JASPER By RuatiRenthlei (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: JASPER By RuatiRenthlei (Completed)

Unread post by Ngaia » January 16th, 2022, 2:13 pm

JASPER



Chapter-19

(By RuatiRenthlei)






Khua a dur a vangin a vawt sung a, ka kut pahnih chu thawk khum leh vung vung thinin ka tei kual sek, ka nghah ber lah chuan rawn thlen tik a nei thei silo.








Ka phone rawn vibrate chur chur chu ka kekawr ipte atanga phawrh sawk sawkin Jas-a hming ka hmuh rual chuan ka chhang nghal vat.







"I va rei" ka ti chhuak thawr a, "Lo thinchhe ve sek suh, Robert-a a nuar alawm" a rawn ti vin ve thawt, "Tinge a? Khawi ah?" bah nawka ka tih leh chuan "In veng ah ka awm tawh, Pekdumi te kawmchhak ah" a ti leh mai a, phone dahin Peki te in lam ka pan nghal hlawk hlawk.







Ka in chei nalh ve tehreng nen ka kalna lamah ka hmelchhe leh vek dawn anih hi,,mahnia phun nuah nuah chungin ka kal zel a, ka bag ah rit zet chuan min ti chau zual, Peki te in thlen dawna kawng chhak lamah mi pakhat leh bike ka hmu a, ka pan ding nghal chat.








Kun du du chungin Robert-a chu a lo thlêk kual a, "A englai nge chhia" ka ti dek dek chu a kat dawrh, "Mi ti phu" a ti hluai a, a hlau hmel chuan ka nuih a ti za daih.








"Phut na tur vak a awm loh kha a, I uar ve hrim hrim" tiin ka thu hniam a, min la melh khui khui pahin "A kawchhung lam a niang, nangmah vangin a nuar ta fo mai" a ti thawp sup.








"Eng nge keimah vang a nih na?" ka tih chuan thaw chhuan hawkin hnai set sawt ah min rawn en a, awm sawn pawh tum lemlo chuan ka chil ka lo lem khalh.







"Nangmah vang" vawt ruiha tiin min la en ngur a, "A.... I phakar" tih pahin ka nam sawn a, dik tak chuan nam sawn mai nachang pawh ka hrelo, kan hmui a in deh dawn tak ngial avanga harh chhuak ta chauh ka ni.







Lei ah a thu tawp a, kei ka ding sawk sawk, "Ke in kal mai ang, kan tlai lutuk chuan a zahthlak" ka ti a, muangchanga rawn tho ve in "Robert-a hi... " a ti vawng vawng, heiham....







"Rawn nawr rawh" tia kal ka tum chuan "Heyyy" a rawn ti leh thawt, zanin hi tinge a chet dan a mak thut le, "Ka nawr thlen thak theih i ring em ni?" a rawn ti khar khar a, "Nawr thleng thak rawh ka tih loh kha, Peki te in kawt a dah ka dilsak dawn che, nge khata dah kha i duh zawk?" ka ti let ve kha kha.






Min melh run run chungin a rawn nawr ve zel a, Peki te in kawta kan hun rem hnu ah kawngka ka kik chauh.








A nu in a lo hawng a, mawi hnai ah Peki awm leh awm loh ka zawt, dawra a kal thu a sawi chuan pehhel lem lovin an in kawta bike dah lawk kan duh thu ka sawi mai a, a nihna takah chuan kan dah fel thlap tawh zawk.








Mi hrang kan ni lem lo va, Peki te in ah pawh ka kal ve fo avangin a lo phal khawp mai, tichuan le... bike chuan in ring zeta kal ve si chu ke in kan in zui ta hnak hnak.






"In hausa tho sia, bike thar lei mai la, Robert-a hi chu siam leh pawh ni la a chhe leh zel tho ang a tlo thei tak tak tawhlo" sawi tur kan hrelo dun lutuk chuan ka ti ta ringawt, ka duh tih ka in hriatchhuah tawh tlat avangin a hma ang khan ka thawveng hurh thei tawh biklo.








"A ngai lo mai" a tih chuan ka melh zawk a, a hmalam a en ngur, ka tawng sual a nih ringin ka in thiam lo leh hnuhnawh, hming lem a phuah sak thlap a bike chu a tan a hlu hle ani tih hrethiam ve mai tut ka nih laia a thar lei tura ka lo ti chu ka in thiam lo thlawt, a rilru ka ti na angem le??







"Ihhh tihpalh" ka ti teh ngawt a, ka ding dat a, min chhan let beisei in ka en reng, min kal pel zet tawh chu rawn in her leh in "Tinge?" a ti sup a, a hmel a thu tak run naa, a thinrim lo niin ka hria.






"Ka thil sawi kha, bike thar lei turin ka ti ve ringawt che a... " ka ti leh sep sep a, nui suk a min rawn pan lehin ka dar ah min kuah hnawk a, min kalpui leh dawr dawr.







"I in thlahrun ve tak tak hi chuan min ti awm nuamlo vek zel, bakah nanga thu sawi mai mai te chu ka ngai thu tak lo" a ti a, a thu sawi ho lam deuha a ngaih chuan min den nat zia a hre miah lo.






Ka thusawi mai mai a ngaih thu tak loh chuan 'ka duh che' tiin hrilh vek pawh ni ila a awih miah lovang, sawi loh tur ka sawi a, hriat loh tur ka hriat phah.





Ngawi rengin sir Fela te in lam kan pan a, kawngka bula kan ding reng tawh chu amah en chho chungin " Lut la" ka ti a, "Lut hmasa rawh" a lo ti ve khauh.







"Ka zak alawm, lut la ka lo zui ang che" ti ve tlat in ngenngawl zetin ka melh pah, vawi khat mah an in ah ka la kal lo va, ka zak ve tho.






. Thaw chhuak hawkin door bell a hmet a, chhunglam atanga lut tura sawmna kan hriat rualin kan in zui lut a, a hnung zelah ka kal a, an in chhung chu a pui reuh lutuk.








"Helam ah" rawn tihna lam chu kan hawi vat a, an sitting room awmna teh daih chu leh!!





Nu pakhat hian naute hnute a lo hnek tir mek a, a hmel that vak loh danah sir Fela nupui a nih ka ring, Pekdumi khan a sawi hmelchhe thei em ani.








"Sir Fela student te kan nia" ka tih chuan "Aw... Lo thu rawh u" tih leh an pa koh a rual a, 'thianpa' a ti deuh kher leh nghal, mahse 'dear' in tih vel duai ai chuan a tha fe zawk.






Inbual zo hlim tih hriat zetin sam hnawm chap in a rawn chhuak a, min hmuh rualin a nui suk.




"Helamah lo kal rawh u" tiin a kut in min hui zauh a, Jas-a nen in en in a kalna lamah kan in zui phei dat dat.






Pindan tê fel ren rawn a ni a, a sir bang vel chu lehkhabu hlirin a khat, kan luh ve rualin a hmaa chair a thu turin min mit mei nghal zat a, ka bula mi nen chuan in melh tawn zuk zuk chung bawkin kan thu leh.







Sir Fela chuan 'I lehkhabu phawrh rawh' tih melh tak hian min melh a, ka phawrh nghal sawk sawk.





Jas-a lah chu'h, lehkhabu chu sawi loh, a kekawr ip atangin pen cheng 5 man pakhat a rawn phawrh a, a zo der.





Zirlai bu chhung ami vek a nih dawn avangin a pawimawh tur ho a sawi nghal mawlh mawlh a, a lo in chhiar fe tawh tih hriat takin a phêk zat nen bahlah miah lovin min hrilh mawp mawp.







"School ai awh a nih avangin in theih tawp in chhuah a ngai dawn ania aw Jasper" sir Fela chuan a ti nghet churh a, a biak pa chuan ngaih pawimawh loh hmel zetin a melh kual ralh ringawt a.





A ngeng lutuk chuan buaina a chawh chhuah palh takin tiin ka lo in rawlh a, 'sir helai hi eng nge?chu chu eng nge? Engatan nge?' tiin ka hriat ve sa nen lam ka zawt vek.








Choka lam atanga hmeichhe tap thawm kan hriat rual chuan phâwk fe in kan in melh hra hlawm a, sir Fela chu tho phut in a chhuak nghal a, ka thutna ngaia la thu reng chung chuan a chhuahna lam chu ka en reng.







Tap ri chu a ring tulh tulh a, ka ban bula rawn vuan Tu chu melh chho hrakin "Tunge?" ka ti sup, ka lungphu a rang a, lungchhe lutuk a hmeichhe tap thawm chuan a hmel hmu kher lo mah ila ka thau ah min man nghet lutuk tlat.








"Ka hrelo, lo kal rawh" tih pahin min pawt tho a, pindan kan chhuahsan dawn chuan ka tang tung ringawt.





"I bulah ka awm ve reng hi" min ti nek chungin min phih lawp a, kal bah nawk nawk pahin "Min thlamuan maihlo" ka ti hram.








Thawm awmna kan hnaih zel a, ka thil hmuh chuan min thawng lutuk, sir Fela chuan a nupui tap hlawp hlawp chu a awm ah kuah bet in a sam a lo chul hliau hliau a.



Min hmuh ruala an nu nam sawn hlek pahin "Ella, chhiat kan tawk a, tunah Chaltlang lamah kal nghal kan ngai si a" tia chawl hlekin an fapa chhuata a nu a tap tih hre miah loa toys khalh Tu chu a melh zawk a,,

"Kan lo awm pui ang, kal rawh u" titu chu ka melh chho zawk a, a ni chuan sir Fela te lam chu a en run thung.









A nupui lah chu a rawn tap ring leh thut zel a, ka lo phu leh pek thin, a tah hla ah 'ka nu' tih a tam em avangin a nu a thi a nih ka ring a, khawngaih eng ang mah ila ka hnem thiam chuang derlo.








Sir Fela chu thaw hapin a ding a, pindan ah lut in rei lo te ah kawrlum leh showl nen a rawn chhuak leh.


"Motor ka khalh a ngai si a, a nu lah hi a biak tlak der bawk si lo, rei lo te chiah Pekpeka hi in lo awm pui thei angem?" a aw leh hmel ah a in thlahrun zia a lang vek a, mi chhiat tawh laia tanpui Tu nih tluka hlu a awm chuang hleinem tiin ka lo bu nghauh nghauh.







"Va kal ru" ka bula mi chuan lo ti ve nghut in min rawn en a, "Pekpeka chu kan lo awm pui ang" tiin ngeiawm lutukin mit min siai kher, a va hun lo thei tak e aw.






"Aw le, harsatna a awm chuan min lo call vat dawn nia" tiin a fapa chu a melh leh zawk a, an nu chu kuah chhuak in an liam hnu thleng ka thlir zui.







Jas-a chu thaw hapin sofa ah a thu hnawk a, a bulah chuan thu ve in kan ngawi dun vang vang phawt, "A nu a thi a niang a" ka tih chuan "Aniang" a lo ti ve mai a, "Ka khawngaih" ka ti leh tawp a, min chhang tawh lemlo.









Chhuata Pekpeka in fiam chu kan en reng a, a pa ang chiah in a hmeltha, "Heta tang Chaltlang chu a hla sia, an rei ngawt ang" ka ti leh a, "An rei leh kan riak anga ni mai lawm" awlsam zeta a tih chuan ka melh nghal hrak.







Min lo en ve run a, a mitmeng awmze nei zet chu ka hmuhhmaihlo, "I hur" ka ti vak a, "A hun ve tawh alawm" tiin a kiai suk, ka va han ngei mai mai e.







"Eng lo, bialnu i nei em?" ka ti a, a mit ah tak ka en ngam tawhlo, a bula ka awm changa ka danglam nasat zia ka hrechiang a, tiang reng a nih chuan insum theih loh hun ka nei palh ang tih ka hlau, ngaihzawng a neilo a nih chuan min duh kherlo mahse ka hahdam ve huai anga, a lo nei anih leh amah hlat dan kawng ka zawng tawh mai a niang chu.







"Ka hmu zolo a ni lo" a ti ringawt a, ka duhkhawp miahlo, "I hmuh zawh leh zawh loh ka zawt lo che" ka ti ve leh a, ka sawi tawh tho tho, min chhan hma ka zawt dawn, "Ka bialnu tur hian min hmu zo thlawt lo a" thaw hapa tiin sofa chu a hlam duai a, a awmdan leh tawng dan vel ei lo zeta ka melh hrak lai chuan naute a rawn tap thut a, rang lutuk in Pekpeka awmna lam kan pan.







Ka pawm kan rualin ka ban a hit nghal vur a, rim danglam tak ka hre nghal bawk.






"Nguri" titu chu ka melh a, keimah ni lovin chhuat a en daih, "Êk a cheh" ban charha tiin min rawn en a, naute chu tap nasa viau mahse ka ban ka ti che ngam tawhlo.







"Ding reng lo khan min lo pui rawh" ka ti a, zeilo lutik in Pekpeka chu ka sûk pui dur dur bawk.




"A êk i kai" tih pahin ka ban a rawn kawk a, êk hmu ngailo ang maiin a meng phâwk, "ka hria, min lo pui rawh ka ti reng alawn" ka ti thawt a, "Engtin?" a la ti ha tho.






"Tih fai a ngai, bathroom ah" ka ti a, a rit ve tawh a, a tap tal vel nen ka thloh lo chauh tawh.





Bathroom ah kan in zui phei a, vawi khat mah naute êk ka la ti fai ngailo, thei leh theilo in a kekawr ka phelh a, ka bulah mi lah chuan "Kha kha kha a êk i kai dawn, diaper hak tir ve mai âwm" a lo ti ve chhen lehnghal.







Pekpeka lah chu a tap uar nasa tawh mai si a, a hmai a sen vek tawh a, awih awm loh khawpin a mittui a tla tha duh lehnghal.






Tuilum zawn buaina hun a awm lova,chawhtawlh lian ve deuh chu la in tui sik ka leih a, tui lum a nilo tih hria ni awm fahranin tuia luh lah chu a hlau em em lehnghal, tih tho tho a ngai dawn tiin ka phih deuh sawk a, a rimchhe ve tho bawk nen thinrim leh tah chuak insum ru teuh chungin ka sawngbawl nawk nawk, 'a tap palh ang' tih vel a hun lo, a tap tawh tho tho bawk a, zawh fel vat a ngai.









Uak loh ka tum a mahse a har, ka sil fai zawh ah loh theih lohna avangin an nupa pindanah ka luh pui a, naute puan ka hmuh ang ang chu la in ka hru hul leh a, a tap nasa lutuk chu keipawh ka tap chhuak lo chauh tawh.









"Choka ah a hnute tur va zawng teh" tiin ka bula tangkai lo zeta lo ding ve reng chu ka melh zawk a, mangang hmel zeta bu nghut nghut in a chhuak ve mai.







Khumah ka muttir a, a kekawr ka zawng leh, ka hak tir hnu ah pawh a la tap zo thei lo va, na dang a nei emaw ka ti hial tawh, ka mittui a tling ve pur tawh a, "Pekpek bawihte, bang tawh hram teh" ti tuau in ka en tlawk tlawk, a tap reng a nih chuan ama tan a pawi ka hlau, internet ah nui hlum ka hre tawh a, tap hlum pawh an awm theih ka ring tlat.








Kawngkhar ri rawk ah chuan ka hawi vat a, "Kha kha eng nge?" tiin min lo pan mek Tu chu a thil ken lai nen ka melh ha.







"Hnute" tih pahin khum ah a rawn thu a, "Zomuansang" ka ti tuar, ka mittui a far a, rang lutuk a tuai hul in "Kum khat chiah a la nih hi, no a a in thiam i ring ami?" ka ti leh, Jasper Zomuansanga hian no khat lungin naute hnute tur a rawn keng a nih chu!! Nopui leh nghal in.









"A dang a awm hleinem, fiante ka lo la ang" tih pahin a tho leh tharh a, a chhuak leh nghal daih, Pekpeka chu ka awi dur dur reng a, reilo te ah fiante nen a rawn lut leh, tih ngaihna dang a awm chuang lo tiin barh kan tum a, a duh tlat lo.









"A dam lo aniang" tia mangang deuha ka en lai chuan "I hnute pe mai rawh" alo ti khauh, ka melh vat a, "Hnute pangai chu a hrethiam ang" thutak deuhin a ti leh a, ka nui hul hak.





"Hnute tui ka nei ve hlei nem" ka tih rualin "A pawimawh lo, a tap kha bang phawt se a tha" a lo ti leh hmanhmawh, a fiamthu chu a ni silo, bakah a sawi dik ve mai thei bawk, hnute pangai chu a hrethiam ang. Hreh deuh chungin Pekpeka ka pawm dan ka siam rem a,

Inhlim ka tum ûk tawh chu "Lehlam hawi rawh" ka ti leh rih, min nin hmel zeta thaw hawkin muangchangin a in her a, thinphu dup dup chungin ka in keu a, vawi khat mah ka la ti chhin lo, ka ip chawih chawih ni mai in ka hria.








Mahse rei lo te ah a tap a bang a, hnute tui awm miahlo chu fawp dek dek in min en kar mai, a tah tawp hmak takah chuan rawn in herin min rawn en a, a la hnek miau avangin ka in khuh vek senglo.







"Lo kal hnai suh" a rawn pen rual chuan ka lo ti thawt, "Bathroom kha lo va ti fel fai rawh" ka tih chuan a meng zau kawk a, "Naute ka buaipui hi, an lo haw hma in engkim lo ti fel fai rawh, I hnute rawn ken te nen hian" tia in ti thu zetin ka meng kual ralh.







Ka zahawmna chanve ka hlan ang a nia, a bak chu a tih ve tur, sawi buai miah lovin a hnute siam nen chuan a let leh hnak hnak a, Pekpeka reuh lah chuan a mit a chhing hmak lehnghal, a tah chhan kha a mut chhuak ah ka puh ta deuh.








Ka chet sawn theih loh avangin keipawh chu ka lo dâk leh awrh zel a, mut chhuak in min zem nghal ringawt, Jas-a lah chu a thawm a reh zui vung vung bawk si.























~~~
NOTE:
Tenawm khawpin ka chawl rei🤮

Christmas vuak vet ah ka buai over lutuk a(ka inkhel ve duh bawk nen😆) heiham, min ngaidam hram² teh u🤧comment pawh ka phût ngam lo, chhiar ve tawp mai ru... (In chhiar duh zawng a nih chuan)



Tlai tawh emai, Xmas nuam deuha in hman theuh ka ring a, kum thar ah hian nun thar leh rilru thar nen bul in tan theuh ka beisei e,,,,, kum thar chibai vek u❣️



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 16th, 2022, 2:13 pm

JASPER



Chapter_20

(By RuatiRenthlei)




"Hey" ti ri ah chuan ka meng siar siar a, hnai fahranah Jaspera'n min lo en, "I va phakar ve" ti supin hnuai lam a melh zauh a, awi ka rei, Pekpeka siam dâk awrh awrh khawpin ka lo muthluk San, ka siam tha sawk sawk a, tep chap chap in a lo awm rem ve zel, a tahna avangin a biang a tai tek a, naute lawm vak ngailo pawh min ti nui min ti nui ve mai.







"I zo tawh mi? Dar engzat nge?" ka ti he hu a, "Zo daih tawh, tunah dar 10 a ri chiah" tih pahin ka bulah a rawn thu hnawk a, mitmengin ka lo khap vat, an khum a dup over a, a rawn thu na bawk nen ka sawt chhuak daih lo chauh alawm.







"A van tlai tawh, awiii nitei.. " tih pahin ka bul vel ka dap kual ruai, "Khawnge ka phone?" tiin ka bula thu chu ka melh leh a, min chhang lovin a dar a kan ak ringawt, a hre biklo a niang.








"Khawnge ka dah le?" tiin rem leh rem lovin ka in dap rak rak a, "Kha.. " tih pahin a rawn lek kang va, "Sawi vat ta che" ti hluk in a kut atang ka phih thla sawk a, ka zawn buai lai khan min pek ve mai tur a nia, nghal zik zek lutuk.









"Nitei miss call a lo awm tuar a, zau deuha mengin Jas-a ka melh, " I hre thei lo lutuk a, kan inbe zo chiah" a lo ti mai a, ka chhuah dawn khan ka silent daih tak kha mawle.








"A.... Engtinnge atih?" Tim daiin ka ti leh a, a tir khan ka haw hma thei dawnlo tih hrilh lawk ila tha mai tur a nia, ka tlaw lutuk hi chu aw...





"Engtin emaw tak a ti" tiin pakhat lah chuan ngeiawm a lo chhuah leh hman pek, "Zomuansang uanna hun a nih loh hi" ka ti vak a, Pekpeka rawn tal leh tuah tuah chu thu chungin ka awi leh nghal dur dur.







"Chiam chiam zel che hian, I nitei chu a thintim lo, zingah pawh haw la a hau miah lo ang che" tih pahin ka chalah min pen fawk.





Tawng tuma ka ang zuau tawh chu "Shhh I tawng ring leng lung thei si, naute a harh ang" min lo tih khalh leh a, ka chal tuai vut vut pahin ka chhiat khum ta ringawt.








"An lo haw har e, ka ban a kham tawh" tia ner nang in ka duhpa chu ka melh a, min dim lo in min pen fawk fawk zel mahse a rilru a tha tih ka hria a, ka duhna a bo chuang miahlo.








"Ka call tlang thei lo va" a tih chuan "I call tawh maw?!" ka lo ti vat a, bu nghutin "A lu kha ka lo dawm chhawk ang che" a ti a, ka lo hniallo nasa.






Dimte in ka kut ka la sawn a, Pekpeka taksa ka mal chungah a awm a, Jas-an a lu a dawm thung.






Ka kut pahniha hnung lama in nem khalhin ka thaw zui hawk a, ka ban na et et chu maimitchhing in ka feel veng veng tawp mai ni.







"A na viau ami?" a tih chuan ka meng a, "Na viau" ka ti, dawt ni tlat heklo,a na a, a na a ni mai.







"A reh vat mai ang, hahdam rawh" a ti leh mai a, kan ngawih dun vang vang hnu ah "Jas" ka ti hap a, "Imm" a tih chuan a mah ka en.




"Bialnu chu I nei ami?" ka ti leh a, a nui suk, "Nui ringawt suh, bualnu nei ka kawm peihlo a nia" tiin ka vau vel khar khar, zanin hian ka danglam zualin ka hria, ka duh tih hria se ka duh a, a thinrim daih ka hlau bawk si.







"Anih leh nei ta ila engtinnge i tih ang?" tih pahin a rawn awm hnai deuh a, a mit ah tak en chungin "Ka sawisa ang che" ka ti, ka sawi tum a ni miahlo mahse, ka sawi zo vek tawh tho.








A nui chhuak hawk a, "Ngurzampui 'ka duh che' min ti mai la" a tih chuan ka melh kawk, "I sawi kual vel chhung khan bialnu dang ka neih San daih mai ang che" tih zawm leh zatin a kiai suk a, biang sa hat hat in ka mit ka la sawn.







Hepa hian engkim a hrethiam vek tihna mawnle.. A... Engtinnge ka tih dawn??






Jasper POV




Zah hmel zeta a hawi sawn riai riai ka hmuh chuan ka nui suk, tha takin min duh thu sawi se engkim a fel ni mai tur.




Thil dang kan sawi leh hma in Pekpeka a rawn tal phat a, fiah lutuk in a rawn meng, a hmuh ngailoh kan nih vang nge a men nghal pur pur a, tah leh a tum laiin Nguri'n a thawh pui lawp a, a sûk pui dur dur.








Eng hla emaw a sa ve neuh neuh a, a insawi vel dan leh ahla thlûk chu a in mil hlawllo




Pekpeka pawh a tap tawh bik em lo a, "Engtinnge ni dawn?" a ngaihna hriat loh hmel zeta min rawn enin a ti sup a, nichin vang khan a biang a la sen tek leh nghal.








"Ka hrelo, ka'n call leh chhin ange" tiin ka phone ka phawrh a, a hma ang bawkin a tlang leh chuanglo.







"A tlang lo ami? A... Engtinnge kan awm zel ang le?" tia beidawn hmel zetin Pekpeka a en, "Kan riah mai loh chuan" ka ti dek dek chu "Zomuansang" a rawn ti nghal tuar.





A va han thinchhe chiang kuang tak, min duh ru viau chung hian a zia a thup thei chuanglo reng reng, mahse a nun dan tlang tak hi min hiptu a ni ve leh tlat si a, a mak ve ngawt mai.






"I tawng ring thei si, naute kha a tap ange" ka tih chuan min melh no lo viau, "Ka fiamthu lo, kan be theilo a nih chuan kan riah mai angai ang" ka ti leh a, rilru buai hmel zetin a meng kual ralh.






"Hlauthawng suh, I nitei chu ka be tawh ka tih kha" keimah bawkin ti leh in khumah ka nam thu a, Pekpeka chu Nguri hoodie nghawng hrui khalhin a tlei rih viau.







"Chulam a nilo" a tih chuan ka melh zawk a, "Tunah a tho chiah a, engtik ah nge kan mut ve ang" tiin Pekpeka a lo en daih, aw... a ni tak ang, mut hun tawh ah a tho chiah a, a va buaithlak dawn tak ve mawle.







"Ka hrelo" ka tih laiin ka phone a rawn ri a, sir Fela a lo ni, ka chhan hma hma in Ngurzampuiin mi rawn chhuh a, "Aw sir" a ti nghal thawr.







Speaker on tur in ti ve bawk mahila a ti duh tlat lo, rei vak lovah phone dahin "A lo haw mek" a ti a, thaw huai hmel a pu, keichuan heta Pekpeka nen kan pathuma riah kha pawi ka ti vaklo asin, amah hian thih hreh in a hreh bawk sia.







"Pekpek bawihte, apa a lo haw trep tawh a nia" tih pahin pindan atang a chhuah pui a, a nau pawm insawi vel chu Biak In a hlim tul vel nen ka tehkhin ber, a zeiloh dan hi a turu lutuk.








Minute 15 hnu velah Sir Fela a rawn lang hlawl a, a hmel a pawr fap mai, a mit sen ram chuan a tap a ni tih a tilang bawk.






Pekpeka chuan a lo ban nghal zat a, an in pawm kân rualin a nui khek nghal tuar tuar lehnghal.







"In awm hlauh chu a tihzia hle mai, kan chhiat tawh lai in rawn nang fuh erawh a pawi ka ti" a fapa pawm pah chuan a ti hap a, tawng ka tum lai takin Ngurpuii bawkin min hma khalh leh.




"In thiam lo duh miah suh, kan hma hun hi kan hrelo em ani, Pekpeka pawh a fel lutuk, a tap miahlo" a sawi tawp lamah chuan min rawn melh zawk tih ka hria.






"Aw le, engpawh nise lawmthu hrilh cheu ka ba hrim hrim" sir chuan a ti ve leh a, "Anih chuan sir, a tlai tawh sia kan haw nghal mai ang" pakhat chuan lo ti ve leh zatin min rawn en a, "Tiraw?" a rawn ti khawtlai leh.








Ka bu nghut a, "Tun hnai ah mai chuan ka en pui hman rih dawnlo cheu a, nangmah nia in lo in en ve angai ang, hriatthiam loh in neih chuan inthlahrung lovin min lo zawt zel anga, ka theih ang angin ka lo pui thin ang che u" sir Fela'n a tih leh duah hnu ah kan chhuak chauh.








" 'A tap miahlo' tih kher kha a ngai ami? 'A tap' i tihna nen a in ang reng" gate kan pelh fel ruala ka tih chuan a ding dat a, "Ka sawi sual ve a ni mai a, a ho emai, a tap miahlo tih leh a tap tih khan engmah a thlak danglam lo, a tah nasat zia kha" a ti duah.







"Ding kher suh, I hmanhmawh a ni lawm ni?" tih pahin ka pawt kal a, "A ni lawm, khatiang em em khan naute, nilo mihring an tap thei tih ka hrelo reng reng, a thi dawn emaw ka ti hman" a tih zawm leh hmiarh hmiarh.








"Aw a tawk" ka tih lah chuan min melh rum ve khanglang lehnghal a, "Chuta karah min la êk khum zui, awii he ka kut hian a êk kha ka sil fai vek a nia" tih pahin a kut phah chu hnai zetah a bih a, a hnim titih lehnghal,

"Sawi sawi lo la, I sawi zel chuan i in sawi thinrim tak ngial dawn" ka tih chuan a nui hak a, "Tunge khatiangah thinrim lo anga, " min ti let nghek, "Aw a tawk, sawi tawh lo hrim hrim teh" ka tih ve hluk takah chuan sawi zawm lovin a kal tau nghawng nghawng ringawt.







Nguri POV


Min rawn ûm lah chu a tum derlo lehnghal a, a va sual tak, khatiang ah te chuan tumah lungawi takin an chhuak bik miah lovang, Pekpeka ka huat hrim hrim vang pawh a nilo, khatiang kha a thleng dawn tih ka hre lawk bik lo va, han hlim vur vur na chi lah a ni heklo, in sawi thawl ka duh a ni ve mai a, ka huat tak tak vang pawh a ni tawp silo, ka kawr te hi a la uih deuhin ka hria ahhh






Jasper-a ah hian ka dreamboy pakhatmah a awm lo, chuti chung chuan engvanga duh tlat nge maw ka nih le? Min duh let ve pawh a ni chuang silo.






Ka dar rawn uai fual hnawk Tu chu ka melh chho ram a, "Kal tau nghawng nghawng kher suh, hnunglam atang pitar kawng tha lo kal sawi i ang lutuk" a lo ti leh hman.








"Duh leh ka ang anga, lo buai ve suh" ka ti ve hmak a, "Buai teh reng e, miin Jasper-a bialnu chu a va kal nalh lo ve an tih ka duh hleinem" a tih chuan lungawi lo viau e tilo in ka lungphu a rawn danglam a, ka ding dat bawk.






Zak chung chungin ka melh chho a, dar kan akin "Ani lawm ni?" a lo ti leh, "Min fiam suh" ka ti hap a, "Ka fiam lo che" tih pahin a lamah min pawt her.








Beisei ka nei a, mahse ka beisei ber pawh chu ka hre chuanglo,

"Min duh tiraw Ngurzampui" a ti zawi sup a, ka mitah tak min en bawk, ka taksa a tang tung a, ka pum a na vek tawh, "Aih" ka ti a, thumal pakhat lekah pawh ka aw khur a lang tho.










A nui hak a, "I mawl dan hi a turu lutuk" a ti chhuak thawr a, ka melh chho ha, ka duh tih bak ka rilru ah eng nge awm tih tak ngial pawh ka hrelo.






"Ka hre thiam vek" a tih chuan a mit ah chiang deuhin ka en a, "Engkim ka hria, min duh tiraw" ati nawn leh.





A hriat tawh ber chuan zep tit tet in awmzia a neilo, "I hriat chuan eng nge mi zawh?" ka ti a, a mit ah ka en ngam tawhlo, kun ngur chungin ka phone ken ka kheuh neuh neuh a, a nui ri suk ka hriat rualin ka kawng ah a rawn dawm a, a lamah min kuah pheiin a âwm ah ka su dawt.








Thei leh thei lovin ka melh chho a, "Ka kiss dawn che" zawi lutuk a tiin muangchangin a rawn kun hniam a, mahse,,,,

Ka in la hrang a, amah hnung chhawn zawnga ding pahin "Engkim hre chungin min duh thu i la sawi ngai hleinem, ka bialpa pawh i ni lo a, ka kiss dawn miah lo che" ka ti zui hlak.







Ka âwm zawn ka dawm a, ka lungphu chu a sawt chhuak daih ang tih hlauhawm khawpin a rang.

Ka duh a, mahse min duh thu ala sawi ve tlat lo, chuti chunga min kiss a tum kha ka ngaithei lo, min bawl kual mai mai lovang tih tunge sawi thei, min tam tak in mawl min ti mai thei mahse ka type a ni ve tlatlo a ni.






"A nih chuan min bem la" a tih chuan ka meng kawk, ngaihdam min dil ka rin laia a thil rawn sawi teh daih chuan min ti hrilh hai daih alawm, muangchangin ka in her a, a hmel chu a thutak run lawi sia.





"Min bem la kan ni nghal a ni mai" ti lehin min rawn pan hnai a, nur nang in ka lo en "Min duh ve mi?" ka tih chuan "Ti chhin la" tiin dar a kan ak duh chauh leh nghal.





"I mawl" ka ti hluai a, min rawn ban rualin hnung lamah ka tawlh dawrh, "Hmeichhia zawk ka nih hi, ka bem miah lovang che" fiah fakin ka ti a, a rawn nui chhuak hawk.





"Nui suh" ka tih te chu a nuihzatthlak zawk nge maw ni, a nui uar sauh lehnghal, a nui nasa lutuk chu ka zak leh daih sia, thil dang sawi lovin ka kalsan leh daih.








Ka hnung ah a lo kal ve zel tih ka hria a, mahse ka la kalmuang duh chuanglo, engtia bem tura min ti ngam nge maw a nih reng reng le, chungte chu mipa tihtur zawk a ni reng sia, teh tuh mai.














~~~
An va in imaita teuh tawh tak😂

Lo comment ve ru aw hmeltha ho😘a tawp tep tawh a nia😂

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 16th, 2022, 2:13 pm

JASPER

Chapter-21_lastchapter

(RuatiRenthlei)


[Last anih bakah ka awl rei deuh avangin zanin chu chapter dang zawng zawng aiin a thui bik aw😘]



Peki te in zawn kan thlen chuan ka ding dat a, ka bulah lo ding ve nghal in "A tlan thei chuang lo va, naktuk ah ka la mai ang" a tih chuan lo bu nghat in kal leh nghal mai ka tum a, ka ban rekah alo man hman.







Hawi let lemlo in "Eng nge?" ka ti a, kan awm dan hi ka hrethiam lo reng reng, "Min bem la kan ni mai dawn lawm" a ti a, a aw khur dat ah a nui tih hriat reng reng, hepa hian min bawl a tum a nih vaih chuan a chak lo ngawt ang.






"Ni lo mai ang, ka bem dawnlo che" ti hmak in ka kut ka thing thla a, ka kalsan leh daih, zan a rei tawh avangin mihring an tam tawh lova, ka hnungah min la zui zel tih pawh ka hre thei.








Kan in thlen dawna ka kal chak sawt chu hrethiam ni hmiang, "Ngurzampui" ti nang nang in ka ban ah a rawn vuan a, thaw hapin a lam ka hawi.


"Min bem dawnlo tak tak ami?" a tih chuan ka bu nghut a, a nui suk thung, "Anih chuan" tiin van lam hawiin a thaw halh a, beisei nei zetin ka lo en kar.






Min vawnna la thla in a kekawr ipte a zen a, a thil zawn a dap fuh mai theilo nge er ngawng ngawng in a zen.




A tawp ah "Huai" a ti hlulh a, a ngaihna hrelo zetin ka lo en, "Maimitchhing rawh" a tih chuan "Tinge?" ka lo ti vat a, "Thil ka pe dawn che" a tih chuan awih lo hmel fe in ka lo ner nang.





"Chhing vat rawh" atih leh pawh chuan ka lu ka la thing mat mat a, a kekawr ipte ah hian a pen bak kha a awm ka ring lo a, ka maimitchhin hlana min pen fawk ka hlau.







"A nih lehlam hawi tal rawh" a ti leh a, min pen chu ka ring leh ta chiah lo, "Eng nge a?" ka tih chuan dawhthei lo zetin min kuai her lawp a, ka sam ka tawn sang bawk nen ka hmai a rawn vaw thlawrh a, a thip nghal sep sep.





Tawng ka tum lai chu tawp leh chawtin ka ip nghal chawih a, a tak a nih leh nih loh hriat nan ka kutin ka dap hram a, hepa hian khawia thi(necklace) nge min pek ve ngawt a!!






"Thil pek satliah a ni lo a nia" ka beng bula a rawn tih sup chuan ka chhing sawk,"Tinge min pek?" ka ti chhuak halh a, nui ri sukin a lamah min kuai her leh.







"Ka duh che Ngurzampui" ka mitah tak min en chungin a ti sup a, meng zau kawkin "Engmaw?!" ka ti hu.







"Kei hian ka duh che, ka hmuh hmasak ber ni a tang che khan ka duh tawh che" a ti leh sup sup a, min duh chu duh hle mah ila awm dan tur ka thiam miah lo.







"Anih chuan min bem tihna mi?" ka ti chhuak thawr a, sawi tur dang hre tlat heklo, a nui hak a, ka hmai zawn a rawn kun hniam in "Aw ka bem che, min chhang dawn em?" a ti a, a aw leh hmelah a nuih a za tih a lang chhuak vek, min nuihzat hi a chak ve hrim hrim.







Mahelse thinrim khum chiamna chi a nilo tih ka hre ve kar a,duh mah ila "I ti tak tak em?" ka ti leh hram, thaw hawkin a ban a rawn lek kang a, ka lo tawlh hnung leh hman,





"Ka pen dawnlo che Ngurzampui" a ti hluk a, ka inthlahrung leh si chuan ka nuih tlawn ta vel, mahse min pen tum a ang em alawm, dem vek theih ka ni bik chuang lo.







"Khawimaw" tiin a thi min awrh tir chu amah bawkin a phelh leh a, min duh leh ta lo emaw tiin a ban ah ka lo vuan ve tang tang.






"Eng nge?" a ti hluk a, a vin lutuk te chuan min ti hlauthawng lehzual, "Lak leh nghal daih te chu a rinawm loh thlak emai, karkhat tal ka kawl ve hrim hrim duh, ka tichhe miah lovang" ka ti nghal zat zat, zah ka hre tawh miah lo.








Chutah a rawn nui chhuak ta hawk hawk a, khawlai a reh tawh bawk nen hawi kual zuk zuk pahin "Heyy" ka ti sap a, ka vawnna a kut thing thla in a ban lehlam in ka dar ah min kuah a,



"Ka laksak dawnlo che, thil ka en tir dawn che lawm" nui suka a tih chuan amah ka melh chho ha,

"Locket hi eng shape nge i hria em?" a tih chuan bu nghatin "Heart" ka ti a, "Ani leh lo Love, heart leh love a ni thei ve ve" ka tih zawm leh, hmangaihna shape ang kha ani tlat alawm le.





"Anih leh eng nge inziak? " a tih leh chuan uluk lehzual in Locket chu ka bih a, "JN" ka tih chuan "Imm" Alo ti mai a, "Tinge min chhiar tir a? Eng nge awmzia?" tiin amah bawk ka en leh.






"J chu Jasper a nia, N chu Nguri, thinlung hmun khat" a ti muang ruih, "Ka bialpa i ni tihna maw?" ka ti leh he haw a, "Ka duh che a, min duh bawk chuan" a lo ti sap a, ngaihtuah chiang mang hlei lovin "Yess" ka ti hluai a, ka kuah ve ringawt.







Nghet lutuk in min lo kuah let ve a, mahse khawlaia awm kan nih avangin ka inla hrang leh thuai, thi chu min awrh tir leh thlap hnu ah ka biang lehlam lehlama dawmin ka chal leh a chal a insik tir a, ka chil ka lo lem khalh, "Min duh takzet em?" a tih chuan "Imm" tih ringawtin ka chhang a, "Ngaihtuah chiang rawh, ka mizia chu nang tluka hrechiang tur an awm lo, chuti chung chuan min duh tho em?" a ti nawn leh sup a, kan awmna a reh em zawk a, nilo se chuan eng nge a sawi ka hre thei kher lovang.







Ka biang a khuap na a kut chu vawn hnanin "Ka duh che, I chimawm te, min pen fawk fawk zel te leh min nuih zat thin te, mi bulah min ti zak thin tihte hre vek chung hian ka duh tho che, a mak lutuk, nangmah ang hi ka dreamboy ngai lo hrim hrim, chuti chung chuan ka vei che a, ka duh tho tho che" ka ti zawt zawt, thaw mang lova sawi ka ni bawk a, ka sawi zawh chuan ka thaw hawlh thei mai.







Ani ve thung chuan nuihza insum tih hriat zetin min lo en reng a, keichuan a nuihzatthlak na lai ka hre ve leh pek lo, ka duhzia ka sawi thiam ve dan a ni mai ni.







Engmah sawi tum hmel a put tak si lovah chuan "I awih em?" ka ti leh ringawt a, nui vur vur chungin a bu nghut nghut, "Anih leh nangin min duh ve tak tak em?" ka ti ve leh a, min inpuan tir vek ringawt a, tlem tal ka ngaihthlak ve loh chuan nakin ah ka inchhir palh ang.







"Ka sawi tak tak chuan i ngaihthla leh peih si lovang a" a tih chuan rang zetin "Aih" ka lo ti vut a, "Kal pah ila" a tih tak daih ah chuan a kut rawn phar chhuah chu rang deuha lo chelhin lungawi deuhin ka zui ve mai.







A ngawih vang vang hnu ah "Nguri" a rawn ti sup a, "Imm" ti vatin ka melh chho vat, "Min ring ang che?" a ti teh ngawt a, chhang lovin ka en chho kar ringawt.




"Midang zawng zawngin min ring lo mahse nang chuan min ring tlat rawh" a ti leh a, keimah min en lovin hmalam a en ngur a, a nui miah lo bawk.







"Ka bialpa i nih te chuan ka ring ve bawk ang che chu" ka ti a, nui sukin ka kut a vawnna a ti nghet salh a, thil dang a sawi tawh lo.







Reilo te ah kan in kawt kan thleng a, ka phone hmet eng zeuhin dar zat ka en a, dar 12 rik nan minute hnih a la awm!!




"Ka lut dawn aw" ka tih chuan a lamah min pawt hnaiin min kuah ringawt a, kan piah lawkah streetlight a din luau avangin kan langsar dawn lutuk tih hriaiin inlak hran mai ka tum a, ka hlawhchham thak.






"Jas" ka tih chuan "Reilo te chiah" a ti sup a, "Hetianga kuah che hi ka chakna abrei tawh lutuk" a ti chhuak leh halh, nichin lawkah keimah zawkin ka kuah hmasa reng sia, a theihnghilh leh tawh niang, hlim lo chi ka ni lo hrim hrim, biang per vekin thei leh thei lo in ka lo nui ver ver.







Min kuah na a thlah dul rualin ka biang lehlam lehlam a khuap leh nghal zat a, muangchang a rawn kun hniam in dim te in min fawp dek dek, ka thiam ang angin ka lo chhang let ve a, "Muttui aw ka bialnu" ti supin ka chalah a hmui a nawr leh tawk a, lai deuha nui seihin ka bu nghat.







Ka kal dawn ah "Chhunglam atang an lo kalh hnan daih mai che a ngah!" a tih chuan a ni thei dawn viau in ka hria ahh




"Lo la awm rawh aw, an lo kalh tak tak daih mai thei a" ka tih chuan a nui hak a, "Ani lawm, riak tur angin min lo ngai thei a" ka ti leh a, "Ka lo la awm ang" a tih takah chuan thlamuang deuhin ka kalsan.






Thawm dim deuhin kawngkhar ka pawt a, vanneih thlak lutuk in an lo kalh lo hlauh, Jas-a awmna lam hawiin ka kut zungpui ka ti pir vah a, nui sukin lut turin min signal nghal.








Ka kut vaiin hmui phun in 'bye bye' ka ti leh hram a, ka lut ta chauh.


Light pakhat a lo la eng va a, nui ver verin ka room lam ka pan nghal.



Inthlak sawk sawk in khum ah ka lawn kai nghal a, a tlai tawh tih ka hria mahse mutthilh chu ka la hlat lutuk tlat.




A khât tawkin ka thaw leh hawk zel a, ka lo nui leh ringawt thin bawk, zanin ah ringawt pawh thil a va thleng hnem hman ve mawle.





Ka hmui ka khawih neuh neuh reng a, engmah kha duhthusam angin a thleng lo, min duh thu a sawi hnu thlebg khan, mi angin romantic takin a che ve lo va, Sir Fela te in ah phei chuan naute êk nen kan buai viau anih kha mahse,,



Ngeiawm deuha a chetna phetna ah khan min ngaihtuah na ka hmu thei a, a hmel nuihzatthlak deuh thin te khan min ti hlim in a ti duhawm daih, mipa ka ngaihsak lutuk ngai lova, chutiang chu ni mahse hmeichhe dangte ang thoin duhthusam mipa ka nei ve tho.





Zantin ka mut dawnah ka duhthusam mipa ang chu suangtuah in ka mutthlilh lawk loh phah fo a, ka suangtuah ang mipa chu Jasper-a hi a ni ngailo.






A ni chu a danglam a, min duh zia a chetziaa a tihlan ngai awm ka hre lo va, a chhan ka zawhin sawi tur a hrelo bawk.




Chuti chung chuan ka ring nghal em em ringawt a, ka ring sual mai thei, mahse tunah chuan amah rin bak tih theih ka nei chuanglo.





Mihring chu kan in rin tawn loh chuan rinawm lo ah kan inchhuah fo a, rin kan duh tlat a, tling lo chunga kan ring tlat anih chuan mi rinawm ah kan in chhuah thei bawk, engpawh nise hunin a la hril ang chu.





"Awi mate, nizan khan i lo haw dawnlo emaw ka ti hman a, ka lo call hreh bawk che sia, I lo haw leh thut rinna nen kawngka ka kalh duhlo va, ka ti fuh khawm mai" choka a ka kal rualin nitei chuan a lo ti hluai a, a nui zui huah huah bawk.






"Nia, kan lo haw leh thei sia" tiin dawhkana tui chu ka thli a, ka in nghal khawlh khawlh, dar 8 ania, school kal ka ngai tih hre mah ila ka phili peih thlawtlo.






"Nizan i mengrei sia, school I kal peih angem?" nitei'n a tih chuan thaw hapin chair ah ka thu thla a, "Kalloh ringawt chu.. " ti nang nang in ka kuttin ka kheuh neuh neuh.






"Ni e, kal hram rawh, Jasper-a bia la, in tlai deuh pawn an hrethiam lutuk ang cheu" a tih lai chuan ka lo lai ringawt a, lehlam hawiin hmui chip hmun in ka nui ka nui mai.








"Ohh mate, I thi chu a va nalh ve" a tih leh hlut chuan ka kutin ka hup thawk a, nitei ka melh chu chiang lutukin min lo en ve.






"Nia ka lei thar" ka ti ve ngawt a,awih chiahlo hmel pu mahse min zawt zuilo, a hriat loh laiin ka kawr chhungah ka thukru zal zal a, ka âwm zawn ka beng thek thek ringawt.







Insiam mawlh mawlh pahin Jas-a ka call a, rei nghah a ngailo, "Hello" a rawn ti hlut a, nizan kan men rei nen a tho fuh hmel chaih chaih khawp mai.






"I insiam tawh em?" ka tih chuan "Ka lo thleng tep" a lo ti vat a, nui ver ver in ka bu nghat a, min hmu theilo tih hrechhuak in ka 'aw' tha leh vel.







Chaw ei lova school kal ringawt ka hreh avangin Jas-a lo thlen hma chaw tello in chawhmeh ka hmawm mawlh mawlh a, ka ril a tam pawh a ni hran lo, ka pum hian rik rawk rawk a hrat a, inven nan eng emaw tal ka ei a ngai.







Nitei tawng ri ah ka bialpa a lo thleng tih hria in ka ha ka nawt leh ang nawk nawk a, ka chhuah chuan mawi deuha ka bialpa nui chu nuih let ve seih in ngaihngam deuhin nitei'n min thlahliam.






Chutiang chuan nitin school kal turin kan inzui chhuak thin a, inhauh chang lah kan ngah, anin hmeichhe dang zawng zawng hawisan in keh thei dawm takin meuhin min dawm a, keipawn theihtawp chhuah ve thin mah ila mipa dang biak loh theihloh chang a awm ve thin si a.





Quiz atan duhsakna min hlana min chibai tute pawh a thik zel a, keipawh quiz ah chuan ka tel ve dawn tiin an duhloh chung a lo chibai ve talh zel a, an kut a hmer sak vak zel tih an hmelah ka hmu thiam thin.






Chung vang mai maite chuan kan va han in hau zing tak, kei ve thung chuan thik tur zawngin hawi nileng thak mah ila ka hmu zolo a ni ber.






Ka vau ve na ber Brenda-i lah ka awm lai ngeiin "Min be tawh suh" tiin a hrilh a, a be tawhlo naa chu, keimah min ngei pahh daih, mahse pawi ka tilo, a ni ngei nih mai mai a na lo.




A chang chuan 'engtinnge min duh theih aw' tih ka ngaihtuah thin, a hmeltha chu thu hran, kawng engkim ah kei thingtlang nula hian ka phu hawllo a lawm, chuti chung chuan min ngaihsakin min duhna a ti lang thiam em em a,ka ring sual dawn lo nia hria in ka hlim thei hle a, nitei pawn a hriat chhuah phah lehnghal, min hau lo a, mahse min fuih thin.






Ka hriattirh a a mize cool tak kha a bo zo tawh a, midang bulah a la hmang tho em tih phei chu ka hrelo mahse, ka bulah chuan a duh duh sawiin a titi thei a, mi zawng zawng aiin a uchuak ka tih thin kha tunah chuan a tawk chiahin a thawveng tawh, nge ni a ka duh luatah ka hmu mam vek tawh pawh a ni mai thei e.








A tawk chiah han tih lemah kan pahnih chauha kan awm dun lai te hian na vak lovin min pen ri leh kerh zel a, mahse ka ngai neih hmak tawh.






Kut min thlak thin vanga haw viau thin khan tunah chuan kan pahnih inpawh tawnna ah ngaiin ka haw duh tawh bik lova, ka nat tak tak a hlau tih ka hriat vang te pawh a ni mahna.







"Mate I thiante an lo thleng" nitei chuan a rawn ti lang lang a, ka lipstick pawh chhin nghet hman lo in ka tlanchhuak.





Pekdumi leh ka bialpa sofa a lo thu ka hmuh chuan nui ver ver in "In va hma" ka ti sap a, Peki min chhanna pawh ngaithla leh tawh lem lovin ka bialpa chu ka en kar.






Coat suit dak thlarh a ha a, smart shoe a bun thlap bawk, hmana a dp ami bak kha hetiang a ha lai ka la hmu lo a, a chhelo thlawt a lawm.






"Mi en vung vung suh" a ti hluk a, ka in thing harh ve nghal bawk, "Ka hman tawh, kal ang u" tih paha chhuah mai ka tum chu "I pheikhawk" tiin Peki a rawn au lauh a, in bih nghal in chapal ka la bun tih ka hrechhuak ve chiah.








Vawiin hian school ah function pawimawh deuh kan hmang dawn a, a nihna takah chuan Jas-a nena kan pual a ni nghe nghe, quiz competition ah chuan kan tel ngei a, champion ta chiah lo mah ila pahnihna kan ni tho, chumi lawmna program te pawh a ni thei ang,



Chuvang a nia ka bialpa pawh suit nen a rawn nih thlarh, Peki'n highwaist mai mai a hak laiin gown ka hak a ngai ta bawk a.






Nitei thiannu min thuisak a nia, fual hnuang ka duh loh a vangin ka khup chen velin a thui a, a tle sep sep bawk nen nalh tak a ni.





Ka pheikhawk thlak tura ka let leh chu dawhkana ka bag theihnghilh ka hmu zui zar a, a va han haihawt thei thin tak.





"Motor I keng maw?!" pawn kan chhuah ruala kan inkawta car in hung ka hmuh rual chuan ka ti nghal thawr a, "Aw" a tih chuan a mah en in "I khalh thiam tak tak em?" Ka ti leh a, min ei loh hmel zeta thaw hapin a meng kual ralh.





Ka rin loh vanga zawt pawh ka nilo, motor a khalh thiam tih ka hrelo a, a khalhah ka la chuan miahloh vang zawk.





"I thiannu pawh ka rawn lam kawi alawm mawle, chuang ringawt rawh" tih pahin a lut zui a, a hnungah thut ka tum chu "A hmaah" a ti deuh tlat lehnghal, Peki ka melh zawk a, nui ver ver in a lo bu nghat.







Lung muang zan lovin ka thu lut a, kawng tluanin Peki'n ka kawr nalh a tih thu a sawi a, Jas-a pawn hmui phun in "I chhelo" a lo ti ve sa sa zel a, "Nangpawh" tiin ka lo chhang thuai zel.







Function a zo a, kan phuloh chawimawina leh lawmpuina eng emaw zat kan dawng, tlai ah ruai an siam a, ka kawr hak a tight avangin ka ei tha ngam lo, chuti chung chuan ka puar viau tho.





Khua a thim titih tawh a, Peki kan thlahkawi hnu ah kan in kawnga kal lovin kawng dangah min pen pui daih.






"Nitei ka hrilh tawh, zanin chu ka hawh dawn che" ka ngaihtuahna a buai tih hria ni awm fahrana a tih chuan ka nui hak a, "Zanin chauh ami min hawh i tum?" ka tih fiamthu chuan tak runin min lo en.






"Fiamthu pawn sawi tawh suh, ka hawn daih mai ang che" a ti hluk a, kei ka lo nui sawng thung.






Min duhzia a tihlan thiamna ber chu thikthu a nia, chu chuan min ti lawm in ka ta bik ngawih ngawih a nih zia min hriat chhuah tir thin..






Competition zawh atangin kan pahnihin hun thawl kan la nei mumal lo va, hmun danga min hruai a tum chu keipawhin ka hnial duh biklo.





Hmun reh lai deuh Aizawl khawchung eng phe tuar hmuh theihna ah min hruai a, pawnah chhuakin a kawr chung min hak tir a, car ngheng in inkuah rialin kan ding dun.






"A van mawi tak" ti hapin khawchhung eng ut chu ka thlir reng a, "I mit meng ang chiah" lo ti sup in a hmuiin ka beng a rawn nul thuak.







"Jas" ka tih chuan "Imm" a lo ti sup a, "Kan puiitlin hun tur I ngaihtuah ve ngai em? Kan puitlin tak tak hunah chuan nupui/pasal kan neih ve angai anga" ka tih lai chuan lo tawng ve in "Nangmah nen" alo ti sup a, a awmzia hrelo zeta melh chho ha pah in,

"Eng nge awmzia?" ka ti a, nui suka ka dar a kuahna ti nghet salhin "Ka hma hun chu nangmah nen chiah ka ngaihtuah thin" a ti.





Ka nui mai a, amah bawk chuan "I hriat loh laia min thlak danglam nasat zia hi, midang tan chuan hmeichhe satliah I ni mai thei a, mahse ka tan chuan I danglam bik, hun rei tak chhung ka pa vangin ka thlamuang a, hma hun ngaihtuah maih lovin khawvel ka chen thin, mahse ka nunah I lo lang a, hmeichhe dang ang bawkin suangtuahna I nei ve tih ka hria, I tan mipa ta ber ka duhsak che a, mahse midang tan ka phal ngang bawk silo che a" a ti duah a, nui suka min rawn en in "I tana mipa tha ber nih tum chuan ka bei mek a nih hi" ti leh sup in ka hnar a piai zeuh.






Ni e, hepa hi ka duh takzet, hma hun hre lawk tumah kan awm lo va, chiang taka kan hriat chhun chu hlim ni leh lungngaih ni a awm dawn tih hi a ni mai.







Ka hlim ni leh ka lungngaih ni a lo thlen hunah ka kianga ding mipa hi ka bula awm reng turin ka duh a, Pathian samsuih kan nih chuan a ni nen a damchhung hun hman ka duh ani.







Ka awmdan siam remin a mah hmachhawn zawngin ka ding a, dingdihlip ar chunga a a nghawnga ka kut suih bet in "Ka tan chuan I famkim" ka ti sap a, a hmui ka fawp zeuh chu duhthawh zetin min lo chhang let.



A TAWP TA✨








~~~
Story dang angin regular deuhin ka dah hman lo va, a tawpna pawh a mumal lo viau tih ka hria, thupha ka chawi tak meuh a, chutih ruala dawhthei taka min lo nghak a, min lo chhiar sak thintu te ka tan in hlu takzet a, in chung ah lawmthu ka sawi tak meuh ani.




Last anih angin in comment tawi te tal kha ka lo beisei ve a, min lo comment sak ve ngei dawn nia.. ❣️


Show post links
Top

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)