CHOICES BY Angel Pops (Completed)

Episode nei ho a hlawm a dahkhawmna

Moderator: writers

Ngaia
Site Admin
Posts: 15548
Joined: April 30th, 2016, 4:07 pm

Re: CHOICES BY Angel Pops (Completed)

Unread post by Ngaia » November 15th, 2020, 11:08 am

JIMMY


"Apa tu nge kha kha?" a school bag la tur a ka kun laiin min rawn hrilh ru.
"Ka ţhianpa anih kha"
"A hlauhawm e"
"A fel lutuk" naupangchhia ang maiin kan inhrilh ru sur sur reng. Kan dawr min nghahsak tu paw'n nui vur vur chungin min rawn en. A pa diktak a ni tih ka la hrilh duh lo. Sawi mah ila ala hrethiam kilh kelh chuang lovang. Ţullo ah naupang kan ti hrehawm mai mai.


"Kan haw pui ange aw. Min mamawhna inneih chuan min rawn be mai dawn nia"
"Awle" Bawihtei an bye bye lauh lauh hlawm. Kan mi chhawr te hi an felin an rintlak a, duhsak tlakin an thawk vek. Chhungkua ang maiah kan ngai tawh.


A school bag ka keng a, ka ken lohna lamin amah ka kai bawk. Mafela a la awm reng a, Bawihtei a lo en ve reng.
"Bawihte ka ţhianpa saw bye bye ve la, hmelţha a ti che a, fel a ti bawk che a" ka tih takah chuan phur zetin Mafela ţhutna lamah a ban a vai a, a lo chhawn lem lo. A hmuh hmasak berna a nia, ala inpeih lo a nih hmel.


Kan dawr luhna step bulah nitin a kutdawh a lo ţhu ţhin kha a lo awm leh tawh. Bawihtei ka kaihna thlahin ka wallet ka phawrh a, ka pawisa lakchhuah chu Bawihtei kutah ka hmehbel. A ni chuan lo hrethiamin tha tho deuh hian chu kutdawh bawmah chuan a thlak a, an innuih ver ver. An inhmuh ngun em vangin an in nel tawh hle. Kan tih ţhan ania, dawr a kan kal apiangin kan pafa hian pawisa tlem kan pe ţhin. Keichuan ka nu leh pa zarah eizawnna ka nei a, tlem a zawng ka pek khan ka hek phah loh zia ka hre tawh. Bawihtei zirtirna pek nan a ţha ka ti pah a, mi ţanpui ţhatzia leh nawmzia hre turin ka duh a ni. Ka thil ngaihtuah vang chuan ka nui suk. Ka tleirawl ngaihtuahna atthlak zet leh ka chapo rukna ţhin na engtik lai khan nge a bo ka hre lo. Pa tak tak ka ni ve tawhah ka in ngai. Zirtir ngai leh min entawn tu tur fanu ka neih hnu phei chuan ka nun ka uluk lehzual. A hmasawn zawngin ka insiamţhat phah hlauh.


"Bawihte vawiin chu ipi office-i hmukawi ang aw. Office a kallo in ka hria" ka ti a, apite pahnih hi chhinchhiah dan a siam a, Zodini nu hian office a kal vangin api office-i atia, ka nu hi office kal tho mahse cake a buaipui lai a hmuh zeuh zeuh vangin api cakesiami a ti thung.
"Aw" ka tlanchhuah hmain a chal leh biang vel ka khawih a, a dai thlar. A khuasik lo chu a thawventhlak. Pumna a sawi reng vangin an miss mangangin min rawn bia a, kan haw hnu chuan a sawi leh awm ka hre lo. A ti mai mai anih ka ring a, ringhlel angin awm duhlo mah ila nidangah chuan ka hrethiam tawh ang ka ti rilru a, school ah pumna a sawi leh chuan vil ru reng chungin ka hruai duh lo chhin ang ti rilru in ka awmdan tur ka duang chhin vel a, a ţhat ngei ka ring.


Tukverh a dahchhuah a chin vangin glass ka up vek a, dahchhuah min dil hlawhchham ngun tawh a, min dil a tum buai tawh lo. Traffic a jam lai chuan a lam ka hawi a, hlim hmel zetin a ni pawn ka lam a lo hawi ve. Mafela te hian min chuhpui dawn ta se lo phallo thei ka ni lo. A pa tak zawk chuan thuneihna a nei nasa zawk ang. A pianhlim aţangin ka kiangah a awm a, Zodini'n hna a zawm tawh hnu a zan ţah a chin lai pawn zan rei tak tak thleng kan in awi ţhin. A nu a awm loh phei chuan zantin ka bulah a mu a, zing a ka hmuh hmasakber a ni ziah. Min ngai a, keipawn ka ngai. A tello a ka awm theih ka ring tawh lo chung hian a pa diktakin a duh let miau chuan ka hnial thei dawn si lova. A samah ka chul a, khawiahmah min kalsan lo se ka ti kher mai.


Mafela khan tum a nei. A hmelah khan a langchhuak vek a, ka haider mai mai zawk a ni. A tum ber hrelo mah ila a ţhat ka ring lo. Ruah a rawn tla ţan a, traffic jam lahin hma a sawn thei lo. A remchang bawk a Zodini ka call a, Bawihtei hriat ve theih turah ka dah.
"I la kallo deuh mi?"
"Aw kal ka tum veleh ruah a tla a, ka ngei lutuk. Raincoat ka phawrh leh hnuhnawh a, ka kal thei ţep"
"Scooty ken ngai lovin thlah tur che an awm lo mi? I haw dawnah ka rawn lam che ang a"
"An buai emai a inthlahrunawm. Ka lo pawh pen ve sek chuan min ning ang. A hla chuang lova bakah a sur hnem lutuk loh hi" a sawi dik ang a bul velah thawm a tam emai.


"Nu"
"I pum ala na em Bawihte?"
"Aih api office-i ka hmu dawn apa nen hian" phur fe hian kan thil tum mek a nu a hrilh fe. Len dawn hi chuan a inring reng.
"Ava nuam dawn ve. Api office-i te inah apa nen khan min lo nghak ula hnathawh zawhah ka rawnkal ve ang aw"
"Kan lo nghak ang che. Pengkawi lovin rawn tlang la" ka lo ti ve vat. Kan tih tlai ka hlauh vangin ka ti tawp a, Bawihte in phone a lo ban chat. Engmah download lo tur a ka hrilh hnuah ka entir a, tlem tlemin kan tawlh ve det det a, hma kan sawn ve hret.


Zodini te inkawt remchang laiah motor ka dah a, Bawihtei pawmchhuakin hmanhmawh zetin ka tlan luhpui. Bawihtei pi leh a pu Mama an lo awm a, min lo beisei loh hmel.
"Teh hlawl cheu chuan. Engmah in rawn sawi lawk lova. In huh em? Bawihte i huh hman lo maw?" a pi in a lo ti nghal chul. Bawihtei vuan betin a endik vel a, an tan chuan rangkachak ang maiin a hlu a, ka tan hian lunghlu ang chiahin a hlu ve bawk.


Mafela fa a ni tih an hria. Chuvang chuan nau a pai ni a a nu in Zodini a rinhlelh lai aţang tawh khan tih tlak tir daih a duh thu a rukin min hrilh tawh. A rinhlelh ang chiahin nau a lo pai reng a nih kha. Mafela an duhloh viau chhan erawh ka hriatpui lova, min hrilh loh chuan zawh ka tum lem lo.


"Bawihte ka sava khawi kha ka entir ang che lokal rawh. A lian tawh tehmai nia aw" a pu Mama, Zothana sawmna a hriat veleh phur fe hian zui nghal mai a tum a, ka awm tih a hrechhuak leh si aniang chu phalna min dil ni awm takin min rawn en hmasa leh te te a, lu ka lo buk zeuh hnuah a pu Mama kut a vuan a, inchung lamah an inkai chho a.


"Jimmy, Mafela chanchin i hre ngai em? Zothana leh Sangpuii hian an hmuh thu an sawi leh zeuh zel a"
"Hrengai lo. Paradise neitu a ni tih ka hria a, thildang ka hre lo"
"Chuvang a nih chu an hmuh ţhin. Aizawl hi chu ala zim em a, paradise neitu anih tawh chuan an hmu ţhin em em ang. Ka hriat tirh phat aţang khan Zodini hi a thlem thluk leh mai ka lo hlau deuh a, chhuanlam turin Bawihtei a awm veleh zel bawk sia, i nu leh pate hian an hriat te ka hlau ţhin" thil thleng thei a ngaihtuah nasat vang nge a hmel a ngui ve riai.


"Ka nu leh pa te vengthawng duh suh. Hre mahse tih theih an nei lo. Ka chhung te chuan eng buaina mah an thlen lovang" ka ti ve ngat. Zodini ka neih dawn khan naupang min la tih vangin an remti chiah lova, kan inkawm nasat zia hria in ka fa anih an ring bik lo. Ka ni phei chuan Mafela thlengin a sawichhuak a, an inrawn khawm nasa. Min kalh vek chung khan ka tum lui tlat a, tuman min dang thei lo. Ka chhungte annih angin min hrechiang a, thu dang hriatbelh leh mahse eng buaina mah an siam ngam lovang. Ka nupui leh ka fanu ka hmangaih zia an hria a, an hmu bawk a, min ţhen hran duhna an nei dawn lo.


"Zodini leh Bawihtei nawm na tur hi ka duh ber. A reh vang vang a, tunah in hlim lai takin a rawn let leh a, buaina a ka hnuh luh loh che ka beisei. Zodini'n nau a pai ka rin thu leh tih tlak tir nghal mai ka duh thu te kha lo hrilh lo che ila chuan i inbarhlut awm si lova" inthiam loh hmel zet hian a ti a, ka thu a inbarh lut chawp ka ni.
"Thil dang ngaihtuah la, Mafela i ngaihtuah reng chuan rilru hahna i insiam chawp mai mai. Engpawh thleng se i chan tur rengah ngaiin lo hmachhawn la, Mafela pawh a duh duhin awmtir la, a tih tur ang ang chu ti vat zawk rawh se" ka ti a, chhungkaw tinin buaina kan nei a, kan thil tih rah kan seng ţhin bawk.


Hman a ngaihtuah chiang mang lova ka thil tih kha tun thlengin ka la inchhir. Kha thil kha sawi lo ta ila Pathian rem ruat dan anih chuan ka nupui a ni tho ang a, ka thu thu a thil ka lo tih ve khan tun thlengin min la vaw let a ni. Zodini nu ka aţanga khatiang thil ka hriat hnu phei kha chuan a insawi anga nau a tih tlak sak kha ka hlau a, Mafela lahin hmeichhe dang nen a lo kawp zeuh zeuh bawk nen, ka thil tih kha ka inchhir takzet. Zodini hrilh ka tum ţhin a, tun thlengin huaisenna ka la nei lo.



ZODINPUII


Ka zing tho ka luhai bur a, ni hmasa lam a ruahsur hnuaia ka haw vang a ni maithei. Ka luak a chhuak hlui reng lehnghal.
"Khawnge ipa?" tiin Bawihtei school kal peih lo khum a let kual reng chu ka zawt a, a tho hma ngai si lova tukin chu min thawh khalh.
"Inhnuai ah" a lo ti sep a, Jimmy hnen aţangin a rukin ka lo hre tawh a, damlo ang a awm a tum vel chu ka nuih a za ru angreng. Ka pum a inlet but but a, ka insum thei tawh ngang lo chu bathroom ah ka tlan lut a, ka luak zui zat. Ka thleng hman lo lek lek zawk a ni.


Ka thawm hria in Bawihtei a rawn lut ve a, en mang lo chung a nem chhuah ka tum a, a ding lui tlat. Ka ngaihtuah let a, hetianga ka awm reng chhan hi rindan ka nei. Naupai lo tur a indanna ka ei ţhin te kha ka thlahna a rei tawh a, nau ka pai a nih ka ring. Ka sulhnu ka tihfai hnuah hmai ka phih a, ka nawm huai ka rin laiin ka nawm phah lo kher mai.
"Towel va la teh" a hma zawng a mu zawi reng si kha towel la tur a ka tirh chuan a kal vat vat. Bathroom chhuatah ka ţhu a, ka hmai ka hrufai zui mawlh mawlh. Mut kawr nen chauh ka la awm vangin a vawt angreng hle. Towel in hmai ka khuh a, bang nghengin ka ţhu rih. Ka luak a chhuak leh tak thutin tiin ka ngaichang vang vang. A hranpa a tlan luh dawr dawr kha a peihawm loh em a.


"Apa, anu hi a luak a" Bawihtei ţawng ka hriat chuan en lo mah ila Jimmy a awm hnai tih ka hre mai.
"I damlo mi?" ka darah a rawn dawn a, a kut a vawh em vangin ka lo che hrut.
"Ka luhai ka luak a chhuak deuh thut a, na dang ka nei lo" ka hmai khuhna towel a lasawn a, ka sam tlem ka hmai a bet chu huikiangin ka bengah a zep a, mit ka la chhing tlat. Ka luhai dan em em chu natna dang ka nei maw tih mai tur.
"I sa vur a"
"I kut a vawh vang anih kha" tih pahin ka lo nui a, kawr bah chiah ka hak vangin ka dar a rawn khawih khan a vawt takzet. Ka taksa chhungril zawng zawng a fan ni berin ka hria.


Canteen a thawk Lucy raincoat ka hmantir a, a rawn let leh si lova, haw ka hmanhmawh bawk si vangin ruah ka do haw a, chung vangte pawh chu a niang. Ka rai erawh ka ring bur. Thawh kan ka tum laiin ka pasal chuan min pawm nawlh a, a nghawngah kuahin a awmah lu ka dah. A kut a vawh em em laiin a taksa a lum vung vung thung.


Khumah dim te in min nghat a, puan min sin tir leh thlap.
"Damdawi ka lo la dawn em? Nachhawkna ei la, i sa vek sia" a ti zung zung. Ka bulah rem tawkin Bawihtei a rawn inthawlh ve than bawk.
"Ei lo ang. Vawiinah doctor ka rawn mai ang" ka ti deuh tlat a, damdawi lo ei tawp ka ngam rih lo. Ka inrinhlelhna hi ka la sawichhuak duh lova, a chian hunah chauh ka hrilh ang ka ti ta zawk.


"Bawihte school kal i ngaih kha aw" min kuah rang nasa mai. School kal a hreh ngai miah lova, tun hnai hian a hreh thar thut.
"I ni ka zuk ko ang a, a rawn siam ang che" a tih hnuah ka mutna bula rawn ţhut pahin ka sam min chul sak.
"Na inei lo maw?"
"Nei lo. Ka ding thut a, ka luhai phut khan ka luak a ti chhuak mai mai niang. Ngaihţha deuhin awm rawh" ţawng thlamuan reng chung chuan ka saisir a, duat takin ka sam min lo la chuksak tho.
"Iva buai awm ve i tho hma a, Bawihtei school kal tur i siam hman bawk si lova"
"Chhang thawn tur a tam a, ka enfel pui. Ala tam mai. Bawihtei rawn endik ka tum a, tikhan ka rawn hmu che sia" a malchungah ka ban ka dah a, meng mang lo mah ila ka nui lui tho. Hmuh ka hrehawm ka hlau ve a ni.
"Zuk tihpui leh tawh rawh. A ni chu a buai loh chuan rawn chhoh tir la, chhang a buaipui ve peih chuang hleinem"
"I ţha takzet maw?"
"Ţha e. Ţha lo ni ila i kal ka phal teuh lo"
"Ka rawn chho leh vat ang" a ti a, rem lo viau mahse ka biangah a fawp hram.
"Bawihte tho rawh le, ini ka rawn tir chho ang. School kal ngei ngei tur. Banah thil kan lei dawn nia" ka bula kan naute mu erawh a che duh eih lo. A lamhawi a ka mut loh vangin engtin chiah nge a awm ka hmuthei lova, apa chhuah hnuah a che ngam ve chiah.


"Bawihte insiam a hun" Fiona ngei mai chu a rawn au lut lang lang.
"Inkhuh bo vel suh aw ka hmu reng che nia Bethsebi tho vat rawh" ka zangthal thawk a, Fiaona pawn blanketba rawn keu ve chiah. Bawihtei chu lo ţang nasa ve viau mahse a pawm tho lui.
"School ka kal peih lo" tih leh ţah a rual a, api leh pu a au chul. Nidang ang lo takin a pa a au lo ve tlat.
"Ikal loh ten i ţhianten an thiam khalh vek dawn che sin. Nakumah nang aia te deuh deuh te nen a awm ho leh i duh a mi?"
"Ka kal duh lo"
"I kal dawn tho tho. Au vak vak suh inu a damlo. Ipi leh pute pawh Vanlalpianga zai ring tawkin an ngaithla a, an lam nasa mai. I au ri an hre pha teuh lo" an awm lohna lamah ka inlet a, keimahin ka nui ver ver.


"Inbual phawt rawh aw"
"Ka duh lo a vawt"
"Tuilum a awm. Inbual lovin school kal loh tur. I ţhiante zingah i bal bik anga i hmelchhe bik palh ang" a ti a, an thawm a ring ţha khawp mai, a bual lui ni ngei tur a ni, pakhat a ţap tuarh tuarh a, pakhat lahin a be lui mawlh mawlh a.


Mutthilh ka tum a, ka thei der lo. Chawhnu ka duty dawn vangin chawhma zawng mutna hun ka nei a, ka harh kawk theih nan mutthilh leh zawk ka duh nen ka tum nasat poh leh mut a chhuak lo.
"Ngatinge school kal i hreh tak em em a? An hau ţhin che mi?" Fiona ţawng ri ka hriat chuan ka meng a, ka lo ngaihtuah ngai miah lo. School kal hreh ngailo school hrehawm a ti ta em em chu a mak em a ni.


"Aw pencil ten ka banah an ziak a" a ti ve ta nge nge a, ngaihven angin ka la awm duh lo.
"An va sual ve. Tu te nge? Vawiin chu keiman ka hruai ang che aw, ka rawn beng hrep ang" a ti hmuar hmuar. A ngam leh tak tak ange maw.


"Ani ih maw, pencil in min chiu a, na deuh deuhin" ala tih zawm zel a, an fiam nasat ţhin zingah a tel ve anih ka ring.
"U Zodin a kal hreh chhan te zawt ve ţhin ta che u, in mawl thei lutuk mai. Inu te hi an tlaw emai ipa lah hi nachang a hre lo ve ropui si. Khawi i sam hi ka ţawnsak che nga, thil ei la maw, tui tawk tawk mai Biaki ten an siam a, chuan eizawhah ka thlah ang che aw" tu ber nge a biak ber ka hre nek love. Ka hmel an hmu lova, muhil angah min ngai tho ang.
"In miss te ka hrilh dawn khawp. In miss ka hrilh hnu a an hauh leh che chuan school bulah anmahni kan lo chang ang a kan beng pawp pawp dawn nia. Inu saw va bye bye la kan chhuk dawn nia" a ţawng chak ang bawk hian a che pawh a rang a, Jimmy nise ala siam zo teuh lo mai.


"Anu bye" ka hmaiah a kut tetak te a rawn khawihin ka biangah a fawp a, "Bye bye..thuawih rawh aw" ka ti a, tlem a inbeng kang deuhin ka fawp ve a, Fiona thusawi khan a thlamuan a ni chek ang chu phur deuhin a kal veleh mai. An duat viau chang hian nuam lo tihna ka la nei ţhin. Jimmy fa a nilo tih chu hria se tun ang hian an duat awm tawp si lova. Tunah chuan tupawn keh thei dawmin an dawm a, hlauhna hi a reh hleithei lo. Jimmy chhungten an hmangaih a an duat ang hian Mafela chhungten an ti ve thei lo maithei. Ka mo na te hi chuan theih tawp an chhuah takmeuh. A naupan deuh laia a sual chang phei chuan Jimmy nen a kan bulah a awm duh ţhin si lo, api leh pu te chaw ei hman lo lek ten a siam ţhin a, a inthlahrunawm duh ţhin khawp mai.


"I zia deuh em?" saisir a ka mu reng lai chu hnunglam aţangin min rawn kuah a, zangthalin ka mu ţha vat vat.
"Iva zo hma leh si ve"
"Zo lo deuh. An ti thei tawh ang"
"Bawihtei"
"Ani in hruai a chuh tlat a tukin chu. In mawl nupa emai atia thil sawi inei mi?" ka lo nui ringawt. A hre lo veleh chhawng a ni kei ai pawn.
"Nge chhan awm lovin a thinrim leh?"
"Bawihtei school ah an lo hau ţhin a" tiin bul ka ţan a, an tih dan ţhin te nen ka hrilh ta vek.
"An miss a rawn hrilh em ang chu"
"Hrilh ang, an la tihbuai zel chuan school bulah anmahni ka chang dawn atih kha" nui hak hak chungin ka lo ti a, a ti duh tak tak dawn tih kan chiang ve ve.


"I kal peih angem nangmah?"
"Peih e damlo ka nilo ka tih kha. Engmah na ka nei lo. Thil ka lo ngaihtuah a?"
"Bawihtei bawk a mi?" min van hrechiang tak. Ka ngaihtuah ngun lutuk vang aniang.
"Ni e hrechhuak ta se an la duat tho angem le?"
"Duat tho ang. An awm len ania, an thlauhthla tak tak thei dawn lo sa tih hria la, rilru nuam deuhin awm rawh"
"Fa dang lo nei ta ila Bawihtei hi ila hmangaih tel tho angem?" ka bul hnai a ţhu a nih vangin a kut ţang ka khal pah a, ka thil vei hi a naupangchhia thei sin aw.


"Ka fanu tho ania, a danglam lo ang. Fa 20 pawh neih belh ila ka hmangaih tho ang. A in ang vekin"
"20 em em min neihtir itum a mi?" nui chung hian ka lo ti a, a uang tih ka hrereng. Ka ti lui ve ngat tho.
"Tum e i huphurh viau leh phir te te in inei anga a rei lo deuh ang" insiamremin a malchung chu lukhamah ka hmang ta zawk a. Ka inrin dan hi dik se ka ti ngawt mai. Jimmy fa ngei neih ve ka duh tawh a ni. Ka inthiamloh na ţhin te hi a zia ve deuh ang. Puan hnuaiah a rukin ka pum chungah ka kut ka dah a, ka duhthusam ber chu a thleng dik maithei.


CONT



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)

Ngaia
Site Admin
Posts: 15548
Joined: April 30th, 2016, 4:07 pm

Unread post by Ngaia » November 15th, 2020, 11:09 am

CHOICES-8



"Kan ring dik em?" nui var var chungin lu ka bu nghat nghat. Ka inrinhlelh thu Mami ka hrilh a, an inah a dik leh dik loh kan finfiah. Vanneihthlak takin a chhungte an awm lo hlauh.


"Avan lawmawm, ka lawmpui che. In pa phei chu a lawm ngawt ang. Pathian malsawmna in dawng ngawt mai" a ti chel chul a, keipawh ka hlimin Jimmy hrilh hlan ka nghakhlel khawp mai.
"Nia tiraw, a lawmawm e. Jimmy nen a kan inzawmna a nghet lehzual dawn a, ka naupanlai aţanga pasal pakhat chiah neih tum ngat ngat ţhin ka nia, tunah pawh kan la upa lova, mipa phei chu an lang upa har a, eng emaw vang a inţhen thut ka hlau ve ţhin. Ka hlauhna zawng zawng kha a zia huaiin ka hria" tih pahin hahdam zetin ka ţhu a, ka duty ka zo tawh a, haw hun tawh viau mahse finfiah duh ka neih miau vangin Mami hmu tur hian ka kal kawi ta tho.


"Inpa hi chuan a hmangaih em mai che. A ţhen lo hrim hrim ang che. I hlimthla ang maiin i kalna apiangah a zui dawr dawr zel che a, fing deuh hlek la chuan Mafela nen a in intawn hma khan a rilru i hrethiam thei tur a nia"
"Ţhian ang chiah a ka enreng vang a nia. Mihring hi a lo in hmangaih chawp theih tak tak aniang. Kan inneih hlim khan ka hmangaih miah lova, huat lek lek chang te ka nei ţhin a, khatiang kha ka ni tawh lo. Ka hmangaih a, min thlauhthlak daih ka hlau tawh zawk" ka bulah rawn ţhu in ka malchungah a ke a rawn kham ar ar.


"Hmangaih chawp theih e. Pasal inei fel a vannei inti viau phawt mai rawh. Nupui te thlavang hauh ngam lo khawp a chhungte hlau mipa hi an awm ve a, inpa hi chu ka hmuh dan chuan a chhungten an sawichhe ngam lo ang che"
"Kei pawn a chhungte ka sawichhe ngam bik chuang hleinem" nuih pahin ka lo ti ve vat. Hmeichhe sual deuh ni ta ila, ka pasal hi fuih kawih tum mah ila ka thei kher lovang. A lai takah a awm thiam a, tun thlenga a nu nen kan la inrem chhan pawh hi niin ka hria.


"I thlavang a hauh ngai lo mi?"
"Hauh ve e. Ka vannei kan pa hi in lam a awm tam chi a ni hlauh a, bakah ka tan a nuam lo tur khawp a an awm chuan a rukin a lo hre ve reng zel. A hauh lai hrelo mah ila ka nawm lohna turin an awm zui lo. Hnathawk ho an awm reng vang hian tih tur vak a awm hran lo bawk a, mahse ka hna bak a len hi chu ka inthlahrung ve" ka ti a, min hriatthiam hmel khawp mai.


Mi chuan mo nuam sa duh duh a awm thei ah min ngai a, mahse chutiang ngawt a ni bik lo. Inchhungah ka che hah vak lo a tih a ni mai. Ka theih ang angin ka pui ve ţhin a, ka lengchhuak khatin kan in lamah phei chuan ka kal mang lo. Ka pa in a remti tlat lo. Ka kal ve chhunah te hian min lo zilh hrep zel. Ka mo naah hi chuan kan buai buaiin kan buai a, inkher neuh neuhna hun kan nei lo. Chu chu a ţhat veleh na a ni. Buai ţhin viau mah ila a tawpkhawk ah lo chuan Jimmy pa hian chhungkua a chaw ei rual loh hi a remti lova, kan tlai lutuk dawn anih loh chuan kan in nghak a, kan eirual hram hram zel. Ka pasal in min chawm thei reng chung a hna ka thawk lui ve tlat te hi a hlimchhawnah kha chuan an sawisel ve deuh a, ka pasalin a hrilhfiah hnu kha chuan an sawisel ta lem lo. Amah ber hian bang turin min duh ta ber zawk. Ban ka tum loh em vangin a ni pawn min nawr lui duh ta bik lo.


"I sual hran lo a, anni an sual lo bawk a, i lo rai lo ang tih a hlauhawm tawh zawk" a ti fiamthu a, hman a kan thaw ti pik em em ţhin tu kha tunah chuan kan nuihpui ve thei ta. Ka haw tur chu inhmu tawh lo tur ang maiin ui tawkin min thlah. Ţhian dang kawm tho mah ila kan pahnih a kan inpawh ang em em hian tumah kan pawh lova, pasal ka neih tak daih vangin a hma angin kan inzui thei tawh lo mai mai zawk. Pawl 11 kan nih lai a ka hriat chauh a ni na a ka mi rin ber a ni tho. Jimmy leh Mami nen hian kan inzui chawt a, kan inţhen hrang mang ngai lo Mafela rawn lan ve hma kha chuan.


"I in entir em?" min hmuh rual a min lo zawh hmasak ber. Khumah bag thehthla in jacket pan te ka hak chu ka hlip a, khum mawngah ka ţhu zawi hnak.
"Entir e ka thisen te an test a, doctor in ngaihthah chi a ni lo atia, ka rin aiin a serious daih" ka ti zuai raih.
"Eng natna nge a rin deuh? Heta an enkawl theih leh theih loh te i rawn hrechiang nghal em" min ngaihtuah hmel tak a tih pah hian chhuatah ţhu thla in ka mal a dawm zui zat.


"Ala chiang lova, rindan chu a nei a, an thihpui nasa sia, ka rin ang hi anih chuan enkawl vat vat a ngai ang a tia" ka tih phei chuan a hlauh hmel takzet tawh.
"Eng nge a rin ber chu? Cancer maw? Hmanni a kan veng a thi kha Septicemia a nia khatiang kha a ni em? Nangmah ang rual thihna kha?"
"Ka la hre bik lo. Engmah ala sawi chiang lo. Ring tu tan te chuan thih a hlauhawm hleinem, eng natna pawh ni se ka pawm thiam vek" ka ti kual vel a, ka nguai lui thiam bawk a ka dawt sawi chu a awih hmel khawp mai.


"I thi lo ang, ka neih zawng zawng hman ngai dawn pawh nise hmun ţha berah inenkawl na ţha ber dawng turin ka hruai ang che. I rilru ti hah duh suh ka awm hi" a ti a, rin aiin a tuar thiam leh si phian. Ka bulah rawn insawn chho in min kuah a, min hnem tum ni awm tak a ka hnung a chul pah hian "I dam vat ang, result te chhuak sela doctor ţha ţha kan rawn kual dawn nia" ka tum angin thil a kal tawh lo. Ka ngaih ang aiin a nuihzathlak lo daih.


"Ka tihder che nih kha" a awmah nemin ka inla hrang a, ka nui lui ta vel mai mai.
"Min tihder maw?" lu ka bu zeuh a, tim dai hian ka melh.
"Natna hmangin fiamthu an thawh ngai lo" vin lek lek hian a ti a, ka ţhen sang lai pawh ka chip hmak.
"Fiah che ka tum tihna a ni mai lawm. Hmeichhia chu kan dil chhut a, engtin emaw lo awm palh ta ila eng angin nge mipa in in lo dawnsawn dawn tih te kan hreve chak ţhin a, in rilru put hmang hi in lantir mawh ve ropui sia" tiin ka insawithiam zat zat.



"Ka hmangaih zia che i hria a, fiahna dang a ngai tawh lo. Tun a ka awmdan aţang khan engmah i finfiah thei lo" a ti a, a awki a hniam tawh na a a la lungawi loh hmel khawp mai.
"Thei e, i neih zawng zawng ka tan a sen i huamna khan ka pawimawhna a lantir a lawm. Thu lawmawm deuh hrilh tur che ka nei lehnghal"
"Sawi rawh"
"A finfiahna ka nei tel thlap tawh ania" tih pahin tlemin ka hnai deuh a, a beng bulah "Nau ka pai a" ka ti zui sep a, phawk zetin min en.
"I beisei loh deuh ka sawi chiang" ka bag chhunga ka thil fun ţhat ka lachhuak a, ka thusawi nem ngheh nan ka entir.


A lawmzia vel a sawi ka rin nen engmah sawi lovin min kuah leh ringawt.
"Sawi tur i nei miah lo mi?"
"Aw"
"I lawm em?"
"Aw"
"Takzet?"
"Takzet" a lo ti ve a, ka beisei loh dan deuhin lo dawngsawng mah sela nui hak chung hian ka kuah let ve ta tho. Sawitur ala haihchham ve rih a nih ka ring a, thu tam sawi lo mah sela min enkawl ţha dawn tih chu chiang sa.


Ka naupai thu midangin an hriat chuan min lawmpui ve hlawm ngei mai. Jimmy nu leh pate chuan mipa nise an ti nghal ngawt a, Bawihtei a awm tawh tho vangin midang pawn mipa an ti ve fur. Ka naupai avang chuan kan hlimin min lawmpui tawk leh min fiam duh tawk an awm reng a, kan in a hnathawk te, kan chhungkaw zinga mi an ni mah tawh zawk, an hah viau chung pawh a min lawmpui vang a an hlim hmel hmuh a nuam takzet. Chhungkaw mi ang a kan ngaih luih tlat vangin anni pawn kan thil neih engkim hi an inti ta tu ve a, an nghetin tumah min kalsan tum an awm lo. Ka mo hma daih aţanga awm ho pawn tun thlengin an la awm ngar ngar. Chu chuan Jimmy te sual lohzia a lantir awm e. A nu hi thunei viau anga a lan rualin a hunah chuan Jimmy leh a pa hian an thunun tlat a, hmanlai thil thleng ka hre fum fe lo na a tun a an awmdan chu sawisel tur em em ka hre lo. Jimmy tihdan takah chhungkuaa hun hman ho na hun kan nei tam lo hian a ti nuam lo ber zawk.


Bawihtei pawh a phur ve khawp mai. Nau neih a chakna a rei tawh bawk a, a muhil hleithei lo, lo chhuak vat vat se a ti deuh reng a, a nau la piang lo chungchang sawi a rei tawk a men hnuah a muhil ve chiah. Thil thiar tur awm an thiar rei vangin zanreiah Jimmy a inbual leh hnuhnawh a, a inbual zo ka bula rawn mut pahin ka pum a rawn khawih ve chat. Lan pawh a la lang miah lo chung hian Bawihtei nen khawih nuam an ti nghal em em ringawt.


"Mipa nise an ti vek a, i duh dan ila sawi ve miah lo nia, mipa nge hmeichhia i duh ve?" tiin ka lo zawt a, engvakmah ala sawi ve lo tlat alawm.
"I neih ang ang ka duh. Kut ke kim leh hrisel ţha tak a a pian chuan a lawmawm vek. Mipa pawh nise, hmeichhia pawh, mihring kan nih chuan kan hlu vek a, ka duh ve ve" a ti ve ta nge nge a, ka neih ang apiang chu ţha ka tih ve tho rualin mipa nise ka ti rilru ve tho. Hmeichhia chu Bawihtei ka nei tawh a, mipa ka awt ru ve, kan thu a ni mang si lova.




MAFELA



"Order hi vawi engzat chiah nge i pek sual tawh? I chhinchhiah thei hlawl lova iti sual reng dawn anih chuan bang mai rawh" hma lam a kutsuih a dingin a kun ngul. Number a inziak reng chung pawn a tisual khut khut fo. Ka hau ziah a, a insiamţha hleithei lo.


"Mi an tam lutuk hian ka chiai a, ka tihsual phah leh ţhin. Ka tihpalh" a tih ziah dan. Hnathawk dang aiin a la naupang deuh a, a hna tur tisual ngun ber pawh amah tho.
"I damlo mi? Natna vei lai inei mi?" tiin ka zawh phah hial. Lu a thing a, a la dakchhuak chuang lo. Ţhutthleng nghen chhan ngheng a ţhut pahin ka thlek vang vang a, thil tisual tu zawk a ni bawk a a zam hmel hle. Hunawl an neih chang lah hian amahin a awm hrang a, a melh ngai a melh reng zel lehnghal. Ruih a nei ti dawn ila a mitmeng a fim reng tho si. Chutianga a awm chu ka hmu fo.


"Ngaihtuah dang inei ţhin a mi?"
"Nei lo. Ka ti dik ziah tawh ang. Ka tisual tawh lovang" inrintawk ve hmel zet a a tih hnu chuan a rawn hawichhuak ve ta.
"Ngaihtuah nei i an ţhin em kha, nangmah a i hawi vung vung lai ka hmu ziah che" ka tih pawn thildangin a tihbuai loh thu hlir a sawi. Mi â hmel a pu si lo hahthlak tak a ni. Hna an mamawh takzet vang a rawn thawk vek an ni a, ban tir mai ka hreh ţhin. Kei ngei pawhin lehkhazir chunga a ruka ka nu ka enkawl lai khan hna ka lo mamawh ve tawh ţhin. In ba tawn lovin kan inrul tawk chiah a, an tha ka chhawr a, an mamawh pawisa ka pe thung. Ka ţanpui ve theih naah ka ngai a, a ţul tawpah leh anmahni an bang anih loh chuan tumah ka ban ngai lo. A thlawnin engmah kan nei lova pawisa kan mamawh vek. Kutdawh nazawng erawh ka ţanpui chak miah lo thung. Mi pangngai phalo leh ramtuileilo ten kut an dawh chuan ka ţanpui ziah ka hmuh apiang. Hna la thawk thei tih hriatreng chunga kutdawh chu ka ţanpui chak lo. Ka sual vang a ni lehpek ang.


Ka hma a ding tleirawl te pawh hi hauh hrep ka tum nen ka khawngaih leh deuh a, buaina nei a ang em a.
"Vawikhat chiah insiamţhatna hun ka pe leh ang che. I thawhna hmun hi kan hlawh hmuhna ania, kan tan a pawimawh ve ve. Fimkhur viau tawh rawh" ka tih hnuah lawmthu te min hrilh leh. Ban tir tum uk in ban lo bawkin ka kal tir leh tak kha.


Ka nu in min kohna angin hmu turin ka kal a, a khawhar zia bawk min lo hrilh teh.
"I fanu kha, Bawihtei em ni kha? Engtik nge irawn hruai theih dawn?" ka ţhu hahdam hman meuh lo.
"Zodini ka la dil lova, ka dil hun hunah a ni mai. A phal chuan"
"A duty hun i hretawh a ni lawm ni? An in a iva kal chuan i hmingchhe palh ang tih te a hlauhawm a, a thawhna hospital ah a duty laiin kal la va dil rawh. Iva kal har tawh reng reng ve" a ti khur khur tawh.


"Menu kan siam ţha a, thil thar telh belh kan nei nual sia, ka buaipui hmasa leh a, thil dang aiin Paradise ka dah pawimawh. I hriat vek kha" ka ti a, special na bik neih ve kan tum a, eitur pahnih pathum vel a hming an sawi apianga paradise an hriatchhuah theihna turin. A buaipui hi rin aiin a hautak lehnghal. In a awm reng anih vangin min hriatthiam pui lo mai mai zawk a.



"Vawiin hian i hman tiraw? I hman chuan va dil rawh. A phalloh chuan invenna tur ineih ţhat kha" a thusawi tawp lamah a nui deuh hlek. Paradise vanga ka buai leh tak vangin ka tum angin ka la awm thei lo. Mami hnenah chanchin ka zawt reng a, Zodini naupai thu thlengin min rawn hrilh. Ka nu ka la hrilh lova, hrilh ka tum rih lo.


Tlai lamah ka nu min tirhna angin hospital ah ka kal. Ka lut hreh deuh a, garage ah ka lo nghak. Eng lirthei ber nge a ken hrelo mah ila eng emaw ber a keng ang a, a lokal ngei dawn tih ka hria.


Vawi sawm chuang sana ka en hnuah a rawn lang hlawl. Min hmuh chuan a tum hmak. Min nghakhlel zawk ţhin tu khan min hmu peih tawh lo a ang.
"In be lawk ang"
"Ka hman lo haw vat ka ngai" ti a kal mai a tum chu a manrekah ka hmer a, tal chhuah a tum poh leh ka hmer nghet zual zel.
"Min thlah rawh a na ania"
"Min zui la ana rei lo a ni mai"
"Ka hmanhmawh ka tih kha" a ti vin hlar.
"I hmanhmawh chuan sawidun vat ila, i ngaihthlak hma chu ka thlah lovang che" min melh rawm rawm a, a ngei tur tawkin ka lo nui suk.
"Hetah chuan miin min hmu ang, hmundang ah kal ang" a ti ta nge nge.
"Pasal neih chuan venthawn tur an tam ta hle mai maw?"
"Min zui rawh" a ti hmuk a, a banrek a ka vawnna ka thlahdul a, na zet a a phih let hnuah a kal nal nal. A hnungah ka kal ve zel a, hospital bula restaurant ah a lut.


"Sawi vat vat rawh. Hun ka nei tam lo ania" kut a kuangkuah a, a tum zui bur.
"Iva cher ve, i naupai chu i ngeih vak nange?"
"Aniang. Eng nge i sawitur chu?"
"Bawihtei hi ka nu in a hmu ve chak a, zanhnih khat riak a a lokal i phal em?" ka sawizo chu a mitmeng a ling nghal hlar.


"I fanu a ni hleinem engvangin nge a lo riah ngawt ang? Inu bulah chuan ka fanu a ni lo ti rawh. Min hnawl ni aţang khan i fanu a ni tawh lo. I hming sawilang lo turin min hrilh a, ka sawi ngai miah lo che. Rawn beisei tawh reng reng suh" thinrim zet hian a ti a, Ka hming thai lang lo turin ka hrilh tak e.


"Nawr luih ngai lovin awm rawh. Eng thil mahin ka fanu a nihna a ti danglam thei lo"
"I duh loh kha. Kan mamawh lai ber che in min kalsan a, kan mamawh tawh lo che. I tello in kan hlim a, kan hlimna hi min rawn tihchhiat sak suh" a la ti hmarh hmarh. Ka ţawngkam khat lek vang a chhe vek thei an nihna inhre reng chungin a la ui lui tlat tho.


"I pasal nu leh pa ka rawn dil dawn mi?"
"I rilru hi chu a chhe ve ngawt mai. Rawn dil rawh, rawnkal la engkim rawn sawi vek rawh. Midang hlim lai i hmuthei hlawl lo anih hi. I duh duh rawn ti rawh"
"Ka tih duh tak tak i ring nange?" hlauthawng tur a ka rin laia zam hmel takngial pawh a pu duh eih lo chu a mak letling mah zawk.


"Ring e, nang ang rilru chhe lutuk mahni a hlimna zawng hmu ve zo lo, midangte hlimna laksak tum ran ţhin chuan iti duh lutuk ang"
"Chutiang chuan maw min lo ngaih a?" an intur rawn chhawpna no ka hum ngawt ngawt. Min ngaihdan a mak sawt khawp mai.


"Aw, i khawngaihthlak zawk. Min hmangaih emaw ka lo tih ţhin vang khan mawl ka in ti. Min lo hmangaih loh zia ka hre chiang telh telh a, a zahthlak zawk rum rum"
"Hmangaih lo che ila tun thleng hian ngawih ka chuh lovang. In chhungkaw chhiatna tur thil hrereng chungin in hlim nan ngawih ka chuh zawk a nih hi" ka ti ve ngat. Naupai lo se la chuan an kehchhe hneh sawh tawh khawp ang.


"In vau nan a hman reng ai chuan sawi chhuak vat vat rawh. A nih tur ang ang chu ni vat teh ang u. Kan chhungkua itih chhiat vanga i hlim leh hlim loh te kan en ang chu" min cho ar ar khawp mai.
"Awle i lo en dawn nia"
"Engtin pawn ti la, ka pasal nen hian min pawt ţhen mah la Bawihtei nen hian i hnenah kher kher chuan engtikah mah kan lo let lovang. Nang ang mi bawlhhlawh lutuk hi kan mamawh hrep lo che" a sawizawh rualin a ding a, a chhuak zui nal nal. Midang an awm ve nual vangin ka chelh lui thei lo. A sawi ang khan lo tichhe ta ila ka hlim angem?


CONT

Ads click kha theihnghilh awih loh aw :)

Link:
BBcode:
HTML:
Hide post links
Show post links

Ngaia
Site Admin
Posts: 15548
Joined: April 30th, 2016, 4:07 pm

Unread post by Ngaia » November 15th, 2020, 11:09 am

CHOICES-9



MAFELA



"Thil dang a i hlawhtlin nen a pawimawh ber i nei thei si lova, Zodini chu keiman ka hmu mai dawn nia, i hna thawk la, lo buaipui ve tawh lo mai rawh. I tan chuan a harsa ve dawn a, ka hrethiam che" ka kalna chanchan ka nu ka hrilh a, a beidawn ve tho ka rin nen beidawn ala tum lo khawp mai.


"Zodini hian a pasal hi a hmangaih a, inrawlh mah la awmzia a nei chuang lovang. Ţul lo ah ka hming i ti chhe mai mai. Tel ve lo ila ka duh zawk" ka lo ti a, kum tam tak kan inhmu tawh lova, ka ngaih ţhin zia ka zep ngai hran lo. Mahse ka tlai tawh. Neih let tum a ka beih nasat poh leh min haw ting a ni mai. Hmeichhe pakhat vang a mualpho ka duh lo. Midangin an fa ang a an pawm theih a hnu, zalen ah ka in ngai hmiah.



"An ti na che a, i fanu an khung bet tlat a, hmu ve thei turin dikna kan nei alawm"
"Nawr duh suh. Ka nute in engkim hreve ta se nang ang hian a ti ve lo ang. Min hmangaih tawh lo a, hmangaih dang a nei tawh. Bei let mah ila tlawm zawk kan ni dawn tho tho. Beih hrep hnu a tlawm ai chuan inrawlh loh ka duh zawk" ka ti hmak a, hmeichhe pakhat vanga ka chapona dah hniam leh ka duh tawh lo. A hma ang reng a min la hmangaih te chu nise ka bei let em em ang. Hmaichhana kan inhmuh khan a mitah min huatna bak hmuh tur a awm lo.



"I hmangaih em?"
"Ka hre lo"
"I fanu tal hi i hmangaih em?"
"Aih vawikhat bak ka la hmu lo. Hmangaih na hun ala awm lo" tiin ka rilru diktak ka hrilh. Mi chuan mak min ti ang. Ka nu ngei pawn mak min tih hmel em hi. Keimah ber hian mak ka in ti lo. Pum chhunga a awm laiin ka fa tih ka hria a, kum6 anih hnuah vawihnih ka hmu ve tawh a, chiang phei chuan vawikhat chiah ka la hmu tak tak. Mahni fa pawh nise pumchhung a a awmlai aţanga ngaihven loh chu a hmangaih vut theih bik tlat loh.


"I pian hlim aţanga lak hran ini chung hian ka hmangaih ber ini tho asin. Chuvang chuan ka tu nu pawh hmuh ve ngei ka duh. Inpawh tak a awm turin ka duh che u" a la ti lehzel. Hmeichhia leh mipa a in an theih loh. Keichuan ka pai ve lo a, ka fa a ni tih ka hria. Chuzawng chu.


"Lo lungngai lo la, i fanu nen chuan in la in ngaina em em ang"
"Engpawh tila ka hming lang lo in ti vek ang che. Miin mi hlawhtling angin min hria se ka duh. Hmangaihna mai mai vanga buai ve ţhin ang a hriat nih ka duh lo" ka ti a, awmzia a awm dawn loh vangin ka dang buai duh lo. A beidawn thleng rakin bei ve reng reng rawh se.



Zodini kha hmana ka hriat ţhin ang kha a ni tawh lo. Pawimawhna ka nei tawh lova, ka vau zam thei tawh lo. Hlau angin a awm duh lova, engpawh ti dawn ila ka thuhnuai a kun a tum tawh lo a ang. Nau a pai lehzel nen, thil ţha ka tihsak ngai lova, tun a an hlimna hi chhe lo tur a duh chang ka nei leh ţhin. Jimmy hi thung rulh duh viau mah ila a pasal ka tih nat rualin Zodini a na tel ve zel tawh ang.


"I fanu hi inkhawl chhawk thei ila ka duh a ni mai. Ka bia anga a phallo lui zel anih leh a pasal chhungte ka dil tawh mai ang chu"
"Nangmah chauh a i awm loh hi. Kei ka awm a, i duh duh naah kalin i hlimna tur iti thei a, ngatinge an fanu hi laksak ţalh i tum? Naupang rilru iti buai mai mai dawn asin. Engtinpawn ti la, inţhen tir mahla Zodini hi ka hnenah a lo let tawh dawn chuang lo. Awmze nei lovin mi chhungkua kan tichhe mai maiah i ngai ve lo mi?" ka ti a, ka nu luhlul zia ka hretawh a, ka thusawi chuan hna a thawk lehpek tawp nang. Rilru lian ve tawk tak chu nilo sela chuan hmanah khan a thi daih tawh ang.


Damdawi a lo khawih ve ţhin vang a a kut vung ve deuh luk chuan ka kut a vuan a, ka lo hmer let vat, mawi tih lohna ka nei lo. Ka nu anih chhung chuan ka hmu mawi vek. Ka nutei te ang a enkawlna ţha dawng ve chu ni sela khawlaiah a cheng bik lovang.



"Ka hria lawm. In inhmu lo rei a, chanchin inhre pawh miah lovin rei tak in awm a, in inţhen laiin in la naupang ve bawk nen. Ngaiin duh viau mahla i hmangaih tawh bik lo niin ka hria. Mahse ka lung a awi thei lo. Zodini chhungte leh Jimmy ten na taka an siam hnu che a an hlim bik hi hmuh hrehawm ka ti" a sawi dik ang. Min khawngaihna a hmelah a langchhuak hial.
"Ka hlim hi, engkim ka neih tawh hi. Kan awmdun thei tawh a, i thil duh apiang ka leisak thei tawh che a, hmanah khan nangmah vangin ka nutei te ka bum reng a, ka hnaih a awm a in nuam tak a cheng turin ka duh si che a, zirlai dang aiin pawisa ka heh a, ka inhlawh reng chung pawh khan ka nutei te ka inthawn tir reng tho. Mak an tih changin awlsam zetin dawt ka hrilh mai zel a, ka hum duh vang vek che in. Mahse iduh belh zel, mi fanu thlengin i awt tawh. Vawiin a Zodini min endan kha i hmu ve lo anih kha. Min hua, ka bula awm nuam a ti tawh lova, min tlanchhiatsan dan tur a zawng reng zawk. Mipa ka nia, hmeichhia buaina tur angah ka buai ve duh tawh lo. Beisei awm tawh lo ka buaipui peih lo. Ka thu la hmasa lova min kalsan khan ka inhmu hniamin tlawm zawkah ka in ngai a, tlawm zawk nih ka duh lo. Inrawlh lo ila ka tlawm lo a ni mai. Ka inrawlh chuan tlawm zawk ka ni dawn tho tho" ka kut a hmer nghet sauh sauh a, a in ngaihtuah vang vang. Zodini hian kan thil neih zawng zawng hi engatanmah a ti lo. Jimmy te lehpelin hlawk zawk mah ila a ngaihven dawn chuang lo. Ka lo umkawi duai duai kha ka inchhirin ka zak letling zawk. Tlawm nawn ka tum tawh lo. Ka tlawm loh theih dan ber chu engkim hriat loh der hmak a nuam ka tihdan ber a nun hman a ni mai. A awmdan ka hmuh khan beiseina ka neih ve ţhin te kha a bo vek.


"Kal tawh rawh chanchin thar ka neih hunah ka hrilh dawn che nia" ka kut a thlah a, pindan lam min pan san. Tupawh hian hman ţangkai atan chiah min duh hlawmin ka hre mai, ka nu thlengin. An duhzawng tih theihna hmanrua bak ka ni lo. Tu hmanrua mah nih ka tum tawh lo. A tawpah tlawm leh zah bak ka hlawh chhuak leh chuang lo.



ZODINPUII


"Nangmah hi em ni Zodini chu? Midang ka rawn zawt kual a helai hi min kawhhmuh a" nu valai tak lo ding zan ka hmuh thut chuan a hrilhhaithlak zawk. Ka hriat ngai mi a ni der si lo.
"Ni e. Keimah lo Zodini an awm si lo a, keimah ka nih hmel" ka lo ti a, ka insawi takah chuan nuih pahin a kut min rawn pe a, lo vawn pahin midang ka melh a, thil awmdan chu an hriatthiam hmel vak bik loh.


"I haw thei ţep tawh em?"
"Aw haw thei ang ka ni tawh. Eng nge ni ta?" tiin hawihhawm deuhin ka lo la chhang tho.
"Thil pawimawhah ka hmu lawk duh che a" a tih hnu a tlem a min rawn hnaih deuhin midang hriat ve loh tur hian "Kan pahnih chiah a sawidun chi a nia" a tih zawm a, lu ka lo bu nghat.
"Min lo nghak rawh, ka haw thei ţep"
"Pawn lamah ka lo ţhu thawveng ang. I rawn chhuah huna min hmuh nghal theihna turah ka lo ţhu dawn nia"
"Awle" a chhuah hnuah midangin eng eng emaw min zawt a, ka hriat bik loh thu hlirin ka lo chhang. Min rawn hmuh chhan tur hre miah lo mah ila ka rilru a nuam thei chuang lo.


Tha tho lo zetin ka chhuak a, pawn ka thlen veleh ka hawi kual a, a fal laiah min lo la nghak reng. Hmun dang a kal a ngai lova a zia phian.
"Eng nge min hmuh duh chhan? Ava pawimawh awm ve" ţhutna dang a awm miau loh vangin hreh chung chungin a bulah ka ţhu. Min chibai dawn lai khan a kut kha ka lo hmu ru reng tawh a, khavang khan amah pawh hi ka hmu pangngai vak lem lo.


"Mafela nu ka nia, Mafela chu sawi vak ngai lovin i hriat tawh kha" mak ti zet a ka en laiin a lo nui sang thung. Nelawm tak a lan a tumna mah nise ka nel loh phah daih zawk.


"Mafela nu chu ka hmu tawh a, nangmah i ni lo. Min bum tum buai lovin iduh ang chu sawi vat vat zawk rawh" ka huaisenna zawng zawng ka sawmkhawm ve takmeuh. Kei aia upa daih anih vangin min bum tum angah ngai mah ila chaltlai deuh a ka ţawng palh ka hlau ve tho.



"A nu anga i ngaih kha a nutei anih kha. Fa an nei thei si lova, a pian hlim aţangin fa angin an la a, khatih hunlai khan ka rethei em a, a nawmsakna turah ka fapa kha ka dah a, fate nen hi chuan a inţhen hran theih tak tak loh a, an upa a, thisen zawm nge nge hi chu an inzawng chhuak leh mai" a tih takah chuan ka hrethiam uarh uarh. Mafela rawnkal chhan ang bawk kha a rawnkal pui ve anih hmel.



"Ka fanu chungchangah bawk a mi min rawn hmuh a?" nui deuh hlek chung hian ka ti a, a nu diktak anih leh nih loh chiang lo mah ila an rawnkal chhan a in an chuan ka chhanna a ngai reng tho ang.


"Mafela nen a in fa a nia, zan hnih khat lek a pa bula awm tir ve zawk zawk chu i phal ka lo ring a, ilo chhang beidawng ţhak sia, keipawn ka tunu chu ka hmu ve chak sia, inremna siampui tur che in keimah ngei ka rawnkal anih hi" an van ngam zawk tak. A sen laia vawikhat pawh an rawn ngaihsak lo, pawm pawh an la pawm ve chhin ngai loh an rawn beisei ngam ania.



"I hresual aniang ka pi. Mafela nen fa kan nei lo. Thudik lo ilo hre palh a nih dawn chu. Kan veng velah te iduh chuan i zawt thei ang. Bawihtei pa diktak chu an lo hrilh zel thei ang che" ka ti ve ngat. Ka chhan dan chu a lawm lo tih ka hria. An thil rawn tihdanah hian ka lawm bik lova, an mitmeng ka veng der duh bik lo.


"Test neih ngam vek khawpin kan chiang a, i phalloh chuan i nu leh pate ka rawn dil mai ang. Kan nei hlen dawn ka ti lova, ka fapa hi ka lainat ve a, a fanu tal hian a pa a ni tih hi hria se ka duh. Midang daih apa ang a ngai lo hian apa dik tak hi hre ve hrim hrim se ka duh a ni mai"
"Ka sawitawh ang khan Bawihtei hi Mafela fanu a ni lo. In duh duh in rawn ti thei ang. Kei aiin Bawihte in a tuar nasa zawk dawn a, chu chu in hriat sa vek tho ka ring. In tawrh tir duh chuan in thu thu le" ka lungawiloh zia a hreve tawh ngei ang. Mafela nu diktak pawh nise ka fanu min rawn chuhpui theihna dan a nei chuang lo.


"Bawihtei i pai khan i sawichhuah hma aţangin i pasal hian a hre tawh. Mafela a vau bet a, chuvangin loh theih lohin a hnawl che u anih kha. Ka fapa rilru nem zia i hriat kha, khatih hunlai khan a hringtu nu ka ni tih a hriatchhuah na ala rei lova, min enkawl a duh a, a nutei te hnenah khan kan nufa chungchang sawi ala rem chiah lo nen, duhthlan tur dang a nei lo. I pasal khan engkim a lo hria a, i hnung lama tenawm tak a thil ti kual vel tu zawk chu i pasal mifel ber anga i ngaih zawk hi a ni" a ti ta piap piap a, a thinrim hmel kher mai. Mak ka tih lutuk vangin sawi tur ka hre lawk lo. Ngawi rengin ka en ngai ka en tlawk tlawk a, mak tihna hlirin ka khat a ni ber.


"Ka pasal hi chutiang mi a ni lo" ka ti sep a, Bawihtei lak hran an duh vanga an dawt phuahchawp ah ka ngai lui hmak.
"A mak teh thut em a min ring kher lo ang. Ka hre sa vek alawm. Mahse dawt a ni miah lo ania, iduh leh i pasal i zawt thei ang. Mafela hnenah eng eng nge a sawi te zawt la, a nupui em chu dawt a hrilh duh bik nang" zangkhai vah hian a ti leh ang lawi a, ka hrethiam lo takzet.


"Ngun deuhin ngaihtuah rawh. Ka fapa misual tak ang a in ngai te hi ka duh dan a ni bik lova, Bawihtei hian a pa diktakin a hmangaih zia hria se ka duh. A duh reng vang a hnawl cheu a nilo tih rawn hrilh tur che in ka lokal. Amah ngei ka rawn tir a, a dawih zep lutuk leh a chapona a dahsan em vangin engmah sawi lovin a rawn let leh a, a rang lamin keiman ka rawn hmu che a nih hi" che lova ka awm reng laia ka kut rawn vawn a tum chuan ka lo duh ţhak lo. Ka phih let sawk a, a nui hak ri ka hre zui zat.



"Min la nello hle mai. Ka rawn ţhawng thut bawk che sia, ka kal phawt mai ang. I pasal chu lo zawt fiah la nidangah ka rawn hmu leh dawn che nia" a kal sawn chiah chu ka thaw chhuak hawk. Rilru buai ru zetin ka haw ve a, ka pasal leh ka fanu ten kawt laiah min lo hmuak. Kei aia an haw hma chuan hetiang hian min lo hmuak ziah. Ka pasal chu ka en ţhin a, midang vau bet chi a nih ka ring thei hlawl lo.


"Hruai ziah rawh ka tih kha Jimmy. Hmeichhia zawk ang maia a lo haw hun nghak tawp zel mai. Chetsual palh te a hlauhawm a, nupui ten nau an pai lai hi chuan a theih ang ang a duat tur. Tunlai mipa ho hi chuan pa lo nih hi in hlau leh lutuk a, in nupuite in duat poh leh inpa zawk" ka nu in a rawn ti chhuak bawrh bawrh a, a ţawn rin em vangin kan hnaih a awm lo an lo nui hak hak hlawm.



"A buai ve em anih hi. Min lo hruai lo turin ka tia, ka fimkhur a, Pathian zarah ka chesual bik lovang" tiin ka pasal thlavang ka lo hauh a, "Min lo zui lawk Bawihtei hruai lovin" ti a a ruka ka hrilh leh hnuah ka lut nul nul.


Pindan tukverh a kan parda zar ka keu a, tukverh hawngin ka dakchhuak a, ka zawt hreh khawp mai. Min chhan na tur ka hre hlau a ni ber. Ka bul chiah a a rawn din ve phei chuan keimah zawk ka zam. An sawi ang kha nilo hlauh se ka ti.


"Niminah Mafela a rawnkal a, vawiin ah a nu. Bawihtei riahpui ve zawk min rawn dil ve ve. Ka phalloh thu ka hrilh ve ve a, thil mak deuh min hrilh a" a lam hawiin ka nui sak a, ka ngaihbel nge zam ve deuhin ka hmu.


A ngawih reng takah chuan keimah bawkin "Mafela i vau niin an sawi a, Bawihtei leh kei min hnawl turin i hrilh ni te in an sawi a, mahse i sawi ka hriat loh chuan ka awih lo. In rintawnna a pawimawh zia kan hre ve ve a, ka ring che a, midang zawng aiin ka ring zawk che. Chuvang chuan nitin khatiang thil kha rawn sawi mahse i sawi ka hriat hma chu ka awih chuang lovang" tiin ka phun sep sep a, min chhang lo tur a hrilh nghal mai ka duh rum rum.


"Hrilh che ka tum ţhin a, min kalsan ka hlauh vangin ka tum apiangin ka ţhulh leh ziah. Mafela ai khan engkim ka hre hmasa a, naute nen a hnawl tur che in hrilh lo mah ila ţhen tur che in ka hrilh" a ţawngkam ngei ka hriat takah chuan ka nghing dawt a ni ber. Vuak chawrh ang mai ka ni. Thinrim a ankhum buan buan tur ang a ka in ngaih laiin ka ngawi tlat thung. Ka thinrim lova, sawitur ka hre lo. Mak ka ti lutuk chu sawi tur ka haihchham vek.


"Thudik i hre tawh a, ka thuruk ka sawichhuak ta bawk a, awmzel dan tur chu i thu thu. Engthil pawh ti dawn la ka dang lovang che" kal nghal mai a tum chu a kawrah ka lo vuan bet.
"Eng thil nge ka tih i rin? A hma ang bawk khan naute pa tur dang ka zawn leh i ring a mi?"


"Aih, ka thil tihsual ka hria a, eng hremna pawh min pe dawn la ka pawm vek. Ka inchhir hnu khan ka siamţha thei tawh lova, min ring tawh dawn lo anih pawn ka thil lo tihdan kha min ngaidam dawn nia"
"Ka hlimna chiah iduh ţhinah ka lo ngai a, khatih hunlaia ka natzia hmu a hrevek tu inia, khang zawng zawng kha i remruat vek maw?" tiin ka zawt nawn leh kher. Eng hremna nge pek tur ka hre lo.


"Ka sawi ang kha a ni mai. Ka inchhir meuh chuan a tlai tawh. Min kalsan ka hlauh vangin ka zep a, i hre leh ta tho sia" za vak lo hian a nui a, tih theih vak ka nei lo. Ka melh tlawk tlawk ringawt.
"Hremna pek tur che ka nei lo. Khang kum chhung zawng khan hremna i tuar char char tawh zawk. Ka hriat hlau reng rengin i awm a, min hnaih duh tho siin i thuruk a lanchhuah i hlau ru reng a, chu bak bak a hremna nasa a awm lo. Nikhat lek rilru nuam lova awm pawh a hrehawm ania, nang chu kum tam tak rilru nuam lovin i awm tawh. Chu chu i hremna ah ngai rawh" ka ti ve thei hram. A pawi tur zawng zawng a pawi vek tawh a, ka pasal hi ka mipa hmangaih ber a ni tawh. Thil hlui vanga ka hmangaih ka kalsan leh kher a ngai dawn em ni? Thil hlui vangin ka in ti na duh tawh lo.


"Min kalsan dawn lo maw?" mak ti hmel zet hian a ti a, lu ka thing.
"Tunah tak hi chuan i kianga awm hrehawm ka ti. Khatiang thil ilo ti ve kher kher khan min ti thinur a mahse ka haw lo che. Naupai chung hian khawiah nge kal se min tih? Bakah pasal pakhat bak neih ka tum lo" min hnaih a tum veleh ka tawlh hnung dawrh.
"Min hnaih rih suh. Ţhen che tum lo mah ila ka hnaih chak rih lo che. Ka rilru a buai nuaih rih a, ka hmangaih te tan theih tawp ka chhuah ţhin laiin natna bak ka hmu let ngai lo. Keimah chauh in ngaihtuah ila chuan ka kalsan em em ang che. I thil tih ka pawm thiam hma chu i hmuh phak lohah ka bo vang vang ang. Mahse fa kan nei tawh a, engkimah naupang ngaihtuah tel angai tawh a, lo ţhen ta che ila nang chauh nilo kei leh ka chhungte thlengin kan mualpho vek bawk ang a, kan thuruk kan zep ţang ţang hi mi tam takin an hriat phah bawk ang. Kalsan theih lohna che hi chhan tam tak a awm. Ka nep vang a kalsan lo che ah min ngai miah suh" ka ti a, nep min tih ka hlau a ni. Ka ţhen theilo hrim hrimah a in ngaih ka hlau a, chutiang a ni lo. Ka chhel vang zawk a ni. Ka tlanchhiatsan lovang. Keimah bawk a hrehawm engkim hmachhawn turin khawiahmah ka kal dawn lo. Min hmuh apiangin a thil tih sual kha hrechhuak zel sela ka duh zawk.


"Min lo bum kual mai mai a, i tan hian eng chiah nge ka nih le? Ka nep hmel viau a mi?"
"Engkim" tiin min lo chhang vat. Ka lo nui hak. Keimahin engmah ka hmachhawn dawn lo. Mafela nu khan kan in ngeiah hian thudik rawn sawi mah sela Jimmy nen ngei hian kan tuar dun ang. Bawihtei nen a hrehawm kan tawrh chuan a ni pawn a tuar ve ngei ngei tur a ni. Kan rual a a chhe ber thleng a tawk ve zel turin ka duh na a ka hmangaih ber chu amah tho hi a ni.


CONT.

Link:
BBcode:
HTML:
Hide post links
Show post links

Ngaia
Site Admin
Posts: 15548
Joined: April 30th, 2016, 4:07 pm

Unread post by Ngaia » November 15th, 2020, 11:09 am

CHOICES-10



"Jimmy lokal teh thu mak deuh ka hria" mu tur a ka chhoh laiin an pindan zawnah ka nu a lo awm a, ka remtih hma in min pawt dawr dawr. An pindan chhungah ka pa leh Fiona an lo awm ve. An awmkhawm ţhap nachhan ka ngaihruat thiam.


Khami ni aţang khan Zodini nen kan inpawh lo sawt. Min be ngai lova, keipawn ka be hmasa khat. A ţul tawpah lo kan inbe ngai lo. A lungawi hun ka nghak chawt. Min ţhen loh chuan a ţha nimai. Ka inchhir zia ka hrilh tawh a, ngaihdam ka dil tawh a, kha thil kha kan sawichhuak leh tawh rih lo.


"Phone kan dawng a, Mafela nu a in ti. Bawihtei chungchangah min rawn bia a" ka rin lawk sa anih vangin mak tihna ka nei lo. Anmahni zawk chu an zamin sawi chhunzawm an hreh hmel hle.


"Bawihtei hi midang fa a mi?" ka nu chuan a ti ta nge nge.
"Mafela fanu ania, in tunu ang a in ngaih kha ka tunu zawk ania a rawn tia, tunge Mafela chu? Bawihtei hi an la dawn tihna mi?" a tih chhunzawm leh a, a ţap lek lek a ni ber tawh.
"Zodini bialpa hlui"
"I fa a ni lo maw? Eng nge thil awmzia hi? Awii midangin an hriat ka hlau emai" a ti vawng vawng. Ka pa in engmah ala sawi ve lova, thuruk pai reng ka duh tawh loh vangin ka thil tih zawng zawng nen ka sawichhuak.
"Khatiang thil kha ti lo ila chuan Mafela zawk kha a nei ang" tiin a tawp ka khar a, ka chhungte hrilhhai hmel chu an khawngaihthlak zawk.


"Hmeichhe dang hmu lo pawh i ni lova, ngatinge chutiang thil chu itih? Mi in hmangaih lai ngatinge i pawh ţhen? Chutiang thil chu iti tak tak maw? I fel viau amaw ka lo tia sin" mumallo zetin ka nu chu a ţawng reng a, ka thil tih vang khan ka awm a nuam ngai lo. Tupawn an hre tawh a, zak viau mah ila ka thawveng hawk.


"Thil thleng tur ang a thleng vek tawh. Zodini nen a in inţhen loh chuan a ţha. Bawihtei hi an duh duh a an lak theih a ni lo. A hring tu nu ala awm a, Bawihtei lah duhthlang thei dinhmunah a ding ve tawh a, min laksak ngawt thei lo" ka pa in a lo ti ve a, kan inhmuhkhawm hnu a a ţawngchhuah hmasak berna a ni.


"Inrawlh ve i tum em?"
"Aih. A pa diktak Mafela a nia, ka thil tih vanga inţhen an ni bawk a, ka inrawlh ngam lo. Nangmahni zawk hian Bawihtei hi in en hran loh ka beisei. Tih sual a nei ve lova, in en hran a in duat lo sawt anih chuan ka thil tihsual kha min thlawp ah ka ngai ang" ka ti a, an hmangaihin an duat a, an awmdan an thlak ang a, Bawihte in hrehawm a tih ka hlau ber.


"A nu nilo mah ila ka pawmlen ania, a sen lai, a pian hlim aţangin ka la hrang a, a nu chuan hnute a pe ţawk. A bual ngai lova, chaw a hrai ngai lova, engkim ka ti vek. Kum6 a nih hnuah i fa a nilo tih ka hria a, mahse ka hmangaihna a bo chuang lo. Harsatna a tawh hi nang ni aiin ka hlau zawk ang. Engkim kan hretawh bawk a Mafela te chu an duh leh lokal se la, ngaihdam te kan dil ang a, mahse Bawihtei duhlo chung chu ka hruai luih tir dawn lo reng reng" ka nu in a tih takah chuan ka rilru a nuam huai. Ka pa fa bik te pahnih a fa anga a pawm theih tlat loh aţang khan ka nu hi ka ring tawk lovin a rilru a ţha lo ah ka ngai ţhin a, huat chang ka ngah. Mahse Bawihtei leh ka nupui a en danah hi chuan vuina tur ka hre lo. Zodini leh Bawihtei hi a hmangaih takzet tih ka hria.


"Mafela chu U Muantei nen an in ngaizawng alawm. U Zodini a duh tawh lo hrim hrim. Keipawn a hotel ah an awmdun vai vawihnih lai ka nghak tawh. Bawihtei pawh hi kal tir miah suh u, keinin kan ngaihsak ang hian an ngaihsak ve dawn miah lo ania aw" ka nau in a lo tih ve chuan kan en ţhap. Min melh kual rulh rulh pah hian "Dawt ka phuahchawpah in ngai a ni maw? In duh leh U Muantei zawt ru. An inkawp chiang emai" a ti leh a, dawt a sawi ngai loh vang zawk a mak ti kan ni.


"Chuti si ngatinge Bawihtei an rawn beisei a?" ka nu bawk. A tunu an lak loh dan tur phet a ngaihtuah a nih hmel.
"Ka hre bik nang. Iduh leh Mafela te chu nangman hmu la a ni mai lawm. U Muantei nen an inkawp a, chu chu ka chiang thildang ka hre ve lo" vin zet a a tih laiin Bawihtei a lukham tereuhte pawm chungin a rawn lut. A pi leh pu te bulah a mu ţhin a, kan bulah a mu ve zeuh zeuh. Zodini nen a kan inbiak ţhat vak loh vangin kan hnen a mu turin ka duh zawk a, a thu in a rawnkal leh ta tho anih hi.


Ka pa in a lo pawm vat a, ka nu pawn a lo chhaih ve vat tho. Ka fanu nilo mah sela an sawi ang khan a buaipui tu ber an nia, an hmangaihna a bo thei tawh lo.
"Kal tawh rawh. Innu nen ţha takin sawi dun ula, a ngaidam thei che anih leh naupang tana hmuh hrehawm loh turin pangngai tak khan awm zui ula. In chezia ho te te kha Bawihtei hian a chhinchhiah ve kar ania. Zodini pawh ka lo sawipui ve dawn nia" ka pa in a tih takah chuan Bawihtei biangah ka fawp a, ka chhungte ho chu ka chhuahsan a.


Kan pindan a ka luh chuan ka nupui a lo muhil tawh. Chhuatah puan a tla a, a mut hi chuan naupang ang chiah. Puan ka sinţhat tur hnuah ka inbual ve a, Zodini ang nupui a ka nei hi ka vannei takzet. A lungawi lohna fel fai takin min hrilh ţhin a, a thinrimna sawi miah lova tih tauh bur bur a hrat ve lo. Kan inhau ngai mang lova, kha thil kha lo ti lo ila chuan tun thlengin buaina kan la nei lovang. Ka thiam lohna kha ka pawm a, min biak ţhat duh loh phah hi ka vui lo. Vui ngam tur niin ka inhre lova, a lungdam nan a sawi tur ka hre tawh lo. Thil thleng tawh a pawm thiam hun nghah tawp mai loh chu tih theih ka nei lo.


A hnaih a ka mut rualin min lo kuah a, harh se chuan min hnaih duh dawn loh nen. A naupai laia natna ka siam vangin a hma aiin a cher deuh. Hma ka lo sialna kha keimah mai ni lo mi tam takin an tawrh phah a, a pawi takzet.


Kan inhriat tirh aţangin a hlim thla ang maiin ka zui kual reng a, ţhiante min chhaih fiamna leh hmeichhe thu thu a awm min tih ţhinna kha ka pawisa ngai lo. Mafela laka a lungawi lohna ţhin zawng zawng a bunchhuahna ka ni a, ka u a thih lai pawn a kiangah chuan lungngai angin ka awm duh lo. Midang nen a an buaina ka chinfel sak a, ka u ka ngaihna ţhin kha ka hrilh ngai lo. Mipa ka nih vangin engkim tuar thei turah min ngai ţhin a, khavang khan rilru na thei lo ang a awm chang ka ngah. Chhel viau turah min ngaih tlat vangin chhel tak angin ka awm lui char char a, mipa dang a buaipui chang a ka nat ve na te kha tih lan a rem ve ngai lo.


A mutthilh lai a ni bawk a, engmah a hriat loh miau vangin ka kuah a, light ka off rualin a phone eng ka hmu a, a nghawr det det bawk. Dar10 a pel tawh a, a pawimawh ka rin vangin a harh hma in ka la vat. Number hlang a ni a, ka la ta tho.


"Hello"
"Khawnge Zodini?" Mafela a ni.
"A muhil tawh a"
"Naktukah ka hmu duh a, min lo hrilh sak rawh. Min hmu turin lokal rawh se"
"Ka lo hrilh ang. Zingah amah pawh hi rawn hrilh ve hrim hrim la" ka ti a, an inhmuh ka phalsak hi ka tisual lo turah ka ngai. Mafela hnen a a let leh let loh chu a duhthlanna a ni tawh. Vawikhat ka nawrlui tawh a, keichuan ka ti nawn tawh lovang.
"Iva phal awlsam leh si ve. Hman a ka hnen a i thilsawi kha a hretawh a nih hmel a, mahse i nupui khan min rawn la be pawp miah lo. Hlutna chang ka hriat loh laia a hlut zia ilo hre bik kha i vannei khawp mai. Ka rilru ka siamfel tawh a, naktuk chiah ka hmu leh ang" a rawn ti a, thinrim a ang lo. Hmu reng dawn mahse sawisel tur a dikna ka nei rih lo. Mafela ngei pawh ka ti na tel ve. Ka hmasialna kha ka lo kalpui thui deuh a ni. Ka chhan leh hma in a tawp hman a, ka inhmuh tir ang. A lo hmangaih ţhin hnenah ka kaltir ang a, a rilru a let leh anih pawn ka pawm vek ang. Duhthlanna ka siamsual loh ka beisei.


ZODINI


Ka harh ve meuh chuan pindanah keimah chauhin ka lo awm leh tawh. Ka inbual sawk sawk a, inhnuaiah ka chhuk a, Bawihte in chaw a lo ei mek. Jimmy erawh ka hmu lo.
"In pa a chhuak tawh. Bawihtei hi chu keiman ka thlah mai ang. Tih tur a ngah deuh a, chaw ei lovin a kal" ka nu in a lo ti zung zung a, Bawihtei pawh a lo siam peih thlap tawh. An thawm engmah ka hriat loh danah kan pindanah an rawn insiam lo aniang.


"I tho nuam maw Zodin? Chaw ei hun ţep tawh mahse thingpui kha mi lo siam tho teh. Khawlaiah ka lo va ţhu ang ni ala sa lo bawk a" ka pa in a tih ve hnu phei chuan ka che zung zung. Thingpui ka lum a, a so hma in Bawihte in chaw a eikham hman a, ka nu leh midangin an tih hma in ka tifel vat vat. Ti lo turin min ti sap sap na a ka ngaithla lo.


Ka pa nen a kan intur thingpui kengin pawnah ka chhuak ve a, kan kawtlai hi a zauin a chang chuan pawnlam hi a nuam mah zawk ţhin. A no tur zawk ka pek hnuah a bulah ka ţhu ve a, ngaihţhat loh rukna ka nei a, a ţawngchhuah hun ka ngaichang ran.


"Bawihtei chungchang kan lo hria a, engtin nge in inbiak tak zel?" a hmel a tak run a, ka hlauthawng kher mai. Tukin a ka nu in Bawihtei a en danah khan danglamna ka hmu lova, an en hran zui mai ka hlau a ni.
"An hnen a kaltir ka phal lo. Engpawh ti dawn se ka hlau bik lova, a hriat ngai loh te hnen a kaltir ka phallo hrim hrim" tiin thudik tak ka hrilh.
"Ka fapa vangin engkim i chan a, a pawi khawp mai. Han hau vak dawn ila puitling anih tawh bakah siamţhat theih a awm tawh mang si lova, i awmzel dan tur chu i duhthlanna ah a in nghat tawh a, engpawh ti la keini lam chuan kan dem miah lovang che" a ti dap dap a, zaidam lamah Jimmy hian ka pa hi a chhun ka ti ţhin. A lakah lungawi lo viau mah ila ka rilru ah a awm reng tho.


"Ka phallo chung chu engmah an ti thei lo. Jimmy chuan engpawh sawi se Bawihtei duhlo tu chu Mafela tho ania, ka lak hran tir dawn lo" ka ti nawn leh ngat. Jimmy chuan engpawh sawi se min hmangaih takzet anih chuan eng thil pawh tawrh huamin min vuan tlat turah ka ngai.


"Jimmy chuan Bawihtei laka kan rilru put hmang a danglam phah a hlau a, chu thil chu nangpawn i hlauh ka ring. Inpa kan hrilh tawh a nangpawn hreve la, Bawihtei hi a sen lai aţanga kan enkawl ania, inu phei chuan a fa zawk ang maiin a enkawl a, tu fa pawh lo nise kan mo inih chhung chuan Bawihtei pawh kan tunu ania, kan hmangaihna a danglam phah lo. A ngai rengin kan en ang. I rilru kha tih hrehawm phah miah suh" ka lawm viau rualin inthlahrunna ka nei tel ve.


"Ka hlauh ber a ni ţhin. Bawihtei hi Jimmy fanu a nilo tih in hriat hunah in ngaihsak a hlawh tawh loh ka hlau ber ţhin. Chutak chu Mafela nu pawn min vau nan a hmang a, ka rin aiin in beng a thleng har zawk. Jimmy fa a nilo chung pawh a min la pawmsak tho hi ka lawm lutuk"
"Ka fapa nupui inih chuan ka fanu ini ve a, Bawihtei pawh kan tunu diktak alawm inih. I pasal chu i duh duhin ti rawh. Mahse Bawihtei hmuh lai chuan a hma a in awm dan ang a inmil khan in awm reng dawn nia" a ti a, ka nu leh Bawihtei an rawn chhuah ve tak vangin kan sawi zawm ta lo. Driver hruaiin Bawihtei thlah turin a kal a, ka pa pawh a sawi duh ang a sawi zo tawh aniang chu inchhungah a lut a, a chhungte ka en hi chuan Jimmy nei tur a thutlukna ka siam kha ka tisual lo.


"U Zodin zingah U Jimmy kal dawn khan ila tho si lo a, vawiinah Mafelan a hmu duh a lo hrilh rawh a tia" kan nau pakhat tleirawl te chuan a rukin min rawn hrilh.
"Awle" ka ti liam puat na a ka hmuchak hran lo khawp mai. Hmuh a thil sawipui ţulin ka hre tho a, hmuh tum rengin tun thlengin ka la hmu lo.


Chawhnu duty turin ka chhuak a, Jimmy hmu miah lova hna kal ka neih khat nen, tun hnai hi chu ka kal tur min enliam ngai lova, ka haw in min lo hmuak ngai tawh lo. Mafela pawn min rawn be leh tawh a, ka hmuh hun tur te ka lo hrilh a, Mami erawh chu kan boruak hi ka hrilh duh lo. Jimmy nen an in ngaina a, ţhian inpawh tak annih bakah thil sual ti ve thei lo turah hial an ngai a, a thil tih hi ka hrilh duh lo. Mami te chhungkua chuan mifel ber ang an hriat reng ka duh.


Rilru khingbai deuh chunga duty ka nei ta zeuh zeuh. Damlo tan pawh a hmuh hrehawm khawp a ka awm chang a tam ang. Ţhiante ti ti zawm ve loh chang ka ngah a, an thusawi te hi ngaithla ang a awm tho siin engmah hriat loh chang ka ngah.


Tlaiah haw tlang lovin Mafela hmu turin ka kal a, tumah ka hrilh lawk lo. Haw tlai deuh mah ila min hrethiam ve em ang chu. A hma ang bawkin hnathawk pakhatin Mafela pindanah min hruai leh a, kan chhungkua a kan chawlh lai chhiar telin ka vawithum kalna chiah a ni.


"Lo ţhu rawh" min hmuh rualin ţhutna min lo kawhhmuh nghal a, ka hmazawnah ţhu mah sela min hnaih tawh lo.
"Ka nu hnen aţangin chanchin ka lo hria a, i mo na ten harsatna an siam phah che em?" min hmuhsit hmel deuhin tun ţum chu a awm miah lo. Pangngai takin min bia a, min ngaihtuah ve tak tak anih hmel.


"Aih an fel a, Bawihtei nen buaina kan tawk lo. An rilru a danglam phah lo. Ka hrilh tawh che kha. Inu pawh ka hrilh. In duh duh rawn ti turin ka hrilh ve ve cheu kha. Engmah in thlak danglam thei chuang lo. In hah mai mai"
"Ka hriatpui lawk lova, in chanchin ka ngaihven lem lo. I chhungte thleng thleng a hriattir phei chu ţul ka ti lova, buaina in tawh loh chuan a ţhat chu" min ngaihtuah ang a a awm tlat chu mak ka ti. A ti lui anih chuan lemchan a thiam khawp mai.


"Min hmuh duh chhan chu sawi vat vat rawh" dawhthei lo zet hian ka lo ti hmanhmawh.
"Khami ni khan Jimmy khan nau ipai thu min hrilh lo. Ka nu ang a ka ngaih ţhin ka nu diktak a ni lo tih leh ka nu diktak a hriat thu chiah a sawi. Keimah zawk kha engmah ka la ni lova, hna ka la nei lova, ka duh thleng lehkha ka la zir lo. Ka nu nen kan inchhar chhuah hlim ania, ka nu rethei zet a vak kual vel kha enkawl ka duh. Nangni aiin ka nu ka thlang tihna a nih chu. Ka nu chiah pawh kha ka enkawl ţha hleithei lova, a awmna tur leh a eitur ka ngaihtuahsak thei ţawk. I pasal i hmangaihzia ka hria a, i hmangaih apiang te hnen aţang hian natna chauh dawng tawh lo turin ka duh che. Jimmy khan eng thil mah min hrilh lo mahse ka awmdan a ngai reng tho ang. Ka nu in a hrilh kim lo che a ni maithei. Jimmy vang ni lovin keima thu in ka hnawl che a, khami ni a duhthlanna siam tu chu keimah ka ni. Nang aiin ka hma hun atana beih ka thlang zawk a, i fanu pawh hi keichuan laksak che ka tum lo. Thlamuang deuhin lo awm rawh u" a ti a, a awmdan a thlak thleng thut chu a awihawm loh zawk.


"Eng thil nge i ruahman a? I fel der vel hi ka awih i ring a mi?"
"I awih leh awih loh chu i thu"
"Jimmy i huat ţhin nen a thlavang i hauh leh ta sia"
"Hua e. Mahse i hmangaih alawm. Min hmangaih lai khan natna ka thlen che a, tunah chuan i pasal hi ţhen mahla i rawn let ka ring tawh lo. I pasal nen a in buaina hi chinfel sak che ka duh. I hlim loh chuan i naupai lai tan pawh khan a ţha lovang. Kan inţhen chhan kha Jimmy vang a ni lo. I pasal thiam loh a awm lo tih ka hrilh duh che. Hlim deuhin awm leh rawh u" a tih leh tak zelah phei chuan ka tan sawitur mang a awm tawh lo. Min neih let tum ang deuhin a awm a, a hnuah Bawihtei min chuhpui a tum leh a, tunah lah kan chhungkua a kan hlim a duh leh a, a mumallo khawp mai.


"Ka nu in rawn hmuh leh che a tum pawn lo hmu duh tawh suh. A hmului che anih a a vau leh che anih pawn engmah lo hlau suh. Keimah ber ka tel ve loh chuan engmah a ti thei lo. Thudik tak vek ka hrilh che a, hetiang thil a buai tawh lo hian i pasal fanaute tan inhmang ţangkai zawk rawh" a tih pawn tum dang a neiah ka ngai tlat tho. A inthlak thleng thut hi ka hrethiam lo a ni ber.


"Inu kha min hmu tawh lo turin lo hrilh la a ni mai. Bawihtei hi kan tello in ala awm thei lo hrim hrim. Chumi sawi tur chuan ka rawn hmu che. Jimmy chungchang i sawi kha chu ka ring. Dawt i sawi lo ang. I duh naah midang thusawi i ngaithla ngai lo. Lo vau che pawh ni sela i hlau lovang. I duhthu a min hnawl inia, ka pawm thlap. Chuvang tak chuan Bawihtei hi rawn beisei ngam tur inni lo. Inrawlh ve tawh suh u" ka ti ve hmak.


Ka haw dawnah pangngai deuhin min thlah a, tun bak ka hmu leh tawh lovang. Chhungkaw nu ka ni tawh a, a sawi ang khan ka pasal fanaute tan a ţangkai tak a awm hi ka tih theih chhun a ni.


CONT

Link:
BBcode:
HTML:
Hide post links
Show post links

Ngaia
Site Admin
Posts: 15548
Joined: April 30th, 2016, 4:07 pm

Unread post by Ngaia » November 15th, 2020, 11:09 am

CHOICES-11



"Jimmy hi a lo la haw chuang nange?" in ka thlen hnuah midang hriat lohin ka zawngkual nasa tawh. Khawiah mah ka hmu lo. Ka nu ka zawt leh ta nge nge.
"I ni in chaw eiah a sawm a, Bawihtei nen an kal. An lo nghak deuh che a, ilo haw thei si lova, tuman kan be tlang thei bawk silo che a, i tello in an kal ta mai a nih kha" a ti a, ka phone ka silent daih a, Mafela hmu tur a ka kal aţang khan ka la en leh lo hrim hrim.


"Anih chu Mami te inah ka kal kawi a, phone ka silent sia" ka ti daih. Mafela nen a kan chungchang hi chu hre tam lo se ka duh zawk. An hriat tam poh leh buaina a tam. Hun kal tawh sawichhuah reng a ngai a, thil ţullo kan phawrh leh chiam zel.


"Iduh leh va kal ve tho la. Chaw an la ei chuang lovang. I thu thu nimai"
"Kal tawh lo mai ang, vawiin chu ka chau ve deuh a, in ka thleng tawh bawk a ka chhuak peih tawh lo mai"
"Fiona a awm kha, an tello a nuam itih loh chuan a thlah thei ang che" a ti lehzel a, a bulah ka ţhu ve ta ringawt.


"In awm tho a nuam tih lohna tur a awm lo" ka ti mawi ve. Thu mak tak tak kan hriat te avang hian a lungawi chiah lo maithei a, ka pa ai mahin tihlawm a ngai zawk. A thil thliar lai ka thliar pui ve nghal mawlh mawlh.
"Chaw in in ei chhuahsan khat sia hrehawm itih takin ka ti mawle"
"Hrehawm ti hran love, an rawn haw har dawn chuang lova. Nangmah zawk hi iţha em? Vei nei i ang riau, ka pa in a hau che ni lo maw?" tiin ka zawt fiam a, a lam ka hawi veleh a kun daih lehnghal.


"Vawiin lamah Bawihte in buaina a siam che mi?" ka ti ta ringawt. Nidanga a awmdan nen a in ang lo em a, ka fanu vang a buaina tho anih ka ring ta ber.
"Khanu kha a kawlhrawng leh lutuk mai. Bawihtei te school thleng thlengin a rawnkal tawh a, a fa pawh nilo a buaipui ve em em a, kei nilo in Jimmy te unau Bawihtei hruai tur khan kal sela chu a lo chhuhsak daih ang chu" a zawhreng takah chuan a puak chhuak ta nge nge.



"Bawihtei a inhmuh tir maw?"
"Aw ipi ka nia, lo leng ve la i duh duh ka lei ang che a ti nem duai a, kan rawn haw kawngah Bawihtei pawh ţawng nem hluak ho reng reng hlau vek tur a ka hrilh hrep kha. A fanu chu nise ka hrethiam, a tunu chupawh a fapa in a duhloh hnu lehnghal, a sen lai buaipui ngaihlai zawng a rawn ngaihven mang silo a len deuh hnuah a rawn ngaihsak vul chuk a, ka ngaihtheih loh tawp hi a thleng ve ţep tawh. Jimmy hian thil lo tisual ve khanglang lo sela chuan ka khing bian bian duh tawh ang. Insawithiam na tur annei a, Jimmy a lo tel ve bawk nen, kan ngawih reng a ngai rih mai mai" a ti tan tan a, a thinrim zia a hmuhtheih. Keipawh ka bang bik lo. Mafela pawh a inrawlh loh laia a buai reng bik mai hi mak ka ti.


"Vawiin chuan i ngawi reng a mi?"
"Ngawi reng e. Ka fapa laktlak loh lutuk vangin ka ngawih reng angai miau alawm. Kan kal dawnah 'I fapa kha fa dang neih tir leh mai rawh' ka tia, kan rawn tlanchhe haw a ni ber. Ka tih let dan hi ipa hrilh reng reng suh ang che. Ngawih hram hram ka tum a, ka thei ta ngang lova, Bawihtei lah a thlaphang nasa. A naupan lai aţanga puitling hmelhriat loh hlauh tur ti a ka hrilh ţhin kha a hunlaiin min nuih ţhin naa a chhawr ţawngkai em hi. A hlau lutuk kha a khawngaihthlak. A thim tawh e ka hmu thei lo. Kha han ti zo mai teh" ka malchungah basket a rawn nghat a, a tho mai dawn maw ka tih laiin thingpui ala lam sauh sauh.


"Jimmy te unau naupanlai hian misual hmaituam kha an lar hluai ţhin a, naupang school bang hruai peng a pawngsual hrat te, khang hunlai kha ka la hrereng. An unau hian an mut dawn leh school kal dawn apiangin ka hrilh ţhin a, ka la inveng reng. Bawihtei pawh kan bula a mut apiangin a mutthilh hma zawng a hlauh tur ang chi te ka hrilh a, ipa hian lo ning thei viau mahse vawiin khan a ţhat zia ka hmu. Nidangah pawh awm lo mah ila ama thu chuan a pi maksak deuh-i kha a zui ngawt lovang" Mafela khan dan a tum ve viau sia, a dang theilo nge dawt min hrilh leh mai mai zawk ka hrethiam hrep tawh love. Court a kal mai te ka duh rum rum tawh. Mafela berin a duh loh thu a sawi tawh a, chu bak bak a chiang a awm thei tawh lo. Boruak nei zawngin che dawn ta ila ţhenawm khawveng te mitmei ven a ngai ve tho si.


"Keiman ka hmu ang. Nangni chu lo inrawlh buai suh u. Ka buaina a hnuh luh cheu ka duh lo. Ka pa hnenah engmah ka sawi lovang. A ruk a chinfel dan ka lo zawng ang"
"Mafela hi ineih leh phah mai ange. Ka fapa hian thil a tisual ngei mahse mihring kan nia, tihsual nei thei kan ni. Ţha famkim kan awm lova, sualna nei lo kan awm lo. Miin natna min thlen a, midang natna kan thlen bawk a, mahse duhthlanna siam thei dinhmun a kan din chang chuan duhthlanna diktak siam a ţha. Nangpawh inngaihtuah chiang la, Mafela hnenah let leh ta la i hlim angem? Jimmy hi tina let ve leh la i hlim phah sawt angem? Tunah hian duhthlanna siam ngei ngei ngaiin i awm a, nau i pai lai lehnghalin, i lainatawm. Duhthlanna dik i siam chuan i hlim reng ang a, a diklo zawk lama i kal chuan i inchhir kumkhua tawh ang. Mafela a sual ka tihna ni lovin i duhthlanna siam khan i zahawmna thlengin a nghawng vek thei" ti a min hrilh tu zawkah ala ţang. Ka buaina ang buaina hi ka mo in nei ve se ka zilh theih ka ring lo. Ka haw viau zawk maithei. An rilru a ţha takzet. Ka pasal chuan tihsual nei mah sela anni vang tal hian heta awm reng hi ka la duh.


"Let lovang. Ka rilru ka siam fel tawh a, Jimmy hi ka pasal a ni tawh. A nu zawk hi ka hmu ang a, min tibuai tawh lo turin ka hrilh mai ang. Mafela kan lamah a ţang a, Bawihtei a duh loh thu a ţawngkam ngei ka hretawh a, hlauh tur a awm lo. Inringtawk lehzualin ka hmachhawn ngam tawh ang" ka tih chuan hahdam hmel sawt ni awm tak a lang hian a thaw huai.
"A ţhat chu. Keinin kan duh alawm, I hmuh hunah pawh i thusawi thlengin fimkhur viau rawh aw. A fing khawp ang, en khan a hriat vek. Inveng ru ranin i awm dawn nia" a ti a, ka pa in a lo koh tak vangin inchungah hmanhmawh deuhin a chho hlawk hlawk. A thusawi erawh ka chhinchhiah kiau tho mai. Duhthlanna siam thei dinhmunah ka ding reng dawn lova, chan ţha zawk ka la chan lai hian duhthlanna dik ka siam a ţha.


Dar8 veleh Jimmy te an rawn haw. Ka lo inbual zo vel chiah chiah a, Bawihtei a rawn pawm lut ka hmuh chuan nelawm deuh turin ka lo nuih. Mihring chuan thil kan tisual thei a, kei ngei pawh ka bang bik lo. Bawihtei thleng a hnawl turin a hrilh em hleinem. Mafela nu hian inţhen turin min duh ngei ang a, kan inţhen loh tur zia hmuhtir ila a ţha zawk.


"Ka phone ka silent daih a, in va eitui maw?" ka lo ti a, ka awmdan teh thut chu mak a tihzia ka hria. Kan inbiak mumal lohna a rei ve tawh em a.
"Aw hmuh ve che an in beisei a"
"Nidangah a kal leh theih tho lawm. Naktuk chu Mafela te inah leng ang hmiang. Kan pahnih hian a nu kha hmu ve hrim hrim ang"
"Mafela fanu ve tho a nia, Bawihtei an hmuh ve zawk chu inphal thei mai lo mi?" ka ngaihbel nge a inthlahrung dukin ka hria. Bawihtei thawmhnaw ka phelh sak a, a awmdan ka en ru zeuh zeuh. Muangchang hian a inthlak ve a, min en ţha ngam lo a ni ber. Thawmhnaw dang ka haktir hnu ah "Ipi ten an ngai tawh che a, zuk hmu lawk rawh" ka ti a, a phur phian.
"Apite bulah ka riak dawn" a ti a, a tlan nal nal. Hmaituam chanchin a ngaithla leh dawn anih hmel.


"Lo ţhu ve phawt rawh" ka bula hmun awl lai ka kawk a, inbiak loh reng kha a ninawm ve hrim hrim. Min hnaih vak lovin a rawn ţhu a, keimah zawkin ka ţhut hnaih.
"Mafela berin a duh lova, a pa berin a duh loh chuan midangin thu an nei thei hleinem. Mafela nen kan inhmuh khan a sawichiang vek a, khami ni khan hmu miah lo mahla min hnawl dawn tho tho. Keini aia a nu leh a hma hun tur a thlan zawk thu thlengin min hrilh. Nang chuan i hma hun chhe vek tur pawiti miah lovin mualpho huamin min tuam hlawm a, Bawihtei pa nih i phu daih zawk" a ban la kangin ka darah ka dah a, keimah ka tih loh chuan tun dinhmunah hi chuan a thu in min kuah miah lovang.


"Tunah chuan kan tello in a hlawhtling tawh a, a duhthlanna siamah a inchhir lo. Chutiang bawkin keipawh ka inchhir lo. Ka nei che hi ka inchhir lova, ka damchhungin ka inchhir lovang. Sawn pai zahtlak loh ka nih lai pawn zah tak chungin min dawm kang a, nangmah vangin ka mawi a, hmeichhe khawlo zet hming pu a mualpho tur kha i zarah mi zah ka kai a, i chhungte lah an felin fa ang tak takin min en a, ka tan chuan hetiang bak a awm chuang lo" tih malh malh pahin a kutţang ka khal a, siamţhat theih tawh loh thil vanga nupa inkara innghir ngho na awm reng kha ka peih lo. A hahthlak emai.


"Min ngaidam thei tawh tihna mi?" a ti ve sup. Kan inbiak ţhat loh lai khan nuam a ti bik lo tih ka hria. Lang vutin min ngaihsak ngam lo mahse a rukin min ngaihsak reng tho a, inngaihtuah fimna hun min pe niin ka hre ber.


"Aw tehreng mai. Hun kal tawh ania, bakah ka sawi tawh ang khan Mafela kha hmulo mahla min hnawl a tum tho tho. Hun kal tawh vanga kan nupa inkar a chhiat chuan kan in hmangaih miah lo tihna a ni dawn a sin. Nupa buaina tawk lo an awm lova, tumah an hlim reng thei lo. Kan tihsual te kan inngaihdam tawn a, kan ţanrual tlat hian kan inzawmna a nghet lehzual zawk. Naupangchhia tak ang a awmin ka be duhlo mai mai tawh miah lovang che" nui sangin ka melh a, a thil tih sual aiin a thil tih ţhat a tam zawk. Bawihtei hma hun eng tak siam sak tu a ni a, damchhunga vawn tlat ka duh.


"Min biak duhloh khan a hrehawm emai thil sual ka ti ngam tawh lovang. Ka tar bawih hmanin i hria em?"
"I ti mah mah emai. Hrehawm iti tawk lo aniang i thau sawt zawk"
"Min hrem nan khum hnuaiah min muttir em lova a zia"
"A lehpekah chuan khum hnuaiah i mu tawh ang" kan nupa a kan nuihdun leh theih tak hnu chuan boruak rit luk ţhin pawh a kiang ta huai. Ka tih chawp ngai lovin a ma thu ngeiin min kuah tawh a, ka lo ngaih tawh zia ka inhrechhuak.


"Mafela hi a sual lo a, nangni aia a hma hun a thlan chhan pawh hi rindan ka nei. A pian hlim aţangin ama pualin engmah a nei ngai lova, a nutei a nu tak tak a nilo tih a hriat hnu phei kha chuan amahah nghawng a nei lehzual dawn a, midangin an thil neih hmang a duh duh na lama an hruai kawi a duh tawh loh vangin hlawhtlin a duh tihna a ni mai. A pual a eizawnna neih a duh a, midang tihbuai theih loh a mahni ke a din a duh ve a, tun hnu a ka ngaihtuah hian demna ka nei lo" a ti a, keipawn ka dem lo. A ţha lam zawng chiah a ngaihtuah ka tum. Min lo hnawl lo ta sela pasal leh chhungte rilru ţha tak tak ka nei miah lovang. He inchhung a ka mo theih nachhan hi Mafela vang a ni pakhat a, min lo hnawl kha a tirah na viau mahse tun hnu hi chuan a lawmawm letling tawh zawk.


"Mafela chu kan lamah a ţang a, a nu hian ala hrelo mai mai aniang. Tum eng ang mahse eng thil mah a ti thei lovang. Mafela ka hrilh lawk ang a, naktuk chawhma lam chu i buai dawn loh chuan anu chu hmu ve reng reng ang" ka sawm tel kher chhan hi chu kan nupa inkarah inhriatthiam lohna awm tawh lo se ka duh vang a ni. Kan inkar a tawp tawh tih hre reng mahse ka bialpa hlui anih miau vangin a nu pawh tel se keimaha ka hmuh chuan ngaihţhat lohna a nei ru reng dawn tho tho. Thuruk hi awm miah lo se kan inkar a ţha ang a kan hlim a ni mai.


"Buaina ka ti punlun mai mai zawk lo maw?"
"Teuhlo mai. Inthlahrung duh suh. Kan pahnih ngeiin hmu ve tawh ang. A mal mal a hmuh reng bikin awmzia a nei lo. Kan ţanrual zia hreve reng reng rawh se" ka ti ve hmak tawh. Kan buaina hi midang hriat ve atan phei chuan a zahthlak a, lo hre tase a nghawng nasat ber tur chu Bawihtei leh kei kan ni. Chuvang chuan a rang lam a chinfel theih ka duh ber.
"Kan kal dawn nia" a ti ve ta nge nge. Ka sawm chuan min lo hnar ka ring lo reng a, min hnar ngai lo tu ka neih awmchhun a ni ve miau a.



"Ka inrawlh dawn lo. Court ah pawh kal la i lam ka ţan loh chuan hnehna i chang thei lovang. Ka hrilh nasat tawh che kha ka nu, beidawng tawh mai rawh" kan pali in kan ţhu ran. Kan nupa in an in ngeiah kan lenchilh a, thinrim angin kan awm duh lo. Puitling vek kan ni a, pangngai tak a indawr hi a ţha ber. Jimmy phei chu ala ţawng ve lo hrim hrim. Tel ve na nei a a inhriat miau vangin a inrawlh tam loh tur thu a sawi lawk vek.



"Kan thil hloh tawh neih let nan hian kum tam kan bei a, keipawn harsa takin ka fapa ka nei let a, ka tunu tello chuan kan chhungkua kan la kim lo. A duh reng vang a hnawl cheu a ni lova, tunah hian Lalrinfela hian engpawh sawi se i hlimna a duh vang chauhin a sawi ang. A thinlung tak chuan a fanu innel tir a, a kiang a reilote tal awm ve a duh. Chu chu a nu ka nih ang hian ka hrechiang" a ti mauh mai si. Keini chuan mualpho kher lova chhungkua a sawifel mai kan han duh nen.


"Tlang deuhin ka hrilh tawh. Mi mo ani tawh a, buaina thlensak ţalh suh. Iduh ber keimah i hnenah ka awm tawh a, i duh apiang ka tihsak thei che. Mi fanu laksak tum ţalh suh. Iti lui zel dawn anih chuan ka nu ini thei tawh lovang" Mafela ber chuan kan hmai a zah zo tawh lo. A nu sawi ang a min hmangaih vang leh ka hlimna tur chiah a ti nge anih a, a duhlo ve hrim hrim ka hrethiam neih nuaih tawh lo.


"Ka pi, Bawihtei hi duhthlang thei rual a ni tawh a, kan lokal leh hunah kan lo hruai ang. In hnen a a awm duh leh duh loh chu aman thlang rawh se. Thil tisual tu chu keimahni a nu leh pate hi kan nia, naupang lehzel chu hnuk lut tawh lo ang u. A puitlin hun thlengin a nghawng thei a, in hnen a awm a duhlo anih chuan min rawn chhuh luih tum lo la" ka ti ta tawp. Keini lo chu a thlang dawn chuang lo. Beidawng tur a ka duh vang zawk a ni.


"Chutianga intih a ngai lo. Ka hming hi lang suh se. In pahnih a fa ania, chutiang chuan miin hrereng rawh se. Ka hming hi engahmah tarlang lo ula tupawh kan fihlim a ni mai" tiin Mafela chuan min rawn hnial a, a nu erawhin min hnungchhawn tlat.
"Chu chu i duh dan maw?"
"Ni e. Ka sawi ang chuan ti rawh u. Ka phalna thlap lo chuan ka nu hian a rawn tibuai tawh lovang che u. Ka nu hian a rawn tibuai leh cheu anih chuan ka tel ve tih hria ula keimah zawk min dem dawn nia. Kan rawn chuhpui lovang che u" a ti a, ka mitah tak min enin a nui a, mahse a nui lui tih ka hria. Hlim hmel put tum chungin a hlim tak tak chuang lo. A ni vang nge Bawihtei vang hrelo mah ila a mit a ka en ve khan natna ka hmu tel. A mitmeng a nung sarh lo reng reng. Kan inkawp rei a, a danglamna chhe te hi ka lo hmu chat thei.


"Mafela kha a hlim loh hmel iti ve em?" kan haw kawngah Jimmy hnenah ka zawt. Kan boruak heti nuaih a ni chung hian ţha deuh a inthlah theih tal ka duh nen.
"Aw nakinah a nu awm loh hunah a chhan ila zawt dawn nia"
"Mafela ka hmuh hian i ngaih a ţha lo miah lo mi?"
"Ka ring che" ka malchunga ka kut dah a rawn vuan a, a thik tawh lo a ni maithei.
"Mipa dang hnenah min kalsan dawn lo tih ka hria. Nupa kan ni tawh a, inrin tawnna a pawimawh. Min rin ang chiah hian keipawn ka ring che. A na a i hriat chuan hnem la, hman a ţhian ang a min kawm ang chiah khan Mafela hi kawm ve rawh. In inhuat zui zel chuan ka tan a nuam lo tial tial ang"
"Kha thil bawk kha i ngaihtuah anih chuan ngaihtuah tawh suh. Kha vang kha a ni lo. Nuam lo tih phah tawh lo la, Mafela pawh nangmah zawkin hmu rawh. Hman a min kawm ţhin ang chiah khan kawm ve zawk la, a nu bak a nei tawh lova, nunthar pe thei tu chu nangmah zawk. Kei nen chuan anih tur ang ang kan ni tawh a, kan in haw zui lovang. In pahnih hian sawifel tur innei zawkin ka hria" ka ti a, keimah vanga na a nih loh chuan a ţha a nimai.


Zan reiah ka muhil ka harh hlawl. Ka dap kual a, keimah chauhin ka lo mu. Ka meng a, kan pindan chhungah thla eng rawn lut ka hmu a, mut dawnah parda ka khar phui vek sia. Peih lo deuh chungin ka ţhuchhuak a, tukverh bula ka pasal ding reng ka hmu ta chiah.


"I muhil thei nange?" a bulah dingin ka kuah a, vawiin thil thleng bawk kha a ngaihtuah let a ni maithei. A thiam loh a nih loh thu sawi mah ila a inthiam lohna a reh thei chuang lo.
"Ka harh ve chiah. Khua a var ţep tawh tho a, ka nghak tlang law law ang ka tia, va mu leh rawh ala hma"
"Ka awih lo. I rilru a nuam lo aniang. Keini chuan engmah kan hre tawh lova, kan ngaihtuah zui tawh lo. Nangmah ber hian ngaihtuah zui loh tum tawh rawh" tiin ka hrilh nawn leh. Mafela hmu sela, thil thleng zawng zawng te sawidun sela tun ai hian a zia zawk ka ring.


"Min ngaihdam chuan engkim a ţhat vek ka lo ring a, mahse Mafela te nufa ka hmuh khan ka inthiam lohna ngai bawk a rawn let leh. Ngaihdam dil hi tlawm thlakah i ngai em?"
"Teuh lo mai. Kan huaisen zia kan lantir na zawk alawm. A tlawm thlak loh. Ngaihdam kan dil hian kan tlawm tihna a ni lo" ka lo ti vat. Ka hnenah chiah ngaihdam ala dil a, a thil ngaihtuah ka hriat pui.


"A ţhat chu. Ngaihdam ka dil rual hian engkim a ngaiah let ve thei se a ţha tur. Ka thlah phal miah lo chung che hian i duhthlanna kha lo zahsak tur che ka nia"
"Sawi tawh suh. Nangmah ka thlang che. Piang nawn leh mah ila ka thlang tho ang che. Ka hrilh ang che khan ti la i rilru a nuam ve huai mai ang" ti a ka hnem mawlh mawlh lai chuan min kuah a, a mamawh lai tak a nih vangin ka lo kuah let ve vat. Keipawh Mafela thusawi ka hriat khan ka rilru a nuam huai a, keimah ang chiah a nih ve ngei ka beisei. A inchhir takzet a, ngaidam theilo tur khawpin kan fel bik lo. A thil lo tih tawh avanga mawhphurhna ala ngam hi huaisen ka ti em em zawk. Ka tluk lo takzet. Mafela te nufa a hmuh zawh hunah thlamuang taka a mut ve theih tawh ngei ka beisei.



CONT

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 15548
Joined: April 30th, 2016, 4:07 pm

Unread post by Ngaia » November 15th, 2020, 11:10 am

CHOICES-LAST



JIMMY


"Ka rawn tibuai che em?"
"Ti buai love, lo ţhu rawh" Mafela hmu turin ka kal. He thil hi ka tih loh chuan inthiamlohna hian min ei zo takngial dawn. Beisei loh deuhin a ni pawn min lo dawngsawng ţha a, ţhat chhuah miah lo se ka inthiamlohna hi a nep zawk ang.


"Inu eng nge a an tawh?"
"A ţha, ka hrilhfiah ve nasa a, ka sen laia ka nutei te nupa in min lak daih vang hian Bawihtei pawh hi min laksakah a ngai tlat a, sawi leh sawi hnu a ruihhlo lo tih nasat ţhin vang khan tlemin a buai deuh a, a fa an chhuhsak lehzel nen, in hriatthiam ka beisei" a ti a, rilru lam buaina a neih ka lo hre lova, ka khawngaih khawp mai.


"I hriatna a rei tawh em?"
"La rei lo. Fing deuhah ka ngai char char ţhin a, Bawihtei la let tur a min nawr nasat lai pawn a rilru buai vang a ni ang tih rin ngaihna ka hre lo. Mahse tun hnai deuh aţang khan mahni a phun bul bul te a hrat a, ka hming a lam reng a, a rukin doctor ka bia a, kan enkawl mek. A nasat vak loh vangin ka lo hre lo aniang. Tunah a nasat tak deuh hnu hian ka hreve chauh"
"Ava zia lo ve. A enkawl ţhat leh theih dawn em?"
"Ka hre lo le. Theihtawp kan chhuah ang a, a ţha leh turah beisei phawt ila, zahthlak viau mahse i chhungte pawh lo hrilh la, ka hriat loh hlan a phone kaltlang a a rawn vau pawn lo hrethiam hram hram rawh se" a ti a, thupha chawi tur zawk kan nih laiin min khalh leh tawh.


"Kan thiam loh zawk ania, bul ţan tu ka nia, ngaihdam dil tur che in ka lokal. Min ngaihdam hma chu rilru nuamin ka awm dawn lo" thutak zet a ka tih laiin min lo nuih liam mai.
"Thiam lohna inei lo. Ka hlawhtlin duh lutuk khan khua ka hmu lo a, Zodini leh a naupai lai ai chuan ka hausak hun tur mawlh kha ka ngaihtuah nasa zawk. Thudik tak ka sawi, nei lo la chuan tun thlengin sawn pawm a la ni reng ang. A hma zawng khan hlawhtlin ka duh vangin nupui nei hman ka inti lova, tunah lah ka nu vang hian nupui ka la neih theih rih loh hmel bawk a, thiam lohna inei ve lo. Bul ţan tu chu Zodini leh keimah zawk kan nia, dem tur ber pawh keini tho. Kan tihsual vangin tam takin in tuar ve zawk anih hi" a ti a, a thulak dan chu mak ka ti letling.


"Kha thil kha min hrilh lo mahla Zodini leh a fanu kha ka hnawl tho ang. Khatih hunlai khan fa ka duh lo. Ka tih theih loh min tihsak tu zawk inia, ngaihdam min dil tawh suh"
"Ngatinge?" ti a ka zawh lai chuan hrethiam lo tih hriat zet hian min lo en.
"A duhawm tehreng nen ngatinge Bawihtei hi i duh loh? Tunah phei chuan min tihlim tu ber a ni tawh"
"Ka sawi tawh kha. Thildang ngaihtuah hman ka ni lo. Nang angin eng ro mah ka pian pui ve lo. I pianhma aţangin nang chu ipi leh pute, inu leh paten i eizawnna tur an lo dinsak diam tawh che. Keichu ka ni lo. Keimaha ka din chawp a ngai a, engmah ka pian pui ve lo. Khawvel hi a chang chuan fair lo ka ti ve ţhin. Hausa an hausa em em a, rethei an rethei tlawk tlawk a, Pathian awm rinloh rum rum chang te ka nei. Ka nu leh pate ang a ka ngaih kha ka nu leh pate ni lovin ka nu hnawtbo tu zawk an ni tih ka hre leh ta zel a, khatiang nuaih ka nih lai khan Zodini lahin a rai thu min lo hrilh veleh a, ka hriat hlim khan ka thinrim takzet. Min tibuai belh tu ah ka ngai a, ka hnawl ta reng a nih kha. Nunrawng min ti maithei, mahse khatianga ti lo theilo dinhmunah khan ka ding ka inti ve tlat. Ka nu khawlaiah a awm a, ka nutei te an hausa thur thur a, phaiah ka kal a, ka nu awmna tur ka ngaihtuah sak a, ka nutei te pawisa ka dil reng bawk. Ka hmang hnem ţhin lutuk kha an ngaihdan a nilo lek lek ţhin. Ka nu ka thukru tlat a, an hriat chuan pawisa min thawn duh tawh dawn si lova, a rukin ka pui. In luahman a to si, ka zirna ah hman a ngai ve reng bawk. Vei vah man to zia pawh i hriat kha. Ka nu lahin nitin a min hmuh a duh a, a hriat loh a ka bo leh daih a hlau" a nui hawk a, tukverh lam hawiin pawn langthei chin a thlir vang vang. Uluk deuhin ka ngaithla a, ţhenkhat hi chuan nun hi a sualin an lo sual takmeuh anih dawn hi.


"Nitin pawisa hmanralna tur a awm reng a, ka nu eichak zawng apiang leisak ka duh bawk nen, pawisa a chhuak char char. Inhlawhna ka zawng pah reng ţhin a, lehkhazir pah a thawh theih awm ang ang ka thawk ţhin. Jim nang ang hian mi zawng zawng an vannei vek lo. Inu hi khawlaiah awm ta se i bialnu aia i thlan ve tho ka ring. Khatih hunlai khan Zodini leh naute buaipui thei dinhmunah ka ding lo. Ka nu nen a kan eitur ka hmu ţawk ţawk a, min enkawl seilian tu mah nise ka nutei te nupa ka rin tawh miau loh vangin an kutah Zodini te nufa awmtir ka duh lo phawt. Engkim diktakin ka hrilh che a, min dem leh dem loh chu i thu thu. Keichuan min puitu ah ka ngai che. Zodini leh ka fanu nuamsa takin insiam a, ka fanu induat zia lah ka hrechiang. In kianga a awm hian ka thlamuang a, hetiang hian nakin thlengin lo hmangaih reng rawh u" reitak chhung chu kan ngawi dun reng. Ţawngsual ka hlauh vangin ngawih ka chuh a, Zodini hi ala hmangaih reng angah ka ngai thung.



"Ka nu in min nawr nasat em vangin a tirah khan ka haw dawn dawn che a, beih let che a tihchhiat che ka duh rum rum hman. Tum nei ranin in dawrah ngei ka rawn hmu che a, ka rilru hi a dawih nge ka hrelo engmah ka puitlin tak tak ngam lo. Bawihtei i endan ka hmuh phei kha chuan tluk lo che ka inti letling zawk. Ka hmeichhe hmangaih ber fa pawh nise mipa dang lak aţanga a fa anih chhung chu ka fanu anga ka ngaih theih ka ring lo. A rukin ka enthla cheu a, ka rilru a nem tial tial. A tawpah phei chuan ka nu in min nawrchhuak zo tawh lo. Zodini ka hmu a, a hmangaih zia che leh ţhen che a tum lohzia ka hmuh thiam hnu phei chuan ka nu khap tu zawkah ka ţang tawh. Mihring hi ţhatna in a lo inhneh theih khawp mai. I ţhat lohna lam zawk min hmuh tir reng la chu a tawp rat thleng a nawrin ka bei let ang che. Mahse chutiang rilru chu ka pu tawh lo. Min vengthawng duh tawh suh u. Ka ngaihdamna che i hre duh tlat anih leh ka ngaidam che. Rilru nuam deuhin lo awm tawh rawh" a ti thei tawh a, thil ţha ka tih hrelo mah ila min ngaihdam phawt chuan ka lawm tawk.


"I puitling tawh bik khawp mai" ka ti a, ka nui hmel a hmuh chuan a nui ve suk.
"A hun ve tawh a, hman aţang khan nangpawh ka rin aiin i puitling. Nupui neih hi puitlinna a nih vang nge kei aiin i puitling fe mai. I kum a naupang zawk lehnghal" a ti hluai a, kan boruak a zangkhai ta deuh.
"Puitlin tak tak a har anih hi. Nangpawh i tuarchhuak ve ţep tawh lawm. Inu a dam anga, hma i sawn chho char char mai ang"
"Nia, dam se ka hnaihah awm char char thei sela ka duh ber. A dam hunah a lawm nan chaw eikhawm te kan la nei zawk ang chu" phur awm tak hian a ti a, a phur tak tak em phei chu ka hre lo. Nuam ka tih nan a sawi mai mai pawh a ni thei.


Ka haw tur pawh min thlah thlap a, khang thil zawng zawng ka hnen a a sawi nachhan kha hrelo mah ila rindan ka nei thiam. A nu a damlo mek a, a rilru tawt inbunruah nan min hmang ve a ni maithei. Inhuatna em em kan nei hran lova, kan inbe tam lo tih a ni mai. Min ring ngam a, a thil paltlang leh a rilru kap tu te hrilh ve tlak a min ngaih chuan ka tan pawh a lawmawmin a ţha a ni mai. A nu erawh chu a natna ka tihzual phah zawk ka hlauh vangin ka hmu lui duh ta lo.


A remchan vangin ka ţhianpa Hruaia te inah ka peng kawi a, Zodini bia in ka hrilh thlap. Kan inhmu khat em a, ka kal remchan a ka penkawi ţhin hi a ni mai. Inleng an lo ngah lehpek khawp. Anni hi chu an ri luih luih reng ţhin hrim hrim.


Min hmuh chuan min lo lawm der thiam hlawp khawp. Ţhian ho chaw eikhawm an buatsaih a lo ni. Tum loh deuhin college kan kal laia min ngaizawng ve ţhin tu Ruthi ka hmu nawlh. Ka hmuh lohna a rei tawh vangin ka hrenghal mai lova, a sam a zuah sei tawhin amah hrim hrim cher lovin a khal deuh tawh a, a hmai a lo hnawih ve deuh tawh bawk nen, a insawi hnu chuan ka hrechhuak hma leh si khawp mai.


Tui ka in a, an eitur dah ruih chu tlem ka ei ve. Hruaia hnen a kal lehnghal mai ka duh thu ka sawi laiin Ruthi bawk chuan min rawn chelh. Ka banah vuanin "Thil hrilh tur che ka nei. A pawimawh sia, a rei lo ang" a tih takah chuan kan kal hrang a, a hmelah a ruih leh ruih loh hrethei lo mah ila a rim a dik tawh lo. A rui tawhah ka ngai hmiah.


"Nupui i nei niin ka lo hria a, ka pa an sawn kual reng sia, kan pem kual nasa ţhin sia, ţhianten min rawn hrilh a" pastor fanu a ni tak e. Ka pa loh vang ni lovin min din hnaih lutuk dawn chuan ka tawlh leh hrut zel. In hriatthiam lohna awm ţhin engpawh hi pumpelh vek ka duh. Ho te ang a kan ngaih pawh nupuite bulah chuan thui deuh a sawifiah a ngai.


"Nei e. An lo kal nual a, kan han lawm nasat nen i chan nasa duai duai hle mai" ka tih fiamthu laiin a tum bar.
"I nupui neih naah ka kal chak vak iring a mi? Kan awmloh hnu khan facebook leh IG velah ka zawng vak zel che. Ka hmu ngai miah lo che"
"Whatsapp chiah ka nei"
"Chuvang anih chu. Hmuhchak man i awm lo emai" a ti zui nang nang. A hmuhchak ve ngawt nachhan tur ka awm lo zawk.


"Fa engzat nge inneih tawh?"
"Pahnih kannei ţep"
"A rai mek tihna?" ka lo bu nghat. A hma aiin a nalh tawh zawk a, chu chu a hreve nge thawmhnaw a thlang uluk lo sawt. A pian langchiang thei tur ang apiang a thlang ni awm tak a ni. Tlangval tan chuan a itawm khawp ang.
"I nupui chu a vannei e, pathlawi te itum hnai em?" nui har har chung hian a ti a, min hnaih lui zel lehnghal.
"Tum nang, pathlawi ka hlauh nak lai a"
"I nupui ngawr ngawr a ni maw?"
"Aw ni deuh mai. Ka fate nen, ka kal mai ang tui deuhin lo ei rawh u" ka ti a, kal ka tum laiin ka phone a ri ral ral. Ka ding leh zawk a, Ruthi pawn min rawn hnawih chawpchilh leh tawh. Tunah phei chuan min uai a ni ber. Zodini a lo ni a, chawhnu lamah ka chhuak chauh a, a haw tawh a ni maithei.


"I haw tawh mi?" ti a ka zawh laiin Ruthi lah chuan "Tunge? Innu mi?" a rawn ti ve sek.
"Apa lo haw tawh rawh" Bawihtei zawk a lo ni. Ka thawveng ve hawk.
"E..aw Bawihte ka rawn haw ţep. Inu lo haw na a rei tawh em?"
"I fanu zawk a ni maw?" Ruthi chu ka nemsawn a, tlemin ka hlat. Thir hipthei kan pai ve ve emaw tih mai turin min rawn hnaih leh tho.



ZODINI


"Ka haw chiah a kan rawn bia che? Khawnge i awm a? Nupui rai lai leh fanu nei chungin tunge i awmpui a? Lo haw vat rawh Bawihtei bual a ngai, ka mu tawp dawn rawn ti vek rawh" ka ti buan buan. Bawihtein a call tirh aţang khan speaker ah kan dah a, ri luih luih leh hmeichhe rawn ţawng ve sek kha ka hre hman ve vek.


"Ruthi anih kha. College kan kalpui ţhin kha. Ka rawn haw ang. I nuam lo mi?" ngaihţhat loh hmel fe hian a rawn ti a, Ruthi ani tih ka hriat phei chuan ka ngaih a ţha lo lehzual. Pastor fanu ve si pawisak nei miah lo chi a nia, zaktheilo deuh. Kan kum a upat ve deuh tawh hnu pawh hian a la danglam ka ring lo.
"Nuam lo. Ka pumna a reh thei lo a ka buai anih hi. Chawhnu lamah i kal chauh a, Bawihtei hi hruai ve ta che" ka ti ram hmak. Ka thik tih a hre leh tawp nang.
"Ka rawn haw nghal" a tawp zui hmiah. Ka pum ka sawilan tawh chuan a rawn haw khawp ang. Ka naupai a ţhalo ang tih hlau reng rengin lawm a awm. Ka inthlak sawk sawk a, ka mu hmak. Ka bulah Bawihtei a rawn mu ve a, chaw ei hmaa a mutthilh leh ka hlauh vangin api hnen a kal turin ka tir a, keimahin ka mu bal. Phone ka en a, facebook aţangin Ruthi chu ka zawngţha leh ta vel. Hming a intlar thla duat a, tuber nge ka hre lo. A ţhiannu ber nen hian kan inbe ţhin a, chuta ţang chuan ka zawng. Ruthi tih hrim hrim ka en tawp a, a tawpah ka hmu ta chiah. A taksa langkim veka a lak a dah deuh ber a, a nalh tawh khawp mai. Mawng a nei ve tawh a, a dul a thepin a nalh zaih mai. Min ti hlauthawng ve ţep.


"A la na em?" khumah rawn ţhu in ka lu a rawn dawm a, ka lo muhil hman lek lek.
"Na e iva rei ve"
"Ka rawn haw tlang. Reilote traffic jam ah ka tang a, a natna a rei tawh em? Ka nute i lo hrilh lo mi?"
"Hetiang pumna satliahah ka tibuai hreh alawm. A na char char, na vaklo mahse awm ti nuam lo tawk vel" ke hlang lovin a rawn mu ve a, ka puan sinlai zen in ka pum a rawn khawih.


"Damdawi ei a chi rih awm si lova, a hrehawm viau em?" min ngaihtuah zet hian a ti a, dim te in ka pum a chul pah.
"A zia tawh. Naupai chuan na kan ngah alawm. Tun ţum phei chu Bawihtei ka pai laia na ngailo kha a na reng a, nang lah i leng mai mai a" lungawi chiah lo hian ka la ti tho.


"Hruaia te inah ka kal kawi a, chaw eikhawm an tum aniang an phe suau suau. Ruthi ka hmu a, kan inhmu khat sia kan ti ti a" a ti a, inthiamlohna pawh a nei lo. Ka thikthu a chhe ngai lova ka thik a ring lo ang ka tih tawh kha. Mahse Ruthi chu a dan a dang. A zahloh lutuk na hian min ti hlauthawng.
"Phone number te a dil che em?"
"Aw ka pe lo"
"Nupui ineih a hre lo mi?"
"Hria e"
"Ivan mawl tak" ka ti hluk. Tawlh hlat ka tum a, min kuah bet tlat.


"Ala ngaizawng reng che aniang chu. A chhelo tawh ropui si. I mit ala tawh ngawt lo maw?" fiamthu titak deuh hian ka ti a, naupang ang maia awm chu ka zak ve deuh tawh.
"Lak pawh ka hre lo. Ka mitah chuan i chhelo ber"
"Vel che hian. Ka awih iring a mawnle?"
"Ring e. Nang ang a chhelo ka la hmu lo. I nuih pawn, i ţah lai pawn, tun anga i tum bur pawh hian ka mitah chuan i ţha vek" a ti vel luam a, hetiang hian vawikhatmah ala sawi ngailoh vangin amah a ang lo zawk.


"Zu i in a nilo maw?" ka ti ta ringawt. A thusawi nen a inrem ve hlawl lo tlat a.
"In lo. Ruthi kha i thik chuan thik tawh suh. Ka invawng a, ka inthunun thei a, hmeichhe dangin min thlem thlu zo lo sa. Ka hmaah inphelh kung kung mahse nangmah chiah ka ngaihtuah tho ang che. An saruak ai chuan hetianga i intuam hlun pawh hian imawi daih zawk" a tih chuan ka lo nui hak.
"Ngawi tawh teh i sawithui mah mah tawh"
"Nau i pai a i pum a puar deuh te hian a nalh fe. Khawi enchhin ang" tih pah a ka puan sinlai a hlim chuan nui vak chung hian ka tawlh dawrh a, hmanhmawh tawkin ka tho zui bawk.


"I pum a na tak tak nange?" a tih chuan ka insiamţha vat vat. A ngai ang chiahin ka mu leh.
"Na e. A nat lai laiin min tibuai miau alawm. Ka lo inven ve bawk lohin" thinrim ang deuh a lang chung hian ka ti a, a awih veleh mai. A hma ang bawkin ka pum min chulsak leh a, in a a awm ve hi chuan a nuam mawle.


"Hmeichhia hi chu kan lang upa hma sia, fa ka neih leh phei chuan nang aiin ka lang upa anga, nau ka pawm phei chuan ka cher chhe thei ropui si. Min la hmangaih tho angem?" en kal chungin ka zawt. Ka pum khawih tawh lovin ka kut ala a, a fawp zui zat.
"Tehreng mai. I landan ringawt ka hmangaih lo. Nangmah inih chhung chu ka hmangaih ang che. Min mamawh changin ka awm reng ang a, buaipui i ngaihin ka buaipui che ang a, engtikah mah i kut ka thlah lovang. Chhe ber anga i inngaih lai pawn ka mitah chuan i ţha ber reng tho ang" a tih chuan ka kuah a, ka vannei takzet. Min hmangaih tak tak tu ka tawng hi ka vannei. Duhthlanna ka siam sual lohzia ka inhrechiang lehzual zel. Nitin ka hre thar reng a ni mah zawk.


"Keipawn ka hmangaih reng ang che. Engpawh tawk la ka thlah bik lovang che. Min hmangaihna hi nasa viauin i hre maithei. Ka hmangaihna che hi teh ve chiah ila nang aia a san loh pawn a inchen vel ang. Ka hmangaih takzet che" ka ti a, ka rilru diktak ka sawilang hreh tawh bik lo.


Bawihtei rawn tlan lutin kan inkarah a rawn inzep ve chawih chawih a, Jimmy chuan lo kawkin "Hei te chian hian min ţhen hrang thei rih anih hi" a ti fiamthu a.
"Kan taksa chiah a lawm a ţhen hran" ka lo ti ve vat. Bawihtei chu kan chhaih fiam a, hlim takin a nui ve har har reng.


Hmeichhia ten kan duhthusam ber chu chhungkaw hlim tak neih a ni. Pasal fel tak neih a, mite awh tham chhungkaw duhawm din kan duh ţhin. Chutiang chu keichuan ka nei tawh. Ka hmeichhiat pui dangte pawh nei ve turin ka duh. A nawmzia hre ve turin ka duh. Hetiang nei tur hian bulţan ţhat kher angai lova, tlai luat a awm lo. Keipawh ka bulţan na a ţha lo. Sawn pai ve mai ka ni a, ka indawmkun reng lo. Ka natna kha reitak inhneh tir lovin ka dakchhuak a, tlu mah ila harsa chung chungin ka tho leh a, ka natna ngaia tlunawn lovin duhthlanna diktak ka siam ta zawk a.

Bulţan ţha a duhthlanna dikzawk siam leh tur hian tumah kan la tlai lo. Kan hmahun hun tam tak chu keimahni ah a in nghat a, a ţhat leh ţhat loh chu kan duhthlanna ah a innghat. Lo tlu tawh mah ula, mite nuihzat leh diriam tawk tawh mah ula a hma aia chak leh huaisen zawkin tho leh ula duhthlanna diktak siam tum tawh rawh u. Hmeichhe hmasawn tum hi engmahin a dang thei lo. Beiseina nen hmalam in pan ţang ţang dawn nia.


END( CHOICES min chhiarsak a, like leh comment min pek ţhin vangin ka lawm e 😇)


*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

Post Reply
  • Similar Topics
    Replies
    Views
    Last post

Who is online

Users browsing this forum: No registered users and 11 guests