ZÂN VÂK (Completed)

Moderator: Ar eL' Khawlhring

Ar eL' Khawlhring
Posts: 75
Joined: December 28th, 2016, 1:46 pm

ZÂN VÂK (Completed)

Unread post by Ar eL' Khawlhring » May 17th, 2018, 10:10 pm

ZÂN VÂK
By: Ar eL Khawlhring

Ka hnathawhna lam pan a ka kal tur chu ka peih lo ngei mai. Mahse ţhulh ve mai mai a rem bawk si lo. Nizan lamah ka meng chau deuh hlek bawk nen, chhûn lam chu hnathawhna lamah ka mutthluk ka ring nghal khawp ringawt. Hosteler ho pawh kha an chau ve khawpin ka ring.

Ka pa min rochun concrete building pakhat Aizawl khaw hmawr lama mi chu ka enkawl ve a. Ka pa hian kum 5 kal ta khan min boralsan avang leh fapa mal ka lo nih avangin engkim hi ka kutah a awm vek tawh a. Ka nu lah ka hre chiang hman hek lo, kum 2 mi ka nih laiin lungphu chawlin min lo boralsan tawh a, ka pa erawh chuan college ka chhuah thleng chuan min dampui ve a. Mahse tunah zawng fahrah mai ka ni ta.

He building, ka pa min rochun hi kum 2 kal ta khan kan chei ţha a. Rawng te hnawih tharin kan chei hnûm ve deuh a. Chhâwng hnih a ni a, a zau tham bawk a. Partition wall siam thliah thliahin pindan 10-ah kan ţhen a. Pindan pakhatah mi pathum zel chên theih turin khum pathum zel kan dah a. Tichuan common room, dining hall, kitchen (Tihian a chiang tho e a) a awm bawk a. Chu chu Mens/boys hostel atan kan hmang ta a ni.

He'ng zawng zawng hi ka ţhian ţha ber Puia, naupan lai aţanga ka kawm ţhin chuan min tihpuiin min enkawlpui vek a. Zan lamah keiin ka enkawl a, chhun lamah Puia'n a lo enkawl ve thung a, warden pahnih kan awm tihna a nih chu.

***************

Office-ah chuan hming va sign in ka lut kawi zuai a, tichuan library-ah chuan ka lut tlang nghal a. Ka hna hi tharum zâwng chuan a hahthlak tehchiam lo nângin ninawm châng erawh a tam ve ţhin khawp mai. Lehkhabu chin fel, lâk khawm, ziah fel, bo thlau a awm em? A chhia leh thler, a phêk tla a awm em tih en fel te leh library hmang mamawhte lo puih chu librarian nih chuan ka nitin hna a ni a. Fel taka chhinchhiah(record) chu ka hna pawimawh ber a ni.

College zirlai ho chu an rawn lut ţak ţak a. Chhun chawlh lai a nih avangin library chu a lûn leh hle dawn tih ka hre mai.

Ka ziah lai mek ka ziah fel thawkhat hnu chuan lehkhabu hawh chhuah emaw, kim lo, chhinchhiah si loh ka neih palh takin tiin ka en kual a. Lehkhabu chhah leh hlui deuh hlek tawh pakhat, almira book shelf aţanga pawh thlak ka tum chu a lo nghet fun mai. Ka han pawt leh deuh a, a ţang tlat. Tinge maw ni le tia ka han phih vak chu ka hma zawn aţang chuan hmeichhe pakhat aw hian, "Awi," a rawn ti ţhat a, lehkhabu ka lak thlakna, lehkhabu leh lehkhabu inkar âwng aţang chuan hmeichhe pakhat hmel hi a lo lang hlawl mai, ka phu ţep nghe nghe a. Ani zawk lah chu a phu chiang em em mai leh nghal.

Chutah zah hmel tak hian a sen ţan ţan a, "Tihpalh sir," a rawn ti sep a. A zak hmel chu a ţha reuh kher mai.

"Oh! kei pawh ka tihpalh, lâk ve i tum tih reng reng ka lo hre lo va," ka ti a, ka nui hawk hawk a.

Kan lehkhabu dahna chhuar reng reng hi steel almira, feet 6 vel a sâng, chhâwng 5 awm chi, bang nei lo, lehlam lehlam aţanga lehkhabu lâk theih ve ve a ni a. Lehkhabu kan rem bichilh a, insi thlap a kan rem avangin lehlam aţanga lehkhabu lâk thlak lo tum ve nen chuan kan inhmu thei ţhin lo va. Tunah pawh hian lehlam lehlam aţangin, kan lehkhabu lâk thlak duh a lo inan avangin kan lo pawt tawn dun ngat ngat a lo ni.

Lehkhabu chu en fel duh vang chauh a lâk tum ka nih avang chuan amah zawk chu ka hmantir a, ani chuan nui sen sen chungin lawm takin a la ta a. Chuta chinah phei chuan a lehkha chhiarna hmun aţang chuan min rawn melh zeuh zeuh reng niin ka hria. Kei pawh chuan ka ţhutna aţang chuan ka lo va melh leh ţhin. He nula la naupang ve tak hi kum 3 chhung zet chu library-ah hian ka hmu fo na a, a hmelţha tih mai bakin ka ngaihtuah chhunzawm ngai lo. Mahse tunţum chu engemaw tak a awm tlat mai, ka sawi thiam si lo. Mahse ka inngaihtuah chiang a, mahni college zirlai chutia ngaihtuah deuh vung vung mai chu ka inthiam leh chiah lo va. Lehkhabu a rawn dah kir leh chuan min rawn melh zeuh a. Kei lah chuan chiang takin ka lo en si, a lai hmel chu a sen ţan ţan a, a hmuhnawm reuh ngei mai.

A chhuah fel hnu chuan a lehkhabu rawn dah chu ka han en a, botany bu a lo ni a. Register-a a hming sign chu kan en leh a, Lalrosangi Bsc final semester zirlai a lo ni. College a lo chhuak ţep tawh chu niin.

**********

Current a awm lo va, chuvang chu ni maw, thla bial pawh chu a ėng zualin a mawi zual bik riau hian a hriat a. Hosteler ho nen chuan inchung zawlah guitar perhin kan zai ţhup ţhup a, a hlimawm hle mai. Kan hostel hi a va daifêm deuh hlek a, mahse a chhuahkâ a remchâng thungin motor a lut thei vek bawk. Tin, a compound hi a rem bawk a, infiamna tualzawl pawh kan nei ţha hle. Hetiang a nih vang hi nge ni, mi pawh hian min rawn pan riau a, hosteler seat pawh an inchan lo hial zawk a ni. Ka pa boral tawh chu ka han ngaihtuah a, hetianga ram ţha leina châng a lo hriat avang hian thil a chhût thuiin a fing hlein ka hre nghe nghe a.

Chutih lai chuan kan râlah sihal an û chuah chuah a. Kan thlang ruam aţang chuan zan sava an chiar leh niai niai ţhin bawk a. A khat tawk hian kawr ruam khâwk deuh ram ramin mutê ni awm tak hi a kiu leh vawng vawng ţhin a. Kan naute ho chu an zai tui bawk a, chutiang lam chu an ngaihsak hman lo tih a lang reng mai. Mahse kei, chhung leh khat pawh nei tawh lo tan chuan chû'ng, zan laia nungcha hrâmte chu khawharna thlentu hlir a ni ve thung. Lehlamah thung chuan zai thawm awm ta lo se, dawihzep deuh tan chuan a rapthlak thei lek lek bawk ang he zan awm dan hi.

Hosteler zinga a upa ber hi kei aiin kum 2 chauhin a naupang a. Tin, midang reng reng nen pawh kan inthlau viau lo hlawm. Naupang deuh kum 20 la tling lo chu mi pathum bak an awm lo. Chuti chung chuan a in neitupa leh warden ni kawp ka nih vang zawk nge, mi hi an zah der ve em em a. Mahse ţhian ang vek a kawm hi ka duh ber zawk. Mipa rual awmkhawm ta nâ chuan a changa zahmawh sawite hi an ching ve tih chu ka hre reng. Tin, an chhuahna aţanga an rawn haw hian zu rim nam zauh an ching tih pawh ka hre reng. Mahse ka bulah zahpuiawm leh ngaimawhawmin an awm ngai hauh lo thung.

Hostel chhungah zu leh ruihtheih dang lak luh kan khap a, pawn lamah an lo va ti ve lawp lawp a nih pawhin rawn pâi lut kan hriat chuan chhuahtirna dân kan zam sa vek a, tumahin an tih luih kan hre ngai lo, a ruka an lo ti ţhin a nih loh chuan.

Chhûn lam ka han ngaihtuah kir a, Lalrosangi bawk kha rilruah a lo lang leh ta. Engati nge kha leh chen ka lo hmu ţhin tawh a, college a chhuah dawn hnaihah chauh hriatchian châkna a ka lo khah tak mai le! 'Kei zawng, ka fin a tlai leh nge nge ţhin, te ka ti rilru a. Eng ka ti ta nge ni kei hi, hmeichhia ngaihsakna reng reng nei ngai lo hian kan zirlai kei aia kum 10 dawn laia naupan hmel leh nghal ka ngaihtuah ta vung vung mai. Ka inthiam lo, inthiam rilru leh thul. Hmn, pawi mai mai lo ngaihtuah ringawt te chu ka ti rilru leh lawi si.

A nui hmel leh zak hmel sen deuh ţân ţân te ka mitthla lai tak mai chuan kan ţhenawm lawkah chuan sihal hi ring em em mai hian a rawn û phut a. Kan phu chiang hlawm bawk aniang, kan ding nghal suau mai. Hosteler ho chuan inchung aţang chuan chu sihal û na lai hriat tum chuan an bih nghal huang huang a.

Chutah râwl ring rapthlak em em mai hian a rualin pathum vel tur hi an rawn û leh a. An râwl chu a hrawl kher mai. Chutih rual chuan kan ţhenawm, kawmthlang lawk a gurkhali nupa kel 20 vel zet vulh te chu an ţe ta chûl mai le!

Ka roomah ka tlan thla lawk a, ka pa min hnutchhiah ulhbun silai chu la chhuakin a mu ka thun nghal a. Ka chhuah dawn lai chuan Sawma, hosteler zing a ka rualpui ber chuan min rawn um zui ve nghalin a phone light chuan min rawn ên a. Kan ţhenawm gurkha te nen hian kan inhlat lo na a, kan inkarah hian kawr ruam khawkrawk zet, kal har deuh mai a awm avang leh kan phone light hman chu duhthu a sâm loh em bawk avang chuan minute 5 velah kan thleng ta hram a. Mahse, archhiara ar dawkdawlâk vak vak thâwm lo chu thâwm dang engmah a lo awm tawh lo.

Chutah gorkhali te nupa in lam chu panin, "Thapa," tiin ka han au vak a, chutih rual chuan ka ke rahna hma chiahah chuan thisen tharlâm tak mai chu ka hmu nghal a. A buak dan tehnuaih leh chu lai hmun phut nasa dep dup lutuk avang erawh chuan Sawma nen chuan mak kan ti dun ang reng hle mai.

"Thapa"

Kawngkhar kalhna chu a ri rak a. Kawngka chu tlem a rawn inhawng a. Chuta Thapa mitmeng kan va hmuh chuan ngaih tiţha lo thei zawk khawpin a ţit hmelin a zâm hle tih a hriat mai. Kan hmel a hmuh takah leh ka silai ken a hmuh takah chuan tlem chuan a thlamuan hmel ta deuhin a hriat a.

Inchhunga kan han luh chuan kil khatah Thapa nupui Aruna-i chuan a fa sên chu pawmin a hlauh avangin a hmel chu a lo dâng var pap mai.

"Thapa, in ar a seh em ni?"
"Ka pu, seh lo. Kel seh."
Kan nuih a za deuh a, Sawma nen chuan kan khi dun sak a.

"Kel maw a seh a?" ka'n ti leh kher a. Sihalin kel a seh chu ka ring lo hulhual.
"Aw, pahnih seh lawm." A ţawng te chu a la khû dar darin a thil tawn chuan a la ţhawng hle tih a hriat a.

Sawma chu a lo phun sup a. Dik tak chuan a awihawm lem loh em alawm. Sihal chuan a ngam tawk ar bak a seh kan ring lo hrim hrim. Chu pawh zanah leh nghal. Mahse zan thil pawh ni se a û ri kha chu kan hre hnai ve viau lawi si a.

Chutah ngaih dan ka nei thut a.

"Thapa, sihal chu eng tiat nge?" ka ti a.
A han sawi dawn a, a sawi thiam mang hauh lo mai. Zaizirin a han sawi ngial a, kan hrethiam chuang lo nain a len hmel khawpin ka hria a sawi dan chuan.

"Bawng tiat em?"
"Tiat lo, bawng tiat lo."

"Ui a tiat em?"
"Aih tiat lo, ui tiat lo."
Sawma chu a lo nui huk a. Mahse Thapa leh Aruna-i chu an nuih a za ve hauh lo.

"Ui palian aiin bora maw?"
"Aw bora bora ka pu."
A mak hle mai, dawt a sawi hmel bawk si lo va.

"Eng rawng nge?" ka ti leh a. A sawi leh mai thiam si lo.

"A dum em?"
"Aw dum chu dum."

"A var a tel em?"
"Var chu var."
Sawma chu a lo nui leh pût pût tawh.

"Rawng dang a la awm em?"
"A sen," a la ti tak deuh deuh. Sawma chu baw hawk hawk khawpin a lo nui a.

Chutah, "Thapa, hlau lo u la, a lo kal tawh lo vang. A lo kal leh chuan hei silai ka nei a, ka kâp ang," ka ti a. Tlem chuan an thla a muan phah ve deuh chuan ka hria.

Sawma nen chuan haw pahin kel thisen awmna lam chu kan han chhui zui deuh a, mahse kan êng neih a chau em mai a, rei chhui lovin kan kirsan leh ta a.

Hostel kan thlen dawn chuan han din khawmuan det pahin, "Sawma, eng angin nge i ngaih?" ka'n ti teh tawng a. Sawma chuan, "Hriatthiam har ka ti khawp mai. Thapa khan a sawi nawi sia, a sawi hmangah kha chuan Chinghnia te hi a ni thei mai lo maw ka tia, mahse Mizoramah Chinghnia a awm tawh lo an ti bawk sia," a ti a.
"Kei pawh ka rin dan chiah, i ţhiante bulah chuan a mak danglam zawngin lo sawi suh aw," tiin ka mangţha ta a.

Mut tum a ka inbuatsaih mek lai chuan kawtah bike a rawn ri thlarh thlarh a, Puia pawh chu a rawn lut zui ve ta a. Kan zanin hun hman chungchang leh chhûn lam a ka thil tawn vel ngaihtuah chhunzawm mai mai ka duh tehreng nen, Puia chuan zanina computer class a pek nula, chhe lo a tih thu leh an inbiak ţhat thuin a rawn phûl sateh a.

"Ninawm, chhe leh awm em mai a," ka lo ti hlak a.
"A chhe miah lo, hei en ta che," tih pah chuan a mobile phone-a an selfie dun chu min hmuhtir nghal a. A sawi ang tak chuan a chhe lo hle mai. Ka'n en chian deuh chuan college library-ah ka hmu ve fovin ka hre leh nghal.

Sawi tak ang khan Puia hi ka ţhian ţha neih chhun a ni a. Tihian min pui turin ka sawm ve chawt a. A nu leh pain an lo rem ti ve hlauh bawk nen. Ani chhûn lamah hostel-ah lo awmin zan lamah computer class mimal inah hlawh ţha tak neiin a pe kual ţhin. Kei ang lo takin nula lam hi chu a mîsâ em em a, nula chhe lo chanchin min sawipui peih lutuk te hi ka lo ning ţhin. Mahse vawiinah zet kha chuan ka thinlai luah ţan veng vengtu kha chu ka tawng ve a nih si kha maw... Hetiang kawng ni lo, kawng dangah erawh kan mizia a inangin kan inngeih dun hle a ni.

************

Ka rilruin Thapa te thil tawn vel kha ka vei bawk a, tûk dang a hosteler- ten chaw ei thlêng an khawn rik tluar tluar tawh pawh a mu ţha leh ţhin khan, tukin zet chu vai pathian ka thawh khalh der mai.

Thawm dîm ang reng takin ka hmai te phihin ka intifai a. Exercise la ngai hlei lo khan thawh hma ve manah ti a tumbailek hmanga exer ka lak kual vak hnu chuan kâwl pawh a lo êng ta. Chutih lai chuan kan hostel chaw chhumtu(cook) pu Zawma pawh chu choka lamah a lo ri ve rak rak tawh bawk a.

Ka chempui chu la chhuakin Thapa te nen kan inkalpawhna kawng a hnim ţo hnawk te chu ka sâm phei pah a. Thapa-te in ka thlen dawn hnaih chuan tho thlawk ri deuh mam mam ka hriatna ka kalna thlang chu ka han en a, kel notê ruang hi a lo let ngât mai. Chhukthlain ka bêl chiang nghal a. Kel note nghâwng chu ha hriam taka sehna tih hriat tak hian a lo khuar dûk a, a bul mai chu bung ţep khawp hian a lo rêk ngût bawk a.

Hnuhma ka han en chuan chulai hmun chu a lungţhil hmun riau avang chuan engmah ka hre thei lo va. Mahse Thapa-te in lam pan a ka pên leh chiah tihah chuan lei nêm laiah kel note sehtu hniak ni awm tak chu ka hmu ta a. A hniak aţang chuan pakhat mai chauh niin chu sa chu a hrawl ve thawkhat hle ang tih chu a rin theih a ni. Tin, a ke chheh rual dan aţang leh a hniak inhlat lam teh chuan chu sa chu a tlanchhia a ni ang tih a rin theih bawk. Sawma nen a kan phone light kha hmuin a sa seh pu tawh lovin a tlanchhia a ni ngei ang.

Thapa kel huang ka va thlen chuan amah Thapa pawh chu lo tho tawhin, kel la awm zat chu a lo chhiar a. Min hmuh veleh chuan, "Pu, patum awm lo patum. Pui nih le notê pakat awm lo," a lo ti chûl a.
"A notê chu saw laiah sawn ka hmu asin. A pui pahnih chu ka hmu miah lo. Nizanah an lo kal leh em?" ka ti a.

"Kal lo ka pu."
"Kel awmna saw phui deuhin vawiinah hung rawh. Zanah an lo kal leh maithei a nia," ka han ti ve thlarawk a.
"Keima siamţha vek ang ka pu."


Nizana Sawma nen thisen far kan hmuhna lamah chuan ka phei nghal a. Tunah chuan a lo lang chiang tawh hle mai. Thisen farna hnuhma ro rap tawh sirah chuan nasa takin hnuhma a pherh vêk vûk mai. An ke thla aţang chuan pathum vel an nih hmelin ka hria a. Kel notê sehtu bik kha a hran a nih phei chuan pali lai pawh an ni thei bawk. Tin kel puitling, hnuhna hnuhma lang mang hlek lo va an kalpui theih danah chuan chu sa sual chu an lian ve thawkhat ang tih a hriat tlat. Tichuan chhui zui thui duh tawh lovin ka hawsan ta a.

Hetia ka buaipui ta viau mai hian chhan ţha tawk tak a nei ve a. Ka pa kha a tlangval lai, thingtlang lama a thawh lai chuan chawlh engemaw zeuhah chuan ram vah hrat tak a ni awm e, chu chu a tichiang turin ulhbun silai leh airgun min hnutchhiah tlat alawm.

Kum 5 kal taa a boral dan kha tupawh mai khan Chinghne seh a nih an ring vek ti ila, a seh ngei a ni kan ti thei ang. A chhan chu ka pate ţhianho kha chhim lam tlangah ram vak turin an zin chhuak kha a nia. Dik tak chuan sa pelh tum an ni em em lo. An vanglai ngaiin chawhmeh engilo fahran zawn pahin tiin an ţhian thum kha an zin chhuak a, thang rei pawh an tum lo. Mahse khatia an liam ka hmu kha ka pa nungdama ka hmuh hnuhnun ber ţum a lo ni ta der mai.

Ka pa ţhianpa pa Siama sawi dan hetiang hi a ni a: "Kan ram kalna hi a ngaw ang reng khawp mai a, riahbuk kan sual fel hnuin chakai meichher chhitin kan chhuak chhunzawm leh nghal a. Arkaiden zan a niin a êng nuam bawk a, chêt vel a samkhai khawp mai. A ram hi mi tlawhpawh zen zen loh a nih avangin kan kalna luiah chuan chakai an lo tamin an hrawl hlawm hle mai a. Chuvang chuan tam tham pawh man duh lovin a tûk zing daih nen chauh kan man a. Bûkah chuan kan chhûm nghal a.

"Zanriah kan ei kham chuan dar 12 a ri tawh. I pa chu ei kham hmasa ber a nih avang chuan tui chawi a chuh vat a, kan hnial hman hma chuan a sihdêt(torch light) nen chuan a liam zui nghal a.

"Rei pawh a rial hman lo. Rum ngul ngul, ngur chhur chhur thawm avang chuan i pa Thanga nen chuan kan tho chhuak rual ţhawt a, kan silai chuhin bûk aţang chuan kan chhuak nghal a. Kan pên chhuah rual chiah chuan i pa han ţe deuh ţhawt kan hriat avangin thimthamah kan tlan phei nawk nawk a. Chutah kan piah maia i pa sihdêt, lei a let bal mai kan hmuh rual chuan a bul mai a mit de ţhiang rual mai, keimahni lam lo hawi fur mai chu kan hmu ta a. Tin pawh tin ţha hman lo chuan kan kâp rual ţhawt a. Chu veleh râk tuar pahin an tlan darh ta suau a.

"I pa tukhum leh a nâknêmah an lo seh niin. I pa chuan, "Chinghnia," zawitea a rawn tih zawh chuan nikhua a hre lo zui a. Mak kan ti khawp mai, Mizoramah Chinghne thâwm thang kan hriat lohna a rei tawh si. Tichuan i pa thisen chhuak chu theih anga tuamin kan tlaivarpui ta a. Zinga a rawn harh laiin kan nachhakna ken te kan pe a. Chulai a ramvak tlangval pahnihin min ţanpuiin kan zâwn a, Serchhip damdawi in kan thlenpui hmain a nunna a thlah ta a ni.

"Kha ramsa kha Chinghnia ngei a ni tih hre turin a hnu lawkah Chinghne ruang luikamah an hmu ta rêng a, thimtham a silai kan kah khan kan lo hliam a, a hliam tuar lovin a thi ta a nih hmel e," tia a sawi lai chu ka bengah a lo ri nawn awn awn a. Ka thin a rim tharin ka rilru a na hle mai. Hei vang hian alawm, Chinghnia hi ka huat rilruk a, ka chhui ve chiam chhan. Hmu ve ngat ila chuan, pakhat tal chu ka thal ve khawp ang. Ka pa phuba la-ah riak ka inngai dawn si a.

************

Rilru phûr ang reng tak chuan library-ah ka ţhu leh vang tawh a. Kha nula nui mawi zet mai, zaidam nunnem hmel bawk si Lalrosangi kha hmuh leh hlan mawlh ka nghakhlel tawh. Class off nei, library rawn lut apiang mai chu an ni dah law maw tiin ka lo melh hrû zel a, mahse a lo lang ve thei hlek lo mai.

Hmeichhe pakhat rawn lut chu ka hriat hnu a ang khawp mai. A inrintawk hmelin a hawiher leh chezia aţang chuan mi changkang ve thawkhat chhungkua aţanga lo chhuak a nih a rin theih bawk. A hmel pawh a ţha hle mai, mahse ka lo zawn ruk ber Sangtei tluk erawh kha chu ka mitah an awm lo nghal pang. Ka va ler sâwt ta em.

Chutah chu hmeichhia chuan a lehkhabu nen chuan min rawn pan a, "Sir Rin, ka lo tibuai lawk che. 'Mechanisms of homology in organism' ziahna lai vel hi min kawhhmuh thei em?" a rawn ti a. Ka hming pawh a lo hre tlat. Non teaching staff te chu kan lâr loh vei nen.

Thiam ve tak tak lem lo mah ila, ka tih ţhan leh ka inzir ve nasat avangin a thil min zawh chu a awmna ka zawn hmuhsakin ka lo kawhhmuh ve mai thei mai a. Mahse chutih lai tak chuan ka lo nghah rilruk ve beri chu a rawn lang ta nawlh mai. Chu nula-in, 'Ka lawm e aw sir,' a tih pawh chu ngaihsak tawh lovin Lalrosangi chu ka lo thlir veng veng mai a.

Seat âwlah chuan rawn ţhu deuh hnawkin a chauh hmel riauvin ka hmu a, a dam vak lo nge ni dawn ni. A mitmeng ka'n en chian chuan a sen râm a ni tih ka hmu thei a. Eng harsatna tak tâwk ang maw?

Chutah thil min rawn zawttu hmeichhia khan Sangtei chu a hmuh veleh a bulah chuan va kalin a va bia a. Mahse Sangtei chuan mitmeng thîp deuh hlek a lo melhin a tho tharh a, chutah ka lam a rawn hawi leh zauh a, a chhuak ta daih a. Beidawn hmel takin a betu hmeichhia chuan a chal a han dawm zauh a, a ţhutnaah a ţhu leh ta a. An chet dan chu mak ka lo ti hle mai.

An harsatna hriat chak hle mah ila, lo inrawlh ve nghal dûk dûk chu a mawi chiah loh avangin Zoology bu va la-in chinghne hrang hrang chanchin chu ka chhiarsan ta daih a.

An chanchin chiang deuh zawk a ka han hriat meuh chuan chinghniate hian a huho lo chuan mihring an lo bei ngam mang reng reng lo a lo nia. Mihring nen mal leh malin inhmachhawn ta se, chuti maiin mihring a seh ngam bik miah lo tih te ka hriat phah a. An len lam pawh khawmualpui hrang hranga mi chu a lo dang ve hret hretin an rawng pawh a lo thuhmun vek lo tih ka hriat belh phah bawk a.

Thapa'n a thil hmuh a sawi dan ka han khaikhawm chuan India ram a chinghnia awm te chu a dum, a var leh a buang sen deuh a inpawlh a ni tih ka lehkhabu en mek aţang chuan ka hre thei ta a. Thapa thil hmuh chu chinghnia a ni ngei ngei ang.

Fahrah a ka awm chhante ka han ngaihtuah leh a, ka lungpuam leh ţeuh mai. An rawn kal hnai leh a nih teh chuan ka va han chângin ka va han kâp dawn chiang tak. Chû zoology bu ka chhiar mek a, 'Animal lover' (ramsa hmangaihtu) pakhat hming an rawn tarlanin a thusawi an rawn quote(sawi chhâwn) te chu chhiar pawh ka chhiar peih lo., ka thin an tirim hlur vek tawh. Hmangaihtu inti mah se chu'ng chinghnia leh ramsate chuan fahraha an siam ve loh vang tih hi ka ngaih dan a ni bur mai a ni. An nu leh pate seh hlum sak ve ta se ramsa humhalhtu, hmangaihtu an ni bik reng thei ang maw!

Evi leh Adama bawhchhiatna avanga khawvel a mihring zawng zawng Pathiana mi sual kan lo ni ta vek ang deuh khan, ka pa an seh hlum avangin chinghnia zawng zawng, America rama mi an ni emaw, Africa khawmualpui tawpa mi an ni emaw, Mizorama mi pawh ni se ka tan chuan hmelma, mi sual an ni vek. Ka hmu phiangsen a nih chuan ka dîm dawn hauh lo.

Chutia mahni awmhmun a thinrim engphiar a lo insawh ve vak vak ringawt mai chu ni chiahin ka hre leh lo va. Library chhûng a ni leh nghal bawk nen. Lehkhabu chu ka khup thawk a, thil dang ngaihtuah ka tum ta a.

Chutih lai chuan nichina hmeichhia khan a lehkhabu chhiar chu a rawn dah fel ve chiah a. Register-a hming a rawn sign chu ka lo en reng a, Jenny Lalhmangaihi a lo ni a, Sangtei nen khan classmate an lo ni bawk a. Chu chu remchang a la in zah pawh dâwn lovin, "Jenny, Lalrosangi nen khan in inhria em ni?" ka lo ti tawp a.
Ka rin loh deuhin Jenny chuan mitmeng thip lam lek lek a min en ha chung hian, "Hria e," tih deuh nghat pah chuan lehlam a hawi hmak a, a chhuak zui ta daih a.

Chu hmeichhe pahnih chêt dan mai mai chu mak ka ti hle mai. An inkarah engemaw fel lo zawng a awm a ni phawt ang le....

(A ngaihnawm chho zel turah ngai ila. Like leh comment min lo peksak theih thin chuan ka lawm ngawt ang. Zan 1 kar tlain kan post thei turah ngai ang)



Link:
BBcode:
HTML:
Hide post links
Show post links

Ar eL' Khawlhring
Posts: 75
Joined: December 28th, 2016, 1:46 pm

Unread post by Ar eL' Khawlhring » June 27th, 2018, 10:15 am

ZÂN VÂK
CHAPTER-2

Beisei tisâng rilru deuh tak a chhuak ka nih vang leh beisei ang thil ka tawn lem loh avang chuan ka haw lam chu ka lunghnûr ang reng khawp mai. Mahse ka thil duh dang, chinghne chanchin erawh ka hriat belh viau e. Ka thil chhiar aţang khan India rama cheng ţhin chinghnia chu Himalayan wolf an tih hi a lo nia, khawvel chinghnia zinga a lian pawl niin a tlangpuiin a puitling chu kg 35 vel an ni ţhin. Peninsular wolf te chu kg 25 vel bak an ni ngai lo tih te ka hriat belh a. Chu chu ka tan ţangkai tak ang maw? Ka buaipui ve em em sia.

In ka thlen chuan hosteler ho chuan zanriah an lo kil ţan leh der tawh a. Puia erawh chuan min lo nghak a. Ka inthlak fel veleh chuan vawiin lama a bialnu thar ka hmuh thu ka hrilh zawm zat a, a ngaithla duh hle mai. Chutih ruala hmel duhzawng deuh ka hmuh thu ka han sawi chuan a au chhuak phut a, a nuih a za a ni tih ka hre mai. A chhan pawh ka hrethiam nghal. A bulah hmeichhia ka sawi ngai lo em atin ni.

Zanriah kan kil dun lai chuan vawiin lam chanchin bawk chu kan sawi dun leh a. Jenny chu a ngaihzawng a la nih bik chiah loh thu leh mahse a beiseiawm thu te, chhûn lamah pawh phone-in an inbiak nasat thu te min hrilh a. Sangtei nena an in ei loh hmel thu vel erawh ka hrilh ve duh lem lo. Chutia chaw ei paha kan titi melh melh lai chuan a ngawi thut a:

"Ţhianpa, zanin chu lo kal ve ta che," a rawn ti thut a.
Ka rilru chuan kha Jenny kha Sangtei chanchin chu zawh chian ka chak a ni. Mahse an inmil loh hmel riau khan a lang bawk si a.

"Ngawi teh ţhianpa, zanin chu Thapa-te sawn rûm ţhaih an lo tawh leh takin va len phei mai mai ka duh a, bakah ka chhuah ve daih te'n tunge hosteler ho lo awmpui ang?" ka ti a.

"Ho mai mai, awm lo mah ila Sawma a awm a, a naute chu a kilkawi hneh lutuk."

A ni rêng lah tak a, keini awm lo mah ila kawhmawh bawl tum an awm dawn lo tih ka chiang. Kan hosteler ho hi high school hosteler te ang mai an ni ve lo. High school kal lai chu mi pathum an awm a, college kal lai mi panga. A bak zawng chu hna nei, sawrkar hna ni si lo, inhlawh chawp pah a zan lam a thil training an ni fur a. Rilru puitling tak tak an nih tawh hlawm avangin buaipui chu an ngai hran lo. Mahse sa sual ho kha ka châng dawn a ni lawm ni?

Ka ngaihtuahna chu hria ni awm takin Puia chuan, "Lo kal ve phawt teh, kan chhuak hma ang a, kan haw hma leh mai dawn nia. Class ka pek chhung chuan a unaunu hmelţha deuh mai lo kawm tur pawh a awm ang," a tih zawm zat a.

Chutah a phone phawrhin a han dial nghal a. "Jenny, dar 7-ah zanin chu ţan mai ang aw," a va tizui nghal a. Kei pawh chuan rilru ka siam a. Dar 10 hnu lamah bak chuan an rawn lang lo maithei sa hmelchhe ho chu. Puia chu ka zui ve phawt mai ang.

Ka silai leh a mute ka en fel zawh chuan dar 6:20 a lo ri tawh a. Kan inpeih fel tawh bawk a, inhawsan te a ngaih thut takin tiin bike kan keng ve ve a, kan chhuak ta nghal a.

**************

Rin ai daihin kan tlan rei mai. Veng laili deuh takah Jenny te in chu awm turin ka lo beisei ve ngawt a. Mahse veng tawp aţangin veng tawp kan pan a ni ber e. Mahse kan han thlen meuh erawh chuan Jenny te in chu a lo changkang reuh kher mai. Compound zau tak an nei a, an in bulah chuan in pakhat ţha tak mai a ding ve tih loh chu ţhenawm tumah an nei lo. An kawmthlang lam chu thing hmun a ni zui ve deuh nghal mai a. An in awmna chu a va penhleh deuh hlek na a, motor luh theih turin an siam vek avangin hmun thlannahawm tak a ni.

Gate chu a lo inhawn sa avangin kan tlan lut nghal a, kawt zawl, motor lo inhûnna bulah chuan bike chu kan han dah fel te te a. Door bell chu Puia chuan a han hmet a, thawm a rawn awm a, kawngka chu Jenny chuan a rawn hawng ta a.

Puia hnunga ka ding a han hmuh chuan Jenny chuan mak a tih hmel kher mai. Mahse inngaihtuah chhuak leh thut ni awm tak hian, "E he! sir Rin, ve teh hlawl che chuan. Engtin nge i rawn kal ve daih theih?" tih pah chuan a nui sâng a.

"Min lo beisei vak nange?"
"Awi, beisei loh piah lamah u Puia hian mi dang a rawn hruai tur thu min hrilh lo hrim hrim," tih pah chuan a nui hawk hawk a. Inţhian nghet tlat kan nih thu te leh kan inlaichin dan Puia chuan a hrilh hrilh malh malh a, chutah chuan a hrethiam ve ta a.

Thingpui hâng kan in mek lai chuan choka lam panin nula pakhat hian towel hian a lu a rawn hru phei mawlh mawlh a. Inbual zo hlim tih hriat tak hian a maltê thleng chauh khuhin towel a rawn veng bawk a, kan lo ngawih ţhap avang chuan kan awm ve tih pawh hre lo ni awm tak hian kan thingpui inna lam chu a rawn pan phei zel a. Chutih lai chuan Jenny chuan, "Mapui, hei sir Rina nen hian lo inkâwm u la, kan han zir lawk ange aw," a rawn tih takah chuan chu nula Mapui a tih chu a rawn hawi chhuak ta a.

A rin loh deuh a kan lo awm avang chuan mak ti hmel lek lek, lai hmel pu lek lek hian a rawn hawi chhuak a.
"Awi, in lo awm tih ka hre lo reng reng, ka va inthlak lawk ange" tih pah chuan min lêtsan leh a.

Kei hi nimin piah mai aţang khan nalh leh chhe lo hi ka hmu thei ţan ta riau mai. Nge ni, ka hmuh apiang hi chhe lo ka ti ta vek mai zawk? Kum 30 han tlin meuh chuan ka ler ve ţan dawn tak tak tawh aniang. Aw, va inthlak kher lovin towel kha veng ringawt mah se pawi ka ti lo asin le huiha..., rilru a va hmul ţhin ve le.

A ni lah tak a, a pian a fuhin a fai sar bawk sia, a unaunu Jenny aiin a hmelţha zawk leh nghal. Mahse ka mitah chuan Sangtei kha a tluk bik chuang lo. Ka rilru chuan Sangtei address tal chu hriat ka châk tawh khawp mai. Jenny khan a hre ngei ang.

Mapuii chu a rawn chhuak leh vat a, paijama thawl deuh hnelh hnawlh hi a rawn ha a, a inhmeh hle tho mai.
Kan inhmu ţan chauh na a, a titi siam siam reng a, chutih pah chuan tv kan en dun mai mai a. A mipa zawk titi tur ka hre lo lutuk chu zialo ka ti ta deuh a, biak dan tur mawlh ka ngaihtuah a.

"Mapui, eng nge i tih ve deuh ber ţhin a?"
"Ka awm ve mai mai, in hi ka nghak a ni ber mai," nui sen sen chungin a han ti a.

"I nu leh pate hi khawnge an awm a?"
"Kristian chhungkaw campaign neiin an chhuak a nih kha."
Ka sawi tur hriat chhun a zo der. Ka ţhiana class pek chu rawn zo vat vat se ka ti rilru ţan tawh. Mahse he nula thawveng tak bul a awm hi a nuam reuh phian lawi si.

"Ka phone buai hi min lo enpui lawk teh a," tih pah chuan ka bulah a rawn ţhu phei ta a. Umn, sawi tur hriat loh paw'n zahzel a awm hlauh dawn e.

Application hrang hrang kan han en dun vel lai chuan, "Thei i ei chak em?" tih pah chuan a tho a, choka lamah chuan a phei ta daih a. Chutia a kal bo lai chuan mit hlei ta ngang chuan a gallery ka lo hawng ru nghal a. Chuta ka thil hmuh chu ka rin loh lam daih a ni. Ka ngaihtuahna luahtu Sangtei nen chuan inngeih hmel tak hian thlalakah chuan an lo awm dun reng mai.

Thlalak dang ka han en zung zung a, thla lak dun chu an lo ngah hle mai. Ţhian inkawmngeih tak an nih dawn hi ka ti rilru ta a. Tihchi viau dawnin ka hre ta. Sangtei te awmna chu ka hre thei ngei dawn e.

Thawm a rawn awm tak avang chuan ka hmet sawn nghal a. Mapuii'n ka bul a rawn thlen dawn lai chuan thiam hmel takin a phone buai chu ka'n 'Check' sak leh vel a. Engmah siamţhat phei chu ka nei ta lem chuang hlei lo va.

Engtin nge ka sawi ţan nghal tak ang aw Sangtei chungchang chu? Ka zawh nghal tawp chuan a phone ka lo 'Check' tih a hre dawn si. Umn, zawt rih lo phawt mai ang. Mahse zah theih loh chhuahin, "I whatsapp number ka duh, a rem chuan," ka lo ti a.

Nui sang chung hian, "Eng atan nge i tih ve a?" a han tih chuan tlangvala pumpa, ka lai deuh lek lek mai. Inla zei fahran hian, "Nula chhe lo deuh number hi ka la nei ve ngai lo va, ka duh ve riau mai," ka han ti vei ngial a. A nui zui hak hak a. A number chu min hrilh ve mai bawk a.

Puiate computer class inpe chuan darkar chanve zet a hun tiam an pelh hnu chuan an rawn chhuak ve thei ta hram a, bonus an inpe ve deuh pawh ni fahmiang. Dar 8:30 ri tawh mah se thingpui kan han in kawi leh hnu chuan haw zai kan rel ve ta a. Jenny-te unau chuan gate bul thleng min rawn thlah a.

***************

Puia chuan min zui ve chu tum viau mah se hostel lo nghak tura ka duh avangin ka awmtir a, Sawma chuan chhûn lamah a ţhianpa silai a lo hawh tho avangin kan kal dun ta zawk a.

Thapa chuan a kel in chu a lo hung ţha viau na a, chinghne koham tak tak chuan luh dan chu a awm tho vang. Mahse awlsam tak chuan an lut hauh lovang.
Thapa pawh lo la mu ngam bik lovin Aruna-i te nufa erawh an lo mu tawh a. Tichuan Sawma nen ţanhmun inhlat lutuk lo, inbe thei tawk vel, kel huang kawngkhar hlat lo te-ah, thingfak chhêk khâwl phênah chuan ţanhmun kan han siam fel a. Sana ka han en chuan dar 10 dawn a lo ri tawh a, kan châng thlawn dawn nge pawh hre hlek lo chuan kan ţhu ta khar a.

Silai hi ka hman lohna a rei ta viau mai. High school leh college kan kal lai, NCC a kan ţan ve lai a kan kah ţhin vel bak chu ka chhunzawm ta lo. Mahse target tê tham pawh ni lo, ui pum aia lian chu kah ţhelh ka inring reng reng lo. Ka kut a khûr lo va, ka mit a fiah ţha bawk a, ka inring tâwk khawp mai.

Thawm riva a awm har tak em-ah chuan ka phone chu ka phawrh a, Mapuii chu message ka va thawn a, keimah ka nih thu ka va hrilh nghal a. A mut ka rin tawh tehlul nen min rawn chhâng lêt nghal hlauh mai. Chutah zanin kan lên lai a ka zawh ngam loh kha pehhel deuh hlekin ka zawt ta a.

"In veng velah kan college a kal, Bsc zir Lalrosangi i hre mial lo maw?"
A reh deuh vang vang hnu chuan, "Tinge?" tih zawng hian min rawn chhang a.

"A, library rawn hman hi a peih ve reuh a, in veng niin ka hre deuh a, ka zawt mai mai che."
"Ka hria alawm, ka ţhiannu a nia, ka 'Best friend' a nih kha."
Khai leh! Daih si chuan. A tihchi nge tihchi loh zawk pawh ka hrethiam lo. Umn, a ţha zawk turah ngai ang.

"E, a lo nih reng tak chu maw le," ka ti ringawt a, han sawi zui ngaihna vak pawh ka hre tawh lo.

Chutih lai chuan kan piah lawk mual a rawn û ruah ruah ri ka hriat avang chuan ka phone chu rang taka akin ţanhmun ka siam ţha nghal a. Sawma chu ka va mitmei zauh bawk a. Chu chinghnia(?) û ri a tawp rual chuan ralkhat hla ve deuh hlek aţang chuan chunghne rual hian an rawn chhâwn tluar tluar bawk a. An û dan aţang chuan kan piah lawk muala mi chuan râla chinghne rual chu a au khâwm a nih hmel hle mai. Ka phûr lutuk chu ka za cheng tawh, ka helhhawlh a ni ber e.

Mahse ka lo beisei ang ngawt chu a ni ta hauh lo mai. Minute 10 a ral hnu pawh chuan an rawn lang ta hauh lo. Chumi a nih avang erawh chuan min rawn hnaih hle tawhin a rinawm zawk a, inrin zual sauh a ngai a ni.

Kel kawngkhar bulah chuan 'Bulb' an khai a, a ên kalh avang chuan rawn kal pawh ni se kan tan chuan lo kah hlawm tawl chu a nuam khawp ang. Kan silai ve ve chu chumi lam hawi chuan kan tin zâwn sa phân mai a.

Minute 15 a ral leh ta, thâwm a va awm har leh tawh êm. Mahse chutia inring thinphu deuh dêp dêp a kan awm lai chuan beisei loh lamah, kan piah mualah chuan bawng a bû ta rawng rawng mai le! Mak ti deuhin Sawma nen chuan kan inen ringawt a.

Chutah thil ka hre chhuak ta. Chu bawng na tuar rawn bû-na hmun chu kan piah mual, Gurunga gurkha tho te bawng vulhna hmun bawr vel a ni tih ka hre chhuak ta thut mai. Nichina chinghne mal rawn û-na bawr vel lawkah khan a ni tih ka ngaihtuah chhuak ta thut a. Kan va han â tehreng em. Zan hmasa-ah helaiah an rawn kal tawh a, zaninah te chuan awmhmun an sawn te chu lo rin ve âwm tak a ni asin le.

"Sawma, kal ang," tih tuar pahin 'Torch light' leh silai chu ka chuh a, ka tlan ta nghal a. Sawma chuan, "Khawiah?" a rawn tih chuan hawi pawh hawi lêt hman tawh lovin, "Gurunga te huanah," tiin hmanhmawh zetin, ka theih ang a chakin ka tlan pur pur a. Hah pawh ngaihtuah hman lo va minute 10 zet ka tlan hnu chuan Gurunga te ram luhna 'Gate' chu ka su hawng rawp a.

Bawng in lam thawm dîm deuh tak a ka pan lai chuan Sawma thawm ka hre ta hauh lo. Ka han hawi kir pawh chuan a hmel reng a lo lang tawh lo. A ni dawn tak e, ka hmanhmawh luatah light keng zawkin ka tlansan daih alawm le. A thim si, kawng a chhe si, a rawn thleng har viau maithei a ni. Mahse pawi lo ti tawh mai ang. Hmelma te'n min lo kalsan hman ai chuan, Sawma tlansan chu a pawi lo zawk e.

Bawng in bulah chuan thawm hriat tur reng a awm lo. Mahse bawng in bulah erawh chuan thisen a far nuaih a. Bawng in kawngka bulah chuan bawng notê pakhat hi a lo let ngât bawk a, a lo la lum thar thar danah a thihna a la rei lo hle a ni tih a hriat theih. Chu bawng no chu a hrawkah sehna hnuhma awmin a khêl tha an chhat ni ngei ngei bawk tur a ni. Mahse ei lohin an kalsan si.

Bawng in kawt a thisen chu ka chhui zui char char a, chhui a har lem lovin ka fimkhur em em lo. A chhan chu bawng dang an lâkna hmunah chung chinghnia chu an awm ngeiin ka ring a, sa ruang inchuhin an inngur deuh ngeiin ka ring bawk a, thawm an lo neih ngei ka ring a ni.

Thisen chu Gurunga te in hlat lam zelin a far a. An kalna hnuhma te chu a pe hen hun bawk a, chhui a har lo hle. Ka rin ang ngeiin thui tak ka kal hma chuan han ngur deuh chhar chhar ri chu ka hre ta. Thla a eng tho bawk a, a kal theih nawk nawk tho avangin ka torch light chu ka kâwng a zepin thawm dîm takin ka ri hriatna zâwn chu ka pan ta a. Chutah chiang vak lo chuan ka hmu ta le! Panga vel an niin ka hria.

An sa ruang ei lai chauh an ngaihtuah avang chuan ka lam pawh an rawn hawi lo niin ka hria. Chutah pakhat chu van lam hawiin chu zan reh tak maiah chuan a han û ruah ruah mai a, a rapthlak duh ang reng fu mai.

Chutih lai chuan chhûm dum hian thla êng chu a rawn hliah deuh khup khup mai a, chu chuan min tibuai ta tlat. Torch light chu ka hman tawh mai loh chuan ka kah ţhelh tingtangin, ka tih thinrim mai mai ka hlauh avang chuan ka phawrh chhuak ta a. Ka dinglamin silai ka lek a, light chu tih ên thut pahin ka seh kawh nghal a, chutih rual chuan silaiin ka tin nghal a.

Êngin a chhun takah chuan chûng chinghniate chuan ka lam an rawn hawi ta fur mai le. Chuta ka chinghne hmuh pakhat chuan alawm min tiphu zawk thei chu. Chinghne dang zawng chu ui palian aia lian deuh awrh tur an nih laiin chu chinghnia ve thung erawh chu anni ai lêt dawn a lian a ni tlat mai! Chutiang em em a lian chinghnia an awm ang tih ka lo ring phak ngai lo hrim hrim.

Inngaihtuah vak hun a ni lo. A lian ber chu ka silai chuan tin nghalin ka'n kâp nghal pawp mai a. Mahse ka hmeh per rual khan a lo che zeuh hman tih ka hmu nghal. Ka tum chu fuh chiah lo mah ila ka silaimu chuan pawi a va khawih tho, ti ila, pawi lo a khawih a ni ber ang chu, chu chinghne hrawl deuh hnung a lo ding pakhat chu zuan zawk pahin a râk ţhawt a. Ka hlah chhe lem lo ve.

An han darh suau na a, rawn lêt khawm leh vatin thinrim ţhen ţhu chung chuan min rawn pan ta hriau hriau hlawm mai le. Silaimu chu rang takin ka han thun leh a. Tin zâwn leh nghalin ka hmet zui a, mahse a ri khep a, a tlawlh ta tlat mai.

Chinghnia nena kan inkar chu feet 12 lo liam a ni tawh si lo. Ka ngaih danah chuan pakhat chu kap hlum leh ila an tlanchhiat tawh mai ka ring a ni. Chuvang chuan ka kekawr iptea silaimu chu phawrh leh hram ka'n tum a, mahse ka dap fuh thei ta tlat lo mai. Ka indap rei tak deuh avang chuan phawrh thei pawh ni ila thun chawp chhung nen, tihngaihna a awm ta lo. Ka tih theih chhun chu min rawn zuan rualin ka silai kâwm lam chuan pakhat tal ka lo la chhut thlûk theih takin tih chauh a ni ta, kei mi ramvachal lo ve tak mai chuan chempui ah tel nachang reng ka lo hre bawk si lo. Dam chhuah beiseina a bo vek tawh, thih chiah ka hmabak ta.

Chutia ka thih hun nghak a thlan tla bat bat a ka awm lai chuan thil mak azawng a thil mak ber mai a lo thleng ta tlat mai le!
An zinga a hrawl ber chu hma lamah rawn pên chak thutin kei lah lo phu zawkin ka silai chuan vuak inringin ka lo hum nghet nghal sauh a. Mahse chu chinghnia chuan min pan ta lovin a ţhiante hmaah chuan a ding ta tlat mai a ni. A chinghnepui, ka lam hawia min zuan mai inpeih tawh, min seh châk tih hriat tak a ţhen ţhû mai te hmaah chuan a vei ta thuak thuak mai a, a ngur chhur chhur bawk a, chuvang chuan pên khat pawhin hma an rawn sâwn tawh lo. Chutia vawi tam a vei kual thuak thuak hnu chuan chûng chinghne pathum chu an hnungtawlh hrut hrut a, chinghne lian, an thuneitu tih hriat tak pawh chu hnungtawlh zelin an hmaah chuan a vei tawn reng bawk a. Nakinah chuan min hlat takah an awm ta.

Ka torch light chuan ka la ên zui zel avang chuan thinrim hmel taka an ţhen ţhu piah lamah an hruaitu ber pawh chu beih mai an châk ni te'n ka hmuin ka ngaihbel thei bawk. Mahse eng êm ti ta lo chuan an inher a, ruam lam pan chuan an liam ta a. Chinghne lian ber chu ka lam rawn hawiin min rawn thlir voh voh a, chutah inherin a liam zui ve ta a.

Ka thaw hawk a, ka bul a hlobet chungah chuan ka mu tawp a. Ka taksa pum mai chu thlanin min bual huh vek. Ka thih teuh zia ka han ngaihtuah a, khatianga thil mak rawn thleng ta kha thil mak tawpkhawk a ni. An hruaitu ber chinghnia-in a rilru, a ngaihtuahna a thlak a, keimah, anmahni ngei kâptu min han chhan tlat mai te kha hriatthiam phak rual a ni lo. A mak hi ka ti ngawih ngawih ringawt mai a ni. Tichuan ka rilruin Pathian hnenah lawmthu ka sawi ta ringawt a.

"Sir Rin, khawnge i awm?" tia min au lauh lauh ka hriat chuan chhân pawh chhang peih lovin ka torch light ka tieng a, ka lo vai kual ringawt a. Ka chhak aţang chuan an rawn ri thla khat khat a, kei ka lo ţhu chhuak a.

Ka bul an lo thlen chuan Sawma leh Gurunga an lo ni a. Sawma chuan min ngaihtuah hmel fe hian, "Sir Rin, engtin nge i awm? I va chauh hmel ve le. Silai ri kan hria a, kan hriatna lam panin kan rawn chhuak tawp mai a nih hi." a ti a.

"Ka ţha e. Pakhat ka kâp fuh a, a thi nge thi lo pawh ka hre ta lo. A dang kah leh ka tum a, ka silai a tlawlh ta sia. Tunah chuan an kal bo zo tawh," tiin ka chhang a. Thil nihna tak ka hrilh duh lem lo, an awih pawh ka ring lo. Chutah, "Saw, kan piah lawkah sawn bawng an lo ei a," tiin ka kawk a. Chu lam pan chuan an kal ta vat a.

Sawma chuan, "A ruh ţhenkhat, a lu leh a ke bak a awm tawh hleinem," a rawn tih lâng lâng takah chuan ka va phei ve a. Chinghne rual chuan an lo ei filh hneh ve em bawk a ni. Sa an ei puar hma, a rimin a tih vir laklawh lai ting tang khan va nangchîng ta ila chu, kei pawh min seh tel chu ka ring khawp mai.

Gurunga, favah(chem) nena a rawn inhûm sek khawtlai ka han hmuh chuan ka thin a rim thut mai.

"Gurung, i bawngte pawh i chhan ngam nange?" hmaisen ţeuhin ka ti a. Gurunga chuan, "Keimah thawm hre lo lawm ka pu," a lo ti a, ka awih thertê lo. A dawihzep vang a ni khawp ang. Hla zawk a awm paw'n chinghne û leh a bawng bû ruah ruah kan hriat avanga va pan kan nia. Mahse ka thinrim zual dawn tlat avangin ka ngawihsan ta a.

Chinghnia ka kah fuhna hmun chu kan han en chuan thisen chu a lo baw zûih mai. Mahse a ruang hmuh tur a awm tlat lo, ka lo kâp fuh chiang lo deuh nge maw ni dawn ni. Zan thim hnuai a ni sia, a piah, chinghnia ho kal liamna lam lah a pik deuh avang chuan chhui zui lovin kan hawsan ta a.

Haw kawngah chuan muangchangin kan kal a. Kan ngawih deuh reng hnu chuan Sawma chuan, "I va han tlan chak em em ve," min rawn tih chuan ka nui tawp.
"Ka tihpalh lutuk, ka va nangchîng hman lo vang tih ka hlau em a ni. Torch light i keng ve lo tih ka lo theihnghilh daih a," ka ti a.

"Thla zawng a êng na a, thingbukin thla eng a hliah vek nen, ka rawn ûm che khan ka ngal ka sawh a, ka rawn bai thleng hram alawm. I awmna hre hek lovi, Gurunga te in ka pan a. Hlauhthawn hmel deuhin an lo awm a, ka zawh lah khan engmah hre lo angin a insawi ve tlat a, i silai ri kan hriat khan kan rawn zawng tawp che a nih kha," a ti a.

"Sawma, i tilawmawm ţhin ngawt mai. I hun a hlut nen, min han pui hram hram a. Nangman kâp zawk la chu a tlan chhuak hauh lo vang maw le," ka han tih chuan, "Mai mai a, hetiang thimah chuan ka kâp fuh bik teuh lo," a ti na-in an khuaah chuan ramvah hrat, sa kâp thei tak mai a ni tih chu ka hre reng a. A inngaitlawm mai mai a ni, hei hi a nia ka ngainat riauna chhan pawh.

In kan thlen hnu chuan zing dar 1 a ri der tawh na a, thingpui te kan in leh te te a, tichuan kan mu zui ve ta a.

***************

A tûkah chuan peih lo zetin ka hna lamah chuan ka kal leh ta a. Zan lam thil avang kha nge ni, ka chau deuh tlat mai leh nghal a. Mahse, phûr ve riauna chhan ka nei tlat. Vawiin chuan Sangtei kha ka hmu ngei ang a, ka vei rûk thu hrilh kher lo mah ila, eng engemaw te chu ka sawipui ve thei ang chu. Ka tawng sâng lem lo a nih pawhin, ni hlimawm tak ka hmang ve turah chuan ka ngai.


Hun pawh khawtlai nan zoology subject a chinghne chanchin te chu ka chhiar leh mai mai a. Bu dangte chu ka keu lâwr bawk a. Engmah tehchiam phei chu ka hriat belh vak chuang lo.

Library a zirlai rawn lut zingah ka beisei leh nghahhlelh rûk chu ka hmu leh ta tlat pek lo mai. Jenny lah kha ka hmu hek lo. Mapuii lah kha class kal lai a ni ve tawh bawk si lo, ka tui lo rawih thei tak tak nia. A, chhun chawlh em pawh a la ni hleinem.

Mah reng reng se, pehhel deuh talin Mapuii kha ka va zawt teh ang, mi tam loh lai a ni bawk a.

"Hello Mapui, i chhuak em, eng nge vawiin lam i tih a?"
"Chhuak lo ve, ka mu a, tho thlawk ka chhiar mai mai," a nui zui har har a.

"Jenny hi class a rawn kal nange, ka va hmu lo ve."
"Kal tur chuan a rawn chhuah ve kha, in la inhmu fuh lo mai mai aniang."

"Aw, a nih dawn chu a. Sangtei pawh hi ka hmu chuang miah lo." Ka sawi zawh chuan ka zak leh hnuhnawh.
Chutih nakalai chuan, "Sangtei hi i thinlai riauvin ka hria," a rawn ti a, a nui zui leh har har a. Ka chhan let hma chuan, "A damlo va, hei ka va kal a, ka haw chiah," a rawn ti a.
"Anih chu maw le, a va pawi ve, lo dam vat rawh se," tiin phone chu ka dah ta a. Ka hnîm deuh ruih mai. Chutia ka rilrua ka vei rûk ber a damlo tih ka hriat chuan ka rilru pawh a nuam bik hlek lo mai. Staff ka nih ang talin va tlawh zaih ila a ţhat dawn chu.

Zirlai library rawn hmang an tlem ni tak a ni a. Kei pawh chu nizan lam chêtna avangin ka la chau deuh aniang, ka ţhu ngui lûp mai a. Maimitchhing chung chuan kha ka thil tawn mak danglam tak mai kha ka ngaihtuah kir leh a. Midang han hrilh ila an awih chiah ka rin loh avangin Puia leh Sawma pawh ka hrilh duh ta lo kha a nia. Ka vanneih zia ka ngaihtuah lai chuan ka lo chhîng sek aniang. Ka chinghne hmuh chu ka lo mangphan zui nghal a.

Ka mumangah chuan chinghne rualin min lo hual a, chutah an hruaitu ber, a lian ber chu kâp thal tawp ila, a dang chu an tlanchhe mai ang tih beiseiin ka han kâp let tawp mai a. Ka beisei ang ngeiin an tlan darh ta suau a. Mahse ka kah thluk ber chu ka han belhchian chuan ka nunna min zuahsak tura a chinghnepuite lo khap daitu kha a ni tih ka han hriat chian meuh chuan ka pawi ti lutuk chuan ding khawng reng chungin ka lo melh tlawk tlawk a. Chutia ka en reng lai chuan chinghne ke chu mihring ke angin a rawn chang ta tlat mai! Chutia mak ti lutuk a ka en lai chuan ka hmai bul sêtah hian, "Sir Rin," min rawn ti chu ka harh zawk a. Jenny chuan hnai fahrana hian min lo en heu mai chu ka phu chiang lutuk a, dawhkana ka pen leh lehkhabu dah chu ka titla rum rum maim

Nuih vak vak pah chuan, "I mut a va chhuak awm ve," a rawn ti a, zirlai dangte pawh chuan min lo nuih ţha hlawm a, ka nuih erawh a za ve tehchiam lo nain zahzelah lem deuhin ka han nui ve a.

Chutah zawite hian ,"Sir Rin, Zanin chu lo kal ve leh la," a rawn ti sep a.
"A, in computer zir hi in zir tak tak paw'n ka ring ta lo ve a, in reh vang vang a, in rei bawk si," ka lo tifiam a. A sen ţan ţan a, lei min chhuah khum zeuh a. "Ka lo ring dawn che nia," tih pahin min kalsan ta a.

Nia, kal chu ka tum ngei ang. Duhthusam zawk alawm le. Ka phone rawn ri ţat ka hriat avang chuan whatsapp chu ka han en nghal a, number hriat loh, display picture awm lo aţang hian message min lo thawn a lo nia.
"Sir Rin, ka damlo min lo ngaihtuah ve avangin ka lawm khawp mai. Chutianga damlo nâ ka ni lo. Ngaihtuahawm ka ni lo ve," tih zawng hi a ni. A rawn thawntu hming a lang lo va, dp a dah hek lo.

Mahse min rawn thawntu ka hriat chian lutuk avang chuan ka hlim lutuk chu ka khi nghal sûng mai, ka 'Mood' a fuh lo rei vei nen. Mapuii khan kan inbiak thu vel a lo hrilh nghal tih a chiang lutuk. A ngaih pawimawh loh mi ni ila, message in min rawn be miah lo vang.
Aw, ka va han lawm tawr tawr tak. Kan hostel naupang kareh zau deuh Hruaia ang mai khan, ka hlim lutuk chu beng thleng thlengin ka nui thlêr phei deuh duai duaiin ka inhria. Umn, thil awm dan han enin, a fuh dawn ţan e.

Link:
BBcode:
HTML:
Hide post links
Show post links

Ar eL' Khawlhring
Posts: 75
Joined: December 28th, 2016, 1:46 pm

Unread post by Ar eL' Khawlhring » June 27th, 2018, 10:17 am

ZÂN VÂK
Chapter - 3

Zanriah ei kham chuan Puia pawh hrilh lem lo chuan muangchangin ka insiam a. Dar 7 a rik chuan inpeih at chungin Puia hnenah chuan nui duh miah lovin, "I lo kal ve dawn em?" ka ti a. Puia chuan mak tih hmel deuh fe a min en chungin, "Khawiah maw?" a ti deuh hu a.
"E, computer class ka pe dawn."
"Uang lo teh, khawnge lên i tum a?"

"Computer class ka pe dawn, min sawm ve miau sia lawm," ka ti a.
"A tu chuan maw?"

"Aw, nizana kan lenna nula upa zawk Jenny khan."
Chutah nuih hawk hawk pahin, "Vawiinah in lo inhmu a ni maw? Jenny paw'n engmah min hrilh bawk si lo va, nih leh ka'n insiam ange," a ti ta a.

Puia insiam chhung chuan Sawma hnenah kalin kan chhuah dawn thu hrilhin a naute ho chu lo vil deuh turin ka chah a. Tichuan Puia insiam zawh veleh chuan bike pawh keng ve ve duh lem lovin, a insenso thlak mai mai tiin ka bike chuan kan inphur chhuak ta a.

Jenny nu leh pate pawh lo awmin anni pahnihin computer class an inpek lai chuan tv en pahin kan lo titi mai mai hlawm a. Dik tak chuan mu daih mah se pawi ka tih loh nen, an meng ve ţut bawk sia. Mapuii lo kawm a, chhûn lam chanchin vel zawh chian a, titipui deuh ka duh tehlul nen.

Mapuii pa chu pa titi thiam tak mai niin sawi tur a hre em em mai a. A titi a ngaihnawm leh a hriatna a zau em avang chuan ka nin tur angin ka ning lo chauh zawk a ni. Chutah ka bengverh zawng tak mai, tunlaia ka ngaihven em em chinghne chungchang a rawn sawi chhuah takah chuan ka ţhu ţha ta sauh sauh a.

Mapuii pa, pu Rawna chuan, "Tun hnai a chinghnia Aizawl khawchhung a rawn lut an sawi hi in hre ve tawh em? a rawn ti ta a. Kei chuan, "Hre ve deuh e. A tak a nih chuan a mak khawpin ka hria," ka han ti te te a, engmah ka thil tawn chu sawi ka tum lo.

Chutah pu Rawna chuan ka lam rawn hawiin, "A tak ngei chu a nih hmel. Hei i hmuh angin kan kawmthlang, huan thlanglam aţang hi chuan thing hmun a ni thla nghal mai a. Tun hnai khan vawi hnih chu a chinghne rual an rawn û chiam chiam alawm. Tunlai mi tam tak hian sihal leh chinghnia hi an hre hre hrang miah lo. Chinghnia chu sihal lian tak niin an hre ve mai mai hlawm a ni. Hmu lo mah ila an râwl hi a ringin a hrawl bik a, hai theih a ni lo. Tin, thla hmasa thla bial lai pawh khan Aizawl khaw dai a farm pakhat chu an beih chiam kha. Kha pawh kha a hmutu te'n sihalah an puh tlat a, a ni lo. Nang, i farm vengtute karah sihal rualin i bawngte an rawn seh ngam i ring em?" tiin min han zawt zui a. Kei chuan, "Ring hauh lo ka pu," ka lo ti a.

"A dik, chinghne rual rilţam tihna a ni mai. Chutah pawh a ruala an awm loh chuan ran awmna an pan vak vak hleinem. Mihring pawh a huho lo chuan an bei ngam lem lo. Mal leh mal inhmachhawnah pawh hriamhrei keng chu engtin mah an ti ngam bik lo, naupang an nih ngawt loh chuan," a ti a.

"A nih leh ka pu, chinghnia hi Mizoram chhungah an awm tawh lo tih te hi kan hriat dan a ni ve mai sia, a va mak ang reng ve," ka lo ti ve leh zel a.

"Chu tak chu alawm mak chu. Mizoram chu sawi loh, India ram chhungah pawh an chî a mang tial tial a. India ram chhungah hian 400 pawh a awm tling tawh kher lo vang. Mizoram chhungah hian a awm tawh lo chu kan tingawt thei lo na a, hmuh mai tur leh sawi tur erawh a awm tawh lo," a han ti leh a. Sawi tur a hre zek mai.

A ţawng duh bawk a, a titi kal laklawh lai chuan a ngaihdan han hriat law law chu ka duh a.
"A nih leh ka pu, 'Werewolf,' mihring chinghnia a chang ţhin an tih hi i rin zawng a ni em?" ka han tih chuan a nui hawk hawk a.

"Ka ring lem lo nachungin, thisena setana hnena inthawi ţhin zingah hi chuan chang thei an awm ka ring ve tho mai. Chu pawh rin dan deuh mai mai a ni. Setana hian a hnena inpumpekte chungah hi chuan thil hi a lo ti thei ve em a," a ti leh a.

Mapuii lam chu hawiin, "Nang i ring em?" nui chung hian ka va ti a. Mapuii chuan, "Ka hre lo e a," ner sak pahin a lo ti a.

Chutah pu Rawna chuan, "Kan mutsan ang che u, hlim deuhin lo inkawm rawh u," tiin an pindan lam chu min pansan ta a.
Pu Rawnate nupa chu an 'Polite' reuh ka ti hle mai. Nge ni an fanu hi tlangval chin hriat vak loh lakah pawh an ngaihtuah lem lo zawk? Mapuii hi ka lo sual vak te an hlau lo em maw ni le? Jenny te lah pindan hrang daihah class an inpe bawk si. Tihian ngaihngam deuhin an awm tho chu a nih hmel sia. Nge ni Pathian ţih tak chhungkua an nih vangin ngaihngam takin an fate hi Pathian kutah an dah zawk le?

Hun rei ve tak kal tawh, ka tlangval chhuah hlim a ka ngaihzawng nu nen kha chuan an inang lo kherin ka hria. Kha ka ngaihzawng nen khan minute sawm tal pawh 'Chance' han neih ve a, thuruk han sawi dun te kha kan châk ve thei em em a. A nu lah khan min mutsan kha a han tum lo thei lailêng khawp a. Thingpui hâng vawi hnih a in hnuah a mu tawh dawn emaw kan tih hnu paw'n thingpui a han chhuang ţha leh a, kan piahah a la ţhu ţha ang soh soh a. Bei tidawng leh zual turin dar 10:30 a rik tawh paw'n a tarmit a la, kristian tlangau chanchinbu te kha a la chhiar tak deuh deuh ţhin kha a nia. Ka bialnu ve nen kan beidawng lutuk kha kan innuih tawp zel ţhin lai te kha mitthlaah a lo lang uar uar a. Mapuii nu leh pate nen chuan an inang lo mange.

Chutia a nu leh pa an mut takah chuan hun remchang ka hmu ta ni a ngaiin engdang sawi tawh lovin Mapuii hnenah chuan Sangtei chu eng nge a an zui zel ka'n zawt nghal teh tawp a. Ka duh tih a hre tho va, amah Mapuii lakah chuan zêp buai vak ngaiin ka hre tawh lo.
Mapuii chuan, "Ţha chu a intia, mahse a ţha vak lo a ni," a ti a.
"Eng nge a awmzia? Ţhat lohna thil eng nge a neih? Ka hnenah pawh a dam ţep thu min hrilh sia," ka lo ti vat a.

Mak tih hmel lek lek hian, "In inbia a maw?" a ti ta. Min rawn biak thu kha Mapuii a hrilh lo tihna a nih hmel hle mai. Keiin min rawn biak thu ka lo sawi laklawh tawh si.
"A, aw... A chanchin ka zawh che kha i hrilh aniang chu ka ti mai. Hei hi a number a ni lo'm ni?" tiin message ka dawn number chu ka entir a. "Aw, a nih hi," a ti ve mai a.
"Eng nge a ţha vak lo i tih tak kha han sawi chiang lawk teh," ka ti a, ka ngaih a ţha chiah lo.
"Eng dang ni lo ve, a hriselna hi a pan ve lutuk a," ti ringawtin min chhang a. Mahse Mapuii hmelah chuan thil thup, eng thil emaw ni sawi lan duh loh a nei niin ka hre tlat a ni. Mahse ka zawt lui duh ta rih lo va.

"Khawiah chuan nge an awm ve reng reng a?" ka han tih chuan, "Aw, ni dawn tak, hei kan ţhenawm chiah in hi," a ti ta mai a. Hriat ka lo chak em em Sangtei te in chu kan lenna bul lawka mi hi lo ni rengin. Ka phûr sawt hle mai.
Mapuii hnenah chuan, "Chuti, naktuk lamah te a la ziaawm vak lo a nih chuan tlawh ve ila a ţhat dawn chu," ka ti a. Mahse Mapuii min chhânna chu ka beisei ang a ni lo kher mai.

"A chi loh ang."
Mak ti deuhin Mapuii chu ka en tawp.
"Engvangin maw?" ka ti a. Mapuii chu inngaihtuah âwm deuh hian a ngawi vang vang a. Ka rilru te te chuan, 'Mapuii hian a thîk deuh emaw ni le,' tih hi a lo awm hman dawn dawn a, tlangval luck ni ve âwm ziazâng chuan.
Keiin ka lo ngaichâng reng tih a hriat takah chuan Mapuii chuan, "Thla liam ta lawk aţang khan Sangtei pa hian an in-a kal te hi a lawm vak ngai lo va, keimah tih loh hi chu lengah pawh a duh vak lo," a ti ta a. Mak ka ti ang reng hle mai.

"Eng nge a chhan?" ka han tih chuan hnuai lam en chung hian, "Ka hre chiah bik lo, a nupui a sûn ațang khan a mizia hi a danglam vek," a ti a.
"Sangtei chuan eng natna nge a vei reng reng a? Natna tihdam theih loh a vei em ni?" tia ka han zawh leh chuan, "U Rin, amah la zawt mai rawh, tihdam theih loh chu a ni hauh lo vang," a tih chuan ka thaw deuh huai a.

Mahse, "Chuti, staff ka nih angin tlawh ve hrim hrim tal tur a nih chu," ka'n ti hram a.
Mapuii chuan, "A chi loh ka tih chu. Nuam i ti chuang lo vang. A chhan dik tak zawng ka hre lo na a, a nupui boral vang a nih kan ring vek. Mi fel biak nuam tak ni ţhin si kha a mizia a inthlak thawk a ni ber mai. Inleng pawh an nei tawh ngai lo."

"Eng hnathawk nge a nih a?"
"Doctor a nia" a ti a.

Chutih lai chuan ţhianpate class inpe pawh an zawh tak avangin engmah sawi chhunzawm lovin thingpuite kan in zawh hnu chuan kan haw zui ta nghal a.

Ka ţawng duh loh em avang chuan Puia ngaih a ţha vak lo tih ka hre reng. Chanchin min zawt na a, kimchang chuan ka hrilh lem duh lem lo va, engmah pawh min zawt zui ta bik lo.

Zanin chu mut vat ka duh. Chinghnia pawh ka buaipui peih rih lo, an rawn kal ka ring tawh chiah lo bawk a. Mahse, rilţam chuan an awm reng thei hauh lo ang a, khawi hmun emaw takah chuan an che leh ngei chuan ka ring.

Mut pah chuan ka phone ka han en a, Mapuii message a lo awm reng mai.

"Khawngaihin Sangtei'n natna a neih chungchang vel ka sawi kha tumah hrilh suh aw," tih, Mapuii message hi a lo ni a.
"Aw le," tiin ka va chhâng a.

"Ka ring nghal lutuk che hi a mak ka ti," tih hi a rawn thawn leh a.
"Lungngai suh, min ring rawh," ka ti a.

"U Rin, i fel ka ti e."
"A, eng chu nge maw ka felna ni reng reng le," ka ti a, ka nuih te lam lam a za.

"A, i fel ve hrim hrim," te a rawn ti vel a.
"Chhe lo min ti a nih chu," ka'n ti ve zauh a, ka va zei tak em....

"Ti e, ti tak tak," a rawn ti a.
"Hehe, a va lawmawm ve, nang tak i chhe lo. A nih muttui phawt aw," ka ti zui a.
"Hmn, nih muttui le.

***************

Thawhţanni, ni sakei a lo inher chhuak leh ta. Chanchinbu hrang hrangah chuan Aizawlah chinghnia a rawn lut tih an ţial chei chuai mai. Chanchinbu ţhenkhat lah chuan kan hostel piah a Gurunga-te bawngpui pahnih leh Thapa-te bawngpui pakhat an lo seh hlumtir thul. Chanchinbu chhuahtu ţhenkhat hi chu an nikhua lo mah mah ţhin chu a ni. Gurunga-te bawngpui a seh lo va, an bawng no pahnih erawh a seh ngei a. Tin, Thapa-te bawngpui a seh hek lo, bawng an vulh lo hrim hrim. Hosteler ho ka chhiartir ve chuan anni pawh an nui ve ringawt hlawm.

Mahse library dawhkan a Hringlang chanchinbu lo awmah erawh chuan durtlang dai a bawng no pakhat an seh thu chu an lo tarlang a. He chinghniate hian an awmhmun an sawn rih dawn a ang hle mai.

*************

Sangtei pawh chuan class pangngai takin a rawn kal leh thei tawh a. Tunah chuan kan inkâwm nêl tak tak tawh. Inngaihzawnna lam engmah la sawi dun tak tak lo mah ila library-a a rawn kal zin tâk danah leh ka hnaih thei ang ber a ţhutna a rawn rem ziah danah ka laka a rilru put hmang a chiang ve thawkhat tawhin ka hria. Staff ka nih avangin engmah min hrilh ngam lo chauh niin ka ngai tawh. Inngaihzawnna lam han sawi dun tak tak turin hun thawl kan nei lo ve ţhin em a ni.

**************

Chinghne thawm a reh rih chu a ni ta. Mahse mi thiamte sawi hmangah Mizoram aţanga an insawn chhuah nghal mai chu a rinawm lohin tlang hranah an insawn rih lawk chauh pawh a ni thei. Tin, thla a mang leh rih ta bawk nen zan lama chêt thawh an chîng rih lo pawh a ni ve thei bawk.

Mut pah chuan ka phone ka tuai nauh nauh a. Eng engemaw ho te te message a sawiin Sangtei nen chuan kan inbe reng a. Chutah chuan engkim chiang taka sawi hun ni ta a hriain ka duh thu leh ka thinlung luah khattu a nih zia ka han hrilh ta tawp mai a. Ka laka a rilru put dan ka zawt zui ve nghal a. Tichuan thinphu dêp dêpin a chhânna lo thlen hun ka lo nghak a.

Min chhân mai loh avangin ka beidawng lek lek tawh. Han zawh nawn a han nawr tut tut lah ni thei chiahin ka hre si lo. Mahse message a rawn type mek tih ka hmuh ve takah nghakhlel si, huphurh bawk si chuan ka lo nghak a. 'I zak lawm ni zah pawh, ve nasa a che,' tih message ka dawng ang tih ka hlau zek zek mai.

Chutia huphurh, nghakhlel ru zet a ka lo awm lai chuan a message chu a lo thleng ta. Thinphu dêp dêpin ka han hawng a.
"Sir Rin, ka awm danah nang paw'n i hriatthiam vek ka ring, hai rual a awm em ni?" tih hi a lo nia. A awm dan aţang chuan min duhin min ngaina ve takzet niin ka hria a. Mahse a sawi ngei loh chuan ngaih a ngam lo ve deuh alawm.

"Tichuan?" ka va ti ringawt a.
"Ka rilru dik tak ka hrilh che ang a, mahse thu min tiam ve thung rawh aw," a ti ta a. Mak awm ve aw thu han intiam nghal ngawt dawn chu. Thutiam chu bawhchhiat chi rual a ni tawh si lo. 'Aih' ka tih chuan a rilru dik tak min hrilh duh awm bawk si lo. Umn, ka thutiam tur chu thil harsa lutuk a ni em lo'ng chu maw.

"Aw le," ka ti ta a.
"Ka duh zia che hi ka sawi thiam lo zawk a, ka duh che piah lamah ka hmangaih che niin ka hria," a rawn tih chuan ka hlim lutuk hi awm ngaihna ka hre lo. Mu chung chuan ka nui vur vur a, ka nui chhuak teuh lutuk chu ţhianpa Puia'n thawm a lo hria ang tih hlauvin lukham te chu ka seh chawt chawt a. Ka ke artui pahnih chuan khum mawng lam te chu rang lutuk hian ka khâwng tlir vei tlat tlat a, ka inlukhûp thûl, a va nuam hawr hawr tak em.

Chutah message ka han en leh chu, "Mahse," tih hi a ni. Ka nui lai chu ka tâwp chiang khawp mai.

"Eng nge mahse?"
"Mahse maw...., khawngaih takin..., i thinlung zawng zawng chuan ka lakah i rilru pe suh aw," a rawn ti ta. A ngaihna ka hre lo kher mai.

"Eng nge a awmzia Sangte, ka duh che, ka hmangaih che min ti zo chauha ni lawm ni, keiin ka hmangaih lêt ve che chuan a tâwk a ni mai lawm ni, dawt min hrilh nghal ringawt tihna em?" tiin lungawi lo deuh hian ka thawn lêt a.

"Sir Rin, chutiang a ni lo asin. Ka hmangaih lutuk che. Mahse nang nen kan kal thui hmain ka hmangaih vang chein hrilh tlang che a ţha ka ti zawk, inchhir a kan tlai hma ngei hian."

Eng tak sawi ang maw tia rilru nuam lo zet a ka awm lai chuan, "Sir Rin, thla hnih liam ta khan ka awm nuam lo ser ser ţhin inentir a kan va kal, result kan han hria chu, thisen cancer veina chance sâng tak ka lo nei a lo nia. Cancer phei chu an ti chiah lo nain ka rilru hrehawm loh nan ka pain min hrilh mai mai nge ka hre lo, ka pa chu i hriat angin doctor a nia, college kal pawh hi a rem ti tawh lo zawk a. Mahse i awih angem ka hre lo, min hre lo in min be ngai lo pawh ni la, i hmel tal hmuh hrim chakin ka rawn class ve ţhin a nih hi. Ka pa lakah chuan chhuanlam siamin, ka natna atan hian botany subject aţangin medicinal plant(ramhmul damdawi) hmuh chhuah/zir chhuah ka tum thu ka hrilh thung a ni," a ti ta le!

Chu thu ka'n hriat chuan ka rilru a hnîm ruih mai. A mak ka tia ka khawngaih rualin ka thinlung takin ka hmangaih nghal vawng vawng mai thung si.

"Chuvang tak chuan min hmangaihin ka lakah i rilru zawng zawng pe lo la ka duh a ni. I nat sei hmain hrilh vat che a ţha ka ti. Tunah chuan thil awmzia ka hrilh ta che a, i duh chuan min kalsan thei tawh e," a rawn ti ta a.

Inngaihtuah buai ka ngai lo khawipin ka hria. Ka thinlung ngaihtuahna chu amah hmangaihnain a lo khat zo tawh a. Chu a natna chuan ka hmangaihna a tizual zawk si a. He natna hi a thihna tur kawng hawngtu a lo nih pawhin kei chuan a damchhung hun tal chu hmangaih tak a vawn tlat chu ka tih tur, ka mawhphurhna a ni tih chiang takin ka hre ta. Amah vanga khua ka lo tlaia lengţûl ka lo chang ta a nih pawhin pialralah min lo nghak ngei dawn tih hi ka chiang em a. Thlah lo va nghet tak a vawn chu ka tum ruh ta tlat a ni.

*****************

Hun a liam a, kan karah hmangaihna pawh a vul chho zel a. A sawi ang ngeiin an in-a inhmuh chu a rem ta lo va. Chuti chung chuan zan lamah Mapuii-te inah kan inhmu zeuh zeuh reng a. Chhun lamah college-ah hun fâl awm thei lo mah se, library-ah 'Fair' takin kan inkawm mai ţhin. Mahse zirlaite mit lo meng ve ta chu, min sawi zeuh zeuhin thil an man thiam chu zia lo ka ti deuh ţhin. Umn, pawi lo teh se, hetiang dinhmunah hi chuan ding lo se hetiang hi kan ni bik nâng.

***************

Chinghne thawm pawh Aizawlah chuah a reh ta vang vang rih chu a nia. Ka rilruah erawh chuan rawn chhuak leh se ka ti ngei mai. Ka pa phuba ka la la lo tlat. Gurunga-te huana ka kah fuh lah kha a hmunah thî baw nei nuai mah se, chhui zui tur awm hlek lohin a hnu a tawp hmiah a. A thi lo a nih a rinawm si a. Chinghnia ka huatna erawh a la reh chuang si lo. Han tawn fuh leh chu ka châk zek zek mai.


Khua a thiang a, thla bial zan a ni bawk a. Thla eng lawm a guitar kuah a hosteler ho nen han zai vak vak a châkawm hle mai. Chuti a nih loh paw'n ţhian ho, ngaihzawngte nen emaw 'World bank road side' vel a han 'Pari pari' te pawh a châkawm khawp mai. Tin, Sangtei va hmuh a hlim taka thla êng lawm a inkuah veng veng pawh a chakawm bawk.

Mahse lehkhabu chinfel ngai tam tak hemi zan hian ka nei a. Sangtei lah test an neih dawn hnaih avangin han inchhiar ve lawk a duh bawk a. Lungleng ru tak siin zaninah hi chuan kan inhmuh a rem dawn lo a ni.
Hosteler ho pawh a ţhen mahni khaw lama an haw lai a ni, a ţhenin zirlai an bih a, a ţhen an chhuak bawk a. Tumah han zâi pawh an awm lo va, a reh vawng vawng hle mai.

Phone message rawn ri pawh chhäng hman lêk lovin zan dar 10 a pelh pawh chuan ka la buai a. Ka tukverh bula lehkhabu rem khawm en fel leh tur a ka han din chiah chuan ka thlang lawk aţang chuan chinghnia hi a rawn û thut mai. A râwl a lianin a ring si a, ka phu zawk nghe nghe a. Chhâwntu dang an awm loh avangin chinghne maltlat tih ka hrethiam nghal mai.

Ka tihtur hre chhuakin ka silai ka chuh lawk a, a mu ka thun fel nghal a. Tumah pawh hrilh lem lovin kawmthlang lamah chuan ka tlan chhuk nghal a. Chinghne û ri ka hriatna lai bawr chu ka han thlen chuan engmah ka hmu lo va. Tlem a ka han chhuk leh deuh chuan chinghne kal liam tur chiah mei hmawr chu ka torch light chuan a va chhun fuh ta a.

Silai pawh ka lek hman lo. Ka um zui tih a hriat vang a ni chek ang, a tlan pur pur tawh mai sia, kei light keng, silai keng leh ani zan thimtham a mit fiah lutuk mai nen chuan kan inthlau hret chu a ni e.
Khawiah emaw tal a lo din khawtlai beiseiin a ruam lamah chuan ka chhuk ve zel a. Kawng mumal a awm lo nen, kal a har kher mai. Chutah ding detin kawngţum zawngin ka torch light chuan ka han ên kual a. Ka thlang thingkung phênah chuan a mei rawn lawr ka hmu ta hlauh mai le. Light pawh tiêng ngam lovin, thla êng ringin dîm tein ka pan ţhem ţhem a. Ka thleng dawn hnai a, silaia tin ka tum rual chiah chuan ruam lam panin a tlanchhe leh ta tlat mai.

Ka va chhuah rua lo mai em ti chungin ka tlan pai thla ţak ţak a, tlan chak a har hle mai. Chutah thil pawi zet mai a thleng ta. Ram hrui inzam chu ka pal nawk a. Bawkkhup zawng a ka tlu thla chu, chu lai tak chu ko, feet 5 vel a sâng chu lo niin. Min lo dâltu tur awm hek lo le, ka tla tlang thla fua a, bawkkhup zawngin ka zuk tla chawrh a, lungah ka lu ka tauh chawrh bawk. Chutah ka lu a rawn hai muai muai a, nikhua ka hre lo chhunzawm ta a.

Ka han harh chuan ka lu na tluk tluk chu ka hre hmasa ber a. Chutah thil awmzia ka hre chhuak zui nghal bawk. Ka sana bun lai chu ka han en dawn a, torch light ka lo thlauh daih si avangin thla êng ring chuan hnai takah ka han en hram a, dar 11 a lo ri chiah mai. Ka chhuah hun aţanga ka han chhût chuan minute 5 vel chu nikhaw hre lovin ka lo awm reng a ni tih ka hre chhuak a.

Ka lu na lai chu ka han khawih a, a lo pâwng lian hle mai. A ban deuh chap danah chuan a thî ngei a ni tih ka hre bawk a. Amaherawh chu nasa lutuk chuan a thî lo niin ka ring ringawt a. Hre chiang a han fiah turin ka torch light ka tibo daih mai bawk si. Ka âwm ruh lah chu a na ngawt ngawt a, thâwk a sak ţalh mai. Ka zuk sawh chiang em bawk a ni.

Thawh ka han tum a, ka tho ţha thei ta mang hlek lo mai. Ka nâk lo na zawk avang chuan ka thlep leh hnawk a. Ka nâk pawh chiang takin ka lo sawh ni ngei tur a ni. Chutah thawh ka han tum leh ka insanmar lai tak chuan alawm, min ti ka hautu, thil mak zet mai ka hmuh tak ni.

Ka nâk leh ka âwm ruh na dawm chung a din chhuah ka han tum leh chiah tihah chuan ka awmna piah mual, ka ep chiah tlâng pâwng laiah chuan mihring ding ka va hmu ta thut mai le! Mipa a ni tih a pian aţang chuan a hriat theih a. Thla êng hnuaiah a ni a, a hmel chu va hmuh theih lohin hlimthla ang hian a lang a. Ka mit vai emaw tiin ka mit ka han nuai chawt chawt a, mahse a awmna ngaiah chuan a awm reng tho mai. Chutah tlemin a che hret a ni tih ka va hmu bawk a. Chutiang hmun, ramhnuai lehnghalah tun ang huna mihring ka han hmu ngawt mai chu a mak hian a mak a ni tawp mai a ni.

Kim lo riauva ka inhriat avangin ka han indap thut thut a. Ni e, a lo kim lo chiang khawp mai. Khawnge ka silai kha a awm tak le? Ka insawh rual khan a per bo nge ni? Ka ke bul velah chuan dap pahin ka'n melh kual thuak a, ka hmu mai lo.

Chutah hawi chhuak lehin mihring ka hmuhna lam mual pâwng lai chu ka han hawi leh a. Chhe hei! A va han mak ngai em! Eng nge a awmzia ni ta ngai le ka thil hmuh hi, min barakhaih chiang lutuk tlat. Mihring ka va hmuhnaah khan mihring awzawng a lo awm tawh lo. Kha mihring awmnaah chiah chiah khan Chinghne pianhmang ka va hmu ta tlat mai le! A dik a dik chuan ka phu chiang khawp mai. Chu chinghnia chuan van lam, thla eng lamah dâkin a han û ta ruah ruah mai a nih kha.

Zan thim ngam inti ve tak, hlauh nei lem lo mah ni ila, tun ţum zet zawng min ti mûr ve sung sung thei hial mai. Chutah theihtawp chhuahin, na tia ţhen chawk chawk chungin ka han ding chhuak ta hram a. Ka ke rêk a lo ulh bawk nen, harsa fat fat tak a ni.

Ka thil hmuh chu eng laiin nge a lo bo hman pawh ka hre lo. Mit khap kâr zawk tak tak aniang, hmuh zui tur reng a lo awm tawh lo. Chhui zui chi ziazâng ka nih tâk loh avangin muangchângin chhak lamah ka inham tâng chho bek bek a. Ka silai leh torch light bo pawh ka ngaihsak hman tawh hek lo. Tlûk leh din fâwmin,a châng leh a bawha bawkvâk chungin, thi lova ruangin hostel compound chu dar 12 pelh hnu chuan ka thleng ve thei ta hram a.

Kan kawngkhar lan theihna ka thlen chuan min ngaihtuah hmel fea Puia vei tawn chhen chu ka hmu na a, ka chauh lutuk avang chuan ka au chhuak peih tawh lo. Chutah ka bawk thlawp a. Ka thawm chu hriain Puia chu rang takin, min ko mawlh mawlh chungin a lo tlan phei a, chutah min paw bahlah nawlhin inchhungah min luhpui a, ka khumah chuan min mut ta a.

Ka hliamte tuilum a min silfaisak hnu chuan nachhawkna min pek chu mum hnih ka'n hmawm ţhawt a. Thingpui min siamsak te ka in zawh hnu chuan ka harh ta sawt mai. Chuta thil awm dan kimchang ka han sawi chuan Puia pawh chuan mak a ti kher mai. Tunah chuan zing dar 1 ri tawhin thla pawhin liam lam a pan ţan tawh.


Chinghnia chhui tur a ka kal thlak ţanna hmun lamah chuan thâwm a rawn awm tak sut sut avangin tukverhah chuan Puia chu a dâk vat a. "A thawm a va lian deuh ve, sa lian tak a ni ngei ang," tia a sawi zawh rual chuan na pawh hre chang tawh lovin ka tho zawk a. Tukverhah chuan dâk ve nghalin mak ti leh a ngaihna hre lo takin thâwm rawn awm mekna chu kan thlir reng a. Ka rilru chuan 'Chinghnia kha a rawn lêt leh a ni mai awm mange,' ka ti a.

Hnim pik rawn che luai luai chu Puia chuan 'Emergency light' chuan a lo ên vat a. Chutah le, beisei loh lutuk maiin hnim pik kâr aţang chuan Sawma a lo chhuak ta heu mai le!

Puia nen chuan, "Sawma," kan ti rual ţhawt a. Mak tiin kan inen tawp ringawt. Chutah Puia chu hmanhmawh zet a tlan chhuakin kawmthlang lam, Sawma awmna lam chu a pan ta nghal a.

Link:
BBcode:
HTML:
Hide post links
Show post links

Ar eL' Khawlhring
Posts: 75
Joined: December 28th, 2016, 1:46 pm

Unread post by Ar eL' Khawlhring » June 27th, 2018, 10:41 am

ZÂN VÂK - 4
Ar eL Khawlhring

{Nizana ka draft ka lo delete palh nge maw ni, ka hmu ta si lo. Hei ka han tichawp leh a, duh ai chuan a thawnthu a hmanhmawh(kal chak mah mah) mai thei e. Eng pawh ni se, chhiar nuam vek u le.}

***************

Thâwm a rawn ri khat khat a, kawngka chu rawn inhawngin Sawma chu hmêl pawr em em mai hian a lo lut a. A thawmhnaw ţhen lai phei chu a ţet deuh hrup a. A hmelah chuan a harh chiang lo a ni tih a lang reng mai. Mit pawh khap mang lovin a hawina lam, a hma lam apiang chu a melh reng zel ringawt a. A hnungah chuan Puia chuan amah dawm chungin a rawn zui lut a.

"Sawma, khawnge i kal?" Min chhâng lo. Ka biak nawn leh pawh chuan min chhâng chuang lo. A mitmeng chu a buai em em a. Kan biaknate chu a chang chuan hre ve niawm tak hian a lang a. Min han ngaithla ve doh doh a, mahse min chhâng chuang lem lo chuan mak tih hmel zel hian min en leh vung vung ţhin.

Puia chuan khumah chuan a ţhuttir a. A biak mawlh mawlh lai te chuan a tho leh hluai ţhin a, an han inkuai ţhu leh chawt chawt ţhin. Tihngaihna kan hre lo hle mai. Kei che hlei thei bawk si lo nen damdawi in pan chu duh viau mah ila, a hun a laklawh tawhin, khawvar kan hnaih lek lek tawh tho va, Sawma chuan hliam engmah a neih bawk si loh avangin khawvar hnu a damdawi in pan mai chu kan titlu ta zawk a.


Damdawiinah chuan ni hnih vel chu kan han awmpui ren rawn a. Mahse engmah awmzia awmin a lang lo. A melh ngai a melh rûn rûn reng a. Biakin a ţawng hek lo. A châng chuan keimah min rawn melhin, a mitmeng aţang chuan engamah tak tak a hriatthiam theih chiah si loh. A chang chuan mitmeng thîp zet hian min melh a, a chang lahin khawngaih thlâ la zet hian min melh leh bawk ţhin. A â tawh a nih ngei dawn hi tih chu ka rilrua a awm dan dik tak ni.

Aizawla a pu te chuan psychia ward-a dah mai sawiin psychiatrist doctor-te pawh an râwn a. Anni lah chuan ţha zawk a an hriat ve tho avangin an lo rem ti ve mai bawk a. Mahse chu'ng mi â ward, rilru buai dahna a han dah mai chu han ngaihtuah chian chuan, kha chen ka mamawh hun apianga ka koh, min phatsan ngai miah lo tu, ka tana inpe em em mai hetianga mi â ward a dah ngai hial chu ka rilru a na vawng vawng mai.

Kan naute, hosteler ho chu ka kalna hmunhma vel hrilhin ka silai bo leh torch light bo te zawng turin mi pali ka tir a, thil danglam deuh an hmuh chuan min hrilh turin ka ti bawk a. Chawhnu her zetah chuan lo hawin ka silai chu an rawn hawn a. Kan nau pakhat chuan silai pakhat a rawn hawn tel tlat mai. Sawma chanchin dik tak hi tuma hnenah chiang taka kan la hrilh loh avang chuan Sawma silai an han hmu ringawt chu mak kan ti tlang ţheuh mai. Kei erawh chuan rin dan, ngaih dan, a tira ka rilrua awm reng tawh chu a rawn nemnghet thlapin ka hria.

Zanah chuan hosteler zawng zawng chu devotion te an neih zawh chuan common room-ah ka ko khawm nghal a. Sawma chungchang zawt nghalin, zanah a chhuak ţhin em tih te ka zawt a. A 'Room mate' pahnih chuan zan lama a chhuah ngai loh thu sawiin an ţang ngang mai.

"Nizan hmasa a dam loh thut zan khan eng ti tura chhuak nge a nih a sawi em?"
Pakhat zawk chuan, "Sawi lo, a chhuah lai tak pawh ka hre lo," a lo ti a.
A room mate pakhat zawk chuan, "Kei chu ka mu hma a, engmah ka hre lo," a lo ti bawk a.

An han sawi nak nak pawh chuan a chanchin chhe lam reng sawi tur hria an awm lo. An û en ber leh 'Leadership' nei ţha tak a nih thu bak sawi sawi tur an hre lo. Tichuan hosteler ho chu ka ţîntir ta a. Ka zawh dan teh thutah ah chuan an hrilh a haiin mak an ti ve ngawt hlawmin ka ring.

***********

Puia hnenah chuan kan ţhiani te ho hnenah ka thil tawn chanchin lo la hrilh lo turin ka ti a. Sangtei'n message-ah hna a ka kal loh chhan min zawh pawhin khawsik satliah ang mai maiin ka insawi tlat a. Mahse Puia chuan min rawn tlawh an duh thu min hrilh ta ta tlat mai. Chuti a nih hrim chuan 'Car' pangngai nei lem lo mah ila, kan mamawh phurhna ber pick up car chu keng a va lam mai turin ka ti ta a ni.


Mahse Puia'n a lo hrilh chuan an lo duh bik ikhaw lo mai. Kan tibuai mai mai ang che u tiin car an lo keng a, ka lo inrin chian hma chuan an lo thleng ta hlawl a, Sangtei, Mapuii leh Jenny chu.

Kan han inkawm chu kan nui tlang bâwk bâwk a. Ka natna chungchang vel min zawh takah chuan zêp tlem tlem nei siin ka han sawi a. An ngawi ţhap a. Chinghne chungchang vel ka han sawi phei chuan hlauh hmel takin ka ding leh vei lama ţhu Sangtei leh Mapuii chuan ka kâwngah min rawn kuah nghet sauh sauh a. Ka luck ve lai ber a ni awm e. Ka rilru chhungril takah phei chuan, a aia hlauhawm sawi a dawt phuah belh hi ka châk khawp mai, an hlauh luatah nula pahnihin min kuah nghet dun sauh sauh dawn si a.

'Hmangaih biahthu duu' pawh kan inhlan hman lo Sangtei nen chuan. A tuamah chuan 'Chance' min pek tum hek lo, an va han mawl hlawm tak, ţhian ţha chu an inti ve sia. Kan titi char char ringawt.

Chinghnia ka ngaihtuah lo, Sawma lampang pawh ka ngaihtuah tawh lo. Ka ngaihtuah ber chu Sangtei biak fâl theih a ni ber. Ka rilru hmul takah chuan 'Muah' bak a awm tawh lo a ni ber mai.

Rilru nei tak chuan, 'Ka'n zung lawk a nge," ka ti a. Ka nat dan aia nasa sa chuan ka bâi der vel a. Ka nâk na chu ka dawm der vel thûl.
Sangtei chuan, "Sir Rin,, ka lo kal pui ang che, i kal hlei thei lo a nih kha," a rawn ti ta. Ka hisâp(plan) a fuh chiang e. Lalpa chu fakin awm rawh se. Puia'n 'Ka lo kalpui ang che,' ti se chu a bam chiang viau ang.

Sangte'n min rawn kuah chiah mai chu le, ka nuam suai suai mai. Ka nâ dam dan te chu e, Faktea tihdam rawngbawl a ka dam dan te kha chu nêp tê. Aishwarya Rai nen ka mumanga kan thlawh dun aia nasa mah khan kan thlâwk sângin ka hria, a nuam let tawp.

Chutah zun chhuak tak tak lo ta chu varanda-ah chhuahpuiin kan inpawm nghal thlawp a, nâ pawh ka hre chang tawh lo. Ka ngaih tawh zia hrilhin a ni pawhin min ngaihtuah zia te, ka tawh sual tawh avanga hrehawm a tih zia min hrilh siam siam a. Chutih lai chuan kawngka rawn inhawngin Mapuii a rawn chhuak ta thut mai. "Awi tihpalh, pawnah in awm tih ka lo hre lo reng reng," tiin inthiam loh hmel takin luh zui leh mai a tum a, keini'n ţawngkain kan lo chelh a, mahse kan sawi pawh ngaithla tawh chuang lovin a lut zui leh ta a. Nuam chu kan ti chiah lo. Tin, laih pawh kan lai ve dêt e.

A pa chungchang te min hrilhin, a nu boral vanga a pa mizia inthlak ta te. Mi reng reng tih theih deuh thaw a huat deuh hlur thu te min hrilh a. A pa rilru pawh reiloteah a thlaksak theih a inrin thu leh an inah pawh ka lên theih thuai a beisei thu te min hrilh a.

Hmeichhia an nih avanga an chhuah rei theih loh thu rawn sawiin a ţhiante chuan an rawn ko ta a. Ngaiin thlahlel hle mah ila inchelh reng theih ni si hek lo le, engmah pawh kan tih hma chuan min hawsan ta nge nge a. A ho dêr mai.

An tlan liam fel chiah tihah chuan Thapa in zawn vel atang chuan ring zet a chinghne û ri hi kan hre zui a. Che thei ni ila silai nena han veh zui ka châk hle mai.
***********


Ka nâ chu na tehchiam ni hran tawh lo mah se, doctor te'n thla khat vel lai chu hna rum thawk lo leh intihah lo tur a min tih avang chuan chinghne veh tih lam a lang thei lo va. Hnaah erawh chuan nitin ka ka kal a. Sangtei nen pawh kan inhmu ţhinin kan inhmangaihna pawhin pâr a chhuang chho ve zel bawk.

Sawma pawh damdawi in aţanga chhuak tawhin a pute in lamah an enkawl a. A khât tawkin kan tlawh reng a. Harh zawng a harh ţha fu mai. Mahse a ţawng ngai mang miah lo mai hi mak zawng a mak takzet. Hetiang taka a awmna chhan hi chhui chhuah zawng ka tum khawp mai. Amah han zawt ila, min chhâng ngai chuang bawk si lo va, tihngaihna a vâng khawp mai.



Ni leh thla a vei a, september thla bial zan a ni leh ta. Khua a dur khup khup na a, chhûm dum tak tak te chu a kian leh tak duak si avangin ka rilru ka thlak ta thut a.

Ka tum dan hmasaah chuan, ka dam tawh tho bawk a, Sangtei kianga hun hman chu ka châk a ni. Amah pawhin leng turin min sâwm ve hmasak ber zan a ni bawk si. Mahse Sawma bul a va awm chu thil pawimawh tâwpkhâwk niin ka hre tlat. Sangtei te inah chuan len hun remchâng chu a bo bik nâng.

Sawma pute ka va phone a, Sawma bul a zan riah ka tum thu ka han hrilh chuan an lo lawm hle mai. Zan tir chauh a la ni bawk a, Sangtei te in panin ka tlan vang vang phawt a. Mapuii te inah lut kawi phawtin, a vawi khatna tur a ni bawk nen ka han sawm kawi a. Ani lahin phur takin min kalpui ve nghal mai bawk a.

Door bell Mapuii'n a han hmeh a kawngka min lo hawntu chu ka beisei ber a ni lo tawp mai. Sangtei pa ni awm tak chuan lut tur pawh a min sawm lem lo chuan inchhung luhna dâl chuan a lo ding siah mai a. Min han melh vung vung a, chutah Mapuii lam hawi lehin, "Hei tunge?" tiin min han kawk a. Min han tih dan leh zah loh danah chuan ka sa deuh zak mai. Mahse ngaihzawng te in-a lêng tur ka nih avangin engmah ka sawi lem lo. Mapuii'n Sangtei pa zawhna chhân tuma a kâ a han ân zuau lai chuan inchhung aţangin Sangtei aw ngei chuan, "Ka pa, ka ţhiante an nih kha, lo luhtir rawh," a rawn ti ta. Chutia Sangtei'n a rawn tih takah chuan ngen(g) hmel deuhin a tawlh sawn ta hram a. Kan kal pelh pah chuan chu doctor chuan zu rim a nam tih ka hre nghal bawk a. Mi fel tak nia an sawi ţhin si chutianga a awm chu mak ka tiin a nun a khawngaihthlak hle dawn niin ka hre bawk a.


Sangtei te inchhung chu mi pahnih luah atan chuan a lian mah mah zawng a ni e. A engamah hma chuan room ruak tam dan tur ringawt te chu ka lo hisâp vel a. An common room zau nuam zet a kan ţhut lai te chuan Sangtei pa chu kan epah ţhuin a mitmeng chu a ngui hle tih ka hmu thei a. A châng leh mitmeng thîp deuhin min melh thûl. A chângin a vei tuak sek a, a mitmengah chuan min lawm hmel mawlh lo a ni. Kan han titi ve bawk tak na a, kan tui lo tlâng chu a ni e.

Kan thleng chauh na a, kal leh nghal deuh maina chi nia ka hriat avanga han sawi ka tum ûk lai chuan Mapuii chuan, "U Rin, kan kal leh phawt mai dawn em ni?" a rawn ti ta hlauh a. Ka rawt tum mah ni se chutia min rawn rawt khalh chu mak ka ti ang reng hle mai. Engemaw fel lo tak Mapuii pawh chuan a hmu thiam a nih ka ring a.

Mahse Sangtei chuan, "Awi, in ti âwm ang lo em mai, in lo thleng ve chauh a," lungawi hmel lo lek lek hian a ti na a, pawi a ti lutuk lo niin ka rin hriat tlat. Nia, a pa awm dan hi a mak em a, ka hre thiam. Mahse nula in-a len ve a thingpui hlawh loh hi chu hriatthiam har ka ti fo. A, a rei lo ve em bawk alawm tiin ka inhnêm ta vel a.

"Sangte, zanin chu Sawma va riahpui ve ka duh deuh a, kan kal phawt ang e," ka han tih chuan a pa pawh chuan a beisei aiin kan awm rei lo a ti deuh nge ni, ka deuh hau hian min lo en a, mahse engmah phei chu a sawi lo va.

"U Sawma chu eng nge a an zel? Kan la inhre chiang vak hman lo na a, a awm dan hi ka khawngaih hle mai," Sangtei chuan a lo ti a.
"A ţha, a pangngai lutuk thil dangah chuan, biak erawh a har deuh, engmah a sawi ngai lo va," ka ti a.

Gate thlengin Sangtei chuan min rawn thlah a, "Lo meng reng rawh aw, message-in kan inbe dawn nia," ka ti a. Tichuan Mapuii nen chuan kan haw ta a.

Sawma pute in ka va thlen chuan min lo lawm thiam hle mai. Sawma awm dan mak an tih thu min lo hrilhin amah tak phei chu vên ngai leh hlauhawm zâwnga a awm ngai loh thu te, amaherawhchu a mut hnua ţawngvaih a hrât thu te, ramhnuai tih te, silai, chinghnia tih te a sawi zing hle tih min lo hrilh a. Mahse zingkar a mumang an han zawh leh pawhin a ţawng leh duh ngai miah loh thu te min hrilh bawk a.

Sawma pindan a ka va luh chuan hlim hmel deuh sawtin ka va hmu na a, mahse min lo be chuang lo. Kei erawh chuan be mawlh mawlhin, kan ngaih thu te, hostel-a a naute hovin an ngaih thu te ka hrilh mawlh mawlh a. Engemaw châng chuan min han thlêk ve deuh ha ţhin na a, engmah a sawi ngai chuang lo va. Eng pawh ni se, min la hre ve hrim hrim pawh hi a lawmawm e.

Sitting room lamah chuan hruai pheiin tv te chu ka en pui a. A che zia ka thlir pah reng bawk a. Dik chiah chuan ka riah chilh chhan hi rinhlelhna ka neih deuh vang a ni. Thla bial zan tak a ni bawk si a, hriat chhuah theih engemaw tak ka neih theih hlauh takin ka ti rilru a ni.

Sawma pute chu ka awm tak vang nge ni, ngaihngam takin an mu diak tawh. Dar 10 pel tawhin kei pawh ţhutthlengseiah chuan ka lo muthlu diar diar a. Chiang lo ruaia chinghne û ri ka hriat chuan ka harh zawk a, Sawma mut zâlna ţhutthleng ka'n en chuan Sawma chu a lo awm dêr lo mai le! Ka tho thut a, kawngka kalhna ka va en chuan chhunglamah a lo la inkalh thlap bawk si. Rang deuhin varanda thlang lam chhuahna kawngkaah chuan ka chhuak nghal a. Chutah Sawma chu ka va hmu ta. Varanda thlang lam vawnbân (railing) vuan chuan hla taka chinghne û-na lam ramhnuai chu a lo thlir veng veng mai a.
"Sawma," tia ka va koh pawh chuan hre âwm pawhin a lang lo. Chutah a banah ka va vuan a, inchhûngah ka luhpui ta a. Ka luhpui dawn pawh chuan a kalna tur lam en lovin ramhnuai lam ngawt chu a la melh a. Tichuan a pindan lamah chuan ka hruai lut a, mu turin ka ti a, thu awih deuh chuan a mu ve mai bawk a.

A awm dân chuan ka ngaih a tiţha lo hle mai. Hostel kawmthlang ram, mual pâwng lai a ka hmuh kha amah hi a ni thei tak tak ang em? A ni lo tura rin ai chuan a nih ngei rin theihna tur ka nei ţha em em mai si. Hunin a hril ang a, fiahin a awm chho chêk ang. Mahse mihring, chinghnia-a han chang tur atan êm chuan ka phal thei thlawt bawk si lo.

Sawma bul ţhutthlengah chuan ţhutmut mai mai ka tum ta a, Sawma awm dan kha a mak riau tlat a, thla bial zan a ni bawk si a, ka rinhlelh rûk hi a dik hmel riauvin a lang ţan tlat bawk si.

Chutah Sangtei ka la be miah lo tih hriain message ka va thawn a, min rawn chhâng lêt vatin 'Assignment' a tih thu min rawn hrilh a. A buai hmel sia biak rei ka inthlahrun deuh avangin ka be chhunzawm ta rih lo va.

Sawma pawh a mut tui hmel tawh khawp mai. Lehkhabu ka bul hnaia awm te chu ka chhiar kual mai mai a. Ka mut chhuak lutuk pawh chu ka inthing harh peih tawh lo.

Thâwm ri rak ka hriat chuan min tiharh zawk a, Sawma khum ka va en nghal vat a, a lo awm leh tawh lo. Ka intihharh peih loh luatah thil pawi a thleng ang tih hlau em em chungin sitting room lamah ka chhuak phei nghal a. Mahse Sawma chu a lo awm hlauh e.

Tukverh thir kham(bar) kar aţang chuan ramhnuai lam a lo thlir leh veuh veuh tawh. A bul ka va thlen pawh chuan min ngaihsak hmelin a lang chuang lo. A thlirna lam ka han hawi ve a, engmah hmuh theih tur chu a awm chuang lo nain ral hla tak a chinghnia nge sihal tih pawh hriat loh û tluar tluar erawh a hriat theih viai viai a.

Sawma dar a va khawih pah chuan, "Sawma, mu ang le, eng nge i tih reng, kotu che an awm em ni?" ka tih rual chuan a rawn hawi thut a, rum deuh hian min melh ta a.

"Sawma, eng nge a awmzia ni ta mai, i lung ka tiawi lo em ni, i ţha em?" ka han tih chuan engmah sawi lovin min kal pêl thuak a, pindanah lutin a va mu ta daih a. Ka sawi awmzia a man thiam tih ka hria, nuam ka ti vak lo.

Sana ka han en a, zing dar 3 a lo ri thuak tawh mai. Ralkhata û ri pawhin reh lam a pan tak avangin mut hahchawlh ve ka tum ta a. Chumi hma chuan Sangtei chu mangţha nan message ka va thawn ve leh hrim hrim a. Ka beisei loh deuhin min rawn chhâng nghal a. A in 'Selfie' thlalak ngei, tuna a thiltih lai ngei chu min rawn thawn a.

"Sangte, tinge i va zir rei em em ve, i taksain a tuar ang asin," ka va ti a.
"Nia, zanin chu ngei ngei a ziah tur ka nei a, ka zo ţep, nang pawh i meng rei, mu tawh rawh, ka mu dawn tawh, nang pawh mangţha muttui," a rawn ti ve a. A zirlai a la urhsun hle niin ka hria, ţha ka tih rualin a taksa hriselna chungchang ka ngaihtuah erawh chuan ţha ka ti vak lo.

****************


Ka men rei em avangin library chhungah midang awm lem loh lai chuan ka lo muthlu leh sek ţhin a. Mumang inzawm lo pui pui hi ka lo nei fo mai. Ka mumang pakhatah chuan Sawma nen hian kan lo inhau nasa mai a. "Chinghniaah i chang thei a nih kha, engvangin nge i inzêp tlat?" ka lo tia, ka harh leh a. Ka mumang avang ringawt te chuan ka inthiam lo leh hnuhnawh vel a. Ka ngaihtuah chhunzawm a. Hetianga Sawma a awm ringawt mai hi pawi hi ka ti vawng vawng a.

Ka lo muthlu chhunzawm leh, Sangtei nen inthlahlel em em hian kan lo inkuah a, kan titi dun melh melh a. Chutah a khâk chhâkna heh vâm hiam maiah chuan fawh ka han tum lai tak chuan Mapuii a lo ni leh daih a, ka harh leh zawk a. Hmn...ka taksa leh rilru a chau a ni e. Mut bawrh bawrh ka mamawh a ni.

Teaching staff te'n chawhnu lam meeting an neih dawn avangin haw turin ka inbuatsaih mek lai chuan Sangtei haw tur chu a rawn lang ta. Ka lo vui lek lek hman alawm le. A meng rei tih hriat takin a mit tlângkâwm te chu a chhah deuh tap a. Ngurchuai hmel a pu hret tho na a, ka mitah chuan a hmelţha ber tho.

"Ka rawn kal ang kha i ti sia i va rei ve." A laka ka lo intih thu hman zia ka hre chhuak nghal.
"Nia, kan class a laklawh lutuk a, vawiinah 'Off' ka lo nei miah bawk si lo va."

A aia zaidam zawkin, "Aw, a nih chu, haw mai ka lo tum a, kan lêng kual mai mai zawk dawn em ni?" ka han tih chuan, "A chakawm khawp mai, mahse ka pa-in a clinic-ah tuna kal turin min tia, ka rawn hmu kâwi hram che a," a han tih chuan, "E, a nih chu. Va kal rawh, zanah ka lo lêng leh dawn a nia, tihtur pawimawh i neih loh chuan," ka han tih chuan a ngawi vang vang a. A tawpah chuan, "Â, nei lo mai ang," a ti a, a nui har har a.

"E, tihtur dang i neih deuh chuan sawi hreh suh. I pa i vengthâwng a ni maw?" ka ti a.
"Ni tho mah se, ka thil duh ka sawi hi chu min hnial hreh asin, fanu mal duat sual theih loh ka nih hi," tih pah chuan a nui leh her her a. Aw, a nui ri han mawi zia lah chu. 'Luitê luang damdiai kar a....' tih vel a thluaithlum ka tum lem lo ve, a mawi a ni tawp mai. Min tidam siai siai zel mai asin. Mahse, a tihtur pawinawh dang chu eng nge niang le? Zirlai a nia, ka lo tibuai mai mai zawk angem le? tih te ka ngaihtuah a, len ka lo tum ve ringawt chu fuh ka ti lo leh deuh na a, a lo phal ve laklawh tawh.

**************

Zan dar 7:30 a rîk chuan Sangtei te kawtah chuan bike chu ka hûng thûm dat a. Ka thlen hun tur bawr vel ka sawi lâwk tawh avangin varanda-ah chuan a lo awm lâwk diam a. Zanin chu Mapuii pawh chhuanlamah ka sawm hran lem lo. A ţul chuan keimah ngeiin a pa hau(h) chu ka tuar tur a ni tiin rilru ka siam fel sa tawh.

Hlim deuhin min lo chhâwn a, inchhungah kan lût zui ta nghal a. A pa chu a lo ţhu ngawi leh ngul na a, zan hmasa ang chuan min melh na lo deuh chuan ka hria.

Tichuan amah zawk chuan inchung zawlah chhohpui atana min sawm avang chuan kan chho dun ta ral ral a, a pa erawh a meng tûr hle tih ka hmu.

Inchung zawl, thla eng mawi leh khaw thiang nuam zet maiah chuan tlâk dâl, vawnbân ngheng chuan kan ding dun a. Min zawh angin Sawma chanchin pawi lo chin te chu ka hrilh mawlh mawlh a. Chutah amah Sawma ka ringhlel tih sawi hauh lovin, ani zoology subject la-ah, 'Werewolf' chungchang a ngaih dan, a rin dan te chu ka zawt pah a. A han ngawi vang vang a, a rin vak loh thu leh, mahse thil awm ve thei tho nia a ngaih thu min hrilh lai tak chuan, kan thlang lawk aţang chuan ring fahran mai hian chinghnia an rawn û ta a nih kha. Sangtei phu chiang lutuk leh hlau lutuk chuan min rawn kuah chawih mai a, kei pawh chuan nghet takin ka lo kuah ve a.

Chinghnia chu an rawn hnai leh ta maw, an huangtau sâwt hle mai. Mahse chutia chinghne rawn hrâm ta thut chu tun ţum chu, huat tâk aruangin, an rawn hrâm lo vang tih ka hlau rilru zawk. A chhan chu ka hmangaih berin ka kuah hmasak pawh ngai lo va min rawn kuah tak avangin. A, chinghnia chu malsawmin awm teh se....han tingawt dawn ila ka pa ngaihtuah chhuah chuan ka haw ru em em bawk si. Chutah dîmtein ka kuai dâk a, lungchim takin kan infawp ta a.

Link:
BBcode:
HTML:
Hide post links
Show post links

Ar eL' Khawlhring
Posts: 75
Joined: December 28th, 2016, 1:46 pm

Unread post by Ar eL' Khawlhring » June 27th, 2018, 10:43 am

ZÂN VÂK - 5
Ar eL Khawlhring

Ka hlim lutuk vang a ni ngei ang, Sangtei khûr der der te chu chinghnia a hlauh luat vang nge, ka kuah avanga a hlim lutuk vang tih pawh kei tlangval hnaisai lo hian ka hrethiam pha ta nek lo mai. Ka tan chuan zan hlimawm tak, ka damchhung a ka theihnghilh tawh loh tur chu a ni chiang e.

Sitting room lama kan chhuk thlak leh hnu te chuan a hmel te chu a nung sar a, hmuh a nuam ngei mai. A pa lah chu hmel hmuh nuam takin a awm bawk a, nizan a kan len laia a hmel nen chuan dang tak a ni. Mi te chu a be ve suam suam reng a, college chungchangte min zawt a. A kâ zen mah ila min seh lo vang tih ang vel hial tur hi niin ka hria. Chutia a mizia inthlak teh hlawk lutuk chu mak ka ti hle mai. Nge ni, a makpa atan hian min ît ru reng zawk em le? te han ti vel ila, ka va zak thei lo tak.

A pain min mutsan hnu te chuan hlim takin kan la inkawm a, dar 11 a rîk chuan kham lo takin haw zai ka rel ve ta a.

Tlai thawkhat tawh mah se Vanapa hall kawt velah te chuan mi hrang hrang an la tam hle mai. Zodin phei vel a ka tlan lai chuan ka light-in a va chhun fuh hmeichhia avang chuan ka accident lek lek mai. A chhan chu, chu nu chu tudang ni lovin Mapuii hmuh a ka hmuh tlat vang a ni. Ka hmu sual a nih takin tiin ka tlân lêt leh ngat a. Nih zawng a ni chiang alawm, ka hai mawlh lo. Mahse a inchei dan vel chu mak ka tiin rin har ka ti zawk. Pawnfen tawngchham lam lek lek hi a fêng a, kawr âwm zau lampang deuh a ha bawk a, a hmai te chu a chei viau bawk. Kawngkama a lo ţhutpuinu kekawrte balh hmel zet leh tlangval inbual khât hmel zet ka hmuh chuan ka ner sawk a, helmet ka khum avang chuan min hre lo hlauh a, ka tlansan ta daih a.

Mi ţha leh nungchang ţha âwm fe a ka ngaih a nih nakalaia chutia a lo awm ka hmuh chuan ka rilru a na vawng vawng mai, zân vâk dik tak chu chinghnia ni lovin amah Mapuii ngei chu a nih hi ka ti a. A chanchin Sangtei ka la zawt ngei ang ka ti rilru rauh rauh a, mahse tuna zawh rih loh phawt chu a ţha ka ti ta zawk a.

***************

Chawlh kan neih avangin torch light, ram vahna-a hman chi, chal a hrên beh chi lei pah a, ţhiante tlawh kual ve zawk tumin ka inkhalh chhuak a. Ka duh ang tak leh tlawm deuh zawk awmna ka hriat loh avangin ka zawng zel a. A tawpah ka beidawn tawh hnu-ah ka ţhiante in-a ka len laiin khawchhak lam unaute'n an rawn zuar ta hlauh a, ka tum aia tlawmin ka lei ta a.

Eng eng emaw la en kual ka duh avangin ka bike pawh chanmari kawn ramhlun lam kawng sirah ka dah a. Ka tihtur te ka tih zawh hnu chuan step-ah ka bike dahna kawngpui panin ka chhuk thla leh a. World vision office bulah chuan tlangval pathum ruih hmel zet zet hi ka kalna kawng dâl deuh chuan an lo ţhu a. Hêl a han kal pelh thlak mai ka tum chu a sira banah chuan ka inpal palh ta hlauh mai. Chutah ka tum loh deuhin a sir ber a ţhu chu ka tauh palh a. Chu veleh thinrim zetin, "Zawnga," tih pahin a rawn ding nghal a. Ka sa zak na a, thiam lo zawk ka nih avangin ngaihdam ka dil a.

Mahse, chu pa chuan min ngaihdam tum lovin min pawt ding tlat mai. Pakhat zawk muthlu deuh lûp lûp lah chuan, "I tilui a nih kha," min lo ti bawk. A bul chiah a kuttum lian deuh, boxing glove bun sa ni awm zet a kut vûng bûr lah chuan min rawn khawih a châk hmel ngang mai. Ngaihdam ka han dil ţhat leh pawh chuan min chhuah duh tak chuan si loh avangin loh theih lohvin buaina ka hmachhawn tih ka hre ta a.

World vision office chhung aţang chuan ruihhlo ngai, chhûn chawl ho chu an rawn dâk huang huang a. Ka inring tawh kher mai. Rui hlawm hle mah se pathum an ni a, chuvangin ka chêt hmasak ngei ngei a ngai a ni. An kuttum chum buang ai chuan ka kuttum tereuhtê hi a che rang zawk dawn tih ka hre chiang lutuk, chuvang chuan ka zâm lo. Mut chhuak deuh pa leh a bul chiaha mi bitum hmasak tum a ka han insanphek uaih lai chuan world vision office aţang chuan hmeichhe au ri ka hria a, mahse ka va hawi phei lo. Chutah mipa pakhat hian pâwr deuh hian, "Hei, nangni kha kan piin lo phei nghal r'u a ti," tih pah chuan amah chu a lo phei a. Chu mite pathum chu, "In zak lawm ni, buaina siam ching in ni ziah nangni hi, phei nghal r'u," tih pah chuan ngaihdam min rawn dil a. Chu mite ho chuan rum fe a min melh chung chuan an lut phei ta a. A zahthlak duh hle mai, min thlirtu an tam si. Ka chhuk thla a, ka haw zui ta vang vang a. Ka ngaihtuah lêt a, office chhûng aţanga hmeichhia rawn au, 'Kan pi' an tih aw ri kha ka hriat hnu a ni ngat mai, mahse ka hriatna hmun ka hre chhuak thei mai lo.

*************



Puia nen chuan chhuak turin kan inpeih fel at tawh. Chakai meichher kan chhitna tura pawimawh zawng zawng pawh kan ipteah chuan kan khung fel tawh a. Ka silai leh a mu ka en fel nawn leh a, ka chempui ka tah hriam, tle em em mai chu ka han en nawn leh a, ka nui sak a. Hetiang em em a chem ka tah uluk pawh ka la hre ngai lo.

Dar 7 a ri a. Thang rei kan inrin sa tho avang leh lui kal kan tumna hmun, a kawng chu Sangtei te in lam kawng a nih tho avangin thingpui te in kawi hmasa ila tih kan rawt a; Puia'n Jenny class a pe tawh lo hmu khât si lungleng tawh bawk nen. Mahse kan kal tur thu kan hrilh lawk lem lo.

Pick up kengin hmanhmawh lovin kan tlan a. Aizawl khawpui dung chu light a ên ţhat em avangin thla pawh a êng lo sawtin a hriat a. Traffic jam ve neuh neuh nen, dar 8 dawn hnaiah Jenny te in bul chu kan thleng thei chauh a.

Jenny te in-a luh hma chuan Sangtei te inah lut hmasa lawk ila tiin kan han pêng kawi lawk a. Door bell ka han hmet a, Sangtei pa chuan kawngka min lo hawnsakin Sangtei a awm loh thu leh thimhlim khan veng ţhenawmah a pite in-a a kal thu min lo hrilh a. Tichuan Jenny te in lamah kan kal leh nghal a.

Jenny'n kan ţhian dun mjn lo hmu chu mak a tiin a hlim hmel hle mai. Keinin kan thil tum te kan hrilh hnu chuan thingpui hâng min lumsak a. Chutah Mapuii ka hmuh mai loh avang chuan, "Jenny, khawnge Mapuii hi?" ka han ti a. Nizana kawngpui dung a ka hmuh kha ka hre chhuak rauh rauh a. Kha vang khan amah Mapuii ka hmuh dan chu a dang vek a, biak pawh ka châk lêm lo. A hmingin Jenny chu ka zawt ve mai mai a ni.

"Ţhenawmah a chhuak lawk a nih kha," Jenny chuan a lo ti mai a. Puia nen chuan reilotê chu hun thâwl an neih duh ka rin avangin varanda thlang lamah chuan zun zunga inthiar chhuanlam pahin ka kalsan a. Varanda thlang aţanga han thlir chuan kan lui kalna tur mual dung leh ruam chu a lang raih a, a lunglenthlak raih raih ngei mai.

Chutih lai chuan ral hla takah chuan chinghnia an û leh rawih rawih tawh a. Zanin ngei hian han tawn nawn leh sak chu ka châk ngei mai. Chumi atana inrin lâwk leh invên lawk nan tiin silai pawh chu keng ka ni rêng bawk a.

Chutia ka thlir vauh vauh lai chuan Jenny te huan mawng pal bul a thil phei vuai chu ka zuk hmu tlat mai. Eng nge a nih ka zuk hre chiang thei lo na a, mihring a ang ka tih lutuk avang chuan a aia chiangin ka han en leh a. A ni, a ni chiang lutuk tlat, mihring ngei a ni! Huan mawng thinghmun aţang chuan pal rawn keuvin a rawn kûn kât kât a, tichuan huanah chuan a rawn chho ta a. Min hmuh ka hlauh avangin ka pil vat a, ka bihthla ta dek dek a.

Fimkhur hmel ang reng tak hian a rawn chho zel a. Êngin a chhunna chin a rawn thleng a ka han hmu chiang mai chu, Mapuii a lo ni reng mai! Mak pawh ka tirei hman lo. Inchhunga a rawn luh hma ngeiin ka chhoh vat a ngai. Hmanhmawh tawkin sitting room lamah ka chho vat a, Puiate chu an lo inkuah uluk lai tak a lo ni leh nghal. Ka thawm an hriat veleh an inthlah vat a. "Tihpalh," tih pah chuan ka nui ringawt a, Puia chuan ngei hmel deuh hian min lo melh ram ram a, ka inthiam lo khawp mai, mahse ka tihluih ni bik hek lo le.

Choka kawngkhar a ri rak a, choka lan theihnaah ka ţhut sa avangin Mapuii rawn lut chu ka hmu nghal a. A sam te chu a thur deuh bum mai a, a hmai te chu thlanin a bual mawm hlupin a tâi tûk bawk a, min rawn hmu lovin a phei tlang a.

Jenny thingpui siam kan in zawh chuan kal nghal mai kan tum tawh. Chutih lai chuan insil fai hlim tih hriat tak hian Mapuii chu fai ser sawr hian bual in aţang chuan a rawn chhuak a. Min han hmu thut chu a phu deuh zawk tih ka hmu thiam, langsar chiam lo mah se, Puiate chuan an hmu thiam hauhin ka ring lo.

"In lo leng a ni maw? In inchei dan chu! Khawnge in kal a?" a rawn ti nui sâng a, mahni inthunun a tum hle tih ka hre mai.
'Nangmah zawk kha khawnge i kal' han tih mai ka châk ngei mai. Mahse ka insûm ta zawk a. Chakai meichher chhit kan tum thu ka sawi a. Chutia kan inbiak lai chuan Jenny chuan, "Mapui, khawnge i kal vang vang a? I lo haw lai ka va hre lo ve," a lo ti a.
"Ţhenawmah ka kal lawk dawn ka tih kha, nichin deuh khan ka lo haw tawh," tiin a lo chhâng a.
'Dawt dawt dawt," lo tih hi ka châk khawp mai. Nizana a awm dan te, zanina a awm dan zawng zawng pawh hriat chhuah hun a la awm ngei ang, mualpho hun a la nei khawp ang. A thitih rûk hi kei chuan ţhiante bulah pawh ka puansak kher lo vang, mahse laihlanin a la awm ang. Amah vang chuan a ţhiannu Sangtei pawh chu ka hmu nikhualo palh ang tih ka hlau ta lek lek mai.

**************

"I mizia hi a mak ngawt mai tunlai hi. A châng leh i hlim thut a, a châng leh thinrim hmel deuhin i awm leh thut a. I mizia hi a inthlak reng mai. Eng nge maw i awmzia le?" Puia'n a rawn tih takah chuan ka ngaihtuahna ata ka harh chhuak zawk a. Nia, a dik. Ka ngaihtuahna kal ding lutuk avang chuan ka motor khalh pawh ka lo ngaihsak mang hauh lo mai.

"A, engdang ni lo ve, ka ngaihtuahna ka lo kâwm tui lutuk alawm le," ka ti ringawt a.
"Mawlhtu che a awm em ni? Ţhiante hi chu inhrilh ve ţhin a ţha a nia," a rawn ti ve thung a.

"Engmah mawlhtu hran awm lo ve, ka ţhian pakhat chanchin chhe lam ka hre deuh a, chuvang maw le. I chempui kha i tât hriam ţha maw? Silai i nei ve mang si lo va, sakei pawh a awm maithei a nia," ka tihsan daih a. A ner nâng nâng a. "Nanga chempui khan ektum pawh a sât bung zo lo ang e," min ti a. Kan chhukna tur hmun chu kan thleng der mai.

Motor kan hûng ţha a, iptepui leh silai chu ka la chhuak a, lui lam pan chuan kan kal ta nghal a. Kawngţum hlui tawh zawhin kan chhuk zel a, kal pahin a hnawk zual kan sâm pah zel bawk a, thla a ên ţhat avangin kal a harsa lutuk lo.

Keini pahnih hi ram chhuak ngai lo tih takah engmah chinchâng kan hre lo va. Chakai chhuah duh hun lai a ni em tih lam kan ngaihtuah pha lo va, kan inrawt phûr a, kan chhuak ve mawp mai a ni. Kan kawmthlang luiah te kha chuan meichher chhit chu kan nei ve zauh zauh tawh, mahse man tak tak tur a awm ngai lem lo. Tunţum pawh hi hlawhtlin inring tak a chhuak pawh kan ni chuang lo va, sawi ve rêng rêngah tia kal kan ni satliah mai. Chakai pakhat pawh kan man chuan a ţha a ni mai. A tuamah mah hian kan ei peih lo hrim hrim chakai chu, ei tur lai ber pawh kan hre lo. Man sa dah khawl na tur chu bucket tê chhin nei hi ka hnungah chuan Puia chuan a rawn keng thên lauh lauh mai.

Mi sawi kan hriat danin helai kan lui kalna tur hi miin an tlawhpawh nasat loh a nih avangin kan kal ve tawp a ni ber. Minute 15 vel kan kal hnu chuan lui luang ri ker ker kan hre ta a.

Lui kan han thlen thlak chuan a lo nuam viau mai. Ka light thar lei chu ka han tiêng a, meichher pawh chher khat chauh kan siam avangin kan la hâl alh lem lo. Hnuhma pherh deuh leh lung phawhna tharlâm deuh a awm loh avangin mi an kal vak lo a nih ringin kan phûr hle. Chawlh pawh chawl khawmuang lovin buh hmui kan, Puia'n a iptea a ah chu phul thla zelin keiin hnung lam aţangin light-in ka lo chhun zel a.

Fimkhur tak chunga lui kawi ruk vel chaw kan chah thlen chuan kawr ruam thûk vak lo a lo awm ta. Kal ţhang kan ni bawk si lo va, chet sual palh kan hlauh avang chuan kan duh tawk ta a.

A nghah nan meizûk ka siam a, Puia ve thung cigarette lo zu thei ţhak lo inti chuan a lo ken theihnghilh hlauh mai. A zu châk tawh bawk si chuan ka vaihlo zial chu inthlahrung deuh hian a rawn ban ta nge nge a. A tui a ti leh hle si. Cigarette lo pawh a lo zu thei khawp mai. Keini pahnih kan inanna em em chu thlahrang, ramhuai tih te hi kan cho e tihna ni lovin kan hlau ve hran lo va, zan thim a nih avang ngawtin kan hlau lo hrim hrim, ei zawhsan kan hlau zawk ve ve.

Kan kal chau ve ta deuh hret bawk a, ka han hahchawl vang vang a. Puia'n a phone a khawih a, keiin ka ngaihtuahna ka kâwm mai mai thung a. Sawma kha engtin nge a awm zel ang, zanin angah te hian ram lam hawiin a buai leh ruai ang em?

Sangtei ka han ngaihtuah leh a. Ka lo hmangaih zia te ka hre chhuak a. Thisen cancer-na chance sâng tak nei, an zêpsak a nih phei chuan a cancer hial tawh maithei a ni. Cancer chunga neih hial ama'n lo duhin lo ngai ta se, fa neih pawh rem dawn lo tih chiang sa. A, ngaihtuah zui lo zawk teh ang, ka hmangaih tlat tho ang a, ka thlah hauh lo vang. Tunah tak phei hi chuan a nun a zâwiawi sâwt si, ngaih a ngam lo sawt khawp mai.

Mapuii chungchâng ka ngaihtuah ve leh. Ka mi rin em em khatianga ka han hmu te kha mak hi ka ti ngawih ngawih mai. Mi awm ţha duh lo maw a lo nih reng! Ţha âwm taka lang siin... A mi kawp aţang tehreng pawh khan a awm dan chu a chiang vekin ka hria. Zanina a rawn chhuah chhohna hmun te rêng rêng kha, tlangval hnaisâi lo nen an inhmu a ni khawp ang. Mahse tinge inah an inhmuh mai loh! A nu leh pa pawh an awm si lo. A duh pilril ang reng chu ka ti!

A dika dik chuan ka rilru tenawm tak han puang ta tawp ila; Sangtei hi tawng hmasa lo ta ila, Mapuii aia thlan zawk tur, ka milpui tur leh ngainat zâwng midang ka hmu lo, ti tawp mai teh ang. A hmel pawh a ţha, a mizia ka hriat hmasak lah ka ngainat chi, pian thiam bawk si. Mahse, zan hnih chhunga ka thil hmuh te khan engkim a tidanglam zo vek. Ka hmu hniam tlat, biak pawh ka châk tawh lo.


Chutia ka ngaihtuahna vâk vêl chu ka piah lawk mai a chinghne rawn û thut mai chuan min va tiphu chiang tak em. Zan thim hlau lo inti ve tho Puia lah chu a kâng zawk a, chempui a chuh nghal a. Nia, phut zawkna tham chu a ni ve alawm hlauh vang ni chuang lem lo paw'n.

"Puia, i phone tithim rawh." Ka silai ka chuh nghal a, kah mai theih turin ka dah nghal bawk a. Ka chal a ka hrên light pawh chu ka la tiêng duh rih lo.

Thingţang tliak ri rap kan hriatna hmun chu a hnai hle mai. Kei pawh ka inring viau tawh. A rualkhat an nih leh takin tih thu-ah min rawn bawh thut pawh a lo inven nan ka chempui chu dimte a phawrh chhuakin ka bulah chuan ka dah nghal a. Mahse thâwm a reh leh rih vang vang a.

Thâwm ri set set ka hriatna lam ka melh rual chuan ngur chhar chhar ri ka hre ta.
"Puia, inring rawh aw," tih pah chuan light chu ka hmet êng nghal a. Chinghne koham hmel zet pathum hian insi deuh chêtin, mit de ţhiang rualin min lo en reng tawh mai. Puia nen chuan kan inhlat deuh vang nge, ka êng chhun chiah an ngaihsak zawk ni, ani lam erawh an ngaihsak ve miah lo.

Min rawn pan nghal mai lo bawk a, khawi ber nge ka kah ang tih ka ngaihtuah hmasa zawk a. An hruaitu ber kah hlum hmasak chu a pawimawh dawn tlat a ni. Ka pa phuba la tur riaka ka inngaih avang chuan ka phûr hle a. Mahse ka phûr sual ang tih hlauvin ka inthunun hram hram thung. An pathum zinga a lian deuh ber, rawn pâwng deuh ber kah tum a ka silai ka tin chiah tihah chuan chhak lam aţang hian a rawn ri sut sut a, rawn phe vuai, rawn zuang zawk hi ka hmu hman. Silai chu ka hmet per pawp a, mahse chinghnia chu pakhatmah an tlu ta hauh lo mai. Ka ţhelh a ni chiang a ni! Chutih rual chuan ka hma zawn hlam nga vel lek a hlaah hian chinghne hrawl em em mai hi a rawn ding ta run mai le! Rawn phe vuai ngei kha a ni chu chinghnia chu. Beisei loh lutuk thil a nih avangin ka phu deuh khan ka tum ka ţhelh tih ka hre bawk. Chu veleh Puia chu au ţhawt pahin ka bulah chuan chempui nen a rawn zuang chhuak nghal a.

Puia, chempui vai chunga a rawn zuan chhuah vang chu a ni ngei ang, chu chinghne hrawl tak mai pawh chuan hma lam rawn pan a tum bik lo. Chumi hun remchang chu chuhin ka silai mu rang taka thunin chu chinghnia chu ka tin nghal a. Chutah chiah chuan alawm ka duh loh lutuk mai ka hriat chhuah tâk ni. Chu chinghne lian zet ngei chu a ni, Gurunga huan a chinghne pathumin min beih rawn an tum lai a, min beih phal lo va lo khaptu kha ni.

Ka hre chiang lutuk tlat, a ke pali vâr bikah te, a chal râng varah te, a len danah leh a mitah chuan. Chutiang ka ngaihtuah thlen meuh chuan ka nunna min chhanhimsaktu chu ka kâp thei ta hauh lo mai le! Chinghne dang angin thinrimin min ţhen khum ve hauh lo va, a mitmeng lah chu a zaidam hmel em em mai bawk si. A hawiherah lah chuan hruaitu ni awm hmel hliah hliah hi puin a zahawm riauvin ka hmu bawk a.

Chinghne dang chu han kâp hram dawn ila, kah tirem lo tawk turin a hliah tlat mai bawk si.
Puia'n, "Ţhianpa, kâp ta che," a rawn tih ţhawt takah chuan ka tin ţha leh a, mahse ka kâp thei chuang lo.
"Ţhianpa, ka thei thlawt lo a ni," ka ti tawp ringawt a.

Chutah chinghne lian chuan a mei a hêm vut vut a, a chîk deuh nghur nghur bawk a. Chu veleh a hnunga chinghne pathum chu chak deuh hian an tawlh lêt a. Chutih chhung chuan chu chinghne lian erawh chuan che miah lo hian min en reng ringawt a. Chutah kei chuan thinrim awrâwl theih tawp a ringin silaia tin chung chuan, "Kal rawh, kal rawh, tun bak hi 'Chance' ka pe tawh lo vang che, kan intawng leh a nih chuan ka kâp tawh ang che," ka ti tuar tuar a. Ka au rawl chuan chu lai ram reh chu a khâwk rum rum a. Chuveleh chu chinghnia chu mei hêm nur nurin, muangchangin min en reng chung chuan a tawlh hnung ve hrut hrut a. Chutah a inher vut a, thing hmun lamah chuan a liam zui ve ta a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ar eL' Khawlhring
Posts: 75
Joined: December 28th, 2016, 1:46 pm

Unread post by Ar eL' Khawlhring » June 27th, 2018, 10:44 am

ZÂN VÂK - 6
By : Ar eL Khawlhring

(Zanin hi thla bial zan a ni e)

Ka dâr a min rawn sawi nawk chunga Puia'n min koh avang chuan ka ngaihtuahna ata chu ka harh zawk a, silai chu chinghne ho liamna lam hawi chuan ka lo la tin reng bawk.

"Ţhianpa, tinge i kah loh?" hriatthiam loh hmel fe hian min ti a.
"Ţhianpa, kha chinghnia kha ka nun min chhanhimsaktu a ni tlat a ni," ka han han tih chuan ka rin ang ngeiin a awih lem lo tih ka hre mai. Chutah ka thil tawn zawng zawng kha ka han hrilh chuan ka thutak bawk a, awih loh chi niin a hre ta lo deuh aniang, mak chu a ti ve hle mai.

Chutih lai chuan chhûm dum hlawm lian deuh deuh vân sângah a rawn lang zut zut a, thla chu a rawn hliah thim ta khup khup mai. Ruah a hnai tih hriain insaseng deuh kan han tum ve ngial na a, ram chin hriat loh a nih bawk si avang leh thim hnuai a nih avangin kal ngaihna kan hre lo. Chutah ruah chu nasa mangkhêng hian a rawn baw ta tlawrh a. Inphenna nei ta lo chuan kan do tlawk tlawk mai a ni. Thingkung hnuai chu kan han bêl ve bawk tak na a, ruah mal a rawn far lian ni berin ka hria.

Thâwklehkhatah ruah chu a rawn hân thut a, chhûm pawh chu kiang leh duakin ngeiawm zawk khawpin thla chu a rawn êng leh a. Hnim ro leh thing vel a huh zo tawh si, mei chhêm theih ni hek lo le, vawt tiin kan khur kan khur mai a. Kan thil tawn, zan tir aţangin fuh lo zui nen, chakai pawh man lo va haw mai chu ka duh rum rum tawh hial mai.

Khur deuh hlak hlak chungin phûr lo zetin lui dung chu kan zawh chho ţan a. Beisei aia lian chakai chu a khât tawkin kan man chho zel a. Mahse a tu ve ve rilru chu kan chakai manah chuan a bet zat lo tih a hriat khawp mai. A tawpah phei chuan Puia chuan, "Ţhianpa, duhtawk mai ang hmiang. Mei chhem theih a ni bawk si lo, a vawt si a, dam loh mai pawh a hlauhawm alawm le. Chakai kan ei duh tak tak pawh ni hlei lo," a rawn ti ta a, ka rilru chiah a ni ve tho mai.

Kawngpui kan pawh hma zawng chuan biak pawh kan inbe mang lo. Kan ngaihtuahna pawh a inang ngawtin ka ring a ni. Mahse, chinghne chungchangah kher chuan, ani ai chuan ka ngaihtuah thui fe ang tih ka hria. Ani chuan a vawi khat tawnna a ni a, kei erawhin vawi tam tak. Chinghnia, mihringa chang thei an awm takzet em, a tû ber nge ni ang, engvangin nge thil mak ka tawn fo bik? tih te thlengin ka ngaihtuahna a vâk kual ruai a. Ka pa phuba ka lâk duh vang a heng thil hi tawng ni tho mah ila, chu aia ril zawk thil inthup a awm ka ring khawp mai. Ni e, thingtlang ran vulhna hmun a tam lutuk. Aizawl dai vel kher chinghne rualin an rawn bawh chhante hi hriatthiam a har asin. Chanchinbu ţhenkhat lahin a ni lo chen chenin, uchuak deuh deuhin an rawn chhuah leh nghal a. Sawrkar ngêng a chhun tak tak ang a, police rual emaw, ramvachal rual tîrin an lo kâp hlum diak ang tih te pawh ka hlau asin. A chhan chu ka pa phuba ka la la tlat lo. Mahse kei ve hi pawnfên fêng tlâk mai niin ka inhre tawh, zanin paw'n ka kah ngam chai loh kha. Mahse....

***************

Hostel kan thlen meuh chuan zing dar 1 a pêl vâng tawh mai. Kan motor hûng thawm chu hriain kan hostel mess manager Dinsanga muhil thei lo chu a rawn tho chhuak vat a. Kan kalna chanchinte min zawh luam hnu chuan kan chakai mante chu kan han chhiar a, sawmhnih lai a lo ni ve a. Chu chu Dinsanga hnenah chuan hosteler te'n an lo hmeh ve turin kan pe ta vek a. A lawm der thiam hle mai nghe nghe a. An duh leh lo râwt se, an duh leh chhûmin bai thak se, behlawi nen pawh chhum pawlh rawh se, kei chuan vawk sa nen tho chhum pawlh se a tui ber tho ka la ring fan mai.


Zing dar 11 a rik chuan kan chaw chhumtu chuan chaw thleng nen min rawn nawr tho ta hram a. Chawlh a la nih tho avangin a inthlahdah theih deuh a, chaw kan ei kham pawh chuan kan mu ţha leh a. Mahse, rilru chuan zan lam mumang inzawm lo zet si chu a ngaihtuah chhunzawm rauh rauh a.


Thingthelh suau, thawveng tak hmun ni si-ah hian Sangtei nen kan lo awm a. A hmel chu damlo hmel tak hian a dâng bâm a, mahse hlim hmel tak a pu tho a. Thing kâr aţangte chu nizung hian a rawn ên lût siau a, sava te pawh hlim taka inchhaihin kan hlimna min ţawmpui ve niawm tak hian an chiar niaih niaih a. Mahse hlim taka kan inkawm lai chuan Sangtei chuan, "Sir Rin, ka thih hun a hnai tawhin ka hria. Ka natna hi inhnehtir loh ka tum nain amah zawk hian min hneh sawt riau mai. Ka thih hun chuan ka ţhian ţha ber Mapuii chu lo thlahthlam miah suh aw, mi fel lutuk a nih hi, ka ngai ngawt ang che," mi lo ti a. Mapuii a sawi lai chuan ka lo ner sawk sawk a, engvang mahin ka ţhian zui dawn lo, mi tenawm ru lutuk hi.

"Sangte, i thi dawn lo reng reng. Chutiang sawi tawh miah suh," ka lo ti a.

Thawklehkhatah sava thawmte chu a reh duak a. Chutah kan kiang velah chuan chhûm leivâk hi nasa em em hian a rawn zîng ta. Kan bul hnai bak chu a hmuh theih ta lo tawp mai. Chutih lai chuan thâwm a rawn awm a, chu lam kan han hawi chuan chiang lo deuh hian mi pakhat hi a lo lang a. A rawn hnai zel a, rawn lan chian chuan mak tiin kan phu dun zawk a. Sangtei pa ngei mai chuan mitmeng sen rûm hian min lo melh a, Sangtei chuan hlauvin min lo kuah chawih chawih a. Hlau chung chung a Sangtei'n, "Ka pa," tia a koh pawh chu hria awm pawhin a lang lo. Chutah a bo leh ta daih a.

Khawi lamah nge a awm ang ti a ka hawi kual ruai lai chuan hmeichhe pakhat nui ri awr awr hi ka hre ta a. Sangtei'n a hlau ange ti a kuah ka han tum chu a lo awm ta hlek lo mai. Ka ding nghal a, 'Sangte,' tia au vak vakin ka tlan kual ruai a. Chhûm a zîn nasat êm avangin thingkungah te chuan ka intauh leh chawrh ţhin. Nui awr awr ri ka hriatna lai ka va thlen chuan Mapuii ka va hmu ta. Pawnfên chhing em em mai fêng hian kawr tawngchhamtê a lo ha a. A mit chu lianpui hian a lo ziak dum kulh bawk a, a hmui sen lutuk mai chuan cigarette hi lo pakin nuihzat awm deuh hian min lo en a.

Ka thinrim lutuk chuan pâwr fê hian, "Lalrinpui, khawiah nge Sangtei?" tia reh deuh nawk nawk mai ka tum lai chuan a lo bo leh daih a. A piah deuh a ka phei leh chu Sawma ka va hmu nawlh mai. Ani chuan mangan hmel em em a min enin a hrawk dawm chungin ka hnung lam chu a rawn kâwk a. Rang taka ka hnung lam ka han hawi chuan Sangtei chu ka va hmu ta. Mahse ka hmuh rual chiah chuan chinghne lianpui hian a bawh lêng lawp a. Sangtei chu a lo au tuar a, thâwm a reh zui ta a.


Ka han harh zet kha chu thlantuiin min lo bual nasat mai kha. Mangchhia chu a va ni chiang em. Ka ngaih a ţha chiah lo, Sangtei chu ka phone ngei tur a ni.

Sangtei chuan phone a la thei dawn lo emaw ka tih hnu chuan a pa aw-in min rawn chhâng a.
"Bawiha, i ţhiannu hi a nuamsam lo va, a mu char char mai."
"A va zia lo ve, ka lo phei nghal ang."

"A ngai lo ve, hei a ţhiannu a awm tho va. A ziaawm leh mai ang."
"A, ka lo phei dawn." A ţawng leh hma chuan phone chu ka dah nghal a. Bawiha tiin min ko maw!

Mahse-ah a inţan leh ta... Mahse 'A ţhiannu' a tih kha Mapuii a ni âwm si, ka va tui chiah lo tak. Eng pawh ni se, Sangtei alawm kal chhan zâwk tur chu. Ka inbual puat a, ka insiam a, ka chhuak zui ta nghal a.


Inti ngampa tak chuan Sangtei te kawngka chu kikin an rawn hawn hma chuan ka lut nghal a. Sangtei pa inchung step atanga rawn chhuk mek hnenah chuan, "Ka pu ka lo thleng e. Khawnge Sangtei pindan chu," ka ti a. Amah chu zui nghalin min hruaina lamah chuan ka kal a.

Sangtei chu drip an lo khaisak a, a lo dâng bel mai, a bulah chuan ka rin ang ngeiin Mapuii a lo ţhu bawk a. Chu pindan chu ka han thlêk kual a, nula room a ang lo riauvin ka hria. Ka ngaihtuahna hria niawm takin a pa chuan, "Keima pindan lam hi a remchâng zawk a, ka sawn phei ta mai a nih hi," a lo ti a.


Mapuii chuan min lo be siam siam a, kei chuan ka be tui vak tlat lo. Ţha awm fahran a lang chhungril tuiêk leh si tih ka hre reng. Hauh deuh hrep te chu ka châk a, mahse a hun leh hmunin a zir loh avangin ka ngawi mai mai a ni.
Sangtei kutah chuan ka hmer vang vang a, hmangaihna leh lainatnain ka thinlung chu a khat a.

Sangtei pain min chhuahsan hlauh chu a tihzia ka ti ngei mai. Tun hi inzawh hun remchang tak a ni. Mapuii muthlu deuh lap lap ka hmuh chuan ka rilru chuan nizan a vâk chhuak leh a nih ka ring ber a, khawngaihna ka nei lo.

"Mapui." A rawn harh zawk a.
"Ka lo muthlu a ni maw." A rawn nui sâng a.

"Mapui, nizan khan khawnge i kal?"
"Ka rawn haw hnu khan ka chhuak tawh hleinem."

"I rawn haw khan maw le."
"Ţhenawmah ka kal lawk ka tih kha." A hmel chu a buai deuh nak mai.

"I ţhenawm chu a va ramhnuai awm ve," ka han tih chuan a meng deuh kawk a, min chhâng lo.

"In kawmthlangah khan eng nge i tih?" ka han tih leh chuan a ngawi reng a. Ka han zawh nawn leh takah chuan, "I hriat a ngai lo," tiin min chhâng zui a. Ka thin a rim phat mai.

"Chuti maw, a nih hman zan khan zodin bula mi ţenghneng ho bulah khan eng nge i tih?" ka han ti leh chu mak tih hmel zet hian min en a, a sen ţawn ţawn a. Zawhna mitmenga ka en reng avang chuan, "Ka duh duh ka ti ang," tiin min chhâng zui lehnghal a. Min chhan dan chu ka lungawi lo kher mai. A inchei dan lepler tak te kha ka mitthla a, ka lungawi lo takzet. Mahse tinge kei hi Mapuii lakah heti hian ka lo awm ve vak vak le! A nun dan chu ka sawisel rual a ni hleinem. Chutih rualin, Sangtei ţhiannu a nihna angin ka thîkthu a chhe ve a ni mai alawm.

Ka ţawng leh hma chuan Sangtei chu a lo che ţial ţial a, "I lo kal a ni maw? I va fel em em ve. In inhau em ni?" a rawn ti thâm ţiak a.

"Hau lo ve, kan lo titi mai mai a," tih pah chuan a pang ka han dek a, a khua sik hran lo bawk a, kan boruakin a zir lo bawk nen.
"Sangte, ka pheisan phawt ang che, rawn lan leh vat ka tum dawn nia," ka ti a, ka chhuak zui nghal a.


Zan lamah chuan ka leng phei leh ang em, Mapuii nen kan boruak lah khati kha a ni sia, a lo awm leh ngei awm sia, tih ka ngaihtuah lai chuan thil hriat chhuah thut ka nei ta, ka va han peih lo tak em. Naktuk hi hna thila guwahati lama training-a ka kal hun tur kha a ni tak e. Ka ngui deuh rawih mai. Ka lo hrechang tawh reng reng lo va. Thla khat dâwn thang a ngai dawn leh nghal.

Leng ta lo chuan ziah fel ngai ang te ziak felin ka buai ta char char a, dar 12 velah ka tifel thei hram a. Ka thawmhnaw ken tur tlem ka tih fel leh hnu chuan ka mu ta. Zanin chu chinghne thâwm pawh a reh rih e.

**************


Dar 12-ah Lengpui airport thlen a ngaih tawh avangin Sangtei pawh tlawh kawi tawh lovin office-ah file ka va theh lût a, tichuan Lengpui pan nghalin dar 2 pelh hret chuan kan tum ram panin kan thlawk chhuak nghal a. Darkar 1 thlawk chauh a ni bawk a, Guwahati airport kan thln hnu a hotel-a ka innghah fel chuan dar 5 pawh a la ri lo. Sangte chu message hnutchhiahin ka thlen tawh thu ka hrilh nghal a.

Kan training chu a ninawm ka ti ţhin hle mai, mahse chawhma chhûng bak a nih ngai loh avangin a zia tak chu a awm. Ka training-pui Mizo an awm ve loh avangin khua a harin ni a rei duh vang vang ţhin hle. Mahse khua tihar lo tawk tur velin Mizoram house, a hlat vak chuang loh avangin ka tlawh zeuh zeuh a.

Hetih chhung hian Sangtei nen pawh a khât tawkin kan inbe reng a, min ngaih zia te min rawn hrilh ve siam siam ţhin a, chu chuan lunglen a tizualin haw vat vat min ti châk hle ţhin. Mapuii chungchang kha ka zawt zui lem lo va, min hrilh zui ta lo erawh mak ka ti deuh a, mahse ka zawt kher duh bik lo. Amah Mapuii zawk chuan 'Mangţha message' erawh min rawn thawn ve zantin tho a, mahse thil dangah kan inbe ngai lo. Ka hmu fuh lo laklawh rih tlat.

Chawlh awm zeuhah chuan Guwahati khawpui dai thingtlang khaw tê deuh te chu intihharh nan vawi hnih vel chu ka tlawh ve a, chuta ka thu hriat chuan ka beng a verh ang reng. Thla 4 vel kal ta khan hetiang lai thingtlang khuaah chinghne rualin kâr khat vel chu thâwm an rawn chhuah ţhin tih thu hi. Chu ngei chu Mizorama rawn lut hi an nih ka ring nghal hmiah bawk.

Ka haw hun tur a hnai ta hle tihah chuan Puia chu ka han bia a. Chinghnia pawhin hla takah chuan thawm an rawn chhuah leh ţan tawh tih min rawn hrilh a. Ka rin dan sa tho a ni. Thla a bial dawn hnai leh tawh miau alawm. Ka haw tûk zan hi thla bial zân tak a nih avangin Puia nen chuan phone hmangin ro kan rêl nghal a. Chinghne thâwm ramkal hovin an hriat fona hmun chu a lo hual deuh tawh avangin ţha turah ka ngai ve ngawt bawk a. Kan lui kalna bawr vel kha nia an sawi avangin hla lutuk a ni lo bawk a, a hmunhmâ lo chian a, chânkhân ţha deuh lo en fel turin ka chah ta ngawt a.


Ka haw ni tur lo her chhuak chu ka phûr hle mai. Ka bazar fel zawh chuan Sangtei phûr takin ka hrilh nghal a. Mahse a mi chhânna chuan min tihnual rawih mai. A mi chhânna chu naktuk maia in 'Check up' tura Kolkata-a an zin tur thu chu a ni. Kâr hnih vel lai an thang maithei.

*************

Aizawl kan thlen chuan in lamah ka tlang nghal nal nal a. Ka ţhianpa Puia leh kan hosteler ho chuan min lo ngai der ve liam liam hle mai. Ka thil hawnte ka han sem a, chumi hnu chuan ka inbual a, zan lamah Sangtei te in-a len ka duh avangin ka mu châwl ta zawk a.

Zan dar 7:30 a rîk chuan Sangtei bulah chuan ka ţhu fel thân tawh a. A pa chu a ţhu ve khur bawk na a, min dîp turin a awm lem lo. A nakinah phei chuan min inthiarfihlimsan ta daih a. Ka lakah a mizia hi a inthlak nasa hlein ka hria.

Chutia a pa ber a inthiarfihlim takah chuan kan inkuah nghal chawt a. Ka ngaih zia ka hrilh mawlh mawlh a. Ani lahin min ngaih tawh thu min hrilh sep sep bawk a.
"Eng nge i lo tih deuh ber? Class i kal thei bawk si lo va," tia ka han zawh chuan, "E le, ka chanchin ka ziak, i lehkhathawn tur te, ka boral hun a i chhiar atan," a ti a, a la nui sen sen zui a.

"Sangte, chutin an ti ngai lo, i thi dawn reng reng lo. I dam leh ang a, kan innei ang a, hlim takin kan la awm dawn alawm," ka han tih chuan mittui parawl leh hnukulh ţeuh chung hian, "Pathianin rem min han tihsak se aw," a ti vawng vawng a. Ka khawngaih hle mai, ka hmangaihna a zual sauh bawk.
"I rawn ţha haw var mai ang doctor thiam rualte'n an lo enkawl che ang a," ka tih lai chuan ka rilruah ngaihţhat lohna lian tak hian min man a. Sangtei chu lo kir leh tawh lo tur leh hmu tawh lo turah ka inngai tlat mai. Mahse chu zawng, dawihzep rilru a ni e.

Sangtei chuan, "Sir Rin, ka boral dawn tawh a inhriatna ka nei tlat pek a, tun ţum kan zin tur hi, dam a inhmu leh tawh lo tur angah ka inngai tlat asin," te chu a la ti ve ta deuh deuh a.

"Sangte, chutiang ngaihtuah reng reng suh, i dam dawn. A hrim hrimin, 'Sir,' ti chuan min ko tawh suh. I duh leh min u zawk rawh," ka tih chuan a nui seih a, a va duhawm tak em.

Hla taka chinghne rual û rawih rawih ri avang chuan min kuah nghet sauh a. "Sangte, i hlau em ni? Mihring an tina ngai hleinem," ka han tih chuan, "Ni chiah, mihring an seh chu ka hre ngai miah lo," a lo ti ve a. Damlo chau a ni bawk si a, len rengna chi niin ka hriat loh avang chuan haw ka tum ta. A pa pawh a rawn chhuak phei ta bawk a, a tûka ka thlah ngei tur thu tiamin kan inmangţha ta a.


Zing dar 10 a rik chuan Sangtei te in chu ka thleng a, Lengpui thleng chu thlah ve ka tum khawp mai. Ka rin loh deuhin a pa chuan an car chu khalh turin min ti ta mai a. Driver hran an neih bawk si loh avangin Lengpui aţang pawhin hawn chho leh a, lo kawl rih mai tur chuan min la tizui leh nghal a. Min rin tawh dan ka hriatin ka hlim hle mai.

Lengpui airport pan a kan tlan lai te chuan kan ngui dun kher mai. A pa lah a hnungah ţhuin a ngawi reng mai bawk si. Boruak tih zângkhai tum a ka han ţawng vêl luam pawh chuan eng kan ang thei tak tak chuang lo. Airport kan han thleng a, terminal pawnah chuan kan inkawm a. A pa pawh chuan min hrethiam takin hun thawl min pein hmun hranah min awm san a.

Terminal chhunga an luh a lo hun dawn ta. Sangtei chu ka kai lawp a, thingpui dawr sir a hmun fianrial lai deuhah chuan kalpuiin kan inpawm thlawp a, ngaih tiţha lo lehzual turin a mittui a far zung zung a. Kei chuan a mittui chu dimtea hrukfaisakin lungchim takin kan infawp ta vawng vawng a. Kan lêt leh lam chuan Sangtei pa chu a lo hawi buai ruai tawh. Min rawn hmuh veleh chuan min rawn pan nghalin a fanu chu a kai a, tichuan kan inmangţha a, terminal-a an luh hma zawng chu ka thlir a. An luh dawn chiah chuan Sangtei chu rawn hawi lêtin, mittui tla tur insûm tih hriat tak, nui sâng chung si hian a bân a rawn vai lâp lâp a, tichuan min luhsan ta a ni.

Ka haw kawngah te chuan ka khua a har ngawih ngawih a, engkim mai chu ka hmu chul zo vek mai. Ka ngaih lah a ţha lo telh telh leh nghal a. Tichuan tlan zelin kan in chu ka thleng ta a. Ka han thlen chuan Puia chuan mak tih hmel deuh hian min lo en a. Kei chuan, "Ka car thar a nih hi," ka ti a, a awih hmel loh nasa mai. Mahse thil awmzia chu ka hrilh leh ta thuai a.

*********

Tlai dar 3 a rik chuan chinghnia chân kan tumna hmunah chuan kan vei kan vei tawh. An hniakte chu a pherh veng vung mai a. A bul lawkah thingkung kâk ţha zet mai, ţhutna rem zet mai hi a awm a, chutah chuan kei ka ţhu ang a. Kan piah lawk, chinghne hnuhma pakhatmah awm lohna bula lungpui phên aţang chuan Puia'n a lo châng thung dawn a ni.

Hmun dang kan fang kual leh a, an hniak lanna leh an chêt tlat nasatna lai te, an êk tharlâm awmna thleng chuan hmaih tum lovin kan chhui zel a, khaw chhûng an pawhna lai vel erawh kan hunin min daih tâk loh avangin kan chhui hman ta lo. Khua chu a la thim lo nain arkaiden zan, kum khat chhunga thla ên ber thla, october thla a ni bawk a, thla chu a lo lang ţan dêr tawh. Tichuan kan motor panin kan chho a, kan haw zui ta nghal a.


Pawi deuh mai chu, kan mess manager chawhmeh leina tur kan lo pêk theihnghilh chu niin. Dâl chauh an lo siam a. Tichuan chawhmeh tur dang an han lei chawp leh a, zanriah kan han kîl fel meuh chuan dar 8 a lo ri dêr tawh mai. Kal hmain Sangtei, chanchin han zawh ka'n tum chu ka phone ka hmu ta awzâwng lo mai le! Vawiin chhun aţang khan ka ah awm reng reng ka hre ta miah lo ka ngaihtuah lêtin. Puia'n a number a lo nei lo bawk nen, kei lah number chhinchhiah thei lo lailêng, a ţhiante va zawh chian leh ai chuan tiin; kan tlâi tawh bawk nen, Sangtei chu biak rih loh law law ka tum ta zawk a.


Chinghnia kan chânna tur hmun kan thlen hma te chuan râlkhata chinghne û ruah ruah chu kan hre tawh. A tîra ka phûr tehreng nen, a hmun kan thlen dawn ruai chuan ngaihţhat lohna mak tak hi ka nei ta tlat mai. Puia bulah chuan ka sawi chhuak duh hauh lo va, mahse chu ka ngaihţhat lohna chu a reh thei chuang lo. Keimah leh keimah chu ka rilruin ka infuih mawlh mawlh a, 'Dawihzep, dawihzep, inti pachang ta che, i pa phuba la tawh ngei ngei ang che," te ka inti thûl. Ni e, phuba chu ka la ngei tur a ni, pakhat tal chu ka kâp hlum ang, tichuan ka huatna pawh a reh deuh tawh ang a, chinghnia châng rêng rêngin ka hun ka hmang tawh lo vang.

Ka ngaihtuahna kal ding lutuk avang chuan Puia min biakna pawh chu ka lo hre lo va, a hmun kan lo thleng dêr tawh chu niin, dar 10 a lo ri dêr tawh mai. Thâwm hnaivâi a la awm lo bawk a, Puia nen chuan mahni ţanhmunah pawh la awm duh lovin zawitê tein kan titi a, mei te kan zu khawmuang a. An rawn kal dâwn chuan a huho an ni ţhin bawk a, an û riin inrâlrinna hman min pêk tho kan ring a ni.

Mahse dar 11 a rîk pawh chuan thâwm engmah a la awm lo va, keini pahnih chuan kan lo sakuh sêr nghah tlawk tlawk ringawt a. Dar 12 a rîk rual vel chuan kan piah mual hla deuh hlekah chinghne mal û ri kan hre ta. Zan reh a ni si, thla a êng êm êm mai bawk si, rapthlâk lamah te a kal lek lek zawk mai. Tichuan thâwm kan hriat takah chuan mahni ţanhmun ve ve panin rang takin kan kal ta a.

Mahse kan beisei ai chuan thawm a rawn awm har leh tlat mai. Zing dâr 1 a rawn ri leh ta. Thâwm rawn awm kan hriatna chu a hmun ngai vel bawkah a la ni ta cheu. Helai hmun hi an rawn tlawh dawn lo niin ka ring deuh rum rum tawh, dawihtheihna ka tlachham sâwt hle mai.

Chinghnia ho chu hmu ta ila, a lian ber kha keiin lo kâp ta ila, Puia hian Sawma silai a kensak chu a hmang thiam tak tak meuh ang em, a dang lo kâp ve turin tih te ka ngaihtuah a. Amah Puia kha chuan kâp thiam chu a inti ve nasa chu a nia.

Zing dar 2 a lo ri leh ta, thla lah chu a her thla bâwih tawh a. Ka rilru a beidawng ţan a, thingkung aţanga chhuk mai ka tum tawh lai chuan kan piah chiah mualah chuan chinghne rual râwl chu a rawn ri ta le! Ka inring sauh a, Puia pawh chu a lo inring tawh hle tih ka hmu.

Kan inrin nasat tawh tehreng nen, chinghnia rawn û leh rî chuan min hlat ta sauh mai, min hnaih zâwng ni si lo va, min kalsan zâwnga a rîk takah chuan ka beidawng chu ka chhuk ta nge nge a. Ka zun a chhuah tawh zia mai chu, zun bûr inchhawpna châng ka lo hre dêr bawk si lo. Thingkung aţanga zun ngawt lahin chinghniate'n rim an hre rang dawn si.

Inthiar pah chuan Puia bulah va kalin kan hlawhchham dawn nia ka ngaih thu ka hrilh a, ani zawk erawh chuan la chân zui leh hlek a duh thu min lo hrilh thung a, kei chu ka beidawng let dêr tawh. Zing dar 3 thleng pawha kan chân chhuah loh chuan haw mai chu ţha kan ti ve ve thung a.

Zing dar 3 bâwr a chinghne û ri kan hriatna hmun chu hla tawh takah, Aizawl khaw dâi vel daih a ni ta. Engmah sawi zui lovin kan insiam sawk sawk a, motor panin kan kal a, chutah kan tlân zui ta daih a. Kan hlawhchham chiang hle a ni. Khaw chhûngah an lût ngei ni chuan kan ring, an hrâmna vel ngaihtuahin. Mahse khawi lai ber nge tih kan hriat chuan loh avangin kan haw tlang ta, thla pawh a liam lek lek tawh mai. Kan thlen fel meuh chuan zing dar 4 a ri ta.

Motor te kan dah fel a, mut kan tum ti ila, Puia phei chu a mu fel diam tawh tihah chuan Thapa te kel ngei mai chu mangang ri tih hriat deuh hian an bê ta tluar tluar mai le! Chu veleh ka silai leh torch light ka la lawk a, Thapa te in lam pan chuan chak zetin ka tlan ta chiam a.

Thapa te kêl huang ka thlen chuan chinghne pathum hian kel pakhat an lo seh a, an lo pet dâwr dâwr mai. Ka light-in a va chhun chiah chu ka lam an rawn hawi fur a. An hmui leh kâ vel chu thisen hlir hian a khat a. Nasa fe hian min rawn ţhen khumin min rawn ngur nghal chhur chhur mai. A lai taka mi kah tuma ka silai ka han lek chiah chu keimahah hlauhthawnna leh ngaihţhat lohna a lo lut leh ta! Kâp mai lo chuan ka châwl leh rih a. Chutih lai chuan an sirah chuan ka hmuh ţhin ngei, ka nunna min zuahsaktu, kei ngei pawhin 'Chance' ka pêk kha a lo chhuak leh ta luau mai le! Ka kâp a nih rau rau chuan chu ngei chu ka kah tur chu a ni, chinghne dang an tlan bo theih nan. Vawi khat ve ve kan nunna kan inzuahsak tawh alawm, ka hmuh leh chuan ka kâp ang tih ka lo tiam tawh kha. Chutah chu chinghne lian leh hrawl, a chal vâr ngei mai chu ka silai chuan ka tin ta. Ka hmet per dawn chiah tihah chuan ka hnung aţangin Sawma, ţawng thei lo va kan ngaih tawh aw râwl ngei mai hian, "Kâp suh sir Rin," min lo ti tuar a, mahse ka hmet per hman laklawh tawh.

Chu chinghne lian chu a zakdawh taka ka kah avang chuan a let tawp a, chutih rual chuan chinghne dang pathum chu hlau lutukin, râk tuar tuar chungin ram lam panin an tlanchhe ta nghal a. Chu chinghne lian chu a la thi lo bawk a, silai mu chu ka han thun ţha leh a, kah nawn ka han tum leh lai tak chuan ka dârah hian min rawn kuai her sawk a. Amah ka han en chian chuan nichina min rawn au tuartu Sawma, â tawh, ţawng thei tawh lo va kan ngaih ngei kha a lo ni tak tak a. Chutah lungchhiat hmel zet hian, "A tawp a tawpah chuan maw.... Sir Rin, kâp tawh suh aw," tih pah chuan a mittui a tla zawih zawih a.

Chutianga Sawma rawn lang teh thut leh a rawn ţawng thei te chu mak hi ka ti lutuk ringawt, sawi tur pawh ka hre lo. A lungchhiat hmel em em zui leh nghal bawk nen.
"Sawma, engtin..." ka ti ţan chauh tihah chuan Sawma chuan chinghnia chu a kâwk ringawt a. Chinghnia ka han en ve chu le! Hmuh hrehawm ka ti kher mai. Chinghnia thi ţep tawh chuan min lo en kiau chung chuan a mittui hi a lo luang ve zawih zawih mai a nih chu! Ka pa phuba chu la taah inngai mah ila, ka en hleithei thlawt lo, ka khawngaih lutuk, ka hlim chuang hlek lo!

Kâwl a rawn êng ţan ta a. Chu chinghnia chu ka va en leh chuan, min lo en reng chungin a mit chu a chhîng ta riai riai a, a chatthla fel ta.

Chumi zawha thil thleng zet chuan alawm ka dam chhung nun min nghawng ta a, inchhir rêng rênga ka hun min hmantirtu ni ta chu ni. Chutia ka en reng lai chuan chu chinghne kê chu mihring kêah a lo chang ta tlat mai! Hmeichhe kê tih a hriat êm êm mai leh nghal. Ka mak ti lutuk hi ka ding khawng reng a, ka che thei tawh lo.

Ka hnung aţang chuan Sawma chuan, "Sir Rin, en suh," tih pahin ka mit a rawn hup a, min awmtir dan danin ka awm tawp tawh, ka lungphu te hi a châwl dawnin ka hria. Ka mit hupna chu Sawma chuan a thlah leh thut a. A thlahna chhan ka han hmuh meuh chuan mumang ni se ka va ti tak em! Chu chinghnia mihringa chang mêk, a serh lang lek lek tawh chu khuh turin Sawma chuan a kawr a lo phelh a ni tih ka hrethiam ta. Mahse Sawma chu a che buai mang hauh lo. Chutah Sawma'n a serh zâwn leh a âwm a theih ang tawka akhuh fel chauh tihah chuan chinghne lu chu mihringah a han chang ta chiah mai a le, khawvel a ka awih loh ber thil ka hmu ta, Sangtei hmêl ngei chu!!! Ka lu a hai mup a, ka tlu tawp a, hriat zui rêng ka nei ta lo.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)