MY LUCKLESS ROMANCE BY Ar EL Khawlhring (Completed)

Moderator: Ar eL' Khawlhring

Ngaia
Site Admin
Posts: 25813
Joined: April 30th, 2016, 4:07 pm

MY LUCKLESS ROMANCE BY Ar EL Khawlhring (Completed)

Unread post by Ngaia » October 29th, 2017, 1:29 pm

MY LUCKLESS ROMANCE
BY Ar EL Khawlhring
www.storyfb.com mizo story thar englai pawhin chhiar tur a awm reng

(T tih tri-na ka phone-ah ka nei ve hauh lo mai, min lo hrethiam ru aw)

Thangkhat lian zet a liam ve ta reng mai. High school kan pel chho ve a, higher kan han thlen ve chinah khan kan pawl rualpuite nen pawh kan inrual seng sawngin, kan inti nula/tlangval ve far tawh a.

Engemaw harsatna deuh ka neih avangin kâr hnih velin school ka zawm tlai bik ta anih kha. Lut tlai ber e ti lovin class room ka han pên lut ve dek dek a. Chhe lo tih deuh mai ka va nei nghal pang, huiham
... Ka mit hre hraw hi alawm, awm hle hle thei dêr lo chuan.

A, la naupang deuh mah ila dem theih ngawt pawh ka ni bik lovang. Pathianin mipa leh hmeichhia inhiptawnna a dah miau avangin middle school naupang chenin thianghlim takin an in 'Sitâr' suau suau tawh hi.

Ka nikhatna class kal ve chu ka va han hlawkpui lo chiang tak. E, lehlam zawng chuan ka hlawk phian lawi si. A chhan chu kha Chhelotei kha ka thutna atangin a lang chiang a. A sakhmel lo thlir veng veng ringawt pawh kha a hlu-in a hlawkthlak ka ti asin aw. Min rawn melh ve zeuh zeuh a ka hriat lehnghal chu le, ka inngaihbel vang zawk nge mawni, nuam ka tizual sauh lehnghal.

A bul chiaha thu nen chuan an inang viau mai. An sam chu dar thleng lek chauh a seiin an zuah ve ve. Inang viau mahse ka lo 'Sitâr' ruk zawk chuan ka mitah chuan pakhatna a hauh fai vek. Mahse tlemin a tawi hret zawk, chu pawh ka duhtawk chiah.


Class kan bân meuh chuan an hming chu ka hre hman dêr tawh. Hmelthatei chu Sêntei a lo nia. A bul ami kha Angie-i, unau an lo ni lehnghal. An inang rêng bawk a ni. Kum inzâwnin an piang a lo nia. Sêntei hi kum khatin a lo upa zawk a. Hemi ni hian 3:30 Pm-ah class kan bâng a. Ka rilru te te chuan kan bang hma mah mah ka ti.

Class room atanga ka chhuak tur chu 'Vawiin atan a tawp nan,' tiin ka han hawi lêt leh zauh a. Ka beisei loh lutukin min lo melh kiau anih chu!! Kan mit leh mit han intawng sak kha chu ka tek chhuai ni berin ka hria.


A mit la sawn vatin a biang chu a sen tan tan tih ka hmu reng. A va nuam lo si lo em....
Khami achinah khan ka thinlungah hian a châm reh thei lo. Kârkhat a ral meuh chuan vawikhat ka be ve tawh. Khawi veng nge an nih te ka zawt a. Kan school bul mai-ah chuan an lo awm reng a. Han biak zawm dan vak pawh ka hre chuang lo. Mahse a nau Angie chuan min be hmasa zeuh zeuh thung.

Vanglai nun intan chho ve nen, hmelthate hi ka hre thei phian anih hi. Sêntei chu a ruk hian ka vei ngawih ngawih a, engmah lah ka hrilh ngam chuang si lova. Heti ringawt chuan a dik dawn tawp lo mai. Ngaihzawng a neih leh neih loh tal ka hre tur a ni. Mipa dangin a nun an lo luah hman ange.

*********
Chawlhni(Sunday)-te chu a rei ka va ti vawng vawng tak. Mipa hi hetiang em em hian hmeichhe pakhat zûnah a uai theih ang tih hi ka lo ring pha ngai lo
hrim hrim. A tuk lama class kalte chu ka châk zek zek tawh a, ka za et et a ni ber e.

A tuk thawhtanni (Monday) rawn inher chhuak, kawla ni engmawi tak rawn êng uau mai kha chu aw, ka tan hian a va mawi lehzual bik tak em.

Nidang aiin ka inchei ulukin darthlalang pawhin min ning ve ngawtin ka ring, sawi thei se chu. Class 12 zirlai zingah ka kekawr a 'Ki' ber tur a nizirithruais.... Ka pheikhawk pawh a tle hle tur a ni. Kekawrte ha lo en theih tur khawpa tle-in ka han nawt a.
Chutah darthlalang hma-ah bawk ding lehin nuih mawi ka han zir vel a. Fair&Lovely ngat ka han inhnawih tak kha. Tichuan Sêntei bula ka awm hun a ka sawi turte chu ka han sawi chhin vel a. Ka aw-te zu han khûr vel a. Umn, kal tawh teh ang.
********

Class 12 zirlai zingah ka thleng hmasa ber. Ka classmate an rawn thleng ve sap sap a. An rawn thleng ve mai si lo. Ka ring hi ka fân ka fân tawh. Class tan a hun tep tawh si, ka va mangang ru tak.

Tan hma minute 5 vel a la awm ang tihah chuan kawngkharah Angie a rawn lang ta, ka thaw huai mai. Angie chuan min rawn nuih sâng a. A hnung chiahah chuan an thiannu Masangi a lo lut ve bawk a. Kei chuan anmahni en kânin kawngkhar hnung lam ringawt chu ka lo en a. Mahse mahse, a va mak ve! Tumah an rawn lut ta miah lo mai. Class tan dar an rawn vaw zui ta lehnghal.

Khatih lai tak khan aw... Ka hmel min hmu chiangtu chu awm se an ngaih a tha lo hialin ka ring. Ka hnual nghal rawih rawih mai.

Geography teacher a lo lut a, kan zirlaite chu ka rilru-ah a lut lo reng reng ringawt. Ka thu tûm vuau. Nge ni ka inbuatsaih nasat tehreng nen. Umn, Angie saw ka zawt khawp ang a u rawn kal loh chhan.

Chawlh lâwk(Short break) kan nei chiah tihah chuan Angie thutna-ah kal ka tum lai takin Angie chu a tho nalh a, hmanhmawh deuhin class atang chuan a chhuak ta daih a. A, a zun a chhuak tawh viau pawh ni fahmiang.

Chutihlai chuan Masangi chuan nui var var chungin min rawn hûi zeuh a. Engdang sawi lovin a bulah chuan ka han thu ve mai a.

"Enge nita Masang, a va pawimawh awm ve?"
"Pawimawh tawp."

"Anih chuan sawi la..."
"Star-tu deuh che ka hria asin."

Ka phu deuh zukin ka hria. Chutiang thu ka lo beisei lo em a ni. Ka thin inthûmrawn tluk tluk rite chu Masangin a hria ang tih ka hlau va. Keimahah chuan beiseinate, hlimnate, hlauhthawn rûknate'n min rawn bâwm nghal a.

"Mak i va ti awm ve?"
"Haha, nia. Tunge a?"

"Tunge i rin a? Hmeichhe mitmei i la man thiam nange?" Vel teh duah chuan a....
"Aw, man thiam eih lo," ka ti a, kan nui dun vak a.

"Tak takin Angie hian a duh lutuk che a," a ti ta! Phut zuk hnihna ka tawng leh e, beisei loh zawk maw? Chutah, "Mak i va ti awm ve, a fel si, hmeltha bawk si, lehkha thiam si, i inchhir lovang, ngaihzawng pangngai a neih pawh ka la hre lo," a ti ta duah a.
"Min duh tak tak awm lo em mai a. Tak taka, ka lo inngaihtuah ve anga," ka tihlai chuan ka rilru chuan, 'A u zawk kha alawm ka duh, mawh mawh mawh,' a lo ti ve mawlh mawlh bawk a..

Dar a rik leh tak avangin ka thutnaah ka thu leh a, chutihlai chuan Angie pawh chu a lo lut a. Ka lainat reuh kher mai. A hmelthatna chu thuhran nise, mi nunnem, mi nuntluang a ni tih a hriat reng bawk si. Mahse i u hian ka nun a luah thûk tawh lutuk. Hrehawm ka va ti rilru tak em.

'Umn...ka hrilh hmiah dawn, mipa ka ni alawm le,' ti rilru chungin lehkhathem ka pawtthla a.
"Masang, banah nangmahin lo awm khawtlai rawh," ka va theh phei zeuh a.

Ban dar a rik chuan Masangi chuan Angie chu a hrilh ru sa sa. Tichuan Angie chuan kawngkhar lam pan pah chuan min rawn nuih sak a, a chhuak ta nghal a.

Midang an awm tawh lem lo bawk a, pehhel vak tulin ka hre tawh lo. Masangi hnenah chuan, "Masang, in zahawm ka ti hle mai. Angie chu sawiselna tur ka nei lo, ka phu pawh ka tilo. Mahse a u zawk hi asin ka duh," ka han ti tâwng mai chu Masangi chu a meng bial bial kaw kaw mai.

Masangi chuan, "Mahse..." a ti a, a riat nawi niah niah a.
"Enge mahse?" ka lo ti vat a.
"Ngaihzawng a nei asin Sêntei chuan." Ka nghing lawihin ka hria.
Chutah chhunzawmin, "Kum 1 vel chu an inzui ve tawh an tia, mahse Sêntei nen hi chuan kan inkâwm tam vak lo zawk a, an chungchang ka hriatpui ve vak lo," a ti ta a, ngaihthlak nuam tak chu a va ni lo em...

Kei chuan chauhthubarawhah, "E, anih chu, a pawi lo ve," pawi ti rilru zet si hian ka han ti hram a.

"Engpawh nise, hmeltha ka ti tih tal chu i lo hrilh ve dawn nia," ka'n ti hram pek a.
"Tehreng mai, ka lo hrilh khawp ang."

"Tinge vawiinah a kal loh?"
"A pi damdawi inah a hruai a."
Kan inmangtha ta rih a.

Zingah, kal chhuah dawn laia ka phûr tehreng nen. Ka haw lam zet erawh chu ka zawi hnak, 'Châr Châr' tlâwn hnih zo leh zo lova pu haw ang velin ka rit bawk si. A la rei loh nen, a zûn phurh a va na si em, ka chau zo ta anih hi le.

Ka chaw ei a tui thlawt lova, ka mutui bawk lova, lehkha zir lah a lang hek lo. Masangi pawh ka khawngaih tho, palai, puarak hlawhtling lo ve tak a ni e. Angie rilru a na dawn bawk si. Engtin tak va sawi chhunzawm ang maw?
********

Class kal tura ka insiam leh mawlh mawlh lai chuan ngaihtuahna thar ka nei ta. Sêntei hi ka thinlung atangin paih bo ka tum tur a ni. Ngaihzawng la urhsun rual pawh ka la ni lo. Kum thu-ah kan inrual, 18 ve ve chauh kan la ni. Ani chu hmeichhia an nih avangin kumtling a chhiar an nia, an duh chuan pasal pawh an nei thei tawh. Kei chu kumtling pawh ka ni lo. Tun atang chuan zirlaiah chauh rilru ka pe tawh tur a ni tiin rilru ka siam ta a.


Class room ka lut fel awrh tihah chuan Sêntei-te unau pawh an lo lang ve nghal a. Biak tumna ka nei tawh lo hrim hrim, theihnghilh ka duh. Tlem a ka han enchian chuan an unau hmelah chuan thil dik lo a awm tih ka hrethiam mai a. Angie, nidanga hmel hlim sarh thin kha vawiin chu a nguai tlat. Thil awmzia ngaihtuahin Masangi khan engkim a hrilh vek tawh a ni ngei ang. Amah
Masangi lah a la rawn lang bawk si lo. Mobile handset-te a la awm lo bawk nen, inbiak a lo va buaithlak thin tak kha'ng hunlai kha aw. Lehkhathem, lehkhathawn hi kan hmang tangkai em em thung.

Kan political science zirtirtu a lo luh hma deuh chuan ka thianpa ka hnunga thu chu inthutthlengpui-ah ka sawm ta daih a, a lo duh ve mai bawk. Umn, ti hi chuan Sêntei nen pawh kan inhmu pha vak dawn lo ve.

Thildang ngaihtuah chu a har ka la ti tho mai. A zûnah khan ka lo uai ve hman khanglang sia, a ruk hian ka va melh leh hram thin. Aw, van mite u, min hrethiam teh u, a hmel saw a duhawm ngawih ngawih em asin..... Angie zawk erawh ka va hmuh apiangin hrehawm ka ti ziah. Kei tehlulin ka lo hnar ve chu a ni sia, ka tifuh meuh ange maw?

Lunch break kan nei a, Canteen-ah kan chawl a. Thingpui ka in zawh hnu chuan Canteen chhung a lum si a, ka thiante ka chhuahsan a. Mahse class room ka lut leh anih chuan Sêntei hmuh ka duh si lo. School chung zâwlah ka chho ta daih a, midang pawh an lo awm ve nak nak a.
Thlang lam thlir vauh vauh pah chuan eng engemaw ka ngaihtuah kual a. Chtihlai chuan hnung lam atanga, "Rl," tia min rawn ko ri ka hriat avang chuan ka ngaihtuahna atangin ka harh chhuak zawk a.

Ka han hawi lêt a, chutah chuan alawm ka beisei loh tak mai ka hmuh chu. Bialpaneii chuan min rawn pan mek.
"Enge ni ta?" Ka tawng chu duh ai chuan a chang fek fawk. Mahse a pawi lo.

Engmah sawi lovin ka bulah chuan dingin a hawi kual zak zak a. Chutah rang deuhin midang hmuh hlau siin ka kutah lehkhathem min rawn hmehbel chawt a, "Nakinah chhiar rawh, ka chhuk leh nghal dawn," a ti a, a kalsawn ta nghal a.

A mak ka ti hle mai Sêntei rawn chêt dan tehthut chu. A lehkha min pek chu chhiar nghal ka'n châk khawp a, mahse ka bulah midang an la awm ve tlat. A nau Angie chungchang a ni ngei ang.

Inhnuai zun inah ka tlan lut sawk sawk a, huphurh si, chhiar châk bawk siin muangchangin ka pawt pharh ta a. Chutah chuan he thu tê chiah hi a lo inziak a:

KAN INTHEN TAWH
tih tê mai hi.......
(To be contd/-)



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 29th, 2017, 1:29 pm

CHAPTER - 2
2 WEEK ROMANCE

Ka bo deuh map mai. Angie chungchang a rawn sawi dawn emaw tia. Kan inthen tawh tih ringawt a rawn sawi chu hriatthiam a har deuhin ka hria. E, taka, a bialpa nen an inthen tawh tihna a ni thei ang. Chu pawh ni se engvanga an inthen thu chu min hrilh ve ringawt nge a nih ang le...?

Umn le... Mi â nileng lo tan chuan a hriatthiam theih kuarin a lang ta tlat. Masangi nen khan an titi anga, tichuan a bialpa a then tawh thu chu min hrilh a nih dawn hi. Ka lakah beiseina a nei ve a ni chiang ang le.... Ka hlim lutuk chu zunin chhungah ka'n khêk chiam pek kha.

Ka hlim luatah theihnghilh ka nei tlat. Dar rik lai ka lo hre miah lo, a reh thap tawh bawk si. Rilru hlim si, hmanhmawh zet a class room a ka tlan lut tur chu kan zirtirtupa Hmuihmula kan tih mai lut tur chiah chu ka'n su her lawih pek a, a lawm hmel loh kher mai. Ngaihdamte ka dil rual chuan fawh nawk nawkte ania ka duh zawk ni, ka hlim em asin. Ka classmate te'n nuih insum zetin min lo en thap lehnghal.

Class bân nghakhlel zek zekin ka thu a. Bân veleh ka zawt chiang nghal ang tih rilru pu-in mawnga hawlh ang sek ka ni tawh. Mahse lehlamah chuan Angie nen an haw rual ngei awm si. Unau an ni sia, an kara rem lohna thlentu mai ka ni angem? Rilru chu a nuam zân lo. Angie lah ka khawngaih. Mahse Sêntei ka duhna chuan min pawt hneh em a. Hringnun kawng chhuk chho hi vawikhat tal han zawhpui ve châkna hian min buan hneh lutuk tawh.

Ban dar a rik chuan ka thin a rawn phu nghal dup dup mai. Zâmnate, helhhawlhna, phûrnate nen, a, ka awmdan diktak sawithiam a har.

Haw tura kan insiam sang sang lai chuan rilru zâm ru deuh tak chungin Sêntei-te unau thutna chu va panin zawite hian, "Sênte, ka be lawk duh che," ka va ti khûr deuh dar dar a. Ani chuan a lu a lo bu nghat a. Angie chuan min rawn melh zawk a, a hawisawn lehnghal a.

Tichuan midang chhuah rêm kan han nghak deuh a, kan pathum chauh chuan kan awm ta. Angie a la awm ve reng bawk si, biak dan tur a vâng hle mai. Mahse Angie chuan Sêntei hnenah chuan, "U, ka lo nghak dawn che em?" a ti zawi raih a. Sêntei chuan, "Mami, min lo va hawsan mai rawh, ka rei lovang," a ti a.
Angie chuan, "Aw le, " tih sep pah chuan a tho va, a hmel chu a ngui kher mai. Kawngka-a a chhuak tur chiahin mittui a hru zauh chu ka hmu fuh lehnghal a. Ka khawngaih reuh em avang chuan engmah pawh sawi lovin ka lo ngawi veng veng a.

Sêntei'n, "Enge min biak duhna ber chu?" a rawn tih chuan ka ngaihtuahna ata ka harh leh chauh va.
"E, ni dawn tak, enge lehkha min pek ami kha a awmzia?"

A sen deuh tan tan a.
"Masangi'n chanchin min hrilh a," a ti ringawt a. Ka lo nui sak a. Le, tunah tak hian tleirawl/rawlthar zahzumna paih a ngai ta e.

"Nia, i hmeltha ka tih thu ka sawi alawm."
"A tak tak anih chuan ka va'n lawm."
Kan ngawi dun leh vang vang a.

Chutah, "Chu zawng chu em ni Masangi chu i hrilh a?" Hnuai lam bih deuh ngar chung chuan a rawn ti leh a.
Chutah zet chuan sawi tura min phût a nei tih ka hrethiam ta a.

"Ni love, ka duh thu che pawh ka hrilh," ka'n ti ve ta anih kha. Min rawn en pah chuan a nui ver ver a, a hmelthain a va duhawm tak em. "Ka lawm lutuk," a ti leh sap a. Sawi turte pawh a rawn lang chho tan ta deuh e.

"Anih ngaihzawng chu i nei lo maw?" ka ti a.
"Nei lo ka tih kha, kan inthen tawh."

"Engtikah?"
"Kar hmasa lawk khan." A nui zui hawk hawk a.

"Tinge in inthen?"
"A, sawi tur a tam lutuk. A nula mi bawk si, kan inmil ta vak lo. Tlangval puitling a ni tawh a."

Hriat ve zel chu ka châk tho na-in inzawh zel a nuam lo, bakah an inthen tawh ber a liamah enge hriat zel a tulna...??

"Anih kan haw tawh mai dawn em ni? Chokider a lo kal tep tawh ang," a ti a.
"Aw le," tih pahin ka tho va, a kutah dimtea vuanin kut sai deuh dar dar chung chuan a thutna atang chuan ka kaitho va.

Kut insuih rialin kan kal a, class room kawngkhar kan thlen hma chiah chuan, "Sênte," ka han ti a, min rawn melh deuh hau va.
"Sênte, ka duh thu chu ka hrilh tawh che, mahse engmah min hrilh ve si lova," ka ti leh a. Chuveleh min hmachhawn zawnga rawn inherin a nui sen sen a, a lai ve hle tih chu ka hre mai. A nuih zawnga a biangsum khuar kek mai te chu a va inhmehin a duhawmna a va han belhchhah chiang em... Chutah a darah chelhin dimtein ka pawt hnai a, ani'n a kut pahnihin ka nghawngah min rawn kuah a, a maimitchhing diar diar a, a hmui chu fawh cho tak mai hian a rawn dawh ta. Chutah chuan ka tihtur chu ka hai tawh bik lo. Tichuan thlang sâppui tawng takin, 'First kiss,' chu kan nei ta a ni.

Ka nun hi a hlim veng veng a, thla lovin kan thlawk delh delh a, kan kâng diai diai ni berin ka hria. Chutah zawitein, "Rl, ka duh che, ka hmuh tirh atang che khan ka hmangaih che niin ka inhria," a ti sep sep a.

Chu thu zet zawng a mawiin, a mi den dan a va dang ta em..... Vantirhkohte aw hi ka la hre lo na a, Sêntei aw aia an aw mawi bikna tur ka chhût thiam pha ta love.

Chutihlai chuan thawm kan hre thut a, rang takin kan inthlah a. Kawngka atangin ka va bih dek dek a. Chokiderin Section - B lam kalh fel tura a chhunga a lut ka hmuh chiah chuan hmanhmawh zetin thawm dim tak siin kan chhuak ta vat vat a.

Kawngpuiah kan chhuak a, a lo tlai phian tawh mai. Inthlakhlelh luatah hun kan lo hmang rei deuh a ni ngei ang, a rei tawp si lova. An in chu a hlat vak loh avangin ka haw-na tur kawng ni lo mahse an kawmchhak thleng ka va thlah a. Inngai leh inkham lo zetin, zan mut dawn, chhungte mut reh hnu a inbiak intiam chungin mahni in lam kan hawi ta a.

******

Zanriah ei a hrehawm ta hauh lo mai thinlung hlim put takah chuan. Mahse ka lung a leng nghal reuh lutuk a ka ei tam thei chuang lo. Manilomaha intih pa ve nakalaia, lunglen vanga chaw lem han harsat deuh tlat mai chu(h)... te ka inti rilru a, mahse ka indem phal chuang lo.

Dar 8 vel atang chuan kan laneline telephone bulah ngei mai thuin lehkha ka'n zir ve sasawi kha ania. Rilru-ah chuan a lut lo teh e..... Phone a lo ri anga, amah a lo ni si anga, chhungte hian min lâk khalh ang tih hlau ru reng rengin bet lo zetin ka awm a. Ka ngaihtuah veng veng a, an telephone bulah a thu ve chat angem le? tih vel mai mai chhûtin dar 10 chu ka nghak thleng ta der mai, ka chhungte pawh an mu fel dêr tawh.

A chhungte an mu tawh angem aw? 'Call' hmasatu tur zawk lah kan lo sawi dêr si lo. 10:30 a ri ta, ka za sek tawh. Umn, mipa zawk ka nia, min lo châng reng zawk pawh a ni maithei asin. Phone chu ka han ban da da a, an phone number min pek kha ka han en that leh lai tak chuan phone a rawn ri thut mai, zan rei lam a lo ni tawh bawk nen a ring tha duh ngei mai. Tunlai hi phut zuk ka hrat hrim hrim.

Rang takin phone chu ka la nghal a, chhungten thawm an hriat hlau takin aw ngaihawm thei ang berin zawi sat hian, "Hello," ka'n ti deuh sa sa a.... Het shaala, agya barega.... Vaipa lo ni lekin...thinrimthlak chuan, phûr ve hman nakalaiin. "I hmelchhiaaa," ka tia ka dah daih.

Tichuan rang takin number chu ka han 'Dial' ta a, vawihnih vel a ri hman tihah chuan min lo chhang ta ngei a.

"Hello."
"Aw Sênte, i la mu em lo maw?"

"Lawk aw,.... U, kha Rla'n a be duh che," a ti ta mai. Angie zawk chu lo niin, a va inthlahrunawm angreng tak.

Chutah, "Hello," rawn titha lehin chu aw zet chu ka duat aw kha a ni ta.
"Tinge nangman i lo lak loh va?" ka'n ti nghal ringawt a.

"Ka kalsawn lawk lai anih kha."

"I chhungte dang an la meng em?"
"Meng tawh love, Angie nen chauh kan meng, ani pawh a mu dawn chiah."

"Kan chanchin hi a hre ve vek awm sia, i lakah a lungawi lovem?"
Zawite hian, "Lungawi lohna engmah a lantir lo, mahse a nun hi ngui lutuk, harhvâng tak kha a ni tawh lo, ka khawngaih tawp, keimahni vang a ni sia," a rawn ti sa sa a.

"Va'n khawngaihthlak tak ve aw, pawi hle mai," ka lo ti a, ka thinlung tak takin ka lainat a ni. Hmeichhe ler(h) deuh chi ang chu ni se ka ngaihdan a dang ngei ang. Mahse a ni si lo. Nungchang mawi leh pawisawi lo, nunnem tak, chhe lo ve tak mai a ni zawk si.

Sêntei chuan, "Nangmah nen ni leh daih zawk mai ula, ka nau hi ka khawngaih e," a rawn ti ta!
"Chiah maw, i phal chiah maw," ka sa deuh phat mai.

A ngawi vang vang a, ka lo insehruh nasa.
"Mawh," ka ti leh ngat a.
Chutah, "Phal chiah bik si nâng," a rawn ti chiah mai chu meiling, tuia chiah ang vel niin ka inhria, ka dai sawng sawng thei. 'Aw, ni ru,' a rawn ti ang tih ka hlau kher asin. A nau a ngaihtuahzia ka hriatin ka ngaihsan phah sawt.

"Rl, ka ngai teh mai che nia aw," a rawn ti leh te chu a pai a va'n nuam tehlul.
"Kei deuh hian asin ngai che, ka nun i tichhe vek. Lehkha zir nachang pawh ka hriat loh hi," ka'n tih chuan, "Hmn... Awihawm lem loh e," a rawn ti a.

Ka awmdan tak tak hi hria se zawng, a intithei lutuk palh ang tih ka hlau zawk. Chaw lem pawh harsa ve talh khawpin a ngaih lunglenna hian min bawm a ni sia. Mahse chu'ng em em zawng ka hrilh dawn lo, englai maha mittui pawh titla duh ngai lo khawpa inla pa ve thin khan he'ng lehzel chu ka sawi lovang, keimahah hian tlem a induh derna (pride) chhete tal ka neih ve a ngai alawm.

Tichuan thil eng engemaw sawiin a khât tawkin kan inngaihzia bawk kan sawi leh thin a, ka hmu châk tawh takzet zet a ni.

"Naktukah min lo sawm rawh aw, ka lo nghak ang che, ka nu office tur hi a chhuak hma thin a," a ti a. Tichuan kham lo tak chungin kan inmangtha ta hram a.

Ka ngaihtuah chhunzawm apiang hian Angie ka hre chhuak tel lo thei thin lo. Unau an lo ni lehzel vei nen. Angie pawh a duhawmin a hmel pawh a tha alawm. Kan class a mipa tam tak paw'n a u aiin tha an ti zawk. Mahse mihring hi kan lo mak khawp a, duhzawng tê hi kan neih bik thin hi. Pathian hian mit inang, duh inang vekin min siam se chu J Lalzahngaia-te, Chester-te ho nen hian kan intibuai fo ang chu. Tunah pawh hian Angie pawh hian ka thinlungah hmun a chang thei tlat lo. Khawngaih ngaihzawnna ringawt hian rei a daih dawn chuang lo.

*************

Zinga ka class kal tur han insiam zet chu ka va han phûr vet vet mai em. Nidanga mut kham lova zingkara tûm deuh hmo thin kha tuntum zet zawng, ka che surh surh a. Ka chhungte, min betu apiang mai hi nui sâng chungin ka lo chhâwn lêt a. Ka mize danglam lutuk avang chuan an ngaih a that hmel zân loh. Chaw lah bar thum zet zawt bârin ka kham zui a. Ka nauvin, "Mama, i chaw ei a tui nange?" tia min zawh chuan, "Vawiin chu kal hma hret a ngai, kan tan hma dawn a," tiin phutzuk nei hauh lovin dawt ka han sawi liam puat a. Ka pa hna a kal dawn chuang lo bawk a tiin, bike ka kensak a.

Mahse ka phûr leh lutuk chu ka lo phûr sual lua deuh a ni e. School thlen hma deuh a PCO atanga Sêntei ka han 'Call' mai chu(h)... "Chaw kan eikham chiah, ka nu pawh a la chhuak lo," a rawn ti ta heu mai. Sana ka han en chiang a, dar 8 chauh alawm lo la ri le..... Ka lo phûrthak mah mah a nih hi.

Kalna tur dang hre chuang hek lovi le, class a thut mai mai tumin school building ka pan a, gate chu a lo inhawng, class room reng reng a lo la inhawng lo. Chokider takngial pawh a lo la kal lo chu niin.

Corridor-ah ka lo tei vel ta mai mai a. A lum bawk si, thlan a tla nasa nen. Ka zirlaipuite'n school an rawn thlen ve meuh chuan e.... Sêntei'n min hmuh hmelthat ve deuh theih nana ka lo inhnawih 'Fair&Lovely' ngei mai kha, 'Lovely' a bo hman vek, ka thlan nasa lutuk a, 'Fair' chiah ka chang tawh a, ka fair em em tawh mai a ni. Tukin zet zawng, ka che fuh lo bawn ve deuh chu a ni e.

Tichuan Sêntei'n a nu kal chhuah âwm hun min hrilh kha a pel ta bawk a, ke-in an in lam chu ka pan phei ta a. Reilote-ah thlengin kawngka ka kik a, ka rin loh zawk Angie chuan kawngka lo hawngin nuisang chungin, "Lo lut rawh, hei kan hman chiah e," a lo ti a. Thinrim hmel min hmuh miah lote chuan ka thinlunga amah lainatna awm chu a rawn kaitho va, mahse ka ngaihtuah zui rei duh lo.

Reilote-ah kan pathum chuan school lam pan chuan kan inzui chhuak ta tham tham a, kan rilru a inang lo hlawm ngawtin ka ring. Nge, a lo inang viau hlawm zawk ang aw....

Chutiang chuan kâr tluan maiin ka sawm ta ziah a. Angie pawh chuan min hrethiam takin in atangin a chhuak hmasa ziah a. Angie a chhuak chiah tihah chuan duhthawh leh inthlahlel taka inpawmin kan in 'Chuks' ziah a, kan chhuak zui ve nghal thin.

Tlai lamah lah midangin class room an chhuahsan hun hi kei leh Sêntei, Angie leh Masangi chuan kan han nghak te te a. An chhuak fel ta maw tihah Angie leh Masangi chuan 'Chance' min han siamsakin pawnah min lo nghak mai thin. Angie hian thîk hmel pu hian a meng ngai reng reng lote chu amah ka ngaihsanna tizualtu a ni.

Zirlai uniform ha mai kan la nih avangin a nu awm laia lên chu ka ngam lova. Chutiang chuan zing lamah sawmin tlai lamah inthlah lehin, chu chu kârtluan a kan hun hman dan chu a ni mai. Mahse infawh tih vel bak kan pel ngai lova, kan inkâr nun kha chu a thianghlim reuh asin.

Vawikhat phei chu class roomah kan lo awm khawtlai rei deuh aniang chu. Corridor a rawn tlan ri phei hlawk hlawk ri kan hria a, kawngkhar a rawn inhawng rawp a, kan inkuah pawh kan inthlah fel hman lo. Masangi leh Angie chuan hah leh hmanhmawh hmel em em hian, "Sir a lokal ania," an tia, kan han tlanchhe ho tak tak mai anih kha. Kha'ng hunlaite kha a lo va hlimawm thin tak em aw, khuarei changin thawnthu mai an chang zo dawn ta si.

Tikhan hlim takin, tudang reng reng mah ngai lovin, lehkha zir kawnga infuih tawn sauh sauh reng chung khan kâr 2 chhung hun kan hmang dun a.

Kan inngaihzawn atanga kâr 2-na tûk chiahah chuan ka chhuah tlai deuh avangin ka sawm lova. Class ka lut a, hlim taka min lo sêih tura beiseina mitmeng nen ka han hawi vel chuan Sêntei chu ka hmu ta hauh lo mai le! 'Short break' kan neih veleh chuan Angie lamah tlan phei nghalin chanchin ka zawt nghal a. Angie chuan a nawmsam loh deuh avanga in check up tura a nu nena an chhuah thu min lo hrilh a. Ngaihtuahawm a nih a rin lem loh thu min hrilh chuan ka ngaih chu a tha deuh huai a. Mahse hemi ni, nileng mai hi chu ka khua a va han har vawng vawng tak em.

Zanah chuan biak ngei tumin ka 'Call' tlauh tlauh va, a tawpah chuan Angie chuan a lo la ta hram a.

"Enge a an? Amah a biak theih em?" ka'n tih chuan, "A mu tawh a, a khua a sik deuh aniang, a ngaihtuahawm loh," a ti leh mai a.
"Anih chuan zingah school kal hmain ka lo kal kawi lawk ange," ka han tih chuan a ngawi deuh reng a, a tawpah chuan, "Aw le," ban deuh taka tih pah chuan phone a dah ta a. A tawng danah chuan ka ngaih a tha vak der lo mai.

Tui lem lo zetin ka muhil ta hram a. A tuk zingah enghelh nei run chung chuan class kal turin ka chhuak leh ta a. Angie min chhân dan ban chelh chawlh khan ka ngaih a titha tlat lo.

Class room-ah bag ka dah te te a, ka chhuak leh tur chuan Angie leh Masangi chu ka hmu zuai na a ka be hman ta lo. Hmanhmawh zetin ka kal a, ka thleng thuai a. Sêntei-te in chu a lo reh thiap mai. Inhnît deuh faih faih ri chu ka hre thei. Kawngkhar chu ka han pawt a, chhung lamah a inkalh bawk si.

Chutah ring leng lawngin Sêntei chu ka han au vak a, chutah muangchanga kawngka lama rawn pên chhet chhet thawm chu ka hria a. Chutah kawngkhar kalhna chu rawn inhawng rakin Sêntei chu a rawn pên chhuak a, kawngka a khar nghal a, lut tur paw'n min sawm lo.

Zanah a muhil miah lovang tih rin theih turin a mitmeng a sen râm mai a, amah lah chu a pawr phengin a chauh hmel em em lehnghal a, mahse chu chuan a duhawmna a tibo pha tak tak chuang lo. A mit atanga mittui lo luang ngiai ngiai ka hmuh chuan ka khawngaih thut a.

"Engati nge Sênte, i lo va na awm em em ve, ka ngai tawh che asin," tih pah a kuah mai ka'n tum chu min nem sawn ta dawrh a, mak ka va ti em.

"Min khawih suh, min kalsan rawh, i tan ka tling tawh lo," a han ti mai chu(h)...!!! Ka va han hrethiam lo tehreng em!

"Sênte, pehhel lovin sawifiah ta che," tih paha a dara chelh ka han tum chuan tawlh sawn dawrh pahin, "Min khawih suh Rl, i tan ka tling tawh lo. Ka.... Ka rai," a han ti mai chu le!!!!!! Ka ding chawt a, ka hrawka hnawhtu avang chuan ka tawng chhuak thei lova, ka khawng vekin ka hria. Ka lu hi a hai muai muai a, ka tlu dawn ta mai. Sêntei, min lo dawm din tum mektu kut chu ka vai kiang lawp a, an varanda-ah chuan ka bawk thlawp a, tlem a ka innemkhalh hman deuh avangin ka na vak lo hlauh.

Chutah, "Rl, min ngaidam hram rawh aw," tia a kut pe a min rawn kaihthawh a tum chu, "Kal rawh," tih pahin a kut chu na zetin ka lo vai kiang leh lawp a. Chu veleh tap hawm hawm chungin inchhungah chuan a tlan lut ta a, chhung lamah a kalh zui thlap bawk.

Ka pangngai deuh hnu chuan ka inbêng fai thuak thuak a, kawngkhar chu sâwiin, "Sênte, lo hawng teh, sawidun tur kan nei," ka ti tuar tuar a. Ka chhânna dawn chhun erawh lungchhe taka tap hawm hawm ri chauh chu a ni.

A dik a dik chuan ka thinrim rilru na chuan an tukverhte chu vuak chhiat vek mai hi ka'n châk khawp a, mahse ka insûm hram a ni.

Chak zetin school lam panin ka tlan a, class an lo la tan lo. Ka bag chu phih chhuak lawpin ka ak nghal a, hmanhmawh zet a ka chhuak tur chu Masangi'n mangan hmel zet chunga, "Rl," tia min rawn kova min rawn um chu hmu mah ila ngaihsak map lovin class room atang chuan ka tlan chhuak ta a.

School piah hmun fal lai deuhah chuan ka thu hnawk a, chakna reng ka nei tawh lo. Hnunglam atanga ka dâr a kut dam takin min rawn khawih a, lungchhiat hmel taka Masangi'n, "Rl," tia min koh lai chuan naupan lai atang pawh a mittui titla duh lo khawpa luhlul leh intipâ ve thin kha ka mittui a far ta zawih zawih a.

To be contd/-
Comment hriat a châkawm thin.
(Min chhiarsak thin a, ka lawm e)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 29th, 2017, 1:29 pm

CHAPTER - 3

CHHINGMITTUI FAR CHUNGIN

Dar a rik tak avangin Masangi chuan, "Kal rawh le, lut phei ang hmiang," a ti a.

"Min lo va luhsan rawh, ka lo lut ve ve mai ang." Tawng ka harsat kher mai.

"A nih aw," tih pah chuan min kirsan ta nge nge a.

Ka mittui ka hru hul a, zawi takin ka haw ta hnak hnak a. Class room luh leh te chu a teuh lo lutuk. Miin min bia ang tih hlau tak chung chuan kun deuh ngal chung chuan ka kal a. Kan veng ka thlen meuh erawh chuan miin min en duh hlein ka hria, ka haw leh hma si a. Bakah ka hmel chu lungngaihna chhûmin a bawm vel a ni tih chu hai rual a ni lovang.

In ka thlen chuan ka nau hmeichhia, nawmsam loh avanga school kal lo chauh a lo awm hlauh va. Ka lawm angreng hle mai. Mahse ka hmelah chuan a ngaih a tha lo aniang chu, a chhan min zawt hram pek a, chhang lovin ka room-ah ka lut tlang daih a.

Tlai school ban hun awm velah chuan kan phone ri deuh ral ral chu ka hria a, ka nau chuan a lo la aniang chu, room kawngka bul atang chuan, "Mama, miin an be duh che a," a rawn ti a. "Tunge?" vîn angreng taka ka lo tih chuan ka nau chuan, "Ka hre lo, 'A thiannu ka nia,' a ti ringawt a," a ti a.
"A muhil ti la, phone kha dah nghal rawh," ka ti leh tuar(h) a.

A hnu lawkah phone chu ri lehin ka nau bawk chuan inthlahrung aw takin min rawn koh leh avangin ka kal ta nge nge a.

"Hello Rl." Angie aw a ni.
"Ka u in a be lawk duh che a," a rawn ti a.
Kei chuan, "Sawi tur pakhatmah ka nei lo," tih pahin phone chu ka dah hmak a, thutthlengah chuan ka thu nghal hnawk a. Lung a va zîng tak em.

Ka kalsawn hman lo, phone bawk chu a rawn ri leh a, thinrim zet a lak pahin, "Enge?" ka han ti tuar(h) a. Ka aw vin lutuk chu ka inthlahrung zawk ngei mai. A, pawi lo sek sek, enge a pawi vakna?

"Rl, min ngaidam hram rawh aw," tia rawn tap ri hawm hawm chuan mi va han tina tehreng em.... Sêntei aw ngei a ni.

Ka chhâng thei lo, min hnawhtu a awm tlat, ka ling but but bawk si. Chutianga vawi hnih lai a rawn tih hnu chuan harsa zetin, "A theih loh." tih pahin phone chu ka dah bur a. Mak tih hmel zet a min lo entu ka nau chu va melh kawkin, ani pawh chuan min melh tha ngam lo. Dik tak chuan ka unau neih chhun a ni a, min nelin min ngai ve. Engkim deuhthaw kan inhrilh tawn thin. Hemi tum pawh hian ka inthiam lo angreng hle mai a ruk tak chuan.

Chhung inkhawm hmang tur leh zanriah kil tura min rawn koh te chuan ka lo um ê tha duh lo va. Engmah phei chu min zawt rih lo na a, an ngaih a tha vak lo a ni tih ka hre reng mai. A chhan min zawh hun tur chu ka huphurh lawk hle mai.

Zan dar 7 a ri awrh ang tihah chuan ka nau chuan ka pa chuan min rawn ko ta ngei a. "Enge?" ka lo ti bak hlur a. Ka pa chuan mak tih hmel fe a min en chung chuan, "Saw, i thiante an lo len saw," tih pahin zawhna ka zawh leh hmain a kal leh ta daih a.

Mak ka ti angreng hle mai. Tu ka thiante tak ni ang maw!? Zanah engemaw zeuhah lo chuan ka leng chhuak ngai lova, ka thiante lah an lo leng ngai hek lo. Phûr lo zet chunga sitting room lama ka va luh chuan ka beisei loh deuhin Angie, Masangi leh mipa a kawm ve ber thin Diktea an lo thu thap a. Mawihnaia han nui lui chung chuan, "In lo leng ve tehkhiah a ni maw? In va fel ve," te chu ka han ti ve a. Ka thinlung chhung erawh a nui mawlh si lo, a der mai a ni e.
Anni lah chuan, "Nia," ti bakin min la chhang lo ta lehnghal. Ka chhungte an awm ve bawk si a, sawi tur a vang ngei mai. An hmel lah chu a ngui nghiai mai bawk si. Eng thu tak rawn keng ang maw?

Ka chhungte an awm ve tlat bawk si avang chuan, "Varanda lamah chhuak phei ang u," ka ti ta hram a, min zui ta diah diah a.

Varanda thutthlenga kan thut hma chuan light ka tithim a, a chhan chu an rawn kal chhan awm ang ka hrethiam si a, ka mittui hi hmu lo hram se ka duh a ni.

Ka ngawi reng a, anni lah chuan tawng hmasatu nih an hreh theuh tih a lang reng mai. Nakinah chuan Masangi chuan a aw a han thian kharh kharh a, chutah, "Rl, i tha maw?" min han ti a.
"Tha alawm," ti bakin ka chhang lo. Ka tawng châk thlawt lo a ni.

Chutah chuan Angie chuan min rawn thut hnaiah a, "Rl, ka u kha ngaidam hram rawh aw," a rawn ti a, ka chhang lo.
"Ngaidama pawm leh tur erawh chuan a ti lo che. Mahse hei hi hrilh tur che a min duh avang leh a hmangaih em che avangin hei thiante ka sawm a, Diktea hian in awmna a hriat avangin taxi la-in kan rawn kal tawp a ni.
'Rla kha ka bum reng reng lo va, mahse ka ngaihzawng hmasa nen kan inthen hma khan a vawikhat nan kan chesual a, ka inchhir em avangin ka then zui nghal a. Chumi hnu lawkah Rla nen khan kan intawng ta sia, rilru inthiam lo deuh chungin ka hmangaih em avangin ka tlanchhiatsan phal lo va. Mahse reilote kan inkawp hman chauh tihin ka thil sual tih a lo lang chhuak ta si a. Hrehawm ka tihdan chu a rapthlak zawk. Intihhlum ka tum a, ka ngam si lo va, naute tih tlak mai ka tum rilru, mahse Pathian ka hlau bawk si a. Tihian ka pai tlang mai a ngai dawn ta a ni. Amah hrilh ka tumin a ngaithla duh si lo va,' a ti a. Chuvang chuan a bum che a nih loh thu leh a lo hriat lawk loh vanga nang zui ta che a nih thu te, a hmangaih thu che hrilh turin hei kan lo kal a nih hi," a ti ta a.

Ka rilru na lutuk ka mittui tla tur chu hawisawn lawk pah chuan ka'n veng hram a. Anni hmuhah ka mittui a tla tur a ni lo. Mahse ka tawng chhuak thei lo.

Kan reh thap a, kan mitkhap thawm ringawt pawh kan inhre tawn thei hial ang tih turin a reh hian a reh ngawih ngawih mai a ni. Hrehawm kan ti tlang a, tawng chhuah kan hreh tlang vek tih a lang reng mai.

Chutah dimtea ka dar a min rawn chul hliau hliau pah chuan, "Rl, ka u chu i ngaidam tih min hrilh la, kan haw tawh ange," a rawn tichhuak ta a.

Ka ngawi vang vang a, a harsa rih deuh chu a ni. Mi fel, mi famkim ka ni bik lo nasa mai si.
"Angie, min hrethiam phawt teh u, a ngaihdam pawh ka la ngaidam thei mahna le," ka ti ta ringawt a. Ka va han ipik tak em.

Kan han ngawih tlan leh vang vang hnu chuan Angie chuan, "A nih leh kan haw phawt ange, kan thlen hunah ka lo hrilh ang che aw," a ti a. Ka lu ka lo bu ringawt a, an tho ta sang sang a. "Mangtha aw," tia min thlah tliar tliar pawh chu ka chhang lo.

An liam fel ta maw tihah chuan ka room chhungah ka lut tlang nghal a. Ka nau chuan min lo en vang vang tih pawh ka hria. Ka khumah chuan ka thu a, ngaihtuah dang neih a va har tak em....
Min bum lovang tih chu ka ring. Mahse ka hmangaih vanglai taka hetiang boruak tawng kan nihna hian min tina a. Uiresan nih a nat dan tur te thlengin min ngaihtuah tir a. Nupa êm kan la ni hleinem tih ngaihtuahna chuan inhnem ka tum a, mahse min hnem chuang eih lo.

Chutihlai chuan, "Mama, damlohna i nei em ni?" tia duat taka min rawn kuahtu ka nau chu ka ngaihtuahna kal ding lutuk avangin ka bula a lo thut lai rêng ka lo hre lo.

"Nei lo ve," tiin ka lo chhang ringawt a.
"Ni lo Mama, engkim kan inhrilh tawn thin kha. I ngaihzawng vang a ni em?" zaidam taka min han tih takah chuan ka hnuk hi a ulh teuh mai a. A tawpah chuan harsa titak chungin Sêntei nena kan chanchin zawng zawng chu ka hrilh ta a.

Khawngaih hmel tak hian min en a. "Mama, Pathianin i thatna tur zawk a ngaihtuahah ngai thiam hram rawh," nau zawkin min han ti te chu ka ngei reuh zawk kher mai, mahse min hmangaih vang a ni tih ka hre si.

"Mami, min lo va chhuahsan phawt teh," ka ti ta ngawt a.

"A nih leh a dam zawng khan ngaihtuah hram hram rawh aw," tih pah chuan min chhuahsan ta a.

Chutah ka inngaihtuah chhunzawm a. Sêntei nen khan class pum kha chuan kan inzui dan an hre vek tawh. Sêntei a rai thu an hria anga, ka fa a ni lo tih an han hre zui anga, min nuihzat dan tur te ka han ngaihtuah chuan a na ka ti thar lehin ka thinrim chuan thil tha lo zawk min ngaihtuah tir ta thut mai.

Khum hnuaia ka khawl bawma ka pawisa dah chu ka la chhuak a. Pathian zarah chhungkaw harsa lutuk chu kan ni lo na a, chawlh engemaw a ka nu leh pa remti lutuk lo chung mi hnena ka va 'Labour' ve zeuh zeuhna atanga tlem ka khawl ve chu ka la chhuak a. Khatihlai khan nikhatah 120 vel kha kan hlawh ve thin kha ania.

Zu lah kha a la tamin a tlawm narawh. Veng thenawm lawkah fun khat cheng 50 in kan la thin, a 'Cial' ngat lehnghal. Fun khat ang zawng paw'n kan sawi ngai lo. Ûm khat cheng 50, a cial lehnghal. Ka thianpa ka kalpui azarah a awmna kha ka hre ve a. No khat lek ka in a, ka kâi ve chha a nih kha.


Ka khawl bawm atang chuan cheng 150 ka la chhuak a, room atang chuan ka chhuak ta a. Dar 9 a ri chiah a, choka lamah chuan pheiin ka pa bike chahbi khai chu ka va la a.

E, mahse taka, Angie khan 'Kan thlen hunah ka rawn phone ang che,' a tih khan, 'Aw,' ka lo ti khanglang a ni.

Sitting room ka va bih dek dek a, ka nau chauh lo meng tawhin tv a lo la en a.
"Mami, dawrah thil ka lei lawk dawn ania. Ka thiante khan min lo 'Call' chuan lo sawi mai rawh," ka ti a, a ngaih a that hmel fahran lo.
"Lo haw har suh aw," a ti a. Ka chhang lo law law mai. Bike ka han tlawh nung anga, min hre dawn thovin ka hria. Ka chhuak ta nghal a.

Garage atangin Rx-100 bike ngei mai kha ka han la chhuak ruk ruk a. Ka han 'Kick' a, a nung har em em zui. Minute 3 vel lai ka han tlawh lauh lauh hnu chuan a nung ta. Ka 'Pump' tâwk a, ka tlan ta nghal vang vang a.

Minute 15 vel lekah ka tum ram chu thlengin ka han ding a. An lo la ri deuh laih laih a. Inthlahrung takin kawngka ka han kik a, nu ber chuan min lo hawnsak a, ka duh thu vel ka han sawi a, min en vung vung hnu chuan min luhtir ve ta a.

Patling deuh deuh mi pali hian an lo inthlit karh karh a, min lo en duh hle mai.

An sirah inthlahrung takin ka thu ve a. A tirah chuan min be luam na a, min ngaihsak rei zui lo.
Cheng 50 man 'Cial' ngei chu lam ve-in tui ka pawlh a ka in ve tan ta a. A tui hi ka han ti lo laileng khawp a, hmanhmawh ka duh tehlul nen.
No thum ka in kha chuan ka rui viau tawh. A la tam angreng si, paih ka ui si. Mitthlaah Sêntei nena kan nunhlui hmu chungin, hnar hup chunga ka han in zawh meuh kha chuan rui chhe tak ka ni, in ngai hek lovi le.

Bike ka tihnun lai kha ka la hria, ka rilru na a zual sauh a, vanduai ka inti thar a, chuta ka rui lungpuam ka tap deuh hlep hlep pawh ka la hre thei vek. Chak mangkhenga kan veng ka tlan thlen lai pawh ka la hre deuh. Chutah êng deuh pup ka hmu a, ka ri chawrh a, chu chu ka hriat tawp a ni ta.

********

Nikhua ka hriat tan riai ruai hnua ka hriat leh hmasak ber chu ka mal na ngut ngut te, ka lu leh ka nâk vel na vawng vawng te chu a ni.
Ka han meng deuh siar siar a, ka hmuh hmasak ber chu ka nu leh ka farnu mangang hmel taka ka bula an lo thu chu a ni. Mahse ka kut dinglam vuana lo chul hliau hliau va, mittui parawl kiang chunga min lo thlir rengtu erawh tudang ni lovin Angie a ni tlat mai!

Ka han men chian deuh hnu chuan damdawi in khumah ka lo mu reng a ni tih ka hre chhuak ta a!!!


(Ka phone chiangkuan loh luatah tlai dar 4 vel atanga ka type kha zing dar 1 velah hei zawng hi ka dah thei hram e pawt chhe rem rum chungin. A lo bo leh vek a, chhiartute in zahawm sia, phone atang phei chuan ka type muang si, duh ang paw'n ka thluaithlum hman ta lo.)

To be contd/-

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 29th, 2017, 1:30 pm

CHAPTER - 4

NI SAKEI

Ka harh ta tih an hriat chuan an lawm hle mai. Kei erawh na ti si, zak chem chem bawk siin ka awm a. Zah loh chi ni hek lo, zu rim ka la nam huam huam bawk si. Chutah hmeichhe pakhat vang teh hrep a hetianga ka awm hi a zahthlak ka ti zual ngawih ngawih. Ka chhungte'n min han biak pawh chuan ka chhâng mumal meuh lo. Ka accident dan pawh chu ka zawt ngam lo, an sawi hun ka nghak tawp mai a ni.

Min hrilh tak danah chuan kan veng tawntirh lamah mi pakhat bike khalh ve tho nen kan insu a lo ni awm e. Chu pa chu ka piah lawkah chuan a mu ve bam a, mahse a nat hmel lutuk lo deuh a. An sawi zel danin kan bike chu tlem a chhia a, ka sut pa bike erawh a chhe nasa hle a ni awm e. Inthlahrun a na duh takzet mai. Ka pa phei chu a lawm lo teh ang chu. Mahse a nih tur ang a ni zo tawh a, inchhirin awmzia a nei vak tlat lo.

Khatia ka tlan chhuak thawm kha ka nauvin lo hriain ka chhuah ngai loh avangin mangang takin a lo awm a. Chumi hnu lawkah a sawi lawk ang ngeiin Angie chuan min rawn phone a ni awm e. Ka chhuah thu ka nauvin a lo hrilh chuan an mangang dun hle a. An lo in 'Call' tawn sek a. Ka nau chuan ka nu leh pa a lo hrilh ngam chiah si lo. Chutah darkar 2 hnu velah kan thenawmte'n ka accident thu an rawn hrilh ta mai a ni awm e. Ka nu leh pa kaithovin Angie pawh hrilh zuiin an rawn kal a, hmanhmawh takin damdawi in min panpui ta a lo nia. Na lutuk, zai ngai em chu ni lo mah ila, ka maltê ruh lehlam tliakin, ka nakruh a auh bawk a. Ka helmet a lo khi vek a ni awm e. Helmet khum lo ila chu ka lu ka sawh keh ngei ang.

Damlo chu ka ni na a, ka sual vanga hetianga awm ka ni bawk a, ka inthlahrung dêk mai. Ka mal ruh chu an cher a, chu chuan chêt a tinuam lo va. Ka nakruh bâwr ber chu a na-in ka hria. Karkhat vel lai chu damdawi inah awm a ngai dawn anih hmel khawp mai.

Angie nen chuan kan inbe hman mang lo va, tunah chuan min hawsan tawh. School chawlh anih avangin a lo kal hman chauh a, zan lamah khan min lo awmpui bawk tih ka hria a, ka lawm viau na a, lawmthu pawh ka hrilh ta chuang lem lo anih kha.

Ka pa chu thinrim hmel taka hmuh ka tum viau laiin ka huphurh ang reng ni lovin min duat ber berah a la tang zui a, chu'ngte hlei hlei chuan min ti inthlahrung.

Tlai lamah tuma awm loh lai tak chuan ka sir maia mu ve, ka sutpuipa chu a rawn bai phei taih taih a. Ka khum bulah chuan rawn thuin a rawn nui sâng a, a inthlahrunawm duh khawp mai.

"I tha maw?" min rawn tih chuan ka lo nuihsak a.
"Aw tha e, a zia lo hle mai a, ka rui ngai lo va, chintawk ka lo hre lo a ni, ka tlan dan speed pawh ka hre reng reng hleinem," ka han tih chuan a nui hawk hawk a.

"Inthiam lo bik mah ta che, keipawh ka ni ve tho alawm," tiin a ruih ve zia leh hmangaihna vanduai avanga chutianga awm anih zia te min hrilh bawrh bawrh mai a, a nelawm phian mai.

Chutiang chuan keipaw'n ka hrilh ve bawk a, hming te kan inhrilh a, kei aiin a upa hret na a, a hnu zelah pawh thian tha tak kan ni zui ta nghe nghe a ni.

Min awmpuitu tumah an awm tawh rih lova. A zankhatna ang tur chauh a la ni bawk a, mahnia inthiar tura kal ka harsat hret avang chuan chaw pek pahin tlaiah ka nu lo kal leh mai se kan ti kha ania.

Mahse damlo awmpuitu midangte'n chaw an dawh laih laih lai chuan ka beisei loh lutukin tiffin khai chung Angie a lo lang nawlh mai le! Engtizia tehreng nge maw ni aw!?
Ka beisei lo ang tih a rin vang nge ni, min hmuh veleh chuan min rawn nuih phei ver ver a. Ka nuih let ve chuang lo, ani awmpui chu ka duh vak loh bakah inthlahrun a tina sawt mai.

"Mak i va tiawm ve?" tih pah chuan a rawn thu a, tiffin chu ka bulah chuan a rawn dah nghal a.
"Tinge nang i rawn kal teh daih a?" ka lo tih chuan ka tawng bung deuh nge ni, min en ha pah chuan, "I lawm vak nange?" aw ki hniam raih hian a han ti a.

"Lawm lo lo ve, i lo kal hi a mak ka ti deuh mawle," ka ti a. Kei thin pawh hi a, 'Lawm e,' tih ve mai awm hi ania, tawngkam ngaihthlak nuam zawk hmang ve thin tur ka ni mawle. Mahse ka lawm vak tlat si lo alawm. A u nen kan inthen vanga hetianga awm ka ni tih an hriatthiam avanga inthlahrunga min riahpui tum tih hriat reng. Anni thiam lohna pakhatmah a awm hleinem. Kan inthen vang ni mah sela, ka sual vang ania, ka tuar tur alawm.

"Nia, i nute nen kan inbia a, i pa a hman lo tih kha ka hria a, i nu ai chuan ka chak zawk ang, ka la thalai zawk alawm," a ti a, a nui har har a.

"Ka nute chuan an phal ringawt em ni a?"
"Han phal lo nâ teh se, ka hnek a ni mai," tih pah chuan a nui leh har har a. A mizia tê hi a lawm awm thin riau, kei pawh chu ka khi ve ta vur vur a.

Tiffin chu hawngin chaw ei min siamsak malh malh a. A hmelah chuan a hlim hle a ni tih a lang reng mai. A hmel chu a êng set a, a nui deuh sen sen reng bawk a, hmuh zawng a nuam ngei mai. Engvanga hlim viau nge a nih ang le, ka bula a awm vang a ni thei mai angem? te ka lo ti rilru a, ve ngawt ngawt a.

Chawhmeh ka'n en chuan vawksa, pickle leh bai a lo ni a. An fapa hnaisai lo chu min va la duat ve mawle. Chi leh buh bai chauh hmehtir awm ka nih vei nen.

Chaw leh chawhmeh chu tui ti taka ei chung chuan, "Chaw hi an rawn dah nge, kan inah i va lam kual chu a ni êm lo'ng chu maw?" ka han tih chuan.
"Lam kual lo ve, in ami ka rawn keng mai. Bai kha keima bai anih kha, tui i ti ve tho em?" hlim hmel siah hian a lo ti a.

"Ehe! A va inthlahrunawm ve, chaw chu tinge ka chhungte chuan an rawn dah tal loh le?" ka ti a, inthlahrunawm ka ti tak tak.

Nuih sen sen pah chuan, "A ngai hleinem. Kan in atangin damdawi in a hnai daih zawk alawm," a ti sam êt a. Chutah, "Ka bai chu a tui em? Min la chhâng miah lo," a ti leh a.
"Tui lutuk tlat, i va'n siam thiam em em," ka han tih chuan lawm hmel takin a nui sen sen a.

"Taka, Angie, i nu'n engtin nge a ngaih reng reng a, rawn riah phei chu a phal reng reng em ni?" ka han tih chuan, "Chaw pawh kha aman pe turin min ti zawk a, chuan riah ka dil nghal a," a ti a.

Ka laka an inthlahrun vang tih ka ngaihtuah phei chuan tha ka ti lo takzet.
"Angie, a va tha lo tak. Mite pawh an inthen thin tho alawm. Hetiang thil ka tawng hi in thiam loh pakhat tê mah a awm lo, hetiang vanga inthlahrunga min rawn awmpui lehzel hi zawng, a zia lo em mai, ka chantawk ka hmu anih hi," ka ti a.
"Chuvang pawh a ni chuang lo," a ti sap a.

"Anih engvang nge?"
"I ngaihawm hrim hrim alawm," zah hmel taka ti chung chuan hmangaih hmel tak hian min en dauh dauh a.

Ka va lainat tak che em..... He thu hi sawi chhuah chi a ni hauh si lo. Keiin khawngaih hmel takin ka en lêt a, hmangaihna mita en theih ka va châk tak em.
"I va tilawmawm ve," tih zawng chu ka chhanna a ni.

Tiffin sil tura min kalsan lai te chuan amah ka khawngaihna leh lainatnate chu a chhuak nasa mai. Hmn, ka ngaihtuah chhunzawm tawh tur a ni lo. Ani emaw, an chhungkhat laina dang nen chuan kan inhnim hnai tawh tur a ni lo. Hetiangte chuan engtin nge Sêntei kha ka theihnghilh theih ang ni.

A tiffin sil zo rawn lêt leh te chu ka lo en reng a. He nu hi a puitling thlarh mai.A chêtdan hi nula kum 25 mi vel ho nen danglamna ka hmu bik lo reng reng. Unau zinga naupang zawk mah ni se, inchhung khurah a in la 'Baby' hauh lovang tih chu a rin theih nghal mai.

Thimhlim atang eng engemaw sawiin kan titi a. Ka sutpuipa Sawma kha kan bulah lo thu ve in titi vawrh tur a hre bawk a, dar 8 chu a ri dêr mai. Chutah chuan kan titi miin an lo nin palh hlauvin Sawma chuan a khum lamah min pheisan ta a.

Nachhâwknain min chhâwk takah chuan mutchhuakin min rawn man tan a, Angie chu ka hrilh a.
"Muhil rawh, light tihthim hma lehhabu ka'n chhiar lawk ange, tui deuhin i mu dawn nia," a lo ti a, a sawi tawp lam chu ka la hre chang chang, tui zetin ka muhil ta bawrh bawrh a.

Ka hmai bul lawk a phun sep sep ri chuan min tiharh a. Ka han ngaihthlak chian chuan Angie chu a tawngtai a ni tih ka hria a. 'Nangmah hnaih thei turin awmpui ang che,' a tih ri chu ka hre hman. Ka tan a tawngtai a ni ang tih ka ring thlap.
Chuta a tawngtai zo chu rawn kunin ka chalah a rawn fawp zeuh a, zawite hian, "Ka hmangaih che," tiin a phun sep sep a, ka muhil emaw a ti a ni ngei ang.
Chutah a insiamrem sat sat a, a thutna atang chuan ka khum bawhin muthilh a tum ve ta a. Nurse-te duty-na lai chiah chu a êng na a, thil a hmuh theih tho avangin Angie chezia leh thiltih chu engkim ka hmu ru thei vek mai.


Angie a muthilh sêk sêk tawh hnu pawh chuan ka la harh ta kur mai. Angie khawsa zia khan min ti mut chhuak lo zo vek. Engvang nge kei tehlul hi min lo hmangaih ve em em ni ang le, kei aia tha, fel leh hausa a hmuh zawh dawn tehlul nen. Hmangaih let ve chu a phû ngawih ngawihin ka hria. Mahse ka thinlung ka pêk lêt dan hi hmangaihna a ni hauh lo tih hre chiang bertu chu keimah ngei hi ka ni si, ka thinlunga awm ve hi chu khawngaihna ringawt a ni tih hi ka chiang tlat, nuam ka ti thei lo, mahse ka tihluih a ni bik si lo.

Sana ka hmuh theih loh avangin dar engzat nge pawh ka hre lo, zan rei tawh takah chuan ka muhil ve leh ta hram a.


Zinga ka han harh leh meuh chuan khua a lo var vek tawh. Midangte pawh an lo tho nual tawh a, Angie phei chu ka bulah hmuh tur a lo awm tawh lova, a inthiar pawh a ni maithei e. Ka bula a lehkhabu kalsan chu ka han en chiang a, kan zirlaibu Education subject a lo ni reng a. Chutihlai tak chuan thingpui no chawi chungin nui sen sen chung hian a lo lut a.

Thingpui min lo pek lai chuan, "I va fel ve, nizan i muhil thei awm si lo, a hrehawm awm," ka lo ti ve luam a.
"Hrehawm nang, ka mutui lutuk. Ka mut a chhuah tawh vek vek chuan ding chung pawhin ka muhil thei alawm," a ti a, a nui hawk hawk a.

Chutah, "Ka pheisan deuh mai che a ngai dawn ania, vawiinah test kan nei dawn sia," a ti a.
"Keimah vangin i tihchhiat phah vek dawn anih hi," ka'n tih chuan, "Teuh nang, nizan khan light an ti êng rei angreng a, ka thiam hman vek," a ti mai a.
Thingpui kan inzawh hnu chuan, "Ka kal ange, remchan veleh ka lo tlawh leh ang che," a ti a, a tho ta a. Thlah thei hek lovi, min rawn 'Bye' zauh pawh chu khum atangin ka lo vai liam ve ta ringawt a.

Angie a han kal liam meuh chuan ka khua a har zui vung vung mai. Han inkawp rei deuh ngat ila chu a chunga ka rilru put dan pawh a danglam daihin ka ring tlat. Mahse kan inkawp tak tak tur a ni lo, Sêntei ka theihnghilh theih loh phah zawk ang.

Chhun lamah chuan ka nuin min awmpui chawt a. Angie chuan school kal dawn leh ban hnu hian min rawn tlawh ziah a, a chang chuan Masangi leh Diktea an lo kal ve a, kan hlim tlang thei hle thin. Karkhat zet zawt damdawi ina ka awm hnu chuan na lutuk tuar nih loh avangin ka chhuak thei dawn tawh a. Ka chhuah dawn tuka Angie school kal tur rawn kal kawi chuan thu thinthawng angreng tak min hrilh a. Chu thu chu a u Sêntei-te an insawi fel thu leh thla thar ni 8-a an inkutsuih tur thu chu a ni.

Min en vang vang a, "I rilru tihnat tuma sawi ka ni miah lo ania aw, nakinah, 'Tinge min hrilh ve reng reng loh?' i ti ang tih ka hlauh vang ania, i hre leh tho dawn bawk sia," a ti a.
"E, ka hrethiam lutuk che, min hrilh lâwk a, ka lawm e," ka ti a. Angie chuan school tlai a hlauh avangin min chhuahsan leh ta a.

Ni e, Angie khan ka rilru tihnat nan a sawi lo tih ka hrereng, mahse a lo na thar leh tih hi zêp buai chi pawh a ni lo sawi chhuak kher lo mah ila.
He thu ka hriat huna ka awmdan tur, hmachhawn thei tur khan ka lo inring lawk viau na a, a taka ka beng a han thlen tak meuhah chuan rin aiin ka lo la inpeih tawk lo tih ka hmu chhuak ta a ni.

In lamah kan inenkawl chho va, bai saih saih chung chuan ka kal thei. Mahse docorin indîm tura min chah ngun em avang chuan Crutch (zak dawh tiang) ka hmang a, bâi ai chuan a ziaawm khawp mai.

In lama inenkawl takah chuan a hlat tham deuh tawh avangin Angie paw'n min rawn tlawh hleithei tawh lo. Chu tak chuan chhun lama mahni chauh va ina awm phei chuan khua a tihar zualin ka hria. Hmangaih kher lo mah ila hetiang khawpa min ngaihsaktu chu ka thinlung hian a lo theihnghilh bik reng reng lo.
Damdawi in leh school han kârtawn kha chu an tan a awlsam a, an hnaih ve ve avangin. Mahse kan veng hi veng hmawr lam deuh anih avangin a rawn kal thei ta si lo va, damdawi in kha ka ngai thar leh rum rum mai, ka awm laia ka nin theih nen.

Min rawn tlawh thei lo mah se, a school kal dawn leh ban hnu leh mut hma hi chuan min rawn phone ngei ngei thin.

********

March ni 8 rawn inher chhuak chiah chu kei ka tan ni sakei a ni. A chhan chu Sêntei-te inneih ni a nih miau avangin.

Zing dar 7-a inkutsuih tur an nia, keiin dar 5-ah ka lo harhpui ve hlawl te chuan an inneih ni tur leh amah ka lo vei zia a ti chiang ngawtin ka hria.

Angie khan kal ve tur khan min sawm nasa mai a. Mahse a tiha tihchi hlawl loh chuan dam viau tawh mah ila.
Tho chhuak chuang lo chuan a tawp nan tiin Sêntei nena kan nunhlui chu ka chhui kir mai mai a, lung a lengin rilru a na leh vawng vawng a, mahse a na rei tawh dawn chuang hleinem.

Dar 6 a pel fel tihah chuan kan laneline phone a rawn ri ral ral a, ka nau a lo tho tawh hlauh a, ani chuan a lo la a. Reiloteah lo kalin, "Mama, i tho tawh em? Hei an be lawk duh che nia," a rawn ti a. A va mak ve, zingkar karah lehnghal. Angie'n min rawn sawm dawn a ni ang tih ngaihtuahnain a rawn zui a, ka be chak lem lo hle mai.

Chutah telephone chu ka han la ta a. Mahse ka aw hriat chu ka tum loh leh beisei loh zawk a ni e. Vawitam tak ka lo hriat tawh aw mawi ngaihawm tak mai chuan, "Rl, inneih inkhawm min lo hman pui ve la," a rawn ti ta! Tudang aw ni lovin Sêntei aw ngei a ni tlat! Chhe hei! A aw ringawt pawh chuan ka thinlung hi a vit tlang zawk zawkin ka hria. Chhanna chang pawh hre lovin ka lo ngawi reng a. Ka reh rei vang aniang, "Mawh, Rl," a rawn ti leh a.
Chutah kei chuan aw han then(thian) deuh kharh kharh pah chuan, "Nia, a tha viau a, mahse ka la kal tha thei vak lo va, hlim leh tluang takin in hmang dawn nia," tih leh phone dah ka rual nghal a. Ka aw te kha a lawi deuh rûtin ka hria. Ka va zâm chiang em.

Engati nge intipa tawk a, 'Nahi' tia ka lo chhân zawk loh le...

To be contd/-
Min chhiarsak a, ka lawm thin e.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 29th, 2017, 1:31 pm

Engatinge intipa tawk a 'Nahi' ti a ka lo chhân zawk loh le..

CHAPTER - 5

SULHNU CHHUIIN

A aw ringawt pawh chuan min va'n la hneh tak em. Min tinatu a ni tih hre reng mah ila huat viau nachhan tur ka nei paw'n ka la hre lo cheu. An sawi kha tak tak anih chuan fa a pai tih inhre lovin min lo ngaizawng ve tihna ania. Hre reng chunga ti ni ta se chuan ngaihdam harsa ka ti khawp ang. Tunah chuan ngaidam lo mah ila awmzia a nei chuang lo va, chuvangin ngaihdam hram tum mai teh ang, a va chauhthubarawh rilru ta em.

Nileng mai chuan ka rilruah a awm tlat mai. An inneih ni chu ka tan lungngaih thar lehna ni a lo ni a. Tinge thil sawt tawh lovah ka intihbuai reng le, ka va han pa lo tak em. Umn, pawi leh lo mai, vawiin chu vawiin a ni tawh, vawiin hi ka amah ngaihtuah tawp berna ni lo ni tawh rawh se.

******

Chutiang thil ngaihtuah reng reng chuan chhunnî ka hmang zo ta der a. Ngaihtuah loh ka tum paw'n ka ngaihtuah chhuah zel si avangin ka tum buai peih tawh lo law law. Ka ngaihtuah nasat poh leh vanduai bika inhriatna ka nei a, mahni inkhawngaihna a lo chhuak a. He nî zet hi zawng, Sêntei hlimna nî a lo nih pawhin, ka tan chuan ni rei ber leh hrehawm ber a va ni chiang tak.
Zanriah kîl tura ka nauvin min rawn koh pawhin ka riltam loh thuin ka lo chhâng mai a. Zanah pawh chuan ka tlaivar ta thak a ni.

********

School kal leh chu a tha viau na-in indim deuh ka la ngaih mai bakah exam a ni chho mai dawn si a, open-ah ka exam mai ang tiin hemi kum hi chu chawlh law law ka tum ta a ni. Kal leh thei tehreng pawh ni ila, Sêntei nena kan chanchin an hre fur si a, ka kal zak tawh hrim hrim.

Ka dam chian tak hnuah pawh chuan ka leng chhuak ngai lo va, inah ka tawm chawt a. Angie chuan kârkhatah vawikhat vel chu min la rawn tlawh tho thin. Phone pawhin ka be hmasa ngai chuang lo, mahse nikhatah vawihnih tal min rawn biak a thulh ngai chuang lo.

Class 12 board exam a lo hun chho va, ka pawl rualpui thenkhat chu ka um pha lo dawn ta, hrehawm ka ti ngei mai. A thiamthei pawl ka ni ve thin asin mawle.
Chutiang chuan ka thiante exam chu awt takin ka lo thlir deuh deuh a.
*******

Kawngka rawn kik dat datah avang chuan ka va hawng a, Angie a lo ding reng mai. Chutah min rawn kuah chung chung pah chuan, "Disctinction-ah ka pass," a rawn ti chûl a. Ka lawmpui lutuk tlat.
"I lawm tak tak chuan i lâm thei," ka ti a. A tih duh tak tak pawh ka rin loh nen, sitting room-ah chuan a lâm ta ziai ziai mai a, a zei reuh phian lehnghal. Keiin ka lo nuih vak vak am
Chutah ka bulah chuan lo thuin, "Min lawmpui em?" a ti a.
"Lawmpui lutuk tlat che. Anih khawnge i zir zawm ang?"

"Ka hre lo, zir zawm pawh ka tui tawh lo."
"Tinge'" ka lo ti vat a.

Thutak zet chunga ka mita en chungin, "Min hmangaih ve thei chuang si lo va.. Min hmangaih ve thei ngang lo a ni tiraw?" a rawn ti ta mai a!! A mittui a tling pam lehnghal.

Chhân dan tur a vang ngei mai. Boruak tha lai a tichhe zo vek alawm le.
'Hmangaih' ka tih chuan dawt ka sawi a ni dawn si. 'Hmangaih lo' han tih thlawt lah ka hreh ve si.

"Angie, hmangaih theih loh tih a la awm reng reng hleinem. Mahse ka tun dinhmunah chuan min hrethiam ta che," ka ti ringawt a.

"Ania lawm, ka hrethiam vek. Min hmangaih lo va, min khawngaih mai mai tiraw? Ka u hi i lo hmangaih em anih hi, ka hrethiam lutuk che," a ti ta a. Chhân dân ka thiam ta hauh lo mai, a sawi dik chiah si a.

"I u chu pasal nei tawh alawm anih," ka ti ta ngawt a.
"Eng pawh nise, college lut kher lo va nurse traininga awm bo daih ka duh," a ti ta. Ka rilru chhungril chuan a awm bo tak tak anih chuan khawhar rûkna riau nei dawnin ka inhre pek a, mahni hmasial zia.....

Tichuan eng engemaw kan sawi leh hnu chuan khua a tlai tawh deuh bawk a, haw a tum ta a. Tawitê ka va thlah a, hemi tum bak hi chu kan inchhung a rawn rap leh tawh ngai lo.

*********

Class 12 chu open atangin ka exam ve ta a, kan inentawn luih luih a, ka pass ve mai.
College kal ka chak viau na a, ka puin an dawr enkawltu atan min duh sia, ka hnar duh ta bik lo va. Duh leh muangchangin Ignou lamah admission ka ti tawh mai ang chu.

Angie chu nurse training tura Bangalore lama a liam tak avangin ka rin lawk ang deuh khan a khawharthlak ka ti thin vung vung hle mai. A training kum 1-naah kha chuan kar khatah vawi khat emaw hi PCO atangin min lo phone thin. Tichuan 1st Year an zawh hnu pawh chuan lo haw lovin a awm tlang a. 2nd year a zir tawp lam atang phei chuan min rawn phone ngai ta lo. Min theihnghilh a tum ve tan ta niin ka ring mai a, anih loh paw'n ngaihzawng, amah hmangaihtu, a duhzâwng tak a tawng ve ta pawh a ni maithei asin. Hmangaihtu ni hlei lo biak reng chu min ti ta deuh pawh a ni maithei e.

********
Ni a sa hle mai a, khua a lum bawk si. Awm mai mai paw'n ka thlan dep dep mai. Dawr ka kal loh ni anih avangin keimahin ka awm a. A lum em avangin pawn boruak a dai zawi ang tih beiseiin varanda-ah ka thu chhuak a.
Ka thu chhuak fel chauh tihah chuan kawtah bike a rawn inhûng thûm dat a, Sawma lo ni rengin, bike a ka sutpui kha. E taka hmanni khan lenpuiah min sawm a, ka hman remchan veleh tiin ka lo chhang ta anih kha mawle.

"Dawrah ka lo kal a, vawiin chu i chawlh thu min lo hrilh a, i nuam sam lo em ni?" a rawn ti bawrh bawrh a.
"Ka tha e, ka chawl châk ve deuh mai mai mawle, thu rawh," ka lo ti a.

"Chuti min tiam tawh bawk a kan leng thei."
"Khawiah nge i tih kha?"

"Veng thenawm lawk a ni mai, min zui la i hre mai ang."
Ka lo tiam ve tumhrang si a, phat chi ni hek lo, ka insiam sawk sawk a, a bike thar chuan kan inphur a, kan chhuak ta nghal a.

Kan tlânna kawng chu ka duh lo kher mai. Angie, Sêntei-te veng chhungah kan tlan lut tlat mai le! Chutah an in kawng lamah kan la tlan zui.

"Khawnge kan kal dawn a?" ka han tih chuan, "Kan thleng tep," a ti mai a. Ka duh lo hle mai, nunhlui min hriat chhuah tir leh ringawt alawm le.


Vanneihthlak takin Angie te in chu kan tlan pel ta hlauh e. Mahse in pali vel chauh kan tlan pel hman, a ding leh ta mai a. Engmah sawi buai tawh lovin ka zui ve mai a, nuam erawh ka ti chiah lo helaia awm hi. Lung hlui a tileng thar em mai.

Sawma chuan kawngka a han kik kauh kauh a. Nula aw hian, "Lo leng rawh u," tiin min lo chhâwn a. A aw chu ka hriat hnu a ang riau.
Kan lut fel a, chu nula hmel ka han hmu chiang chu, Masangi lo ni rengin! Hei hi an in tih ka lo hre reng reng lo va, ka kal pê ve ringawt zel kha ania.

"Awi... Hmela, induhpa," tih pah chuan min rawn chibai, kan inchibai ta lawp lawp a. Huiha... Nunhlui leh sulhnute'n liam zai reng an rel dawn lo ve.

Chanchinte kan han sawi chhoh takah chuan thianpa Sawma leh Masangi chu college atangin an inchhar hi a lo ni a. Tichuan kei hi engtin tin emaw min lo sawi chhuak nawlh a ni awm e. Sawma chuan Masangi -te inah kan leng dawn tih min hrilh duh miah lovin min lenpui hi a lo nia, an lo tum lawk ang ngeiin min barakhaih a, kan hlim zui phian lehnghal.

Mahse titi vawrh vawrh kual ta nâ chu a tawpah Sêntei chanchinah bawk an lut leh ta.
"Vawiin paw'n an pa nen an fapa nen an lo leng asin, tunah chuan a nute inah an leng aniang," a ti zui a. Chutia hnaivai takah a awm tih ka han hriat phei chuan ka lung hi a su dup dup nghalin ka hria, ka va han nêp tak.

Chutah an pahnih chuan 'Chance' pek pah ve deuhin ka tia, kuhva lei turin ka chhuahsan ta a.
Dawr ka la thleng hman lo, ka hma a min tawk tur zâwnga lo kal te chu tudang an ni tawp lo mai le! Ka hlauh lawk rûk ang ngeiin maw!.... Sêntei chuan a fapa kum 2 mi bawr vel hi pawmin a bulah chuan an pa a kal ve bawk a. Ka hmu hreh, tâwk hreh lutuk chuan pên kawina tur ka melh ruai a, remchang a awm mai si lo. Han tlan lêt leh dawn ila, min hmu vek tawh a, a rem chiah si lo. Chutia ka inngaihtuah buai chhung chuan kan lo inhnaih hle tawh a. Anmahni hlat thei lam, kawng chhak lamah chuan ka phei ta ringawt a.
Ka awmdan danglam chu Sêntei chuan a lo hrethiam khawp mai. An pa chu kheuh zeuhin amah chuan kawng rawn tan tlangin min rawn pan ta mai. Hmuh loh der chi rual a ni ta lo ve.

A hma ang tho va mawi tak khan min rawn nuih leh saih a, ka lo nuih let ve taknain ka nui chu a va lem tak em aw...Hlim nui hi ka ni lo chiang lutuk.

"I dam thin maw, i va ngaihawm em..." a rawn tih te chuan ka chhân dan pawh kha ka hre tehnuaih tawh lo ve a.
Chutah, "Kha, naute hi han pawm ve reng reng teh," min la tizui a. Ka kut te chu a khûr dawn dawnin ka hria. Ka pawm angem aw tia inngaihtuah vang vang chunga an pa ka zuk melh chuan min lo nuih var var a, chutah ka pawmsak ta nge nge a, sawi tur a va'n vâng tak. Ka tlawm vawng vawngin ka hria. Sêntei pawh chuan sawi tur a haihchham hle tih ka hre mai. Chutah nau chu pe let leh vatin ka hmanhmawh deuh thu ka hrilh a, dawr lam panin ka kalsan ta a. Kawng kawi ka thlen chuan ka han hawi let leh hram a, ani pawh chu a lo hawi let ve chiah lehnghal nui sâng chungin. Thinlaiah i va thar chiang tak em.

Ka kuhva lei zo ka let leh lam te chu tlâwm ngawih ngawihin ka inhre leh a, ka awmdan te kha mahni ka inhaw hial mai. Hemi ka lenpui bak hi chu Sawma pawh lenpui ka tum tawh lo chiang khawp mai. Rilru tihthar zel ka duh tawh lo.

********

Khatia class 12 kan zir atang kum 10 chuang zet a lo liam leh ta reng mai. Ka pute dawr pawh ka kutah tawp a awm tawh a, kei pawh an inah ka awm tawp a.

Khatih kâr kum chhung zawng khan tlang ve nafam chuan ngaihzawng pawh ka nei nual hmanin ka nun pawh ka hmang ho hle mai. Vawikhatnaa ka chêt fuh tawh loh avang khan ngaihzawngte chu ka han la lâp tawh mai mai khawp a, ka kalpah vel mai mai a ni ber a. Kan inthen leh pawhin engahmah ka ngai tawh lo, ka kir leh tawh ngai bawk lo, midang ka ngaizawng leh mai zel a ni. Sual min ti hlawm ngawt ang chu.
**********

Thingsul lama kan bungraw pe zo chu kan motor pick up chuan kan haw leh mek a. Ruah a sur duhin kawng a nâl hle mai. Kan driver hnenah chuan khalh chak vak lo tur leh fimkhur turin ka chah mawlh mawlh a.

Tuirial kan tlan pel a, Aizawl pawh kan thleng lek lek tawh. Truck pakhat hi min tâwk tur zawng chuan chak zetin a rawn tlan chhuk a, a tlan chak em avang chuan kan driver hnenah chuan ding turin ka au tuar a. Chutah, "Side lo pe mai teh," ka tih rual chuan kan driver chuan tlan chhuah a sîr deuha din tumin a han phiat ngial na a, kawng nâl lutuk avang chuan a inphiat chhuak thei ta lo. Keini motora chuang chuan engmah kan ti hman ta lo a ni. Chu truck chuan kan motor chawp chuan min lên lawp a, kawng thlangah kan lum thla a, ka nau hruai pakhat Rema chu a au tial ruai chu ka hriat tawp ber a ni ta.

Chiangkuang lo zeta ka han harh ruai ruai chuan tumah ka hmu chiang thei lo.
"A harh dawn aniang," tia tawng thawm chu ka hre na a, tunge ka hre thei lo. Ka che thei bawk si lo. Truck-in min rawn su lai tak leh kan motor nen kawngthlanga kan tlak lai kha ka hre chhuak ta uai uai a.
Ka lu hi a na em em ringawt a, a bak ka taksa na ka hre lo, nachhawknain min jection a ni maithei. Reiloteah chuan ka harh kâwk a, nurse pakhat hian ka kutah, drip khai lohna ka kut ding lamah chuan min lo chelh rân mai a. A mittui hru zauh leh a tahnuih deuh hmel ka hmuh chuan ka harh chiang lehzual kâwk mai. Chu nurse, ka kuta min lo chelh rengtu chu ka han en chian chuan tudang ni lovin 'Angie' bawk a lo ni leh ta!!!

To be contd/-
Min chhiarsak a, comment leh like te min peksak thin. Ka lawm lutuk ania.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 29th, 2017, 1:31 pm

CHAPTER - 6(Last)
A REI TA E

Chutia kum 10 tehmeuh a liam hnu, chanchin reng reng kan inhriatpawh tawh loh hnu a Angie ka hmu leh ta nawlh chuan min tiharh kawk mai. Chutah nurse uniform diktak nen lehnghal. Ka mumang a ni lo tih chu ka lu na tluk tluk atang chuan ka hre thei si.

Ka harh chiang tawlh tawlh a, thil thlen dan ka hre chhuak telh telh a. Chutah tawng chhuah ka tum lai tak chuan Angie chuan, "Rl, i tha em? Ka va lawm tak. Hahdam deuh khan awm rawh aw," lawm avanga mittui tling chung hian min rawn ti a.
"Angie, ka tha alawm," tia ka chhan lai chuan ka chauhzia ka inhre nghal a.
Angie chuan, "Nachhawkna hian ka chiu leh lawk ang che, muthilh tum la, nakinah thil awmzia ka hrilh ang che," a ti a.
Nachhawkna-in min chhawk hnu chuan tui takin ka muhil leh ta a.

Ka muhil ka han harh leh chuan ka nuam deuh huaiin ka hre tawh. Ka bula lo thu te chu ka'n en chiang a, Angie, ka nu leh ka nau an lo ni a, min ngaihtuah hmel hlawm khawp mai.

Ka bula drip leh thisen inkhai ka hmuh atang chuan thisen ka hloh hnemin, thisen hial min pe tih a lang reng mai.

Chanchin Angie'n min hrilh dan chuan, truck brake fail in kawng thlangah min hnawl a, kha chu ka la hre thei. Kan motor lum thlakna kha sang leh thui lutuk chu a ni lo nangin a hmun a khawkrawk viau a ni awm e. A sira thu ka nih avangin motor atang khan min vawrh chhuak a. Ka lu sawhin thisen a chhuah nasat lutuk avangin nikhaw hre lovin ka awm a lo ni a. Kan driver leh nau pakhat erawh hliam na tak tuarin an awm mek a. Kei erawh a vanneiah tangin ka taksa hmun dang han hliam em em a awm lo a ni awm e.

Kan veng YMA te inpunkhawmin thisen min lo pe hi a lo nia. A zahthlak ka tih rualin, mite chu pha lo mah ila, ka theih ang tawk YMA lama ka chhuah ve thinna lawmman chu ka dawng ve ta a ni. Anni awm lo se chu thisen tlachhamin ka thi thei hial ang chu. Hetah chiah hian YMA hlutzia ka hre chiang lehzual ta.

Angie chuan accident tuar zingah ka tel tih a hriat veleh a duty hun pel tawh mahse a awm tlang nghal hi a lo nia. Ka chhungte ai zawng zawng a rawn awh leh ta anih chu. Ka nau hian nikum hmasa mai khan pasal a neih avangin chhangchhiat hun lai tak a ni si a, chuvang chuan ka nu pawhin a lo phût ngam lo zawk a, Angie a lo awm leh hlauh chu kei leh ka chhungte tan chuan thil lawmawm tawpkhawk a ni ringawt.

Ka lu kak duai avang leh thisen a chhuah hnem deuh avang chuan ka chhuak thei ta lawk lo va. Chutih nakalaiin Angie hian a lo sawi nge ni, Cabin-ah min la sawn tak deuh deuh a, ward pangngaia awm ai chuan a hahdamthlak khawp mai. Mahse damdawi in hi chu ka ning ve tawk a ni.
Angie ka han zawh chian chuan Cabin-ah chuan amah vanga sawn ka lo ni tak tak a. Chhuah mai ka inbeisei tawh avang chuan ka lawm viau lo.
Mahse Angie chuan, "Chhuak chi i la ni hleinem, a hliam hi 'Dressing' that reng a ngai dawn a, motora insawh fo chi i ni lo. He laia awm hahdam hi i tan a tha ber," a ti mai a. Mahse Angie a duty phei chuan a khawharthlak thin. Ka nu a lo kal reng hman si lo, ka pa lah eng natna nge kan hriat si lohvin a tlakbuak a, a dam thei meuh si lo.

Angie a duty loh lai chuan ka bulah a tâp châwt a, a tan pawh duty tura kal leh mai a awlsam bawk thin. Kan school kal laia a tleirawl tîtuai chu awm tawh lo mah se, a puitlin hmel sawtin a hmeltha telh telh emaw tih mai tur a ni. Nurse zingah ani aia tha leh duhawm ka hmu lo, a thlirtu mit azir pawh a ni thei e.


Khatia kan inhmuh loh chhunga a chanchinte ka zawt a, min hrilh keuh keuh thin. A sawi dan chuan ngaihzawng reng reng a ngaihsak lo va, nurse anih hnu paw'n hêltu neih neuh chu a nei fo a ni awm e, mahse a lo hnar zel a, ama nu ngei pawh a chungah a lawm loh phah viau a ni awm e.

Ka chanchin ve thung erawh a bulah sawi ngam pawh a ni lo thung. Ngaihzawngte chu ka kalpah zel zul anih kha. Nimin maiah pawh hmanni lawka ka then tak nula khan min lo kan a, Angie awm loh lai a ni hlauh zawk a, haw a tum hma hmain ka haw tir sawk sawk a, lungawi vak lovin a haw ta anih kha. Angie-te ang mi thianghlim, min ngaihsaktu ni bawk si hmuhah ka duh lo, a rilru tihnatsak hi ka duh tawh lo. Chutiang avang chuan ka hmangaih ve ta em ni tia ka ngaihtuah chuan, ni chiahin ka hre chuang bawk si lo. Ka rilru tak pawh hi ka hrethiam tehnuaih tawh lo ve.

Kâr hnih dawn cabin-ah pawh chuan ka awm ta, ka ning tawh takzet mai. Mahse Angie a awm ve thin avang chuan ka nin tur angin ka ning lo chauh zawk a ni.
In lamah inenkawl tawh ta ila, Angie chu a hna avangin a rawn kal thei mang dawn lo tih ania, a awm loh chuan ka khua a har dawn bawk si, he nu tê hi a ngaihawm thar riau mai.

Zirtawpni a lo thleng a, doctor-in min rawn tlawh chuan a tûka ka chhuah theih tur thu min rawn hrilh ta a. A lawmawm rualin Angie bula ka awm thei lo tur chu ka khua a har ru veng veng mai.

Chhunah a duty âwl laiin Angie chu a rawn lut a, a chau deuh aniang, ka khum sir lamah chuan rawn mu ve-in, "Ka'n tluzâl lawk ange aw," a ti a, tui takin a muhil zui bawrh bawrh a. Ni e, nizan lamah a duty tlaivar a, a hahchawlh hun neih chhunah kei min ngaihtuah em em bawk si a, a hah ngawt ta ve ang.

A muhil hmel te chu ka han en a, pawisawi lo hliah hliah hmelpu-in ka hmu a. A sam chu dimtein ka zûtsak hliau hliau va, duhawm zawng a duhawm chiang ngei mai. Ka ngaina lutuk tawh tlat, mahse hmangaihna ni chuan ka hre chuang lo.

Zanah chuan duty a neih tak bik loh avangin ka bulah chuan a thu ve reng a. Chhun lama ka mut nasat avangin ka mut a chhuak lo kher mai, chutiang bawkin Angie pawh a mut a chhuak lo anih hmel.

Thil zawh tur ka neih ka hre chhuak thut mai.
"Angie, i training hnu atang khan tinge i reh vang vang a? In training chhuah thu te, hna i hmuh thu chenin min hrilh miah si lo va, i chanchin ka hre ngai ta reng reng hleinem," ka ti a.
"Kei chuan i chanchin hi ka hre chhunzawm reng asin."
"Engtin a?" mak ti deuhin ka ti a.

"I chanchin ngaihven hian kârtin vawikhat tal i nau ka be ziah alawm," a ti ta!
"Tinge keimah min lo biak mai thin loh a?" ka han tih chuan, "Nang chu biak ngam rualah ka ngai tawh hleinem che, i ngaihzawng neih thin chenin ka hria asin," a la ti ta deuh deuh. A va zia lo mai mai tak. Mahse min lo la ngaihtuah thin tih ka hriatnaah erawh ka lawm hle bawk si.

Chutah, "Rl, a rei ta," a rawn ti chhuak phawng mai a. Mak ti deuh hian, "Engmaw?" ka lo ti deuh hu a.
A heh a pet fan fan a, hnuailam bih chungin, "I hmangaihna hi tlem tal han dawng pha ve ila aw...," a ti vang vang a.
A zahtheih lohna ni lovin, a zah loh theihna zawng zawng a sawmkhawm a ni tih a hriat mai.
Chhân ngaihna pawh ka hre lo va, mahse thil diktak hrilh a thain ka hria.
"Angie, ka ngaina em em che a. Mahse hmangaihna awmzia diktak hi ka hrethiam tlat tawh lo a ni. Ka hmangaih che han ti ngawt ila, ka sawi sual palh thei, mahse nang aia ngainat hi ka nei lo," ka han tih chuan tlemin a hlim hmel hretin ka hria.
Chu lam kan sawi nasat chuan kan boruak a chhe dawna ka hriat avangin titi dang ka vawrh a, hlim takin dar 12 pelh hnu thleng chuan kan meng dun a.

*********

THINLAIA'N MAW I HLUI MAWLH LO

Kum 1 zet a vei leh thleng pawh chuan ngaihzawng lam ka buaipui peih tawh lo va. Mobile phone te a lo chhuak a, kan neih ve tak avangin Angie nen chuan kan inbe reng thin. Min sawm a min phût viau thin naa, an inah chuan len phei chu ka leng chhin lo reng reng. A u Sêntei chanchin a sawi ngai lo va, keipaw'n ka zawt ngai hek lo, hriat pawh ka hre chhuak ngai tawh lo zawk a ni.

September thla a ni a, ruah a sur nasa mai. Tukverh ruahin a rawn theh chu ka khar lai takin ka phone a lo ri a. Ka han en chuan Angie hnen atangin a ni. Ka han chhân chuan ka rin loh deuhin a nu âw zawk a ni tlat mai. Angie khawsikpuiin a man thut thu leh keimah min hrilh ve tura a tih thu a rawn sawi a. A dam lo tih ka han hriat chuan min nghawr ve dawt mai.

Hmanhmawh taka insiamin taxi ka la a, damdawi in lam pan chuan kan tlan ta vang vang a.
Damdawi in kan thlen chuan a awmna bul corridor-ah a chhungte ho an lo awm thap a. An hmel atang chuan an mangang ru hle tih ka hre mai. Tichuan engmah sawi lovin an bulah chuan ka thu ve ta ran a.

Zan thleng pawh chuan a la harh thei lo va. A nu min hrilh dan chuan a tawngvai bual bual a, ka hming a lo lam ri fo a ni awm e. Haw tawh tura min tih pawh chuan ka haw duh bik lo va, ka ba zawng zawng kha ka rulh lêt ve a ngai a ni tih ka hria. Chubakah hawsan pawh ni ila ka awm a nuam dawn chuang lo, Angie ngaihtuah reng rengin ka awm dawn tho tih ka hria. Chuvang chuan pawn lamah ka va inhnawh puar a. Chutah lêt lehin min phalsak angin ka lut leh a, corridor-ah chuan ka thu tlaivar ve ta thak a.

Nihnih hnu-ah chuan Angie khawsik pawh chu a ziaawm ve ta hret a. A nu a awm avang leh a buaipui thiam zawk avangin ka riak ve lo va, mahse tlawh chu ka tlawh âwl lo thung.

Chutianga thla 1 lai a awm hnu chuan doctorte'n in lama inenkawl tawh turin an ti ta a. A khawsik zawng a reh tawh na a, a hmel ka han en chuan ka lung hi a awi thei mawlh lo a ni. Pathian pawh hian engatinge hetiang mifel leh a Thu awihtu chungah kut a thlak duh mai le tiin Pathian pawh chu ka dem rum rum mai. Ni e, a lungawi thlak mawlh lo a ni. Pneumonia chuan a heh sen vâm ham mai thin chu a tiro vek a, a duk deuh cher a. A hmui chu a pawt sâwi vek a ni mai, hmuh hrehawm tak a ni ringawt. A kê lah kebai ang maiin a pên a, a kal zei lo kher mai, piangsual a ni ringawt tawh, ka va han lungawi lo tak em... A nu pawh chuan a khawngaih lutuk chu a mittui a rukin a hru zauh zauh reng a, a hmuh turah erawh chuan hlim hmel takin a awm tlat thung.


Damdawi in atanga chhuakin in lamah an inenkawl ta si a, in lamah va tlawh lo thei lo ka ni bawk si, 'Ka kal tawh miah lovang' ka lo tih ve pâng pâng pawh kha ka bawhchhiat a ngai dawn ta a ni.

Zanriah chaw ei kham veleh chuan ka inkhalh chhuak nghal a. Angie-te in ka thlen chuan tlawhtu pawh a lo nei nual a. Khati khawpa nula hmeltha thin khan a hmui sâwi avang chuan tilang ngam lovin a lo tuam a, ka khawngaih takzet a ni.

Damdawi in chhuak tlawhtu an haw fel ta a. A nu chuan dawrah min chhuahsan lawk avangin Angie bulah chuan ka va thu phei a. Ka va thut hnaih veleh chuan a mittui hi a far nghal zung zung a. Chutah chuan alawm, keimaha Angie khawngaihna leh lainatna thin zawng zawng kha hmangaihnaah a inlet zo ta. Keimaha hmangaihna lo inthup reng thin, ka hriatthiam phak loh kha a dam lohna avang chuan kaithawhin a lo awm ta zawk a ni.

Angie chu kuah pahin, "Angie, bawihte, ka hmangaih che asin," ka ti ta a. Chu thu ka han sawi chu a mittui hru faiin min rawn en hau mai.
"Rl, inhmuhsitah pawh chintawk a awm ania," a rawn ti ta!
"Hmuhsit a!? Ka ti tak tak alawm Angie, ka hmangaih lutuk che," ka ti leh a.

Chu thu ka han sawi nawn leh ka titak hmel a han hmuh chuan chhuak em emin a tap ta hawm hawm a. Thlem ngaihna ka hre lo, dimtein a lu ka chûlsak heuh heuh ringawt a.
Chutah, "Rl, a tlai zo tawh anih hi. Piangsual i ngaihzawn chuan miin an hmusit lutuk ang che. Ka bula i awm duh anih paw'n thian ang chauhin min en rawh," lungchhe takin a ti a.

Chutia piangsual niawm hiala a insawi chuan ka rilru a dek zak mai! Chutah chuan keimahah thinrimnate, tumruhnate, huaisenna leh hmangaihnate nasa takin a lo awm ta.

"Ngawi tak rawh, Angie, han dam chiang deuh la, palai ka rawn tir ang. Tumah hian an hmusit ngai lovang che," tiin ka kuah vawng vawng a.
Chutah zet zawng, "A ni thei lo," tiin a hma aia uar zawkin a tap leh ta a. A tap a bân hnu chuan, "Rl, i ti tak tak lo tiraw?" a la rawn ti ta cheu va.
"Angie, sawi tawh suh, ka ti tak tak, han awm dam deuh la, palai ka rawn tir dawn," ka ti ta tlat a.

Chutihlai chuan a nu dawr kal chu a lo haw a. Dar 10 a pelh tawh avang chuan haw tumin ka ding ta a. Angie chu a kal that theih loh avangin awmhmun atang chuan min mangtha a. Kawngkaa chhuah dawn pah chuan a nu hnenah, "Ka nu, Angie hi han dam chiang deuh se la, palai ka rawn tir dawn e," ka ti chhuak ta phawng a.
Angie nu chuan engmah a sawi lo. Mahse a mittui chu a far zung zung a, engmah sawi tawh lovin ka hawsan ta a.

In ka thlen veleh chuan ka pu chu ka hrilh nghal a. Ka pu chu a inngaihtuah nasa ngang mai. Piangsual tawh min neih tir ngawt chu a ngaingam bik lo pawh aniang, a demawm loh khawpin ka hria. Mahse, ka tih tumah ka chiang a, phal lo pawih ni se ka tum lui thovang. Kha chen, ka chhiat lai ber pawha min lo hmangaihtu kha ka phatsan bik ang maw! Hnai lo mai.

"I duh a tha i tih phawt te chuan naktuk lamah i pate pawh ka lo râwn ve dawn nia," a ti ta hlauh a, ka lawm hle mai.

******

Ka pa natna chu an hmuhchhuah theih mai loh avangin phai lamah an 'Refer' a. Chumi anih avang chuan Kolkatta lamah a tûk maia kan liam thlak a ngai dawn ta.

Zanah Angie-te inah leng lehin kan tum dan te chu ka hrilh a. Ka kal bo dawn avang chuan hrehawm a ti hmel ve hlein ka hria. Amah Angie chu ka han en chiang a, a hmui sâwi pawh chu tlemin a lo ziaawm tawh. A nerve tha lo lehzel avangin a hmui chu a lo inpawt sâwi a lo nia, doctor-te chuan hun a kal deuh hunah chuan dam vek thei turah an ngai. Dam thei lo tehreng pawh ni se ka nei tho thovang. A taksa chu ka hmangaih chhan a ni lo, a thinlung thatna zawk kha a ni.

******

Doctor-te thurâwn ang ngei chuan Kolkatta damdawi in lian Apollo Gleneagles-ah chuan kan lut ta a. Enkawl dan chi hrang hranga an enkawl hnu chuan ka pa chu thlîng lam tha lo tih an hmu chhuak a. Inenkawlna tur sum pawh a hautak dawn hle mai.

Damdawi in kawta an siam thutna-ah chuan thuin ka inngaihtuah vang vang a, a manganthlak duh angreng hle mai. Palai tirh kan sawi a, rem min tihpui vek tawh hnuah dam lohna avangin heti hian kan awm leh ta si a. Hei kâr hnih lai chu a ni leh ta, kâr khat tal kan la awm chu a ngaih hmel si. Mahse lawmna tak mai ka neih chu Angie'n a dam zel thu leh a hmui pawh a pangngai lek lek tawh thu min hrilh chu a ni, ka ngai veng veng kher mai.

Ka phone biha ka kûn ngar ngar lai chuan ka bul lawk atang chuan ka hming ngei maiin min rawn ko ta! Ka phu deuh zawk mai. Hetiang mi ramah lehnghal hmelhriat an awm ve mial maw!

Ka han hawi chhuah chuan ka rin loh lutuk mai chu ka hmu ta, Sêntei ngei mai chu ka hmaah dingin min nuih ver ver a. Chutah ka dan rual lohvin ka thinlung chuan hun kal ta koh kir leh tumin a lo inhâi lêt buan buan a. Sêntei chu lo chhân nachang pawh ka hre lo.

"Rl, min hre nange?" tih pah chuan nui sâng chung chuan min rawn pan a. In chibai nana a kut a rawn lek chhuah chiah chuan ka harhfim ve chauh.

Chanchinte kan inhrilh tawn a, ka chanchin ka sawi zawh chuan min han hrilh ve ta a. Khatia a nute venga kan inhmuh hnuhnun ber hnu lawk khan a pasalin a lo boralsan a. Pasal a sûn atanga kum 1 hnu velah hna tha tak an 'Offer' avangin Kolkata-ah a la awm ta char char a, tunah phei chuan a fapa nen mi in luahin a awm ta hi a lo nia.

Chuta chinah chuan ka pa chu nâ, khawsik tluk tluk anih loh avangin hna a thawh loh karah Sêntei in luahah chuan ka kal ta zeuh zeuh a. A hmel lah chu a hma aiin a tha zawk daih ta lehnghal a. Nuthlawi/hmeithai lo ni tawh mah se ka thinlungah hian a lo la hlui loh zia leh a la thih loh zia ka hmu chiang ta telh telh a, thil a tibuaithlak khawlo zo leh ta vek mai le!

*******

A TEL LO CHUAN

Ka pa damdawi in atanga a chhuah hma chiah zanah chuan Sêntei chu ka pa rawn tlawh turin a lo kal a. Thawktu hmelhriat a lo neih nual tawh avangin a rawn lût tlang thei mai a. Tichuan pâwn lamah inkawm turin damdawi in chu kan chhuahsan ta a.

Arsi-te chu an pe êng uarh a. Sawi tur kan vân dunin hmanlai ka chhui kir vawng vawng a, ani pawh chuti tho chu anih ka ring. Rei fe kan ngawih hnu chuan, "Naktukah in haw mai dawn sia," a rawn ti ringawt a.
"Ni e," ka lo ti ringawt a.
Chutah, "I ngaihawm dawn hle mai," a ti ta a. Ngaihthlak hrehawm tak chu a ni mawlh lo.
"Nang deuh alawm ngaihawm dawn le," ka ti ve leh a.

Kan han ngawi dûn leh vang vang a. Chutah, "Taka, Sênte, pasal neih leh i tum tawh lo em ni?" ka ti a.

A ngawih vang vang hnu chuan, "Ka hmangaih ber ka nei thei ta si lo va, neih leh tumna pawh ka nei tawh lo," a ti ta a.
Chutah, "Pasal ka nei ta kha ka tum rêng vang a ni lo tak tak asin. Khati kha kan lo ni palh ta hlauh sia, fate tih fahrah aiah tiin ka nei ta anih kha," a ti a, a tihtak hmelin a lunglen hmel hle mai.

Chutah, "Mipa pakhat chiah hmangaih ka nei a, chu chu nangmah i ni asin. Zakthei lo min ti maithei, tunah hian nangin min la pawm duh la chu pasal ka nei leh thei dawn tihna a ni mai, midang chu neih ka tum lo," inthlahrung tak chung hian a ti a, ngaihtuahna a tibuai ta mup mup mai le! Fa a lo neih tawh avang hian ka iai lo nasa lutuk. Ka inngaihtuah thui hman em em mai bawk a.

Mahse, Angie dam lo na tuar hmel leh hmangaih taka min tuam hlawm thintu hmel ka mitthla-ah a rawn lan meuh chuan ka rilru insual buai mek chu mei thelh mih ang maiin a reh ta duk a. Ka thinlung pawh a hmun ngaiah a rawn kir leh ta.

"Sênte, a rem tawh lo a ni e, hmangaih ka nei ve tawh asin," ka han tih chuan Sêntei chu a hawi phâwk hle mai.

"Tunge ka hriat ve a rem em?" inthlahrung âw taka a han tih chuan, "Aw, rem e, i la hre vat tho dawn a. Englai pawha min phatsan lo va min hmangaihtu, ka dam loh nikhuaa min thlahthlam ngai miah lo tu i nau Angie nen kan inhual tawh asin," ka han tih leh chuan mak tih hmel deuh, ka hau hian min en a.

"I ti tak tak em ni Rl!?"
"Ti tak tak e."

"A piangsual tawh chung paw'n i nei ang maw!?" Mak a tih hmel takzet.
"Tehreng mai. Ka chhiat ber lai paw'n min hmangaih a, min hnualsuat bik hleinem, keipaw'n ka hmangaih asin, a tello chuan ka nun hian awmzia a nei tawh lovang," ka ti ta a.
Chutah mittui parawl deuh kiang chungin, "Ka va'n lawmpui tak em. Ka thinlung zawng zawngin ka lawmpui che u, Rl, i va'n fel tak.." min ti a. A thîk miah lo va a lawmpui takzet zawk tih ka hmuh chuan kei pawh ka lawm hle mai. Tichuan duhsakna inhlan tawn chungin kan inmangtha ta a.

*********

Aizawl khaw chhung kan tlan luh tan te chuan ka phûr kher mai, ka helhhawlh takzet a ni. Ka pa hmel nung sar mai ka hmuh phei chuan ka hlim lehzual a. Chu ai bera min tihlim-tu chu ka pa-in kan thlen zan la la a palai tirh a tum thu a sawi chu a ni.

Dam taka in kan thlen veleh chuan Angie ka phone a. Kan thlen tawh thu leh zan lama ka pa-in palai tirh a tum thu chu ka hrilh a. A hlim nui ri te chu a ngaihnawm kher mai.

Tichuan zan a lo thlen chuan a nuamah pawh, a hrehawmah pawh ka tihpui turin phûr takin palai chu kan tîr ta a. Hei hi ka hre chhuak ta. Hmangaih ber chu an hlu ngei mai. Kan inhmangaih tawn anih ngat phei chuan a hlu lehzual. Mahse ka hmangaih berin min hmangaih ve lo ta se, chu ai chuan ka lo hmangaih nghal mai lo anih pawhin min hmangaihtu tluka hlu he khawvelah an awm lo tih hi a ni.

Angie ka hmangaihna dan pawh chu ka la hrethiam chiang lutuk lo na a, a dam leh anga, hmangaih takin min enkawl dawn. A dam hlen lo va, taksa piangsual mai a ni zui ta anih pawhin ka phatsan ngai lovang a, a kiangah ka awm zel ang a, ani paw'n min phatsan ngai lovang.

Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/

A TAWP TA
(He story hi a 'Cool' mah mahin ka hria, ngaihnawm in ti lovang tih ka hlau va, hei tlemin ka pawt chhe ta. In comment erawh hriat chu ka chak viau mai).
MIN LO CHHIARSAK THIN A, KA LAWM THIN LUTUK ANIA.

COMING UP------ YOU ARE SAVED IN MY HEART
A hun erawh ka sawi chiang thei lo.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)