ZOTHANTLUANGA by Amy Cck (Completed)

Moderator: writers

Ngaia
Site Admin
Posts: 17219
Joined: April 30th, 2016, 4:07 pm

Re: ZOTHANTLUANGA by Amy Cck (Completed)

Unread post by Ngaia » May 2nd, 2021, 3:30 pm

LAST CHAPTER - 41 💮 by Amy Cck




" Nangni maw? He... Hetah enge in rawn tih? " Room chhung lam a ding chuan a rawn ti bah nawk a. A hmel atang chuan min hmu deuh thut chu mak a ti ve tho a nih hmel. Chuan kei pawn mak ka ti, Remkimi bulah hian Puipuii chu a awm tihna em ni?





" Kan fanu i bulah a awm niin an sawi a! " Zothana chuan a ti hmuk a. Kei erawh in sawi ve ngaihna pawh ka hre lo. Room chhung lam a reh duk bawk sia. Puipuii chu awm se kan tawng ri hria hian a rawn in lan ngei tawh ang.




" Eng thu awm ze nei lo nge in rawn sawi hi! Tuin nge ti a, in fanu a bo a ka bulah in rawn zawng chu a nia. Mahni fanu pawh enkawl zo lo in fa dang i la pai zui a! " Ti dduh ngat in min rawn melh kher a. Ka in hun ruh nghal nghek.




" Nimin nge nimin piah a hna thawkin hmeichhe naupang a hmuh tih a sawi a lawm! " Kan bul a staff ding chuan a rawn ti a. Remkimi chu a nui hak. A sam a hnawk nia a, a mit meng pawh ka en chian hian a harhfim hlawl lo.




" Nimin maw? A nih chuan nimin chuan ti nge in va hrilh zawk mai loh a. Niminah hetah in hmu a tunah in rawn zawng chauh a. In a a ni zawk lo maw. Min ti buai a nia, kal sawn vat teu! " Ti hlar in kawngka rawn nem khar a tum chu Zothana chuan a vuan nghal vat.




" An hmu an ti miau sia. Ngaihthat nan room chhung chu kan lo en ve hrim hrim ang! " A ti hmuk a. Remkimi chuan a phal loh hmel ngang mai.




" A teuh lo. ka room a nia hahchawlh ka duh. Nang ni hian in buainaah min rawn in hnamhnawih tir tum suh. " A ti fiak that a. Zothana erawh in kawngka chu a vuan ngur thung.



" Police koh buai i duh loh chuan min tih tir mai rawh! " A ti chhur chhur a. Hotel a hnakthawk chu a hawi phawk hra.




" Enge inbuaina! Engvangin nge police chu in koh ang. Tihsual pawh ka nei lo! " Ti that a a rawn khar lui tur in Zothanan a nem let nawk a. A pen lut zui pawk pawk chu a hnung a hotel staff nen chuan kan zui lut a. Room chhung chu a rim chhe tak zet. Zu rim leh meizial rim, rim chi hrang hrang a in pawlh nuk mai.




Remkimi chuan chhuak tur a in ti in a au tuar tuar a. Mi a a ang zawk hial. Zothana lah chuan ngai pawimawh lo in room chungah chuan a thil zawn hmuh tum in a vei kual thuak thuak a. Room pakhat a hawng chuan a ding chawt a. Kan pan ve nghal vat.





" En rih suh! " Zothana bul ka thleng chu room chhung ka hmuh ve hma in ka hmaah a rawn ding hmuk a. Hrilh hai zet in ka melh thung.




" Ngati nge? " Tih leh sir lam atang a room ka melh chu ka khawng awt.




" Ni lo.... Ni lo Bawihte! " Tih leh Zothana chu nem sawn in tlan phei ka rual a. Room pawn atang khan a ke chiah ka hmu mahse ka luh meuh chuan ka tha a khur vek. Puipuii chu khumah a lo mu fel at a nih chu.




" Bawihte! Puipui harh teh! Ka naute, i mit meng teh ka tih chu! I nu ka lo thleng a nia! Lo meng hram teh! " Puipuii chu rem lo zet a kuah in ka ti a. Mahse a che eih lo. A taksa chu a vawt vek a, a khawng ti tih tawh bawk. A mit chu a duk kual raih a. A hmui sen no chek thin te kha a duk vek tawh.




" Ni lo.... Bawihte lo meng teh ka tih chu! Zothan Puipuii hi..... " Ka bulah Zothana a rawn din rual in ka ti chhuak tiau. Ka fanu engmah hre lo chu ka kuah bet tlat a. A taksa vawt leh khawng vek tawh chu thlahlel lutuk in ka kuah a. Kar khat chuang zet kan zawng a, tunah kan hmu ta a. Mahse kan hmuh dan hian lung a dum mawlh lo.




" Remruatpui lo meng rawh! Ka thu i awi loh chuan i lakah ka thinrim tak tak dawn nia! " Ka ti chhuak nghek a. Mahse ka fanu chu ka bulah a mu tlawn zar a. Ka tawng erawh a hre ve tawh ang pawn a awm lo. Kawngka bul a hmeichhe ding zawi ngiai chu ka melh nghek a. Tho lawk in ka pan zui nghal hlak hlak.




" Ka fanu chungah hian engthil nge i tih? Damdawi vang mai mai a tiang a awm saw a ni ti raw! Nang hian ka fanu saw I hrai rui a ni ti raw! " Ka taksa chu sawi nghek in ka ti a. Mi a ang maiin a ding ve reng ringawt. Zothanan min rawn pawh hran rual in chhuatah chuan a thu nawk a. Bawihte mutna lam en chuan a mittui chu a luang ngiai ngiai bawk.




" Ka tihpalh! A ninna lak sak ka tum miah lo a nia. Kei chuan a tap nasa lutuk kha tih reh ka duh mai a lawm!




Tha tak a awm tur kha mi a ang mai a tap in Anu a au vak vak a. Ka beng a ti chhet vek dawn a sin. Rei lo te chhung vhaih ngawih turin ka duh a.! " A rawn tig chuan ka thawk a tawp ni mai hian ka hria. Ka thinlung hi chem a vih sawk ang mai in a na a, ka fanu hlauthawng hmel leh min zawng a a hawi kual ruai tur vel ka mitthla phei chuan ka a lo chauh.




" Naupang te chauh a la ni sin! Eng i lakah tih sual a neih! Ka fanu hian i eng pawi nge a sawi a! " Ka au chhuak nghek a. Ka taksa chu thinrim leh Rilru nat lutuk vang in a puak darh lo chauh.




" Thah ka tum lo la tih chu! Kei chuan tha tak a enkawl ka duh a sin. Ka hmu che a lawm. Damdawiin khan nang leh i pasal thar, chuan i fanu nen hian. Ka awt lutuk che a. I dinhmun a din kha ka chak zia i hre lo ang. Kei pawh nu ni tur in Faka fa kha ka pai a mahse engvang bik nge dam tha tak a rawn chhuak ve mai tur kha ka chan a sin. Faka lah in nang leh puipuii chiah a duh thu cheu a sawi a. Puipuii ka bul a a awm chuan Fakawman min hmangaih leh ka ring a.




Mahse he naupang hi naupang sual leh luhlul tak a ni! Zan pawh min ti mu thei lo. A tap reng a. Kha tiang chuan Tu in nge tuar bik ang! " A rawn ti ve nghek a nih chu. A thu sawi te chu ka hre muai muai. Ka a chhuih a, enge tih tur ber pawh ka hre tawh lo.



Police ho an rawn thlen lai pawh ka hre lo. Puipuii taksa vaqt thler chu ka kuah ngawih ngawih a. Ka tel lo in ni eng emaw zat leh zan tam tak hlau thawng in a awm a. Min zawng a min au ruai tur ka ngaihtuah phei chuan ka thawk a chham hial dawn in ka hria.




Postmortem tur in Bawihtei chu an la a, kan chhungte dang pawh chu an rawn thleng ve zel a. Ka tap nasa lutuk leh thil thleng in min thawng lutuk chu ka awm mawl ve tawp a. Kei leh Emily chu kan tap tawp thei lo.




Kan inah ruang kan la lut a. Mahse ka la phal thei lo. Dam tak a hmuh leh beisei in ka nghak a, mahse kan hmuh meuh chuan tih theih kan nei si a. Ka fanu hi kum naupang te mah nise a nu leh pa in buaina kan ngah em vang hian hun harsa leh khirh tam tak a tawh phah a. Tunah chhungkaw thar a tan ka din sak dawn chiah a. Min kal san leh ta si hi ka tuar thiam lo. Engtin nge a tel lo in khawvel ka hma chhawn ang.




" Ka neih chhun! Ka engkim, ka chakna ber i ni a sin! I tan chuan i nu hian ka nunna pawh hi ka chan phal a sin. A la hun lo e mai Bawihte! " Ka fanu hmai dang bel chu chul in ka tap chhuak hawk.




" Adik lo kal rawh! Hahdam i mamawh a nia! " Emily chuan tah aw tiau hian a rawn ti a. Mahse ka kal sawn phal lo. Tum bak chu ka fanu hi hnai takah ka hmuh thei tawh dawn si lo a. A taksa khawih in ka hmangaih thu pawh ka hrilh thei tawh dawn si lo. Emily pawh chuan tih ngaihna min hre bik lo nge min thut pui leh ta ngawt a.




Tun aia hreawm zawk in hria em? Ka fanu chu a kuang nen thlanmual lam pan in min lak sak a nih chu. Phal lo eng ang mah i la ka thu chu tu man min ngaihthlak sak lo. Zothanan min kuah bet tawp a. Ka tap nasa lutuk leh ka taksa khur nasa lutuk chu zo lo in nikhaw hre lo in ka awm zui hial bawk.




________________________________________________




* ZOTHANTLUANGA POV *



" A la harh lo a mi? " In ka thlen rual in Emily sitting room a lo thu chu pan in ka ti sup. Thlanmual a kal thei lo khawp in ni khua a hre lo nghal a. A bul a awm chu duh viau mah i la pakhat zawk tal thlanmual a kal a, Bawihtei kan zui thlah liam loh chuan dik thei in ka hre si lo a. Emily hnenah lo awmpui tur a tiin kei ka kal a. Puipuii kan vui zawh hnu in hman hmawh zet in ka haw nghal a.



" Aw.... A tuar na viau a niang! A pawi e mai hetiang em em a nih ka ring lo a sin! " Emily pawh chuan a ti hap a. Ka hmai tuai phawk in room lam ka pan a. Khum a ka nupui muhil bam bulah chuan thu in a hmai chu ka chual riak riak a.




Puipuii bo atang in a mu thei lo a, chaw a ei thei hek lo. A taksa in a tuar in a cher dawk bawk a. Tun hi hun rwi tak liam hnu a a muttui ber a la ni hial ang. Engmah hre lo ang mai a mu chu ka thlit ngawih ngawih a. A rawn harh hun a a lungngai hmel leh na tur hmel ka ngaihtuah in hreawm ka lo ti lawk.



*

*

" Bawiha Adiki hi a va rawn tho chhuak har ve va en teh! " Ka nu in a tih avangin room lam pan in ka kal a. Inpui lamah kan let a. A chhan pawh ka nupui hi a pangai thei meuh lo. Puipuii kan chan kha a la na lutuk a. Natna leh chet sual palhna lam ni lo a, kha tiang zawng kher a a boral kha a mah leh a mah a in dem phah a.




Engkawl uluk a ngai bawk nen ka nu leh pa in rawn haw phei ru! I nupui lah nau nei mai thei a ni tawh a. Chet sual palh emaw pawh a aam thei! An tih avangin kei pawn ka hnial ta bik lo. Ka rin phak bak in ka nu leh ka pa in ka nupui an ngaih sak a. A mah zawk hi a la pangai loh em avang hian a vil in kan vil chawt a.




Hna ka chawlh rei tawh avang in hmanni deuh atang khan ka zawm a. Chhunah ka nu in a vil chawt a. Engkimah a buaipui vek a. Tlaiah ka pa office bangin a ei theih takin tiin thei lam leh ei tur tha nau pai tan a tha tur a a ngaih ang chi zawng zawng a rawn lei sak a. Mahse tlem te bak a ei thei lo.




A nui ngai lo a, a tawng ngai hek lo. A awm mawl ve tawp a. Emily a hmuh a piang in tawp thei tawh lo tur ang maiin a tah khum thin a. Puipuii a hriat chhuah tir vang pawh a ni mahna! Emily pawn a hreawm e mai tiin a rawn kal khat phah tawp nghe nghe.




" Bawihte! " Kan room ka luh chu a reh thiap a, khum a lo ruah hiau danah a tho tawh a nih hmel. Bathroom lam a a awm ring in ka pan a. Mahse ka thlen hma chiah in bathroom kawngkaah a rawn lang hlawl mai.




" Zothan.... Ka pum hi a na lutuk! " Seh chilh nak in a rawn ti a. Rang zet in ka pan a. A kap atangin thisen a chhuak tih ka hmuh phei chuan ka hlauthawng lutuk tak zet. A bul ka thlen rual in a rawn awn riai riai a. Na a ti tih a hmelah a hriat ngawih ngawih. A thlan fimin a leih zawih zawih a. A mit chu thei leh thei lo in a meng tawk tawk bawk.




Rang zet in Adiki chu ka pawm a, room atang chuan ka chhuah pui a, ka nu leh pa ka ko zui vat a. Choka atanga ka nu rawn tlan chhuak in ka pa pawh a lehkha chhiarna room atang a rawn chhuak phei a. Kan thawm a ring a ti a ni mahna.




" Ehe.... Enge thleng hi! A tha em? " Ka nu chuan hlauthawng lutuk in a rawn ti chul a. Adiki erawh ni khua a hre tawh lo nge a taksa chu a zawi ngiai a. Ka hlauhthawn zia chu pui tak a ni.




Damdawiin kan thlen rual in doctor leh staff dang ten min lo buaipui vat a. Room a an nawr luh lai te chuan ka mangang leh hlauthawng bawk si chu ka thinphu hi a rawn chhuak mai dawn in ka hre hial. Hetiang fako hian patling, than kin tawh hi a lo mang an theih ang tih ka ring ngai lo.




" Bawiha a tha leh mai ang! " Corridor bang ngheng a ka ding ngur chu a rawn ti sup a. Mahse ka thla a muan phah lo tak zet. Puipuii kan thlah liamna chin pawh a la rei lo a. Tunah ka nupui leh ka fa lo piang tur hi ka chan ang tih ka hlau tak zet.




" U.... Adiki chu an nawt lut a mi? " Emily chuan a rawn ti a. Thaw hawk in lu ka bu nghut a. Kan chhungkua chuan kan nghak thap a. Kawngka a rawn in hawn rual in doctor a rawn pen chhuak a. Kan pan nghal vat.




" Enge ka nupui leh naute din hmun? An tha em? " Ka tih hrawk a. Ka aw chu ka hlauhthawn lutuk vang nge a khur ti tih bawk.




" Tunah rin chuan an dinhmun a tha lem lo khawp mai. Naute hi a ril in a nghawngah a vet tlat mai a. Zai chhuah a ngai ang. Mahse naute nu hian thisen a hloh hnem tawh bakah a din hmun hi a hniam riau a. Kan zai vat a ngai ang! " A rawn tih chuan ka in seh ruh tawlh tawlh.




Doctor chu in zai na buaipui tur in a kal sawn a. Bang chu ka chhir nghek. Ka chhungte pawh chu an ngawi thap a. Emily chu a mittui a tling pam mai.




" Kei mah vang vek a ni? Room ah khan ngaihven tur in lo va kal vat i la hetiang hian a awm lo tur. " Ka hmai tui phawk chuan ka ti chhuak hrawk.




Ka nupui an zai na room pawnah chuan ka vei kual thuak thuak a. Darkar tam fe kan nghah hnu chuan room chhung lam atang naute tap ri a rawn awm a. Ka pen leh tur chiah chu tawp chawt in ka thaw chhuak hawk.




Ka nu leh ka pa, Emily leh Peka , kan vai mai chuan kan hmel a hlauh thawnna kha hlimna in a rawn thlak a. Emily phei chu a tah nui hak. Kei thleng in ka hlauthawng leh rilru pik lutuk chu hnawh kian ang huai a ni.





Room kawngka a rawn in hawn rual in doctor a rawn chhuak a, a hnungah nurse in naute a rawn pawm chhuak bawk. Rang zet in kan pan a. Emily chuan doctor pawh be hmasa lo in nurse kut a tangin naute chu a lo la vat a. A nui nghel ver ver a. Chutiang bawk in midang pawh chu an ri hak mai.




" U... Mipa a nih hi aw.. " Emily chuan nui hak in a rawn ti a. Thaw chhuak hawk in ka nui ve ta suk. Mahse doctor thu rawn sawi avang chuan ka tliak hnawk mai. A sawi kha ka hre sual a maw ka ti hial.




" Eng thu maw I sawi kha? " Ka ti chhuak sup. Ka chhungte ho pawh chu an hawi phawk nghal vek.




" Pawi ka ti lutuk Pu Zothan! Naute nu chu kan chan ta a ni. A thi put kha a tam tawh bakah a reh mai thei lo a. Kan chhan thei ta lo a ni. Pawi ka ti khawp mai! " Doctor chuan a rawn ti nawn leh a nih chu! Ka pai nawk mai. Ka pa leh Peka chuan min rawn chelh vat a. Ka nu leh Emily erawh ka fapa pawm chungin an ding thung.




" Ni lo.... A ni thei lo! A kal ka la phal lo ! Rawn hruai kir leh rawh! Ka nupui kha ka duh let leh! " Doctor chu a dar tawn tawnah vuan in ka thing nghek a. Ka pa leh Peka chuan min rawn pawt hrang vat.




" Pawi ka tih khawp mai! " Doctor chuan ti nawn leh sup a. Chhuatah chuan ka thu hnawk a. Patling mah ni i la ka in sum thei lo. Tap khur ngawt ngawt in chhuat ka melh ngur a. Ka pa chuan ka darah min beng thuk thuk a, min hnem mawlh mawlh a. Emily leh ka nu pawh an tap nghal hawm hawm mai.




Nurse in naute chu room lamah sawn tur in a la leh a. In zai na room atanga ka nupui an rawn nawr chhuah chuan in ti pachang lui tur a ka pan min hrilh in min kuah ding a. Ka nupui, ka hmangaih leh ka thlakhlelh em em nunna nei tawh lo tih hriat zet a an rawn nawr chhuah chu pan in a hmel tha zet chu ka kut in ka khuap nghal hmiah a.




" Hetiang hian engtin nge min kal san i tum theih? I tel lo chuan kan fapa hi engtin nge ka enkawl thei ang! Thu min tiam tawh kha, ka kut i thlah ngai loh tur thu! " Ka ti chhuak sup a. Mahse Lalrindiki chuan hria ang pawn a awm lo. A mit meng nalh zet kha a chhing chial a. Min chhang let tur a awm ve tawh lo tih ka chiang lutuk chu ka beidawng hluah hluah .




Naute nen in lamah chuan kan let ngei a. Mahse ka nupui erawh ka hruai haw ve thei tawh lo. Ka awh em em fapa duhawm tak chu ka nei ngei a mahse min enkawl pui tur leh kan hma hun zawng zawng a tel lo a ka lo suangtuah ngai lo ka nupui erawh ka chan thung si a. Pathian hian ka tan hian an pahnih a neih kawp hi a rem ti ve loah ka ngai hmiah bawk.


*

*

" Nu.... Bawiha hi class a la rawn bang lo a mi? " Ka room atanga ka chhuah rual in ka nu ko in ka ti sup a. Ka nu in a rawn ban ve tep tawh a rin thu in min chhang a. Thuthlengah ka thu fel chiah tih in kawngka lam atang Puipuiin min rawn ko lang lang in a rawn tlan lut ter ter a. Ka lo nuih suk rual in min rawn bawh nghal rak rak.




" Apu chu anu in i awm dawn lo a tia i awm reng sia! " Ka awm zawn atanga rawn dak chho ha in a ti vat a. Nui suk in a sangah ka tuai zeuh.




" U... Hna i kal na nge? Remruatpuiin rawn len a ngen ngun lutuk a, a tlai a tlaiin kan rawn kal. Kan pa a night dauh a chaw kan ei nghal dawn a nia! " Emily chuan a rawn ti zui berh berh a. Puipuii hi an fa pathumna a ni tawh a. A upa pahnihah mipa ve ve a neih a. Hmeichhia ka neih hmasak berah Bawihtei hming ang kha ka phuah ang a ti ve tlat a. A pathumnaah chuan a nei ve hram.




" Khawnge a u te? An lo kal ve na nge? " A rawn thut thlak rual in ka ti sup a. Lu a bi ve nghat.




" Assignment tih tur an ngah lutuk an leng hman lo! Khaw nge Zorinpuia hi a awm a? A la rawn haw lo a mi? " A ti zawm zat. Chu mi rual in pawn lamah bike ri ring zetin a rawn zui nghal.




" E.... Chu... Au ! " Tih leh Puipuii chu kawngka lam a tlan a rual a. Emily chuan min rawn melh in a ner nang.




Rei lo teah kawngka lamah thawm a rawn awm a. Ka fapa, khawvel a ka rohlu neih chhun Zorinpuia chuan Puipuii chu a rawn pawm lut a. Puipuii lah chuan a putea nghawngah kuah bet in eng emaw ni hi a hrilh malh malh a. Ka fanu Remruatpuii ka hre chhuak rum rum. Kum 20 meuh liam tawh mahse nimin ang mai a chiang in ka la hre miau.




" I U ve hi a tawng duh lo in a nel awm loh si, i duh in i chhuang ve em em a! " Kan bul an lo thlen in Emily chuan a lo ti hlak a. Zorina chu a ner sawng.




" I hmuh ve leh kei mahah hian hmuh a nei a ni mahna! " Ti hmuk in in chung lamah an in pawm chho a. Mak tak in Puipuii hian a Putea hi a ngaina em em mai a. A tawng duh lo in naupang hi a ngainat loh teh lul nen Puipuii hi chu a duat viau thung.




" U naktuk chu dar eng zat a kal nge in tih a? Chuan Zorina hi a kal duh loh leh a nge! A nu thih cham vawi 20 naah hi chuan tel ve tawh tur a ni. A duh loh pawn ti lui ve deuh rawh! " Emily chuan a rawn ti a. Ka thaw chhuak hawk.




" A tan a harsat dan tur hi hriat thiam pui a ngai a sin. A duh miau loh chuan kei chuan tih luih ka tum lo! " Ka ti hmuk.




Ka fapa hian a nu thih chhanah a in ngai tlat a. He khawvel eng a rawn hmuh rual in a nu in a kal san a, a hriat thiam chin hian mahni in thiam lohna lian tak a nei a. A pi leh pu, leh kei thleng in a thiam loh a nuh loh zia kan hrilh fo a mahse min chhang lem lo a, a mitmengah erawh a in thiam loh zia ka hmuh sak fo. Mawhphurtu dik tak erawh kei mah ka ni thung a. Damdawiin lam ka pan pui har lutuk leh na a nei tih ka hre har lutuk kha tune thleng in ka la in dem reh thei lo.




Kum tam tak liam tawh pawh nise Lalrindiki din hmun hi tu hmeichhe dang mahin an luah lan ka phal lo a. Ka nunah hmeichhe dang seng luh leh tumna pawh ka nei hek lo. Ka fapa thang lian lai ka hmuh hian ka nun hi a hlim in a kim tawk em em a. He khawvel a ka pek theih leh neih a suh engkim chu kei hian pek vek ka tum bawk. Midang chuan duat sual emaw pawh min ti se, ka fapa lo chuan kei hian dam chhan ka nei miau lo tlat.




" I lo dam em ka hmangaih! I tel lo a dam chhung ni hman ral chu thil hreawm tak a ni. Nang erawh in vawi khat pawh min zawt hmasa lo in min kal san a. I fapa hian nu a mamawh zia chu i awmna atang khan i hmu ve a ni ti raw. Engmah chu a sawi ngai lo, mahse a pa ka ni a, a mit mengah hian ka hmuh sak thin a sin.




Nang nen hun hmang rei lo viau mah i la ka damchhung zawng hian nang ngaihtuah lo che hian ka hun ka hmang ngai lo. Minute tin , ni lo.... Second tin hian kha mi tuk kha koh kir theih nise tih ka ngaihtuah fo a. Mahse sawtna a nei tawh si lo. I fapa ka enkawl danah hian i duh thu a sam em chu ka hre lo. Nang chu awm la tun aia tlangval thaah hian i chhuah ngei ka ring! " Ti sup in ka khi suk a. Ka hma zawn a ka nupui Lalrindiki thlan lung chu ka melh ngur pawh.



Rei lo te chhung nupa niin kan cheng dun a. Min kal san hma viau mahse ka hmangaihna leh ka thlakhlelhna erawh in min kian san lam aiin a mah ka mamawh zia leh a tel lo a nun hreawm zia min hriat nawn tir zual sauh a. Tunah chuan min hnut chhiah ka fapa vang chauh hian ka la dam ve ni mai in ka hria!




____A TAWP TA____

*** KAN WEBSITE A FAKNA LAM THIL MILEM LANG THIN I LO HMEH ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)