REMRUATSANGA BY Papuii Sailo (Completed)

Episode nei ho a hlawm a dahkhawmna
Ngaia
Site Admin
Posts: 26232
Joined: April 30th, 2016, 4:07 pm

Re: REMRUATSANGA BY Papuii Sailo (Completed)

Unread post by Ngaia » March 19th, 2023, 4:58 pm

REMRUATSANGA
CHAPTER 25

LAST CHAPTER

Police station-ah FIR theh lutin, Remruatan advocate a hmelhriat a be nghal bawk a.Pawngsual case a nih bakah kum tlinglo anih miau avangin case a serious zual viau.FIR thehluh ni lâ lâ in Valpuia pawh an In a a awm lai ngei rawn hruai nghal a ni a, Dawngi sawi hmangah police-in an hruai dawn lai chuan Valpuia chu a pha nasa viau a ni awm e.Adina nen an va kal ve kha a nia. Eng nge thudik chu medical test kan neih hunah a chiang ngei ang.



Thil awmzia hriat chian tumin Valpuia chhungte an rawn chuang kai thuai a, kan hriat ang te kan lo hrilh chuan anni pawhin sawi tur an hre bik lo. Kan fate in kawm reng reng an nih avangin kan inmihrang en lo va, a thawng ve viau ta ve ang. Valpuia lah misual leh awm herh tia sawi tur a ni ngailo bawk nen.


Keini pawh Lunglei lamah medical test nei turin Remruata nen Hlima kan kal pui a, vanneihthlak ka ti dawn nge Valpuian a khawih ni ni tura kan ngaihbel ni khan inbual fai sa thlapin a leng a, a zanah a khuasik zui nghal avangin a la inbual ta miah rih lo kha a nia. Test-ah chuan ka fapa chu pawngsual ngei a ni tih nem ngheh a ni. Ava han na vawng vawng tak em? Hma hun ka ngaihtuahin amah hi engtin nge a nghawng zel ang, tunah rih chuan ala naupang a, engmah tak tak ala hrethiam lo. Pawngsual a ni tih tak ngial pawh ala hrethiam lo a ni a, a chunga hetiang thil titu Valpuia hian eng rilru pu a khawih nge anih ang?Naupang a kara mipa leh nghal, a nunrawn thlak em mai! Theih se chu ka fapa chunga a thil tih vang hian ka kut ngei hian thah ania ka duh ni.


Kan khuaah kan let leh ni chuan Remruata chuan "In thawmhnaw siam rawh, tun atang chuan ka bulah in awm tawh ang" A ti ta bur mai.


" Chutiang ringawt a chi loh " Ka ti a

" I lokal ve duh loh pawhin Bawihpuia te unau hi chu ka hruai dawn " A thusawi avang chuan phawk zetin ka en a, a thusawi chu a tum tlang ngei dawn tih a hmelah chuan ka hmu thei. Ka mittui chawp leh chilhin a rawn tling nghal piau a, a ruh lang rawtin sawi dawt lo mah se, kan fate ka venghim zo lo tih tunah khan min hrilhah ka ngai.Nihnih liamta chhung khan kan inbe tam lo em em a, a tula kan awm dun a ni tawp. Kan inbiak chhunah a rul tawk lek lekin kan inbiaa, a bak chu Bawihpuia a kuah deuh chawt.Ka awm ti nuamlo zual turin eng tawngkam mah a nei hran lo nâ in a che zia ringawt pawh khan mahni inthiamlohna leh nu nih tlin lo nia inngaihna lian tak min neih tir a, tunah...



Ka mittui luang chu ka dang buai peih lo. Remruata chu ka en a, "Kan fate tan hian nu nih ka tlin lo tih ka hria;mahse, khawngaih takin ka lak atangin la hrang suh. Ka ngen a che, Remruat, an tello chuan ka awm theilo ang " Tiin ka ngen ta mawlh mawlh.


" Nang tluka nu nih tlin hi an tam lo ang.. I lak atangin naupang hi lak hran ka tum hauhlo bawk " A aw chu a dam dap a, a awmdan hi ka hrethiam lo.


" Nu nih ka tlin lo itih avang in a ni lawm ni kan fate hi ka lak atanga lak hran i tum? " Ka tih lai chuan tawng tumin a ang hman zuau, ka tawng chhunzawm leh avangin a ngawi ta rih.


" Kan fapa chunga thil thleng hi na ka ti ve tho a sin, mahni fapa pawh venghim zo lo nu ka ni hi hrehawm ka ti lutuk, ka zak ngawih ngawih bawk." Ka awm tawt lutuk chu tham ngawt ngawtin ka tap chhuak hawm hawm a, kan dinnaah chuan ka thusawp thla zui niaih.


Remruatan min rawn panin a awmah nghet zeta min kuah beh chuan ka tap ring zual sauh. Kan pindanah kan pahnih chauhin kan awm a, thutkhawmna lamah tute nge awm pawh ka pawisa zo tawh lo. Ka thinlung leh rilru na lutuk ka puakkeh zo a ni. Ka tukhumah a kut pakhat a vuanin pakhatin min kuah bet tlat bawk a, kei ang thoin chhuatah a thu ve. A khat tawkin ka luah a hmui a chuktuah leh vang vang thîn.


Ka tap ka ziaawm deuh hnu chuan "Kan fapa chunga thil thleng hi i thiam loh a nilo a, tuma thiamloh a ni bawk hek lo. Puhmawh tur an awm anih chuan kei leh kha mihring mahni fate rual lek it duh khawpa piansualna nei mihring kha a ni ngei ang." A ti a, a sawi tawp lam erawh a seh chilh deuh rap.


" I rilru lo pui kha sawi suh, kan fapa ka venghim zo lo hi min dem tih ka hria alawm " Ka tih chuan " Ka rilru i hre thei em ni? " A lo ti khauh.


" I awmdanah a hriat vek alawm, tun nihnih chhung khan min be mumal lo a, tunah kan fate ka bulah an him tawk lo nia i hriat avangin i bula awm tir i tum bawk a " Ka hnuk a ulh leh titih der tawh. Ka fate hi ka lak atanga awm hrang tur hian vawi khat pawh ka la ngaihtuah ngai lo.


" Shii... Tap suh le, a hmasain ngaihdam ka dil che ni rawh se i awm ti nuamlo zawnga ka lo awm avangin, ka dem vang chea be lo che leh hnem lo che ka ni lo tih hria la ka duh. Kan fapa chunga thil thleng khan min thawng em em a, chutihrualin nasa takin keimah ka indem bawk. Palai kha rawn tir lui ni ila chuan ka bulah in awm ang a, hetiang hi kan tawng miah lo ang tih ka ngaihtuah a, kan fapa chunga thleng hi ka thiam loh vek a ni.I damloh te khan rawn phei tur ka ni a." A insehruh ngawt ngawt chu ka kuah ve ta thung.


"Chuan.. Kan fate i lak atanga la hrang tur a min ngai kha chu a dik lo, i thawmhnaw siam tel turin ka ti che in ka hria, mahse min hnial a " A ner zui sak chu ka nuih tlawn ta ringawt.


" Awm hran ka duh tawh lo, bakah kan fate, a bikin Hlima hian kan pahnih hian min mamawh zual dawn a. Kan awm hran chuan ka tan rawn kal reng a rem dawn lo.Kan pahnih inkarah harsatna a awm lo a, inhmangaih reng chung leh karah fa an awm tawh chunga awm hran reng te hi ka hne tawh. Ka nu leh pa pawh ka rawn a, an rem ti thlap bawk. Tin, helaia in awm chuan mi hian ka fapa hi an en hrek hrek dawn, chu chu ka rem tilo. School pawh chawl rih se nakkum lamah zawm tha leh mai rawh se, abula hun a tam thei ang ber kan hman a, kan tih hlim a pawimawh ber. Chuvangin min hniallo la, min zui haw mai rawh u" Tiin thiam takin min thlem takah chuan keipawhin zui haw mai chu pawi ka ti lo. Mahse, keimah maia thu ka tih tlang ngam loh avangin ka chhungte be rawn turin ka hrilh a. Anni tih dan danin ka awm ang.


Kan chhiat tawh dan han inhnem a, han inlen pui vak chi a nih loh avangin kan chhungkaw kual bakah, Pa Mafela te chhung leh Zawmi te nupa bak an rawn leng lut hran lem lo va,kan chanchin erawhin khaw chhung a al hneh viau.Khaw chhung mai nilo, social media lamah pawh an sawi ber a ni.Remruata te chhungkua, vantlang chung lam an lo ni bawk nen.Kan chanchin chu a nihna bak baka sawi belh anih bakah, inti hrechiang fahranin thenkhatin ka nunhlui an sawi chhuak bawk a, U Rammuana hming thlengin a lang ve. Mi tam tak, ka fapa chunga thil thleng avanga min dem tawk an awm a, thil nihna dik tak an hriat loh vang niah ngaiin kei chuan ka enliam thei mai zel, Remruata ber hian a theilo thin. Ka chanchin duk daklo tak tak leh chhe tinreng a min puhna a hmuh chang chuan ngaihdam min dil leh ringawt thin.


Journalists pawh ni hawt silo, journalists emaw in ti tlat YouTuber thenkhatin viewer neih duhin kan chanchin an channel-ah an chhuah chuai chuai a, keimahni min rawn biak tum pawh an awm nuk. Mahse, kan rem ti hauhlo thung.A chhan pawh nakin zelah kan fapa tan a pawi theih kan rin vang a ni.Lo upload ho pawh delete leh turin kan ngen zawk hial. Chung delete tura kan ngenna te chu mipui lamin lo zeldin kual lehin "thil dik tawklo a awm aniang, an delete tir vek danah,thu chiang zawk hriattum a biak tumte ho pawh an hnar vek.An lar duhin an fapa an hmang tangkai mai mai anih ka ring " Tih te, thu mak pui pui a awm nawk.


Ka chhungte ho remtihna thlapin kan nufa ho chuan Remruata kan zui haw ta nge nge.Kan thlen tirh vel chuan ka inthlahrung deuh dû in awm dan ka thiamlo viau. Pa Sangpuia leh Nu Ahruaii an fel êm hlauh zawk a, nilo phei se chu ka haw leh daih duh ang.An chhungte ho an rawn leng khawm nak nak a, boruak a rit viau dawn emaw ka tih laiin Bawihpuia chanchin lam sawi langlo in kei leh Remruata chu fiam berah min neiin an nui bâwk bâwk hlawm a, kam boruak a zangkhai ta viau.Keipawh ka thinlung takin ka nui ve thei, min millo leh min duhlo hmel pu awm tumah ka hmuh loh vang ringawt pawh chuan ka hahdam viau.


"Naktuk chu hotel lamah ka va kal ve lawk ang aw,tihfel lawk tur ka nei a, hrehawm i lo ti ang em? " Zan mutnaah chuan min zawt a, " I rei ang em? " Ka lo ti vat.


" Ka hre lo le, rei vaklo turah chuan ka inngai a " A ti leh mai a.A pi te bulah naupang pahnih an riah daih avangin a awma min kuah bei sauh sauh pahin tihian a sawi a, "In in ang chiah khan awm tum rawh, ka nu leh pa pawh bia in ko bawrh bawrh la, nangma tan pawh a nuam ang. Ka nupui ini tawh a, he in hi i in a ni ve tawh tho a, inthlahrun a ngailo ania " Tiin



" Tihian kan innei tawh tihna maw? " Ka lo ti he haw thung. A nui nghawr dat a, "Kan inneih lohin kan inru tihna mi ni ang? " Nuih za aw deuh hian a ti a.


"Ka hre chuang nang" Ka ti chu a nui ta hawk hawk.


Thla khat dawn chu Remruata bulah kan awm tawh a, ngaiah ka nei chho tan tawh. Kan buaina tawh Zoram mipuiin an theihnghilh tan deuh bawk nen nun pangngai kan zawh chho tan leh mek a, Hliman ala mang phan thin tih loh chu harsatna em em kan nei tawh lo. Apa in school kal a rem tih rih miau loh avangin a chawl a, Mala lah a u telloa school kal duh bik hek lo. Nitin ka nu leh kan nufa ho in In kan lo nghak thin a, kan tlei ve em em tho zel mai. Mampuii te an rawn len phei chang phei chuan Puipuii lo awm ve bawk nen kan ri chel chul zel.



" Bawihpuia te hi an lian tawh iti em? " An unau infiam kan thlir dun lai chuan min zawt a, "Nia, hun hi a kal chak e... " Tiin tha deuhin ka lo chhang thuai. An nausen lai khan an len hun ka nghahlelh nen khan tunah chuan an nausen lai kha ka ngai leh tawh zawk.


" Chhang an neih a hun iti viau tawhlo maw? " Tih pah chuan ka darah a rawn kuah zui thak chu thawk ka la halh.


"Ih.. Remruat, ka rai thei tawhlo anih ka ring. U Rammuana nen kan inneih lai pawh khan vawi tam doctor kan pan a; mahse, ka rai thei chuang miah lo " Ka ti a, U Rammuana nen doctor kan pan dun khan that lohna kan neih loh ve ve thu min hrilh a. Khati chunga ka rai thei chuang miahlo kha a hunlai khan ka rilru a hah ru thin.Mahse, a fa ka lo pailo kha tun hnu hian ka lawm a ni. Nilo se chu kha mi tenawm fa kha ka enkawl angai ngei dawn si a.


"A siam thiam ve lo a niang, kei chuan a siam dan ka hria lawm, vawikhatnaah i pai nghal zawt mai kha " A intithei emaw tih tura a hawi sang vah chu ka ner khum nghek.


" Tan ka la deuh ang a, i puar awk mai ang" A ti leh zel phei chu ka chum chawrh lo chauh, mahnilomaha rilru hah ve nen.


" Uanna chi pawh a nih loh chu " Ka tih laiin " Ka uang angah i ngai em ni? " Ala ti ta deuh deuh chu chhan pawh ka chhang peih tawh lo.Thawh tauh sanin ka nu pangpar tui pe bulah ka kal ta daih.Kan mut dun vawikhatnaa ka rai nghal pawh chu intihtheihpui chi a ni reng reng em maw ni?



Zan thleng pawh chuan ka la lungawi thei lo,Min biak changin a rul tawk lek lekin ka chhang tih loh chu keimah phei chuan ka be hmasa lo hrim hrim.A hnu deuhah chuan hrehawm a ti ta deuh nge min thlem seuh seuh a, chutia min han thlem vel lah chu ka hnuk a no a, ka mittui a tla dawn titih ringawt. Ka awmdan chu ka inzahpui lutuk;mahse, ka mittui chu ka dang thei der lo.Zan rei tawh lama ka tap min thlem hoh hoh chu a lehlam zawng tak chuan a nuihzatthlak, ka tah chhan ber lah ka hre hauh lo. Tlai a mi kha tih dawnin han tah pui thamah ka ngai bik bawk si lo. Thla bi ka chhiar dawn hnaih vangah ka puh ta ngawt.



Remruata lah chuan a tuk thlengin min fiam nan tak a hmang zui leh ta nghal. "Tahbelh nu" min tih loh leh "Zanah i tap leh dawn em? " Tiin a khat tawkin min chhaih reng a, ka huat tawk hi a tling thei em em mai bawk si. Tum khat phei chu ka insum hmanlo in a hmaiah lukham ka vawm bei thlawp a, ka nu chhuak rawn haw chuan min lo hmu hman ni tur a ni.



" Nangni nupa chu in va indim lo ve, Bawiha innu lung i ti awi na nge? " A rawn ti lut lang lang a,


" Ka duat hlak a, a kham lo lung nilo anih hi " Pakhat lah chuan a lo ti sam then.


" Awii.... I daw thei lutuk " Tih paha lukham bawka ka tin leh uai uai chu "Zahngai, zahngai " Tih pahin ka nu phenah a biru a, ka nu nuih a za ngang mai.



Chawhnu her eirawngbawl hma deuh si chuan tih tur a awm lem lo bawk a tiin ka awm nuam vaklo chu mu turin pindanah ka lut a, khumah ka thu chiah tihin kawngkhar a rawn inhawnh a, Remruata a rawn nui lut vur vur.


" Eng nge ilo tih ve dawn? " Ka tih chuan a mut ve dawn thuin min chhang a,


" Naupang ilo ngaihven ang chu ka ti asin, ka nu a buai awm sia. I duh chuan mu rawh ka tho leh mai ang " Tia thawh leh mai ka tum chu min nem thu leh rang lutuk.


" Mu mai mai teh, Mampuii te ina leng turin an chhuak chiah " Min tihder anih ringin ringhlel zet hian ka melh a, a hrethiam nge " Dawt ka sawi lo" A ti zawm zat.



Inkuah rialin kan mu dun a, min zai sak tura ka ngen tlat avangin Ed Sheeran hla *Perfect* kha muang fan raihin a sa pah riai riai a, engtik laiin nge ka mutthilh ka hre lo. Duh aiin ka lo mu rei mah mah leh nghal a, ka harh meuh chuan zanriah ei a hun thuak tawh. Remruata erawh min kuah chial chungin a la muhil sâk sâk, ka kutin a hmai chu ka chul riak riak a, ani ang mipa rilru tha leh puitling, a hmel chu sawi ngai loah dah ta ila. Min hmangaihtu ka nei hi ka vanneih zia ka la hre chho mawlh mawlh dawn niin a lang.Kan bul tan danin zir teh chiam lo mah se, tuna kan thlen chinah ringawt pawh hian mipa hming pu satliah mai mai a nih loh zia ka hre thar nitin ziah zawng anih hi.


"Nu...En ve teh, hei hi eng nge awm zia? " Ka kuta pregnancy test kit ka ken chu a rawn ban vat.


" Aw Lalpa... Ka ring dik tak tak " Phur zet hian a tihluai a, mak ka ti lutuk chu sawi tur pawh hre lo in ka ding khawng reng ringawt. A lan dan chuan kei hi ka rai a ni.



" Ka rai tak tak tiraw? " Tiin ka nu chu ka zawt he haw!

" Aw.. A lan dan chuan i rai ngei a ni.Naktukah damdawi in lamah tichiang turin kan kal dawn nia " Nui sang chung hian a ti a, ka rai anih chu! Ka rai thei tawh lo a ka inngaih hnuah ka rai tih ka hria chu ka tan mak tih loh rual a ni lo.


Remruata rawn haw hnena ka rai thu ka hrilh chuan thu dang sawilo in "Tan ka lak tak tak chuan i puar awk mai ang ka tih reng kha " A ti leh pek. Huat enah pawh ka en tawhlo ka nui ta ringawt.


A tukah chuan Remruata nen damdawiin ah kalin ka rai ngei tih kan va finfiah chiang a. Remruata hlim lutuk chu a nui thaw reng mai, keipawh ka bang bik chuang lo.U Rammuana nena kan inneih lai zawnga rai thei silo Remruata nena kan awm dun hnu lawka ka rai leh mai chu mak ka ti a, ka hrethiam lo viau. Remruatan "A siam thiam ve lo anih kha, kei chuan ka siam thiam alawm " Fiamthu titak deuha a tih laiin, Ka nu chuan "Mipa leh hmeichhia pawh hi chi inmil lo te hi an awm ve a, chutiang chu inni a ni ang, ka thiannu pakhat pawh a pasal nen kum 6 vel an inneih hnu pawhin fa an nei thei lo va, a pasalin a then phah hial a. Mahse, an inthen hnu kum khat velah midang lakah a rai leh mai a, inneiin fa pawh 3 lai an nei zui nghe nghe " Tiin min hrilh a, chutiang chu anih ka ring ta ber.


Ka rai tih ka hriat chhan pawh hi ka nu vang liau liau a ni, ka mood swing nasa lutuk leh ka rilru no thar thut kha "I rai a nilo maw? " Tiin min zawt khawl a, ka period dawn hnaih vang anih ka rin thua ka chhan mai laiin "A ni dawn em maw ni? Rai no tan tir i ang tlat " A ti deuh tlat a, inring ngam chiah lo leh beisei deuh tho chung siin ka in test ta kha a nia.



Ka raino chu a u te ka pai tum anglo takin ka la na kher mai, chaw ka ei theih loh avangin ka cher kawk kawk a, zanah lah ka muhil thei silo.Drip khai ngai hial ten ka awm a, Remruata a tihngaihna hre lo in " Tun bak chu i rai tawhlo ang" Min ti leh ringawt thin. Ka ngaihtuahnaah 'a u te ka pai lai kha chuan hun harsa tak kara pai ka nih avang khan Pathianin rai no huat em em neilo in min siam a, tunah min duata min hmangaih em em tu ka pasal thla zar hnuaiah hetiang hun hi min tawn tir a ni' tih hi a lo lut a. A dik ngei bawk a ni, tun ang hian Hlima leh Mala te ka pai lai khan awm ta ila, ka retheih a zual dawn lutuk. A hunlaiin hrethiam lo mah ila, hun kal tawh kan thlir let chuan Pathian hian kan tana tha tur hlirin rem a lo ruat thin a ni tih hi a lang chiang leh thin.


Ka nu thihna thleng khan Pathian remruat vek a lo ni, ka nu thihna kaltlanga rawn che in ka pa'n a sual simin nun thar a neih phah a.A hunlaia ka rilru ti hrehawm em em thin U Rammuana nena fa kan neih theih loh lah, ka damchhunga ka kawppui tur a nilo tih a lo hriat lawk avanga a lo ruahman sa vek a lo ni. Ka chunga a rorel danah lungawi loin, hun harsa tak tak min paltlang tir avang tein a laka ka vui changte, ka tan a awm ve lo nia ka ngaih lai te pawh khan ka kiangah lo ding rengin ka nun min chher hriam zawk a lo ni a, tunah chuan ka tana a rorelte ka hrethiamin chhuang takin "LALPA A THA " ka ti thei tawh.


Raino hrehawm zual lutuk ka pal tlang a, ka dul lah a kiar ve tan deuh tawh bawk.Thil mak leh nuam ve mai mai deuh chu Dawngi nen kan rai rual mai pawh nilo in kan neih hun tur a min chhut sak pawh a inang chiah chiah chu a ni. Chanchin kan inhrilh tawn renga, Adina phur hmel vel ka hmu ve chak khawp mai. Kan Remruata ang tho hi a ni ve ang em tih ka ngaihtuah, ani hi chu a ngaihna a awm thlawtlo. Awm awl hlekin ka dul a lo khawih hman ziah zel, zanah lah ni se, 'ka bia e' a tia. Ka dul zawnah a phun bul bul zel a, ka mut chhuah chang phei chuan ka lo mutthilh san chang a tam.


Naupang pahnih pawh an pa ang chiah, " engtikah nge a lo chhuah dawn? " Tih min zawt khat tawk reng a, ka dul kiar te chu an lawm tlat pek. An pafa thum a ka dul khawih paha an han be ta thin phei hi chu keimah hian ka lo ning thin. Hmeichhia an duh ni hmiang ka ti mai, hmeichhe chei bawlin tun atangin an chei bawl a, a hming tur pawh a u ten an hauh lawk sa vek tawh.


Puan leh mamawh eng ilo kan in la khawm tan a, Remruata a phur thei vut vut khawp mai. Mampuii phei chuan a fiam phah fo reng a ni. Engah a ngai chuang lem hlei lo va.


" I thil lei reng reng rawng nû deuh deuh zel i lei sia, mipa a lo ni khauh mai ang a" Tiin ka fiam a, a ni lah tak a. A eng, a sendang tih vel hlir a ni a lei thin. Tunah pawh mawza set sendang bawk a nia a rawn hawn leh tawh ni.


" Engmah ala hre dawn tak tak chuang lo a, a senlai chuan eng rawng pawh ha se a pawi lo turah ngai ang " Mi chhanna turte hi a haih chham ngailo reng reng.


" A len hunah a kal zaw zaw thin phah ang e " Ka tih chuan a ner nawk.Tuai leh patil hi a ngai theilo bur.


" Chutiang nilo turin kan enkawl dawn a lawm" Inringtawk takin a ti nghat chu ka lo pawmpui khawp mai.


Ka pasal fanaute duhthusam ang ngeiin Fanu duhawm tak ka hring a, kan hlim tlang hlawm ngei mai. A u ten a hmingah Lalthazuali an sa a, kan atchilh tlang a ni, a men hlek chuan pawm kan inchuh laih laih zel. A u te pahnih pawh an inhauh phah deuh fo.Ka nu leh ka pa lahin a len deuh veleh riah pui an tum der tawh. Khawi ilo a an chhuak an rawn haw hi inchhung an rawn luh rual chiah hian Bawihtei hming an lam hmasa ber ziah a, chutihrualin a u te an thlahthlam phah chuang lo. Zanah phei chuan an riah pui ta ziah.


Ka hmaa Remruata nui tut tut chu tum barin ka melh a,amah vang vek hi.

"Engtin nge kan tih dawn? " Ka ti nghat chu, "Engtin vak nge kan tih ang,nghakhlel takin kan thlir leh ang " A ti sam then " I insum theih loh vang vek,Bawihteii ka pai tan tirh khan 'tun bak chu i rai tawh lo ang' te kha itih nasat nen " Ti a ka ang hlak hlak chu, a nui mai mai duh chauh.


Ni, tunah hian ka rai leh mek a, ka rai hi pawi ka ti pawh a ni lo. Ka rai leh hma lutuk ber zawk hi, ka nau neih thi-ah ka rai leh nghal der anih chu.A insawi ang tak takin Remruatsanga hian naute siam chu a lo thiam tak tak a ni.Ka rai a, a lawmawm viau rualin a zahthlak bawk si lai tak hi ka lung ti zingtu a ni.Chhungkhat leh thenrual tha te fiam kan hlawh leh nasa dawn lutuk.

" I rilru ti hah vak duh suh, pasal fel deuh min neih hi hre ta che. Kan pahnihin kan enkawl dawn a lawm." Min kuah hlu hlu chunga a ti chu ka ringhlel lo, Bawihteii pawh hi a buaipui tam viau. "A u te-ah ka buaipui thei silo che a, tun chu ka chhawk hun che " A ti ve tlat a. Diaper thlak leh thil dang dangah min awl hneh lutuk mah mah. Bawihpuia te unau ka pawmlai lakah chuan hahdam tak ka ni.


" Ka rai leh hma lutuk a, a zahthlak a lawm " Ka ti sap a, a nuih ka rin laiin " A zahthlakna a awm hlei nem, Pathianin inthlahpung turin min ti a, kan inthlahpung a ni mai. Mi tamtak fa neih theih loh avanga rilru hreawm leh lungngai an awm laia, keini nupa a malsawmnaa min vur hi lawm tur zawk kan ni. " A ti dap dap.


Remruata ang min hmangaihtu pasal leh innghahna tlak min pe hi Pathian hnenah lawmthu sawi mawlh mawlh tur ka ni. Thil engkim a êng zawnga thlir tlat thin mi a nihna te, chhungkua a ngaih pawimawh dan te, a nupui fanaute min enkawl danah leh thil dang tam takah ka pasal nunah hian entawn tur tam tak ka nei a. Ka inzir chho ve bek bek zel bawk.



Ka fapa te pawh hi apa ang chiah hi rawn ni se tih hi ka duhthusam a ni. A bikin Bawihpuia a thil tawn khan a thanlen zel hunah a nunah eng nge nghawng a neih ang ka hre lo. Kan nupain kan tawngtai apiangin Pathian hnenah kan thlen tel thin a,a chunga thleng te kha theihnghilh hmak se tih kan duh ber. Mahse, chu erawh Pathian thu thu a ni. Kan hma hunah eng nge kan tawh dawn a, eng harsatna nge kan chungah lo thleng dawn ka hre lo; mahse, hei erawh ka hre chiang a ni. Ka bulah PATHIAN leh REMRUATSANGA an awm chhung chuan eng pawh ka paltlang thei ang tih hi.




CHAPTER PANGA LEK thla 7 dawn innghah a ngai hi a pawi ka ti. 😬Keima lamah buaina neuh neuh ka neih avangin ka huntiamah pawh ka rawn dah thei ta chuang lo a, a... Insawithiam ngaihna pawh a awm lo, ka thiamlo a ni. 🤣Min han hau hrep mai teh u, ka pawm vek.


Tun bak chu kan inhmu leh mai mai khat tawh dawn si a(kan inhmu khat sa tho a chu🙉) Lo dam ula, lo hlim ula, dam nuam vek u le❤


Show post links
Top



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)