Page 1 of 1

KUTDAWH

Posted: December 5th, 2017, 6:09 pm
by Ar eL' Khawlhring
KUTDAWH
By Ar eL Khawlhring

A inchhâwng chung zâwl aţang chuan pu Liansanga chuan a han thlir thla a. A in chu a ropui takzet mai. Eirukna tel hauh lo va a sak ngei, inchhâwng sarih zet a ni. Krismas a hnaih tawh avangin an awmpuite nasa takin a cheitir a. A compound zau zet maiah chuan 'Christmas tree' tam tak dahin fâr thingkung puitling tawh te nen nasa takin a cheitir bawk a. Han hawi vel ila, mi tihlim ngawih ngawih thei tur khawp leh rilru dam sawng sawng theihna tur khawpa mawi leh nuamin a in leh a vêl chu a vul a ni. Mahse a hlim tlat si lo.

A nupui pi Saii hian kum 2 vel kal ta aţang khan a natna ber hriat theih si lohvin dam ni hmel a hmu mang lo va. Phai damdawi in ţha a an sawi zawng zawng pawh an pan kimin doctor ţha ţha an râwn zo tawh. Mahse a natna diktak an hmu chhuak thei chuang lo. An bei a dawng tawh kher mai.

An fapa Johny-a lah 'Addict' mai niin tunah Revival camping centre lamah a awm mek a. Ani lah an manganpuiin a lakah an beidawng takzet tawh. Tunah pawh hian ţha taka a rawn chhuah an beisei vang pawh ni tawh lovin kâr khat tal damdawi ti lo va camp chhunga a han inkhung ve ringawt pawh hi an tan chuan a lawmawm em vang chauh zawka camp luhtir an ni.

Johny-a hian vawi 15 chuang zet chu camp a lut tawh a. Mahse vawi khat chiah inhlânin a rawn chhuak. Chu pawh councellor te'n an khalh fal rei bik ţhin a nin vang mai maia inhlân ve a ni. Camp chhuah ni aţangin a rui chhunzawm leh nghal pang ţhin. Tun ţumah pawh hian a nu leh pa thu hnial hreh vang chauha camp lut leh a ni. Ţhat chhuah tum tak takna rilru a pu chuang hauh lo.


Pu Liansanga chu a rilru a hah kher mai. A fanute pahnih erawh phai lamah college an kal a, anni thung chu sawiselna tur em em an awm lo. An awmna hmunah pawh nula ţha tak niin an sawi ve ve a ni.
Mahse an fapa ber heti hi a ni si a. Johny-a siamţha leh tur hi chuan thilmak a ngai ni ber tawhin a hria. He khawvel mihringte siamţhat phâk bâk niin a ngai tawh. Pathianin a siamţha thei tih chu a rilruin awih mah se, amah zilh turin rinna kawngah an nupaa an derdêpzia a han inhmuh chian meuh chuan a bei a dawng hle mai.

An fapa neih chhun a ni bawk nen, a naupanlai aţangin an duat lutuk a. A duh apiang leisakin a duh tinreng a nei thei a ni mai a. Tunah zawng kha'ng duatna kha hmangaihna a lo ni lo tih hre chhuakin a inhmuh chhuah hun erawh a tlai lek lek tawh.

Mite ngaihah chuan kohhran leh khawtlangah pawh pa ţha tak a ni ngei mai. Mahse a hausakna hian khua tihmu lo zovin, duhtawk lêm neih lohna chuan amah a bâwih tawh a, sum bawihah a tâng nghet tawh hle a ni. Ţawngţai a thlahthlam a, chhûng inkhawm an lo neih ţhin pawh an nei ngai meuh tawh lo.

A nupui a han ngaihtuah leh a, tunah pawh an nupa khumah a mu bâm mai. Na viau ni si lo hian natna hian a thlah mang lo va. Doctor-ah damna an hmu zo lo va, ţawngţai dam thei an pan pawhin eng an ang thei chuang lo. A natna tal hi hre chhuak se chu a ziaawm zawk tur a nia, doctor-te lah an hawihâi ang reng viau mai si.

Chu zan khawhar takah chuan inchung zâwlah midang hriat lohin a rilru hah chu a hûi pap pap a. A in ropui zet chu a han thlir nawn leh a. A in tluka ţha leh lian, compound nuam bawk si hi chu veng chhungah a dang a awm lo. Aizawl khaw chhungah hrim hrim pawh a zahpuiawm lo pawl chu a ni ngei ang. Tunah phei chuan 'Decoration light' tam mangkheng, chi hrang hrang te chuan an chei a. Zan lama an han tiêng zet chu 'Vai truck' chu nêptê, a pêt hian a pe chuai mai a, ralkhat aţanga thlir pawhin in dang ai chuan a langsarin a ropui bik hliah hliah a ni.

Miten a in an luah man ringawt pawh ei sên loh an la lut a. Aizawl khaw chhungah dawr lian tak tak, hmun thumah ngawt a nei bawk. Contract lam pawh a buaipui hman meuh tawh lo zawk a ni.

Mahse hetianga pa ţha-a an ngaih leh mi hausa ni mah se famkim lohna riau a nei. Khawtlang tan chuan a sum chu a theh chhuak ui hauh lo. Mahse mi rethei, a hranpaa ţanpui te hi a duh dêr lo. A chhan chu retheih hi thatchhiat vangah a ngai tlat.

Aizawla an nupa-a an pêm tirh laia an retheihzia a chhût lêt a. A tumruhna avang leh a thawhrimna avanga hetiang dinhmun thleng thei a ni tih a inhria. Chuvangin retheih chu thatchhiat vangah a ngai hmiah a, chantawk khuarelah a puh fel hmiah mai a ni.

Rilru hah zetin an nupa pindanah chuan a lût ta a. A nupui, an inneih tirha hmelţha tak, hrisel ţha tak ni ţhin kha chêr kiamin a lo mu dâng bei mai a. Sum zawng ngah teh mah se he inchhungah hlimna hmuh tûr a vângin hlim taka nui ri hriat tur a awm ngai tawh lo.

A nupui chuan khawsik a neih lêm loh avangin thâwm dîm takin a sirah chuan a inthawlh ve a. Zing dar 1 lai a ri tawh nachungin a mut a chhuak hauh lo.

'Table light' tihthim tuma a han ban lai tak chuan a sira khawhar hmel taka lo let ve bâm lehkhabu chuan a mit a la ta tlat mai. Chu chu thil dang ni lovin 'Bible' a ni.

Bible a chhiar khâtzia a han ngaihtuah meuh chuan han keu leh pawh a inthlahrung rum rum a. Mahse a thinlungah turtu mak tak mai a awm miau avangin ţi deuh tak, inthlahrung tak chung chuan a han keu va. A zuk hmuh hmasak ber chu helai thu hi a ni:

"Tlang lamah te khian ka mit ka lên chho vang.
Khawi lama mi nge mi ţanpuina tur lo thleng ang?
Mi ţanpuina tur chu LALPA, lei leh van siamtu hnena mi a lo thleng ang." (Sam 121:1,2)

A harh deuh huaiin a inhria. A hausakna ringawt a hmachhuan a, Pathian a lo be pawp ngai tawh lo reng reng tih a inhre chhuak a. A hausakna chuan an chhungkua-ah damna, hlimna a pe thei si lo.
A mangan hunah chauh Pathian a hre chhuak tih a han ngaihtuah thlen chuan a inthlahrung zual sauh a. Mahse tih theih a nei tawh lo. A nupui mutna kiangah chuan a ţhingţhi a, ngaihdam dilin a ţawngţai ta a. A tihtur a tih loh te hriattir turin Pathian a au va. A nupui damna tur erawh inthlahrun luatah a dil mai ngam lo.

Urhsun taka a ţawngţai zawh meuh chuan a thâwl huaiin a inhria. Tichuan bible bawk chu chhiar tur ber pawh hre chuang lovin a phêk a phêk kual a. Nakinah chuan helai thu hian a mit a la leh ta tlat mai a ni:

Malakia 3:10
“Ka inah ei tur a awm theih nan sawma pakhat zawng zawng chu thawhhlawm inah rawn la rawh u; van tukverhte chu hawnsak che u in, malsawmna dawn sen loh khawp hial ka vur dawn che u nge dawn lo che u, mi han fiah teh reng u, Sipaihote LALPA chuan a ti,” tih thu hi.

Ni e, thawhlawm, Pathian ram pek chungchang velah chuan kohhranah a sâng filawr lak a. Amah rawn hnaihtu ber pawhin a thawh zatve a thawh pha ţawk ţawk chauh. Mi fak pawh a hlawh. Mahse sawma pakhat Pathian hnenah a lo pe ngai reng reng lo, a ui ţhin a nih kha.

Sawma pakhat chu han pe chiah se a tam dawn lutuk a. Aizawlah dawr lian zet zet hmun thumah a nei a. A dawr pakhat aţang ringawta sawma pakhat a pek tur pawh a tam tham lutuk. Chumi piah lamah a in luahtuho luah man zawng zawng aţanga sawma pakhat pek chu tam tham tak a ni bawk. Contract a lo thawh aţang te a chhût tel phei chuan Pathian rama a dah tur chu sâng vah vah tak a ni. Chuvang chuan a ui a ni ber, a lo pe ngai miah lo. Midang aia a thawh hnem chu tawk a lo ti em em ţhin.

Mahse a thinlungah inthiamlohna a lo lut ta. Sawma pakhat chu Pathianin, "Ka ta," a ti tlat si a.

Khum aţang chuan a chhuk nalh a. Lehkhabu leh pen la in, a thawh chhuah zawng zawng chu a mal te tein a chhût a. A chhût chhuah aţang chuan Pathian ta tur chu a dah hrang ta a, amah paw'n tam a ti hle mai. Mahse ui thei a ni tawh lo. Ui lo va a pek phawt chuan Pathian pawhin malsawmnaa a vûr dawn leh dawn loh fiah a cho kha maw...

Safe va hawngin sawma pakhat, 'Pathian ta' chu a han la chhuak a, a fûn hrang ta nghal a. Chumi zawhah chuan Pathian hnenah a hlan a. Kohhrana chhûn luh turin a dah ţha ta a. Tichuan rilru hlim em em chungin zing khawvar dawn ruaiah chuan a muhil ve ta hram a.
********

"Bawiha pa, tho tawh rawh, kha i thingpui tur le."

Chu aw a hriat chuan a harh kawk a, chutih rual chuan a mumang emaw a ti tho bawk. Chêt nachang pawh hre lo chuan a ka hau mai. A nupui pi Saii lah chuan nui ver ver chungin thingpui chawiin a lo en reng mai bawk si.

Chutah pi Saii chuan hrethiam takin,
"Bawiha pa, ni e, a mak lutuk, ka dam vek," hlim hmel siaha a rawn tih takah chuan pu Liansanga chuan ngaihtuah chhuah a nei ta! Dan rual lohvin patlinga pumpa, a mittui chu a dîr ta zung zung a. A nupui lo dam tak nachhan chu ui lo va a pek avangin Pathianin malsawmnain a rawn um zui nghal tih a hre chiang em a ni.
"Lalpa, i che rang ngei mai maw," a ti sap a.

Engdang a sawi tawh lo, thingpui in hman pawh a ni tawh hek lo. A nupui pi Saii chu a bulah a ţhingţhittir a, mittui tla zawih zawih chungin Pathian hnenah lawmthu an sawi dun a.
********

Johny-a chuan a ning takzet tawh. A 'Suffer' zualpui chu a pel chho tawh (Suffer- tuar, damdawi khawih ţhin han nghei thut avanga taksaa ţhînlêtna). Mahse camping chu a ning ngawih ngawih. Tlân chhuah te a duh rum rum a. Mahse a tûk mai hi camping chhuah hun a nih tawh avangin a insûm ve hram hram a.

Addict camping a ni bawk a, tiţha duh vak lo pawh an tam khawp mai. Sâwmna vawikhatna chu speaker-in a siam tawh. Mi 80 vel zet chu la ţhu nghûkin ngaihsak tehchiam hmel pawh an la pu lo. Mahse ngawlvei rual na na na chu speaker sawmna hnuhnung berah, chhungte ngaihţhat nan an ding leh deuh vek ang tih chu Johny-a hriat sa a ni. Mahse ani erawh zawngin sâwmna chu chhân a tum bau lo.
*******
*******
Kutdawh putar bâl zet mai hian sai ip chu pu chungin mi in hrang hrangah chuan a lût lâwr dan dan a. Ţhenkhat chuan buhfai no khat te an lo pe a. Ţhenkhat erawh chuan VC hriatpuina lehkha a neih leh neih loh te an lo zawt a. Ani chuan chutiang lehkha a lo nei bawk si lo, an veng an han zawh lah chuan a riat nawi vel mai mai bawk si. Chuvangin ţhenkhat chuan buhfai no khat tal pawh lo pek ahnêkin an pêt chhuak lo chauh zel mai a ni. Chutiang chung chuan thlan tla hluamin in dangah pawh a lût zel a. A luhna thenkhat erawh mi rethei berh ve tak tak tho an ni.

In tla bal tawh tak, kawngka inhawng hiau maiah chuan a lût a. Nu tar lam lek lek tawh, rilru hah hmel deuh mai hian lo chhawnin lêng lut turin a lo sawm a. Chu kutdawh putar chuan tuisik in dil pah chuan buhfai no khat tal pe turin a khawngaihna a dil a. Chu nu chuan tuisik pek pah chuan a mittui a hru zauh a.
"Ka pu, min hre thiam rawh. Keini paw'n vawiin tlai buhfai thlak tur pawh kan nei tawh lo," a lo ti a.

Chu kutdawh putar hmel chu a dur deuh khapa, a chhâng lêt lo. Mahse a hmelah chuan a inngaihtuah mûk hle tih a hriat a. A ngaihtuahna erawh hriat thiam theih a ni lo.

********
Hah hmel taka thaw deuh huam huam chung chuan pu Liansanga in ropui zet mai chu a han thlir vung vung a. Chutah gate chu hawngin chau(h) hmel zet hian inchhâwng chung ber pan chuan a inpu pâr pâr a.

Pu Liansanga te chhungkaw chênna bika choka kawngka inhawngah chuan a dâk lut a. Pi Saii chuan chawhmeh a lo siam mawlh mawlh a.
"Ka pi, buhfai no khat min pe ve thei angem?"

Chu aw a hriat rual chiah chuan pi Saii chuan kutdawh putar lam chu hawiin za lutuk mai hian a nui ta uarh uarh a.

A nuihza zualpui a reh hnu chuan pi Saii chuan, "Bawiha pa, i ang lutuk, i inhmeh kher mai. I rawn hlawhtling em?" tih pah chuan a nui leh vak vak a. Chu kutdawh chuan a buhfai put lai chu chhuata nghah pahin a sam lem chu a la thla a, tui awmna lam panin a hmai chu a'n tuai fai thuak thuak a. Hrûkpuana a hmai hru zo rawn hawi chhuak leh chu putar kutdawh ni tawh lovin pu Liansanga ngei kha a ni leh ta.

Pu Liansanga chuan a nupui hnenah chuan a kutdawh dân chanchin chu a hrilh mawlh mawlh a. Pi Saii chuan uluk taka lo ngaihthlak pahin a hmel chu hlim hmel leh lainatna ngah hmel puin a inthlak sek mai.

Tichuan an nupa chuan ruahmanna an siam zui nghal a. Vawiin khan an veng chhunga mi harsa deuh nia a hriatte inah chuan a lût kim hman a. Chumite zingah chuan amah khawngaih a, buhfai lo petu mi harsa zualte chu Krismas thilpêkin an rul lêt ve thung dawn a ni.

Mi in-a a luh pah khan a mi la hriat chian loh te hming kha 'Name plate' aţangin a chhinchhiah zel a, chuvang chuan harsatna a awm lovang. Amah ngei chu kal duh tho mah se, mite inhriattir loh ţha zawka a hriat avangin an driver, mite hriat vak loh, a mi rin tak ni si chu thilpek pe tur leh a petu hming an lo zawt a nih paw'n sawi miah lo turin a ti anga, tichuan a aiawhin a kaltîr mai dawn a ni.
********
Pu Liansanga chuan an driver chu tîr chhuak nghalin vawiina buhfai pawh nei tawh lo nu khawngaihthlak kha a chanchin a va chhui tir nghal a. Amah pawh khan zawt thei chu a ni. Mahse chhûnah kha chuan kutdawh a ni miau va, a tan zawhna zawh vak kha a thiang lo deuh tlat. A ngaihtuah chhunzawm zel takah chuan veng chhung mi a lo hriat tlemzia te, mi rethei leh harsa zawk hriat a lo neih mang lohzia te a ngaihtuah chhuah chuan a zak thar em em a.

Vawiina kutdawh pu Liansanga buhfai lo petu mi harsa ve tak tak te'n Krismas hlim taka an lo hman ve nan an mamawh dan a hmuh ang zelin 'Envelope' chhungah chuan pawisa pek tur a dah nghauh nghauh a, uina rilru pakhat tê mah a pu tawh lo.

Driver rawn lêt leh chuan chanchin rawn sawiin kha nu khawngaihthlak tak khan pasal leh fa pahnih a nei a. A hnathawktu ber tlangvalin kum kal ta khan a boralsan a, pa ber hrisel lo, damdawi in luh ngai reng bawk avangin an harsa em em mai hi a lo nia. Tunah pawh an pa chu damdawi inah awmin a fanu-in a awmpui a, damdawi in 'Bill' pek tur pawh an lo nei lo chu niin.
Chu'ng thu an hriat chuan an nupa chuan an chek tlawk tlawk a. Pu Liansanga rilruah chuan buhfai tui ţha zet zet, kudam lama a 'Stock' ngei mai chu hre chhuakin a bag ngeia pek a tum khawp mai.
********
*******
Speaker-in sawmna a han siam leh chuan Johny-a rin ang ngeiin an ding deuh suau vek a. Inhlân thei lo, sawmna chhâng lo chu mi pali vel chauh an ni, chung zingah chuan Johny-a pawh a tel ran a.

Mahse thilmak tak mai a lo thleng ta. Speaker-in sawmna hnuhnung ber a siam dawn lai chuan thâwklehkhatah Johny-a thinlung chu Thlarau Thianghlimin a rawn luah ve ta tlat mai le! Thlarau Thianghlim chuan sual a nihzia rawn hriattirin, mi luhlul mittui chu ama'n duh lo teh mah se a rawn far ta zawih zawih mai. A zak a, inthup tumin a kûn tlat a. Mahse Thlarau Thianghlim chuan hna thawh chhunzawmin sawmna hnuhnung berah chuan Isua Krista chu Lal leh Chhandamtu-ah pawmin a pian tirh ata a vawikhat nan thinlung leh tihtakzetin a inhlân ve ta nge nge a.

Hetia Johny-a a inhlan lai tak hi pu Liansanga te nupa Pathian hmaa an ţhingţhit lai tak niin amah Johny-a tan an dilsak lai tak a ni a, an driver-in mi harsa-te hnena thilpek hnuhnung ber a pek lai chiah a ni bawk.
Chu'ng mi harsa zual, chhungkaw sawmpakhatte hnena thilpek, envelope kâwmah chuan he thu hi a inziak thliah a:
ISUA THILPEK
Buhfai no 1 avangin.
From
Kutdawh.
Tih hi a ni.

Hmalam hun thim zawnga thlir mek pu Liansanga te chhungkua chuan naktip lawka lo thleng tur Lal piancham chu hlim em emin an hmuak ta a. Ui lo va Pathian hnena an pek avang leh mi chanhai zawk an khawngaih avangin vanah ro an khawl khawm zel a, an lallukhum a chhah deuh deuh a, he leiah ngei pawh malsawmna an dawn belh zel dawn tih chu an la hre chh’awm zel dawn a ni.

(Krismas lo thleng turah hian chanhai zawk te tan, a tê emaw, a lian emaw, engemaw tal i ti ve dawn lawm ni? Pathianin i thiltih a theihnghilh dawn hauh si lo)
A TAWP TA

Ka Krismas hla phuah ve hi in lo ngaihthlak ve duh tak mialin:
Ramthar Pastor Bial Zaipawl
Ropui rawh se
https://mizotrack.wodemo.com/file/391237

Lal piancham hman nuam vek u le.

Re: KUTDAWH

Posted: November 15th, 2018, 1:34 pm
by TMAWII
Mas a hnai bawk a, up.