PATHLAWIA (NEVER LET YOU GO) BY Te-i MrsAmbrose (Completed)

Episode nei ho a hlawm a dahkhawmna
Ngaia
Site Admin
Posts: 26470
Joined: April 30th, 2016, 4:07 pm

Re: PATHLAWIA (NEVER LET YOU GO) BY Te-i MrsAmbrose (Completed)

Unread post by Ngaia » July 7th, 2024, 9:28 pm

Pathlawia (Never Let You Go)
By: Te-i Mrs Ambrose

Chapter 31

(Story a awm loh hian ka chawl mawl tawp ngai bik lova, comment lamah hian khawngaihin chanchin hi ngaihven hmasa ve thin teh u aw😁)



Bawihi'n min thlah hnu chuan "ṭah ka tum pawh a ni lo" a rawn ti nghal a, amah bawk chuan "in zavaia hriat tura sawi ka tum chu engdang mah ni lovin ka natna chungchang hi a ni a, a natna neitu ka nih angin ka natnain ka taksaa hna a thawh dan ka chiang a, rei ka dam ka ring tawh bik lo, mahse, Ann-i ka ngei aṭanga hun ka neih zat tur ka hriat kha chuan min ṭhawng ve lutuk a, ka insum thei ta lo a ni kha" a ti a, tupawh mai chuan Bawihi chu kan en vek.








Bawihi chu ka lam lo hawiin "a hmain ka hrilh che kha, thinrim suh aw" a ti sep, chutah hawikualin "tuna ka hriatchhuah leh hnu che u hian thutlukna ka siam a, Hmangaihzuala pawh ka la hrilh lo, in zavaia hriata sawi ka duh a ni. Kei hian inzai ka duh a ni" a tih rualin "Mahse Bawihi i tan a hlauhawm asin" ka lo ti nghal.








"Ka hria alawm, mahse, ka hun neih tlem tawh zia i hriat kha, chu lo rengah nangmahni tihnat ve zel che u ka duh tawh lo. Ka vanneih chuan min zai hlawhtling ngei ang, ka lo vanduai tak erawh chuan" tiin a ngawi a, a risky zia a hria a, ani pawhin engmah a sawi fak ngam bik lo.








"Doctor min biaksak rawh u" a tih chuan tumah kan chechang hlawm lo. Bawihi pa chuan "Ni e, Bawihi sawi kha a dik alawm, inzai chu a theih chuan hmanhmawh se a ṭha, Pathian kan nei a, rilru leh tihtak zeta kan ngen chuan Bawihi hi a ṭha em em ang, hetia nghah reng a ,ha lo tih inhrechiang vekin ka hria" a rawn ti ve a, an sawi dik alawm, mahse, vanduai thilthuah hian Bawihi hian min kalsan ta thut se engtin nge kan awm tak ang?








Ka kuta rawn chelhin Bawihi chuan "I ngaihtuah nasa lutuk anih kha, ka pa sawi ang khan Pathian kan nei alawm, ka chakna ber hetia i awm chuan engtin nge chak takin ka awm ve theih ang" Bawihi'n a tih chuan midang an awm leh awm loh ka ngaihtuah buai peih lo, ka fawp ringawt.








Duati chuan doctor a bia a, kan zaivai mai chuan Bawihi'n inzai a duh chu lawm tlang hle mah ila, kan hlauthawng ru ṭheuh. Duati'n doctor a biak zawh chuan "a vanneih thlak lutuk, doctor ṭha lutuk tak mai a awm lai a ni hlauh a, naktuk lamah Chhingpuii hi zai turin a in fit tawk em tih vel an check ang a, chumi a zir chuan an zaiin an zai lovang, chuan tuna doctor hi a kut a hmui a, mi zaifuh loh mang pawh a la nei lo" a tih chuan kan thaw deuh huai hlawm.









Zan rei hnuah chuan midang chu an haw sap sap hlawm a, an haw vek hnuin Bawihi nen Jarson chu kan muttir a, a mutfel hnuin Bawihi chu kan pindan lam ka panpui a, khuma kan mut hnuin ka kuah a, ani pawhin min kuahlet ve a, he taksa lian lo tak kiangah hian ka hahdam em em ṭhin.









"Ka ngai ṭhin lutuk che" ka tih chuan "keipawhin ka ngai ṭhin che alawm, ka hre tho che a, mahse, hriat mumal ka nei bawk si lo, mahse, hetia engkim deuh thaw ka hriat leh takah chuan ka ngai zual che" tiin ka khabe a fawp a, min thlah rualin a hmuiah ka fawp nghal.









Bawihi muhil lai chu ka en reng, ka zep lovang, Lenny kha ka hmangaih ṭhin lutuk, a hun lai phei kha chuan ka hmangaihna neih ve zawng zawngin ka hmangaih emaw ka inti ṭhin, mahse, a lo ni lo, Bawihi ka hmangaihna leh Lenny ka hmangaihna kha khaikhin ni dawn ta se, Bawihi ka hmangaihna hi a sang zawk ngei ang.








Lenny laka ka tih ngai loh khw Bawihi lakah chuan tih ka ngah a, a lakah chuan ngaihdam dil ka hreh lo va, tlawm taka awm ka hreh hek lo. Ani hian ka tih ngai loh, ka tih pawha ka rin ngai loh min tihtir hnem tawh takzet. Chuta ṭang ringawt pawh chuan ka tana a hlutbikzia in hrethiam ngei ang.








Tui taka mihil mek Bawihi chu ka kuah a, he taksa hi ka tawk phak lova a awm ka hlau ber tawh. "Lalpa, ani hi min chantir lul suh aw," ka ti sup. Ani hi ka chan anih ngat zawngin Pathian khi chiang takin ka dem dawn tih ka hria, a ṭum hnihna atana ka hmangaih chan chu ka zuam tawh ngang lo. Mipa mah ni ila, hlauh nei lo ka ni lova, tu pawhin thil hlauh chu kan nei vek, kei pawhin Bawihi chan chu ka hlau takzet.








Zing lamah ka biang rawn fawptu chuan "Morning tho tawh rawh" a ti a, a aw ka hriat rual chuan ka hahdam. Ka men chuan a thawhna a rei rawh tih a hriat hle a, zan lama a kawr hak a thlak tawh mai bakah a sam a la hnawm deuh. "Tinge ka tel lova i lo thawh?" tiin a kawngah ka man a, ka lama ka pawh chuan min rawn bawh rawk mai.








"Amak, in ei tur ka siam alawm, Bawiha pawh ka la kai tho lo, tho la, Bawiha ka va kaitho ang" a tih chuan "ka nupui hi engtikah nge ka pumbilh theih ang che aw" ka ti a, a rawn nui chhuak hak hak, hetia nui reng tur hian ka duh. "Tho hmanhmawh mai rawh, chhun lamah damdawi în lamah kal kan ngaih dawn kha" a tih chuan a kawnga ka chelhna chu ka thlah a, ka thlah rualin Bawihi chu a tho sawn nghal bawk, Jarson kaithawh a tum a ni ngei ang, pindan aṭang chuan a chhuak nghal a.








Damdawiin lama kan va kal chuan Dr. Duke bawk khan min lo buaipui leh a, Bawihi chu a hlauhthawn hmel deuha ka hriat avangin a kuta ka vawnsak a, min rawn enin min nuih ver ver. Dr Duke rawn let leh chuan "Dam lo chu rin aiin a taksa a in fit a, nangni in inzai in duh hun hunah in inzai thei a ni deuh mai, mahse, in hmanhmawh erawh a ngai, doctor hi a awn zen zen lo ania" a ti a, "chhungkua kan han inrawn ve phawt ang a, thu thar kan rawn nei thuai ang, a theih chuan doctor number min pe thei ang em?" ka ti a, Bawihi chuan engmah a sawi ve lo.








Kan haw hnu chuan chhungkua kan inbe kual a, Bawihi chhungte lam chuan Bawihi inpeih hun apiang chu ṭha an lo ti mai a, Bawihi chuan "Anih chuan naktipah tih tum mai ang u, naktuk erawh chhungkuaa thil tih ho ka chak" a ti a, hlim taka lan a tumna phena a hlauhthawnna chu ka hmuhhmaih lo kher mai.








Doctor chu zan lamah ka bia a, amah kaltlangin appointment pawh kan nei thei a ni nghal mai. Doctor chuan "dam lo hi a chanchin ka lo hre tawh ṭhin, tunah mi a hrechhuak leh tawh em?" a ti a, mak ti ru zetin "Aw, hrechhuak tawh" ka tih chuan a rawn thaw hawk a.








"Inzai in tih chu in tiṭha anih chu. Hetianga dam lo te an awm tawh hi chuan a dam lo dinhmun a derthawng zual tawh a, a lu nâ a rawn chhuah leh hunah chuan a hma ai mahin a na tawh zawk ṭhin a, tin chu mai bakah a hmaa hriatna tlemte tal la nei khan a hriatna a hloh fai fek tawh ṭhin" a rawn ti leh.









"Chuan dam lo hi i nupui a ni tiraw?" doctor bawkin a rawn tih leh chuan a nih thuin ka lo chhang a, "I hriat ngei ngai chu dam lo hi kan lo zai hlawhtling ta anih pawhin a hriatna lamin a ngawng thui viau dawn a, engkim a theihnghilh theihna chance hi zaah sawmkua leh pakua lawih a ni" a tih chuan ka che lawih mai. Mahse, min kalsan hlen ai chuan a hriatna hloh mah se pawi ka ti lo zawk. Ka duhthusam chu Bawihi a ṭhat leh hi a ni mai.






________________________






Kan zavai mai chuan hlim taka lan tum mah ila, kan hlauhthawng ru tlang vekin ka hria. Bawihi zai a risky zia kan hre vek a, kan zai lo anih lahin hun a neih a ral ṭep tawh bawk si, loh theih lohnaa kan din avangin Bawihi inzai hi rem ti mai kan ni.









Bawihi chhungte leh ṭhiante, ka chhungkhat ho te nen kan awm khawm ṭhap. Bawihi hlim tak anga lan tum chu kan en leh zuk ṭhin. A puitling ka ti a, ka tluk lo ka ti ngawih ngawih. Tu bulah mah hrehawm a tih thu a sawi ngai lo, nimin zan phei kha chuan "Ka natna hi Pathian min hmuhfiahtir tu a ni a, ka pawm ta thlap" a ti anih kha! Ka Bawihi hi ka chhuang takzet.








Zan lamah chuan Bawihi nen kan balcony ah kan chhuak dun a, ṭhutthlengah ka ṭhu a, ka mal chungah ka pawm a, ka kuah hle hle. "Naktuk khua hi var ngai lo se" ka ti sup ringawt. Bawihi ai hian ka hlauhthawng zawkin ka hria. "Hun chelh theihna kan nei miau si lo a tiraw?" a rawn tih ve chuan a ngawngah ka fawp vang vang ringawt.








"Ka nupui i ni hi ka lawm, ka khawvel i ni, ka phu lo hle che tih ka hria mahse, chuti chung chuan ka ta i ni ve duh a, min kalsan ngai miah suh aw" ka tih chuan ka lamah a rawn inher theih nan ka pawmna aṭangin a chhuk a, ka lam a lo hawi rualin ka kuah leh nghal.








"Kan thawnthu hi chu a mak ve alawm," nui sak chung hian a ti a, ka nui ve tho. A tir aṭanga engkim hriaa chhuitu tan chuan kei leh Bawihi nupa kan ni hi thil mak a tling ve a ni. "Keipawh ka natna hre reng chunga i nupui min nihtir avang leh ka nat changa ka kut vuana i awm reng ṭhin avangin ka lawm e, nangmahah hian hahdamna ka hmu asin" a tih chuan insum hman lovin ka fawp a, ani pawhin min chhang rang kher mai.









Zankhuaa fawh mai ka duh, mahse, chu lah thil tih mi a ni bawk si lo. "I taste hi a tui tulh tulh, a ngawl ka vei pawh hi a awm ka ti ṭhin" ka tih chuan a nui hak hak a, nui ri a zawnga hriat hahdamthlak ber a ni.
"Ih maw, min zai zawha thochhuak tur ka lo awm ta lo anih chuan hmalam min lo pansan hmak rawh aw" a tih chuan a hmui ka kharchilh leh hmiah.








Ka thlah hnu chuan "tun hi engkim sawi hun a ni tih i hriatchian ve tho kha" a rawn ti leh a, ka ngawi ngul mai, hmalam pansan tura min tih avang erawhin ka lung a tiawi zan lo. "Jarson hian nu a mamawh dawn a" a sawi zawh hmain "hetah a nu i awm reng alawm" ka ti hmuk. Harhchhuak tawh lo tur anga a ṭawng hi ka duh bau lo.








"Luhlul tlat lo la" tiin ka biang a rawn dawm a, min nuih sen sen. He a nui hmel te hi ka hmuh tawh loh ka hlau ngawih ngawih. "Hmahun kan hre lova, thut thei a nih avangin ka thusawi hi uluk taka ngaithla turin ka duh che" a mitmenga min thunun tlat avangin ka bu ta nge nge.








"Ka harhchhuak leh thei ta lo anih chuan ka sawi ang khan hmalam pan turin ka duh dawn che, keimah avanga na taka awm turin ka duh lo che, i nat chuan ka na ve ṭhin tih i hriat kha. Jarson pawhin nu a mamawh dawn, a len hunah phei chuan nu pawimawhna a hre chho telh telh ang a, nu awt reng renga a awm loh nan tal hmalam i pan a ngai. Min tiam rawh, keimah avangin i tlusawp hlen lovang tih hi, hmalam pan i tum ngei tur a ni" a ti charh charh.







Kei erawhin chhang lovin ka fawp vang vang phawt a, "Bawihi, ka tum thei meuh mai, mahse, ka hlawhtling kherin ka ring lo. Ring lo mai pawh ni lovin ka chiang, chuvang chuan harhchhuah i tum tur a ni. Chutiang ni lova i thawh leh tawh loh chuan Pathian hi ka dem viau ang" ka ti nghut. Ka hmui rawn hupin








"Shttt, chutiang sawi suh, a pawi i sawi ka hlau ber ṭhin, a bikin keimah avangin" a rawn ti a, he a mizia leh rilru ang pu mi hi an awm leh tawh kherin ka ring lo. "Ṭawngṭaina hian thil a ti thei a, ka tan min dilsak la, Pathian khian a chhang mahna" min nuih chung chuan a ti leh a, hahdam taka a awm thei chu lehlam zawng tak chuan ka lawmpui zawk.







"Mu tawh ang aw" ka ti tak daihah chuan ka kuta ka bun mek sana chu a rawn bih a, "a va tlai tawh ve, ka tawn tirh che khan i kianga ka awmin hun kha a tawiin a kalmuang ta riauin ka hre ṭhin. Mahse, tunah chuan ka thlakhlelh vang che nge hun hi ka duh aiin a kal chak" a tih chuan ka nui sup.







A mawnga dawm chungin ka thawhpui a, min lo kherhbet ve nghal bawk. Khum lamah ka penpui pawk pawk a, a hmela hlimna lang reng chuan min ti hahdam ru riau. Khuma ka nghat thla a, a bula ka inthawlh ve chuan min lo kuah nghal sat sat.







Zanlai a ni tawh, min kuah chunga muhil mek hmel ṭha zet chu ka en reng a, a hmel hmu lo hian awm ka zuam lo. Amah tiharh lo ber tur chuan ka ṭhuchhuak a, ka ṭawngṭai ta tawp. Chan ka hlau em a tin ni. Bawihi hi chan ka duh lo. Ka ṭawngṭai zawh chuan hahdamna mak tak hian min rawn tuam a, Bawihi kuah chung chuan ka muhil leh ta a.





________________________





Bawihi damdawiin khuma mu chuan keini chu min nuih seih hlawm a, "Kei ai pawhin in hlauhthawn hmel hlawm zawk alawm" a rawn tih chuan kan han nui ve a, Bawihi bawk chuan "Lalpa kutah ka inngat a, nangni pawhin a thiltihtheihzia in hria tih ka hria, beidawng lova ṭawngṭai ṭhintute ṭawngṭaina a chhan ṭhin kha, ka tan min ṭawngṭaisak rawh u aw" la nui reng chung chuan a ti a, an bu sap sap hlawm a, Bawihi chu an chhuangin an ngaisang ve hle tih ka hria.







Inzai dawn darkar chan ve vel awmah chuan midang chuan min chhuahsan ta dial a, Bawihi chuan a luhkham hnuai hai rak rak chungin "thil kawltir duh che ka nei" a ti a, diary ni awm tak, te ren rawn hi a rawn phawrhchhuak a, ka kuta hmehbelin "min zai zawh hma chuan en miah suh aw" a ti tê te.







"Min zai zawha ka harh anih chuan chhiar miah lovin ka kutah min pe let la, ka harh tak loh erawh chuan i duh dan danin i ti dawn nia" tiin Diary chu a rawn melh zawk a. "I rawn harh leh dawn alawm," tiin a chalah ka fawhsak a, min nuih seih.







"Kei chu harh tawh lo pawh ni ila keimah mimal bik chuan hahdamna a nei, ka hahdam pumhlum theih loh chhan erawh nang i ni" a rawn ti a, nui lui sakin "chutiang anih chuan i harh ngei ngei a ngai dawn anih chu" ka lo ti a, lu a bu nghat nghat.







A kutah ka vuan reng a, a kianga ka awm reng chung pawha hla taka min kalsan tur anga ka ngaihna chuan ka awm a tinuam thei lova, chutiang anga ka ngaih avang chuan keimah leh keimah ngei pawh chu ka inhaw takzet.







Bawihi an zai chuan kan zavaiin ICU kawtah kan awm ṭhap a, a tu a mai pawh mai chuan rilru ṭawngṭaina kan nei ru mawlh mawlhin ka ring. Bawihi'n Diary min pek kha ka hrechhuak a, ka va lak chuan inthiam lo zetin ka hawng ta tawp.








Diary chu a dam loh tirh aṭanga a ziah anih ka ring. A hlauthawng ve hle ṭhin tih ka hriat thar phah a, ka nupui nih te a lo hreh ve em em zel a, ka tana buaina a nih a hlauh ziate a lo ziak ve ṭeuh. Kan inneih hnua a hlim ṭhin zia te a ziak chho zel a, a zawng zawnga chhiar lovin a ṭhen ṭhen ka chhiar thuak thuak.








A natna a pawmthiam tawh dante pawh a lo ziak nual, a natna a chhuah tirhte kha a ziak a nual a, min theinghilh a hlauh zia chu hmun tam takah ka hmu. A hnu chuan a ziah phek tawp ber ka keu ta tawp a, a thuziah ho avang chuan ka hnim ve ruih thei mai.







"Lalpa, min tidam thei a ni tiraw? Nangmahah ka rinna zawng zawng ka nghat a, ka taksa harhchhuak leh tur a awm ta lo anih erawh chuan khawngaihin ka chhungte, ka ,hiante, ka fapa leh a bik takin ka pasal Hmangaihzuala te hi nangin awmpui la, thlamuanna in thuam ang che aw








Hmangaihzuala phei chuan..." tiin ka chanchin vel a ziak ,euh. A chhiar pawh ka chhiar zo lo. Khatiang ang hunah pawh amah ingaihtuah miah lovin keimah chiah maw min ngaihtuah a. Kei hian Bawihi hi ka tawng lo tih ka hlau ngawih ngawih. Ka tan, ka kehchhiat loh nan a theihtawpin Pathian a dil ve chu ania.








Dairy khup mai ka tum a, mahse, ka han keulet leh rih. "Min lo zai hlawhtlin thut chuan ka hriatna ka hloh theihna chance a sang tih ka hre ve a, ka harh ruala ka pasal hmuh hmasak ber ka duh. Ka hming chu Rochhingpuii a ni a, ka pasal chu Hmangaihzuala a ni. Fapa Jarson Hmingmuanzuala ka nei bawk. Ka pasal hi ka tawn tirh aṭang ka atchilh tawh a...." tiin min tawhtirh dan te a lo ziak a.








Diary ka khup dawn tak takah chuan a phek hnuhnung ber, a cover hma ami chiaha chuan "Harh chhuah leh ngei ka duh, ka tum bawk" tih hi lian zetin a lo ziak a, "ka mi hmangaihte tan ka harhchhuah leh a ṭul" tih a hnuaiah a ziak bawk, ka nui suk. Bawihi hian min kalsan thei lovang.




(Story thar Hmangaihna Dik Lo chu zanin aṭangin ka dah ṭan a, khawngaihin min lo chhiarsak ve ṭheuh ru aw)

(Naktukah Final kan tum ang aw)
Show post links
Top



Link:
BBcode:
HTML:
Hide post links
Show post links

Ngaia
Site Admin
Posts: 26470
Joined: April 30th, 2016, 4:07 pm

Unread post by Ngaia » July 7th, 2024, 9:28 pm

Pathlawia (Never Let You Go)
By; Te-i Mrs Ambrose

Chapter 32 (Last Chapter)

(Khawngaihin ka story thar Hmangaihna Dik Lo kha min lo chhiar sak ve theih ru aw)

(ka phone ka thlak a, mizo keyboard kha ka hmang thei tlat lo, in lo hre thiam dawn nia)

Bawihi Diary ka chhiar zawh chuan amah ka mitthla nghal zut zut, doctor ho lah chuan chanchin engmah an rawn nei lo va, Bawihi ka chan ka hlauh avangin a khat tawkin ka hui leh pap thin. "Bawihi, i rawn hahrchhuah leh ngei ngei a ngai ania" ICU lam en pah chuan ka ti a, ka hui leh ringawt.

Darkar khat a liam tep tihah nurse pakhat hi a lo chhuak a, chanchin kan zawh chuan a chhan pawh min chhang lo, a hmanhmawh hmel hle a, min kalsan hnu reiloteah a lo let leh, a hmanhmawh em avangin biak pawh biak hleih theih a ni lo. ICU chhung lamah a lut leh a, keini pawna awm ho ngaihtuahna chu a inan theuh ka ring. Bawihi dinhmun a that hmel vak loh.

Darkar chanve dawn a ral leh hnu chuan Bawihi zaitu doctor ngei kha a lo chhuak a, kan lam a rawn pan chuan kan lo ding suau, Doctor chuan "dam lo dinhmun chu a hlauhawm tawh love, tluang taka zai a ni. Pathian hnenah lawmthu in sawi dawn nia" nui sang chung chuan a ti a, ka hahdam ta! Ka Bawihi chu a tha leh tawh.

"Doctor kan lawm lutuk e" Bawihi pa chuan a ti a, tupawh mai chu kan lawm tlang vek mai. Doctor a kal hnu chuan midang chu an inkuah sap sap a, kei erawh chuan ICU lam chu ka en reng. Bawihi ngei mai chu an rawn nawrchhhak a, a mit la meng lo mah se, ka hlim viau. "Lalpa, ka lawm e" ka ti sup a, Bawihi lam chu ka pan nghal.

Bawihi chu cabin lamah an nawr a, kan zui ve zel. "Engtikah nge a harh theih ang?" Mami, Bawihi thiannu chuan doctor pakhat chu a zawt a, doctor chuan "Naktuk lamah chuan a harh thei tawh mai in ka ring" a ti a, kan zavai mai chuan kan hlim tlang a ni. "Anih Bawihi hian a thluak lama harsatna te tawkin a hriatna a hloh ang em?" ka tih chuan doctor chuan ngui hmel lap hian

"ka hre lo le, mahse, a hriatna hloh theihna chance kha chu in hriat ve ka ring" a ti a, ka bu nghat. Mahse, chumi avang mai maia lungngai tur ka ni lo, Bawihi ka kianga a awm leh theih dawn avanga lawm hle tur ka ni.

Zan lamah Bawihi chu ka riahpui dawn a, zan tir lamah Duati a rawn kal a, Jarson a rawn hruaitel bawk. Jarson chuan a nu khuma mu mek chu en pahin "Apa, ka ama hi eng ngati nge hetianga a awm a?" min tih chuan nuih sakin "kan kianga rei tak a awm theih nan doctor te kha a inzai tir a, a dam leh hunah chuan kan zaitir tawh lovang aw" ka tih chuan a bu lap lap mai.

Rei tak awm lovin Duati leh Jarson chu an haw leh a, Bawihi kut zawi nghiang mai chu vuanin "ka lawm e aw, min kalsan loh avangin" tiin a kut chu ka fawp a, a rawn harh leh hunah chuan kan nun chu a famkim tawh ngei ang. A hma kha chuan hlim mah ila, a natna khan kawng eng emaw chenah kan hlimna a dal a, mahse, tunah erawh chuan natna tel tawh lovin hlim takin kan awm dun tawh ang.

"I diary kha ka lo chhiar a, thinrim suh aw, mahse, kha diary avang khan ka hmangaih zual sauh che" tiin Bawihi muhil mek chu ka be mawlh mawlh a, a diary ka hriatchhuah chuan a diary kha ka phawrh a, thil tlemte ka ziah hnuah ka khup a, naktuk zing ni chhuak hian Bawihi tan eng ni nge a hrechhuahpui ang? Hriatna a hloh ang nge? Engkim a hre vek zawk ang? Mahse, a hriatna lo hloh mah se, a dam hrim hrim hi a lawmawm lutuk tawh hrim hrim.

Zing lama ka harh chuan khua a la var chiang lo, Bawihi kiangah ka awm avangin ka hahdam a, nimin lama min kalsan mai ka hlauh ziate ka ngaihtuah a, ka khi suk. Min kalsan tura ka hlauh em em nu khan min kalsan dawn lo.

Chhun lam a nih pawh chuan Bawihi chu a la harh lo cheu a, midang ho chu an mangang tawh takzet. Doctor ho pawh an buai a, 'a harh a hun tawh asin' an ti leh ngawt thin. Kei erawh Bawihi khum bula thuin engmah ka sawi ve lova, Bawihi kut chu ka hum reng ringawt "Bawihte, min kalsan dawn lo tiraw? I duh hun hunah i harhchhuak dawn nia aw" tiin a chal ka fawhsak a, an zaina avangin a la chau pawh a ni thei alawm.

Darkar chanve dawn kan nghah leh hnu chuan Bawihi chuan a kut chu a rawn chet a, ka lo en nghal thuai, a hnu chuan a rawn meng ta riai riai a, nui sang chungin kan lo en hlawm. "khawiah nge ka awm?" a tih chuan damdawiin a kan la awm thuin ka lo chhang nghal thuai a, min en vang vang chungin "Tu nge i nih?" min tih chuan ka chhung lam a che lawih. "A thleng tur a ni reng alawm" tiin ka inhrilh leh nghal a.

"Bawihi, Hmangaihzuala ka nia, chuan hei hi" tiin a chhungte ho chu ka hrilh hlawm dan dan, mak tih hmel fe chuan mi chu a en hlawm a, keimahniah nâ chu a awm teuh mai mahse, kan nâ hi a natna avanga a dam tak avanga kan hlimna ngaihtuah chuan a neptham lutuk. "Anih tu nge ka nih ve? Bawihi maw?" a tih chuan "keia tan chuan Bawihi i ni. I hming tak erawh Rochhingpuii" tiin ka hrilh leh a, a lu a hiat neuh neuh.

Bawihi chu a tuk lamah damdawiin atangin kan chhuahpui a, engmah hriat a nei lova, a thilhmuh thar apiang chu mak tih hmel tak hian a thlir leh dauh dauh thin. Tunah hian motor ka khalh mek a, a hnung lamah Bawihi leh a thiante pahnih an thu a, midang chu motor dangah an chuang thung.

Bawihi chu darthlalang chhan atangin ka en leh thin a, tumah a hriat miau loh avangin a la tlangnel tak tak lo tih ka hre thei. Bawihi chuan min rawn enin "nang hi ka pasal maw i nih?" a tih chuan ka bu nghat. Rawn nui lui sakin "tinge engmah ka hriat si loh" a rawn tih leh chuan Mami zawkin "I dam lova, an zai avang chein engmah i hre lo anih kha" dam diai hian a ti a, Bawihi chu a bu nghat nghat.

Bawihi chhuah atangin kar khat dawn a ral ta, hmasawnna engmah a awm lova, mahse, a hma ai mah kha chuan mi a nel deuh tawh a, a hahdamthlak ve hrim hrim. A thiante leh chhungte an lo lang deuh reng a, Bawihi tak pawhin a ngaina hle tawh tih ka hria. Kei pawhin Bawihi dam loh laia hna lama ka kal loh atang khan tun thlengin ka la kal leh ta miah lo. In lam atangin hna ka la thawk zawm reng.

Tlai ni tlak dawna pawn corridor a Bawihi ding ngawi reng lam chu ka pan a, a hnung lam atanga kuahin "I va ngaihtuah muk hmel ve" tiin a biang ka fawp zeuh. Ka khawih chang hian awm dan a thiam lovin a chang phei chuan hreawm a ti deuh thin tih ka hria, mahse, ka insum thei ngang thin si lo. Tun tum erawh Bawihi chuan ka kuah rualin min rawn ngheng ve nghal a, a hahdamthlak takzet.

"Ih maw, ka ruak vek a, bawm chhung liat zet, a chhunga engmah awm lo leh thim phui mup hi ka angin ka hria" a rawn ti a, "keiman ka hnawhkhah sak vek ang che, Bawihi theinghilh ngai suh, ka duh lutuk che a, chumi let chuan ka Hmangaih bawk che" ka tih chuan ka lam a rawn hawi a, ka biang a rawn fawp zeuh. Chu thil a tih zawh rual chuan ka awmah hmai a phum nghal a, a zak anih ka ring.

Nghet zetin Bawihi chu ka kuah a, pindan lama ka luhpui hnuin Jarson a rawn tlan lut a, a nu rawn melhin "Ama, ka mu duh a, chuan thawnthu min hrilh la" a hma lama a kut suih chung chuan ti a, Bawihi chuan tha takin "imm, I room lamah kal ang aw, lo kal ve la" tiin min melh nghal a, a sawi te chuan ka kal ve mai a ni ang chu.

Kan kal lai chuan Bawihi'n zawi tein " 'Ama' min tih hian keimahah hian che dawt a awm thin" a ti a, ka nui suk ringawt. Bawihi nen chuan Jarson sir ve veah kan mu a, Bawihi chuan thawnthu bu a chhiarsak a, rei lote hnuah Jarson chu a mu a, Bawihi pawhin a chhiar lai a tawp ve zui mai.

Jarson khumah chuan a tu a mah tawng lovin kan mu reng a, a hnu chuan thochhuakin zawi tein "Bawihi" ka han ti a, min chhang lo reng reng. Bawihi ka en chuan a lo muhil ve reng chu niin. Nui sukin Bawihi chu ka pawm a, kan pindan lam ka panpui nghal. Khuma ka nghah chuan a chal ka fawp zeuh a, thawhsawn mai ka tum laiin Bawihi'n ka kut a lo hum tai a, tho lovin ka tawlhsawntir deuh a, a bulah ka mut rualin ka kuah nghal.

Ani hian min hre tawh lo mah se, ka inhmangaihtir leh thei a lawm. Tuna kan thlen chinah pawh hian ka lawm viau. Chuan inngaizawng tir kan ang chho tawlh tawlh dawn tih ka hria. Bawihi sam chu a benga zehsak chungin "ka hmangaih che" ka ti sup.

Zing lama chuan ka harh chuan Bawihi chu a la muhil reng a, amah chu ka en vang vang. Tunah chuan engmah lungkham lutuk tur a awm tawh lo. Pathian khian phal se, kan pahniha tar kun thlenga dam duna, awm dun ka duh a ni.

Thil hriatchhuah zawk ka nei. Bawihi min chelhna ban chu ka lasawn a, ka tho nghal, Diary kha tun thlengin Bawihi hi ka la pe lo. A tir lamah kha chuan ka pe duh lo lui a, a rei deuh hnua pek ka duh avangin ka pe lo kha ania. Diary chu ka lachhuak a, ka en vang vang.

Bawihi lamah chuan ka let leh a, a bulah ka inthawlh leh nghal, Bawihi a rawn chet tual tual chuan "Morning Bawihi" tiin a hmui ka fawp zeuh. A rawn nui sen sen a, a la meng lo "I thil pek let tur che ka nei a" ka tih chuan a rawn mengchhuak a, "eng thil?" a tih chuan Diary chu ka lek a, a rawn ban rual chuan a en vang vang. "Ka ta maw?" tiin Diary chu a en a, lu ka buk nghat chuan "ka lawm e" tiin a rawn thuchhuak a, diary chu khum sir dawhkana dahin washroom lam a pan a.

Hna ka thawh laiin Bawihi a rawn lang a, "awi, i buai hmel e" tiha let leh mai a tum chuan "Bawihi, lo kal rawh, ka buai lo" ka ti a, ka lam a lo pan chuan a bana chelhin ka mal chungah ka thuttir nghal a, "I tan chuan ka buai ngai lo" ka ti sup. Rawn nuiin " I inlazei anih chu" min tih chuan ka nuichhuak hawk hawk. A lai tih ka hria, a dara khabe nghah pahin "I kiangah chiah zei ka tum" ka tih leh a, a tawng tawh lo.

Rei lote hnuah Bawihi chuan "Diary kha ka chhiar a, nang hi ka first love maw i nih? I lo ziak chawp te hi a ni lo maw?" a tih chuan nui hawkin "nangmah ziah ngei a ni e" ka ti a, ka pawmna atanga chhuk thlain "ka awi lo reuh e a" a tih chuan "I awi duh leh duh loh chu i thu alawm" ka ti hmuk. Bawihi chu a ngawi deuh vang vang a, kei pawhin ka hna ka thawh chhunzawm nghal bawk.

Kawngka inkhar thawm ka hriatchhuah chuan ka hawichhuak a, Bawihi a lo awm tawh hauh lo. Ka inthiam lo nghal, khatianga awm khum tur kha ka ni lo. Ka laptop chu khupin ka hnathawhna office bik atang chuan ka chhuak a, Bawihi chu pindan lama a awm ringin pindan lam chu ka pan a, mahse, a lo awm hauh lo. Ka zawngkual nghal vat. Eng vanga khatia tihthauh khum mai mai nge maw ka nih le?

Arini hnenah chuan "Bawihi kha i lo hmu em?" ka tih chuan "aw, pawn lamah khan a chhuak a" a rawn ti a, hmanhmawh zetin pawn lamah chuan ka chhuak nghal. Bawihi lah chu ka hmu mai lo. Ka tihngaihna hre lo chuan ka au ta vak. Khawiah nge maw a lo awm le? "I â anih kha" keimah leh keimah chu ka inti leh ngawt thin.

Gate pawn lamah a chhuak a nih ringin gate chu ka hawng a, ka penchhuah dawn chuan "hetah ka awm" Bawihi aw ngei chuan ka hnung lam atangin a rawn ti a, ka lehhawi chuan Bawihi chu ka hmu nghal. Rang zeta a lam panin ka kuah a, "khawiah nge i lo awm char char, ka ngaihtuah lutuk che" ka tih chuan zawi sapin "in hnung lamah ka awm alawm" a rawn ti a, a mit taka a ka en theih nan Bawihi chu ka kuahna atangin ka thlah a, ka nawr hla deuh bawk.

"Tihpalh lutuk, khatianga ti tur che kha ka ni lo, thinrim suh aw" tiin a chalah ka chal ka nghat a, mit chhingin ka thaw ham ham. "Ka thinrim lo, hreawm ka ti zawk a" a tih chuan "Tihpalh, tihhreawm che ka duh ngai lo, tihpalh lutuk aw" ka ti leh sup. "Nangmah vang a ni lo. Keimah zawk alawm, i thin ka tirim sia, hreawm ka lo ti deuh a, ngaihdam dil che lah kha ka ngam lova" a tih chuan "Mi â nu" tiin ka fawp ringawt.

"I thinrim khan hreawm ka tia lawm" a tih chuan "ka thinrim lo, ka lungawi lo hlek chauh alawm, ka lakah inthlahrung ngai suh englai mahin" ka ti a, a rawn thaw huai reuh. "Mak deuh chu maw, i thinrim emaw ka tih khan helai hi a nâ veng veng a" tiin a awm a dawm a, a chang chuan Bawihi hian min hria emaw ka ti leh thut thin.

Thla thum a ral ta, tunah chuan Bawihi pawhin eng damdawi mah a ei a ngai tawh lo. Kan inpawh em em a, kan hlim a ni. Ani hi ka hlimna a ni a, ka engkim a ni ti pawh ni ila ka sawisual hnem lutuk awm love.

Kan inneih cham a ni a, Bawihi chu surprise ka duh. Jarson chu a ni Rinfeli te in lamah a riak dawn a, kei leh Bawihi chauh kan awm dawn. Bawihi thiante hnenah chuan Bawihi chu len chhuahpuia sawm turin ka ti a, ka sawi ang chuan Bawihi chu an rawn sawm a, Bawihi'n min râwn chuan 'aw' tiin ka lo chhang a, a thiante nen chuan an chhuak a. Amah surprise na tur ka buaipui nghal mawlh mawlh.

Thim hnuah Bawihi te chu an lo haw a, ka duh dan chhiah. A thiante an rawn lut ve lova, Bawihi a rawn luh rual chuan "Happy 6th Monthsary" tiin a biang ka fawp a, "kan inneih atang thla ruk a ral tawh maw?" a tih chuan ka bu nghat a, dawhkan lam ka panpui nghal bawk.

Bawihi chuan nui sen sen chungin "a mawi lutuk" a ti hliai. Kan pahnih chuan zanriah kan kil dun a, kan inneih atang thla ruk a lo liam ve ta reng mai. Zanriah kan ei zawh chuan Bawihi lam ka pan a, a tana a bik taka ka siamtir thi chu ka awrhtir a, "a nalh lutuk ka lawm e aw, mahse, ka lo hre ve si lova, engmah i ta tur ka nei ve lo" a tih chuan "nangmah hi ka tana gift tha ber chu i ni" ka ti a, a rawn nui leh sen sen.

"Bawihi, min hmangaih ve em?" ka tih chuan "a zahthlak e a" a ti daih anih chu! Engtia dawnsawn tur nge ka hre hauh lo. "Ih, ka hmangaih che chuan ka hria" a tih chuan rang zetin ka pawm kâng a, ka virpui chiam. "Ka hmangaih che, ka hmangaih lutuk che Bawihi" ka nghahthlak ruala tiin a hmuiah ka fawp vang vang.

Ka thlah hnu chuan "thil ka hrilh che ang a, nui miah suh aw" a tih chuan lu ka bu nghat. "Damdawi ina ka harh ruala ka hmuh che khan chhe lo ka ti lutuk che a" a tih chuan ka nuichhuak hawk hawk. " I sual emai" tiin Bawihi chu a hawisawn hmak. "Tihpalh Bawihi, ka lawm lutuk vang zawk a nia" ka tih chuan ka lama lo hawiin "dawt nge a tak tak?" a ti a "tak tak" tiin ka fawp leh.

"I ngawl ka vei pawh hi a awm ka la ti reng" ka tih chuan Bawihi mitmeng a rawn danglam zawk. "kha thil kha i sawi vawikhatna a ni em?" a tih chuan lu ka thing. Chutah Bawihi chuan hmanhmawh zetin kan room lam a pan a, a lo let leh lam chuan Diary kha a rawn keng vang.

Diary chu a keu a, a chhiar mawlh mawlh, a phek tawp bera a ziah kha a keu a, a mittui a rawn luang a, "ka hmangaih te tana ka harchhuah leh a tul" a ti sap. Chutah min rawn enin a nui a, "in tan" a rawn tih chuan ka lo kuah nghal. "Pathian that zia hi, Hmangaihzual ka hmangaih che" a rawn ti tiau a, ka lawm takzet. A mitmeng atang khan engkim ka hre vek.

"Mi nghal pa, ka diary kha i chhiar ka phal hleinem, min zai hma pawhin ka chah che" a tih chuan "Sorry" ka ti sup ringawt. "Ka Hmangaih Che Bawihi, I paltlang ta," ka thilziah kha a rawn sawi chhawng. "Ni e, Bawihi, inzai i paltlang a, kan tan i harhchhuak leh ta bawk, ka hmangaih che" tiin ka kuaidak a, ka fawp vang vang.

"Kan chhungte bia ang" a ti a, midang kan be nghal zung zung. He thu lawmawm lutuk avang hian midang zawng pawh an hlim tih ka hria. Ka Bawihi'n engkim a hre leh vek tawh.

Bawihi chuan "kan pahniha inkar hi a mak tiraw? A tir tê atang khan mak ka ka la ti reng" a tih chuan ka khi suk. Bawihi chu ka pawm a, min ngheng ar ar chungin amah bawk chuan "Keini pahnih hi vawihnih kan ni mai lo maw?" a tih chuan "timaw?" ka lo ti a, ka lama rawn inherin "ngaihtuah chiang la,

ka vawkhat tawnnaah che kha chuan mi pâ i ni, a vawihnihnaah erawh ka ta i nih theihna chance rawn awmin mi pa i ni tawh lova, i offer kha a vawihnihnaah ka pawm. Chuan min duhthu i sawi khan a nihnihnaah ka chhang let che a
vawihnih kan inhual a, mi pakhat ni si kha vawihnih ka hmangaih nawn che... engkim vawihnih vek anih chu" a tih chuan ka nuichhuak hawk hawk.

"I sawi dik" ka ti a, kan pahnih chuan inenin kan nui dun a, "Vawihnih chauh tiin tunah leh kumkhuain ti mai ang aw" ka tih chuan nui chungin a rawn bu nghat nghat. "tinge kan fapa i tirhbo kher, ka ngai asin, va lam ang" a tih chuan lu thing nghut nghut chungin "Ai, zanin chu ka pumbilh dawn che, kan fa tur kan siam ang, phir" ka tih chuan za zet hian a nui a, ka pawmkang rualin min kherhbet ve nghal a, ka beng bula sawi si, nghal ru zet chuan "phir siam chu i thiam ang maw?" a ti sar sar. "Dawn lawm ni. Pahnih an ngai miau," ka ti ve a, zawi sapin "ka hmangaih ber che" ka ti a, "kei pawhin ka hmangaih ber che" a rawn ti let ve a.


A TAWP TA



(Story chu a lo tawp ta reng mai, ka story eng teh ual mah a nih loh vei nen, comment duhawm tak min hnutchhiah sak thin a, in lo ngaina der ve a ka lawm hle a ni. A tir atanga min lo chhiarsak thintute chungah thinlung leh tihtakzetin lawmthu ka sawi mawlh mawlh e. )
Show post links
Top

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)