FUR RUAHTUI KARA HMANGAIHNA By: Ar EL

Moderator: Ar eL' Khawlhring

Ar eL' Khawlhring
Posts: 75
Joined: December 28th, 2016, 1:46 pm

FUR RUAHTUI KARA HMANGAIHNA By: Ar EL

Unread post by Ar eL' Khawlhring » November 2nd, 2017, 10:07 am

FUR RUAHTUI KARA HMANGAIHNA
By: Ar EL
--------------------
Kha, fur ruahtui han hân ta duk, min hrethiam duh lo fe chunga a rawn tlâk nawn leh zan tak kha kan inhmangaihna par chhuah zan chu a ni.
Engvang nge maw chung khuanu pawh hian fûr lai kherin kan kara hmangaihna hi a pâr chhuahtir kher kher le...!!
******

Facebook-a group hrang hrangah ka lut lâwr a, Mizo nula bawp sei thlalak group chu ka en duh phian. Chutia ka keu lawr mai mai lai chuan inbox-ah message a lo thleng a. Ka han en nghal vat a;
.
"Fb hi khawih dan ka thiam lo lutuk, ka khawih ţanna a la rei lo bawk sia, min lo pui teh," tih hi a lo nia.
"Enge i harsatna, eng browser nge i hman?" Chutih pah chuan a profile picture chu ka han en nghal a. Chhe lo phian mai a!
.
"FACEBOOK browser pangngai tawp ka hmang."
"Enge i buaina ber?" tih pah chuan a pp dang chu ka han check chhunzawm nghal zat a. Chutah a han sawi chho va, mutual friend chungchangte, thlalak tag dan...adt..
.
Ka han hrilhfiah chho malh malh a, hriatthiam nghal mai loh a neih te pawh dawhthei takin ka hrilh zel a, ka phûr viau mai. Min reply leh hmain a thlalak dang dang lo en kual leh a, ka meng 'Tawka' hru tawh mai. A profile name ka han en chiang leh a, 'Gene.........' a lo ni a.
.
"Tinge kei kher min lo râwn a!?" ka han ti a.
"Midang chu ka râwn hreh alawm, ka zak a, ka thil rawn zawh che hi midang bulah sawi suh aw" a rawn ti a.
.
Ngaihtuah tham a awm ve tlat. Kei a hmelhriat sa pawh ni bik hlei lo hi tinge min râwn ngam bik! Lawm tur a ni chiah em? Ka hmel hi a rinawm viau zawk nge mawni le...? A, a lawmawm lamah ngai phawt teh ang. Tichuan eng engemaw sawiin leh veng hming te inhrilh-in dar 1 dawn chu kan thleng ve der mai a. Ehe! Ka post siam tur ka lo theihnghilh hmak mai le... Pawi kher mai a, pawi leh lo ve. Zanin chu a nuam vei reuh em anih kha.
.
A zan lehah chuan thil pawimawh avangin ka haw hma hman lo va. Dar 11 vel, in ka thlen veleha ka han online chuan ka han bih dek dek a, a lo la hring kiau mai. Ka phûr phah leh deuh sawt.
.
"I la meng a ni maw?" tih hi ka va thawn a.
"Aw, ka lo nghak che a."
Ahaaii..a va nuam reuh e, nge ni min bawl a tum khanglang zawk emaw ni le?
.
"Awihawm lem loh e, chhas nen in inbia a ni maw?"
"Teuh lo, sas ka nei ngai lo."
.
"Tinge?"
"Ka nuin neih a phal lo va."
.
Chuta a han sawifiah chuan Bsc a zawh hnuah zirlai rei tak engemaw buaina avanga a chawlhsan thu te, a nuin zir zawm tura a tih avanga ngaihzawng neih a phal loh thu te chu min hrilh a. Keimaha a ruka beiseina lo awm ve ringawt kha Chite lui mawnga pêt liam thlak ang vawn vawn a ni ta. Kan inbe ţan dek dek a, ka hnual nghal rawih mai.
.
Mahse a zan lehah pawh thil min rawn zawt leh a. Mizorama fb a rawn chhuah tirh deuhthaw atanga khawih ve ka ni bawk a, a harsatna tawh chu ka tawn hnu deuh vek anih avangin ka hrilh thei ve zel mai a. Chutah kan inbe chhunzawm a, kan inbiak zawh meuh chuan online hi an lo awm meuh tawh lo.
.
Chutiang chuan hunawl apiangah hian kan inbia a, hmel tak inhmu si lovin thla 2 dawn lai chu kan inbe ta. Zanah lah kan inbiak zawh a kan han mut ve meuh hi chuan dâr tlemtê hi a lo ri hman ziah.
.
Zan khat chu ka beisei loh deuhin 'Live' a inhmuh a chak thu min rawn hrilh tehmial a. Ka phûr hle mai. Mahse chhun hun awl ţha ka nei lo va, zanah han ti dawn ila, ruah a sur nasa thin si, kan veng a inhlatin kawng chhiatzia an sawi nasa si. Chutah a nuin ngaihzawng neih a phal lo anih chuan ka leng thei lo emaw a ni anga, a buaithlak hmel hle mai.
.
Chutah kan inhmuh theih hlauh takin tih thu-ah, "Thlalak inthawn lawk ang, tuna kan awm mek dan thlalak," ka ti a. Ka tih nachhan tak pawh, min hai mai mai a nih ka hlauhthawn thut vang a ni.
Tichuan a awmhmun thlalak chu min rawn thawn a, fb ami aiin a chhe lo emaw tih mai tur a ni. Chutah min han dil ve khauh a, ka han selfie ve sawk sawk a, ka thawn ve ta nghal a.
.
Reiloteah a message a lo thleng a, "Kei chuan hmelah hian ka en lem lo va," tih a lo nia, a va lawmawm lem loh tak, ka lo inlak chhiat loh ve nen.
.
*******
Ni thum lai mai ruah a sur ta lo va, mual min liamsan ta te pawh a ni'ang e.
Hetia ruaha sur loh lai hi inhmuh a remchan lai anih vei nen, hun remchang a nei thei chuang lo va. Mahse ruah sur loh zan 3-na zan dar 8 velah chuan a chhuah lawk theih tur thu a rawn sawi ta.
.
Phur tak maiin ka insiam a, uluk takin ka inchei a. Ka nau fair&lovely ngei mai chu hman sakin ka han inhnawih paw ve deuh phak a, ţan a na teh e.
Dar 8:30 vel chuan scooty la chhuakin ka tlan ta nghal a. Thui pawh ka la tlan hman lo, ruah mal lian fe fe hi a rawn tla ţan ta. Rain coat ka keng si lo, kawng sirah ka han ding zawk a. Mahse a tlai chhe mai dawn. Amah hmu lo va let leh chu ka tum lo nasa mai.
.
Chutah ka han tlan leh ta a. Kan veng a inhlat avangin lai leh laiah, kawng chanvea inhmuh kan intiam a. Dar 9 a pelh hnu chuan kan sawi hmunah tak, ruah hmi seng seng karah ka ding reng tawh.
.
Kan han in phone a, "Ka awm tawh ania," a rawn ti ta. Keiin, "Ka awm tawh," ka ti bawk si. Kan inhmu der bawk si lo. Inhmuh hma hma aţangin, "I va mawl tak e aw," kan inti deuh chhen tawh. Lo awm mai rawh min tihna hmunah chuan ka tlan thleng leh ta a, a lo la thleng ve chuang lo. Mahse reiloteah scooty rawn eng vat vat ka hmu a, chutah ngei chuan a rawn chuang a, rawlthar pakhatin a rawn phur zui.
.
Ruahin a nan ve lo nge ni, a rawn chhe lo hle mai. Thlalaka ka hmuh ai chuan a takah a tha fe zawk. Kei lah arte tui tla ang chiapin ka thleng ve hram a, ka huh pheng mai bawk si, ka fair&lovely inhnawih lah ţum danga ka inhnawih ka chet fuh loh ang bawk a ni leh ta. Ruah khan a nan, ka hmai ka lo nuai ve bawk si, lovely ka nuai bo zo va, fair chiah ka chang ta, ka fair tawh ţiah ţiah khawp mai. Chutah rawn chhukin scooty rawn khalhtu chu a kal tir a, dar 10:30 a lam leh turin a ti a, kan inhmuh rei loh hmel khawp mai. Tunah dar 10 a ri der tawh a, kan inzawng kual rei deuh a ni.
.
Sawi tur haihchham dun angreng takin kan han ţhu dun ren rawn a. Hun lah chu kan nei tlem nasa si. Chutah, "Tunge a rawn thlahtu che kha?" ka han ti a.
"Kan ţhenawm nau anih kha, ka driver," tih pahin a nui sak a.
.
"I chhunge bulah engtin nge chhuanlam i siam?"
"Ka pute inah chaw kan ei a, ka thiannu damlo tlawh zawk tur angin ka rawn chhuak."
.
Tlemin ka han thut hnaih deuh a. Kuah tuma ka ban ka han tihchêt lai takin khawpui a rawn ri dur dur a, ruah a rawn ri ta hum hum mai. Hmanhmawh zetin mi varanda lam panin kan tlan a, kan thlen chuan kan huh deuh hnuang hman tho.
.
Dar 10:30 a haw tum kha an ni na a, malsawm ruah avang chuan haw thei lovin a awm phah a, ka tan chuan a tihchi zek. Mahse mi varanda current êng hnuaiah awm heki le, a sexy lo khawp mai.
.
A nauvin a rawn lam leh chuan 11:30 vel niin ruah a bang ta bawk a. Pahnih an ni tho tiin, "Min rawn thlah r'u, kan in pawh rawn hre ve hrim hrim ula," ka ti a, an hnial lem lo va. Chutah amah Genei chu ka phur a, a nau hruai chu amahin a tlan a. Chutah a zankhatna leh a vawikhat nan kawng chhe nâl laiah chuan ka han tlukpui ta hram a.
.
A chhungte bulah chhuanlam a siam fuh cher cher bawk aniang, thlamuang takin zing lam dar 1 velah chuan an haw ta a. Vawikhat inhmuhnaah chuan a lungawithlak thawkhat e.
.
Chutia kan inhmu ta chu kan invei dun ta riau mai. Inhmuh leh hi kan chak dun thei em em a. Chhunah len nan hunawl ka nei si lo. Zanah lah a chhuak thei bik si lo, an inah lah len chi si loh, buaithlak tak a ni.
.
Inhmuh tum leh inhmu chak ta nangiang chu le, tihdan phei chu a awm mai. Zanah a chhungte bula dawt sawi keuh, a bâk tihdan tur a vâng tlat.
Mahse buaithlak ta chu a chhuanlam khan hla tak a thleng thei lo. Hla lo tea a ţhiannu kha a chhuanlam ţha ber chu a ni mai. An in hlatah chuan a kal thiang lo, hmeichhia a ni sia.
.
Ka hmu chak ve tawh bawk a, ruahsur tla phuar phuar hnuaiah chuan ka han inkhalh chhuak leh bap bap a. An veng ţhenawm ka thlen aţanga kawng chhiat dan chu buru tak a ni ringawt. Rei deuh fe ka han tawlh deuh piat piat hnu chuan ka thleng ve mai.
.
A lo awmna tur a sawi ka'n hre fuh lo lehpek a, kan han inzawng leh zak zak phawt a, hun a neih tlem vei nen.
Kan han inhmu a, 'Mawl' kan han inti hmasa leh te te a. Chutah an in hlat si lo, awmna tur ţhaa a hriat chhunah chuan kan han kal ngei a. A fianrial ţhat hmel angreng chuan ka hria. Mahse le, minute 5 kan ţhu chauh tih chuan kan awmna bul chiah chu kawng tih ka hre ta. Motor a rawn êng vu vu a, min chhun pha zel lehnghal, a sesy lo thei ania. Reiloteah ruah a rawn sur leh a, mi hulhliap êng ţha kelhkawlhah bawk tlanchhiat a ngai leh ta.
.
Chutiang reng reng chuan zanthum vel chu kan awm. 'Chance' ţawih zet zet kan nei ve. Hmun dang hre hek lo le, an in aţanga hnaivai a ngai bawk si, a nu-in a rawn phone chuan haw nghal vat theihna remchang kha a ngai sia, a ţhiante inah lah a tihchi chiah bawk si loh, a hahthlak teh e.
.
Ka haw lam kawng nâl chu thuhran, a chhiat dan hi a turu em avangin zan thim lo ni bawk nen, ka tlu haw leh nge nge ţhin, dettol a hek khawp mai. Ka tlukna a diak deuh phei chuan zan dar 12 velah peih lo tâwka inbual a la ngai zui. Hnathawh thawmhnaw nena chhuahna chi a ni.
.
Mahse a mi ngaih a zual a ni tehchek ang chu, min rawn phone a, a nu hnena ngaihzawng a neih a hrilh mai tur thu min rawn hrilh a. A pa hi an bulah a awm loh avangin a nu leh a pite nen an ni mai a. Mahse a nu a hrilh ngam lawk ta si lo, thlakhat chu a liam der mai.
.
Ka tlu zing bawk si, silawng, ning bawk si chuan, "Lo leng ve tawh mai rawh," te hi ka'n ti leh ngawt ţhin. Amahin chhuak ngam der hek lo le, zankhat chu a sikuti a nau a rawn khalh tir leh a hlawh neiin, an rawn lang ve hlawl a. Mahse midang rawn hruai nei ta chu, kan che 'Fair' thei ania.
.
Ka ngai a, min ngai bawk a, chhun ka hunawl neih ve chhunah pawh hruaitu neiin a lo len ve kha. Hlim zawng kan hlim dun ve chiang alawm.
Nia, kan hlim, kan hlim lutuk. Hemi chhung hun tlêm leh tawitea kan hun hman hi midang tan thil ho tak tur ni mah se, ka tan chuan chatuana thar leh tur nunhlui a ni ngei ang.
*********
Khua a ţha nileng, ka leng thei dawn chiang. Ka phûr khawp mai, a nu a lo dil vei thlap bawk si, nuam dawn teh e...
Tlai dar 4 vel a rik a kawlkil lam ka han melh meuh chuan khua a lo dur leh ta khuih khuih mai le! Mahse chu ai mah chuan ka hmel a dur zawkin ka ring. 'Aw Lalpa, i ti buaithlak thei eee.'

Motor chung khuh nei chi awh a na thin ngei mai. Ka lo tiam tawh angin ka len ngei chu a ngai dawn si a. Chhuanlam ka siam zauh zauh a, a nuam bik miah lo. Hlauh ang ngeiin phuba la ni awm hrimin thinrim hmel zet hian a rawn sur leh tak tak ta. Min ti hnual vek alawm le.
.
Hmn, rain coat thar ka neih kha maw.... Ka chhuak lui khawp ang, ka va tlu tawh kher awm lo, kum 10 chuang two wheeler khalh ve tawh si hi tinge ka tluk bik chhen...
.
Fimkhur tak chuan ka chhuak a. Chu fur ruah zet chuan min sawisa rethei phei leh bap bap hle mai. He fûr ruah zet hi chu aw, a hân hleithei lo, mihur kekawrtê ang mai a ni, a tla reng mai.Vawi engemaw zat ka din phah.
He kawng zet hi chu metal road a hming chuan a ni ve si, bawng kawngţum ni awm zawka mawi alawm a nih le. Ramhuai an hmu ţhin an tihna hmun tlan pelh ngai ziah bawk si.
.
Hah hnepin tlu lovin an in piah chu ka thleng ta hram a, ka thaw huai mai. Ruah lahin min hmusit ni awm fahranin, ka nan kim lo palh ang ti ni awm tak hian, hnuaichhiah hmel tawkin min la nan tluk tluk bawk a.
.

Inchhung ka lut anga, a nu ka hmachhawn dawn si, chuvang chuan theihtawpa intih zahawm thiam leh nelawm taka lan thiam a ngai dawn a ni tih ka ngaihtuah mek lai chuan step nâl rap pialin ka tawlh zawt a, an in kawt chu ka thleng fel der mai. Ka dâr leh khûp thip dan atang chuan a pilh tih ka hrethiam nghal mai a, ka kâwng leh ka ngal han nat dan chu(h). Ka han kal tur chu ka ke ka bilh tih ka hre zui bawk a, a va han 'Hit' lo ve chai chai tak em.
.
Bai suih suih chungin kawngka ka kik a, a nu ngei mai chuan kawngka rawn hawngin a tarmit chung atang chuan min han melh vang vang a, "Lo lut rawh," a ti ta nge nge a.
.
Amah Gene chuan a nu vengthawng deuh chung chuan min lo nuih sang a. Tichuan hlim tak chuan kan inkawm chho na a, a nu chuan a palang chung aţanga min rawn melh leh rulh ţhin han hmuh chuan awm a tinuam lo.
.

Dar 10 a rik chuan a nu chu a mu ta hlauh a. Tichuan inţhuthnaihin biahthu di chu kan inhlan mawlh mawlh a. Thawm a rawn ri rak a, hmanhmawh zetin a sir ve veah kan ţhu hman hram.
.
A nu chu rawn tho lehin chawhmeh ţhing a rawn chhuang leh... A va ţul lo tak, nichin lawkah a chhuang tawh a, ka hmu reng sia....
.
Keini Genei nen lah inbe chuang lovin a nu chawhmeh chhuang chu kan nghak ngar ngar a. A tawpa tawpah chuan a so ta, kan thaw huai mai. A mu leh nghal mai dawn emaw tih nakalaiin Agape chanchinbu la chhuakin a chhiar khawmuang leh, Genei nen chuan kan in 'Signal' a kan nui tawp.
.
Chutah a nu vek chuan a palang chunglam aţang bawk chuan sana chu a han melh rulh a, chutah min han melh leh rulh a, awm hi a nuam thei tawh lo reng reng ringawt. Ka tih theih awmchhun chu haw a ni mai. Zum leh hriam karah an in ka thleng a, ka tawrh nasat vei nen chu zawng chu ka chan a ni tih ka ngaihtuah chhuah phei chuan ka thinrim, ka rilru na bawk si chuan, 'Ka leng tawh malek ang,' ka ti rilru ţhuai ţhuai a.
.
Haw kawngah lah a chhe zualpui ka pelh dawn chiahin ka han tlu leh hram a, ka khup pilh sa chu ka han 'Confirm' leh sak anih kha. Tlangval a pumpa mah ni ila e, ţah a chhuah duh zia mai chu.
******

Genei chuan zan leha leng tura min han sawm leh pawh chuan aw ka pawh duh ta rih lo.
Hemi atanga kar 1 a liam leh chuan message-in min ngaih thu min rawn hrilh leh keuh keuh a, kei lahin ngai bawk. Ruah pawh a hmi seng seng chauh a, a hmaa a nu chetdan kha chu hmangaihna thinlung pu chungin ka theihnghilh leh mai tawh.
.
Rain coat ka ha sauh sauh a, tlûkna ngaia tlûk tum tawh lo tak chungin ka inkhalh chhuak leh bauh bauh a. Ruah a sur nasat loh avangin minute 45 velah chuan tlu lovin ka thleng ve ta hram a.
.
Ka len hmasak ang lo takin a nu pawh chuan min lo be ve surh surh tawh. Umn, zanin chu a fuh tawh dawn e,.. Ka khi deuh sung mai.
A nuin tv a en lai chuan a sir kilah zawi te tea ţawngin kan lo hlim ve em em a. Dar 10 a rik chuan a nu chuan mut a tum thu leh hlim deuha inkawm turin min ti a, mut pindan lamah min luhsan ta a. Kan lawm lutuk chu kan 'Hallelui' lo chauh a ni e.
.
Mahse kan hlim dawn chauh emaw tih laiin ani Genei, ka laka zêp nei ta lem lo chuan a inbox min han entir chuan ka lawm vak tlat lo. A hmelin a zir bawk a, a lo luck mah mah chu a ni. Mipa-in an biaknate ka chhiar a, ani chuan a rul tawk, beiseiawm si loh, a mawi tawk chauhin chhang let mahse kei thikthu chhe lutuk 'Mood' chu a 'Off' hmak.
.
Chuta ka lungawi lo min thlem tuma min rawn ţhut hnaih a, min han nghen lai tak mai chuan a nu chu thawm nei hlek lovin pindan aţang chuan a lo chhuak leh hlawl mai, kan va han che lai dun tak. A rawn meng kal rulh rulh a, a vei tau deuh nghut nghut bawk a. Nichin lawka thingpui in si khan thingpui a rawn siam leh ringawt, a heh awm mange ka ti...
.
Lungawi lohna a thuahhnih tlat, haw a ngai. Ka haw tur thu ka'n sawi chuan Genei min chhan hma hmain a nu chuan, "A la hma alawm," lem zet hian a rawn tizui a, ngeiawm mai mai chuan. Engmah sawi lovin ka chhuak nal nal a.
.
Scooty chuan a kawng ţha lai ka tlan chhuak chiah tihah headlight a thim ta hmak mai le! Kawng chhia ka tlan dawn ţan chiah lehnghal. A thim chung chuan tlan vak ngaihna a awm dawna ka hriat loh avangin tlawm la deuh chungin torch light hawh tur tal an neih takin ti rilru chungin Genei chu ka han phone a. Lehlamah a nuin, "Rawn riak mai rawh se," a tih ka beisei ru deuh bawk, ti ila, a ti awm chai si lo.
.
"Lo awm rawh aw, ka scooty hi i hawn mai dawn nia," a rawn ti ta. Genei hi chu a va fel reuh tak. Mahse a hmaa ka thinrim kha ka ngaihtuah chhuak leh thut pek a, "A ngai lo," tih pahin phone ka dah a, kawng chhe lutuk tak mai, ringtute'n vanram kan panna ni awm khawpa bumbohah chuan ka'n tlan tak tak mai a nih kha. Headlight ţhaa ka tlan pawh a tlu bawksawp nuaih nuaih chunga minute 45 vel tlan ţhin khan minute 30 velah harsatna awm miah lovin in chu ka tlan thleng leh der ang lawi a. Genei'n min rawn phone leh chuan in ka thlen tawh thu ka lo hrilh a, a awih hmel vak loh bakah a nuih a zat hmel tehchiam loh.
.
*******

Chumi hnu chuan kan inbe tam vak ta lo. Ka awmdanah khan a lungawi vak lo te pawh aniang, kei lah lungawi bik hek suh.
Mahse a inbox ka chhiarsak a ka lungawi lo tih a hriat avangin ngaihdam erawh min rawn dil a, a biak leh ngai tawh loh tur thu min rawn hrilh a, ka hlim sawt mai. Min ngaih thute min han hrilh takah chuan kei lo lungleng ve leh tawh bawk nen, kar tawpa ka len tur thu ka hrilh a. Mahse engmah hi ka tiam hleithei lo. Ka tiam berah pawh, 'Ka lo lenna hi engma'n min dal lovang. Ka lo leng ngei ngei ang, ruah a sur loh chuan,' tih a ngai tlat.
.
Diktak chuan ruah sur nal lutuk, bumboh leh khuar chek chuka va insawh leh hrep chu e, keima tan chuan thudang ni se, scooty pawh a ui(h)awm piah lamah a khawngaihthlak reng reng. Ţawng thei ngat phei se chu a hrehawm ti lutuk hian, "Ka pu, min that law law rawh, ka tan a nuam zawk ang," a tih ka ring tlat.
.
******

Ka lo tiam tawh ang ngeiin zirtawp zan chuan leng turin ka chhuak leh ta. Hlauh ang ngeiin kawng chanve ka thleng chauh tihih ruahpui vanâwnin min han nan leh nghal a. Chutah thlipui hrâng zet a rawn thawk a, min len tlu thei takngial dawn a ka hriat avangin ka chawl ta nge nge a. Ruah chu a nasat em avangin kal thei lawk lovin ka tâng reng a. Dar 9 a rik chuan a ziaawm ta deuh. Haw leh mai tur zawk nge ni tih ka ngaihtuah lai chuan Genei chuan min rawn phone ta hlauh a, leng tho tura min duh avang chuan an veng lam panin ka tlan leh ta bauh bauh a.
.
Vanneihthlak takin chesual miah lovin ka thleng thei ta, an step-ah pawh ka tlu lo. Mahse dar 9:30 vel a ni tawh, len luh chu inthlahrunawm tawh tak a ni. An varanda (verandah)-ah chuan rain coat chu phelhin door bell ka han hmet a, a ring ţha duh tawh hle mai. Reiloteah Genei chuan rawn hawngin ka lut ta a. Sitting room ka han lut chu a nu chuan a palang chung aţang ngei mai chuan min lo melh leh ta kur mai. Ka leng tlai bawk a, inbiak ţhat vakna chi pawh a ni lo a ni ang, ka hrethiam khawp mai.
.
A nuin min melh hruk hrukna karah chuan ţawng ring ngam si lovin kan titi melh melh a. 'Muah' te pawh a chakawm ve nen a rem lo nasa mai, a nu zun lawk chhung nghah a ngai zel. Mahse dar 10 a ri ţep e. Chutih rualin a nu 'Tactic' ka man ve tawh tho va. Dar 10-ah a mu anga, darkar chanve velah a lo tho leh ang. Eng engemaw ţul lo pui a rawn ti leh ang a, ruah a sur loh lai a nih chuan ka haw ngei a ngai bawk ang.
.
Dar 10 chu a ri ta ngei a, a tho nulh a, mu tur chuan a phei ta. Thawm a reh fel ta maw tihah Angie nen chuan kan inţhut hnaih seuh seuh a, inthlahlel zetin kan inkeih ta mial mial a. Mahse, kan ngawi rei ta deuh nge, mut pindan lam atang chuan thawm a rawn awm leh hma khawp mai. Rang takin Genei chu a ţhu sawn leh nghal a.
.
Ka lo rin lawk ang chiahin a nu chu a rawn tho leh chhut chhut a. Eng tak chu ti leh dawn chu ni maw? A rukin Genei erawh a lo nui khur char char tawh.
.
Chutah le...., ka hriatchian lutuk, nichin lawka chawhmeh ţhing a chhuan kha a va chhuang nawn lehpek a nih kha! Nikhua lo lutuk mai a. Genei ngaihdan pawh a ni chiah bik lo ani'ang, "Nu, nichin lawkah i chhuan kha," a rawn ti ta. Kei lah nui ţha ngam si lovin ka lo khur ngat ngat thung. A nu lah chuan engdanga chhang ta lo chuan a tarmit chung aţang ngei chuan a rawn melh rulh ringawt a, tihngaihna a vâng.
.
Chutah a so ta maw tihah Bible a la chhuak a, a han chhiar leh, huiha... A rilruah a lut lo teh ang chu... A phakar em mai, a thu chhiar chu Pathianin mal a sawm paw'n ka ring nek lo ve a.
.
Ruah lah a hân duh der bawk si lo, dar 11 a ri dawn takngial ta. A nu lah chu a mu duh der bawk si lo.
"Gene, ka haw ange."
Genei min chhân hma hmain a nu chuan, "A la hma alawm, hei ruah a sur nasa bawk si," a rawn ti ve leh khauh mai, nuihzatthlak zawkin... Chuti na na na ka ti rilru a, ka ding uaih tawh chu ka han ţhu fel leh hmak a, tifuh lo chu a inti teh ang chu, a meng leh nghal rulh rulh mai, a khap fuk fuk bawk a.
.
Dar 12 a hnai ta ruih mai, ruah lah chuan ban zai a rel der mai si lo va. A nu lah chu nghate rêp ang kar, a meng kar mai.
.
'Chûn lungmawli,
Meng ve rengi, meng ve rengi,' tih hla te kha ka hre chhuak uai uai a.

Ruah a hân duk a, a nu chu a rawn hawi chhuak nghal hrû, min rawn melh nghal rulh bawk. A awmzia ka hre chiang. 'Chu, ruah bang ta chu i hre ve em?' min rawn tihna a ni tih ka hai lo, ka muthlu der tlat zawk dawn emaw ni le....
.
Mawi zawn a ngaih ve bawk si avang chuan ka tho ta a. Tichuan varanda-ah chuan Genei nen kan inzui chhuak a, ka kutah min rawn kai nghal a. Engemaw sawi tuma a kâ a ân zuau lai chuan kawngka a rawn ri rak a, a nu chu a lo chhuak ve leh ta. Varanda-a chair an dah, zan dangah pawh an riah ţhin chu a rawn la ringawt a, a va ţul lo takkk....
Chutah, "Mangţha u aw," tih pah chuan ka kal ta vang vang a.
.
Kawng chhe laiah chuan thin tirim tawk tur lekin ka khup pân, la dam lo chu ka han sawh pilh leh hram a. Thinrim insehruh ţeuh chungin in chu ka thleng ta a.
.
Ni a liam a, he fûr zet hi chuan a daih rei mah mahin ka hre tawh. Chumi piah lamah ka len theih ţum pawha heti taka hun ţha kan nei thei lo ka hmuh hian, ka ngaihzawn loh tawp tur ngaizawng niin ka inhre ta.
Ka inngaihtuah vang vang hnu chuan Genei chu message ka va thawn a.
.
"Gene, a buaithlak e."
"Ni ngawt mai."
A lo hrethiam nghal tih ka hre mai.
.
Chutah amah vek chuan message min rawn thawn lehin, "Inţhen rih phawt mai ang hmiang," a rawn ti ta a.
Kei lah chuan inngaihtuah buai eih lovin, "Aw le," ka lo ti mai bawk a.
.
Chutah a han reh deuh vang vang a.
"Ngaihzawng dang chu ka nei tawh miah lovang ka zirlai ka zawh hma chuan," a rawn ti leh a.
"Aw le, aw le," ka lo ti leh mai a. Tichuan kan inţhen fel chu a ni ta der mai. Ka tawrh âwm pawh ka hre lem lo ve. Kei pawh ka insawhna pân vel chu a reh fel hma chuan ngaihzawng ka nei tawh bik lovang.
.

.
A tûk a lo thleng a, kâwlah Sikni êng mawi tak chu a rawn chhuak ta. Nilengin ruah a sur lo va, zanah a sur hek lo. Chumi aţang chuan thlasik rawn inţanin ruah a sur chhunzawm ta reng reng lo va. Mahse kan lo inţhen laklawh tawh si. Lenna tur hre lo chuan ka hawihil ta reng ringawt a. A, ani pawh kha a hawihil ve âwm tho e....

Chutah inngaihtuah chungin chauhthubarawh-ah, "Engati nge ka lên hun chhung zawng ruah a sûr tluk tluk a. Kan inţhen fel chiah a, a sur leh duh tak miah loh!? Umn, ka hre chhuak ta, Vân lam khian Genei nena kan inhmangaihna(?) kha min lo hriatpui a. Tikhan awm ta zel ila, thil ţha lo zawk tiin kan nun kan hmang dun thei. Chuvang chuan a hun takah min lo la chhuak a nih hi," te ka ti ta vel mai mai a.

Tunah chuan thutlukna ka siam ta, ti ila, thutiam ka nei ta... Chu chu pawh a la ni chuang lo. A, hei hi a ni e;
'Tun achinah keimah leh midang reng reng, kan kawmthlang tlangval pawh ni rawh se. Fur lai chuan mi zawng zawng chungah hmangaihna hi a piang chhuak tawh tur a ni lo, a hahthlak,' tih hi a ni. Mahse ka thu lah chu a ni der mai bawk si lo va.
.
A hnua ka hriat leh dan chuan khatia sual vang ni si lo va ka tlûk fona kawng bumboh leh nâl zet kha, kawng hluihlâwn deuh tawh, tûma kal zen zen duh tawh lohna a lo ni awm e. Midang tlan ve ka hmu ngai lo rêng a ni. Fin a tlai leh ta. Saw lam venga ngaihzawng ka neih leh vaih chuan kawng ţha hlir ka zawh tawh anga, ka tlu tawh bik lovang mawle.
.
Mite hmangaihna chuan a sik a sa, a fur a ţhal a sawi lo va, damchhung hial a daih ţhin.
Keini inkara hmangaihna kawng bumboh tak erawh kha chuan 'FÛR' chhûng chiah a daih....

************

A TAWP TA
Zing thawh tlai thatnate:
Meizial, kuhva, sahdah a hek lo
Sum save.
Chuvangin tihtur a awm vak loh chuan i fate kaitho hma lutuk suh... Kan thenawmpain a ti.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)