawi lo anih ngat chuan he pa hian thihna a hnaih tawh hle tihna a ni chiang mai. Mahse kraws letling hmu lova kraws ding a hmu chuan ngaih erawh a titha deuh sawt thung. Vanram a kai ngei a rinawm tlat.

"Anih upa Zawna chalah hian hmuh i nei em?
"Nei lo, a pangngai vek."
Umn, a thih chiah atang khan a reh a ni ngei ang. A hma kha chuan kraws letling kha chiang takin ka hmu a ni.

Ka ngaihtuah vang vang a, he tleirawl Mawitei hian dawt a sawi nge sawi lo tih chu fiah ka tum talh tho vang mawle, ka chhui zui ngei ngei ang. Hmelhriat nilo mahse khawmpui puipa thenkhatte chu thla ka lakna lamah ka hmelhriat deuh tho kha maw.

Amah zawk chu rawn tawng chhuak hmasa lehin, "U Rin, ka zam takzet tawh. Thil thleng pangngai leh ka ngaihruatna mai mai anih ka ring hman thut thuta a tir kha chuan. Mahse a thleng zing tawh lulai em mai, a hrehawm lutuk," tiin a mittui rawn luang chu a han hru zauh a. Goggy chuan khawngaih hmel taka lo kuahin a samte chu a lo zut sak heuh heuh a.

"Engtin nge a lo intan dan min lo hrilh ta che," ka ti a.
A thut dante chu a han siamrem sauh sauh a, chutah heti hian a sawi ta a.

"Ka naupanlai chanchin zawng zawng ka sawi dawn chuan sawi tur a tam dawn lutuk a, chuvangin a tawi thei angin ka'n sawi ange. Kum 10 ka la tling lo deuh ang chutih hunlai chuan, mumang mak tak tak hi ka nei thin a. Entirnan, kan kawtah rul lianpuite ka lo hmu a, Mupuiin mihring a la lai leh a thlawh bopui laite ka hmu a. Thlanmual lam panin mi an lo inzui duah duah laite ka hmu thin. Chutianga mumang mak danglam deuh hlek ka hmuh chuan kan khuaah chhiat tawk an awm ve ziah thin. Ka nu leh pate chuan 'Mumang mai mai anih chu,' min tih sak mai thin a. Mahse a rei hnu deuh chuan mak an ti ve hle tih ka hria. A chhan chu midang bulah ka mumang sawi chhuak miah lo turin min ti tlat a ni.

Mak deuh maiin kum 10 ka tlin hnu chuan chutianga ka lo hriat lawk theihna chu a reh ta daih mai a. Keipawhin naupang tak ka la nih avang chuan ka theihnghilh zui ve mai. Mahse hei, nikum october ni 21 atang chiah khan he thil hi a lo intan leh ta a ni.

Mahse ka chang nawn leh a ni tih khami zan khan ka inhre mai lova. Biak in leh kan inluah inkar hi chil chhak phak lek chauh tak tak a ni a. Inkhawm lem lo pawn an thusawi leh programme zawng zawng deuhthaw hi kan hre pha ti ila ka sawi sual tam lovang. Khami zan khan ka muhil thei lova, zing dar 1-ah te khan ka la harh kar mai a. Dar 2 a ri vel ang tihah hian Biak in zawnah, a chhungah nge pawh hriatthiam theih si loh hian tap vak vak thawm hi a lo awm a. An tawngtai anih dawn hi ka ti a, ka ngaihsak vak lem lo. Mahse tap ri chu a ring telh telh a, na tuar, hrehawm ti lutuk tap vak vak thawmah a lo chang ta a. Chutah ka ngaih tha lo chu ka tho va, hlauh pawh sawi lovin Biak in lam chu ka pan phei a. Mahse a mak lutuk, engmah va hmuh reng reng ka nei lo. Mahse tap ri erawh ka bul hnai lawkah a awm reng tho si a. Ka tihngaihna hre lo chuan ka beng ka hup ta ringawt mai a ni. Mahse beng hup chuan sawtna pakhatmah a nei lo, tap ri chu a ring tial tial emaw tih mai tur a ni. Chutah tlan haw thut mai chu ka tum rilru ta a, ka rilruin ka tawngtai pah mawlh mawlh bawk a. Mahse Isua neitu inti tan chuan han hlauh vak kha ka tlawmla ve si, rilrua hlau chungin chungin tlan lovin inchhungah ka lut leh ta a.

Inchhung ka luh fel chiah chuan ka in luahpui, ka cousin u Mapuii chu lo tho chhuakin, 'Tun ang hun hunah te khawnge i kal a?' min lo ti a. Kei chuan, 'Thawm chu va en chhin ka tum a, mahse tumah ka hmu lo,' ka ti ringawt a.

'Thawm a! Eng thawm maw?' a ti ha a. A mak hle mai, tap thawm a hriat ve avanga rawn tho emaw tih nakalaiin.
'Chu, tap thawm chu i hre ve lo em ni?' ka ti a.
'Eng thawm mah a awm loh chu,' tiin mak tih hmel deuh hian min en a, min mutsan leh ta daih a.

Thawm ri chu ka bengah a rawn nasa lehzual sauh a, mangang lutuk au rawl ang tein ka hria a, hrehawm tak a ni. Mahse rei a ni tawh lo, ka thawm hriat chu zawi zawiin a reh ve tial tial a, nakinah chuan a reh hlen ta a, keipawh chu ka muhil ve thei ta hram a ni.

Tichuan a tuk chawlhni(sunday) inkhawm banah chuan kan thian hovin kan inkawm a. Ka thiante ho hnenah chuan, 'Nizan thawm kha in hre ve em?' tiin ka han zawt a. An bo hlawm hle mai. Ka hriat dan chungchangte ka han sawi chuan hlauhawm en tak hian min en ta hlawm niin ka hria.

Chutah chawhnu a rawn her a. Information mic atangin Pu Lalsanga kum 40 mi a thih thu an rawn puang ta mai a. Mak ka tih zia mai chu, nat lawkna a nei miah bawk si lo. Chuta a u, amah chhangtuin ruang chunga a thusawi chuan alawm a hma zan lama ka thil tawn nena inzawm tlata min ngaih tirtu chu ni ta. Pu Lalsanga u chuan chanchin sawi mawi a tum hran lo. 'Lalsanga hian Isua lo nei hman talin thi se tha tur,' tia a sawi chu rilruah a cham vawng vawng mai. Zan lama ka benga mangang au rawl rapthlak tak ri reng mai kha hremhmuna kal tur mangangte au dan tur ni awm tak ni hialin ka ngai ta hial a. Pu Lalsanga thi tur thla ai ri vel a ni thei mai angem tihte ka ngaihtuah a, ka tim sung sung thei," tiin a sawi ta a.

Goggy nen chuan mak ti zet hian kan lo ngaithla reng a, tawng zai reng kan rel lo, Mawitei thusawi chu a mak em bawk a ni. Tichuan hma hun tur tam tak a lo hriat lawk thleng dik zel si thil dang dang min hrilh zel a, a mak tih bak chu sawi tur kan hre lo. Keima chan ve thin kha chuan min rikrap hran lova, mitthi tur ka lo hre lawk ve kha a ni mai a, Mawitei chan anga rapthlak chu ka tawng ve hauh lo.

Kan han ngawih tlan vang vang hnu chuan, "Tichuan enge min rawn pan chhan ber hi ni ta le Mawite?" ka han ti a.
Mawitei chuan, "U Rin, a hrehawm ka ti em a, miin an la hre vak lo emaw ka tih laiin a lo ni miah lo. School(sikul) lama ka thiante ho lah hian min en hrek hrek a, zawite tein an tawng sep sep a. Ka biak lahin a rul tawk lekin min chhang a, tuma'n min be hmasa ngai lo, ka hnaih a awm hlau ni awm tak hian an awm vek. Class chawlhsan a kan khaw lama haw daih mai te ka duh rum rum a, mahse ka thil chan hi a reh thei dawn chuangin ka hre bawk si lova. Tunah chuan min be duhtu thian chu pakhat chiah ka nei, hman zan mitthi in-a ka rawn kalpui Jenny chiah kha. Mahse kan school kalna a inang bawk si lo, kan veng a inhlat ve deuh si nen. Tihian ka maltlat deuh ngawk mai anih hi. U Mapuii lah sawn tihngaihna min hriatpui der bawk si lo. E, taka, i zawhna kha. U Rin, min tanpui turin ka ngen ngawih ngawih che a ni," tah aw deuh tiau hian a ti a.

Kei chuan, "Lungngai mah ta che, ka tih theih zawng anih phawt chuan ka tanpui em em ang che. Hei ka thiannu Goggy pawh hian englai pawhin tanpui che a inhuam reng ang," tih pah chuan Goggy chu ka va melh zauh va, ani chuan a lu a lo bu nghat nghat a.

Chutah a hmelah hlim hmel a lo lang a, "Takzet maw?"
"Tehreng mai, ka tih theih a awm chuan. Mahse tinge midang i hmelhriat tha leh mifel tak takte tanpui tur chein i sawm mai loh?" ka ti a.
"Tuman min pui thei lovang, nang chauh hi min pui theitu awmchhun i ni." Mak ka ti tulh tulh mai.

"Anih leh tichuan kei hian tanpui thei ta che ila, i thil lo hmuh lawk, hriat lawk theihna chu a reh tawh dawn tihna em ni?" tiin ka han zawt a.
"Reh dawn chuang lo, mahse ka phur hi a zang sawt ang."

"Han sawi tlang law law teh Mawite?"
A heh a pet fan fan a, a chalah thisen zam a rawn bawl deuh tak tak a, a thlan fim a tla, a phone ken lai chu a hmer tlawk tlawk a, sawi chhuah a hreh hmel kher mai. Chutah, "U Rin, sawi nuam a ni miah lo na a, mahse he thil ka chunga thleng hi kei hmeichhe awm nem mai chuan ka tuar chhuak zo dawn lovin ka hria. Mahnia tuar zel ai chuan thih daih mai te pawh ka duh zawk hial tawh. U Rin, khawngaih takin ka chan ang hi chang ve leh la, min tuarpui ve rawh," a ti ta daih mai le! Mak ka tiin ka va hrethiam lo tak!! Chhul tha lo hi a lo ni tak tak roh mai ang a he nu hi, leh si ana. A chhul tha lo buai vel suanghtuahna rawn puak chhuak mai mai a lo nih teh chuan aw....hit lo rem rem ang chu. A thusawi thutak ngaihin kan lo ngaithla rei ve laklawh tawh si.

Chutah tha deuhin, "Mawite, i tuna i chan ang emaw, hmana ka lo chan tawh thin emaw te kha duh duh a neih let leh theih mai a ni hleinem. Tih bo sakin ka awm tawh a, engtin nge i rau chan ang pawh chu ka chanpui ve theih reng reng ang che le?" ka ti a.
"A theih alawm, u Rin, 'Aw' tiin min chhang mai la, tichuan hriatna danglam i neih thin ang kha i nei let leh dawn tih ka chiang.

Ka rilru te te chuan, "He nu hi a ā tak tak anih dawn hi," ka ti a.
Chutihlai chuan Mawitei chuan, "U Rin, i awih vak lo a ni maw? Kei chuan ka awih thlap asin. Keimaha hriattirna lo awm thin hi dawt a ni ngai lo, a takin a thleng ziah," a la tizui tak deuh deuh va.

"U Rin, i remti anih ngat ngai chuan ka phur hi a zāng hawk dawn asin, mahse ka inthlarung hle mai, min phurhpui ve a ngai dawn sia," dawih aw deuh dai hian a han ti leh a."

Chhan ngaihna pawh ka hre lo. Goggy pawh sawi tur hre lovin a ngawi reng ringawt bawk a. He nula sawi hi thudik ni ta se, diktak chuan kha mitvarna leh hriatna danglam kha chan nawn leh ka duh hlawl lo a ni. Khawngaih zawng ka khawngaih reuh khawp mai. Mite thinhrik a hlawh mek chu a ni si a, a tih luih pawh ni miah lovah lehnghal, hmana ka lo awm tawh dan ang chiah. Mahse mite pawhin mi pangngai enin min en ve tan dawn chauh a, chutianga han kir leh chu ka ngam tawh ngang lo a ni.

"Mawite, min lo hrethiam la, tun tut tutah chuan chhanna ka pe thei lo che a ni, kan la sawi tha leh dawn nia," ka ti ta ringawt a.
Mawitei chuan, U Rin, khawngaih takin remti hram rawh aw. Rem min tih sak loh chuan dam chakna pakhatmah ka nei tawh lovang,"tih pah chuan a mittui a far kiang kiang a. Goggy chuan khawngaih hmel zet hian a lo kuah a. "Mate, Pathianin a hun takah a lak bo sak ngei ngei ang che. Kan lo tawngtaipui reng dawn bawk che nia," a lo ti ve a.

Thutlukna ka siam theih hun turte ka sawi fel hnu chuan Mawitei chuan min chhuahsan ta a.

Mawitei a chhuak fel ta maw tihah chuan Goggy hnenah, "Eng angin nge i ngaih, dawt a sawi i ring em?" ka han ti a. Goggy chuan, "Hriatthiam a har khawp mai, mahse dawt sawi hmel chu a put miah loh kha. Bakah dawt sawi tur ringawtin helai chen chen a lo kal peih i ring em ni?" min han ti a, a ni viau lawi bawk si.

"Anih engtin nge awm se min tih nangman?" ka han tih chuan Goggy chuan, "Thil tak tak a lo nih chuan remti mai la ka va ti em, khatiang khawpa mi khawngaihthlak ka hmu ngai lo," a ti a.

"Nih leh ka chan ngai ang kha chang leh ila, rilru hrehawm tak khan awm leh ila min duh em ni?"
"Duh teh nang, ka khawngaih em a, ka han sawi ve mai mai anih kha. Mahse pui thei la ka ti e," a la ti hram a.
"Ka lo inngaihtuah ang," tih chiahin ka chhang a. Chutihlai chuan pawn lam atangin Goggy pa chuan Goggy chu a rawn au ta a. Khai aw, kan nula inleng vang vek, Goggy nen biahthu tam pawh kan inhlan hman hleinem mawle, pawi ve le. Mahse hmanhmawh takin 'Muah muah' chu kan han ti hram a, a va khamawm lem loh em...

Zan muthmunah pawh rei tak ka ngaihtuah a, engtin nge maw ka tih dawn le? A hmel lah khan khawngaih thla a la hliah hliah mai bawk si, ka buai a ni. Umn, khawnge, dawt a sawi nge sawi lo ka finfiah tehreng ang. Naktukah khawmpui puipate ho thlalak kha ka keng anga. Khami ni a thla la tura min kotu ber pa Siama kha ka zawt ngat ang, hmelhriat sa a ni bawk a. Mawitei'n a chalah kraws sen lar lutuk, kraws ding ka hmu a tih ngei kha, khami chanchin kha ka zawt chiang anga. Kraws sen lar tak chu a lo hmu tak tak anih chuan kha pa, kohhran upa nge pastor ni awm tak khan a thih ni chu a hlat tawh hauh lovang, ka chhui chiang chhin ang," ka ti rilru a.

A tuk zing chaw eikham chuan ka tum lawk ang ngeiin thlalak chu ka print thar leh a. Pa siama te in lamah chuan ka tlan vang vang a. Ka tlangnel tawhna, ka luh fona in anih avang chuan kawngka pawh kik lem lovin, 'pa Siam,' ka ti lut lawng lawng a. Min chhangtu tur an awm dawn ta lo emaw ka tih tawh laiin room pindan chu rawn inhawngin pa Siama nupui nu Thantei a lo chhuak a.

"Ve teh khiah che chuan, tunlai i va rawn lang khat ve, leng thu rawh, enge i duh tak?" a lo ti bawrh bawrh a.
"Pa Siama hi a awm em, nge a leng chhuak? Thil zawh duh lawk ka nei a," ka ti a.

"Aw...i rawn thlen hma lawk khan veng thenawm chiahah mitthi in-a leng turin a chhuak ta anih kha. Enge, a va pawimawh awm ve?" a ti a.
"A, pawimawh em em hran love, he thlalak ami hi tunge anih ka hrechiang duh mai mai mawle. Naupan laia kan school principal kha a ang riauvin ka hria a. Bazara kal pahin ka rawn zawt kawi mai mai dawn e ka tia," ka ti zaih a. "Khawimaw ka lo enchhin?" a rawn tih takah chuan ka han hmuh tir a. Thlalak a en zo rawn hawi chhuak leh chu a mengphawk angreng hle mai. "Pastor Lalsangliana," a ti sap a. Chutah, "Nizanah a boral, chutah chuan alawm kan pa pawh a kal mek, engtin nge amah ber kher hi min rawn zawh theih zawk le...." a ti ta le!!!

Nu Thantei chuan ka hmel min lo en se chuan a ngaih a tha lo ngawtin ka ring. Ka hmela maktihna chu ka thup hman miau si lova. "Nia, ka sawi ang khan naupangte kan nih laia kan principal nen khan inang ka ti deuh a, chuvang mai mai mawle. A va mak ve aw, a boral veleh a ka rawn zawt tlat che chu," te chu ka han ti ve a, awih tak ang maw? Chhuanlam tur a vang em anih kha.



"Nu Thante, ka kal leh mai ange, kal kawi lawkna tur ka la nei a," tih pah chuan ka chhuak zui ta a.

Keimaha Mawitei rinhlelh rukna zawng zawng chu vawm bo ang duak a ni ta le. Mawitei khan dawt a lo sawi hauh lo, a chhul zawng a lo tha chiang mai le....

TO BE CONTD-

(Khawngaihin like leh commentte kha min han pek sak leh sauh sauh ru aw, ziak zel tura chakna min petu tha tak a ni si a)
I CHHIAR AVANGIN KA LAWM E

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 13th, 2017, 1:43 pm

A GIRL WHO SAW THE FUTURE - 4

Mawitei ka rinhlelh rukna chu a bo ta. Tanpui ngai tak a ni tih ka hria. Ani ang rual lek lehnghal hetiang hriatna mak danglam pek a ni hi hriatthiam a har ka ti.

Hmeichhia, rilru no zawk an la ni lehnghal vei nen. Mipa tan pawh at phahna thlen thei hialtu, nunphung leh rilru zawng zawng chawk buai vek theitu anih vei nen. Keia

thil hriat lawk vena pawh kha, Goggy min fuihtu leh thlamuantu awm lo ngat se chu mi ka ang pha chiah tawh lo hialin ka ring. Chuvang tak chuan Mawitei-te ang hmeichhe

awm nem, naupang lutuk chunga a thlen hi hriatthiam a harin ka thinlung zawng zawngin ka khawngaihin ka lainat a. Zah pawh dawn lova tanpui min rawn ngen chawt maite

kha a zahtheih loh vang a ni lo tih ka chiang khawp mai. Mangan vawrtawp thil a ni e.

Mahse...tih a ngai leh ta tlat thin hi alawm pawi thin le. Ka nunhlui zawng zawng ka'n chhui let a, hrehawm ka tih dan tlawk tlawk kha aw. Khawvel mihringah hi chuan

tuman min hriatthiampui phak lovang. Min hriatthiampuitu ber Goggy takngial paw'n ka thinlung chhung hmu tlang bik hek lovi, mipa phei hi chuan kan rilru zawng zawng

hi midang bulah kan phawrh ngai lo ania, mangan tawpah a tlangpuiin inbun ruak ve thin mah ila. Mipa ni tura Pathianin min duan chhan tak hi hei vangte pawh hi a lo ni

ngei ang. Zawng zawng kan phawrh ngai lova, thuruk pawh kan zep thei. Mipa khai uai ve si, thuruk tur leh sawi tul lem lo sawi chhuak zuah zuah thin ho hi chu an lo

'Pherh' deuh nge nge thin.

Ni e, ka nun a zalen ve tan chauh va, 'A' pawl thiam lo pawl, nursery class kal tantir ang maiin hringnun ka zir tan chho ve leh tan chauh a ni si. Min tihkhaitute

pawn hetia ka hriatna danglam a reh tak si-ah chuan min be tha chho ve tan chauh a ni si. Mawitei min ngenna chu lo remtih pui ta tehreng pawh ni ila, ka chan tawh ang

kha ka chang nawn tawh kher lo maithei asin, thil chiang sa a awm lo. Inrawlh lohna turah ka lo inrawlh ve vak anga, a hmingchhiat kai tawk lek si hian.

Rilru siam fel har ka va ti tak em. Lo remtihpui ta ila, mi endawng, tihkhai, hlauhawm en a an en, kawng laia intawh dawn pawh a an hel hram hram thin ang bawk kha ka

ni leh ang maw. Muanhnapa bawk kha ka rilruah a lo lang leh a, ani khan sawi chhuak kher lo se chu tu vak mahin ka chanchin hre lovin mahniin hrehawmna zawng zawng kha

ka tuar chhuak thei mai tur lah ni. Min hriatpui vetu Goggy lahin engmah a sawi chhuak dawn der si lo. Muanhnapa lakah chuan ka thinte a rim hnuhnawh leh vel a. Ka

rilru hi a buai takzet mai.

Mawitei lakah khan rem, lo tilo ta ila, engtin chiah nge maw a awm ang le??? Umn, a theologian ang chi zawk leh biblical zawnga kan chhut chuan, engkim hi Pathian ruat

a ni a, a tul a tih hunah a tihreh sak ve mai ang chu maw... Chuvang chuan rilru hahna tawng nawn leh tawh lo turin Mawitei lakah chuan, 'Aih' ka ti mai ang. Tuar nawn

leh ila, chang nawn leh ila, rilru buai mi a wardah min dah ngei awm si, ka zuam tawh mawlh lo a ni e, amah Mawitei khawngaihin lainat hle mah ila. Mahni hmasial a va

na ta ngaih ngaih ve.....

Mawitei chu ka thutlukna hrilh tumin ka phone chu ka han ban a, ka hrilh hreh takzet mai. A number ka han hmetchhuak a, ka 'Dial' leh ngam lovin ka tim leh a. Ka

inngaihtuah leh rih thin. Tunhmain tanpui ngai an awmin, ka tihtheih tawkah chuan tanpui loh ka neih ka la hre ngai miah lo. Chuvang chuan tuntum Mawitei ka thil hrilh

tur zet hi chu thih hreh takin ka hreh ve a ni e. Khawnge, mipa ka ni alawm le, ti rilru chungin ka phone chu ka han lek kang leh a. Chutihlai chuan ka phone chu a

rawn ri thut a, 'Mawitei'... Min tiphu chiang angreng hle mai. Ka thutlukna min rawn zawt dawn chiang mai le. Chhan a va'n hrehawm dawn tak em. Phone chu ka la ta hram

a.

Aw zangkhai vah hian, "U Rin, i tha maw?" a rawn nui deuh har har a. Chu hlei hlei chuan keimaha beisei a neih san zia min hriattirin chhan let pawh hrehawm ka va ti

tak em.
"Aw, tha alawm," ka aw-te chu a khur a khur deuh hialin ka hria.

"U, ih maw, ka chanchin hi ka rinai daihin miin an lo ngaihven nge ni, hria an pung chak sawt riau, u Mapuiin min hrilh a, hrehawm ka ti tak tak a ni," a rawn ti a.

Sawi tur pawh ka hre lo.
"U Rin, i va tawng duh love, a nuam lo e," te chu a la rawn tizui a. Ka thil hrilh tur ka hrilh hreh lutuk chuan phone chu ka hmet hlum anga ka off hmiah mai dawn

emawni ka ti rum rum tawh.

"Mate, enge min rawn biak duhna ni ta?" ka ti hram a, chhang turin huaisenna sang ber nen ka lo hmachhawn tawh dawn e.
"Ka thil sawi kha i awih zawng a ni em?"

"Aw, awih tehreng mai."
"Anih chuan min tanpui chu i inhuam ta em? Enge i thutlukna chu nita?" Ka ngawi vang vang a, ka kha a chih tlat. Ka dangte a ro zo vek. Mahse khawnge mawle.....

"Mate, min hrethiam hram rawh, ka tuar nawn thei ngang tawh lo a ni." Ka sawi zo thei chang chang chauh a ni e. A va hrehawm tlawk tlawk tak em.
A reh vang vang a, chutah, "Chu chu i thutlukna hnuhnung chu maw ni ta?"
"Aw, a ni tawh mai aniang chu," ka ti ban chat a.. Ka hrehawm ti chuan ka kutte chu ka hmer tlawk tlawk a.

Chutah, "Nang berin min puih duh si loh chuan khawvelah dam thlakhlelhna chhan tur reng ka nei ta lo a nih chu," tih pah chuan phone chu a dah ta hmak a.

Chutiang ringawta thu tihtawp chu a dikin ka hre si lova, ka han 'Dial' nawn leh ngat a, a lo la lo. Ka tih nawn leh ngial hnu pawh chuan a 'Ring' ral thak zel a. A

tawpah phei chuan 'Switch off' a inti ta nge nge a. Ka mangangin ka rilru pawh a na. Keia letin a rilru a na ang tih pawh ka hrechiang khawp mai.

***************************

Goggy-te in lamah ka inkhalh chhuak nghal a. Rilru thawven loh nakalaiin a lo chhuak ve daih lehnghal. Ka han phone a, "Dar 3 hnu deuhah chuan ka rawn thlen hman mai

chu ka ring," a rawn la ti, huiham.... Goggy ni nen chuan kan lo inkawm mai mai a, sawi tur lah chu ka hre lo em em mai lehnghal. A thusawite chu ka lo umn..e ve vel

mai mai a. Rilru luah mawlh hek lo, 'Thingpui hi in rawh' a tih bak kha hriat mumal pawh ka nei love a.

Lo nghah ngawt ngawt mai chu a ninawm deuh bawk nen tualzawlah chuan ka thu chhuak a, message ka thawn lah chuan Goggy chuan min chhang thei hek lo. Tlai dar 3 a pelh

hret hnu chuan ka piah maiah chuan bike hi a rawn ri dat dat a. Eheu! Goggy chu mipain a rawn phur tlat mai le! Ka rilru hi a lo na vawng vawng hman a. Auh pawh ka lo

au duh lo. Mahse amah zawkin min rawn hmuh takah chuan min rawn au vak a, phur hmel deu hian a rawn tlan phei chan chan a, ka lo ngaihsak duh lo lui vel a. Ka tum deuh

bur bawk a. Ka awmdanah a ni ang nula fing chuan a man thiam nghal ani tehchek aniang chu,"Hei, nget ngut che hian, ka putea anih saw, thikthu pe chhe leh lutuk," tih

pahin a a rawn nui vawr vawr a. Ka rilru a zang ta huai mai. "Ka thik bawk lo e aw." 'I thik chiang em mai," tih pah chuan ka man beh hma chuan a tlanchhia a, kan han

inum kual leh rih a, a putea pawh chuan nui var varin min lo thlir a, chutah a bike chuan min kirsan leh ta a.

****************************

"Tinge min hrilh lawk loh a i lo kal? Min lo nghak rei tawh em?"
"Chatuan an tih hi a tluk vel hial tawhin ka hria, ka haw leh hman tep a ni."

"I ngeiawm mai e a."
"Min ngei tak tak loh kha." Nuih awr awr pah chuan min han chum taih taih a.

"Tak takin enge i lo lan ve khiah chhan? Thingpui kan lum ange aw?"
"Ngai lo mai rawh se. ka lo in tawh e."

"Anih i lokal chhan a pawimawh hmel si, han sawi vat teh, ka hre chak tawh ania."

Chutah sawi nuam tilo chungin hreh zetin,'Goggy, thutlukna chu ka siam fel ta,' ka tia. Goggy chuan min rawn en ha a.
"Engtin nge i chhan tak a?
"Ka khawngaih viau na a, ka puih theih loh tur thu ka hrilh mai," Goggy chu a meng kawk a. Min chhan zai pawh a rel lo.
Nakinah chuan, "I lungawi vak nange" ka ti a.
Ka beisei loh zet tawngkam chuan min deng ta. "Ka mipa ngaihsan berin tanpui ngai ngawih ngawih a tanpui thei lo hi chu a mak ka ti, rilru a kal thui khawp mai," a ti

ta daih mai.

Ka nghing deuh lawihin ka hria.
"Mahse hrehawm ti taka ka nung kha i duh tawh lo a ni lawm ni?" Ka tawng pawh a vin khawp mai.

"Duh awkawng love, mahse ka inngaihtuwh tha leh a, hetiang taka mangang tanpui ngai tlanchhiatsan hi mipa diktak tihtur a ni thei angem?"

Chu thu chuan min khei zak mai.... A tawngkam chuan min deng na a ni.

"He nula mangang em em hi kan tlanchhiatsan anih ngat chuan ka inthiamthei tawh ngai lovang," a ti leh a.

" 'Kan' i ti elo?" Ka lo ti hu a.
"Ni e, ka tel ve i phal lo em ni, tangkaina ka nei ve em em ang," a ti a.

A sawi dik chiah ang, a hma pawh khan ani tello chuan ka nun kha ka sual chhuak hauh lovang tih ka chiang.

"Tinge chutianga i lo chhan le aw? Tunahte hian rilru hrehawm takin a awm reng dawn asin. A ngenna che kha i remtih sak lo a nih ngat chuan ka lo ngaihsanna zawng

zawng che hi a tla fai vek ang," a ti ta mai le!

Chu thu zet chuan min barakhaih a, chhun ang vawng vawngin ka na a. Ka Goggy nunnemi kha a ni ta lo emaw tih mai turin a tawngkam a chang fak mai si a. Ka inngaihtuah

chiang a, nep ka inti ngawih ngawih ta mai. Pawnfen feng tlak ka lo ni e.
Lehlam kawng zawngin ka'n ngaihtuah leh a. Ka tawn ang kha a tawng ve lo Goggy hian, a hrethiam pha lo a ni a hrehawmzia kha. Rilru a buai mup mup mai.

"Anih chuti anih chuan min then dawn tihna em ni?" ka han ti tawl mai a.
"Dawn love, mahse min hrethiam la, ka ngaihdan che hi a dang hret tawh maithei a ni," a ti ta a. Chu thu pawh chu ngaihthlak a hrehawm zet mai.

Chutah, "U Rin, khawngaihtakin i rilru i lamlet thei hram lawm ni, a khawngaihthlak em mai, ka lainat asin," tih pah chuan a mittui chu a luang ngiai ngiai a. A mittui

tla ka vawikhat hmuhna. A mittui tlate hlei hlei chuan a hmelthatna a belhchhah lehzualin ka hmu lehpek a.

"U Rin, zam mah ta che, kan tang ho dawn alawm. Pathian zarah kan chungah thihna em a thleng nang. U Rin, tanpui rawh aw, i thei ang ti raw? A lainatawm em kha. Mite

pawhin an endawng leh tihkhai a ni tan tawh, thian kawm tur pawh hmu zo tawh lo a ni si. Keini tal hi a thianah kan tang dawn lawm ni? U Rin, khawngaih takin inlamlet

rawh aw...mawh mawh," tih pah chuan min kuah thlawp a, a mittui, a tla kiang kiang reng bawk a.

A va han duhawm tak he nu hi chu aw. Shillong university a a kal lai pawha college miss ngat lo hauh pha, Pathian tih mi, Evangelical unionah pawh OB ngat ni pha bawk

si, A Pathian tih zia lah mi fak rawn ti mai ang. Chutiang miin kei tehlul min ngaina em em mai hi chu a mak ve thlawt a ni. Hmangaih thu chiang fek fawk chuan kan la

inhlan hauh lo nachungin ka hmangaih ve tawk a ni.

Chutia hmeichhia in mipa hneh nana an hmanraw neih that ber mai 'MITTUI' a han hman ve takah chuan kei, inla pa ve tak thin hi ka rilru pawh a inlamlet tan ta reng

mai. Diktak chuan keimah pawh chu nep ka inti. Mi tlawmngai ka nih ka hre ngai lova, mahse tlangval tlawmngai an sawi chang hian ka hming a ri ve fo tih ka hria, a

zahthlak phei chu ka ti viau. Engmah phei chu ni lovin mite tluk lo mah ila midang tanpui kawngah ka tlanchhiat ka hre ngai lo.

Umn...khawnge, pa takin le.... Goggy ngaihsan loh nih phei chu ka duh lo bur. Tin, tanpuitu nih a, a tul anih ngat phei chuan ka nunna hial thap pawh ka huam ve ta.

Harhtharna ka chang e....

"Duhtak, nangin i ti miau alawm, ka thihna tur pawh nise Mawitei chu ka tanpui em em ang ka thiam dan tawkin, i mittui ti tla tawh suh," ka ti ta a.

Goggy hmela hlimna lo lang chhuak chu khawvel mawina hian a teh chhuak zo lo hial mai awm mange ka ti, keimahah chuan.
"U Rin, ka lawm lutuk, ka hmangaih ngawih ngawih che," tih pah chuan min rawn kuah a. Kan hmui a insi ta, kan lei hmawr ve ve chu chak loh zawk hlau ni awm fahranin

kan innawr tir buan buan a. Hnehtu ka va ni awm e, mipa ka nia, ka lei pawh a khawng zawk hrim hrim.


Tunah zawng, ka thinlung chu midang tanpui duhnain a khat leh ta... Nge mawle, hmeichhia ringawt tuartir ai chuan mipain kan tuar hian a 'Man' zawk.... Nauvi, Mawite... lo

lungphang hlek suh aw....

"Mawitei chu phone vat rawh," min han tih chuan ka harh chhuak zawk a. E taka, a phone kha a switch off si kha mawle. Ka han tichhin reng reng a. A ngai ang

chiah..'Ofi'. Goggy pawh chuan a han tum ve sateh na a, vainu saptawng pai zet aw bak a hre bik chuang lo.

Ka ngaih tha lo thut chuan, "Hawh, an veng kan hriat tawh kha. An inah i va kal teh ang," ka ti a. Bike tinung nghalin kan tlan char char a. Veng daifem lam deuh anih

avang leh traffic jam avang chuan kan thleng har phian. Chutia kan tlan lai chuan Goggy chuan ka nghawng zawn velah min rawn thawk khum lum hiam hiam thin a, ka za

chiai chiai mai, a nau chaw bawm kawh lah mai chuan loh theih lohvin min rawn nawr thin bawk si, huiham... Accident palh mai hlauhawm khawpin alawm ka tlan le...(#€£™^

feeling). (Ching ve hlek su hmeichhe ho khan)

An veng kan thlen chuan khua a thim ruai tawh. Nepnawi dawrkai pakhat lo inkhar mek hnenah chuan Mawitei chu an hriat leh hriat loh kan han zawt a. A lo hre hauh lo

mai. Veng hmawr lam deuh kan han tlan chuan in pakhat bulah mi tam vak lo an lo thukhawm tel tel a. Tlangval pakhat kan lam hnaih deuh ami chu ka han zawt ta chawt a.

"Hmingmawii Mawitei kum 18 mi vel, class 12 zirlai helai hnaiah hriat i nei em?" ka han ti a.
Min en deuh ho pah chuan, " Hei hi an in chu ania," a lo ti ta hlauh a.

Bike park that pah chuan, "Amah a awm em ang chu maw, " tiin Goggy nen chuan kal mai kan han tuma. Mahse chupa chuan, "Damdawi inah a awm mek" ati ta mai a!

Mak ti zet hian, "Tinge?" Ka han ti a. Chupa lah chuan sawi a hreh hmel em em lehnghal.
A han ngawi det a, chutah, sawi hreh hmel zet hian, "Inawhhlum tumin a lo inkhai a, an chhanchhuak hman ta hlauh a ni, damdawi inah an tlanpui nghal" a ti ta mai a!!!


Ka rilru chu inthiamlohna hian a rawn khat nghal a. Ni e, keimah vang chiah a ni. "Goggy, tlan vat ang," tih pah chuan bike chu ka tinung nghal a. Chak mangkhengin

Civil hospital lam pan chuan kan tlan nghal fua fua a. Casualty-ah chuan chanchin kan han zawt nghal a. Oxygente an pe a, a harh that tawh thu leh cabin ruak lamah

reilote chawl zawk tura an dah thu nurse chuan min lo hrilh a. A awmna cabin chu ka han zawh chuan a awmna lai min kawhhmuh nghal a. Pan phei nghalin luh mai ka han tum a.

Nurse pakhat lo duty chuan, "Ka pu, tumah a luh theih loh, bakah, tumah a be duh lova, a hmu duh lo bawk" a lo ti a.

"Ka pi, hei chiah hi amah a harh anih chuan min va sawi sak teh, kei chu min hmu duh ang, i u Rinan a be duh che tih chiah hi min va sawi sak hram teh," ka ti a. Tui

vak hmel loh chuan cabin chhungah chuan a lut ta thova. reilote hnuah chuan a lo chhuak leh a. "Va lut rawh u," a ti ta.

Mawitei ka va hmu chiah chu ka va lainat tak em. A nghawngah hruizen thla a val kalh a. Goggy nen min lo hmuh veleh chuan lungchhe em emin a tap rawih a. A bula lo thu

ka cousin a tih ni awm tak chuan lainat tak hian a lo kuah a.

Kan va pan phei nghal a. Inawhhlum hial duhna khawp thinlung a put nachhan chu kan rin hriat ruak avang chuan engdang sawi lovin, "Mawite, min ngaidam hram rawh aw.

Tun atang chuan kan nunna hial pawn tuar dawn mahse a tawp thlengin Goggy nen hian kan pui ang che," ka han ti chiah mai chu a cousin kuahna atang chuan a tal

chhuak lawp a. Lungchhe vankaia tap chungin ka awmah a rawn bei thlawp a, engmah a sawi thei lo. A lungchhe zualpui a reh hnu chuan ka mitah tak min enin, "Ka u, ka

lawm lutuk, ka va han lawm tak em, i tider lo tiraw?" tih pah chuan a tap leh hliam hliam a. "Mate, lungngai reng reng suh, i tan kan awm e," tih pah chuan nghet takin

ka kuah ve a. Chutihlai tak chuan thil mak tak, sawifiah thiam theih si loh hian ka taksa, ka chhungril zawng zawng hi rawn fanin a rawn uap leh tan a. Umn, engemaw

tak chuan min rawn luhchilh ve leh ta.... Hmana ka awmdan ang khan ka mitthlaah mitthi tur chala kraws sen lar leh kraws letling ka hmuh thin angte kha a rawn inlar

leh ta ta zut zut mai le! Kha thil ngei kha ka chang nawn leh dawn tih hriattirtu ka nei ta bawk..... Hmn, enge pawi tehchai le, tanpui ngai ngawih ngawih ka tanpui

dawn alawm, dawihzep nih chu ka duh awkawng lo, ka thihna tur pawh nise, he nu hi ka pui dawn.

Mawitei cousin Mapuii chuan a ngaihna hriat loh hmel fe hian min lo en reng a.


TO BE CONTD/-
Comment min peksak khan ziak lehzel turin phurna min pe tih min lo hriatsak zel dawn nia. Comment in pek leh pek loh hi chu dang tak a ni a ziaktu riruah chuan.
I CHHIAR AVANGIN KA LAWM E

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 13th, 2017, 1:43 pm

A GIRL WHO SAW THE FUTURE! - 5

Le!! MIhring pangngaiah ka chhuak zo dawnin ka hre leh ta lo tawp mai. Mahse a pawi love, a pawi lo. Hmeichhe tleirawl tak, mahni intihhlum duhna hial khawp thinlung pu a hrehawm ti ngawih ngawih, amah ngawk a tuar tir zawng ka thei ngang tawh lo a ni. Ka hrehawm tawrhna, mi diriam, hmuhsitna leh endawngnate pawh kha lo kir leh vek rawh se. A saptawng takin experience ka lo nei ve nual tawh tho alawm le. Ka tuar leh mai ang chu. E...kan tuar dun dawn zawk mah mah, a tul anga min pui turin Goggy a awm reng dawn lehnghal, thlahrang em pawh a ni hleinem, val hi ka zam dawn lo rengsss.....

Mawitei pawh a rilru rawn damin a pangngai leh ta viau mai. Kei lah ka huntiam a ral tawh avangin ka camera chhuanvawr ve Nikon D500 chu ka han lek chhhuak ve leh ta poh a. Ka khawih tirh chuan awm nawm lohna hian min la tham er er mai. A chhan chu mitthi tur hnaivai ka hmu leh dawn tih ka hriat kur avangin.

Engmah han sawi zui tur thil danglam pawh awm lem lovin hun chu a kal pangngaiin a kal chho leh miah miah a. Mawitei paw'n a dan pangngai tein school pawh kal chho lehin a awmdan, a tawrhna avanga khawngaih hlawh ai mah chuan endawng leh tihkhai a hlawh zual zel zawk anih hmel e. Mahse, a hma ang em kha chuan hrehawm tiawmin a awm ta lo. A chhan chu hriatthiampuitu thian, phatsan ngai lo tur a nei ta miau a ni.

Goggy pa pawh thil awmzia zawng zawng kan hrilh vek a, tha min tihpui thu pawh min hrilh lova, tha lo min tihpui thu pawh min hrilh chuang lem lova. Mahse fimkhur taka che tur erawh chuan min fuih thung a. A mi rin chi ka ni ve tehreng nge ni, mi hi a rin tawk hmel em em mai a. zan thilah pawh nise, a
pawimawh miau chuan Goggy hi ka va sawm chhuak leh lawp lawp mai zel a. Min lo hnial emaw pawh a nei ngai chuang lo. Hei vang tak hian kan tan pawh Mawitei puih ngai a nih avangin puihna tur kawngah pawh nise thil a awlsam phah sawt dawn tlat a ni.

*******

Thil buaithlak tak pakhat a awm. Chu chu hei hi a ni. Chhiatna lo thleng tur emaw, mi chunga thihna lo thleng tur emawte lo hmu lawk ta tehreng ila, engtin nge hma kan lo lak ve ngawt ang tih hi a ni.
'Hey nang kha, i thih a hnai tawh ania, fimkhur hle rawh,' te va ti ta ringawt ila, min lo tim zek duh mai emaw kha a ni si anga. Tawngkam lah hi ka thiam lo ve ropui mai si a, an huatthu ka sawi a ni lekfang anga, an thi tak tak anih roh phei chuan FIR te hial thehlutin min khing ur ur anga, jail bang kan zut daih lovang tih pawh a sawi theih hauh loh. Mawitei lah naupang lutuk, mahni thiamthu ngei pawh sawi buai nuaih chi tur tih hriat reng. Mahse Bible chuan misual thi tur chu vaukhanna kan pek loh chuan an thisen mawh kan chunga a tlak tur thu min hrilh miau mai bawk si a.

Kawng lehlamah chuan ka nunhlui hre tawhtu mi thahnem tak an awm avangin ka thusawi chu an awih phian maithei. Mahse ka hriatna danglam leh mit varna kha ka dawng leh dawn em tih erawh ka chiang chuang miah silo. Umn....ka chang nawn leh ngei ang tih chu ka ring tlat. Mawitei nena kan inkuah chiah a ka ka taksa chhungril, sawifiah thiam si loh a rawn danglam dan atang khan. Chutah Mawitei lah khan, 'Ka zang deuh huaiin ka hria,' tiin hlim em em khan a sawi bawk si. A, a phurrit ka lo chhawk ve tak tak hlauh anih chuan chu tluka hlu a awm hleinem. Keizawng, hrehawm leh deuh dawn mah ila mipa alawm ka nih le tiin ka rilru ka tipaukhauh ve ta sauh sauh a.

Ka han inngaihtuah chiang a, kei hi engtin chiah nge ka la awm zel ang aw? A tir phat kha kha chuan ka camera in mi thla ka la a, chutah computerah ka dah lut a. A 'Blur' lai deuhte a lo awm lo maw tia uluk leh chik zeta ka enna lamah kha thil, kraws riruang, langchiang lo zet kha ka hmu ta kha ania. 'Blur' satliah mai mai emaw ka tih laiin nihnih thum hnuah khan a lo lang fiah ta tlat si, chik lehzuala en phei kha chuan kraws hlimthla, a riruang a lo ni reng a. A tifiah turin hun a han kal leh hret phei kha chuan rawng senin a rawn inrin ta anih kha. Midang lah khan min hmuhpui thiam ve der mai si lova, Muanhnapa lahin fiamthu thawh nan a lo hmang thul, mahse fiamthu mai anih lohzia a hriat hnu hi chuan hnaih pawh min rawn hnaih ngam tawh loh hi maw.......

Ka camera chu uluk fahran hian ka'n tuaihnum hlarh hlarh a. A lenste hrufaiin a double lens ka'n vuahchhawng a. Photographer ka ni tho nachungin he ka Nikon D500 zet hi chu maimitchhing chung pawn bahlah lovin ka khawih thei ang tih vel tur khawpin ka lo chulnel tawhin ka bel hle. Kawr phelh chung pawn ka khawih dik thlap ang. A.....lei hmuam chung paw'n mawle.

Kha mai kha a la ni tlat lova, rei hnu phei kha chuan ka mit a var zual a, computera edit kher loh paw'n camera screenah mi chala kraws sign ka hmu ta tlat thin kha a ni.

Buaithlak ta ber chu hei zawk hi ania. Engkim chunga thuneitu hian a duhtawk ve mai ka lo rin ve tehlul nen, ka mit a tivar sauh sauh lehnghal mai si. Khang hunlaia mitthi tur hnaivai chala kraws sen inrin kha, computer ngai lo, camera pawh ngai tawh lovin mit lawng ngatin min han hmuh tir ta siah siah mai anih kha. A va han hrehawm thin vawng vawngin mahni nunna lak mai ka va chak thin tak. Tunah zawng ka tumna ni miah lovah, ka hlawkna tur ni hek lovah ka inbarh lut leh ta. Mahse a pawi love. Zo tlangval tlawmngai hnar bawng, kethiah arh hian a thutiam a sut leh ang em ni!? Hnai love.

*********

Zan dar 8 a rik chuan Goggy nen Mawiteite in chu kan thleng a. Chu chu Mawitei'n hrilh tur pawimawh tak ka nei che u a tih vang ania. Mi inhnuai chep ve rik rek takah hian kan lut thla a. Kawngka kan han kik a, inchhung atang chuan min lo chhawn vat a. Inchhung chu a chep ve rik rek tehreng nen an vawng uluk tih hriat takin an bungraw neih ang ang chu a felfaiin a dak thlarh mai. An inluah a chep deh tih lovahh chuan mi harsa tak an ni lovang tih i a niileng lo chuann an hrethiam vek ang. Mawitei bakah chuan mi pahnih an lo awm a. Mawitein, "ka u Mapui," a tih zawk chu a thiante inah note copy tur chhuanlamin a chhuak zui nghal a. Mawitei chuan thutthleng hniama lo thu nu valai tak chu kawkin, "Hei hi ka nU nih hi," nuih var var pah chuan a ti a. Goggy chuan din chhuah hluai pah chuan, "Mawite, nu i va nei hmeltha ve, a la nula bawk sia, i tluuk lo," tih pah chuan nui sang chungin a chungin a chibai a. Mawitei nu pi Remi hmelah chuan a lawm hle tih a hriat bawk. "Mami, nang alawm hmeltha, modelling lamahte i kal ngai lo maw...i hlawhtlingin ka va ring em," a lo ti a, kan nui tlang dar dar a.

Chutah min koh chhhan diktak chu min han hrilh ta a. "Sikul chu nuam ka tih theih tak ngang loh avangin ka chawl ta ringawt a. Kan principal hnenah privatea exam ve mai ka dil a, ani chuan min lo hrethiam khawpin min lo phalsak ta a. Chumi pah chuan thildang tih tur ka zawng pah reng bawk a. Tichuan ka vanneih asiamin Pathian zarah SMTC a training tur chuan min la ve ta hlauh mai a. Tichuan hei ka kal ve tan ta anih hi.

Kan trainingna ep chiah hi Khatla South a ni a. Nikhat cu hlim deuha zai ri hi ka hria. A mawi ka tih em avangin ka ngaithla ta reng a. Ka bula ding ve Zira kan trainingpuipa ka'n ve tho hnenah chuan, "A nalh tiraw, a mawi i ti ve em?" ka'n tih chuan, "Eng chu maw?" a lo ti ha a. "Ehe, i hre ve nange, hlim taka zai ri anih chu, engtin nge i hriat loh theih zawk a?" ka ti a.
Zira chuan, "I bengek lum ri anih chu a," min lo tihsak a. Kei chuan, "Anih dawn lek tak chu," ka lo ti a, kan nui vak vak a. Mahse ka rilru te te chuan, 'Lei zaipawl zingah hetianga zai mawi ka la hre ngai hauh lo mai. An hla thu lah hriat theih loh, a thluk lah ka la hriat ngi reng reng loh lehnghal. Van lam zaipawl a ni thei ngei ngei ang. Angel ten vana hruai chhoh tur an nei a nih ngei dawn hi,' ka ti rilru rauh rauh a.

***************

Tichuan chhun chawlh kan han nei a, hla tak thlira ka din vang vang lai chuan a ngaite bawkin zai ri mawi lutuk, lunglenthlak lutuk mai hi ka hre leh ta. Chutihrual chuan tawtawrawt ri riai riai leh rimawi dang enge pawh ka hriat loh, zawite, fiah tak si, lungkuai zet hian a rawn ri leh riai riai a. Music ka hriat tawh zawng zawngah hetiang tluka mawi leh a ne ek pha pawh ka la he ngai lo, ka mur sung sung thei.

Mahse chutihlai chuan awm nawm lohna hian min rawn tham er er a. Chutah ka hnunglam atang chuan u Mapuii chuan, "Putea damdawi inah an dah lut, a 'Serious' hmel riau mai lehnghal a rawn ti ta mai a. Diktak chuan ka putea hi zep thu cheng lo, zu ngawl vei, zu heh lutuk mai a ni a. A zu in pumna leh a kaihhnawih avang hian vawi tam tak damdawi inah hian a lut tawh nghe nghe a, mahse a sim thei chuang lo.
.
Ka rilrute te chuan, 'Ka putea chu damlo serious anih si chuan, ani zawng piangthar lo, zu ngawl vei chatthla tep, Pathian ngaihsakna chhete mah nei lo a ni si a. Tuna ka benga cham tlat hi chu van zaipawl leh rimawi a ni tlat bawk si. Thil ni thei a ni lo. Damlo na zual deuh tak an awm em maw ni dawn chu le?' tiin ka ngaihtuah chhunzawm a.

Engpawh nise ICU lamah ka kal ve a ngai tihna chu a ni phawt mai. Diktak chuan ka putea hi ka ngaina lem lo. A chhan chu zu a heh lutuk vang leh mi tawng tlem lutuk anih vang hian ka nel lo a ni ber. Ka nu nena damdawi ina kan kal pawh chuan a hmingin a hmel ka hmu ve zuai chauh tak tak a ni. A chauh hmel tawh si, daihrei tur hmel a pu tawh lova, a thlarau kalna tur chu ka rilru erawh chuan ka khawngaih khawp mai. Ka rilruin urhsun zetin tawngtaina ka hman sak a.

A lo awmpuitute ho chu tam hnemah coffeete kan leisak a. Ka nu in doctor a va zawh chian chuan, 'E, a tha, a bp pawh a pangngai e,' a lo tih avang chuan ngaih titha ve angreng takin kan haw a. Scooty a kal kan ni a. Chutia kan tlan laklawh lai chuan hla hian min rawn pawl thut mai, krismas hla daih lehnghal. 'Kan lawm a che lei leh van lal ropui,' tih kha a ni. Ka sa a, ka sa ring tial tial a, ka inthunun zo ta hauh lo mai.
Ka nu pawh chuan,'Mami, a va ring mah mah em,' a lo tihial a. Mahse ka tihluih ni lovin chhungril tak atanga nawr chhuah a ni miau si. Ka awmdan hi ka sawi thiam lo zawk. Mihlim an tih ang chi hi ka ni chuang hauh si lo.

Chutah Chandmari lun lai tak maiah chuan van tawtawrawt ri ka tih mai, mawi em em mai hian a beng, ka thinlung a rawn luah leh ta ngut ngut mai le. Chutah zah pawh sawi thei lovin ka hmui chu tawtawrawt ham turin angin ka'n tikum a, boruak mai chu ka'n ham phei tak tak mai anih kha. Aw....nula a pumpa, zah zawng ka va zak chiang tak. Mahse zah a sawi theih loh, keima tihluih ni lovin hriatfiah phak loh thilin min tihtir a ni miau si. Mi chuan min en duh kher mai, a thenin min nuih tet tet a, min thlir thup a. Trafficte'n damdawi in mi â warda min thawn phei lo kha ka vannei asin.

Biak in bul kan thlen chuan mi an lo thu khawm tal tal a. A chatthla tawh tih thute, a bp pawh a pangngai tih vel ten an lo inhnial luih luih a.

Chutah pa pakhat phone call dawn mekah chuan, 'A la chatthla lova, mahse a bp a hniam khawp mai, biak tlak a awm tawh lo tih hi a ni.
Chuveleh ka nu chuan, 'Ka va tlan let leh nghal ange,' tih pah chuan kal a tum a. Ka thinlungah hriattirna ka dawng ta tlat mai.
'Ka nu, kal buai duh suh, chandmari bak i thleng hman dawn chuang lo, in lam lo singsak fel a hun zawk,' ka lo ti a, mak pawh ka inti ka thusawi ve teh ngawt chu. Mahse ka nu chuan ngaipawimawh duh lovin a kal lui ta a.

Chutah ka nuin Chanmari kawn a thleng hman vel ang tihah chuan,
'AMEN, Angelten thla khawngin an lo hmuak ta,' tiin ka han au chhuak piap mai ale, ka insum hman miah lo. Ka nu pawh chu a thi tih an hrillh veleh chanmari atang chuan a lo kir lehnghal bawk a.Chutiang hlir chuan insum thei miah lovin vawi 10 ka au chhuak ta anih chu. Chutihlai chuan ka putea zu ngawl vei, Pathian ngaihsak lotu chu ka mitthla hian a hmu reng mai bawk si. Ka ringhlel a, midang ka au hre pha pawh chuan min nuihzat tih ka hrereng. Mahse ka mit tihvara an awm chiah chu ka putea misual kha, angel var rualte'n hlim hmel taka an lo hmuak a an kuangkuah lai ka hmu ta tlat mai a ni. A va hlimawm tak em.

Chutah a ruang a lo thleng a, a hmel hmuh ka beisei lawk loh ang deuhin nui hmel pu, thlamuan hmel takin a liam a ni tih a hriat hliah hliah mai. Mak tak a ni.

Ruang lakluh hlim lah chuan mihlim pakhat hian,'Halleluia Amen, Lalpa'n a kiangah a hruai ania aw,' a ti mawlh mawlh reng bawk a,thil mak chu a ni ve alawm.

Tin, khatiang Pathian ngaihsak si lo kha, a thih dawn a a awmdan min hrilh chuan ka mittui a ti tla hial mai.
'Ka chhingmit khua fiah lo mahse, thlarau mitin a fiah chhandamtu,' Pi Lalsangzuali hla kha phoneah an play sak a, zawite tein a lo phun ve sep sep a, tichuan, 'Tinawn leh ru,' a ti zel a, a chahthlak hma zawng kha hla kha ngaithlain zai phun ve sep sep chungin a liam ta a ni. Chu chanchin chu a lawmawm em a, in hriat ve atan ka duh sia nangni ka thian neihchhun, ka rawn ko tawp che u anih kha," Mawitei chuan a ti ta ta. Thinlung a khawih kher mai, Goggy nen chuan sawi tur pawh kan hre lo.
"A va ropui tak em," tih chauh mai loh chu.

Tihian Mawitei-te nen kan inkawp tan chhin chauh a la ni. Hma hun thim leh éng, thihna chungchang kher lo pawh sawi tur a va la tam em. Kan sawi chho zel ang chu.

Hemi part tih tawp nan bik chuan hei hi ka sawi duh.
NANGIN MISUAL I TIH KHA, Lalpa chuan a thih dawn darkarah, minute, secondah pawh a ngaidam daih thei.
NANGIN VANRAM KAI tur chiang saa i ngaih kha, khawvel mite hriatpui loh Pathian pawisawina lian tham a ruka a lo neih avangin chatuan hremhnunah a kal daih thei bawk.

Chuvangin chhiartu duhtak, mi an thihin an chatuan hmun tur lo inrin lawk siak luih luih lovang u.
KAN KALNA TURAH HIAN I THU PAKHATMAH A AWM LO. PATHIAN THU THU A NI E.

TO BE CONTD/-
Hlawkpui ngei ang che aw. Tihian true story kan base tel zeuh zeuh dawn ania.
Ka lawm e min chhiarsak avangin.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 13th, 2017, 1:44 pm

THE GIRL WHO SAW THE FUTURE - 6

Goggy-te in thar chu a nuamin a zau tha hle a. Pafa chauha awm an nih avangin an luah hneh lo mah mah a ni. In mal din a ni a, a compound a zau thain a bul velah pangpar a vul chuk a. Rilru ipik lai deuh phei chuan awm thawven nan hmun nuam leh thlannahawm tak a ni.

Mawitei pawhin thil hriatthiampuitu a neih tak avangin a hmel pawh hmuh theihin a tha sawt sawt thei. Goggy-te nen veng inhnaihtea awm an ni bawk a, ka tan pawh, an tan pawh, intlawhpawh zung zung a awlsam hle a ni.

Nikhat chu Goggy-te in thar lawmin Mawitei nen chuan kan leng a. Ka Camera pawh ka keng leh ran tawh. A hmunhma vel chu thlalak nan a remchan em avanga keng chhuak ve mai mai chauh ka ni. Sawi lawk lem lova kal kan ni a. Kan innel tlang tawh bawk a, door bell pawh hmet lovin thawm dim tein kan lut a, barakhaih kan tum a ni ber a.

Choka kawngka lo inhawng hiauvah chuan kan dak dek dek a, hmuh tur an awm lo, a reh thiap mai. A pa chu officeah a kal ang tih chu kan hre sa thova. Dim thei ang bera penin lehkha chhiarna pindan lam chu kan va bih leh a. Goggy chu a lo awm ngei mai. Min hnungchhawn zawnga thu anih avangin min hmu lova. Lehkha hi a lo chhiar niap niap a. Chutah kal hnai zelin kan han barakhaih ta a le... A phut chian zia mai chu. A lehkhabu ken lai paih lawpin a zuang tho zawk a, a te chul a. A chum hian min chum dun awk awk mai. Keini lah kan nuih a za, ani lah lungawi lo.
"In va han suaksual dun tak," tih pah chuan a tum deuh bar a. A tum hmelte hlei hlei chu a va tha chiangkuang tak em.

Awmhmun rawt thawmhnaw a inbel a, make up engmah a hmang lo nangin a fai sar mai si, a va han tha sawr sawr tak em. Kapliantawni chawhma chhung zet a inchei ai pawhin a lêt sawmkua leh pathum velin a la tha zawk. Mawitei chu awm kher lo se chu ka muah loh a tîk a tâkah.

Chutah thinrim tak tak lo tih hriat tak, mahse la tum lui deuh bar chung chuan leng thu turin min han ti ta a. Chutah a lehkhabu paih chu chhar leh pahin, "Kha nangmahni vang, a kâwm a chhiat phah," a ti a. Lehkhabu chu ka han en chuan bible a lo ni a, a kawm chu tlem a chhe deuh. Barakhaih kan tum luatah kan va tifuh lo angreng si ve.

"Chhiar leh tawh rawh," ka han tih chuan min ner khum nasa mai.

Sawi tak ang khan Goggy hi mi piangthar tha lutuk a ni a. Shillong university-a a kal lai pawh a Evangelical Uniona hruaitu ni pha ve ngat kha a ni. Ka ngaisang tharin ka duh thar leh sawt mai. Sawisep kai lo nula, mahni lu zo vah, inringtawk tak, hmelthatna chapopui miah si lo a nihna tak hi a ni min hip lehzualtu chu.

Reiloteah chuan hlim takin min nuih leh sen sen tawh. Chutah kan titi a, kan phul hlut a. Thihna chungchang lam engmah kan sawi ri lo. Thil sawi nuam a ni tlat lo.

Chutah Goggy chuan, "Huan i fang mai mai ang u hmiang, a dai nuam asin, pangparte hi mawi in ti hlawm ngawt ang," a ti a. Mahse pangpar tih vel hi chuan ka rilru a khawih ve ngai lem lo.

Tichuan huanah chuan kan inzui chhuak diah diah a. Engkim mai chu a fuh thlap ni mai hian ka hria. In neitu hmasa ten an enkawl uluk tur ziate ka lo chhut neuh neuh a. Hmun danga pem an ngaih tak avanga hralh ta chauh an ni reng a. Ui zawng an uiin a man pawh an chhiar to khawp ang le.

In hnung lama min han chhuahpui chuan a lo mawiin nawm zawng a lo nuam nameuh mai. Park ni awm hiala mawi a ni. Huan kil tinah chuan thir thutthleng sei an dah a. Huan lai takah chuan Bûng kung lian zet mai a inzar pharh duai a. A mizo tawng takin 'Tawlhpahrit leh pipu' chenin a awm a. Kil khatah chuan swimming pool lian vak lo, thianghlim zet hi a awm bawk. A tlâng kual leh a awmna hmun tur diktak ni awm rengah chuan pangpar chi hrang hrang uluk taka enkawl tih hriat reng hi a vul chûk bawk a.

Chutiang khawpa hmun hahdamthlak chu Aizawlah ka la hmu lo. Camera chu lek chhuakin hmuntin mai chu ka tin deuh reng mai. Chutih laiin Goggy leh Mawitei lah chuan 'Helamah click,' an lo ti ve chhen bawk a. An pangparte chu ka hriat ngai loh chi hran hran a tam hle mai. Rose senduk, a var, Lily, a...lele-te pawh a ni ta ve ang, ka hre ve teh nuaih love. Chutah chiah chuan pangpar mawina leh hlutna ka hmu chhuak ve tan chauh niin ka hria. Kei, 'THIR' hlir ngaihtuah thin paw'n mawi zuk ti ve a mawle.

Photographerte reng reng chuan thil hi kan chîk a, kan 'Click' liam satliah ve mai mai ngai lo. Chutah rose par var pathum insi riala parte chuan ka mit a la riau mai. Engemaw ti takin danglamna sawi thiam si loh an nei tlat. Chu chu keimaha hriatna danglam awm thin khan min rawn hriattir tlat mai le!

Insi riala ngil takin van lam hawiin par an chhuah a, an awmdan(position) a inang vek bawk. Chutah ka han hnaih a, ka camera chuan a 'Angle' dik thei ang berin ka han tin a, feet hnih vel bakin ka hlat lovang tihah chuan thla chu ka la a. Mak ka tihna em em chu chutiang khawpa inang chuan lemziak thiam ber pawhin an ziah thiam ka ring lo. Tichuan,'Vawikhat leh,' tiin ka tanhmun ka han siamrem leh sauh a. Chiang thei ang ber turin ka han tilian(zoom) a. Ka hmet leh a, Goggy-te pahnih chuan min rawn koh tak lauh lauh avangin ka kalsan ta a.

Goggy leh Mawitei chu pool tlangah chuan lo thuin tuiah chuan an ke an lo chiah a. Anni pahnih pawh an innel tawhin rei tak inkawm thin tawh ang maiin an khawsa tawh a ni. An bula ka va thlen phei chuan Goggy chuan nuih vak vak pah chuan, "A mipa berin pangpar i lo lawm ber zawk anih hi a. Nge ni, thil danglam hmuhchhuah i tum leh tawh zawk?" min lo ti a, chhang chuang lem lovin ka nui mai a. Mahse thil danglam chu ka hmu ngei alawm.

Chutah Goggy chuan, "In peih angemaw ka hre lova, zanin chu Vanapa Hall crusade va chhim ve ang u hmiang," a rawn ti teh thut a. Kan han inrawn tlang a, Mawitei pawhin exam chawlh an neih lai a la nih avangin a lo remti ve a.
Goggy vek chuan, "Ruah hi a sur leh thut thin si a, carin ka rawn lam kual mai ang che u," a ti ta a, a tihzia ka ti hle mai, petrol save.

Reilote chauh emaw kan la awm kan tih chhungin ni pawh a lo her bawih tawh mai. Haw mai tum chuan kan ding ta a. Theihnghilh palh ka nei em aw tiin ka han indap vel a. 'Ehe! Khawnge ka cigarette lei thar kha?' Uluk zeta rose par var thla ka laknaah khan ka thlauh a ni ngei ang.

"Lawk aw," tih pahin in hnung lam huanah chuan ka va lut phei leh a. A awm ka rinna rose bula tanhmun ka siamnaah ngei chuan ka lo thlauh tak tak a. Tichuan ka chhar a, ka ak fel chiah a kal mai ka tum lai chuan rose par var pathum chu ka va melh leh kher a. Chhe hei!!! A va mak ngai ve, an pathum chuan van lam hawi tawh lovin keima lam vek an lo hawi tehreng a nih chu.

A mak ka ti lutuk chuan ka thlir reng a, ka melh tlawk tlawk a. Ka ringhlel deuh chuan ka camera ka phawrh leh a, nichina ka lâk kha ka'n ennawn leh ngat a, iau!! Ka hmu sual lo tawp mai. Cameraah chuan van lam an hawi thap a ni a parte chuan. Tanhmun ka siamna lai kha ka han en tha leh a. Ka tisual lo chiang, ka dinna hmun ngei pawh chu ka la hria, ka teh uluk em avang khan. A angle leh degree thlengin ka hria, ka tisual lo. Mahse tinge!? A va mak ta mai ve le.

Chutah ka awmdan ka'n siamrem leh a, pangpar chu ka'n tin leh vang vang a, ka hmet ta kauh a. Chutah pan hnaiin hmun leh hmunah hnai set sawtin ka'n en leh a. An pathum chuan an hawi lam nen, an par len lamte pawh a inang vek. Phir thum unau ni awm tak an ni.

Ka lo rei leh ta deuh nge ni, Mawitei chuan min au lauh lauh a. Tichuan pangpar chu ka kalsan ta a, mak chu ka ti rilru hle mai. Mawitei lah chuan nuih tlawrh tlawrh pahin, "Pangpar hi i lo ngaina viau a ni maw?" min lo ti a. Za lo takin ka nui sak a. "Tirawh, kal tawh ang hmiang," ka ti a. Kan inzui chhuak ta a.

Goggy chuan gate thleng a min thlah pah chuan, "Zan programme kha in theihnghilh ange, lo hman hma r'u aw," a ti a. Tichuan kan kalsan ta a.

*******************

Zan dar 6:30-ah chuan Vanapa Hall tlar hma lam deuhah chuan kan thu vang tawh. Khuang leh music dangte a tang tha et awt bawk a. Mihlim nuho pawh an vir leh zak zak tawh. An speaker ber lah saw ka hriat mi pawh a ni hek lo. Goggy'n min sawm lo se chu ka kal lo chiang ngawt ang. Mamawh zawng ka mamawh Pathian Thu chu.

Inkhawm tan hun chu dar 7 a ni a, minute 15 in tan a la hun lo tihah chuan pa pakhat, pa zahawm hmel zet hi stageah chuan lawn chhovin chairman thutna sirah chuan a thu ta a. Ka lo en reng a, chuta a tawngtai zo rawn hawi chhuak a hmel ka'n hmu chiang chiah mai chu ka va han phu chiang tak em. Goggy chuan maktih hmel deuh hian min lo en ha a.

"Tinge i va phu nasa ve?" tiin min zawt nghal chat a.
"A...aw, nakinah ka hrilh ang che," ka ti ta ringawt a. Ngaihthat loh hmel takin min enzui tih pawh ka mitsirin ka hmu reng mai.

Ka thutna chair chu Goggy leh Mawitei-te inkarah a ni a. Mawitei pawh chuan kan tawng chu a hre vek. Engemaw sawi tum hian a ka a ang zuau va, mahse engmah sawi leh lovin a ngawi leh ta daih a.

Chairman bul chiaha rawn thu rawn lut tharpa chu mak ti zet hian ka melh tlawk tlawk a. Ka hriat ngai mi pawh a ni chuang lova, mahse a mak tih loh chi a ni lo. A chalah chuan a sen lar theihtawpin chiang fahranin kraws a lo lang miau alawm! Phu zuk lo chi pawh ka ni bik hleinem. Hei kum khat zet chu mi thi tur ka hmuh lawk theihna kha laksakin ka awm tawh sia. Mahse Mawitei phur chhawk zangkhai turin Mawitei min ngenna kha ka lo 'Amen' ve ta mai kha ania. Khatiang kha keimahah a lo awm leh dawn a ni tih hrereng mah ila, kum khat zet hmuh tawh loh hnua thi tur chhinchhiahna han hmuh leh thut mai chu a makin a rapthlak em asin. Chutah camera ni lovin, mit lawng ngatin ka hmu lehnghal si.

Amah ka hriat mi ni lo mahse, stage-a thu pha chin a nih ngat chuan he crusade a mi pawimawh ve thawkhat tak chu a ni ngei ang.

Inkhawm tan a lo hun a, chairman chuan thunawi tlem a neih hnu chuan, "Puan tur awmte puang turin kan General secretary upa Lalsangkima i lo sawm ang," a ti ta a. Chutah chiah chuan alawm, mak ti taka ka thlir vung vungpa chu a lo dinchhuah tak ni. Secretary lo ni rengin.

Chutah rawn ding chhuakin thu a han puang a, a tawngkam a mawiin thu a thiam a, a nui deuh sang a. Pa nelawm tak leh mifel tak a ni tih chu a landanah chuan a chiang mai. Chutihlai chuan melh pawh ka lo melh tha ngam tawh lo. 'Aw, a hma hun tur hi hria se chuan hlim takin thu a puang hauh lovang mawle,' ka lo ti rilru a.

Chutihlai tak chuan Mawitei chuan min rawn nghawk zauh a. Rang deuhin ka melh nghal a. Ka lama rawn thlek phei pah chuan zawitein, "U Rin, tun ami saw zaninah a thi dawn," ngui deuh raih hian a rawn ti ta mai le!

A lo hre thei chu mak ti tak chung chuan, "Ka hria asin, engtin nge i lo hriat ve dan? Zaninah maw ni a?" ka han ti a.
"Ka hre bik lo, ka hmuh tirh khan ka hre nghal tawp. Aw, zaninah ngei a ni. Mahse a thih dan tur pawh ka hre lo. A boral dawn tih chiah ka hre thei. Nang engtin nge i hriat zawk?" min ti a

"A chalah kraws sen lar tak ka hmu mawle," ka ti a.

Kan tawng chu hriain a Goggy chuan, "Engmaw engmaw?" mak tih hmel tak hian a lo ti ve a. Tichuan thil awmzia zawng zawng chu kan hrilhfiah ta a. Rapthlak a ti bawk aniang, Goggy chu a chek tlawk tlawk a.

Chutah, "Hawh u, kan dan theih a ni si lova, a thlarau tan tal i tawngtaisak ang u," a rawn ti ta a.

Speaker rawn din chhuah hma a chairmanin tawngtairual a rawt chu Goggy tan ngat phei chuan thil lawmawm lutuk a ni ngei ang. A tawngtai tui ngang mai, thinlung takin Pathian hnenah chupa thlarau tan chuan a dilsak tih ka lo hre kiau, a tawngtai chu ka lo ngaithla kur a.

Chutiang bawk chuan ka vei lama thu a tawngtai mawlh mawlh Mawitei pawh chu a tawngtai urhsun hle. Chairmanin tawngtai thupui tur a rawn thawh chu an chham tel dun lo ve ve. Secretary thlarau tan chiah an dil tih ka lo hre leh ker.

Kei chuan ngaihtuah mang hlei lovin ka duh duh ka chham kual vel mai mai a. A chang leh Goggy tawngtai ka ngaithla ru, a changin Mawitei tawngtai ka ngaithla ru bawk.

Mahse maw, kei chu ka mangang chhete lo. Chupa thlarau tan chuan ka dilsak lo hrim hrim bawk. A chhan chu maw, khapa chalah khan kraws letling ni lo. Kraws ding ka hmu tlat bik a. Vanram kai tur chiang sa, enge tawngtaipui a ngaih vakna le....te ka lo ti ta vel mai mai anih kha. Ka lo dilsak ve hluam hluam anga, kraws kha a letlingin a inthlak thut ang tih mah hlauh zawk nak alaiin, ka rau lo ve bawk sia.

Speaker chuan thu a sawi rei lutuk lem lova. Ka thil ngaihtuah lai avang chuan eng thu nge a sawi pawh ka hre mang lo. Ka bula thute pahnih pawh hi an ni ve thovang.

Inkhawm ban chuan hmanhmawh tawkin, 'Va biakpawh dan hram a awm lo maw le,' tiin hmanhmawh takin stage lam panin kan kal dawr dawr a. Mahse kan va thlen chuan kan hmu ta hauh lo mai. Green room lam atangin a chhuak a ni ngei ang.

Haw kawngah te chuan kan sawi nasa mai a. Tichuan Goggy chuan a car chuan kan in ve ve thleng min thlah ve ve a.

In kan thlen atangin darkar khat pawh a la tling em lovang a tihah chuan fb news leh whatsapp lama kan thil hmuh chu hei hi a ni:

"Vanapa hall crusade neih meka an general secretary upa Lalsangkima chu Eden thar pengah vai truck nen insuin ka pawh chhawn lovin a boral. He vai truck hi a head light system fel loh vanga hetiang thil hi thleng ni ngeia hriat a ni."
Tih an rawn post ta kalh mai. Hre lawk tho mah ila, a rang tehthut lutuk erawh chuan min barakhaih hle mai. Goggy nen, Mawitei nen chuan chu thihna chungchang chu sawiin message kan inthawn kual hlawm a.

Chutah camera a thla ka lak, rose par var pathum kha rilruah a lo lang leh thut a. A awmdan kha a mak danglam tlat, engemaw thleng tur a awm chiang. 'Naktukah en chiang leh reng reng teh ang' ti rilru chungin ka muhil ta siai siai a.

TO BE CONTD/-
Like leh comment min pek sak thin kha ziak leh zel tura min tiphurtu a ni e.

I CHHIAR AVANGIN KA LAWM E

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)