ZÂN VÂK (Completed)

Moderator: Ar eL' Khawlhring

Ar eL' Khawlhring
Posts: 75
Joined: December 28th, 2016, 1:46 pm

Re: ZÂN VÂK (Completed)

Unread post by Ar eL' Khawlhring » June 27th, 2018, 10:46 am

ZÂN VÂK - 7(Last)
(Sangtei Diary)
By: Ar eL Khawlhring

(Hei ka thawnthu phuah chawp zet, a taka thil thleng thei lo tih hriat reng mai min lo hlutpui ve a. Fiction, thriller fiction tak meuh meuh a ni tih min lo hriatpui tih ka hriatin lawmthu ka sawi e)

***************


Eng chen nge nikhaw hre lo va ka awm ka hre lo. Nikhua ka hriat ţan riai ruai chuan ka bul maia titi mawlh mawlh thâwm ka hria a. Ka beng hriatnate chu a la chawmawlh muih mai. "Ka pu, engtin nge hetah in lo awm leh daih theih? Rina khan 'Airport-ah ka vai liam' a ti ve bawk sia," tih ri ka hria a.
"Kolkata khawpui chhungah helna a chhuak a, muslim leh hindu-in buaina an neih avangin flight an 'Delay' rên râwn a, a hnuah an 'Cancel' zui ta alawm maw le," tia ţawng ri ka hriat chuan ka thil tawn chu ka hre chhuak ta uai uai a. Rapthlak ka ti lutuk hi ka â mai dawnin ka inhria. Ka taksa na ka hre lo va, mahse ka che thei chuang dêr si lo.

"Ka kal phawt ange, eng nge a an hriat nan ka rawn kal zawk a ni, a ţha vat turah beisei ang," a ti zui leh a, pên thlarh thlarh thâwm chu a reh zui a.

Chumi hnu a ka awm dan Sawma leh Puia'n mih hrilh leh dan chuan, ka mu chu ka tho hluai a, Sangtei te inah kal ka lo tum a ni awm e. Ka meng â ruai mai bawk sia, min lo dawm bet a, tichuan nurse-in mutna damdawiin min lo chiu a, ka lo muhil zui leh ta a ni.

Zinga ka han harh leh thung chu ka harh chiang vêk vâwk tawh hle mai. Sawma'n min lo riahpui a, meng phak chual hian a lo awm a, a mu tam lo vang tih a hriat theih.
Sawma chu ama chunga thleng leh nizan nikhua ka hriat loh hnu a thil thlen dan tlangpui ka zawt a, heti hian chanchin tlângpui chu min hrilh a ni:

"Khami zan a chinghnia chhuia i chhuak tih ka hmuh khan, silai la chhuak ve nghalin ka rawn um zui che a, ka rawn chhuah ve tur thu tumah ka hrilh lo. I liam deuh chauh sia ka rawn hmu zui ta reng reng lo che kha mak ka tih avangin chak leh zualin ka rawn ûm che a, kawngţum zawh ka nih avang leh thla a ên avangin ka kal chak hle na a, mahse ûm phâk tur i awm lo.

"Ka thlang mual aţangin kan piah mual a thil chê ka hmuh chuan nangmah i nih ringin hmanhmawh deuhin ka pan a, mahse ka hmu ta si lo che a. Mual pawng lai aţanga khua ka han chuan chiah tihah chuan ka ke bul lawkah hian hmeichhia, a taksa chunglam mihring, a hnuai lam ramsa hi a lo mu reng a. Ka phut zawk ruala light a ka han ên a ka hmuh chian em em mai chu i ţhiannu Sangtei hmel chu a ni, ka râp lutuk avang chuan ka thidang zui ta a ni. (Hei ngei hi mual lehlam aţanga mak ti deuh a ka lo hmuh kha a ni)

"Ka han harh chuan chinghnia chu a lo awm tawh lo. Ka mangang lutuk chu au chhuah ka han tum a, ka au thei ta hlek lo mai. Ka â ta nge ka mumang zawk ni ang tih pawh ka hrethiam tawh lo. Ka â chu a ni ber zawk e. Ka la hriat chhun chu êng de ve ve lam panin ka kal tawp tih chauh hi a ni.

"Ka pute in-a ka awm hnu hun engemawti hnu khan ka harh chhuak a, ka ţawng chhuak thei tawh tih pawh ka hria. Mahse ngawih mai kha ţha berin ka hria, ka thusawi tuman an awih duh dawn chuang lo. I rawn riah zan ngei pawh khan ka ţawng chhuak ţep ţhin a. Mahse ţawng chhuakin han hrilh che ni ila, Sangtei kha i hmangaih ber a ni bawk si, chu bakah mi â-ah bak nangin min ngai dawn lo tih ka hre reng a, chuvangin engmah ka sawi ta lo a ni.

"Ka mu lai chinghne û avanga ka thawh ţhin kha i hriat kha, a dika dik chuan ka thauvah min man a, chuti chung chuan min aikaih tlat bawk si. Chuvangin chinghne û na lam ka lo pan leh ţhin a nih kha. Nangmah khan min muttir lo la chu varanda thlang aţang khan zuangthlain anmahni ka lo pan mai âwm asin," a ti ta a. A mak tih bak chu sawi ngaihna ka hre lo. Tin, Sangtei a ngaihtuah chhuah loh theih si loh a, a hrehawm duh ngei mai.

"A nih leh nizan hmasa zîng khawvar hma khan engtin nge i lo lan hlawl theih ka kah hma khan?" ka ti a.
"A mak lutuk kha chu, thil mak a ni. Ka mumangah kha mi zinga kan thil tawn ang ngei khan, Sangtei hi i lo kâp a, tichuan ka harh zawk a. Ngaihţhat lohna hlir hian ka khat a. Chutah chhûngrila min turtu a nasat em avangin hostel panin kein ka rawn chhuak ta tawp mai a ni. Hostel thlen hmain Thapa te in lam ka rawn thlir kha torch light êng zet mai ka hmuh avang leh chinghne ngur thawm ka hriat avangin hmanhmawh zetin ka rawn tlan thla a, tichuan ka rawn au tuar che a, nang lahin i thal i lo thlah laklawh tawh si, ka tlai ta chiah a ni," tiin hrehawm tih hmel deuh hian a sawi a.
Chutah, "Keima duh thu a rawn kal pawh niin ka inhre lo, min hruaitu a awm ni berin ka hria," a tizui a.

Chutih lai chuan Sangtei pa chu a rawn lut zân zân a. Kei lah hrehawm ti deuhin amah pawh ka lo en mang lo. Chutah ka khum bula ţhutthlengah chuan rawn ţhuin, "Bawiha, min ngaidam rawh aw," a rawn ti ta mai a, a mitmeng lahin min en ngam hek lo. Chutia amah zawkin ngaihdam min dil daih mai chu mak hi ka ti nasa khawp a.
"Ngaihdam a! Keimah zawk hi alawm ngaihdam ngai zawk chu le. Ka pu, ka tihpalh takmeuh a ni," ka han tih chuan, "I thiam loh a ni reng reng lo, naktukah i chhuak thei dawn ni awmin doctor-te'n an sawi a, chuvangin in lamah engkim chiang takin i hre fiah tawh ang. Hei inleng awm lai laiin ka rawn chhuahsan a, i chanchin ka rawn ngaihven zawk a ni. Ka phei leh nghal phawt ang e," a ti a.
A sawi awmzia ka hrethiam chiah lo hle mai. Mahse hriat tur thil pawimawh tak a awm ang tih ka ring tlat. Aw, a nia lawm, Sangtei kha engtin nge khatianga chinghniaah a chan theih! Hriat chhuah ngei ngei chu a ngai rêng a ni.



Damdawi in aţanga ka chhuah ni tur a lo thleng a, hosteler sawm vel lai mai hi min la chhuak turin an lo kal a, min lo ngaihtuah hle a ni awm e.
In kan thlen fel chuan hosteler awm ang ang te chu ka pindan lamah an rawn lut sap sap a. Chutih lai chuan kawtah motor inhûng thawm a lo awm a, reiloteah Sangtei pa, Jenny leh Mapuii chu hmel ngui tak, mutmu tuah ţha lo tih hriat zet hian an lo lut hlawl bawk a. Puia chuan lo dawngsawngin, "Ka pu, tinge tun ang hunah te in lo kal duh zawk a? Inlengte in la ngah vanglai a ni awm bawk si," a lo ti a.
"A, engkim hi Rina hian a hriat chian hma chu ka rilru a nuam thei lo, ngaihdam ka nih dawn leh dawn loh lah ka hre si lo, ka beisei phâk pawh niin ka inhre lo," Sangtei pa chuan a lo ti a, a thusawi awmzia kan hrethiam lo tlang hle mai.

"Eng pawh ni se, hei ka fanu diary hi han chhiar teh Puia, a riin aw," a ti a. Hosteler ho chuan chhuah mai an tum lai chuan Sangtei pa bawk chuan, "Khawngaihin chhuak lo teh u, engkim hre ve u la ka duh a ni," a tih takah chuan a rem remah chuan an ţhu leh ta hlawm a. Tichuan Puia chuan sangtei diary chu kan vaia hriat tur chuan a chhiar ta a ni.

SANGTEI DIARY

"Sir Rin, hei hi i lehkhathawn tur angin ka diary-ah ka ziak e. Sawma damlo riahpui tura i phei khan hei hi ka ziak ţan nghal a ni, sawi hmaih tam tak a awm thei ngei ang. A hmasain ka pa nen hian hian i ngaihdamna ka dil hmasa e. Thudik kan thup chhan pawh hi i chhiar hunah a fiah vek ang a, min ngaihdam theih hram pawh ka beiseiin ka pa pawh, tin Mapuii ngei pawh ka ngensak e.

"Zoology subject la ka nih i hriat kha. Ran leh nungchate hi ka hmangaih a, an chanchin zirna kawngah hian ka tui hle a. Kan college aiawh a Darjeling sahuana nungchate chanchin zir a, America aţanga an chah Mrs Thomson, 'Animal lover' hnungzui tur a mi pahnih tirh kan nih khan nang chuan min la hre kher lo vang, record i en chuan i hmu mai ang. Khami ţum khan India ram chhung college hrang hrang aţanga an tirh zirlaite nen ramsa hrang hrang awmnaah kal kualin an nungchang leh chanchin kan zir nasa hle. Mrs Thomson-i chu ramsa hmangaihtu tih takah ramsate pawh khan anmahni hmangaihtu chu an lo hai hauh lo. Ramsa kawlh awmna tih lohah kha chuan min luhpui zel a, ani kha chuan a titlangnel thei zel mai.

"A tawi thei angin ka'n ziak ang e. Khatia vengtute'n min fan kualpui naah khan chinghne damlo pakhat, bawma an khung hran chu min enpui a. Doctor-te'n bâwm aţanga chiu tur a an han lâk chhuah chuan chu chinghnia chu chau tak a nih thu leh a hlauhawm lêm lo tia an sawi avangin en chian duhin kan kîl hnai ţiau ţiau a. Chutia hnai taka kan en lai, an chiu dawn lai chuan a rawn tho thut a, ka kerêkah min hap ta mai a. Vengtute chuan rang takin lên a khuhin an chiu zui nghal a. Ka ke chu a nain a thî duh par par hle.

"Office-ah rang taka min hruai lutin doctor chuan damdawiin min chiu a, min silfaisakin a tuam nghal a, tun thleng pawhin a ser nasat avangin kekawrtlawn lo chu ka hâk ngam tâk loh hi. Tichuan kan châm chhungin midang ho pawh chu ka zui ve thei ta lo. Tlema a hil deuh hnu chuan Mizoramah min thawn haw ta a ni.

"Ka hliam chu ka pain min enkawlsakin a dam chak hle mai. Pawnlângah chuan ka dam var ta, mahse thil mak leh pawi ber mai chu a lo thleng ta a ni:
Thla a rawn dê a, ka awm dan hi mak tihna riau ka nei ta tlat mai. Ka zauthau a, ka awm hle hle thei hlek lo va, a zan têlin a nasa ta telh telh mai. Ka awm dan ka hrethiam lo va, hlauhthawn ahnekin nuam tih riauna hi ka nei tlat pek zawk a. Zan a ka muhil lai te hi ka harh thut a, inchung sangah chhovin ramhnuai lam hi ka thlir reng a, ramhnuai hian ka lung min len vawng vawng mai a ni.

"Thla bial hma zan chiah a ni. Zan laiah ka mu ka harh leh hlawl chu keimahah thil dik lo a awm tih ka hre nghal a. Chutah ka taksa ka han en chu ka ţe tuarh a. Ka bân vel lo hmul dur avang chuan mangangin ka pa ka au tuar tuar a. Ka pa chu mut kawr nen hmanhmawh zet a lo lutin min han hmu chu mak tih luat vangin a ding chawt a, chêt zai a rêl lo. 'Ka pa' tia ka han auh leh takah chuan harh chhuakin a pindan lamah a tlan phei a, damdawi mum hi rawn lain pathum min eitir a, mutna damdawi a ni ngei ang, ka muhil ta siai siai a. Zing kara ka han harh chuan ka lo pangngai leh vek tawh.

"Ka pa chu a mangang hle mai. Midang han râwn buai dawn se thil zahthlak niin kan hria a. Amah doctor a lo ni tho bawk nen, chinghne min seh vang a nih ringin ramhmul damdawi aţanga a siam, ui â seh damdawi te chu min eitir a.
Zanin hi thla bial zan a ni tih ka hre kiau mai si, keimahah thil mak lehzual a lo thleng dawna hriatna ka nei bawk nen, rilru a hah kher mai. Zanah phei chuan ka pa chu chu min awmpui turin ka ti ta ngawt a.

"Khua pawh a thim fel meuh lo tihah chuan chung lamah thla a bial lian hle tawh mai. Kei lah chu ka za ruai tawh bawk si. Ka pa chu ka bulah a ţhu ran a, chiang takin min en reng bawk a. Dar 8 a rik chuan ka taksa a rawn danglam ţan ta. Ka taksa a rawn lian a, hmul a rawn chawr ţuam ţuam a, ka thawmhnaw hak lai te chu a ţet phawk phawk a. Ka pa chu tlan chhuak nghalin a rawn luh leh chuan chinghne lian zetah ka lo chang fel dêr tawh.

"Ka pa chuan a fanu ka nih miau avanga min hlau duh lovin syringe lianpui a rawn ken chu ka khêlah chuan a chûm lût pawp a, damdawi zawng zawng chu a hmet lut nghal a, ka pa chu ni lo se ka sawisak nasat dan tur chu. Mahse ka rilru a chanve vel chu mihring rilru a la nih miau avangin ka inthunun thei hram a, mahse damdawi hnathawh avang chuan ka let tawp a. Ka harh leh chuan zing khua lo vâr tawhin mihring pangngai thlap ka lo ni leh tawh. Mahse 'Werewolf' mai ka lo ni ta tih ka hriat chhuah meuh erawh chuan ka rilru na lutuk chu ka ţap ta hawm hawm a.

"Hetianga chinghnia-a ka chan hi a rei berah kâr khat bak a ni ngai lo. Ka nu kan sûn zo chauh a, hetiang hi ka nih zui ve leh avang hian ka pa rilru a hah thei hle a, zu pawh a in phah ta zeuh zeuh mai. Miin min hriat chhuah kan hlauh si avangin inlêng pawh kan nei ţha duh lo va, ka pa mizia inthlâk ta avang hian mi paw'n rawn lên enah pawh an en lo.
Chinghnia-a ka chan a, ka chhuah dawn hian ka pa hian min dan a tum viau ţhin na a, tihngaihna tak pawh a hre bik tawh lo. A chhan chu ramhnuai hian min ko tawh ţhin si a, ka inthunun zo lo va, ka chak em em mai bawk si. Tukverh bar ka sâwi chhiat pawh vawi tam kan siamţha tawh, mahse tihngaihna a awm lo.

"Mahse werewolf an sawi ţhin dang, setana hnena thisen a inthawi avang te a chinghnia a chang ka nih miau loh avangin pawi khawih duhna lian tham, thisen chhuah duhnate engmah ka nei ngai lo. Mihring ngat phei chuan min khawih hmasa a nih loh chuan tihlêt ka tum hek lo. A chhan chu ka rilru chanve mihring a nih miau vang a ni.

"Darjeeling lamah chinghnia min sehtu chu chinghne â nge a nih chian tumin ka pa chu a zin a. Mahse a thu rawn hawn chu, chu chinghnia chu an enkawlna lamah a tlân chhuak tih hi a ni. An rin dan phei chuan chinghne fing zet, natna tak tak pawh nei lo niin an ring chutianga tlân chhuak thei chu. Chu thu chuan keimahah phûrna riau hi min pe ta tlat mai.

"Thla bial dawn hnaiah chuan darjeeling kal tumin a rûkin ka inbuatsaih a. Ka thuamhnaw tur leh a ţûl ang chu ngaihtuah lâwkin ka dah chhuak sa diam a. Chutah ka pa lehkha tur ziakin ka zin dawn thu te, ka rei vak dawn loh thu leh min lo ngaihtuah lo va, min lo zawng buai lo turin ka ti a, lehkha chu hnutchhiahin zin tur chuan ka chhuak ta vang vang a.

"Darjeeling sahuan aţang chuan chinghne chêttlatna hmun chu ka chhui nghal char char a. Chinghne mihring ka nih tawhna aţang chuan chhui ka harsat lo. Teesta luikamah chinghne rual hnu chhui zelin evergreen forest-ah ka chhui lût ta a. Hetah hian awlsam takin Darjeeling sahuan a min sehtu kha ka chhui chhuak ta a ni. Chinghne naran ka nih ve loh avangin chu chinghnia nen a kan insual chu ka seh hlum awlsam hle a. Chutah chinghne dang pali min lo hap ve zuau zuautute chu an hruaitu ber ka seh hlum takah chuan meikhupin an awm ta a ni. Tichuan chu'ng ho zingah chuan zan thum zet chêngin Mizoram lam ka rawn pan leh ta a.

"Mizoram ka thlen chuan ka chau lutuk hi thih hlauhawm khawp a nih avangin ka pa leh doctor thiam rual te chuan 'Medical check up' min nei ta a, chuta result min hrilh chu thisen cancer chance sang tak nei tih a ni, ka lo cancer reng tawhin an zêp pawh a ni maithei bawk. Rilru nat hi a zual ngawih ngawih mai.

"Ka pa chuan class kal a phal tawh lo va, mahse keiman kal ka duh tlat avangin min hnial duh ta bik lo va. Tichuan library-ah botany subject-ah insâwrbingin ka pa min hrilh angin hnimhnah aţanga damdawi siam chhuah âwm chi te ka zir ta tlauh tlauh a.

"Hetah tak hian alawm sir Rin, ka ngainat ţanna em em che chu, a bak chu i hriat kha. Ka nihna dik tak pakhat zawk ka hrilh che a, mahse chinghne mihring ka nih erawh ka hrilh ngam ta ngang lo che a ni, chân che ka hlauh êm avangin.

"Zan khat kan huan mawnga chinghnia a ka chang lai tak chu ka ţhian ţha ber Mapuii hian min lo hmu hlauh mai a. A hnu a min zawh lehin ţang teh mah ila min lo hmuh chian êm si avangin ka inpuang ta vek a. Engkim zêppui min tiamin a theih angah chuan ţanpui min tiam bawk a, ţhian ţha hi an lo va hlu tak êm. Ka pa pawhin ani bak chu inlêng neih a duh ta miah lo bawk. Tin, Jenny hian min hre deuh nia ka ngaih avangin biak ţhat harsa ka ti deuh ţhin.

"Ka chinghne ţhiante'n min rawn zawn chhuah theih dan kha alawm tun thleng a ka la hriat theih loh, mahse min rawn zawng chhuak ve miau si. Min rawn zawng a ni tih erawh kha chu ka hriatna danglam tak hmang hian ka lo hre lâwk daih tawh thung. An rawn thleng a ni tih ka hriat tirh a ka hlim dan leh ka hlauhthawn si zia kha. Hla tak aţangin an rawn û a, keiin kawmthlang ram aţangin insûm thei lovin ka lo chhâwn ta a nih kha.

Ka ţhiante nen kan inhmuhkhawm hnu khan vawi khat tê pawh mihring kan khawih lo va, ei tur kan mamawh miau avangin ran erawh kan suasam zauh zauh. Bâwng note kan khawih ţum a kan ţhian pakhat kap hlumtu hmel ka hmu chiang kha chu ka mihring rilru a harh zawk mai. Sir Rin, nang ber kherin i rawn kâp ka hmu kha mak ka tiin ka ţhiante'n i silai tlawlh lai a rawn seh an tum che khan ka khap zawh loh teuh zia kha.

Khatiang thil a thlen tak avang leh nangin chinghnia i châng ţhin a, i haw em em bawk tih i ţhianpa Puia kâ ngei aţanga ka hriat khan Aizawl khaw chhungah sa pelh ka duh vak ta lo.

Mahse maw, mihring rilru chanve chu ka pu ngei na a, ka rilru hi ka thunun zo lo fo. Tum lawk sa em em pawh ni lovin in awmna hnaiah mahni pawhin kan lo kal leh ta fo mai.

"In hostel thlang a min hmuh kha i la hria ang, u Sawma nen kan inhmuh zan kha. Ka ţhiante an rawn thlen mai theih loh avangin in hostel thlang aţangin insûm zo lovin thâwm ka rawn chhuah ta a nih kha. Nangin min rawn ûm zel si a, chuvang chuan mual lehlamah ka kal ta a. Mahse ka rin loh deuhin mi pakhat ka hmu tlat! Mihringa ka chan chuan min kah loh beiseiin mihringah inleh ka tum ta a. Mahse ka bul maiah rawn ding a, u Sawma a ni tih ka hriat chiah khan thil a pawi khaw lo zo ta. Ka kâwng chin chung lam chiah chu mihring a la ni hman tihah chuan min rawn hmuin chiang takin a lightin min rawn ên a, min hre chiang khawp tih ka hria. Mahse min râp luatah aniang chu, a tlu tawp a, nikhua a hre lo zui ta a nih kha. Ka rilruah chuan chutia min hretu chu dahţhat nghal mai ka duh rum rum a, mahse ka mihring rilru zawk chuan a thei ta ngang si lo va, engtinmah ti lovin ka kalsan ta a nih kha.

"Mahse khami hnu aţang khan lungmuangin ka awm tawh reng reng lo, u Sawma khan a hrilh che hi ka ring em em mai bawk si. Nangin min hriat chhuah hunah eng nge ka sawi ang, engtin nge nang hian min tih ang tih ngaihtuah a hlauthawng reng rengin ka hun ka hmang ţhin. Tin, i kut tuar ngeia thi tur a inngaih deuh tlatna ka nei zui bawk.

"U Puia nen ram lama in kal ţum a, ka ţhiante silaia i tin laia ka rawn thlen kha i la hre reng ang. Ka ţhiante i kah hlum ai chuan tiin an hmaah ka ding a, nangin 'Chance' min pe a min kâp ta lo kha ka theihnghilh ngai lo.

"Thla bial zan a i lo lên ţuma ka ţhiante'n min rawn koh laia ka khurh nasat zia kha i la hria em? Ka inthunun zo lo lek lek a, mahse nangin hmangaiha min kuahna khan chinghniaah min chantir ta lo mai chauh a nih kha. Ka ţhiante'n min au beidawng a an thawm a reh khan thlamuangin ka awm ve thei ta chauh a ni.

"Ka tana rinawm em em Mapuii hi a châng chuan ka thîk lek lek ţhin, in inkawmngeih êm avang hian. Ani pawh hian a ngainain a hmangaih che niin ka ring hial a awm danah hian. Mahse ka natna pahnih min hriatpuitu hian i lakah min sawichhe hauh lo vang tih hi chu ka ring tlat, a chhan chu a thutiam a sût ve mai mai ngai lo. Ka thîk a ni tih a hriat vangin i laka inlâk hran hret a tum a. I rin ang lo deuh pawh a i hmuh fo thu min hrilh ţum phei chuan nâ a ti hle asin. Sir Rin, hei hi i lo hre dawn nia: Mapuii hi misual ni lovin mi ţha lutuk a ni tih hi. Engkim deuh thaw hi kan inhrilh tawn vek a. I ngaih anga mi hur leplêr ni lovin, ks leh ruihhlo ngaite chhawmdâwltu social worker, an bialah phei chuan naupangtê mah ni se an pi, hotu ber a ni asin. A inchei leplêr dan te kha chu hetiang mite zingah chuan a ţul châng a awm fo tih i hriatthiam mai ka ring.

"U Puia nen an in-a in lo awm zan a huan mawng aţanga a rawn chho i lo hmuh thu min hrilh a. Eng nge a rawn ken chhoh erawh i hre hauh lo vang tiraw? Ka thawmhnaw a nih kha. Chinghnia a ka chan a ţul tawh miau chuan kawmthlang ramah khan min kalpuiin, miin min hriat chhuah loh nan ka thawmhnaw a hawn leh a ţul ţhin asin. A nihna te pawh engmah sawi lo tura min tih avangin ka zêp thei hram hram a, mahse ziak talin hei ka dah e. Ka taksa dinhmun a hniam ta riau va, hengte hi hriat chhuah lohin a awm palh ang e. Ka boral a nih pawhin ka ţhian rinawm hi lo thlahthlam hauh suh ang che.

Kolkata-ah in check up kan ngai si a, ka ngai ngawt ang che. I bula ka sawi ang khan ngaihţhat lohna hlira ka khah tawh avangin leh inhmu tawh lo tur riak a ka inngaih avangin he'ng thu hi ka ziak a nih hi.

---------

Phêk hran daihah:

Flight an cancel ta sia, tum loh deuhin kan lo haw leh. Sir Rina min rawn hruai turin chah leh mai kan tum a, kan phone tlang thei lo.

---------

Inah kan awm leh ta vâng mai, thla a bial bawk si, kolkata kan kal hmain ka ramhnuai ţhiante ka hmu leh thei hlauh dawn e.

Ka natna hi damin reh thei tak ang maw!

----------

**************

Puia lehkha chhiar hria chu tumah mittui tla lo rêng kan awm lo. Sangtei pa chu rawn ţap chhuak hawkin, "Bawiha, min ngaidam rawh aw, kan va han bum rei ngai che ve, tihngaihna dang ka hre bik ngang lo a ni" tih pahin min rawn kuah a, a hnuk a ulh ţeuh mai. Chutah, "Tunah zawng fa ka nei ta lo. Ka fapaah i ţang duh ang em? Nu leh pa nangin i chân tawh bawk si," min ti ta a.

Chutih lai chuan ka dâr a dîmtea min rawn khawihtu hmel chu ka han en a, Mapuii chuan min lainat hmel takin, mittui parawl kiangin min lo en reng a. Tunah zawng, a hmela rinawmna inphûm ru tlat chu ka hmu thiam ve ta.


**************

Thlân lung mawi tak, marble to chi tih hriat tak mai a hming inziak chu:

Lalrosangi
Kum 23
Lei hrehawm kalsanin Lalpa hnenah a châwl ta.
Tih hi a ni.

Chu thlân lung chungah ngei chuan kan hmangaih kal ta ngai êm êmin, thinlung hmunkhat pu a mittui tla zawih zawihin Mapuii nen chuan kan ţhingţhi dun a.

A TAWP TA



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)