THE TWIN AVENGE BY Ar eL' Khawlhring

Moderator: Ar eL' Khawlhring

Ngaia
Site Admin
Posts: 25813
Joined: April 30th, 2016, 4:07 pm

THE TWIN AVENGE BY Ar eL' Khawlhring

Unread post by Ngaia » November 5th, 2017, 4:42 pm

THE TWIN AVENGE

Dar 11 a ri dawn tawh a, ka mu fel chiah tih chuan ka phone a rawn ri ral ral a. Ka han en chuan ka number hriat ngailoh a lo ni lehnghal a. Peih lem lo zet chuan ka chhang ta hram a. Ka beisei loh deuhin ka ṭhianpa Sangtea,Police SI lo ni a, hun rei tak chhung ka biakpawh tawh loh leh ka hmuh tawh loh a lo ni a. Chanchinte kan inhrilh luam hnu chuan min rawn biak chhan tak zawk chu min hrilh ta a.
~
"Ka cousinte hi phir inang zet mai an ni a, an hming chu Danny-a leh David-a an ni. Danny hi a piang hmasa, a chhuak hmasa zawk a ni a. Thla liam ta khan airfield kawng khamah Danny hi bike accident tawkin a boral hlauh mai a. Khami hnu aṭang khan David-a hi a pangngailo chho ta tlat a. Pangngailo han ti ila, lehkhabu chhuah tur an unauva an ziah hi a chhunzawm reng lawi bawk si a. Mahse biakin min chhang ngai lova, hrelo ang hmiah hian a awm tlat ṭhin. Chutih rual chuan an unauva an roomah amaha a phun mawlh mawlh leh biak nei ni awm taka a ṭawng mawlh mawlh lai an hmu fo ṭhin." Sangtea chuan a han ti charh charh a.
~
Kei chuan, "Psychiatrist hnenah te an kalpui lawm ni?" ka lo ti a. "Kalpui e, amah ber a ṭawng duh miau si lova, tihngaihna vak an hre bik lo a ni," a han ti charh charh a. "Anih kei hi tinge min rawn hrilh teh daih," ka han tih chuan, "E ṭhianpa, i chanchin an sawi hi ka lo hre ve fo tawh asin, thlâ hmu thei, be thei niin an sawi che a," a han tih chuan ka nui hul huk a. "Ka inhnamhnawih lohna a rei tawh asin, kum 1 chuang lai chu ka hmu tawh lo, bakah, a nazawngin ka hmu thei hek lo, hmuh nuam tak pawh ni nghal lo chuan," ka ti nuah nuah a.
~
Sangtea chuan ngenngawl takin, "David-a nu leh pa hi an mangang em em a, a biak ṭhin hi thlâ(rau) a lo nih tak tak chuan kalsawn tir dan ngaihtuah an duh a ni, heti reng chuan a chiangkuang lo hlen tak tak thei mai dawnin a lang tlat mai. I hmu ngei ngei ang ka ti bik hauh lo, mahse bei tih dawn nan tal tlawmngaiin naktukah lo kal ta che," a han ti hram a.
*****************************---------------------********************************


David-a te in kan thlen chuan pa zahawm deuh mai leh a nupui ni ngei tur nu la valai angreng tak fel hmel deuh, hmelṭha tak mai hian min lo chhawn a. An hmelah chuan an lawm hle a ni tih a hriat reng mai. Pa zawk chuan min lo chibaiin, “I lokal thei chu kan va lawm em, pa Ruat tiin min ko mai dawn nia, a ni hi nu Hmingte tiin i ko dawn nia, David-a nu leh pate kan ni e," tiin min lo hrilh zung zung a. Eng engemaw sawia kan titi hnu chuan nu Hmingtei chuan David-a te unau chanchin tlangpui chu tihian a sawi ta a.
~
~
Danny-a leh David-a hi Pu Ruata leh Pi Hmingtei te fa neihchhunte an ni, phir an ni a, unau dang an neih tawh loh avang pawh a ni ang, an inngai em em a, midang pawh an kâwm meuh lo. An inan(g) em avangin tlangval an nih hnu thleng pawhin an nu leh pate ngei pawhin an hai fo reng a. An naupan deuh lai phei chuan a nu chuan Danny-a veilam bengkawm-a khuavang chhinchhiah aṭang chuan a hre hrang thei chauh thin, chupawh tlangval an nih hnu chuan an sam tlemin a lo sei bawk nen, khuavang chhinchhiah lai ber pawh chu a sam chuan a hliah vek a, hriat hran harsa tak an ni.
~
An phawk a chhuah chang phei chuan an ngaihzawngte an tiluhai thei hle. Vawikhat phei chu David-a class kal loh ṭumin Danny-a chu David-a lemah a chang a. David-a bialnu chu In-a hawpui lawkah a sawm ta a, ani chuan David-a emaw tiin a zui haw ve mai bawk a, In an thlen hnu chuan room aṭangin David-a diktak chu a lo chhuak luau mai a. Danny-a a chu a lo nui chur chur a, Davida'n an hmu chiah chu hrethiam nghalin, "Ehe....Hmela," tih pahin an inum zak zak anih kha. David-a bialnu-in thil awmzia a'n hrethiam chiah chu zak lutukin a haw tau nghawng nghawng mai a ni.
~
Lehkha an zir peihin an thiamthei bawk a, college-ah pawh a tiṭha pawl an ni char char ṭhin. Danny-a zawk hian bike intlansiak (race) hi a tui em em bawk a, David-a erawhin a tuipui ve meuh lo thung. Lehkhabu chhuah tur an ziah lai mekin nikhat chu Danny-a chu bike racing a tel turin a chhuak a, airfield kalkawng-a khamah a chesual a, a boral ta a ni. Chuta chinah chuan David-a zia chu a dang vek a, a chhungte a be ngai tawh lova, an biakin a chhang ngai hek lo. A chaw ei hun a danglam vek a, lehkhabu erawh a ziah zawm tluk tluk thung a ni.
*******************-------------------------******************

An chanchin tlangpui min hrilh zawh chuan nu Hmingtei chuan David-a te room kawngka bul thleng chuan min hruai a, tichuan min kalsan leh ta a. Kawngka ka hawng a, ka han lut chiah chu boruak a inthlak danglam tih chiang takin ka hre thei nghal a, mihring mai nilo rau dang a awm ve a ni tih a boruak aṭang chuan ka hrethei nghal a ni. Chu pindan zaupui mai kil lamah chuan dawhkan kilin David-a chuan lehkha a lo ziak ngar ngar a, a phun deuh mawlh mawlh bawk. A sir kil lamah chuan ruangâm ringawt hi fiahlo ruai hian ka va hmu bawk a, chu chu a bia aniang tih chu ka ring thiam nghal a ni. Thlâ ka hmuh hian ka hlau chu ka ti duh chiah lo nangin a nuam chu ka ti zawk zawk ngai miah lo.
~
"Hello David," ka han tih chuan hria awm pawh hian a awm lo. Ka aw ka han thian a, ka va kal hnaih pawh chuan min lo melh chhin eih lo, mahse thlâ chu chiang takin ka va hmu thei ta a ni. An lo inang em lah taka, hre lawk lo ila chu amah David-a thla-ah ka ngai ngei ang. Chutah a thil ziah lai chu ka va bih dek dek a, Jazz music chungchang a lo ziak mek chu niin, ka beisei leh ka rin loh lam daih a ni. Chutia min biak duh tak si lovah chuan tiin tihdan tur dang ka ngaihtuah ta a.
~
"Danny, i lo la awm ve reng a ni maw?" ka han ti thut mai chu an pahnih chuan an lo hawichhuak rang kher mai le. Mak ti mitmeng zet chuan an pahnih chuan min melh a. Chutah David-a chu lo dingchhuakin, "Lo ṭhu rawh ṭhianpa, i hmu thei ve maw?" tiin min lo zawt nghal a, a mitmengah chuan a unaupa hmuhpui thei ka nih avangin a hlim hle tih hai rual a ni lo.


A hma zawnga lungtum biak ang mai kha tunah chuan a thlun phelh ang par par a ni ta. Mahse ka kalchhan diktak ka han hrilh erawh chuan an pahnih chuan an meng hnual rawih mai. "rau khawvel ami leh hringmi damlai chen dun reng chu tihchi a ni love, miin i unaupa David-a hi mi pangngai pha lovah an ngaih phah vek tawh nen, Danny, tunah chuan i lo inthiarfihlimsan thei tawh lawm ni? Inngaih hi chuan chin lem a nei tak tak dawn chuang lova," ka han tih chuan pindan chhung chu thehmeh ang maiin a reh tlawk tlawk mai.
~
"A ni ngawt mai tiraw," Danny-a chuan a rawn tichhuak bauh a. "Tihtur ka la nei si anih hi ka chawlh hma hian," a han tih chuan ka va en vat a. "Ni e, kan lehkhabu buatsaih lai kan zo fel ṭep a, ka puih law law a ngai a ni," a han ti a.
"Chutiangah chuan lungngai lo la, keipawhin ka lo pui thei tho alawm."
"Thildang pakhat ka chawlh hlen theih lohna tur min daltu a la awm tlat a ni."
"Enge nita?"
"Phuba," Dannya'n a han tih chuan ka phu deuh zawk a. "Bike accident-a khâm-a ka tla kha tihluih a ni," a han tih chuan ka beng a verh kher mai.
"College a ka classmate min itsikna leh thikna vang a ni ber," a han ti a. Chutah sawizawm lehin, "Kan college Queen Julie nena kan inzui ve deuh avang hian min thik hle a, chaltlai deuh hian min ti fek fek reng a, engahmah phei chuan ka ngai duh lo. Chutah a tihngaihna vak hre lo chuan race ah min sawm tlut tlut reng a. keiin ka lo pawm a, chuta race vawi thum kan nei chu ka chak fai vek a ni. Tichuan ka haw lampang hahchawla bike kawng thlanga ka park chu chak zeta lo tlanin min rawn su thla ta a. Accident ang thei ber turin ka bike park chu a rawn namthla zui ta a ni," a han tih chuan ka lo chek tlawk tlawk a.
Chutah, "Phuba la turin tih theih ka nei lo hi a buaithlak ber chu a ni. A hmuh turin ka inlan thei lova, han tihṭhaih tur ang pawn engmah ka khawih thei tlat lo hi a ni," lungngai hmel tak hian a han ti charh charh a.
~
"David, i chhungte pawh engmah i hrilh nange," ka han tih chuan, "ka thusawi an ngaithla duh miau lo alawm," a lo ti bauh a. Thil engkim ka hrechiang ta. Tunah chuan ka tihtur chu Danny-a thlâ-in thil a khawih theihna tura zirtir chu a ni ta.
~
Danny-a chu maimitchhing turin ka han ti a, a bulah chuan lehkhabu ka dah a, a rilru zawng zawng pe turin ka ti bawk a. Tichuan lehkhabu chu khawih turin ka ti a, reife chhung chu engmah a ang thei lo. Ka lo fuih sauh sauh a, nakinah chuan lehkhabu chu a che deuh det mai. Danny-a hlim lutuk chuan, "Ka khawih thei ta," tiin a au chul a. Kei chuan, "Ti zel rawh," tiin ka lo fuih sauh sauh a. Tumruh taka a han beih lauh lauh takah chuah lehkhabu chu a leng ta lawp mai le. Ka au deuh hluai a, ka lawmpui kher mai.
~
Common room lama ka va luh leh chuan chanchin min lo zawt sawk sawk a. Kei chuan engkim chu chipchiar taka hrilhin hmalak dan tura ka duhdan te chu ka sawitlang nghal rawng a. Pu Ruata chu Kohhran upa mah nise a thinrim hle a ni tih kan hrethiam vek mai. "Ni e, in tihdan dan ni teh se, mahse nunna em inlaksak chu ringtu tan tih a thiang love, FIR erawh zawng kan thehlut ve ang chu," sehchilh rap rap chung chuan a han ti a.
~
~
~
Siama (bike-a su tu) chu a phone number kan nei thei ta. Sangtea nena kan ruahman angin vawikhat tihṭhaihna chu neih kan tum ta a ni. Kan han be ta ngei a, airfield lama race nei tur chuan kan han cho a,kan veng te kan han phuahchawp a. Ngaihṭhat lohna pawh a nei lo nge, a tukah a ṭhiante nen dar 11-ah airfield-ah an lokal tur thu a sawi nghal a. Aw....amahin lokal se kan duh tehreng nen. Umn...a pawi hrep love.
~

Chak zet a bike rawn tlan, rawn ving fia fia ri kan hriat chuan Sangtea nen chuan kan helhhawlhin kan phur kher mai. Chutah David-a a position(ṭanhmun)ah inpeih fel turin kan ti bawk a. Reioteah chuan Siama chu a rawn thleng ta mai reng a. Mahse speed sang miau hek le, kan thil lo dahkhawm chu rapin a tleng ta hawn hawn mai le. Thawh leh an tum chiah chu hriatchhuah a nei ta, tuna a accidentna lai hi Danny-a a sutthlukna lai tih a hrechhuak thut mai,a hlau rilru ta khap a.
~
Chutia na ti leh harsa ti chung chung a bke tundin a tum lai mek chuan a hnung atangin aw fiah tak,chiang tak hian zawi sap si hian, "Ka lo pui ang che chu" ṭawng zawi sap si hian a rawn ti a. Chutah hawileta amah puih tumtu hmel an hmu chiah chu a ṭe nghai ṭeng ṭung mai le.....Thlarau emaw tiin tiang em em a rapthlak a takah a la hmu ngai lo ani tehchek ang. A ni reng lah taka, a lu-ah thisen a kai hnuang a, a ka leh hmui te nen thisenin a berh luai a,A Kawr a ṭeṭ hrup a,a sam a bawrchhawr em em a, ramhuaite pawn hmu ve se an hlau ve thovang, thlahrang te thlahrang ni mai awm a ni.
~
David-a kha a unaupa in a thihsan laia a thawmhnaw inbel ang chiah chiah nen,rawngsen nen, a ang thei tur bera chei kha kan ni reng a, phir unau an lo ni bawk nen, hriathran ngaihna reng an awmlo a ni. Chutah keini pawh kan tawmna atang chuan kan chhuak ve ta a. Danny-a a tihhlum chhante kan zawt a, a tir chuan dawt sawiin a ṭang ve khawp mai. Sangtea ka ṭhianpa polise SI thinrim chuan thingkungah nem betin a rek nghal bawrh bawrh ta mai. A reh hlum kan hlauh avang chuan kan pawt ṭhen thei ta hram zawk a.
~
"Hetia min tih avang hian ka report thei che u asin," a la ti khang khang a.
"keini pawn tual i thah vang hian hremna kan pe thei che," kan ti bawk a.
"Enge evidence in neih?"
Ka chemte chu ka khawih miah siloh chuan a thlawk chhuak pawp a, Siama thing nghen ah chuan a chhipsam telin a va bur vu mai chu a ṭe nasa ngei mai. A dāng nghal sawp sawp a. chutihlai chuan Sangtea pistol chu a khawihtu hmuh theih si loh in boruakah Siama chaldar chu a tin ran mai le.
~
" Fiahna dang i la duh em?" chang ret rawt hian ka han ti a. "Duhlo,duhlo,ka thiamloh ani e, min ngaidam hram teh u," mittui parawl deh pur chuan tiin, khawngaih min dil lawm lawm a. chuta kan han dawp deuh takah chuan rei rial lovin a inpuang ta zut zut mai a ni.
~
Siama hian an class ami Julie a ngaizawng em em mai a, Ani Julie lahin a hawi der silo. Danny-a nen erawh inngaizawng ni si lovin, an inkawmngeih em em a, a chhia, a ṭha engkim an inhrilh ngam ṭhin. Chutiang taka inzui an nih avang chuan inngaizawng ni a ring an tam hle a, chupawh a mawh love.. Thiktu tam tak zingah Siama pawh lo tel ve in Danny-a thikna in a khat a. Danny-a chungah rilru sual a pu zui chho ta ngar ngar a ni.
~
Race-a a chakloh thin avangin a itsik lehzual a, an lo inhnial thinrim bawk nen, an race hawlam Danny kawngthlang lama a lo ṭhu hahachawl chu rilru chhia pu thutin a va su a, khamah a liam thla ta nghal a. A tlansan hnuah Danny-a bike kha tha taka a la inpark avangin an manchhuah hlauvin a tlan let leh a, accident ang thei ber turin bike pawh chu khāmah a nam lum thla leh ta a lo ni.
~
Na vak lova kan han piai ve liam liam hnu chuan truck rawn tlan body ah kan hlang nawlh a, Aizawl kan thlenpui ta a. Pu Ruata chu thinrim hle mahse Kohhran upa a nihna a lang hle mai. Sual chu sual veka thungrulh chu a Kristian lo em em si a.
~
Siama zawng a pawikhawih a len tham em avangin damchhung lung in tāng turin Central Jail lamah thawn liam a ni ta ani.
~
Mission ber kan zawh takah chuan Danny-a pawh thlamuang takin a chawl thei ta. David-a nen chuan mittui tla chungin an inkuah vawng vawng a,...chutah Danny-a chu a tawlh hla telh telh a, boruaka a thamral mek lai chuan David-a nen chuan rilru hmunkhat leh inpawh takin ngawi rengin kan thlir liam vawng vawng a.
~ FICTION
.....................A TAWP TA......... ..........
Ar eL Khawlhring..... 19 oct 2016



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 27th, 2018, 8:46 pm

2

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)